૮. અટ્ઠમવગ્ગો
(૭૩) ૧. છગતિકથા
૫૦૩. છ ગતિયોતિ? આમન્તા. નનુ પઞ્ચ ગતિયો વુત્તા ભગવતા – નિરયો, તિરચ્છાનયોનિ, પેત્તિવિસયો, મનુસ્સા, દેવાતિ મ॰ નિ॰ ૧.૧૫૩? આમન્તા. હઞ્ચિ પઞ્ચ ગતિયો વુત્તા ભગવતા – નિરયો, તિરચ્છાનયોનિ, પેત્તિવિસયો, મનુસ્સા, દેવા; નો ચ વત રે વત્તબ્બે – ‘‘છ ગતિયો’’તિ.
છ ગતિયોતિ? આમન્તા. નનુ કાલકઞ્ચિકા કાલકઞ્જિકા (સી॰ સ્યા॰ કં॰), કાળકઞ્જકા (પી॰) સુરા પેતાનં સમાનવણ્ણા સમાનભોગા સમાનાહારા સમાનાયુકા પેતેહિ સહ આવાહવિવાહં ગચ્છન્તીતિ? આમન્તા. હઞ્ચિ કાલકઞ્ચિકા અસુરા પેતાનં સમાનવણ્ણા સમાનભોગા સમાનાહારા સમાનાયુકા પેતેહિ સહ આવાહવિવાહં ગચ્છન્તિ, નો ચ વત રે વત્તબ્બે – ‘‘છ ગતિયો’’તિ.
છ ગતિયોતિ? આમન્તા. નનુ વેપચિત્તિપરિસા દેવાનં સમાનવણ્ણા સમાનભોગા સમાનાહારા સમાનાયુકા દેવેહિ સહ આવાહવિવાહં ગચ્છન્તીતિ? આમન્તા. હઞ્ચિ વેપચિત્તિપરિસા દેવાનં સમાનવણ્ણા સમાનભોગા સમાનાહારા સમાનાયુકા દેવેહિ સહ આવાહવિવાહં ગચ્છન્તિ, નો ચ વત રે વત્તબ્બે – ‘‘છ ગતિયો’’તિ.
છ ગતિયોતિ? આમન્તા. નનુ વેપચિત્તિપરિસા પુબ્બદેવાતિ? આમન્તા. હઞ્ચિ વેપચિત્તિપરિસા પુબ્બદેવા, નો ચ વત રે વત્તબ્બે – ‘‘છ ગતિયો’’તિ.
૫૦૪. ન વત્તબ્બં – ‘‘છ ગતિયો’’તિ? આમન્તા. નનુ અત્થિ અસુરકાયોતિ, આમન્તા. હઞ્ચિ અત્થિ અસુરકાયો, તેન વત રે વત્તબ્બે – ‘‘છ ગતિયો’’તિ.
છગતિકથા નિટ્ઠિતા.
૮. અટ્ઠમવગ્ગો
(૭૪) ૨. અન્તરાભવકથા
૫૦૫. અત્થિ અન્તરાભવોતિ? આમન્તા. કામભવોતિ? ન હેવં વત્તબ્બે…પે॰… અત્થિ અન્તરાભવોતિ? આમન્તા. રૂપભવોતિ ? ન હેવં વત્તબ્બે…પે॰… અત્થિ અન્તરાભવોતિ? આમન્તા. અરૂપભવોતિ? ન હેવં વત્તબ્બે…પે॰… અત્થિ અન્તરાભવોતિ? આમન્તા. કામભવસ્સ ચ રૂપભવસ્સ ચ અન્તરે અત્થિ અન્તરાભવોતિ? ન હેવં વત્તબ્બે…પે॰… અત્થિ અન્તરાભવોતિ? આમન્તા. રૂપભવસ્સ ચ અરૂપભવસ્સ ચ અન્તરે અત્થિ અન્તરાભવોતિ? ન હેવં વત્તબ્બે…પે॰….
કામભવસ્સ ચ રૂપભવસ્સ ચ અન્તરે નત્થિ અન્તરાભવોતિ? આમન્તા. હઞ્ચિ કામભવસ્સ ચ રૂપભવસ્સ ચ અન્તરે નત્થિ અન્તરાભવો, નો ચ વત રે વત્તબ્બે – ‘‘અત્થિ અન્તરાભવો’’તિ. રૂપભવસ્સ ચ અરૂપભવસ્સ ચ અન્તરે નત્થિ અન્તરાભવોતિ? આમન્તા . હઞ્ચિ રૂપભવસ્સ ચ અરૂપભવસ્સ ચ અન્તરે નત્થિ અન્તરાભવો, નો ચ વત રે વત્તબ્બે – ‘‘અત્થિ અન્તરાભવો’’તિ.
૫૦૬. અત્થિ અન્તરાભવોતિ? આમન્તા. પઞ્ચમી સા યોનિ, છટ્ઠમી સા ગતિ, અટ્ઠમી સા વિઞ્ઞાણટ્ઠિતિ, દસમો સો સત્તાવાસોતિ? ન હેવં વત્તબ્બે…પે॰… અત્થિ અન્તરાભવોતિ? આમન્તા. અન્તરાભવો ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? ન હેવં વત્તબ્બે…પે॰… અત્થિ અન્તરાભવૂપગં કમ્મન્તિ? ન હેવં વત્તબ્બે…પે॰… અત્થિ અન્તરાભવૂપગા સત્તાતિ? ન હેવં વત્તબ્બે…પે॰… અન્તરાભવે સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? ન હેવં વત્તબ્બે…પે॰… અન્તરાભવે અત્થિ રૂપં વેદના સઞ્ઞા સઙ્ખારા વિઞ્ઞાણન્તિ? ન હેવં વત્તબ્બે…પે॰… અન્તરાભવો પઞ્ચવોકારભવોતિ? ન હેવં વત્તબ્બે…પે॰….
૫૦૭. અત્થિ કામભવો, કામભવો ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? આમન્તા. અત્થિ અન્તરાભવો, અન્તરાભવો ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? ન હેવં વત્તબ્બે…પે॰… અત્થિ કામભવૂપગં કમ્મન્તિ? આમન્તા. અત્થિ અન્તરાભવૂપગં કમ્મન્તિ? ન હેવં વત્તબ્બે…પે॰… અત્થિ કામભવૂપગા સત્તાતિ? આમન્તા. અત્થિ અન્તરાભવૂપગા સત્તાતિ? ન હેવં વત્તબ્બે…પે॰… કામભવે સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? આમન્તા. અન્તરાભવે સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? ન હેવં વત્તબ્બે…પે॰… કામભવે અત્થિ રૂપં વેદના સઞ્ઞા સઙ્ખારા વિઞ્ઞાણન્તિ? આમન્તા. અન્તરાભવે અત્થિ રૂપં વેદના સઞ્ઞા સઙ્ખારા વિઞ્ઞાણન્તિ? ન હેવં વત્તબ્બે…પે॰… કામભવો પઞ્ચવોકારભવોતિ? આમન્તા. અન્તરાભવો પઞ્ચવોકારભવોતિ? ન હેવં વત્તબ્બે…પે॰….
અત્થિ રૂપભવો, રૂપભવો ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? આમન્તા. અત્થિ અન્તરાભવો, અન્તરાભવો ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? ન હેવં વત્તબ્બે…પે॰… અત્થિ રૂપભવૂપગં કમ્મન્તિ? આમન્તા. અત્થિ અન્તરાભવૂપગં કમ્મન્તિ? ન હેવં વત્તબ્બે…પે॰… અત્થિ રૂપભવૂપગા સત્તાતિ? આમન્તા. અત્થિ અન્તરાભવૂપગા સત્તાતિ? ન હેવં વત્તબ્બે…પે॰… રૂપભવે સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? આમન્તા. અન્તરાભવે સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? ન હેવં વત્તબ્બે…પે॰… રૂપભવે અત્થિ રૂપં વેદના સઞ્ઞા સઙ્ખારા વિઞ્ઞાણન્તિ? આમન્તા. અન્તરાભવે અત્થિ રૂપં વેદના સઞ્ઞા સઙ્ખારા વિઞ્ઞાણન્તિ? ન હેવં વત્તબ્બે…પે॰… રૂપભવો પઞ્ચવોકારભવોતિ? આમન્તા. અન્તરાભવો પઞ્ચવોકારભવોતિ? ન હેવં વત્તબ્બે…પે॰….
અત્થિ અરૂપભવો, અરૂપભવો ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? આમન્તા. અત્થિ અન્તરાભવો, અન્તરાભવો ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? ન હેવં વત્તબ્બે…પે॰… અત્થિ અરૂપભવૂપગં કમ્મન્તિ? આમન્તા. અત્થિ અન્તરાભવૂપગં કમ્મન્તિ? ન હેવં વત્તબ્બે…પે॰… અત્થિ અરૂપભવૂપગા સત્તાતિ? આમન્તા. અત્થિ અન્તરાભવૂપગા સત્તાતિ? ન હેવં વત્તબ્બે…પે॰… અરૂપભવે સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? આમન્તા. અન્તરાભવે સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? ન હેવં વત્તબ્બે…પે॰… અરૂપભવે અત્થિ વેદના સઞ્ઞા સઙ્ખારા વિઞ્ઞાણન્તિ? આમન્તા. અન્તરાભવે અત્થિ વેદના સઞ્ઞા સઙ્ખારા વિઞ્ઞાણન્તિ? ન હેવં વત્તબ્બે…પે॰… અરૂપભવો ચતુવોકારભવોતિ? આમન્તા. અન્તરાભવો ચતુવોકારભવોતિ? ન હેવં વત્તબ્બે…પે॰….
૫૦૮. અત્થિ અન્તરાભવોતિ? આમન્તા. સબ્બેસઞ્ઞેવ સત્તાનં અત્થિ અન્તરાભવોતિ? ન હેવં વત્તબ્બે …પે॰… સબ્બેસઞ્ઞેવ સત્તાનં નત્થિ અન્તરાભવોતિ? આમન્તા. હઞ્ચિ સબ્બેસઞ્ઞેવ સત્તાનં નત્થિ અન્તરાભવો, નો ચ વત રે વત્તબ્બે – ‘‘અત્થિ અન્તરાભવો’’તિ.
અત્થિ અન્તરાભવોતિ? આમન્તા. આનન્તરિયસ્સ પુગ્ગલસ્સ અત્થિ અન્તરાભવોતિ? ન હેવં વત્તબ્બે…પે॰… આનન્તરિયસ્સ પુગ્ગલસ્સ નત્થિ અન્તરાભવોતિ? આમન્તા. હઞ્ચિ આનન્તરિયસ્સ પુગ્ગલસ્સ નત્થિ અન્તરાભવો, નો ચ વત રે વત્તબ્બે – ‘‘અત્થિ અન્તરાભવો’’તિ.
ન આનન્તરિયસ્સ પુગ્ગલસ્સ અત્થિ અન્તરાભવોતિ? આમન્તા. આનન્તરિયસ્સ પુગ્ગલસ્સ અત્થિ અન્તરાભવોતિ? ન હેવં વત્તબ્બે…પે॰… આનન્તરિયસ્સ પુગ્ગલસ્સ નત્થિ અન્તરાભવોતિ? આમન્તા. ન આનન્તરિયસ્સ પુગ્ગલસ્સ નત્થિ અન્તરાભવોતિ? ન હેવં વત્તબ્બે…પે॰… નિરયૂપગસ્સ પુગ્ગલસ્સ…પે॰… અસઞ્ઞસત્તૂપગસ્સ પુગ્ગલસ્સ …પે॰… અરૂપૂપગસ્સ પુગ્ગલસ્સ અત્થિ અન્તરાભવોતિ? ન હેવં વત્તબ્બે…પે॰… અરૂપૂપગસ્સ પુગ્ગલસ્સ નત્થિ અન્તરાભવોતિ? આમન્તા. હઞ્ચિ અરૂપૂપગસ્સ પુગ્ગલસ્સ નત્થિ અન્તરાભવો, નો ચ વત રે વત્તબ્બે – ‘‘અત્થિ અન્તરાભવો’’તિ.
ન અરૂપૂપગસ્સ પુગ્ગલસ્સ અત્થિ અન્તરાભવોતિ? આમન્તા. અરૂપૂપગસ્સ પુગ્ગલસ્સ અત્થિ અન્તરાભવોતિ? ન હેવં વત્તબ્બે…પે॰… અરૂપૂપગસ્સ પુગ્ગલસ્સ નત્થિ અન્તરાભવોતિ? આમન્તા. ન અરૂપૂપગસ્સ પુગ્ગલસ્સ નત્થિ અન્તરાભવોતિ? ન હેવં વત્તબ્બે…પે॰….
૫૦૯. ન વત્તબ્બં અત્થિ અન્તરાભવોતિ? આમન્તા. નનુ અન્તરાપરિનિબ્બાયી પુગ્ગલો અત્થીતિ? આમન્તા. હઞ્ચિ અન્તરાપરિનિબ્બાયી પુગ્ગલો અત્થિ, તેન વત રે નો ચ વત રે (સી॰ ક॰), નો વત રે (સ્યા॰) વત્તબ્બે – ‘‘અત્થિ અન્તરાભવો’’તિ.
અન્તરાપરિનિબ્બાયી પુગ્ગલો અત્થીતિ કત્વા અત્થિ અન્તરાભવોતિ? આમન્તા. ઉપહચ્ચપરિનિબ્બાયી પુગ્ગલો અત્થીતિ કત્વા અત્થિ ઉપહચ્ચભવોતિ? ન હેવં વત્તબ્બે…પે॰… અન્તરાપરિનિબ્બાયી પુગ્ગલો અત્થીતિ કત્વા અત્થિ અન્તરાભવોતિ? આમન્તા. અસઙ્ખારપરિનિબ્બાયી પુગ્ગલો…પે॰… સસઙ્ખારપરિનિબ્બાયી પુગ્ગલો અત્થીતિ કત્વા અત્થિ સસઙ્ખારભવોતિ? ન હેવં વત્તબ્બે…પે॰….
અન્તરાભવકથા નિટ્ઠિતા.
૮. અટ્ઠમવગ્ગો
(૭૫) ૩. કામગુણકથા
૫૧૦. પઞ્ચેવ કામગુણા કામધાતૂતિ? આમન્તા. નનુ અત્થિ તપ્પટિસઞ્ઞુત્તો છન્દોતિ? આમન્તા. હઞ્ચિ અત્થિ તપ્પટિસઞ્ઞુત્તો છન્દો, નો ચ વત રે વત્તબ્બે – ‘‘પઞ્ચેવ કામગુણા કામધાતૂ’’તિ. નનુ અત્થિ તપ્પટિસઞ્ઞુત્તો રાગો તપ્પટિસઞ્ઞુત્તો છન્દો તપ્પટિસઞ્ઞુત્તો છન્દરાગો તપ્પટિસઞ્ઞુત્તો સઙ્કપ્પો તપ્પટિસઞ્ઞુત્તો રાગો તપ્પટિસઞ્ઞુત્તો સઙ્કપ્પરાગો તપ્પટિસઞ્ઞુત્તા પીતિ તપ્પટિસઞ્ઞુત્તં સોમનસ્સં તપ્પટિસઞ્ઞુત્તં પીતિસોમનસ્સન્તિ? આમન્તા. હઞ્ચિ અત્થિ તપ્પટિસઞ્ઞુત્તં પીતિસોમનસ્સં, નો ચ વત રે વત્તબ્બે – ‘‘પઞ્ચેવ કામગુણા કામધાતૂ’’તિ.
પઞ્ચેવ કામગુણા કામધાતૂતિ? આમન્તા. મનુસ્સાનં ચક્ખુ ન કામધાતૂતિ? ન હેવં વત્તબ્બે…પે॰… મનુસ્સાનં સોતં…પે॰… મનુસ્સાનં ઘાનં…પે॰… મનુસ્સાનં જિવ્હા…પે॰… મનુસ્સાનં કાયો…પે॰… મનુસ્સાનં મનો ન કામધાતૂતિ? ન હેવં વત્તબ્બે…પે॰….
મનુસ્સાનં મનો ન કામધાતૂતિ? આમન્તા. નનુ વુત્તં ભગવતા –
‘‘પઞ્ચ કામગુણા લોકે, મનોચ્છટ્ઠા પવેદિતા;
એત્થ છન્દં વિરાજેત્વા, એવં દુક્ખા પમુચ્ચતી’’તિ સુ॰ નિ॰ ૧૭૩; સં॰ નિ॰ ૧.૩૦.
અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘મનુસ્સાનં મનો ન કામધાતૂ’’તિ.
૫૧૧. પઞ્ચેવ કામગુણા કામધાતૂતિ? આમન્તા. કામગુણા ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? ન હેવં વત્તબ્બે…પે॰… અત્થિ કામગુણૂપગં કમ્મન્તિ? ન હેવં વત્તબ્બે…પે॰… અત્થિ કામગુણૂપગા સત્તાતિ? ન હેવં વત્તબ્બે…પે॰… કામગુણે સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? ન હેવં વત્તબ્બે…પે॰… કામગુણે અત્થિ રૂપં વેદના સઞ્ઞા સઙ્ખારા વિઞ્ઞાણન્તિ? ન હેવં વત્તબ્બે…પે॰… કામગુણા પઞ્ચવોકારભવોતિ? ન હેવં વત્તબ્બે…પે॰… કામગુણે સમ્માસમ્બુદ્ધા ઉપ્પજ્જન્તિ, પચ્ચેકસમ્બુદ્ધા ઉપ્પજ્જન્તિ, સાવકયુગં ઉપ્પજ્જતીતિ? ન હેવં વત્તબ્બે…પે॰….
કામધાતુ ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? આમન્તા. કામગુણા ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? ન હેવં વત્તબ્બે…પે॰… અત્થિ કામધાતૂપગં કમ્મન્તિ? આમન્તા. અત્થિ કામગુણૂપગં કમ્મન્તિ ? ન હેવં વત્તબ્બે…પે॰… અત્થિ કામધાતૂપગા સત્તાતિ? આમન્તા. અત્થિ કામગુણૂપગા સત્તાતિ? ન હેવં વત્તબ્બે…પે॰….
કામધાતુયા સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? આમન્તા. કામગુણે સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? ન હેવં વત્તબ્બે …પે॰… કામધાતુયા અત્થિ રૂપં વેદના સઞ્ઞા સઙ્ખારા વિઞ્ઞાણન્તિ? આમન્તા. કામગુણે અત્થિ રૂપં વેદના સઞ્ઞા સઙ્ખારા વિઞ્ઞાણન્તિ? ન હેવં વત્તબ્બે…પે॰… કામધાતુ પઞ્ચવોકારભવોતિ? આમન્તા. કામગુણા પઞ્ચવોકારભવોતિ? ન હેવં વત્તબ્બે…પે॰… કામધાતુયા સમ્માસમ્બુદ્ધા ઉપ્પજ્જન્તિ, પચ્ચેકસબુદ્ધા ઉપ્પજ્જન્તિ, સાવકયુગં ઉપ્પજ્જતીતિ? આમન્તા. કામગુણે સમ્માસમ્બુદ્ધા ઉપ્પજ્જન્તિ, પચ્ચેકસમ્બુદ્ધા ઉપ્પજ્જન્તિ, સાવકયુગં ઉપ્પજ્જતીતિ? ન હેવં વત્તબ્બે…પે॰….
૫૧૨. ન વત્તબ્બં – ‘‘પઞ્ચેવ કામગુણા કામધાતૂ’’તિ? આમન્તા. નનુ વુત્તં ભગવતા – ‘‘પઞ્ચિમે, ભિક્ખવે, કામગુણા! કતમે પઞ્ચ? ચક્ખુવિઞ્ઞેય્યા રૂપા ઇટ્ઠા કન્તા મનાપા પિયરૂપા કામૂપસંહિતા રજનીયા, સોતવિઞ્ઞેય્યા સદ્દા…પે॰… ઘાનવિઞ્ઞેય્યા ગન્ધા…પે॰… જિવ્હાવિઞ્ઞેય્યા રસા…પે॰… કાયવિઞ્ઞેય્યા ફોટ્ઠબ્બા ઇટ્ઠા કન્તા મનાપા પિયરૂપા કામૂપસંહિતા રજનીયા – ઇમે ખો, ભિક્ખવે, પઞ્ચ કામગુણા’’તિ. અત્થેવ સુત્તન્તોતિ? આમન્તા. તેન હિ પઞ્ચેવ કામગુણા કામધાતૂતિ.
કામગુણકથા નિટ્ઠિતા.
૮. અટ્ઠમવગ્ગો
(૭૬) ૪. કામકથા
૫૧૩. પઞ્ચેવાયતના કામાતિ? આમન્તા. નનુ અત્થિ તપ્પટિસંયુત્તો છન્દોતિ? આમન્તા. હઞ્ચિ અત્થિ તપ્પટિસંયુત્તો છન્દો, નો ચ વત રે વત્તબ્બે – ‘‘પઞ્ચેવાયતના કામા’’તિ. નનુ અત્થિ તપ્પટિસંયુત્તો રાગો તપ્પટિસંયુત્તો છન્દો તપ્પટિસંયુત્તો છન્દરાગો તપ્પટિસંયુત્તો સઙ્કપ્પો તપ્પટિસંયુત્તો રાગો તપ્પટિસંયુત્તો સઙ્કપ્પરાગો તપ્પટિસંયુત્તા પીતિ તપ્પટિસંયુત્તં સોમનસ્સં તપ્પટિસંયુત્તં પીતિસોમનસ્સન્તિ? આમન્તા . હઞ્ચિ અત્થિ તપ્પટિસંયુત્તં પીતિસોમનસ્સં, નો ચ વત રે વત્તબ્બે – ‘‘પઞ્ચેવાયતના કામા’’તિ.
૫૧૪. ન વત્તબ્બં – ‘‘પઞ્ચેવાયતના કામા’’તિ? આમન્તા. નનુ વુત્તં ભગવતા – ‘‘પઞ્ચિમે, ભિક્ખવે, કામગુણા! કતમે પઞ્ચ? ચક્ખુવિઞ્ઞેય્યા રૂપા…પે॰… કાયવિઞ્ઞેય્યા ફોટ્ઠબ્બા ઇટ્ઠા કન્તા મનાપા પિયરૂપા કામૂપસંહિતા રજનીયા – ઇમે ખો, ભિક્ખવે, પઞ્ચ કામગુણા’’તિ. અત્થેવ સુત્તન્તોતિ? આમન્તા. તેન હિ પઞ્ચેવાયતના કામાતિ.
પઞ્ચેવાયતના કામાતિ? આમન્તા. નનુ વુત્તં ભગવતા – ‘‘પઞ્ચિમે, ભિક્ખવે, કામગુણા! કતમે પઞ્ચ? ચક્ખુવિઞ્ઞેય્યા રૂપા…પે॰… કાયવિઞ્ઞેય્યા ફોટ્ઠબ્બા ઇટ્ઠા કન્તા મનાપા પિયરૂપા કામૂપસંહિતા રજનીયા – ઇમે ખો, ભિક્ખવે, પઞ્ચ કામગુણા . અપિ ચ, ભિક્ખવે, નેતે કામા કામગુણા નામેતે અરિયસ્સ વિનયે વુચ્ચ’’ન્તિ –
‘‘સઙ્કપ્પરાગો પુરિસસ્સ કામો,
ન તે કામા યાનિ ચિત્રાનિ લોકે;
સઙ્કપ્પરાગો પુરિસસ્સ કામો,
તિટ્ઠન્તિ ચિત્રાનિ તથેવ લોકે;
અથેત્થ ધીરા વિનયન્તિ છન્દ’’ન્તિ અ॰ નિ॰ ૬.૬૩ નિબ્બેધિકસુત્તે.
અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘પઞ્ચેવાયતના કામા’’તિ.
કામકથા નિટ્ઠિતા.
૮. અટ્ઠમવગ્ગો
(૭૭) ૫. રૂપધાતુકથા
૫૧૫. રૂપિનો ધમ્મા રૂપધાતૂતિ? આમન્તા. રૂપં ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? ન હેવં વત્તબ્બે…પે॰… અત્થિ રૂપૂપગં કમ્મન્તિ? ન હેવં વત્તબ્બે…પે॰… અત્થિ રૂપૂપગા સત્તાતિ? ન હેવં વત્તબ્બે…પે॰… રૂપે સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? ન હેવં વત્તબ્બે…પે॰… રૂપે અત્થિ રૂપં વેદના સઞ્ઞા સઙ્ખારા વિઞ્ઞાણન્તિ? ન હેવં વત્તબ્બે…પે॰… રૂપં પઞ્ચવોકારભવોતિ? ન હેવં વત્તબ્બે…પે॰….
રૂપધાતુ ભવો ગતિ…પે॰… અત્તભાવપટિલાભોતિ? આમન્તા. રૂપં ભવો ગતિ…પે॰… અત્તભાવપટિલાભોતિ? ન હેવં વત્તબ્બે…પે॰… અત્થિ રૂપધાતૂપગં કમ્મન્તિ? આમન્તા. અત્થિ રૂપૂપગં કમ્મન્તિ? ન હેવં વત્તબ્બે…પે॰… અત્થિ રૂપધાતૂપગા સત્તાતિ? આમન્તા. અત્થિ રૂપૂપગા સત્તાતિ? ન હેવં વત્તબ્બે…પે॰….
રૂપધાતુયા સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? આમન્તા. રૂપે સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? ન હેવં વત્તબ્બે…પે॰… રૂપધાતુયા અત્થિ રૂપં વેદના સઞ્ઞા સઙ્ખારા વિઞ્ઞાણન્તિ? આમન્તા. રૂપે અત્થિ રૂપં વેદના સઞ્ઞા સઙ્ખારા વિઞ્ઞાણન્તિ? ન હેવં વત્તબ્બે…પે॰… રૂપધાતુ પઞ્ચવોકારભવોતિ? આમન્તા. રૂપં પઞ્ચવોકારભવોતિ? ન હેવં વત્તબ્બે…પે॰….
૫૧૬. રૂપિનો ધમ્મા રૂપધાતુ, કામધાતુયા અત્થિ રૂપન્તિ? આમન્તા. સાવ કામધાતુ, સા રૂપધાતૂતિ? ન હેવં વત્તબ્બે…પે॰… સાવ કામધાતુ, સા રૂપધાતૂતિ? આમન્તા. કામભવેન સમન્નાગતો પુગ્ગલો દ્વીહિ ભવેહિ સમન્નાગતો હોતિ – કામભવેન ચ રૂપભવેન ચાતિ? ન હેવં વત્તબ્બે.
રૂપધાતુકથા નિટ્ઠિતા.
૮. અટ્ઠમવગ્ગો
(૭૮) ૬. અરૂપધાતુકથા
૫૧૭. અરૂપિનો ધમ્મા અરૂપધાતૂતિ? આમન્તા. વેદના ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? ન હેવં વત્તબ્બે…પે॰… અત્થિ વેદનૂપગં કમ્મન્તિ? ન હેવં વત્તબ્બે…પે॰… અત્થિ વેદનૂપગા સત્તાતિ? ન હેવં વત્તબ્બે…પે॰… વેદનાય સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? ન હેવં વત્તબ્બે…પે॰… વેદનાય અત્થિ વેદના સઞ્ઞા સઙ્ખારા વિઞ્ઞાણન્તિ? ન હેવં વત્તબ્બે…પે॰… વેદના ચતુવોકારભવોતિ? ન હેવં વત્તબ્બે…પે॰….
અરૂપધાતુ ભવો ગતિ…પે॰… અત્તભાવપટિલાભોતિ? આમન્તા. વેદના ભવો ગતિ…પે॰… અત્તભાવપટિલાભોતિ? ન હેવં વત્તબ્બે…પે॰… અત્થિ અરૂપધાતૂપગં કમ્મન્તિ? આમન્તા. અત્થિ વેદનૂપગં કમ્મન્તિ? ન હેવં વત્તબ્બે…પે॰… અત્થિ અરૂપધાતૂપગા સત્તાતિ? આમન્તા. અત્થિ વેદનૂપગા સત્તાતિ? ન હેવં વત્તબ્બે…પે॰….
અરૂપધાતુયા સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? આમન્તા. વેદનાય સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? ન હેવં વત્તબ્બે…પે॰… અરૂપધાતુયા અત્થિ વેદના સઞ્ઞા સઙ્ખારા વિઞ્ઞાણન્તિ? આમન્તા. વેદનાય અત્થિ વેદના સઞ્ઞા સઙ્ખારા વિઞ્ઞાણન્તિ? ન હેવં વત્તબ્બે…પે॰… અરૂપધાતુ ચતુવોકારભવોતિ? આમન્તા. વેદના ચતુવોકારભવોતિ? ન હેવં વત્તબ્બે…પે॰….
૫૧૮. અરૂપિનો ધમ્મા અરૂપધાતુ, કામધાતુયા અત્થિ વેદના સઞ્ઞા સઙ્ખારા વિઞ્ઞાણન્તિ? આમન્તા. સાવ કામધાતુ, સા અરૂપધાતૂતિ? ન હેવં વત્તબ્બે…પે॰… સાવ કામધાતુ, સા અરૂપધાતૂતિ? આમન્તા. કામભવેન સમન્નાગતો પુગ્ગલો દ્વીહિ ભવેહિ સમન્નાગતો હોતિ – કામભવેન ચ અરૂપભવેન ચાતિ? ન હેવં વત્તબ્બે…પે॰….
રૂપિનો ધમ્મા રૂપધાતુ, અરૂપિનો ધમ્મા અરૂપધાતુ, કામધાતુયા અત્થિ રૂપં વેદના સઞ્ઞા સઙ્ખારા વિઞ્ઞાણન્તિ? આમન્તા . સાવ કામધાતુ, સા રૂપધાતુ, સા અરૂપધાતૂતિ? ન હેવં વત્તબ્બે…પે॰… સાવ કામધાતુ, સા રૂપધાતુ, સા અરૂપધાતૂતિ? આમન્તા. કામભવેન સમન્નાગતો પુગ્ગલો તીહિ ભવેહિ સમન્નાગતો હોતિ – કામભવેન ચ રૂપભવેન ચ અરૂપભવેન ચાતિ? ન હેવં વત્તબ્બે…પે॰….
અરૂપધાતુકથા નિટ્ઠિતા.
૮. અટ્ઠમવગ્ગો
(૭૯) ૭. રૂપધાતુયાઆયતનકથા
૫૧૯. અત્થિ સળાયતનિકો અત્તભાવો રૂપધાતુયાતિ? આમન્તા. અત્થિ તત્થ ઘાનાયતનન્તિ? આમન્તા. અત્થિ તત્થ ગન્ધાયતનન્તિ? ન હેવં વત્તબ્બે…પે॰… અત્થિ તત્થ જિવ્હાયતનન્તિ? આમન્તા . અત્થિ તત્થ રસાયતનન્તિ? ન હેવં વત્તબ્બે…પે॰… અત્થિ તત્થ કાયાયતનન્તિ? આમન્તા. અત્થિ તત્થ ફોટ્ઠબ્બાયતનન્તિ? ન હેવં વત્તબ્બે…પે॰….
નત્થિ તત્થ ગન્ધાયતનન્તિ? આમન્તા. નત્થિ તત્થ ઘાનાયતનન્તિ? ન હેવં વત્તબ્બે…પે॰… નત્થિ તત્થ રસાયતનન્તિ? આમન્તા. નત્થિ તત્થ જિવ્હાયતનન્તિ? ન હેવં વત્તબ્બે…પે॰… નત્થિ તત્થ ફોટ્ઠબ્બાયતનન્તિ? આમન્તા . નત્થિ તત્થ કાયાયતનન્તિ? ન હેવં વત્તબ્બે…પે॰….
૫૨૦. અત્થિ તત્થ ચક્ખાયતનં, અત્થિ રૂપાયતનન્તિ? આમન્તા. અત્થિ તત્થ ઘાનાયતનં, અત્થિ ગન્ધાયતનન્તિ? ન હેવં વત્તબ્બે…પે॰… અત્થિ તત્થ ચક્ખાયતનં, અત્થિ રૂપાયતનન્તિ? આમન્તા. અત્થિ તત્થ જિવ્હાયતનં, અત્થિ રસાયતનં…પે॰… અત્થિ તત્થ કાયાયતનં, અત્થિ ફોટ્ઠબ્બાયતનન્તિ? ન હેવં વત્તબ્બે…પે॰… અત્થિ તત્થ સોતાયતનં, અત્થિ સદ્દાયતનં…પે॰… અત્થિ તત્થ મનાયતનં, અત્થિ ધમ્માયતનન્તિ? આમન્તા. અત્થિ તત્થ ઘાનાયતનં, અત્થિ ગન્ધાયતનન્તિ? ન હેવં વત્તબ્બે…પે॰… અત્થિ તત્થ મનાયતનં, અત્થિ ધમ્માયતનન્તિ? આમન્તા. અત્થિ તત્થ જિવ્હાયતનં, અત્થિ રસાયતનન્તિ…પે॰… અત્થિ તત્થ કાયાયતનં, અત્થિ ફોટ્ઠબ્બાયતનન્તિ? ન હેવં વત્તબ્બે…પે॰….
અત્થિ તત્થ ઘાનાયતનં, નત્થિ ગન્ધાયતનન્તિ? આમન્તા . અત્થિ તત્થ ચક્ખાયતનં, નત્થિ રૂપાયતનન્તિ? ન હેવં વત્તબ્બે…પે॰… અત્થિ તત્થ ઘાનાયતનં, નત્થિ ગન્ધાયતનન્તિ? આમન્તા. અત્થિ તત્થ સોતાયતનં, નત્થિ સદ્દાયતનં…પે॰… અત્થિ તત્થ મનાયતનં, નત્થિ ધમ્માયતનન્તિ? ન હેવં વત્તબ્બે…પે॰… અત્થિ તત્થ જિવ્હાયતનં, નત્થિ રસાયતનં…પે॰… અત્થિ તત્થ કાયાયતનં, નત્થિ ફોટ્ઠબ્બાયતનન્તિ? આમન્તા. અત્થિ તત્થ ચક્ખાયતનં, નત્થિ રૂપાયતનન્તિ? ન હેવં વત્તબ્બે…પે॰… અત્થિ તત્થ કાયાયતનં, નત્થિ ફોટ્ઠબ્બાયતનન્તિ? આમન્તા. અત્થિ તત્થ સોતાયતનં, નત્થિ સદ્દાયતનં …પે॰… અત્થિ તત્થ મનાયતનં, નત્થિ ધમ્માયતનન્તિ? ન હેવં વત્તબ્બે…પે॰….
૫૨૧. અત્થિ તત્થ ચક્ખાયતનં અત્થિ રૂપાયતનં, તેન ચક્ખુના તં રૂપં પસ્સતીતિ? આમન્તા. અત્થિ તત્થ ઘાનાયતનં અત્થિ ગન્ધાયતનં, તેન ઘાનેન તં ગન્ધં ઘાયતીતિ? ન હેવં વત્તબ્બે…પે॰… અત્થિ તત્થ ચક્ખાયતનં અત્થિ રૂપાયતનં, તેન ચક્ખુના તં રૂપં પસ્સતીતિ? આમન્તા. અત્થિ તત્થ જિવ્હાયતનં અત્થિ રસાયતનં, તાય જિવ્હાય તં રસં સાયતિ…પે॰… અત્થિ તત્થ કાયાયતનં અત્થિ ફોટ્ઠબ્બાયતનં, તેન કાયેન તં ફોટ્ઠબ્બં ફુસતીતિ? ન હેવં વત્તબ્બે…પે॰….
અત્થિ તત્થ સોતાયતનં અત્થિ સદ્દાયતનં…પે॰… અત્થિ તત્થ મનાયતનં અત્થિ ધમ્માયતનં, તેન મનેન તં ધમ્મં વિજાનાતીતિ? આમન્તા. અત્થિ તત્થ ઘાનાયતનં અત્થિ ગન્ધાયતનં, તેન ઘાનેન તં ગન્ધં ઘાયતીતિ? ન હેવં વત્તબ્બે…પે॰… અત્થિ તત્થ મનાયતનં અત્થિ ધમ્માયતનં, તેન મનેન તં ધમ્મં વિજાનાતીતિ? આમન્તા. અત્થિ તત્થ જિવ્હાયતનં અત્થિ રસાયતનં…પે॰… અત્થિ તત્થ કાયાયતનં અત્થિ ફોટ્ઠબ્બાયતનં, તેન કાયેન તં ફોટ્ઠબ્બં ફુસતીતિ? ન હેવં વત્તબ્બે…પે॰….
અત્થિ તત્થ ઘાનાયતનં અત્થિ ગન્ધાયતનં, ન ચ તેન ઘાનેન તં ગન્ધં ઘાયતીતિ? આમન્તા. અત્થિ તત્થ ચક્ખાયતનં અત્થિ રૂપાયતનં, ન ચ તેન ચક્ખુના તં રૂપં પસ્સતીતિ? ન હેવં વત્તબ્બે…પે॰… અત્થિ તત્થ ઘાનાયતનં અત્થિ ગન્ધાયતનં, ન ચ તેન ઘાનેન તં ગન્ધં ઘાયતીતિ? આમન્તા. અત્થિ તત્થ સોતાયતનં અત્થિ સદ્દાયતનં…પે॰… અત્થિ તત્થ મનાયતનં અત્થિ ધમ્માયતનં, ન ચ તેન મનેન તં ધમ્મં વિજાનાતીતિ? ન હેવં વત્તબ્બે…પે॰….
અત્થિ તત્થ જિવ્હાયતનં અત્થિ રસાયતનં…પે॰… અત્થિ તત્થ કાયાયતનં અત્થિ ફોટ્ઠબ્બાયતનં, ન ચ તેન કાયેન તં ફોટ્ઠબ્બં ફુસતીતિ? આમન્તા. અત્થિ તત્થ સોતાયતનં અત્થિ સદ્દાયતનં…પે॰… અત્થિ તત્થ મનાયતનં અત્થિ ધમ્માયતનં, ન ચ તેન મનેન તં ધમ્મં વિજાનાતીતિ? ન હેવં વત્તબ્બે…પે॰….
૫૨૨. અત્થિ તત્થ ઘાનાયતનં અત્થિ ગન્ધાયતનં, તેન ઘાનેન તં ગન્ધં ઘાયતીતિ? આમન્તા. અત્થિ તત્થ મૂલગન્ધો સારગન્ધો તચગન્ધો પત્તગન્ધો પુપ્ફગન્ધો ફલગન્ધો આમગન્ધો વિસ્સગન્ધો સુગન્ધો દુગ્ગન્ધોતિ? ન હેવં વત્તબ્બે…પે॰….
અત્થિ તત્થ જિવ્હાયતનં અત્થિ રસાયતનં, તાય જિવ્હાય તં રસં સાયતીતિ? આમન્તા. અત્થિ તત્થ મૂલરસો ખન્ધરસો તચરસો પત્તરસો પુપ્ફરસો ફલરસો અમ્બિલં મધુરં તિત્તકં કટુકં લોણિયં ખારિયં લમ્બિલં કસાવો સાદુ અસાદૂતિ? ન હેવં વત્તબ્બે…પે॰….
અત્થિ તત્થ કાયાયતનં અત્થિ ફોટ્ઠબ્બાયતનં, તેન કાયેન તં ફોટ્ઠબ્બં ફુસતીતિ? આમન્તા. અત્થિ તત્થ કક્ખળં મુદુકં સણ્હં ફરુસં સુખસમ્ફસ્સં દુક્ખસમ્ફસ્સં ગરુકં લહુકન્તિ? ન હેવં વત્તબ્બે…પે॰….
૫૨૩. ન વત્તબ્બં – ‘‘સળાયતનિકો અત્તભાવો રૂપધાતુયા’’તિ? આમન્તા. નનુ અત્થિ તત્થ ઘાનનિમિત્તં જિવ્હાનિમિત્તં કાયનિમિત્તન્તિ? આમન્તા. હઞ્ચિ અત્થિ તત્થ ઘાનનિમિત્તં જિવ્હાનિમિત્તં કાયનિમિત્તં, તેન વત રે વત્તબ્બે – ‘‘સળાયતનિકો અત્તભાવો રૂપધાતુયા’’તિ.
રૂપધાતુયા આયતનકથા નિટ્ઠિતા.
૮. અટ્ઠમવગ્ગો
(૮૦) ૮. અરૂપે રૂપકથા
૫૨૪. અત્થિ રૂપં અરૂપેસૂતિ? આમન્તા. રૂપભવો રૂપગતિ રૂપસત્તાવાસો રૂપસંસારો રૂપયોનિ રૂપત્તભાવપટિલાભોતિ? ન હેવં વત્તબ્બે…પે॰… નનુ અરૂપભવો અરૂપગતિ અરૂપસત્તાવાસો અરૂપસંસારો અરૂપયોનિ અરૂપત્તભાવપટિલાભોતિ? આમન્તા. હઞ્ચિ અરૂપભવો…પે॰… અરૂપત્તભાવપટિલાભો, નો ચ વત રે વત્તબ્બે – ‘‘અત્થિ રૂપં અરૂપેસૂ’’તિ.
અત્થિ રૂપં અરૂપેસૂતિ? આમન્તા. પઞ્ચવોકારભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? ન હેવં વત્તબ્બે…પે॰… નનુ ચતુવોકારભવો…પે॰… અત્તભાવપટિલાભોતિ? આમન્તા. હઞ્ચિ ચતુવોકારભવો ગતિ…પે॰… અત્તભાવપટિલાભો, નો ચ વત રે વત્તબ્બે – ‘‘અત્થિ રૂપં અરૂપેસૂ’’તિ.
૫૨૫. અત્થિ રૂપં રૂપધાતુયા, સો ચ રૂપભવો રૂપગતિ રૂપસત્તાવાસો રૂપસંસારો રૂપયોનિ રૂપત્તભાવપટિલાભોતિ? આમન્તા. અત્થિ રૂપં અરૂપેસુ, સો ચ રૂપભવો રૂપગતિ…પે॰… રૂપત્તભાવપટિલાભોતિ? ન હેવં વત્તબ્બે…પે॰… અત્થિ રૂપં રૂપધાતુયા, સો ચ પઞ્ચવોકારભવો ગતિ…પે॰… અત્તભાવપટિલાભોતિ? આમન્તા . અત્થિ રૂપં અરૂપેસુ, સો ચ પઞ્ચવોકારભવો ગતિ…પે॰… અત્તભાવપટિલાભોતિ? ન હેવં વત્તબ્બે…પે॰…. અત્થિ રૂપં અરૂપેસુ, સો ચ અરૂપભવો અરૂપગતિ અરૂપસત્તાવાસો અરૂપસંસારો અરૂપયોનિ અરૂપત્તભાવપટિલાભોતિ? આમન્તા. અત્થિ રૂપં રૂપધાતુયા અરૂપધાતુયા (સબ્બત્થ), સો ચ અરૂપભવો અરૂપગતિ…પે॰… અરૂપત્તભાવપટિલાભોતિ? ન હેવં વત્તબ્બે…પે॰… અત્થિ રૂપં અરૂપેસુ, સો ચ ચતુવોકારભવો ગતિ…પે॰… અત્તભાવપટિલાભોતિ? આમન્તા. અત્થિ રૂપં રૂપધાતુયા અરૂપધાતુયા (સબ્બત્થ), સો ચ ચતુવોકારભવો ગતિ…પે॰… અત્તભાવપટિલાભોતિ? ન હેવં વત્તબ્બે…પે॰….
૫૨૬. અત્થિ રૂપં અરૂપેસૂતિ? આમન્તા. નનુ રૂપાનં નિસ્સરણં અરૂપં ઇતિવુ॰ ૭૨; અ॰ નિ॰ ૫.૨૦૦; દી॰ નિ॰ ૩.૩૨૧ વુત્તં ભગવતાતિ? આમન્તા. હઞ્ચિ રૂપાનં નિસ્સરણં અરૂપં ઇતિવુ॰ ૭૨; અ॰ નિ॰ ૫.૨૦૦; દી॰ નિ॰ ૩.૩૨૧ વુત્તં ભગવતા, નો ચ વત રે વત્તબ્બે – ‘‘અત્થિ રૂપં અરૂપેસૂ’’તિ.
રૂપાનં નિસ્સરણં અરૂપં વુત્તં ભગવતા, અત્થિ રૂપં અરૂપેસૂતિ? આમન્તા . કામાનં નિસ્સરણં નેક્ખમ્મં વુત્તં ભગવતા, અત્થિ નેક્ખમ્મેસુ કામા, અત્થિ અનાસવેસુ આસવા, અત્થિ અપરિયાપન્નેસુ પરિયાપન્નાતિ? ન હેવં વત્તબ્બે…પે॰….
અરૂપે રૂપકથા નિટ્ઠિતા.
૮. અટ્ઠમવગ્ગો
(૮૧) ૯. રૂપં કમ્મન્તિકથા
૫૨૭. કુસલેન ચિત્તેન સમુટ્ઠિતં કાયકમ્મં રૂપં કુસલન્તિ? આમન્તા. સારમ્મણં, અત્થિ તસ્સ આવટ્ટના આભોગો સમન્નાહારો મનસિકારો ચેતના પત્થના પણિધીતિ? ન હેવં વત્તબ્બે…પે॰… નનુ અનારમ્મણં, નત્થિ તસ્સ આવટ્ટના આભોગો સમન્નાહારો મનસિકારો ચેતના પત્થના પણિધીતિ? આમન્તા. હઞ્ચિ અનારમ્મણં, નત્થિ તસ્સ આવટ્ટના…પે॰… પણિધીતિ, નો ચ વત રે વત્તબ્બે – ‘‘કુસલેન ચિત્તેન સમુટ્ઠિતં કાયકમ્મં રૂપં કુસલ’’ન્તિ.
કુસલેન ચિત્તેન સમુટ્ઠિતો ફસ્સો કુસલો સારમ્મણો, અત્થિ તસ્સ આવટ્ટના…પે॰… પણિધીતિ? આમન્તા. કુસલેન ચિત્તેન સમુટ્ઠિતં કાયકમ્મં રૂપં કુસલં સારમ્મણં, અત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰… કુસલેન ચિત્તેન સમુટ્ઠિતા વેદના…પે॰… સઞ્ઞા… ચેતના… સદ્ધા… વીરિયં… સતિ… સમાધિ…પે॰… પઞ્ઞા કુસલા સારમ્મણા, અત્થિ તાય આવટ્ટના…પે॰… પણિધીતિ? આમન્તા. કુસલેન ચિત્તેન સમુટ્ઠિતં કાયકમ્મં રૂપં કુસલં સારમ્મણં, અત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰….
કુસલેન ચિત્તેન સમુટ્ઠિતં કાયકમ્મં રૂપં કુસલં અનારમ્મણં, નત્થિ તસ્સ આવટ્ટના…પે॰… પણિધીતિ? આમન્તા. કુસલેન ચિત્તેન સમુટ્ઠિતો ફસ્સો કુસલો અનારમ્મણો, નત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰… કુસલેન ચિત્તેન સમુટ્ઠિતં કાયકમ્મં રૂપં કુસલં અનારમ્મણં, નત્થિ તસ્સ આવટ્ટના…પે॰… પણિધીતિ? આમન્તા. કુસલેન ચિત્તેન સમુટ્ઠિતા વેદના…પે॰… સઞ્ઞા… ચેતના… સદ્ધા… વીરિયં… સતિ… સમાધિ…પે॰… પઞ્ઞા કુસલા અનારમ્મણા, નત્થિ તાય આવટ્ટના…પે॰… પણિધીતિ? ન હેવં વત્તબ્બે…પે॰….
૫૨૮. કુસલેન ચિત્તેન સમુટ્ઠિતં કાયકમ્મં રૂપં કુસલન્તિ? આમન્તા. યં કિઞ્ચિ કુસલેન ચિત્તેન સમુટ્ઠિતં રૂપં સબ્બં તં કુસલન્તિ? ન હેવં વત્તબ્બે…પે॰….
કુસલેન ચિત્તેન સમુટ્ઠિતં કાયકમ્મં રૂપં કુસલન્તિ? આમન્તા. કુસલેન ચિત્તેન સમુટ્ઠિતં રૂપાયતનં કુસલન્તિ? ન હેવં વત્તબ્બે…પે॰… કુસલેન ચિત્તેન સમુટ્ઠિતં કાયકમ્મં રૂપં કુસલન્તિ? આમન્તા. કુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં…પે॰… પથવીધાતુ … આપોધાતુ… તેજોધાતુ…પે॰… વાયોધાતુ કુસલાતિ? ન હેવં વત્તબ્બે…પે॰….
કુસલેન ચિત્તેન સમુટ્ઠિતં રૂપાયતનં અબ્યાકતન્તિ? આમન્તા. કુસલેન ચિત્તેન સમુટ્ઠિતં કાયકમ્મં રૂપં અબ્યાકતન્તિ? ન હેવં વત્તબ્બે…પે॰… કુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં…પે॰… પથવીધાતુ… આપોધાતુ … તેજોધાતુ …પે॰… વાયોધાતુ અબ્યાકતાતિ? આમન્તા. કુસલેન ચિત્તેન સમુટ્ઠિતં કાયકમ્મં રૂપં અબ્યાકતન્તિ? ન હેવં વત્તબ્બે…પે॰….
૫૨૯. કુસલેન ચિત્તેન સમુટ્ઠિતં કાયકમ્મં રૂપં અનારમ્મણં કુસલન્તિ? આમન્તા. કુસલેન ચિત્તેન સમુટ્ઠિતં રૂપાયતનં અનારમ્મણં કુસલન્તિ? ન હેવં વત્તબ્બે…પે॰… કુસલેન ચિત્તેન સમુટ્ઠિતં કાયકમ્મં રૂપં અનારમ્મણં કુસલન્તિ? આમન્તા. કુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં…પે॰… પથવીધાતુ… આપોધાતુ… તેજોધાતુ…પે॰… વાયોધાતુ અનારમ્મણા કુસલાતિ? ન હેવં વત્તબ્બે…પે॰….
કુસલેન ચિત્તેન સમુટ્ઠિતં રૂપાયતનં અનારમ્મણં અબ્યાકતન્તિ? આમન્તા. કુસલેન ચિત્તેન સમુટ્ઠિતં કાયકમ્મં રૂપં અનારમ્મણં અબ્યાકતન્તિ? ન હેવં વત્તબ્બે…પે॰… કુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં … રસાયતનં… ફોટ્ઠબ્બાયતનં…પે॰… પથવીધાતુ… આપોધાતુ… તેજોધાતુ…પે॰… વાયોધાતુ અનારમ્મણા અબ્યાકતાતિ? આમન્તા. કુસલેન ચિત્તેન સમુટ્ઠિતં કાયકમ્મં રૂપં અનારમ્મણં અબ્યાકતન્તિ? ન હેવં વત્તબ્બે…પે॰….
૫૩૦. કુસલેન ચિત્તેન સમુટ્ઠિતં કાયકમ્મં રૂપં ફસ્સવિપ્પયુત્તં કુસલન્તિ? આમન્તા. કુસલેન ચિત્તેન સમુટ્ઠિતં રૂપાયતનં ફસ્સવિપ્પયુત્તં કુસલન્તિ? ન હેવં વત્તબ્બે…પે॰… કુસલેન ચિત્તેન સમુટ્ઠિતં કાયકમ્મં રૂપં ફસ્સવિપ્પયુત્તં કુસલન્તિ? આમન્તા. કુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં…પે॰… પથવીધાતુ… આપોધાતુ… તેજોધાતુ…પે॰… વાયોધાતુ ફસ્સવિપ્પયુત્તા કુસલાતિ? ન હેવં વત્તબ્બે…પે॰….
કુસલેન ચિત્તેન સમુટ્ઠિતં રૂપાયતનં ફસ્સવિપ્પયુત્તં અબ્યાકતન્તિ? આમન્તા. કુસલેન ચિત્તેન સમુટ્ઠિતં કાયકમ્મં રૂપં ફસ્સવિપ્પયુત્તં અબ્યાકતન્તિ? ન હેવં વત્તબ્બે…પે॰… કુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં…પે॰… પથવીધાતુ… આપોધાતુ… તેજોધાતુ…પે॰… વાયોધાતુ ફસ્સવિપ્પયુત્તા અબ્યાકતાતિ ? આમન્તા. કુસલેન ચિત્તેન સમુટ્ઠિતં કાયકમ્મં રૂપં ફસ્સવિપ્પયુત્તં અબ્યાકતન્તિ? ન હેવં વત્તબ્બે…પે॰….
૫૩૧. કુસલેન ચિત્તેન સમુટ્ઠિતં કાયકમ્મં રૂપં અનારમ્મણં ફસ્સવિપ્પયુત્તં કુસલન્તિ? આમન્તા. કુસલેન ચિત્તેન સમુટ્ઠિતં રૂપાયતનં અનારમ્મણં ફસ્સવિપ્પયુત્તં કુસલન્તિ? ન હેવં વત્તબ્બે…પે॰… કુસલેન ચિત્તેન સમુટ્ઠિતં કાયકમ્મં રૂપં અનારમ્મણં ફસ્સવિપ્પયુત્તં કુસલન્તિ? આમન્તા. કુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં…પે॰… પથવીધાતુ… આપોધાતુ… તેજોધાતુ…પે॰… વાયોધાતુ અનારમ્મણા ફસ્સવિપ્પયુત્તા કુસલાતિ? ન હેવં વત્તબ્બે…પે॰….
કુસલેન ચિત્તેન સમુટ્ઠિતં રૂપાયતનં અનારમ્મણં ફસ્સવિપ્પયુત્તં અબ્યાકતન્તિ? આમન્તા. કુસલેન ચિત્તેન સમુટ્ઠિતં કાયકમ્મં રૂપં અનારમ્મણં ફસ્સવિપ્પયુત્તં અબ્યાકતન્તિ? ન હેવં વત્તબ્બે…પે॰… કુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં…પે॰… પથવીધાતુ… આપોધાતુ… તેજોધાતુ…પે॰… વાયોધાતુ અનારમ્મણા ફસ્સવિપ્પયુત્તા અબ્યાકતાતિ? આમન્તા. કુસલેન ચિત્તેન સમુટ્ઠિતં કાયકમ્મં રૂપં અનારમ્મણં ફસ્સવિપ્પયુત્તં અબ્યાકતન્તિ? ન હેવં વત્તબ્બે…પે॰….
૫૩૨. કુસલેન ચિત્તેન સમુટ્ઠિતં વચીકમ્મં રૂપં કુસલન્તિ? આમન્તા. સારમ્મણં, અત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰… નનુ અનારમ્મણં , નત્થિ તસ્સ આવટ્ટના…પે॰… પણિધીતિ? આમન્તા. હઞ્ચિ અનારમ્મણં, નત્થિ તસ્સ આવટ્ટના…પે॰… પણિધિ; નો ચ વત રે વત્તબ્બે – ‘‘કુસલેન ચિત્તેન સમુટ્ઠિતં વચીકમ્મં રૂપં કુસલ’’ન્તિ.
કુસલેન ચિત્તેન સમુટ્ઠિતો ફસ્સો કુસલો સારમ્મણો, અત્થિ તસ્સ આવટ્ટના…પે॰… પણિધીતિ? આમન્તા. કુસલેન ચિત્તેન સમુટ્ઠિતં વચીકમ્મં રૂપં કુસલં સારમ્મણં, અત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰… કુસલેન ચિત્તેન સમુટ્ઠિતા વેદના…પે॰… સઞ્ઞા… ચેતના… સદ્ધા… વીરિયં… સતિ… સમાધિ…પે॰… પઞ્ઞા કુસલા સારમ્મણા, અત્થિ તાય આવટ્ટના…પે॰… પણિધીતિ? આમન્તા. કુસલેન ચિત્તેન સમુટ્ઠિતં વચીકમ્મં રૂપં કુસલં સારમ્મણં, અત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰….
કુસલેન ચિત્તેન સમુટ્ઠિતં વચીકમ્મં રૂપં કુસલં અનારમ્મણં, નત્થિ તસ્સ આવટ્ટના…પે॰… પણિધીતિ? આમન્તા. કુસલેન ચિત્તેન સમુટ્ઠિતો ફસ્સો કુસલો અનારમ્મણો, નત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰… કુસલેન ચિત્તેન સમુટ્ઠિતં વચીકમ્મં રૂપં કુસલં અનારમ્મણં, નત્થિ તસ્સ આવટ્ટના…પે॰… પણિધીતિ? આમન્તા. કુસલેન ચિત્તેન સમુટ્ઠિતા વેદના…પે॰… સઞ્ઞા… ચેતના… સદ્ધા… વીરિયં… સતિ… સમાધિ…પે॰… પઞ્ઞા કુસલા અનારમ્મણા, નત્થિ તાય આવટ્ટના…પે॰… પણિધીતિ? ન હેવં વત્તબ્બે…પે॰….
કુસલેન ચિત્તેન સમુટ્ઠિતં વચીકમ્મં રૂપં કુસલન્તિ? આમન્તા. યં કિઞ્ચિ કુસલેન ચિત્તેન સમુટ્ઠિતં રૂપં સબ્બં તં કુસલન્તિ? ન હેવં વત્તબ્બે…પે॰… યથા કાયકમ્મં તથા વચીકમ્મન્તિ.
૫૩૩. અકુસલેન ચિત્તેન સમુટ્ઠિતં કાયકમ્મં રૂપં અકુસલન્તિ? આમન્તા . સારમ્મણં, અત્થિ તસ્સ આવટ્ટના આભોગો સમન્નાહારો મનસિકારો ચેતના પત્થના પણિધીતિ? ન હેવં વત્તબ્બે…પે॰… નનુ અનારમ્મણં, નત્થિ તસ્સ આવટ્ટના આભોગો સમન્નાહારો મનસિકારો ચેતના પત્થના પણિધીતિ? આમન્તા. હઞ્ચિ અનારમ્મણં, નત્થિ તસ્સ આવટ્ટના આભોગો સમન્નાહારો મનસિકારો ચેતના પત્થના પણિધિ; નો ચ વત રે વત્તબ્બે – ‘‘અકુસલેન ચિત્તેન સમુટ્ઠિતં કાયકમ્મં રૂપં અકુસલ’’ન્તિ.
અકુસલેન ચિત્તેન સમુટ્ઠિતો ફસ્સો અકુસલો સારમ્મણો, અત્થિ તસ્સ આવટ્ટના…પે॰… પણિધીતિ? આમન્તા. અકુસલેન ચિત્તેન સમુટ્ઠિતં કાયકમ્મં રૂપં અકુસલં સારમ્મણં, અત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰… અકુસલેન ચિત્તેન સમુટ્ઠિતા વેદના…પે॰… સઞ્ઞા… ચેતના… રાગો… દોસો… મોહો… માનો… દિટ્ઠિ… વિચિકિચ્છા… થિનં… ઉદ્ધચ્ચં… અહિરિકં…પે॰… અનોત્તપ્પં અકુસલં સારમ્મણં, અત્થિ તસ્સ આવટ્ટના…પે॰… પણિધીતિ? આમન્તા. અકુસલેન ચિત્તેન સમુટ્ઠિતં કાયકમ્મં રૂપં અકુસલં સારમ્મણં, અત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰….
અકુસલેન ચિત્તેન સમુટ્ઠિતં કાયકમ્મં રૂપં અકુસલં અનારમ્મણં, નત્થિ તસ્સ આવટ્ટના…પે॰… પણિધીતિ? આમન્તા. અકુસલેન ચિત્તેન સમુટ્ઠિતો ફસ્સો અકુસલો અનારમ્મણો, નત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰… અકુસલેન ચિત્તેન સમુટ્ઠિતં કાયકમ્મં રૂપં અકુસલં અનારમ્મણં, નત્થિ તસ્સ આવટ્ટના…પે॰… પણિધીતિ? આમન્તા. અકુસલેન ચિત્તેન સમુટ્ઠિતા વેદના…પે॰… સઞ્ઞા… ચેતના… રાગો… દોસો… મોહો… માનો… દિટ્ઠિ… વિચિકિચ્છા… થિનં… ઉદ્ધચ્ચં… અહિરિકં…પે॰… અનોત્તપ્પં અકુસલં અનારમ્મણં, નત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰….
અકુસલેન ચિત્તેન સમુટ્ઠિતં કાયકમ્મં રૂપં અકુસલન્તિ? આમન્તા . યં કિઞ્ચિ અકુસલેન ચિત્તેન સમુટ્ઠિતં રૂપં સબ્બં તં અકુસલન્તિ? ન હેવં વત્તબ્બે…પે॰….
૫૩૪. અકુસલેન ચિત્તેન સમુટ્ઠિતં વચીકમ્મં રૂપં અકુસલન્તિ? આમન્તા. સારમ્મણં, અત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰… નનુ અનારમ્મણં, નત્થિ તસ્સ આવટ્ટના…પે॰… પણિધીતિ? આમન્તા. હઞ્ચિ અનારમ્મણં, નત્થિ તસ્સ આવટ્ટના…પે॰… પણિધિ; નો ચ વત રે વત્તબ્બે – ‘‘અકુસલેન ચિત્તેન સમુટ્ઠિતં વચીકમ્મં રૂપં અકુસલ’’ન્તિ.
અકુસલેન ચિત્તેન સમુટ્ઠિતો ફસ્સો અકુસલો સારમ્મણો, અત્થિ તસ્સ આવટ્ટના…પે॰… પણિધીતિ? આમન્તા. અકુસલેન ચિત્તેન સમુટ્ઠિતં વચીકમ્મં રૂપં અકુસલં સારમ્મણં, અત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰… અકુસલેન ચિત્તેન સમુટ્ઠિતા વેદના…પે॰… સઞ્ઞા … ચેતના… રાગો… દોસો… મોહો… માનો… દિટ્ઠિ… વિચિકિચ્છા… થિનં… ઉદ્ધચ્ચં… અહિરિકં…પે॰… અનોત્તપ્પં અકુસલં સારમ્મણં, અત્થિ તસ્સ આવટ્ટના…પે॰… પણિધીતિ? આમન્તા. અકુસલેન ચિત્તેન સમુટ્ઠિતં વચીકમ્મં રૂપં અકુસલં સારમ્મણં, અત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰….
અકુસલેન ચિત્તેન સમુટ્ઠિતં વચીકમ્મં રૂપં અકુસલં અનારમ્મણં, નત્થિ તસ્સ આવટ્ટના…પે॰… પણિધીતિ? આમન્તા. અકુસલેન ચિત્તેન સમુટ્ઠિતો ફસ્સો અકુસલો અનારમ્મણો, નત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰… અકુસલેન ચિત્તેન સમુટ્ઠિતં વચીકમ્મં રૂપં અકુસલં અનારમ્મણં, નત્થિ તસ્સ આવટ્ટના…પે॰… પણિધીતિ? આમન્તા. અકુસલેન ચિત્તેન સમુટ્ઠિતા વેદના…પે॰… સઞ્ઞા… ચેતના… રાગો… દોસો… મોહો… માનો… દિટ્ઠિ… વિચિકિચ્છા… થિનં… ઉદ્ધચ્ચં… અહિરિકં…પે॰… અનોત્તપ્પં અકુસલં અનારમ્મણં, નત્થિ તસ્સ આવટ્ટના…પે॰… પણિધીતિ? ન હેવં વત્તબ્બે…પે॰….
અકુસલેન ચિત્તેન સમુટ્ઠિતં વચીકમ્મં રૂપં અકુસલન્તિ? આમન્તા. યં કિઞ્ચિ અકુસલેન ચિત્તેન સમુટ્ઠિતં રૂપં સબ્બં તં અકુસલન્તિ? ન હેવં વત્તબ્બે…પે॰….
૫૩૫. અકુસલેન ચિત્તેન સમુટ્ઠિતં વચીકમ્મં રૂપં અકુસલન્તિ? આમન્તા. અકુસલેન ચિત્તેન સમુટ્ઠિતં રૂપાયતનં અકુસલન્તિ? ન હેવં વત્તબ્બે…પે॰… અકુસલેન ચિત્તેન સમુટ્ઠિતં વચીકમ્મં રૂપં અકુસલન્તિ? આમન્તા. અકુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં…પે॰… પથવીધાતુ… આપોધાતુ… તેજોધાતુ…પે॰… વાયોધાતુ અસુચિ અસ્સુ લોહિતં સેદો અકુસલોતિ? ન હેવં વત્તબ્બે…પે॰….
અકુસલેન ચિત્તેન સમુટ્ઠિતં રૂપાયતનં અબ્યાકતન્તિ? આમન્તા . અકુસલેન ચિત્તેન સમુટ્ઠિતં વચીકમ્મં રૂપં અબ્યાકતન્તિ ? ન હેવં વત્તબ્બે…પે॰… અકુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં…પે॰… પથવીધાતુ… આપોધાતુ… તેજોધાતુ…પે॰… વાયોધાતુ અસુચિ અસ્સુ લોહિતં સેદો અબ્યાકતોતિ? આમન્તા. અકુસલેન ચિત્તેન સમુટ્ઠિતં વચીકમ્મં રૂપં અબ્યાકતન્તિ? ન હેવં વત્તબ્બે…પે॰….
૫૩૬. અકુસલેન ચિત્તેન સમુટ્ઠિતં વચીકમ્મં રૂપં અનારમ્મણં અકુસલન્તિ? આમન્તા. અકુસલેન ચિત્તેન સમુટ્ઠિતં રૂપાયતનં અનારમ્મણં અકુસલન્તિ? ન હેવં વત્તબ્બે…પે॰… અકુસલેન ચિત્તેન સમુટ્ઠિતં વચીકમ્મં રૂપં અનારમ્મણં અકુસલન્તિ? આમન્તા. અકુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં…પે॰… રસાયતનં…પે॰… ફોટ્ઠબ્બાયતનં… પથવીધાતુ… આપોધાતુ… તેજોધાતુ…પે॰… વાયોધાતુ અસુચિ અસ્સુ લોહિતં સેદો અનારમ્મણો અકુસલોતિ? ન હેવં વત્તબ્બે…પે॰….
અકુસલેન ચિત્તેન સમુટ્ઠિતં રૂપાયતનં અનારમ્મણં અબ્યાકતન્તિ? આમન્તા. અકુસલેન ચિત્તેન સમુટ્ઠિતં વચીકમ્મં રૂપં અનારમ્મણં અબ્યાકતન્તિ? ન હેવં વત્તબ્બે…પે॰… અકુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં…પે॰… પથવીધાતુ… આપોધાતુ… તેજોધાતુ…પે॰… વાયોધાતુ અસુચિ અસ્સુ લોહિતં સેદો અનારમ્મણો અબ્યાકતોતિ? આમન્તા. અકુસલેન ચિત્તેન સમુટ્ઠિતં વચીકમ્મં રૂપં અનારમ્મણં અબ્યાકતન્તિ? ન હેવં વત્તબ્બે…પે॰….
૫૩૭. અકુસલેન ચિત્તેન સમુટ્ઠિતં વચીકમ્મં રૂપં ફસ્સવિપ્પયુત્તં અકુસલન્તિ? આમન્તા. અકુસલેન ચિત્તેન સમુટ્ઠિતં રૂપાયતનં ફસ્સવિપ્પયુત્તં અકુસલન્તિ? ન હેવં વત્તબ્બે…પે॰… અકુસલેન ચિત્તેન સમુટ્ઠિતં વચીકમ્મં રૂપં ફસ્સવિપ્પયુત્તં અકુસલન્તિ? આમન્તા. અકુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં… પથવીધાતુ… આપોધાતુ… તેજોધાતુ…પે॰… વાયોધાતુ અસુચિ અસ્સુ લોહિતં સેદો ફસ્સવિપ્પયુત્તો અકુસલોતિ? ન હેવં વત્તબ્બે…પે॰….
અકુસલેન ચિત્તેન સમુટ્ઠિતં રૂપાયતનં ફસ્સવિપ્પયુત્તં અબ્યાકતન્તિ? આમન્તા. અકુસલેન ચિત્તેન સમુટ્ઠિતં વચીકમ્મં રૂપં અનારમ્મણં ફસ્સવિપ્પયુત્તં અબ્યાકતન્તિ? ન હેવં વત્તબ્બે…પે॰… અકુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં… પથવીધાતુ… આપોધાતુ… તેજોધાતુ…પે॰… વાયોધાતુ અસુચિ અસ્સુ લોહિતં સેદો અનારમ્મણો ફસ્સવિપ્પયુત્તો અબ્યાકતોતિ? આમન્તા. અકુસલેન ચિત્તેન સમુટ્ઠિતં વચીકમ્મં રૂપં અનારમ્મણં ફસ્સવિપ્પયુત્તં અબ્યાકતન્તિ? ન હેવં વત્તબ્બે…પે॰….
અકુસલેન ચિત્તેન સમુટ્ઠિતં વચીકમ્મં રૂપં અનારમ્મણં ફસ્સવિપ્પયુત્તં અકુસલન્તિ? આમન્તા. અકુસલેન ચિત્તેન સમુટ્ઠિતં રૂપાયતનં અનારમ્મણં ફસ્સવિપ્પયુત્તં અકુસલન્તિ? ન હેવં વત્તબ્બે…પે॰… અકુસલેન ચિત્તેન સમુટ્ઠિતં વચીકમ્મં રૂપં અનારમ્મણં ફસ્સવિપ્પયુત્તં અકુસલન્તિ? આમન્તા. અકુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં… પથવીધાતુ… આપોધાતુ… તેજોધાતુ…પે॰… વાયોધાતુ અસુચિ અસ્સુ લોહિતં સેદો અનારમ્મણો ફસ્સવિપ્પયુત્તો અકુસલોતિ? ન હેવં વત્તબ્બે…પે॰….
અકુસલેન ચિત્તેન સમુટ્ઠિતં રૂપાયતનં અનારમ્મણં ફસ્સવિપ્પયુત્તં અબ્યાકતન્તિ? આમન્તા. અકુસલેન ચિત્તેન સમુટ્ઠિતં વચીકમ્મં રૂપં અનારમ્મણં ફસ્સવિપ્પયુત્તં અબ્યાકતન્તિ? ન હેવં વત્તબ્બે…પે॰… અકુસલેન ચિત્તેન સમુટ્ઠિતં સદ્દાયતનં…પે॰… ગન્ધાયતનં… રસાયતનં… ફોટ્ઠબ્બાયતનં… પથવીધાતુ… આપોધાતુ… તેજોધાતુ…પે॰… વાયોધાતુ અસુચિ અસ્સુ લોહિતં સેદો અનારમ્મણો ફસ્સવિપ્પયુત્તો અબ્યાકતોતિ? આમન્તા. અકુસલેન ચિત્તેન સમુટ્ઠિતં વચીકમ્મં રૂપં અનારમ્મણં ફસ્સવિપ્પયુત્તં અબ્યાકતન્તિ? ન હેવં વત્તબ્બે…પે॰….
૫૩૮. ન વત્તબ્બં – ‘‘રૂપં કુસલમ્પિ અકુસલમ્પી’’તિ? આમન્તા. નનુ કાયકમ્મં વચીકમ્મં કુસલમ્પિ અકુસલમ્પીતિ? આમન્તા. હઞ્ચિ કાયકમ્મં વચીકમ્મં કુસલમ્પિ અકુસલમ્પિ, તેન વત રે વત્તબ્બે – ‘‘રૂપં કુસલમ્પિ અકુસલમ્પી’’તિ.
રૂપં કુસલમ્પિ અકુસલમ્પીતિ? આમન્તા. ચક્ખાયતનં કુસલમ્પિ અકુસલમ્પીતિ? ન હેવં વત્તબ્બે…પે॰… રૂપં કુસલમ્પિ અકુસલમ્પીતિ? આમન્તા. સોતાયતનં…પે॰… ઘાનાયતનં… જિવ્હાયતનં… કાયાયતનં… રૂપાયતનં… સદ્દાયતનં… ગન્ધાયતનં… રસાયતનં … ફોટ્ઠબ્બાયતનં… પથવીધાતુ… આપોધાતુ… તેજોધાતુ…પે॰… વાયોધાતુ અસુચિ અસ્સુ લોહિતં સેદો કુસલોપિ અકુસલોપીતિ? ન હેવં વત્તબ્બે…પે॰….
કાયો રૂપં, કાયકમ્મં રૂપન્તિ? આમન્તા. મનો રૂપં, મનોકમ્મં રૂપન્તિ? ન હેવં વત્તબ્બે …પે॰… મનો અરૂપં, મનોકમ્મં અરૂપન્તિ? આમન્તા. કાયો અરૂપં, કાયકમ્મં અરૂપન્તિ? ન હેવં વત્તબ્બે…પે॰….
કાયો રૂપન્તિ, કાયકમ્મં રૂપન્તિ? આમન્તા. ચક્ખાયતનં રૂપન્તિ, ચક્ખુવિઞ્ઞાણં રૂપન્તિ? ન હેવં વત્તબ્બે…પે॰… કાયો રૂપન્તિ, કાયકમ્મં રૂપન્તિ? આમન્તા. સોતાયતનં રૂપન્તિ, સોતવિઞ્ઞાણં રૂપન્તિ? ન હેવં વત્તબ્બે…પે॰… કાયો રૂપન્તિ, કાયકમ્મં રૂપન્તિ? આમન્તા. ઘાનાયતનં રૂપન્તિ, ઘાનવિઞ્ઞાણં રૂપન્તિ? ન હેવં વત્તબ્બે…પે॰… કાયો રૂપન્તિ, કાયકમ્મં રૂપન્તિ? આમન્તા. જિવ્હાયતનં રૂપન્તિ, જિવ્હાવિઞ્ઞાણં રૂપન્તિ ? ન હેવં વત્તબ્બે…પે॰… કાયો રૂપન્તિ, કાયકમ્મં રૂપન્તિ? આમન્તા. કાયાયતનં રૂપન્તિ, કાયવિઞ્ઞાણં રૂપન્તિ? ન હેવં વત્તબ્બે…પે॰….
૫૩૯. રૂપં કમ્મન્તિ? આમન્તા. નનુ વુત્તં ભગવતા – ‘‘ચેતનાહં, ભિક્ખવે, કમ્મં વદામિ; ચેતયિત્વા કમ્મં કરોતિ કાયેન વાચાય મનસા’’તિ અ॰ નિ॰ ૬.૬૩ નિબ્બેધિકસુત્તે! અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘રૂપં કમ્મ’’ન્તિ.
રૂપં કમ્મન્તિ? આમન્તા. નનુ વુત્તં ભગવતા – ‘‘કાયે વા, આનન્દ હાનન્દ (સં॰ નિ॰ ૨.૨૫), સતિ કાયસઞ્ચેતનાહેતુ ઉપ્પજ્જતિ અજ્ઝત્તં સુખદુક્ખં; વાચાય વા, આનન્દ હાનન્દ (સં॰ નિ॰ ૨.૨૫), સતિ વચીસઞ્ચેતનાહેતુ ઉપ્પજ્જતિ અજ્ઝત્તં સુખદુક્ખં; મને વા, આનન્દ હાનન્દ (સં॰ નિ॰ ૨.૨૫), સતિ મનોસઞ્ચેતનાહેતુ ઉપ્પજ્જતિ અજ્ઝત્તં સુખદુક્ખ’’ન્તિ સં॰ નિ॰ ૨.૨૫; અ॰ નિ॰ ૪.૧૭૧! અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘રૂપં કમ્મ’’ન્તિ.
રૂપં કમ્મન્તિ? આમન્તા. નનુ વુત્તં ભગવતા – ‘‘તિવિધા, ભિક્ખવે, કાયસઞ્ચેતના અકુસલં કાયકમ્મં દુક્ખુદ્રયં દુક્ખવિપાકં; ચતુબ્બિધા, ભિક્ખવે, વચીસઞ્ચેતના અકુસલં વચીકમ્મં દુક્ખુદ્રયં દુક્ખવિપાકં; તિવિધા, ભિક્ખવે, મનોસઞ્ચેતના અકુસલં મનોકમ્મં દુક્ખુદ્રયં દુક્ખવિપાકં; તિવિધા, ભિક્ખવે, કાયસઞ્ચેતના કુસલં કાયકમ્મં સુખુદ્રયં સુખવિપાકં; ચતુબ્બિધા, ભિક્ખવે, વચીસઞ્ચેતના કુસલં વચીકમ્મં સુખુદ્રયં સુખવિપાકં; તિવિધા , ભિક્ખવે, મનોસઞ્ચેતના કુસલં મનોકમ્મં સુખુદ્રયં સુખવિપાક’’ન્તિ અ॰ નિ॰ ૧૦.૨૧૭ થોકં પન વિસદિસં! અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘રૂપં કમ્મ’’ન્તિ.
રૂપં કમ્મન્તિ? આમન્તા. નનુ વુત્તં ભગવતા – ‘‘સચાયં, આનન્દ, સમિદ્ધિ મોઘપુરિસો પાટલિપુત્તસ્સ પોતલિપુત્તસ્સ (મ॰ નિ॰ ૩.૩૦૦) પરિબ્બાજકસ્સ એવં પુટ્ઠો એવં બ્યાકરેય્ય – ‘સઞ્ચેતનિયં , આવુસો પાટલિપુત્ત, કમ્મં કત્વા કાયેન વાચાય મનસા સુખવેદનિયં સુખં સો વેદયતિ; સઞ્ચેતનિયં, આવુસો પાટલિપુત્ત, કમ્મં કત્વા કાયેન વાચાય મનસા દુક્ખવેદનિયં દુક્ખં સો વેદયતિ; સઞ્ચેતનિયં, આવુસો પાટલિપુત્ત, કમ્મં કત્વા કાયેન વાચાય મનસા અદુક્ખમસુખવેદનિયં અદુક્ખમસુખં સો વેદયતી’તિ, એવં બ્યાકરમાનો ખો, આનન્દ, સમિદ્ધિ મોઘપુરિસો પાટલિપુત્તસ્સ પરિબ્બાજકસ્સ સમ્મા બ્યાકરમાનો બ્યાકરેય્યા’’તિ મ॰ નિ॰ ૩.૩૦૦! અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘રૂપં કમ્મ’’ન્તિ.
રૂપં કમ્મન્તિકથા નિટ્ઠિતા.
૮. અટ્ઠમવગ્ગો
(૮૨) ૧૦. જીવિતિન્દ્રિયકથા
૫૪૦. નત્થિ રૂપજીવિતિન્દ્રિયન્તિ? આમન્તા. નત્થિ રૂપીનં ધમ્માનં આયુ ઠિતિ યપના યાપના ઇરિયના વત્તના પાલનાતિ? ન હેવં વત્તબ્બે…પે॰… અત્થિ રૂપીનં ધમ્માનં આયુ ઠિતિ યપના યાપના ઇરિયના વત્તના પાલનાતિ? આમન્તા. હઞ્ચિ અત્થિ રૂપીનં ધમ્માનં આયુ ઠિતિ યપના યાપના ઇરિયના વત્તના પાલના, નો ચ વત રે વત્તબ્બે – ‘‘નત્થિ રૂપજીવિતિન્દ્રિય’’ન્તિ.
અત્થિ અરૂપીનં ધમ્માનં આયુ ઠિતિ યપના યાપના ઇરિયના વત્તના પાલના, અત્થિ અરૂપજીવિતિન્દ્રિયન્તિ? આમન્તા. અત્થિ રૂપીનં ધમ્માનં આયુ ઠિતિ યપના યાપના ઇરિયના વત્તના પાલના, અત્થિ રૂપજીવિતિન્દ્રિયન્તિ? ન હેવં વત્તબ્બે…પે॰… અત્થિ રૂપીનં ધમ્માનં આયુ ઠિતિ યપના યાપના ઇરિયના વત્તના પાલના, નત્થિ રૂપજીવિતિન્દ્રિયન્તિ? આમન્તા . અત્થિ અરૂપીનં ધમ્માનં આયુ ઠિતિ યપના યાપના ઇરિયના વત્તના પાલના, નત્થિ અરૂપજીવિતિન્દ્રિયન્તિ? ન હેવં વત્તબ્બે…પે॰….
અરૂપીનં ધમ્માનં આયુ અરૂપજીવિતિન્દ્રિયન્તિ? આમન્તા. રૂપીનં ધમ્માનં આયુ રૂપજીવિતિન્દ્રિયન્તિ? ન હેવં વત્તબ્બે…પે॰… રૂપીનં ધમ્માનં આયુ ન વત્તબ્બં – ‘‘રૂપજીવિતિન્દ્રિય’’ન્તિ? આમન્તા. અરૂપીનં ધમ્માનં આયુ ન વત્તબ્બં – ‘‘અરૂપજીવિતિન્દ્રિય’’ન્તિ? ન હેવં વત્તબ્બે…પે॰….
૫૪૧. રૂપીનં ધમ્માનં આયુ અરૂપજીવિતિન્દ્રિયન્તિ? આમન્તા. અરૂપીનં ધમ્માનં આયુ રૂપજીવિતિન્દ્રિયન્તિ? ન હેવં વત્તબ્બે…પે॰….
અરૂપીનં ધમ્માનં આયુ ન વત્તબ્બં – ‘‘રૂપજીવિતિન્દ્રિય’’ન્તિ? આમન્તા. રૂપીનં ધમ્માનં આયુ ન વત્તબ્બં – ‘‘અરૂપજીવિતિન્દ્રિય’’ન્તિ? ન હેવં વત્તબ્બે…પે॰….
રૂપીનઞ્ચ અરૂપીનઞ્ચ ધમ્માનં આયુ અરૂપજીવિતિન્દ્રિયન્તિ? આમન્તા. રૂપીનઞ્ચ અરૂપીનઞ્ચ ધમ્માનં આયુ રૂપજીવિતિન્દ્રિયન્તિ? ન હેવં વત્તબ્બે…પે॰….
રૂપીનઞ્ચ અરૂપીનઞ્ચ ધમ્માનં આયુ ન વત્તબ્બં – ‘‘રૂપજીવિતિન્દ્રિય’’ન્તિ? આમન્તા. રૂપીનઞ્ચ અરૂપીનઞ્ચ ધમ્માનં આયુ ન વત્તબ્બં – ‘‘અરૂપજીવિતિન્દ્રિય’’ન્તિ? ન હેવં વત્તબ્બે…પે॰… નત્થિ રૂપજીવિતિન્દ્રિયન્તિ? આમન્તા. નિરોધં સમાપન્નસ્સ નત્થિ જીવિતિન્દ્રિયન્તિ? ન હેવં વત્તબ્બે…પે॰….
૫૪૨. નિરોધં સમાપન્નસ્સ અત્થિ જીવિતિન્દ્રિયન્તિ? આમન્તા. હઞ્ચિ નિરોધં સમાપન્નસ્સ અત્થિ જીવિતિન્દ્રિયં, નો ચ વત રે વત્તબ્બે – ‘‘નત્થિ રૂપજીવિતિન્દ્રિય’’ન્તિ.
નિરોધં સમાપન્નસ્સ અત્થિ જીવિતિન્દ્રિયન્તિ? આમન્તા. કતમક્ખન્ધપરિયાપન્નન્તિ? સઙ્ખારક્ખન્ધપરિયાપન્નન્તિ. નિરોધં સમાપન્નસ્સ અત્થિ સઙ્ખારક્ખન્ધોતિ? ન હેવં વત્તબ્બે…પે॰….
નિરોધં સમાપન્નસ્સ અત્થિ સઙ્ખારક્ખન્ધોતિ? આમન્તા. નિરોધં સમાપન્નસ્સ અત્થિ વેદનાક્ખન્ધો…પે॰… સઞ્ઞાક્ખન્ધો…પે॰… વિઞ્ઞાણક્ખન્ધોતિ? ન હેવં વત્તબ્બે…પે॰….
નિરોધં સમાપન્નસ્સ અત્થિ વેદનાક્ખન્ધો…પે॰… સઞ્ઞાક્ખન્ધો…પે॰… વિઞ્ઞાણક્ખન્ધોતિ? આમન્તા. ન નિરોધં સમાપન્નોતિ? ન હેવં વત્તબ્બે…પે॰….
૫૪૩. નત્થિ રૂપજીવિતિન્દ્રિયન્તિ? આમન્તા. અસઞ્ઞસત્તાનં નત્થિ જીવિતિન્દ્રિયન્તિ? ન હેવં વત્તબ્બે…પે॰….
અસઞ્ઞસત્તાનં અત્થિ જીવિતિન્દ્રિયન્તિ? આમન્તા. હઞ્ચિ અસઞ્ઞસત્તાનં અત્થિ જીવિતિન્દ્રિયં, નો ચ વત રે વત્તબ્બે – ‘‘નત્થિ રૂપજીવિતિન્દ્રિય’’ન્તિ. અસઞ્ઞસત્તાનં અત્થિ જીવિતિન્દ્રિયન્તિ? આમન્તા. કતમક્ખન્ધપરિયાપન્નન્તિ? સઙ્ખારક્ખન્ધપરિયાપન્નન્તિ. અસઞ્ઞસત્તાનં અત્થિ સઙ્ખારક્ખન્ધોતિ? ન હેવં વત્તબ્બે…પે॰….
અસઞ્ઞસત્તાનં અત્થિ સઙ્ખારક્ખન્ધોતિ? આમન્તા. અસઞ્ઞસત્તાનં અત્થિ વેદનાક્ખન્ધો…પે॰… સઞ્ઞાક્ખન્ધો…પે॰… વિઞ્ઞાણક્ખન્ધોતિ? ન હેવં વત્તબ્બે…પે॰….
અસઞ્ઞસત્તાનં અત્થિ વેદનાક્ખન્ધો…પે॰… સઞ્ઞાક્ખન્ધો…પે॰… વિઞ્ઞાણક્ખન્ધોતિ? આમન્તા. પઞ્ચવોકારભવોતિ? ન હેવં વત્તબ્બે…પે॰….
૫૪૪. ઉપપત્તેસિયેન ચિત્તેન સમુટ્ઠિતં જીવિતિન્દ્રિયં ઉપપત્તેસિયે ચિત્તે ભિજ્જમાને એકદેસં ભિજ્જતીતિ? આમન્તા. ઉપપત્તેસિયેન ચિત્તેન સમુટ્ઠિતો ફસ્સો ઉપપત્તેસિયે ચિત્તે ભિજ્જમાને એકદેસો ભિજ્જતીતિ? ન હેવં વત્તબ્બે…પે॰….
ઉપપત્તેસિયેન ચિત્તેન સમુટ્ઠિતો ફસ્સો ઉપપત્તેસિયે ચિત્તે ભિજ્જમાને અનવસેસો ભિજ્જતીતિ? આમન્તા. ઉપપત્તેસિયેન ચિત્તેન સમુટ્ઠિતં જીવિતિન્દ્રિયં ઉપપત્તેસિયે ચિત્તે ભિજ્જમાને અનવસેસં ભિજ્જતીતિ? ન હેવં વત્તબ્બે…પે॰….
૫૪૫. દ્વે જીવિતિન્દ્રિયાનીતિ? આમન્તા. દ્વીહિ જીવિતેહિ જીવતિ, દ્વીહિ મરણેહિ મીયતીતિ? આમન્તા ન હેવં વત્તબ્બે (સ્યા॰ કં॰ પી॰).
જીવિતિન્દ્રિયકથા નિટ્ઠિતા.
૮. અટ્ઠમવગ્ગો
(૮૩) ૧૧. કમ્મહેતુકથા
૫૪૬. કમ્મહેતુ અરહા અરહત્તા પરિહાયતીતિ? આમન્તા. કમ્મહેતુ સોતાપન્નો સોતાપત્તિફલા પરિહાયતીતિ? ન હેવં વત્તબ્બે…પે॰… કમ્મહેતુ અરહા અરહત્તા પરિહાયતીતિ? આમન્તા. કમ્મહેતુ સકદાગામી…પે॰… અનાગામી અનાગામિફલા પરિહાયતીતિ? ન હેવં વત્તબ્બે…પે॰….
કમ્મહેતુ સોતાપન્નો સોતાપત્તિફલા ન પરિહાયતીતિ? આમન્તા. કમ્મહેતુ અરહા અરહત્તા ન પરિહાયતીતિ? ન હેવં વત્તબ્બે …પે॰… કમ્મહેતુ સકદાગામી…પે॰… અનાગામી અનાગામિફલા ન પરિહાયતીતિ? આમન્તા. કમ્મહેતુ અરહા અરહત્તા ન પરિહાયતીતિ? ન હેવં વત્તબ્બે…પે॰….
કમ્મહેતુ અરહા અરહત્તા પરિહાયતીતિ? આમન્તા. પાણાતિપાતકમ્મસ્સ હેતૂતિ? ન હેવં વત્તબ્બે…પે॰… અદિન્નાદાનકમ્મસ્સ હેતુ…પે॰… કામેસુમિચ્છાચારકમ્મસ્સ હેતુ… મુસાવાદકમ્મસ્સ હેતુ… પિસુણવાચાકમ્મસ્સ હેતુ… ફરુસવાચાકમ્મસ્સ હેતુ… સમ્ફપ્પલાપકમ્મસ્સ હેતુ… માતુઘાતકમ્મસ્સ માતુઘાતકકમ્મસ્સ (સ્યા॰), માતુઘાતિકમ્મસ્સ (ક॰) તથા પિતુઘાતઅરહન્તઘાતકમ્મસ્સાતિપદેસુ હેતુ… પિતુઘાતકમ્મસ્સ હેતુ… અરહન્તઘાતકમ્મસ્સ હેતુ… રુહિરુપ્પાદકમ્મસ્સ હેતુ…પે॰… સઙ્ઘભેદકમ્મસ્સ હેતૂતિ? ન હેવં વત્તબ્બે…પે॰….
કતમસ્સ કમ્મસ્સ હેતૂતિ? હન્દ હિ અરહન્તાનં અબ્ભાચિક્ખતીતિ. અરહન્તાનં અબ્ભાચિક્ખનકમ્મસ્સ હેતુ અરહા અરહત્તા પરિહાયતીતિ? આમન્તા. યે કેચિ અરહન્તાનં અબ્ભાચિક્ખન્તિ, સબ્બે તે અરહત્તં સચ્છિકરોન્તીતિ? ન હેવં વત્તબ્બે…પે॰….
કમ્મહેતુકથા નિટ્ઠિતા.
અટ્ઠમવગ્ગો.
તસ્સુદ્દાનં –
છ ગતિયો, અન્તરાભવો, પઞ્ચેવ કામગુણા કામધાતુ, પઞ્ચેવ આયતના કામા, રૂપિનો ધમ્મા રૂપધાતુ, અરૂપિનો ધમ્મા અરૂપધાતુ, સળાયતનિકો અત્તભાવો રૂપધાતુયા, અત્થિ રૂપં અરૂપેસુ, રૂપં કમ્મં, રૂપં જીવિતં, કમ્મહેતુકા પરિહાયતીતિ.