೨೩. ತೇವೀಸತಿಮವಗ್ಗೋ
(೨೧೮) ೧. ಏಕಾಧಿಪ್ಪಾಯಕಥಾ
೯೦೮. ಏಕಾಧಿಪ್ಪಾಯೇನ ಮೇಥುನೋ ಧಮ್ಮೋ ಪಟಿಸೇವಿತಬ್ಬೋತಿ? ಆಮನ್ತಾ। ಏಕಾಧಿಪ್ಪಾಯೇನ ಅಸ್ಸಮಣೇನ ಹೋತಬ್ಬಂ, ಅಭಿಕ್ಖುನಾ ಹೋತಬ್ಬಂ, ಛಿನ್ನಮೂಲೇನ ಹೋತಬ್ಬಂ ಪಾರಾಜಿಕೇನ ಹೋತಬ್ಬನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಏಕಾಧಿಪ್ಪಾಯೇನ ಮೇಥುನೋ ಧಮ್ಮೋ ಪಟಿಸೇವಿತಬ್ಬೋತಿ? ಆಮನ್ತಾ। ಏಕಾಧಿಪ್ಪಾಯೇನ ಪಾಣೋ ಹನ್ತಬ್ಬೋ, ಅದಿನ್ನಂ ಆದಿಯಿತಬ್ಬಂ, ಮುಸಾ ಭಣಿತಬ್ಬಾ, ಪಿಸುಣಂ ಭಣಿತಬ್ಬಂ, ಫರುಸಂ ಭಣಿತಬ್ಬಂ, ಸಮ್ಫಂ ಪಲಪಿತಬ್ಬಂ, ಸನ್ಧಿ ಛೇದಿತಬ್ಬೋ, ನಿಲ್ಲೋಪಂ ಹಾತಬ್ಬಂ, ಏಕಾಗಾರಿಕಂ ಕಾತಬ್ಬಂ, ಪರಿಪನ್ಥೇ ಠಾತಬ್ಬಂ, ಪರದಾರೋ ಗನ್ತಬ್ಬೋ, ಗಾಮಘಾತಕೋ ಕಾತಬ್ಬೋ, ನಿಗಮಘಾತಕೋ ಕಾತಬ್ಬೋತಿ? ನ ಹೇವಂ ವತ್ತಬ್ಬೇ…ಪೇ॰…।
ಏಕಾಧಿಪ್ಪಾಯಕಥಾ ನಿಟ್ಠಿತಾ।
೨೩. ತೇವೀಸತಿಮವಗ್ಗೋ
(೨೧೯) ೨. ಅರಹನ್ತವಣ್ಣಕಥಾ
೯೦೯. ಅರಹನ್ತಾನಂ ವಣ್ಣೇನ ಅಮನುಸ್ಸಾ ಮೇಥುನಂ ಧಮ್ಮಂ ಪಟಿಸೇವನ್ತೀತಿ? ಆಮನ್ತಾ। ಅರಹನ್ತಾನಂ ವಣ್ಣೇನ ಅಮನುಸ್ಸಾ ಪಾಣಂ ಹನನ್ತಿ…ಪೇ॰… ಅದಿನ್ನಂ ಆದಿಯನ್ತಿ, ಮುಸಾ ಭಣನ್ತಿ, ಪಿಸುಣಂ ಭಣನ್ತಿ, ಫರುಸಂ ಭಣನ್ತಿ, ಸಮ್ಫಂ ಪಲಪನ್ತಿ, ಸನ್ಧಿಂ ಛಿನ್ದನ್ತಿ, ನಿಲ್ಲೋಪಂ ಹರನ್ತಿ, ಏಕಾಗಾರಿಕಂ ಕರೋನ್ತಿ, ಪರಿಪನ್ಥೇ ತಿಟ್ಠನ್ತಿ, ಪರದಾರಂ ಗಚ್ಛನ್ತಿ, ಗಾಮಘಾತಕಂ ಕರೋನ್ತಿ…ಪೇ॰… ನಿಗಮಘಾತಕಂ ಕರೋನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰…।
ಅರಹನ್ತವಣ್ಣಕಥಾ ನಿಟ್ಠಿತಾ।
೨೩. ತೇವೀಸತಿಮವಗ್ಗೋ
(೨೨೦-೪) ೩-೭. ಇಸ್ಸರಿಯಕಾಮಕಾರಿಕಾದಿಕಥಾ
೯೧೦. ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ವಿನಿಪಾತಂ ಗಚ್ಛತೀತಿ? ಆಮನ್ತಾ। ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ನಿರಯಂ ಗಚ್ಛತಿ , ಸಞ್ಜೀವಂ ಗಚ್ಛತಿ, ಕಾಲಸುತ್ತಂ ಗಚ್ಛತಿ, ತಾಪನಂ ಗಚ್ಛತಿ, ಮಹಾತಾಪನಂ ಪತಾಪನಂ (ಸೀ॰ ಸ್ಯಾ॰ ಕಂ॰ ಪೀ॰) ಗಚ್ಛತಿ, ಸಙ್ಘಾತಕಂ ಗಚ್ಛತಿ, ರೋರುವಂ ಗಚ್ಛತಿ…ಪೇ॰… ಅವೀಚಿಂ ಗಚ್ಛತೀತಿ? ನ ಹೇವಂ ವತ್ತಬ್ಬೇ…ಪೇ॰…।
ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ವಿನಿಪಾತಂ ಗಚ್ಛತೀತಿ? ಆಮನ್ತಾ। ‘‘ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ವಿನಿಪಾತಂ ಗಚ್ಛತೀ’’ತಿ – ಅತ್ಥೇವ ಸುತ್ತನ್ತೋತಿ? ನತ್ಥಿ। ಹಞ್ಚಿ ‘‘ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ವಿನಿಪಾತಂ ಗಚ್ಛತೀ’’ತಿ – ನತ್ಥೇವ ಸುತ್ತನ್ತೋ, ನೋ ಚ ವತ ರೇ ವತ್ತಬ್ಬೇ – ‘‘ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ವಿನಿಪಾತಂ ಗಚ್ಛತೀ’’ತಿ।
೯೧೧. ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ಗಬ್ಭಸೇಯ್ಯಂ ಓಕ್ಕಮತೀತಿ? ಆಮನ್ತಾ। ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ನಿರಯಂ ಉಪಪಜ್ಜೇಯ್ಯ, ತಿರಚ್ಛಾನಯೋನಿಂ ಉಪಪಜ್ಜೇಯ್ಯಾತಿ? ನ ಹೇವಂ ವತ್ತಬ್ಬೇ…ಪೇ॰…।
ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ಗಬ್ಭಸೇಯ್ಯಂ ಓಕ್ಕಮತೀತಿ ? ಆಮನ್ತಾ। ಬೋಧಿಸತ್ತೋ ಇದ್ಧಿಮಾತಿ? ನ ಹೇವಂ ವತ್ತಬ್ಬೇ…ಪೇ॰… ಬೋಧಿಸತ್ತೋ ಇದ್ಧಿಮಾತಿ? ಆಮನ್ತಾ। ಬೋಧಿಸತ್ತೇನ ಛನ್ದಿದ್ಧಿಪಾದೋ ಭಾವಿತೋ…ಪೇ॰… ವೀರಿಯಿದ್ಧಿಪಾದೋ…ಪೇ॰… ಚಿತ್ತಿದ್ಧಿಪಾದೋ…ಪೇ॰… ವೀಮಂಸಿದ್ಧಿಪಾದೋ ಭಾವಿತೋತಿ? ನ ಹೇವಂ ವತ್ತಬ್ಬೇ…ಪೇ॰…।
ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ಗಬ್ಭಸೇಯ್ಯಂ ಓಕ್ಕಮತೀತಿ? ಆಮನ್ತಾ। ‘‘ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ಗಬ್ಭಸೇಯ್ಯಂ ಓಕ್ಕಮತೀ’’ತಿ – ಅತ್ಥೇವ ಸುತ್ತನ್ತೋತಿ? ನತ್ಥಿ। ಹಞ್ಚಿ ‘‘ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ಗಬ್ಭಸೇಯ್ಯಂ ಓಕ್ಕಮತೀ’’ತಿ – ನತ್ಥೇವ ಸುತ್ತನ್ತೋ, ನೋ ಚ ವತ ರೇ ವತ್ತಬ್ಬೇ – ‘‘ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ಗಬ್ಭಸೇಯ್ಯಂ ಓಕ್ಕಮತೀ’’ತಿ।
೯೧೨. ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ದುಕ್ಕರಕಾರಿಕಂ ಅಕಾಸೀತಿ? ಆಮನ್ತಾ। ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ‘‘ಸಸ್ಸತೋ ಲೋಕೋ’’ತಿ ಪಚ್ಚಾಗಚ್ಛಿ, ‘‘ಅಸಸ್ಸತೋ ಲೋಕೋ’’ತಿ…ಪೇ॰… ‘‘ಅನ್ತವಾ ಲೋಕೋ’’ತಿ…ಪೇ॰… ‘‘ಅನನ್ತವಾ ಲೋಕೋ’’ತಿ… ‘‘ತಂ ಜೀವಂ ತಂ ಸರೀರ’’ನ್ತಿ … ‘‘ಅಞ್ಞಂ ಜೀವಂ ಅಞ್ಞಂ ಸರೀರ’’ನ್ತಿ… ‘‘ಹೋತಿ ತಥಾಗತೋ ಪರಂ ಮರಣಾ’’ತಿ… ‘‘ನ ಹೋತಿ ತಥಾಗತೋ ಪರಂ ಮರಣಾ’’ತಿ… ‘‘ಹೋತಿ ಚ ನ ಚ ಹೋತಿ ತಥಾಗತೋ ಪರಂ ಮರಣಾ’’ತಿ…ಪೇ॰… ‘‘ನೇವ ಹೋತಿ ನ ನ ಹೋತಿ ತಥಾಗತೋ ಪರಂ ಮರಣಾ’’ತಿ ಪಚ್ಚಾಗಚ್ಛೀತಿ? ನ ಹೇವಂ ವತ್ತಬ್ಬೇ…ಪೇ॰…।
ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ದುಕ್ಕರಕಾರಿಕಂ ಅಕಾಸೀತಿ? ಆಮನ್ತಾ। ‘‘ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ದುಕ್ಕರಕಾರಿಕಂ ಅಕಾಸೀ’’ತಿ – ಅತ್ಥೇವ ಸುತ್ತನ್ತೋತಿ? ನತ್ಥಿ। ಹಞ್ಚಿ ‘‘ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ದುಕ್ಕರಕಾರಿಕಂ ಅಕಾಸೀ’’ತಿ – ನತ್ಥೇವ ಸುತ್ತನ್ತೋ, ನೋ ಚ ವತ ರೇ ವತ್ತಬ್ಬೇ – ‘‘ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ದುಕ್ಕರಕಾರಿಕಂ ಅಕಾಸೀ’’ತಿ।
೯೧೩. ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ಅಪರನ್ತಪಂ ಅಮರಂ ತಪಂ (ಸಂ॰ ನಿ॰ ೧.೧೩೭) ಅಕಾಸಿ, ಅಞ್ಞಂ ಸತ್ಥಾರಂ ಉದ್ದಿಸೀತಿ? ಆಮನ್ತಾ। ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ‘‘ಸಸ್ಸತೋ ಲೋಕೋ’’ತಿ ಪಚ್ಚಾಗಚ್ಛಿ…ಪೇ॰… ‘‘ನೇವ ಹೋತಿ ನ ನ ಹೋತಿ ತಥಾಗತೋ ಪರಂ ಮರಣಾ’’ತಿ ಪಚ್ಚಾಗಚ್ಛೀತಿ? ನ ಹೇವಂ ವತ್ತಬ್ಬೇ…ಪೇ॰…।
೯೧೪. ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ಅಞ್ಞಂ ಸತ್ಥಾರಂ ಉದ್ದಿಸೀತಿ? ಆಮನ್ತಾ। ‘‘ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ಅಞ್ಞಂ ಸತ್ಥಾರಂ ಉದ್ದಿಸೀ’’ತಿ – ಅತ್ಥೇವ ಸುತ್ತನ್ತೋತಿ? ನತ್ಥಿ। ಹಞ್ಚಿ ‘‘ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ಅಞ್ಞಂ ಸತ್ಥಾರಂ ಉದ್ದಿಸೀ’’ತಿ – ನತ್ಥೇವ ಸುತ್ತನ್ತೋ, ನೋ ಚ ವತ ರೇ ವತ್ತಬ್ಬೇ – ‘‘ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ಅಞ್ಞಂ ಸತ್ಥಾರಂ ಉದ್ದಿಸೀ’’ತಿ।
ಇಸ್ಸರಿಯಕಾಮಕಾರಿಕಾಕಥಾ ನಿಟ್ಠಿತಾ।
೨೩. ತೇವೀಸತಿಮವಗ್ಗೋ
(೨೨೫) ೮. ಪತಿರೂಪಕಥಾ
೯೧೫. ಅತ್ಥಿ ನ ರಾಗೋ ರಾಗಪತಿರೂಪಕೋತಿ? ಆಮನ್ತಾ। ಅತ್ಥಿ ನ ಫಸ್ಸೋ ಫಸ್ಸಪತಿರೂಪಕೋ, ಅತ್ಥಿ ನ ವೇದನಾ ವೇದನಾಪತಿರೂಪಿಕಾ, ಅತ್ಥಿ ನ ಸಞ್ಞಾ ಸಞ್ಞಾಪತಿರೂಪಿಕಾ , ಅತ್ಥಿ ನ ಚೇತನಾ ಚೇತನಾಪತಿರೂಪಿಕಾ, ಅತ್ಥಿ ನ ಚಿತ್ತಂ ಚಿತ್ತಪತಿರೂಪಕಂ, ಅತ್ಥಿ ನ ಸದ್ಧಾ ಸದ್ಧಾಪತಿರೂಪಿಕಾ, ಅತ್ಥಿ ನ ವೀರಿಯಂ ವೀರಿಯಪತಿರೂಪಕಂ, ಅತ್ಥಿ ನ ಸತಿ ಸತಿಪತಿರೂಪಿಕಾ, ಅತ್ಥಿ ನ ಸಮಾಧಿ ಸಮಾಧಿಪತಿರೂಪಕೋ , ಅತ್ಥಿ ನ ಪಞ್ಞಾ ಪಞ್ಞಾಪತಿರೂಪಿಕಾತಿ? ನ ಹೇವಂ ವತ್ತಬ್ಬೇ…ಪೇ॰…।
೯೧೬. ಅತ್ಥಿ ನ ದೋಸೋ ದೋಸಪತಿರೂಪಕೋ, ಅತ್ಥಿ ನ ಮೋಹೋ ಮೋಹಪತಿರೂಪಕೋ, ಅತ್ಥಿ ನ ಕಿಲೇಸೋ ಕಿಲೇಸಪತಿರೂಪಕೋತಿ? ಆಮನ್ತಾ। ಅತ್ಥಿ ನ ಫಸ್ಸೋ ಫಸ್ಸಪತಿರೂಪಕೋ…ಪೇ॰… ಅತ್ಥಿ ನ ಪಞ್ಞಾ ಪಞ್ಞಾಪತಿರೂಪಿಕಾತಿ? ನ ಹೇವಂ ವತ್ತಬ್ಬೇ…ಪೇ॰…।
ಪತಿರೂಪಕಥಾ ನಿಟ್ಠಿತಾ।
೨೩. ತೇವೀಸತಿಮವಗ್ಗೋ
(೨೨೬) ೯. ಅಪರಿನಿಪ್ಫನ್ನಕಥಾ
೯೧೭. ರೂಪಂ ಅಪರಿನಿಪ್ಫನ್ನನ್ತಿ? ಆಮನ್ತಾ। ರೂಪಂ ನ ಅನಿಚ್ಚಂ ನ ಸಙ್ಖತಂ ನ ಪಟಿಚ್ಚಸಮುಪ್ಪನ್ನಂ ನ ಖಯಧಮ್ಮಂ ನ ವಯಧಮ್ಮಂ ನ ವಿರಾಗಧಮ್ಮಂ ನ ನಿರೋಧಧಮ್ಮಂ ನ ವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰… ನನು ರೂಪಂ ಅನಿಚ್ಚಂ ಸಙ್ಖತಂ ಪಟಿಚ್ಚಸಮುಪ್ಪನ್ನಂ ಖಯಧಮ್ಮಂ ವಯಧಮ್ಮಂ ವಿರಾಗಧಮ್ಮಂ ನಿರೋಧಧಮ್ಮಂ ವಿಪರಿಣಾಮಧಮ್ಮನ್ತಿ? ಆಮನ್ತಾ। ಹಞ್ಚಿ ರೂಪಂ ಅನಿಚ್ಚಂ ಸಙ್ಖತಂ…ಪೇ॰… ವಿಪರಿಣಾಮಧಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ರೂಪಂ ಅಪರಿನಿಪ್ಫನ್ನ’’ನ್ತಿ।
ದುಕ್ಖಞ್ಞೇವ ಪರಿನಿಪ್ಫನ್ನನ್ತಿ? ಆಮನ್ತಾ। ನನು ಯದನಿಚ್ಚಂ ತಂ ದುಕ್ಖಂ ಸಂ॰ ನಿ॰ ೩.೧೫ ವುತ್ತಂ ಭಗವತಾ – ‘‘ರೂಪಂ ಅನಿಚ್ಚ’’ನ್ತಿ? ಆಮನ್ತಾ। ಹಞ್ಚಿ ಯದನಿಚ್ಚಂ ತಂ ದುಕ್ಖಂ ವುತ್ತಂ ಭಗವತಾ – ‘‘ರೂಪಂ ಅನಿಚ್ಚಂ’’, ನೋ ಚ ವತ ರೇ ವತ್ತಬ್ಬೇ – ‘‘ದುಕ್ಖಞ್ಞೇವ ಪರಿನಿಪ್ಫನ್ನ’’ನ್ತಿ…ಪೇ॰…।
೯೧೮. ವೇದನಾ …ಪೇ॰… ಸಞ್ಞಾ… ಸಙ್ಖಾರಾ… ವಿಞ್ಞಾಣಂ… ಚಕ್ಖಾಯತನಂ…ಪೇ॰… ಧಮ್ಮಾಯತನಂ… ಚಕ್ಖುಧಾತು… ಧಮ್ಮಧಾತು… ಚಕ್ಖುನ್ದ್ರಿಯಂ…ಪೇ॰… ಅಞ್ಞಾತಾವಿನ್ದ್ರಿಯಂ ಅಪರಿನಿಪ್ಫನ್ನನ್ತಿ? ಆಮನ್ತಾ। ಅಞ್ಞಾತಾವಿನ್ದ್ರಿಯಂ ನ ಅನಿಚ್ಚಂ…ಪೇ॰… ನ ವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰… ನನು ಅಞ್ಞಾತಾವಿನ್ದ್ರಿಯಂ ಅನಿಚ್ಚಂ ಸಙ್ಖತಂ…ಪೇ॰… ವಿಪರಿಣಾಮಧಮ್ಮನ್ತಿ? ಆಮನ್ತಾ। ಹಞ್ಚಿ ಅಞ್ಞಾತಾವಿನ್ದ್ರಿಯಂ ಅನಿಚ್ಚಂ ಸಙ್ಖತಂ ಪಟಿಚ್ಚಸಮುಪ್ಪನ್ನಂ ಖಯಧಮ್ಮಂ ವಯಧಮ್ಮಂ ವಿರಾಗಧಮ್ಮಂ ನಿರೋಧಧಮ್ಮಂ ವಿಪರಿಣಾಮಧಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ಅಞ್ಞಾತಾವಿನ್ದ್ರಿಯಂ ಅಪರಿನಿಪ್ಫನ್ನ’’ನ್ತಿ।
ದುಕ್ಖಞ್ಞೇವ ಪರಿನಿಪ್ಫನ್ನನ್ತಿ? ಆಮನ್ತಾ। ನನು ಯದನಿಚ್ಚಂ ತಂ ದುಕ್ಖಂ ವುತ್ತಂ ಭಗವತಾ – ‘‘ಅಞ್ಞಾತಾವಿನ್ದ್ರಿಯಂ ಅನಿಚ್ಚ’’ನ್ತಿ? ಆಮನ್ತಾ। ಹಞ್ಚಿ ಯದನಿಚ್ಚಂ ತಂ ದುಕ್ಖಂ ವುತ್ತಂ ಭಗವತಾ – ‘‘ಅಞ್ಞಾತಾವಿನ್ದ್ರಿಯಂ ಅನಿಚ್ಚಂ’’, ನೋ ಚ ವತ ರೇ ವತ್ತಬ್ಬೇ – ‘‘ದುಕ್ಖಞ್ಞೇವ ಪರಿನಿಪ್ಫನ್ನ’’ನ್ತಿ।
ಅಪರಿನಿಪ್ಫನ್ನಕಥಾ ನಿಟ್ಠಿತಾ।
ತೇವೀಸತಿಮವಗ್ಗೋ।
ತಸ್ಸುದ್ದಾನಂ –
ಏಕಾಧಿಪ್ಪಾಯೇನ ಮೇಥುನೋ ಧಮ್ಮೋ ಪಟಿಸೇವಿತಬ್ಬೋ, ಅರಹನ್ತಾನಂ ವಣ್ಣೇನ ಅಮನುಸ್ಸಾ ಮೇಥುನಂ ಧಮ್ಮಂ ಪಟಿಸೇವನ್ತಿ, ಬೋಧಿಸತ್ತೋ ಇಸ್ಸರಿಯಕಾಮಕಾರಿಕಾಹೇತು ವಿನಿಪಾತಂ ಗಚ್ಛತಿ, ಗಬ್ಭಸೇಯ್ಯಂ ಓಕ್ಕಮತಿ, ದುಕ್ಕರಕಾರಿಕಂ ಅಕಾಸಿ , ಅಪರನ್ತಪಂ ಅಕಾಸಿ, ಅಞ್ಞಂ ಸತ್ಥಾರಂ ಉದ್ದಿಸಿ, ಅತ್ಥಿ ನ ರಾಗೋ ರಾಗಪತಿರೂಪಕೋ ಅತ್ಥಿ ನ ದೋಸೋ ದೋಸಪತಿರೂಪಕೋ ಅತ್ಥಿ ನ ಮೋಹೋ ಮೋಹಪತಿರೂಪಕೋ ಅತ್ಥಿ ನ ಕಿಲೇಸೋ ಕಿಲೇಸಪತಿರೂಪಕೋ, ರೂಪಂ ಅಪರಿನಿಪ್ಫನ್ನಂ ಅಞ್ಞಾತಾವಿನ್ದ್ರಿಯಂ ಅಪರಿನಿಪ್ಫನ್ನನ್ತಿ।
ಖುದ್ದಕೋ ಅಡ್ಢಪಣ್ಣಾಸಕೋ।
ತಸ್ಸುದ್ದಾನಂ –
ನವಂ, ನಿಬ್ಬುತಿ, ಏಕಾಧಿಪ್ಪಾಯೋತಿ।
ಪಣ್ಣಾಸಕುದ್ದಾನಂ –
ಮಹಾನಿಯಾಮೋ , ಅನುಸಯಾ, ನಿಗ್ಗಹೋ, ಖುದ್ದಕಪಞ್ಚಮೋ।
ಪರಪ್ಪವಾದಮದ್ದನಾ, ಸುತ್ತಮೂಲಸಮಾಹಿತಾ।
ಉಜ್ಜೋತನಾ ಸತ್ಥುಸಮಯೇ, ಕಥಾವತ್ಥುಪಕರಣೇತಿ॥
ಪಞ್ಚತ್ತಿಂಸಭಾಣವಾರಂ
ಕಥಾವತ್ಥುಪಕರಣಂ ನಿಟ್ಠಿತಂ।