೧೩. ತೇರಸಮವಗ್ಗೋ
೧. ಕಪ್ಪಟ್ಠಕಥಾವಣ್ಣನಾ
೬೫೪-೬೫೭. ಇದಾನಿ ಕಪ್ಪಟ್ಠೋತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಬುದ್ಧೋ ಚ ಲೋಕೇತಿ ಇದಂ ವಿನಾ ಬುದ್ಧುಪ್ಪಾದೇನ ಸಙ್ಘಭೇದಸ್ಸ ಅಭಾವದಸ್ಸನತ್ಥಂ ವುತ್ತಂ। ಕಪ್ಪೋ ಚ ಸಣ್ಠಾತಿ ಸಙ್ಘೋ ಚ ಭಿಜ್ಜತೀತಿಆದಿ ‘‘ಯದಿ ಸೋ ಸಕಲಂ ಕಪ್ಪಂ ತಿಟ್ಠತಿ, ಸಣ್ಠಹನತೋ ಪಟ್ಠಾಯ ತಂ ಕಮ್ಮಂ ಕತ್ವಾ ತತ್ಥ ಉಪ್ಪಜ್ಜಿತ್ವಾ ತಿಟ್ಠೇಯ್ಯಾ’’ತಿ ದಸ್ಸೇತುಂ ವುತ್ತಂ। ಅತೀತನ್ತಿಆದಿ ಹೇಟ್ಠಾ ವುತ್ತಾಧಿಪ್ಪಾಯಮೇವ। ಕಪ್ಪಟ್ಠೋ ಇದ್ಧಿಮಾತಿ ಪಞ್ಹೇ ಭಾವನಾಮಯಂ ಸನ್ಧಾಯ ಪಟಿಕ್ಖಿಪತಿ, ಪರಸಮಯೇ ಪನಸ್ಸ ಜಾತಿಮಯಂ ಇದ್ಧಿಂ ಇಚ್ಛನ್ತಿ, ತಂ ಸನ್ಧಾಯ ಪಟಿಜಾನಾತಿ। ಛನ್ದಿದ್ಧಿಪಾದೋತಿಆದಿ ‘‘ಜಾತಿಮಯಾಯ ಇದ್ಧಿಯಾ ಇದ್ಧಿಮಾತಿ ಲದ್ಧಿಮತ್ತಮೇತಂ, ಕಿಂ ತೇನ, ಯದಿ ಪನಸ್ಸ ಇದ್ಧಿ ಅತ್ಥಿ, ಇಮಿನಾ ನಯೇನ ಇದ್ಧಿಪಾದಾ ಭಾವಿತಾ ಭವೇಯ್ಯು’’ನ್ತಿ ಚೋದನತ್ಥಂ ವುತ್ತಂ। ಆಪಾಯಿಕೋ ನೇರಯಿಕೋತಿ ಸುತ್ತಂ ಯಂ ಸೋ ಏಕಂ ಕಪ್ಪಂ ಅಸೀತಿಭಾಗೇ ಕತ್ವಾ ತತೋ ಏಕಭಾಗಮತ್ತಂ ಕಾಲಂ ತಿಟ್ಠೇಯ್ಯ, ತಂ ಆಯುಕಪ್ಪಂ ಸನ್ಧಾಯ ವುತ್ತಂ, ತಸ್ಮಾ ಅಸಾಧಕನ್ತಿ।
ಕಪ್ಪಟ್ಠಕಥಾವಣ್ಣನಾ।
೨. ಕುಸಲಪಟಿಲಾಭಕಥಾವಣ್ಣನಾ
೬೫೮-೬೫೯. ಇದಾನಿ
ಕುಸಲಪಟಿಲಾಭಕಥಾವಣ್ಣನಾ।
೩. ಅನನ್ತರಾಪಯುತ್ತಕಥಾವಣ್ಣನಾ
೬೬೦-೬೬೨. ಇದಾನಿ ಅನನ್ತರಾಪಯುತ್ತಕಥಾ ನಾಮ ಹೋತಿ। ತತ್ಥ ಅನನ್ತರಾಪಯುತ್ತೋ ನಾಮ ಯೇನ ಖನ್ಧಭೇದತೋ ಅನನ್ತರಾ ವಿಪಾಕದಾಯಕಂ ಮಾತುಘಾತಾದಿ ಆನನ್ತರಿಯಕಮ್ಮಂ ಆಣತ್ತಂ। ತತ್ಥ ಯಸ್ಸ ನಿಯತಾಯ ಆಣತ್ತಿಯಾ ಆಣತ್ತೋ ತಂ ಕಮ್ಮಂ ಕರಿಸ್ಸತಿ, ಸೋ ಅತ್ಥಸಾಧಿಕಾಯ ಚೇತನಾಯ ಉಪ್ಪಾದಿತತ್ತಾ ಮಿಚ್ಛತ್ತನಿಯತೋ ಹೋತಿ, ಅಭಬ್ಬೋ ಸಮ್ಮತ್ತನಿಯಾಮಂ ಓಕ್ಕಮಿತುಂ। ಯಸ್ಸ ಅನಿಯತಾಯ ಆಣತ್ತಿಯಾ ಆಣತ್ತೋ ತಂ ಕಮ್ಮಂ ಕರಿಸ್ಸತಿ, ಸೋ ಅತ್ಥಸಾಧಿಕಾಯ ಚೇತನಾಯ ಅನುಪ್ಪಾದಿತತ್ತಾ ನ ಮಿಚ್ಛತ್ತನಿಯತೋ, ಭಬ್ಬೋ ಸಮ್ಮತ್ತನಿಯಾಮಂ ಓಕ್ಕಮಿತುನ್ತಿ ಇದಂ ಸಕಸಮಯೇ ಸನ್ನಿಟ್ಠಾನಂ। ಯೇಸಂ ಪನ ‘‘ಅನಿಯತಾಯಪಿ ಆಣತ್ತಿಯಾ ಅಭಬ್ಬೋಯೇವ ಸಮ್ಮತ್ತನಿಯಾಮಂ ಓಕ್ಕಮಿತು’’ನ್ತಿ ಲದ್ಧಿ, ಸೇಯ್ಯಥಾಪಿ ಉತ್ತರಾಪಥಕಾನಂ; ತೇಸಂ ತಂ ಲದ್ಧಿಂ ಭಿನ್ದಿತುಂ ಸಕವಾದೀ ಪುಬ್ಬಪಕ್ಖಂ ದತ್ವಾ ಅನನ್ತರಾಪಯುತ್ತೋತಿ ಪರವಾದಿನಾ ಅತ್ತಾನಂ ಪುಚ್ಛಾಪೇತಿ। ತೇನೇತ್ಥ ಪಠಮಪುಚ್ಛಾ ಪರವಾದಿಸ್ಸ, ಅತ್ಥಸಾಧಿಕಚೇತನಾಯ ಅಭಾವಂ ಸನ್ಧಾಯ ಪಟಿಞ್ಞಾ ಸಕವಾದಿಸ್ಸ। ತತೋ ಪರವಾದೀ ಮಾತುಘಾತಾದಿಕಮ್ಮಸ್ಸ ಆಣತ್ತತ್ತಾವ ‘‘ಸೋ ಮಿಚ್ಛತ್ತನಿಯತೋ’’ತಿ ಮಞ್ಞತಿ। ತಸ್ಮಾ ಮಿಚ್ಛತ್ತನಿಯಾಮಞ್ಚಾತಿ ನ ಹೇವನ್ತಿ ಪಟಿಕ್ಖಿಪತಿ।
ನನು ತಂ ಕಮ್ಮನ್ತಿ ಮಾತುಘಾತಾದಿಕಮ್ಮಂ। ತತ್ಥ ಅನಿಯತಾಣತ್ತಿಂ ಸನ್ಧಾಯ ‘‘ಆಮನ್ತಾ’’ತಿ ಪಟಿಞ್ಞಾ ಸಕವಾದಿಸ್ಸ। ಅನಿಯತಮ್ಪಿ ಹಿ ಆಣತ್ತಿಂ ಪಯೋಜೇತ್ವಾ ಠಿತಸ್ಸ ‘‘ಅನನುಚ್ಛವಿಕಂ ಮಯಾ ಕತ’’ನ್ತಿ ಕುಕ್ಕುಚ್ಚಂ ಉಪ್ಪಜ್ಜತೇವ, ವಿಪ್ಪಟಿಸಾರೋ ಜಾಯತೇವ। ಹಞ್ಚೀತಿಆದಿ ಕುಕ್ಕುಚ್ಚುಪ್ಪತ್ತಿಮತ್ತಂ ಗಹೇತ್ವಾ ಪರವಾದಿನಾ ಲದ್ಧಿಪತಿಟ್ಠಾಪನತ್ಥಂ ವುತ್ತಂ।
೬೬೧. ಇದಾನಿ ಅನನ್ತರಾಪಯುತ್ತೋ ಪುಗ್ಗಲೋ ಅಭಬ್ಬೋತಿ ಪುಚ್ಛಾ ಸಕವಾದಿಸ್ಸ, ಅತ್ತನೋ ಲದ್ಧಿವಸೇನ ಪಟಿಞ್ಞಾ ಇತರಸ್ಸ। ಅಥ ನಂ ಸಕವಾದೀ ‘‘ಅಭಬ್ಬೋ ನಾಮ ಮಾತುಘಾತಾದಿಕಮ್ಮಾನಂ ಕಾರಕೋ, ಕಿಂ ತೇ ತೇನ ತಾನಿ ಕಮ್ಮಾನಿ ಕತಾನೀ’’ತಿ ಚೋದೇತುಂ ಮಾತಾ ಜೀವಿತಾ ವೋರೋಪಿತಾತಿಆದಿಮಾಹ। ಇತರೋ ತೇಸಂ ವತ್ಥೂನಂ ಅರೋಗತಾಯ ತಥಾರೂಪಂ ಕಿರಿಯಂ ಅಪಸ್ಸನ್ತೋ ‘‘ನ ಹೇವ’’ನ್ತಿ ಪಟಿಕ್ಖಿಪತಿ।
ತಂ ಕಮ್ಮಂ ಪಟಿಸಂಹರಿತ್ವಾತಿ ಅನಿಯತಾಣತ್ತಿಕಮ್ಮಂ ಸನ್ಧಾಯ ವುತ್ತಂ। ತಞ್ಹಿ ‘‘ಮಾ ಖೋ ಮಯಾ ಆಣತ್ತಂ ಆಕಾಸೀ’’ತಿ ಆಣತ್ತಂ ನಿವಾರೇನ್ತೇನ ಪಟಿಸಂಹಟಂ ನಾಮ ಹೋತಿ। ಪಟಿಸಂಹಟತ್ತಾಯೇವ ಚೇತ್ಥ ಕುಕ್ಕುಚ್ಚಂ ಪಟಿವಿನೋದಿತಂ, ವಿಪ್ಪಟಿಸಾರೋ ಪಟಿವಿನೀತೋ ನಾಮ ಹೋತಿ। ಏವಂ ಸನ್ತೇಪಿ ಪನೇತ್ಥ ಪುರಿಮಾಣತ್ತಿಯಾಯೇವ ನಿಯತಭಾವಂ ಮಞ್ಞಮಾನೋ ಪರವಾದೀ ‘‘ಆಮನ್ತಾ’’ತಿ ಪಟಿಜಾನಾತಿ। ಅಥ ನಂ ಸಕವಾದೀ ತಸ್ಸ ಕಮ್ಮಸ್ಸ ಪಟಿಸಂಹಟಭಾವಂ ಸಮ್ಪಟಿಚ್ಛಾಪೇತ್ವಾ ಅತ್ತನೋ ಲದ್ಧಿಂ ಪತಿಟ್ಠಾಪೇತ್ವಾ ಹಞ್ಚೀತಿಆದಿಮಾಹ।
೬೬೨. ಪುನ ಅನನ್ತರಾಪಯುತ್ತೋತಿ ಪರಿಯೋಸಾನಪಞ್ಹೇ ಪಠಮಪಞ್ಹೇ ವಿಯ ಪುಚ್ಛಾ ಪರವಾದಿಸ್ಸ, ಪಟಿಞ್ಞಾ ಸಕವಾದಿಸ್ಸ। ನನು ತಂ ಕಮ್ಮನ್ತಿ ಅನುಯೋಗೋ ಪರವಾದಿಸ್ಸ, ಪಟಿಸಂಹಟಕಾಲತೋ ಪುಬ್ಬೇ ಪಯುತ್ತಕಾಲಂ ಸನ್ಧಾಯ ಪಟಿಞ್ಞಾ ಸಕವಾದಿಸ್ಸ। ಪಯುತ್ತಪುಬ್ಬತಾಮತ್ತಂ ಗಹೇತ್ವಾ ಅನಿಯತಾಣತ್ತಿವಸೇನ ಹಞ್ಚೀತಿ ಲದ್ಧಿಪತಿಟ್ಠಾಪನಂ ಪರವಾದಿಸ್ಸ। ಅಯಂ ಪನ ಲದ್ಧಿ ಅಯೋನಿಸೋ ಪತಿಟ್ಠಿತತ್ತಾ ಅಪ್ಪತಿಟ್ಠಿತಾವ ಹೋತೀತಿ।
ಅನನ್ತರಾಪಯುತ್ತಕಥಾವಣ್ಣನಾ।
೪. ನಿಯತಸ್ಸ ನಿಯಾಮಕಥಾವಣ್ಣನಾ
೬೬೩-೬೬೪. ಇದಾನಿ ಮಿಚ್ಛತ್ತನಿಯತೋತಿಆದಿ ಅಞ್ಞೇನ ನಿಯಾಮೇನ ನಿಯತಸ್ಸ ಅಞ್ಞನಿಯಾಮಾಭಾವದಸ್ಸನತ್ಥಂ ವುತ್ತಂ। ಪುಬ್ಬೇ ಮಗ್ಗಂ ಭಾವೇತ್ವಾತಿಆದಿ ನಿಯಾಮಪ್ಪಭೇದದಸ್ಸನತ್ಥಂ ವುತ್ತಂ। ಸತಿಪಟ್ಠಾನನ್ತಿಆದಿ ಏಕಸ್ಮಿಮ್ಪಿ ನಿಯಾಮೇ ಧಮ್ಮಪ್ಪಭೇದದಸ್ಸನತ್ಥಂ ವುತ್ತಂ। ಭಬ್ಬೋ ಬೋಧಿಸತ್ತೋತಿ ವಚನಂ ಕೇವಲಂ ಬೋಧಿಸತ್ತಸ್ಸ ಭಬ್ಬತಂ ದೀಪೇತಿ, ನ ನಿಯತಸ್ಸ ನಿಯಾಮೋಕ್ಕಮನಂ, ತಸ್ಮಾ ಅಸಾಧಕಂ। ಸೋ ಹಿ ಪುಬ್ಬೇ ಏಕೇನಪಿ ನಿಯತಧಮ್ಮೇನ ಅನಿಯತೋ ಬೋಧಿಮೂಲೇ ಸಚ್ಚದಸ್ಸನೇನ ನಿಯಾಮಂ ಓಕ್ಕನ್ತೋತಿ।
ನಿಯತಸ್ಸ ನಿಯಾಮಕಥಾವಣ್ಣನಾ।
೫. ನಿವುತಕಥಾವಣ್ಣನಾ
೬೬೫-೬೬೭. ಇದಾನಿ ನಿವುತಕಥಾ ನಾಮ ಹೋತಿ। ತತ್ಥ ಸುದ್ಧಸ್ಸ ಸುದ್ಧಕಿಚ್ಚಾಭಾವತೋ ನೀವರಣೇಹಿ ನಿವುತೋ ಓಫುಟೋ ಪರಿಯೋನದ್ಧೋ ಚ ನೀವರಣಂ ಜಹತೀತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಉತ್ತರಾಪಥಕಾನಂ; ತೇ ಸನ್ಧಾಯ ನಿವುತೋತಿಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ರತ್ತೋ ರಾಗನ್ತಿಆದಿ ನಿವುತಸ್ಸ ನೀವರಣಜಹನೇ ದೋಸದಸ್ಸನತ್ಥಂ ವುತ್ತಂ। ಪರಿಸುದ್ಧೇ ಪರಿಯೋದಾತೇತಿಆದಿ ವಿಕ್ಖಮ್ಭನವಿಸುದ್ಧಿಯಾ ವಿಸುದ್ಧಸ್ಸ ತಸ್ಸ ಏವಂ ಜಾನತೋತಿಆದಿ ಜಾನತೋ ಪಸ್ಸತೋ ಆಸವಕ್ಖಯಂ ದೀಪೇತಿ, ನ ನಿವುತಸ್ಸ ನೀವರಣಜಹನಂ, ತಸ್ಮಾ ಅಸಾಧಕನ್ತಿ।
ನಿವುತಕಥಾವಣ್ಣನಾ।
೬. ಸಮ್ಮುಖೀಭೂತಕಥಾವಣ್ಣನಾ
೬೬೮-೬೭೦. ಇದಾನಿ ಸಮ್ಮುಖೀಭೂತೋತಿ ಸಂಯೋಜನಾನಂ ಸಮ್ಮುಖೀಭಾವಂ ತೇಹಿ ಸಮಙ್ಗೀಭಾವಂ ಉಪಗತೋ। ಸೇಸಮೇತ್ಥ ನಿವುತಕಥಾಸದಿಸಮೇವಾತಿ।
ಸಮ್ಮುಖೀಭೂತಕಥಾವಣ್ಣನಾ।
೭. ಸಮಾಪನ್ನೋ ಅಸ್ಸಾದೇತೀತಿಕಥಾವಣ್ಣನಾ
೬೭೧-೬೭೩. ಇದಾನಿ ಸಮಾಪನ್ನೋತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ತಂ ಝಾನಂ ತಸ್ಸ ಝಾನಸ್ಸ ಆರಮ್ಮಣನ್ತಿ ಪಞ್ಹೇಸು ತಸ್ಸೇವ ತದಾರಮ್ಮಣತಂ ಅಪಸ್ಸನ್ತೋ ಸುತ್ತವಿರೋಧಭಯೇನ ಪಟಿಕ್ಖಿಪತಿ, ‘‘ತದಸ್ಸಾದೇತೀ’’ತಿವಚನಮತ್ತೇನ ಪಟಿಜಾನಾತಿ। ಸೋ ತದಸ್ಸಾದೇತೀತಿ ಸುತ್ತಂ ಝಾನಲಾಭಿನೋ ಝಾನಾ ವುಟ್ಠಾಯ ಝಾನಸ್ಸಾದಂ ಸಾಧೇತಿ, ನ ಅನ್ತೋಸಮಾಪತ್ತಿಯಂಯೇವ ಝಾನನಿಕನ್ತಿಯಾ ಝಾನಾರಮ್ಮಣತಂ, ತಸ್ಮಾ ಅಸಾಧಕನ್ತಿ।
ಸಮಾಪನ್ನೋ ಅಸ್ಸಾದೇತೀತಿಕಥಾವಣ್ಣನಾ।
೮. ಅಸಾತರಾಗಕಥಾವಣ್ಣನಾ
೬೭೪. ಇದಾನಿ ಅತ್ಥಿ ಅಸಾತರಾಗೋತಿ ಪುಚ್ಛಾ ಸಕವಾದಿಸ್ಸ। ತತ್ಥ ಅಸಾತರಾಗೋತಿ ಅಸಾತೇ ದುಕ್ಖವೇದಯಿತೇ ‘‘ಅಹೋ ವತ ಮೇ ಏತದೇವ ಭವೇಯ್ಯಾ’’ತಿ ರಜ್ಜನಾ। ಆಮನ್ತಾತಿ ಲದ್ಧಿವಸೇನ ಪಟಿಞ್ಞಾ ಇತರಸ್ಸ। ಸೇಸಮೇತ್ಥ ಉತ್ತಾನತ್ಥಮೇವ।
೬೭೫. ಸೋ ತಂ ವೇದನಂ ಅಭಿನನ್ದತೀತಿ ಸುತ್ತೇ ಪನ ವಿನಿವಟ್ಟೇತ್ವಾ ದುಕ್ಖವೇದನಮೇವ ಆರಬ್ಭ ರಾಗುಪ್ಪತ್ತಿ ನಾಮ ನತ್ಥಿ, ಸಮೂಹಗ್ಗಹಣೇನ ಪನ ವೇದಯಿತಲಕ್ಖಣಂ ಧಮ್ಮಂ ದುಕ್ಖವೇದನಮೇವ ವಾ ಅತ್ತತೋ ಸಮನುಪಸ್ಸನ್ತೋ ದಿಟ್ಠಿಮಞ್ಞನಾಸಙ್ಖಾತಾಯ ದಿಟ್ಠಾಭಿನನ್ದನಾಯ ವೇದನಂ ಅಭಿನನ್ದತಿ, ದುಕ್ಖಾಯ ವೇದನಾಯ ವಿಪರಿಣಾಮಂ ಅಭಿನನ್ದತಿ, ದುಕ್ಖಾಯ ವೇದನಾಯ ಅಭಿಭೂತೋ ತಸ್ಸಾ ಪಟಿಪಕ್ಖಂ ಕಾಮಸುಖಂ ಪತ್ಥಯನ್ತೋಪಿ
ಅಸಾತರಾಗಕಥಾವಣ್ಣನಾ।
೯. ಧಮ್ಮತಣ್ಹಾಅಬ್ಯಾಕತಾತಿಕಥಾವಣ್ಣನಾ
೬೭೬-೬೮೦. ಇದಾನಿ ಧಮ್ಮತಣ್ಹಾ ಅಬ್ಯಾಕತಾತಿಕಥಾ ನಾಮ ಹೋತಿ। ತತ್ಥ ರೂಪತಣ್ಹಾ…ಪೇ॰… ಧಮ್ಮತಣ್ಹಾತಿ ಇಮಾಸು ಛಸು ತಣ್ಹಾಸು ಯಸ್ಮಾ ಸಬ್ಬಪಚ್ಛಿಮಾ ತಣ್ಹಾ ಧಮ್ಮತಣ್ಹಾತಿ ವುತ್ತಾ, ತಸ್ಮಾ ಸಾ ಅಬ್ಯಾಕತಾತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಪುಬ್ಬಸೇಲಿಯಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಸೇಸಪಞ್ಹಾನಂ ಕಾಮತಣ್ಹಾತಿಆದೀಹಿ ತೀಹಿ ಕೋಟ್ಠಾಸೇಹಿ ಛಪಿ ತಣ್ಹಾ ಸಙ್ಖಿಪಿತ್ವಾ ದಸ್ಸಿತಾ। ರೂಪಾದೀಸು ಹಿ ಛಸು ಆರಮ್ಮಣೇಸು ಕಾಮಸ್ಸಾದವಸೇನ ಪವತ್ತಾ ತಣ್ಹಾ ಕಾಮತಣ್ಹಾ। ‘‘ಭವಿಸ್ಸತಿ ಅತ್ತಾ ಚ ಲೋಕೋ ಚಾ’’ತಿ ಸಸ್ಸತದಿಟ್ಠಿಸಹಗತಾ ತಣ್ಹಾ ಭವತಣ್ಹಾ। ‘‘ನ ಭವಿಸ್ಸತೀ’’ತಿ ಉಚ್ಛೇದದಿಟ್ಠಿಸಹಗತಾ ತಣ್ಹಾ ವಿಭವತಣ್ಹಾತಿ। ನನು ಸಾ ಧಮ್ಮತಣ್ಹಾತಿ ಪದಂ ತಣ್ಹಾಯ ಧಮ್ಮಾರಮ್ಮಣಂ ಆರಬ್ಭ ಪವತ್ತಿಂ ದೀಪೇತಿ, ನ ಅಬ್ಯಾಕತಭಾವಂ ತಸ್ಮಾ ಅಸಾಧಕನ್ತಿ।
ಧಮ್ಮತಣ್ಹಾ ಅಬ್ಯಾಕತಾತಿಕಥಾವಣ್ಣನಾ।
೧೦. ಧಮ್ಮತಣ್ಹಾನದುಕ್ಖಸಮುದಯೋತಿಕಥಾವಣ್ಣನಾ
೬೮೧-೬೮೫. ಇದಾನಿ
ಧಮ್ಮತಣ್ಹಾ ನದುಕ್ಖಸಮುದಯೋತಿಕಥಾವಣ್ಣನಾ।
ತೇರಸಮೋ ವಗ್ಗೋ।