൬. കിലേസസംയുത്തവണ്ണനാ
൩൨൨-൩൩൧. കിലേസസംയുത്തേ ചിത്തസ്സേസോ ഉപക്കിലേസോതി കതരചിത്തസ്സ? ചതുഭൂമകചിത്തസ്സ. തേഭൂമകചിത്തസ്സ താവ ഹോതു, ലോകുത്തരസ്സ കഥം ഉപക്കിലേസോ ഹോതീതി? ഉപ്പത്തിനിവാരണതോ. സോ ഹി തസ്സ ഉപ്പജ്ജിതും അപ്പദാനേന ഉപക്കിലേസോതി വേദിതബ്ബോ. നെക്ഖമ്മനിന്നന്തി നവലോകുത്തരധമ്മനിന്നം. ചിത്തന്തി സമഥവിപസ്സനാചിത്തം. അഭിഞ്ഞാ സച്ഛികരണീയേസു ധമ്മേസൂതി പച്ചവെക്ഖണഞാണേന അഭിജാനിത്വാ സച്ഛികാതബ്ബേസു ഛളഭിഞ്ഞാധമ്മേസു, ഏകം ധമ്മം വാ ഗണ്ഹന്തേന നെക്ഖമ്മന്തി ഗഹേതബ്ബം. സേസം സബ്ബത്ഥ ഉത്താനമേവാതി.
കിലേസസംയുത്തവണ്ണനാ നിട്ഠിതാ.