១១. ឯកាទសមនយោ
១១. សង្គហិតេនសម្បយុត្តវិប្បយុត្តបទនិទ្ទេសោ
៤០៩. សមុទយសច្ចេន យេ ធម្មា… មគ្គសច្ចេន យេ ធម្មា ខន្ធសង្គហេន សង្គហិតា អាយតនសង្គហេន សង្គហិតា ធាតុសង្គហេន សង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សម្បយុត្តា? តេ ធម្មា តីហិ ខន្ធេហិ ឯកេនាយតនេន សត្តហិ ធាតូហិ សម្បយុត្តា; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តា។ កតិហិ វិប្បយុត្តា? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។
៤១០. ឥត្ថិន្ទ្រិយេន យេ ធម្មា… បុរិសិន្ទ្រិយេន យេ ធម្មា ខន្ធសង្គហេន សង្គហិតា អាយតនសង្គហេន សង្គហិតា ធាតុសង្គហេន សង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សម្បយុត្តាតិ? នត្ថិ។ កតិហិ វិប្បយុត្តា? ចតូហិ ខន្ធេហិ ឯកេនាយតនេន សត្តហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។
៤១១. សុខិន្ទ្រិយេន យេ ធម្មា… ទុក្ខិន្ទ្រិយេន យេ ធម្មា… សោមនស្សិន្ទ្រិយេន យេ ធម្មា… ទោមនស្សិន្ទ្រិយេន យេ ធម្មា ខន្ធសង្គហេន សង្គហិតា អាយតនសង្គហេន សង្គហិតា ធាតុសង្គហេន សង្គហិតា…បេ.… តេ ធម្មា តីហិ ខន្ធេហិ ឯកេនាយតនេន សត្តហិ ធាតូហិ សម្បយុត្តា; ឯកេនាយតនេន ឯកាយ ធាតុយា កេហិចិ សម្បយុត្តា។ កតិហិ វិប្បយុត្តា? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។
៤១២. ឧបេក្ខិន្ទ្រិយេន យេ ធម្មា ខន្ធសង្គហេន សង្គហិតា អាយតនសង្គហេន សង្គហិតា ធាតុសង្គហេន សង្គហិតា… តេ ធម្មា តីហិ ខន្ធេហិ ឯកេនាយតនេន ទ្វីហិ ធាតូហិ សម្បយុត្តា; ឯកេនាយតនេន ឯកាយ ធាតុយា កេហិចិ សម្បយុត្តា។ កតិហិ វិប្បយុត្តា? ឯកេន ខន្ធេន ទសហាយតនេហិ បន្នរសហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។
៤១៣. សទ្ធិន្ទ្រិយេន យេ ធម្មា… វីរិយិន្ទ្រិយេន យេ ធម្មា… សតិន្ទ្រិយេន យេ ធម្មា… សមាធិន្ទ្រិយេន យេ ធម្មា… បញ្ញិន្ទ្រិយេន យេ ធម្មា… អនញ្ញាតញ្ញស្សាមីតិន្ទ្រិយេន យេ ធម្មា… អញ្ញិន្ទ្រិយេន យេ ធម្មា… អញ្ញាតាវិន្ទ្រិយេន យេ ធម្មា… អវិជ្ជាយ យេ ធម្មា… អវិជ្ជាបច្ចយា សង្ខារេហិ យេ ធម្មា… សឡាយតនបច្ចយា ផស្សេន យេ ធម្មា… វេទនាបច្ចយា តណ្ហាយ យេ ធម្មា… តណ្ហាបច្ចយា ឧបាទានេន យេ ធម្មា… កម្មភវេន យេ ធម្មា ខន្ធសង្គហេន សង្គហិតា អាយតនសង្គហេន សង្គហិតា ធាតុសង្គហេន សង្គហិតា តេ ធម្មា តីហិ ខន្ធេហិ ឯកេនាយតនេន សត្តហិ ធាតូហិ សម្បយុត្តា; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តា។ កតិហិ វិប្បយុត្តា? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។
៤១៤. បរិទេវេន យេ ធម្មា ខន្ធសង្គហេន សង្គហិតា អាយតនសង្គហេន សង្គហិតា ធាតុសង្គហេន សង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សម្បយុត្តាតិ? នត្ថិ។ កតិហិ វិប្បយុត្តា? ចតូហិ ខន្ធេហិ ឯកេនាយតនេន សត្តហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។
៤១៥. សោកេន យេ ធម្មា… ទុក្ខេន យេ ធម្មា… ទោមនស្សេន យេ ធម្មា ខន្ធសង្គហេន សង្គហិតា អាយតនសង្គហេន សង្គហិតា ធាតុសង្គហេន សង្គហិតា… តេ ធម្មា តីហិ ខន្ធេហិ ឯកេនាយតនេន សត្តហិ ធាតូហិ សម្បយុត្តា; ឯកេនាយតនេន ឯកាយ ធាតុយា កេហិចិ សម្បយុត្តា។ កតិហិ វិប្បយុត្តា? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។
៤១៦. ឧបាយាសេន យេ ធម្មា… សតិបដ្ឋានេន យេ ធម្មា… សម្មប្បធានេន យេ ធម្មា… អប្បមញ្ញាយ យេ ធម្មា… បញ្ចហិ ឥន្ទ្រិយេហិ យេ ធម្មា… បញ្ចហិ ពលេហិ យេ ធម្មា… សត្តហិ ពោជ្ឈង្គេហិ យេ ធម្មា… អរិយេន អដ្ឋង្គិកេន មគ្គេន យេ ធម្មា… ផស្សេន យេ ធម្មា… ចេតនាយ យេ ធម្មា… អធិមោក្ខេន យេ ធម្មា… មនសិការេន យេ ធម្មា… ហេតូហិ ធម្មេហិ យេ ធម្មា… ហេតូហិ ចេវ សហេតុកេហិ ច ធម្មេហិ យេ ធម្មា… ហេតូហិ ចេវ ហេតុសម្បយុត្តេហិ ច ធម្មេហិ យេ ធម្មា… អាសវេហិ ធម្មេហិ យេ ធម្មា… អាសវេហិ ចេវ សាសវេហិ ច ធម្មេហិ យេ ធម្មា… អាសវេហិ ចេវ អាសវសម្បយុត្តេហិ ច ធម្មេហិ យេ ធម្មា… សំយោជនេហិ ធម្មេហិ យេ ធម្មា… គន្ថេហិ ធម្មេហិ យេ ធម្មា… ឱឃេហិ ធម្មេហិ យេ ធម្មា… យោគេហិ ធម្មេហិ យេ ធម្មា… នីវរណេហិ ធម្មេហិ យេ ធម្មា… បរាមាសេហិ ធម្មេហិ យេ ធម្មា… ឧបាទានេហិ ធម្មេហិ យេ ធម្មា… កិលេសេហិ ធម្មេហិ យេ ធម្មា… កិលេសេហិ ចេវ សំកិលេសិកេហិ ច ធម្មេហិ យេ ធម្មា… កិលេសេហិ ចេវ សំកិលិដ្ឋេហិ ច ធម្មេហិ យេ ធម្មា… កិលេសេហិ ចេវ កិលេសសម្បយុត្តេហិ ច ធម្មេហិ យេ ធម្មា ខន្ធសង្គហេន សង្គហិតា អាយតនសង្គហេន សង្គហិតា ធាតុសង្គហេន សង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សម្បយុត្តា? តេ ធម្មា តីហិ ខន្ធេហិ ឯកេនាយតនេន សត្តហិ ធាតូហិ សម្បយុត្តា; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តា។ កតិហិ វិប្បយុត្តា? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។
ទ្វេ សច្ចា បន្នរសិន្ទ្រិយា, ឯកាទស បដិច្ចបទា;
ឧទ្ធំ បុន ឯកាទស, គោច្ឆកបទមេត្ថ តិំសវិធាតិ។
សង្គហិតេនសម្បយុត្តវិប្បយុត្តបទនិទ្ទេសោ ឯកាទសមោ។