૧૦. સુભસુત્તવણ્ણના
સુભમાણવકવત્થુવણ્ણના
૪૪૪. એવં ‘‘એવં મે સુતં…પે॰… સાવત્થિયન્તિ સુભસુત્ત’’ન્તિ આહ. અનુનાસિકલોપેન ‘‘અચિર પરિનિબ્બુતે’’તિ વુત્તન્તિ દસ્સેતિ ‘‘અચિરં પરિનિબ્બુતે’’તિ ઇમિના યથા પોટ્ઠપાદસુત્તે ‘‘અપ્પાટિહીરક તં ભાસિતં સમ્પજ્જતી’’તિ, અચિરં પરિનિબ્બુતસ્સ અસ્સાતિ વા અચિરપરિનિબ્બુતો યથા ‘‘અચિરપક્કન્તો, માસજાતો’’તિ. અત્થમત્તં પન દસ્સેતું એવં વુત્તં. અચિરપરિનિબ્બુતેતિ ચ સત્થુ પરિનિબ્બુતભાવસ્સ ચિરકાલતાપટિક્ખેપેન આસન્નતામત્તં દસ્સિતં, કાલપરિચ્છેદો પન ન દસ્સિતોતિ તં દસ્સેન્તો ‘‘પરિનિબ્બાનતો’’તિઆદિમાહ. વિસાખપુણ્ણમિતો ઉદ્ધં યાવ જેટ્ઠપુણ્ણમી, તાવ કાલં સન્ધાય ‘‘માસમત્તે’’તિ વુત્તં. મત્તસદ્દેન પન તસ્સ કાલસ્સ કિઞ્ચિ અસમ્પુણ્ણતં જોતેતિ. તુદિસઞ્ઞિતો ગામો નિવાસો એતસ્સાતિ તોદેય્યો. તં પનેસ યસ્મા સોણદણ્ડો (દી॰ નિ॰ ૧.૩૦૦) વિય ચમ્પં, કૂટદન્તો (દી॰ નિ॰ ૧.૩૨૩) વિય ચ ખાણુમતં અજ્ઝાવસતિ, તસ્મા વુત્તં ‘‘તસ્સ અધિપતિત્તા’’તિ, ઇસ્સરભાવતોતિ અત્થો. અયમ્પિ હિ રઞ્ઞો પસેનદિકોસલસ્સ પુરોહિતબ્રાહ્મણો. પુત્તમ્પિ આહાતિ સુભં માણવમ્પિ ઓવદન્તો આહ.
અઞ્જનાનન્તિ અક્ખિઅઞ્જનત્થાય ઘંસિતઅઞ્જનાનં. વમ્મિકાનન્તિ કિમિસમાહટવમ્મિકાનં સઞ્ચયં દિસ્વાતિ સમ્બન્ધો. મધૂનન્તિ મક્ખિકમધૂનં. સમાહારન્તિ મકરન્દસન્નિચયં. પણ્ડિતો ઘરમાવસેતિ યસ્મા અપ્પતરપ્પતરેપિ ગય્હમાને ભોગા ખીયન્તિ, અપ્પતરપ્પતરેપિ ચ સઞ્ચિયમાને વડ્ઢન્તિ, તસ્મા યથાવુત્તમુપમત્તયં પઞ્ઞાય દિસ્વા વિઞ્ઞુજાતિકો
અદાનમેવ સિક્ખાપેત્વા સિક્ખાપનહેતુ લોભાભિભૂતતાય તસ્મિંયેવ ઘરે સુનખો હુત્વા નિબ્બત્તિ. લોભવસિકસ્સ હિ દુગ્ગતિ પાટિકઙ્ખા અતિવિય પિયાયતિ. વુત્તઞ્હિ ‘‘પુબ્બેવ સન્નિવાસેના’’તિઆદિ (જા॰ ૧.૨.૧૭૪). નિક્ખન્તેતિ કેનચિદેવ કરણીયેન બહિ નિગ્ગતે. સુભં માણવં અનુગ્ગણ્હિતુકામો એકકોવ ભગવા પિણ્ડાય પાવિસિ. ભુક્કારન્તિ ‘‘ભુ ભૂ’’તિ સુનખસદ્દકરણં. ‘‘ભો ભો’’તિ બ્રાહ્મણસમુદાચારેન પરિભવિત્વા પરિભવનહેતુ. ‘‘ભોવાદિ નામ સો હોતિ, સચે હોતિ સકિઞ્ચનો’’તિ (ધ॰ પ॰ ૩૯૬; સુ॰ નિ॰ ૬૨૫) હિ વુત્તં. નનુ ચ હેટ્ઠા ‘‘અદાનમેવ સિક્ખાપેત્વા સુનખો હુત્વા નિબ્બત્તો’’તિ આહ, કસ્મા પનેત્થ ‘‘પુબ્બેપિ મં ‘ભો ભો’તિ પરિભવિત્વા સુનખો જાતો’’તિ વદતીતિ? તથા નિબ્બત્તિયા તદુભયસાધારણફલત્તા. આનિસંસફલઞ્હિ સાધારણકમ્મેનપિ જાતં, ન વિપાકફલં વિય એકકમ્મેનેવાતિ દટ્ઠબ્બં. અવીચિં ગમિસ્સસિ કતોકાસસ્સ કમ્મસ્સ પટિબાહિતુમસક્કુણેય્યભાવતો. ‘‘જાનાતિ મં સમણો ગોતમો’’તિ વિપ્પટિસારી હુત્વા. ઉદ્ધનન્તરેતિ ચુલ્લિકન્તરે. નન્તિ સુનખં.
તં પવત્તિન્તિ ભગવતા યથાવુત્તકારણં. બ્રાહ્મણચારિત્તસ્સ અપરિહાપિતતં સન્ધાય, તથા પિતરં ઉક્કંસેન્તો ‘‘બ્રહ્મલોકે નિબ્બત્તો’’તિ આહ. મુખારુળ્હન્તિ સયંપટિભાનવસેન મુખમારુળ્હં. તં પવત્તિં પુચ્છીતિ ‘‘સુતમેતં ભો ગોતમ મય્હં પિતા સુનખો હુત્વા નિબ્બત્તો’’તિ તુમ્હેહિ વુત્તં, ‘‘કિમિદં સચ્ચં વા અસચ્ચં વા’’તિ પુચ્છિ. તથેવ વત્વાતિ યથા પુબ્બે સુનખસ્સ વુત્તં, તથેવ વત્વા. અવિસંવાદનત્થન્તિ સચ્ચાપનત્થં, ‘‘તોદેય્યબ્રાહ્મણો સુનખો હુત્વા નિબ્બત્તો’’તિ વચનસ્સ અવિસંવાદનેન અત્તનો અવિસંવાદિભાવદસ્સનત્થન્તિ વુત્તં હોતિ. અપ્પોદકન્તિ અપ્પકેન ઉદકેન સમ્પાદિતં. મધુપાયાસન્તિ સાદુરસં, મધુયોજિતં વા પાયાસં. તથા અકાસિ, યથા ભગવતા વુત્તં. ‘‘સબ્બં દસ્સેસીતિ બુદ્ધાનુભાવેન સો સુનખો તં સબ્બં નેત્વા દસ્સેસિ, ન જાતિસ્સરતાય. ભગવન્તં દિસ્વા ભુક્કરણં પન પુરિમજાતિસિદ્ધવાસનાવસેના’’તિ (દી॰ નિ॰ ટી॰ ૧.૪૪૪) એવં આચરિયેન વુત્તં. ઉપરિપણ્ણાસકે પન ચૂળકમ્મવિભઙ્ગસુત્તટ્ઠકથાયં ‘‘સુનખો ‘ઞાતોમ્હિ ઇમિના’તિ રોદિત્વા ‘હું
‘‘ભવપટિચ્છન્નં ભગવતિ પસન્નચિત્તો. અઙ્ગવિજ્જાપાઠકો કિરેસ. તેનસ્સ એતદહોસિ ‘‘ઇમં ધમ્મપણ્ણાકારં કત્વા સમણં ગોતમં પઞ્હં પુચ્છિસ્સામી’’તિ, તતો સો ચુદ્દસ પઞ્હે અભિસઙ્ખરિત્વા ભગવન્તં પુચ્છિ. તેન વુત્તં ‘‘ચુદ્દસ પઞ્હે પુચ્છિત્વા’’તિ. તત્થ ચુદ્દસ પઞ્હેતિ ‘‘દિસ્સન્તિ હિ ભો ગોતમ મનુસ્સા અપ્પાયુકા, દિસ્સન્તિ દીઘાયુકા. દિસ્સન્તિ બવ્હાબાધા, અપ્પાબાધા. દુબ્બણ્ણા, વણ્ણવન્તો. અપ્પેસક્ખા, મહેસક્ખા. અપ્પભોગા, મહાભોગા. નીચકુલીના, ઉચ્ચાકુલીના. દિસ્સન્તિ દુપ્પઞ્ઞા, દિસ્સન્તિ પઞ્ઞવન્તો. કો નુ ખો ભો ગોતમ હેતુ કો પચ્ચયો, યેન મનુસ્સાનંયેવ સતં મનુસ્સભૂતાનં દિસ્સન્તિ હીનપણીતતા’’તિ (મ॰ નિ॰ ૩.૨૮૯) ઇમે ચૂળકમ્મવિભઙ્ગસુત્તે આગતે ચુદ્દસ પઞ્હે. ‘‘કમ્મસ્સકા માણવ સત્તા કમ્મદાયાદા’’તિઆદિના (મ॰ નિ॰ ૩.૨૮૯) સઙ્ખેપતો, વિત્થારતો ચ વિસ્સજ્જનપરિયોસાને ભગવન્તં સરણં ગતો. અઙ્ગસુભતાય ‘‘સુભો’’ તિસ્સ નામં. માણવોતિ પન મહલ્લકકાલેપિ તરુણવોહારેન નં વોહરતિ. અત્તનો ભોગગામતોતિ તુદિગામતો આગન્ત્વા તઙ્ખણિકં વસતિ. તેનેવ પાળિયં ‘‘કેનચિદેવ કરણીયેના’’તિ વુત્તં.
૪૪૫. ‘‘એકા ચ મે કઙ્ખા અત્થી’’તિ ઇમિના ઉપરિ પુચ્છિયમાનસ્સ પઞ્હસ્સ પગેવ તેન અભિસઙ્ખતભાવં દસ્સેતિ. માણવકન્તિ ખુદ્દકમાણવં ‘‘એકપુત્તકો, (મ॰ નિ॰ ૨.૨૯૬, ૩૫૩; પારા॰ ૨૬) પિયપુત્તકો’’તિઆદીસુ વિય ક-સદ્દસ્સ ખુદ્દકત્થે પવત્તનતો. વિસભાગવેદનાતિ દુક્ખવેદના. સા હિ કુસલકમ્મનિબ્બત્તે અત્તભાવે ઉપ્પજ્જનકસુખવેદનાપટિપક્ખભાવતો ‘‘વિસભાગવેદના’’તિ ચ કાયં ગાળ્હા હુત્વા બાધનતો પીળનતો ‘‘આબાધો’’તિ ચ વુચ્ચતિ. કીદિસા પન સાતિ આહ ‘‘યા એકદેસે’’તિઆદિ. એકદેસે ઉપ્પજ્જિત્વાતિ સરીરેકદેસે ઉટ્ઠહિત્વાપિ અપરિવત્તિભાવકરણતો અયપટ્ટેન આબન્ધિત્વા વિય ગણ્હાતિ, ઇમિના બલવરોગો આબાધો નામાતિ દસ્સેતિ. કિચ્છજીવિતકરોતિ અસુખજીવિતાવહો, ઇમિના દુબ્બલો અપ્પમત્તકો રોગો આતઙ્કો નામાતિ દસ્સેતિ. ઉટ્ઠાનન્તિ સયનનિસજ્જાદિતો ગરુકન્તિ ભારિયં અકિચ્ચસિદ્ધિકં. ગિલાનસ્સેવ કાયે બલં ન હોતીતિ સમ્બન્ધો. લહુટ્ઠાનેન ચેત્થ ગેલઞ્ઞાભાવો પુચ્છિતો. હેટ્ઠા ચતૂહિ પદેહિ અફાસુવિહારાભાવં પુચ્છિત્વાપિ ઇદાનિ પુન ફાસુવિહારભાવં પુચ્છતિ, તેન સવિસેસો એત્થ ફાસુવિહારો પુચ્છિતોતિ વિઞ્ઞાયતિ. અસતિપિ હિ અતિસયત્થજોતને સદ્દે અત્થાપત્તિતો અતિસયત્થો લબ્ભતેવ યથા ‘‘અભિરૂપસ્સ કઞ્ઞા દાતબ્બા’’તિ. તેનાહ ‘‘ગમનટ્ઠાના’’તિઆદિ. પુરિમં આણાપનવચનં, ઇદં પન પુચ્છિતબ્બાકારદસ્સનન્તિ અયમિમેસં વિસેસોતિ દસ્સેતિ ‘‘અથસ્સા’’તિઆદિના.
૪૪૭. કાલો સમયો નામ તસ્સેવ પચ્ચયસામગ્ગી, અત્થતો પનેસ તજ્જં સરીરબલઞ્ચેવ તપ્પચ્ચયપરિસ્સયાભાવો ચ. ઉપાદાનં નામ ઞાણેન તેસં ગહણં સલ્લક્ખણન્તિ આહ ‘‘પઞ્ઞાયા’’તિઆદિ. ‘‘સ્વે ગમનકાલો ભવિસ્સતી’’તિ ઇમિના કાલં, ‘‘કાયે’’તિઆદિના સમયઞ્ચ સરૂપતો દસ્સેતિ. ફરિસ્સતીતિ ફરણવસેન ઠસ્સતિ.
૪૪૮. ચેતિયરટ્ઠેતિ ચેતિરટ્ઠે. ય-કારેન હિ પદં વડ્ઢેત્વા એવં વુત્તં. ‘‘ચેતિરટ્ઠતો અઞ્ઞં વિસુંયેવેકં રટ્ઠ’’ન્તિપિ વદન્તિ. ‘‘યસ્મા મરણં નામ તાદિસાનં દસબલાનં રોગવસેનેવ હોતિ, તસ્મા યેન રોગેન તં જાતં, તસ્સ સરૂપપુચ્છા, કારણપુચ્છા, મરણહેતુકચિત્તસન્તાપપુચ્છા, તસ્સ ચ સન્તાપસ્સ સબ્બલોકસાધારણતા, તથા મરણસ્સ ચ અપ્પટિકરણતા’’તિ એવમાદિના મરણપટિસઞ્ઞુત્તં સમ્મોદનીયં કથં કથેસીતિ દસ્સેતું ‘‘ભો આનન્દા’’તિઆદિ વુત્તં. ‘‘કો નામા’’તિઆદિના હિ રોગં પુચ્છતિ, ‘‘કિં ભગવા પરિભુઞ્જી’’તિ ઇમિના કારણં, ‘‘અપિચા’’તિઆદિના ચિત્તસન્તાપં, ‘‘સત્થા નામા’’તિઆદિના તસ્સ સબ્બલોકસાધારણતં, ‘‘એકા દાની’’તિઆદિના મરણસ્સ અપ્પટિકરણતં દસ્સેતીતિ દટ્ઠબ્બં. મહાજાનીતિ મહાહાનિ. યત્રાતિ યેન કારણેન પરિનિબ્બુતો, તેન કો દાનિ અઞ્ઞો મરણા મુચ્ચિસ્સતીતિઆદિના યોજેતબ્બં. ઇદાનીતિ ચ અત્તનો મનસિકારં પતિ વોહારમત્તેન વુત્તં. લજ્જિસ્સતીતિ લજ્જા વિય ભવિસ્સતિ, વિજ્જિસ્સતીતિ અત્થો ‘‘પીત…પે॰… દત્વા’’તિ.
હુત્વાતિ પાઠસેસો સન્તિકાવચરભાવસ્સ વિસેસનતો. મારો પાપિમા વિય ન રન્ધગવેસી, ઉત્તરમાણવો વિય ચ ન વીમંસનાધિપ્પાયો, અપિ તુ ખલુ ઉપટ્ઠાકો હુત્વા સન્તિકાવચરોતિ હિ વિસેસેતિ. ન રન્ધગવેસીતિ ન છિદ્દગવેસી. યેસુ ધમ્મેસૂતિ વિમોક્ખુપાયેસુ નિય્યાનિકધમ્મેસુ. ધરન્તીતિ અધુના તિટ્ઠન્તિ, પવત્તન્તીતિ અત્થો.
૪૪૯. અત્થતો પયુત્તતાય સદ્દપયોગસ્સ સદ્દપબન્ધલક્ખણાનિ તીણિ પિટકાનિ તદત્થભૂતેહિ સીલાદીહિ તીહિ ધમ્મક્ખન્ધેહિ સઙ્ગય્હન્તીતિ વુત્તં ‘‘તીણિ પિટકાનિ તીહિ ખન્ધેહિ સઙ્ગહેત્વા’’તિ. સઙ્ખિત્તેન કથિતન્તિ ‘‘તિણ્ણં ખો માણવ ખન્ધાન’’ન્તિ એવં ગણનતો, સામઞ્ઞતો ચ સઙ્ખેપેનેવ કથિતં. ‘‘કતમેસં તિણ્ણ’’ન્તિ અયં અદિટ્ઠજોતનાપુચ્છાયેવ, ન કથેતુકમ્યતાપુચ્છા. માણવસ્સેવ હિ અયં પુચ્છા, ન થેરસ્સાતિ આહ ‘‘માણવો’’તિઆદિ. અઞ્ઞત્થ પન ઈદિસેસુ ઠાનેસુ કથેતુકમ્યતાપુચ્છાયેવ દિસ્સતિ, ન અદિટ્ઠજોતનાપુચ્છા. ઇધ પન અટ્ઠકથાયં એવં વુત્તં, તદેતં અટ્ઠકથાપમાણતો પચ્ચેતબ્બં. તદા પવત્તમાનઞ્હિ પચ્ચક્ખં કત્વા અટ્ઠકથમ્પિ સઙ્ગહમારોપિંસુ. કથેતુકમ્યતાપુચ્છાભાવે પનસ્સ થેરસ્સેવ વચનતા સિયા.
સીલક્ખન્ધવણ્ણના
૪૫૦-૪૫૩. સીલક્ખન્ધસ્સાતિ એત્થ પદત્થવિપલ્લાસકારી ઇતિસદ્દો લુત્તો, અત્થનિદ્દેસો વિય સદ્દનિદ્દેસો વા, યથારુતો ચ ઇતિસદ્દો આદ્યત્થો, પકારત્થો વા, તેન ‘‘અરિયસ્સ સમાધિક્ખન્ધસ્સ…પે॰… પતિટ્ઠપેસી’’તિ અયં પાઠો ગહિતોતિ દટ્ઠબ્બં. તેન વુત્તં ‘‘તેસુ દસ્સિતેસૂ’’તિ, તેસુ તીસુ ખન્ધેસુ ઉદ્દેસવસેન દસ્સિતેસૂતિ અત્થો. ભગવતા વુત્તનયેનેવાતિ સામઞ્ઞફલાદીસુ (દી॰ નિ॰ ૧.૧૯૪) દેસિતનયેનેવ, તેન ઇમસ્સ સુત્તસ્સ બુદ્ધભાસિતભાવં દસ્સેતીતિ વેદિતબ્બં. સાસને ન સીલમેવ સારોતિ અરિયમગ્ગસારે ભગવતો સાસને યથાદસ્સિતં સીલં સારો એવ ન હોતિ સારવતો મહતો રુક્ખસ્સ પપટિકટ્ઠાનિકત્તા ‘‘કેવલ’’ન્તિઆદિ. ઝાનાદિઉત્તરિમનુસ્સધમ્મે અધિગન્તુકામસ્સ અધિટ્ઠાનમત્તં તત્થ અપ્પતિટ્ઠિતસ્સ તેસમસમ્ભવતો. વુત્તઞ્હિ ‘‘સીલે પતિટ્ઠાય નરો સપઞ્ઞો’’તિઆદિ (સં॰ નિ॰ ૧.૨૩, ૧૯૨; પેટકો॰ ૨૨) અથ વા સાસને ન સીલમેવ સારોતિ કામઞ્ચેત્થ સાસને મગ્ગફલસીલસઙ્ખાતં લોકુત્તરસીલમ્પિ સારમેવ, તથાપિ ન સીલક્ખન્ધો એવ સારો હોતિ, અથ ખો સમાધિક્ખન્ધોપિ પઞ્ઞાક્ખન્ધોપિ સારો એવાતિ એવમ્પેત્થ યથાપયુત્તેન એવસદ્દેન અત્થો વેદિતબ્બો, પુરિમોયેવ પનત્થો યુત્તતરો. તથા હિ વુત્તં ‘‘ઇતો ઉત્તરી’’તિઆદિ. અઞ્ઞમ્પિ કત્તબ્બન્તિ સેસખન્ધદ્વયં.
સમાધિક્ખન્ધવણ્ણના
૪૫૪. કસ્મા પનેત્થ થેરો સમાધિક્ખન્ધં પુટ્ઠોપિ ઇન્દ્રિયસંવરાદિકે વિસ્સજ્જેસિ, નનુ એવં સન્તે અઞ્ઞં પુટ્ઠો અઞ્ઞં બ્યાકરોન્તો અમ્બં પુટ્ઠો લબુજં બ્યાકરોન્તો વિય હોતીતિ ઈદિસી ચોદના ઇધ અનોકાસાતિ દસ્સેન્તો ‘‘કથઞ્ચ…પે॰… આરભી’’તિ આહ, તેનેત્થ ઇન્દ્રિયસંવરાદયોપિ સમાધિઉપકારકતં ઉપાદાય સમાધિક્ખન્ધપક્ખિકભાવેન ઉદ્દિટ્ઠાતિ દસ્સેતિ. યે તે ઇન્દ્રિયસંવરાદયોતિ સમ્બન્ધો. રૂપાવચરચતુત્થજ્ઝાનદેસનાનન્તરં અભિઞ્ઞાદેસનાય અવસરોતિ કત્વા રૂપજ્ઝાનાનેવ આગતાનિ, ન અરૂપજ્ઝાનાનિ. રૂપાવચરચતુત્થજ્ઝાનપાદિકા હિ સપરિભણ્ડા છપિ અભિઞ્ઞાયો. યસ્મા પન લોકિયાભિઞ્ઞાયો ‘‘આનેત્વા પન દીપેતબ્બાની’’તિ, વુત્તનયેન દેસિતાનેવ કત્વા સંવણ્ણકેહિ પકાસેતબ્બાનીતિ અત્થો. અટ્ઠકથાયં પન ‘‘ચતુત્થજ્ઝાનં ઉપસમ્પજ્જ વિહરતી’’તિ ઇમિનાવ અરૂપજ્ઝાનમ્પિ સઙ્ગહિતન્તિ દસ્સેતું ‘‘ચતુત્થજ્ઝાનેન હી’’તિઆદિ વુત્તં. ચતુત્થજ્ઝાનમેવ હિ રૂપવિરાગભાવનાવસેન પવત્તં ‘‘અરૂપજ્ઝાન’’ન્તિ વુચ્ચતિ.
૪૭૧-૪૮૦. ન ચિત્તેકગ્ગતામત્તકેનેવાતિ એત્થ હેટ્ઠા વુત્તનયાનુસારેન ઠાનાઠાનપયુત્તસ્સ એવસદ્દસ્સાનુરૂપમત્થો વેદિતબ્બો. લોકિયસમાધિક્ખન્ધસ્સ ‘‘ન ચિત્તેકગ્ગતા…પે॰… અત્થી’’તિ વુત્તં. અરિયો સમાધિક્ખન્ધોતિ એત્થ હિ અરિયસદ્દો સુદ્ધમત્તપરિયાયોવ, ન લોકુત્તરપરિયાયો. યથા ચેત્થ, તથા અરિયો સીલક્ખન્ધોતિ એત્થાપિ. ઇતોતિ પઞ્ઞાક્ખન્ધતો, સો ચ ઉક્કટ્ઠતો અરહત્તફલપરિયાપન્નો એવાતિ આહ ‘‘અરહત્તપરિયોસાન’’ન્તિઆદિ. લોકિયાભિઞ્ઞાપટિસમ્ભિદાહિ વિનાપિ હિ અરહત્તે અધિગતે ‘‘નત્થેવ ઉત્તરિકરણીય’’ન્તિ સક્કા વત્તું યદત્થં ભગવતિ બ્રહ્મચરિયં વુસ્સતિ, તસ્સ સિદ્ધત્તા. ઇધ પન લોકિયાભિઞ્ઞાયોપિ આગતાયેવ. સેસમેત્થ સુવિઞ્ઞેય્યં.
ઇતિ સુમઙ્ગલવિલાસિનિયા દીઘનિકાયટ્ઠકથાય પરમસુખુમગમ્ભીરદુરનુબોધત્થપરિદીપનાય સુવિમલવિપુલપઞ્ઞાવેય્યત્તિયજનનાય સાધુવિલાસિનિયા નામ લીનત્થપકાસનિયા સુભસુત્તવણ્ણનાય લીનત્થપકાસના.
સુભસુત્તવણ્ણના નિટ્ઠિતા.