អបុនរាវត្តិគមនទីបនីយមកគាថា
៧៨.
អនន្តកាលោបចិតេន តេន,
បុញ្ញេន និព្ពត្តវិមានយានេ;
តស្មិំ ទិនេ ជាតសុតំ បជាបតិំ,
ហិត្វា គតោ សោ សុគតោ គតោ វ។
៧៩.
តំ ជីវមានំ បិតរញ្ច មាតរំ,
តេ ញាតកេ តាទិសិយោ ច ឥត្ថិយោ;
តេ តាទិសេ រម្មករេ និកេតេ,
ហិត្វា គតោ សោ សុគតោ គតោ វ។
៨០.
ខោមញ្ច បត្តុណ្ណទុកូលចីនំ,
សកាសិកំ សាធុសុគន្ធវាសិតំ;
និវាសិតោ សោភតិ វាសវោ វ,
ហិត្វា គតោ សោ សុគតោ គតោ វ។
៨១.
វិធិប្បកាសា និធិយោ ចតស្សោ,
សមុគ្គតា ភូតធរា វសុន្ធរា;
សត្តាវសត្តាវសុធា សុធាសា,
ហិត្វា គតោ សោ សុគតោ គតោ វ។
៨២.
សុវណ្ណថាលេ សតរាជិកេ សុភេ,
សាធុំ សុគន្ធំ សុចិសាលិភោជនំ;
ភុត្វា សវាសីហិ វិលាសិនីហិ,
ហិត្វា គត សោ សុគតោ គតោ វ។
៨៣.
មនុញ្ញគន្ធេន អសុញ្ញគន្ធោ,
សុគន្ធគន្ធេន វិលិត្តគត្តោ;
សុគន្ធវាតេន សុវិជ្ជិតង្គោ,
ហិត្វា គតោ សោ សុគតោ គតោ វ។
៨៤.
សុលក្ខណេ ហេវភិលក្ខិតង្គោ,
បសាធិតោ ទេវបសាធនេន;
វិរោចមានោ សមរាជិនីហិ,
ហិត្វា គតោ សោ សុគតោ គតោ វ។
៨៥.
នានាសនានិ សយនានិ និវេសនានិ,
ភាភានិភានិ រតនាករសន្និភានិ;
តត្រុស្សិតានិ រតនទ្ធជភូសិតានិ,
ហិត្វា វ តានិ ហិមពិន្ទុសមានិ តានិ។
៨៦.
នានាវិធេហិ រតនេហិ សមុជ្ជលេហិ,
នារីហិ និច្ចមុបគាយិតហម្មិយេហិ;
រជ្ជេហិ ចក្ករតនាទិវិភូសិតេហិ,
យាតោ តតោ ហិ មហិតោ បុរិសស្សរេហិ។