(೬) ೧. ನೀವರಣವಗ್ಗೋ
೧-೨. ಆವರಣಸುತ್ತಾದಿವಣ್ಣನಾ
೫೧-೫೨. ದುತಿಯಸ್ಸ ಆವರಣಾ, ನೀವಾರಯನ್ತೀತಿ ನೀವರಣಾ। ಏತ್ಥ ಚ ಆವರನ್ತೀತಿ ಕುಸಲಧಮ್ಮುಪ್ಪತ್ತಿಂ ಆದಿತೋ ಪರಿವಾರೇನ್ತಿ। ನೀವಾರಯನ್ತೀತಿ ನಿರವಸೇಸತೋ ವಾರಯನ್ತೀತಿ ಅತ್ಥೋ, ತಸ್ಮಾ ಆವರಣವಸೇನಾತಿ ಆದಿತೋ ಕುಸಲುಪ್ಪತ್ತಿವಾರಣವಸೇನ। ನೀವರಣವಸೇನಾತಿ ನಿರವಸೇಸತೋ ವಾರಣವಸೇನಾತಿ ಏವಮೇತ್ಥ ಅತ್ಥೋ ದಟ್ಠಬ್ಬೋ। ಯಸ್ಮಾ ಪಞ್ಚ ನೀವರಣಾ ಉಪ್ಪಜ್ಜಮಾನಾ ಅನುಪ್ಪನ್ನಾಯ ಲೋಕಿಯಲೋಕುತ್ತರಾಯ ಪಞ್ಞಾಯ ಉಪ್ಪಜ್ಜಿತುಂ ನ ದೇನ್ತಿ, ಉಪ್ಪನ್ನಾಪಿ ಅಟ್ಠ ಸಮಾಪತ್ತಿಯೋ ಪಞ್ಚ ವಾ ಅಭಿಞ್ಞಾ ಉಪಚ್ಛಿನ್ದಿತ್ವಾ ಪಾತೇನ್ತಿ, ತಸ್ಮಾ ‘‘ಪಞ್ಞಾಯ ದುಬ್ಬಲೀಕರಣಾ’’ತಿ ವುಚ್ಚನ್ತಿ। ಉಪಚ್ಛಿನ್ದನಂ ಪಾತನಞ್ಚೇತ್ಥ ತಾಸಂ ಪಞ್ಞಾನಂ ಅನುಪ್ಪನ್ನಾನಂ ಉಪ್ಪಜ್ಜಿತುಂ ಅಪ್ಪದಾನಮೇವ। ಇತಿ ಮಹಗ್ಗತಾನುತ್ತರಪಞ್ಞಾನಂ ಏಕಚ್ಚಾಯ ಚ ಪರಿತ್ತಪಞ್ಞಾಯ ಅನುಪ್ಪತ್ತಿಹೇತುಭೂತಾ ನೀವರಣಧಮ್ಮಾ ಇತರಾಸಂ ಸಮತ್ಥತಂ ವಿಹನನ್ತಿಯೇವಾತಿ ಪಞ್ಞಾಯ ದುಬ್ಬಲೀಕರಣಾ ವುತ್ತಾ। ಭಾವನಾಮನಸಿಕಾರೇನ ವಿನಾ ಪಕತಿಯಾ ಮನುಸ್ಸೇಹಿ ನಿಬ್ಬತ್ತೇತಬ್ಬೋ ಧಮ್ಮೋತಿ ಮನುಸ್ಸಧಮ್ಮೋ, ಮನುಸ್ಸತ್ತಭಾವಾವಹೋ ವಾ ಧಮ್ಮೋ ಮನುಸ್ಸಧಮ್ಮೋ, ಅನುಳಾರಂ ಪರಿತ್ತಕುಸಲಂ। ಯಂ ಅಸತಿಪಿ ಬುದ್ಧುಪ್ಪಾದೇ ವತ್ತತಿ, ಯಞ್ಚ ಸನ್ಧಾಯಾಹ ‘‘ಹೀನೇನ ಬ್ರಹ್ಮಚರಿಯೇನ, ಖತ್ತಿಯೇ ಉಪಪಜ್ಜತೀ’’ತಿ (ಜಾ॰ ೧.೮.೭೫)। ಅಲಂ ಅರಿಯಾಯ ಅರಿಯಭಾವಾಯಾತಿ ಅಲಮರಿಯೋ, ಅರಿಯಭಾವಾಯ ಸಮತ್ಥೋತಿ ವುತ್ತಂ ಹೋತಿ। ಞಾಣದಸ್ಸನಮೇವ ಞಾಣದಸ್ಸನವಿಸೇಸೋ, ಅಲಮರಿಯೋ ಚ ಸೋ ಞಾಣದಸ್ಸನವಿಸೇಸೋ ಚಾತಿ ಅಲಮರಿಯಞಾಣದಸ್ಸನವಿಸೇಸೋ।
ಞಾಣದಸ್ಸನನ್ತಿ ಚ ದಿಬ್ಬಚಕ್ಖುಪಿ ವಿಪಸ್ಸನಾಪಿ ಮಗ್ಗೋಪಿ ಫಲಮ್ಪಿ ಪಚ್ಚವೇಕ್ಖಣಞಾಣಮ್ಪಿ ಸಬ್ಬಞ್ಞುತಞ್ಞಾಣಮ್ಪಿ ವುಚ್ಚತಿ। ‘‘ಅಪ್ಪಮತ್ತೋ ಸಮಾನೋ ಞಾಣದಸ್ಸನಂ ಆರಾಧೇತೀ’’ತಿ (ಮ॰ ನಿ॰ ೧.೩೧೧) ಹಿ ಏತ್ಥ ದಿಬ್ಬಚಕ್ಖು ಞಾಣದಸ್ಸನಂ ನಾಮ। ‘‘ಞಾಣದಸ್ಸನಾಯ ಚಿತ್ತಂ ಅಭಿನೀಹರತಿ ಅಭಿನಿನ್ನಾಮೇತೀ’’ತಿ (ದೀ॰ ನಿ॰ ೧.೨೩೪) ಏತ್ಥ ವಿಪಸ್ಸನಾಞಾಣಂ। ‘‘ಅಭಬ್ಬಾ ತೇ ಞಾಣಾಯ ದಸ್ಸನಾಯ ಅನುತ್ತರಾಯ ಸಮ್ಬೋಧಾಯಾ’’ತಿ (ಅ॰ ನಿ॰ ೪.೧೯೬) ಏತ್ಥ ಮಗ್ಗೋ। ‘‘ಅಯಮಞ್ಞೋ ಞಾಣದಸ್ಸನಂ, ದಿಬ್ಬಚಕ್ಖು। ಸಮ್ಮಸನೂಪಚಾರೇ ಚ ಧಮ್ಮಲಕ್ಖಣತ್ತಯಞ್ಚ ತಥಾ ಜಾನಾತಿ ಪಸ್ಸತಿ ಚಾತಿ ಞಾಣದಸ್ಸನಂ, ವಿಪಸ್ಸನಾ। ನಿಬ್ಬಾನಂ ಚತ್ತಾರಿ ವಾ ಸಚ್ಚಾನಿ ಅಸಮ್ಮೋಹಪ್ಪಟಿವೇಧತೋ ಜಾನಾತಿ ಪಸ್ಸತಿ ಚಾತಿ ಞಾಣದಸ್ಸನಂ, ಮಗ್ಗೋ। ಫಲಂ ಪನ ನಿಬ್ಬಾನವಸೇನೇವ ಯೋಜೇತಬ್ಬಂ। ಪಚ್ಚವೇಕ್ಖಣಾ ಮಗ್ಗಾಧಿಗತಸ್ಸ ಅತ್ಥಸ್ಸ ಸಬ್ಬಸೋ ಜೋತನಟ್ಠೇನ ಞಾಣದಸ್ಸನಂ। ಸಬ್ಬಞ್ಞುತಾ ಅನಾವರಣತಾಯ ಸಮನ್ತಚಕ್ಖುತಾಯ ಚ ಞಾಣದಸ್ಸನಂ। ಬ್ಯಾದಿಣ್ಣಕಾಲೋತಿ ಪರಿಯಾದಿನ್ನಕಾಲೋ। ದುತಿಯಂ ಉತ್ತಾನಮೇವ।
ಆವರಣಸುತ್ತಾದಿವಣ್ಣನಾ ನಿಟ್ಠಿತಾ।
೩-೪. ಪಧಾನಿಯಙ್ಗಸುತ್ತಾದಿವಣ್ಣನಾ
೫೩-೫೪. ತತಿಯೇ ಪದಹತೀತಿ ಪದಹನೋ, ಭಾವನಮನುಯುತ್ತೋ ಯೋಗೀ, ತಸ್ಸ ಭಾವೋ ಭಾವನಾನುಯೋಗೋ ಪದಹನಭಾವೋ। ಪಧಾನಮಸ್ಸ ಅತ್ಥೀತಿ ಪಧಾನಿಕೋ, ಕ-ಕಾರಸ್ಸ ಯ-ಕಾರಂ ಕತ್ವಾ ‘‘ಪಧಾನಿಯೋ’’ತಿ ವುತ್ತಂ। ‘‘ಅಭಿನೀಹಾರತೋ ಪಟ್ಠಾಯ ಆಗತತ್ತಾ’’ತಿ ವುತ್ತತ್ತಾ ಪಚ್ಚೇಕಬೋಧಿಸತ್ತಸಾವಕಬೋಧಿಸತ್ತಾನಮ್ಪಿ ಪಣಿಧಾನತೋ ಪಭುತಿ ಆಗತಸದ್ಧಾ ಆಗಮನಸದ್ದಾ ಏವ, ಉಕ್ಕಟ್ಠನಿದ್ದೇಸೇನ ಪನ ‘‘ಸಬ್ಬಞ್ಞುಬೋಧಿಸತ್ತಾನ’’ನ್ತಿ ವುತ್ತಂ। ಅಧಿಗಮತೋ ಸಮುದಾಗತತ್ತಾ ಅಗ್ಗಮಗ್ಗಫಲಸಮ್ಪಯುತ್ತಾ ಚಾಪಿ ಅಧಿಗಮಸದ್ಧಾ ನಾಮ, ಯಾ ಸೋತಾಪನ್ನಸ್ಸ ಅಙ್ಗಭಾವೇನ ವುತ್ತಾ। ಅಚಲಭಾವೇನಾತಿ ಪಟಿಪಕ್ಖೇನ ಅನಧಿಭವನೀಯತ್ತಾ ನಿಚ್ಚಲಭಾವೇನ। ಓಕಪ್ಪನನ್ತಿ ಓಕ್ಕನ್ದಿತ್ವಾ ಅಧಿಮುಚ್ಚನಂ, ಪಸಾದುಪ್ಪತ್ತಿಯಾ ಪಸಾದನೀಯವತ್ಥುಸ್ಮಿಂ ಪಸೀದನಮೇವ। ಸುಪ್ಪಟಿವಿದ್ಧನ್ತಿ ಸುಟ್ಠು ಪಟಿವಿದ್ಧಂ। ಯಥಾ ತೇನ ಪಟಿವಿದ್ಧೇನ ಸಬ್ಬಞ್ಞುತಞ್ಞಾಣಂ ಹತ್ಥಗತಂ ಅಹೋಸಿ, ತಥಾ ಪಟಿವಿದ್ಧಂ। ಯಸ್ಸ ಬುದ್ಧಸುಬುದ್ಧತಾಯ ಸದ್ಧಾ ಅಚಲಾ ಅಸಮ್ಪವೇಧಿ, ತಸ್ಸ ಧಮ್ಮಸುಧಮ್ಮತಾಯ ಸಙ್ಘಸುಪ್ಪಟಿಪನ್ನತಾಯ ಪಧಾನವೀರಿಯಂ ಇಜ್ಝತಿ ‘‘ಅದ್ಧಾ ಇಮಾಯ ಪಟಿಪದಾಯ ಜರಾಮರಣತೋ ಮುಚ್ಚಿಸ್ಸಾಮೀ’’ತಿ ಸಕ್ಕಚ್ಚಂ ಪದಹನತೋ।
ಅಪ್ಪ-ಸದ್ದೋ ‘‘ಅರೋಗೋ’’ತಿ। ಸಮವೇಪಾಕಿನಿಯಾತಿ ಯಥಾಭುತ್ತಮಾಹಾರಂ ಸಮಾಕಾರೇನೇವ ಪಚನಸೀಲಾಯ। ದಳ್ಹಂ ಕತ್ವಾ ಪಚನ್ತೀ ಹಿ ಗಹಣೀ ಘೋರಭಾವೇನ ಪಿತ್ತವಿಕಾರಾದಿವಸೇನ ರೋಗಂ ಜನೇತಿ, ಸಿಥಿಲಂ ಕತ್ವಾ ಪಚನ್ತೀ ಮನ್ದಭಾವೇನ ವಾತವಿಕಾರಾದಿವಸೇನ ತೇನಾಹ ‘‘ನಾತಿಸೀತಾಯ ನಾಚ್ಚುಣ್ಹಾಯಾ’’ತಿ। ಗಹಣಿತೇಜಸ್ಸ ಮನ್ದಪಟುತಾವಸೇನ ಸತ್ತಾನಂ ಯಥಾಕ್ಕಮಂ ಸೀತುಣ್ಹಸಹತಾತಿ ಆಹ ‘‘ಅತಿಸೀತಲಗ್ಗಹಣಿಕೋ’’ತಿಆದಿ। ಯಾಥಾವತೋ ಅಚ್ಚಯದೇಸನಾ ಅತ್ತನೋ ಆವಿಕರಣಂ ನಾಮಾತಿ ಆಹ ‘‘ಯಥಾಭೂತಂ ಅತ್ತನೋ ಅಗುಣಂ ಪಕಾಸೇತಾ’’ತಿ। ಉದಯತ್ಥಗಾಮಿನಿಯಾತಿ ಸಙ್ಖಾರಾನಂ ಉದಯಞ್ಚ ವಯಞ್ಚ ಪಟಿವಿಜ್ಝನ್ತಿಯಾತಿ ಅಯಮೇತ್ಥ ಅತ್ಥೋತಿ ಆಹ ‘‘ಉದಯಞ್ಚಾ’’ತಿಆದಿ। ಪರಿಸುದ್ಧಾಯಾತಿ ನಿರುಪಕ್ಕಿಲೇಸಾಯ। ನಿಬ್ಬಿಜ್ಝಿತುಂ ಸಮತ್ಥಾಯಾತಿ ತದಙ್ಗವಸೇನ ಸವಿಸೇಸಂ ಪಜಹಿತುಂ ಸಮತ್ಥಾಯ। ತಸ್ಸ ದುಕ್ಖಸ್ಸ ಖಯಗಾಮಿನಿಯಾತಿ ಯಂ ದುಕ್ಖಂ ಇಮಸ್ಮಿಂ ಞಾಣೇ ಅನಧಿಗತೇ ಪವತ್ತಿರಹಂ, ಅಧಿಗತೇ ನ ಪವತ್ತಿ, ತಂ ಸನ್ಧಾಯ ವದತಿ। ತಥಾಹೇಸ ಯೋಗಾವಚರೋ ‘‘ಚೂಳಸೋತಾಪನ್ನೋ’’ತಿ ವುಚ್ಚತಿ। ಚತುತ್ಥಂ ಉತ್ತಾನಮೇವ।
ಪಧಾನಿಯಙ್ಗಸುತ್ತಾದಿವಣ್ಣನಾ ನಿಟ್ಠಿತಾ।
೫. ಮಾತಾಪುತ್ತಸುತ್ತವಣ್ಣನಾ
೫೫. ಪಞ್ಚಮೇ ವಿಸ್ಸಾಸೋತಿ ವಿಸಚ್ಛಾಯಸನ್ತಾನೋ ಭಾವೋ। ಓತಾರೋತಿ ತತ್ಥ ಚಿತ್ತಸ್ಸ ಅನುಪ್ಪವೇಸೋ। ಗಹೇತ್ವಾತಿ ಅತ್ತನೋ ಏವ ಓಕಾಸಂ ಗಹೇತ್ವಾ। ಖೇಪೇತ್ವಾತಿ ಕುಸಲವಾರಂ ಖೇಪೇತ್ವಾ।
ಘಟ್ಟೇಯ್ಯಾತಿ ಅಕ್ಕಮನಾದಿವಸೇನ ಬಾಧೇಯ್ಯ। ತೀಹಿ ಪರಿಞ್ಞಾಹೀತಿ ಞಾತತೀರಣಪ್ಪಹಾನಸಙ್ಖಾತಾಹಿ ತೀಹಿ ಪರಿಞ್ಞಾಹಿ। ನತ್ಥಿ ಏತೇಸಂ ಕುತೋಚಿ ಭಯನ್ತಿ ಅಕುತೋಭಯಾ, ನಿಬ್ಭಯಾತಿ ಅತ್ಥೋ। ಚತುನ್ನಂ ಓಘಾನಂ, ಸಂಸಾರಮಹೋಘಸ್ಸೇವ ವಾ ಪಾರಂ ಪರಿಯನ್ತಂ ಗತಾ। ತೇನಾಹ ‘‘ಪಾರಂ ವುಚ್ಚತಿ ನಿಬ್ಬಾನ’’ನ್ತಿಆದಿ।
ಮಾತಾಪುತ್ತಸುತ್ತವಣ್ಣನಾ ನಿಟ್ಠಿತಾ।
೬. ಉಪಜ್ಝಾಯಸುತ್ತವಣ್ಣನಾ
೫೬. ಛಟ್ಠೇ ‘‘ಸಞ್ಜಾತಗರುಭಾವೋ’’ತಿ ನ ಪಕ್ಖಾಯನ್ತೀತಿ ನಪ್ಪಕಾಸೇನ್ತಿ, ನಾನಾಕಾರಣತೋ ನ ಉಪಟ್ಠಹನ್ತಿ। ತೇನಾಹ ‘‘ಚತಸ್ಸೋ ದಿಸಾ ಚ ಅನುದಿಸಾ ಚ ಮಯ್ಹಂ ನ ಉಪಟ್ಠಹನ್ತೀ’’ತಿ। ಸೇಸಮೇತ್ಥ ಉತ್ತಾನಮೇವ।
ಉಪಜ್ಝಾಯಸುತ್ತವಣ್ಣನಾ ನಿಟ್ಠಿತಾ।
೭. ಅಭಿಣ್ಹಪಚ್ಚವೇಕ್ಖಿತಬ್ಬಟ್ಠಾನಸುತ್ತವಣ್ಣನಾ
೫೭. ಸತ್ತಮೇ ಜರಾಧಮ್ಮೋತಿ ಧಮ್ಮ-ಸದ್ದೋ ‘‘ಅಸಮ್ಮೋಸಧಮ್ಮೋ ನಿಬ್ಬಾನ’’ನ್ತಿಆದೀಸು (ಸು॰ ನಿ॰ ೭೬೩) ವಿಯ ಪಕತಿಪರಿಯಾಯೋ, ತಸ್ಮಾ ಜರಾಪಕತಿಕೋ ಜಿಣ್ಣಸಭಾವೋತಿ ಅತ್ಥೋ। ತೇನಾಹ ‘‘ಜರಾಸಭಾವೋ’’ತಿಆದಿ। ಸೇಸಪದೇಸುಪಿ ಏಸೇವ ನಯೋ। ಕಮ್ಮುನಾ ದಾತಬ್ಬಂ ಆದಿಯತೀತಿ ಕಮ್ಮದಾಯಾದೋ, ಅತ್ತನಾ ಯಥೂಪಚಿತಕಮ್ಮಫಲಭಾಗೀತಿ ಅತ್ಥೋ। ತಂ ಪನ ದಾಯಜ್ಜಂ ಕಾರಣೂಪಚಾರೇನ ವದನ್ತೋ ‘‘ಕಮ್ಮಂ ಮಯ್ಹಂ ದಾಯಜ್ಜಂ ಸನ್ತಕನ್ತಿ ಅತ್ಥೋ’’ತಿ ಆಹ ಯಥಾ ‘‘ಕುಸಲಾನಂ, ಭಿಕ್ಖವೇ, ಧಮ್ಮಾನಂ ಸಮಾದಾನಹೇತು, ಏವಮಿದಂ ಪುಞ್ಞಂ ವಡ್ಢತೀ’’ತಿ (ದೀ॰ ನಿ॰ ೩.೮೦)। ಯೋನೀಹಿ ಫಲಂ ಸಭಾವತೋ ಭಿನ್ನಮ್ಪಿ ಅಭಿನ್ನಂ ವಿಯ ಮಿಸ್ಸಿತಂ ಹೋತಿ। ತೇನಾಹ ‘‘ಕಮ್ಮಂ ಮಯ್ಹಂ ಯೋನಿ ಕಾರಣ’’ನ್ತಿ। ಮಮತ್ತವಸೇನ ಬಜ್ಝನ್ತೀತಿ ಬನ್ಧೂ, ಞಾತಿ ಸಾಲೋಹಿತೋ ಚ, ಕಮ್ಮಂ ಪನ ಏಕನ್ತಸಮ್ಬನ್ಧವಾತಿ ಆಹ ‘‘ಕಮ್ಮಂ ಮಯ್ಹಂ ಬನ್ಧೂ’’ತಿ। ಪತಿಟ್ಠಾತಿ ಅವಸ್ಸಯೋ। ಕಮ್ಮಸದಿಸೋ ಹಿ ಸತ್ತಾನಂ ಅವಸ್ಸಯೋ ನತ್ಥಿ।
ಯೋಬ್ಬನಂ ಆರಬ್ಭ ಉಪ್ಪನ್ನಮದೋತಿ ‘‘ಮಹಲ್ಲಕಕಾಲೇ ಪುಞ್ಞಂ ಕರಿಸ್ಸಾಮ, ದಹರಮ್ಹ ತಾವಾ’’ತಿ ಯೋಬ್ಬನಂ ಅಪಸ್ಸಾಯ ಮಾನಕರಣಂ। ‘‘ಅಹಂ ನಿರೋಗೋ ಸಟ್ಠಿ ವಾ ಸತ್ತತಿ ವಾ ವಸ್ಸಾನಿ ಅತಿಕ್ಕನ್ತಾನಿ, ನ ಮೇ ಹರೀತಕಖಣ್ಡಮ್ಪಿ ಖಾದಿತಬ್ಬಂ, ಇಮೇ ಪನಞ್ಞೇ ‘ಅಸುಕಂ ನೋ ಠಾನಂ ರುಜ್ಜತಿ, ಭೇಸಜ್ಜಂ ಖಾದಾಮಾ’ತಿ ವಿಚರನ್ತಿ, ಕೋ ಅಞ್ಞೋ ಮಯಾ ಸದಿಸೋ ನಿರೋಗೋ ನಾಮಾ’’ತಿ ಏವಂ ಮಾನಕರಣಂ ಆರೋಗ್ಯಮದೋ। ಸಬ್ಬೇಸಮ್ಪಿ ಜೀವಿತಂ ನಾಮ ಪಭಙ್ಗುರಂ ದುಕ್ಖಾನುಬನ್ಧಞ್ಚ, ತದುಭಯಂ ಅನೋಲೋಕೇತ್ವಾ ಪಬನ್ಧಟ್ಠಿತಿಂ ಪಚ್ಚಯಸುಲಭತಞ್ಚ ನಿಸ್ಸಾಯ ‘‘ಚಿರಂ ಜೀವಿಂ, ಚಿರಂ ಜೀವಾಮಿ, ಚಿರಂ ಜೀವಿಸ್ಸಾಮಿ, ಸುಖಂ ಜೀವಿಂ, ಸುಖಂ ಜೀವಾಮಿ, ಸುಖಂ ಜೀವಿಸ್ಸಾಮೀ’’ತಿ ಏವಂ ಮಾನಕರಣಂ ಜೀವಿತಮದೋ।
ಉಪಧಿರಹಿತನ್ತಿ
ಅಭಿಣ್ಹಪಚ್ಚವೇಕ್ಖಿತಬ್ಬಟ್ಠಾನಸುತ್ತವಣ್ಣನಾ ನಿಟ್ಠಿತಾ।
೮-೧೦. ಲಿಚ್ಛವಿಕುಮಾರಕಸುತ್ತಾದಿವಣ್ಣನಾ
೫೮-೬೦. ಅಟ್ಠಮೇ ಸಾಪತೇಯ್ಯನ್ತಿ ಏತ್ಥ ಸಂ ವುಚ್ಚತಿ ಧನಂ, ತಸ್ಸ ಪತೀತಿ ಸಪತಿ, ಧನಸಾಮಿಕೋ। ತಸ್ಸ ಹಿತಾವಹತ್ತಾ ಸಾಪತೇಯ್ಯಂ, ದ್ರಬ್ಯಂ, ಧನನ್ತಿ ಅತ್ಥೋ। ಅತ್ತನೋ ರುಚಿವಸೇನ ಗಾಮಕಿಚ್ಚಂ ನೇತೀತಿ ಗಾಮನಿಯೋ, ಗಾಮನಿಯೋಯೇವ ಗಾಮಣಿಕೋ।
ಅನ್ವಾಯ ಉಪನಿಸ್ಸಾಯ ಜೀವನಸೀಲಾ ಅನುಜೀವಿನೋತಿ ಆಹ ‘‘ಯೇ ಚ ಏತಂ ಉಪನಿಸ್ಸಾಯ ಜೀವನ್ತೀ’’ತಿ। ಏಕಂ ಮಹಾಕುಲಂ ನಿಸ್ಸಾಯ ಪಣ್ಣಾಸಮ್ಪಿ ಸಟ್ಠಿಪಿ ಕುಲಾನಿ ಜೀವನ್ತಿ, ತೇ ಮನುಸ್ಸೇ ಸನ್ಧಾಯೇತಂ ವುತ್ತಂ। ಸೇಸಂ ಸುವಿಞ್ಞೇಯ್ಯಮೇವ। ನವಮಾದೀನಿ ಉತ್ತಾನತ್ಥಾನೇವ।
ಲಿಚ್ಛವಿಕುಮಾರಕಸುತ್ತಾದಿವಣ್ಣನಾ ನಿಟ್ಠಿತಾ।
ನೀವರಣವಗ್ಗವಣ್ಣನಾ ನಿಟ್ಠಿತಾ।