(២៤) ៤. កម្មវគ្គោ
១. សំខិត្តសុត្តវណ្ណនា
២៣២. ចតុត្ថស្ស កណ្ហន្តិ កាឡកំ ទសអកុសលកម្មបថកម្មំ។ កណ្ហវិបាកន្តិ អបាយេ និព្ពត្តនតោ កាឡកវិបាកំ។ សុក្កន្តិ បណ្ឌរកំ កុសលកម្មបថកម្មំ សុក្កវិបាកន្តិ សគ្គេ និព្ពត្តនតោ បណ្ឌរកវិបាកំ។ កណ្ហសុក្កន្តិ មិស្សកកម្មំ។ កណ្ហសុក្កវិបាកន្តិ អកណ្ហំ អសុក្កន្តិ កម្មក្ខយករំ ចតុមគ្គញាណំ អធិប្បេតំ។ តញ្ហិ យទិ កណ្ហំ ភវេយ្យ, កណ្ហវិបាកំ ទទេយ្យ។ យទិ សុក្កំ ភវេយ្យ, សុក្កវិបាកំ ទទេយ្យ។ ឧភយវិបាកស្ស បន អប្បទានតោ អកណ្ហំ អសុក្កន្តិ អយមេត្ថ អត្ថោ។
២. វិត្ថារសុត្តវណ្ណនា
២៣៣. ទុតិយេ សព្យាពជ្ឈន្តិ សទោសំ។ កាយសង្ខារន្តិ កាយទ្វារចេតនំ។ អភិសង្ខរោតីតិ អាយូហតិ សម្បិណ្ឌេតិ។ សេសទ្វយេបិ ឯសេវ នយោ។ សព្យាពជ្ឈំ លោកន្តិ សទុក្ខំ លោកំ។ សព្យាពជ្ឈា ផស្សាតិ សទុក្ខា វិបាកផស្សា។ សព្យាពជ្ឈំ វេទនំ វេទិយតីតិ សាពាធំ វិបាកវេទនំ វេទិយតិ។ ឯកន្តទុក្ខន្តិ ឯកន្តេនេវ ទុក្ខំ, ន សុខសម្មិស្សំ។ សេយ្យថាបិ សត្តា នេរយិកាតិ ឯត្ថ សេយ្យថាបីតិ និទស្សនត្ថេ និបាតោ។ តេន កេវលំ នេរយិកសត្តេ ទស្សេតិ, អញ្ញេ បន តំសរិក្ខកា នាម នត្ថិ។ ឥមិនា ឧបាយេន សព្ពត្ថ អត្ថោ វេទិតព្ពោ។ សេយ្យថាបិ មនុស្សាតិអាទីសុ បន មនុស្សានំ តាវ កាលេន សុខា វេទនា ឧប្បជ្ជតិ, កាលេន ទុក្ខា វេទនា។ ឯកច្ចេ ច ទេវាតិ ឯត្ថ បន កាមាវចរទេវា ទដ្ឋព្ពា។ តេសញ្ហិ មហេសក្ខតរា ទេវតា ទិស្វា និសិន្នាសនតោ វុដ្ឋានំ, បារុតឧត្តរាសង្គស្ស ឱតារណំ, អញ្ជលិបគ្គណ្ហនន្តិអាទីនំ វសេន កាលេន ទុក្ខំ ឧប្បជ្ជតិ, ទិព្ពសម្បត្តិំ អនុភវន្តានំ កាលេន សុខំ។ ឯកច្ចេ ច វិនិបាតិកាតិ ឯត្ថ វេមានិកបេតា ទដ្ឋព្ពា។ តេ និរន្តរមេវ ឯកស្មិំ កាលេ សុខំ, ឯកស្មិំ កាលេ បហានាយ យា ចេតនាតិ ឯត្ថ វិវដ្ដគាមិនី មគ្គចេតនា វេទិតព្ពា។ សា ហិ កម្មក្ខយាយ សំវត្តតីតិ។
៣. សោណកាយនសុត្តវណ្ណនា
២៣៤. តតិយេ សិខាមោគ្គល្លានោតិ សីសមជ្ឈេ ឋិតាយ មហតិយា សិខាយ សមន្នាគតោ មោគ្គល្លានគោត្តោ ព្រាហ្មណោ។ បុរិមានីតិ អតីតានន្តរទិវសតោ បដ្ឋាយ បុរិមានិ, ទុតិយាទិតោ បដ្ឋាយ បុរិមតរានិ វេទិតព្ពានិ។ សោណកាយនោតិ តស្សេវ អន្តេវាសិកោ។ កម្មសច្ចាយំ ភោ លោកោតិ ភោ អយំ លោកោ កម្មសភាវោ។ កម្មសមារម្ភដ្ឋាយីតិ កម្មសមារម្ភេន តិដ្ឋតិ។ កម្មំ អាយូហន្តោវ តិដ្ឋតិ, អនាយូហន្តោ ឧច្ឆិជ្ជតីតិ ទីបេតិ។ សេសំ ហេដ្ឋា វុត្តនយមេវ។
៤-៩. សិក្ខាបទសុត្តាទិវណ្ណនា
២៣៥. ចតុត្ថាទីនិបិ ឧត្តានត្ថានេវ។ មគ្គង្គេសុ បន យស្មា សតិយា ឧបដ្ឋបេត្វា បញ្ញាយ បរិច្ឆិន្ទតិ, តស្មា ឧភយមេវ កម្មំ។ សេសា អង្គានេវ ហោន្តិ, នោ កម្មន្តិ
១០. សមណសុត្តវណ្ណនា
២៤១. ទសមេ ឥធេវាតិ ឥមស្មិំយេវ សាសនេ។ អយំ បន និយមោ សេសបទេសុបិ វេទិតព្ពោ។ ទុតិយាទយោបិ ហិ សមណា ឥធេវ, ន អញ្ញត្ថ។ សុញ្ញាតិ រិត្តា តុច្ឆា។ បរប្បវាទាតិ ចត្តារោ សស្សតវាទា, ចត្តារោ ឯកច្ចសស្សតិកា, ចត្តារោ អន្តានន្តិកា, ចត្តារោ អមរាវិក្ខេបិកា, ទ្វេ អធិច្ចសមុប្បន្និកា, សោឡស សញ្ញិវាទា, អដ្ឋ អសញ្ញិវាទា, អដ្ឋ នេវសញ្ញិនាសញ្ញិវាទា, សត្ត ឧច្ឆេទវាទា, បញ្ច ទិដ្ឋធម្មនិព្ពានវាទាតិ ឥមេ សព្ពេបិ ព្រហ្មជាលេ អាគតទ្វាសដ្ឋិទិដ្ឋិយោ ឥតោ ពាហិរានំ បរេសំ បវាទា បរប្បវាទា នាម។ តេ សព្ពេបិ ឥមេហិ ចតូហិ ផលដ្ឋកសមណេហិ សុញ្ញា។ ន ហិ តេ ឯត្ថ សន្តិ។ ន កេវលញ្ច ឯតេហេវ សុញ្ញា
‘‘ឯកូនតិំសោ
យំ បព្ពជិំ កិំកុសលានុឯសី;
វស្សានិ បញ្ញាស សមាធិកានិ,
យតោ អហំ បព្ពជិតោ សុភទ្ទ;
ញាយស្ស ធម្មស្ស បទេសវត្តី,
ឥតោ ពហិទ្ធា សមណោបិ នត្ថិ’’។
‘‘ទុតិយោបិ សមណោ នត្ថិ, តតិយោបិ សមណោ នត្ថិ, ចតុត្ថោបិ សមណោ នត្ថិ, សុញ្ញា បរប្បវាទា សមណេហិ អញ្ញេហី’’តិ
កម្មវគ្គោ ចតុត្ថោ។