(১৫) ৫. মঙ্গলৰগ্গো
১-৯. অকুসলসুত্তাদিৰণ্ণনা
১৪৭-১৫৫. পঞ্চমস্স যথাভতং নিক্খিত্তোতি যথা আনেত্ৰা ঠপিতো। দুতিযে সাৰজ্জেনাতি সদোসেন। ততিযে ৰিসমেনাতি সপক্খলনেন। সমেনাতি অপক্খলনেন। চতুত্থে অসুচিনাতি গূথসদিসেন অপরিসুদ্ধেন অমেজ্ঝেন। সুচিনাতি পরিসুদ্ধেন মেজ্ঝেন। পঞ্চমাদীনি উত্তানানেৰ।
১০. পুব্বণ্হসুত্তৰণ্ণনা
১৫৬. দসমে সুনক্খত্তন্তিআদীসু যস্মিং দিৰসে তযো সুচরিতধম্মা পূরিতা হোন্তি, সো দিৰসো লদ্ধনক্খত্তযোগো নাম, তেনস্স সদা সুনক্খত্তং নাম হোতীতি ৰুচ্চতি। স্ৰেৰ দিৰসো কতমঙ্গলো নাম হোতি, তেনস্স সদা সুমঙ্গলন্তি ৰুচ্চতি। পভাতম্পিস্স সদা সুপ্পভাতমেৰ, সযনতো উট্ঠানম্পি সুহুট্ঠিতমেৰ, খণোপি সুক্খণোৰ, মুহুত্তোপি সুমুহুত্তোৰ। এত্থ চ দসচ্ছরপমাণো সুযিট্ঠং ব্রহ্মচারিসূতি যস্মিং দিৰসে তীণি সুচরিতানি পূরিতানি, তদাস্স সেট্ঠচারীসু দিন্নদানং সুযিট্ঠং নাম হোতি পদক্খিণং কাযকম্মন্তি তং দিৰসং তেন কতং কাযকম্মং ৰড্ঢিকাযকম্মং নাম হোতি। সেসপদেসুপি এসেৰ নযো। পদক্খিণানি কত্ৰানাতি ৰড্ঢিযুত্তানি কাযকম্মাদীনি কত্ৰা। লভন্তত্থে পদক্খিণেতি পদক্খিণে ৰড্ঢিঅত্থেযেৰ লভতি। সেসং উত্তানমেৰাতি।
মঙ্গলৰগ্গো পঞ্চমো।
ততিযপণ্ণাসকং নিট্ঠিতং।