१. निस्सयवग्गो
१-६. किमत्थियसुत्तादिवण्णना
१-६. एकादसकनिपातस्स
७-८. पठमसञ्ञासुत्तादिवण्णना
७-८. सत्तमे अत्थेन अत्थोति अत्थेन सद्धिमत्थो। ब्यञ्जनेन ब्यञ्जनन्ति ब्यञ्जनेन सद्धिं संसन्दिस्सतीति सम्पवत्तिस्सति। समेस्सतीति समानं भविस्सति। न विग्गय्हिस्सतीति न विरज्झिस्सति। अग्गपदस्मिन्ति निब्बाने। अट्ठमे पच्चवेक्खणा कथिता।
९. सद्धसुत्तवण्णना
९. नवमे दोणिया बद्धोति यवसस्सदोणिया समीपे बद्धो। अन्तरं करित्वाति अब्भन्तरे कत्वा। झायतीति चिन्तेति। पज्झायतीति इतो चितो च नानप्पकारकं झायति। निज्झायतीति निरन्तरवसेन निबद्धं झायति। पथविम्पि निस्साय झायतीति समापत्तियं सनिकन्तिकवसेनेतं आपादीसुपि एसेव नयो।
कथञ्च सद्ध आजानीयझायितं होतीति कथं कारणाकारणं जानन्तस्स सिन्धवस्स झायितं होति। यथा इणन्तिआदीसु इणसदिसं बन्धनसदिसं धनजानिसदिसं कलिसङ्खातमहापराधसदिसञ्च कत्वा अत्तनो अभिमुखस्स पतोदस्स अज्झोहरणसङ्खातं पतनं विपस्सतीति अत्थो। नेव पथविं निस्साय झायतीति समापत्तिसुखनिकन्तिया अभावेन पथविआरम्मणाय झायति च पनाति निब्बानारम्मणाय फलसमापत्तिया झायति। पथवियं पथविसञ्ञा विभूता होतीति पथवारम्मणे उप्पन्ना चतुक्कपञ्चकज्झानसञ्ञा विभूता पाकटा होति। ‘‘विभूता, भन्ते, रूपसञ्ञा अविभूता अट्ठिकसञ्ञा’’ति इमस्मिञ्हि सुत्ते समतिक्कमस्स अत्थिताय विभूतता वुत्ता, इध पन विपस्सनावसेन अनिच्चदुक्खानत्ततो दिट्ठत्ता विभूता नाम जाता। आपोसञ्ञादीसुपि एसेव नयो। एवमेत्थ हेट्ठा विय समापत्तिवसेन समतिक्कमं अवत्वा विपस्सनाचारवसेन समतिक्कमो वुत्तो। एवं झायीति एवं विपस्सनापटिपाटिया आगन्त्वा उप्पादिताय फलसमापत्तिया झायन्तो।
१०. मोरनिवापसुत्तवण्णना
१०. दसमे अच्चन्तनिट्ठोति अन्तं अतीतत्ता अच्चन्तसङ्खातं अविनासधम्मं निब्बानं निट्ठा अस्साति अच्चन्तनिट्ठो। इमिना नयेन सेसपदानि वेदितब्बानि। जनेतस्मिन्ति जनितस्मिं ये गोत्तपटिसारिनोति ये जना तस्मिं गोत्ते पटिसरन्ति ‘‘अहं गोतमो, अहं कस्सपो’’ति, तेसु लोके गोत्तपटिसारीसु खत्तियो सेट्ठो। अनुमता मयाति मम सब्बञ्ञुतञ्ञाणेन सद्धिं संसन्देत्वा देसिता मया अनुञ्ञाता। सेसं सब्बत्थ उत्तानत्थमेवाति।
निस्सयवग्गो पठमो।