ಸೇದಮೋಚನಗಾಥಾ
ಅವಿಪ್ಪವಾಸಾದಿಪಞ್ಹವಣ್ಣನಾ
೪೭೯. ಸೇದಮೋಚನಗಾಥಾಸು ತಹಿನ್ತಿ ತಸ್ಮಿಂ ಪುಗ್ಗಲೇ। ‘‘ಅಕಪ್ಪಿಯಸಮ್ಭೋಗೋ ನಾಮ ಮೇಥುನಧಮ್ಮಾದೀ’’ತಿ ಗಣ್ಠಿಪದೇಸು ವುತ್ತಂ। ಏಸಾ ಪಞ್ಹಾ ಕುಸಲೇಹಿ ಚಿನ್ತಿತಾತಿ ಲಿಙ್ಗವಿಪಲ್ಲಾಸವಸೇನೇತಂ ವುತ್ತಂ, ಏಸೋ ಪಞ್ಹೋ ಕುಸಲೇಹಿ ಚಿನ್ತಿತೋತಿ ಅತ್ಥೋ।
ದಸಾತಿ ಅವನ್ದಿಯೇ ದಸ। ಏಕಾದಸಾತಿ ಪಣ್ಡಕಾದಯೋ ಏಕಾದಸ। ಉಬ್ಭಕ್ಖಕೇ ನ ವದಾಮೀತಿ ಇಮಿನಾ ಮುಖೇ ಮೇಥುನಧಮ್ಮಾಭಾವಂ ದೀಪೇತಿ। ಅಧೋನಾಭಿಂ ವಿವಜ್ಜಿಯಾತಿ ಇಮಿನಾ ವಚ್ಚಮಗ್ಗಪಸ್ಸಾವಮಗ್ಗೇಸು।
ಗಾಮನ್ತರಪರಿಯಾಪನ್ನಂ ನದೀಪಾರಂ ಓಕ್ಕನ್ತಭಿಕ್ಖುನಿಂ ಸನ್ಧಾಯಾತಿ ಏತ್ಥ ನದೀ ಭಿಕ್ಖುನಿಯಾ ಗಾಮಪರಿಯಾಪನ್ನಾ, ಪರತೀರಂ ಗಾಮನ್ತರಪರಿಯಾಪನ್ನಂ। ತತ್ಥ ಪರತೀರೇ ಪಠಮಲೇಡ್ಡುಪಾತಪ್ಪಮಾಣೋ ಗಾಮೂಪಚಾರೋ ನದೀಪರಿಯನ್ತೇನ ಪರಿಚ್ಛಿನ್ನೋ, ತಸ್ಮಾ ಪರತೀರೇ ರತನಮತ್ತಮ್ಪಿ ಅರಞ್ಞಂ ನತ್ಥಿ, ಪರತೀರಞ್ಚ ತಿಣಾದೀಹಿ ಪಟಿಚ್ಛನ್ನತ್ತಾ ದಸ್ಸನೂಪಚಾರವಿರಹಿತಂ ಕರೋತಿ। ತತ್ಥ ಅತ್ತನೋ ಗಾಮೇ ಆಪತ್ತಿ ನತ್ಥಿ, ಪರತೀರೇ ಪನ ಪಠಮಲೇಡ್ಡುಪಾತಸಙ್ಖಾತೇ ಗಾಮೂಪಚಾರೇಯೇವ ಪಾದಂ ಠಪೇತಿ। ಅನ್ತರೇ ಅಭಿಧಮ್ಮೇ ವುತ್ತನಯೇನ ಅರಞ್ಞಭೂತಂ ಸಕಗಾಮಂ ಅತಿಕ್ಕಮತಿ ನಾಮ, ತಸ್ಮಾ ಗಣಮ್ಹಾ ಓಹೀಯನಾ ನಾಮ ಹೋತೀತಿ ವೇದಿತಬ್ಬಂ।
ಭಿಕ್ಖೂನಂ ಸನ್ತಿಕೇ ಏಕತೋಉಪಸಮ್ಪನ್ನಾ ನಾಮ ಮಹಾಪಜಾಪತಿಪಮುಖಾ ಪಞ್ಚಸತಸಾಕಿನಿಯೋ ಭಿಕ್ಖುನಿಯೋ। ಮಹಾಪಜಾಪತಿಪಿ ಹಿ ಆನನ್ದತ್ಥೇರೇನ ದಿನ್ನಓವಾದಸ್ಸ ಪಟಿಗ್ಗಹಿತತ್ತಾ ಭಿಕ್ಖೂನಂ ಸನ್ತಿಕೇ ಉಪಸಮ್ಪನ್ನಾ ನಾಮ।
ಪಾರಾಜಿಕಾದಿಪಞ್ಹವಣ್ಣನಾ
೪೮೦. ಸಹ ‘‘ದುಸ್ಸಕುಟಿಆದೀನಿ ಸನ್ಧಾಯಾ’’ತಿ ವುತ್ತಂ। ಲಿಙ್ಗಪರಿವತ್ತಂ ಸನ್ಧಾಯ ವುತ್ತಾತಿ ‘‘ಲಿಙ್ಗಪರಿವತ್ತೇ ಸತಿ ಪಟಿಗ್ಗಹಣಸ್ಸ ವಿಜಹನತೋ ಸಾಮಂ ಗಹೇತ್ವಾ ಭುಞ್ಜಿತುಂ ನ ವಟ್ಟತೀ’’ತಿ ಲಿಙ್ಗಪರಿವತ್ತನಂ ಸನ್ಧಾಯ ವುತ್ತಾ।
೪೮೧. ಸುಪ್ಪತಿಟ್ಠಿತನಿಗ್ರೋಧಸದಿಸನ್ತಿ ಯೋಜನದ್ವಿಯೋಜನಾದಿಪರಮಂ ಮಹಾನಿಗ್ರೋಧಂ ಸನ್ಧಾಯ ವುತ್ತಂ।
ಸೇದಮೋಚನಗಾಥಾವಣ್ಣನಾ ನಿಟ್ಠಿತಾ।