ಚೋದನಾಕಣ್ಡಂ
೧. ಅನುವಿಜ್ಜಕಅನುಯೋಗೋ
೩೬೦. ಅನುವಿಜ್ಜಕೇ ಚೋದಕೋ ಪುಚ್ಛಿತಬ್ಬೋ – ‘‘ಯಂ ಖೋ ತ್ವಂ, ಆವುಸೋ, ಇಮಂ ಭಿಕ್ಖುಂ ಚೋದೇಸಿ, ಕಿಮ್ಹಿ ನಂ ಚೋದೇಸಿ, ಸೀಲವಿಪತ್ತಿಯಾ ವಾ ಚೋದೇಸಿ, ಆಚಾರವಿಪತ್ತಿಯಾ ವಾ ಚೋದೇಸಿ, ದಿಟ್ಠಿವಿಪತ್ತಿಯಾ ವಾ ಚೋದೇಸೀ’’ತಿ? ಸೋ ಚೇ ಏವಂ ವದೇಯ್ಯ – ‘‘ಸೀಲವಿಪತ್ತಿಯಾ ವಾ ಚೋದೇಮಿ, ಆಚಾರವಿಪತ್ತಿಯಾ ವಾ ಚೋದೇಮಿ, ದಿಟ್ಠಿವಿಪತ್ತಿಯಾ ವಾ ಚೋದೇಮೀ’’ತಿ, ಸೋ ಏವಮಸ್ಸ ವಚನೀಯೋ – ‘‘ಜಾನಾಸಿ ಪನಾಯಸ್ಮಾ ಸೀಲವಿಪತ್ತಿಂ, ಜಾನಾಸಿ ಆಚಾರವಿಪತ್ತಿಂ, ಜಾನಾಸಿ ದಿಟ್ಠಿವಿಪತ್ತಿ’’ನ್ತಿ? ಸೋ ಚೇ ಏವಂ ವದೇಯ್ಯ – ‘‘ಜಾನಾಮಿ ಖೋ ಅಹಂ, ಆವುಸೋ, ಸೀಲವಿಪತ್ತಿಂ, ಜಾನಾಮಿ ಆಚಾರವಿಪತ್ತಿಂ, ಜಾನಾಮಿ ದಿಟ್ಠಿವಿಪತ್ತಿ’’ನ್ತಿ, ಸೋ ಏವಮಸ್ಸ ವಚನೀಯೋ – ‘‘ಕತಮಾ ಪನಾವುಸೋ, ಸೀಲವಿಪತ್ತಿ? ಕತಮಾ ಆಚಾರವಿಪತ್ತಿ? ಕತಮಾ ದಿಟ್ಠಿವಿಪತ್ತೀ’’ತಿ? ಸೋ ಚೇ ಏವಂ ವದೇಯ್ಯ – ‘‘ಚತ್ತಾರಿ ಚ ಪಾರಾಜಿಕಾನಿ, ತೇರಸ ಚ ಸಙ್ಘಾದಿಸೇಸಾ – ಅಯಂ ಸೀಲವಿಪತ್ತಿ। ಥುಲ್ಲಚ್ಚಯಂ, ಪಾಚಿತ್ತಿಯಂ, ಪಾಟಿದೇಸನೀಯಂ, ದುಕ್ಕಟಂ, ದುಬ್ಭಾಸಿತಂ, ಅಯಂ ಆಚಾರವಿಪತ್ತಿ। ಮಿಚ್ಛಾದಿಟ್ಠಿ, ಅನ್ತಗ್ಗಾಹಿಕಾ ದಿಟ್ಠಿ – ಅಯಂ ದಿಟ್ಠಿವಿಪತ್ತೀ’’ತಿ, ಸೋ ಏವಮಸ್ಸ ವಚನೀಯೋ – ‘‘ಯಂ ಖೋ ತ್ವಂ, ಆವುಸೋ, ಇಮಂ ಭಿಕ್ಖುಂ ಚೋದೇಸಿ, ದಿಟ್ಠೇನ ವಾ ಚೋದೇಸಿ ಸುತೇನ ವಾ ಚೋದೇಸಿ ಪರಿಸಙ್ಕಾಯ ವಾ ಚೋದೇಸೀ’’ತಿ? ಸೋ ಚೇ ಏವಂ ವದೇಯ್ಯ – ‘‘ದಿಟ್ಠೇನ ವಾ ಚೋದೇಮಿ ಸುತೇನ ವಾ ಚೋದೇಮಿ ಪರಿಸಙ್ಕಾಯ ವಾ ಚೋದೇಮೀ’’ತಿ, ಸೋ ಏವಮಸ್ಸ ವಚನೀಯೋ – ‘‘ಯಂ ಖೋ ತ್ವಂ, ಆವುಸೋ, ಇಮಂ ಭಿಕ್ಖುಂ ದಿಟ್ಠೇನ ಚೋದೇಸಿ, ಕಿಂ ತೇ ದಿಟ್ಠಂ ಕಿನ್ತಿ ತೇ ದಿಟ್ಠಂ, ಕದಾ ತೇ ದಿಟ್ಠಂ, ಕತ್ಥ ತೇ ದಿಟ್ಠಂ ಪಾರಾಜಿಕಂ ಅಜ್ಝಾಪಜ್ಜನ್ತೋ ದಿಟ್ಠೋ, ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತೋ ದಿಟ್ಠೋ, ಥುಲ್ಲಚ್ಚಯಂ… ಪಾಚಿತ್ತಿಯಂ… ಪಾಟಿದೇಸನೀಯಂ… ದುಕ್ಕಟಂ… ದುಬ್ಭಾಸಿತಂ ಅಜ್ಝಾಪಜ್ಜನ್ತೋ ದಿಟ್ಠೋ, ಕತ್ಥ ಚ ತ್ವಂ ಅಹೋಸಿ, ಕತ್ಥ ಚಾಯಂ ಭಿಕ್ಖು ಅಹೋಸಿ, ಕಿಞ್ಚ ತ್ವಂ ಕರೋಸಿ, ಕಿಂ ಚಾಯಂ ಭಿಕ್ಖು ಕರೋತೀ’’ತಿ? ಸೋ ಚೇ ಏವಂ ವದೇಯ್ಯ – ‘‘ನ ಖೋ ಅಹಂ, ಆವುಸೋ, ಇಮಂ ಭಿಕ್ಖುಂ ದಿಟ್ಠೇನ ಚೋದೇಮಿ, ಅಪಿ ಚ ಸುತೇನ ಚೋದೇಮೀ’’ತಿ, ಸೋ ಏವಮಸ್ಸ ವಚನೀಯೋ – ‘‘ಯಂ ಖೋ ತ್ವಂ, ಆವುಸೋ, ಇಮಂ ಭಿಕ್ಖುಂ ಸುತೇನ ಚೋದೇಸಿ, ಕಿಂ ತೇ ಸುತಂ, ಕಿನ್ತಿ ತೇ ಸುತಂ, ಕದಾ ತೇ ಸುತಂ , ಕತ್ಥ ತೇ ಸುತಂ, ಪಾರಾಜಿಕಂ ಅಜ್ಝಾಪನ್ನೋತಿ ಸುತಂ, ಸಙ್ಘಾದಿಸೇಸಂ… ಥುಲ್ಲಚ್ಚಯಂ… ಪಾಚಿತ್ತಿಯಂ… ಪಾಟಿದೇಸನೀಯಂ… ದುಕ್ಕಟಂ… ದುಬ್ಭಾಸಿತಂ ಅಜ್ಝಾಪನ್ನೋತಿ ಸುತಂ, ಭಿಕ್ಖುಸ್ಸ ಸುತಂ, ಭಿಕ್ಖುನಿಯಾ ಸುತಂ, ಸಿಕ್ಖಮಾನಾಯ ಸುತಂ , ಸಾಮಣೇರಸ್ಸ ಸುತಂ, ಸಾಮಣೇರಿಯಾ ಸುತಂ, ಉಪಾಸಕಸ್ಸ ಸುತಂ, ಉಪಾಸಿಕಾಯ ಸುತಂ, ರಾಜೂನಂ ಸುತಂ, ರಾಜಮಹಾಮತ್ತಾನಂ ಸುತಂ, ತಿತ್ಥಿಯಾನಂ ಸುತಂ, ತಿತ್ಥಿಯಸಾವಕಾನಂ ಸುತ’’ನ್ತಿ? ಸೋ ಚೇ ಏವಂ ವದೇಯ್ಯ – ‘‘ನ ಖೋ ಅಹಂ, ಆವುಸೋ, ಇಮಂ ಭಿಕ್ಖುಂ ಸುತೇನ ಚೋದೇಮಿ, ಅಪಿ ಚ ಪರಿಸಙ್ಕಾಯ ಚೋದೇಮೀ’’ತಿ, ಸೋ ಏವಮಸ್ಸ ವಚನೀಯೋ – ‘‘ಯಂ ಖೋ ತ್ವಂ, ಆವುಸೋ, ಇಮಂ ಭಿಕ್ಖುಂ ಪರಿಸಙ್ಕಾಯ ಚೋದೇಸಿ, ಕಿಂ ಪರಿಸಙ್ಕಸಿ, ಕಿನ್ತಿ ಪರಿಸಙ್ಕಸಿ, ಕದಾ ಪರಿಸಙ್ಕಸಿ, ಕತ್ಥ ಪರಿಸಙ್ಕಸಿ, ಪಾರಾಜಿಕಂ ಅಜ್ಝಾಪನ್ನೋತಿ ಪರಿಸಙ್ಕಸಿ, ಸಙ್ಘಾದಿಸೇಸಂ ಅಜ್ಝಾಪನ್ನೋತಿ ಪರಿಸಙ್ಕಸಿ, ಥುಲ್ಲಚ್ಚಯಂ… ಪಾಚಿತ್ತಿಯಂ… ಪಾಟಿದೇಸನೀಯಂ… ದುಕ್ಕಟಂ… ದುಬ್ಭಾಸಿತಂ ಅಜ್ಝಾಪನ್ನೋತಿ ಪರಿಸಙ್ಕಸಿ, ಭಿಕ್ಖುಸ್ಸ ಸುತ್ವಾ ಪರಿಸಙ್ಕಸಿ, ಭಿಕ್ಖುನಿಯಾ ಸುತ್ವಾ ಪರಿಸಙ್ಕಸಿ, ಸಿಕ್ಖಮಾನಾಯ ಸುತ್ವಾ ಪರಿಸಙ್ಕಸಿ, ಸಾಮಣೇರಸ್ಸ ಸುತ್ವಾ ಪರಿಸಙ್ಕಸಿ, ಸಾಮಣೇರಿಯಾ ಸುತ್ವಾ ಪರಿಸಙ್ಕಸಿ, ಉಪಾಸಕಸ್ಸ ಸುತ್ವಾ ಪರಿಸಙ್ಕಸಿ, ಉಪಾಸಿಕಾಯ ಸುತ್ವಾ ಪರಿಸಙ್ಕಸಿ, ರಾಜೂನಂ ಸುತ್ವಾ ಪರಿಸಙ್ಕಸಿ, ರಾಜಮಹಾಮತ್ತಾನಂ ಸುತ್ವಾ ಪರಿಸಙ್ಕಸಿ, ತಿತ್ಥಿಯಾನಂ ಸುತ್ವಾ ಪರಿಸಙ್ಕಸಿ, ತಿತ್ಥಿಯಸಾವಕಾನಂ ಸುತ್ವಾ ಪರಿಸಙ್ಕಸೀ’’ತಿ?
೩೬೧.
ದಿಟ್ಠಂ ದಿಟ್ಠೇನ ಸಮೇತಿ ದಿಟ್ಠೇನ ಸಂಸನ್ದತೇ ದಿಟ್ಠಂ।
ದಿಟ್ಠಂ ಪಟಿಚ್ಚ ನ ಉಪೇತಿ ಅಸುದ್ಧಪರಿಸಙ್ಕಿತೋ।
ಸೋ ಪುಗ್ಗಲೋ ಪಟಿಞ್ಞಾಯ ಕಾತಬ್ಬೋ ತೇನುಪೋಸಥೋ॥
ಸುತಂ ಸುತೇನ ಸಮೇತಿ ಸುತೇನ ಸಂಸನ್ದತೇ ಸುತಂ।
ಸುತಂ ಪಟಿಚ್ಚ ನ ಉಪೇತಿ ಅಸುದ್ಧಪರಿಸಙ್ಕಿತೋ।
ಸೋ ಪುಗ್ಗಲೋ ಪಟಿಞ್ಞಾಯ ಕಾತಬ್ಬೋ ತೇನುಪೋಸಥೋ॥
ಮುತಂ ಮುತೇನ ಸಮೇತಿ ಮುತೇನ ಸಂಸನ್ದತೇ ಮುತಂ।
ಮುತಂ ಪಟಿಚ್ಚ ನ ಉಪೇತಿ ಅಸುದ್ಧಪರಿಸಙ್ಕಿತೋ।
ಸೋ ಪುಗ್ಗಲೋ ಪಟಿಞ್ಞಾಯ ಕಾತಬ್ಬೋ ತೇನುಪೋಸಥೋ॥
೩೬೨. ಚೋದನಾಯ ಕೋ ಆದಿ, ಕಿಂ ಮಜ್ಝೇ, ಕಿಂ ಪರಿಯೋಸಾನಂ? ಚೋದನಾಯ ಓಕಾಸಕಮ್ಮಂ ಆದಿ, ಕಿರಿಯಾ ಮಜ್ಝೇ, ಸಮಥೋ ಪರಿಯೋಸಾನಂ। ಚೋದನಾಯ ಕತಿ ಮೂಲಾನಿ, ಕತಿ ವತ್ಥೂನಿ, ಕತಿ ಭೂಮಿಯೋ, ಕತಿಹಾಕಾರೇಹಿ ಚೋದೇತಿ? ಚೋದನಾಯ ದ್ವೇ ಮೂಲಾನಿ, ತೀಣಿ ವತ್ಥೂನಿ, ಪಞ್ಚ ಭೂಮಿಯೋ, ದ್ವೀಹಾಕಾರೇಹಿ ಚೋದೇತಿ। ಚೋದನಾಯ ಕತಮಾನಿ ದ್ವೇ ಮೂಲಾನಿ? ಸಮೂಲಿಕಾ ವಾ ಅಮೂಲಿಕಾ ವಾ – ಚೋದನಾಯ ಇಮಾನಿ ದ್ವೇ ಮೂಲಾನಿ। ಚೋದನಾಯ ಕತಮಾನಿ ತೀಣಿ ವತ್ಥೂನಿ? ದಿಟ್ಠೇನ ಸುತೇನ ಪರಿಸಙ್ಕಾಯ – ಚೋದನಾಯ ಇಮಾನಿ ತೀಣಿ ವತ್ಥೂನಿ। ಚೋದನಾ ಕತಮಾ ಪಞ್ಚ ಭೂಮಿಯೋ? ಕಾಲೇನ ವಕ್ಖಾಮಿ ನೋ ಅಕಾಲೇನ, ಭೂತೇನ ವಕ್ಖಾಮಿ ನೋ ಅಭೂತೇನ, ಸಣ್ಹೇನ ವಕ್ಖಾಮಿ ನೋ ಫರುಸೇನ, ಅತ್ಥಸಂಹಿತೇನ ವಕ್ಖಾಮಿ ನೋ ಅನತ್ಥಸಂಹಿತೇನ, ಮೇತ್ತಾಚಿತ್ತೋ ವಕ್ಖಾಮಿ ನೋ ದೋಸನ್ತರೋತಿ – ಚೋದನಾಯ ಇಮಾ ಪಞ್ಚ ಭೂಮಿಯೋ।
ಕತಮೇಹಿ ದ್ವೀಹಾಕಾರೇಹಿ ಚೋದೇತಿ? ಕಾಯೇನ ವಾ ಚೋದೇತಿ ವಾಚಾಯ ವಾ ಚೋದೇತಿ – ಇಮೇಹಿ ದ್ವೀಹಾಕಾರೇಹಿ ಚೋದೇತಿ।
೨. ಚೋದಕಾದಿಪಟಿಪತ್ತಿ
೩೬೩. ಚೋದಕೇನ ಕಥಂ ಪಟಿಪಜ್ಜಿತಬ್ಬಂ? ಚುದಿತಕೇನ ಕಥಂ ಪಟಿಪಜ್ಜಿತಬ್ಬಂ? ಸಙ್ಘೇನ ಕಥಂ ಪಟಿಪಜ್ಜಿತಬ್ಬಂ? ಅನುವಿಜ್ಜಕೇನ ಕಥಂ ಪಟಿಪಜ್ಜಿತಬ್ಬಂ? ಚೋದಕೇನ ಕಥಂ ಪಟಿಪಜ್ಜಿತಬ್ಬನ್ತಿ? ಚೋದಕೇನ ಪಞ್ಚಸು ಧಮ್ಮೇಸು ಪತಿಟ್ಠಾಯ ಪರೋ ಚೋದೇತಬ್ಬೋ। ಕಾಲೇನ ವಕ್ಖಾಮಿ ನೋ ಅಕಾಲೇನ, ಭೂತೇನ ವಕ್ಖಾಮಿ ನೋ ಅಭೂತೇನ, ಸಣ್ಹೇನ ವಕ್ಖಾಮಿ ನೋ ಫರುಸೇನ, ಅತ್ಥಸಂಹಿತೇನ ವಕ್ಖಾಮಿ ನೋ ಅನತ್ಥಸಂಹಿತೇನ, ಮೇತ್ತಾಚಿತ್ತೋ ವಕ್ಖಾಮಿ ನೋ ದೋಸನ್ತರೋತಿ – ಚೋದಕೇನ ಏವಂ ಪಟಿಪಜ್ಜಿತಬ್ಬಂ। ಚುದಿತಕೇನ ಕಥಂ ಪಟಿಪಜ್ಜಿತಬ್ಬನ್ತಿ? ಚುದಿತಕೇನ ದ್ವೀಸು ಧಮ್ಮೇಸು ಪಟಿಪಜ್ಜಿತಬ್ಬಂ। ಸಚ್ಚೇ ಚ ಅಕುಪ್ಪೇ ಚ – ಚುದಿತಕೇನ ಏವಂ ಪಟಿಪಜ್ಜಿತಬ್ಬಂ। ಸಙ್ಘೇನ ಕಥಂ ಪಟಿಪಜ್ಜಿತಬ್ಬನ್ತಿ? ಸಙ್ಘೇನ ಓತಿಣ್ಣಾನೋತಿಣ್ಣಂ ಜಾನಿತಬ್ಬಂ। ಸಙ್ಘೇನ ಏವಂ ಪಟಿಪಜ್ಜಿತಬ್ಬಂ। ಅನುವಿಜ್ಜಕೇನ ಕಥಂ ಪಟಿಪಜ್ಜಿತಬ್ಬನ್ತಿ? ಅನುವಿಜ್ಜಕೇನ ಯೇನ ಧಮ್ಮೇನ ಯೇನ ವಿನಯೇನ ಯೇನ ಸತ್ಥುಸಾಸನೇನ ತಂ ಅಧಿಕರಣಂ ವೂಪಸಮ್ಮತಿ ತಥಾ ತಂ ಅಧಿಕರಣಂ ವೂಪಸಮೇತಬ್ಬಂ। ಅನುವಿಜ್ಜಕೇನ ಏವಂ ಪಟಿಪಜ್ಜಿತಬ್ಬಂ।
೩೬೪.
ಉಪೋಸಥೋ ಕಿಮತ್ಥಾಯ, ಪವಾರಣಾ ಕಿಸ್ಸ ಕಾರಣಾ।
ಪರಿವಾಸೋ ಕಿಮತ್ಥಾಯ, ಮೂಲಾಯಪಟಿಕಸ್ಸನಾ ಕಿಸ್ಸ ಕಾರಣಾ।
ಮಾನತ್ತಂ ಕಿಮತ್ಥಾಯ, ಅಬ್ಭಾನಂ ಕಿಸ್ಸ ಕಾರಣಾ॥
ಉಪೋಸಥೋ ಸಾಮಗ್ಗತ್ಥಾಯ, ವಿಸುದ್ಧತ್ಥಾಯ ಪವಾರಣಾ।
ಪರಿವಾಸೋ ಮಾನತ್ತತ್ಥಾಯ, ಮೂಲಾಯಪಟಿಕಸ್ಸನಾ ನಿಗ್ಗಹತ್ಥಾಯ।
ಮಾನತ್ತಂ ಅಬ್ಭಾನತ್ಥಾಯ, ವಿಸುದ್ಧತ್ಥಾಯ ಅಬ್ಭಾನಂ॥
ಛನ್ದಾ ದೋಸಾ ಭಯಾ ಮೋಹಾ, ಥೇರೇ ಚ ಪರಿಭಾಸತಿ।
ಕಾಯಸ್ಸ ಭೇದಾ ದುಪ್ಪಞ್ಞೋ, ಖತೋ ಉಪಹತಿನ್ದ್ರಿಯೋ।
ನಿರಯಂ ಗಚ್ಛತಿ ದುಮ್ಮೇಧೋ, ನ ಚ ಸಿಕ್ಖಾಯ ಗಾರವೋ॥
ನ ಚ ಆಮಿಸಂ ನಿಸ್ಸಾಯ।
ನ ಚ ನಿಸ್ಸಾಯ ಪುಗ್ಗಲಂ।
ಉಭೋ ಏತೇ ವಿವಜ್ಜೇತ್ವಾ।
ಯಥಾಧಮ್ಮೋ ತಥಾ ಕರೇ॥
೩. ಚೋದಕಸ್ಸಅತ್ತಝಾಪನಂ
ಕೋಧನೋ ಉಪನಾಹೀ ಚ।
ಚಣ್ಡೋ ಚ ಪರಿಭಾಸಕೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ಉಪಕಣ್ಣಕಂ ಜಪ್ಪತಿ ಜಿಮ್ಹಂ ಪೇಕ್ಖತಿ।
ವೀತಿಹರತಿ ಕುಮ್ಮಗ್ಗಂ ಪಟಿಸೇವತಿ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ಅಕಾಲೇನ ಚೋದೇತಿ ಅಭೂತೇನ।
ಫರುಸೇನ ಅನತ್ಥಸಂಹಿತೇನ।
ದೋಸನ್ತರೋ ಚೋದೇತಿ ನೋ ಮೇತ್ತಾಚಿತ್ತೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ಧಮ್ಮಾಧಮ್ಮಂ ನ ಜಾನಾತಿ।
ಧಮ್ಮಾಧಮ್ಮಸ್ಸ ಅಕೋವಿದೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ವಿನಯಾವಿನಯಂ ನ ಜಾನಾತಿ।
ವಿನಯಾವಿನಯಸ್ಸ ಅಕೋವಿದೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ಭಾಸಿತಾಭಾಸಿತಂ ನ ಜಾನಾತಿ।
ಭಾಸಿತಾಭಾಸಿತಸ್ಸ ಅಕೋವಿದೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ಆಚಿಣ್ಣಾನಾಚಿಣ್ಣಂ ನ ಜಾನಾತಿ।
ಆಚಿಣ್ಣಾನಾಚಿಣ್ಣಸ್ಸ ಅಕೋವಿದೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ಪಞ್ಞತ್ತಾಪಞ್ಞತ್ತಂ ನ ಜಾನಾತಿ।
ಪಞ್ಞತ್ತಾಪಞ್ಞತ್ತಸ್ಸ ಅಕೋವಿದೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ಆಪತ್ತಾನಾಪತ್ತಿಂ ನ ಜಾನಾತಿ।
ಆಪತ್ತಾನಾಪತ್ತಿಯಾ ಅಕೋವಿದೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ಲಹುಕಗರುಕಂ ನ ಜಾನಾತಿ।
ಲಹುಕಗರುಕಸ್ಸ ಅಕೋವಿದೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ಸಾವಸೇಸಾನವಸೇಸಂ ನ ಜಾನಾತಿ।
ಸಾವಸೇಸಾನವಸೇಸಸ್ಸ ಅಕೋವಿದೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ದುಟ್ಠುಲ್ಲಾದುಟ್ಠುಲ್ಲಂ ನ ಜಾನಾತಿ।
ದುಟ್ಠುಲ್ಲಾದುಟ್ಠುಲ್ಲಸ್ಸ ಅಕೋವಿದೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ಪುಬ್ಬಾಪರಂ ನ ಜಾನಾತಿ।
ಪುಬ್ಬಾಪರಸ್ಸ ಅಕೋವಿದೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನಂ॥
ಅನುಸನ್ಧಿವಚನಪಥಂ ನ ಜಾನಾತಿ।
ಅನುಸನ್ಧಿವಚನಪಥಸ್ಸ ಅಕೋವಿದೋ।
ಅನಾಪತ್ತಿಯಾ ಆಪತ್ತೀತಿ ರೋಪೇತಿ।
ತಾದಿಸೋ ಚೋದಕೋ ಝಾಪೇತಿ ಅತ್ತಾನನ್ತಿ॥
ಚೋದನಾಕಣ್ಡಂ ನಿಟ್ಠಿತಂ।
ತಸ್ಸುದ್ದಾನಂ –
ಚೋದನಾ ಅನುವಿಜ್ಜಾ ಚ, ಆದಿ ಮೂಲೇನುಪೋಸಥೋ।
ಗತಿ ಚೋದನಕಣ್ಡಮ್ಹಿ, ಸಾಸನಂ ಪತಿಟ್ಠಾಪಯನ್ತಿ॥