២២. ពាវីសតិមវគ្គោ
(២០៨) ១. បរិនិព្ពានកថា
៨៩២. អត្ថិ កិញ្ចិ សំយោជនំ អប្បហាយ បរិនិព្ពានន្តិ? អាមន្តា។ អត្ថិ កិញ្ចិ សក្កាយទិដ្ឋិំ អប្បហាយ…បេ.… អនោត្តប្បំ អប្បហាយ បរិនិព្ពានន្តិ? ន ហេវំ វត្តព្ពេ…បេ.…។
អត្ថិ កិញ្ចិ សំយោជនំ អប្បហាយ បរិនិព្ពានន្តិ? អាមន្តា។ អរហា សរាគោ…បេ.… សកិលេសោតិ? ន ហេវំ វត្តព្ពេ…បេ.… ននុ អរហា និរាគោ…បេ.… និក្កិលេសោតិ? អាមន្តា។ ហញ្ចិ អរហា និរាគោ…បេ.… និក្កិលេសោ, នោ ច វត រេ វត្តព្ពេ – ‘‘អត្ថិ កិញ្ចិ សំយោជនំ អប្បហាយ បរិនិព្ពាន’’ន្តិ។
៨៩៣. ន វត្តព្ពំ – ‘‘អត្ថិ កិញ្ចិ សំយោជនំ អប្បហាយ បរិនិព្ពាន’’ន្តិ? អាមន្តា ។ អរហា សព្ពំ ពុទ្ធវិសយំ ជានាតីតិ? ន ហេវំ វត្តព្ពេ។ តេន ហិ អត្ថិ កិញ្ចិ សំយោជនំ អប្បហាយ បរិនិព្ពានន្តិ។
បរិនិព្ពានកថា និដ្ឋិតា។
២២. ពាវីសតិមវគ្គោ
(២០៩) ២. កុសលចិត្តកថា
៨៩៤. អរហា កុសលចិត្តោ បរិនិព្ពាយតីតិ? អាមន្តា។ អរហា បុញ្ញាភិសង្ខារំ អភិសង្ខរោន្តោ… អានេញ្ជាភិសង្ខារំ អភិសង្ខរោន្តោ… គតិសំវត្តនិយំ កម្មំ ករោន្តោ… ភវសំវត្តនិយំ កម្មំ ករោន្តោ… ឥស្សរិយសំវត្តនិយំ កម្មំ ករោន្តោ… អធិបច្ចសំវត្តនិយំ កម្មំ ករោន្តោ… មហាភោគសំវត្តនិយំ កម្មំ ករោន្តោ… មហាបរិវារសំវត្តនិយំ កម្មំ ករោន្តោ… ទេវសោភគ្យសំវត្តនិយំ កម្មំ ករោន្តោ… មនុស្សសោភគ្យសំវត្តនិយំ កម្មំ ករោន្តោ បរិនិព្ពាយតីតិ? ន ហេវំ វត្តព្ពេ…បេ.…។
អរហា កុសលចិត្តោ បរិនិព្ពាយតីតិ? អាមន្តា។ អរហា អាចិនន្តោ អបចិនន្តោ បជហន្តោ ឧបាទិយន្តោ វិសិនេន្តោ ឧស្សិនេន្តោ វិធូបេន្តោ សន្ធូបេន្តោ បរិនិព្ពាយតីតិ? ន ហេវំ វត្តព្ពេ …បេ.… ននុ អរហា នេវាចិនាតិ ន អបចិនាតិ អបចិនិត្វា ឋិតោតិ? អាមន្តា។ ហញ្ចិ អរហា នេវាចិនាតិ ន អបចិនាតិ អបចិនិត្វា ឋិតោ, នោ ច វត រេ វត្តព្ពេ – ‘‘អរហា កុសលចិត្តោ បរិនិព្ពាយតី’’តិ។ ននុ អរហា នេវ បជហតិ ន ឧបាទិយតិ បជហិត្វា ឋិតោ, នេវ វិសិនេតិ ន ឧស្សិនេតិ វិសិនេត្វា ឋិតោ; ននុ អរហា នេវ វិធូបេតិ ន សន្ធូបេតិ វិធូបេត្វា ឋិតោតិ? អាមន្តា។ ហញ្ចិ អរហា នេវ វិធូបេតិ ន សន្ធូបេតិ វិធូបេត្វា ឋិតោ, នោ ច វត រេ វត្តព្ពេ – ‘‘អរហា កុសលចិត្តោ បរិនិព្ពាយតី’’តិ។
៨៩៥. ន វត្តព្ពំ – ‘‘អរហា កុសលចិត្តោ បរិនិព្ពាយតី’’តិ? អាមន្តា។ ននុ អរហា ឧបដ្ឋិតស្សតិ សតោ សម្បជានោ បរិនិព្ពាយតីតិ? អាមន្តា។ ហញ្ចិ អរហា ឧបដ្ឋិតស្សតិ សតោ សម្បជានោ បរិនិព្ពាយតិ, តេន វត រេ វត្តព្ពេ – ‘‘អរហា កុសលចិត្តោ បរិនិព្ពាយតី’’តិ។
កុសលចិត្តកថា និដ្ឋិតា។
២២. ពាវីសតិមវគ្គោ
(២១០) ៣. អានេញ្ជកថា
៨៩៦. អរហា អានេញ្ជេ ឋិតោ បរិនិព្ពាយតីតិ? អាមន្តា។ ននុ អរហា បកតិចិត្តេ ឋិតោ បរិនិព្ពាយតីតិ? អាមន្តា។ ហញ្ចិ អរហា បកតិចិត្តេ ឋិតោ បរិនិព្ពាយតិ, នោ ច វត រេ វត្តព្ពេ – ‘‘អរហា អានេញ្ជេ ឋិតោ បរិនិព្ពាយតី’’តិ។
អរហា អានេញ្ជេ ឋិតោ បរិនិព្ពាយតីតិ? អាមន្តា។ អរហា កិរិយមយេ ចិត្តេ ឋិតោ បរិនិព្ពាយតីតិ? ន ហេវំ វត្តព្ពេ…បេ.… ននុ អរហា វិបាកចិត្តេ ឋិតោ បរិនិព្ពាយតីតិ? អាមន្តា។ ហញ្ចិ អរហា វិបាកចិត្តេ ឋិតោ បរិនិព្ពាយតិ, នោ ច វត រេ វត្តព្ពេ – ‘‘អរហា អានេញ្ជេ ឋិតោ បរិនិព្ពាយតី’’តិ។
អរហា អានេញ្ជេ ឋិតោ បរិនិព្ពាយតីតិ? អាមន្តា។ អរហា កិរិយាព្យាកតេ ចិត្តេ ឋិតោ បរិនិព្ពាយតីតិ? ន ហេវំ វត្តព្ពេ…បេ.… ននុ អរហា វិបាកាព្យាកតេ ចិត្តេ ឋិតោ បរិនិព្ពាយតីតិ? អាមន្តា។ ហញ្ចិ អរហា វិបាកាព្យាកតេ ចិត្តេ ឋិតោ បរិនិព្ពាយតិ, នោ ច វត រេ វត្តព្ពេ – ‘‘អរហា អានេញ្ជេ ឋិតោ បរិនិព្ពាយតី’’តិ។
អរហា អានេញ្ជេ ឋិតោ បរិនិព្ពាយតីតិ? អាមន្តា។ ននុ ភគវា ចតុត្ថជ្ឈានា វុដ្ឋហិត្វា សមនន្តរា បរិនិព្ពុតោតិ ទី. និ. ២.២១៩? អាមន្តា។ ហញ្ចិ ភគវា ចតុត្ថជ្ឈានា វុដ្ឋហិត្វា សមនន្តរា បរិនិព្ពុតោ, នោ ច វត រេ វត្តព្ពេ – ‘‘អរហា អានេញ្ជេ ឋិតោ បរិនិព្ពាយតី’’តិ។
អានេញ្ជកថា និដ្ឋិតា។
២២. ពាវីសតិមវគ្គោ
(២១១) ៤. ធម្មាភិសមយកថា
៨៩៧. អត្ថិ គព្ភសេយ្យាយ ធម្មាភិសមយោតិ? អាមន្តា។ អត្ថិ គព្ភសេយ្យាយ ធម្មទេសនា, ធម្មស្សវនំ, ធម្មសាកច្ឆា, បរិបុច្ឆា, សីលសមាទានំ , ឥន្ទ្រិយេសុ គុត្តទ្វារតា, ភោជនេ មត្តញ្ញុតា, បុព្ពរត្តាបររត្តំ ជាគរិយានុយោគោតិ ? ន ហេវំ វត្តព្ពេ…បេ.… នត្ថិ គព្ភសេយ្យាយ ធម្មទេសនា, ធម្មស្សវនំ…បេ.… បុព្ពរត្តាបររត្តំ ជាគរិយានុយោគោតិ? អាមន្តា។ ហញ្ចិ នត្ថិ គព្ភសេយ្យាយ ធម្មទេសនា, ធម្មស្សវនំ…បេ.… បុព្ពរត្តាបររត្តំ ជាគរិយានុយោគោ, នោ ច វត រេ វត្តព្ពេ – ‘‘អត្ថិ គព្ភសេយ្យាយ ធម្មាភិសមយោ’’តិ។
អត្ថិ គព្ភសេយ្យាយ ធម្មាភិសមយោតិ? អាមន្តា។ ននុ ទ្វេ បច្ចយា សម្មាទិដ្ឋិយា ឧប្បាទាយ – បរតោ ច ឃោសោ, យោនិសោ ច មនសិការោតិ? អាមន្តា។ ហញ្ចិ ទ្វេ បច្ចយា សម្មាទិដ្ឋិយា ឧប្បាទាយ – បរតោ ច ឃោសោ, យោនិសោ ច មនសិការោ, នោ ច វត រេ វត្តព្ពេ – ‘‘អត្ថិ គព្ភសេយ្យាយ ធម្មាភិសមយោ’’តិ។
អត្ថិ គព្ភសេយ្យាយ ធម្មាភិសមយោតិ? អាមន្តា។ សុត្តស្ស បមត្តស្ស មុដ្ឋស្សតិស្ស អសម្បជានស្ស ធម្មាភិសមយោតិ? ន ហេវំ វត្តព្ពេ…បេ.…។
ធម្មាភិសមយកថា និដ្ឋិតា។
២២. ពាវីសតិមវគ្គោ
(២១២-៤) ៥-៧. តិស្សោបិកថា
៨៩៨. អត្ថិ គព្ភសេយ្យាយ អរហត្តប្បត្តីតិ? អាមន្តា។ សុត្តស្ស បមត្តស្ស មុដ្ឋស្សតិស្ស អសម្បជានស្ស អរហត្តប្បត្តីតិ? ន ហេវំ វត្តព្ពេ…បេ.…។
៨៩៩. អត្ថិ សុបិនគតស្ស ធម្មាភិសមយោតិ? អាមន្តា។ សុត្តស្ស បមត្តស្ស មុដ្ឋស្សតិស្ស អសម្បជានស្ស ធម្មាភិសមយោតិ? ន ហេវំ វត្តព្ពេ…បេ.…។
៩០០. អត្ថិ សុបិនគតស្ស អរហត្តប្បត្តីតិ? អាមន្តា។ សុត្តស្ស បមត្តស្ស មុដ្ឋស្សតិស្ស អសម្បជានស្ស អរហត្តប្បត្តីតិ? ន ហេវំ វត្តព្ពេ…បេ.…។
តិស្សោបិកថា និដ្ឋិតា។
២២. ពាវីសតិមវគ្គោ
(២១៥) ៨. អព្យាកតកថា
៩០១. សព្ពំ សុបិនគតស្ស ចិត្តំ អព្យាកតន្តិ? អាមន្តា។ សុបិនន្តេន បាណំ ហនេយ្យាតិ? អាមន្តា។ ហញ្ចិ សុបិនន្តេន បាណំ ហនេយ្យ, នោ ច វត រេ វត្តព្ពេ – ‘‘សព្ពំ សុបិនគតស្ស ចិត្តំ អព្យាកត’’ន្តិ។
សុបិនន្តេន អទិន្នំ អាទិយេយ្យ…បេ.… មុសា ភណេយ្យ, បិសុណំ ភណេយ្យ, ផរុសំ ភណេយ្យ, សម្ផំ បលបេយ្យ, សន្ធិំ ឆិន្ទេយ្យ, និល្លោបំ ហរេយ្យ, ឯកាគារិកំ ករេយ្យ, បរិបន្ថេ តិដ្ឋេយ្យ, បរទារំ គច្ឆេយ្យ, គាមឃាតកំ ករេយ្យ, និគមឃាតកំ ករេយ្យ, សុបិនន្តេន មេថុនំ ធម្មំ បដិសេវេយ្យ , សុបិនគតស្ស អសុចិ មុច្ចេយ្យ, សុបិនន្តេន ទានំ ទទេយ្យ, ចីវរំ ទទេយ្យ, បិណ្ឌបាតំ ទទេយ្យ, សេនាសនំ ទទេយ្យ, គិលានបច្ចយភេសជ្ជបរិក្ខារំ ទទេយ្យ, ខាទនីយំ ទទេយ្យ, ភោជនីយំ ទទេយ្យ, បានីយំ ទទេយ្យ, ចេតិយំ វន្ទេយ្យ, ចេតិយេ មាលំ អារោបេយ្យ, គន្ធំ អារោបេយ្យ , វិលេបនំ អារោបេយ្យ…បេ.… ចេតិយំ អភិទក្ខិណំ ករេយ្យាតិ? អាមន្តា ។ ហញ្ចិ សុបិនន្តេន ចេតិយំ អភិទក្ខិណំ ករេយ្យ, នោ ច វត រេ វត្តព្ពេ – ‘‘សព្ពំ សុបិនគតស្ស ចិត្តំ អព្យាកត’’ន្តិ។
៩០២. ន វត្តព្ពំ – ‘‘សព្ពំ សុបិនគតស្ស ចិត្តំ អព្យាកត’’ន្តិ? អាមន្តា។ ននុ សុបិនគតស្ស ចិត្តំ អព្ពោហារិយំ វុត្តំ ភគវតាតិ? អាមន្តា។ ហញ្ចិ សុបិនគតស្ស ចិត្តំ អព្ពោហារិយំ វុត្តំ ភគវតា, តេន វត រេ វត្តព្ពេ – ‘‘សព្ពំ សុបិនគតស្ស ចិត្តំ អព្យាកត’’ន្តិ។
អព្យាកតកថា និដ្ឋិតា។
២២. ពាវីសតិមវគ្គោ
(២១៦) ៩. អាសេវនបច្ចយកថា
៩០៣. នត្ថិ កាចិ អាសេវនបច្ចយតាតិ? អាមន្តា។ ននុ វុត្តំ ភគវតា – ‘‘បាណាតិបាតោ, ភិក្ខវេ, អាសេវិតោ ភាវិតោ ពហុលីកតោ និរយសំវត្តនិកោ តិរច្ឆានយោនិសំវត្តនិកោ បេត្តិវិសយសំវត្តនិកោ, យោ សព្ពលហុសោ បាណាតិបាតស្ស វិបាកោ មនុស្សភូតស្ស អប្បាយុកសំវត្តនិកោ ហោតី’’តិ អ. និ. ៨.៤០។ អត្ថេវ សុត្តន្តោតិ? អាមន្តា។ តេន ហិ អត្ថិ កាចិ អាសេវនបច្ចយតាតិ។
នត្ថិ កាចិ អាសេវនបច្ចយតាតិ? អាមន្តា។ ននុ វុត្តំ ភគវតា – ‘‘អទិន្នាទានំ, ភិក្ខវេ, អាសេវិតំ ភាវិតំ ពហុលីកតំ និរយសំវត្តនិកំ តិរច្ឆានយោនិសំវត្តនិកំ បេត្តិវិសយសំវត្តនិកំ, យោ សព្ពលហុសោ អទិន្នាទានស្ស វិបាកោ មនុស្សភូតស្ស ភោគព្យសនសំវត្តនិកោ ហោតិ…បេ.… យោ សព្ពលហុសោ កាមេសុមិច្ឆាចារស្ស វិបាកោ មនុស្សភូតស្ស សបត្តវេរសំវត្តនិកោ ហោតិ…បេ.… យោ សព្ពលហុសោ មុសាវាទស្ស វិបាកោ មនុស្សភូតស្ស អព្ភូតព្ភក្ខានសំវត្តនិកោ ហោតិ…បេ.… យោ សព្ពលហុសោ បិសុណាយ វាចាយ វិបាកោ មនុស្សភូតស្ស មិត្តេហិ ភេទនសំវត្តនិកោ ហោតិ…បេ.… យោ សព្ពលហុសោ ផរុសាយ វាចាយ វិបាកោ មនុស្សភូតស្ស អមនាបសទ្ទសំវត្តនិកោ ហោតិ…បេ.… យោ សព្ពលហុសោ សម្ផប្បលាបស្ស វិបាកោ មនុស្សភូតស្ស អនាទេយ្យវាចាសំវត្តនិកោ ហោតិ, សុរាមេរយបានំ, ភិក្ខវេ, អាសេវិតំ…បេ.… យោ សព្ពលហុសោ សុរាមេរយបានស្ស វិបាកោ មនុស្សភូតស្ស ឧម្មត្តកសំវត្តនិកោ ហោតី’’តិ អ. និ. ៨.៤០! អត្ថេវ សុត្តន្តោតិ? អាមន្តា។ តេន ហិ អត្ថិ កាចិ អាសេវនបច្ចយតាតិ។
៩០៤. នត្ថិ កាចិ អាសេវនបច្ចយតាតិ? អាមន្តា។ ននុ វុត្តំ ភគវតា – ‘‘មិច្ឆាទិដ្ឋិ, ភិក្ខវេ, អាសេវិតា ភាវិតា ពហុលីកតា និរយសំវត្តនិកា តិរច្ឆានយោនិសំវត្តនិកា បេត្តិវិសយសំវត្តនិកា’’តិ។ អត្ថេវ សុត្តន្តោតិ? អាមន្តា។ តេន ហិ អត្ថិ កាចិ អាសេវនបច្ចយតាតិ។
នត្ថិ កាចិ អាសេវនបច្ចយតាតិ? អាមន្តា។ ននុ វុត្តំ ភគវតា – ‘‘មិច្ឆាសង្កប្បោ…បេ.… មិច្ឆាសមាធិ, ភិក្ខវេ, អាសេវិតោ ភាវិតោ…បេ.… បេត្តិវិសយសំវត្តនិកោ’’តិ! អត្ថេវ សុត្តន្តោតិ ? អាមន្តា។ តេន ហិ អត្ថិ កាចិ អាសេវនបច្ចយតាតិ។
៩០៥. នត្ថិ កាចិ អាសេវនបច្ចយតាតិ? អាមន្តា។ ននុ វុត្តំ ភគវតា – ‘‘សម្មាទិដ្ឋិ, ភិក្ខវេ, អាសេវិតា ភាវិតា ពហុលីកតា អមតោគធា ហោតិ អមតបរាយនា អមតបរិយោសានា’’តិ! អត្ថេវ សុត្តន្តោតិ? អាមន្តា។ តេន ហិ អត្ថិ កាចិ អាសេវនបច្ចយតាតិ។
នត្ថិ កាចិ អាសេវនបច្ចយតាតិ? អាមន្តា។ ននុ វុត្តំ ភគវតា – ‘‘សម្មាសង្កប្បោ, ភិក្ខវេ, អាសេវិតោ ភាវិតោ ពហុលីកតោ…បេ.… សម្មាសមាធិ, ភិក្ខវេ, អាសេវិតោ ភាវិតោ ពហុលីកតោ អមតោគធោ ហោតិ អមតបរាយនោ អមតបរិយោសានោ’’តិ អត្ថេវ សុត្តន្តោតិ, អាមន្តា។ តេន ហិ អត្ថិ កាចិ អាសេវនបច្ចយតាតិ។
អាសេវនបច្ចយកថា និដ្ឋិតា។
២២. ពាវីសតិមវគ្គោ
(២១៧) ១០. ខណិកកថា
៩០៦. ឯកចិត្តក្ខណិកា សព្ពេ ធម្មាតិ? អាមន្តា។ ចិត្តេ មហាបថវី សណ្ឋាតិ, មហាសមុទ្ទោ សណ្ឋាតិ, សិនេរុបព្ពតរាជា សណ្ឋាតិ, អាបោ សណ្ឋាតិ, តេជោ សណ្ឋាតិ, វាយោ សណ្ឋាតិ, តិណកដ្ឋវនប្បតយោ សណ្ឋហន្តីតិ? ន ហេវំ វត្តព្ពេ…បេ.…។
ឯកចិត្តក្ខណិកា សព្ពេ ធម្មាតិ? អាមន្តា។ ចក្ខាយតនំ ចក្ខុវិញ្ញាណេន សហជាតន្តិ? ន ហេវំ វត្តព្ពេ…បេ.… ចក្ខាយតនំ ចក្ខុវិញ្ញាណេន សហជាតន្តិ? អាមន្តា។ ននុ អាយស្មា សារិបុត្តោ ឯតទវោច – ‘‘អជ្ឈត្តិកញ្ចេវ, អាវុសោ, ចក្ខុំ អបរិភិន្នំ ហោតិ, ពាហិរា ច រូបា ន អាបាថំ អាគច្ឆន្តិ, នោ ច តជ្ជោ សមន្នាហារោ ហោតិ, នេវ តាវ តជ្ជស្ស វិញ្ញាណភាគស្ស វិញ្ញាណភាវស្ស (ពហូសុ) បាតុភាវោ ហោតិ។ អជ្ឈត្តិកញ្ចេវ, អាវុសោ, ចក្ខុំ អបរិភិន្នំ ហោតិ, ពាហិរា ច រូបា អាបាថំ អាគច្ឆន្តិ, នោ ច តជ្ជោ សមន្នាហារោ ហោតិ, នេវ តាវ តជ្ជស្ស វិញ្ញាណភាគស្ស បាតុភាវោ ហោតិ។ យតោ ច ខោ, អាវុសោ, អជ្ឈត្តិកញ្ចេវ ចក្ខុំ អបរិភិន្នំ ហោតិ , ពាហិរា ច រូបា អាបាថំ អាគច្ឆន្តិ, តជ្ជោ ច សមន្នាហារោ ហោតិ, ឯវំ តជ្ជស្ស វិញ្ញាណភាគស្ស បាតុភាវោ ហោតី’’តិ ម. និ. ១.៣០៦! អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘ចក្ខាយតនំ ចក្ខុវិញ្ញាណេន សហជាត’’ន្តិ។
សោតាយតនំ…បេ.… ឃានាយតនំ…បេ.… ជិវ្ហាយតនំ…បេ.… កាយាយតនំ កាយវិញ្ញាណេន សហជាតន្តិ? ន ហេវំ វត្តព្ពេ…បេ.… កាយាយតនំ កាយវិញ្ញាណេន សហជាតន្តិ? អាមន្តា។ ននុ អាយស្មា សារិបុត្តោ ឯតទវោច – ‘‘អជ្ឈត្តិកោ ចេវ, អាវុសោ, កាយោ អបរិភិន្នោ ហោតិ, ពាហិរា ច ផោដ្ឋព្ពា ន អាបាថំ អាគច្ឆន្តិ, នោ ច…បេ.… អជ្ឈត្តិកោ ចេវ, អាវុសោ, កាយោ អបរិភិន្នោ ហោតិ, ពាហិរា ច ផោដ្ឋព្ពា អាបាថំ អាគច្ឆន្តិ, នោ ច…បេ.… យតោ ច ខោ, អាវុសោ, អជ្ឈត្តិកោ ចេវ កាយោ អបរិភិន្នោ ហោតិ, ពាហិរា ច ផោដ្ឋព្ពា អាបាថំ អាគច្ឆន្តិ, តជ្ជោ ច សមន្នាហារោ ហោតិ, ឯវំ តជ្ជស្ស វិញ្ញាណភាគស្ស បាតុភាវោ ហោតី’’តិ ម. និ. ១.៣០៦! អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘កាយាយតនំ កាយវិញ្ញាណេន សហជាត’’ន្តិ។
៩០៧. ន វត្តព្ពំ – ‘‘ឯកចិត្តក្ខណិកា សព្ពេ ធម្មា’’តិ? អាមន្តា។ សព្ពេ ធម្មា និច្ចា ធុវា សស្សតា អវិបរិណាមធម្មាតិ? ន ហេវំ វត្តព្ពេ។ តេន ហិ ឯកចិត្តក្ខណិកា សព្ពេ ធម្មាតិ។
ខណិកកថា និដ្ឋិតា។
ពាវីសតិមវគ្គោ។
តស្សុទ្ទានំ –
អត្ថិ កិញ្ចិ សំយោជនំ អប្បហាយ បរិនិព្ពានំ, អរហា កុសលចិត្តោ បរិនិព្ពាយតិ, អរហា អានេញ្ជេ ឋិតោ បរិនិព្ពាយតិ, អត្ថិ គព្ភសេយ្យាយ ធម្មាភិសមយោ, អត្ថិ គព្ភសេយ្យាយ អរហត្តប្បត្តិ, អត្ថិ សុបិនគតស្ស ធម្មាភិសមយោ, អត្ថិ សុបិនគតស្ស អរហត្តប្បត្តិ, សព្ពំ សុបិនគតស្ស ចិត្តំ អព្យាកតំ, នត្ថិ កាចិ អាសេវនបច្ចយតា, ឯកចិត្តក្ខណិកា សព្ពេ ធម្មាតិ។