4. පවාරණාක්ඛන්ධකො
120. අඵාසුකවිහාරො
209. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන සම්බහුලා සන්දිට්ඨා සම්භත්තා භික්ඛූ කොසලෙසු ජනපදෙ අඤ්ඤතරස්මිං ආවාසෙ වස්සං උපගච්ඡිංසු. අථ ඛො තෙසං භික්ඛූනං එතදහොසි – ‘‘කෙන නු ඛො මයං උපායෙන සමග්ගා සම්මොදමානා අවිවදමානා ඵාසුකං වස්සං වසෙය්යාම, න ච පිණ්ඩකෙන කිලමෙය්යාමා’’ති. අථ ඛො තෙසං භික්ඛූනං එතදහොසි – ‘‘සචෙ ඛො මයං අඤ්ඤමඤ්ඤං නෙව ආලපෙය්යාම න සල්ලපෙය්යාම – යො පඨමං ගාමතො පිණ්ඩාය පටික්කමෙය්ය සො ආසනං පඤ්ඤපෙය්ය, පාදොදකං පාදපීඨං පාදකථලිකං උපනික්ඛිපෙය්ය, අවක්කාරපාතිං ධොවිත්වා උපට්ඨාපෙය්ය, පානීයං පරිභොජනීයං උපට්ඨාපෙය්ය; යො පච්ඡා ගාමතො පිණ්ඩාය පටික්කමෙය්ය, සචස්ස භුත්තාවසෙසො, සචෙ ආකඞ්ඛෙය්ය භුඤ්ජෙය්ය, නො චෙ ආකඞ්ඛෙය්ය අප්පහරිතෙ වා ඡඩ්ඩෙය්ය, අප්පාණකෙ වා උදකෙ ඔපිලාපෙය්ය; සො ආසනං උද්ධරෙය්ය, පාදොදකං පාදපීඨං පාදකථලිකං පටිසාමෙය්ය, අවක්කාරපාතිං ධොවිත්වා පටිසාමෙය්ය, පානීයං පරිභොජනීයං පටිසාමෙය්ය, භත්තග්ගං සම්මජ්ජෙය්ය; යො පස්සෙය්ය පානීයඝටං වා පරිභොජනීයඝටං වා වච්චඝටං වා රිත්තං තුච්ඡං සො උපට්ඨාපෙය්ය; සචස්ස හොති අවිසය්හං, හත්ථවිකාරෙන දුතියං ආමන්තෙත්වා හත්ථවිලඞ්ඝකෙන උපට්ඨාපෙය්ය; න ත්වෙව තප්පච්චයා වාචං භින්දෙය්ය – එවං ඛො මයං සමග්ගා සම්මොදමානා අවිවදමානා ඵාසුකං වස්සං වසෙය්යාම, න ච පිණ්ඩකෙන කිලමෙය්යාමා’’ති. අථ ඛො තෙ භික්ඛූ අඤ්ඤමඤ්ඤං නෙව ආලපිංසු, න සල්ලපිංසු. යො පඨමං ගාමතො පිණ්ඩාය පටික්කමති, සො ආසනං පඤ්ඤපෙති, පාදොදකං පාදපීඨං පාදකථලිකං උපනික්ඛිපති, අවක්කාරපාතිං ධොවිත්වා උපට්ඨාපෙති, පානීයං පරිභොජනීයං උපට්ඨාපෙති . යො පච්ඡා ගාමතො පිණ්ඩාය පටික්කමති, සචෙ හොති භුත්තාවසෙසො, සචෙ ආකඞ්ඛති භුඤ්ජති, නො චෙ ආකඞ්ඛති අප්පහරිතෙ වා ඡඩ්ඩෙති, අප්පාණකෙ වා උදකෙ ඔපිලාපෙති; සො ආසනං උද්ධරති, පාදොදකං පාදපීඨං පාදකථලිකං පටිසාමෙති, අවක්කාරපාතිං ධොවිත්වා පටිසාමෙති, පානීයං පරිභොජනීයං පටිසාමෙති, භත්තග්ගං සම්මජ්ජති. යො පස්සති පානීයඝටං වා පරිභොජනීයඝටං වා වච්චඝටං වා රිත්තං තුච්ඡං සො උපට්ඨාපෙති. සචස්ස හොති අවිසය්හං, හත්ථවිකාරෙන දුතියං ආමන්තෙත්වා හත්ථවිලඞ්ඝකෙන උපට්ඨාපෙති, න ත්වෙව තප්පච්චයා වාචං භින්දති.
ආචිණ්ණං ඛො පනෙතං වස්සංවුට්ඨානං භික්ඛූනං භගවන්තං දස්සනාය උපසඞ්කමිතුං. අථ ඛො තෙ භික්ඛූ වස්සංවුට්ඨා තෙමාසච්චයෙන සෙනාසනං සංසාමෙත්වා පත්තචීවරමාදාය යෙන සාවත්ථි තෙන පක්කමිංසු. අනුපුබ්බෙන යෙන සාවත්ථි ජෙතවනං අනාථපිණ්ඩිකස්ස ආරාමො යෙන භගවා තෙනුපසඞ්කමිංසු, උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. ආචිණ්ණං ඛො පනෙතං බුද්ධානං භගවන්තානං ආගන්තුකෙහි භික්ඛූහි සද්ධිං පටිසම්මොදිතුං. අථ ඛො භගවා තෙ භික්ඛූ එතදවොච – ‘‘කච්චි, භික්ඛවෙ, ඛමනීයං, කච්චි යාපනීයං, කච්චි සමග්ගා සම්මොදමානා අවිවදමානා ඵාසුකං වස්සං වසිත්ථ, න ච පිණ්ඩකෙන කිලමිත්ථා’’ති? ‘‘ඛමනීයං භගවා, යාපනීයං භගවා. සමග්ගා ච මයං, භන්තෙ, සම්මොදමානා අවිවදමානා ඵාසුකං වස්සං වසිම්හා, න ච පිණ්ඩකෙන කිලමිම්හා’’ති. ජානන්තාපි තථාගතා පුච්ඡන්ති, ජානන්තාපි න පුච්ඡන්ති. කාලං විදිත්වා පුච්ඡන්ති, කාලං විදිත්වා න පුච්ඡන්ති. අත්ථසංහිතං තථාගතා පුච්ඡන්ති, නො අනත්ථසංහිතං. අනත්ථසංහිතෙ සෙතුඝාතො තථාගතානං. ද්වීහාකාරෙහි බුද්ධා භගවන්තො භික්ඛූ පටිපුච්ඡන්ති – ධම්මං වා දෙසෙස්සාම, සාවකානං වා සික්ඛාපදං පඤ්ඤපෙස්සාමාති. අථ ඛො භගවා තෙ භික්ඛූ එතදවොච – ‘‘යථාකථං පන තුම්හෙ, භික්ඛවෙ, සමග්ගා සම්මොදමානා අවිවදමානා ඵාසුකං වස්සං වසිත්ථ, න ච පිණ්ඩකෙන කිලමිත්ථා’’ති.
ඉධ මයං, භන්තෙ, සම්බහුලා සන්දිට්ඨා සම්භත්තා භික්ඛූ කොසලෙසු ජනපදෙ අඤ්ඤතරස්මිං ආවාසෙ වස්සං උපගච්ඡිම්හා. තෙසං නො, භන්තෙ, අම්හාකං එතදහොසි – ‘‘කෙන නු ඛො මයං උපායෙන සමග්ගා සම්මොදමානා අවිවදමානා ඵාසුකං වස්සං වසෙය්යාම, න ච පිණ්ඩකෙන කිලමෙය්යාමා’’ති. තෙසං නො, භන්තෙ, අම්හාකං එතදහොසි – ‘‘සචෙ ඛො මයං අඤ්ඤමඤ්ඤං නෙව ආලපෙය්යාම න සල්ලපෙය්යාම – යො පඨමං ගාමතො පිණ්ඩාය පටික්කමෙය්ය සො ආසනං පඤ්ඤපෙය්ය, පාදොදකං පාදපීඨං පාදකථලිකං උපනික්ඛිපෙය්ය, අවක්කාරපාතිං ධොවිත්වා උපට්ඨාපෙය්ය, පානීයං පරිභොජනීයං උපට්ඨාපෙය්ය; යො පච්ඡා ගාමතො පිණ්ඩාය පටික්කමෙය්ය, සචස්ස භුත්තාවසෙසො , සචෙ ආකඞ්ඛෙය්ය භුඤ්ජෙය්ය, නො චෙ ආකඞ්ඛෙය්ය අප්පහරිතෙ වා ඡඩ්ඩෙය්ය, අප්පාණකෙ වා උදකෙ ඔපිලාපෙය්ය; සො ආසනං උද්ධරෙය්ය, පාදොදකං පාදපීඨං පාදකථලිකං පටිසාමෙය්ය , අවක්කාරපාතිං ධොවිත්වා පටිසාමෙය්ය, පානීයං පරිභොජනීයං පටිසාමෙය්ය, භත්තග්ගං සම්මජ්ජෙය්ය; යො පස්සෙය්ය පානීයඝටං වා පරිභොජනීයඝටං වා වච්චඝටං වා රිත්තං තුච්ඡං සො උපට්ඨාපෙය්ය; සචස්ස හොති අවිසය්හං, හත්ථවිකාරෙන දුතියං ආමන්තෙත්වා හත්ථවිලඞ්ඝකෙන උපට්ඨාපෙය්ය; න ත්වෙව තප්පච්චයා වාචං භින්දෙය්ය – එවං ඛො මයං සමග්ගා සම්මොදමානා අවිවදමානා ඵාසුකං වස්සං වසෙය්යාම, න ච පිණ්ඩකෙන කිලමෙය්යාමා’’ති. අථ ඛො මයං, භන්තෙ, අඤ්ඤමඤ්ඤං නෙව ආලපිම්හා න සල්ලවිම්හා. යො පඨමං ගාමතො පිණ්ඩාය පටික්කමති සො ආසනං පඤ්ඤපෙති, පාදොදකං පාදපීඨං පාදකථලිකං උපනික්ඛිපති, අවක්කාරපාතිං ධොවිත්වා උපට්ඨාපෙති, පානීයං පරිභොජනීයං උපට්ඨාපෙති. යො පච්ඡා ගාමතො පිණ්ඩාය පටික්කමති, සචෙ හොති භුත්තාවසෙසො, සචෙ ආකඞ්ඛති භුඤ්ජති, නො චෙ ආකඞ්ඛති අප්පහරිතෙ වා ඡඩ්ඩෙති, අප්පාණකෙ වා උදකෙ ඔපිලාපෙති, සො ආසනං උද්ධරති, පාදොදකං පාදපීඨං පාදකථලිකං පටිසාමෙති, අවක්කාරපාතිං ධොවිත්වා පටිසාමෙති, පානීයං පරිභොජනීයං පටිසාමෙති, භත්තග්ගං සම්මජ්ජති. යො පස්සති පානීයඝටං වා පරිභොජනීයඝටං වා වච්චඝටං වා රිත්තං තුච්ඡං සො උපට්ඨාපෙති. සචස්ස හොති අවිසය්හං, හත්ථවිකාරෙන දුතියං ආමන්තෙත්වා හත්ථවිලඞ්ඝකෙන උපට්ඨාපෙති, න ත්වෙව තප්පච්චයා වාචං භින්දති. එවං ඛො මයං, භන්තෙ, සමග්ගා සම්මොදමානා අවිවදමානා ඵාසුකං වස්සං වසිම්හා, න ච පිණ්ඩකෙන කිලමිම්හාති.
අථ ඛො භගවා භික්ඛූ ආමන්තෙසි – ‘‘අඵාසුඤ්ඤෙව අඵාසුකඤ්ඤෙව (සී.) කිරමෙ කිරිමෙ (ක.), භික්ඛවෙ, මොඝපුරිසා වුට්ඨා වුත්ථා (ක.) සමානා ඵාසුම්හා ඵාසුකම්හා (සී.) වුට්ඨාති පටිජානන්ති. පසුසංවාසඤ්ඤෙව කිරමෙ, භික්ඛවෙ, මොඝපුරිසා වුට්ඨා සමානා ඵාසුම්හා වුට්ඨාති පටිජානන්ති. එළකසංවාසඤ්ඤෙව කිරමෙ, භික්ඛවෙ, මොඝපුරිසා වුට්ඨා සමානා ඵාසුම්හා වුට්ඨාති පටිජානන්ති. සපත්තසංවාසඤ්ඤෙව කිරමෙ, භික්ඛවෙ, මොඝපුරිසා වුට්ඨා සමානා ඵාසුම්හා වුට්ඨාති පටිජානන්ති. කථඤ්හි නාමිමෙ, භික්ඛවෙ, මොඝපුරිසා මූගබ්බතං තිත්ථියසමාදානං සමාදියිස්ස’’න්ති. නෙතං, භික්ඛවෙ, අප්පසන්නානං වා පසාදාය…පෙ.… විගරහිත්වා ධම්මිං කථං කත්වා භික්ඛූ ආමන්තෙසි – න, භික්ඛවෙ, මූගබ්බතං තිත්ථියසමාදානං සමාදියිතබ්බං. යො සමාදියෙය්ය, ආපත්ති දුක්කටස්ස. අනුජානාමි, භික්ඛවෙ, වස්සංවුට්ඨානං භික්ඛූනං තීහි ඨානෙහි පවාරෙතුං – දිට්ඨෙන වා සුතෙන වා පරිසඞ්කාය වා. සා වො භවිස්සති අඤ්ඤමඤ්ඤානුලොමතා ආපත්තිවුට්ඨානතා විනයපුරෙක්ඛාරතා. එවඤ්ච පන, භික්ඛවෙ, පවාරෙතබ්බං. බ්යත්තෙන භික්ඛුනා පටිබලෙන සඞ්ඝො ඤාපෙතබ්බො –
210. ‘‘සුණාතු මෙ, භන්තෙ, සඞ්ඝො. අජ්ජ පවාරණා. යදි සඞ්ඝස්ස පත්තකල්ලං, සඞ්ඝො පවාරෙය්යා’’ති.
ථෙරෙන භික්ඛුනා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා එවමස්ස වචනීයො – ‘‘සඞ්ඝං, ආවුසො, පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තො අනුකම්පං උපාදාය. පස්සන්තො පටිකරිස්සාමි. දුතියම්පි, ආවුසො, සඞ්ඝං පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තො අනුකම්පං උපාදාය. පස්සන්තො පටිකරිස්සාමි. තතියම්පි, ආවුසො, සඞ්ඝං පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තො අනුකම්පං උපාදාය. පස්සන්තො පටිකරිස්සාමී’’ති.
නවකෙන භික්ඛුනා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා එවමස්ස වචනීයො – ‘‘සඞ්ඝං, භන්තෙ, පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තො අනුකම්පං උපාදාය. පස්සන්තො පටිකරිස්සාමි. දුතියම්පි, භන්තෙ, සඞ්ඝං…පෙ.… තතියම්පි, භන්තෙ, සඞ්ඝං පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තො අනුකම්පං උපාදාය. පස්සන්තො පටිකරිස්සාමී’’ති.
211. තෙන ඛො පන සමයෙන ඡබ්බග්ගියා භික්ඛූ ථෙරෙසු භික්ඛූසු උක්කුටිකං නිසින්නෙසු පවාරයමානෙසු ආසනෙසු අච්ඡන්ති. යෙ තෙ භික්ඛූ අප්පිච්ඡා…පෙ.… තෙ උජ්ඣායන්ති ඛිය්යන්ති විපාචෙන්ති – ‘‘කථඤ්හි නාම ඡබ්බග්ගියා භික්ඛූ ථෙරෙසු භික්ඛූසු උක්කුටිකං නිසින්නෙසු පවාරයමානෙසු ආසනෙසු අච්ඡිස්සන්තී’’ති. අථ ඛො තෙ භික්ඛූ භගවතො එතමත්ථං ආරොචෙසුං…පෙ.… ‘‘සච්චං කිර, භික්ඛවෙ, ඡබ්බග්ගියා භික්ඛූ ථෙරෙසු භික්ඛූසු උක්කුටිකං නිසින්නෙසු පවාරයමානෙසු ආසනෙසු අච්ඡන්තී’’ති? ‘‘සච්චං, භගවා’’ති. විගරහි බුද්ධො භගවා…පෙ.… ‘‘කථඤ්හි නාම තෙ, භික්ඛවෙ, මොඝපුරිසා ථෙරෙසු භික්ඛූසු උක්කුටිකං නිසින්නෙසු පවාරයමානෙසු ආසනෙසු අච්ඡිස්ස’’න්ති. නෙතං, භික්ඛවෙ, අප්පසන්නානං වා පසාදාය, පසන්නානං වා භිය්යොභාවාය…පෙ.… විගරහිත්වා ධම්මිං කථං කත්වා භික්ඛූ ආමන්තෙසි – ‘‘න, භික්ඛවෙ, ථෙරෙසු භික්ඛූසු උක්කුටිකං නිසින්නෙසු පවාරයමානෙසු ආසනෙසු අච්ඡිතබ්බං. යො අච්ඡෙය්ය, ආපත්ති දුක්කටස්ස. අනුජානාමි, භික්ඛවෙ, සබ්බෙහෙව උක්කුටිකං නිසින්නෙහි පවාරෙතු’’න්ති.
තෙන ඛො පන සමයෙන අඤ්ඤතරො ථෙරො ජරාදුබ්බලො යාව සබ්බෙ පවාරෙන්තීති යාව සබ්බෙ පවාරෙන්ති (ස්යා.) උක්කුටිකං නිසින්නො ආගමයමානො මුච්ඡිතො පපති. භගවතො එතමත්ථං ආරොචෙසුං. අනුජානාමි, භික්ඛවෙ, තදමන්තරා උක්කුටිකං නිසීදිතුං යාව පවාරෙති, පවාරෙත්වා ආසනෙ නිසීදිතුන්ති.
අඵාසුකවිහාරො නිට්ඨිතො.
121. පවාරණාභෙදා
212. අථ ඛො භික්ඛූනං එතදහොසි – ‘‘කති නු ඛො පවාරණා’’ති? භගවතො එතමත්ථං ආරොචෙසුං. ද්වෙමා, භික්ඛවෙ, පවාරණා – චාතුද්දසිකා ච පන්නරසිකා ච. ඉමා ඛො, භික්ඛවෙ, ද්වෙ පවාරණාති.
අථ ඛො භික්ඛූනං එතදහොසි – ‘‘කති නු ඛො පවාරණකම්මානී’’ති? පවාරණාකම්මානීති (ස්යා.) භගවතො එතමත්ථං ආරොචෙසුං. චත්තාරිමානි, භික්ඛවෙ, පවාරණකම්මානි – අධම්මෙන වග්ගං පවාරණකම්මං, අධම්මෙන සමග්ගං පවාරණකම්මං, ධම්මෙන වග්ගං පවාරණකම්මං, ධම්මෙන සමග්ගං පවාරණකම්මං. තත්ර, භික්ඛවෙ, යදිදං අධම්මෙන වග්ගං පවාරණකම්මං, න, භික්ඛවෙ, එවරූපං පවාරණකම්මං කාතබ්බං; න ච මයා එවරූපං පවාරණකම්මං අනුඤ්ඤාතං. තත්ර, භික්ඛවෙ, යදිදං අධම්මෙන සමග්ගං පවාරණකම්මං, න, භික්ඛවෙ, එවරූපං පවාරණකම්මං කාතබ්බං; න ච මයා එවරූපං පවාරණකම්මං අනුඤ්ඤාතං. තත්ර, භික්ඛවෙ, යදිදං ධම්මෙන වග්ගං පවාරණකම්මං, න, භික්ඛවෙ, එවරූපං පවාරණකම්මං කාතබ්බං; න ච මයා එවරූපං පවාරණකම්මං අනුඤ්ඤාතං. තත්ර, භික්ඛවෙ, යදිදං ධම්මෙන සමග්ගං පවාරණකම්මං, එවරූපං, භික්ඛවෙ, පවාරණකම්මං කාතබ්බං; එවරූපඤ්ච මයා පවාරණකම්මං අනුඤ්ඤාතං. තස්මාතිහ, භික්ඛවෙ, එවරූපං පවාරණකම්මං කරිස්සාම යදිදං ධම්මෙන සමග්ගන්ති, එවඤ්හි වො, භික්ඛවෙ, සික්ඛිතබ්බන්ති.
පවාරණාභෙදා නිට්ඨිතා.
122. පවාරණාදානානුජානනා
213. අථ ඛො භගවා භික්ඛූ ආමන්තෙසි – ‘‘සන්නිපතථ, භික්ඛවෙ. සඞ්ඝො පවාරෙස්සතී’’ති. එවං වුත්තෙ අඤ්ඤතරො භික්ඛු භගවන්තං එතදවොච – ‘‘අත්ථි, භන්තෙ, භික්ඛු ගිලානො , සො අනාගතො’’ති. අනුජානාමි, භික්ඛවෙ, ගිලානෙන භික්ඛුනා පවාරණං දාතුං. එවඤ්ච පන, භික්ඛවෙ, දාතබ්බා – තෙන ගිලානෙන භික්ඛුනා එකං භික්ඛුං උපසඞ්කමිත්වා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා එවමස්ස වචනීයො – ‘‘පවාරණං දම්මි, පවාරණං මෙ හර, පවාරණං මෙ ආරොචෙහි, මමත්ථාය පවාරෙහී’’ති කායෙන විඤ්ඤාපෙති, වාචාය විඤ්ඤාපෙති, කායෙන වාචාය විඤ්ඤාපෙති, දින්නා හොති පවාරණා; න කායෙන විඤ්ඤාපෙති, න වාචාය විඤ්ඤාපෙති, න කායෙන වාචාය විඤ්ඤාපෙති, න දින්නා හොති පවාරණා. එවඤ්චෙතං ලභෙථ, ඉච්චෙතං කුසලං. නො චෙ ලභෙථ, සො, භික්ඛවෙ, ගිලානො භික්ඛු මඤ්චෙන වා පීඨෙන වා සඞ්ඝමජ්ඣෙ ආනෙත්වා පවාරෙතබ්බං. සචෙ, භික්ඛවෙ, ගිලානුපට්ඨාකානං භික්ඛූනං එතදහොසි – ‘‘සචෙ ඛො මයං ගිලානං ඨානා චාවෙස්සාම, ආබාධො වා අභිවඩ්ඪිස්සති, කාලංකිරියා වා භවිස්සතී’’ති න, භික්ඛවෙ, ගිලානො භික්ඛු ඨානා චාවෙතබ්බො. සඞ්ඝෙන තත්ථ ගන්ත්වා පවාරෙතබ්බං; න ත්වෙව වග්ගෙන සඞ්ඝෙන පවාරෙතබ්බං. පවාරෙය්ය චෙ, ආපත්ති දුක්කටස්ස.
පවාරණහාරකො පවාරණාහාරකො (ස්යා.) චෙ, භික්ඛවෙ, දින්නාය පවාරණාය තත්ථෙව පක්කමති, අඤ්ඤස්ස දාතබ්බා පවාරණා. පවාරණහාරකො චෙ, භික්ඛවෙ, දින්නාය පවාරණාය තත්ථෙව විබ්භමති…පෙ.… කාලංකරොති… සාමණෙරො පටිජානාති… සික්ඛං පච්චක්ඛාතකො පටිජානාති… අන්තිමවත්ථුං අජ්ඣාපන්නකො පටිජානාති… උම්මත්තකො පටිජානාති… ඛිත්තචිත්තො පටිජානාති… වෙදනාට්ටො පටිජානාති… ආපත්තියා අදස්සනෙ උක්ඛිත්තකො පටිජානාති… ආපත්තියා අප්පටිකම්මෙ උක්ඛිත්තකො පටිජානාති… පාපිකාය දිට්ඨියා අප්පටිනිස්සග්ගෙ උක්ඛිත්තකො පටිජානාති… පණ්ඩකො පටිජානාති… ථෙය්යසංවාසකො පටිජානාති… තිත්ථියපක්කන්තකො පටිජානාති… තිරච්ඡානගතො පටිජානාති… මාතුඝාතකො පටිජානාති… පිතුඝාතකො පටිජානාති… අරහන්තඝාතකො පටිජානාති… භික්ඛුනිදූසකො පටිජානාති… සඞ්ඝභෙදකො පටිජානාති … ලොහිතුප්පාදකො පටිජානාති… උභතොබ්යඤ්ජනකො පටිජානාති, අඤ්ඤස්ස දාතබ්බා පවාරණා.
පවාරණහාරකො චෙ, භික්ඛවෙ, දින්නාය පවාරණාය අන්තරාමග්ගෙ පක්කමති, අනාහටා හොති පවාරණා. පවාරණහාරකො චෙ, භික්ඛවෙ, දින්නාය පවාරණාය අන්තරාමග්ගෙ විබ්භමති…පෙ.… කාලංකරොති… සාමණෙරො පටිජානාති… සික්ඛං පච්චක්ඛාතකො පටිජානාති… අන්තිමවත්ථුං අජ්ඣාපන්නකො පටිජානාති… උම්මත්තකො පටිජානාති… ඛිත්තචිත්තො පටිජානාති… වෙදනාට්ටො පටිජානාති… ආපත්තියා අදස්සනෙ උක්ඛිත්තකො පටිජානාති… ආපත්තියා අප්පටිකම්මෙ උක්ඛිත්තකො පටිජානාති… පාපිකාය දිට්ඨියා අප්පටිනිස්සග්ගෙ උක්ඛිත්තකො පටිජානාති… පණ්ඩකො පටිජානාති… ථෙය්යසංවාසකො පටිජානාති… තිත්ථියපක්කන්තකො පටිජානාති… තිරච්ඡානගතො පටිජානාති… මාතුඝාතකො පටිජානාති… පිතුඝාතකො පටිජානාති… අරහන්තඝාතකො පටිජානාති… භික්ඛුනිදූසකො පටිජානාති… සඞ්ඝභෙදකො පටිජානාති… ලොහිතුප්පාදකො පටිජානාති… උභතොබ්යඤ්ජනකො පටිජානාති, අනාහටා හොති පවාරණා.
පවාරණහාරකො චෙ, භික්ඛවෙ, දින්නාය පවාරණාය සඞ්ඝප්පත්තො පක්කමති, ආහටා හොති පවාරණා. පවාරණහාරකො චෙ, භික්ඛවෙ, දින්නාය පවාරණාය සඞ්ඝප්පත්තො විබ්භමති…පෙ.… කාලංකරොති… සාමණෙරො පටිජානාති… සික්ඛං පච්චක්ඛාතකො පටිජානාති… අන්තිමවත්ථුං අජ්ඣාපන්නකො පටිජානාති… උම්මත්තකො පටිජානාති… ඛිත්තචිත්තො පටිජානාති… වෙදනාට්ටො පටිජානාති… ආපත්තියා අදස්සනෙ උක්ඛිත්තකො පටිජානාති… ආපත්තියා අප්පටිකම්මෙ උක්ඛිත්තකො පටිජානාති… පාපිකාය දිට්ඨියා අප්පටිනිස්සග්ගෙ උක්ඛිත්තකො පටිජානාති… පණ්ඩකො පටිජානාති… ථෙය්යසංවාසකො පටිජානාති… තිත්ථියපක්කන්තකො පටිජානාති… තිරච්ඡානගතො පටිජානාති… මාතුඝාතකො පටිජානාති… පිතුඝාතකො පටිජානාති… අරහන්තඝාතකො පටිජානාති… භික්ඛුනිදූසකො පටිජානාති… සඞ්ඝභෙදකො පටිජානාති… ලොහිතුප්පාදකො පටිජානාති… උභතොබ්යඤ්ජනකො පටිජානාති, ආහටා හොති පවාරණා.
පවාරණහාරකො චෙ, භික්ඛවෙ, දින්නාය පවාරණාය සඞ්ඝප්පත්තො සුත්තො නාරොචෙති, ආහටා හොති පවාරණා. පවාරණහාරකස්ස අනාපත්ති . පවාරණහාරකො චෙ, භික්ඛවෙ, දින්නාය පවාරණාය සඞ්ඝප්පත්තො පමත්තො නාරොචෙති…පෙ.… සමාපන්නො නාරොචෙති, ආහටා හොති පවාරණා. පවාරණහාරකස්ස අනාපත්ති.
පවාරණහාරකො චෙ, භික්ඛවෙ , දින්නාය පවාරණාය සඞ්ඝප්පත්තො සඤ්චිච්ච නාරොචෙති, ආහටා හොති පවාරණා. පවාරණහාරකස්ස ආපත්ති දුක්කටස්ස. අනුජානාමි, භික්ඛවෙ, තදහු පවාරණාය පවාරණං දෙන්තෙන ඡන්දම්පි දාතුං, සන්ති සඞ්ඝස්ස කරණීයන්ති.
පවාරණාදානානුජානනා නිට්ඨිතා.
123. ඤාතකාදිග්ගහණකථා
214. තෙන ඛො පන සමයෙන අඤ්ඤතරං භික්ඛුං තදහු පවාරණාය ඤාතකා ගණ්හිංසු. භගවතො එතමත්ථං ආරොචෙසුං. ඉධ පන, භික්ඛවෙ, භික්ඛුං තදහු පවාරණාය ඤාතකා ගණ්හන්ති. තෙ ඤාතකා භික්ඛූහි එවමස්සු වචනීයා – ‘‘ඉඞ්ඝ, තුම්හෙ ආයස්මන්තො ඉමං භික්ඛුං මුහුත්තං මුඤ්චථ, යාවායං භික්ඛු පවාරෙතී’’ති. එවඤ්චෙතං ලභෙථ, ඉච්චෙතං කුසලං. නො චෙ ලභෙථ, තෙ ඤාතකා භික්ඛූහි එවමස්සු වචනීයා – ‘‘ඉඞ්ඝ, තුම්හෙ ආයස්මන්තො මුහුත්තං එකමන්තං හොථ, යාවායං භික්ඛු පවාරණං දෙතී’’ති. එවඤ්චෙතං ලභෙථ, ඉච්චෙතං කුසලං. නො චෙ ලභෙථ, තෙ ඤාතකා භික්ඛූහි එවමස්සු වචනීයා – ‘‘ඉඞ්ඝ, තුම්හෙ ආයස්මන්තො ඉමං භික්ඛුං මුහුත්තං නිස්සීමං නෙථ, යාව සඞ්ඝො පවාරෙතී’’ති. එවඤ්චෙතං ලභෙථ, ඉච්චෙතං කුසලං. නො චෙ ලභෙථ, න ත්වෙව වග්ගෙන සඞ්ඝෙන පවාරෙතබ්බං. පවාරෙය්ය චෙ, ආපත්ති දුක්කටස්ස.
ඉධ පන, භික්ඛවෙ, භික්ඛුං තදහු පවාරණාය රාජානො ගණ්හන්ති…පෙ.… චොරා ගණ්හන්ති … ධුත්තා ගණ්හන්ති… භික්ඛුපච්චත්ථිකා ගණ්හන්ති. තෙ භික්ඛුපච්චත්ථිකා භික්ඛූහි එවමස්සු වචනීයා – ‘‘ඉඞ්ඝ, තුම්හෙ ආයස්මන්තො ඉමං භික්ඛුං මුහුත්තං මුඤ්චථ, යාවායං භික්ඛු පවාරෙතී’’ති . එවඤ්චෙතං ලභෙථ, ඉච්චෙතං කුසලං. නො චෙ ලභෙථ, තෙ භික්ඛුපච්චත්ථිකා භික්ඛූහි එවමස්සු වචනීයා – ‘‘ඉඞ්ඝ, තුම්හෙ ආයස්මන්තො මුහුත්තං එකමන්තං හොථ, යාවායං භික්ඛු පවාරණං දෙතී’’ති. එවඤ්චෙතං ලභෙථ, ඉච්චෙතං කුසලං. නො චෙ ලභෙථ, තෙ භික්ඛුපච්චත්ථිකා භික්ඛූහි එවමස්සු වචනීයා – ‘‘ඉඞ්ඝ, තුම්හෙ ආයස්මන්තො ඉමං භික්ඛුං මුහුත්තං නිස්සීමං නෙථ, යාව සඞ්ඝො පවාරෙතී’’ති. එවඤ්චෙතං ලභෙථ, ඉච්චෙතං කුසලං. නො චෙ ලභෙථ, න ත්වෙව වග්ගෙන සඞ්ඝෙන පවාරෙතබ්බං. පවාරෙය්ය චෙ, ආපත්ති දුක්කටස්සාති.
ඤාතකාදිග්ගහණකථා නිට්ඨිතා.
124. සඞ්ඝපවාරණාදිප්පභෙදා
215. තෙන ඛො පන සමයෙන අඤ්ඤතරස්මිං ආවාසෙ තදහු පවාරණාය පඤ්ච භික්ඛූ විහරන්ති. අථ ඛො තෙසං භික්ඛූනං එතදහොසි – ‘‘භගවතා පඤ්ඤත්තං ‘සඞ්ඝෙන පවාරෙතබ්බ’න්ති. මයඤ්චම්හා පඤ්ච ජනා. කථං නු ඛො අම්හෙහි පවාරෙතබ්බ’’න්ති? භගවතො එතමත්ථං ආරොචෙසුං. අනුජානාමි, භික්ඛවෙ, පඤ්චන්නං සඞ්ඝෙ පවාරෙතුන්ති.
216. තෙන ඛො පන සමයෙන අඤ්ඤතරස්මිං ආවාසෙ තදහු පවාරණාය චත්තාරො භික්ඛූ විහරන්ති. අථ ඛො තෙසං භික්ඛූනං එතදහොසි – ‘‘භගවතා අනුඤ්ඤාතං පඤ්චන්නං සඞ්ඝෙ පවාරෙතුන්ති. මයඤ්චම්හා චත්තාරො ජනා. කථං නු ඛො අම්හෙහි පවාරෙතබ්බ’’න්ති? භගවතො එතමත්ථං ආරොචෙසුං. අනුජානාමි, භික්ඛවෙ, චතුන්නං අඤ්ඤමඤ්ඤං පවාරෙතුං. එවඤ්ච පන, භික්ඛවෙ, පවාරෙතබ්බං. බ්යත්තෙන භික්ඛුනා පටිබලෙන තෙ භික්ඛූ ඤාපෙතබ්බා –
‘‘සුණන්තු මෙ ආයස්මන්තො. අජ්ජ පවාරණා. යදායස්මන්තානං පත්තකල්ලං, මයං අඤ්ඤමඤ්ඤං පවාරෙය්යාමා’’ති.
ථෙරෙන භික්ඛුනා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා තෙ භික්ඛූ එවමස්සු වචනීයා – ‘‘අහං, ආවුසො, ආයස්මන්තෙ පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තො අනුකම්පං උපාදාය. පස්සන්තො පටිකරිස්සාමි. දුතියම්පි…පෙ.… තතියම්පි අහං, ආවුසො, ආයස්මන්තෙ පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තො අනුකම්පං උපාදාය. පස්සන්තො පටිකරිස්සාමී’’ති.
නවකෙන භික්ඛුනා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා තෙ භික්ඛූ එවමස්සු වචනීයා – ‘‘අහං, භන්තෙ, ආයස්මන්තෙ පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තො අනුකම්පං උපාදාය. පස්සන්තො පටිකරිස්සාමි. දුතියම්පි…පෙ.… තතියම්පි අහං, භන්තෙ, ආයස්මන්තෙ පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තො අනුකම්පං උපාදාය. පස්සන්තො පටිකරිස්සාමී’’ති.
තෙන ඛො පන සමයෙන අඤ්ඤතරස්මිං ආවාසෙ තදහු පවාරණාය තයො භික්ඛූ විහරන්ති. අථ ඛො තෙසං භික්ඛූනං එතදහොසි – ‘‘භගවතා අනුඤ්ඤාතං පඤ්චන්නං සඞ්ඝෙ පවාරෙතුං, චතුන්නං අඤ්ඤමඤ්ඤං පවාරෙතුං. මයඤ්චම්හා තයො ජනා. කථං නු ඛො අම්හෙහි පවාරෙතබ්බ’’න්ති? භගවතො එතමත්ථං ආරොචෙසුං. අනුජානාමි, භික්ඛවෙ, තිණ්ණං අඤ්ඤමඤ්ඤං පවාරෙතුං. එවඤ්ච පන, භික්ඛවෙ, පවාරෙතබ්බං. බ්යත්තෙන භික්ඛුනා පටිබලෙන තෙ භික්ඛූ ඤාපෙතබ්බා –
‘‘සුණන්තු මෙ ආයස්මන්තා. අජ්ජ පවාරණා. යදායස්මන්තානං පත්තකල්ලං, මයං අඤ්ඤමඤ්ඤං පවාරෙය්යාමා’’ති.
ථෙරෙන භික්ඛුනා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා තෙ භික්ඛූ එවමස්සු වචනීයා – ‘‘අහං, ආවුසො, ආයස්මන්තෙ පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තා අනුකම්පං උපාදාය. පස්සන්තො පටිකරිස්සාමි. දුතියම්පි…පෙ.… තතියම්පි අහං, ආවුසො, ආයස්මන්තෙ පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තා අනුකම්පං උපාදාය. පස්සන්තො පටිකරිස්සාමී’’ති.
නවකෙන භික්ඛුනා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා තෙ භික්ඛූ එවමස්සු වචනීයා – ‘‘අහං, භන්තෙ, ආයස්මන්තෙ පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තා අනුකම්පං උපාදාය. පස්සන්තො පටිකරිස්සාමි. දුතියම්පි…පෙ.… තතියම්පි අහං, භන්තෙ, ආයස්මන්තෙ පවාරෙමි දිට්ඨෙන වා සුතෙන වා පරිසඞ්කාය වා. වදන්තු මං ආයස්මන්තා අනුකම්පං උපාදාය. පස්සන්තො පටිකරිස්සාමී’’ති .
217. තෙන ඛො පන සමයෙන අඤ්ඤතරස්මිං ආවාසෙ තදහු පවාරණාය ද්වෙ භික්ඛූ විහරන්ති. අථ ඛො තෙසං භික්ඛූනං එතදහොසි – ‘‘භගවතා අනුඤ්ඤාතං පඤ්චන්නං සඞ්ඝෙ පවාරෙතුං, චතුන්නං අඤ්ඤමඤ්ඤං පවාරෙතුං, තිණ්ණං අඤ්ඤමඤ්ඤං පවාරෙතුං. මයඤ්චම්හා ද්වෙ ජනා. කථං නු ඛො අම්හෙහි පවාරෙතබ්බ’’න්ති. භගවතො එතමත්ථං ආරොචෙසුං. අනුජානාමි, භික්ඛවෙ, ද්වින්නං අඤ්ඤමඤ්ඤං පවාරෙතුං. එවඤ්ච පන, භික්ඛවෙ, පවාරෙතබ්බං. ථෙරෙන භික්ඛුනා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා නවො භික්ඛු එවමස්ස වචනීයො – ‘‘අහං, ආවුසො, ආයස්මන්තං පවාරෙමි දිට්ඨෙන වා සුතෙන වා පරිසඞ්කාය වා. වදතු මං ආයස්මා අනුකම්පං උපාදාය. පස්සන්තො පටිකරිස්සාමි. දුතියම්පි…පෙ.… තතියම්පි අහං, ආවුසො, ආයස්මන්තං පවාරෙමි දිට්ඨෙන වා සුතෙන වා පරිසඞ්කාය වා. වදතු මං ආයස්මා අනුකම්පං උපාදාය. පස්සන්තො පටිකරිස්සාමී’’ති.
නවකෙන භික්ඛුනා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා ථෙරො භික්ඛු එවමස්ස වචනීයො – ‘‘අහං, භන්තෙ, ආයස්මන්තං පවාරෙමි දිට්ඨෙන වා සුතෙන වා පරිසඞ්කාය වා. වදතු මං ආයස්මා අනුකම්පං උපාදාය. පස්සන්තො පටිකරිස්සාමි. දුතියම්පි…පෙ.… තතියම්පි අහං, භන්තෙ, ආයස්මන්තං පවාරෙමි දිට්ඨෙන වා සුතෙන වා පරිසඞ්කාය වා. වදතු මං ආයස්මා අනුකම්පං උපාදාය. පස්සන්තො පටිකරිස්සාමී’’ති.
218. තෙන ඛො පන සමයෙන අඤ්ඤතරස්මිං ආවාසෙ තදහු පවාරණාය එකො භික්ඛු විහරති. අථ ඛො තස්ස භික්ඛුනො එතදහොසි – ‘‘භගවතා අනුඤ්ඤාතං පඤ්චන්නං සඞ්ඝෙ පවාරෙතුං, චතුන්නං අඤ්ඤමඤ්ඤං පවාරෙතුං, තිණ්ණං අඤ්ඤමඤ්ඤං පවාරෙතුං, ද්වින්නං අඤ්ඤමඤ්ඤං පවාරෙතුං. අහඤ්චම්හි එකකො. කථං නු ඛො මයා පවාරෙතබ්බ’’න්ති? භගවතො එතමත්ථං ආරොචෙසුං.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය එකො භික්ඛු විහරති. තෙන, භික්ඛවෙ, භික්ඛුනා යත්ථ භික්ඛූ පටික්කමන්ති උපට්ඨානසාලාය වා මණ්ඩපෙ වා රුක්ඛමූලෙ වා, සො දෙසො සම්මජ්ජිත්වා පානීයං පරිභොජනීයං උපට්ඨාපෙත්වා ආසනං පඤ්ඤපෙත්වා පදීපං කත්වා නිසීදිතබ්බං. සචෙ අඤ්ඤෙ භික්ඛූ ආගච්ඡන්ති, තෙහි සද්ධිං පවාරෙතබ්බං; නො චෙ ආගච්ඡන්ති, ‘අජ්ජ මෙ පවාරණා’ති අධිට්ඨාතබ්බං. නො චෙ අධිට්ඨෙය්ය, ආපත්ති දුක්කටස්ස.
තත්ර , භික්ඛවෙ, යත්ථ පඤ්ච භික්ඛූ විහරන්ති, න එකස්ස පවාරණං ආහරිත්වා
චතූහි සඞ්ඝෙ පවාරෙතබ්බං. පවාරෙය්යුං චෙ, ආපත්ති දුක්කටස්ස. තත්ර, භික්ඛවෙ, යත්ථ චත්තාරො භික්ඛූ විහරන්ති, න එකස්ස පවාරණං ආහරිත්වා තීහි අඤ්ඤමඤ්ඤං පවාරෙතබ්බං. පවාරෙය්යුං චෙ, ආපත්ති දුක්කටස්ස. තත්ර, භික්ඛවෙ, යත්ථ තයො භික්ඛූ විහරන්ති, න එකස්ස පවාරණං ආහරිත්වා ද්වීහි අඤ්ඤමඤ්ඤං පවාරෙතබ්බං. පවාරෙය්යුං චෙ, ආපත්ති දුක්කටස්ස. තත්ර, භික්ඛවෙ, යත්ථ ද්වෙ භික්ඛූ විහරන්ති, න එකස්ස පවාරණං ආහරිත්වා එකෙන අධිට්ඨාතබ්බං. අධිට්ඨෙය්ය චෙ, ආපත්ති දුක්කටස්සාති.
සඞ්ඝපවාරණාදිප්පභෙදා නිට්ඨිතා.
125. ආපත්තිපටිකම්මවිධි
219. තෙන ඛො පන සමයෙන අඤ්ඤතරො භික්ඛු තදහු පවාරණාය ආපත්තිං ආපන්නො හොති. අථ ඛො තස්ස භික්ඛුනො එතදහොසි – ‘‘භගවතා පඤ්ඤත්තං ‘න සාපත්තිකෙන පවාරෙතබ්බ’න්ති. අහඤ්චම්හි ආපත්තිං ආපන්නො. කථං නු ඛො මයා පටිපජ්ජිතබ්බ’’න්ති? භගවතො එතමත්ථං ආරොචෙසුං ආරොචෙසි (ක.).
ඉධ පන, භික්ඛවෙ, භික්ඛු තදහු පවාරණාය ආපත්තිං ආපන්නො හොති. තෙන, භික්ඛවෙ, භික්ඛුනා එකං භික්ඛුං උපසඞ්කමිත්වා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා එවමස්ස වචනීයො – ‘‘අහං, ආවුසො, ඉත්ථන්නාමං ආපත්තිං ආපන්නො, තං පටිදෙසෙමී’’ති. තෙන වත්තබ්බො – ‘‘පස්සසී’’ති. ආම පස්සාමීති. ආයතිං සංවරෙය්යාසීති.
ඉධ පන, භික්ඛවෙ, භික්ඛු තදහු පවාරණාය ආපත්තියා වෙමතිකො හොති. තෙන, භික්ඛවෙ, භික්ඛුනා එකං භික්ඛුං උපසඞ්කමිත්වා එකංසං උත්තරාසඞ්ගං කරිත්වා උක්කුටිකං නිසීදිත්වා අඤ්ජලිං පග්ගහෙත්වා එවමස්ස වචනීයො – ‘‘අහං, ආවුසො, ඉත්ථන්නාමාය ආපත්තියා වෙමතිකො; යදා නිබ්බෙමතිකො භවිස්සාමි තදා තං ආපත්තිං පටිකරිස්සාමී’’ති වත්වා පවාරෙතබ්බං; න ත්වෙව තප්පච්චයා පවාරණාය අන්තරායො කාතබ්බොති.
ආපත්තිපටිකම්මවිධි නිට්ඨිතා.
126. ආපත්තිආවිකරණවිධි
220. තෙන ඛො පන සමයෙන අඤ්ඤතරො භික්ඛු පවාරයමානො ආපත්තිං සරති. අථ ඛො තස්ස භික්ඛුනො එතදහොසි – ‘‘භගවතා පඤ්ඤත්තං ‘න සාපත්තිකෙන පවාරෙතබ්බ’න්ති. අහඤ්චම්හි ආපත්තිං ආපන්නො. කථං නු ඛො මයා පටිපජ්ජිතබ්බ’’න්ති? භගවතො එතමත්ථං ආරොචෙසුං.
ඉධ පන, භික්ඛවෙ, භික්ඛු පවාරයමානො ආපත්තිං සරති. තෙන, භික්ඛවෙ, භික්ඛුනා සාමන්තො භික්ඛු එවමස්ස වචනීයො – ‘‘අහං, ආවුසො, ඉත්ථන්නාමං ආපත්තිං ආපන්නො. ඉතො වුට්ඨහිත්වා තං ආපත්තිං පටිකරිස්සාමී’’ති වත්වා පවාරෙතබ්බං; න ත්වෙව තප්පච්චයා පවාරණාය අන්තරායො කාතබ්බො.
ඉධ පන, භික්ඛවෙ, භික්ඛු පවාරයමානො ආපත්තියා වෙමතිකො හොති. තෙන, භික්ඛවෙ,
භික්ඛුනා සාමන්තො භික්ඛු එවමස්ස වචනීයො – ‘‘අහං, ආවුසො, ඉත්ථන්නාමාය ආපත්තියා වෙමතිකො; යදා නිබ්බෙමතිකො භවිස්සාමි තදා තං ආපත්තිං පටිකරිස්සාමී’’ති වත්වා පවාරෙතබ්බං; න ත්වෙව තප්පච්චයා පවාරණාය අන්තරායො කාතබ්බොති.
ආපත්ති ආවිකරණවිධි නිට්ඨිතා.
127. සභාගාපත්තිපටිකම්මවිධි
221. තෙන ඛො පන සමයෙන අඤ්ඤතරස්මිං ආවාසෙ තදහු පවාරණාය සබ්බො සඞ්ඝො සභාගං ආපත්තිං ආපන්නො හොති. අථ ඛො තෙසං භික්ඛූනං එතදහොසි – ‘‘භගවතා පඤ්ඤත්තං ‘න සභාගා ආපත්ති දෙසෙතබ්බා, න සභාගා ආපත්ති පටිග්ගහෙතබ්බා’ති. අයඤ්ච සබ්බො සඞ්ඝො සභාගං ආපත්තිං ආපන්නො. කථං නු ඛො අම්හෙහි පටිපජ්ජිතබ්බ’’න්ති? භගවතො එතමත්ථං ආරොචෙසුං.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සබ්බො සඞ්ඝො සභාගං ආපත්තිං ආපන්නො හොති. තෙහි, භික්ඛවෙ, භික්ඛූහි එකො භික්ඛු සාමන්තා ආවාසා සජ්ජුකං පාහෙතබ්බො – ගච්ඡාවුසො, තං ආපත්තිං පටිකරිත්වා ආගච්ඡ, මයං තෙ සන්තිකෙ තං ආපත්තිං පටිකරිස්සාමාති. එවඤ්චෙතං ලභෙථ, ඉච්චෙතං කුසලං. නො චෙ ලභෙථ, බ්යත්තෙන භික්ඛුනා පටිබලෙන සඞ්ඝො ඤාපෙතබ්බො –
‘‘සුණාතු මෙ, භන්තෙ, සඞ්ඝො. අයං සබ්බො සඞ්ඝො සභාගං ආපත්තිං ආපන්නො. යදා අඤ්ඤං භික්ඛුං සුද්ධං අනාපත්තිකං පස්සිස්සති තදා තස්ස සන්තිකෙ තං ආපත්තිං පටිකරිස්සතී’’ති වත්වා පවාරෙතබ්බං; න ත්වෙව තප්පච්චයා පවාරණාය අන්තරායො කාතබ්බො.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සබ්බො සඞ්ඝො සභාගාය ආපත්තියා වෙමතිකො හොති. බ්යත්තෙන භික්ඛුනා පටිබලෙන සඞ්ඝො ඤාපෙතබ්බො –
‘‘සුණාතු මෙ, භන්තෙ, සඞ්ඝො. අයං සබ්බො සඞ්ඝො සභාගාය ආපත්තියා වෙමතිකො. යදා නිබ්බෙමතිකො භවිස්සති තදා තං ආපත්තිං පටිකරිස්සතී’’ති වත්වා, පවාරෙතබ්බං, න ත්වෙව තප්පච්චයා පවාරණාය අන්තරායො කාතබ්බොති.
සභාගාපත්තිපටිකම්මවිධි නිට්ඨිතා.
පඨමභාණවාරො නිට්ඨිතො.
128. අනාපත්තිපන්නරසකං
222. තෙන ඛො පන සමයෙන අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතිංසු, පඤ්ච වා අතිරෙකා වා. තෙ න ජානිංසු ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙසුං. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡිංසු බහුතරා. භගවතො එතමත්ථං ආරොචෙසුං.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති බහුතරා. තෙහි, භික්ඛවෙ, භික්ඛූහි පුන පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, අවසෙසෙහි පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, අවසෙසෙහි පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරිතමත්තෙ අථඤ්ඤෙ ආවාසිකා භික්ඛූ ආගච්ඡන්ති බහුතරා. තෙහි, භික්ඛවෙ, භික්ඛූහි පුන පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරිතමත්තෙ අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරිතමත්තෙ අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරිතමත්තෙ, අවුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති බහුතරා. තෙහි, භික්ඛවෙ, භික්ඛූහි පුන පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරිතමත්තෙ, අවුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරිතමත්තෙ, අවුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරිතමත්තෙ, එකච්චාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති බහුතරා. තෙහි, භික්ඛවෙ, භික්ඛූහි පුන පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරිතමත්තෙ, එකච්චාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරිතමත්තෙ, එකච්චාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරිතමත්තෙ, සබ්බාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති බහුතරා. තෙහි, භික්ඛවෙ, භික්ඛූහි පුන පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරිතමත්තෙ, සබ්බාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං අනාපත්ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා සමග්ගසඤ්ඤිනො පවාරෙන්ති. තෙහි පවාරිතමත්තෙ, සබ්බාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං අනාපත්ති.
අනාපත්තිපන්නරසකං නිට්ඨිතං.
129. වග්ගාවග්ගසඤ්ඤීපන්නරසකං
223. ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා වග්ගසඤ්ඤිනො පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති බහුතරා. තෙහි, භික්ඛවෙ, භික්ඛූහි පුන පවාරෙතබ්බං. පවාරිතානං ආපත්ති දුක්කටස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා වග්ගසඤ්ඤිනො පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, අවසෙසෙහි පවාරෙතබ්බං. පවාරිතානං ආපත්ති දුක්කටස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා වග්ගසඤ්ඤිනො පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, අවසෙසෙහි පවාරෙතබ්බං. පවාරිතානං ආපත්ති දුක්කටස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ධම්මසඤ්ඤිනො විනයසඤ්ඤිනො වග්ගා වග්ගසඤ්ඤිනො පවාරෙන්ති. තෙහි පවාරිතමත්තෙ,…පෙ.… අවුට්ඨිතාය පරිසාය…පෙ.… එකච්චාය වුට්ඨිතාය පරිසාය…පෙ.… සබ්බාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති බහුතරා…පෙ.… සමසමා…පෙ.… ථොකතරා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං ආපත්ති දුක්කටස්ස.
වග්ගාවග්ගසඤ්ඤීපන්නරසකං නිට්ඨිතං.
130. වෙමතිකපන්නරසකං
224. ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘කප්පති නු ඛො අම්හාකං පවාරෙතුං, න නු ඛො කප්පතී’’ති වෙමතිකා පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති බහුතරා. තෙහි, භික්ඛවෙ, භික්ඛූහි පුන පවාරෙතබ්බං. පවාරිතානං ආපත්ති දුක්කටස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘කප්පති නු ඛො අම්හාකං පවාරෙතුං, න නු ඛො කප්පතී’’ති වෙමතිකා පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, අවසෙසෙහි පවාරෙතබ්බං. පවාරිතානං ආපත්ති දුක්කටස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘කප්පති නු ඛො අම්හාකං පවාරෙතුං, න නු ඛො කප්පතී’’ති වෙමතිකා පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, අවසෙසෙහි පවාරෙතබ්බං. පවාරිතානං ආපත්ති දුක්කටස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘කප්පති නු ඛො අම්හාකං පවාරෙතුං, න නු ඛො කප්පතී’’ති වෙමතිකා පවාරෙන්ති. තෙහි පවාරිතමත්තෙ…පෙ.… අවුට්ඨිතාය පරිසාය…පෙ.… එකච්චාය වුට්ඨිතාය පරිසාය…පෙ.… සබ්බාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති බහුතරා…පෙ.… සමසමා…පෙ.… ථොකතරා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං ආපත්ති දුක්කටස්ස.
වෙමතිකපන්නරසකං නිට්ඨිතං.
131. කුක්කුච්චපකතපන්නරසකං
225. ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘කප්පතෙව අම්හාකං පවාරෙතුං, නාම්හාකං න කප්පතී’’ති කුක්කුච්චපකතා පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති බහුතරා. තෙහි, භික්ඛවෙ, භික්ඛූහි පුන පවාරෙතබ්බං. පවාරිතානං ආපත්ති දුක්කටස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘කප්පතෙව අම්හාකං පවාරෙතුං, නාම්හාකං න කප්පතී’’ති කුක්කුච්චපකතා පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, අවසෙසෙහි පවාරෙතබ්බං. පවාරිතානං ආපත්ති දුක්කටස්ස.
ඉධ පන, භික්ඛවෙ, අඤ්ඤරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘කප්පතෙව අම්හාකං පවාරෙතුං, නාම්හාකං න කප්පතී’’ති කුක්කුච්චපකතා පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, අවසෙසෙහි අවසෙසෙහි තෙසං සන්තිකෙ (ක.) පවාරෙතබ්බං. පවාරිතානං ආපත්ති දුක්කටස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘කප්පතෙව අම්හාකං පවාරෙතුං, නාම්හාකං න කප්පතී’’ති කුක්කුච්චපකතා පවාරෙන්ති. තෙහි පවාරිතමත්තෙ,…පෙ.… අවුට්ඨිතාය පරිසාය…පෙ.… එකච්චාය වුට්ඨිතාය පරිසාය…පෙ.… සබ්බාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති බහුතරා…පෙ.… සමසමා…පෙ.… ථොකතරා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං ආපත්ති දුක්කටස්ස.
කුක්කුච්චපකතපන්නරසකං නිට්ඨිතං.
132. භෙදපුරෙක්ඛාරපන්නරසකං
226. ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති බහුතරා . තෙහි, භික්ඛවෙ, භික්ඛූහි පුන පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, අවසෙසෙහි පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ , කො තෙහි අත්ථො’’ති – භෙදපුරෙක්ඛාරා පවාරෙන්ති. තෙහි පවාරියමානෙ අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, අවසෙසෙහි පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති – භෙදපුරෙක්ඛාරා පවාරෙන්ති. තෙහි පවාරිතමත්තෙ අථඤ්ඤෙ ආවාසිකා භික්ඛූ ආගච්ඡන්ති බහුතරා, තෙහි භික්ඛවෙ භික්ඛූහි පුන පවාරෙතබ්බං, පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරිතමත්තෙ අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරිතමත්තෙ අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරිතමත්තෙ, අවුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති බහුතරා. තෙහි, භික්ඛවෙ, භික්ඛූහි පුන පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරිතමත්තෙ, අවුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරිතමත්තෙ, අවුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරිතමත්තෙ, එකච්චාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති බහුතරා. තෙහි, භික්ඛවෙ, භික්ඛූහි පුන පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරිතමත්තෙ, එකච්චාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරිතමත්තෙ, එකච්චාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරිතමත්තෙ, සබ්බාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති බහුතරා. තෙහි, භික්ඛවෙ, භික්ඛූහි පුන පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරිතමත්තෙ, සබ්බාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති සමසමා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං ආපත්ති ථුල්ලච්චයස්ස.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා
භික්ඛූ සන්නිපතන්ති, පඤ්ච වා අතිරෙකා වා. තෙ ජානන්ති ‘‘අත්ථඤ්ඤෙ ආවාසිකා භික්ඛූ අනාගතා’’ති. තෙ ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. තෙහි පවාරිතමත්තෙ, සබ්බාය වුට්ඨිතාය පරිසාය, අථඤ්ඤෙ ආවාසිකා භික්ඛූ ආගච්ඡන්ති ථොකතරා. පවාරිතා සුප්පවාරිතා, තෙසං සන්තිකෙ පවාරෙතබ්බං. පවාරිතානං ආපත්ති ථුල්ලච්චයස්ස.
භෙදපුරෙක්ඛාරපන්නරසකං නිට්ඨිතං.
පඤ්චවීසත්තිකා නිට්ඨිතා.
133. සීමොත්තන්තිකපෙය්යාලං
227. ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය සම්බහුලා ආවාසිකා භික්ඛූ සන්නිපතන්ති, පඤ්ච වා අතිරෙකා වා. තෙ න ජානන්ති ‘‘අඤ්ඤෙ ආවාසිකා භික්ඛූ අන්තොසීමං ඔක්කමන්තී’’ති…පෙ.… තෙ න ජානන්ති ‘‘අඤ්ඤෙ ආවාසිකා භික්ඛූ අන්තොසීමං ඔක්කන්තා’’ති…පෙ.… තෙ න පස්සන්ති අඤ්ඤෙ ආවාසිකෙ භික්ඛූ අන්තොසීමං ඔක්කමන්තෙ…පෙ.… තෙ න පස්සන්ති අඤ්ඤෙ ආවාසිකෙ භික්ඛූ අන්තොසීමං ඔක්කන්තෙ…පෙ.… තෙ න සුණන්ති ‘‘අඤ්ඤෙ ආවාසිකා භික්ඛූ අන්තොසීමං ඔක්කමන්තී’’ති…පෙ.… තෙ න සුණන්ති ‘‘අඤ්ඤෙ ආවාසිකා භික්ඛූ අන්තොසීමං ඔක්කන්තා’’ති…පෙ.….
ආවාසිකෙන ආවාසිකා එකසතපඤ්චසත්තති තිකනයතො, ආවාසිකෙන ආගන්තුකා, ආගන්තුකෙන ආවාසිකා, ආගන්තුකෙන ආගන්තුකා, පෙය්යාලමුඛෙන සත්ත තිකසතානි හොන්ති.
සීමොක්කන්තිකපෙය්යාලං නිට්ඨිතං.
134. දිවසනානත්තං
228. ඉධ පන, භික්ඛවෙ, ආවාසිකානං භික්ඛූනං චාතුද්දසො හොති, ආගන්තුකානං පන්නරසො. සචෙ ආවාසිකා බහුතරා හොන්ති, ආගන්තුකෙහි ආවාසිකානං අනුවත්තිතබ්බං. සචෙ සමසමා හොන්ති, ආගන්තුකෙහි ආවාසිකානං අනුවත්තිතබ්බං. සචෙ ආගන්තුකා බහුතරා හොන්ති, ආවාසිකෙහි ආගන්තුකානං අනුවත්තිතබ්බං.
ඉධ පන, භික්ඛවෙ, ආවාසිකානං භික්ඛූනං පන්නරසො හොති, ආගන්තුකානං චාතුද්දසො. සචෙ ආවාසිකා බහුතරා හොන්ති, ආගන්තුකෙහි ආවාසිකානං අනුවත්තිතබ්බං. සචෙ සමසමා හොන්ති, ආගන්තුකෙහි ආවාසිකානං අනුවත්තිතබ්බං. සචෙ ආගන්තුකා බහුතරා හොන්ති, ආවාසිකෙහි ආගන්තුකානං අනුවත්තිතබ්බං.
ඉධ පන, භික්ඛවෙ, ආවාසිකානං භික්ඛූනං පාටිපදො හොති, ආගන්තුකානං පන්නරසො. සචෙ ආවාසිකා බහුතරා හොන්ති, ආවාසිකෙහි ආගන්තුකානං නාකාමා දාතබ්බා සාමග්ගී; ආගන්තුකෙහි නිස්සීමං ගන්ත්වා පවාරෙතබ්බං. සචෙ සමසමා හොන්ති, ආවාසිකෙහි ආගන්තුකානං නාකාමා දාතබ්බා සාමග්ගී; ආගන්තුකෙහි නිස්සීමං ගන්ත්වා පවාරෙතබ්බං . සචෙ ආගන්තුකා බහුතරා හොන්ති, ආවාසිකෙහි ආගන්තුකානං සාමග්ගී වා දාතබ්බා, නිස්සීමං වා ගන්තබ්බං.
ඉධ පන, භික්ඛවෙ, ආවාසිකානං භික්ඛූනං පන්නරසො හොති, ආගන්තුකානං පාටිපදො. සචෙ ආවාසිකා බහුතරා හොන්ති, ආගන්තුකෙහි ආවාසිකානං සාමග්ගී වා දාතබ්බා, නිස්සීමං වා ගන්තබ්බං. සචෙ සමසමා හොන්ති, ආගන්තුකෙහි ආවාසිකානං සාමග්ගී වා දාතබ්බා, නිස්සීමං වා ගන්තබ්බං. සචෙ ආගන්තුකා බහුතරා හොන්ති, ආගන්තුකෙහි ආවාසිකානං නාකාමා දාතබ්බා සාමග්ගී; ආවාසිකෙහි නිස්සීමං ගන්ත්වා පවාරෙතබ්බං.
දිවසනානත්තං නිට්ඨිතං.
135. ලිඞ්ගාදිදස්සනං
229. ඉධ පන, භික්ඛවෙ, ආගන්තුකා භික්ඛූ පස්සන්ති ආවාසිකානං භික්ඛූනං ආවාසිකාකාරං, ආවාසිකලිඞ්ගං, ආවාසිකනිමිත්තං, ආවාසිකුද්දෙසං, සුප්පඤ්ඤත්තං මඤ්චපීඨං භිසිබිබ්බොහනං, පානීයං පරිභොජනීයං සපට්ඨිතං, පරිවෙණං සුසම්මට්ඨං; පස්සිත්වා වෙමතිකා හොන්ති – ‘‘අත්ථි නු ඛො ආවාසිකා භික්ඛූ, නත්ථි නු ඛො’’ති. තෙ වෙමතිකා න විචිනන්ති, අවිචිනිත්වා පවාරෙන්ති. ආපත්ති දුක්කටස්ස…පෙ.… තෙ වෙමතිකා විචිනන්ති, විචිනිත්වා න පස්සන්ති, අපස්සිත්වා පවාරෙන්ති. අනාපත්ති. තෙ වෙමතිකා විචිනන්ති, විචිනිත්වා පස්සන්ති, පස්සිත්වා එකතො පවාරෙන්ති. අනාපත්ති. තෙ වෙමතිකා විචිනන්ති, විචිනිත්වා පස්සන්ති, පස්සිත්වා පාටෙක්කං පවාරෙන්ති. ආපත්ති දුක්කටස්ස. තෙ වෙමතිකා විචිනන්ති, විචිනිත්වා පස්සන්ති, පස්සිත්වා – ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති – භෙදපුරෙක්ඛාරා පවාරෙන්ති. ආපත්ති ථුල්ලච්චයස්ස.
ඉධ පන, භික්ඛවෙ, ආගන්තුකා භික්ඛූ සුණන්ති ආවාසිකානං භික්ඛූනං ආවාසිකාකාරං, ආවාසිකලිඞ්ගං, ආවාසිකනිමිත්තං, ආවාසිකුද්දෙසං, චඞ්කමන්තානං පදසද්දං, සජ්ඣායසද්දං, උක්කාසිතසද්දං, ඛිපිතසද්දං; සුත්වා වෙමතිකා හොන්ති – ‘‘අත්ථි නු ඛො ආවාසිකා භික්ඛූ, නත්ථි නු ඛො’’ති. තෙ වෙමතිකා න විචිනන්ති, අවිචිනිත්වා පවාරෙන්ති. ආපත්ති දුක්කටස්ස. තෙ වෙමතිකා විචිනන්ති, විචිනිත්වා න පස්සන්ති, අපස්සිත්වා පවාරෙන්ති. අනාපත්ති. තෙ වෙමතිකා විචිනන්ති, විචිනිත්වා පස්සන්ති, පස්සිත්වා එකතො පවාරෙන්ති. අනාපත්ති. තෙ වෙමතිකා විචිනන්ති, විචිනිත්වා පස්සන්ති, පස්සිත්වා පාටෙක්කං පවාරෙන්ති. ආපත්ති දුක්කටස්ස. තෙ වෙමතිකා විචිනන්ති, විචිනිත්වා පස්සන්ති, පස්සිත්වා ‘‘නස්සන්තෙතෙ, විනස්සන්තෙතෙ, කො තෙහි අත්ථො’’ති භෙදපුරෙක්ඛාරා පවාරෙන්ති. ආපත්ති ථුල්ලච්චයස්ස.
ඉධ පන, භික්ඛවෙ, ආවාසිකා භික්ඛූ පස්සන්ති ආගන්තුකානං භික්ඛූනං ආගන්තුකාකාරං, ආගන්තුකලිඞ්ගං, ආගන්තුකනිමිත්තං, ආගන්තුකුද්දෙසං, අඤ්ඤාතකං පත්තං, අඤ්ඤාතකං චීවරං, අඤ්ඤාතකං නිසීදනං, පාදානං ධොතං, උදකනිස්සෙකං; පස්සිත්වා වෙමතිකා හොන්ති – ‘‘අත්ථි නු ඛො ආගන්තුකා භික්ඛූ, නත්ථි නු ඛො’’ති. තෙ වෙමතිකා න විචිනන්ති, අවිචිනිත්වා පවාරෙන්ති. ආපත්ති දුක්කටස්ස. තෙ වෙමතිකා විචිනන්ති, විචිනිත්වා න පස්සන්ති, අපස්සිත්වා පවාරෙන්ති. අනාපත්ති. තෙ වෙමතිකා විචිනන්ති, විචිනිත්වා පස්සන්ති, පස්සිත්වා එකතො පවාරෙන්ති. අනාපත්ති. තෙ වෙමතිකා විචිනන්ති, විචිනිත්වා පස්සන්ති, පස්සිත්වා පාටෙක්කං පවාරෙන්ති. ආපත්ති දුක්කටස්ස. තෙ වෙමතිකා විචිනන්ති, විචිනිත්වා පස්සන්ති, පස්සිත්වා – නස්සන්තෙතෙ, විනස්සන්තෙතෙ, කො තෙහි අත්ථොති – භෙදපුරෙක්ඛාරා පවාරෙන්ති. ආපත්ති ථුල්ලච්චයස්ස.
ඉධ පන, භික්ඛවෙ, ආවාසිකා භික්ඛූ සුණන්ති ආගන්තුකානං භික්ඛූනං ආගන්තුකාකාරං,
ආගන්තුකලිඞ්ගං, ආගන්තුකනිමිත්තං, ආගන්තුකුද්දෙසං, ආගච්ඡන්තානං පදසද්දං, උපාහනපප්ඵොටනසද්දං, උක්කාසිතසද්දං, ඛිපිතසද්දං; සුත්වා වෙමතිකා හොන්ති – ‘‘අත්ථි නු ඛො ආගන්තුකා භික්ඛූ, නත්ථි නු ඛො’’ති. තෙ වෙමතිකා න විචිනන්ති, අවිචිනිත්වා පවාරෙන්ති. ආපත්ති දුක්කටස්ස. තෙ වෙමතිකා විචිනන්ති, විචිනිත්වා න පස්සන්ති, අපස්සිත්වා පවාරෙන්ති. අනාපත්ති. තෙ වෙමතිකා විචිනන්ති, විචිනිත්වා පස්සන්ති, පස්සිත්වා එකතො පවාරෙන්ති. අනාපත්ති. තෙ වෙමතිකා විචිනන්ති, විචිනිත්වා පස්සන්ති, පස්සිත්වා පාටෙක්කං පවාරෙන්ති. ආපත්ති දුක්කටස්ස. තෙ වෙමතිකා විචිනන්ති, විචිනිත්වා පස්සන්ති, පස්සිත්වා – නස්සන්තෙතෙ, විනස්සන්තෙතෙ, කො තෙහි අත්ථොති – භෙදපුරෙක්ඛාරා පවාරෙන්ති. ආපත්ති ථුල්ලච්චයස්ස.
ලිඞ්ගාදිදස්සනං නිට්ඨිතං.
136. නානාසංවාසකාදීහි පවාරණා
230. ඉධ පන, භික්ඛවෙ, ආගන්තුකා භික්ඛූ පස්සන්ති ආවාසිකෙ භික්ඛූ නානාසංවාසකෙ. තෙ සමානසංවාසකදිට්ඨිං පටිලභන්ති, සමානසංවාසකදිට්ඨිං පටිලභිත්වා න පුච්ඡන්ති, අපුච්ඡිත්වා එකතො පවාරෙන්ති. අනාපත්ති. තෙ පුච්ඡන්ති, පුච්ඡිත්වා නාභිවිතරන්ති, අනභිවිතරිත්වා එකතො පවාරෙන්ති. ආපත්ති දුක්කටස්ස. තෙ පුච්ඡන්ති, පුච්ඡිත්වා නාභිවිතරන්ති, අනභිවිතරිත්වා පාටෙක්කං පවාරෙන්ති. අනාපත්ති.
ඉධ පන, භික්ඛවෙ, ආගන්තුකා භික්ඛූ පස්සන්ති ආවාසිකෙ භික්ඛූ සමානසංවාසකෙ. තෙ නානාසංවාසකදිට්ඨිං පටිලභන්ති, නානාසංවාසකදිට්ඨිං පටිලභිත්වා න පුච්ඡන්ති, අපුච්ඡිත්වා එකතො පවාරෙන්ති. ආපත්ති දුක්කටස්ස. තෙ පුච්ඡන්ති, පුච්ඡිත්වා අභිවිතරන්ති, අභිවිතරිත්වා පාටෙක්කං පවාරෙන්ති. ආපත්ති දුක්කටස්ස. තෙ පුච්ඡන්ති, පුච්ඡිත්වා අභිවිතරන්ති, අභිවිතරිත්වා එකතො පවාරෙන්ති. අනාපත්ති.
ඉධ පන, භික්ඛවෙ, ආවාසිකා භික්ඛූ පස්සන්ති ආගන්තුකෙ භික්ඛූ නානාසංවාසකෙ. තෙ සමානසංවාසකදිට්ඨිං පටිලභන්ති, සමානසංවාසකදිට්ඨිං පටිලභිත්වා න පුච්ඡන්ති, අපුච්ඡිත්වා එකතො පවාරෙන්ති. අනාපත්ති. තෙ පුච්ඡන්ති, පුච්ඡිත්වා නාභිවිතරන්ති, අනභිවිතරිත්වා එකතො පවාරෙන්ති. ආපත්ති දුක්කටස්ස. තෙ පුච්ඡන්ති, පුච්ඡිත්වා නාභිවිතරන්ති, අනභිවිතරිත්වා පාටෙක්කං පවාරෙන්ති. අනාපත්ති.
ඉධ පන, භික්ඛවෙ, ආවාසිකා භික්ඛූ පස්සන්ති ආගන්තුකෙ භික්ඛූ සමානසංවාසකෙ. තෙ නානාසංවාසකදිට්ඨිං පටිලභන්ති, නානාසංවාසකදිට්ඨිං පටිලභිත්වා න පුච්ඡන්ති, අපුච්ඡිත්වා එකතො පවාරෙන්ති. ආපත්ති දුක්කටස්ස. තෙ පුච්ඡන්ති, පුච්ඡිත්වා අභිවිතරන්ති, අභිවිතරිත්වා පාටෙක්කං පවාරෙන්ති. ආපත්ති දුක්කටස්ස. තෙ පුච්ඡන්ති, පුච්ඡිත්වා අභිවිතරන්ති, අභිවිතරිත්වා එකතො පවාරෙන්ති. අනාපත්ති.
නානාසංවාසකාදීහි පවාරණා නිට්ඨිතා.
137. න ගන්තබ්බවාරො
231. න, භික්ඛවෙ, තදහු පවාරණාය සභික්ඛුකා ආවාසා අභික්ඛුකො ආවාසො ගන්තබ්බො, අඤ්ඤත්ර සඞ්ඝෙන, අඤ්ඤත්ර අන්තරායා. න, භික්ඛවෙ, තදහු පවාරණාය සභික්ඛුකා ආවාසා අභික්ඛුකො අනාවාසො ගන්තබ්බො, අඤ්ඤත්ර සඞ්ඝෙන, අඤ්ඤත්ර අන්තරායා. න, භික්ඛවෙ, තදහු පවාරණාය සභික්ඛුකා ආවාසා අභික්ඛුකො ආවාසො වා අනාවාසො වා ගන්තබ්බො, අඤ්ඤත්ර සඞ්ඝෙන, අඤ්ඤත්ර අන්තරායා.
න , භික්ඛවෙ, තදහු පවාරණාය සභික්ඛුකා අනාවාසා අභික්ඛුකො ආවාසො ගන්තබ්බො, අඤ්ඤත්ර සඞ්ඝෙන, අඤ්ඤත්ර අන්තරායා. න, භික්ඛවෙ, තදහු පවාරණාය සභික්ඛුකා අනාවාසා අභික්ඛුකො අනාවාසො ගන්තබ්බො, අඤ්ඤත්ර සඞ්ඝෙන, අඤ්ඤත්ර අන්තරායා. න, භික්ඛවෙ, තදහු පවාරණාය සභික්ඛුකා අනාවාසා අභික්ඛුකො ආවාසො වා අනාවාසො වා ගන්තබ්බො, අඤ්ඤත්ර සඞ්ඝෙන, අඤ්ඤත්ර අන්තරායා.
න, භික්ඛවෙ, තදහු පවාරණාය සභික්ඛුකා ආවාසා වා අනාවාසා වා අභික්ඛුකො ආවාසො ගන්තබ්බො, අඤ්ඤත්ර සඞ්ඝෙන, අඤ්ඤත්ර අන්තරායා. න, භික්ඛවෙ, තදහු පවාරණාය සභික්ඛුකා ආවාසා වා අනාවාසා වා අභික්ඛුකො අනාවාසො ගන්තබ්බො, අඤ්ඤත්ර සඞ්ඝෙන, අඤ්ඤත්ර අන්තරායා . න, භික්ඛවෙ, තදහු පවාරණාය සභික්ඛුකා ආවාසා වා අනාවාසා වා අභික්ඛුකො ආවාසො වා අනාවාසො වා ගන්තබ්බො, අඤ්ඤත්ර සඞ්ඝෙන, අඤ්ඤත්ර අන්තරායා.
න, භික්ඛවෙ, තදහු පවාරණාය සභික්ඛුකා ආවාසා සභික්ඛුකො ආවාසො ගන්තබ්බො, යත්ථස්සු භික්ඛූ නානාසංවාසකා, අඤ්ඤත්ර සඞ්ඝෙන, අඤ්ඤත්ර අන්තරායා. න, භික්ඛවෙ, තදහු පවාරණාය සභික්ඛුකා ආවාසා සභික්ඛුකො අනාවාසො ගන්තබ්බො, යත්ථස්සු භික්ඛූ නානාසංවාසකා, අඤ්ඤත්ර සඞ්ඝෙන, අඤ්ඤත්ර අන්තරායා. න, භික්ඛවෙ, තදහු පවාරණාය සභික්ඛුකා ආවාසා සභික්ඛුකො ආවාසො වා අනාවාසො වා ගන්තබ්බො, යත්ථස්සු භික්ඛූ නානාසංවාසකා, අඤ්ඤත්ර සඞ්ඝෙන, අඤ්ඤත්ර අන්තරායා.
න, භික්ඛවෙ, තදහු පවාරණාය සභික්ඛුකා අනාවාසා සභික්ඛුකො ආවාසො ගන්තබ්බො, යත්ථස්සු භික්ඛූ නානාසංවාසකා, අඤ්ඤත්ර සඞ්ඝෙන, අඤ්ඤත්ර අන්තරායා. න, භික්ඛවෙ, තදහු පවාරණාය සභික්ඛුකා අනාවාසා සභික්ඛුකො අනාවාසො ගන්තබ්බො, යත්ථස්සු භික්ඛූ නානාසංවාසකා, අඤ්ඤත්ර සඞ්ඝෙන, අඤ්ඤත්ර අන්තරායා. න, භික්ඛවෙ, තදහු පවාරණාය සභික්ඛුකා අනාවාසා සභික්ඛුකො ආවාසො වා අනාවාසො වා ගන්තබ්බො, යත්ථස්සු භික්ඛූ නානාසංවාසකා, අඤ්ඤත්ර සඞ්ඝෙන, අඤ්ඤත්ර අන්තරායා.
න , භික්ඛවෙ, තදහු පවාරණාය සභික්ඛුකා ආවාසා වා අනාවාසා
වා සභික්ඛුකො ආවාසො ගන්තබ්බො, යත්ථස්සු භික්ඛූ නානාසංවාසකා, අඤ්ඤත්ර සඞ්ඝෙන, අඤ්ඤත්ර අන්තරායා. න, භික්ඛවෙ, තදහු පවාරණාය සභික්ඛුකා ආවාසා වා අනාවාසා වා සභික්ඛුකො අනාවාසො ගන්තබ්බො, යත්ථස්සු භික්ඛූ නානාසංවාසකා, අඤ්ඤත්ර සඞ්ඝෙන, අඤ්ඤත්ර අන්තරායා. න, භික්ඛවෙ, තදහු පවාරණාය සභික්ඛුකා ආවාසා වා අනාවාසා වා සභික්ඛුකො ආවාසො වා අනාවාසො වා ගන්තබ්බො, යත්ථස්සු භික්ඛූ නානාසංවාසකා, අඤ්ඤත්ර සඞ්ඝෙන, අඤ්ඤත්ර අන්තරායා.
න ගන්තබ්බවාරො නිට්ඨිතො.
138. ගන්තබ්බවාරො
232. ගන්තබ්බො, භික්ඛවෙ, තදහු පවාරණාය සභික්ඛුකා ආවාසා සභික්ඛුකො ආවාසො , යත්ථස්සු භික්ඛූ සමානසංවාසකා, යං ජඤ්ඤා ‘‘සක්කොමි අජ්ජෙව ගන්තු’’න්ති. ගන්තබ්බො, භික්ඛවෙ, තදහු පවාරණාය සභික්ඛුකා ආවාසා සභික්ඛුකො අනාවාසො…පෙ.… සභික්ඛුකො ආවාසො වා අනාවාසො වා, යත්ථස්සු භික්ඛූ සමානසංවාසකා, යං ජඤ්ඤා ‘‘සක්කොමි අජ්ජෙව ගන්තු’’න්ති.
ගන්තබ්බො , භික්ඛවෙ, තදහු පවාරණාය සභික්ඛුකා අනාවාසා සභික්ඛුකො ආවාසො…පෙ.… සභික්ඛුකො අනාවාසො…පෙ.… සභික්ඛුකො ආවාසො වා අනාවාසො වා, යත්ථස්සු භික්ඛූ සමානසංවාසකා, යං ජඤ්ඤා ‘‘සක්කොමි අජ්ජෙව ගන්තු’’න්ති.
ගන්තබ්බො, භික්ඛවෙ, තදහු පවාරණාය සභික්ඛුකා ආවාසා වා අනාවාසා වා සභික්ඛුකො
ආවාසො…පෙ.… සභික්ඛුකො අනාවාසො…පෙ.… සභික්ඛුකො ආවාසො වා අනාවාසො වා, යත්ථස්සු භික්ඛූ සමානසංවාසකා, යං ජඤ්ඤා ‘‘සක්කොමි අජ්ජෙව ගන්තු’’න්ති.
ගන්තබ්බවාරො නිට්ඨිතො.
139. වජ්ජනීයපුග්ගලසන්දස්සනා
233. න, භික්ඛවෙ, භික්ඛුනියා නිසින්නපරිසාය පවාරෙතබ්බං. යො පවාරෙය්ය, ආපත්ති දුක්කටස්ස. න, භික්ඛවෙ, සික්ඛමානාය…පෙ.… න සාමණෙරස්ස…පෙ.… න සාමණෙරියා…පෙ.… න සික්ඛං පච්චක්ඛාතකස්ස…පෙ.… න අන්තිමවත්ථුං අජ්ඣාපන්නකස්ස නිසින්නපරිසාය පවාරෙතබ්බං. යො පවාරෙය්ය, ආපත්ති දුක්කටස්ස .
න ආපත්තියා අදස්සනෙ උක්ඛිත්තකස්ස නිසින්නපරිසාය පවාරෙතබ්බං. යො පවාරෙය්ය, යථාධම්මො කාරෙතබ්බො. න ආපත්තියා අප්පටිකම්මෙ උක්ඛිත්තකස්ස…පෙ.… න පාපිකාය දිට්ඨියා අප්පටිනිස්සග්ගෙ උක්ඛිත්තකස්ස නිසින්නපරිසාය පවාරෙතබ්බං. යො පවාරෙය්ය, යථාධම්මො කාරෙතබ්බො.
න පණ්ඩකස්ස නිසින්නපරිසාය පවාරෙතබ්බං. යො පවාරෙය්ය, ආපත්ති දුක්කටස්ස. න ථෙය්යසංවාසකස්ස…පෙ.… න තිත්ථියපක්කන්තකස්ස…පෙ.… න තිරච්ඡානගතස්ස…පෙ.… න මාතුඝාතකස්ස…පෙ.… න පිතුඝාතකස්ස…පෙ.… න අරහන්තඝාතකස්ස…පෙ.… න භික්ඛුනිදූසකස්ස …පෙ.… න සඞ්ඝභෙදකස්ස…පෙ.… න ලොහිතුප්පාදකස්ස …පෙ.… න උභතොබ්යඤ්ජනකස්ස නිසින්නපරිසාය පවාරෙතබ්බං. යො පවාරෙය්ය, ආපත්ති දුක්කටස්ස.
න, භික්ඛවෙ, පාරිවාසිකපවාරණාදානෙන පවාරෙතබ්බං, අඤ්ඤත්ර අවුට්ඨිතාය පරිසාය. න ච, භික්ඛවෙ, අප්පවාරණාය පවාරෙතබ්බං, අඤ්ඤත්ර සඞ්ඝසාමග්ගියාති.
වජ්ජනීයපුග්ගලසන්දස්සනා නිට්ඨිතා.
දුතියභාණවාරො නිට්ඨිතො.
140. ද්වෙවාචිකාදිපවාරණා
234. තෙන ඛො පන සමයෙන කොසලෙසු ජනපදෙ අඤ්ඤතරස්මිං ආවාසෙ තදහු පවාරණාය සවරභයං අහොසි. භික්ඛූ නාසක්ඛිංසු තෙවාචිකං පවාරෙතුං. භගවතො එතමත්ථං ආරොචෙසුං. අනුජානාමි, භික්ඛවෙ, ද්වෙවාචිකං පවාරෙතුන්ති.
බාළ්හතරං සවරභයං අහොසි. භික්ඛූ නාසක්ඛිංසු ද්වෙවාචිකං පවාරෙතුං. භගවතො එතමත්ථං ආරොචෙසුං. අනුජානාමි, භික්ඛවෙ, එකවාචිකං පවාරෙතුන්ති.
බාළ්හතරං සවරභයං අහොසි. භික්ඛූ නාසක්ඛිංසු එකවාචිකං පවාරෙතුං. භගවතො එතමත්ථං ආරොචෙසුං. අනුජානාමි, භික්ඛවෙ, සමානවස්සිකං පවාරෙතුන්ති.
තෙන ඛො පන සමයෙන අඤ්ඤතරස්මිං ආවාසෙ තදහු පවාරණාය මනුස්සෙහි දානං දෙන්තෙහි යෙභුය්යෙන රත්ති ඛෙපිතා හොති. අථ ඛො තෙසං භික්ඛූනං එතදහොසි – ‘‘මනුස්සෙහි දානං දෙන්තෙහි යෙභුය්යෙන රත්ති ඛෙපිතා. සචෙ සඞ්ඝො තෙවාචිකං පවාරෙස්සති, අප්පවාරිතොව සඞ්ඝො භවිස්සති, අථායං රත්ති විභායිස්සති. කථං නු ඛො අම්හෙහි පටිපජ්ජිතබ්බ’’න්ති? භගවතො එතමත්ථං ආරොචෙසුං. ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය මනුස්සෙහි දානං දෙන්තෙහි යෙභුය්යෙන රත්ති ඛෙපිතා හොති. තත්ර චෙ, භික්ඛවෙ, භික්ඛූනං එවං හොති – ‘‘මනුස්සෙහි දානං දෙන්තෙහි යෙභුය්යෙන රත්ති ඛෙපිතා. සචෙ සඞ්ඝො තෙවාචිකං පවාරෙස්සති, අප්පවාරිතොව සඞ්ඝො භවිස්සති, අථායං රත්ති විභායිස්සතී’’ති, බ්යත්තෙන භික්ඛුනා පටිබලෙන සඞ්ඝො ඤාපෙතබ්බො –
‘‘සුණාතු මෙ, භන්තෙ, සඞ්ඝො. මනුස්සෙහි දානං දෙන්තෙහි යෙභුය්යෙන රත්ති ඛෙපිතා. සචෙ සඞ්ඝො තෙවාචිකං පවාරෙස්සති, අප්පවාරිතොව සඞ්ඝො භවිස්සති, අථායං රත්ති විභායිස්සති. යදි සඞ්ඝස්ස පත්තකල්ලං, සඞ්ඝො ද්වෙවාචිකං, එකවාචිකං, සමානවස්සිකං පවාරෙය්යා’’ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය භික්ඛූහි ධම්මං භණන්තෙහි…පෙ.… සුත්තන්තිකෙහි සුත්තන්තං සඞ්ගායන්තෙහි… විනයධරෙහි විනයං විනිච්ඡිනන්තෙහි… ධම්මකථිකෙහි ධම්මං සාකච්ඡන්තෙහි… භික්ඛූහි කලහං කරොන්තෙහි යෙභුය්යෙන රත්ති ඛෙපිතා හොති. තත්ර චෙ භික්ඛූනං එවං හොති – ‘‘භික්ඛූහි කලහං කරොන්තෙහි යෙභුය්යෙන රත්ති ඛෙපිතා. සචෙ සඞ්ඝො තෙවාචිකං පවාරෙස්සති, අප්පවාරිතොව සඞ්ඝො භවිස්සති, අථායං රත්ති විභායිස්සතී’’ති, බ්යත්තෙන භික්ඛුනා පටිබලෙන සඞ්ඝො ඤාපෙතබ්බො –
‘‘සුණාතු මෙ, භන්තෙ, සඞ්ඝො. භික්ඛූහි කලහං කරොන්තෙහි යෙභුය්යෙන රත්ති ඛෙපිතා. සචෙ සඞ්ඝො තෙවාචිකං පවාරෙස්සති, අප්පවාරිතොව සඞ්ඝො භවිස්සති, අථායං රත්ති විභායිස්සති. යදි සඞ්ඝස්ස පත්තකල්ලං, සඞ්ඝො ද්වෙවාචිකං, එකවාචිකං, සමානවස්සිකං පවාරෙය්යා’’ති.
තෙන ඛො පන සමයෙන කොසලෙසු ජනපදෙ අඤ්ඤතරස්මිං ආවාසෙ තදහු පවාරණාය මහාභික්ඛුසඞ්ඝො සන්නිපතිතො හොති , පරිත්තඤ්ච අනොවස්සිකං අනොවස්සකං (ක.) හොති, මහා ච මෙඝො උග්ගතො හොති. අථ ඛො තෙසං භික්ඛූනං එතදහොසි – ‘‘අයං ඛො මහාභික්ඛුසඞ්ඝො සන්නිපතිතො, පරිත්තඤ්ච අනොවස්සිකං, මහා ච මෙඝො උග්ගතො. සචෙ සඞ්ඝො තෙවාචිකං පවාරෙස්සති, අප්පවාරිතොව සඞ්ඝො භවිස්සති, අථායං මෙඝො පවස්සිස්සති. කථං නු ඛො අම්හෙහි පටිපජ්ජිතබ්බ’’න්ති? භගවතො එතමත්ථං ආරොචෙසුං. ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය මහාභික්ඛුසඞ්ඝො සන්නිපතිතො හොති, පරිත්තඤ්ච අනොවස්සිකං හොති, මහා ච මෙඝො උග්ගතො හොති. තත්ර චෙ භික්ඛූනං එවං හොති – ‘‘අයං ඛො මහාභික්ඛුසඞ්ඝො සන්නිපතිතො, පරිත්තඤ්ච අනොවස්සිකං, මහා ච මෙඝො උග්ගතො. සචෙ සඞ්ඝො තෙවාචිකං පවාරෙස්සති, අප්පවාරිතොව සඞ්ඝො භවිස්සති, අථායං මෙඝො පවස්සිස්සතී’’ති. බ්යත්තෙන භික්ඛුනා පටිබලෙන සඞ්ඝො ඤාපෙතබ්බො –
‘‘සුණාතු මෙ, භන්තෙ, සඞ්ඝො. අයං මහාභික්ඛුසඞ්ඝො සන්නිපතිතො, පරිත්තඤ්ච අනොවස්සිකං, මහා ච මෙඝො උග්ගතො. සචෙ සඞ්ඝො තෙවාචිකං පවාරෙස්සති, අප්පවාරිතොව සඞ්ඝො භවිස්සති, අථායං මෙඝො පවස්සිස්සති. යදි සඞ්ඝස්ස පත්තකල්ලං, සඞ්ඝො ද්වෙවාචිකං, එකවාචිකං, සමානවස්සිකං පවාරෙය්යා’’ති.
ඉධ පන, භික්ඛවෙ, අඤ්ඤතරස්මිං ආවාසෙ තදහු පවාරණාය රාජන්තරායො හොති…පෙ.… චොරන්තරායො හොති… අග්යන්තරායො හොති… උදකන්තරායො හොති… මනුස්සන්තරායො හොති… අමනුස්සන්තරායො හොති… වාළන්තරායො හොති… සරීසපන්තරායො හොති… ජීවිතන්තරායො හොති… බ්රහ්මචරියන්තරායො හොති. තත්ර චෙ භික්ඛූනං එවං හොති – ‘‘අයං ඛො, බ්රහ්මචරියන්තරායො . සචෙ සඞ්ඝො තෙවාචිකං පවාරෙස්සති, අප්පවාරිතොව සඞ්ඝො භවිස්සති, අථායං බ්රහ්මචරියන්තරායො භවිස්සතී’’ති, බ්යත්තෙන භික්ඛුනා පටිබලෙන සඞ්ඝො ඤාපෙතබ්බො –
‘‘සුණාතු මෙ, භන්තෙ, සඞ්ඝො. අයං බ්රහ්මචරියන්තරායො. සචෙ සඞ්ඝො තෙවාචිකං පවාරෙස්සති, අප්පවාරිතොව සඞ්ඝො භවිස්සති, අථායං බ්රහ්මචරියන්තරායො භවිස්සති. යදි සඞ්ඝස්ස පත්තකල්ලං, සඞ්ඝො ද්වෙවාචිකං, එකවාචිකං, සමානවස්සිකං පවාරෙය්යා’’ති.
ද්වෙවාචිකාදිපවාරණා නිට්ඨිතා.
141. පවාරණාඨපනං
235. තෙන ඛො පන සමයෙන ඡබ්බග්ගියා භික්ඛූ සාපත්තිකා පවාරෙන්ති. භගවතො එතමත්ථං ආරොචෙසුං. න, භික්ඛවෙ, සාපත්තිකෙන පවාරෙතබ්බං. යො පවාරෙය්ය, ආපත්ති දුක්කටස්ස. අනුජානාමි, භික්ඛවෙ, යො සාපත්තිකො පවාරෙති, තස්ස ඔකාසං කාරාපෙත්වා ආපත්තියා චොදෙතුන්ති.
තෙන ඛො පන සමයෙන ඡබ්බග්ගියා භික්ඛූ ඔකාසං කාරාපියමානා න ඉච්ඡන්ති ඔකාසං කාතුං. භගවතො එතමත්ථං ආරොචෙසුං. අනුජානාමි, භික්ඛවෙ, ඔකාසං අකරොන්තස්ස පවාරණං ඨපෙතුං. එවඤ්ච පන, භික්ඛවෙ, ඨපෙතබ්බා. තදහු පවාරණාය චාතුද්දසෙ වා පන්නරසෙ වා තස්මිං පුග්ගලෙ සම්මුඛීභූතෙ සඞ්ඝමජ්ඣෙ උදාහරිතබ්බං – ‘‘සුණාතු මෙ, භන්තෙ, සඞ්ඝො. ඉත්ථන්නාමො පුග්ගලො සාපත්තිකො . තස්ස පවාරණං ඨපෙමි. න තස්මිං සම්මුඛීභූතෙ පවාරෙතබ්බ’’න්ති. ඨපිතා හොති පවාරණාති.
තෙන ඛො පන සමයෙන ඡබ්බග්ගියා භික්ඛූ – පුරම්හාකං පෙසලා භික්ඛූ පවාරණං ඨපෙන්තීති – පටිකච්චෙව සුද්ධානං භික්ඛූනං අනාපත්තිකානං අවත්ථුස්මිං අකාරණෙ පවාරණං ඨපෙන්ති, පවාරිතානම්පි පවාරණං ඨපෙන්ති. භගවතො එතමත්ථං ආරොචෙසුං. න, භික්ඛවෙ, සුද්ධානං භික්ඛූනං අනාපත්තිකානං අවත්ථුස්මිං අකාරණෙ පවාරණා ඨපෙතබ්බා. යො ඨපෙය්ය, ආපත්ති දුක්කටස්ස. න, භික්ඛවෙ, පවාරිතානම්පි පවාරණා ඨපෙතබ්බා. යො ඨපෙය්ය, ආපත්ති දුක්කටස්ස.
236. එවං ඛො, භික්ඛවෙ, ඨපිතා හොති පවාරණා, එවං අට්ඨපිතා. කථඤ්ච, භික්ඛවෙ, අට්ඨපිතා හොති පවාරණා? තෙවාචිකාය චෙ, භික්ඛවෙ, පවාරණාය භාසිතාය ලපිතාය පරියොසිතාය පවාරණං ඨපෙති, අට්ඨපිතා හොති පවාරණා. ද්වෙවාචිකාය චෙ, භික්ඛවෙ,… එකවාචිකාය චෙ, භික්ඛවෙ,… සමානවස්සිකාය චෙ, භික්ඛවෙ, පවාරණාය භාසිතාය ලපිතාය පරියොසිතාය පවාරණං ඨපෙති , අට්ඨපිතා හොති පවාරණා. එවං ඛො, භික්ඛවෙ, අට්ඨපිතා හොති පවාරණා.
කථඤ්ච, භික්ඛවෙ, ඨපිතා හොති පවාරණා? තෙවාචිකාය, චෙ, භික්ඛවෙ, පවාරණාය භාසිතාය ලපිතාය අපරියොසිතාය පවාරණං ඨපෙති, ඨපිතා හොති පවාරණා. ද්වෙවාචිකාය චෙ, භික්ඛවෙ,… එකවාචිකාය චෙ, භික්ඛවෙ,… සමානවස්සිකාය චෙ, භික්ඛවෙ, පවාරණාය භාසිතාය ලපිතාය අපරියොසිතාය පවාරණං ඨපෙති, ඨපිතා හොති පවාරණා. එවං ඛො, භික්ඛවෙ, ඨපිතා හොති පවාරණා.
237. ඉධ පන, භික්ඛවෙ, තදහු පවාරණාය භික්ඛු භික්ඛුස්ස පවාරණං ඨපෙති. තං චෙ භික්ඛුං අඤ්ඤෙ භික්ඛූ ජානන්ති, ‘‘අයං ඛො ආයස්මා අපරිසුද්ධකායසමාචාරො, අපරිසුද්ධවචීසමාචාරො, අපරිසුද්ධාජීවො, බාලො, අබ්යත්තො, න පටිබලො අනුයුඤ්ජීයමානො අනුයොගං දාතු’’න්ති, ‘අලං, භික්ඛු, මා භණ්ඩනං, මා කලහං, මා විග්ගහං, මා විවාද’න්ති ඔමද්දිත්වා සඞ්ඝෙන පවාරෙතබ්බං.
ඉධ පන, භික්ඛවෙ, තදහු පවාරණාය භික්ඛු භික්ඛුස්ස පවාරණං ඨපෙති. තං චෙ භික්ඛුං අඤ්ඤෙ භික්ඛූ ජානන්ති, ‘‘අයං ඛො ආයස්මා පරිසුද්ධකායසමාචාරො, අපරිසුද්ධවචීසමාචාරො, අපරිසුද්ධාජීවො, බාලො, අබ්යත්තො, න පටිබලො අනුයුඤ්ජීයමානො අනුයොගං දාතු’’න්ති, ‘අලං, භික්ඛු, මා භණ්ඩනං, මා කලහං, මා විග්ගහං, මා විවාද’න්ති ඔමද්දිත්වා සඞ්ඝෙන පවාරෙතබ්බං.
ඉධ පන, භික්ඛවෙ, තදහු පවාරණාය භික්ඛු භික්ඛුස්ස පවාරණං ඨපෙති. තං චෙ භික්ඛුං අඤ්ඤෙ භික්ඛූ ජානන්ති, ‘‘අයං ඛො ආයස්මා පරිසුද්ධකායසමාචාරො, පරිසුද්ධවචීසමාචාරො, අපරිසුද්ධාජීවො, බාලො, අබ්යත්තො, න පටිබලො අනුයුඤ්ජීයමානො අනුයොගං දාතු’’න්ති, ‘අලං, භික්ඛු, මා භණ්ඩනං, මා කලහං, මා විග්ගහං, මා විවාද’න්ති ඔමද්දිත්වා සඞ්ඝෙන පවාරෙතබ්බං.
ඉධ පන, භික්ඛවෙ, තදහු පවාරණාය භික්ඛු භික්ඛුස්ස පවාරණං ඨපෙති. තං චෙ භික්ඛුං අඤ්ඤෙ භික්ඛූ ජානන්ති, ‘‘අයං ඛො ආයස්මා පරිසුද්ධකායසමාචාරො , පරිසුද්ධවචීසමාචාරො, පරිසුද්ධාජීවො, බාලො, අබ්යත්තො , න පටිබලො අනුයුඤ්ජීයමානො අනුයොගං දාතු’’න්ති, ‘අලං, භික්ඛු, මා භණ්ඩනං, මා කලහං, මා විග්ගහං, මා විවාද’න්ති ඔමද්දිත්වා සඞ්ඝෙන පවාරෙතබ්බං.
ඉධ පන, භික්ඛවෙ, තදහු පවාරණාය භික්ඛු භික්ඛුස්ස පවාරණං ඨපෙති. තං චෙ භික්ඛුං අඤ්ඤෙ භික්ඛූ ජානන්ති, ‘‘අයං ඛො ආයස්මා පරිසුද්ධකායසමාචාරො, පරිසුද්ධවචීසමාචාරො, පරිසුද්ධාජීවො, පණ්ඩිතො, බ්යත්තො, පටිබලො අනුයුඤ්ජීයමානො අනුයොගං දාතු’’න්ති, සො එවමස්ස වචනීයො, ‘‘යං ඛො ත්වං, ආවුසො, ඉමස්ස භික්ඛුනො පවාරණං ඨපෙසි, කිම්හි නං ඨපෙසි, සීලවිපත්තියා වා ඨපෙසි, ආචාරවිපත්තියා වා ඨපෙසි, දිට්ඨිවිපත්තියා වා ඨපෙසී’’ති? සො චෙ එවං වදෙය්ය – ‘‘සීලවිපත්තියා වා ඨපෙමි, ආචාරවිපත්තියා වා ඨපෙමි, දිට්ඨිවිපත්තියා වා ඨපෙමී’’ති, සො එවමස්ස වචනීයො – ‘‘ජානාසි පනායස්මා සීලවිපත්තිං, ජානාසි ආචාරවිපත්තිං, ජානාසි දිට්ඨිවිපත්ති’’න්ති? සො චෙ එවං වදෙය්ය – ‘‘ජානාමි ඛො අහං, ආවුසො, සීලවිපත්තිං, ජානාමි ආචාරවිපත්තිං, ජානාමි දිට්ඨිවිපත්ති’’න්ති, සො එවමස්ස වචනීයො – ‘‘කතමා පනාවුසො, සීලවිපත්ති, කතමා ආචාරවිපත්ති, කතමා දිට්ඨිවිපත්තී’’ති? සො චෙ එවං වදෙය්ය – ‘‘චත්තාරි පාරාජිකානි, තෙරස සඞ්ඝාදිසෙසා, අයං සීලවිපත්ති; ථුල්ලච්චයං, පාචිත්තියං, පාටිදෙසනීයං, දුක්කටං, දුබ්භාසිතං, අයං ආචාරවිපත්ති; මිච්ඡාදිට්ඨි, අන්තග්ගාහිකාදිට්ඨි, අයං දිට්ඨිවිපත්තී’’ති, සො එවමස්ස වචනීයො – ‘‘යං ඛො ත්වං , ආවුසො, ඉමස්ස භික්ඛුනො පවාරණං ඨපෙසි, දිට්ඨෙන වා ඨපෙසි, සුතෙන වා ඨපෙසි, පරිසඞ්කාය වා ඨපෙසී’’ති? සො චෙ එවං වදෙය්ය – ‘‘දිට්ඨෙන වා ඨපෙමි, සුතෙන වා ඨපෙමි, පරිසඞ්කාය වා ඨපෙමී’’ති, සො එවමස්ස වචනීයො – ‘‘යං ඛො ත්වං, ආවුසො, ඉමස්ස භික්ඛුනො දිට්ඨෙන පවාරණං ඨපෙසි, කිං තෙ දිට්ඨං, කින්ති තෙ දිට්ඨං, කදා තෙ දිට්ඨං, කත්ථ තෙ දිට්ඨං, පාරාජිකං අජ්ඣාපජ්ජන්තො දිට්ඨො, සඞ්ඝාදිසෙසං අජ්ඣාපජ්ජන්තො දිට්ඨො, ථුල්ලච්චයං… පාචිත්තියං… පාටිදෙසනීයං… දුක්කටං… දුබ්භාසිතං අජ්ඣාපජ්ජන්තො දිට්ඨො, කත්ථ ච ත්වං අහොසි, කත්ථ චායං භික්ඛු අහොසි, කිඤ්ච ත්වං කරොසි, කිඤ්චායං භික්ඛු කරොතී’’ති? සො චෙ එවං වදෙය්ය – ‘‘න ඛො අහං, ආවුසො, ඉමස්ස භික්ඛුනො දිට්ඨෙන පවාරණං ඨපෙමි, අපිච සුතෙන පවාරණං ඨපෙමී’’ති, සො එවමස්ස වචනීයො – ‘‘යං ඛො ත්වං, ආවුසො, ඉමස්ස භික්ඛුනො සුතෙන පවාරණං ඨපෙසි, කිං තෙ සුතං, කින්ති තෙ සුතං, කදා තෙ සුතං, කත්ථ තෙ සුතං, පාරාජිකං අජ්ඣාපන්නොති සුතං, සඞ්ඝාදිසෙසං අජ්ඣාපන්නොති සුතං, ථුල්ලච්චයං… පාචිත්තියං… පාටිදෙසනීයං… දුක්කටං… දුබ්භාසිතං අජ්ඣාපන්නොති සුතං, භික්ඛුස්ස සුතං, භික්ඛුනියා සුතං, සික්ඛමානාය සුතං, සාමණෙරස්ස සුතං, සාමණෙරියා සුතං, උපාසකස්ස සුතං, උපාසිකාය සුතං, රාජූනං සුතං, රාජමහාමත්තානං සුතං, තිත්ථියානං සුතං, තිත්ථියසාවකානං සුත’’න්ති? සො චෙ එවං වදෙය්ය – ‘‘න ඛො අහං, ආවුසො, ඉමස්ස භික්ඛුනො සුතෙන පවාරණං ඨපෙමි , අපිච පරිසඞ්කාය පවාරණං ඨපෙමී’’ති, සො එවමස්ස වචනීයො – ‘‘යං ඛො ත්වං, ආවුසො, ඉමස්ස භික්ඛුනො පරිසඞ්කාය පවාරණං ඨපෙසි, කිං පරිසඞ්කසි, කින්ති පරිසඞ්කසි, කදා පරිසඞ්කසි, කත්ථ පරිසඞ්කසි, පාරාජිකං අජ්ඣාපන්නොති පරිසඞ්කසි, සඞ්ඝාදිසෙසං අජ්ඣාපන්නොති පරිසඞ්කසි, ථුල්ලච්චයං… පාචිත්තියං… පාටිදෙසනීයං… දුක්කටං… දුබ්භාසිතං අජ්ඣාපන්නොති පරිසඞ්කසි, භික්ඛුස්ස සුත්වා පරිසඞ්කසි, භික්ඛුනියා සුත්වා පරිසඞ්කසි, සික්ඛමානාය සුත්වා පරිසඞ්කසි, සාමණෙරස්ස සුත්වා පරිසඞ්කසි, සාමණෙරියා සුත්වා පරිසඞ්කසි, උපාසකස්ස සුත්වා පරිසඞ්කසි, උපාසිකාය සුත්වා පරිසඞ්කසි, රාජූනං සුත්වා පරිසඞ්කසි, රාජමහාමත්තානං සුත්වා පරිසඞ්කසි, තිත්ථියානං සුත්වා පරිසඞ්කසි, තිත්ථියසාවකානං සුත්වා පරිසඞ්කසී’’ති? සො චෙ එවං වදෙය්ය – ‘‘න ඛො අහං, ආවුසො, ඉමස්ස භික්ඛුනො පරිසඞ්කාය පවාරණං ඨපෙමි, අපි ච අහම්පි න ජානාමි කෙන පනාහං ඉමස්ස භික්ඛුනො පවාරණං ඨපෙමී’’ති. සො චෙ, භික්ඛවෙ, චොදකො භික්ඛු අනුයොගෙන විඤ්ඤූනං සබ්රහ්මචාරීනං චිත්තං න ආරාධෙති, අනනුවාදො චුදිතො භික්ඛූති අලං වචනාය. සො චෙ, භික්ඛවෙ, චොදකො භික්ඛු අනුයොගෙන විඤ්ඤූනං සබ්රහ්මචාරීනං චිත්තං ආරාධෙති, සානුවාදො චුදිතො භික්ඛූති අලං වචනාය. සො චෙ, භික්ඛවෙ, චොදකො භික්ඛු අමූලකෙන පාරාජිකෙන අනුද්ධංසිතං පටිජානාති, සඞ්ඝාදිසෙසං ආරොපෙත්වා සඞ්ඝෙන පවාරෙතබ්බං. සො චෙ, භික්ඛවෙ, චොදකො භික්ඛු අමූලකෙන සඞ්ඝාදිසෙසෙන අනුද්ධංසිතං පටිජානාති, යථාධම්මං කාරාපෙත්වා සඞ්ඝෙන පවාරෙතබ්බං. සො චෙ, භික්ඛවෙ, චොදකො, භික්ඛු අමූලකෙන ථුල්ලච්චයෙන… පාචිත්තියෙන… පාටිදෙසනීයෙන… දුක්කටෙන… දුබ්භාසිතෙන අනුද්ධංසිතං පටිජානාති, යථාධම්මං කාරාපෙත්වා සඞ්ඝෙන පවාරෙතබ්බං. සො චෙ, භික්ඛවෙ, චුදිතො භික්ඛු පාරාජිකං අජ්ඣාපන්නොති පටිජානාති, නාසෙත්වා සඞ්ඝෙන පවාරෙතබ්බං. සො චෙ, භික්ඛවෙ, චුදිතො භික්ඛු සඞ්ඝාදිසෙසං අජ්ඣාපන්නොති පටිජානාති, සඞ්ඝාදිසෙසං ආරොපෙත්වා සඞ්ඝෙන පවාරෙතබ්බං. සො චෙ, භික්ඛවෙ, චුදිතො භික්ඛු ථුල්ලච්චයං… පාචිත්තියං… පාටිදෙසනීයං… දුක්කටං… දුබ්භාසිතං අජ්ඣාපන්නොති පටිජානාති, යථාධම්මං කාරාපෙත්වා සඞ්ඝෙන පවාරෙතබ්බං.
පවාරණාඨපනං නිට්ඨිතං.
142. ථුල්ලච්චයවත්ථුකාදි
238. ඉධ පන, භික්ඛවෙ, භික්ඛු තදහු පවාරණාය ථුල්ලච්චයං අජ්ඣාපන්නො හොති. එකච්චෙ භික්ඛූ ථුල්ලච්චයදිට්ඨිනො හොන්ති, එකච්චෙ භික්ඛූ සඞ්ඝාදිසෙසදිට්ඨිනො හොන්ති. යෙ තෙ, භික්ඛවෙ, භික්ඛූ ථුල්ලච්චයදිට්ඨිනො, තෙහි සො, භික්ඛවෙ, භික්ඛු එකමන්තං අපනෙත්වා යථාධම්මං කාරාපෙත්වා සඞ්ඝං උපසඞ්කමිත්වා එවමස්ස වචනීයො – ‘‘යං ඛො සො, ආවුසො, භික්ඛු ආපත්තිං ආපන්නො, සාස්ස යථාධම්මං පටිකතා. යදි සඞ්ඝස්ස පත්තකල්ලං, සඞ්ඝො පවාරෙය්යා’’ති.
ඉධ පන, භික්ඛවෙ, භික්ඛු තදහු පවාරණාය ථුල්ලච්චයං අජ්ඣාපන්නො හොති. එකච්චෙ භික්ඛූ ථුල්ලච්චයදිට්ඨිනො හොන්ති, එකච්චෙ භික්ඛූ පාචිත්තියදිට්ඨිනො හොන්ති…පෙ.… එකච්චෙ භික්ඛූ ථුල්ලච්චයදිට්ඨිනො හොන්ති, එකච්චෙ භික්ඛූ පාටිදෙසනීයදිට්ඨිනො හොන්ති… එකච්චෙ භික්ඛූ ථුල්ලච්චයදිට්ඨිනො හොන්ති, එකච්චෙ භික්ඛූ දුක්කටදිට්ඨිනො හොන්ති… එකච්චෙ භික්ඛූ ථුල්ලච්චයදිට්ඨිනො හොන්ති, එකච්චෙ භික්ඛූ දුබ්භාසිතදිට්ඨිනො හොන්ති. යෙ තෙ, භික්ඛවෙ, භික්ඛූ ථුල්ලච්චයදිට්ඨිනො, තෙහි සො, භික්ඛවෙ, භික්ඛු එකමන්තං අපනෙත්වා යථාධම්මං කාරාපෙත්වා සඞ්ඝං උපසඞ්කමිත්වා එවමස්ස වචනීයො – ‘‘යං ඛො සො, ආවුසො, භික්ඛු ආපත්තිං ආපන්නො, සාස්ස යථාධම්මං පටිකතා. යදි සඞ්ඝස්ස පත්තකල්ලං, සඞ්ඝො පවාරෙය්යා’’ති.
ඉධ පන, භික්ඛවෙ, භික්ඛු තදහු පවාරණාය පාචිත්තියං අජ්ඣාපන්නො හොති…පෙ.… පාටිදෙසනීයං අජ්ඣාපන්නො හොති… දුක්කටං අජ්ඣාපන්නො හොති… දුබ්භාසිතං අජ්ඣාපන්නො හොති. එකච්චෙ භික්ඛූ දුබ්භාසිතදිට්ඨිනො හොන්ති, එකච්චෙ භික්ඛූ සඞ්ඝාදිසෙසදිට්ඨිනො හොන්ති. යෙ තෙ, භික්ඛවෙ, භික්ඛූ දුබ්භාසිතදිට්ඨිනො, තෙහි සො, භික්ඛවෙ, භික්ඛු එකමන්තං අපනෙත්වා යථාධම්මං කාරාපෙත්වා සඞ්ඝං උපසඞ්කමිත්වා එවමස්ස වචනීයො – ‘‘යං ඛො සො, ආවුසො, භික්ඛු ආපත්තිං ආපන්නො, සාස්ස යථාධම්මං පටිකතා. යදි සඞ්ඝස්ස පත්තකල්ලං, සඞ්ඝො පවාරෙය්යා’’ති.
ඉධ පන, භික්ඛවෙ, භික්ඛු තදහු පවාරණාය දුබ්භාසිතං අජ්ඣාපන්නො හොති. එකච්චෙ භික්ඛූ දුබ්භාසිතදිට්ඨිනො හොන්ති, එකච්චෙ භික්ඛූ ථුල්ලච්චයදිට්ඨිනො හොන්ති…පෙ.… එකච්චෙ භික්ඛූ දුබ්භාසිතදිට්ඨිනො හොන්ති, එකච්චෙ භික්ඛූ පාචිත්තියදිට්ඨිනො හොන්ති… එකච්චෙ භික්ඛූ දුබ්භාසිතදිට්ඨිනො හොන්ති, එකච්චෙ භික්ඛූ පාටිදෙසනීයදිට්ඨිනො හොන්ති… එකච්චෙ භික්ඛූ දුබ්භාසිතදිට්ඨිනො හොන්ති, එකච්චෙ භික්ඛූ දුක්කටදිට්ඨිනො හොන්ති. යෙ තෙ, භික්ඛවෙ, භික්ඛූ දුබ්භාසිතදිට්ඨිනො, තෙහි සො, භික්ඛවෙ, භික්ඛු එකමන්තං අපනෙත්වා යථාධම්මං කාරාපෙත්වා සඞ්ඝං උපසඞ්කමිත්වා එවමස්ස වචනීයො – ‘‘යං ඛො සො, ආවුසො, භික්ඛු ආපත්තිං ආපන්නො, සාස්ස යථාධම්මං පටිකතා. යදි සඞ්ඝස්ස පත්තකල්ලං, සඞ්ඝො පවාරෙය්යා’’ති.
ථුල්ලච්චයවත්ථුකාදි නිට්ඨිතා.
143. වත්ථුඨපනාදි
239. ඉධ පන, භික්ඛවෙ, භික්ඛු තදහු පවාරණාය සඞ්ඝමජ්ඣෙ උදාහරෙය්ය – ‘‘සුණාතු මෙ, භන්තෙ, සඞ්ඝො. ඉදං වත්ථු පඤ්ඤායති, න පුග්ගලො. යදි සඞ්ඝස්ස පත්තකල්ලං, වත්ථුං ඨපෙත්වා සඞ්ඝො පවාරෙය්යා’’ති. සො එවමස්ස වචනීයො – ‘‘භගවතා ඛො, ආවුසො, විසුද්ධානං පවාරණා පඤ්ඤත්තා. සචෙ වත්ථු පඤ්ඤායති, න පුග්ගලො, ඉදානෙව නං වදෙහී’’ති.
ඉධ පන, භික්ඛවෙ, භික්ඛු තදහු පවාරණාය සඞ්ඝමජ්ඣෙ උදාහරෙය්ය – ‘‘සුණාතු මෙ, භන්තෙ, සඞ්ඝො. අයං පුග්ගලො පඤ්ඤායති, න වත්ථු. යදි සඞ්ඝස්ස පත්තකල්ලං, පුග්ගලං ඨපෙත්වා සඞ්ඝො පවාරෙය්යා’’ති. සො එවමස්ස වචනීයො – ‘‘භගවතා ඛො, ආවුසො, සමග්ගානං පවාරණා පඤ්ඤත්තා. සචෙ පුග්ගලො පඤ්ඤායති, න වත්ථු, ඉදානෙව නං වදෙහී’’ති.
ඉධ පන, භික්ඛවෙ, භික්ඛු තදහු පවාරණාය සඞ්ඝමජ්ඣෙ උදාහරෙය්ය – ‘‘සුණාතු මෙ, භන්තෙ, සඞ්ඝො. ඉදං වත්ථු ච පුග්ගලො ච පඤ්ඤායති. යදි සඞ්ඝස්ස පත්තකල්ලං, වත්ථුඤ්ච පුග්ගලඤ්ච ඨපෙත්වා සඞ්ඝො පවාරෙය්යා’’ති. සො එවමස්ස වචනීයො – ‘‘භගවතා ඛො, ආවුසො, විසුද්ධානඤ්ච සමග්ගානඤ්ච පවාරණා පඤ්ඤත්තා. සචෙ වත්ථු ච පුග්ගලො ච පඤ්ඤායති, ඉදානෙව නං වදෙහී’’ති.
පුබ්බෙ චෙ, භික්ඛවෙ, පවාරණාය වත්ථු පඤ්ඤායති, පච්ඡා පුග්ගලො, කල්ලං වචනාය. පුබ්බෙ චෙ, භික්ඛවෙ, පවාරණාය පුග්ගලො පඤ්ඤායති, පච්ඡා වත්ථු, කල්ලං වචනාය. පුබ්බෙ චෙ, භික්ඛවෙ, පවාරණාය වත්ථු ච පුග්ගලො ච පඤ්ඤායති, තං චෙ කතාය පවාරණාය උක්කොටෙති, උක්කොටනකං පාචිත්තියන්ති.
වත්ථුඨපනාදි නිට්ඨිතා.
144. භණ්ඩනකාරකවත්ථු
240. තෙන ඛො පන සමයෙන සම්බහුලා සන්දිට්ඨා සම්භත්තා භික්ඛූ කොසලෙසු ජනපදෙ අඤ්ඤතරස්මිං ආවාසෙ වස්සං උපගච්ඡිංසු. තෙසං සාමන්තා අඤ්ඤෙ භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා වස්සං උපගච්ඡිංසු – මයං තෙසං භික්ඛූනං වස්සංවුට්ඨානං පවාරණාය පවාරණං ඨපෙස්සාමාති. අස්සොසුං ඛො තෙ භික්ඛූ – ‘‘අම්හාකං කිර සාමන්තා අඤ්ඤෙ භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා වස්සං උපගතා – මයං තෙසං භික්ඛූනං වස්සංවුට්ඨානං පවාරණාය පවාරණං ඨපෙස්සාමා’’ති. කථං නු ඛො අම්හෙහි පටිපජ්ජිතබ්බන්ති? භගවතො එතමත්ථං ආරොචෙසුං.
ඉධ පන, භික්ඛවෙ, සම්බහුලා සන්දිට්ඨා සම්භත්තා භික්ඛූ අඤ්ඤතරස්මිං ආවාසෙ වස්සං උපගච්ඡන්ති. තෙසං සාමන්තා අඤ්ඤෙ භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා වස්සං උපගච්ඡන්ති – මයං තෙසං භික්ඛූනං වස්සංවුට්ඨානං පවාරණාය පවාරණං ඨපෙස්සාමාති. අනුජානාමි, භික්ඛවෙ, තෙහි භික්ඛූහි ද්වෙ තයො උපොසථෙ චාතුද්දසිකෙ කාතුං – කථං මයං තෙහි භික්ඛූහි පඨමතරං පවාරෙය්යාමාති. තෙ චෙ, භික්ඛවෙ, භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා තං ආවාසං ආගච්ඡන්ති, තෙහි, භික්ඛවෙ, ආවාසිකෙහි භික්ඛූහි ලහුං ලහුං සන්නිපතිත්වා පවාරෙතබ්බං, පවාරෙත්වා වත්තබ්බා – ‘‘පවාරිතා ඛො මයං, ආවුසො; යථායස්මන්තා මඤ්ඤන්ති තථා කරොන්තූ’’ති. තෙ චෙ, භික්ඛවෙ, භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා අසංවිහිතා තං ආවාසං ආගච්ඡන්ති, තෙහි, භික්ඛවෙ, ආවාසිකෙහි භික්ඛූහි ආසනං පඤ්ඤපෙතබ්බං, පාදොදකං පාදපීඨං පාදකථලිකං උපනික්ඛිපිතබ්බං, පච්චුග්ගන්ත්වා පත්තචීවරං පටිග්ගහෙතබ්බං, පානීයෙන පරිපුච්ඡිතබ්බා; තෙසං වික්ඛිත්වා වික්ඛිපාපෙත්වා (පටිවිසොධකානං මති), ආචික්ඛිත්වා (ක.) නිස්සීමං ගන්ත්වා පවාරෙතබ්බං, පවාරෙත්වා වත්තබ්බා – ‘‘පවාරිතා ඛො මයං, ආවුසො; යථායස්මන්තා මඤ්ඤන්ති තථා කරොන්තූ’’ති. එවඤ්චෙතං ලභෙථ, ඉච්චෙතං කුසලං. නො චෙ ලභෙථ, ආවාසිකෙන භික්ඛුනා බ්යත්තෙන පටිබලෙන ආවාසිකා භික්ඛූ ඤාපෙතබ්බා –
‘‘සුණන්තු මෙ, ආයස්මන්තො ආයස්මන්තා (ක.), ආවාසිකා. යදායස්මන්තානං පත්තකල්ලං, ඉදානි උපොසථං කරෙය්යාම, පාතිමොක්ඛං උද්දිසෙය්යාම , ආගමෙ කාළෙ පවාරෙය්යාමා’’ති. තෙ චෙ, භික්ඛවෙ, භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා තෙ භික්ඛූ එවං වදෙය්යුං – ‘‘සාධාවුසො, ඉදානෙව නො පවාරෙථා’’ති, තෙ එවමස්සු වචනීයා – ‘‘අනිස්සරා ඛො තුම්හෙ, ආවුසො, අම්හාකං පවාරණාය; න තාව මයං පවාරෙය්යාමා’’ති. තෙ චෙ, භික්ඛවෙ, භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා තං කාළං අනුවසෙය්යුං, ආවාසිකෙන, භික්ඛවෙ, භික්ඛුනා බ්යත්තෙන පටිබලෙන ආවාසිකා භික්ඛූ ඤාපෙතබ්බා –
‘‘සුණන්තු මෙ, ආයස්මන්තො, ආවාසිකා. යදායස්මන්තානං පත්තකල්ලං, ඉදානි උපොසථං කරෙය්යාම, පාතිමොක්ඛං උද්දිසෙය්යාම, ආගමෙ ජුණ්හෙ පවාරෙය්යාමා’’ති. තෙ චෙ, භික්ඛවෙ, භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා තෙ භික්ඛූ එවං වදෙය්යුං – ‘‘සාධාවුසො, ඉදානෙව නො පවාරෙය්යාථා’’ති, තෙ එවමස්සු වචනීයා – ‘‘අනිස්සරා ඛො තුම්හෙ, ආවුසො, අම්හාකං පවාරණාය, න තාව මයං පවාරෙය්යාමා’’ති. තෙ චෙ, භික්ඛවෙ, භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා තම්පි ජුණ්හං අනුවසෙය්යුං, තෙහි, භික්ඛවෙ, භික්ඛූහි සබ්බෙහෙව ආගමෙ ජුණ්හෙ කොමුදියා චාතුමාසිනියා අකාමා පවාරෙතබ්බං.
තෙහි චෙ, භික්ඛවෙ, භික්ඛූහි පවාරියමානෙ ගිලානො අගිලානස්ස පවාරණං ඨපෙති, සො එවමස්ස වචනීයො – ‘‘ආයස්මා ඛො ගිලානො. ගිලානො ච අනනුයොගක්ඛමො වුත්තො භගවතා. ආගමෙහි, ආවුසො, යාව අරොගො හොසි. අරොගො ආකඞ්ඛමානො චොදෙස්සසී’’ති. එවඤ්චෙ වුච්චමානො චොදෙති, අනාදරියෙ පාචිත්තියං. තෙහි චෙ, භික්ඛවෙ, භික්ඛූහි පවාරියමානෙ අගිලානො ගිලානස්ස පවාරණං ඨපෙති, සො එවමස්ස වචනීයො – ‘‘අයං ඛො, ආවුසො, භික්ඛු ගිලානො. ගිලානො ච අනනුයොගක්ඛමො වුත්තො භගවතා. ආගමෙහි, ආවුසො, යාවායං භික්ඛු අරොගො හොති. අරොගං ආකඞ්ඛමානො චොදෙස්සසී’’ති. එවඤ්චෙ වුච්චමානො චොදෙති, අනාදරියෙ පාචිත්තියං. තෙහි චෙ, භික්ඛවෙ, භික්ඛූහි පවාරියමානෙ ගිලානො ගිලානස්ස පවාරණං ඨපෙති, සො එවමස්ස වචනීයො – ‘‘ආයස්මන්තා ඛො ගිලානා. ගිලානො ච අනනුයොගක්ඛමො වුත්තො භගවතා. ආගමෙහි, ආවුසො, යාව අරොගා හොථ. අරොගො අරොගං ආකඞ්ඛමානො චොදෙස්සසී’’ති යාව අරොගො හොති, අරොගං ආකඞ්ඛමානො චොදෙස්සසීති (ක.). එවඤ්චෙ වුච්චමානො චොදෙති, අනාදරියෙ පාචිත්තියං. තෙහි චෙ, භික්ඛවෙ, භික්ඛූහි පවාරියමානෙ අගිලානො අගිලානස්ස පවාරණං ඨපෙති, උභො සඞ්ඝෙන සමනුයුඤ්ජිත්වා සමනුගාහිත්වා සමනුභාසිත්වා (සී.) යථාධම්මං කාරාපෙත්වා සඞ්ඝෙන පවාරෙතබ්බන්ති.
භණ්ඩනකාරකවත්ථු නිට්ඨිතං.
145. පවාරණාසඞ්ගහො
241. තෙන ඛො පන සමයෙන සම්බහුලා සන්දිට්ඨා සම්භත්තා භික්ඛූ කොසලෙසු ජනපදෙ අඤ්ඤතරස්මිං ආවාසෙ වස්සං උපගච්ඡිංසු. තෙසං සමග්ගානං සම්මොදමානානං අවිවදමානානං විහරතං අඤ්ඤතරො ඵාසුවිහාරො අධිගතො හොති. අථ ඛො තෙසං භික්ඛූනං එතදහොසි – ‘‘අම්හාකං ඛො සමග්ගානං සම්මොදමානානං අවිවදමානානං විහරතං අඤ්ඤතරො ඵාසුවිහාරො අධිගතො. සචෙ මයං ඉදානි පවාරෙස්සාම , සියාපි භික්ඛූ පවාරෙත්වා චාරිකං පක්කමෙය්යුං. එවං මයං ඉමම්හා ඵාසුවිහාරා පරිබාහිරා භවිස්සාම. කථං නු ඛො අම්හෙහි පටිපජ්ජිතබ්බ’’න්ති? භගවතො එතමත්ථං ආරොචෙසුං.
ඉධ පන, භික්ඛවෙ, සම්බහුලා සන්දිට්ඨා සම්භත්තා භික්ඛූ අඤ්ඤතරස්මිං ආවාසෙ වස්සං උපගච්ඡන්ති. තෙසං සමග්ගානං සම්මොදමානානං අවිවදමානානං විහරතං අඤ්ඤතරො ඵාසුවිහාරො අධිගතො හොති. තත්ර චෙ භික්ඛූනං එවං හොති – ‘‘අම්හාකං ඛො සමග්ගානං සම්මොදමානානං අවිවදමානානං විහරතං අඤ්ඤතරො ඵාසුවිහාරො අධිගතො. සචෙ මයං ඉදානි පවාරෙස්සාම, සියාපි භික්ඛූ පවාරෙත්වා චාරිකං පක්කමෙය්යුං. එවං මයං ඉමම්හා ඵාසුවිහාරා පරිබාහිරා භවිස්සාමා’’ති, අනුජානාමි, භික්ඛවෙ, තෙහි භික්ඛූහි පවාරණාසඞ්ගහං කාතුං. එවඤ්ච පන, භික්ඛවෙ, කාතබ්බො. සබ්බෙහෙව එකජ්ඣං සන්නිපතිතබ්බං – සන්නිපතිත්වා බ්යත්තෙන භික්ඛුනා පටිබලෙන සඞ්ඝො ඤාපෙතබ්බො –
‘‘සුණාතු මෙ, භන්තෙ, සඞ්ඝො. අම්හාකං සමග්ගානං සම්මොදමානානං අවිවදමානානං විහරතං අඤ්ඤතරො ඵාසුවිහාරො අධිගතො. සචෙ මයං ඉදානි පවාරෙස්සාම, සියාපි භික්ඛූ පවාරෙත්වා චාරිකං පක්කමෙය්යුං. එවං මයං ඉමම්හා ඵාසුවිහාරා පරිබාහිරා භවිස්සාම. යදි සඞ්ඝස්ස පත්තකල්ලං, සඞ්ඝො පවාරණාසඞ්ගහං කරෙය්ය, ඉදානි උපොසථං කරෙය්ය, පාතිමොක්ඛං උද්දිසෙය්ය, ආගමෙ ජුණ්හෙ කොමුදියා චාතුමාසිනියා පවාරෙය්ය. එසා ඤත්ති.
‘‘සුණාතු මෙ, භන්තෙ, සඞ්ඝො. අම්හාකං සමග්ගානං සම්මොදමානානං අවිවදමානානං විහරතං අඤ්ඤතරො ඵාසුවිහාරො අධිගතො. සචෙ මයං ඉදානි පවාරෙස්සාම, සියාපි භික්ඛූ පවාරෙත්වා චාරිකං පක්කමෙය්යුං. එවං මයං ඉමම්හා ඵාසුවිහාරා පරිබාහිරා භවිස්සාම. සඞ්ඝො පවාරණාසඞ්ගහං කරොති, ඉදානි උපොසථං කරිස්සති, පාතිමොක්ඛං උද්දිසිස්සති, ආගමෙ ජුණ්හෙ කොමුදියා චාතුමාසිනියා පවාරෙස්සති. යස්සායස්මතො ඛමති පවාරණාසඞ්ගහස්ස කරණං, ඉදානි උපොසථං කරිස්සති, පාතිමොක්ඛං උද්දිසිස්සති, ආගමෙ ජුණ්හෙ කොමුදියා චාතුමාසිනියා පවාරෙස්සති, සො තුණ්හස්ස; යස්ස නක්ඛමති, සො භාසෙය්ය.
‘‘කතො සඞ්ඝෙන පවාරණාසඞ්ගහො, ඉදානි උපොසථං කරිස්සති, පාතිමොක්ඛං උද්දිසිස්සති, ආගමෙ ජුණ්හෙ කොමුදියා චාතුමාසිනියා පවාරෙස්සති. ඛමති සඞ්ඝස්ස, තස්මා තුණ්හී, එවමෙතං ධාරයාමී’’ති.
තෙහි චෙ, භික්ඛවෙ, භික්ඛූහි කතෙ පවාරණාසඞ්ගහෙ අඤ්ඤතරො භික්ඛු එවං වදෙය්ය – ‘‘ඉච්ඡාමහං, ආවුසො, ජනපදචාරිකං පක්කමිතුං; අත්ථි මෙ ජනපදෙ කරණීය’’න්ති, සො එවමස්ස වචනීයො – ‘‘සාධාවුසො, පවාරෙත්වා ගච්ඡාහී’’ති. සො චෙ , භික්ඛවෙ, භික්ඛු පවාරයමානො අඤ්ඤතරස්ස භික්ඛුනො පවාරණං ඨපෙති, සො එවමස්ස වචනීයො – ‘‘අනිස්සරො ඛො මෙ ත්වං, ආවුසො, පවාරණාය, න තාවාහං පවාරෙස්සාමී’’ති. තස්ස චෙ, භික්ඛවෙ, භික්ඛුනො පවාරයමානස්ස අඤ්ඤතරො භික්ඛු තස්ස භික්ඛුනො පවාරණං ඨපෙති, උභො සඞ්ඝෙන සමනුයුඤ්ජිත්වා සමනුගාහිත්වා යථාධම්මං කාරාපෙතබ්බා. සො චෙ, භික්ඛවෙ, භික්ඛු ජනපදෙ තං කරණීයං තීරෙත්වා පුනදෙව අන්තො කොමුදියා චාතුමාසිනියා තං ආවාසං ආගච්ඡති, තෙහි චෙ, භික්ඛවෙ, භික්ඛූහි පවාරියමානෙ අඤ්ඤතරො භික්ඛු තස්ස භික්ඛුනො පවාරණං ඨපෙති, සො එවමස්ස වචනීයො – ‘‘අනිස්සරො ඛො මෙ ත්වං, ආවුසො, පවාරණාය; පවාරිතො අහ’’න්ති. තෙහි චෙ, භික්ඛවෙ, භික්ඛූහි පවාරියමානෙ සො භික්ඛු අඤ්ඤතරස්ස භික්ඛුනො පවාරණං ඨපෙති, උභො සඞ්ඝෙන සමනුයුඤ්ජිත්වා සමනුගාහිත්වා යථාධම්මං කාරාපෙත්වා සඞ්ඝෙන පවාරෙතබ්බන්ති.
පවාරණාසඞ්ගහො නිට්ඨිතො.
පවාරණාක්ඛන්ධකො චතුත්ථො.
146. තස්සුද්දානං
වස්සංවුට්ඨා කොසලෙසු, අගමුං සත්ථු දස්සනං;
අඵාසුං පසුසංවාසං, අඤ්ඤමඤ්ඤානුලොමතා.
පවාරෙන්තා පණාමඤ්ච පවාරෙන්තාසනෙ ද්වෙ ච (සී. ස්යා.), කම්මං ගිලානඤාතකා;
රාජා චොරා ච ධුත්තා ච, භික්ඛුපච්චත්ථිකා තථා.
පඤ්ච චතුතයො ද්වෙකො, ආපන්නො වෙමතී සරි;
සබ්බො සඞ්ඝො වෙමතිකො, බහූ සමා ච ථොකිකා.
ආවාසිකා චාතුද්දස, ලිඞ්ගසංවාසකා උභො;
ගන්තබ්බං න නිසින්නාය, ඡන්දදානෙ පවාරණා ඡන්දදානපවාරණා (ක.).
සවරෙහි ඛෙපිතා මෙඝො, අන්තරා ච පවාරණා;
න ඉච්ඡන්ති පුරම්හාකං, අට්ඨපිතා ච භික්ඛුනො.
කිම්හි වාති කතමඤ්ච, දිට්ඨෙන සුතසඞ්කාය;
චොදකො චුදිතකො ච, ථුල්ලච්චයං වත්ථු භණ්ඩනං;
පවාරණාසඞ්ගහො ච, අනිස්සරො පවාරයෙති.
ඉමම්හි ඛන්ධකෙ වත්ථූනි ඡචත්තාරීසාති.
පවාරණාක්ඛන්ධකො නිට්ඨිතො.