(১৩) ৩. দানৰগ্গৰণ্ণনা
১৪২. ততিযস্স দানানীতি দিয্যনকৰসেন দানানি, দেয্যধম্মস্সেতং নামং। সৰত্থুকা ৰা চেতনা দানং, সম্পত্তিপরিচ্চাগস্সেতং নামং। আমিসদানন্তি চত্তারো পচ্চযা দিয্যনকৰসেন আমিসদানং নাম। ধম্মদানন্তি ইধেকচ্চো অমতপত্তিপটিপদং কথেত্ৰা দেতি, ইদং ধম্মদানং নাম।
১৪৩. দুতিযে যাগো নাম ধম্মোপি যজনকৰসেন যাগোতি ৰেদিতব্বো।
১৪৪. ততিযে আমিসস্স চজনং আমিসচাগো, ধম্মস্স চজনং ধম্মচাগো। চতুত্থে উপসগ্গমত্তং ৰিসেসো।
১৪৬. পঞ্চমে চতুন্নং পচ্চযানং ভুঞ্জনং আমিসভোগো, ধম্মস্স ভুঞ্জনং ধম্মভোগো। ছট্ঠে উপসগ্গমত্তং ৰিসেসো।
১৪৮. সত্তমে চতুন্নং পচ্চযানং সংৰিভজনং আমিসসংৰিভাগো, ধম্মস্স সংৰিভজনং ধম্মসংৰিভাগো।
১৪৯. অট্ঠমে চতূহি পচ্চযেহি সঙ্গহো আমিসসঙ্গহো, ধম্মেন সঙ্গহো ধম্মসঙ্গহো।
১৫০. নৰমে আমিসানুগ্গহো, ধম্মেন অনুগ্গণ্হনং ধম্মানুগ্গহো।
১৫১. দসমে চতূহি পচ্চযেহি অনুকম্পনং আমিসানুকম্পা, ধম্মেন অনুকম্পনং ধম্মানুকম্পাতি।
দানৰগ্গো ততিযো।