ಪಞ್ಚವೀಸತಿಮೋ ಪರಿಚ್ಛೇದೋ
೨೫. ವಿಪಸ್ಸನಾವುದ್ಧಿಕಥಾ
೯೮೧.
ಸೀಲಚಿತ್ತದಿಟ್ಠಿಕಙ್ಖಾವಿತರಣವಿಸುದ್ಧಿಯೋ
ಪತ್ವಾ ಕಲಾಪತೋ ತಾವ, ಸಮ್ಮಸೇಯ್ಯ ತತೋ ಪರಂ॥
೯೮೨.
ಕಲಾಪತೋ ಸಮ್ಮಸನಂ, ಉದಯಬ್ಬಯದಸ್ಸನಂ।
ಭಙ್ಗಞಾಣಂ ಭಯಞಾಣಂ, ತಥಾದೀನವನಿಬ್ಬಿದಾ॥
೯೮೩.
ಮುಚ್ಚಿತುಕಮ್ಯತಾಞಾಣಂ, ಪಟಿಸಙ್ಖಾನುಪಸ್ಸನಾ।
ಸಙ್ಖಾರುಪೇಕ್ಖಾನುಲೋಮಮಿಚ್ಚಾನುಕ್ಕಮತೋ ಠಿತಾ॥
೯೮೪.
ವಿಪಸ್ಸನಾತಿ ಚಕ್ಖಾತಾ, ದಸಞಾಣಪರಮ್ಪರಾ।
ಲಕ್ಖಣತ್ತಯಮಾಹಚ್ಚ, ಸಙ್ಖಾರೇಸು ಪವತ್ತತಿ॥
೯೮೫.
ತಸ್ಮಾ ಕಲಾಪತೋ ತಾವ, ಸಮ್ಮಸೇಯ್ಯ ತಿಲಕ್ಖಣಂ।
ಸಮ್ಮಸಿತ್ವಾ ಅತೀತಾದಿಖನ್ಧಾಯತನಧಾತುಯೋ॥
೯೮೬.
ಅನಿಚ್ಚಾ ತೇ ಖಯಟ್ಠೇನ, ಖನ್ಧಾ ದುಕ್ಖಾ ಭಯಟ್ಠತೋ।
ಅನತ್ತಾ ಅಸಾರಕಟ್ಠೇನ, ಇಚ್ಚಾಭಿಣ್ಹಂ ವಿಚಿನ್ತಯಂ॥
೯೮೭.
ತಸ್ಸೇವಂ ಸಮ್ಮಸನ್ತಸ್ಸ, ಉಪಟ್ಠಾತಿ ತಿಲಕ್ಖಣಂ।
ಸಙ್ಖಾರೇಸು ತತೋ ಯೋಗೀ, ಖಣಸನ್ತತಿಅದ್ಧತೋ॥
೯೮೮.
ಪಚ್ಚುಪ್ಪನ್ನಾನ ಧಮ್ಮಾನಂ, ಉದಯಞ್ಚ ವಯಂ ತಥಾ।
ಪಞ್ಞಾಸಾಕಾರಭೇದೇಹಿ, ಅನುಪಸ್ಸತಿ ತತ್ಥ ಹಿ॥
೯೮೯.
ಅವಿಜ್ಜಾತಣ್ಹಾಕಮ್ಮಾನಂ, ಉದಯಾ ಚ ನಿರೋಧತೋ।
ಸಮುದಯಾ ನಿರೋಧಾ ಚ, ಪಞ್ಚನ್ನಂ ದಸ್ಸಿತಾ ತಥಾ॥
೯೯೦.
ರೂಪಸ್ಸಾಹಾರತೋ
ವಿಞ್ಞಾಣಸ್ಸೇತಿ ಸಬ್ಬೇಪಿ, ಚತ್ತಾಲೀಸ ಸಮಿಸ್ಸಿತಾ॥
೯೯೧.
ನಿಬ್ಬತ್ತಿಲಕ್ಖಣಂ
ಲಕ್ಖಣಞ್ಚೇತ್ಥ ಪಸ್ಸತೋ।
ಖಣತೋದಯತೋ ಚೇತಿ,
ಸಮಪಞ್ಞಾಸ ಹೋನ್ತಿ ತೇ॥
೯೯೨.
ಇತಿ ಖನ್ಧಮುಖೇನೇತೇ, ವಿಭತ್ತಾ ಉದಯಬ್ಬಯಾ।
ಆಯತನ್ನಾದಿಭೇದೇಹಿ, ಯೋಜೇತಬ್ಬಾ ಯಥಾರಹಂ॥
೯೯೩.
ಉದಯಞ್ಚ ವಯಞ್ಚೇವಂ, ಪಸ್ಸತೋ ತಸ್ಸ ಯೋಗಿನೋ।
ವಿಭೂತಾ ಹೋನ್ತಿ ಸಙ್ಖಾರಾ, ಸಮುಟ್ಠಾತಿ ತಿಲಕ್ಖಣಂ॥
೯೯೪.
ಬೋಧಿಪಕ್ಖಿಯಧಮ್ಮಾ ಚ,
ತೇ ಪಸ್ಸನ್ತಿ ವಿಸೇಸತೋ।
ತತೋ ಜಾಯನ್ತುಪಕ್ಲೇಸಾ,
ದಸೋಪಕ್ಲೇಸವತ್ಥುಕಾ॥
೯೯೫.
ಓಭಾಸೋ ಪೀತಿ ಪಸ್ಸದ್ಧಿ, ಅಧಿಮೋಕ್ಖೋ ಚ ಪಗ್ಗಹೋ।
ಸುಖಂ ಞಾಣಮುಪಟ್ಠಾನಂ, ಉಪೇಕ್ಖಾ ಚ ನಿಕನ್ತಿ ಚ॥
೯೯೬.
ತಣ್ಹಾಮಾನದಿಟ್ಠಿಗ್ಗಾಹವಸೇನ ತಿವಿಧೇಪಿ ತೇ।
ಅಸ್ಸಾದೇನ್ತೋ ಉನ್ನಮನ್ತೋ, ಮಮಾಯನ್ತೋ ಕಿಲಿಸ್ಸತಿ॥
೯೯೭.
ಮಗ್ಗಂ ಫಲಞ್ಚ ನಿಬ್ಬಾನಂ, ಪತ್ತೋಸ್ಮೀತಿ ಅಕೋವಿದೋ।
ವೇಕ್ಖಬುಜ್ಝಾತಿ ಮಞ್ಞನ್ತೋ, ಪಪ್ಪೋತಿ ಅಧಿಮಾನಿಕೋ॥
೯೯೮.
ಮಗ್ಗಾದಯೋ ನ ಹೋನ್ತೇತೇ,
ತಣ್ಹಾಗಾಹಾದಿವತ್ಥುತೋ।
ತಣ್ಹಾಮಾನದಿಟ್ಠಿಯೋ ಚುಪಕ್ಲೇಸಾ ಪರಿಪನ್ಥಕಾ॥
೯೯೯.
ಪೋರಾಣಮೇವ ಖನ್ಧಾನಂ, ಉದಯಬ್ಬಯದಸ್ಸನಂ।
ತಿಲಕ್ಖಣಾರಮ್ಮಣತೋ, ಮಗ್ಗೋ ನಿಬ್ಬಾನಪಚ್ಚಯೋ॥
೧೦೦೦.
ಇತಿ
ವಿಸುದ್ಧಿ ಚ ಮಗ್ಗಾಮಗ್ಗಞಾಣದಸ್ಸನನಾಮಿಕಾ॥
೧೦೦೧.
ತಥಾಪರಾ
ಆದಿಂ ಕತ್ವಾ ಪಟಿಪದಾಞಾಣದಸ್ಸನನಾಮಿಕಾ॥
೧೦೦೨.
ಪಚ್ಛಾ ಸಂಕ್ಲೇಸವಿಕ್ಖೇಪವಿಸುದ್ಧನ್ತಂ ಯಥಾ ಪುರೇ।
ಪಟಿಪಜ್ಜತಿ ಮೇಧಾವೀ, ಉದಯಬ್ಬಯದಸ್ಸನಂ॥
೧೦೦೩.
ಇತಿ ಖೋದಯಬ್ಬಯಾನುಪಸ್ಸನಾಞಾಣವೀಥಿಯಂ।
ಸಿಕ್ಖನ್ತಸ್ಸಾಚಿರೇನೇವ, ಪರಿಪಕ್ಕಾ ವಿಪಸ್ಸನಾ॥
೧೦೦೪.
ಪಹಾಯೋದಯವೋಹಾರಂ, ವಯಮೇವಾಧಿಮುಚ್ಚತೋ।
ಉಪ್ಪಾದಾಭೋಗಮೋಹಾಯ, ಭಙ್ಗಮೇವಾನುತಿಟ್ಠತಿ॥
೧೦೦೫.
ತತೋ ನಿಜ್ಝರಧಾರಾವ, ಗಙ್ಗಾವಾರೋದಕಂ ವಿಯ।
ಭಿಜ್ಜಮಾನತಿಣಾನಿವ, ಪಟಿಪಜ್ಜಾ ಸಿಖಾ ವಿಯ॥
೧೦೦೬.
ಪತನ್ತೇ ಚ ವಯನ್ತೇ ಚ, ಭಿಜ್ಜನ್ತಿಚ್ಚೇವ ಸಙ್ಖತೇ।
ಪಸ್ಸತೋ ತಸ್ಸ ಭಙ್ಗಾನುಪಸ್ಸನಾಞಾಣಮೀರಿತಂ॥
೧೦೦೭.
ತತೋ ಭಯಾನುಪಸ್ಸನಾ, ಸಭಯಾತಿ ವಿಪಸ್ಸತೋ।
ಆದೀನವಾನುಪಸ್ಸನಾ-ಞಾಣಂ ಆದೀನವಾತಿ ಚ॥
೧೦೦೮.
ನಿಬ್ಬಿದಾನುಪಸ್ಸನಾ ಚ, ನಿಬ್ಬಿನ್ದನ್ತಸ್ಸ ಯೋಗಿನೋ।
ಮುಚ್ಚಿತುಕಮ್ಯತಾಞಾಣಂ, ತತೋ ಮುಚ್ಚಿತುಮಿಚ್ಛತೋ॥
೧೦೦೯.
ನಿಚ್ಚಾ ಚೇ ನ ನಿರುಜ್ಝೇಯ್ಯ, ನ ಬಾಧೇಯ್ಯ ಸುಖಾ ಯದಿ।
ವಸೇ ವತ್ತೇಯ್ಯ ಅತ್ತಾ ಚೇ, ತದಭಾವಾ ನ ತೇ ತಥಾ॥
೧೦೧೦.
ಸುಟ್ಠು ಮುಚ್ಚಿತುಮಿಚ್ಚೇವಂ, ಪಟಿಪಚ್ಚಕ್ಖತೋ ತತೋ।
ಪಟಿಸಙ್ಖಾನುಪಸ್ಸನಾ-ಞಾಣಂ ಜಾತನ್ತಿ ವುಚ್ಚತಿ॥
೧೦೧೧.
ಸಾಧುಕಂ ಪಟಿಸಙ್ಖಾಯ, ಸಙ್ಖಾರೇಸು ತಿಲಕ್ಖಣಂ।
ಸುಪರಿಞ್ಞಾತಸಙ್ಖಾರೇ, ತಥೇವ ಪಟಿಪಸ್ಸತಿ॥
೧೦೧೨.
ಅನಿಚ್ಚಾ ದುಕ್ಖಾನತ್ತಾ ಚ, ಸಙ್ಖಾರಾವ ನ ಚಾಪರೋ।
ಅತ್ತಾ ವಾ ಅತ್ತನೀಯಂ ವಾ, ನಾಹಂ ನ ತು ಮಮಾತಿ ಚ॥
೧೦೧೩.
ತತೋವ
ಅತ್ತತ್ತನಿಯಭಾವೇನ, ಸಙ್ಖಾರೇಸ್ವಜ್ಝುಪೇಕ್ಖತಿ॥
೧೦೧೪.
ಸಙ್ಖಾರುಪೇಕ್ಖಾಸಙ್ಖಾತಂ, ಞಾಣಂ ತಸ್ಸ ಇತೀರಿತಂ।
ತತೋ ವುಟ್ಠಾನಘಟಿತಂ, ಅನುಲೋಮನ್ತಿ ವುಚ್ಚತಿ॥
೧೦೧೫.
ಸುಪರಿಞ್ಞಾತಸಙ್ಖಾರೇ, ಸುಸಮ್ಮಟ್ಠತಿಲಕ್ಖಣೇ।
ಉಪೇಕ್ಖನ್ತಸ್ಸ ತಸ್ಸೇವ, ಸಿಖಾಪತ್ತಾ ವಿಪಸ್ಸನಾ॥
೧೦೧೬.
ಸಙ್ಖಾರಧಮ್ಮೇ ಆರಬ್ಭ, ತಾವ ಕಾಲಂ ಪವತ್ತತಿ।
ತೀರದಸ್ಸೀವ ಸಕುಣೋ, ಯಾವ ಪಾರಂ ನ ಪಸ್ಸತಿ॥
೧೦೧೭.
ಯದಾ ಪಸ್ಸತಿ ನಿಬ್ಬಾನಂ, ವುಟ್ಠಾನಗಹಿತಾ ತದಾ।
ವುಟ್ಠಾನಗಾಮಿನೀ ನಾಮ, ಸಾನುಲೋಮಾ ಪವುಚ್ಚತಿ॥
೧೦೧೮.
ಇತಿ ದ್ವೀಹಿ ವಿಸುದ್ಧೀಹಿ, ವಿಸುದ್ಧಾಯ ವಿಪಸ್ಸತೋ।
ವಿಪಸ್ಸನಾಪಟಿಪದಂ, ಪೂರೇತೀತಿ ಪವುಚ್ಚತೀತಿ॥
ಇತಿ ನಿಬ್ಬಾನವಿಭಾಗೇ ವಿಪಸ್ಸನಾವುದ್ಧಿಕಥಾ ನಿಟ್ಠಿತಾ।
ಪಞ್ಚವೀಸತಿಮೋ ಪರಿಚ್ಛೇದೋ।