৪. জম্বুখাদকসংযুত্তং
১. নিব্বানপঞ্হাসুত্তং
৩১৪. একং সমযং আযস্মা সারিপুত্তো মগধেসু ৰিহরতি নালকগামকে। অথ খো জম্বুখাদকো পরিব্বাজকো যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো জম্বুখাদকো পরিব্বাজকো আযস্মন্তং সারিপুত্তং এতদৰোচ –
‘‘‘নিব্বানং, নিব্বান’ন্তি, আৰুসো সারিপুত্ত, ৰুচ্চতি। কতমং নু খো, আৰুসো, নিব্বান’’ন্তি? ‘‘যো খো, আৰুসো, রাগক্খযো দোসক্খযো মোহক্খযো – ইদং ৰুচ্চতি নিব্বান’’ন্তি। ‘‘অত্থি পনাৰুসো, মগ্গো অত্থি পটিপদা এতস্স নিব্বানস্স সচ্ছিকিরিযাযা’’তি? ‘‘অত্থি খো, আৰুসো, মগ্গো অত্থি পটিপদা এতস্স নিব্বানস্স সচ্ছিকিরিযাযা’’তি। ‘‘কতমো পনাৰুসো, মগ্গো কতমা পটিপদা এতস্স নিব্বানস্স সচ্ছিকিরিযাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো এতস্স নিব্বানস্স সচ্ছিকিরিযায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা এতস্স নিব্বানস্স সচ্ছিকিরিযাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা এতস্স নিব্বানস্স সচ্ছিকিরিযায। অলঞ্চ পনাৰুসো সারিপুত্ত, অপ্পমাদাযা’’তি। পঠমং।
২. অরহত্তপঞ্হাসুত্তং
৩১৫. ‘‘‘অরহত্তং, অরহত্ত’ন্তি, আৰুসো সারিপুত্ত, ৰুচ্চতি। কতমং নু খো, আৰুসো , অরহত্ত’’ন্তি? ‘‘যো খো, আৰুসো, রাগক্খযো দোসক্খযো মোহক্খযো – ইদং ৰুচ্চতি অরহত্ত’’ন্তি। ‘‘অত্থি পনাৰুসো, মগ্গো অত্থি পটিপদা এতস্স অরহত্তস্স সচ্ছিকিরিযাযা’’তি? ‘‘অত্থি খো, আৰুসো, মগ্গো অত্থি পটিপদা এতস্স অরহত্তস্স সচ্ছিকিরিযাযা’’তি। ‘‘কতমো পনাৰুসো, মগ্গো কতমা পটিপদা এতস্স অরহত্তস্স সচ্ছিকিরিযাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো এতস্স অরহত্তস্স সচ্ছিকিরিযায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো আৰুসো, মগ্গো, অযং পটিপদা এতস্স অরহত্তস্স সচ্ছিকিরিযাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা এতস্স অরহত্তস্স সচ্ছিকিরিযায। অলঞ্চ পনাৰুসো সারিপুত্ত, অপ্পমাদাযা’’তি। দুতিযং।
৩. ধম্মৰাদীপঞ্হাসুত্তং
৩১৬. ‘‘কে নু খো, আৰুসো সারিপুত্ত, লোকে ধম্মৰাদিনো, কে লোকে সুপ্পটিপন্না, কে লোকে সুগতা’’তি? ‘‘যে খো, আৰুসো, রাগপ্পহানায ধম্মং দেসেন্তি, দোসপ্পহানায ধম্মং দেসেন্তি, মোহপ্পহানায ধম্মং দেসেন্তি, তে লোকে ধম্মৰাদিনো। যে খো, আৰুসো, রাগস্স পহানায পটিপন্না, দোসস্স পহানায পটিপন্না, মোহস্স পহানায পটিপন্না, তে লোকে সুপ্পটিপন্না। যেসং খো, আৰুসো, রাগো পহীনো উচ্ছিন্নমূলো তালাৰত্থুকতো অনভাৰঙ্কতো আযতিং অনুপ্পাদধম্মো, দোসো পহীনো উচ্ছিন্নমূলো তালাৰত্থুকতো অনভাৰঙ্কতো আযতিং অনুপ্পাদধম্মো, মোহো পহীনো উচ্ছিন্নমূলো তালাৰত্থুকতো অনভাৰঙ্কতো আযতিং অনুপ্পাদধম্মো, তে লোকে সুগতা’’তি।
‘‘অত্থি পনাৰুসো, মগ্গো অত্থি পটিপদা এতস্স রাগস্স দোসস্স মোহস্স পহানাযা’’তি? ‘‘অত্থি খো, আৰুসো, মগ্গো অত্থি পটিপদা এতস্স রাগস্স দোসস্স মোহস্স পহানাযা’’তি। ‘‘কতমো, পনাৰুসো, মগ্গো কতমা পটিপদা এতস্স রাগস্স দোসস্স মোহস্স পহানাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো এতস্স রাগস্স দোসস্স মোহস্স পহানায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা এতস্স রাগস্স দোসস্স মোহস্স পহানাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা, এতস্স রাগস্স দোসস্স মোহস্স পহানায। অলঞ্চ পনাৰুসো সারিপুত্ত, অপ্পমাদাযা’’তি। ততিযং।
৪. কিমত্থিযসুত্তং
৩১৭. ‘‘কিমত্থিযং , আৰুসো সারিপুত্ত, সমণে গোতমে ব্রহ্মচরিযং ৰুস্সতী’’তি? ‘‘দুক্খস্স খো, আৰুসো, পরিঞ্ঞত্থং ভগৰতি ব্রহ্মচরিযং ৰুস্সতী’’তি। ‘‘অত্থি পনাৰুসো, মগ্গো অত্থি পটিপদা এতস্স দুক্খস্স পরিঞ্ঞাযা’’তি? ‘‘অত্থি খো, আৰুসো, মগ্গো অত্থি পটিপদা, এতস্স দুক্খস্স পরিঞ্ঞাযা’’তি? ‘‘কতমো পনাৰুসো, মগ্গো কতমা পটিপদা, এতস্স দুক্খস্স পরিঞ্ঞাযা’’তি?
‘‘অযমেৰ খো, আৰুসো, অরিযো অট্ঠঙ্গিকো মগ্গো, এতস্স দুক্খস্স পরিঞ্ঞায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা এতস্স দুক্খস্স পরিঞ্ঞাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা, এতস্স দুক্খস্স পরিঞ্ঞায। অলঞ্চ পনাৰুসো সারিপুত্ত, অপ্পমাদাযা’’তি। চতুত্থং।
৫. অস্সাসপ্পত্তসুত্তং
৩১৮. ‘‘‘অস্সাসপ্পত্তো, অস্সাসপ্পত্তো’তি, আৰুসো সারিপুত্ত, ৰুচ্চতি। কিত্তাৰতা নু খো, আৰুসো, অস্সাসপ্পত্তো হোতী’’তি? ‘‘যতো খো, আৰুসো, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং পজানাতি, এত্তাৰতা খো, আৰুসো, অস্সাসপ্পত্তো হোতী’’তি। ‘‘অত্থি পনাৰুসো, মগ্গো অত্থি পটিপদা, এতস্স অস্সাসস্স সচ্ছিকিরিযাযা’’তি? ‘‘অত্থি খো, আৰুসো, মগ্গো অত্থি পটিপদা, এতস্স অস্সাসস্স সচ্ছিকিরিযাযা’’তি। ‘‘কতমো পনাৰুসো, মগ্গো কতমা পটিপদা, এতস্স অস্সাসস্স সচ্ছিকিরিযাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো এতস্স অস্সাসস্স সচ্ছিকিরিযায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো , মগ্গো অযং পটিপদা, এতস্স অস্সাসস্স সচ্ছিকিরিযাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা, এতস্স অস্সাসস্স সচ্ছিকিরিযায। অলঞ্চ পনাৰুসো সারিপুত্ত, অপ্পমাদাযা’’তি। পঞ্চমং।
৬. পরমস্সাসপ্পত্তসুত্তং
৩১৯. ‘‘‘পরমস্সাসপ্পত্তো, পরমস্সাসপ্পত্তো’তি, আৰুসো সারিপুত্ত, ৰুচ্চতি। কিত্তাৰতা নু খো, আৰুসো, পরমস্সাসপ্পত্তো হোতী’’তি? ‘‘যতো খো, আৰুসো, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং ৰিদিত্ৰা অনুপাদাৰিমুত্তো হোতি, এত্তাৰতা খো, আৰুসো, পরমস্সাসপ্পত্তো হোতী’’তি। ‘‘অত্থি পনাৰুসো, মগ্গো অত্থি পটিপদা, এতস্স পরমস্সাসস্স সচ্ছিকিরিযাযা’’তি? ‘‘অত্থি খো, আৰুসো, মগ্গো অত্থি পটিপদা, এতস্স পরমস্সাসস্স সচ্ছিকিরিযাযা’’তি। ‘‘কতমো পন, আৰুসো, মগ্গো কতমা পটিপদা, এতস্স পরমস্সাসস্স সচ্ছিকিরিযাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো এতস্স পরমস্সাসস্স সচ্ছিকিরিযায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা, এতস্স পরমস্সাসস্স সচ্ছিকিরিযাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা, এতস্স পরমস্সাসস্স সচ্ছিকিরিযায। অলঞ্চ পনাৰুসো সারিপুত্ত, অপ্পমাদাযা’’তি। ছট্ঠং।
৭. ৰেদনাপঞ্হাসুত্তং
৩২০. ‘‘‘ৰেদনা, ৰেদনা’তি, আৰুসো সারিপুত্ত, ৰুচ্চতি। কতমা নু খো, আৰুসো, ৰেদনা’’তি? ‘‘তিস্সো ইমাৰুসো, ৰেদনা। কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা – ইমা খো, আৰুসো, তিস্সো ৰেদনা’’তি। ‘‘অত্থি পনাৰুসো, মগ্গো অত্থি পটিপদা, এতাসং তিস্সন্নং ৰেদনানং পরিঞ্ঞাযা’’তি? ‘‘অত্থি খো, আৰুসো, মগ্গো অত্থি পটিপদা, এতাসং তিস্সন্নং ৰেদনানং পরিঞ্ঞাযা’’তি। ‘‘কতমো পনাৰুসো, মগ্গো কতমা পটিপদা, এতাসং তিস্সন্নং ৰেদনানং পরিঞ্ঞাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো, এতাসং তিস্সন্নং ৰেদনানং পরিঞ্ঞায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা, এতাসং তিস্সন্নং ৰেদনানং পরিঞ্ঞাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা, এতাসং তিস্সন্নং ৰেদনানং পরিঞ্ঞায। অলঞ্চ পনাৰুসো সারিপুত্ত, অপ্পমাদাযা’’তি। সত্তমং।
৮. আসৰপঞ্হাসুত্তং
৩২১. ‘‘‘আসৰো , আসৰো’তি, আৰুসো সারিপুত্ত, ৰুচ্চতি। কতমো নু খো, আৰুসো, আসৰো’’তি? ‘‘তযো মে, আৰুসো, আসৰা । কামাসৰো, ভৰাসৰো, অৰিজ্জাসৰো – ইমে খো, আৰুসো, তযো আসৰা’’তি। ‘‘অত্থি পনাৰুসো, মগ্গো অত্থি পটিপদা এতেসং আসৰানং পহানাযা’’তি? ‘‘অত্থি খো, আৰুসো, মগ্গো অত্থি পটিপদা এতেসং আসৰানং পহানাযা’’তি। ‘‘কতমো পনাৰুসো, মগ্গো কতমা পটিপদা এতেসং আসৰানং পহানাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো এতেসং আসৰানং পহানায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা, এতেসং আসৰানং পহানাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা, এতেসং আসৰানং পহানায। অলঞ্চ পনাৰুসো সারিপুত্ত, অপ্পমাদাযা’’তি। অট্ঠমং।
৯. অৰিজ্জাপঞ্হাসুত্তং
৩২২. ‘‘‘অৰিজ্জা, অৰিজ্জা’তি, আৰুসো সারিপুত্ত, ৰুচ্চতি। কতমা নু খো, আৰুসো, অৰিজ্জা’’তি? ‘‘যং খো, আৰুসো, দুক্খে অঞ্ঞাণং, দুক্খসমুদযে অঞ্ঞাণং, দুক্খনিরোধে অঞ্ঞাণং, দুক্খনিরোধগামিনিযা পটিপদায অঞ্ঞাণং – অযং ৰুচ্চতাৰুসো, অৰিজ্জা’’তি। ‘‘অত্থি পনাৰুসো, মগ্গো অত্থি পটিপদা, এতিস্সা অৰিজ্জায পহানাযা’’তি? ‘‘অত্থি খো, আৰুসো, মগ্গো অত্থি পটিপদা, এতিস্সা অৰিজ্জায পহানাযা’’তি। ‘‘কতমো পনাৰুসো, মগ্গো কতমা পটিপদা, এতিস্সা অৰিজ্জায পহানাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো, এতিস্সা অৰিজ্জায পহানায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা, এতিস্সা অৰিজ্জায পহানাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা, এতিস্সা অৰিজ্জায পহানায। অলঞ্চ পনাৰুসো সারিপুত্ত, অপ্পমাদাযা’’তি। নৰমং।
১০. তণ্হাপঞ্হাসুত্তং
৩২৩. ‘‘‘তণ্হা, তণ্হা’তি, আৰুসো সারিপুত্ত, ৰুচ্চতি। কতমা নু খো, আৰুসো, তণ্হা’’তি? ‘‘তিস্সো ইমা, আৰুসো, তণ্হা। কামতণ্হা, ভৰতণ্হা, ৰিভৰতণ্হা – ইমা খো, আৰুসো, তিস্সো তণ্হা’’তি। ‘‘অত্থি পনাৰুসো, মগ্গো অত্থি পটিপদা, এতাসং তণ্হানং পহানাযা’’তি? ‘‘অত্থি খো, আৰুসো, মগ্গো অত্থি পটিপদা, এতাসং তণ্হানং পহানাযা’’তি। ‘‘কতমো পনাৰুসো, মগ্গো কতমা পটিপদা, এতাসং তণ্হানং পহানাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো, এতাসং তণ্হানং পহানায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা, এতাসং তণ্হানং পহানাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা , এতাসং তণ্হানং পহানায। অলঞ্চ পনাৰুসো সারিপুত্ত, অপ্পমাদাযা’’তি। দসমং।
১১. ওঘপঞ্হাসুত্তং
৩২৪. ‘‘‘ওঘো, ওঘো’তি, আৰুসো সারিপুত্ত, ৰুচ্চতি। কতমো নু খো, আৰুসো, ওঘো’’তি? ‘‘চত্তারোমে, আৰুসো, ওঘা। কামোঘো, ভৰোঘো, দিট্ঠোঘো, অৰিজ্জোঘো – ইমে খো, আৰুসো, চত্তারো ওঘা’’তি। ‘‘অত্থি পনাৰুসো, মগ্গো অত্থি পটিপদা, এতেসং ওঘানং পহানাযা’’তি? ‘‘অত্থি খো, আৰুসো, মগ্গো অত্থি পটিপদা, এতেসং ওঘানং পহানাযা’’তি। ‘‘কতমো পনাৰুসো, মগ্গো কতমা পটিপদা, এতেসং ওঘানং পহানাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো, এতেসং ওঘানং পহানায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি । অযং খো, আৰুসো, মগ্গো অযং পটিপদা, এতেসং ওঘানং পহানাযা’’তি। ‘‘ভদ্দকো , আৰুসো, মগ্গো ভদ্দিকা পটিপদা, এতেসং ওঘানং পহানায। অলঞ্চ পনাৰুসো সারিপুত্ত, অপ্পমাদাযা’’তি। একাদসমং।
১২. উপাদানপঞ্হাসুত্তং
৩২৫. ‘‘‘উপাদানং, উপাদান’ন্তি, আৰুসো সারিপুত্ত, ৰুচ্চতি। কতমং নু খো, আৰুসো, উপাদান’’ন্তি? ‘‘চত্তারিমানি, আৰুসো, উপাদানানি। কামুপাদানং, দিট্ঠুপাদানং সীলব্বতুপাদানং, অত্তৰাদুপাদানং – ইমানি খো, আৰুসো, চত্তারি উপাদানানী’’তি। ‘‘অত্থি পনাৰুসো, মগ্গো অত্থি পটিপদা, এতেসং উপাদানানং পহানাযা’’তি? ‘‘অত্থি খো, আৰুসো, মগ্গো অত্থি পটিপদা, এতেসং উপাদানানং পহানাযা’’তি । ‘‘কতমো পনাৰুসো, মগ্গো কতমা পটিপদা, এতেসং উপাদানানং পহানাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো, এতেসং উপাদানানং পহানায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা, এতেসং উপাদানানং পহানাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা, এতেসং উপাদানানং পহানায। অলঞ্চ পনাৰুসো সারিপুত্ত, অপ্পমাদাযা’’তি। দ্ৰাদসমং।
১৩. ভৰপঞ্হাসুত্তং
৩২৬. ‘‘‘ভৰো, ভৰো’তি, আৰুসো সারিপুত্ত, ৰুচ্চতি। কতমো নু খো, আৰুসো, ভৰো’’তি? ‘‘তযো মে, আৰুসো, ভৰা। কামভৰো, রূপভৰো, অরূপভৰো – ইমে খো, আৰুসো, তযো ভৰা’’তি। ‘‘অত্থি পনাৰুসো, মগ্গো অত্থি পটিপদা, এতেসং ভৰানং পরিঞ্ঞাযা’’তি? ‘‘অত্থি খো, আৰুসো, মগ্গো অত্থি পটিপদা, এতেসং ভৰানং পরিঞ্ঞাযা’’তি। ‘‘কতমো, পনাৰুসো, মগ্গো কতমা পটিপদা, এতেসং ভৰানং পরিঞ্ঞাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো, এতেসং ভৰানং পরিঞ্ঞায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা, এতেসং ভৰানং পরিঞ্ঞাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা, এতেসং ভৰানং পরিঞ্ঞায। অলঞ্চ পনাৰুসো সারিপুত্ত, অপ্পমাদাযা’’তি। তেরসমং।
১৪. দুক্খপঞ্হাসুত্তং
৩২৭. ‘‘‘দুক্খং , দুক্খ’ন্তি, আৰুসো সারিপুত্ত, ৰুচ্চতি। কতমং নু খো, আৰুসো, দুক্খ’’ন্তি? ‘‘তিস্সো ইমা, আৰুসো, দুক্খতা। দুক্খদুক্খতা, সঙ্খারদুক্খতা , ৰিপরিণামদুক্খতা – ইমা খো, আৰুসো, তিস্সো দুক্খতা’’তি। ‘‘অত্থি পনাৰুসো মগ্গো অত্থি পটিপদা, এতাসং দুক্খতানং পরিঞ্ঞাযা’’তি? ‘‘অত্থি খো, আৰুসো, মগ্গো অত্থি পটিপদা, এতাসং দুক্খতানং পরিঞ্ঞাযা’’তি। ‘‘কতমো পনাৰুসো, মগ্গো কতমা পটিপদা, এতাসং দুক্খতানং পরিঞ্ঞাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো, এতাসং দুক্খতানং পরিঞ্ঞায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা, এতাসং দুক্খতানং পরিঞ্ঞাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা, এতাসং দুক্খতানং পরিঞ্ঞায। অলঞ্চ পনাৰুসো সারিপুত্ত, অপ্পমাদাযা’’তি। চুদ্দসমং।
১৫. সক্কাযপঞ্হাসুত্তং
৩২৮. ‘‘‘সক্কাযো , সক্কাযো’তি, আৰুসো সারিপুত্ত, ৰুচ্চতি। কতমো নু খো, আৰুসো, সক্কাযো’’তি? ‘‘পঞ্চিমে, আৰুসো, উপাদানক্খন্ধা সক্কাযো ৰুত্তো ভগৰতা, সেয্যথিদং – রূপুপাদানক্খন্ধো, ৰেদনুপাদানক্খন্ধো, সঞ্ঞুপাদানক্খন্ধো, সঙ্খারুপাদানক্খন্ধো, ৰিঞ্ঞাণুপাদানক্খন্ধো । ইমে খো, আৰুসো, পঞ্চুপাদানক্খন্ধা সক্কাযো ৰুত্তো ভগৰতা’’তি। ‘‘অত্থি পনাৰুসো, মগ্গো অত্থি পটিপদা, এতস্স সক্কাযস্স পরিঞ্ঞাযা’’তি? ‘‘অত্থি খো, আৰুসো, মগ্গো অত্থি পটিপদা, এতস্স সক্কাযস্স পরিঞ্ঞাযা’’তি। ‘‘কতমো পনাৰুসো, মগ্গো কতমা পটিপদা, এতস্স সক্কাযস্স পরিঞ্ঞাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো, এতস্স সক্কাযস্স পরিঞ্ঞায , সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি। অযং খো, আৰুসো, মগ্গো অযং পটিপদা, এতস্স সক্কাযস্স পরিঞ্ঞাযা’’তি। ‘‘ভদ্দকো, আৰুসো, মগ্গো ভদ্দিকা পটিপদা, এতস্স সক্কাযস্স পরিঞ্ঞায। অলঞ্চ পনাৰুসো সারিপুত্ত, অপ্পমাদাযা’’তি। পন্নরসমং।
১৬. দুক্করপঞ্হাসুত্তং
৩২৯. ‘‘কিং নু খো, আৰুসো সারিপুত্ত, ইমস্মিং ধম্মৰিনযে দুক্কর’’ন্তি? ‘‘পব্বজ্জা খো, আৰুসো, ইমস্মিং ধম্মৰিনযে দুক্করা’’তি। ‘‘পব্বজিতেন পনাৰুসো, কিং দুক্কর’’ন্তি? ‘‘পব্বজিতেন খো, আৰুসো, অভিরতি দুক্করা’’তি। ‘‘অভিরতেন পনাৰুসো, কিং দুক্কর’’ন্তি? ‘‘অভিরতেন খো, আৰুসো, ধম্মানুধম্মপ্পটিপত্তি দুক্করা’’তি। ‘‘কীৰচিরং পনাৰুসো, ধম্মানুধম্মপ্পটিপন্নো ভিক্খু অরহং অস্সা’’তি? ‘‘নচিরং, আৰুসো’’তি। সোল়সমং।
জম্বুখাদকসংযুত্তং সমত্তং।
তস্সুদ্দানং –
নিব্বানং অরহত্তঞ্চ, ধম্মৰাদী কিমত্থিযং।
অস্সাসো পরমস্সাসো, ৰেদনা আসৰাৰিজ্জা।
তণ্হা ওঘা উপাদানং, ভৰো দুক্খঞ্চ সক্কাযো॥
ইমস্মিং ধম্মৰিনযে দুক্করন্তি॥