(೨೬) ೬. ಅಭಿಞ್ಞಾವಗ್ಗೋ
೧-೩. ಅಭಿಞ್ಞಾಸುತ್ತಾದಿವಣ್ಣನಾ
೨೫೪-೨೫೬. ಛಟ್ಠಸ್ಸ ಅಭಿಞ್ಞಾಯಾತಿ ಜಾನಿತ್ವಾ। ಸಮಥೋ ಚ ವಿಪಸ್ಸನಾ ಚಾತಿ ಚಿತ್ತೇಕಗ್ಗತಾ ಚ ಸಙ್ಖಾರಪರಿಗ್ಗಹವಿಪಸ್ಸನಾಞಾಣಞ್ಚ। ವಿಜ್ಜಾ ಚ ವಿಮುತ್ತಿ ಚಾತಿ ಮಗ್ಗಞಾಣವಿಜ್ಜಾ ಚ ಸೇಸಾ ಸಮ್ಪಯುತ್ತಕಧಮ್ಮಾ ಚ। ದುತಿಯೇ ಅನರಿಯಪರಿಯೇಸನಾತಿ ಅನರಿಯಾನಂ ಏಸನಾ ಗವೇಸನಾ। ಜರಾಧಮ್ಮನ್ತಿ ಜರಾಸಭಾವಂ। ಸೇಸೇಸುಪಿ ಏಸೇವ ನಯೋ। ತತಿಯಂ ಉತ್ತಾನಮೇವ।
೪. ಮಾಲುಕ್ಯಪುತ್ತಸುತ್ತವಣ್ಣನಾ
೨೫೭. ಚತುತ್ಥೇ ಮಾಲುಕ್ಯಪುತ್ತೋತಿ ಮಾಲುಕ್ಯಬ್ರಾಹ್ಮಣಿಯಾ ಪುತ್ತೋ। ಏತ್ಥಾತಿ ಏತಸ್ಮಿಂ ತವ ಓವಾದಯಾಚನೇ। ಇಮಿನಾ ಥೇರಂ ಅಪಸಾದೇತಿಪಿ ಉಸ್ಸಾದೇತಿಪಿ। ಕಥಂ? ಅಯಂ ಕಿರ ದಹರಕಾಲೇ ಪಚ್ಚಯೇಸು ಲಗ್ಗೋ ಹುತ್ವಾ ಪಚ್ಛಾ ಮಹಲ್ಲಕಕಾಲೇ ಅರಞ್ಞವಾಸಂ ಪತ್ಥೇನ್ತೋ ಕಮ್ಮಟ್ಠಾನಂ ಯಾಚತಿ। ಅಥ ಭಗವಾ ‘‘ಏತ್ಥ ದಹರೇ ಕಿಂ ವಕ್ಖಾಮ, ಮಾಲುಕ್ಯಪುತ್ತೋ ವಿಯ ತುಮ್ಹೇಪಿ ತರುಣಕಾಲೇ ಪಚ್ಚಯೇಸು ಲಗ್ಗಿತ್ವಾ ಮಹಲ್ಲಕಕಾಲೇ ಅರಞ್ಞಂ ಪವಿಸಿತ್ವಾ ಸಮಣಧಮ್ಮಂ ಕರೇಯ್ಯಾಥಾ’’ತಿ ಇಮಿನಾ ಅಧಿಪ್ಪಾಯೇನ ಭಣನ್ತೋ ಥೇರಂ ಅಪಸಾದೇತಿ ನಾಮ। ಯಸ್ಮಾ ಪನ ಥೇರೋ ಮಹಲ್ಲಕಕಾಲೇವ ಅರಞ್ಞಂ ಪವಿಸಿತ್ವಾ ಸಮಣಧಮ್ಮಂ ಕಾತುಕಾಮೋ, ತಸ್ಮಾ ಭಗವಾ ‘‘ಏತ್ಥ ದಹರೇ ಕಿಂ ವಕ್ಖಾಮ, ಅಯಂ ಅಮ್ಹಾಕಂ ಮಾಲುಕ್ಯಪುತ್ತೋ ಮಹಲ್ಲಕಕಾಲೇಪಿ ಅರಞ್ಞಂ ಪವಿಸಿತ್ವಾ ಸಮಣಧಮ್ಮಂ ಕಾತುಕಾಮೋ
೫-೧೦. ಕುಲಸುತ್ತಾದಿವಣ್ಣನಾ
೨೫೮-೨೬೩. ಪಞ್ಚಮೇ ಆಧಿಪಚ್ಚೇ ಠಪೇನ್ತೀತಿ ಭಣ್ಡಾಗಾರಿಕಟ್ಠಾನೇ ಠಪೇನ್ತಿ। ಛಟ್ಠೇ ವಣ್ಣಸಮ್ಪನ್ನೋತಿ ಸರೀರವಣ್ಣೇನ ಸಮನ್ನಾಗತೋ। ಬಲಸಮ್ಪನ್ನೋತಿ ಕಾಯಬಲೇನ ಸಮನ್ನಾಗತೋ। ಭಿಕ್ಖುವಾರೇ ವಣ್ಣಸಮ್ಪನ್ನೋತಿ ಗುಣವಣ್ಣೇನ ಸಮನ್ನಾಗತೋ। ಬಲಸಮ್ಪನ್ನೋತಿ ವೀರಿಯಬಲೇನ ಸಮನ್ನಾಗತೋ। ಜವಸಮ್ಪನ್ನೋತಿ ಞಾಣಜವೇನ ಸಮನ್ನಾಗತೋ। ಸತ್ತಮೇಪಿ ಏಸೇವ ನಯೋ। ಸೇಸಮೇತ್ಥ ಉತ್ತಾನಮೇವಾತಿ।
ಅಭಿಞ್ಞಾವಗ್ಗೋ ಛಟ್ಠೋ।