૮. વત્તક્ખન્ધકો
આગન્તુકવત્તકથાવણ્ણના
૩૫૭. વત્તક્ખન્ધકે પત્થરિતબ્બન્તિ આતપે પત્થરિતબ્બં. પાળિયં અભિવાદાપેતબ્બોતિ વન્દનત્થાય વસ્સં પુચ્છનેન નવકો સયમેવ વન્દતીતિ વુત્તં. નિલ્લોકેતબ્બોતિ ઓલોકેતબ્બો.
આગન્તુકવત્તકથાવણ્ણના નિટ્ઠિતા.
આવાસિકવત્તકથાવણ્ણના
૩૫૯. ‘‘યથાભાગ’’ન્તિ ઠપિતટ્ઠાનં અનતિક્કમિત્વા મઞ્ચપીઠાદિં પપ્ફોટેત્વા પત્થરિત્વા ઉપરિ પચ્ચત્થરણં દત્વા દાનમ્પિ સેનાસનપઞ્ઞાપનમેવાતિ દસ્સેન્તો આહ ‘‘પપ્ફોટેત્વા હિ પત્થરિતું પન વટ્ટતિયેવા’’તિ.
આવાસિકવત્તકથાવણ્ણના નિટ્ઠિતા.
અનુમોદનવત્તકથાવણ્ણના
૩૬૨. પઞ્ચમે નિસિન્નેતિ અનુમોદનત્થાય નિસિન્ને. ન મહાથેરસ્સ ભારો હોતીતિ અનુમોદકં આગમેતું ન ભારો. અજ્ઝિટ્ઠોવ આગમેતબ્બોતિ અત્તના અજ્ઝિટ્ઠેહિ ભિક્ખૂહિ અનુમોદન્તેયેવ નિસીદિતબ્બન્તિ અત્થો.
અનુમોદનવત્તકથાવણ્ણના નિટ્ઠિતા.
ભત્તગ્ગવત્તકથાવણ્ણના
૩૬૪. મનુસ્સાનં પરિવિસનટ્ઠાનન્તિ યત્થ અન્તોવિહારેપિ મનુસ્સા સપુત્તદારા આવસિત્વા ભિક્ખૂ નેત્વા ભોજેન્તિ. આસનેસુ સતીતિ નિસીદનટ્ઠાનેસુ ઇદં, ભન્તે, આસનં ઉચ્ચન્તિ આસન્ને સમભૂમિભાગે પઞ્ઞત્તં થેરાસનેન સમકં આસનં સન્ધાય વુત્તં, થેરાસનતો પન ઉચ્ચતરે આપુચ્છિત્વાપિ નિસીદિતું ન વટ્ટતિ. યદિ તં આસન્નમ્પિ નીચતરં હોતિ, અનાપુચ્છાપિ નિસીદિતું વટ્ટતિ. મહાથેરસ્સેવ આપત્તીતિ આસનેન પટિબાહનાપત્તિયા આપત્તિ. અવત્થરિત્વાતિ પારુતસઙ્ઘાટિં અવત્થરિત્વા, અનુક્ખિપિત્વાતિ અત્થો.
પાળિયં ‘‘ઉભોહિ હત્થેહિ…પે॰… ઓદનો પટિગ્ગહેતબ્બો’’તિ ઇદં હત્થતલે વા પચ્છિપિટ્ઠિઆદિદુસ્સણ્ઠિતાધારે વા પત્તં ઠપેત્વા ઓદનસ્સ ગહણકાલે પત્તસ્સ અપતનત્થાય વુત્તં, સુસજ્જિતે પન આધારે પત્તં ઠપેત્વા એકેન હત્થેન તં પરામસિત્વાપિ ઓદનં પટિગ્ગહેતું વટ્ટતિ એવ. ઉભોહિ હત્થેહિ…પે॰… ઉદકં પટિગ્ગહેતબ્બન્તિ એત્થાપિ એસેવ નયો.
હત્થધોવનઉદકન્તિ ભોજનાવસાને ઉદકં. તેનાહ ‘‘પાનીયં પિવિત્વા હત્થા ધોવિતબ્બા’’તિ. તેન પરિયોસાને ધોવનમેવ પટિક્ખિત્તં, ભોજનન્તરે પન પાનીયપિવનાદિના નયેન હત્થં ધોવિત્વા પુન ભુઞ્જિતું વટ્ટતીતિ દસ્સેતિ. પોત્થકેસુ પન ‘‘પાનીયં પિવિત્વા હત્થા ન ધોવિતબ્બા’’તિ લિખન્તિ, તં પુરિમવચનેન ન સમેતિ પરિયોસાને ઉદકસ્સેવ ‘‘હત્થધોવનઉદક’’ન્તિ વુત્તત્તા. સચે મનુસ્સા ધોવથ, ભન્તેતિઆદિ નિટ્ઠિતભત્તં નિસિન્નં થેરં સન્ધાય વુત્તં. ધુરે દ્વારસમીપે.
ભત્તગ્ગવત્તકથાવણ્ણના નિટ્ઠિતા.
પિણ્ડચારિકવત્તકથાદિવણ્ણના
૩૬૬. પાળિયં ઠાપેતિ વાતિ તિટ્ઠ ભન્તેતિ વદન્તિ.
૩૬૭. અત્થિ, ભન્તે, નક્ખત્તપદાનીતિ નક્ખત્તપદવિસયાનિ ઞાતાનિ અત્થિ, અસ્સયુજાદિનક્ખત્તં જાનાથાતિ અધિપ્પાયો. તેનાહ ‘‘ન જાનામ, આવુસો’’તિ. અત્થિ, ભન્તે , દિસાભાગન્તિ એત્થાપિ એસેવ નયો.
૩૬૯. અઙ્ગણેતિ એવમેવ પટિપજ્જિતબ્બન્તિ ઉદ્દેસદાનાદિ આપુચ્છિતબ્બન્તિ દસ્સેતિ.
૩૭૪. નિબદ્ધગમનત્થાયાતિ અત્તનોવ નિરન્તરગમનત્થાય. ઊહદિતાતિ એત્થ હદ-ધાતુસ્સ વચ્ચવિસ્સજ્જનત્થતાયાહ ‘‘બહિ વચ્ચમક્ખિતા’’તિ.
પિણ્ડચારિકવત્તકથાદિવણ્ણના નિટ્ઠિતા.
વત્તક્ખન્ધકવણ્ણનાનયો નિટ્ઠિતો.