११. अधम्मवग्गवण्णना
१४०. एकादसमे अधम्मं अधम्मोतिआदीनि वुत्तनयेनेव वेदितब्बानि। सेसमेत्थ उत्तानमेवाति।
अधम्मवग्गवण्णना।
१२. अनापत्तिवग्गवण्णना
१५०. द्वादसमे अनापत्तिं आपत्तीतिआदीसु ‘‘अनापत्ति अजानन्तस्स अथेय्यचित्तस्स नमरणाधिप्पायस्स अनुल्लपनाधिप्पायस्स नमोचनाधिप्पायस्सा’’ति तत्थ तत्थ वुत्ता अनापत्ति अनापत्ति नाम, ‘‘जानन्तस्स थेय्यचित्तस्सा’’तिआदिना नयेन वुत्ता आपत्ति आपत्ति नाम, पञ्चापत्तिक्खन्धा लहुकापत्ति नाम, द्वे आपत्तिक्खन्धा गरुकापत्ति नाम। द्वे आपत्तिक्खन्धा दुट्ठुल्लापत्ति नाम, पञ्चापत्तिक्खन्धा अदुट्ठुल्लापत्ति नाम। छ आपत्तिक्खन्धा सावसेसापत्ति नाम, एको पाराजिकापत्तिक्खन्धो अनवसेसापत्ति नाम। सप्पटिकम्मापत्ति नाम सावसेसापत्तियेव, अप्पटिकम्मापत्ति नाम अनवसेसापत्तियेव। सेसं सब्बत्थ उत्तानमेवाति।
अनापत्तिवग्गवण्णना।