ವೇತುಲ್ಲವಾದಸ್ಸ ಪಠಮನಿಗ್ಗಹೋ
ವೋಹಾರಕತಿಸ್ಸರಞ್ಞೋ ಕಾಲೇ (೭೫೮-೭೮೦-ಬು-ವ) ಅಭಯಗಿರಿವಾಸಿನೋ ಧಮ್ಮರುಚಿನಿಕಾಯಿಕಾ ಪುಬ್ಬೇ ವುತ್ತಪ್ಪಕಾರೇನ ಸಾಸನವಿನಾಸನತ್ಥಾಯ ಭಿಕ್ಖುವೇಸಧಾರೀಹಿ ವೇತುಲ್ಲವಾದಿಬ್ರಾಹ್ಮಣೇಹಿ ರಚಿತಂ ವೇತುಲ್ಲಪಿಟಕಂ ಸಮ್ಪಟಿಗ್ಗಹೇತ್ವಾ ‘‘ಇದಂ ಬುದ್ಧಭಾಸಿತ’’ನ್ತಿ ದಸ್ಸೇನ್ತಿ। ತಂ ಮಹಾವಿಹಾರವಾಸಿನೋ ಥೇರವಾದಿಕಾ ಧಮ್ಮವಿನಯೇನ ಸಂಸನ್ದೇತ್ವಾ ಅಧಮ್ಮವಾದೋತಿ ಪಟಿಕ್ಖಿಪಿಂಸು। ತಂ ಸುತ್ವಾ ರಾಜಾ ಸಬ್ಬಸತ್ಥಪಾರಗುಂ ಕಪಿಲಂ ನಾಮ ಅಮಚ್ಚಂ ಪೇಸೇತ್ವಾ ವಿನಿಚ್ಛಯಂ ಕಾರಾಪೇತ್ವಾ ಅಬುದ್ಧಭಾಸಿತಭಾವಂ ಞತ್ವಾ ಸಬ್ಬಂ ವೇತುಲ್ಲಪೋತ್ಥಕಂ ಝಾಪೇತ್ವಾ ತಲ್ಲದ್ಧಿಕೇ ಚ ಪಾಪಭಿಕ್ಖೂ ನಿಗ್ಗಹೇತ್ವಾ ಬುದ್ಧಸಾಸನಂ ಜೋತೇಸಿ
೩೬-೪೧.
‘‘ವೇತುಲ್ಲವಾದಂ ಮದ್ದಿತ್ವಾ, ಕಾರೇತ್ವಾ ಪಾಪನಿಗ್ಗಹಂ।
ಕಪಿಲೇನ ಅಮಚ್ಚೇನ, ಸಾಸನಂ ಜೋತಯೀ ಚ ಸೋ’’ತಿ॥