೨. ಪಾರಿವಾಸಿಕಕ್ಖನ್ಧಕಂ
ಪಾರಿವಾಸಿಕವತ್ತಕಥಾವಣ್ಣನಾ
೭೫. ಪಾರಿವಾಸಿಕಕ್ಖನ್ಧಕೇ ನವಕತರಂ ಪಾರಿವಾಸಿಕನ್ತಿ ಅತ್ತನೋ ನವಕತರಂ ಪಾರಿವಾಸಿಕಂ। ಪಾರಿವಾಸಿಕಸ್ಸ ಹಿ ಅತ್ತನೋ ನವಕತರಂ ಪಾರಿವಾಸಿಕಂ ಠಪೇತ್ವಾ ಅಞ್ಞೇ ಮೂಲಾಯಪಟಿಕಸ್ಸನಾರಹಮಾನತ್ತಾರಹಮಾನತ್ತಚಾರಿಕಅಬ್ಭಾನಾರಹಾಪಿ ಪಕತತ್ತಟ್ಠಾನೇಯೇವ ತಿಟ್ಠನ್ತಿ। ತೇನಾಹ ‘‘ಅನ್ತಮಸೋ ಮೂಲಾಯಪಅಕಸ್ಸನಾರಹಾದೀನಮ್ಪೀ’’ತಿ। ಪಾದೇ ಘಂಸೇನ್ತಿ ಏತೇನಾತಿ ಪಾದಘಂಸನಂ, ಸಕ್ಖರಕಥಲಾದಿ। ‘‘ಅನುಜಾನಾಮಿ, ಭಿಕ್ಖವೇ, ತಿಸ್ಸೋ ಪಾದಘಂಸನಿಯೋ ಸಕ್ಖರಂ ಕಥಲಂ ಸಮುದ್ದಫೇಣಕ’’ನ್ತಿ (ಚೂಳವ॰ ೨೬೯) ಹಿ ವುತ್ತಂ। ಸದ್ಧಿವಿಹಾರಿಕಾದೀನಮ್ಪಿ ಸಾದಿಯನ್ತಸ್ಸಾತಿ ಸದ್ಧಿವಿಹಾರಿಕಾನಮ್ಪಿ ಅಭಿವಾದನಾದಿಂ ಸಾದಿಯನ್ತಸ್ಸ। ‘‘ಮಾ ಮಂ ಗಾಮಪ್ಪವೇಸನಂ ಆಪುಚ್ಛಥಾ’’ತಿ ವುತ್ತೇ ಅನಾಪುಚ್ಛಾಪಿ ಗಾಮಂ ಪವಿಸಿತುಂ ವಟ್ಟತಿ। ಯೋ ಯೋ ವುಡ್ಢೋತಿ ಪಾರಿವಾಸಿಕೇಸು ಭಿಕ್ಖೂಸು ಯೋ ಯೋ ವುಡ್ಢೋ। ನವಕತರಸ್ಸ ಸಾದಿತುನ್ತಿ ಪಾರಿವಾಸಿಕನವಕತರಸ್ಸ ಅಭಿವಾದನಾದಿಂ ಸಾದಿತುಂ।
ತತ್ಥೇವಾತಿ ಸಙ್ಘನವಕಟ್ಠಾನೇಯೇವ। ಅತ್ತನೋ ಪಾಳಿಯಾ ಪವಾರೇತಬ್ಬನ್ತಿ ಅತ್ತನೋ ವಸ್ಸಗ್ಗೇನ ಪತ್ತಪಾಳಿಯಾ ಪವಾರೇತಬ್ಬಂ, ನ ಪನ ಸಬ್ಬೇಸು ಪವಾರಿತೇಸೂತಿ ಅತ್ಥೋ। ಯದಿ ಪನ ನ ಗಣ್ಹಾತಿ ನ ವಿಸ್ಸಜ್ಜೇತೀತಿ ಯದಿ ಪುರಿಮದಿವಸೇ ಅತ್ತನೋ ನ ಗಣ್ಹಾತಿ ಗಹೇತ್ವಾ ಚ ನ ವಿಸ್ಸಜ್ಜೇತಿ। ಚತುಸ್ಸಾಲಭತ್ತನ್ತಿ ಭೋಜನಸಾಲಾಯಂ ಪಟಿಪಾಟಿಯಾ ದಿಯ್ಯಮಾನಭತ್ತಂ। ಹತ್ಥಪಾಸೇ ಠಿತೇನಾತಿ ದಾಯಕಸ್ಸ ಹತ್ಥಪಾಸೇ ಠಿತೇನ।
೭೬. ಅಞ್ಞೋ ಸಾಮಣೇರೋ ನ ಗಹೇತಬ್ಬೋತಿ ಉಪಜ್ಝಾಯೇನ ಹುತ್ವಾ ಅಞ್ಞೋ ಸಾಮಣೇರೋ ನ ಗಹೇತಬ್ಬೋ। ಉಪಜ್ಝಂ ದತ್ವಾ ಗಹಿತಸಾಮಣೇರಾಪೀತಿ ಪಕತತ್ತಕಾಲೇ ಉಪಜ್ಝಂ ದತ್ವಾ ಗಹಿತಸಾಮಣೇರಾಪಿ। ಲದ್ಧಸಮ್ಮುತಿಕೇನ ಆಣತ್ತೋಪಿ ಗರುಧಮ್ಮೇಹಿ ಅಞ್ಞೇಹಿ ವಾ ಓವದಿತುಂ ಲಭತೀತಿ ಆಹ ‘‘ಪಟಿಬಲಸ್ಸ ವಾ ಭಿಕ್ಖುಸ್ಸ ಭಾರೋ ಕಾತಬ್ಬೋ’’ತಿ। ಆಗತಾ ಭಿಕ್ಖುನಿಯೋ ವತ್ತಬ್ಬಾತಿ ಸಮ್ಬನ್ಧೋ। ಸವಚನೀಯನ್ತಿ ಸದೋಸಂ ಜೇಟ್ಠಕಟ್ಠಾನಂ ನ ಕಾತಬ್ಬನ್ತಿ ಪಧಾನಟ್ಠಾನಂ ನ ಕಾತಬ್ಬಂ। ಕಿಂ ತನ್ತಿ ಆಹ ‘‘ಪಾತಿಮೋಕ್ಖುದ್ದೇಸಕೇನ ವಾ’’ತಿಆದಿ।
ರಜೇಹಿ ರಜೋಹತಭೂಮಿ, ರಜೋಕಿಣ್ಣಭೂಮೀತಿ ಅತ್ಥೋ। ಪಚ್ಚಯನ್ತಿ ವಸ್ಸಾವಾಸಿಕಲಾಭಂ ಸನ್ಧಾಯ ವುತ್ತಂ। ಏಕಪಸ್ಸೇ ಠತ್ವಾತಿ ಪಾಳಿಂ ವಿಹಾಯ ಭಿಕ್ಖೂನಂ ಪಚ್ಛತೋ ಠತ್ವಾ। ಸೇನಾಸನಂ ನ ಲಭತೀತಿ ಸೇಯ್ಯಾಪರಿಯನ್ತಭಾಗಿತಾಯ ವಸ್ಸಗ್ಗೇನ ಗಣ್ಹಿತುಂ ನ ಲಭತಿ। ಅಸ್ಸಾತಿ ಭವೇಯ್ಯ। ‘‘ಆಗನ್ತುಕೇನ ಆರೋಚೇತಬ್ಬಂ, ಆಗನ್ತುಕಸ್ಸ ಆರೋಚೇತಬ್ಬ’’ನ್ತಿ ಅವಿಸೇಸೇನ ವುತ್ತತ್ತಾ ಸಚೇ ದ್ವೇ ಪಾರಿವಾಸಿಕಾ ಗತಟ್ಠಾನೇ ಅಞ್ಞಮಞ್ಞಂ ಪಸ್ಸನ್ತಿ, ಉಭೋಹಿಪಿ ಅಞ್ಞಮಞ್ಞಸ್ಸ ಆರೋಚೇತಬ್ಬಂ। ಯಥಾ ಬಹಿ ದಿಸ್ವಾ ಆರೋಚಿತಸ್ಸ ಭಿಕ್ಖುನೋ ವಿಹಾರಂ ಆಗತೇ ಪುನ ಆರೋಚನಕಿಚ್ಚಂ ನತ್ಥಿ, ಏವಂ ಅಞ್ಞಂ ವಿಹಾರಂ ಗತೇನಪಿ ತತ್ಥ ಪುಬ್ಬೇ ಆರೋಚಿತಸ್ಸ ಪುನ ಆರೋಚನಕಿಚ್ಚಂ ನತ್ಥೀತಿ ವದನ್ತಿ।
೮೧. ಅವಿಸೇಸೇನಾತಿ ಪಾರಿವಾಸಿಕಸ್ಸ ಉಕ್ಖಿತ್ತಕಸ್ಸ ಚ ಅವಿಸೇಸೇನ। ಓಬದ್ಧನ್ತಿ ಪಲಿಬುದ್ಧಂ।
೮೩. ಸಹವಾಸೋತಿ ವುತ್ತಪ್ಪಕಾರೇ ಛನ್ನೇ ಪಕತತ್ತೇನ ಭಿಕ್ಖುನಾ ಸದ್ಧಿಂ ಸಯನಮೇವ ಅಧಿಪ್ಪೇತಂ, ನ ಸೇಸಇರಿಯಾಪಥಕಪ್ಪನಂ। ಸೇಸಮೇತ್ಥ ಸುವಿಞ್ಞೇಯ್ಯಮೇವ।
ಪಾರಿವಾಸಿಕಕ್ಖನ್ಧಕವಣ್ಣನಾ ನಿಟ್ಠಿತಾ।