১. নিস্সযৰগ্গো
১-৬. কিমত্থিযসুত্তাদিৰণ্ণনা
১-৬. একাদসকনিপাতস্স
৭-৮. পঠমসঞ্ঞাসুত্তাদিৰণ্ণনা
৭-৮. সত্তমে অত্থেন অত্থোতি অত্থেন সদ্ধিমত্থো। ব্যঞ্জনেন ব্যঞ্জনন্তি ব্যঞ্জনেন সদ্ধিং সংসন্দিস্সতীতি সম্পৰত্তিস্সতি। সমেস্সতীতি সমানং ভৰিস্সতি। ন ৰিগ্গয্হিস্সতীতি ন ৰিরজ্ঝিস্সতি। অগ্গপদস্মিন্তি নিব্বানে। অট্ঠমে পচ্চৰেক্খণা কথিতা।
৯. সদ্ধসুত্তৰণ্ণনা
৯. নৰমে দোণিযা বদ্ধোতি যৰসস্সদোণিযা সমীপে বদ্ধো। অন্তরং করিত্ৰাতি অব্ভন্তরে কত্ৰা। ঝাযতীতি চিন্তেতি। পজ্ঝাযতীতি ইতো চিতো চ নানপ্পকারকং ঝাযতি। নিজ্ঝাযতীতি নিরন্তরৰসেন নিবদ্ধং ঝাযতি। পথৰিম্পি নিস্সায ঝাযতীতি সমাপত্তিযং সনিকন্তিকৰসেনেতং আপাদীসুপি এসেৰ নযো।
কথঞ্চ সদ্ধ আজানীযঝাযিতং হোতীতি কথং কারণাকারণং জানন্তস্স সিন্ধৰস্স ঝাযিতং হোতি। যথা ইণন্তিআদীসু ইণসদিসং বন্ধনসদিসং ধনজানিসদিসং কলিসঙ্খাতমহাপরাধসদিসঞ্চ কত্ৰা অত্তনো অভিমুখস্স পতোদস্স অজ্ঝোহরণসঙ্খাতং পতনং ৰিপস্সতীতি অত্থো। নেৰ পথৰিং নিস্সায ঝাযতীতি সমাপত্তিসুখনিকন্তিযা অভাৰেন পথৰিআরম্মণায ঝাযতি চ পনাতি নিব্বানারম্মণায ফলসমাপত্তিযা ঝাযতি। পথৰিযং পথৰিসঞ্ঞা ৰিভূতা হোতীতি পথৰারম্মণে উপ্পন্না চতুক্কপঞ্চকজ্ঝানসঞ্ঞা ৰিভূতা পাকটা হোতি। ‘‘ৰিভূতা, ভন্তে, রূপসঞ্ঞা অৰিভূতা অট্ঠিকসঞ্ঞা’’তি ইমস্মিঞ্হি সুত্তে সমতিক্কমস্স অত্থিতায ৰিভূততা ৰুত্তা, ইধ পন ৰিপস্সনাৰসেন অনিচ্চদুক্খানত্ততো দিট্ঠত্তা ৰিভূতা নাম জাতা। আপোসঞ্ঞাদীসুপি এসেৰ নযো। এৰমেত্থ হেট্ঠা ৰিয সমাপত্তিৰসেন সমতিক্কমং অৰত্ৰা ৰিপস্সনাচারৰসেন সমতিক্কমো ৰুত্তো। এৰং ঝাযীতি এৰং ৰিপস্সনাপটিপাটিযা আগন্ত্ৰা উপ্পাদিতায ফলসমাপত্তিযা ঝাযন্তো।
১০. মোরনিৰাপসুত্তৰণ্ণনা
১০. দসমে অচ্চন্তনিট্ঠোতি অন্তং অতীতত্তা অচ্চন্তসঙ্খাতং অৰিনাসধম্মং নিব্বানং নিট্ঠা অস্সাতি অচ্চন্তনিট্ঠো। ইমিনা নযেন সেসপদানি ৰেদিতব্বানি। জনেতস্মিন্তি জনিতস্মিং যে গোত্তপটিসারিনোতি যে জনা তস্মিং গোত্তে পটিসরন্তি ‘‘অহং গোতমো, অহং কস্সপো’’তি, তেসু লোকে গোত্তপটিসারীসু খত্তিযো সেট্ঠো। অনুমতা মযাতি মম সব্বঞ্ঞুতঞ্ঞাণেন সদ্ধিং সংসন্দেত্ৰা দেসিতা মযা অনুঞ্ঞাতা। সেসং সব্বত্থ উত্তানত্থমেৰাতি।
নিস্সযৰগ্গো পঠমো।