17. கு²த்³த³கவத்து²விப⁴ங்கோ³
1. ஏககமாதிகாதி³வண்ணனா
832. ‘‘தெத்திங்ஸதி பஞ்சதிங்ஸ. ததா² ‘‘புரிஸமலாத³யோ அட்ட² நவகா’’தி வுத்தங், தே பன ஆகா⁴தவத்து²ஆத³யோ நவ. யே ‘‘த்³வே அட்டா²ரஸகா’’திஆதி³ம்ஹி வுத்தா, தே ஏவ ‘‘இதி அதீதானி ச²த்திங்ஸா’’திஆதி³னா தயோ ச²த்திங்ஸகா கதாதி ஆஹ ‘‘ச² அட்டா²ரஸகா’’தி, த்³வாஸட்டி² பன தி³ட்டி²க³தானி அஞ்ஞத்த² வுத்தபா⁴வேனேவ இத⁴ நிக்கி²த்தானீதி ந க³ஹிதானீதி த³ட்ட²ப்³பா³னி.
ஏககமாதிகாதி³வண்ணனா நிட்டி²தா.
(1.) ஏககனித்³தே³ஸவண்ணனா
843-844. அத்தி² படிச்சங் நாமாதி யதா² ‘‘சக்கு²ஞ்ச படிச்சா’’திஆதீ³ஸு நிஸ்ஸயாதி³பச்சயபா⁴வேன படிச்சாதி வுத்தங், ந ததா² இத⁴ க²த்தியாதி³ஜாதீனங் பரமத்த²தோ அவிஜ்ஜமானானங் நிஸ்ஸயாதி³பச்சயத்தஸ்ஸ அபா⁴வா. யேஸு பன க²ந்தே⁴ஸு ஸந்தேஸு க²த்தியாதி³ஸம்முதி ஹோதி, தேஸங் அப்³பொ³ச்சி²ன்னதாவ க²த்தியாதி³ஜாதியா அத்தி²தா, ஸா இத⁴ படிச்ச-ஸத்³தே³ன விபா⁴விதாதி அத்தோ². ஏகிஸ்ஸா ஸேணியாதி அஸம்பி⁴ன்னாயாதி அத்தோ².
பஞ்ஹவிஸ்ஸஜ்ஜனாதி³கிரியாஸு புரெக்கா²ரோ. நிக்கே²பராஸீதி நிதா⁴னராஸி. பத்த²டாகித்தினோதி வித்தி²ண்ணாகித்தினோ. ரத்தஞ்ஞுமதோ³தி புராணஞ்ஞுதாமதோ³தி வத³ந்தி. சிரரத்திஜாதேன, சிரரத்திபப்³ப³ஜிதேன வா ஜானிதப்³ப³ஸ்ஸ, ரத்தீனமேவ வா ஜானநமதோ³. உபட்டா²பகமானோதி ஆணாகரணமானோ. ஆணாகரணஞ்ஹி விசாரணங் இத⁴ ‘‘யஸோ’’தி வுத்தந்தி. பரிமண்ட³லத்தபா⁴வனிஸ்ஸிதோ மானோ பரிணாஹமதோ³. ஸரீரஸம்பத்திபாரிபூரியா மதோ³ பாரிபூரிமதோ³.
845. வத்து²னா வினாபி வத்தப்³ப³தாய அவத்து²கங், ந வத்து²னோ அபா⁴வா.
846. சித்தஸ்ஸ வொஸ்ஸஜ்ஜனந்தி சித்தஸ்ஸ ஸதிதோ முச்சனங், காயது³ச்சரிதாதீ³ஸு பக்க²ந்த³னங் வா வொஸ்ஸக்³கோ³. பதிட்டா²பா⁴வோதி குஸலகரணே அட்டா²னங், அனுட்டா²னந்தி அத்த²ஸ்ஸ காயது³ச்சரிதே சித்தஸ்ஸ வொஸ்ஸக்³கோ³ பாணாதிபாதே மிச்சா²தி³ட்டி²யங் கோதே⁴ உபனாஹேதி ஏவமாதி³கோ பரியாயோ அபரியந்தோ, தத³த்த²தப்பரியாயப்பகாஸகோ வொஸ்ஸக்³க³னிஸ்ஸக்³கா³தி³கோ ப்³யஞ்ஜனபரியாயோ சாதி ஸப்³ப³ங் தங் ஸங்கி²பித்வா ஏவரூபோதி இத³ங் ஆகாரனித³ஸ்ஸனங் ஸப்³ப³பரியாயஸ்ஸ வத்துங் அஸக்குணெய்யத்தா கதந்தி த³ஸ்ஸெந்தோ ஆஹ ‘‘பரியந்தாபா⁴வதோ’’தி. விஸ்ஸட்டா²காரோதி ஸதியா பச்சனீகபூ⁴தே சத்தாரோ க²ந்தே⁴ த³ஸ்ஸேதி.
847. சித்தஸ்ஸ த²த்³த⁴தா ததா²பவத்தசித்தமேவாதி வத³ந்தி, மானவிஸேஸோ வா த³ட்ட²ப்³போ³. உபஸங்கமனே வந்தி³தப்³ப³ங் ஹோதீதி பரியந்தேனேவ சரதி.
848. ‘‘ஆபத்திங் ஆபன்னோஸீ’’தி வுத்தே ‘‘ஆவுஸோ, த்வங் ஆபன்னோஸீ’’திஆதி³னா தேன வுத்தங் தஸ்ஸேவ உபரி கி²பனவஸேன ‘‘படிப்ப²ரித்வா’’தி வத³ந்தி. ‘‘தஸ்மிங் நாம த³லித்³தே³, அகுஸலே வா இத³ங் கரொந்தே அஹங் கஸ்மா ந கரோமீ’’தி ஏவங் இத⁴ படிப்ப²ரணங் யுத்தங். கரணஸ்ஸ உத்தரகிரியா கரணுத்தரியங். அகுஸலபக்கோ² ஏஸாதி ஸாரம்போ⁴தி அதி⁴ப்பாயோ.
849. அதிச்ச இச்ச²தீதி அதிச்சிச்சோ², தஸ்ஸ பா⁴வோ அதிச்சிச்ச²தாதி வத்தப்³பே³ ச்சி-காரலோபங் கத்வா ‘‘அதிச்ச²தா’’தி வுத்தங். அத்ரிச்ச²தாதி ச ஸா ஏவ வுச்சதீதி. தத்ராபி நேருத்திகவிதா⁴னேன பத³ஸித்³தி⁴ வேதி³தப்³பா³. யதா²லத்³த⁴ங் வா அதிக்கமித்வா அத்ர அத்ர இச்ச²னங் அத்ரிச்ச²தா, ஸா ஏவ ர-காரஸ்ஸ த-காரங் கத்வா ‘‘அதிச்ச²தா’’தி வுத்தா.
அத்ரிச்ச²ந்தி அதிலோபே⁴ன அதிலோப⁴மிச்சா²ஸங்கா²தேன அதிலோப⁴மதே³ன ச. அத்தனோ ஹிதங் அத்தாதி வுத்தங். ஹாயதி ஜீரதி, ஆதி³ண்ணோ வா அத்தா, பத்தோ வா அத்தா, நங் ஜீரதி சந்த³கின்னரிங் பத்த²யித்வா அஸிதாபூ⁴தே³வியா விஹீனோ விய.
இச்சா²ஹதஸ்ஸாதி இச்சா²ய உபத்³து³தஸ்ஸ, முத்³தி³தஸ்ஸ வா.
அதிஹீளயானோதி அவமஞ்ஞமானோ. மலகந்தி ஏவங்னாமகங் ஜனபத³ங், அப்³போ⁴காஸங் வா. கோத³ண்ட³கேனாதி குத³ண்ட³கேன ரஸ்ஸத³ண்ட³கேன. க³த்³து³லேனாதி ச வத³ந்தி. ருஹிரமக்கி²தங்கோ³தி ருஹிரஸின்னக³த்தோ.
850. ஜானந்தஸ்ஸேவ ஸம்பா⁴வேதுகாமோ ஹோதி. பச்சயேதி உபாதா³னாதி³பச்சயே.
851. யே பதிரூபேன வஞ்செந்தி, தே க³ண்டி²கா, து³ராசாரேன வா க³ண்டி²பூ⁴தா. க³ண்டி²கபுத்தா நாம க³ண்டி²கா ஏவ ஹொந்தி, தேன ஸத்³தி⁴விஹாரிகா க³ண்டி²கபா⁴வேன ‘‘தே²ரோ…பே॰… தீ³க⁴சங்கமே விஹரதீ’’தி வத³ந்தி.
வட்டதி ப⁴ந்தேதி அயம்பி ஏகோ பகாரோ, லாபி⁴னா ஏவ பன ஸக்கா ஞாதுந்தி அத்தனோ ஸமாபத்திலாபி⁴தங் ஸூசேதீதி அத்தோ². பஞ்சத்தயங் நாம உபரிபண்ணாஸகே து³தியஸுத்தங் (ம॰ நி॰ 3.21 ஆத³யோ). தஸ்ஸ க³ம்பீ⁴ரத்தா வத³தி ‘‘பஞ்சத்தயங் ஓலோகெந்தஸ்ஸா’’தி.
852. ஸிங்க³ந்தி ஸிங்கா³ரங். தஞ்ஹி குஸலஸ்ஸ விஜ்ஜ²னதோ ஸமாஸேவிததாய ஸீஸே பரிக்க²தங் ஸுனிக²தங் விஸாணங் விய, தி²ரத்தா ச ஸிங்க³ங் வியாதி ஸிங்க³ங், தங் பனத்த²தோ ராகோ³.
853. தேமனகரணத்தே² திந்திண-ஸத்³தோ³ த³ட்ட²ப்³போ³. கீ²யனந்தி ச யேன லோபே⁴ன பரங் மமந்தி வத³ந்தங் கீ²யதி, ஸோ வுத்தோ. கீ²யனங் ப⁴ண்ட³னந்தி ச வத³ந்தி. திந்திணந்தி வா லோலுப்பமிச்சேவ வுத்தங் ஹோதி. ஸஞ்ஞா-ஸத்³தோ³ ஹி ஏஸோ லோலுப்பவாசகோதி.
854. ஊருப்பமாணாபீதி அத²வாதிஆதி³னா சீவரமண்ட³னாதீ³னங் விஸேஸனானி ‘‘இமஸ்ஸ வா பூதிகாயஸ்ஸ பா³ஹிரானங் வா பரிக்கா²ரானங் மண்ட³னா’’திஆதீ³னீதி த³ஸ்ஸேதி. சீவரேன ஹி மண்ட³னா சீவரமண்ட³னா, சீவரஸ்ஸ வா மண்ட³னா சீவரமண்ட³னா, ஏவங் பத்தமண்ட³னா ஸேனாஸனமண்ட³னா சாதி அதி⁴ப்பாயோ. ஊனட்டா²னபூரணங் ச²விராக³ஸுஸண்டா²னாதி³கரணஞ்ச சீவராதீ³ஸு காயே ச யதா²யோக³ங் யோஜேதப்³ப³ங். தத³ஹுஜாததா³ரகோ விய ஹோதீதி தா³ரகசாபல்யங் ந முஞ்சதீதி அத்தோ².
855. ஸதி³ஸா அனுரூபா ப⁴த்தி ஸபா⁴கோ³, ந ஸபா⁴கோ³ அஸபா⁴கோ³, மானத²த்³த⁴தா, விரோதோ⁴ வா. தேனஸ்ஸ மாதாதீ³ஸு வத்தனங் அஸபா⁴க³வுத்திதா. ஏவங்விதா⁴னங் மானாதி⁴கானங் அகுஸலானமித³ங் நாமங்.
856. பரிதஸ்ஸிதாதி
857. குஸலகரணே காயஸ்ஸ அவிப்பா²ரிகதா லீனதா ஜாதிஆலஸ்யங், ந ரோக³உதுபோ⁴ஜனாதீ³ஹி காயகே³லஞ்ஞங் தந்தீ³ நாம, அத² கோ² பகதிஆலஸ்யந்தி அத்தோ². காயாலஸியந்தி நாமகாயஸ்ஸ ஆலஸியங், ததே³வ ரூபகாயஸ்ஸாபீதி த³ட்ட²ப்³ப³ங்.
858. அச்சஸனாதீ³ஹி உப்பன்னதா⁴துக்கோ²ப⁴னிமித்தங் ஆலஸியங் விஜம்பி⁴தா.
859. ப⁴த்தனிமித்தேன உப்பன்னங் ஆலஸ்யங் ப⁴த்தஸம்மதோ³.
860. இமேஹி பனாதி சித்தஸ்ஸ அகல்யதாதீ³ஹி. ஸப்³ப³த்த² கிலேஸவஸேனாதி தி²னமித்³த⁴காரணானங் ராகா³தீ³னங் வஸேனாதி த³ட்ட²ப்³ப³ங்.
861. ஸம்மாஆஜீவதோ அபேதோ கதோதி அபகதோ. ஸோ ஆஜீவுபத்³த³வேன உபத்³து³தோதி கத்வா ஆஹ ‘‘உபத்³து³தஸ்ஸாதி அத்தோ²’’தி.
திவித⁴ம்பி தங் தத்த² ஆக³தங் தஸ்ஸ நிஸ்ஸயபூ⁴தாய இமாய பாளியா த³ஸ்ஸேதுந்தி ஏவமத்தோ² த³ட்ட²ப்³போ³.
பாபணிகானீதி நந்தகானீதி அந்தரஹிதானி, சீரானி வா. கி³லானஸ்ஸ பச்சயபூ⁴தா பே⁴ஸஜ்ஜஸங்கா²தா ஜீவிதபரிக்கா²ரா கி³லானபச்சயபே⁴ஸஜ்ஜபரிக்கா²ரா. பூதிமுத்தந்தி புராணஸ்ஸ அபுராணஸ்ஸ ச ஸப்³ப³ஸ்ஸ கோ³முத்தஸ்ஸேதங் நாமங். பூதிபா⁴வேன ச²ட்³டி³தோஸத⁴ந்திபி கேசி.
அக³ப்³பி⁴கா ஏகத்³வாரா தீ³க⁴ஸாலா கிர உத்³த³ண்டோ³. குச்சி²தரஜபூ⁴தாய பாபிச்ச²தாய நிரத்த²ககாயவசீவிப்ப²ந்த³னிக்³க³ஹணங் கோரஜங், தங் ஏதஸ்ஸ அத்தீ²தி கோரஜிகோ, அதிவிய கோரஜிகோ கோரஜிககோரஜிகோ. அதிபரிஸங்கிதோதி கேசி. முக²ஸம்பா⁴விதோதி கோரஜிககோரஜிகாதி³பா⁴வேன பவத்தவசனேஹி அத்தனோ முக²மத்தேன அஞ்ஞேஹி ஸம்பா⁴விதோ. ஸோ ஏவரூபோ ஏவரூபதாய ஏவ அத்தானங் பரங் விய கத்வா ‘‘அயங் ஸமணோ’’திஆதி³ங் கதே²தி.
பணிதா⁴யாதி ‘‘அரஹாதி மங் ஜானந்தூ’’தி சித்தங் ட²பெத்வா, பத்தெ²த்வா வா. ஆபாத²கஜ்ஜா²யீதி மனுஸ்ஸானங் ஆபாத²ட்டா²னே ஸமாதி⁴ங் ஸமாபன்னோ விய நிஸீத³ந்தோ ஆபாத²கே ஜனஸ்ஸ பாகடட்டா²னே ஜா²யீ.
அஞ்ஞங் ஸாமந்தஜப்பிதங். ஆகாரஸ்ஸ ரஸ்ஸத்தங் கத்வா ‘‘அட²பனா’’தி வுத்தங். குஹனங் குஹோ, தஸ்ஸ அயனா பவத்தி குஹாயனா, குஹஸ்ஸ வா புக்³க³லஸ்ஸ அயனா க³திகிரியா குஹாயனா.
862. புட்ட²ஸ்ஸாதி ‘‘கோ திஸ்ஸோ, கோ ராஜபூஜிதோ’’தி புட்ட²ஸ்ஸ. நஹனாதி ப³ந்த⁴னா பரிவேட²னா.
863. நிமித்தேன சரந்தோ ஜீவந்தோ நிமித்தகாரகோ நேமித்திகோ, தஸ்ஸ பா⁴வோ நேமித்திகதா. அத்தனோ இச்சா²ய பகாஸனங் ஓபா⁴ஸோ. கோ பன ஸோதி? ‘‘அஜ்ஜ பி⁴க்கூ²னங் பச்சயா து³ல்லபா⁴ ஜாதா’’திஆதி³கா பச்சயபடிஸங்யுத்தகதா². இச்சி²தவத்து²ஸ்ஸ ஸமீபே கத²னங் ஸாமந்தஜப்பா.
864. ப³ஹி ச²ட்³ட³னங் உக்கே²பனா. பரபிட்டி²மங்ஸகா²த³னஸீலோ பரபிட்டி²மங்ஸிகோ, தஸ்ஸ பா⁴வோ பரபிட்டி²மங்ஸிகதா.
865. நிகத்துங் நிஜிகீ³ஸனதா. தஸ்ஸேவ இச்ச²னஸ்ஸ பவத்திஆகாரோ, தங்ஸஹஜாதங் வா க³வேஸனகம்மங்.
866. வண்ணஸம்பன்னங் பொக்க²ரங் வண்ணபொக்க²ரந்தி உத்தரபத³லோபோ புப்³ப³பத³ஸ்ஸ த³ட்ட²ப்³போ³, வண்ணபாரிபூரீ வா வண்ணபொக்க²ரதா. ‘‘அத்த²ஜாபிகா’’தி எத்த² விய ஜப-ஸத்³தோ³ உப்பத்திவாசகோதி ஆஹ ‘‘பவத்தேதீ’’தி.
867. ஸெய்யஸதி³ஸமானா உன்னதிவஸேன பவத்தாதி உப⁴யத்தா²பி ‘‘மானங் ஜப்பேதீ’’தி வுத்தங்.
868. ஹீனமானோ பன ஓனதிவஸேன பவத்திதோ கேவலேன மானஸத்³தே³ன நித்³தே³ஸங் நாரஹதீதி தங்னித்³தே³ஸே ‘‘ஓமானங் ஜப்பேதீ’’தி (விப⁴॰ 874) வுத்தங்.
872. ராஜபோ⁴கே³ன ரட்ட²பு⁴ஞ்ஜனகோ ராஜனிஸ்ஸிதோ ரட்டி²யோ.
879. புக்³க³லங் அனாமஸித்வாதி யதா² ஸெய்யஸ்ஸ ஸெய்யமானாதி³னித்³தே³ஸேஸு ‘‘பரேஹி ஸெய்யங் அத்தானங் த³ஹதீ’’தி ஸெய்யாதி³புக்³க³லோ மானுப்பாத³கோ
880. புரிமமானஸ்ஸ உபரிமானோ மானாதிமானோ, அதி-ஸத்³தோ³ உபரி-ஸத்³த³ஸ்ஸ அத்த²ங் வத³தீதி த³ட்ட²ப்³போ³. புரிமமானங் வா அதிக்கந்தோ மானோ மானாதிமானோ.
881. பக்கி²ஜாதீஸு வாயஸோ அந்தோ லாமகோதி கத்வா ‘‘காகஜாதி வியா’’தி வுத்தங்.
882. தே²ரோ கிர தோ³ஸசரிதோ அஹோஸி, தஸ்மா ஆதி³தோவ ‘‘தும்ஹே அகீ²ணாஸவா’’தி அவத்வா உபாயேன கதே²ஸீதி வத³ந்தி, தோ³ஸசரிதத்தா வா கி²ப்பங் ததியபத³வாரே விராக³ங் உப்பாதே³ஸீதி அதி⁴ப்பாயோ.
883. மானங் அனுக³தச்ச²ந்தோ³தி மானஸம்பயுத்தச²ந்தோ³, மானஸபா⁴வங் அனுக³தோ மானச்ச²ந்தோ³ வா.
884. ‘‘விலம்ப³ன’’ந்தி ச இத்தி²புரிஸஸம்மானநாதி³கிரியாதி³விலம்ப³னபடிஸங்யுத்தங் கத்தப்³ப³ங் த³ட்ட²ப்³ப³ங். தத்த² யுத்தமுத்தஸிலிட்ட²ங் படிபா⁴னங் விலம்ப³னபடிபா⁴னங்.
887. அமரவாத³படிஸங்யுத்தோ விதக்கோ, அத்தனோ அமரணத்தா²ய தே³வபா⁴வத்தா²ய வா விதக்கோ அமரவிதக்கோ.
888. பரேஸு அனுத்³த³யா ராக³வஸேன அனுத்³த³யகரணங் ஏதஸ்ஸாதி பரானுத்³த³யோ, தஸ்ஸ பா⁴வோ பரானுத்³த³யதா, பரேஸு வா அனுத்³த³யஸ்ஸேவ ஸஹனந்தி³தாதி³கஸ்ஸ பா⁴வோ பரானுத்³த³யதா, தாதி³ஸோ ராகோ³. தத்தா²தி பரானுத்³த³யதாய ஸங்ஸட்ட²விஹாரேன த³ஸ்ஸிதாயாதி அத்தோ² யுஜ்ஜதி.
890. அனவஞ்ஞத்திங் பத்தெ²ந்தோ அனவஞ்ஞத்தத்த²மேவ காமகு³ணே ச பத்தே²தீதி ஆஹ ‘‘பஞ்சகாம…பே॰… நிஸ்ஸிதோ ஹுத்வா’’தி.
ஏககனித்³தே³ஸவண்ணனா நிட்டி²தா.
(2.) து³கனித்³தே³ஸவண்ணனா
891. உபனய்ஹதீதி ‘‘அனந்தரட்ட²பனா’’திஆதி³மாஹ. தத்த² பட²முப்பன்னஸ்ஸ பவத்தாகாரோ மரியாதா³, தங் அனதிக்கமித்வா தஸ்ஸேவ த³ள்ஹீகரணவஸேன ட²பனா மரியாத³ட்ட²பனா. பகதிட்ட²பனாமத்தமேவ, விஸேஸனரஹிதாதி அத்தோ².
892. நிட்டு²ரியங் கே²ளபாதனங், நிட்டு²ரியங் விய நிட்டு²ரியங். த³ஸ்ஸெத்வாதி த³ந்தேஹி சி²ந்தி³த்வா. தேன பளாஸோதி த³ஸ்ஸேதி. பளாஸஸ்ஸ ஆயனாதி யுக³க்³கா³ஹப்பவத்தி. ஸமபா⁴வத³ஹனங் ஜயோ, தஸ்ஸ ஆஹரணதோ ஆஹாரோ. து⁴ரங் ந தே³தீதி பாமொக்க²ங் ந தே³தி.
894. காயேன சேதியங்க³ணாதி³வத்தங் கரோதி ‘‘ஏவங் வத்தஸம்பன்னோ ஸத்³தோ⁴ கத²ங் காயது³ச்சரிதாதீ³னி கரிஸ்ஸதீ’’தி பரேஸங் ஞாபனத்த²ங். அதிச்சாதி அச்சயங் கத்வா. ஆஸரந்தீதி ஆக³ச்ச²ந்தி, புன படிச்சா²த³னே பவத்தந்தீதி அத்தோ². கோனாமேவங் கரோதீதி வொச்சி²ந்த³னச்சா²த³னா வா வொச்சா²த³னா.
ந ஸம்மா பா⁴ஸிதாதி யோ ந ஸம்மா பா⁴ஸதி, ஸோ ஸடோ²தி த³ஸ்ஸேதி. குச்சி² வா பிட்டி² வா ஜானிதுங் ந ஸக்காதி அஸந்தகு³ணஸம்பா⁴வனேனேவ சித்தானுரூபகிரியாவிரஹதோ ‘‘ஏவங்சித்தோ ஏவங்கிரியோ’’தி ஜானிதுங் ந ஸக்காதி அத்தோ².
அஜோ ஏவ அஜாமிகோ³. நேலகோதி தருணவச்சோ². யதா² ஸோ யக்கோ² தாதி³ஸங் ரூபங் த³ஸ்ஸெத்வா ‘‘அஜா’’தி ஸஞ்ஞாய ஆக³தாக³தே கா²த³தி, ஏவமயம்பி தங்தங்ஸதி³ஸகு³ணஸம்பா⁴வனேன தே தே வஞ்சேதி. தேனேதங் ஸாடெ²ய்யங் மாயாதோ ப³லவதரா வஞ்சனாதி த³ட்ட²ப்³ப³ங். தேனேவ ‘‘பரிக்க²த்ததா’’தி வுத்தங்.
908. ஸக்காயதி³ட்டா²தீ³னங் அபா⁴வேபி யங் ஸங்யோஜனங் ஹோதி, தங் ப³ஹித்³தா⁴ ஸங்யோஜனதோ ப³ஹித்³தா⁴ஸங்யோஜனஸ்ஸ புக்³க³லஸ்ஸ விஸேஸனபூ⁴தங் ப³ஹித்³தா⁴ஸங்யோஜனங் நாம.
து³கனித்³தே³ஸவண்ணனா நிட்டி²தா.
(3.) திகனித்³தே³ஸவண்ணனா
909. அகுஸலமூலானேவ ‘‘தீஹி…பே॰… கதி²தோ’’தி.
919. ஸஸ்ஸதோ லோகோதிஆதி³த³ஸ்ஸனமேவ ப்³ரஹ்மசரியங் மொக்க²ஸம்பாபகங் உத்தமசரியந்தி தி³ட்டி²க³திகேஹி ஸம்மதந்தி ஆஹ ‘‘தி³ட்டி²க³திகஸம்மதஸ்ஸா’’தி. ரூபாரூபாவசரவிபாகேஸு ஸாதிஸயோ ப⁴வராகோ³தி அதி⁴ப்பாயேன வுத்தங் ‘‘மஹாப்³ரஹ்மான’’ந்தி.
920. கத²ங்வித⁴ந்தி கேனாகாரேன ஸண்டி²தந்தி அத்தோ²தி கத்வா ஆஹ ‘‘ஆகாரஸண்டா²ன’’ந்தி. மானட²பனாதி ஸெய்யாதி³வஸேன மானேன ட²பனா, மானஸங்கா²தா வா ட²பனா.
921. சேதஸோ உத்ராஸோ தோ³மனஸ்ஸங், தோ³ஸோ வா, தங்ஸம்பயுத்தா வா சேதனாத³யோ.
922. தே³ஸனாஸுக²தாயாதி திண்ணங் அத்³தா⁴னங் வஸேன விசிகிச்சா²ய தே³ஸனா ஸுகா² ‘‘கங்க²தி விசிகிச்ச²தீ’’தி, ந பன ததா² மோஹேனாதி அதி⁴ப்பாயோ. வண்ணாதி³பே⁴த³ங் ஸுத்வாதி கேசி கிர வத³ந்தி ‘‘க²த்தியஜீவோ பண்டு³வண்ணோ. கஸ்மா? ஸோ ஹி புப்³ப³ண்ஹே ரமதி, புப்³ப³ண்ஹே ச சா²யா பண்டு³வண்ணா. ப்³ராஹ்மணவெஸ்ஸஸுத்³த³ஜீவா ஓதா³தபீதகாளவண்ணா. தே ஹி மஜ்ஜ²ன்ஹஸாயன்ஹரத்தீஸு ஓதா³தபீதகாளசா²யா காளதமகாலேஸு ரமந்தீ’’தி தேஸங் வண்ணபே⁴த³ங், ‘‘ப்³யாபீ பரிமண்ட³லோ’’திஆதி³னா கதெ²ந்தானங் ஸண்டா²னபே⁴த³ஞ்ச ஸுத்வா.
923. புரிஸபுக்³க³லோதி பத³த்³வயங் ஏகபத³ங் கத்வா ஜானந்தானங் வஸேனாயங் ஸம்முதிகதா² பவத்தா, பத³ந்தரமேவ வா இத³ங் புக்³க³லவாசகந்தி த³ஸ்ஸெந்தோ ‘‘அயங் பனா’’திஆதி³மாஹ. அத² வா புரிஸோதி வுத்தோ ச புக்³க³லோ ஏவ, ந புரிஸிந்த்³ரியயுத்தோவாதி த³ஸ்ஸனத்த²ம்பி ‘‘புரிஸபுக்³க³லோ’’தி வுத்தந்தி வேதி³தப்³ப³ங். அட்ட²ஸு ஆபா³தே⁴ஸூதி பித்தஸெம்ஹவாதஸமுட்டா²னஉதுவிபரிணாமஜஓபக்கமிகவிஸமபரிஹாரஜஸன்னிபாதஜகம்மஸமுட்டா²னேஸு. புப்³பே³ கதந்தி புராணதரகம்மங் இச்ச²ந்தீதி உபபஜ்ஜவேத³னீயஞ்ச கிர படிக்கி²பந்தி. ஆணத்திமூலகேன வாதி யோபி ஆணாபெத்வா வத⁴ப³ந்தா⁴தி³து³க்க²ங் உப்பாதே³தி, தம்பி தங்மூலகங் ந ஹோதி, இஸ்ஸரனிம்மானமூலமேவாதி அதி⁴ப்பாயோ.
924. மோஹஸ்ஸ அனுத³ஹனங் தா³ஹகாரணதாய வுத்தங், ஸபா⁴வதோபி பன அஸம்படிவேதோ⁴ ஸம்படிவேத⁴ஸுக²ஸ்ஸ பச்சனீகபூ⁴தோ து³க்கோ² ஏவாதி அனுத³ஹனதா வேதி³தப்³பா³. ஏவஞ்ச கத்வா ‘‘உபெக்கா² வேத³னா ஞாணஸுகா² அஞ்ஞாணது³க்கா²’’தி (ம॰ நி॰ 1.465) வுத்தா.
926. புது²னிமித்தாரம்மணேஸூதி கோஸஜ்ஜங், ஸதிவொஸ்ஸக்³க³ஸங்கா²தங் பமஜ்ஜனங் பமாதோ³தி அயங் விஸேஸோதி.
931. ஸக³ருவாஸந்தி ஸஒத்தப்பவாஸமாஹ, ஸஜெட்ட²கவாஸந்தி ஸஹிரிவாஸங். அனாதி³யனா அனத்³தா³ ஓவாத³அக்³க³ஹணங், அசித்தீகாரோதி அத்தோ². ஸுக்க²கட்ட²ஸ்ஸ விய அனல்லதா, அமுது³தா வா அனத்³தா³. அஸீல்யந்தி அஸுக²ஸீலதா அமுது³தா ஏவ.
934. உபாரம்போ⁴ தோ³ஸஸம்பயுத்தசித்துப்பாதோ³ ஸியா.
936. ‘‘இத⁴ பாஸாணங் கரோதீ’’திஆதி³னா ட²பனத்தே²பி கரோதி-ஸத்³தோ³ யுஜ்ஜதீதி ஆஹ ‘‘கரோதீதி ட²பேதீ’’தி. எத்த² சாயங் ஆவஜ்ஜனா அகுஸலானங் ஆஸன்னகாரணத்தா கு²த்³த³கவத்தூ²ஸு வுத்தாதி வேதி³தப்³பா³, தத³னுகூலகிச்சத்தா வா.
திகனித்³தே³ஸவண்ணனா நிட்டி²தா.
(4.) சதுக்கனித்³தே³ஸவண்ணனா
939. இதீதி நித³ஸ்ஸனே நிபாதோதி ஏவங்-ஸத்³தே³ன ஸமானத்தோ²தி த³ஸ்ஸேதி. ப⁴வாப⁴வஹேதூதிபீதி எத்த² ப⁴வந்தி ஜாயந்தி ஏதேனாதி ப⁴வோ, ஸப்பிஆதி³பே⁴ஸஜ்ஜங். ப⁴வோ ஏவ பணீததரோ அபி⁴வுத்³தோ⁴ அப⁴வோ. பா⁴வனாராமதாஅரியவங்ஸப்பஹெய்யத்தா வா புரிமதண்ஹாத்தயவஜ்ஜா ஸப்³பா³ தண்ஹா ‘‘ப⁴வாப⁴வஹேது உப்பஜ்ஜதீ’’தி வுத்தாதி வேதி³தப்³பா³.
ஏதாயாதி ந க³ச்ச²ந்தீதி ந பவத்தந்தி, தங் தங் கிரியங் ந கரொந்தீதி இமினாதி ச²ந்தா³தி³னா அக³திக³மனேன. ச²ந்தா³தீ³ஸு யேன நின்னோ, தேன க³மனங் யதா²னின்னக³மனங்.
‘‘ராஜா’’திஆதி³னா ராஜாதி³னிமித்தோ விய ஊமிஆதி³னிமித்தோ சித்துத்ராஸோ ஊமிஆதி³ப⁴யங், ‘‘ஊமிப⁴யந்தி கோ², பி⁴க்க²வே, கோது⁴பாயாஸஸ்ஸேதங் அதி⁴வசன’’ந்திஆதி³வசனதோ (ம॰ நி॰ 2.162; அ॰ நி॰ 4.122; இதிவு॰ 109) கோது⁴பாயாஸஓத³ரிகத்தபஞ்சகாமகு³ணமாதுகா³மா வா. தத்த² பஞ்சகாமகு³ணமாதுகா³மக்³க³ஹணேன தன்னிஸ்ஸிதச²ந்த³ராக³க்³க³ஹணங் வேதி³தப்³ப³ங், ஓத³ரிகத்தஞ்ச லோபோ⁴வ. உக்கே²பனீயாதி³கம்மங் வினயத³ண்ட³ங்.
‘‘அத² கோ² திம்ப³ருகோ பரிப்³பா³ஜகோ யேன ப⁴க³வா…பே॰… ஏதத³வோச ‘கிங் நு கோ², போ⁴ கோ³தம, ஸயங்கதங் ஸுக²து³க்க²’ந்தி? மா ஹேவங் திம்ப³ருகாதி ப⁴க³வா அவோசா’’திஆதி³னா நிதா³னவக்³கே³ (ஸங்॰ நி॰ 2.18) ஆக³தத்தா ‘‘திம்ப³ருகதி³ட்டீ²’’தி வுத்தா.
சதுக்கனித்³தே³ஸவண்ணனா நிட்டி²தா.
(5.) பஞ்சகனித்³தே³ஸவண்ணனா
940. ஆக³ந்துங் பன ந தெ³ந்தீதி ஆக³மனஸ்ஸ பச்சயா ந ஹொந்தீதி அத்தோ² த³ட்ட²ப்³போ³.
941. அவதே³ஹனதோதி பூரணேன மங்ஸூபசயஹேதுதாய ச உபசயனதோ. கி³ம்ஹகாலே பு⁴ஞ்ஜித்வா ஸயந்தஸ்ஸ ஸுக²ங் ஹோதீதி தங் உதுஸுக²ங் ‘‘ஸெய்யஸுக²’’ந்தி வுத்தங், ஸயனிரியாபத²ஸுக²ந்தி அத்தோ². வதந்தி து⁴தங்கா³னி. தபோதி க²ந்த⁴கவத்தானி, வீரியங் வா. ஸீலக்³க³ஹணேன க²ந்த⁴கவத்தமேது²னவிரதீனங் க³ஹிதத்தா தபப்³ரஹ்மசரியக்³க³ஹணங் ந கத்தப்³ப³ந்தி சே? ந, அஞ்ஞஸீலதோ விஸேஸெத்வா தபப்³ரஹ்மசரியானங் தே³வத்தகாரணத்தக்³க³ஹணஸ்ஸ த³ஸ்ஸனதோ, பா³ஹிரானஞ்சஸ்ஸ வினிப³ந்த⁴ஸ்ஸ பவத்தித³ஸ்ஸனதோ வா. தேஸஞ்ஹி அவிஹிங்ஸாதி³கோ³வதாதி³து³க்கரகாரிகாமேது²னவிரதியோ யதா²க்கமங் ஸீலாதீ³னி, தானி ச தே தே³வனிகாயங் பணிதா⁴ய சரந்தீதி. அஞ்ஞதா² ச ஸத்³தா⁴ருசிஆதீ³ஹி ‘‘யதோ
942. ப்³யஸனேஸு த³ஸ்ஸனஸவனபடிகூலதா. எத்த² ச ஆதீ³னவேஹி பஞ்சஹி தேஸங் காரணபூ⁴தா அக்க²ந்தியேவ பி⁴ந்தி³த்வா கதி²தாதி வேதி³தப்³பா³, அக்க²ந்திமூலகா வா அப்பியதாதி³ஹேதுபூ⁴தா து³க்கடது³ப்³பா⁴ஸிததாதி³தோ³ஸா.
மிச்சா²ஜீவனிமித்தங் மரணகாலே உப்பன்னப⁴யங் ‘‘ஆஜீவகப⁴ய’’ந்தி வுத்தங். ‘‘ஆஜீவிகாப⁴ய’’ந்தி பன பாடே² பச்சயானுப்பத்திங் பஸ்ஸதோ ஆஜீவிகனிமித்தோ சித்துத்ராஸோதி அத்தோ² த³ட்ட²ப்³போ³. கித்திஸத்³தோ³ ஸிலோகந்தி தப்படிபக்கா² அஸிலோகங் அகித்தி. தேனாஹ ‘‘க³ரஹப⁴ய’’ந்தி.
943. உப்பிலாவிதந்தி உத³க்³க³தாஸங்கா²தோ அவூபஸமபா⁴வோ, அவூபஸமஹேதுபூ⁴தோ வா பீதியா ஆகாரோ.
பஞ்சகனித்³தே³ஸவண்ணனா நிட்டி²தா.
(6.) ச²க்கனித்³தே³ஸவண்ணனா
944. ‘‘கோத⁴னோ ஹோதி உபனாஹீ’’திஆதி³னா கோதா⁴தி³ஹேதுகா உபனாஹாத³யோ கோதா⁴தீ³னங் ஸஹாயகாரணபா⁴வேன ஸுத்தந்தே வுத்தாதி கோதா⁴த³யோ ஏவ விவாத³மூலானி, தேனெத்த² தே ஏவ வுத்தா. ஸந்தி³ட்டி²பராமஸிதா அத்தனோ தி³ட்டி²யங் அபி⁴னிவிட்ட²தா.
945. அப்பதிஸ்ஸயோதி பதிஸ்ஸயபூ⁴தேஹி க³ரூஹி விரஹிதோ. அப்பமாத³லக்க²ணந்தி ஸதிஅவிப்பவாஸங் குஸலானுயோக³ஸாதச்சங் வா.
யுத்தபயுத்ததாதி க³ணஸங்க³ணிகா கிலேஸவஸேன பவத்தா ஸங்க³ணிகா. இத்தி²படிஸங்யுத்தகதா²ஸவனே இத்தி²ஸத்³த³ஸவனே ச அஸ்ஸாதோ³ ஸவனஸங்ஸக்³கோ³. இத்தி²யா கஸ்ஸசி தா³னக்³க³ஹணஸ்ஸாதோ³ பரிபோ⁴க³ஸங்ஸக்³கோ³.
946. ஸோமனஸ்ஸேன ஸத்³தி⁴ங் உபவிசரந்தீதி ஸோமனஸ்ஸுபவிசாராதி அகுஸலஸோமனஸ்ஸஸஹக³தா ரூபவிசாராத³யோ இதா⁴தி⁴ப்பேதாதி வேதி³தப்³பா³, ததா² உபெக்கு²பவிசாரா ச. தங்ஸம்பயுத்தோ வாதி ஏதேன விசாரக்³க³ஹணேன விதக்கோபி
947. அஞ்ஞாணஸம்பயுத்தாதி விசிகிச்சு²த்³த⁴ச்சஸஹக³தசித்தேஸு உபெக்கா² மோஹோதி வத³ந்தி, லோப⁴ஸம்பயுத்துபெக்கா²பி பன கே³ஹஸ்ஸிதா ந ந ஹோதி.
948. அதி⁴ச்சஸமுப்பன்னிகோ ‘‘அதி⁴ச்ச ஸமுப்பன்னோ அத்தா உப்பன்னோ ப⁴விஸ்ஸதீ’’தி க³ண்ஹந்தோ ஸஸ்ஸததி³ட்டி²கோ ஹோதீதி ஏவரூபஸ்ஸ தி³ட்டி² வியாதி த³ஸ்ஸெந்தோ ‘‘அதி⁴ச்சஸமுப்பன்னிகஸ்ஸேவா’’தி ஆஹ. ந ஸோ ஜாதோதி எத்த² ‘‘ஜாதூ’’தி அயங் நிபாதோ உ-காரஸ்ஸ ஓ-காரங் கத்வா ஜாதோதி வுத்தோ, தேன வா ஸமானத்த²ங் நிபாதந்தரங் ஏதங் த³ட்ட²ப்³ப³ங். ஸப்³பா³ஸவதி³ட்டீ²தி ஸப்³பா³ஸவபரியாயேன ஆக³தா தி³ட்டி².
ச²க்கனித்³தே³ஸவண்ணனா நிட்டி²தா.
(7.) ஸத்தகனித்³தே³ஸவண்ணனா
951. த்³வாஸட்டி²யா தி³ட்டீ²ஸு ஸத்தகஸ்ஸ அஞ்ஞஸ்ஸ அபா⁴வா ஸத்த உச்சே²த³வாதா³ ஏவ இத⁴ ததா² அவத்வா ‘‘ஸத்த தி³ட்டீ²’’தி வுத்தா.
ஸத்தகனித்³தே³ஸவண்ணனா நிட்டி²தா.
(8.) அட்ட²கனித்³தே³ஸவண்ணனா
952. ‘‘கம்மங் கோஸஜ்ஜகாரணானி, கோஸஜ்ஜமேவ வா கோஸஜ்ஜந்தரகாரணதாய கோஸஜ்ஜகாரணானீதி த³ட்ட²ப்³பா³னி. மாஸாசிதங் மஞ்ஞேதி எத்த² ஆசித-ஸத்³தோ³ திந்த-ஸத்³த³ஸ்ஸ, மஞ்ஞே-ஸத்³தோ³ ச விய-ஸத்³த³ஸ்ஸ அத்த²ங் வத³தீதி அதி⁴ப்பாயேன ‘‘திந்தமாஸோ வியா’’தி அயமத்தோ² விபா⁴விதோ, மாஸசயோ வியாதி வா அத்தோ².
957. ப²ரதீதி பு²ஸதி, க⁴ட்டேதீதி அத்தோ². அஞ்ஞேன காரணேனாதி ‘‘அஜ்ஜ தயா விகாலே பு⁴த்தங், தேன த்வங் ஆபத்திங் ஆபன்னோஸீ’’தி வுத்தோ ‘‘ஹிய்யோ ப³ஹித்³தா⁴ அபனாமனா.
958. அஸஞ்ஞீவாதா³தி புக்³க³லேஹி தி³ட்டி²யோ த³ஸ்ஸேதி. யேஹி வா அபி⁴னிவேஸேஹி அஸஞ்ஞீ அத்தானங் வத³ந்தி, தே அஸஞ்ஞீவாதா³. அரூபஸமாபத்தினிமித்தந்தி ஆகாஸாதி³ங்.
அட்ட²கனித்³தே³ஸவண்ணனா நிட்டி²தா.
(9.) நவகனித்³தே³ஸவண்ணனா
960. த³ஸமஸ்ஸ அவுத்தத்தா ‘‘ஸத்தேஸு உப்பத்திவஸேனேவ கதி²தானீ’’தி வுத்தங்.
963. ஸுக²வினிச்ச²யந்தி ஸேவிதப்³பா³ஸேவிதப்³ப³ஸுக²ஸன்னிட்டா²னந்தி அத்தோ². அஜ்ஜ²த்தங் ஸுக²ந்தி ஸேவிதப்³ப³ங் நெக்க²ம்மஸுக²ங். வினிச்ச²யாதி த்³வே வினிச்ச²யாதி இத³ங் –
‘‘ஸாதங்
தமூபனிஸ்ஸாய பஹோதி ச²ந்தோ³;
ரூபேஸு தி³ஸ்வா விப⁴வங் ப⁴வஞ்ச,
வினிச்ச²யங் குப்³ப³தி ஜந்து லோகே’’தி. (ஸு॰ நி॰ 873; மஹானி॰ 102) –
ஏதஸ்ஸ நித்³தே³ஸே வுத்தங்.
இத⁴ வினிச்ச²யோதி வுத்தோதி இமிஸ்ஸா விப⁴ங்க³பாளியா யோ ச²ந்த³ராக³ஸ்ஸ பச்சயஸபா⁴வேன வினிச்ச²ய-ஸத்³தே³ன வுத்தோ, ஸக்கபஞ்ஹேபி (தீ³॰ நி॰ 2.357) ச²ந்த³ஸ்ஸ நிதா³னபா⁴வேன விதக்க-ஸத்³தே³ன ஸோ ஏவ ஆக³தோதி ஏவங் விதக்கஸ்ஸ வினிச்ச²யபா⁴வங் தஸ்ஸேவ இத⁴ க³ஹிததஞ்ச த³ஸ்ஸேதி. ப³லவஸன்னிட்டா²னந்தி ப³லவதியா தண்ஹாய ஆரம்மணஸ்ஸ நிட்ட²பெத்வா க³ஹணங்.
964. ஸதிபி அஞ்ஞேஸஞ்ச ஸங்க²தபா⁴வே அஹந்தி அஸ்மீதி ச ஸாதிஸயா மானஸ்ஸ ஸங்க²ததாதி கத்வா ‘‘ஸங்க²த’’ந்தி மானோ வுத்தோ. ஸெய்யாதி³வஸேன ஸங்க²தங். எத்த² ‘‘ப⁴விஸ்ஸந்தீ’’திஆதி³கா பவத்தி தண்ஹாதி³ட்டீ²னங் விஸேஸவதீதி தாஸம்பி இஞ்ஜிதாதி³பா⁴வோ வுத்தோ.
நவகனித்³தே³ஸவண்ணனா நிட்டி²தா.
(10.) த³ஸகனித்³தே³ஸவண்ணனா
970. ஜாலக்கி²பஸங்விதா⁴னாதி³குஸலதாஸங்கப்பனங் உபாயசிந்தா, தஸ்ஸா மிச்சா²பா⁴வபடிச்சா²த³னபா⁴வேன பவத்தோ ததா³காரோ மோஹோ உபாயசிந்தாவஸேன உப்பன்னோதி த³ட்ட²ப்³போ³. யதா²கதே பன பாபே அனாதீ³னவத³ஸ்ஸனவஸேன பவத்தா ஸஞ்ஞா, ஸங்கப்போ வா பச்சவெக்க²ணா, தஸ்ஸாபி மிச்சா²பா⁴வபடிச்சா²த³கங் ததா³காரங், அனாதீ³னவத³ஸ்ஸனங் வா பச்சவெக்க²ணாகாரேன உப்பன்னோ மோஹோதி. விமுத்தஸஞ்ஞிதாதி மிச்சா²விமுத்தீதி கேசி வத³ந்தி. ப²லங் விய விமுத்தந்தி க³ஹிதே பன தி³ட்டி²ஸம்பயுத்தசித்தே தி³ட்டி² மிச்சா²ஞாணங், ஸமாதி⁴ ச மிச்சா²விமுத்தீதி யுத்தங் ஸியா.
த³ஸகனித்³தே³ஸவண்ணனா நிட்டி²தா.
தண்ஹாவிசரிதனித்³தே³ஸவண்ணனா
973. ஸமூஹகா³ஹதோதி தண்ஹாமானதி³ட்டீ²னங் ஸாதா⁴ரணக்³க³ஹணதோதி வத³ந்தி. ‘‘இத்த²ங் ஏவங் அஞ்ஞதா²’’தி பன விஸேஸங் அகத்வா க³ஹணங் ஸமூஹகா³ஹோதி த³ட்ட²ப்³போ³. அஞ்ஞங் ஆகாரந்தி பரஸந்தானக³தங் ஆகாரங். அத்தீ²தி ஸதா³ ஸங்விஜ்ஜதீதி அத்தோ². ஸீத³தீதி வினஸ்ஸதி. ஸங்ஸயபரிவிதக்கவஸேனாதி ‘‘கிங் நு கோ² அஹங் ஸியங், ந ஸிய’’ந்தி ஏவங் பரிவிதக்கவஸேன. பத்த²னாகப்பனவஸேனாதி ‘‘அபி நாம ஸாது⁴ பனாஹங் ஸிய’’ந்தி ஏவங் பத்த²னாய கப்பனவஸேன.
ஸுத்³த⁴ஸீஸாதி தண்ஹாமானதி³ட்டீ²னங் ஸாதா⁴ரணஸீஸா விஸேஸஸ்ஸ அனிஸ்ஸிதத்தா ‘‘ஸுத்³த⁴ஸீஸா’’தி வுத்தா. தத்த² தி³ட்டி²ஸீஸேஹி தி³ட்டி²யா தண்ஹா த³ஸ்ஸிதா, ஸீஸஸீஸமூலகேஹி ‘‘ஏவமேதே…பே॰… தண்ஹா விசரிதத⁴ம்மா வேதி³தப்³பா³’’தி. தி³ட்டி²மானேஸுபி ‘‘தண்ஹாவிசரிதானீ’’தி வசனஞ்ச அஞ்ஞமஞ்ஞங் விப்பயோகீ³னங் தி³ட்டி²மானானங் தண்ஹாய அவிப்பயோகீ³னங் தங்மூலகத்தாவ தப்பதா⁴னதாய கதந்தி வேதி³தப்³ப³ங்.
974. அவக்கரீதி நிபாதோ நானாபா⁴வே வத்ததீதி அனானாகரணங் அனவக்கரி, தங் கத்வா, அவக்கரி வா அகத்வா அனவக்கரி கத்வாதி ஏவங் த³ஸ்ஸெந்தோ ஆஹ ‘‘அவினிப்³போ⁴க³ங் கத்வா’’தி. ‘‘அனவகாரிங் கரித்வா’’தி வா பாடோ², தத்த² அவகிரணங் விக்கே²பனங் ஸமூஹஸ்ஸ ஏகதே³ஸானங் வினிப்³பு⁴ஜ்ஜனங் அவகாரி, தங் அவகாரிங் வினிப்³போ⁴க³ங் அகத்வா, பஞ்சபி க²ந்தே⁴ ஸமூஹதோ ஏகத்தேனேவ க³ஹெத்வா அத்ததோ அவினிப்³பு⁴ஜ்ஜித்வா அஸ்மீதி ச²ந்த³மானதி³ட்டி²யோ படிலப⁴தீதி அஸிதப்³யாப⁴ங்கி³தாயாதி தா³த்தேன காஜேன சாதி ஏதேன பரிக்கா²ரேன, அஸிதப்³யாப⁴ங்கீ³ஹி லவனவஹனகிரியா வா ‘‘அஸிதப்³யாப⁴ங்கீ³’’தி வுத்தா.
976. அவகாரிங் கரித்வாதி ரூபாதீ³னி அத்ததோ வினிப்³பு⁴ஜ்ஜித்வா இமினா ரூபேன…பே॰… இமினா விஞ்ஞாணேன அஸ்மீதி ச²ந்த³ங் படிலப⁴தீதி ஏவங் ஸப்³ப³த்த² இமினாதி ஏதஸ்ஸ அத்ததோ அவினிப்³பு⁴த்தேன ரூபாதி³னாதி அத்தோ² த³ட்ட²ப்³போ³. அத்ததோ ஹி அவினிப்³பு⁴த்தானி அப³ஹிகதானி அஹமிச்சேவ க³ஹிதானி ரூபாதீ³னி உபாதா³ய உபக³ந்த்வா பவத்தா தண்ஹா ‘‘அஜ்ஜ²த்திகஸ்ஸ உபாதா³யா’’தி வுத்தா, அத்ததோ ச வினிப்³பு⁴த்தானி ப³ஹிகதானி உபக³ந்த்வா பவத்தா ‘‘பா³ஹிரஸ்ஸ உபாதா³யா’’தி. க²க்³கே³ன வா ச²த்தேன வா அஹங் நிச்சோதி அபி⁴மங்க³லஸம்மதேன க²க்³கா³தி³னா மம வினாஸோ நத்தீ²தி மஞ்ஞதீதி அத்தோ². ஏகேகஸ்ஸாதி இத³ங் அனாதி³ம்ஹி அனந்தே ச ஸங்ஸாரே ஏகேகஸ்ஸ அதீதானாக³தேஸு ச²த்திங்ஸாயபி ஸம்ப⁴வத³ஸ்ஸனத்த²ங் வுத்தங், ஏகேகஸ்ஸ வா புக்³க³லஸ்ஸ யதா²லாப⁴வஸேனாதி இத³ம்பி அனிஸ்ஸிததண்ஹாமானதி³ட்டி²ங் கத்வா புது²ஜ்ஜனஸ்ஸ அத்³தா⁴பச்சுப்பன்னே கஸ்ஸசி ஸம்ப⁴வத³ஸ்ஸனத்த²ங்.
தண்ஹாவிசரிதனித்³தே³ஸவண்ணனா நிட்டி²தா.
கு²த்³த³கவத்து²விப⁴ங்க³வண்ணனா நிட்டி²தா.