પઞ્ઞત્તિવારવણ્ણના
૧. વિસુદ્ધપરિવારસ્સ
સમન્તચક્ખુનાતિ સબ્બઞ્ઞુતઞ્ઞાણેન. અતિવિસુદ્ધેન મંસચક્ખુનાતિ રત્તિન્દિવં સમન્તા યોજનપ્પમાણે અતિસુખુમાનિપિ રૂપાનિ પસ્સનતો અતિવિય પરિસુદ્ધેન પસાદચક્ખુના. ‘‘અત્થિ તત્થ પઞ્ઞત્તી’’તિઆદીસુ અત્થિ નુ ખો તત્થ પઞ્ઞત્તીતિઆદિના અત્થો ગહેતબ્બોતિ આહ ‘‘તત્થ પઞ્ઞત્તિ…પે॰… કેનાભતન્તિ પુચ્છા’’તિ.
૨. પુચ્છાવિસ્સજ્જનેતિ વિનીતકથાતિ વિનીતવત્થુકથા, અયમેવ વા પાઠો.
દ્વઙ્ગિકેન એકેન સમુટ્ઠાનેનાતિ અઙ્ગદ્વયસમુદાયભૂતેન એકેન. અઙ્ગદ્વયવિમુત્તસ્સ સમુટ્ઠાનસ્સ અભાવેપિ તેસુ એકેનઙ્ગેન વિના અયં આપત્તિ ન હોતીતિ દસ્સનત્થમેવ ‘‘એકેન સમુટ્ઠાનેના’’તિ વુત્તં. ઇદાનિ તેસુ દ્વીસુ અઙ્ગેસુ પધાનઙ્ગં દસ્સેતુમાહ ‘‘એત્થ હિ ચિત્તં અઙ્ગં હોતી’’તિઆદિ. યસ્મા પન મગ્ગેનમગ્ગપ્પટિપત્તિસઙ્ખાતાય કાયવિઞ્ઞત્તિયા સેવનચિત્તેનેવ સમ્ભવે સતિ અયં તં અઙ્ગદ્વયં ઉપાદાય ભગવતા પઞ્ઞત્તા આપત્તિસમ્મુતિ હોતિ, નાસતિ. તસ્મા તં ચિત્તં કાયવિઞ્ઞત્તિસઙ્ખાતસ્સ કાયસ્સ અઙ્ગં કારણં હોતિ, ન આપત્તિયા. તસ્સ પન તંસમુટ્ઠિતકાયો એવ અઙ્ગં અબ્યવહિતકારણં, ચિત્તં પન કારણકારણન્તિ અધિપ્પાયો. એવં ઉપરિપિ સબ્બત્થ ચિત્તઙ્ગયુત્તસમુટ્ઠાનેસુ અધિપ્પાયો ઇમમત્થં સન્ધાયાતિ આપન્નાય પારાજિકાપત્તિયા કેહિચિપિ સમથેહિ અનાપત્તિભાવાપાદનસ્સ અસક્કુણેય્યત્તસઙ્ખાતમત્થં સન્ધાય.
૩. પોરાણકેહિ મહાથેરેહીતિ સઙ્ગીતિત્તયતો પચ્છા પોત્થકસઙ્ગીતિકારકેહિ છળભિઞ્ઞાપઅસમ્ભિદાદિગુણસમુજ્જલેહિ મહાથેરેહિ. ચતુત્થસઙ્ગીતિસદિસા હિ પોત્થકારોહસઙ્ગીતિ.
૧૮૮. મહાવિભઙ્ગેતિ ભિક્ખુવિભઙ્ગે. સોળસ વારા દસ્સિતાતિ યેહિ વારેહિ આદિભૂતેહિ ઉપલક્ખિતત્તા અયં સકલોપિ પરિવારો સોળસપરિવારોતિ વોહરીયતિ, તે સન્ધાય વદતિ.
પઞ્ઞત્તિવારવણ્ણના નિટ્ઠિતા.