೬. ಅತೀತಕ್ಖನ್ಧಾದಿಕಥಾ
೧. ನಸುತ್ತಸಾಧನಕಥಾವಣ್ಣನಾ
೨೯೭. ಇದಾನಿ ‘‘ಅತೀತಂ ಖನ್ಧಾ’’ತಿಆದಿಕಥಾ ಹೋತಿ। ತತ್ಥ ಖನ್ಧಾದಿಭಾವಾವಿಜಹನತೋ ಅತೀತಾನಾಗತಾನಂ ಅತ್ಥಿತಂ ಇಚ್ಛನ್ತಸ್ಸ ಅತೀತಂ ಖನ್ಧಾತಿ ಪುಚ್ಛಾ ಪರವಾದಿಸ್ಸ, ಅತೀತಸ್ಸ ಖನ್ಧಸಙ್ಗಹಿತತ್ತಾ ಆಮನ್ತಾತಿ ಪಟಿಞ್ಞಾ ಸಕವಾದಿಸ್ಸ। ಪುನ ಅತೀತಂ ನತ್ಥೀತಿ ಪುಚ್ಛಾ ಪರವಾದಿಸ್ಸ, ತಸ್ಸ ನಿರುತ್ತಿಪಥಸುತ್ತೇನ ಅತ್ಥಿತಾಯ ವಾರಿತತ್ತಾ ಪಟಿಕ್ಖೇಪೋ ಸಕವಾದಿಸ್ಸ। ಆಯತನಧಾತುಪುಚ್ಛಾಸುಪಿ ಅನಾಗತಪಞ್ಹೇಸುಪಿ ಪಚ್ಚುಪ್ಪನ್ನೇನ ಸದ್ಧಿಂ ಸಂಸನ್ದಿತ್ವಾ ಅನುಲೋಮಪಟಿಲೋಮತೋ ಆಗತಪಞ್ಹೇಸುಪಿ ‘‘ಅತೀತಂ ರೂಪ’’ನ್ತಿಆದಿಪಞ್ಹೇಸುಪಿ ಇಮಿನಾವುಪಾಯೇನ ಅತ್ಥೋ ವೇದಿತಬ್ಬೋ।
೨. ಸುತ್ತಸಾಧನವಣ್ಣನಾ
೨೯೮. ಸುತ್ತಸಾಧನೇ ನ ವತ್ತಬ್ಬನ್ತಿ ಪುಚ್ಛಾ ಸಕವಾದಿಸ್ಸ। ತತ್ಥ ನತ್ಥಿ ಚೇತೇತಿ ನತ್ಥಿ ಚ ಏತೇ ಧಮ್ಮಾತಿ ಅತ್ಥೋ। ಖನ್ಧಾದಿಭಾವೇ ಸತಿ ನತ್ಥಿತಂ ಅನಿಚ್ಛನ್ತಸ್ಸ ಆಮನ್ತಾತಿ ಪಟಿಞ್ಞಾ ಪರವಾದಿಸ್ಸ, ಅಥ ನೇಸಂ ನತ್ಥಿಭಾವಸಾಧನತ್ಥಂ ಸುತ್ತಾಹರಣಂ ಸಕವಾದಿಸ್ಸ। ದುತಿಯಪುಚ್ಛಾಪಿ ಪರವಾದಿಸ್ಸ, ಪಟಿಞ್ಞಾ ಸಕವಾದಿಸ್ಸ, ಸುತ್ತಾಹರಣಂ ಪರವಾದಿಸ್ಸ। ತಂ ಪನ ನೇಸಂ ಖನ್ಧಾದಿಭಾವಮೇವ ಸಾಧೇತಿ, ನ ಅತ್ಥಿಭಾವನ್ತಿ ಆಹಟಮ್ಪಿ ಅನಾಹಟಸದಿಸಮೇವಾತಿ।
ಅತೀತಂ ಖನ್ಧಾತಿಆದಿಕಥಾವಣ್ಣನಾ।