૫. સામણ્ડકસંયુત્તં
૧. સામણ્ડકસુત્તં
૩૩૦. એકં સમયં આયસ્મા સારિપુત્તો વજ્જીસુ વિહરતિ ઉક્કચેલાયં ગઙ્ગાય નદિયા તીરે. અથ ખો સામણ્ડકો સામણ્ડકાનિ (સી॰) પરિબ્બાજકો યેનાયસ્મા સારિપુત્તો તેનુપસઙ્કમિ; ઉપસઙ્કમિત્વા આયસ્મતા સારિપુત્તેન સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો સામણ્ડકો પરિબ્બાજકો આયસ્મન્તં સારિપુત્તં એતદવોચ –
‘‘‘નિબ્બાનં, નિબ્બાન’ન્તિ, આવુસો સારિપુત્ત, વુચ્ચતિ. કતમં નુ ખો, આવુસો, નિબ્બાન’’ન્તિ? ‘‘યો ખો, આવુસો, રાગક્ખયો દોસક્ખયો મોહક્ખયો – ઇદં વુચ્ચતિ નિબ્બાન’’ન્તિ. ‘‘અત્થિ પનાવુસો, મગ્ગો અત્થિ પટિપદા, એતસ્સ નિબ્બાનસ્સ સચ્છિકિરિયાયા’’તિ? ‘‘અત્થિ ખો, આવુસો, મગ્ગો અત્થિ પટિપદા, એતસ્સ નિબ્બાનસ્સ સચ્છિકિરિયાયા’’તિ.
‘‘કતમો પનાવુસો, મગ્ગો કતમા પટિપદા એતસ્સ નિબ્બાનસ્સ સચ્છિકિરિયાયા’’તિ? ‘‘અયમેવ ખો, આવુસો, અરિયો અટ્ઠઙ્ગિકો મગ્ગો, એતસ્સ નિબ્બાનસ્સ સચ્છિકિરિયાય, સેય્યથિદં – સમ્માદિટ્ઠિ સમ્માસઙ્કપ્પો સમ્માવાચા સમ્માકમ્મન્તો સમ્માઆજીવો સમ્માવાયામો સમ્માસતિ સમ્માસમાધિ. અયં ખો, આવુસો, મગ્ગો અયં પટિપદા, એતસ્સ નિબ્બાનસ્સ સચ્છિકિરિયાયા’’તિ. ‘‘ભદ્દકો, આવુસો, મગ્ગો ભદ્દિકા પટિપદા, એતસ્સ નિબ્બાનસ્સ સચ્છિકિરિયાય. અલઞ્ચ પનાવુસો સારિપુત્ત, અપ્પમાદાયા’’તિ. પઠમં.
(યથા જમ્બુખાદકસંયુત્તં, તથા વિત્થારેતબ્બં).
૨. દુક્કરસુત્તં
૩૩૧. ‘‘કિં નુ ખો, આવુસો સારિપુત્ત, ઇમસ્મિં ધમ્મવિનયે દુક્કર’’ન્તિ ? ‘‘પબ્બજ્જા ખો, આવુસો, ઇમસ્મિં ધમ્મવિનયે દુક્કરા’’તિ. ‘‘પબ્બજિતેન પનાવુસો, કિં દુક્કર’’ન્તિ? ‘‘પબ્બજિતેન ખો, આવુસો, અભિરતિ દુક્કરા’’તિ. ‘‘અભિરતેન પનાવુસો, કિં દુક્કર’’ન્તિ? ‘‘અભિરતેન ખો, આવુસો, ધમ્માનુધમ્મપ્પટિપત્તિ દુક્કરા’’તિ. ‘‘કીવચિરં પનાવુસો, ધમ્માનુધમ્મપ્પટિપન્નો ભિક્ખુ અરહં અસ્સા’’તિ? ‘‘નચિરં, આવુસો’’તિ. સોળસમં.
(પુરિમકસદિસં ઉદ્દાનં.)
સામણ્ડકસંયુત્તં સમત્તં.