૧૯. કપ્પિયભૂમિવિનિચ્છયકથા
૧૦૧. એવં ‘‘કપ્પિયા ચતુભૂમિયો’’તિઆદિમાહ. તત્થ કપ્પન્તીતિ કપ્પિયા, કપ્પ સામત્થિયેતિ ધાતુ. ભવન્તિ એતાસુ અન્તોવુત્થઅન્તોપક્કાનીતિ ભૂમિયો, ચતસ્સો ભૂમિયો ચતુભૂમિયો, ચતસ્સો કપ્પિયકુટિયોતિ અત્થો. કતમા તાતિ આહ ‘‘ઉસ્સાવનન્તિકા…પે॰… વેદિતબ્બા’’તિ. કથં વિઞ્ઞાયતિચ્ચાહ ‘‘અનુજાનામિ…પે॰… વચનતો’’તિ. ઇદં ભેસજ્જક્ખન્ધકપાળિં (મહાવ॰ ૨૯૫) સન્ધાયાહ. તત્થ ઉદ્ધં સાવના ઉસ્સાવના, ઉસ્સાવના અન્તો યસ્સા કપ્પિયભૂમિયાતિ ઉસ્સાવનન્તિકા. ગાવો નિસીદન્તિ એત્થાતિ ગોનિસાદિકા, ગો-સદ્દૂપપદ નિ-પુબ્બસદ વિસરણગત્યાવસાનેસૂતિ ધાતુ. ગહપતીહિ દિન્નાતિ ગહપતિ, ઉત્તરપદલોપતતિયાતપ્પુરિસોયં. કમ્મવાચાય સમ્મન્નિતબ્બાતિ સમ્મુતીતિ એવમિમાસં વિગ્ગહો કાતબ્બો. તત્થાતિ કપ્પિયકુટિવિનિચ્છયે. તં પન અવત્વાપીતિ અન્ધકટ્ઠકથાયં વુત્તનયં અવત્વાપિ. પિ-સદ્દેન તથાવચનમ્પિ અનુજાનાતિ. અટ્ઠકથાસુ વુત્તનયેન વુત્તેતિ સેસઅટ્ઠકથાસુ વુત્તનયેન ‘‘કપ્પિયકુટિં કરોમા’’તિ વા ‘‘કપ્પિયકુટી’’તિ વા વુત્તે. સાધારણલક્ખણન્તિ સબ્બઅટ્ઠકથાનં સાધારણં ઉસ્સાવનન્તિકકુટિકરણલક્ખણં. ચયન્તિ અધિટ્ઠાનં ઉચ્ચવત્થું. યતો પટ્ઠાયાતિ યતો ઇટ્ઠકતો સિલતો મત્તિકાપિણ્ડતો વા પટ્ઠાય. પઠમિટ્ઠકાદીનં હેટ્ઠા ન વટ્ટન્તીતિ પઠમિટ્ઠકાદીનં હેટ્ઠાભૂમિયં પતિટ્ઠાપિયમાના ઇટ્ઠકાદયો ભૂમિગતિકત્તા ‘‘કપ્પિયકુટિં કરોમા’’તિ વત્વા પતિટ્ઠાપેતું ન વટ્ટન્તિ. યદિ એવં ભૂમિયં નિખણિત્વા ઠપિયમાના થમ્ભા કસ્મા તથા વત્વા પતિટ્ઠાપેતું વટ્ટન્તીતિ આહ ‘‘થમ્ભા પન…પે॰… વટ્ટન્તી’’તિ.
સઙ્ઘસન્તકમેવાતિ ભિક્ખુસન્તકન્તિ વાસત્થાય એવ કતં ભિક્ખુસ્સ પુગ્ગલિકસેનાસનં.
૧૦૨. મુખસન્નિધીતિ ઇમિના અન્તોવુત્થદુક્કટમેવ દીપેતિ.
વિમતિવિનોદનિયં (વિ॰ વિ॰ ટી॰ મહાવગ્ગ ૨.૨૯૫) પન એવં વુત્તં – તં પન અવત્વાપીતિ પિ-સદ્દેન તથાવચનમ્પિ અનુજાનાતિ. અટ્ઠકથાસૂતિ અન્ધકટ્ઠકથાવિરહિતાસુ સેસટ્ઠકથાસુ. સાધારણલક્ખણન્તિ અન્ધકટ્ઠકથાય સહ સબ્બટ્ઠકથાનં સમાનં. ચયન્તિ અધિટ્ઠાનં ઉચ્ચવત્થું. યતો પટ્ઠાયાતિ યતો ઇટ્ઠકાદિતો પટ્ઠાય ચયં આદિં કત્વા ભિત્તિં ઉટ્ઠાપેતુકામાતિ અત્થો. ‘‘થમ્ભા પન ઉપરિ ઉગ્ગચ્છન્તિ, તસ્મા વટ્ટન્તી’’તિ એતેન ઇટ્ઠકપાસાણા હેટ્ઠા પતિટ્ઠાપિયમાનાપિ યદિ ચયતો, ભૂમિતો વા એકઙ્ગુલમત્તમ્પિ ઉગ્ગતા તિટ્ઠન્તિ, વટ્ટન્તીતિ સિદ્ધં હોતિ.
આરામોતિ ઉપચારસીમાપરિચ્છિન્નો સકલો વિહારો. સેનાસનાનીતિ વિહારસ્સ અન્તો તિણકુટિઆદિકાનિ સઙ્ઘસ્સ નિવાસગેહાનિ. વિહારગોનિસાદિકા નામાતિ સેનાસનગોનિસાદિકા નામ. સેનાસનાનિ હિ સયં પરિક્ખિત્તાનિપિ આરામપરિક્ખેપાભાવેન ‘‘ગોનિસાદિકા’’તિ વુત્તા. ‘‘ઉપડ્ઢપરિક્ખિત્તોપી’’તિ ઇમિના તતો ઊનપરિક્ખિત્તો યેભુય્યેન અપરિક્ખિત્તો નામ, તસ્મા અપરિક્ખિત્તસઙ્ખમેવ ગચ્છતીતિ દસ્સેતિ. એત્થાતિ ઉપડ્ઢાદિપરિક્ખિત્તે. કપ્પિયકુટિ લદ્ધું વટ્ટતીતિ ગોનિસાદિકાય અભાવેન સેસકપ્પિયકુટીસુ તીસુ યા કાચિ કપ્પિયકુટિ કાતબ્બાતિ અત્થો.
તેસં ગેહાનીતિ એત્થ ભિક્ખૂનં વાસત્થાય કતમ્પિ યાવ ન દેન્તિ, તાવ તેસં સન્તકંયેવ ભવિસ્સતીતિ દટ્ઠબ્બં. વિહારં ઠપેત્વાતિ ઉપસમ્પન્નાનં વાસત્થાય કતં ગેહં ઠપેત્વાતિ અત્થો. ગેહન્તિ નિવાસગેહં. તદઞ્ઞં પન ઉપોસથાગારાદિ સબ્બં અનિવાસગેહં ચતુકપ્પિયભૂમિવિમુત્તા પઞ્ચમી કપ્પિયભૂમિ. સઙ્ઘસન્તકેપિ હિ એતાદિસે ગેહે સુટ્ઠુ પરિક્ખિત્તારામટ્ઠેપિ અબ્ભોકાસે વિય અન્તોવુત્થાદિદોસો નત્થિ. યેન કેનચિ છન્ને પરિચ્છન્ને ચ સહસેય્યપ્પહોનકે ભિક્ખુસ્સ, સઙ્ઘસ્સ વા નિવાસગેહે અન્તોવુત્થાદિદોસો, ન અઞ્ઞત્થ. તેનાહ ‘‘યં પના’’તિઆદિ. તત્થ ‘‘સઙ્ઘિકં વા પુગ્ગલિકં વા’’તિ ઇદં કિઞ્ચાપિ ભિક્ખુભિક્ખુનીનં સામઞ્ઞતો વુત્તં ભિક્ખૂનં પન સઙ્ઘિકં પુગ્ગલિકઞ્ચ ભિક્ખુનીનં, તાસં સઙ્ઘિકં પુગ્ગલિકઞ્ચ ભિક્ખૂનં ગિહિસન્તકટ્ઠાને તિટ્ઠતીતિ વેદિતબ્બં.
મુખસન્નિધીતિ અન્તોસન્નિહિતદોસો હિ મુખપ્પવેસનનિમિત્તં આપત્તિં કરોતિ, નાઞ્ઞથા, તસ્મા ‘‘મુખસન્નિધી’’તિ (વિ॰ વિ॰ ટી॰ મહાવગ્ગ ૨.૨૯૫) વુત્તોતિ.
તત્થ તત્થ ખણ્ડા હોન્તીતિ ઉપડ્ઢતો અધિકં ખણ્ડા હોન્તિ. સબ્બસ્મિં છદને વિનટ્ઠેતિ તિણપણ્ણાદિવસ્સપરિત્તાયકે છદને વિનટ્ઠે. ગોપાનસીનં પન ઉપરિ વલ્લીહિ બદ્ધદણ્ડેસુ ઠિતેસુપિ પક્ખપાસકમણ્ડલન્તિ એકસ્મિં પસ્સે તિણ્ણં ગોપાનસીનં ઉપરિ ઠિતતિણપણ્ણાદિછદનં વુચ્ચતિ.
૧૦૩. ‘‘અનુપસમ્પન્નસ્સ દત્વા તસ્સા’’તિઆદિના અકપ્પિયકુટિયં વુત્થમ્પિ અનુપસમ્પન્નસ્સ દિન્ને કપ્પિયં હોતિ, સાપેક્ખદાનઞ્ચેત્થ વટ્ટતિ, પટિગ્ગહણં વિય ન હોતીતિ દસ્સેતિ. અન્તોપક્કસામંપક્કેસુ પન ‘‘ન, ભિક્ખવે, અન્તોવુત્થં અન્તોપક્કં સામંપક્કં પરિભુઞ્જિતબ્બં, યો પરિભુઞ્જેય્ય, આપત્તિ દુક્કટસ્સ. અન્તો ચે, ભિક્ખવે, વુત્થં અન્તોપક્કં અન્તોવુત્થન્તિ અકપ્પિયકુટિયં વુત્થં. અન્તોપક્કેપિ એસેવ નયો. સામંપક્કન્તિ યં કિઞ્ચિ આમિસં ભિક્ખુસ્સ પચિતું ન વટ્ટતિ. તત્થ યં વત્તબ્બં, તં અટ્ઠકથાયં વુત્તમેવ.
ઇતિ વિનયસઙ્ગહસંવણ્ણનાભૂતે વિનયાલઙ્કારે
કપ્પિયભૂમિવિનિચ્છયકથાલઙ્કારો નામ
એકૂનવીસતિમો પરિચ્છેદો.