൧൩. ഏകപുഗ്ഗലവഗ്ഗോ
൧൭൦. ‘‘ഏകപുഗ്ഗലോ , ഭിക്ഖവേ, ലോകേ ഉപ്പജ്ജമാനോ ഉപ്പജ്ജതി ബഹുജനഹിതായ ബഹുജനസുഖായ ലോകാനുകമ്പായ അത്ഥായ ഹിതായ സുഖായ ദേവമനുസ്സാനം . കതമോ ഏകപുഗ്ഗലോ? തഥാഗതോ അരഹം സമ്മാസമ്ബുദ്ധോ. അയം ഖോ, ഭിക്ഖവേ, ഏകപുഗ്ഗലോ ലോകേ ഉപ്പജ്ജമാനോ ഉപ്പജ്ജതി ബഹുജനഹിതായ ബഹുജനസുഖായ ലോകാനുകമ്പായ അത്ഥായ ഹിതായ സുഖായ ദേവമനുസ്സാന’’ന്തി.
൧൭൧. ‘‘ഏകപുഗ്ഗലസ്സ, ഭിക്ഖവേ, പാതുഭാവോ ദുല്ലഭോ ലോകസ്മിം. കതമസ്സ ഏകപുഗ്ഗലസ്സ? തഥാഗതസ്സ അരഹതോ സമ്മാസമ്ബുദ്ധസ്സ. ഇമസ്സ ഖോ, ഭിക്ഖവേ, ഏകപുഗ്ഗലസ്സ പാതുഭാവോ ദുല്ലഭോ ലോകസ്മി’’ന്തി.
൧൭൨. ‘‘ഏകപുഗ്ഗലോ, ഭിക്ഖവേ, ലോകേ ഉപ്പജ്ജമാനോ ഉപ്പജ്ജതി അച്ഛരിയമനുസ്സോ. കതമോ ഏകപുഗ്ഗലോ? തഥാഗതോ അരഹം സമ്മാസമ്ബുദ്ധോ. അയം ഖോ, ഭിക്ഖവേ, ഏകപുഗ്ഗലോ ലോകേ ഉപ്പജ്ജമാനോ ഉപ്പജ്ജതി അച്ഛരിയമനുസ്സോ’’തി.
൧൭൩. ‘‘ഏകപുഗ്ഗലസ്സ, ഭിക്ഖവേ, കാലകിരിയാ ബഹുനോ ജനസ്സ അനുതപ്പാ ആനുതപ്പാ (സീ॰) ഹോതി. കതമസ്സ ഏകപുഗ്ഗലസ്സ? തഥാഗതസ്സ അരഹതോ സമ്മാസമ്ബുദ്ധസ്സ. ഇമസ്സ ഖോ, ഭിക്ഖവേ, ഏകപുഗ്ഗലസ്സ കാലകിരിയാ ബഹുനോ ജനസ്സ അനുതപ്പാ ഹോതീ’’തി.
൧൭൪. ‘‘ഏകപുഗ്ഗലോ, ഭിക്ഖവേ, ലോകേ ഉപ്പജ്ജമാനോ ഉപ്പജ്ജതി അദുതിയോ അസഹായോ അപ്പടിമോ അപ്പടിസമോ അപ്പടിഭാഗോ അപ്പടിപുഗ്ഗലോ അസമോ അസമസമോ ദ്വിപദാനം അഗ്ഗോ. കതമോ ഏകപുഗ്ഗലോ? തഥാഗതോ അരഹം സമ്മാസമ്ബുദ്ധോ. അയം ഖോ, ഭിക്ഖവേ, ഏകപുഗ്ഗലോ ലോകേ ഉപ്പജ്ജമാനോ ഉപ്പജ്ജതി അദുതിയോ അസഹായോ അപ്പടിമോ അപ്പടിസമോ അപ്പടിഭാഗോ അപ്പടിപുഗ്ഗലോ അസമോ അസമസമോ ദ്വിപദാനം അഗ്ഗോ’’തി.
൧൭൫-൧൮൬. ‘‘ഏകപുഗ്ഗലസ്സ , ഭിക്ഖവേ, പാതുഭാവാ മഹതോ ചക്ഖുസ്സ പാതുഭാവോ ഹോതി, മഹതോ ആലോകസ്സ പാതുഭാവോ ഹോതി, മഹതോ ഓഭാസസ്സ പാതുഭാവോ ഹോതി, ഛന്നം അനുത്തരിയാനം പാതുഭാവോ ഹോതി, ചതുന്നം പടിസമ്ഭിദാനം സച്ഛികിരിയാ ഹോതി, അനേകധാതുപടിവേധോ ഹോതി, നാനാധാതുപടിവേധോ ഹോതി, വിജ്ജാവിമുത്തിഫലസച്ഛികിരിയാ ഹോതി, സോതാപത്തിഫലസച്ഛികിരിയാ ഹോതി, സകദാഗാമിഫലസച്ഛികിരിയാ ഹോതി, അനാഗാമിഫലസച്ഛികിരിയാ ഹോതി, അരഹത്തഫലസച്ഛികിരിയാ ഹോതി. കതമസ്സ ഏകപുഗ്ഗലസ്സ? തഥാഗതസ്സ അരഹതോ സമ്മാസമ്ബുദ്ധസ്സ. ഇമസ്സ ഖോ, ഭിക്ഖവേ, ഏകപുഗ്ഗലസ്സ പാതുഭാവാ മഹതോ ചക്ഖുസ്സ പാതുഭാവോ ഹോതി, മഹതോ ആലോകസ്സ പാതുഭാവോ ഹോതി, മഹതോ ഓഭാസസ്സ പാതുഭാവോ ഹോതി, ഛന്നം അനുത്തരിയാനം പാതുഭാവോ ഹോതി, ചതുന്നം പടിസമ്ഭിദാനം സച്ഛികിരിയാ ഹോതി, അനേകധാതുപടിവേധോ ഹോതി, നാനാധാതുപടിവേധോ ഹോതി, വിജ്ജാവിമുത്തിഫലസച്ഛികിരിയാ ഹോതി, സോതാപത്തിഫലസച്ഛികിരിയാ ഹോതി, സകദാഗാമിഫലസച്ഛികിരിയാ ഹോതി, അനാഗാമിഫലസച്ഛികിരിയാ ഹോതി, അരഹത്തഫലസച്ഛികിരിയാ ഹോതീ’’തി.
൧൮൭. ‘‘നാഹം ഭിക്ഖവേ, അഞ്ഞം ഏകപുഗ്ഗലമ്പി സമനുപസ്സാമി യോ ഏവം തഥാഗതേന അനുത്തരം ധമ്മചക്കം പവത്തിതം സമ്മദേവ അനുപ്പവത്തേതി യഥയിദം, ഭിക്ഖവേ, സാരിപുത്തോ. സാരിപുത്തോ, ഭിക്ഖവേ, തഥാഗതേന അനുത്തരം ധമ്മചക്കം പവത്തിതം സമ്മദേവ അനുപ്പവത്തേതീ’’തി.
ഏകപുഗ്ഗലവഗ്ഗോ തേരസമോ.