೧. ನಿಸ್ಸಯವಗ್ಗೋ
೧-೬. ಕಿಮತ್ಥಿಯಸುತ್ತಾದಿವಣ್ಣನಾ
೧-೬. ಏಕಾದಸಕನಿಪಾತಸ್ಸ
೭-೮. ಪಠಮಸಞ್ಞಾಸುತ್ತಾದಿವಣ್ಣನಾ
೭-೮. ಸತ್ತಮೇ ಅತ್ಥೇನ ಅತ್ಥೋತಿ ಅತ್ಥೇನ ಸದ್ಧಿಮತ್ಥೋ। ಬ್ಯಞ್ಜನೇನ ಬ್ಯಞ್ಜನನ್ತಿ ಬ್ಯಞ್ಜನೇನ ಸದ್ಧಿಂ ಸಂಸನ್ದಿಸ್ಸತೀತಿ ಸಮ್ಪವತ್ತಿಸ್ಸತಿ। ಸಮೇಸ್ಸತೀತಿ ಸಮಾನಂ ಭವಿಸ್ಸತಿ। ನ ವಿಗ್ಗಯ್ಹಿಸ್ಸತೀತಿ ನ ವಿರಜ್ಝಿಸ್ಸತಿ। ಅಗ್ಗಪದಸ್ಮಿನ್ತಿ ನಿಬ್ಬಾನೇ। ಅಟ್ಠಮೇ ಪಚ್ಚವೇಕ್ಖಣಾ ಕಥಿತಾ।
೯. ಸದ್ಧಸುತ್ತವಣ್ಣನಾ
೯. ನವಮೇ ದೋಣಿಯಾ ಬದ್ಧೋತಿ ಯವಸಸ್ಸದೋಣಿಯಾ ಸಮೀಪೇ ಬದ್ಧೋ। ಅನ್ತರಂ ಕರಿತ್ವಾತಿ ಅಬ್ಭನ್ತರೇ ಕತ್ವಾ। ಝಾಯತೀತಿ ಚಿನ್ತೇತಿ। ಪಜ್ಝಾಯತೀತಿ ಇತೋ ಚಿತೋ ಚ ನಾನಪ್ಪಕಾರಕಂ ಝಾಯತಿ। ನಿಜ್ಝಾಯತೀತಿ ನಿರನ್ತರವಸೇನ ನಿಬದ್ಧಂ ಝಾಯತಿ। ಪಥವಿಮ್ಪಿ ನಿಸ್ಸಾಯ ಝಾಯತೀತಿ ಸಮಾಪತ್ತಿಯಂ ಸನಿಕನ್ತಿಕವಸೇನೇತಂ ಆಪಾದೀಸುಪಿ ಏಸೇವ ನಯೋ।
ಕಥಞ್ಚ ಸದ್ಧ ಆಜಾನೀಯಝಾಯಿತಂ ಹೋತೀತಿ ಕಥಂ ಕಾರಣಾಕಾರಣಂ ಜಾನನ್ತಸ್ಸ ಸಿನ್ಧವಸ್ಸ ಝಾಯಿತಂ ಹೋತಿ। ಯಥಾ ಇಣನ್ತಿಆದೀಸು ಇಣಸದಿಸಂ ಬನ್ಧನಸದಿಸಂ ಧನಜಾನಿಸದಿಸಂ ಕಲಿಸಙ್ಖಾತಮಹಾಪರಾಧಸದಿಸಞ್ಚ ಕತ್ವಾ ಅತ್ತನೋ ಅಭಿಮುಖಸ್ಸ ಪತೋದಸ್ಸ ಅಜ್ಝೋಹರಣಸಙ್ಖಾತಂ ಪತನಂ ವಿಪಸ್ಸತೀತಿ ಅತ್ಥೋ। ನೇವ ಪಥವಿಂ ನಿಸ್ಸಾಯ ಝಾಯತೀತಿ ಸಮಾಪತ್ತಿಸುಖನಿಕನ್ತಿಯಾ ಅಭಾವೇನ ಪಥವಿಆರಮ್ಮಣಾಯ ಝಾಯತಿ ಚ ಪನಾತಿ ನಿಬ್ಬಾನಾರಮ್ಮಣಾಯ ಫಲಸಮಾಪತ್ತಿಯಾ ಝಾಯತಿ। ಪಥವಿಯಂ ಪಥವಿಸಞ್ಞಾ ವಿಭೂತಾ ಹೋತೀತಿ ಪಥವಾರಮ್ಮಣೇ ಉಪ್ಪನ್ನಾ ಚತುಕ್ಕಪಞ್ಚಕಜ್ಝಾನಸಞ್ಞಾ ವಿಭೂತಾ ಪಾಕಟಾ ಹೋತಿ। ‘‘ವಿಭೂತಾ, ಭನ್ತೇ, ರೂಪಸಞ್ಞಾ ಅವಿಭೂತಾ ಅಟ್ಠಿಕಸಞ್ಞಾ’’ತಿ ಇಮಸ್ಮಿಞ್ಹಿ ಸುತ್ತೇ ಸಮತಿಕ್ಕಮಸ್ಸ ಅತ್ಥಿತಾಯ ವಿಭೂತತಾ ವುತ್ತಾ, ಇಧ ಪನ ವಿಪಸ್ಸನಾವಸೇನ ಅನಿಚ್ಚದುಕ್ಖಾನತ್ತತೋ ದಿಟ್ಠತ್ತಾ ವಿಭೂತಾ ನಾಮ ಜಾತಾ। ಆಪೋಸಞ್ಞಾದೀಸುಪಿ ಏಸೇವ ನಯೋ। ಏವಮೇತ್ಥ ಹೇಟ್ಠಾ ವಿಯ ಸಮಾಪತ್ತಿವಸೇನ ಸಮತಿಕ್ಕಮಂ ಅವತ್ವಾ ವಿಪಸ್ಸನಾಚಾರವಸೇನ ಸಮತಿಕ್ಕಮೋ ವುತ್ತೋ। ಏವಂ ಝಾಯೀತಿ ಏವಂ ವಿಪಸ್ಸನಾಪಟಿಪಾಟಿಯಾ ಆಗನ್ತ್ವಾ ಉಪ್ಪಾದಿತಾಯ ಫಲಸಮಾಪತ್ತಿಯಾ ಝಾಯನ್ತೋ।
೧೦. ಮೋರನಿವಾಪಸುತ್ತವಣ್ಣನಾ
೧೦. ದಸಮೇ ಅಚ್ಚನ್ತನಿಟ್ಠೋತಿ ಅನ್ತಂ ಅತೀತತ್ತಾ ಅಚ್ಚನ್ತಸಙ್ಖಾತಂ ಅವಿನಾಸಧಮ್ಮಂ ನಿಬ್ಬಾನಂ ನಿಟ್ಠಾ ಅಸ್ಸಾತಿ ಅಚ್ಚನ್ತನಿಟ್ಠೋ। ಇಮಿನಾ ನಯೇನ ಸೇಸಪದಾನಿ ವೇದಿತಬ್ಬಾನಿ। ಜನೇತಸ್ಮಿನ್ತಿ ಜನಿತಸ್ಮಿಂ ಯೇ ಗೋತ್ತಪಟಿಸಾರಿನೋತಿ ಯೇ ಜನಾ ತಸ್ಮಿಂ ಗೋತ್ತೇ ಪಟಿಸರನ್ತಿ ‘‘ಅಹಂ ಗೋತಮೋ, ಅಹಂ ಕಸ್ಸಪೋ’’ತಿ, ತೇಸು ಲೋಕೇ ಗೋತ್ತಪಟಿಸಾರೀಸು ಖತ್ತಿಯೋ ಸೇಟ್ಠೋ। ಅನುಮತಾ ಮಯಾತಿ ಮಮ ಸಬ್ಬಞ್ಞುತಞ್ಞಾಣೇನ ಸದ್ಧಿಂ ಸಂಸನ್ದೇತ್ವಾ ದೇಸಿತಾ ಮಯಾ ಅನುಞ್ಞಾತಾ। ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ।
ನಿಸ್ಸಯವಗ್ಗೋ ಪಠಮೋ।