நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
அபி⁴த⁴ம்மபிடகே
த⁴ம்மஸங்க³ணீ-மூலடீகா
வீஸதிகா³தா²வண்ணனா
1. த⁴ம்மஸங்வண்ணனாயங்
தத்த² யஸ்ஸ ஸத்து²னோ பணாமங் கத்துகாமோ, தஸ்ஸ கு³ணவிஸேஸத³ஸ்ஸனத்த²ங் ‘‘கருணா வியா’’திஆதி³மாஹ. கு³ணவிஸேஸவா ஹி பணாமாரஹோ ‘‘கருணா விய ஸத்தேஸூ’’தி கருணங் உபமாபா⁴வேன க³ஹெத்வா பஞ்ஞாய தோ²மேதி.
தத்த² கருணா வியாதி நித³ஸ்ஸனவசனமேதங், யஸ்ஸ யதா² கருணா ஸப்³பே³ஸு ஸத்தேஸு பவத்தித்த², ஏவங் ஸப்³பே³ஸு ஞெய்யத⁴ம்மேஸு பஞ்ஞாபி பவத்தித்தா²தி அத்தோ². ஸத்தேஸூதி விஸயனித³ஸ்ஸனமேதங். பஞ்ஞாதி நித³ஸ்ஸேதப்³ப³த⁴ம்மனித³ஸ்ஸனங். யஸ்ஸாதி தத³தி⁴ட்டா²னபுக்³க³லனித³ஸ்ஸனங். மஹேஸினோதி தப்³பி³ஸேஸனங். ஞெய்யத⁴ம்மேஸூதி பஞ்ஞாவிஸயனித³ஸ்ஸனங். ஸப்³பே³ஸூதி தப்³பி³ஸேஸனங். பவத்தித்தா²தி கிரியானித³ஸ்ஸனங். யதா²ருசீதி வஸீபா⁴வனித³ஸ்ஸனங்.
தத்த² கிரதீதி கருணா, பரது³க்க²ங் விக்கி²பதி அபனேதீதி அத்தோ². ரூபாதீ³ஸு ஸத்தா விஸத்தாதி ஸத்தா. தஸ்ஸா பன பஞ்ஞத்தியா க²ந்த⁴ஸந்தானே நிருள்ஹபா⁴வதோ நிச்ச²ந்த³ராகா³பி ‘‘ஸத்தா’’தி வுச்சந்தி. பஜானாதீதி பஞ்ஞா, யதா²ஸபா⁴வங் பகாரேஹி படிவிஜ்ஜ²தீதி அத்தோ². யஸ்ஸாதி அனியமனங். ‘‘தஸ்ஸ பாதே³ நமஸ்ஸித்வா’’தி ஏதேன நியமனங் வேதி³தப்³ப³ங். மஹேஸீதி மஹந்தே ஸீலக்க²ந்தா⁴த³யோ ஏஸி க³வேஸீதி மஹேஸி. ஞாதப்³பா³தி ஞெய்யா, ஸபா⁴வதா⁴ரணாதி³னா அத்தே²ன த⁴ம்மா. தத்த² ‘‘ஞெய்யா’’தி வசனேன த⁴ம்மானங் அஞெய்யத்தங் படிக்கி²பதி. ‘‘த⁴ம்மா’’தி வசனேன ஞெய்யானங் ஞெய்யத⁴ம்மா. ஸப்³பே³ஸூதி அனவஸேஸபரியாதா³னங். தேன அஞ்ஞாதாபா⁴வங் த³ஸ்ஸேதி. பவத்தித்தா²தி உப்பஜ்ஜித்த². யதா²ருசீதி யா யா ருசி யதா²ருசி, ருசீதி ச இச்சா², கத்துகாமதா ஸா. யா யா பவத்தா தப்பபே⁴தா³, யதா² வா ருசி ததா², ருசிஅனுரூபங் பவத்தா ‘‘யதா²ருசி பவத்தித்தா²’’தி வுச்சதி. யதா² யதா² வா ருசி பவத்தா, ததா² ததா² பவத்தா பஞ்ஞா ‘‘யதா²ருசி பவத்தித்தா²’’தி வுச்சதி.
தத்த² ப⁴க³வதி பவத்தாவ கருணா ப⁴க³வதோ பஞ்ஞாய நித³ஸ்ஸனந்தி க³ஹேதப்³பா³. ஸா ஹி அஸாதா⁴ரணா மஹாகருணா, ந அஞ்ஞா. யஸ்ஸாதி ச கருணாபஞ்ஞானங் உபி⁴ன்னம்பி ஆதா⁴ரபுக்³க³லனித³ஸ்ஸனங். ந ஹி நிராதா⁴ரா கருணா அத்தீ²தி படிஸம்பி⁴தா³மக்³கே³ மஹாகருணாஞாணவிப⁴ங்க³வஸேன ஜானிதப்³ப³ங், பஞ்ஞாய ச யதா²ருசி பவத்தி ஸேஸாஸாதா⁴ரணஞாணவிப⁴ங்கா³தி³வஸேன. பஞ்ஞாக³ஹணேன ச தீஸு காலேஸு அப்படிஹதஞாணங் சதுஸச்சஞாணங் சதுபடிஸம்பி⁴தா³ஞாணங், கருணாக³ஹணேன மஹாகருணாஸமாபத்திஞாணஸ்ஸ க³ஹிதத்தா தங் வஜ்ஜெத்வா அஞ்ஞானி அஸாதா⁴ரணஞாணானி சதுவேஸாரஜ்ஜஞாணங் த³ஸப³லானி ச² அபி⁴ஞ்ஞா சதுசத்தாலீஸ ஞாணவத்தூ²னி ஸத்தஸத்ததி ஞாணவத்தூ²னீதி ஏவமாத³யோ அனேகே பஞ்ஞாப்பபே⁴தா³ ஸங்க³ய்ஹந்தி, தஸ்மா தஸ்ஸா தஸ்ஸா பஞ்ஞாய பவத்திவஸேன யதா²ருசி பவத்தி வேதி³தப்³பா³. தேனாஹ ‘‘கருணா விய…பே॰… யதா²ருசீ’’தி.
தத்த² கருணாக³ஹணேன மஹாபோ³தி⁴யா மூலங் த³ஸ்ஸேதி. மஹாது³க்க²ஸம்பா³த⁴ப்படிபன்னஞ்ஹி ஸத்தனிகாயங் தி³ஸ்வா ஸத்தேஸூதி ஏதேன மஹாபோ³தி⁴யா பயோஜனங் த³ஸ்ஸேதி. ஸத்தா ஹி மஹாபோ³தி⁴ங் பயோஜெந்தி. ஸத்தஸந்தாரணத்த²ஞ்ஹி ஸப்³ப³ஞ்ஞுதா அபி⁴பத்தி²தா. யதா²ஹ –
‘‘கிங்
ஸப்³ப³ஞ்ஞுதங் பாபுணித்வா, ஸந்தாரெஸ்ஸங் ஸதே³வக’’ந்தி. (பு³॰ வங்॰ 2. 56);
பஞ்ஞாக³ஹணேன மஹாபோ³தி⁴ங் த³ஸ்ஸேதி. ஸப்³ப³ஞ்ஞுதாய ஹி பத³ட்டா²னபூ⁴தங் மக்³க³ஞாணங், மக்³க³ஞாணபத³ட்டா²னஞ்ச ஸப்³ப³ஞ்ஞுதஞ்ஞாணங் ‘‘மஹாபோ³தீ⁴’’தி வுச்சதீதி. ஞெய்யத⁴ம்மேஸு ஸப்³பே³ஸூதி ஏதேன ஸந்தாரேதப்³பா³னங் ஸத்தானங் அபி⁴ஞ்ஞெய்யபரிஞ்ஞெய்யபஹாதப்³ப³பா⁴வேதப்³ப³ஸச்சி²காதப்³பே³ க²ந்தா⁴யதனதா⁴துஸச்சிந்த்³ரியபடிச்சஸமுப்பாத³ஸதிபட்டா²னாதி³பே⁴தே³ குஸலாதி³பே⁴தே³ ச ஸப்³ப³த⁴ம்மே த³ஸ்ஸேதி. பவத்தித்த² யதா²ருசீதி ஏதேன படிவேத⁴பச்சவெக்க²ணபுப்³ப³ங்க³மதே³ஸனாஞாணப்பவத்திதீ³பனேன பயோஜனஸம்பத்திங் த³ஸ்ஸேதி. ஸப்³ப³த⁴ம்மானஞ்ஹி படிவேத⁴ஞாணங் போ³தி⁴பல்லங்கே அஹோஸி. மக்³க³ஞாணமேவ ஹி தந்தி. பச்சவெக்க²ணஞாணஞ்ச விஸேஸேன ரதனக⁴ரஸத்தாஹே அஹோஸி. ஏவங் படிவித்³த⁴பச்சவெக்கி²தானங் த⁴ம்மானங் த⁴ம்மசக்கப்பவத்தனாதீ³ஸு தே³ஸனாஞாணங் அஹோஸி, விஸேஸேன ச பண்டு³கம்ப³லஸிலாயங் ஸத்தப்பகரணதே³ஸனாயந்தி. தே³ஸனாஞாணேன ச தே³ஸெந்தோ ப⁴க³வா ஸத்தேஸு ஹிதபடிபத்திங் படிபஜ்ஜதீதி. ஏதேன ஸப்³பே³ன அத்தஹிதபடிபத்திங் பரஹிதபடிபத்திஞ்ச த³ஸ்ஸேதி. மஹாபோ³தி⁴த³ஸ்ஸனேன ஹி அத்தஹிதபடிபத்தி, இதரேஹிபி பரஹிதபடிபத்தி த³ஸ்ஸிதாதி. தேன அத்தஹிதபடிபன்னாதீ³ஸு சதூஸு புக்³க³லேஸு ப⁴க³வதோ சதுத்த²புக்³க³லபா⁴வங் த³ஸ்ஸேதி, தேன ச அனுத்தரத³க்கி²ணெய்யபா⁴வங் நிரதிஸயபணாமாரஹபா⁴வஞ்ச அத்தனோ ச கிரியாய கெ²த்தங்க³தபா⁴வங் த³ஸ்ஸேதி.
எத்த² ச கருணாக³ஹணேன லோகியேஸு மஹக்³க³தபா⁴வப்பத்தாஸாதா⁴ரணகு³ணதீ³பனதோ ஸப்³ப³லோகியகு³ணஸம்பத்தி ப⁴க³வதோ த³ஸ்ஸிதா ஹோதி, பஞ்ஞாக³ஹணேனபி ஸப்³ப³ஞ்ஞுதஞ்ஞாணபத³ட்டா²னமக்³க³ஞாணதீ³பனதோ ஸப்³ப³லோகுத்தரகு³ணஸம்பத்தி. கருணாவசனேன ச உபக³மனங் நிருபக்கிலேஸங், பஞ்ஞாவசனேன அபக³மனங் த³ஸ்ஸேதி. உபக³மனங் த³ஸ்ஸெந்தோ ச லோகே ஸஞ்ஜாதஸங்வட்³ட⁴பா⁴வங் த³ஸ்ஸேதி, அபக³மனங் த³ஸ்ஸெந்தோ லோகேன அனுபலித்ததங். ‘‘கருணா விய ஸத்தேஸூ’’தி ச லோகஸமஞ்ஞானுரூபங் ப⁴க³வதோ
2. ஏவங் ஸங்கே²பேன ஸப்³ப³பு³த்³த⁴கு³ணேஹி ப⁴க³வந்தங் தோ²மெத்வா யஸ்ஸா ஸங்வண்ணனங் கத்துகாமோ, தாய அபி⁴த⁴ம்மதே³ஸனாய அஞ்ஞேஹி அஸாதா⁴ரணாய தோ²மேதுங் ‘‘த³யாய தாயா’’திஆதி³மாஹ. தஸ்ஸா பன தே³ஸனாய நிதா³னஞ்ச ஸமுட்டா²னஞ்ச த³ஸ்ஸேதுங் ‘‘த³யாய தாயா’’திஆதி³ வுத்தங். நிதா³னஞ்ச து³வித⁴ங் அப்³ப⁴ந்தரங் பா³ஹிரஞ்சாதி. அப்³ப⁴ந்தரங் கருணா, பா³ஹிரங் தே³ஸகாலாதி³. ஸமுட்டா²னங் தே³ஸனாபஞ்ஞா. தத்த² அப்³ப⁴ந்தரனிதா³னங் த³ஸ்ஸெந்தோ ‘‘த³யாய தாய ஸத்தேஸு, ஸமுஸ்ஸாஹிதமானஸோ’’தி ஆஹ. தத்த² த³யாதி கருணா அதி⁴ப்பேதா. தாய ஹி ஸமுஸ்ஸாஹிதோ அபி⁴த⁴ம்மகதா²மக்³க³ங் ஸம்பவத்தயீதி. தாயாதி அயங் த-ஸத்³தோ³ புப்³பே³ வுத்தஸ்ஸ படினித்³தே³ஸோ ஹோதி.
புரிமகா³தா²ய ச பதா⁴னபா⁴வேன பஞ்ஞா நித்³தி³ட்டா², தப்³பி³ஸேஸனபா⁴வேன கருணா. ஸா ஹி தஸ்ஸா நித³ஸ்ஸனபூ⁴தா அப்பதா⁴னா தங் விஸேஸெத்வா வினிவத்தா, தஸ்மா ‘‘தாயா’’தி படினித்³தே³ஸங் நாரஹதி. யா ச பதா⁴னபூ⁴தா பஞ்ஞா, ஸா தே³ஸனாய ஸமுட்டா²னங், ந ஸமுஸ்ஸாஹினீதி தஸ்ஸா ச படினித்³தே³ஸோ ந யுத்தோதி? பஞ்ஞாய தாவ படினித்³தே³ஸோ ந யுத்தோதி ஸுவுத்தமேதங், கருணாய பன படினித்³தே³ஸோ நோ ந யுத்தோ ‘‘த³யாய தாயா’’தி த்³வின்னங் பதா³னங் ஸமானாதி⁴கரணபா⁴வதோ. ஸமானாதி⁴கரணானஞ்ஹி த்³வின்னங் பதா³னங் ரூபக்க²ந்தா⁴தீ³னங் விய விஸேஸனவிஸேஸிதப்³ப³பா⁴வோ ஹோதி. ரூப-ஸத்³தோ³ ஹி அஞ்ஞக்க²ந்த⁴னிவத்தனத்த²ங் வுச்சமானோ விஸேஸனங் ஹோதி, க²ந்த⁴-ஸத்³தோ³ ச நிவத்தேதப்³ப³க³ஹேதப்³ப³ஸாதா⁴ரணவசனபா⁴வதோ விஸேஸிதப்³போ³, ஏவமிதா⁴பி ‘‘த³யாய தாயா’’தி த்³வின்னங் பதா³னங் ஏகவிப⁴த்தியுத்தானங் ஸமானாதி⁴கரணபா⁴வதோ விஸேஸனவிஸேஸிதப்³ப³பா⁴வோ ஹோதி. தத்த² த³யா ஸமுஸ்ஸாஹினீதி பதா⁴னா, நிவத்தேதப்³ப³க³ஹேதப்³ப³ஸாதா⁴ரணவசனஞ்சித³ங். தஸ்மா ‘‘த³யாயா’’தி விஸேஸிதப்³ப³வசனமேதங், தஸ்ஸ ச யதா² விஸேஸனங் ஹோதி ‘‘தாயா’’தி
கத²ங் பன கருணா ‘‘த³யா’’தி ஞாதப்³பா³, நனு வுத்தங் ‘‘த³யாபன்னோ’’தி ஏதஸ்ஸ அட்ட²கதா²யங் (தீ³॰ நி॰ அட்ட²॰ 1.8) ‘‘மெத்தசித்ததங் ஆபன்னோ’’தி, தஸ்மா த³யா மெத்தாதி யுஜ்ஜெய்ய, ந கருணாதி? யதி³ ஏவங் ‘‘அத³யாபன்னோ’’தி ஏதஸ்ஸ அட்ட²கதா²யங் ‘‘நிக்கருணதங் ஆபன்னோ’’தி வுத்தந்தி த³யா மெத்தாதி ச ந யுஜ்ஜெய்ய, தஸ்மா த³யா-ஸத்³தோ³ யத்த² யத்த² பவத்ததி, தத்த² தத்த² அதி⁴ப்பாயவஸேன யோஜேதப்³போ³. த³யா-ஸத்³தோ³ ஹி அனுரக்க²ணத்த²ங் அந்தோனீதங் கத்வா பவத்தமானோ மெத்தாய ச கருணாய ச பவத்ததீதி நோ ந யுஜ்ஜதி. ஏவஞ்ஹி அட்ட²கதா²னங் அவிரோதோ⁴ ஹோதீதி. கருணா ச தே³ஸனாய நிதா³னபா⁴வேன வுத்தா, ந மெத்தா ‘‘அச்சந்தமேவ ஹி தங் ஸமயங் ப⁴க³வா கருணாவிஹாரேன விஹாஸீ’’தி (தீ³॰ நி॰ அட்ட²॰ 1.1; ம॰ நி॰ அட்ட²॰ 1.1 மூலபரியாயஸுத்தவண்ணனா; ஸங்॰ நி॰ அட்ட²॰ 1.1.1; அ॰ நி॰ அட்ட²॰ 1.1.1) ஏவமாதீ³ஸு, தஸ்மா இத⁴ கருணாவ த³யாவசனேன க³ஹிதாதி வேதி³தப்³பா³. ஸா ஹி ஸமுஸ்ஸாஹினீ, ந மெத்தா, மெத்தா பன பஞ்ஞாக³திகபவத்தினீ ஹோதீதி.
‘‘ஸத்தேஸூ’’தி கஸ்மா ஏவங் வுத்தங், நனு ‘‘தாயா’’தி ஏதேன வசனேன ஸத்தவிஸயா கருணா க³ஹிதாதி? நோ ந க³ஹிதா, புரிமகா³தா²ய பன ‘‘ஸத்தேஸு கருணா யதா²ருசி பவத்தித்தா²’’தி ஸப்பதே³ஸஸத்தவிஸயா நிப்பதே³ஸஸத்தவிஸயா ச ஸப்³பா³ வுத்தா, இத⁴ பன நிப்பதே³ஸஸத்தவிஸயதங் க³ஹேதுங் ‘‘ஸத்தேஸூ’’தி நிப்பதே³ஸஸத்தவிஸயபூ⁴தா த³ஸ்ஸிதா. தேன ஸப்³ப³ஸத்தவிஸயாய கருணாய ஸமுஸ்ஸாஹிதோ அபி⁴த⁴ம்மகதா²மக்³க³ங் தே³வானங் ஸம்பவத்தயி, ந தே³வவிஸயாய ஏவ, தஸ்மா ஸப்³ப³ஸத்தஹிதத்த²ங் அபி⁴த⁴ம்மகதா²மக்³க³ங் தே³வானங் ஸம்பவத்தயி, ந தே³வானங்யேவ அத்தா²யாதி அயமத்தோ² த³ஸ்ஸிதோவ ஹோதி. அத² வா ‘‘ஸத்தேஸூ’’தி இத³ங் ந த³யாய ஆலம்ப³னநித³ஸ்ஸனங், ஸமுஸ்ஸாஹனவிஸயோ பன ஏதேன த³ஸ்ஸிதோ. அபி⁴த⁴ம்மகதா²மக்³க³ப்பவத்தனத்த²ஞ்ஹி ப⁴க³வா கருணாய ந தே³வேஸுயேவ ஸமுஸ்ஸாஹிதோ ஸத்தேஸு ஸமுஸ்ஸாஹிதமானஸோதி
ஏவங் அப்³ப⁴ந்தரனிதா³னங் த³ஸ்ஸெத்வா பா³ஹிரனிதா³னங் த³ஸ்ஸெந்தோ ‘‘பாடிஹீராவஸானம்ஹீ’’திஆதி³மாஹ. தத்த² யஸ்மிங் காலே ப⁴க³வதா அபி⁴த⁴ம்மகதா²மக்³கோ³ பவத்திதோ, தங் த³ஸ்ஸேதுங் ‘‘பாடிஹீராவஸானம்ஹி வஸந்தோ’’தி வுத்தங். ‘‘அவஸானம்ஹி வஸந்தோ தித³ஸாலயே’’தி வசனதோ யஸ்ஸாவஸானம்ஹி தித³ஸாலயே வஸி, தங் கண்ட³ம்ப³மூலே கதங் யமகபாடிஹாரியங் இத⁴ ‘‘பாடிஹீர’’ந்தி வுத்தங், ந போ³தி⁴மூலாதீ³ஸு கதங் பாடிஹாரியங், நாபி ஆதே³ஸனானுஸாஸனியோதி விஞ்ஞாயதி, பாகடத்தா ச ஆஸன்னத்தா ச ததே³வ க³ஹிதந்தி த³ட்ட²ப்³ப³ங். பாடிஹாரியபத³ஸ்ஸ வசனத்த²ங் (உதா³॰ அட்ட²॰ 1; இதிவு॰ அட்ட²॰ நிதா³னவண்ணனா) ‘‘படிபக்க²ஹரணதோ ராகா³தி³கிலேஸாபனயனதோ பாடிஹாரிய’’ந்தி வத³ந்தி, ப⁴க³வதோ பன படிபக்கா² ராகா³த³யோ ந ஸந்தி யே ஹரிதப்³பா³. புது²ஜ்ஜனானம்பி ஹி விக³துபக்கிலேஸே அட்ட²ங்க³கு³ணஸமன்னாக³தே சித்தே ஹதபடிபக்கே² இத்³தி⁴வித⁴ங் பவத்ததி, தஸ்மா தத்த² பவத்தவோஹாரேன ச ந ஸக்கா இத⁴ ‘‘பாடிஹாரிய’’ந்தி வத்துங். ஸசே பன மஹாகாருணிகஸ்ஸ ப⁴க³வதோ வேனெய்யக³தா ச கிலேஸா படிபக்கா², தேஸங் ஹரணதோ ‘‘பாடிஹாரிய’’ந்தி வுத்தங், ஏவங் ஸதி யுத்தமேதங். அத² வா ப⁴க³வதோ ச ஸாஸனஸ்ஸ ச படிபக்கா² தித்தி²யா, தேஸங் ஹரணதோ பாடிஹாரியங். தே ஹி தி³ட்டி²ஹரணவஸேன தி³ட்டி²ப்பகாஸனே அஸமத்த²பா⁴வேன ச இத்³தி⁴ஆதே³ஸனானுஸாஸனீஹி ஹரிதா அபனீதா ஹொந்தீதி. அத² வா படீதி அயங் ஸத்³தோ³ ‘‘பச்சா²’’தி ஏதஸ்ஸ அத்த²ங் போ³தே⁴தி ‘‘தஸ்மிங் படிபவிட்ட²ம்ஹி, அஞ்ஞோ ஆக³ஞ்சி² ப்³ராஹ்மணோ’’திஆதீ³ஸு (ஸு॰ நி॰ 985; சூளனி॰ பாராயனவக்³க³, வத்து²கா³தா² 4) விய, தஸ்மா ஸமாஹிதே சித்தே விக³துபக்கிலேஸே ச கதகிச்சேன பச்சா² ஹரிதப்³ப³ங் பவத்தேதப்³ப³ந்தி படிஹாரியங், அத்தனோ வா உபக்கிலேஸேஸு சதுத்த²ஜ்ஜா²னமக்³கே³ஹி ஹரிதேஸு பச்சா² ஹரணங் படிஹாரியங், இத்³தி⁴ஆதே³ஸனானுஸாஸனியோ ச விக³துபக்கிலேஸேன கதகிச்சேன ச ஸத்தஹிதத்த²ங் புன பவத்தேதப்³பா³, ஹரிதேஸு ச அத்தனோ உபக்கிலேஸேஸு பரஸத்தானங் உபக்கிலேஸஹரணானி ஹொந்தீதி படிஹாரியானி ப⁴வந்தி, படிஹாரியமேவ பாடிஹாரியங். படிஹாரியே வா இத்³தி⁴ஆதே³ஸனானுஸாஸனிஸமுதா³யே ப⁴வங் ஏகேகங் பாடிஹாரியந்தி வுச்சதி. படிஹாரியங் பாடிஹாரியங். பாடிஹாரியமேவ இத⁴ ‘‘பாடிஹீர’’ந்தி வுத்தங். அவஸானம்ஹி வஸந்தோதி ஏதேஹி காலங் நித³ஸ்ஸேதி. பாடிஹீரகரணாவஸானேன ஹி தித³ஸாலயவாஸேன ச பரிச்சி²ன்னோ அபி⁴த⁴ம்மகதா²மக்³க³ப்பவத்தனஸ்ஸ காலோதி தித³ஸாலயேதி தே³ஸங் நித³ஸ்ஸேதி. ஸோ ஹி அபி⁴த⁴ம்மகதா²மக்³க³ப்பவத்தனஸ்ஸ தே³ஸோ தத்த² வஸந்தேன பவத்திதத்தாதி.
3. தத்தா²பி தே³ஸவிஸேஸத³ஸ்ஸனத்த²ங் ‘‘பாரிச்ச²த்தகமூலம்ஹீ’’திஆதி³ வுத்தங். யுக³ந்த⁴ரேதி ஸீதபப்³ப³தெஸ்வேகோ த்³வேசத்தாலீஸயோஜனஸஹஸ்ஸுப்³பே³தோ⁴, ஆதி³ச்சோ ச தது³ப்³பே³த⁴மக்³க³சாரீ, ஸோ ஸதி ஸம்ப⁴வே யதா² யுக³ந்த⁴ரே ஸோபெ⁴ய்ய, ஏவங் ஸோப⁴மானோ நிஸின்னோதி அத்தோ².
4-5. இதா³னி புக்³க³லே த⁴ம்மபடிக்³கா³ஹகே அபதி³ஸந்தோ ‘‘சக்கவாளஸஹஸ்ஸேஹீ’’திஆதி³மாஹ. ஸப்³ப³ஸோதி ஸமந்ததோ ஆக³ம்ம ஸப்³பே³ஹி தி³ஸாபா⁴கே³ஹி, ஸன்னிவேஸவஸேன வா ஸமந்ததோ ஸன்னிவிட்டே²ஹி த³ஸஹி சக்கவாளஸஹஸ்ஸேஹீதி அதி⁴ப்பாயோ, ந ஸப்³ப³ஸோ சக்கவாளஸஹஸ்ஸேஹி த³ஸஹி த³ஸஹீதி. ஏவங் ஸதி சத்தாலீஸசக்கவாளஸஹஸ்ஸேஹி அதி⁴கேஹி வா ஆக³மனங் வுத்தங் ஸியா, ந சேதங் அதி⁴ப்பேதந்தி. ஸமந்ததோ ஸன்னிஸின்னேனாதி வா யோஜேதப்³ப³ங். ஸமங், ஸம்மா வா நிஸின்னேன ஸன்னிஸின்னேன, அஞ்ஞமஞ்ஞங் அப்³யாபா³தெ⁴த்வா ப⁴க³வதி கா³ரவங் கத்வா ஸோதங் ஓத³ஹித்வா நிஸஜ்ஜதோ³ஸே வஜ்ஜிதப்³பே³ வஜ்ஜெத்வா நிஸின்னேனாதி அத்தோ². மாதரங் பமுக²ங் கத்வா ஸன்னிஸின்னேன தே³வானங் க³ணேன பரிவாரிதோதி வா, மாதரங் பமுக²ங் கத்வா அபி⁴த⁴ம்மகதா²மக்³க³ங் ஸம்பவத்தயீதி வா யோஜனா காதப்³பா³.
இதா³னி தே³ஸனாய ஸமுட்டா²னங் த³ஸ்ஸெந்தோ ‘‘தஸ்ஸா பஞ்ஞாய தேஜஸா’’தி ஆஹ. யா ஸா ஆதி³ம்ஹி கருணாய உபமிதா ஸப்³ப³ஞெய்யத⁴ம்மானங் யதா²ஸபா⁴வஜானநஸமத்தா², தேஸங் தே³ஸேதப்³ப³ப்பகாரஜானநஸமத்தா², போ³தே⁴தப்³ப³புக்³க³லானங் ஆஸயாதி⁴முத்தியாதி³விபா⁴வனஸமத்தா² ச பஞ்ஞா, தஸ்ஸா ச யதா²வுத்தப³லயோக³தோதி அத்தோ². தேன ஸப்³ப³ஞ்ஞுதஞ்ஞாணமேவ அபி⁴த⁴ம்மகதா²ய ஸமுட்டா²னபா⁴வே ஸமத்த²ங், நாஞ்ஞந்தி இமமத்த²ங் தீ³பெந்தோ அபி⁴த⁴ம்மகதா²ய அஸாதா⁴ரணபா⁴வங் த³ஸ்ஸேதி. மக்³கோ³தி உபாயோ. க²ந்தா⁴யதனாதீ³னங் குஸலாதீ³னஞ்ச த⁴ம்மானங் அவபோ³த⁴ஸ்ஸ, ஸச்சப்படிவேத⁴ஸ்ஸேவ வா உபாயபா⁴வதோ ‘‘அபி⁴த⁴ம்மகதா²மக்³கோ³’’தி வுத்தோ. பப³ந்தோ⁴ மக்³கோ³, தஸ்மா அபி⁴த⁴ம்மகதா²பப³ந்தோ⁴ ‘‘அபி⁴த⁴ம்மகதா²மக்³கோ³’’தி வுத்தோ. தே³வானங் க³ணேன பரிவாரிதோதி வத்வா புன தே³வானந்தி வசனங் தேஸங் க³ஹணஸமத்த²தங் தீ³பேதி. ந ஹி அஸமத்தா²னங் ப⁴க³வா தே³ஸேதீதி.
6. ஏவங் ‘‘தஸ்ஸ பாதே³ நமஸ்ஸித்வா’’தி. ப⁴க³வதோ தோ²மனேனேவ ச த⁴ம்மஸ்ஸ ஸ்வாக்கா²ததா ஸங்க⁴ஸ்ஸ ச ஸுப்படிபன்னதா த³ஸ்ஸிதா ஹோதி தப்பப⁴வஸ்ஸ அனஞ்ஞதா²பா⁴வதோ, தஸ்மா பணாமாரஹங் தஞ்ச ரதனத்³வயங் பணமந்தோ ‘‘ஸத்³த⁴ம்மஞ்சஸ்ஸ…பே॰… சஞ்ஜலி’’ந்தி ஆஹ. தத்த² யஸ்மா பு³த்³தோ⁴ ‘‘ஸதே³வகே லோகே ததா²க³தோ வந்த³னீயோ’’தி, ஸங்கோ⁴ ச ‘‘ஸுப்படிபன்னோ…பே॰… அஞ்ஜலிகரணீயோ’’தி (அ॰ நி॰ 6.10) வுத்தோ, தஸ்மா ‘‘தஸ்ஸ பாதே³ நமஸ்ஸித்வா, கத்வா ஸங்க⁴ஸ்ஸ சஞ்ஜலி’’ந்தி வுத்தங். த⁴ம்மோ பன ஸ்வாக்கா²ததாதி³கு³ணயுத்தோ ததா²னுஸ்ஸரணேன பூஜேதப்³போ³ ஹோதி ‘‘தமேவ த⁴ம்மங் ஸக்கத்வா க³ருங்கத்வா உபனிஸ்ஸாய விஹரெய்ய’’ந்தி (ஸங்॰ நி॰ 1.173; அ॰ நி॰ 4.21) வசனதோ, காயவாசாசித்தேஹி ஸப்³ப³தா² பூஜேதப்³போ³, தஸ்மா ‘‘ஸத்³த⁴ம்மஞ்சஸ்ஸ பூஜெத்வா’’தி வுத்தங். ஸிரீமதோதி எத்த² ஸிரீதி பஞ்ஞாபுஞ்ஞானங் அதி⁴வசனந்தி வத³ந்தி. அத² வா புஞ்ஞனிப்³ப³த்தா ஸரீரஸோப⁴க்³கா³தி³ஸம்பத்தி கதபுஞ்ஞே நிஸ்ஸயதி, கதபுஞ்ஞேஹி வா நிஸ்ஸீயதீதி ‘‘ஸிரீ’’தி வுச்சதி, ஸா ச அதிஸயவதீ ப⁴க³வதோ அத்தீ²தி ஸிரீமா, ப⁴க³வா, தஸ்ஸ ஸிரீமதோ.
7. நிபச்சகாரஸ்ஸாதி பணாமகிரியாய. ஆனுபா⁴வேனாதி ப³லேன. ஸோஸெத்வாதி ஸுக்கா²பெத்வா அந்தரதா⁴பெத்வா அத்த²ங் பகாஸயிஸ்ஸாமீதி ஸம்ப³ந்தோ⁴. அந்தராயேதி அத்த²ப்பகாஸனஸ்ஸ உபகா⁴தகே. அஸேஸதோதி நிஸ்ஸேஸே ஸகலே.
8. இதா³னி அபி⁴த⁴ம்மஸ்ஸ க³ம்பீ⁴ரத்த²த்தா அத்த²ப்பகாஸனஸ்ஸ து³க்கரபா⁴வங் தீ³பேதுங் ‘‘விஸுத்³தா⁴சாரஸீலேனா’’திஆதி³னா அபி⁴யாசனங் த³ஸ்ஸேதி. து²ல்லச்சயாதி³விஸுத்³தி⁴யா விஸுத்³தா⁴சாரோ, பாராஜிகஸங்கா⁴தி³ஸேஸவிஸுத்³தி⁴யா விஸுத்³த⁴ஸீலோ. சாரித்தவாரித்தவிஸுத்³தி⁴யா விஸுத்³தா⁴சாரஸீலோ, தேன. ஸக்கச்சந்தி சித்திங் கத்வா. அபி⁴யாசிதோதி அபி⁴முக²ங் யாசிதோ. தேன அனாத³ரியங் அத்த²ப்பகாஸனே காதுங் அஸக்குணெய்யங் த³ஸ்ஸேதி.
9. இதா³னி யஸ்ஸ அத்த²ங் பகாஸேதுகாமோ, தங் த³ஸ்ஸேதுங் ‘‘யங் தே³வதே³வோ’’திஆதி³மாஹ. தத்த² யந்தி அபி⁴த⁴ம்மங். தே³வதே³வோதி விஸுத்³தி⁴ஸம்முதிஉபபத்திதே³வானங் தே³வோ. லோகே ஹி யே ‘‘ஸரணங் பராயண’’ந்தி க³ந்தப்³பா³ க³திபூ⁴தா, தே ‘‘தே³வா’’தி வுச்சந்தி, ப⁴க³வா ச ஸப்³ப³தே³வானங் க³திபூ⁴தோதி நயதோதி ஸங்கே²பதோ. ஸமாசிக்கீ²தி ஸம்மா ஆசிக்கி² யதா² தே²ரோ பு³ஜ்ஜ²தி. வேனெய்யஸத்தே வினேதீதி வினாயகோ, நாயகவிரஹிதோ வா, ஸயம்பூ⁴தி அத்தோ².
10-12. யஞ்சாதி யஞ்ச அபி⁴த⁴ம்மங் பி⁴க்கூ²னங் பயிருதா³ஹாஸீதி ஸம்ப³ந்தோ⁴. பயிருதா³ஹாஸீதி கதே²ஸி. இதீதி இமினா அனுக்கமேன. ‘‘யோ தா⁴ரிதோ’’தி யந்தி உபயோக³வஸேன வுத்தோ யங்-ஸத்³தோ³ தா⁴ரிதோதி பச்சத்தேன ஸம்ப³ஜ்ஜ²மானோ பச்சத்தவஸேன பரிணமதி, தஸ்மா யோ தா⁴ரிதோ, யோ ச ஸங்கீ³தோ, தஸ்ஸ அத்த²ங் பகாஸயிஸ்ஸாமீதி யோஜனா காதப்³பா³. வேதே³ன பஞ்ஞாய ஈஹதி பவத்ததீதி வேதே³ஹோ, தேன முனினா. அபி⁴ண்ஹஸோதி ப³ஹுஸோ. அபி⁴த⁴ம்மஸ்ஸாதி ஏதங் ‘‘அத்த²ங் பகாஸயிஸ்ஸாமீ’’தி ஏதேன யோஜேதப்³ப³ங். இதா³னி யோ அத்த²ப்பகாஸனஸ்ஸ நிஸ்ஸயோ, தங் த³ஸ்ஸேதுங் ‘‘ஆதி³தோ’’திஆதி³மாஹ. தத்த² ஆதி³தோதி ஆதி³ம்ஹி பட²மஸங்கீ³தியங்.
13. யா அட்ட²கதா² ஸங்கீ³தா, கஸ்ஸ பன ஸா அட்ட²கதா²தி? அஞ்ஞஸ்ஸ வுத்தஸ்ஸ அபா⁴வா ‘‘யஸ்ஸ அத்த²ங் பகாஸயிஸ்ஸாமீ’’தி வுத்தங், அதி⁴காரவஸேன ‘‘தஸ்ஸ அபி⁴த⁴ம்மஸ்ஸா’’தி விஞ்ஞாயதி. ஸங்கீ³தாதி அத்த²ங் பகாஸேதுங் யுத்தட்டா²னே ‘‘அயங் ஏதஸ்ஸ அத்தோ², அயங் ஏதஸ்ஸ அத்தோ²’’தி ஸங்க³ஹெத்வா வுத்தா, பச்சா²பி ச து³தியததியஸங்கீ³தீஸு அனுஸங்கீ³தா.
14-16. அபி⁴ஸங்க²தாதி ரசிதா. ததோதி அட்ட²கதா²தோ. தந்தினயானுக³ந்தி தந்திக³திங் அனுக³தங். பா⁴ஸந்தி மாக³த⁴பா⁴ஸங். நிகாயந்தரலத்³தீ⁴ஹீதி அந்தரந்தரா அனுப்பவேஸிதாஹி. அஸம்மிஸ்ஸந்தி அவோகிண்ணங். அனாகுலந்தி ஸனிகாயேபி அனாவிலங் பரிச்சி²ன்னங். அஸம்மிஸ்ஸோ அனாகுலோ ச யோ மஹாவிஹாரவாஸீனங் அத்த²வினிச்ச²யோ, தங் தீ³பயந்தோ அத்த²ங் பகாஸயிஸ்ஸாமீதி திபிடகசூளனாக³த்தே²ராதீ³ஹி வுத்தோ தே²ரவாதோ³பி ஸங்க³ஹிதோ ஹோதி. அத² வா தம்ப³பண்ணிபா⁴ஸங் அபனெத்வா மாக³த⁴பா⁴ஸஞ்ச ஆரோபெத்வா பகாஸியமானோ யோ அபி⁴த⁴ம்மஸ்ஸ அத்தோ² அஸம்மிஸ்ஸோ அனாகுலோயேவ ச ஹோதி மஹாவிஹாரவாஸீனஞ்ச வினிச்ச²யபூ⁴தோ, தங் அத்த²ங் ‘‘ஏஸோ மஹாவிஹாரவாஸீனங் வினிச்ச²யோ’’தி தீ³பயந்தோ பகாஸயிஸ்ஸாமி. தப்பகாஸனேனேவ ஹி ஸோ ததா² தீ³பிதோ ஹோதீதி.
17. தோஸயந்தோ விசக்க²ணேதி விசக்க²ணே தோஸயந்தோ க³ஹேதப்³ப³ங் க³ஹெத்வானாதி ஏவங் யோஜெத்வா ‘‘க³ஹேதப்³ப³ட்டா²னேயேவ க³ஹிதங் ஸுட்டு² கத’’ந்தி ஏவங் தோஸயந்தோதி அத்த²ங் வத³ந்தி. ஏவங் ஸதி
18-20. இதா³னி யங் அத்த²ப்பகாஸனங் கத்துகாமோ, தஸ்ஸ மஹத்தங் பரிஹரிதுங் ‘‘கம்மட்டா²னானீ’’திஆதி³மாஹ. அத்த²வண்ணனந்தி எத்த² வண்ணனா நாம விவரித்வா வித்தா²ரெத்வா வசனங். இதீதி ‘‘அபனெத்வா ததோ பா⁴ஸ’’ந்தி ஏவமாதி³னா யதா²த³ஸ்ஸிதப்பகாரேன. இதி ஸோதூனங் உஸ்ஸாஹுப்பாத³னஸ்ஸ ஹேதுங் த³ஸ்ஸேதி. அபி⁴த⁴ம்மகத²ந்தி அபி⁴த⁴ம்மட்ட²கத²ங். நிஸாமேதா²தி ஸுணாத². இதா³னி அவஸ்ஸங் அயங் ஸோதப்³பா³யேவாதி த³ள்ஹங் உஸ்ஸாஹெந்தோ ஆஹ ‘‘து³ல்லபா⁴ ஹி அயங் கதா²’’தி.
வீஸதிகா³தா²வண்ணனா நிட்டி²தா.
நிதா³னகதா²வண்ணனா
அட்ட²ஸாலினிங் தாவ வண்ணெந்தேஹி ஆசரியேஹி தஸ்ஸா ஸன்னிவேஸோ விபா⁴வேதப்³போ³. தஸ்மா இத³ங் வுச்சதி –
‘‘வசனத்தோ² பரிச்சே²தோ³, ஸன்னிவேஸோ ச பாளியா;
ஸாக³ரேஹி ததா² சிந்தா, தே³ஸனாஹி க³ம்பீ⁴ரதா.
‘‘தே³ஸனாய
தே²ரஸ்ஸ வாசனாமக்³க³-தப்பபா⁴விததாபி ச.
‘‘படிவேதா⁴ ததா² பு³த்³த⁴-வசனாதீ³ஹி ஆதி³தோ;
ஆபி⁴த⁴ம்மிகபா⁴வஸ்ஸ, ஸாத⁴னங் ஸப்³ப³த³ஸ்ஸினோ.
‘‘வினயேனாத²
பா⁴ஸிதத்தஸ்ஸ ஸங்ஸித்³தி⁴, நிதா³னேன ச தீ³பிதா.
‘‘பகாஸெத்வா இமங் ஸப்³ப³ங், படிஞ்ஞாதகதா² கதா;
அட்ட²ஸாலினியா ஏதங், ஸன்னிவேஸங் விபா⁴வயே’’தி.
வசனத்த²விஜானநேன விதி³தாபி⁴த⁴ம்மஸாமஞ்ஞத்த²ஸ்ஸ அபி⁴த⁴ம்மகதா² வுச்சமானா ஸோபெ⁴ய்யாதி அபி⁴த⁴ம்மபரிஜானநமேவ ஆதி³ம்ஹி யுத்தரூபந்தி தத³த்த²ங் புச்ச²தி ‘‘தத்த² கேனட்டே²ன அபி⁴த⁴ம்மோ’’தி. தத்த² தத்தா²தி ‘‘அபி⁴த⁴ம்மஸ்ஸ அத்த²ங் பகாஸயிஸ்ஸாமீ’’தி யதி³த³ங் வுத்தங், தஸ்மிங். ‘‘யஸ்ஸ அத்த²ங் பகாஸயிஸ்ஸாமீ’’தி படிஞ்ஞாதங், ஸோ அபி⁴த⁴ம்மோ கேனட்டே²ன அபி⁴த⁴ம்மோதி அத்தோ². தத்தா²தி வா ‘‘அபி⁴த⁴ம்மகத²’’ந்தி ஏதஸ்மிங் வசனே யோ அபி⁴த⁴ம்மோ வுத்தோ, ஸோ கேனட்டே²ன அபி⁴த⁴ம்மோதி அத்தோ². த⁴ம்மாதிரேகத⁴ம்மவிஸேஸட்டே²னாதி எத்த² த⁴ம்மோ அதிரேகோ த⁴ம்மாதிரேகோ, ஸுத்தந்தாதி⁴கா பாளீதி அத்தோ². த⁴ம்மோ விஸேஸோ த⁴ம்மவிஸேஸோ த⁴ம்மாதிஸயோ, விசித்தா பாளீதி அத்தோ², த⁴ம்மாதிரேகத⁴ம்மவிஸேஸா ஏவ அத்தோ² த⁴ம்மாதிரேகத⁴ம்மவிஸேஸட்டோ². த்³வின்னம்பி அத்தா²னங் அபி⁴த⁴ம்மஸத்³த³ஸ்ஸ அத்த²பா⁴வேன ஸாமஞ்ஞதோ ஏகவசனநித்³தே³ஸோ கதோ. தஸ்மாதி யஸ்மா ‘‘அபி⁴க்கமந்தி, அபி⁴க்கந்தவண்ணா’’திஆதீ³ஸு விய அதிரேகவிஸேஸட்ட²தீ³பகோ அபி⁴ஸத்³தோ³, தஸ்மா அயம்பி த⁴ம்மோ த⁴ம்மாதிரேகத⁴ம்மவிஸேஸட்டே²ன ‘‘அபி⁴த⁴ம்மோ’’தி வுச்சதீதி ஸம்ப³ந்தோ⁴.
தத்த² ஸியா – ‘‘அபி⁴க்கமந்தி, அபி⁴க்கந்தவண்ணா’’தி எத்த² தா⁴துஸத்³த³ஸ்ஸ புரதோ பயுஜ்ஜமானோ அபி⁴ஸத்³தோ³ கிரியாய அதிரேகவிஸேஸபா⁴வதீ³பகோ ஹோதீதி யுத்தங் உபஸக்³க³பா⁴வதோ, த⁴ம்மஸத்³தோ³ பன ந தா⁴துஸத்³தோ³தி ஏதஸ்மா புரதோ அபி⁴ஸத்³தோ³ பயோக³மேவ நாரஹதி. அதா²பி பயுஜ்ஜெய்ய, கிரியாவிஸேஸகா உபஸக்³கா³, ந ச த⁴ம்மோ கிரியாதி த⁴ம்மஸ்ஸ அதிரேகவிஸேஸபா⁴வதீ³பனங் ந யுத்தந்தி? நோ ந யுத்தங். அஞ்ஞஸ்ஸபி ஹி உபஸக்³க³ஸ்ஸ அதா⁴துஸத்³தா³ ‘‘யதா²’’திஆதி³. ஏவமேவாதி யதா² ச²த்தாதிரேகச²த்தவிஸேஸாதி³அத்தே²ன அதிச²த்தாத³யோ ஹொந்தி அதிஸத்³த³ஸ்ஸ உபஸக்³க³ஸ்ஸ அதா⁴துஸத்³த³ஸ்ஸபி புரதோ பயுஜ்ஜமானஸ்ஸ அகிரியாய ச தப்³பா⁴வதீ³பகத்தா, ஏவமயம்பி த⁴ம்மோ த⁴ம்மாதிரேகத⁴ம்மவிஸேஸட்டே²ன ‘‘அபி⁴த⁴ம்மோ’’தி வுச்சதி அபி⁴-ஸத்³த³ஸ்ஸ உபஸக்³க³ஸ்ஸ அதா⁴துஸத்³த³ஸ்ஸபி புரதோ பயுஜ்ஜமானஸ்ஸ அகிரியாய ச தப்³பா⁴வதீ³பகத்தாதி அதி⁴ப்பாயோ.
ஏகதே³ஸேனேவ விப⁴த்தாதி ‘‘கதமே ச, பி⁴க்க²வே, பஞ்சக்க²ந்தா⁴? ரூபக்க²ந்தோ⁴…பே॰… விஞ்ஞாணக்க²ந்தோ⁴. கதமோ ச, பி⁴க்க²வே, ரூபக்க²ந்தோ⁴? யங் கிஞ்சி ரூபங் அதீதா…பே॰… ஸந்திகே வா, அயங் வுச்சதி ரூபக்க²ந்தோ⁴’’திஏவமாதி³னா (ஸங்॰ நி॰ 3.48; விப⁴॰ 2) உத்³தே³ஸனித்³தே³ஸமத்தேனேவ விப⁴த்தா, ‘‘தத்த² கதமங் ரூபங் அதீத’’ந்திஏவமாதி³னா (விப⁴॰ 3) படினித்³தே³ஸஸ்ஸ அபி⁴த⁴ம்மபா⁴ஜனீயஸ்ஸ பஞ்ஹபுச்ச²கஸ்ஸ ச அபா⁴வா ந நிப்பதே³ஸேன. அபி⁴த⁴ம்மங் பத்வா பன…பே॰… நிப்பதே³ஸதோவ விப⁴த்தா, தஸ்மா அயம்பி த⁴ம்மோ த⁴ம்மாதிரேகத⁴ம்மவிஸேஸட்டே²ன ‘‘அபி⁴த⁴ம்மோ’’தி வுச்சதி நிப்பதே³ஸானங் திண்ணம்பி நயானங் அதிரேகபாளிபா⁴வதோ விஸேஸபாளிபா⁴வதோ சாதி அதி⁴ப்பாயோ. ஸுத்தந்தே பா³வீஸதியா இந்த்³ரியானங் ஏகதோ அனாக³தத்தா இந்த்³ரியவிப⁴ங்கே³ ஸுத்தந்தபா⁴ஜனீயங் நத்தி². ‘‘அவிஜ்ஜாபச்சயா ஸங்கா²ரா ஸம்ப⁴வந்தீ’’திஆதி³னா படிச்சஸமுப்பாதே³ தஸ்ஸ தஸ்ஸ பச்சயத⁴ம்மஸ்ஸ பச்சயுப்பன்னத⁴ம்மானங் பச்சயபா⁴வோ உத்³தி³ட்டோ², உத்³தி³ட்ட²த⁴ம்மானஞ்ச குஸலாதி³பா⁴வோ புச்சி²த்வா விஸ்ஸஜ்ஜேதப்³போ³, ந செத்த² ‘‘அவிஜ்ஜாஸங்கா²ரா’’தி ஏவங் வுத்தோ உத்³தே³ஸோ அத்தீ²தி பஞ்ஹபுச்ச²கங் நத்தி². ஸுத்தந்தே பஞ்ச ஸிக்கா²பதா³னி உத்³தி³ட்டா²னி பாணாதிபாதா வேரமணீதிஆதீ³னி. ஸா பன வேரமணீ யதி³ ஸபா⁴வகிச்சாதி³வஸேன விப⁴ஜீயெய்ய, ‘‘ஆரதி விரதீ’’திஆதி³னா அபி⁴த⁴ம்மபா⁴ஜனீயமேவ ஹோதி. அதா²பி சித்துப்பாத³வஸேன விப⁴ஜீயெய்ய, ததா²பி அபி⁴த⁴ம்மபா⁴ஜனீயமேவ ஹோதி. அஞ்ஞோ பன வேரமணீனங் விப⁴ஜிதப்³ப³ப்பகாரோ நத்தி², யேன பகாரேன ஸுத்தந்தபா⁴ஜனீயங் வத்தப்³ப³ங் ஸியா. தஸ்மா ஸிக்கா²பத³விப⁴ங்கே³ ஸுத்தந்தபா⁴ஜனீயங் நத்தி².
வசனத்த²தோ அபி⁴த⁴ம்மே ஞாதே பரிச்சே²த³தோ ஞாபேதுங் ஆஹ ‘‘பகரணபரிச்சே²த³தோ’’திஆதி³. கதிபயாவ பஞ்ஹவாரா அவஸேஸாதி த⁴ம்மஹத³யவிப⁴ங்கே³ அனாக³தா ஹுத்வா மஹாத⁴ம்மஹத³யே ஆக³தா த⁴ம்மஹத³யவிப⁴ங்க³வசனவஸேன ‘‘அபுப்³ப³ங் நத்தீ²’’தி வுத்தங். அப்பமத்திகாவ தந்தி அவஸேஸாதி த⁴ம்மஹத³யவிப⁴ங்கே³ அனாக³ந்த்வா மஹாத⁴ம்மஹத³யே ஆக³ததந்திதோ யதி³ பத²வீஆதீ³னங் வித்தா²ரகதா² மஹாதா⁴துகதா² ரூபகண்ட³தா⁴துவிப⁴ங்கா³தீ³ஸு, அத² தா⁴துகதா²ய வித்தா²ரகதா² தா⁴துகதா²ய அனாக³ந்த்வா மஹாதா⁴துகதா²ய ஆக³ததந்தி அப்பமத்திகாவாதி அதி⁴ப்பாயோ.
யங் ‘‘ஸம்மாஸம்பு³த்³தோ⁴ ஹீ’’திஆதி³மாஹ. சதூஸு பஞ்ஹேஸூதி ‘‘உபலப்³ப⁴தி நுபலப்³ப⁴தீ’’தி படிஞ்ஞாய க³ஹிதாய படிக்கே²பக³ஹணத்த²ங் ‘‘யோ ஸச்சிகட்டோ²’’தி வுத்தங் ஸச்சிகட்ட²ங் நிஸ்ஸயங் கத்வா உபாதா³ய பவத்தா த்³வேபி பஞ்சகா ஏகோ பஞ்ஹோ, ‘‘ஸப்³ப³த்தா²’’தி ஸரீரங் ஸப்³ப³ங் வா தே³ஸங் உபாதா³ய பவத்தா ஏகோ, ‘‘ஸப்³ப³தா³’’தி காலமுபாதா³ய ஏகோ, ‘‘ஸப்³பே³ஸூ’’தி யதி³ க²ந்தா⁴யதனாத³யோ க³ஹிதா, தே உபாதா³ய பவத்தா, அத² பன ‘‘யோ ஸச்சிகட்டோ² ஸப்³ப³த்த² ஸப்³ப³தா³’’தி ஏதேஹி ந கோசி ஸச்சிகட்டோ² தே³ஸோ காலோ வா அக்³க³ஹிதோ அத்தி², தே பன ஸாமஞ்ஞவஸேன க³ஹெத்வா அனுயோகோ³ கதோ, ந பே⁴த³வஸேனாதி பே⁴த³வஸேன க³ஹெத்வா அனுயுஞ்ஜிதுங் ‘‘ஸப்³பே³ஸூ’’தி வுத்தா ஸச்சிகட்ட²தே³ஸகாலப்பதே³ஸே உபாதா³ய ச பவத்தா ஏகோதி ஏதேஸு சதூஸு. த்³வின்னங் பஞ்சகானந்தி எத்த² ‘‘புக்³க³லோ உபலப்³ப⁴தி…பே॰… மிச்சா²’’தி ஏகங், ‘‘புக்³க³லோ நுபலப்³ப⁴தி…பே॰… மிச்சா²’’தி (கதா²॰ 18) ஏகங், ‘‘த்வங் சே பன மஞ்ஞஸி…பே॰… இத³ங் தே மிச்சா²’’தி (கதா²॰ 3) ஏகங், ‘‘ஏஸே சே து³ன்னிக்³க³ஹிதே…பே॰… இத³ங் தே மிச்சா²’’தி ஏகங், ‘‘ந ஹேவங் நிக்³க³ஹேதப்³பே³, தேன ஹி யங் நிக்³க³ண்ஹாஸி…பே॰… ஸுகதா படிபாத³னா’’தி (கதா²॰ 10) ஏகந்தி ஏவங் நிக்³க³ஹகரணங், படிகம்மகரணங், நிக்³க³ஹஸ்ஸ ஸுனிக்³க³ஹபா⁴வங் இச்ச²தோ படிஞ்ஞாட²பனேன படிகம்மவேட²னங், படிகம்மஸ்ஸ து³ப்படிகம்மபா⁴வங் இச்ச²தோ தங்னித³ஸ்ஸனேன நிக்³க³ஹஸ்ஸ து³ன்னிக்³க³ஹபா⁴வத³ஸ்ஸனேன நிக்³க³ஹனிப்³பே³ட²னங், அனிக்³க³ஹபா⁴வாரோபனாதி³னா சே²தோ³தி அயங் ஏகோ பஞ்சகோ, யோ அட்ட²கதா²யங் அனுலோமபஞ்சகபடிகம்மசதுக்கனிக்³க³ஹசதுக்கஉபனயனசதுக்கனிக³மனசதுக்க நாமேஹி ஸகவாதி³புப்³ப³பக்கே² அனுலோமபச்சனீகபஞ்சகோதி வுத்தோ, பரவாதி³புப்³ப³பக்கே² ச ஏவமேவ பச்சனீயானுலோமபஞ்சகோதி வுத்தோ. ஏவங் த்³வே பஞ்சகா வேதி³தப்³பா³. ஏவங் ஸேஸபஞ்ஹேஸுபீதி அட்ட² பஞ்சகா அட்ட²முகா² வாத³யுத்தீதி யுத்தீதி உபாயோ, வாத³ஸ்ஸ யுத்தி வாத³யுத்தி, வாத³ப்பவத்தனஸ்ஸ உபாயோதி அத்தோ².
அனுலோமபச்சனீகபஞ்சகே ஆதி³னிக்³க³ஹங் த³ஸ்ஸெத்வா பச்சனீயானுலோமபஞ்சகே ச ஆதி³னிக்³க³ஹமேவ த³ஸ்ஸெத்வா மாதிகங் தீ³பேதுங் ‘‘ஸா பனேஸா’’திஆதி³மாஹ. புக்³க³லோதி அத்தா ஸத்தோ ஜீவோ. உபலப்³ப⁴தீதி பஞ்ஞாய உபக³ந்த்வா லப்³ப⁴தி. ஸச்சிகட்ட²பரமட்டே²னாதி மாயாமரீசிஆத³யோ விய நாபூ⁴தாகாரேன, அனுஸ்ஸவாதீ³ஹி க³ஹேதப்³பா³ விய ந அனுத்தமத்த²பா⁴வேன, அத² கோ² பூ⁴தேன உத்தமத்த²பா⁴வேன உபலப்³ப⁴தீதி புச்ச²தி. இதரோ தாதி³ஸங் இச்ச²ந்தோ படிஜானாதி. புன யோ ஸச்சிகட்ட²பரமட்டே²ன உபலப்³ப⁴தி, ஸோ ஸச்சிகட்ட²பரமட்ட²தோ அஞ்ஞோ ததா³தா⁴ரோ, அஞ்ஞத்ர வா தேஹி, தேஸங் ‘‘யோ ஸச்சிகட்டோ²…பே॰… பரமட்டே²னா’’தி. இதரோ புக்³க³லஸ்ஸ ரூபாதீ³ஹி அஞ்ஞத்தங் அனஞ்ஞத்தஞ்ச அனிச்ச²ந்தோ ‘‘ந ஹேவ’’ந்தி படிக்கி²பதி. புன ஸகவாதீ³ படிஞ்ஞாய ஏகத்தாபன்னங் அப்படிக்கி²பிதப்³ப³ங் படிக்கி²பதீதி கத்வா நிக்³க³ஹங் ஆரோபெந்தோ ஆஹ ‘‘ஆஜானாஹி நிக்³க³ஹ’’ந்தி. ‘‘புக்³க³லோ நுபலப்³ப⁴தீ’’தி புட்டோ² ஸகவாதீ³ புக்³க³லதி³ட்டி²ங் படிஸேதெ⁴ந்தோ ‘‘ஆமந்தா’’தி படிஜானாதி. புன இதரோ யோ ஸச்சிகட்டே²ன நுபலப்³ப⁴தி புக்³க³லோ, ஸோ ஸச்சிகட்ட²பரமட்ட²தோ அஞ்ஞோ வா அனஞ்ஞோ வா நுபலப்³ப⁴தீதி ஆபஜ்ஜதி அஞ்ஞஸ்ஸ பகாரஸ்ஸ அபா⁴வாதி அனுயுஞ்ஜதி ‘‘யோ ஸச்சிகட்டோ²…பே॰… பரமட்டே²னா’’தி. யஸ்மா பன புக்³க³லோ ஸப்³பே³ன ஸப்³ப³ங் நுபலப்³ப⁴தி, தஸ்மா தஸ்ஸ அஞ்ஞத்தானஞ்ஞத்தானுயோகோ³ அனநுயோகோ³ புக்³க³லலத்³தி⁴ங் படிஸேதெ⁴ந்தஸ்ஸ அனாபஜ்ஜனதோதி ‘‘ந ஹேவ’’ந்தி படிக்கி²பதி. இதரோ படிஞ்ஞாய ஆபஜ்ஜனலேஸமேவ பஸ்ஸந்தோ அவிபரீதங் அத்த²ங் அஸம்பு³ஜ்ஜ²ந்தோயேவ நிக்³க³ஹங் ஆரோபேதி ‘‘ஆஜானாஹி நிக்³க³ஹ’’ந்தி.
இதீதி யங் தி³ஸ்வா மாதிகா ட²பிதா, ஏவங் தே³ஸிதத்தாதி அதி⁴ப்பாயோ. யதா² கிந்தி யேன பகாரேன பு³த்³த⁴பா⁴ஸிதங் நாம ஜாதங், தங் நித³ஸ்ஸனங் கிந்தி அத்தோ². யதோனிதா³னந்தி யங்காரணா ச²அஜ்ஜ²த்திகபா³ஹிராயதனாதி³னிதா³னந்தி அத்தோ². பபஞ்சஸஞ்ஞாஸங்கா²தி தண்ஹாமானதி³ட்டி²பபஞ்சஸம்பயுத்தா ஸஞ்ஞாகொட்டா²ஸா. ஸமுதா³சரந்தீதி அஜ்ஜா²சரந்தி. எத்த² சேதி ஏதேஸு ஆயதனாதீ³ஸு தண்ஹாமானதி³ட்டீ²ஹி அபி⁴னந்தி³தப்³ப³ங் அபி⁴வதி³தப்³ப³ங் அஜ்ஜோ²ஸிதப்³ப³ஞ்ச நத்தி² சே ஏஸேவந்தோதி அபி⁴னந்த³னாதீ³னங் நத்தி²பா⁴வகரோ மக்³கோ³ தப்படிப்பஸ்ஸத்³தி⁴பூ⁴தங் ப²லங் வா ராகா³னுஸயாதீ³னங் அந்தோ அவஸானங், அப்பவத்தீதி அத்தோ².
ஜானங் ஜானாதீதி ஸப்³ப³ஞ்ஞுதஞ்ஞாணேன ஜானிதப்³ப³ங் ஜானாதி. ந ஹி பதே³ஸஞாணவா ஜானிதப்³ப³ங் ஸப்³ப³ங் ஜானாதீதி. பஸ்ஸங் பஸ்ஸதீதி தி³ப்³ப³சக்கு²பஞ்ஞாசக்கு²த⁴ம்மசக்கு²பு³த்³த⁴சக்கு²ஸமந்தசக்கு²ஸங்கா²தேஹி பஞ்சஹி சக்கூ²ஹி பஸ்ஸிதப்³ப³ங் பஸ்ஸதி. அத² வா ஜானங் ஜானாதீதி யதா² அஞ்ஞே ஸவிபல்லாஸா காமரூபபரிஞ்ஞாவாதி³னோ ஜானந்தாபி விபல்லாஸவஸேன ஜானந்தி, ந ஏவங் ப⁴க³வா சக்கு²பூ⁴தோதி பஞ்ஞாசக்கு²மயத்தா ஸத்தேஸு ச தது³ப்பாத³னதோ லோகஸ்ஸ சக்கு²பூ⁴தோ. ஞாணபூ⁴தோதி ஏதஸ்ஸ ச ஏவமேவ அத்தோ² த³ட்ட²ப்³போ³. த⁴ம்மா போ³தி⁴பக்கி²யா. ப்³ரஹ்மா மக்³கோ³, தேஹி உப்பன்னத்தா லோகஸ்ஸ ச தது³ப்பாத³னதோ தப்³பூ⁴தோ. வத்தாதி சதுஸச்சத⁴ம்மே வத³தீதி வத்தா. பவத்தாதி சிரங் ஸச்சப்படிவேத⁴ங் பவத்தெந்தோ வத³தீதி பவத்தா. அத்த²ஸ்ஸ நின்னேதாதி அத்த²ங் உத்³த⁴ரித்வா த³ஸ்ஸேதா, பரமத்த²ங் வா நிப்³பா³னங் பாபயிதா. அமதஸ்ஸ தா³தாதி அமதஸச்சி²கிரியங் ஸத்தேஸு உப்பாதெ³ந்தோ அமதங் த³தா³தீதி அமதஸ்ஸ தா³தா. போ³தி⁴பக்கி²யத⁴ம்மானங் ததா³யத்தபா⁴வதோ த⁴ம்மஸ்ஸாமீ. ஸுவண்ணாலிங்க³ந்தி ஸுவண்ணமயங் ஆலிங்க³ங் கு²த்³த³கமுதி³ங்க³ங். ஸுபுப்பி²தஸதபத்தபது³மமிவ ஸஸ்ஸிரிகங் ஸஸோப⁴ங் ஸுபுப்பி²தஸதபத்தஸஸ்ஸிரிகங்.
அனுமோதி³தகாலதோ பட்டா²ய…பே॰… பு³த்³த⁴பா⁴ஸிதங் நாம ஜாதந்தி ஏதேன அனுமோத³னா பு³த்³த⁴பா⁴ஸிதபா⁴வஸ்ஸ காரணந்தி அயமத்தோ² வுத்தோ விய தி³ஸ்ஸதி, ஏவஞ்ச ஸதி கதா²வத்து²ஸ்ஸ பு³த்³த⁴பா⁴ஸிதபா⁴வோ ந ஸியா அனநுமோதி³தத்தா, தஸ்மா ஏவமெத்த² அத்தோ² த³ட்ட²ப்³போ³ – ‘‘மஹாகச்சாயனோ ஏவங் விப⁴ஜிஸ்ஸதீ’’தி தி³ஸ்வா ப⁴க³வா மாதிகங் நிக்கி²பித்வா விஹாரங் பவிட்டோ², ததே²வ ச தே²ரோ ப⁴க³வதா தி³ன்னநயேன ட²பிதமாதிகாய விப⁴ஜீதி பு³த்³த⁴பா⁴ஸிதங் நாம ஜாதங், தங் பன அனுமோத³னாய பாகடங் ஜாதந்தி ஏதமத்த²ங் ஸந்தா⁴ய ‘‘ஏவங் ஸத்தா²ரா…பே॰… நாம ஜாத’’ந்தி வுத்தந்தி.
இதா³னி ‘‘தத்த² த⁴ம்மஸங்க³ணீபகரணே’’திஆதி³மாஹ. காமாவசரகுஸலதோ அட்டா²தி காமாவசரகுஸலே சத்தாரோ க²ந்தே⁴ க³ஹெத்வா ததோ அட்ட² சித்தானி உத்³த⁴ரதி. பட²மா விப⁴த்தீதிபி வத³ந்தி. ஏகூனநவுதி சித்தானீதி யத்த² ஏதானி சித்தானி விப⁴த்தானி, தே பாளிப்பதே³ஸா ‘‘ஏகூனநவுதி சித்தானீ’’தி வுத்தா. தேஸஞ்ச ஸமுதா³யோ சித்தவிப⁴த்தி, தஸ்மா உபபன்னமேதங் ‘‘ஏகூனநவுதி சித்தானி சித்தவிப⁴த்தீ’’தி. மாதிகஞ்ச உத்³தி³ஸித்வா தத்த² ஏகேகங் பத³ங் உத்³த⁴ரித்வா யஸ்மா சித்தானி விப⁴த்தானி, தஸ்மா மாதிகாபி சித்தவிப⁴த்திஅந்தோக³தா⁴யேவாதி சித்துப்பாத³கண்ட³ங் மாதிகாபத³பா⁴ஜனீயவஸேன து³வித⁴ந்தி இத³ம்பி வசனங் யுஜ்ஜதி.
மூலதோதி ‘‘தீணி குஸலமூலானீ’’திஆதி³னா (த⁴॰ ஸ॰ 985) குஸலாதீ³னங் மூலவஸேன ஸங்கி²பித்வா வசனங். ‘‘வேத³னாக்க²ந்தோ⁴’’திஆதி³னா க²ந்த⁴தோ. ‘‘காயகம்ம’’ந்திஆதி³னா த்³வாரதோ. ‘‘ஸுக²பூ⁴மியங் காமாவசரே’’திஆதி³னா (த⁴॰ ஸ॰ 988) பூ⁴மிதோ. அத்தோ²தி ஹேதுப²லங். த⁴ம்மோதி ஹேது த⁴ம்மதோ நிக்கே²போ. ‘‘தங்ஸம்பயுத்தோ, தங்ஸமுட்டா²னா ததே³கட்டா² ச கிலேஸா’’திஆதி³னா (த⁴॰ ஸ॰ 985-986) ஹேதுப²லவஸேன ஸங்க³ஹோ அத்த²தோ நிக்கே²போ. அத² வா த⁴ம்மோதி பா⁴ஸிதோ. அத்தோ²தி பா⁴ஸிதத்தோ². ‘‘தயோ குஸலஹேதூ’’தி (த⁴॰ ஸ॰ 1059) த⁴ம்மோ. ‘‘தத்த² கதமே தயோ குஸலஹேதூ அலோபோ⁴’’திஆதி³ (த⁴॰ ஸ॰ 1060) அத்தோ², ஸோ ச த⁴ம்மோ. ‘‘தத்த² கதமோ அலோபோ⁴’’திஆதி³ (த⁴॰ ஸ॰ 1061) அத்தோ²தி ஏவங் அத்த²த⁴ம்மவஸேன நிக்கே²போ வேதி³தப்³போ³. நாமதோதி ‘‘தீணி குஸலமூலானீ’’தி வுத்தத⁴ம்மானங் அலோபோ⁴திஆதி³னாமவஸேன. லிங்க³தோதி உத்³தி³ட்ட²ஸ்ஸ ஏகஸ்ஸேவ த⁴ம்மஸ்ஸ ‘‘அலோபோ⁴ அலுப்³ப⁴னா அலுப்³பி⁴தத்த’’ந்தி (த⁴॰ ஸ॰ 1061) புரிஸாதி³லிங்க³வஸேன நிக்கே²போ.
க³ணனசாரந்தி க³ணனப்பவத்திங். ஸமானெந்தீதி ஸமானங் கரொந்தி பூரெந்தி, ததா² ஸமானேதப்³ப³ந்தி எத்தா²பி. ‘‘விஜ்ஜாபா⁴கி³னோ அவிஜ்ஜாபா⁴கி³னோ’’தி (த⁴॰ ஸ॰ து³கமாதிகா 101) ஏவமாதீ³ஸு எத்த² விஞ்ஞாதேஸு ஆபி⁴த⁴ம்மிகத்தே²ரா ஸுத்தந்தங் ஸுணந்தா சிந்தெந்தா ச ஸுத்தந்தேஸு ‘‘விஜ்ஜாபா⁴கி³னோ’’திஆதீ³ஸு ஆக³தேஸு அத்த²ஸ்ஸ விஞ்ஞாதத்தா ந கிலமந்தீதி ஏதமத்த²ங் ஸந்தா⁴ய வுத்தங் ‘‘ஆபி⁴த⁴ம்மிகத்தே²ரானங்…பே॰… அகிலமத்த²ங் ட²பிதா’’தி.
அனமதக்³கோ³தி க²ந்த⁴ந்தரந்தி க²ந்த⁴னானத்தங், க²ந்த⁴மேவ வா. க³ஹேதுங் அஸக்குணெய்யத்தா ஸண்ஹங், ஸுகு²மாய பஞ்ஞாய க³ஹேதப்³ப³தோ ஸுகு²மஞ்ச த⁴ம்மங் ஸண்ஹஸுகு²மத⁴ம்மங். ப³லவதா ஞாணவேகே³ன பவத்தத்தா ப³லவதோ ஞாணவேக³ஸ்ஸ நிமித்தபா⁴வதோ ச ப³லவங். க³ம்பீ⁴ரமேவ க³ம்பீ⁴ரக³தங், க³ம்பீ⁴ரானி வா க³தானி க³மனானி ஏதஸ்ஸ ஸந்தீதி க³ம்பீ⁴ரக³தங். யதா²னுபுப்³ப³ந்தி யதா²னுபுப்³பே³ன. நிகி²லேனாதி நிரவஸேஸேன தே³ஸிதங், பஞ்சகி²லரஹிதேன வா ப⁴க³வதா தே³ஸிதங். ரூபக³தங்வாதி ஹத்த²க³தங் ரூபங் விய சக்கு²னா. ‘‘படிவேத⁴ஞாணேன ஸமந்தபட்டா²னங் யோ பஸ்ஸதி, ஸோ அத்தே²வ, நோ நத்தீ²’’தி அத்தானங் ஸந்தா⁴ய தே²ரோ வத³தீதி.
கு²த்³த³கவத்து²விப⁴ங்கே³ ஆக³தேஸு ஏகாதி⁴கேஸு அட்ட²ஸு கிலேஸஸதேஸு அட்ட²ஸததண்ஹாவிசரிதானி அபனெத்வா ஸேஸா த்³வாஸட்டி² தி³ட்டி²யோ ச உப்பன்னானுப்பன்னபா⁴வேன தி³கு³ணிதானி தி³யட்³ட⁴கிலேஸஸஹஸ்ஸானி த³ஸாதி⁴கானி ஹொந்தி, அப்பகங் பன ஊனமதி⁴கங் வா ந க³ணனூபக³ங் ஹோதீதி ‘‘தி³யட்³ட⁴கிலேஸஸஹஸ்ஸ’’ந்தி வுத்தங். இதரேஸங் அதீதாதி³பா⁴வாமஸனா அக்³க³ஹணங் கே²பனே த³ட்ட²ப்³ப³ங்.
மேசகபடாதி சித்தஸமுட்டா²னா வண்ணதா⁴தூதி சித்தபச்சயஉதுஸமுட்டா²னா வண்ணதா⁴தூதி அத்தோ² க³ஹேதப்³போ³. கஸ்மா? ந ஹி சித்தஸமுட்டா²னங் ரூபங் ப³ஹி நிக³ச்ச²தீதி, சித்தஸமுட்டா²னரூபபரம்பராய ஆக³தத்தா பன ஏவங் வுத்தங். அத² வா சித்தஸமுட்டா²னா வண்ணதா⁴தூதி எத்த² பச்சயஉதுஸத்³தா³னங் லோபங் கத்வா ஸோயேவ புப்³பே³ வுத்தோ அத்தோ² ஸுவண்ணதா ஸுஸ்ஸரதா விய. எத்த² ஹி ‘‘ஸுஸ்ஸரதா’’தி உபாதி³ன்னகாதி⁴காரே ஆக³தங், ந ச ஸத்³தோ³ உபாதி³ன்னகோ அத்தி², தஸ்மா உபாதி³ன்னகரூபஒட்ட²தாலுஆதி³னிஸ்ஸயத்தா ஏவங் வுத்தந்தி, ஏவமெத்தா²பி சித்தபச்சயஉதுஸமுட்டா²னங் ஸந்தா⁴ய ‘‘சித்தஸமுட்டா²னா வண்ணதா⁴தூ’’தி வத³தி.
காயஸக்கி²ந்தி பச்சக்க²ங். த³ந்தாவரணந்தி ஒட்ட²த்³வயங். முகா²தா³னந்தி முக²விவரங். ஸிலிட்ட²ந்தி ஸங்க³தங் ஸுஸண்டி²தங். ஸரே நிமித்தங் க³ஹெத்வாதி ‘‘த⁴ம்மோ ஏஸோ வுச்சதீ’’தி த⁴ம்மஸ்ஸரவஸேன நிமித்தங் க³ஹெத்வா, ந கிலேஸானுப்³யஞ்ஜனவஸேன. ஏகப்பஹாரேனாதி எத்த² பஹாரோதி தி³வஸஸ்ஸ ததியோ பா⁴கோ³ வுச்சதி. ஏவங் ஸந்தேதி புப்³பே³ வுத்தமக்³க³ஹெத்வா வாசனாமக்³க³ஸ்ஸ தே²ரப்பப⁴வத்தவசனமேவ க³ஹெத்வா தேன புரிமவசனஞ்ச படிக்கி²பந்தோ சோதே³தி.
தேனேதமேதஸ்ஸாதி அத்தத்த²பரத்தா²தி³பே⁴தே³தி யோ தங் ஸுத்தங் ஸஜ்ஜா²யதி ஸுணாதி வாசேதி சிந்தேதி தே³ஸேதி, ஸுத்தேன ஸங்க³ஹிதோ ஸீலாதி³அத்தோ² தஸ்ஸபி ஹோதி, தேன பரஸ்ஸ ஸாதே⁴தப்³ப³தோ பரஸ்ஸபி ஹோதீதி தது³ப⁴யங் தங் ஸுத்தங் ஸூசேதி தீ³பேதி. ததா² தி³ட்ட²த⁴ம்மிகஸம்பராயிகத்தே² லோகியலோகுத்தரத்தே²தி ஏவமாதி³பே⁴தே³ அத்தே² ஆதி³ஸத்³தே³ன ஸங்க³ண்ஹாதி. அத்த²ஸத்³தோ³ சாயங் ஹிதபரியாயவசனங், ந பா⁴ஸிதத்த²வசனங். யதி³ ஸியா, ஸுத்தங் அத்தனோபி பா⁴ஸிதத்த²ங் ஸூசேதி பரஸுத்தஸ்ஸபீதி அயமத்தோ² ஸியா, ஸுத்தேன ச யோ அத்தோ² பகாஸிதோ, ஸோ தஸ்ஸேவ ஹோதீதி ந தேன பரத்தோ² ஸூசிதோ ஹோதி, தேன ச ஸூசேதப்³ப³ஸ்ஸ பரத்த²ஸ்ஸ நிவத்தேதப்³ப³ஸ்ஸ அபா⁴வா அத்தக்³க³ஹணங் ந கத்தப்³ப³ங், அத்தத்த²பரத்த²வினிமுத்தஸ்ஸ பா⁴ஸிதத்த²ஸ்ஸ அபா⁴வா ஆதி³க்³க³ஹணஞ்ச ந கத்தப்³ப³ங், தஸ்மா யதா²வுத்தஸ்ஸ அத்த²ஸ்ஸ ஸுத்தே அஸம்ப⁴வதோ ஸுத்தாதா⁴ரஸ்ஸ புக்³க³லஸ்ஸ வஸேன அத்தத்த²பரத்தா² வுத்தா.
அத² வா ஸுத்தங் அனபெக்கி²த்வா யே அத்தத்தா²த³யோபி அத்த²ப்பபே⁴தா³ வுத்தா நித்³தே³ஸே (மஹானி॰ 69; சூளனி॰ மோக⁴ராஜமாணவபுச்சா²னித்³தே³ஸ 85) ‘‘அத்தத்தோ² பரத்தோ² உப⁴யத்தோ² தி³ட்ட²த⁴ம்மிகோ அத்தோ² ஸம்பராயிகோ அத்தோ² உத்தானோ அத்தோ² க³ம்பீ⁴ரோ அத்தோ² கு³ள்ஹோ அத்தோ² படிச்ச²ன்னோ அத்தோ² நெய்யோ அத்தோ² ‘‘அத்தா²னங் ஸூசனதோ ஸுத்த’’ந்தி வுத்தங்.
ஸுத்தே ச ஆணாத⁴ம்மஸபா⁴வா வேனெய்யஜ்ஜா²ஸயங் அனுவத்தந்தி, ந வினயாபி⁴த⁴ம்மேஸு விய வேனெய்யஜ்ஜா²ஸயோ ஆணாத⁴ம்மஸபா⁴வே அனுவத்ததி, தஸ்மா வேனெய்யானங் ஏகந்தஹிதபடிலாப⁴ஸங்வத்தனிகா ஸுத்தந்ததே³ஸனா ஹோதீதி ‘‘ஸுவுத்தா செத்த² அத்தா²’’திஆதி³ வுத்தங். பஸவதீதி ப²லதி ‘‘ஸுத்தாணா’’தி ஏதஸ்ஸ அத்த²ங் பகாஸேதுங் ‘‘ஸுட்டு² ச நே தாயதீ’’தி வுத்தங். அத்தத்த²பரத்தா²தி³விதா⁴னேஸு ச ஸுத்தஸ்ஸ பமாணபா⁴வோ தேஸஞ்ச ஸங்கா³ஹகத்தங் யோஜேதப்³ப³ங், தத³த்த²ப்பகாஸனே பதா⁴னத்தா ஸுத்தஸ்ஸ இதரேஹி விஸேஸனஞ்ச. ஏதந்தி ‘‘அத்தா²னங் ஸூசனதோ’’திஆதி³கங் அத்த²வசனங். ஏதஸ்ஸாதி ஸுத்தஸ்ஸ.
அபி⁴க்கமந்தீதி எத்த² அபி⁴-ஸத்³தோ³ கமனஸ்ஸ வுத்³தி⁴பா⁴வங் அதிரேகத்தங் தீ³பேதி. அபி⁴க்கந்தேனாதி ச எத்த² கந்தியா அதி⁴கத்தங் விஸேஸபா⁴வந்தி யுத்தங் கிரியாவிஸேஸகத்தா உபஸக்³க³ஸ்ஸ. அபி⁴ஞ்ஞாதா, அபி⁴ராஜா, அபி⁴வினயேதி எத்த² லக்க²ணபூஜிதபரிச்சி²ன்னேஸு ரத்திஆதீ³ஸு அபி⁴-ஸத்³தோ³ வத்ததீதி கத²மேதங் யுஜ்ஜெய்யாதி? லக்க²ணகரணஞாணபூஜனபரிச்சே²த³கிரியாதீ³பனதோ தாஹி ச கிரியாஹி ரத்திராஜவினயானங் யுத்தத்தா. பா⁴வனாப²ரணவுத்³தீ⁴ஹி வுத்³தி⁴மந்தோ. ஆரம்மணாதீ³ஹீதி ஆரம்மணஸம்பயுத்தகம்மத்³வாரபடிபதா³தீ³ஹி. அவிஸிட்ட²ந்தி அஞ்ஞமஞ்ஞவிஸிட்டே²ஸு வினயஸுத்தந்தாபி⁴த⁴ம்மேஸு அவிஸிட்ட²ங் ஸமானங் பிடகஸத்³த³ந்தி அத்தோ². யதா²வுத்தேனேவாதி ‘‘ஏவங் து³வித⁴த்தே²னா’’திஆதி³னா நயேன.
கதே²தப்³பா³னங் அத்தா²னங் தே³ஸகாயத்தேன ஆணாதி³விதி⁴னா அதிஸஜ்ஜனங் பபோ³த⁴னங் தே³ஸனா. ஸாஸிதப்³ப³புக்³க³லக³தேன யதா²பராதா⁴தி³னா ஸாஸிதப்³ப³பா⁴வேன அனுஸாஸனங் வினயனங் ஸாஸனங். கதே²தப்³ப³ஸ்ஸ ஸங்வராஸங்வராதி³னோ அத்த²ஸ்ஸ கத²னங் வசனபடிப³த்³த⁴கரணங் கதா². பே⁴த³-ஸத்³தோ³ விஸுங் விஸுங் யோஜேதப்³போ³ ‘‘தே³ஸனாபே⁴த³ங் ஸாஸனபே⁴த³ங் கதா²பே⁴த³ஞ்ச யதா²ரஹங் பரிதீ³பயே’’தி. பே⁴த³ந்தி நானத்தங், நானாகரணந்தி ஸிக்கா²பஹானக³ம்பீ⁴ரபா⁴வங், தஞ்ச பரிதீ³பயே. யந்தி பரியத்திஆதி³ங். யதா²தி உபாரம்பா⁴தி³ஹேது பரியாபுணனாதி³ப்பகாரேஹி.
தீஸுபி சேதேஸு ஏதே த⁴ம்மத்த²தே³ஸனாபடிவேதா⁴தி எத்த² தந்திஅத்தோ² தந்திதே³ஸனா தந்திஅத்த²படிவேதோ⁴ ச தந்திவிஸயா ஹொந்தீதி வினயபிடகாதீ³னங் அத்த²தே³ஸனாபடிவேதா⁴தா⁴ரபா⁴வோ யுத்தோ, பிடகானி பன தந்தியோயேவாதி த⁴ம்மாதா⁴ரபா⁴வோ கத²ங் யுஜ்ஜெய்யாதி? தந்திஸமுதா³யஸ்ஸ அவயவதந்தியா ஆதா⁴ரபா⁴வதோ, த⁴ம்மாதீ³னஞ்ச து³க்கோ²கா³ஹபா⁴வதோ தேஹி வினயாத³யோ க³ம்பீ⁴ராதி வினயாதீ³னஞ்ச சதுப்³பி³தோ⁴ க³ம்பீ⁴ரபா⁴வோ வுத்தோ, தஸ்மா ‘‘த⁴ம்மாத³யோ ஏவ து³க்கோ²கா³ஹத்தா க³ம்பீ⁴ரா, ந
ஹேதும்ஹி ஞாணங் த⁴ம்மபடிஸம்பி⁴தா³தி ஏதேன வசனத்தே²ன த⁴ம்மஸ்ஸ ஹேதுபா⁴வோ கத²ங் ஞாதப்³போ³தி? ‘‘த⁴ம்மபடிஸம்பி⁴தா³’’தி ஏதஸ்ஸ ஸமாஸபத³ஸ்ஸ அவயவபத³த்த²ங் த³ஸ்ஸெந்தேன ‘‘ஹேதும்ஹி ஞாண’’ந்தி வுத்தத்தா. ‘‘த⁴ம்மே படிஸம்பி⁴தா³’’தி எத்த² ஹி ‘‘த⁴ம்மே’’தி ஏதஸ்ஸ அத்த²ங் த³ஸ்ஸெந்தேன ‘‘ஹேதும்ஹீ’’தி வுத்தங், ‘‘படிஸம்பி⁴தா³’’தி ஏதஸ்ஸ ச அத்த²ங் த³ஸ்ஸெந்தேன ‘‘ஞாண’’ந்தி, தஸ்மா ஹேதுத⁴ம்மஸத்³தா³ ஏகத்தா² ஞாணபடிஸம்பி⁴தா³ஸத்³தா³ சாதி இமமத்த²ங் த³ஸ்ஸெந்தேன ஸாதி⁴தோ த⁴ம்மஸ்ஸ ஹேதுபா⁴வோ. அத்த²ஸ்ஸ ஹேதுப²லபா⁴வோ ச ஏவமேவ த³ட்ட²ப்³போ³. யதா²த⁴ம்மந்தி எத்த² த⁴ம்ம-ஸத்³தோ³ ஹேதுங் ஹேதுப²லஞ்ச ஸப்³ப³ங் க³ண்ஹாதி. ஸபா⁴வவாசகோ ஹேஸ, ந பரியத்திஹேதுபா⁴வவாசகோ, தஸ்மா யதா²த⁴ம்மந்தி யோ யோ அவிஜ்ஜாஸங்கா²ராதி³த⁴ம்மோ, தஸ்மிங் தஸ்மிந்தி அத்தோ². த⁴ம்மாபி⁴லாபோதி அத்த²ப்³யஞ்ஜனகோ அவிபரீதாபி⁴லாபோ. ஏதேன ‘‘தத்ர த⁴ம்மனிருத்தாபி⁴லாபே ஞாணங் நிருத்திபடிஸம்பி⁴தா³’’தி (விப⁴॰ 718-720) எத்த² வுத்தத⁴ம்மனிருத்திங் த³ஸ்ஸேதி. அனுலோமாதி³வஸேன வா கத²னந்தி ஏதேன தஸ்ஸா த⁴ம்மனிருத்தியா அபி⁴லாபங் கத²னங் தஸ்ஸ வசனஸ்ஸ பவத்தனங் த³ஸ்ஸேதி. அதி⁴ப்பாயோதி ஏதேன ‘‘தே³ஸனாதி பஞ்ஞத்தீ’’தி ஏதங் வசனங் த⁴ம்மனிருத்தாபி⁴லாபங் ஸந்தா⁴ய வுத்தங், ந தப்³பி³னிமுத்தங் பஞ்ஞத்திங் ஸந்தா⁴யாதி த³ஸ்ஸேதி.
ஸோ ச லோகியலோகுத்தரோதி ஏவங் வுத்தங் அபி⁴ஸமயங் யேன பகாரேன அபி⁴ஸமேதி, யஞ்ச அபி⁴ஸமேதி, யோ ச தஸ்ஸ ஸபா⁴வோ, தேஹி பாகடங் காதுங் ‘‘விஸயதோ அஸம்மோஹதோ ச அத்தா²தி³அனுரூபங் த⁴ம்மாதீ³ஸு அவபோ³தோ⁴’’தி ஆஹ. தத்த² ஹி விஸயதோ அத்தா²தி³அனுரூபங் த⁴ம்மாதீ³ஸு அவபோ³தோ⁴ அவிஜ்ஜாதி³த⁴ம்மஸங்கா²ராதி³அத்த²தது³ப⁴யபஞ்ஞாபனாரம்மணோ லோகியோ அபி⁴ஸமயோ. அஸம்மோஹதோ அத்தா²தி³அனுரூபங் த⁴ம்மாதீ³ஸு அவபோ³தோ⁴ நிப்³பா³னாரம்மணோ மக்³க³ஸம்பயுத்தோ யதா²வுத்தத⁴ம்மத்த²பஞ்ஞத்தீஸு ஸம்மோஹவித்³த⁴ங்ஸனோ லோகுத்தரோ அபி⁴ஸமயோதி. அபி⁴ஸமயதோ அஞ்ஞம்பி படிவேத⁴த்த²ங் த³ஸ்ஸேதுங் ‘‘தேஸங் தேஸங் வா’’திஆதி³மாஹ. ‘‘படிவேத⁴னங்
யதா²வுத்தேஹி த⁴ம்மாதீ³ஹி பிடகானங் க³ம்பீ⁴ரபா⁴வங் த³ஸ்ஸேதுங் ‘‘இதா³னி யஸ்மா ஏதேஸு பிடகேஸூ’’திஆதி³மாஹ. யோ செத்தா²தி ஏதேஸு தங்தங்பிடகக³தேஸு த⁴ம்மாதீ³ஸு யோ படிவேதோ⁴ ஏதேஸு ச பிடகேஸு தேஸங் தேஸங் த⁴ம்மானங் யோ அவிபரீதஸபா⁴வோதி யோஜேதப்³போ³. து³க்கோ²கா³ஹதா ச வுத்தனயேனேவ வேதி³தப்³பா³. அயங் பனெத்த² விஸேஸோ ‘‘அவிபரீதஸபா⁴வஸங்கா²தோ படிவேதோ⁴ து³ப்³பி³ஞ்ஞெய்யதாய ஏவ து³க்கோ²கா³ஹோ’’தி.
யந்தி பரியத்திது³க்³க³ஹணங் ஸந்தா⁴ய வுத்தங். அத்த²ந்தி பா⁴ஸிதத்த²ங் பயோஜனத்த²ஞ்ச. ந உபபரிக்க²ந்தீதி ந விசாரெந்தி. ந நிஜ்ஜா²னங் க²மந்தீதி நிஜ்ஜா²னபஞ்ஞங் ந க²மந்தி, நிஜ்ஜா²யித்வா பஞ்ஞாய தி³ஸ்வா ரோசெத்வா ந க³ஹேதப்³பா³ ஹொந்தீதி அதி⁴ப்பாயோ. இதீதி ஏவங் ஏதாய பரியத்தியா வாத³ப்பமொக்கா²னிஸங்ஸா அத்தனோ உபரி பரேஹி ஆரோபிதவாத³ஸ்ஸ நிக்³க³ஹஸ்ஸ பமொக்க²ப்பயோஜனா ஹுத்வா த⁴ம்மங் பரியாபுணந்தி. வாத³ப்பமொக்கோ²தி வா நிந்தா³பமொக்கோ². யஸ்ஸ சத்தா²யாதி யஸ்ஸ ச ஸீலாதி³பரிபூரணஸ்ஸ அனுபாதா³விமொக்க²ஸ்ஸ வா அத்தா²ய. த⁴ம்மங் பரியாபுணந்தீதி ஞாயேன பரியாபுணந்தீதி அதி⁴ப்பாயோ. அஸ்ஸாதி அஸ்ஸ த⁴ம்மஸ்ஸ. நானுபொ⁴ந்தீதி ந விந்த³ந்தி. தேஸங் தே த⁴ம்மா து³க்³க³ஹிதத்தா உபாரம்ப⁴மானத³ப்பமக்க²பலாஸாதி³ஹேதுபா⁴வேன தீ³க⁴ரத்தங் அஹிதாய து³க்கா²ய ஸங்வத்தந்தி. ப⁴ண்டா³கா³ரே நியுத்தோ ப⁴ண்டா³கா³ரிகோ, ப⁴ண்டா³கா³ரிகோ வியாதி ப⁴ண்டா³கா³ரிகோ, த⁴ம்மரதனானுபாலகோ. அஞ்ஞங் அத்த²ங் அனபெக்கி²த்வா ப⁴ண்டா³கா³ரிகஸ்ஸேவ ஸதோ பரியத்தி ப⁴ண்டா³கா³ரிகபரியத்தி.
தாஸங்யேவாதி அவதா⁴ரணங் பாபுணிதப்³பா³னங் ச²ளபி⁴ஞ்ஞாசதுபடிஸம்பி⁴தா³னங் வினயே பபே⁴த³வசனாபா⁴வங் ஸந்தா⁴ய வுத்தங். வேரஞ்ஜகண்டே³ ஹி திஸ்ஸோ விஜ்ஜாவ விப⁴த்தாதி. து³தியே தாஸங்யேவாதி தேஸந்தி தேஸங் பிடகானங். ஸப்³ப³ம்பீதி ஸப்³ப³ம்பி பு³த்³த⁴வசனங்.
அத்தா²னுலோமனாமதோ அனுலோமிகோ. அனுலோமிகத்தங்யேவ விபா⁴வேதுங் ‘‘கஸ்மா பனா’’திஆதி³ வுத்தங். ஏகனிகாயம்பீதி ஏகஸமூஹம்பி. போணிகா போணிகனிகாயோ சிக்க²ல்லிகனிகாயோ ச. ஏவங் த⁴ம்மக்க²ந்த⁴தோ சதுராஸீதி த⁴ம்மக்க²ந்த⁴ஸஹஸ்ஸானீதி பு³த்³த⁴வசனபிடகாதீ³னி நிட்டா²பெத்வா அனேகச்ச²ரியபாதுபா⁴வபடிமண்டி³தாய ஸங்கீ³தியா பட²மபு³த்³த⁴வசனாதி³கோ ஸப்³போ³ வுத்தப்பபே⁴தோ³ அஞ்ஞோபி உத்³தா³னஸங்க³ஹாதி³பே⁴தோ³ ஸங்கீ³தியா ஞாயதீதி ஏதஸ்ஸ த³ஸ்ஸனத்த²ங் ‘‘ஏவமேதங் ஸப்³ப³ம்பீ’’திஆதி³ ஆரத்³த⁴ங். அயங் அபி⁴த⁴ம்மோ பிடகதோ அபி⁴த⁴ம்மபிடகந்திஆதி³னா பிடகாதி³பா⁴வத³ஸ்ஸனேனேவ மஜ்ஜி²மபு³த்³த⁴வசனபா⁴வோ ததா²க³தஸ்ஸ ச ஆதி³தோ ஆபி⁴த⁴ம்மிகபா⁴வோ த³ஸ்ஸிதோதி வேதி³தப்³போ³.
எத்த² ஸியா ‘‘யதி³ ததா²க³தபா⁴ஸிதபா⁴வோ அபி⁴த⁴ம்மஸ்ஸ ஸித்³தோ⁴ ஸியா, மஜ்ஜி²மபு³த்³த⁴வசனபா⁴வோ ச ஸித்³தோ⁴ ப⁴வெய்ய, ஸோ ஏவ ச ந ஸித்³தோ⁴’’தி தஸ்ஸ வினயாதீ³ஹி பு³த்³த⁴பா⁴ஸிதபா⁴வங் ஸாதே⁴துங் வத்து²ங் த³ஸ்ஸெந்தோ ‘‘தங் தா⁴ரயந்தேஸு பி⁴க்கூ²ஸூ’’திஆதி³மாஹ. ஸப்³ப³ஸாமயிகபரிஸாயாதி ஸப்³ப³னிகாயிகபரிஸாய பஞ்சபி நிகாயே பரியாபுணந்தியா. ந உக்³க³ஹிதந்தி ஸகலஸ்ஸ வினயபிடகஸ்ஸ அனுக்³க³ஹிதத்தா ஆஹ. வினயமத்தங் உக்³க³ஹிதந்தி விப⁴ங்க³த்³வயஸ்ஸ உக்³க³ஹிதத்தா ஆஹ. வினயங் அவிவண்ணேதுகாமதாய ‘‘அபி⁴த⁴ம்மங் பரியாபுணஸ்ஸூ’’தி ப⁴ணந்தஸ்ஸ அனாபத்திங், அபி⁴த⁴ம்மே அனோகாஸகதங் பி⁴க்கு²ங் பஞ்ஹங் புச்ச²ந்தியா பாசித்தியஞ்ச வத³ந்தேன ப⁴க³வதா அபி⁴த⁴ம்மஸ்ஸ பு³த்³த⁴பா⁴ஸிதபா⁴வோ தீ³பிதோ பு³த்³த⁴பா⁴ஸிதேஹி ஸுத்தாதீ³ஹிஸஹ வசனதோ, பா³ஹிரகபா⁴ஸிதேஸு ச ஈதி³ஸஸ்ஸ வசனஸ்ஸ அபா⁴வா.
இதோபி ப³லவதரங் ஆபி⁴த⁴ம்மிகஸ்ஸ ஸாது⁴காரதா³னேன விசிகிச்சா²விச்சே²த³ஸ்ஸ கதத்தா. கம்மதோ அஞ்ஞங் கம்மங் கம்மந்தரங், தங் காமாவசராதி³ங் ரூபாவசராதி³பா⁴வேன, கண்ஹவிபாகாதி³ங் ஸுக்கவிபாகாதி³பா⁴வேன கதெ²ந்தோ ஆலோளேதி.
ஜினசக்கேதி ஜினஸாஸனே. விஸங்வாதே³தீதி விப்பலம்பே⁴தி. பே⁴த³கரவத்தூ²ஸு ஏகஸ்மிந்தி ‘‘பா⁴ஸிதங் உத்தரிபி ஏவங் வத்தப்³போ³…பே॰… ந அஞ்ஞேஸங் விஸயோ…பே॰… நிதா³னகிச்சங் நாம நத்தீ²தி அபாகடானங் காலதே³ஸதே³ஸகபரிஸானங் பாகடபா⁴வகரணத்த²ங் தது³பதே³ஸஸஹிதேன நிதா³னேன ப⁴விதப்³ப³ங், அஞ்ஞேஸங் அவிஸயத்தா தே³ஸகோ பாகடோ, ஓக்கந்திகாலாதீ³னங் பாகடத்தா காலோ ச, தே³வலோகே தே³ஸிதபா⁴வஸ்ஸ பாகடத்தா தே³ஸபரிஸா ச பாகடாதி கிங் நிதா³னகிச்சங் ஸியாதி.
யத்த² ‘‘மஹாபோ³தி⁴னிதா³னோ அபி⁴த⁴ம்மோ’’தி த³ஸ்ஸேதி. ‘‘ஸோ ஏவங் பஜானாமி ஸம்மாதி³ட்டி²பச்சயாபி வேத³யித’’ந்திஆதி³னா (ஸங்॰ நி॰ 5.12) நயேன பச்சயாதீ³ஹி வேத³னங் உபபரிக்க²ந்தோ க²ந்தா⁴தி³பதே³ஸானங் வேத³னாக்க²ந்தா⁴தீ³னங் வஸேன விஹாஸி. த⁴ம்மேதி குஸலாதி³அரணந்தே.
த⁴ம்மங் பரிவத்தெந்தோதி ஸாட்ட²கத²ங் பாளிங் பரிவத்தெந்தோ ஏதங் பரவாதீ³சோத³னங் பத்வா ‘‘அயங் பரவாதீ³’’திஆதி³மாஹ. அம்ஹாதி³ஸேஸு நிதா³னங் ஜானந்தேஸு படிஸரணேஸு விஜ்ஜமானேஸு அப்படிஸரணோ அரஞ்ஞே கந்த³ந்தோ விய நிதா³னஸப்³பா⁴வே ஸக்கி²பூ⁴தேஸுபி அம்ஹேஸு விஜ்ஜமானேஸு அஸக்கி²கங் அட்³ட³ங் கரொந்தோ விய ஹோதி, நிதா³னஸ்ஸ அத்தி²பா⁴வம்பி ந ஜானாதி, நனு ஏதங் நிதா³னந்தி கதெ²ந்தோ ஏவமாஹ. ஏகமேவாதி தே³ஸனானிதா³னமேவ அஜ்ஜா²ஸயானுரூபேன தே³ஸிதத்தா. த்³வே நிதா³னானீதி அதி⁴க³ந்தப்³ப³தே³ஸேதப்³ப³த⁴ம்மானுரூபேன தே³ஸிதத்தா. அபி⁴த⁴ம்மாதி⁴க³மஸ்ஸ மூலங் அதி⁴க³மங் நிதே³தீதி அதி⁴க³மனிதா³னங். போ³தி⁴அபி⁴னீஹாரஸத்³தா⁴யாதி யாய ஸத்³தா⁴ய தீ³பங்கரத³ஸப³லஸ்ஸ ஸந்திகே போ³தி⁴யா சித்தங் அபி⁴னீஹரி பணிதா⁴னங் அகாஸி.
ஸுமேத⁴கதா²வண்ணனா
சதுரோ ச அஸங்கி²யேதி (பு³॰ வங்॰ அட்ட²॰ 2.1-2) உத்³த⁴ங் ஆரோஹனவஸேன அதிக்கமித்வா அமரங் நாம நக³ரங் அஹோஸீதி வசனஸேஸயோஜனா காதப்³பா³. த³ஸஹீதி ஹத்தி²அஸ்ஸரத²பே⁴ரீஸங்க²முதி³ங்க³வீணாகீ³தஸம்மதாளேஹி ‘‘அஸ்னாத² பிவத² கா²த³தா²’’தி த³ஸமேன ஸத்³தே³ன. தே பன ஏகதே³ஸேன த³ஸ்ஸேதுங் ‘‘ஹத்தி²ஸத்³த³’’ந்திஆதி³ வுத்தங். ஹத்தி²ஸத்³த³ந்தி கரணத்தே² உபயோகோ³ த³ட்ட²ப்³போ³. பே⁴ரீஸங்க²ரதா²னஞ்ச ஸத்³தே³ஹி ஹத்தி²ஸத்³த³ந்தி வா ஹத்தி²ஸத்³த³வந்தங் நக³ரங். கா²த³த² பிவத² சேவாதி இதி-ஸத்³தோ³ ஞாதத்த²த்தா அப்பயுத்தோ த³ட்ட²ப்³போ³.
ஸப்³ப³ங்க³ஸம்பன்னங் உய்யானபொக்க²ரணீஆதி³ஸம்பன்னத்தா. லக்க²ணேதி இத்தி²லக்க²ணே புரிஸலக்க²ணே ச. இதிஹாஸேதி போராணே. ஸத⁴ம்மேதி அத்தனோ தேவிஜ்ஜத⁴ம்மே ச யஞ்ஞவிதி⁴ஆதி³கே ச. பாரமிந்தி பாரஞாணங் பாராதி⁴க³மங் க³தோ. சிந்தேஸஹந்தி சிந்தேஸிங் அஹங் ஸுமேத⁴பூ⁴தோதி ஸத்தா² வத³தி. அத்தி² ஹேஹிதீதி ஸோ விஜ்ஜமானோ ப⁴விஸ்ஸதி. ந ஹேதுயேதி அப⁴விதுங். ஏவமேவாதி ஏவமேவங். ந க³வேஸதீதி ந க³ந்துங் ஏஸதி ந இச்ச²தி நானுக³ச்ச²தி வா. தோ⁴வேதி தோ⁴வந்தே. ஸேரீதி ஸாயத்திகோ. ஸயங்வஸீதி ஸவஸோ. மஹாசோரஸமோ வியாதி காயஸாராக³வஸேன து³ச்சரிதானேஸனேஹி குஸலப⁴ண்ட³ச்சே²த³னா. நாதா²தி நாத²வந்தோ. பஞ்சதோ³ஸவிவஜ்ஜிதந்தி ஏவமாதி³கஸ்ஸ அத்தோ² கேஸுசி அட்ட²கதா²பொத்த²கேஸு லிகி²தோதி கத்வா ந வக்கா²ம.
ஸாஸனேதி எத்த² தாபஸஸாஸனங் ஜா²னாபி⁴ஞ்ஞா ச. வஸீபூ⁴தஸ்ஸ ஸதோ. மயி ஏவங்பூ⁴தே தீ³பங்கரோ ஜினோ உப்பஜ்ஜி. ஸோதே⁴தி ஜனோ. அஞ்ஜஸங் வடுமாயனந்தி பரியாயவசனேஹி மக்³க³மேவ வத³தி. மா நங் அக்கமித்தா²தி எத்த² நந்தி பத³பூரணமத்தே நிபாதோ. கா⁴தியாமஹந்தி எத்த² ச அ-இதி ச ஹங்-இதி ச நிபாதா, அஹங்-இதி வா ஏகோ நிபாதோ ஸானுனாஸிகோ கதோ. ஆஹுதீனந்தி த³க்கி²ணாஹுதீனங். மந்தி மம, மங் வா அப்³ர்வி.
கப்பே அதிக்கமித்வா வுத்தேபி போ³தி⁴ம்ஹி மாதாதி³ஸங்கித்தனே ஸங்க³ண்ஹிதுங் ‘‘போ³தி⁴ தஸ்ஸ ப⁴க³வதோ’’திஆதி³மாஹ. ஸுகே²னாதி உத்தமேன ஸுகே²ன. அஸமோதி தாபஸேஹி அஸமோ. அபி⁴ஞ்ஞாஸுக²தோபி விஸிட்ட²ங் ஈதி³ஸங் பு³த்³த⁴த்தப்³யாகரணஜங் ஸுக²ங் அலபி⁴ங். யாதி யானி நிமித்தானி. ஆபு⁴ஜதீதி ஆவத்ததி. அபி⁴ரவந்தீதி ஸத்³த³ங் கரொந்தி. சு²த்³தா⁴தி நிக்க²ந்தா. நுத்³த⁴ங்ஸதீதி ந உத்³த⁴ங் க³ச்ச²தி. உப⁴யந்தி உப⁴யவசனங். து⁴வஸஸ்ஸதந்தி ஏகந்தஸஸ்ஸதங், அவிபரீதமேவாதி அத்தோ². ஆபன்னஸத்தானந்தி க³ப்³பி⁴னீனங். யாவதாத³ஸ தி³ஸா, தத்த². த⁴ம்மதா⁴துயாதி த⁴ம்மதா⁴துயங், ஸப்³பே³ஸு த⁴ம்மேஸு விசினாமீதி அத்தோ².
யஸ்ஸ ஸம்புண்ணோ, தங் வமதேவ உத³கங் நிஸ்ஸேஸங். ஏதேதி ஏகிஸ்ஸாபி தா³னபாரமிதாய அனேகப்பகாரதாய ப³ஹுவசனநித்³தே³ஸோ கதோ. படிலக்³கி³தங் ரக்க²தீதி வசனஸேஸோ, பு⁴ம்மத்தே² வா உபயோகோ³ சதூஸு பூ⁴மீஸூதி பாதிமொக்கா²தீ³ஸு ஸங்வரபூ⁴மீஸு. அத்³வெஜ்ஜ²மானஸோதி கதா³சி க²மனங் கதா³சி அக்க²மனங், கஸ்ஸசி க²மனங் கஸ்ஸசி அக்க²மனந்தி ஏவங் த்³வேதா⁴பா⁴வங் அனாபன்னமானஸோ ஹுத்வா. ஸச்சஸ்ஸ வீதி² நாம தி³ட்டா²தி³ ச அதி³ட்டா²தி³ ச யதா²பூ⁴தங்வ வத்து². அதி⁴ட்டா²னந்தி குஸலஸமாதா³னாதி⁴ட்டா²னங், ஸமாதி³ன்னேஸு குஸலேஸு அசலதா அதி⁴ட்டா²னங் நாம. பத²வியா உபெக்க²னங் நாம விகாரானாபத்தி. அஞ்ஞத்ராதி அஞ்ஞங். ஸபா⁴வரஸலக்க²ணேதி எத்த² பா⁴வோதி அவிபரீததா விஜ்ஜமானதா, ஸஹ பா⁴வேன ஸபா⁴வோ, அவிபரீதோ அத்தனோ போ³தி⁴பரிபாசனகிச்சஸங்கா²தோ ஸபா⁴வரஸலக்க²ணங், ததோ ஸம்மஸதோ. த⁴ம்மதேஜேனாதி ஞாணதேஜேன. சலதாதி சலதாய கம்பனதாய. ஸேஸீதி ஸயி. மா பா⁴தா²தி மா பா⁴யித்த². ஸப்³பீ³தியோதி ஸப்³பா³ ஈதியோ உபத்³த³வா தங் விவஜ்ஜந்து.
ஸுமேத⁴கதா²வண்ணனா நிட்டி²தா.
பவச்ச²தீதி தே³தி. யோகே³னாதி உபாயேன. ஸமிங்ஸூதி ஸன்னிபதிங்ஸு. அப்பத்தமானஸாதி அப்பத்தஅரஹத்தா பி⁴க்கூ² க³ரஹிதா ப⁴வந்தி. ரித்தாதி ஸுஞ்ஞா அந்தரஹிதா. ஸாலகல்யாணீ நாம ஏகோ ருக்கோ². பு³த்³த⁴சக்கவத்திகாலேயேவ கிர ஏகாஹேனேவ உப்பஜ்ஜதி.
லிங்க³ஸம்பத்தீதி புரிஸலிங்க³தா. ஹேதூதி திஹேதுகபடிஸந்தி⁴தா. கு³ணஸம்பத்தீதி அபி⁴ஞ்ஞாஸமாபத்திலாபி⁴தா. அதி⁴காரோதி பு³த்³தா⁴னங் ஸக்காரகரணங். ச²ந்த³தாதி பு³த்³த⁴த்தப்பத்தியங் ச²ந்த³ஸமாயோகோ³. ஸப்³ப³ங்க³ஸம்பன்னாதி அட்ட²ங்கா³னி ஸமோதா⁴னெத்வா கதபணிதா⁴னா. பக்கி²காதி பீட²ஸப்பிகா. பண்ட³காதி உப⁴யலிங்க³ரஹிதா. போ³தி⁴ஸத்தா ச ப்³ரஹ்மலோகூபபத்திபட²மகப்பிகேஸு காலேஸு உப⁴யலிங்க³ரஹிதா ஹொந்தி, ந பன பண்ட³கபரியாபன்னாதி ஏதமத்த²ங் த³ஸ்ஸேதுங் ‘‘பரியாபன்னா ந ப⁴வந்தீ’’தி வுத்தங், யதா²வுத்தேஸு வா தோ³ஸேஸு ஸப்³பே³ஸு பரியாபன்னா ந ப⁴வந்தி, போ³தி⁴ஸத்தேஸு வா பரியாபன்னா தத³ந்தோக³தா⁴, பரிச்சி²ன்னஸங்ஸாரத்தா வா பரியாபன்னா போ³தி⁴ஸத்தா உப⁴தொப்³யஞ்ஜனபண்ட³கா ந ப⁴வந்தீதி அத்தோ². ஸப்³ப³த்த² ஸுத்³த⁴கோ³சரா யஸ்மா, தஸ்மா மிச்சா²தி³ட்டி²ங் ந ஸேவந்தி. மிச்சா²தி³ட்டி²ந்தி நத்தி²காஹேதுகாகிரியதி³ட்டி²ங். ப⁴வாப⁴வேதி கு²த்³த³கே சேவ மஹந்தே ச ப⁴வே. போ⁴ஜபுத்தேதி லுத்³த³கே. லக³னந்தி ஸங்கோ³. அஞ்ஞதா²தி லீனதா. கா³மண்ட³லாதி கா³மதா³ரகா. ரூபந்தி விப்பகாரங். அயங் தாவ நிதா³னகதா² யாய அபி⁴த⁴ம்மஸ்ஸ பு³த்³த⁴பா⁴ஸிததாஸித்³தீ⁴தி அத்த²யோஜனா காதப்³பா³.
நிதா³னகதா²வண்ணனா நிட்டி²தா.