೧೨. ಚೂಳಬ್ಯೂಹಸುತ್ತನಿದ್ದೇಸವಣ್ಣನಾ
ದ್ವಾದಸಮೇ ಸಕಂಸಕಂದಿಟ್ಠಿಪರಿಬ್ಬಸಾನಾತಿ ಇದಮ್ಪಿ ತಸ್ಮಿಂಯೇವ ಮಹಾಸಮಯೇ ‘‘ಸಬ್ಬೇಪಿಮೇ ದಿಟ್ಠಿಗತಿಕಾ ‘ಸಾಧುರೂಪಾಮ್ಹಾ’ತಿ ಭಣನ್ತಿ, ಕಿಂ ನು ಖೋ ಸಾಧುರೂಪಾವ ಇಮೇ ಅತ್ತನೋ ಏವ ದಿಟ್ಠಿಯಾ ಪತಿಟ್ಠಹನ್ತಿ, ಉದಾಹು ಅಞ್ಞಮ್ಪಿ ದಿಟ್ಠಿಂ ಗಣ್ಹನ್ತೀ’’ತಿ ಉಪ್ಪನ್ನಚಿತ್ತಾನಂ ಏಕಚ್ಚಾನಂ ದೇವತಾನಂ ತಮತ್ಥಂ ಪಕಾಸೇತುಂ ಪುರಿಮನಯೇನೇವ ನಿಮ್ಮಿತಬುದ್ಧೇನ ಅತ್ತಾನಂ ಪುಚ್ಛಾಪೇತ್ವಾ ವುತ್ತಂ।
೧೧೩. ತತ್ಥ ಆದಿತೋ ದ್ವೇಪಿ ಗಾಥಾ ಪುಚ್ಛಾಗಾಥಾಯೇವ। ತಾಸು ಸಕಂ ಸಕಂ ದಿಟ್ಠಿಪರಿಬ್ಬಸಾನಾತಿ ಅತ್ತನೋ ಅತ್ತನೋ ದಿಟ್ಠಿಯಾ ವಸಮಾನಾ। ವಿಗ್ಗಯ್ಹ ನಾನಾ ಕುಸಲಾ ವದನ್ತೀತಿ ತಂ ದಿಟ್ಠಿಂ ಬಲವಗ್ಗಾಹಂ ಗಹೇತ್ವಾ ‘‘ತತ್ಥ ಕುಸಲಾಮ್ಹಾ’’ತಿ ಪಟಿಜಾನಮಾನಾ ಪುಥು ಪುಥು ವದನ್ತಿ, ಏಕಂ ನ ವದನ್ತಿ। ಯೋ ಏವಂ ಜಾನಾತಿ ಸ ವೇದಿ ಧಮ್ಮಂ, ಇದಂ ಪಟಿಕ್ಕೋಸಮಕೇವಲೀ ಸೋತಿ ತಞ್ಚ ದಿಟ್ಠಿಂ ಸನ್ಧಾಯ ಯೋ ಏವಂ ಜಾನಾತಿ, ಸೋ ಧಮ್ಮಂ ವೇದಿಯಿ। ಇದಂ ಪನ ಪಟಿಕ್ಕೋಸನ್ತೋ ಹೀನೋ ಹೋತೀತಿ ಚ ವದನ್ತಿ।
ನಾನಾ ವದನ್ತೀತಿ ನಾನಾಕಾರಣಂ ಭಣನ್ತಿ। ವಿವಿಧಂ ವದನ್ತೀತಿ ನಾನಾವಿಧಂ ಭಣನ್ತಿ। ಅಞ್ಞೋಞ್ಞಂ ವದನ್ತೀತಿ ಏಕಂ ಅವತ್ವಾ ಅಞ್ಞಂ ಅಞ್ಞಂ ಗಹೇತ್ವಾ ವದನ್ತಿ। ಅಕೇವಲೀ ಸೋತಿ ಯೋ ಅಕುಸಲೋ ಅಯಂ। ಅಸಮತ್ತೋತಿ ನ ಪರಿಪೂರೋ। ಅಪರಿಪುಣ್ಣೋತಿ ನ ಸಮ್ಪುಣ್ಣೋ।
೧೧೪. ಬಾಲೋತಿ ಹೀನೋ। ಅಕ್ಕುಸಲೋತಿ ಅವಿದ್ವಾ।
೧೧೫. ಇದಾನಿ ತಿಸ್ಸೋ ವಿಸ್ಸಜ್ಜನಗಾಥಾ ಹೋನ್ತೀತಿ। ತಾ ಪುರಿಮಡ್ಢೇನ ವುತ್ತಮತ್ಥಂ ಪಚ್ಛಿಮಡ್ಢೇನ ಪಟಿಬ್ಯೂಹಿತ್ವಾ ಠಿತಾ। ತೇನ ಬ್ಯೂಹೇನ ಉತ್ತರಸುತ್ತತೋ ಚ ಅಪ್ಪಕತ್ತಾ ಇದಂ ಸುತ್ತಂ ‘‘ಚೂಳಬ್ಯೂಹ’’ನ್ತಿ ನಾಮಂ ಲಭಿ। ತತ್ಥ ಪಠಮಗಾಥಾಯಂ ತಾವ ಪರಸ್ಸ ಚೇ ಧಮ್ಮನ್ತಿ ಪರಸ್ಸ ದಿಟ್ಠಿಂ। ಸಬ್ಬೇವಿಮೇ ಬಾಲಾತಿ ಏವಂ ಸನ್ತೇ ಸಬ್ಬೇವ ಇಮೇ ಸಬ್ಬೇವಿಮೇ ದಿಟ್ಠಿಪರಿಬ್ಬಸಾನಾತಿ।
೧೧೬. ಸನ್ದಿಟ್ಠಿಯಾ ಚೇವ ನ ವೀವದಾತಾ, ಸಂಸುದ್ಧಪಞ್ಞಾ ಕುಸಲಾ ಮುತೀಮಾತಿ ಸಕಾಯ ದಿಟ್ಠಿಯಾ ಅನವೀವದಾತಾ ಅವೋದಾತಾ ಸಂಕಿಲಿಟ್ಠಾವ ಸಮಾನಾ ಸಂಸುದ್ಧಪಞ್ಞಾ ಚ ಕುಸಲಾ ಚ ಮುತಿಮನ್ತೋ ಚ ತೇ ಹೋನ್ತಿ ಚೇ। ಅಥ ವಾ ‘‘ಸನ್ದಿಟ್ಠಿಯಾ ಚೇ ವದಾತಾ’’ತಿ ಪಾಠೋ, ತಸ್ಸತ್ಥೋ – ಸಕಾಯ ಪನ ದಿಟ್ಠಿಯಾ ವೋದಾತಾ ನ ತೇಸಂ ಕೋಚೀತಿ ಏವಂ ಸನ್ತೇ ತೇಸಂ ಏಕೋಪಿ ನಿಹೀನಪಞ್ಞೋ ನ ಹೋತಿ, ಕಿಂಕಾರಣಾ? ದಿಟ್ಠೀ ಹಿ ತೇಸಮ್ಪಿ ತಥಾ ಸಮತ್ತಾ, ಯಥಾ ಇತರೇಸನ್ತಿ।
೧೧೭. ನ ವಾಹಮೇತನ್ತಿ ಗಾಥಾಯ ಸಙ್ಖೇಪತ್ಥೋ – ಯಂ ತೇ ಮಿಥು ದ್ವೇ ದ್ವೇ ಜನಾ ಅಞ್ಞಮಞ್ಞಂ ‘‘ಬಾಲೋ’’ತಿ ಆಹು, ಅಹಂ ಏತಂ ತಥಿಯನ್ತಿ ತಚ್ಛನ್ತಿ ನೇವ ಬ್ರೂಮಿ। ಕಿಂಕಾರಣಾ? ಯಸ್ಮಾ ಸಬ್ಬೇವ ತೇ ಸಕಂ ಸಕಂ ದಿಟ್ಠಿಂ ‘‘ಇದಮೇವ ಸಚ್ಚಂ ಮೋಘಮಞ್ಞ’’ನ್ತಿ ಅಕಂಸು, ತೇನ ಚ ಕಾರಣೇನ ಪರಂ ‘‘ಬಾಲೋ’’ತಿ ದಹನ್ತಿ। ಏತ್ಥ ಚ ತಥಿಯಂ, ತಥೇವನ್ತಿ (ಸು॰ ನಿ॰ ಅಟ್ಠ॰ ೨.೮೮೯) ದ್ವೇಪಿ ಪಾಠಾ।
ತಚ್ಛನ್ತಿ ಅತುಚ್ಛಂ। ತಥನ್ತಿ ಅವಿಪರೀತಂ, ಭೂತನ್ತಿ ಸನ್ತಂ। ಯಾಥಾವನ್ತಿ ಸಂವಿಜ್ಜಮಾನಂ। ಅವಿಪರಿತನ್ತಿ ನ ವಿಸಙ್ಕೇತಂ।
೧೧೮. ಯಮಾಹೂತಿ ಪುಚ್ಛಾಗಾಥಾಯ ‘‘ಯಂ ದಿಟ್ಠಿಸಚ್ಚಂ ತಥಿಯ’’ನ್ತಿ ಏಕೇ ಆಹು।
೧೧೯. ಏಕಞ್ಹಿ ಸಚ್ಚನ್ತಿ ವಿಸ್ಸಜ್ಜನಗಾಥಾಯ ಏಕಂ ಸಚ್ಚಂ ನಿರೋಧೋ ಮಗ್ಗೋ ವಾ। ಯಸ್ಮಿಂ ಪಜಾ ನೋ ವಿವದೇ ಪಜಾನನ್ತಿ ಯಮ್ಹಿ ಸಚ್ಚೇ ಪಜಾನನ್ತೋ ಪಜಾ ನೋ ವಿವದೇಯ್ಯುಂ। ಸಯಂ ಥುನನ್ತೀತಿ ಅತ್ತನಾ ವದನ್ತಿ।
೧೨೦. ಕಸ್ಮಾ ನೂತಿ ಪುಚ್ಛಾಗಾಥಾಯ ಪವಾದಿಯಾಸೇತಿ ವಾದಿನೋ। ಉದಾಹು ತೇ ತಕ್ಕಮನುಸ್ಸರನ್ತೀತಿ ತೇ ವಾದಿನೋ ಉದಾಹು ಅತ್ತನೋ ತಕ್ಕಮತ್ತಂ ಅನುಗಚ್ಛನ್ತಿ।
ತಕ್ಕಪರಿಯಾಹತನ್ತಿ ವಿತಕ್ಕೇನ ಸಮನ್ತತೋ ಆಹತಂ। ವೀಮಂಸಾನುಚರಿತನ್ತಿ ಅತ್ತನೋ ಉಪಟ್ಠಿತಪಞ್ಞಾಯ ವಿಚರಿತಂ। ಸಯಂಪಟಿಭಾನನ್ತಿ ಅತ್ತನೋ ಪಟಿಭಾನಂ।
೧೨೧. ನ ಹೇವಾತಿ ವಿಸ್ಸಜ್ಜನಗಾಥಾಯ ಅಞ್ಞತ್ರ ಸಞ್ಞಾಯ ನಿಚ್ಚಾನೀತಿ ಠಪೇತ್ವಾ ಸಞ್ಞಾಮತ್ತೇನ ನಿಚ್ಚನ್ತಿ ಗಹಿತಗ್ಗಹಣಾನಿ। ತಕ್ಕಞ್ಚ ದಿಟ್ಠೀಸು ಪಕಪ್ಪಯಿತ್ವಾತಿ ಅತ್ತನೋ ನಿಚ್ಚಸಙ್ಕಪ್ಪಮತ್ತಂ ದಿಟ್ಠೀಸು ಜನೇತ್ವಾ।
ಯಸ್ಮಾ ಜನೇನ್ತೀತಿ ಉಪರೂಪರಿ ದಿಟ್ಠಿಂ ಉಪ್ಪಾದೇನ್ತಾ ಜನೇನ್ತಿ। ಸಞ್ಜನೇನ್ತೀತಿಆದೀನಿ ಉಪಸಗ್ಗವಸೇನ ಪದಂ ವಡ್ಢೇತ್ವಾ ವುತ್ತಾನಿ। ಮಯ್ಹಂ ಸಚ್ಚನ್ತಿ ಮಮ ವಚನಂ ತಚ್ಛಂ।
೧೨೨. ಇದಾನಿ ‘‘ದಿಟ್ಠೇ ಸುತೇ’’ತಿಆದಿಕಾ ಗಾಥಾಯೋ ಅಭಾಸಿ। ತತ್ಥ ದಿಟ್ಠೇತಿ ದಿಟ್ಠಂ, ದಿಟ್ಠಸುದ್ಧಿನ್ತಿ ಅಧಿಪ್ಪಾಯೋ। ಏಸ ನಯೋ ಸುತಾದೀಸು। ಏತೇ ಚ ನಿಸ್ಸಾಯ ವಿಮಾನದಸ್ಸೀತಿ ಏತೇ ದಿಟ್ಠಿಧಮ್ಮೇ ನಿಸ್ಸಯಿತ್ವಾ ಸುದ್ಧಿಭಾವಸಙ್ಖಾತಂ ವಿಮಾನಂ ಅಸಮ್ಮಾನಂ ಪಸ್ಸನ್ತೋಪಿ। ವಿನಿಚ್ಛಯೇ ಠತ್ವಾ ಪಹಸ್ಸಮಾನೋ, ಬಾಲೋ ಪರೋ ಅಕ್ಕುಸಲೋತಿ ಚಾಹಾತಿ ಏವಂ ವಿಮಾನದಸ್ಸೀಪಿ ತಸ್ಮಿಂ ದಿಟ್ಠಿವಿನಿಚ್ಛಯೇ ಠತ್ವಾ ತುಟ್ಠಿಜಾತೋ ಹಾಸಜಾತೋ ಹುತ್ವಾ ಪರೋ ‘‘ಹೀನೋ ಚ ಅವಿದ್ವಾ ಚಾ’’ತಿ ಏವಂ ವದತಿಯೇವ।
ನ ಸಮ್ಮಾನೇತೀತಿಪಿ ವಿಮಾನದಸ್ಸೀತಿ ನ ಬಹುಮಾನಂ ಕರೋತೀತಿ ಏವಮ್ಪಿ ವಿಮಾನದಸ್ಸೀ ನ ಬಹುಮಾನದಸ್ಸೀ। ದೋಮನಸ್ಸಂ ಜನೇತೀತಿ ಪಠಮಂ ದಿಟ್ಠಿನಿಸ್ಸಯಂ ಅಲ್ಲೀಯಿತ್ವಾ ದೋಮನಸ್ಸಂ ಪತ್ವಾ ಪಚ್ಛಾ ದಿಟ್ಠಿವಿನಿಚ್ಛಯೇ ಠಿತಕಾಲೇ ಸೋಮನಸ್ಸಂ ಉಪ್ಪಾದೇತೀತಿ ಅತ್ಥೋ।
ವಿನಿಚ್ಛಯದಿಟ್ಠಿಯಾ ಠತ್ವಾತಿ ಸನ್ನಿಟ್ಠಾನಂ ಕತ್ವಾ ಗಹಿತದಿಟ್ಠಿಯಾ ಠತ್ವಾ।
೧೨೩. ಏವಂ ಸನ್ತೇ ಯೇನೇವಾತಿ ಗಾಥಾ। ತತ್ಥ ಸಯಮತ್ತನಾತಿ ಸಯಮೇವ ಅತ್ತಾನಂ। ವಿಮಾನೇತೀತಿ ಗರಹತಿ। ತದೇವ ಪಾವಾತಿ ತದೇವ ವಚನಂ ದಿಟ್ಠಿಂ ವದತಿ, ತಂ ವಾ ಪುಗ್ಗಲಂ।
೧೨೪. ಅತಿಸಾರದಿಟ್ಠಿಯಾತಿ ಗಾಥಾಯತ್ಥೋ – ಸೋ ಏವಂ ತಾಯ ಲಕ್ಖಣಾತಿಸಾರಿನಿಯಾ ಅತಿಸಾರದಿಟ್ಠಿಯಾ ಸಮತ್ತೋ ಪರಿಪುಣ್ಣೋ ಉದ್ಧುಮಾತೋ, ತೇನ ಚ ದಿಟ್ಠಿಮಾನೇನ ಮತ್ತೋ ‘‘ಪರಿಪುಣ್ಣೋ ಪರಿಪುಣ್ಣಮಾನೀ। ಸಯಮೇವ ಅತ್ತಾನಂ ಮನಸಾ ‘‘ಅಹಂ ಪಣ್ಡಿತೋ’’ತಿ ಅಭಿಸಿಞ್ಚತಿ। ಕಿಂಕಾರಣಾ? ದಿಟ್ಠೀ ಹಿ ಸಾ ತಸ್ಸ ತಥಾ ಸಮತ್ತಾತಿ।
ಸಬ್ಬಾ ತಾ ದಿಟ್ಠಿಯೋ ಲಕ್ಖಣಾತಿಕ್ಕನ್ತಾತಿ ತಾ ಸಬ್ಬಾ ದ್ವಾಸಟ್ಠಿದಿಟ್ಠಿಯೋ ಲಕ್ಖಣಂ ಅತೀತಾ ಅತಿಸರನ್ತೀತಿ ಅತಿಕ್ಕನ್ತಾ। ಅನೋಮೋತಿ ಅನೂನೋ।
೧೨೫. ಪರಸ್ಸ ಚೇತಿ ಗಾಥಾಯ ಸಮ್ಬನ್ಧೋ ಅತ್ಥೋ ಚ – ಕಿಞ್ಚ ಭಿಯ್ಯೋ? ಯೋ ಸೋ ವಿನಿಚ್ಛಯೇ ಠತ್ವಾ ಪಹಸ್ಸಮಾನೋ ‘‘ಬಾಲೋ ಪರೋ ಅಕ್ಕುಸಲೋ’’ತಿ ಚಾಹ, ತಸ್ಸ ಪರಸ್ಸ ಚೇ ಹಿ ವಚಸಾ ಸೋ ತೇನ ವುಚ್ಚಮಾನೋ ನಿಹೀನೋ ಹೋತಿ, ತುಮೋ ಸಹಾ ಹೋತಿ ನಿಹೀನಪಞ್ಞೋ, ಸೋಪಿ ತೇನೇವ ಸಹ ನಿಹೀನಪಞ್ಞೋ ಹೋತಿ। ಸೋಪಿ ಹಿ ತಂ ‘‘ಬಾಲೋ’’ತಿ ವದತಿ। ಅಥ ತಸ್ಸ ಸಯಮೇವ ವೇದಗೂ ಚ ಧೀರೋ ಚ ಹೋತಿ। ಏವಂ ಸನ್ತೇ ನ ಕೋಚಿ ಬಾಲೋ ಸಮಣೇಸು ಅತ್ಥಿ। ಸಬ್ಬೇಪಿ ಹಿ ತೇ ಅತ್ತನೋ ಇಚ್ಛಾಯ ಪಣ್ಡಿತಾ।
ವಾಚಾಯಾತಿ ಕಥನೇನ। ವಚನೇನಾತಿ ಭಾಸಿತೇನ। ನಿನ್ದಿತಕಾರಣಾತಿ ಗರಹಹೇತುನಾ। ಗರಹಿತಕಾರಣಾತಿ ಅವಞ್ಞಾತಹೇತುನಾ। ಉಪವದಿತಕಾರಣಾತಿ ಉಪವಾದಹೇತುನಾ।
೧೨೬. ಅಞ್ಞಂ ಇತೋತಿ ಗಾಥಾಯ ಸಮ್ಬನ್ಧೋ ಅತ್ಥೋ ಚ – ‘‘ಅಥ ಚೇ ಸಯಂ ವೇದಗೂ ಹೋತಿ ಧೀರೋ। ನ ಕೋಚಿ ಬಾಲೋ ಸಮಣೇಸು ಅತ್ಥೀ’’ತಿ ಏವಞ್ಹಿ ವುತ್ತೇಪಿ ಸಿಯಾ ಕಸ್ಸಚಿ ‘‘ಕಸ್ಮಾ’’ತಿ। ತತ್ಥ ವುಚ್ಚತೇ – ಯಸ್ಮಾ ಅಞ್ಞಂ ಇತೋ ಯಾಭಿವದನ್ತಿ ಧಮ್ಮಂ, ಅಪರದ್ಧಾ ಸುದ್ಧಿಮಕೇವಲೀ ತೇ। ಏವಮ್ಪಿ ತಿತ್ಥ್ಯಾ ಪುಥುಸೋ ವದನ್ತಿ, ಯೇ ಇತೋ ಅಞ್ಞಂ ದಿಟ್ಠಿಂ ಅಭಿವದನ್ತಿ, ತೇ ಅಪರದ್ಧಾ ವಿರದ್ಧಾ ಸುದ್ಧಿಮಗ್ಗಂ, ಅಕೇವಲಿನೋ ಚ ತೇತಿ ಏವಂ ಪುಥುತಿತ್ಥಿಯಾ ಯಸ್ಮಾ ವದನ್ತೀತಿ ವುತ್ತಂ ಹೋತಿ। ಕಸ್ಮಾ ಪನೇವಂ ವದನ್ತೀತಿ ಚೇ? ಸನ್ದಿಟ್ಠಿರಾಗೇನ ಹಿ ತೇಭಿರತ್ತಾ, ಯಸ್ಮಾ ಸಕೇನ ದಿಟ್ಠಿರಾಗೇನ ತೇ ಅಭಿರತ್ತಾತಿ ವುತ್ತಂ ಹೋತಿ।
ತೇ ಸುದ್ಧಿಮಗ್ಗನ್ತಿ ತೇ ಅಞ್ಞತಿತ್ಥಿಯಾ ಅಕಿಲಿಟ್ಠಮಗ್ಗಂ। ವಿಸುದ್ಧಿಮಗ್ಗನ್ತಿ ನಿದ್ದೋಸಮಗ್ಗಂ। ಪರಿಸುದ್ಧಿಮಗ್ಗನ್ತಿ ಸುಕ್ಕಮಗ್ಗಂ। ವೋದಾತಮಗ್ಗನ್ತಿ ಪಣ್ಡರಮಗ್ಗಂ। ಪರಿಯೋದಾತಮಗ್ಗನ್ತಿ ಪಭಾವನ್ತಮಗ್ಗಂ। ವಿರದ್ಧಾತಿ ವುತ್ತವಿಧಿನಾ ಮಗ್ಗೇನ ವಿರಜ್ಝಿತ್ವಾ ಠಿತಾ। ಅಪರದ್ಧಾತಿ ಅಪರಜ್ಝಿತ್ವಾ ಠಿತಾ। ಖಲಿತಾತಿ ಗಲಿತಾತಿ ತತೋ ಭಟ್ಠಾ। ಅಞ್ಞಾಯಾತಿ ಅಞ್ಞಾಣೇನ। ಅಪರದ್ಧಾತಿ ಪರಾಜಯಮಾಪನ್ನಾ। ಅಥ ವಾ ‘‘ಞಾಯಾಪರದ್ಧಾ’’ತಿಪಿ ಪಾಠೋ। ಞಾಯೇನ ಮಗ್ಗೇನ ವಿರದ್ಧಾತಿ ಅತ್ಥೋ।
೧೨೭. ಏವಂ ಅಭಿರತ್ತಾ ಚ – ಇಧೇವ ಸುದ್ಧಿನ್ತಿ ಗಾಥಾ। ತತ್ಥ ಸಕಾಯನೇತಿ ಸಕಮಗ್ಗೇ। ದಳ್ಹಂ ವದಾನಾತಿ ದಳ್ಹವಾದಾ।
ಥಿರವಾದಾತಿ ಸನ್ನಿಟ್ಠಾನವಾದಾ। ಬಲಿಕವಾದಾತಿ ಬಲವನ್ತವಾದಾ। ಅವಟ್ಠಿತವಾದಾತಿ ಪತಿಟ್ಠಹಿತ್ವಾ ಕಥಿತವಾದಾ।
೧೨೮. ಯೇ ಏವಞ್ಚ ದಳ್ಹವಾದಾ, ತೇಸು ಯೋ ಕೋಚಿ ತಿತ್ಥಿಯೋ ಸಕಾಯನೇ ವಾಪಿ ದಳ್ಹಂ ವದಾನೋ ಕಮೇತ್ಥ ಬಾಲೋತಿ ಪರಂ ದಹೇಯ್ಯ, ಸಙ್ಖೇಪತೋ ತತ್ಥ ಸಸ್ಸತುಚ್ಛೇದಸಙ್ಖಾತೇ ವಿತ್ಥಾರತೋ ನತ್ಥಿಕಇಸ್ಸರಕಾರಕನಿಯತಿಆದಿಭೇದೇ ಸಕೇ ಅಯನೇ ‘‘ಇದಮೇವ ಸಚ್ಚ’’ನ್ತಿ ದಳ್ಹಂ ವದಾನೋ ಕಂ ಪರಂ ಏತ್ಥ ದಿಟ್ಠಿಗತೇ ಸಯಮೇವ ಸೋ ಮೇಧಗಮಾವಹೇಯ್ಯ, ಪರಂ ವದಂ ಬಾಲಮಸುದ್ಧಿಧಮ್ಮಂ। ಸೋಪಿ ಪರಂ ‘‘ಬಾಲೋ ಚ ಅಸುದ್ಧಿಧಮ್ಮೋ ಚ ಅಯ’’ನ್ತಿ ವದನ್ತೋ ಅತ್ತನಾವ ಕಲಹಂ ಆವಹೇಯ್ಯ। ಕಸ್ಮಾ? ಯಸ್ಮಾ ಸಬ್ಬೋಪಿ ತಸ್ಸ ಮತೇನ ಪಣ್ಡಿತೋಯೇವ ಸುಪ್ಪಟಿಪನ್ನೋಯೇವ ಚ।
೧೨೯. ಏವಂ ಸಬ್ಬಥಾಪಿ ವಿನಿಚ್ಛಯೇ ಠತ್ವಾ ಸಯಂ ಪಮಾಯ, ಉದ್ಧಂ ಸ ಲೋಕಸ್ಮಿಂ ವಿವಾದಮೇತೀತಿ ದಿಟ್ಠಿಯಾ ಠತ್ವಾ ಸಯಞ್ಚ ಸತ್ಥಾರಾದಿಂ ಮಿನಿತ್ವಾ ಸೋ ಭಿಯ್ಯೋ ವಿವಾದಮೇತೀತಿ। ಏವಂ ಪನ ವಿನಿಚ್ಛಯೇಸು ಆದೀನವಂ ಞತ್ವಾ ಅರಿಯಮಗ್ಗೇನ ಹಿತ್ವಾನ ಸಬ್ಬಾನಿ ವಿನಿಚ್ಛಯಾನಿ, ನ ಮೇಧಗಂ ಕುಬ್ಬತಿ ಜನ್ತು ಲೋಕೇತಿ ಅರಹತ್ತನಿಕೂಟೇನ ದೇಸನಂ ನಿಟ್ಠಾಪೇಸಿ।
ಸಯಂ ಪಮಾಯಾತಿ ಅತ್ತನಾ ಮಿನಿತ್ವಾ। ಪಮಿನಿತ್ವಾತಿ ಪಮಾಣಂ ಕತ್ವಾ। ‘‘ಪವಿನೇತ್ವಾ’’ತಿಪಿ ಪಾಠೋ, ತಂ ನ ಸುನ್ದರಂ। ಉದ್ಧಂ ವಾದೇನ ಸದ್ಧಿನ್ತಿ ಅತ್ತನೋ ಉಪರಿ ಕಥೇನ್ತೇನ ಸಹ। ದೇಸನಾಪರಿಯೋಸಾನೇ ಪುರಾಭೇದಸುತ್ತೇ (ಮಹಾನಿ॰ ೮೩) ವುತ್ತಸದಿಸೋ ಏವ ಅಭಿಸಮಯೋ ಅಹೋಸೀತಿ।
ಸದ್ಧಮ್ಮಪ್ಪಜ್ಜೋತಿಕಾಯ ಮಹಾನಿದ್ದೇಸಟ್ಠಕಥಾಯ
ಚೂಳಬ್ಯೂಹಸುತ್ತನಿದ್ದೇಸವಣ್ಣನಾ ನಿಟ್ಠಿತಾ।