ખન્ધકપુચ્છાકથાવણ્ણના
૩૦૦. સેસેસૂતિ અભબ્બપુગ્ગલપરિદીપકેસુ સબ્બપદેસુ.
૩૦૨. ‘‘નસ્સન્તુ એતે’’તિ પદચ્છેદો. પુરક્ખકાતિ એત્થ સામિઅત્થે પચ્ચત્તવચનં, ભેદપુરેક્ખકસ્સ, ભેદપુરેક્ખકાયાતિ અત્થો.
૩૦૩. સેસેસૂતિ અવસેસેસુ અસંવાસકાદિદીપકેસુ પટિક્ખેપપદેસુ.
૩૦૪. એકાવ દુક્કટાપત્તિ વુત્તાતિ વસ્સં અનુપગમનાદિપચ્ચયા જાતિતો એકાવ દુક્કટાપત્તિ વુત્તા.
૩૦૫. ઉપોસથસમા મતાતિ ઉપોસથક્ખન્ધકે વુત્તસદિસા જાતા આપત્તિયો મતા અધિપ્પેતા.
૩૦૬. ચમ્મેતિ ચમ્મક્ખન્ધકે. વચ્છતરિં ગહેત્વા મારેન્તાનં છબ્બગ્ગિયાનં પાચિત્તિ વુત્તાતિ સમ્બન્ધો. વચ્છતરિન્તિ બલસમ્પન્નં તરુણગાવિં. સા હિ વચ્છકભાવં તરિત્વા અતિક્કમિત્વા ઠિતત્તા ‘‘વચ્છતરી’’તિ વુચ્ચતિ.
૩૦૭. અઙ્ગજાતં છુપન્તસ્સાતિ ગાવીનં અઙ્ગજાતં અત્તનો અઙ્ગજાતેન બહિ છુપન્તસ્સ. સેસેસૂતિ ગાવીનં વિસાણાદીસુ ગહણે, પિટ્ઠિઅભિરુહણે ચ. યથાહ ‘‘છબ્બગ્ગિયા ભિક્ખૂ અચિરવતિયા નદિયા ગાવીનં તરન્તીનં વિસાણેસુપિ ગણ્હન્તી’’તિઆદિ (મહાવ॰ ૨૫૨).
૩૦૯. તત્થ ભેસજ્જક્ખન્ધકે. સામન્તા દ્વઙ્ગુલેતિ વચ્ચમગ્ગપસ્સાવમગ્ગાનં સામન્તા દ્વઙ્ગુલમત્તે પદેસે. સત્થકમ્મં કરોન્તસ્સ થુલ્લચ્ચયમુદીરિતન્તિ યોજના. યથાહ – ‘‘ન, ભિક્ખવે, સમ્બાધસ્સ સામન્તા દ્વઙ્ગુલે સત્થકમ્મં વા વત્થિકમ્મં વા કારેતબ્બં, યો કારેય્ય, આપત્તિ થુલ્લચ્ચયસ્સા’’તિ (મહાવ॰ ૨૭૯). એત્થ ચ ‘‘સામન્તા દ્વઙ્ગુલે’’તિ ઇદં સત્થકમ્મંયેવ સન્ધાય વુત્તં. વત્થિકમ્મં પન સમ્બાધેયેવ પટિક્ખિત્તં.
‘‘ન, ભિક્ખવે, અઞ્ઞત્ર નિમન્તિતેન અઞ્ઞસ્સ ભોજ્જયાગુ પરિભુઞ્જિતબ્બા, યો પરિભુઞ્જેય્ય, યથાધમ્મો કારેતબ્બો’’તિ (મહાવ॰ ૨૮૩) વુત્તત્તા આહ ‘‘ભોજ્જયાગૂસુ પાચિત્તી’’તિ. એત્થ ભોજ્જયાગુ નામ બહલયાગુ. ‘‘પિણ્ડં વટ્ટેત્વા પાતબ્બયાગૂ’’તિ ગણ્ઠિપદે વુત્તં. પાચિત્તીતિ પરમ્પરભોજનપવારણસિક્ખાપદેહિ પાચિત્તિ. સેસેસૂતિ અન્તોવુત્થઅન્તોપક્કસયંપક્કપરિભોગાદીસુ. યથાહ ‘‘ન, ભિક્ખવે, અન્તોવુત્થં અન્તોપક્કં સામંપક્કં પરિભુઞ્જિતબ્બં, યો પરિભુઞ્જેય્ય, આપત્તિ દુક્કટસ્સા’’તિઆદિ (મહાવ॰ ૨૭૪).
૩૧૦. ચીવરસંયુત્તેતિ ચીવરક્ખન્ધકે.
૩૧૩. ચમ્પેય્યકે ચ કોસમ્બેતિ ચમ્પેય્યક્ખન્ધકે ચેવ કોસમ્બકક્ખન્ધકે ચ. ‘‘કમ્મસ્મિ’’ન્તિઆદીસુપિ એસેવ નયો.
૩૧૭. રોમન્થેતિ ભુત્તસ્સ લહું પાકત્તાય કુચ્છિગતં મુખં આરોપેત્વા સણ્હકરણવસેન અનુચાલને.
૩૧૮. સેનાસનસ્મિન્તિ સેનાસનક્ખન્ધકે. ગરુનોતિ ગરુભણ્ડસ્સ.
૩૨૦. સઙ્ઘભેદેતિ સઙ્ઘભેદકક્ખન્ધકે.
૩૨૧. ભેદાનુવત્તકાનન્તિ સઙ્ઘભેદાનુવત્તકાનં. ગણભોગેતિ ગણભોજને.
૩૨૨. સાતિ એત્થ સબ્બવત્તેસુ અનાદરિયેન હોતીતિ સેસો. સેસં ઉત્તાનત્થમેવ.
ઇતિ ઉત્તરે લીનત્થપકાસનિયા
ખન્ધકપુચ્છાકથાવણ્ણના નિટ્ઠિતા.