(൨൬) ൬. അഭിഞ്ഞാവഗ്ഗോ
൧-൩. അഭിഞ്ഞാസുത്താദിവണ്ണനാ
൨൫൪-൨൫൬. ഛട്ഠസ്സ അഭിഞ്ഞായാതി ജാനിത്വാ. സമഥോ ച വിപസ്സനാ ചാതി ചിത്തേകഗ്ഗതാ ച സങ്ഖാരപരിഗ്ഗഹവിപസ്സനാഞാണഞ്ച. വിജ്ജാ ച വിമുത്തി ചാതി മഗ്ഗഞാണവിജ്ജാ ച സേസാ സമ്പയുത്തകധമ്മാ ച. ദുതിയേ അനരിയപരിയേസനാതി അനരിയാനം ഏസനാ ഗവേസനാ. ജരാധമ്മന്തി ജരാസഭാവം. സേസേസുപി ഏസേവ നയോ. തതിയം ഉത്താനമേവ.
൪. മാലുക്യപുത്തസുത്തവണ്ണനാ
൨൫൭. ചതുത്ഥേ മാലുക്യപുത്തോതി മാലുക്യബ്രാഹ്മണിയാ പുത്തോ. എത്ഥാതി ഏതസ്മിം തവ ഓവാദയാചനേ. ഇമിനാ ഥേരം അപസാദേതിപി ഉസ്സാദേതിപി. കഥം? അയം കിര ദഹരകാലേ പച്ചയേസു ലഗ്ഗോ ഹുത്വാ പച്ഛാ മഹല്ലകകാലേ അരഞ്ഞവാസം പത്ഥെന്തോ കമ്മട്ഠാനം യാചതി. അഥ ഭഗവാ ‘‘എത്ഥ ദഹരേ കിം വക്ഖാമ, മാലുക്യപുത്തോ വിയ തുമ്ഹേപി തരുണകാലേ പച്ചയേസു ലഗ്ഗിത്വാ മഹല്ലകകാലേ അരഞ്ഞം പവിസിത്വാ സമണധമ്മം കരെയ്യാഥാ’’തി ഇമിനാ അധിപ്പായേന ഭണന്തോ ഥേരം അപസാദേതി നാമ. യസ്മാ പന ഥേരോ മഹല്ലകകാലേവ അരഞ്ഞം പവിസിത്വാ സമണധമ്മം കാതുകാമോ, തസ്മാ ഭഗവാ ‘‘എത്ഥ ദഹരേ കിം വക്ഖാമ, അയം അമ്ഹാകം മാലുക്യപുത്തോ മഹല്ലകകാലേപി അരഞ്ഞം പവിസിത്വാ സമണധമ്മം കാതുകാമോ
൫-൧൦. കുലസുത്താദിവണ്ണനാ
൨൫൮-൨൬൩. പഞ്ചമേ ആധിപച്ചേ ഠപെന്തീതി ഭണ്ഡാഗാരികട്ഠാനേ ഠപെന്തി. ഛട്ഠേ വണ്ണസമ്പന്നോതി സരീരവണ്ണേന സമന്നാഗതോ. ബലസമ്പന്നോതി കായബലേന സമന്നാഗതോ. ഭിക്ഖുവാരേ വണ്ണസമ്പന്നോതി ഗുണവണ്ണേന സമന്നാഗതോ. ബലസമ്പന്നോതി വീരിയബലേന സമന്നാഗതോ. ജവസമ്പന്നോതി ഞാണജവേന സമന്നാഗതോ. സത്തമേപി ഏസേവ നയോ. സേസമെത്ഥ ഉത്താനമേവാതി.
അഭിഞ്ഞാവഗ്ഗോ ഛട്ഠോ.