4. ஸச்சவிப⁴ங்கோ³
1. ஸுத்தந்தபா⁴ஜனீயங்
உத்³தே³ஸவண்ணனா
189. ஸாஸனக்கமோதி ஸாஸனக்கமோதி ஸச்சானி ஸாஸனபவத்திட்டா²னானி வுச்சந்தி, தங்தே³ஸனா ச தப்³போ³ஹாரேனாதி.
ததா²தி தங்ஸபா⁴வாவ. அவிததா²தி அமுஸாஸபா⁴வா. அனஞ்ஞதா²தி அஞ்ஞாகாரரஹிதா. து³க்க²து³க்க²தாதங்னிமித்ததாஹி அனிட்ட²தா பீளனட்டோ², த்³விதா⁴பி பரித³ஹனங், கிலேஸதா³ஹஸமாயோகோ³ வா ஸந்தாபட்டோ²தி அயமேதேஸங் விஸேஸோ. புக்³க³லஹிங்ஸனங் வா பீளனங், அத்தனோ ஏவ திகி²ணபா⁴வோ ஸந்தாபனங் ஸந்தாபோதி. எத்த² ச பீளனட்டோ² து³க்க²ஸ்ஸ ஸரஸேனேவ ஆவிப⁴வனாகாரோ, இதரே யதா²க்கமங் ஸமுத³யமக்³க³னிரோத⁴த³ஸ்ஸனேஹி ஆவிப⁴வனாகாராதி அயங் சதுன்னம்பி விஸேஸோ. தத்ரதத்ராபி⁴னந்த³னவஸேன ப்³யாபெத்வா ஊஹனங் ராஸிகரணங் து³க்க²னிப்³ப³த்தனங் ஆயூஹனங், ஸமுத³யதோ ஆக³ச்ச²தீதி வா ஆயங், து³க்க²ங். தஸ்ஸ ஊஹனங் பவத்தனங் ஆயூஹனங், ஸரஸாவிபா⁴வனாகாரோ ஏஸோ. நித³தா³தி து³க்க²ந்தி நிதா³னங், ‘‘இத³ங் தங் து³க்க²’’ந்தி ஸம்படிச்சா²பெந்தங் விய ஸமுட்டா²பேதீதி அத்தோ². து³க்க²த³ஸ்ஸனேன சாயங் நிதா³னட்டோ² ஆவி ப⁴வதி. ஸங்யோக³பலிபோ³த⁴ட்டா² நிரோத⁴மக்³க³த³ஸ்ஸனேஹி, தே ச ஸங்ஸாரஸங்யோஜனமக்³க³னிவாரணாகாரா த³ட்ட²ப்³பா³.
நிஸ்ஸரந்தி நிஸ்ஸரணங். அயமஸ்ஸ ஸபா⁴வேன ஆவிப⁴வனாகாரோ. விவேகாஸங்க²தாமதட்டா² ஸமுத³யமக்³க³து³க்க²த³ஸ்ஸனாவிப⁴வனாகாரா, ஸமுத³யக்க²யஅப்பச்சயஅவினாஸிதா வா. ஸங்ஸாரதோ நிக்³க³மனங் நிய்யானங். அயமஸ்ஸ ஸரஸேன பகாஸனாகாரோ, இதரே ஸமுத³யனிரோத⁴து³க்க²த³ஸ்ஸனேஹி. தத்த² பலிபோ³து⁴பச்சே²த³வஸேன நிப்³பா³னாதி⁴க³மோவ நிப்³பா³னநிமித்ததா ஹெத்வட்டோ². பஞ்ஞாபதா⁴னத்தா மக்³க³ஸ்ஸ நிப்³பா³னத³ஸ்ஸனங், சதுஸச்சத³ஸ்ஸனங் வா த³ஸ்ஸனட்டோ². சதுஸச்சத³ஸ்ஸனே கிலேஸது³க்க²ஸந்தாபவூபஸமனே ச ஆதி⁴பச்சங் கரொந்தி மக்³க³ங்க³த⁴ம்மா ஸம்பயுத்தத⁴ம்மேஸூதி ஸோ மக்³க³ஸ்ஸ அதி⁴பதெய்யட்டோ²தி. விஸேஸதோ வா ஆரம்மணாதி⁴பதிபூ⁴தா மக்³க³ங்க³த⁴ம்மா ஹொந்தி ‘‘மக்³கா³தி⁴பதினோ த⁴ம்மா’’தி வசனதோதி ஸோ தேஸங் ஆகாரோ அதி⁴பதெய்யட்டோ². ஏவமாதி³ ஆஹாதி ஸம்ப³ந்தோ⁴. தத்த² அபி⁴ஸமயட்டோ²தி அபி⁴ஸமேதப்³ப³ட்டோ², அபி⁴ஸமயஸ்ஸ வா விஸயபூ⁴தோ அத்தோ² அபி⁴ஸமயட்டோ², அபி⁴ஸமயஸ்ஸேவ வா பவத்திஆகாரோ அபி⁴ஸமயட்டோ², ஸோ செத்த² அபி⁴ஸமேதப்³பே³ன பீளனாதி³னா த³ஸ்ஸிதோதி த³ட்ட²ப்³போ³.
குச்சி²தங் க²ங் து³க்க²ங். ‘‘ஸமாக³மோ ஸமேத’’ந்திஆதீ³ஸு கேவலஸ்ஸ ஆக³ம-ஸத்³த³ஸ்ஸ ஏத-ஸத்³த³ஸ்ஸ ச பயோகே³ ஸங்யோக³த்த²ஸ்ஸ அனுபலப்³ப⁴னதோ ஸங்-ஸத்³த³ஸ்ஸ ச பயோகே³ உபலப்³ப⁴னதோ ‘‘ஸங்யோக³ங் தீ³பேதீ’’தி ஆஹ, ஏவங் ‘‘உப்பன்னங் உதி³த’’ந்தி எத்தா²பி. அய-ஸத்³தோ³ க³திஅத்த²ஸித்³தோ⁴ ஹேது-ஸத்³தோ³ விய காரணங் தீ³பேதி அத்தனோ ப²லனிப்பா²த³னேன அயதி பவத்ததி, ஏதி வா ஏதஸ்மா ப²லந்தி அயோதி, ஸங்யோகே³ உப்பத்திகாரணங் ஸமுத³யோதி எத்த² விஸுங் பயுஜ்ஜமானாபி உபஸக்³க³-ஸத்³தா³ ஸதா⁴துகங் ஸங்யோக³த்த²ங் உப்பாத³த்த²ஞ்ச தீ³பெந்தி கிரியாவிஸேஸகத்தாதி வேதி³தப்³பா³.
அபா⁴வோ எத்த² ரோத⁴ஸ்ஸாதி நிரோதோ⁴தி ஏதேன நிப்³பா³னஸ்ஸ து³க்க²விவேகபா⁴வங் த³ஸ்ஸேதி. ஸமதி⁴க³தே தஸ்மிங் தத³தி⁴க³மவதோ புக்³க³லஸ்ஸ ரோதா⁴பா⁴வோ பவத்திஸங்கா²தஸ்ஸ ரோத⁴ஸ்ஸ படிபக்க²பூ⁴தாய நிவத்தியா அதி⁴க³தத்தாதி ஏதஸ்மிஞ்சத்தே² அபா⁴வோ ஏதஸ்மிங் ரோத⁴ஸ்ஸாதி நிரோதோ⁴இச்சேவ பத³ஸமாஸோ. து³க்கா²பா⁴வோ பனெத்த² புக்³க³லஸ்ஸ, ந நிப்³பா³னஸ்ஸேவ. அனுப்பாதோ³ ஏவ நிரோதோ⁴ அனுப்பாத³னிரோதோ⁴. ஆயதிப⁴வாதீ³ஸு அப்பவத்தி, ந பன ப⁴ங்கோ³தி ப⁴ங்க³வாசகங் நிரோத⁴-ஸத்³த³ங் நிவத்தெத்வா அனுப்பாத³வாசகங் க³ண்ஹாதி. ஏதஸ்மிங் அத்தே² காரணே ப²லோபசாரங் கத்வா நிரோத⁴பச்சயோ நிரோதோ⁴தி வுத்தோ. படிபதா³ ச ஹோதி புக்³க³லஸ்ஸ து³க்க²னிரோத⁴ப்பத்தியா. நனு ஸா ஏவ து³க்க²னிரோத⁴ப்பத்தீதி தஸ்ஸா ஏவ ஸா படிபதா³தி ந யுஜ்ஜதீதி? ந, புக்³க³லாதி⁴க³மஸ்ஸ யேஹி ஸோ அதி⁴க³ச்ச²தி, தேஸங்
பு³த்³தா⁴த³யோ அரியா படிவிஜ்ஜ²ந்தீதி எத்த² படிவித்³த⁴காலே பவத்தங் பு³த்³தா⁴தி³வோஹாரங் ‘‘அக³மா ராஜக³ஹங் பு³த்³தோ⁴’’திஆதீ³ஸு (ஸு॰ நி॰ 410) விய புரிமகாலேபி ஆரோபெத்வா ‘‘பு³த்³தா⁴த³யோ’’தி வுத்தங். தே ஹி பு³த்³தா⁴த³யோ சதூஹி மக்³கே³ஹி படிவிஜ்ஜ²ந்தீதி. அரியபடிவிஜ்ஜி²தப்³பா³னி ஸச்சானி அரியஸச்சானீதி செத்த² புரிமபதே³ உத்தரபத³லோபோ த³ட்ட²ப்³போ³. அரியா இமந்தி படிவிஜ்ஜி²தப்³ப³ட்டே²ன ஏகத்தங் உபனெத்வா ‘‘இம’’ந்தி வுத்தங். தஸ்மாதி ததா²க³தஸ்ஸ அரியத்தா தஸ்ஸ ஸச்சானீதி அரியஸச்சானீதி வுச்சந்தீதி அத்தோ². ததா²க³தேன ஹி ஸயங் அதி⁴க³தத்தா, தேனேவ பகாஸிதத்தா, ததோ ஏவ ச அஞ்ஞேஹி அதி⁴க³மனீயத்தா தானி தஸ்ஸ ஹொந்தீதி. அரியபா⁴வஸித்³தி⁴தோபீதி எத்த² அரியஸாத⁴கானி ஸச்சானி அரியஸச்சானீதி புப்³பே³ விய உத்தரபத³லோபோ த³ட்ட²ப்³போ³. அரியானி ஸச்சானீதிபீதி எத்த² அவிதத²பா⁴வேன அரணீயத்தா அதி⁴க³ந்தப்³ப³த்தா அரியானி, அரியவோஹாரோ வா அயங் அவிஸங்வாத³கோ அவிதத²ரூபோ த³ட்ட²ப்³போ³.
பா³த⁴னலக்க²ணந்தி எத்த² து³க்க²து³க்க²தன்னிமித்தபா⁴வோ பா³த⁴னா, உத³யப்³ப³யபீளிததா வா. ப⁴வாதீ³ஸு ஜாதிஆதி³வஸேன சக்கு²ரோகா³தி³வஸேன ச அனேகதா⁴ து³க்க²ஸ்ஸ பவத்தனமேவ புக்³க³லஸ்ஸ ஸந்தாபனங், தத³ஸ்ஸ கிச்சங் ரஸோ. பவத்தினிவத்தீஸு ஸங்ஸாரமொக்கே²ஸு பவத்தி ஹுத்வா க³ய்ஹதீதி பவத்திபச்சுபட்டா²னங். பப⁴வதி ஏதஸ்மா து³க்க²ங் படிஸந்தி⁴யங் நிப்³ப³த்ததி புரிமப⁴வேன பச்சி²மப⁴வோ க⁴டிதோ ஸங்யுத்தோ ஹுத்வா பவத்ததீதி பப⁴வோ. ‘‘ஏவம்பி தண்ஹானுஸயே அனூஹதே நிப்³ப³த்ததீ து³க்க²மித³ங் புனப்புன’’ந்தி (த⁴॰ ப॰ 338) ஏவங் புனப்புனங் உப்பாத³னங் அனுபச்சே²த³கரணங். ப⁴வனிஸ்ஸரணனிவாரணங் பலிபோ³தோ⁴. ராக³க்க²யாதி³பா⁴வேன ஸப்³ப³து³க்க²ஸந்ததா ஸந்தி. அச்சுதிரஸந்தி அச்சுதிஸம்பத்திகங். சவனங் வா கிச்சந்தி தத³பா⁴வங் கிச்சமிவ வோஹரித்வா அச்சுதிகிச்சந்தி அத்தோ². அசவனஞ்ச ஸபா⁴வஸ்ஸாபரிச்சஜனங் அவிகாரதா த³ட்ட²ப்³பா³. பஞ்சக்க²ந்த⁴னிமித்தஸுஞ்ஞதாய அவிக்³க³ஹங் ஹுத்வா க³ய்ஹதீதி அனிமித்தபச்சுபட்டா²னங். அனுஸயுபச்சே²த³னவஸேன ஸங்ஸாரசாரகதோ நிக்³க³மனூபாயபா⁴வோ நிய்யானங். நிமித்ததோ பவத்ததோ ச சித்தஸ்ஸ வுட்டா²னங் ஹுத்வா க³ய்ஹதீதி வுட்டா²னபச்சுபட்டா²னங்.
அஸுவண்ணாதி³ விபரீததா வுத்தா. உத³கங் விய தி³ஸ்ஸமானா பன மரீசி உபக³தானங் துச்சா² ஹோதி, வத்து²மத்தம்பி தஸ்ஸா ந தி³ஸ்ஸதீதி விஸங்வாதி³கா வுத்தா. மரீசிமாயாஅத்தானங் விபக்கோ² பா⁴வோ தச்சா²விபரீதபூ⁴தபா⁴வோ. அரியஞாணஸ்ஸாதி அவிதத²கா³ஹகஸ்ஸ ஞாணஸ்ஸ, தேன படிவேத⁴பச்சவெக்க²ணானி க³ய்ஹந்தி, தேஸஞ்ச கோ³சரபா⁴வோ படிவிஜ்ஜி²தப்³ப³தாஆரம்மணபா⁴வோ ச த³ட்ட²ப்³போ³. அக்³கி³லக்க²ணங் உண்ஹத்தங். தஞ்ஹி கத்த²சி கட்டா²தி³உபாதா³னபே⁴தே³பி விஸங்வாத³கங் விபரீதங் அபூ⁴தங் வா கதா³சி ந ஹோதி. ‘‘ப்³யாதி⁴த⁴ம்மா ஜராத⁴ம்மா, அதோ² மரணத⁴ம்மினோ’’தி (அ॰ நி॰ 3.39; 5.57) எத்த² வுத்தா ஜாதிஆதி³கா லோகபகதி. மனுஸ்ஸானங் உத்³த⁴ங் தீ³க⁴தா, ஏகச்சானங் திரச்சா²னானங் திரியங் தீ³க⁴தா, வுத்³தி⁴னிட்ட²ங் பத்தானங் புன அவட்³ட⁴னங் ஏவமாதி³கா சாதி வத³ந்தி. தச்சா²விபரீதபூ⁴தபா⁴வேஸு பச்சி²மோ தத²தா, பட²மோ அவிதத²தா, மஜ்ஜி²மோ அனஞ்ஞத²தாதி அயமேதேஸங் விஸேஸோ.
து³க்கா² அஞ்ஞங் ந பா³த⁴கந்தி கஸ்மா வுத்தங், நனு தண்ஹாபி ஜாதி விய து³க்க²னிமித்ததாய பா³தி⁴காதி? ந, பா³த⁴கபப⁴வபா⁴வேன விஸுங் க³ஹிதத்தா. ஜாதிஆதீ³னங் விய வா து³க்க²ஸ்ஸ அதி⁴ட்டா²னபா⁴வோ து³க்க²து³க்க²தா ச பா³த⁴கதா, ந து³க்க²ஸ்ஸ பப⁴வகதாதி நத்தி² தண்ஹாய பப⁴வகபா⁴வேன க³ஹிதாய பா³த⁴கத்தப்பஸங்கோ³. தேனாஹ ‘‘து³க்கா² அஞ்ஞங் ந பா³த⁴க’’ந்தி. பா³த⁴கத்தனியாமேனாதி து³க்க²ங் பா³த⁴கமேவ, து³க்க²மேவ பா³த⁴கந்தி ஏவங் த்³விதா⁴பி பா³த⁴கத்தாவதா⁴ரணேனாதி அத்தோ². தங் வினா நாஞ்ஞதோதி ஸதிபி அவஸேஸகிலேஸஅவஸேஸாகுஸலஸாஸவகுஸலமூலாவஸேஸஸாஸவகுஸலத⁴ம்மானங் து³க்க²ஹேதுபா⁴வே ந தண்ஹாய வினா தேஸங் து³க்க²ஹேதுபா⁴வோ அத்தி², தேஹி பன வினாபி தண்ஹாய து³க்க²ஹேதுபா⁴வோ அத்தி² குஸலேஹி வினா அகுஸலேஹி, ரூபாவசராதீ³ஹி வினா காமாவசராதீ³ஹி ச தண்ஹாய து³க்க²னிப்³ப³த்தகத்தா. தச்ச²னிய்யானபா⁴வத்தாதி த்³விதா⁴பி நியமேன தச்சோ² நிய்யானபா⁴வோ ஏதஸ்ஸ, ந மிச்சா²மக்³க³ஸ்ஸ விய விபரீததாய, லோகியமக்³க³ஸ்ஸ விய வா அனேகந்திகதாய அதச்சோ²தி தச்ச²னிய்யானபா⁴வோ, மக்³கோ³. தஸ்ஸ பா⁴வோ தச்ச²னிய்யானபா⁴வத்தங், தஸ்மா தச்ச²னிய்யானபா⁴வத்தா. ஸப்³ப³த்த² த்³விதா⁴பி நியமேன தச்சா²விபரீதபூ⁴தபா⁴வோ வுத்தோதி ஆஹ ‘‘இதி தச்சா²விபல்லாஸா’’திஆதி³.
ஸச்ச-ஸத்³த³ஸ்ஸ அத்து²த்³தா⁴ரோ. விரதிஸச்சேதி முஸாவாத³விரதியங். ந ஹி அஞ்ஞவிரதீஸு ஸச்ச-ஸத்³தோ³ நிருள்ஹோதி. ‘‘இத³மேவ ஸச்சங், மோக⁴மஞ்ஞ’’ந்தி க³ஹிதா தி³ட்டி² தி³ட்டி²ஸச்சங். ‘‘அமோஸத⁴ம்மங் நிப்³பா³னங் பரமத்த²ஸச்சங் வுத்தங். தஸ்ஸ பன தங்ஸம்பாபகஸ்ஸ ச மக்³க³ஸ்ஸ பஜானநா படிவேதோ⁴ அவிவாத³காரணந்தி த்³வயம்பி ‘‘ஏகஞ்ஹி ஸச்சங் ந து³தியமத்தி², யஸ்மிங் பஜா நோ விவதே³ பஜான’’ந்தி (ஸு॰ நி॰ 890; மஹானி॰ 119) மிஸ்ஸா கா³தா²ய ஸச்சந்தி வுத்தங்.
நேதங் து³க்க²ங் அரியஸச்சந்தி ஆக³ச்செ²ய்ய, நேதங் டா²னங் விஜ்ஜதீதி ஏதேன ஜாதிஆதீ³னங் து³க்க²அரியஸச்சபா⁴வே அவிபரீததங் த³ஸ்ஸேதி, அஞ்ஞங் து³க்க²ங் அரியஸச்சந்தி ஆக³ச்செ²ய்ய, நேதங் டா²னங் விஜ்ஜதீதி இமினா து³க்க²அரியஸச்சபா⁴வஸ்ஸ ஜாதிஆதீ³ஸு நியததங். ஸசேபி கத²ஞ்சி கோசி ஏவங்சித்தோ ஆக³ச்செ²ய்ய, பஞ்ஞாபனே பன ஸஹத⁴ம்மேன பஞ்ஞாபனே அத்தனோ வாத³ஸ்ஸ ச பஞ்ஞாபனே ஸமத்தோ² நத்தீ²தி த³ஸ்ஸேதுங் ‘‘அஹமேதங்…பே॰… பஞ்ஞாபெஸ்ஸாமீதி ஆக³ச்செ²ய்ய, நேதங் டா²னங் விஜ்ஜதீ’’தி வுத்தங். ஜாதிஆதீ³னங் அனஞ்ஞத²தா அஞ்ஞஸ்ஸ ச ததா²பூ⁴தஸ்ஸ அபா⁴வோயேவெத்த² டா²னாபா⁴வோ. ஸசேபி கோசி ஆக³ச்செ²ய்ய, ஆக³ச்ச²து, டா²னங் பன நத்தீ²தி அயமெத்த² ஸுத்தத்தோ². ஏஸ நயோ து³தியஸுத்தேபி. தத்த² பன ஸம்பத்ததா பச்சக்க²தா ச பட²மதா, தங்னிமித்ததா து³தியதா, தது³பஸமதா ததியதா, தங்ஸம்பாபகதா சதுத்த²தாதி த³ட்ட²ப்³பா³.
நிப்³பு³திகாமேன பரிஜானநாதீ³ஹி அஞ்ஞங் கிஞ்சி கிச்சங் காதப்³ப³ங் நத்தி², த⁴ம்மஞாணகிச்சங் வா இதோ அஞ்ஞங் நத்தி², பரிஞ்ஞெய்யாதீ³னி ச ஏதப்பரமானேவாதி சத்தாரேவ வுத்தானி. தண்ஹாய ஆதீ³னவத³ஸ்ஸாவீனங் வஸேன ‘‘தண்ஹாவத்து²ஆதீ³னங் ஏதங்பரமதாயா’’தி வுத்தங். ததா² ஆலயே பஞ்சகாமகு³ணஸங்கா²தே, ஸகலவத்து²காமஸங்கா²தே, ப⁴வத்தயஸங்கா²தே வா து³க்கே² தோ³ஸத³ஸ்ஸாவீனங் வஸேன ‘‘ஆலயாதீ³னங் ஏதங்பரமதாயா’’தி வுத்தங்.
ஸஹேதுகேன து³க்கே²னாதி ஏதேன து³க்க²ஸ்ஸ அப்³பொ³ச்சி²ன்னதாத³ஸ்ஸனேன அதிஸங்வேக³வத்து²தங் த³ஸ்ஸேதி.
ந அனுபோ³தோ⁴, அனுஸ்ஸவாகாரபரிவிதக்கதி³ட்டி²னிஜ்ஜா²னக்க²ந்திஅனுக³தோ வா போ³தோ⁴ அனுபோ³தோ⁴. ந ஹி ஸோ பச்சக்க²தோ பு³ஜ்ஜ²தி, அனுஸ்ஸவாதி³வஸேன பன கப்பெத்வா க³ண்ஹாதீதி. கிச்சதோதி பரிஜானநாதி³தோ. தங்கிச்சகரணேனேவ ஹி தானி தஸ்ஸ பாகடானி. விவட்டானுபஸ்ஸனாய ஹி ஸங்கா²ரேஹி பதிலீயமானமானஸஸ்ஸ உப்பஜ்ஜமானங் மக்³க³ஞாணங் விஸங்கா²ரங் து³க்க²னிஸ்ஸரணங் ஆரம்மணங் கத்வா ‘‘சத்தாரிபி ஸச்சானி பஸ்ஸதீ’’தி வுத்தங்.
து³க்க²ஸமுத³யம்பி ஸோ பஸ்ஸதீதி காலந்தரத³ஸ்ஸனங் ஸந்தா⁴ய வுத்தந்தி சே? ந, ‘‘யோ நு கோ², ஆவுஸோ, து³க்க²ங் பஸ்ஸதி, து³க்க²ஸமுத³யம்பி ஸோ பஸ்ஸதீ’’திஆதி³னா (ஸங்॰ நி॰ 5.1100) ஏகத³ஸ்ஸினோ அஞ்ஞத்தயத³ஸ்ஸிதாவிசாரணாய தஸ்ஸா ஸாத⁴னத்த²ங் க³வங்பதித்தே²ரேன இமஸ்ஸ ஸுத்தஸ்ஸ ஆஹரிதத்தா பச்சேகஞ்ச ஸச்சேஸு தி³ஸ்ஸமானேஸு அஞ்ஞத்தயத³ஸ்ஸனஸ்ஸ யோஜிதத்தா. அஞ்ஞதா² அனுபுப்³பா³பி⁴ஸமயே புரிமதி³ட்ட²ஸ்ஸ பச்சா² அத³ஸ்ஸனதோ ஸமுத³யாதி³த³ஸ்ஸினோ து³க்கா²தி³த³ஸ்ஸனதா ந யோஜேதப்³பா³ ஸியாதி. ஸுத்³த⁴ஸங்கா²ரபுஞ்ஜமத்தத³ஸ்ஸனதோ ஸக்காயதி³ட்டி²பரியுட்டா²னங் நிவாரேதி. ‘‘லோகஸமுத³யங் கோ², கச்சான, யதா²பூ⁴தங் ஸம்மப்பஞ்ஞாய பஸ்ஸதோ யா லோகே நத்தி²தா, ஸா ந ஹோதீ’’தி வசனதோ ஸமுத³யத³ஸ்ஸனங் ஹேதுப²லப்பப³ந்தா⁴விச்சே²த³த³ஸ்ஸனவஸேன உச்சே²த³தி³ட்டி²பரியுட்டா²னங் நிவத்தேதி. ‘‘லோகனிரோத⁴ங் கோ²…பே॰… பஸ்ஸதோ யா லோகே அத்தி²தா, ஸா ந ஹோதீ’’தி (ஸங்॰ நி॰ 2.15) வசனதோ நிரோத⁴த³ஸ்ஸனங் ஹேதுனிரோதா⁴ ப²லனிரோத⁴த³ஸ்ஸனவஸேன ஸஸ்ஸததி³ட்டி²பரியுட்டா²னங் நிவாரேதி. அத்தகாரஸ்ஸ பச்சக்க²த³ஸ்ஸனதோ மக்³க³த³ஸ்ஸனேன ‘‘நத்தி² அத்தகாரே, நத்தி² பரகாரே, நத்தி² புரிஸகாரே’’திஆதி³கங் (தீ³॰ நி॰ 1.168) அகிரியதி³ட்டி²பரியுட்டா²னங் பஜஹதி. ‘‘நத்தி² ஹேது, நத்தி² பச்சயோ ஸத்தானங் ஸங்கிலேஸாய, அஹேதூ அப்பச்சயா ஸத்தா ஸங்கிலிஸ்ஸந்தி. நத்தி² ஹேது…பே॰… விஸுத்³தி⁴யா, அஹேதூ அப்பச்சயா ஸத்தா விஸுஜ்ஜ²ந்தீ’’திஆதி³கா அஹேதுகதி³ட்டி² ச இத⁴ அகிரியதி³ட்டி²க்³க³ஹணேன க³ஹிதாதி த³ட்ட²ப்³பா³. ஸாபி ஹி விஸுத்³தி⁴மக்³க³த³ஸ்ஸனேன பஹீயதீதி.
து³க்க²ஞாணங் ப²லே விப்படிபத்திங் நிவத்தேதி. ‘‘இஸ்ஸரோ லோகங் பவத்தேதி நிவத்தேதி சா’’தி இஸ்ஸரகாரணினோ வத³ந்தி, பதா⁴னதோ ஆவி ப⁴வதி, தத்தே²வ ச பதிலீயதீதி பதா⁴னகாரணினோ. ‘‘காலவஸேனேவ பவத்ததி நிவத்ததி சா’’தி காலவாதி³னோ. ‘‘ஸபா⁴வேனேவ ஸம்போ⁴தி விபோ⁴தி சா’’தி ஸபா⁴வவாதி³னோ. ஆதி³-ஸத்³தே³ன அணூஹி லோகோ பவத்ததி, ஸப்³ப³ங் புப்³பே³கதஹேதூதி ஏவமாதி³ அகாரணபரிக்³க³ஹோ த³ட்ட²ப்³போ³. ராமுத³காளாராதீ³னங் விய அரூபலோகே, நிக³ண்டா²தீ³னங் விய லோகது²பிகாய அபவக்³கோ³ மொக்கோ²தி க³ஹணங் ஆதி³-ஸத்³தே³ன பதா⁴னஸ்ஸ அப்பவத்தி, கு³ணவியுத்தஸ்ஸ அத்தனோ ஸகத்தனி அவட்டா²னங், ப்³ரஹ்முனா ஸலோகதா, தி³ட்ட²த⁴ம்மனிப்³பா³னவாதா³தி ஏவமாதி³க்³க³ஹணஞ்ச த³ட்ட²ப்³ப³ங். எத்த² கு³ணவியுத்தஸ்ஸாதி பு³த்³தி⁴ஸுக²து³க்க²இச்சா²தோ³ஸபயத்தத⁴ம்மாத⁴ம்மஸங்கா²ரேஹி நவஹி அத்தகு³ணேஹி விப்பயுத்தஸ்ஸாதி கணாத³ப⁴க்க²வாதோ³. இந்த்³ரியதப்பனபுத்தமுக²த³ஸ்ஸனாதீ³ஹி வினா அபவக்³கோ³ நத்தீ²தி க³ஹெத்வா ததா²பவத்தனங் காமஸுக²ல்லிகானுயோகோ³.
அஜ்ஜ²த்திகபா³ஹிரேஸு த்³வாத³ஸஸு ஆயதனேஸு காமப⁴வவிப⁴வதண்ஹாவஸேன த்³வாத³ஸ திகா ச²த்திங்ஸ தண்ஹாவிசரிதானி. கு²த்³த³கவத்து²விப⁴ங்கே³ வா ஆக³தனயேன காலவிபா⁴க³ங் அனாமஸித்வா வுத்தானி. வீமங்ஸித்³தி⁴பாதா³த³யோ போ³தி⁴பக்கி²யா கிச்சனானத்தேன வுத்தா, அத்த²தோ ஏகத்தா ஸம்மாதி³ட்டி²முகே²ன தத்த² அந்தோக³தா⁴. தயோ நெக்க²ம்மவிதக்காத³யோதி லோகியக்க²ணே அலோப⁴மெத்தாகருணாஸம்பயோக³வஸேன பி⁴ன்னா மக்³க³க்க²ணே லோப⁴ப்³யாபாத³விஹிங்ஸாஸமுச்சே²த³வஸேன தயோதி ஏகோபி வுத்தோ. ஏஸ நயோ ஸம்மாவாசாதீ³ஸு. அப்பிச்ச²தாஸந்துட்டி²தானங் பன பா⁴வே ஸம்மாஆஜீவஸம்ப⁴வதோ தேன தேஸங் ஸங்க³ஹோ த³ட்ட²ப்³போ³. ப⁴வந்தரேபி ஜீவிதஹேதுபி அரியேஹி அவீதிக்கமனீயத்தா அரியகந்தானங் ஸம்மாவாசாதி³ஸீலானங் க³ஹணேன யேன ஸத்³தா⁴ஹத்தே²ன தானி பரிக்³க³ஹேதப்³பா³னி, ஸோ ஸத்³தா⁴ஹத்தோ² க³ஹிதோயேவ ஹோதீதி ததோ அனஞ்ஞானி ஸத்³தி⁴ந்த்³ரியஸத்³தா⁴ப³லானி தத்த² அந்தோக³தா⁴னி ஹொந்தி. தேஸங் அத்தி²தாயாதி ஸத்³தி⁴ந்த்³ரியஸத்³தா⁴ப³லச²ந்தி³த்³தி⁴பாதா³னங் அத்தி²தாய ஸீலஸ்ஸ அத்தி²பா⁴வதோ திவிதே⁴னபி ஸீலேன தே தயோபி க³ஹிதாதி தத்த² அந்தோக³தா⁴. சித்தஸமாதீ⁴தி சித்தித்³தி⁴பாத³ங் வத³தி. ‘‘சித்தங் பஞ்ஞஞ்ச பா⁴வய’’ந்தி (ஸங்॰ நி॰ 1.23, 192) ஹி சித்தமுகே²ன ஸமாதி⁴ ‘‘சித்தஸமாதீ⁴’’தி வுத்தங். ‘‘பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ சித்தங் ஸமாதி⁴யதீ’’தி (தீ³॰ நி॰ 3.359; ஸங்॰ நி॰ 5.376; அ॰ நி॰ 3.96; 11.12) வசனதோ ஸமாதி⁴உபகாரா பீதிபஸ்ஸத்³தி⁴யோ, தஸ்மா ஸமாதி⁴க்³க³ஹணேன க³ஹிதா, உபெக்கா² பன ஸமாதி⁴உபகாரகதோ தங்ஸதி³ஸகிச்சதோ ச, தஸ்மா ஸம்மாஸமாதி⁴வஸேன ஏதேஸங் அந்தோக³த⁴தா த³ட்ட²ப்³பா³.
பா⁴ரோ விய விகா⁴தகத்தா. து³ப்³பி⁴க்க²மிவ பா³த⁴கத்தா. ‘‘நிப்³பா³னபரமங் ஸுக²’’ந்தி (ம॰ நி॰ 2.215, 217; த⁴॰ ப॰ 203, 204) ஸுக²பா⁴வதோ ஸுபி⁴க்க²மிவ. அனிட்ட²பா⁴வதோ ஸாஸங்கஸப்படிப⁴யதோ ச து³க்க²ங் வேரீவிஸருக்க²ப⁴யஓரிமதீரூபமங்.
தத²த்தே²னாதி தத²ஸபா⁴வேன, பரிஞ்ஞெய்யபா⁴வேனாதி அத்தோ². ஏதேன அரியஸச்சத்³வயங் ஸியா து³க்க²ங், ந அரியஸச்சங், ஸியா அரியஸச்சங், ந து³க்க²ந்தி இமமத்த²ங் த³ஸ்ஸேதி. அரியஸச்ச-ஸத்³த³பரா ஹி து³க்கா²தி³ஸத்³தா³ பரிஞ்ஞெய்யாதி³பா⁴வங் வத³ந்தி. தேனேவ அரியஸச்ச-ஸத்³தா³னபெக்க²ங் து³க்க²-ஸத்³த³ங் ஸந்தா⁴ய மக்³க³ஸம்பயுத்தஸாமஞ்ஞப²லத⁴ம்மானங் ஆதி³பத³ஸங்க³ஹோ வுத்தோ, தத³பெக்க²ங் ஸந்தா⁴ய சதுத்த²பத³ஸங்க³ஹோ. ஸமுத³யாதீ³ஸு அவஸேஸகிலேஸாத³யோ ஸமுத³யோ, ந அரியஸச்சங், ஸங்கா²ரனிரோதோ⁴ நிரோத⁴ஸமாபத்தி ச நிரோதோ⁴, ந அரியஸச்சங், அரியமக்³க³தோ அஞ்ஞானி மக்³க³ங்கா³னி மக்³கோ³, ந அரியஸச்சந்தி இமினா நயேன யோஜனா காதப்³பா³. து³க்க²ங் வேத³னீயம்பி ஸந்தங் வேத³கரஹிதங், கேவலங் பன தஸ்மிங் அத்தனோ பச்சயேஹி பவத்தமானே து³க்க²ங் வேதே³தீதி வோஹாரமத்தங் ஹோதி. ஏவங் இதரேஸுபி.
கிரியாவ விஜ்ஜதீதி ஸமுத³யமேவ வத³தி, தஸ்ஸ வா து³க்க²பச்சயபா⁴வங். மக்³கோ³ அத்தீ²தி வத்தப்³பே³ ‘‘மக்³க³மத்தீ²’’தி ஓகாரஸ்ஸ அபா⁴வோ கதோதி த³ட்ட²ப்³போ³. க³மகோதி க³ந்தா. ஸாஸவதா அஸுப⁴தாதி கத்வா நிரோத⁴மக்³கா³ ஸுபா⁴ ஏவ. து³க்கா²தீ³னங் பரியாயேன ஸமுத³யாதி³பா⁴வோ ச அத்தி², ந பன நிரோத⁴பா⁴வோ, நிரோத⁴ஸ்ஸ வா து³க்கா²தி³பா⁴வோதி ந அஞ்ஞமஞ்ஞஸமங்கி³தாதி ஆஹ ‘‘நிரோத⁴ஸுஞ்ஞானி வா’’திஆதி³. ஸமுத³யே து³க்க²ஸ்ஸாபா⁴வதோதி போனொப்³ப⁴விகாய தண்ஹாய புனப்³ப⁴வஸ்ஸ அபா⁴வதோ. யதா² வா பகதிவாதீ³னங் விகாராவிபா⁴வதோ புப்³பே³ படிப்பலீனா ச பகதிபா⁴வேனேவ திட்ட²ந்தி, ந ஏவங் ‘‘ஸமுத³யே து³க்க²ஸ்ஸாபா⁴வதோ’’தி. யதா² அவிப⁴த்தேஹி விகாரேஹி மஹந்தா விஸேஸிந்த்³ரியபூ⁴தவிஸேஸேஹி பகதிபா⁴வேனேவ டி²தேஹி பகதி ஸக³ப்³பா⁴ பகதிவாதீ³னங், ஏவங் ந ப²லேன ஸக³ப்³போ⁴ ஹேதூதி அத்தோ². து³க்க²ஸமுத³யானங் நிரோத⁴மக்³கா³னஞ்ச அஸமவாயாதி ஏதங் விவரந்தோ ஆஹ ‘‘ந ஹேதுஸமவேதங் ஹேதுப²ல’’ந்திஆதி³. தத்த² இத⁴ தந்தூஸு படோ, கபாலேஸு க⁴டோ, பி³ரணேஸு கடோ, த்³வீஸு அணூஸு த்³விஅணுகந்திஆதி³னா இத⁴ பு³த்³தி⁴வோஹாரஜனகோ அவிஸுங் ஸித்³தா⁴னங் ஸம்ப³ந்தோ⁴ ஸமவாயோ, தேன ஸமவாயேன காரணேஸு த்³வீஸு அணூஸு த்³விஅணுகங் ப²லங் ஸமவேதங் ஏகீபூ⁴தமிவ ஸம்ப³ந்த⁴ங், தீஸு அணூஸு திஅணுகந்தி ஏவங் மஹாபத²விமஹாஉத³கமஹாஅக்³கி³மஹாவாதக்க²ந்த⁴பரியந்தங் ப²லங் அத்தனோ காரணேஸு ஸமவேதந்தி ஸமவாயவாதி³னோ வத³ந்தி. ஏவங் பன வத³ந்தேஹி அபரிமாணேஸு காரணேஸு மஹாபரிமாணங்
பவத்திபா⁴வதோதி ஸங்ஸாரஸ்ஸ பவத்திபா⁴வதோ. சதுஆஹாரபே⁴த³தோதி இமினா சத்தாரோ ஆஹாரபே⁴தே³ தேஹி பி⁴ன்னே தப்பச்சயத⁴ம்மபே⁴தே³ ச ஸங்க³ண்ஹாதி. ரூபாபி⁴னந்த³னாதி³பே⁴தோ³ ரூபாதி³க²ந்த⁴வஸேன, ஆரம்மணவஸேன வா. உபாதா³னேஹி உபாதீ³யதீதி உபாதி³, உபாதா³னக்க²ந்த⁴பஞ்சகங். நிப்³பா³னஞ்ச தங்னிஸ்ஸரணபூ⁴தங் தஸ்ஸ வூபஸமோ தங்ஸந்தீதி கத்வா தஸ்ஸ யாவ பச்சி²மங் சித்தங், தாவ ஸேஸதங், ததோ பரஞ்ச அனவஸேஸதங் உபாதா³ய ‘‘ஸஉபாதி³ஸேஸனிப்³பா³னதா⁴து அனுபாதி³ஸேஸனிப்³பா³னதா⁴தூ’’தி த்³விதா⁴ வோஹரீயதீதி. ‘‘ஸம்மாதி³ட்டி² ஸம்மாஸங்கப்போ விபஸ்ஸனா, இதரே ஸமதோ²’’தி வத³ந்தி. ஸீலம்பி ஹி ஸமத²ஸ்ஸ உபகாரகத்தா ஸமத²க்³க³ஹணேன க³ய்ஹதீதி தேஸங் அதி⁴ப்பாயோ. அத² வா யானத்³வயவஸேன லத்³தோ⁴ மக்³கோ³ ஸமதோ² விபஸ்ஸனாதி ஆக³மனவஸேன வுத்தோதி த³ட்ட²ப்³போ³. ஸப்பதே³ஸத்தாதி ஸீலக்க²ந்தா⁴தீ³னங் ஏகதே³ஸத்தாதி அத்தோ². ஸீலக்க²ந்தா⁴த³யோ ஹி ஸப்³ப³லோகியலோகுத்தரஸீலாதி³ஸங்கா³ஹகா, அரியமக்³கோ³ லோகுத்தரோயேவாதி ததே³கதே³ஸோ ஹோதி.
ஓனதஸஹாயோ விய வாயாமோ பக்³க³ஹகிச்சஸாமஞ்ஞதோ. அங்ஸகூடங் த³த்வா டி²தஸஹாயோ விய ஸதி அபிலாபனவஸேன நிச்சலபா⁴வகரணஸாமஞ்ஞதோ. ஸஜாதிதோதி ஸவிதக்கஸவிசாராதி³பே⁴தே³ஸு ஸமானாய ஸமாதி⁴ஜாதியாதி கிரியதோதி ஸமாதி⁴அனுரூபகிரியதோ. ததோ ஏவ ஹி ‘‘சத்தாரோ ஸதிபட்டா²னா ஸமாதி⁴னிமித்தா, சத்தாரோ ஸம்மப்பதா⁴னா ஸமாதி⁴பரிக்கா²ரா’’தி (ம॰ நி॰ 1.462) ஸதிவாயாமானங் ஸமாதி⁴ஸ்ஸ நிமித்தபரிக்கா²ரபா⁴வோ வுத்தோதி.
ஆகோடெந்தேன வியாதி ‘‘அனிச்சங் அனிச்ச’’ந்திஆதி³னா பஞ்ஞாஸதி³ஸேன கிச்சேன ஸமந்ததோ ஆகோடெந்தேன விய ‘‘அனிச்சங் க²யட்டே²ன, து³க்க²ங் ப⁴யட்டே²னா’’திஆதி³னா பரிவத்தந்தேன விய ச ஆதா³ய ஊஹித்வா தி³ன்னமேவ பஞ்ஞா படிவிஜ்ஜ²தி. த்³வின்னங் ஸமானகாலத்தேபி பச்சயபா⁴வேன ஸங்கப்பஸ்ஸ புரிமகாலஸ்ஸ விய நித்³தே³ஸோ கதோ. ஸஜாதிதோதி ‘‘து³க்கே² ஞாண’’ந்திஆதீ³ஸு ஸமானாய பஞ்ஞாஜாதியா. கிரியதோதி எத்த² பஞ்ஞாஸதி³ஸகிச்சங் கிரியாதி வுத்தங், புப்³பே³ பன ஸமாதி⁴உபகாரகங் தத³னுரூபங் கிச்சந்தி அயமெத்த² விஸேஸோ. ‘‘ஸப்³ப³ங், பி⁴க்க²வே, அபி⁴ஞ்ஞெய்ய’’ந்தி (ஸங்॰ நி॰ 4.46) வசனதோ அபி⁴ஞ்ஞெய்யானி.
து³ரபி⁴ஸம்ப⁴வதரந்தி அபி⁴ஸம்ப⁴விதுங் ஸாதே⁴துங் அஸக்குணெய்யதரங், ஸத்திவிகா⁴தேன து³ரதி⁴க³மந்தி அத்தோ². பா³த⁴கபப⁴வஸந்தினிய்யானலக்க²ணேஹி வவத்தா²னங் ஸலக்க²ணவவத்தா²னங். து³ரவகா³ஹத்தே²ன க³ம்பீ⁴ரத்தாதி ஓளாரிகா து³க்க²ஸமுத³யா. திரச்சா²னக³தானம்பி ஹி து³க்க²ங் ஆஹாராதீ³ஸு ச அபி⁴லாஸோ பாகடோ, பீளனாதி³ஆயூஹனாதி³வஸேன பன ‘‘இத³ங் து³க்க²ங், இத³மஸ்ஸ காரண’’ந்தி யாதா²வதோ ஓகா³ஹிதுங் அஸக்குணெய்யத்தா க³ம்பீ⁴ரா, ஸண்ஹஸுகு²மத⁴ம்மத்தா நிரோத⁴மக்³கா³ ஸபா⁴வதோ ஏவ க³ம்பீ⁴ரத்தா து³ரவகா³ஹா, தேனேவ உப்பன்னே மக்³கே³ நத்தி² நிரோத⁴மக்³கா³னங் யாதா²வதோ அனவகா³ஹோதி. நிப்³பா³னம்பி மக்³கே³ன அதி⁴க³ந்தப்³ப³த்தா தஸ்ஸ ப²லந்தி அபதி³ஸ்ஸதீதி ஆஹ ‘‘ப²லாபதே³ஸதோ’’தி. வுத்தஞ்ஹி ‘‘து³க்க²னிரோதே⁴ ஞாணங் அத்த²படிஸம்பி⁴தா³’’தி (விப⁴॰ 719). மக்³கோ³பி நிரோத⁴ஸ்ஸ ஸம்பாபகபா⁴வதோ ஹேதூதி அபதி³ஸ்ஸதீதி ஆஹ ‘‘ஹேதுஅபதே³ஸதோ’’தி. வுத்தம்பி சேதங் ‘‘து³க்க²னிரோத⁴கா³மினியா படிபதா³ய ஞாணங் த⁴ம்மபடிஸம்பி⁴தா³’’தி (விப⁴॰ 719). இதி விஜஞ்ஞாதி இதி-ஸத்³தே³ன விஜானநக்கமங் த³ஸ்ஸேதி. ஏவங் பகாரேஹீதி ஏவங்-ஸத்³தே³ன விஜானநகாரணபூ⁴தே நயே.
உத்³தே³ஸவண்ணனா நிட்டி²தா.
1. து³க்க²ஸச்சனித்³தே³ஸோ
ஜாதினித்³தே³ஸவண்ணனா
190. தத்த² …பே॰… அயங் மாதிகாதி நித்³தே³ஸவாரஆதி³ம்ஹி வுத்தே ஜாதிஆதி³னித்³தே³ஸே தேஸங் ஜாதிஆதீ³னங் நித்³தே³ஸவஸேன து³க்க²ஸ்ஸ அரியஸச்சஸ்ஸ கத²னத்தா²ய, தேஸு வா ஜாதிஆதீ³ஸு தேஸஞ்ச து³க்க²ட்டே² வேதி³தப்³பே³ ஜாதிஆதீ³னங் நித்³தே³ஸவஸேன து³க்க²ஸ்ஸ அரியஸச்சஸ்ஸ கத²னத்தா²ய து³க்க²து³க்க²ந்திஆதி³கா து³க்க²மாதிகா வேதி³தப்³பா³தி அத்தோ². அத² வா தத்தா²தி தஸ்மிங் நித்³தே³ஸவாரே. ‘‘ஜாதிபி து³க்கா²…பே॰… ஸங்கி²த்தேன பஞ்சுபாதா³னக்க²ந்தா⁴ து³க்கா²’’தி அயங் து³க்க²ஸ்ஸ அரியஸச்சஸ்ஸ கத²னத்தா²ய மாதிகாதி யதா²த³ஸ்ஸிதஸ்ஸ ஜாதிஆதி³னித்³தே³ஸஸ்ஸ மாதிகாபா⁴வங் ‘‘இத³ஞ்ஹி து³க்க²ங் நாமா’’திஆதி³.
ஸபா⁴வதோதி து³க்க²வேத³யிதஸபா⁴வதோ. நாமதோதி தேனேவ ஸபா⁴வேன லத்³த⁴னாமதோ. தேன ந அஞ்ஞேன பரியாயேன இத³ங் து³க்க²ங் நாம, அத² கோ² து³க்க²த்தாயேவாதி ஸபா⁴வேன நாமங் விஸேஸேதி. அத² வா நாமதோதி உத³யப்³ப³யவந்ததாய லத்³த⁴னாமதோ. யதா² அஞ்ஞே உத³யப்³ப³யவந்தோ த⁴ம்மா ந ஸபா⁴வதோ து³க்கா², ந ஏவங் இத³ங், அத² கோ² ஸபா⁴வதோ து³க்கா², பூ⁴தமேவேத³ங் து³க்க²ந்தி புரிமேன து³க்க²-ஸத்³தே³ன பச்சி²மங் விஸேஸேதி. விபரிணாமவந்ததாய ஸுக²ங் அனிட்ட²மேவ ஹோதீதி து³க்க²ங் நாம ஜாதங். தேனேவாஹ ‘‘து³க்கு²ப்பத்திஹேதுதோ’’தி. கண்ணஸூலாதீ³ஹி அபி⁴பூ⁴தஸ்ஸ நித்து²னநாதீ³ஹி து³க்கா²பி⁴பூ⁴ததாய விஞ்ஞாயமானாயபி கிங் தவ ருஜ்ஜதீதி புச்சி²த்வாவ கண்ணஸூலாதி³து³க்க²ங் ஜானிதப்³ப³ங் ஹோதீதி படிச்ச²ன்னது³க்க²தா தஸ்ஸ வுத்தா. உபக்கமஸ்ஸ ச பாகடபா⁴வதோதி காரணாவஸேன து³க்க²விஸேஸஸ்ஸ பாகடபா⁴வங் த³ஸ்ஸேதி.
ஸபா⁴வங் முஞ்சித்வா பகாரந்தரேன து³க்க²ந்தி வுச்சமானங் பரியாயது³க்க²ங். கதே²தப்³ப³த்தா படிஞ்ஞாதங் யதா² கதே²தப்³ப³ங், தங்பகாரத³ஸ்ஸனத்த²ங் ‘‘அரியஸச்சஞ்ச நாமேத’’ந்திஆதி³மாஹ. ஸங்கே²போ ஸாமஞ்ஞங், ஸாமஞ்ஞஞ்ச விஸேஸே அந்தோகரித்வா பவத்ததீதி தத்த² உப⁴யதா²பி கதே²துங் வட்டதி. வித்தா²ரோ பன விஸேஸோ ஜாதிஆதி³கோ, விஸேஸோ ச விஸேஸந்தரனிவத்தகோதி ஜாதிஆதீ³ஸு ஜராதீ³னங் ஸங்கி²பனங் ந ஸக்கா காதுந்தி தத்த² வித்தா²ரேனேவ கதே²தப்³ப³ங்.
191. ‘‘அபரஸ்ஸ அபரத்த²தீ³பனங். ஸாமிஅத்தே²பி ஹி அபரத்த²-ஸத்³தோ³ ஸிஜ்ஜ²தீதி. தேஸங் தேஸந்தி வா ஸாமிவஸேன வுத்தங் அத்த²ங் பு⁴ம்மவஸேன வத்துகாமதாய ஆஹ ‘‘அபரத்த²தீ³பன’’ந்தி, அபரஸ்மிங் அபரஸ்மிங் தீ³பனந்தி அத்தோ². அபரஸ்ஸ அபரஸ்ஸ வா ஜாதிஸங்கா²தஸ்ஸ அத்த²ஸ்ஸ தீ³பனங் அபரத்த²தீ³பனங். பஞ்சக³திவஸேன ஏகேகாயபி க³தியா க²த்தியாதி³பு⁴ம்மதே³வாதி³ஹத்தி²ஆதி³ஜாதிவஸேன சாதி க³திஜாதிவஸேன.
திணாகாரோ திணஜாதி, ஸோ ச உபாதா³பஞ்ஞத்தீதி ‘‘பஞ்ஞத்திய’’ந்தி ஆஹ. தது³பாதா³யாதி தங் பட²மங் விஞ்ஞாணங் உபாதா³ய அயங் ஜாதி, நாஸ்ஸ குதோசி நிக்³க³மனங் உபாதா³ய. யஸ்மா ச ஏவங், தஸ்மா ஸாவஸ்ஸ ஜாதி பட²மவிஞ்ஞாணஸங்கா²தாதி அத்தோ². அத² வா தது³பாதா³ய ஸஜாதோதி வுச்சதீதி ஸாவஸ்ஸ ஜாதி பட²மவிஞ்ஞாணஸங்கா²தாதி அத்தோ². விஞ்ஞாணமுகே²ன ச பஞ்சபி க²ந்தா⁴ வுத்தா ஹொந்தீதி ‘‘படிஸந்தி⁴ய’’ந்தி ஆஹ. அரியபா⁴வகரணத்தா அரியஸீலந்தி பாதிமொக்க²ஸங்வரோ வுச்சதி. ஜாதிஆதீ³னிபி லக்க²ணானி த⁴ம்மானங் ஆகாரவிகாராதி கத்வா ஸஹுப்பாத³கா ஸஹவிகாரகாதி வுத்தா. ஜாயனட்டே²னாதிஆதி³ ஆயதனவஸேன யோனிவஸேன ச த்³வீஹி த்³வீஹி பதே³ஹி ஸப்³ப³ஸத்தே பரியாதி³யித்வா ஜாதிங் த³ஸ்ஸேதுங் வுத்தங். புரிமனயே பன ஏகேகேனேவ பதே³ன ஸப்³ப³ஸத்தே பரியாதி³யித்வா ஜாதி த³ஸ்ஸிதாதி அயங் விஸேஸோ. கேசி பன ‘‘புரிமனயே கத்துனித்³தே³ஸோ, பச்சி²மனயே பா⁴வனித்³தே³ஸோ கதோ’’தி வத³ந்தி, ‘‘தேஸங் தேஸங் ஸத்தானங் ஜாதீ’’தி பன கத்தரி ஸாமினித்³தே³ஸஸ்ஸ கதத்தா உப⁴யத்தா²பி பா⁴வனித்³தே³ஸோவ யுத்தோ. ஸம்புண்ணா ஜாதி ஸஞ்ஜாதி. பாகடா நிப்³ப³த்தி அபி⁴னிப்³ப³த்தி. ‘‘தேஸங் தேஸங் ஸத்தானங்…பே॰… அபி⁴னிப்³ப³த்தீ’’தி ஸத்தவஸேன பவத்தத்தா ஸம்முதிகதா².
தத்ர தத்ராதி ஏகசதுவோகாரப⁴வேஸு த்³வின்னங் த்³வின்னங், ஸேஸே ரூபதா⁴துயங் படிஸந்தி⁴க்க²ணே உப்பஜ்ஜமானானங் பஞ்சன்னங், காமதா⁴துயங் விகலாவிகலிந்த்³ரியானங் வஸேன ஸத்தன்னங் நவன்னங் த³ஸன்னங் புன த³ஸன்னங் ஏகாத³ஸன்னஞ்ச ஆயதனானங் வஸேன ஸங்க³ஹோ வேதி³தப்³போ³. ஏகப⁴வபரியாபன்னஸ்ஸ க²ந்த⁴ஸந்தானஸ்ஸ பட²மாபி⁴னிப்³ப³த்திபூ⁴தா படிஸந்தி⁴க்க²ந்தா⁴தி ஆஹ ‘‘பட²மாபி⁴னிப்³ப³த்திலக்க²ணா’’தி. தமேவ ஸந்தானங் நிய்யாதெந்தங் விய ‘‘ஹந்த³ க³ண்ஹதா²’’தி படிச்சா²பெந்தங் விய பவத்ததீதி நிய்யாதனரஸா. ஸந்ததியா ஏவ உம்முஜ்ஜனங் ஹுத்வா க³ய்ஹதீதி உம்முஜ்ஜனபச்சுபட்டா²னா. து³க்க²ராஸிஸ்ஸ விசித்ததா து³க்க²விசித்ததா, து³க்க²விஸேஸா வா தத³வயவா, தங் பச்சுபட்டா²பேதி ப²லதீதி து³க்க²விசித்ததாபச்சுபட்டா²னா.
பரியாயனிப்பரியாயது³க்கே²ஸு
‘‘தங் கிங் மஞ்ஞத², பி⁴க்க²வே, கதமோ நு கோ² மஹந்ததரோ? யோ சாயங் மயா பரித்தோ பாணிமத்தோ பாஸாணோ க³ஹிதோ, யோ ச ஹிமவா பப்³ப³தராஜாதி. அப்பம…பே॰… க³ஹிதோ, ஹிமவந்தங் பப்³ப³தராஜானங் உபனிதா⁴ய ஸங்க²ம்பி ந உபேதி, கலபா⁴க³ம்பி ந உபேதி, உபனித⁴ம்பி ந உபேதி. ஏவமேவ கோ², பி⁴க்க²வே, யங் ஸோ புரிஸோ தீஹி ஸத்திஸதேஹி ஹஞ்ஞமானோ
உபமாவஸேன பகாஸிதங் ஆபாயிகது³க்க²ங். ஸுகு²ப்பத்திகாரணானி ஸுசீனி உப்பலாதீ³னீதி கத்வா தத்த² நிப்³ப³த்தினிவாரணேன ஜாதியா து³க்க²வத்து²பா⁴வங் த³ஸ்ஸேதி ‘‘அத² கோ²’’திஆதி³னா. து³க்கு²ப்பத்திகாரணே நிப்³ப³த்தனேன க³ப்³ப⁴பரிஹரணூபக்கமேன வினா மாதுகுச்சி²ஸம்ப⁴வமேவ து³க்க²ங் க³ப்³போ⁴க்கந்திமூலகங் அஞ்ஞானபெக்க²த்தா, உபக்கமனிப்³ப³த்தங் பன பரிஹரணமூலகங் ஓக்கந்திமத்தானபெக்க²த்தா. அயமேதேஸங் விஸேஸோ.
அத்தனோ அபி⁴முக²ங் கட்³ட⁴னங் ஆகட்³ட⁴னங், பரிதோ ஸப்³ப³தோபா⁴கே³ன கட்³ட⁴னங் பரிகட்³ட⁴னங். அதோ⁴ து⁴னநங் ஓது⁴னநங், திரியங், ஸப்³ப³தோ வா து⁴னநங் நிது⁴னநங். தச்செ²த்வா கா²ரபக்கி²பனங் கா²ராபடிச்ச²கங்.
ஸகலஸரீரன்ஹாபனங் ந்ஹாபனங், ஏகதே³ஸதோ⁴வனங் தோ⁴வனங், ஸூரியாபி⁴முக²பவத்தனேன ஆதாபனங், பஞ்சக்³கி³தாபேன பரிதாபனங் த³ட்ட²ப்³ப³ங். ஸப்³போ³யேவ வா தாபோ த்³விதா⁴பி வுத்தோ.
குஹிங் நு பதிட்ட²ங் லபே⁴த², ஜாதியா வினா ந தஸ்ஸ து³க்க²ஸ்ஸ பதிட்டா²னங் அத்தீ²தி அத்தோ², ஜாதியா வா வினா ஸோ ஸத்தோ குஹிங் நு பதிட்ட²ங், கத்த² நு பதிட்ட²ந்தோ தங் து³க்க²ங் லபே⁴தா²தி அத்தோ². தத்த² திரச்சா²னேஸு கத²ங் து³க்க²ங் ப⁴வெய்ய தஹிங் திரச்சா²னேஸு ஜாதிங் வினா. ந சஸ்ஸாதி ந சே அஸ்ஸ. நனு நேவத்தீ²தி ஸம்ப³ந்தோ⁴ காதப்³போ³, நனு ஆஹாதி வா. யத³தோதி யஸ்மா நேவத்தி², தஸ்மா ஆஹாதி அத்தோ².
ஜரானித்³தே³ஸவண்ணனா
192. ஜீரணமேவ ஜீரணதா, ஜீரணஸ்ஸ வா ஆகாரோ தா-ஸத்³தே³ன வுத்தோ.
யதா²புரே அஸல்லக்கெ²ந்தேதி கா³ரவகரணஉபட்டா²னாதீ³னி அஸல்லக்கெ²ந்தே தங்னிமித்தங் தோ³மனஸ்ஸங் உப்பஜ்ஜதீதி அத்தோ².
ஸதாதீ³னந்தி ‘‘பி⁴ய்யோ பா³லத்தப்பத்தியா’’தி.
மரணனித்³தே³ஸவண்ணனா
193. ‘‘காலஸ்ஸ அந்தகஸ்ஸ கிரியா’’தி யா லோகே வுச்சதி, ஸா சுதி, மரணந்தி அத்தோ². சவனகாலோயேவ வா அனதிக்கமனீயத்தா விஸேஸேன காலோதி வுத்தோ, தஸ்ஸ கிரியா சுதிக்க²ந்தா⁴னங் பே⁴த³ப்பத்தியேவ. மச்சு மரணந்தி எத்தா²பி ஸமாஸங் அகத்வா யோ மச்சு வுச்சதி பே⁴தோ³, யஞ்ச மரணங் பாணசாகோ³, இத³ங் வுச்சதி மரணந்தி விஸுங் ஸம்ப³ந்தோ⁴ ந ந யுஜ்ஜதி.
யஸ்ஸ க²ந்த⁴பே⁴த³ஸ்ஸ பவத்தத்தா ‘‘திஸ்ஸோ மதோ, பு²ஸ்ஸோ மதோ’’தி வோஹாரோ ஹோதி, ஸோ க²ந்த⁴ப்பப³ந்த⁴ஸ்ஸ அனுபச்சி²ன்னதாய ‘‘ஸம்முதிமரண’’ந்தி வுத்தோ, பப³ந்த⁴ஸமுச்சே²தோ³ ச ‘‘ஸமுச்சே²த³மரண’’ந்தி. மரணம்பி து³க்க²ந்தி இமஸ்மிங் பனத்தே² து³க்க²ஸச்சகதா² வட்டகதா²தி கத்வா ‘‘ஸம்முதிமரணங் அதி⁴ப்பேத’’ந்தி ஆஹ. தஸ்ஸேவ நாமந்தி தப்³பா⁴வதோ ததே³கதே³ஸபா⁴வதோ ச மரண-ஸத்³த³ப³ஹுத்தே அஸம்மோஹத்த²ங் வுத்தங். சுதிலக்க²ணந்தி ‘‘சவனதா’’தி நித³ஸ்ஸிதசவனலக்க²ணமேவ வத³தி. ஸம்பத்திப⁴வக²ந்தே⁴ஹி வியோஜேதீதி வியோக³ரஸங், வியோக³கிரியாபூ⁴ததாய வா ‘‘வியோக³ரஸ’’ந்தி வுத்தங். ஸத்தஸ்ஸ புரிமப⁴வதோ விப்பவாஸோ ஹுத்வா உபட்டா²தீதி விப்பவாஸபச்சுபட்டா²னங்.
மரணந்திகாதி மரணஸ்ஸ ஆஸன்னா. யதி³ மரணங் ந ப⁴விஸ்ஸதி, யதா²வுத்தங் காயிகங் சேதஸிகஞ்ச து³க்க²ங் ந ப⁴விஸ்ஸதீதி ஆஹ ‘‘த்³வின்னம்பி து³க்கா²னங் வத்து²பா⁴வேனா’’தி.
பாபகம்மாதி³னிமித்தந்தி ப⁴த்³த³ஸ்ஸாதி கல்யாணகம்மஸ்ஸாதி அத்தோ². அவிஸேஸதோதி ‘‘ஸப்³பே³ஸ’’ந்தி ஏதேன யோஜேதப்³ப³ங். ஸப்³பே³ஸந்தி ச யேஸங் காயிகங் து³க்க²ங் உப்பஜ்ஜதி, தேயேவ ஸப்³பே³ க³ஹிதா ‘‘விதுஜ்ஜமானமம்மான’’ந்தி விஸேஸிதத்தா. ஸந்தீ⁴னங் ப³ந்த⁴னானி ஸந்தி⁴ப³ந்த⁴னானி ‘‘ஸந்தி⁴ப³ந்த⁴னச்சே²த³ன’’ந்தி வுத்தங். ஆதி³-ஸத்³தோ³ வா காரணத்தோ², ஸந்தி⁴ப³ந்த⁴னச்சே²த³னமூலகந்தி அத்தோ².
அனயப்³யஸனாபாத³னங் வியாதி அனயப்³யஸனாபத்தி வியாதி அத்தோ². வாளாதீ³ஹி கதே ஹி அனயப்³யஸனாபாத³னே அந்தோக³தா⁴ அனயப்³யஸனாபத்தி எத்த² நித³ஸ்ஸனந்தி.
ஸோகனித்³தே³ஸவண்ணனா
194. ஸுக²காரணங் ஹிதங், தஸ்ஸ ப²லங் ஸுக²ங். ஞாதிக்க²யோதி போ⁴கா³தீ³ஹி ஞாதீனங் பரிஹானி மரணஞ்ச. அயங் பன விஸேஸோதி போ⁴க³ப்³யஸனாதி³பத³த்த²விஸேஸங் ரோக³ப்³யஸனாதீ³ஸு ஸமாஸவிஸேஸஞ்ச ஸந்தா⁴யாஹ. ஞாதிபோ⁴கா³ பஞ்ஞத்திமத்தா தப்³பி³னாஸாவாதி இமினா அதி⁴ப்பாயேன அபரினிப்ப²ன்னதங் ஸந்தா⁴ய ‘‘அனிப்ப²ன்னானீ’’தி ஆஹ. அபரினிப்ப²ன்னதங்யேவ ஹி ஸந்தா⁴ய விஸுத்³தி⁴மக்³கே³ (விஸுத்³தி⁴॰ 2.447 ஆத³யோ) ச ‘‘த³ஸ ரூபானி அனிப்ப²ன்னானீ’’தி வுத்தங். ரூபகண்ட³வண்ணனாயஞ்ஹி (த⁴॰ ஸ॰ அட்ட²॰ 975 பகிண்ணககதா²) நி ‘‘அபரினிப்ப²ன்னானீ’’தி வுத்தானி. க²ந்த⁴விப⁴ங்கே³ ச நிப்பா²தே³தப்³ப³ஸ்ஸ நிரோத⁴ஸமாபத்திஆதி³கஸ்ஸ நிப்ப²ன்னதா வுத்தாதி அஸபா⁴வத⁴ம்மஸ்ஸ ச நிப்ப²ன்னதா, நிப்³பா³னஸ்ஸேவ அனிப்ப²ன்னதாதி.
த⁴ம்ம-ஸத்³தோ³ ஹேதுஅத்தோ²தி ஆஹ ‘‘து³க்க²ஸ்ஸ உப்பத்திஹேதுனா’’தி. ஜா²மந்தி த³ட்³ட⁴ங். புப்³பே³ வுத்தலக்க²ணாதி³கா தோ³மனஸ்ஸவேத³னா ஸோகோதி தஸ்ஸ புன லக்க²ணாத³யோ ந வத்தப்³பா³ ஸியுங், ததா²பி தோ³மனஸ்ஸவிஸேஸத்தா ஸோகஸ்ஸ ச விஸிட்டா² லக்க²ணாத³யோ வத்தப்³பா³தி ‘‘கிஞ்சாபீ’’திஆதி³மாஹ. விஸாரரஹிதங் அந்தோ ஏவ ஸங்குசிதங் சிந்தனங், ஸுக்க²னங் வா அந்தோனிஜ்ஜா²னங். பரினிஜ்ஜா²யனங் த³ஹனங். ஞாதிப்³யஸனாதி³அனுரூபங் ஸோசனங் அனுஸோசனங், தங் தங் வா கு³ணங் தோ³ஸஞ்ச அனுக³ந்த்வா ஸோசனங் தப்பனங் அனுஸோசனங்.
ஜவனக்க²ணேதி ‘‘எத்தகா மே’’திஆதி³மாஹ. காயவிஞ்ஞாணாதி³வீதி²யம்பி பன ஜவனக்க²ணே தோ³மனஸ்ஸஸ்ஸ பச்சயோ ஹோதி ஏவ. தேனேவ ‘‘ஜவனக்க²ணே சா’’தி ஆஹ. அஞ்ஞதா² காயிகசேதஸிகது³க்கா²னங் காயவத்து²கமனொத்³வாரப்பவத்தானமேவ பச்சயோதி க³ண்ஹெய்ய தத்த² விஸேஸேன காயிகசேதஸிகஸத்³த³ப்பவத்திதோ.
துஜ்ஜதீதி
பரிதே³வனித்³தே³ஸவண்ணனா
195. ஆதே³வந்தி ஏதேனாதி ஆதே³வோதி ஆதே³வன-ஸத்³த³ங் கத்வா அஸ்ஸுவிமோசனாதி³விகாரங் ஆபஜ்ஜந்தானங் தப்³பி³காராபத்தியா ஸோ ஸத்³தோ³ கரணபா⁴வேன வுத்தோதி. வீஹிபலாபாத³யோ விய துச்ச²ங் வசனங் பலாபோ. கு³ணதோ³ஸே கித்தேதி போ³தே⁴தீதி கு³ணதோ³ஸகித்தனரஸோ லாலப்ப-ஸத்³தோ³. அத்தா²னத்தே² ஹிரியிதப்³ப³ஜனே ச அவிசாரெத்வா புக்³க³லஸ்ஸ ஸம்ப⁴மபா⁴வோ ஹுத்வா பரிதே³வன-ஸத்³தோ³ உபட்டா²தீதி ‘‘ஸம்ப⁴மபச்சுபட்டா²னோ’’தி வுத்தோ, ஸோகவத்து²அவிகா⁴தேன வா ஸம்ப⁴மோ, ந உத்தாஸஸம்ப⁴மோ, ஸோ ச பரிதே³வன-ஸத்³தே³ன பாகடோ ஹோதீதி பரிதே³வோ ‘‘ஸம்ப⁴மபச்சுபட்டா²னோ’’தி வுத்தோ.
ஸோகாபி⁴பூ⁴தோ பரிதே³வனநிமித்தங் முட்டி²போத²னாதீ³னி கரோதி, பரிதே³வனநிமித்தமேவ ச ஞாதிஅப்³ப⁴த்த²ங்க³மனாதீ³னி சிந்தேதீதி பரிதே³வஸ்ஸ து³க்க²தோ³மனஸ்ஸானங் வத்து²பா⁴வோ வுத்தோ.
பி⁴ய்யோதி யேன வினா ந ஹோதி, ததோ பரிதே³வஸமுட்டா²பகதோ³மனஸ்ஸதோ, புப்³பே³ வுத்தது³க்க²தோ வா பி⁴ய்யோ, கண்டொ²ட்ட²தாலுஆதி³ஸோஸஜதோபி வா பி⁴ய்யோதி அஞ்ஞஞ்ச காயிகங் சேதஸிகங் தங்னிதா³னது³க்க²ங் ஸங்க³ண்ஹாதி.
து³க்க²தோ³மனஸ்ஸனித்³தே³ஸவண்ணனா
196-7. காயிகங் து³க்க²ங் காயிகஸ்ஸ து³க்க²ஸ்ஸ உபனிஸ்ஸயபச்சயோதி ‘‘து³க்கி²தஸ்ஸ து³க்க²ங் உப்பஜ்ஜதீ’’தி வுத்தங். ஏதேன து³க்கே²ன அபி⁴பூ⁴தத்தா நக்க²த்தங் கீளிதுங்
அத்தனோ பவத்திக்க²ணங் ஸந்தா⁴ய ‘‘பீளேதீ’’தி வுத்தங் காயிகது³க்க²ங், தது³பனிஸ்ஸயதோ வா.
ஆவட்டந்தீதி பரிவட்டந்தி. விவட்டந்தீதி பப்³பா⁴ரே கி²த்தத்த²ம்போ⁴ விய லுத⁴ந்தி. மூலச்சி²ன்னருக்கோ² விய சி²ன்னபபாதங் பபதந்தி, பரித³ய்ஹமானசித்தா புரிமதோ³மனஸ்ஸுபனிஸ்ஸயவஸேன சிந்தெந்தி, விக³தே தோ³மனஸ்ஸே ததா²சிந்தனங் நத்தீ²தி.
உபாயாஸனித்³தே³ஸவண்ணனா
198. ஸப்³ப³விஸயப்படிபத்தினிவாரணவஸேன ஸங்ஸீத³னங், உட்டே²தும்பி அஸக்குணெய்யதாகரணவஸேன அதிப³லவங், விரூபங் வா ஸீத³னங் விஸீத³னங். அஞ்ஞங் விஸயங் அக³ந்த்வா ஞாதிப்³யஸனாதீ³ஸு விரூபோ ஆஸங்கோ³ தத்தே²வ அவப³ந்த⁴தா ப்³யாஸத்தி. நித்து²னநகரணதோ நித்து²னநரஸோ. விஸீத³னங் விஸாதோ³.
ஸயங் ந து³க்கோ² தோ³ஸத்தா ஸங்கா²ரக்க²ந்த⁴பரியாபன்னத⁴ம்மந்தரத்தா வா. யே பன தோ³மனஸ்ஸமேவ உபாயாஸோதி வதெ³ய்யுங், தே ‘‘உபாயாஸோ தீஹி க²ந்தே⁴ஹி ஏகேனாயதனேன ஏகாய தா⁴துயா ஸம்பயுத்தோ, ஏகேன க²ந்தே⁴ன ஏகேனாயதனேன ஏகாய தா⁴துயா கேஹிசி ஸம்பயுத்தோ’’தி (தா⁴து॰ 249) இமாய பாளியா படிக்கி²பிதப்³பா³. விஸாத³ப்பத்தியா ஸுக²து³க்க²காரணங் அக³ணயித்வா து³க்க²ட்டா²னாதீ³னி கரொந்தானங் உபாயாஸோ காயிகது³க்க²ஸ்ஸ வத்து² ஹோதி, விஸாத³னவஸேனேவ ஞாதிவினாஸாதீ³னி சிந்தெந்தானங் தோ³மனஸ்ஸஸ்ஸ. அத்தனோ பவத்திக்க²ணேயேவ உபாயாஸோ தோ³மனஸ்ஸஸம்பயோக³தோ சித்தங் பரித³ஹதி, அவிப்பா²ரிகதாகரணவஸேன காயங் விஸாதே³தி, தது³ப⁴யகரணேனேவ ததோ பரங் தங்னிமித்தங் காயிகங் சேதஸிகஞ்ச அதி⁴மத்தங் து³க்க²ங் ஜனயதீதி து³க்கோ² வுத்தோ.
அப்பியஸம்பயோக³னித்³தே³ஸவண்ணனா
199. ந அப்பியந்தீதி ந க³மியந்தி, ந பவேஸீயந்தீதி அத்தோ². அனத்த²ந்தி ப்³யஸனங், து³க்க²ங் வா. அஹிதந்தி தஸ்ஸ ஹேதுங். து³தியே அத்த²விகப்பே அத்த²ங் ந காமெந்தீதி அனத்த²காமாதிஆதி³ அஸமத்த²ஸமாஸோபி யோஜிதோ. ‘‘அஸூரியபஸ்ஸானி முகா²னீ’’திஆதீ³ஸு விய ஹி யேன ஸமாஸோ, ந தஸ்ஸாயங் படிஸேத⁴கோ அ-காரோதி. யஸ்மிங் கிஸ்மிஞ்சி நிப்³ப⁴யே யோக³க்கே²ம-ஸத்³தோ³ நிருள்ஹோ து³க்க²யோக³தோ கே²மத்தா.
ஸங்க³திஆதீ³ஸு ஸங்கா²ரவஸேன யங் லப்³ப⁴தி, தங் க³ஹேதப்³ப³ங். ந ஹி ஸங்கா²ரானங் டா²னநிஸஜ்ஜாத³யோ போ⁴ஜனாதி³கிச்சேஸு வா ஸஹகரணங் விஜ்ஜதீதி பச்சி²மத்³வயங் தத³த்த²வஸேன லப்³ப⁴தீதி ந ஸக்கா வத்துந்தி. யங் லப்³ப⁴தீதி வா யங் அத்த²ஜாதங் லப்³ப⁴தீதி அத்தோ². தேன யதா² லப்³ப⁴தி ஸங்க³திஆதீ³ஸு அத்தோ², ததா² யோஜேதப்³போ³. புக்³க³லஸ்ஸ ஹி ஸங்க³தி க³ந்த்வா ஸங்கா²ரேஹி ஸங்யோகோ³ அனத்த²பா⁴வோ உபத்³த³வபா⁴வோ.
அனிட்டா²னங் ஆபாத²க³மனமத்தங் தங்க³ஹணமத்தஞ்ச அப்பியஸம்பயோகோ³, ந பன பத²விப²ஸ்ஸாத³யோ விய அப்பியஸம்பயோகோ³ நாம ஏகோ த⁴ம்மோ அத்தீ²தி ஆஹ ‘‘ஸோ அத்த²தோ ஏகோ த⁴ம்மோ நாம நத்தீ²’’தி. அனிட்டா²னி கண்டகாதீ³னி அமித்தா ச உஸுஆதீ³ஹி விஜ்ஜ²னாதி³து³க்க²ங் உப்பாதெ³ந்தி.
இதா⁴தி இமஸ்மிங் லோகே து³க்க²ங் ஹோதீதி வா இத⁴ இமஸ்மிங் து³க்க²ஸச்சனித்³தே³ஸே து³க்கோ² வுத்தோதி வா யோஜேதப்³ப³ங்.
பியவிப்பயோக³னித்³தே³ஸவண்ணனா
200. மினந்தீதி நாளியாதீ³ஸு த⁴ஞ்ஞங் விய அந்தோ பக்கி²பந்தி, ந ப³ஹி கரொந்தீதி அத்தோ². அமா-ஸத்³தோ³ ஸஹபா⁴வதீ³பகோ. ஞாயந்தி வா அஜ்ஜ²த்திகாஇச்சேவ. ஞாதிப்³யஸனாதி³கோ ஹுத்வா உபட்டா²தீதி ப்³யஸனபச்சுபட்டா²னோ. ஸோகுப்பாத³னேனேவ ஸரீரங் ஸோஸெந்தி, கிஸங் கரொந்தி, அகிஸம்பி நிரோஜதாகரணேன மிலாபெந்தி, ததோ ச காயிகங் து³க்க²ங் உப்பஜ்ஜதீதி தது³ப்பாத³கதா வுத்தா.
ஸோகஸரஸமப்பிதாதி ஏதேன சேதஸிகது³க்க²ங் த³ஸ்ஸேதி, விதுஜ்ஜந்தீதி ஏதேன காயிகங் து³க்க²ங்.
இச்சா²னித்³தே³ஸவண்ணனா
201. யஸ்மிங் ‘‘பரினிப்³பு³தேஸு ச விஜ்ஜமானங் ஜாதியா அனாக³மன’’ந்தி. யம்பீதி யேனபீதி அத்தோ² வுத்தோ. யதா³பி பன யங்-ஸத்³தோ³ ‘‘இச்ச²’’ந்தி ஏதங் அபெக்க²தி, ததா³பி அலாப⁴விஸிட்டா² இச்சா² வுத்தா ஹோதி. யதா³ ‘‘ந லப⁴தீ’’தி ஏதங் அபெக்க²தி, ததா³ இச்சா²விஸிட்டோ² அலாபோ⁴ வுத்தோ ஹோதி. ஸோ பனத்த²தோ அஞ்ஞோ த⁴ம்மோ நத்தி², ததா²பி அலப்³ப⁴னெய்யஇச்சா²வ வுத்தா ஹோதி. அபாபுணிதப்³பே³ஸு பவத்தத்தா ஏவ ‘‘அப்பத்திபச்சுபட்டா²னா’’தி வுத்தா. யத்த² ஹி ஸா இச்சா² பவத்தா, தங் வத்து²ங் அபாபுணந்தீ ஹுத்வா க³ய்ஹதீதி.
சி²ன்னபி⁴ன்னக³ணேனாதி நில்லஜ்ஜேன து⁴த்தக³ணேன, கப்படிகக³ணேன வா.
விகா⁴தமயந்தி இச்சி²தாலாப⁴ந்தி அலப்³ப⁴னெய்யஇச்ச²மேவ வத³தி.
உபாதா³னக்க²ந்த⁴னித்³தே³ஸவண்ணனா
202. வித்தி²ண்ணஸ்ஸ து³க்க²ஸ்ஸ எத்தகந்தி த³ஸ்ஸனங் து³க்க²ஸ்ஸ ஸங்கே²போ, தங் காதுங் ந ஸக்கா வித்தா²ரஸ்ஸ அனந்தத்தா. து³க்க²வித்தா²ரக³தங் பன தே³ஸனாவித்தா²ரங் பஹாய யத்த² ஸப்³போ³ து³க்க²வித்தா²ரோ ஸமோதா⁴னங் க³ச்ச²தி, தத்த² தே³ஸனாய வவத்தா²னங் ஸங்கே²போ, தங் காதுங் ஸக்கா தாதி³ஸஸ்ஸ வத்து²னோ ஸப்³பா⁴வா.
தே³ஸங் ஜானந்தோ மக்³க³க்கா²யிகபுரிஸோ தே³ஸகோ. ப⁴க³வாபி து³க்க²ஸ்ஸ தே³ஸகோ. ‘‘து³க்க²ந்ததே³ஸகேனா’’தி வா பாடோ², து³க்க²ந்தக்கா²யிகோதி அத்தோ².
பாவகாத³யோ யதா² இந்த⁴னாதீ³னி பா³தெ⁴ந்தி, ஏவங் பா³த⁴யமானா. மாரணந்திகது³க்கா²பி⁴கா⁴தேனாதி இமினா அதிபாகடேன ஜாதிஜராது³க்க²விகா⁴தஜஸோகாத³யோ த³ஸ்ஸேதி. ததோதி பரிதே³வதோ உத்³த⁴ங். கண்ட² ஸோஸாதி³ ஸந்தி⁴ ப³ந்த⁴ச்சே²த³னாதி³ ஜனக தா⁴துக்கோ²ப⁴ ஸமாயோக³தோ காயஸ்ஸ ஆபா³த⁴னது³க்க²ங் து³க்க²ங். யேஸு கேஸுசீதி திஸ்ஸஸ்ஸ வா பு²ஸ்ஸஸ்ஸ வா உபாதா³னக்க²ந்தே⁴ஸு ஸப்³ப³ம்பி சக்கு²ரோகா³தி³து³க்க²ங் ஸப்³ப³ஸத்தக³தங் ஏவங்பகாரமேவாதி ஸங்கி²பித்வா த³ஸ்ஸெந்தோதி அத்தோ².
து³க்க²ஸச்சனித்³தே³ஸவண்ணனா நிட்டி²தா.
2. ஸமுத³யஸச்சனித்³தே³ஸவண்ணனா
203. உத்தரபத³லோபங் ‘‘புனப்³ப⁴வகரணங் புனொப்³ப⁴வோ’’திஆஹ. ‘‘மனோஸம்ப²ஸ்ஸோ’’தி எத்த² மனோ விய ச புரிமபத³ஸ்ஸ ஓகாரந்ததா த³ட்ட²ப்³பா³. அத² வா ஸீலட்டே²ன இக-ஸத்³தே³ன க³மியத்த²த்தா கிரியாவாசகஸ்ஸ ஸத்³த³ஸ்ஸ அத³ஸ்ஸனங் த³ட்ட²ப்³ப³ங் யதா² ‘‘அபூபப⁴க்க²னஸீலோ ஆபூபிகோ’’தி. ‘‘தத்³தி⁴தா’’இதி ப³ஹுவசனநித்³தே³ஸா விசித்தத்தா வா தத்³தி⁴தானங் அபி⁴தா⁴னலக்க²ணத்தா ‘‘புனப்³ப⁴வஸ்ஸ தா³யிகாபீ’’திஆதி³. போனொப்³ப⁴விகாயேவாதி நாமங் லப⁴தீதி புனப்³ப⁴வங் தா³யிகாபி அதா³யிகாபி புனப்³ப⁴வங் தே³திச்சேவ போனொப்³ப⁴விகாதி ஸமானவிபாகாதி நாமங் லப⁴தி ஸமானஸபா⁴வத்தா ததா³னுபா⁴வத்தா ச. ஏவங் இதரேஸு த³ட்ட²ப்³ப³ங். தத்த² உபதி⁴ம்ஹி யதா²னிப்³ப³த்தே அத்தபா⁴வே விபச்சனகம்மங் ஏதிஸ்ஸாதி உபதி⁴வேபக்கா. நந்த³னட்டே²ன நந்தீ³, ரஞ்ஜனட்டே²ன ராகோ³. யோ ச நந்தி³ராகோ³, யா ச தண்ஹா, உப⁴யமேதங் ஏகத்த²ங், ப்³யஞ்ஜனமேவ நானந்தி தண்ஹா ‘‘நந்தி³ராகே³ன ஸத்³தி⁴ங் அத்த²தோ ஏகத்தங் க³தா’’தி வுத்தா. ராக³ஸம்ப³ந்தே⁴ன ‘‘உப்பன்னஸ்ஸா’’தி வுத்தங். ரூபாரூபப⁴வராகோ³ விஸுங் வக்க²தீதி காமப⁴வே ஏவ ப⁴வபத்த²னாஉப்பத்தி வுத்தாதி வேதி³தப்³பா³.
தஸ்மிங் தஸ்மிங் பியரூபே பட²முப்பத்திவஸேன ‘‘உப்பஜ்ஜதீ’’தி வுத்தா, புனப்புனங் பவத்திவஸேன ‘‘நிவிஸதீ’’தி, பரியுட்டா²னானுஸயவஸேன வா உப்பத்தினிவேஸா யோஜேதப்³பா³. ஸம்பத்தியந்தி மனுஸ்ஸஸோப⁴க்³கே³ தே³வத்தே ச. அத்தனோ சக்கு²ந்தி ஸவத்து²கங் சக்கு²மாஹ, ஸபஸாத³ங் வா மங்ஸபிண்ட³ங். விப்பஸன்னபஞ்சபஸாத³ந்தி பரிஸுத்³த⁴னீலபீதலோஹிதகண்ஹஓதா³தவண்ணபஸாத³ங். ரஜதபனாளிகங் விய சி²த்³த³ங் அப்³ப⁴ந்தரே ஓதா³தத்தா. பாமங்க³ஸுத்தங் விய லம்ப³கண்ணப³த்³த⁴ங். துங்கா³ உச்சா தீ³கா⁴ நாஸிகா துங்க³னாஸிகா, ஏவங் லத்³த⁴வோஹாரங் அத்தனோ கா⁴னங். ‘‘லத்³த⁴வோஹாரா’’தி வா பாடோ². தஸ்மிங் ஸதி துங்கா³ நாஸிகா யேஸங், தே துங்க³னாஸிகா. ஏவங் லத்³த⁴வோஹாரா ஸத்தா அத்தனோ கா⁴னந்தி யோஜனா காதப்³பா³. ஜிவ்ஹங்…பே॰… மஞ்ஞந்தி வண்ணா ஸண்டா²னதோ கிச்சதோ ச. மனங்…பே॰… உளாரங் மஞ்ஞந்தி அதீதாதி³அத்த²விசினநஸமத்த²ங். அத்தனா படிலத்³தா⁴னீதி அஜ்ஜ²த்தஞ்ச ஸரீரக³ந்தா⁴தீ³னி உப்பஜ்ஜமானா உப்பஜ்ஜதீதி யதா³ உப்பஜ்ஜமானா ஹோதி, ததா³ எத்த² உப்பஜ்ஜதீதி ஸாமஞ்ஞேன க³ஹிதா உப்பாத³கிரியா லக்க²ணபா⁴வேன வுத்தா, விஸயவிஸிட்டா² லக்கி²தப்³ப³பா⁴வேன. ந ஹி ஸாமஞ்ஞவிஸேஸேஹி நானத்தவோஹாரோ ந ஹோதீதி. உப்பஜ்ஜமானாதி வா அனிச்சி²தோ உப்பாதோ³ ஹேதுபா⁴வேன வுத்தோ. உப்பஜ்ஜதீதி நிச்சி²தோ ப²லபா⁴வேன ‘‘யதி³ உப்பஜ்ஜமானா ஹோதி, எத்த² உப்பஜ்ஜதீ’’தி. ஸோ ஹி தேன உபயோஜிதோ விய ஹோதி.
ஸமுத³யஸச்சனித்³தே³ஸவண்ணனா நிட்டி²தா.
3. நிரோத⁴ஸச்சனித்³தே³ஸவண்ணனா
204. அனூஹதேதி
ஸீஹோ வேத⁴கே படிபஜ்ஜதி, ந உஸும்ஹி, ஸுவானோ லெட்³டு³ம்ஹி படிபஜ்ஜதி, ந பஹாரகே. க²யக³மனவஸேன விரஜ்ஜதி, அப்பவத்திக³மனவஸேன நிருஜ்ஜ²தி. அனபெக்க²தாய சஜனவஸேன ஹானிவஸேன ச சஜீயதி, புன யதா² ந பவத்ததி, ததா² தூ³ரகி²பனவஸேன படினிஸ்ஸஜ்ஜீயதி, ப³ந்த⁴னபூ⁴தாய மோசனவஸேன முச்சதி, அஸங்கிலேஸவஸேன ந அல்லீயதி. ஆயூஹனங் ஸமுத³யோ, தப்படிபக்க²வஸேன அனாயூஹனங்.
அபஞ்ஞத்திந்தி அபஞ்ஞாபனங், ‘‘தித்தஅலாபு³ அத்தீ²’’தி வோஹாராபா⁴வங் வா. தித்தஅலாபு³வல்லியா அப்பவத்திங் இச்ச²ந்தோ புரிஸோ விய மக்³கோ³ த³ட்ட²ப்³போ³, தஸ்ஸ தஸ்ஸா அப்பவத்தினின்னசித்தஸ்ஸ மூலச்சே²த³னங் விய மக்³க³ஸ்ஸ நிப்³பா³னாரம்மணஸ்ஸ தண்ஹாபஹானங். ததா³ப்பவத்தி விய தண்ஹாய அப்பவத்திபூ⁴தங் நிப்³பா³னங் த³ட்ட²ப்³ப³ங். து³தியூபமாய த³க்கி²ணத்³வாரங் விய நிப்³பா³னங், சோரகா⁴தகா விய மக்³கோ³ த³ட்ட²ப்³போ³, புரிமா வா உபமா மக்³கே³ன நிருத்³தா⁴ய பியரூபஸாதரூபேஸு நிருத்³தா⁴தி வத்தப்³ப³தாத³ஸ்ஸனத்த²ங் வுத்தா, பச்சி²மா நிப்³பா³னங் ஆக³ம்ம நிருத்³தா⁴யபி.
நிரோத⁴ஸச்சனித்³தே³ஸவண்ணனா நிட்டி²தா.
4. மக்³க³ஸச்சனித்³தே³ஸவண்ணனா
205. அஞ்ஞமக்³க³படிக்கே²பனத்த²ந்தி அஞ்ஞமக்³க³படிக்கே²போ. புக்³க³லஸ்ஸ அரியபா⁴வகரத்தா அரியங் கரோதீதி அரியோ, அரியப²லபடிலாப⁴கரத்தா அரியங் லபா⁴பேதி ஜனேதீதி அரியோ. அத்தனோ கிச்சவஸேன ப²லவஸேன ச அரியனாமலாபோ⁴ ஏவ வுத்தோதி த³ட்ட²ப்³போ³. அட்ட² அங்கா³னி அஸ்ஸாதி அஞ்ஞபத³த்த²ஸமாஸங் அகத்வா ‘‘அட்ட²ங்கா³னி அஸ்ஸ ஸந்தீதி அட்ட²ங்கி³கோ’’தி பத³ஸித்³தி⁴ த³ட்ட²ப்³பா³.
சதுரங்க³ஸமன்னாக³தா ‘‘பரிக்³க³ஹலக்க²ணா’’தி வுத்தா. யதா² சீவரகம்மாதி³கோ கம்மந்தோ ஏகங் காதப்³ப³ங் ஸமுட்டா²பேதி நிப்பா²தே³தி, தங்தங்கிரியானிப்பா²த³கோ வா சேதனாஸங்கா²தோ கம்மந்தோ ஹத்த²பாத³சலனாதி³கங் கிரியங் ஸமுட்டா²பேதி, ஏவங் ஸாவஜ்ஜகத்தப்³ப³கிரியாஸமுட்டா²பகமிச்சா²கம்மந்தப்பஹானேன ஸம்மாகம்மந்தோ நிரவஜ்ஜஸமுட்டா²பனகிச்சவா ஹோதி, ஸம்பயுத்தத⁴ம்மே ச ஸமுட்டா²பெந்தோ ஏவ பவத்ததீதி ‘‘ஸமுட்டா²பனலக்க²ணோ’’தி வுத்தோ. காயவாசானங் க²ந்த⁴ஸந்தானஸ்ஸ ச ஸங்கிலேஸபூ⁴தமிச்சா²ஆஜீவப்பஹானேன ஸம்மாஆஜீவோ ‘‘வோதா³பனலக்க²ணோ’’தி வுத்தோ.
அத்தனோ பச்சனீககிலேஸா தி³ட்டே²கட்டா² அவிஜ்ஜாத³யோ. பஸ்ஸதீதி பகாஸேதீதி அத்தோ². தேனேவ ஹி அங்கே³ன தத்த² பச்சவெக்க²ணா பவத்ததீதி. ததே²வாதி அத்தனோ பச்சனீககிலேஸேஹி ஸத்³தி⁴ந்தி அத்தோ².
கிச்சதோதி புப்³ப³பா⁴கே³ஹி து³க்கா²தி³ஞாணேஹி கத்தப்³ப³கிச்சஸ்ஸ இத⁴ நிப்ப²த்திதோ, இமஸ்ஸேவ வா ஞாணஸ்ஸ து³க்கா²தி³ப்பகாஸனகிச்சதோ. தீணி நாமானி லப⁴தி காமஸங்கப்பாதி³ப்பஹானகிச்சனிப்ப²த்திதோ. ஸிக்கா²பத³விப⁴ங்கே³ (விப⁴॰ 703 ஆத³யோ) ‘‘விரதிசேதனா ஸப்³பே³ ஸம்பயுத்தத⁴ம்மா ச ஸிக்கா²பதா³னீ’’தி வுத்தாதி தத்த² பதா⁴னானங் விரதிசேதனானங் வஸேன ‘‘விரதியோபி ஹொந்தி சேதனாயோபீ’’தி ஆஹ. முஸாவாதா³தீ³ஹி விரமணகாலே வா விரதியோ ஸுபா⁴ஸிதாதி³வாசாபா⁴ஸனாதி³காலே ச சேதனாயோ யோஜேதப்³பா³, மக்³க³க்க²ணே விரதியோவ
புப்³ப³பா⁴கே³பி மக்³க³க்க²ணேபி ஸம்மாஸமாதி⁴ ஏவாதி யதி³பி ஸமாதி⁴உபகாரகானங் அபி⁴னிரோபனானுமஜ்ஜனஸம்பியாயனப்³ரூஹனஸந்தஸுகா²னங் விதக்காதீ³னங் வஸேன சதூஹி ஜா²னேஹி ஸம்மாஸமாதி⁴ விப⁴த்தோ, ததா²பி வாயாமோ விய அனுப்பன்னாகுஸலானுப்பாத³னாதி³சதுவாயாமகிச்சங், ஸதி விய ச அஸுபா⁴ஸுகா²னிச்சானத்தேஸு காயாதீ³ஸு ஸுபா⁴தி³ஸஞ்ஞாபஹானசதுஸதிகிச்சங், ஏகோ ஸமாதி⁴ சதுக்கஜ்ஜா²னஸமாதி⁴கிச்சங் ந ஸாதே⁴தீதி புப்³ப³பா⁴கே³பி பட²மஜ்ஜா²னஸமாதி⁴சித்தே ஜா²னஸமாதி⁴
வசீபே⁴த³ஸ்ஸ உபகாரகோ விதக்கோ ஸாவஜ்ஜானவஜ்ஜவசீபே⁴த³னிவத்தனபவத்தனகராய ஸம்மாவாசாயபி உபகாரகோ ஏவாதி ‘‘ஸ்வாய’’ந்திஆதி³மாஹ. வசீபே⁴த³னியாமிகா வாசா காயிககிரியானியாமகஸ்ஸ ஸம்மாகம்மந்தஸ்ஸ உபகாரிகா. இத³ங் வீரியந்தி சதுஸம்மப்பதா⁴னவீரியங். க³தியோதி நிப்ப²த்தியோ, கிச்சாதி³ஸபா⁴வே வா. ஸமன்வேஸித்வாதி உபதா⁴ரெத்வா.
புரிமானி த்³வே ஸச்சானி உக்³க³ண்ஹித்வாதி ஸம்ப³ந்தோ⁴. இட்ட²ங் கந்தந்தி நிரோத⁴மக்³கே³ஸு நின்னபா⁴வங் த³ஸ்ஸேதி, ந அபி⁴னந்த³னங், தன்னின்னபா⁴வோயேவ ச தத்த² கம்மகரணங் த³ட்ட²ப்³ப³ங்.
கிச்சதோதி பரிஞ்ஞாதி³தோ. ஆரம்மணபடிவேதோ⁴தி ஸச்சி²கிரியாபடிவேத⁴மாஹ. ஸப்³ப³ம்பி படிவேத⁴ஞாணங் லோகுத்தரந்தி கஸ்மா வுத்தங், நனு உக்³க³ஹாதி³படிவேதோ⁴ ச படிவேதோ⁴வ, ந ச ஸோ லோகுத்தரோதி? ந, கேவலேன படிவேத⁴-ஸத்³தே³ன உக்³க³ஹாதி³படிவேதா⁴னங் அவசனீயத்தா, படிவேத⁴னிமித்தத்தா வா உக்³க³ஹாதி³வஸேன பவத்தங் து³க்கா²தீ³ஸு புப்³ப³பா⁴கே³ ஞாணங் ‘‘படிவேதோ⁴’’தி வுத்தங், ந படிவேத⁴த்தா, படிவேத⁴பூ⁴தமேவ பன ஞாணங் ஸந்தா⁴யாஹ ‘‘ஸப்³ப³ம்பி படிவேத⁴ஞாணங் லோகுத்தர’’ந்தி. உக்³க³ஹபரிபுச்சா²ஞாணானிபி ஸவனஞாணே ஏவ அவரோத⁴ங் க³ச்ச²ந்தீதி ‘‘ஸவனதா⁴ரணஸம்மஸனஞாணங் லோகிய’’ந்தி திவித⁴மேவ ஞாணமாஹ. உக்³க³ஹாதீ³ஹி ஸச்சபரிக்³க³ண்ஹனங் பரிக்³க³ஹோ.
பயோகோ³தி ‘‘ப⁴வக்³க³க³ஹணத்த²’’ந்திஆதி³னா.
பத³கா⁴தந்தி எத்த² க³தமக்³கோ³ ‘‘பத³’’ந்தி வுச்சதி. யேன சுபாயேன காரணேன காமவிதக்கோ உப்பஜ்ஜதி, ஸோ தஸ்ஸ க³தமக்³கோ³தி தஸ்ஸ கா⁴தோ பத³கா⁴தோ. உஸ்ஸுக்காபெத்வாதி உத்³த⁴ங் உத்³த⁴ங் ஸந்திவிஸேஸயுத்தங் கத்வா, வட்³டெ⁴த்வாதி அத்தோ².
பாளியங் விப⁴த்தேஸூதி கதரபாளியங்? த⁴ம்மஸங்க³ஹே தாவ அட்ட² கஸிணானி த³ஸ அஸுபா⁴ சத்தாரோ ப்³ரஹ்மவிஹாரா சத்தாரி ஆருப்பானி விப⁴த்தானி, ஆக³மேஸு த³ஸ அனுஸ்ஸதியோ ஆஹாரே படிகூலஸஞ்ஞா இமேஸு தீஸூதி காமாதீ³ஸு தீஸு டா²னேஸு.
மிச்சா²வாசாஸங்கா²தாயாதி ஏதேன ஏகாய சேதனாய பஹாதப்³ப³ஏகத்தங் த³ஸ்ஸேதி. இத⁴ அரியஸாவகோ ஸகல்யாணபுது²ஜ்ஜனகோ ஸெக்கோ². காயத்³வாரவீதிக்கமாதி ஆஜீவஹேதுகதோ பாணாதிபாதாதி³தோ விஸுங் விஸுங் விரமணங் யோஜேதப்³ப³ங்.
அயங் பனஸ்ஸாதி மக்³க³பா⁴வேன சதுப்³பி³த⁴ம்பி ஏகத்தேன க³ஹெத்வா அஸ்ஸ மக்³க³ஸ்ஸ அயங் ஜா²னவஸேன ஸப்³ப³ஸதி³ஸஸப்³பா³ஸதி³ஸஏகச்சஸதி³ஸதா விஸேஸோ. பாத³கஜ்ஜா²னநியாமேன ஹோதீதி இத⁴ பாத³கஜ்ஜா²னநியாமங் து⁴ரங் கத்வா ஆஹ, அட்ட²ஸாலினியங் பன விபஸ்ஸனானியாமங் தத்த² ஸப்³ப³வாதா³விரோத⁴தோ, இத⁴ பன ஸம்மஸிதஜ்ஜா²னபுக்³க³லஜ்ஜா²ஸயவாத³னிவத்தனதோ பாத³கஜ்ஜா²னநியாமங். விபஸ்ஸனானியாமோ பன ஸாதா⁴ரணத்தா இதா⁴பி ந படிக்கி²த்தோதி த³ட்ட²ப்³போ³. அஞ்ஞே சாசரியவாதா³ வக்க²மானா விப⁴ஜிதப்³பா³தி யதா²வுத்தமேவ தாவ பாத³கஜ்ஜா²னநியாமங் விப⁴ஜந்தோ ஆஹ ‘‘பாத³கஜ்ஜா²னநியாமேன தாவா’’தி.
ஆருப்பே சதுக்கபஞ்சக…பே॰… வுத்தங் அட்ட²ஸாலினியந்தி அதி⁴ப்பாயோ. நனு தத்த² ‘‘ஆருப்பே திகசதுக்கஜ்ஜா²னங் உப்பஜ்ஜதீ’’தி வுத்தங், ந ‘‘சதுக்கபஞ்சகஜ்ஜா²ன’’ந்தி? ஸச்சங், யேஸு பன ஸங்ஸயோ அத்தி², தேஸங் உப்பத்தித³ஸ்ஸனேன, தேனத்த²தோ சதுக்கபஞ்சகஜ்ஜா²னங் உப்பஜ்ஜதீதி வுத்தமேவ ஹோதீதி ஏவமாஹாதி வேதி³தப்³ப³ங். ஸமுதா³யஞ்ச அபெக்கி²த்வா ‘‘தஞ்ச லோகுத்தரங், ந லோகிய’’ந்தி ஆஹ. சதுத்த²ஜ்ஜா²னமேவ ஹி லோகியங் தத்த² உப்பஜ்ஜதி, ந சதுக்கங் பஞ்சகஞ்சாதி. எத்த² கத²ந்தி பாத³கஜ்ஜா²னஸ்ஸ அபா⁴வா கத²ங் த³ட்ட²ப்³ப³ந்தி அத்தோ². தங்ஜா²னிகாவ தஸ்ஸ தத்த² தயோ மக்³கா³ உப்பஜ்ஜந்தி தஜ்ஜா²னிகங் பட²மப²லாதி³ங் பாத³கங் கத்வா உபரிமக்³க³பா⁴வனாயாதி அதி⁴ப்பாயோ, திகசதுக்கஜ்ஜா²னிகங் பன மக்³க³ங் பா⁴வெத்வா தத்து²ப்பன்னஸ்ஸ அரூபஜ்ஜா²னங் தஜ்ஜா²னிகங் ப²லஞ்ச பாத³கங் கத்வா உபரிமக்³க³பா⁴வனாய அஞ்ஞஜா²னிகாபி உப்பஜ்ஜந்தீதி ஜா²னங்கா³தி³னியாமிகா புப்³பா³பி⁴ஸங்கா²ரஸமாபத்தி பாத³கங், ந ஸம்மஸிதப்³பா³தி ப²லஸ்ஸபி பாத³கதா த³ட்ட²ப்³பா³.
து³க்க²ஞாணாதீ³னங் ரூபாதி³ச²ளாரம்மணத்தா நெக்க²ம்மஸங்கப்பாதீ³னங் கஸிணாதி³தங்தங்குஸலாரம்மணாரம்மணத்தா ‘‘யதா²னுரூப’’ந்தி ஆஹ. தத³னுரூபோதி அவிப்படிஸாரகரஸீலங் வாயாமஸ்ஸ விஸேஸபச்சயோதி ஸீலானுரூபதா வாயாமஸ்ஸ வுத்தா ஸம்பயுத்தஸ்ஸபி, ஸம்பயுத்தஸ்ஸேவ ச வசனதோ ‘‘ஸீலபூ⁴மியங் பதிட்டி²தஸ்ஸா’’தி அவத்வா ‘‘பதிட்ட²மானஸ்ஸா’’தி வுத்தங். சேதஸோ அஸம்மோஸோதி ‘‘ஏகாரக்கோ²’’தி எத்த² வுத்தேன ஸதாரக்கே²ன சேதஸோ ரக்கி²ததா. தேனாஹ ‘‘இதி…பே॰… ஸுவிஹிதசித்தாரக்க²ஸ்ஸா’’தி.
ஆஸவக்க²யஞாணஸ்ஸ விஜ்ஜாபா⁴வோ வுத்தோதி ஆஸவக்க²யஸங்கா²தே மக்³கே³ தீஹி க²ந்தே⁴ஹி ஸங்க³ஹிதே பஞ்ஞாக்க²ந்தோ⁴ விஜ்ஜா, ஸீலஸ்ஸ சதுன்னஞ்ச ஜா²னானங் சரணபா⁴வோ வுத்தோதி இதரே த்³வே க²ந்தா⁴ சரணங். யந்தி ஏதேன நிப்³பா³னங் க³ச்ச²ந்தீதி யானங், விபஸ்ஸனாவ யானங் விபஸ்ஸனாயானங். ஸீலங் ஸமாதி⁴ஸ்ஸ விஸேஸபச்சயோ, ஸமாதி⁴ விபஸ்ஸனாயாதி ஸமத²ஸ்ஸ உபகாரத்தா ஸீலக்க²ந்தோ⁴ ச ஸமத²யானேன ஸங்க³ஹிதோ. விபஸ்ஸனாயானேன காமேஸு ஆதீ³னவங் விபா⁴வெந்தோ ஸமத²யானேன நிராமிஸங் ஜா²னஸுக²ங் அபரிச்சஜந்தோ அந்தத்³வயகும்மக்³க³ங் விவஜ்ஜேதி. பஞ்ஞா விய மோஹஸ்ஸ, ஸீலஸமாத⁴யோ ச தோ³ஸலோபா⁴னங் உஜுவிபச்சனீகா அதோ³ஸாலோபே⁴ஹி ஸாதே⁴தப்³ப³த்தா. ஸீலஸமாதி⁴பஞ்ஞாயோக³தோ ஆதி³மஜ்ஜ²பரியோஸானகல்யாணங். ஸீலாதீ³னி ஹி ஸாஸனஸ்ஸ ஆதி³மஜ்ஜ²பரியோஸானந்தி. யஸ்மிங் டி²தோ மக்³க³ட்டோ² ப²லட்டோ² ச அரியோ ஹோதி, தங் மக்³க³ப²லஸங்கா²தங் க²ந்த⁴த்தயஸங்க³ஹிதங் ஸாஸனங் அரியபூ⁴மி.
மக்³க³ஸச்சனித்³தே³ஸவண்ணனா நிட்டி²தா.
ஸுத்தந்தபா⁴ஜனீயவண்ணனா நிட்டி²தா.
2. அபி⁴த⁴ம்மபா⁴ஜனீயவண்ணனா
206-214. அரியஸச்ச-ஸத்³தோ³ ‘‘நிப்பதே³ஸதோ ஸமுத³யங் த³ஸ்ஸேது’’ந்தி. து³க்க²னிரோதா⁴ பன அரியஸச்சதே³ஸனாயங் த⁴ம்மதோ நிப்பதே³ஸா ஏவ. ந ஹி ததோ அஞ்ஞோ த⁴ம்மோ அத்தி², யோ ஸச்சதே³ஸனாயங் பச்சயஸங்கா²தந்தி கம்மகிலேஸவஸேன ஜாதிஆதி³து³க்க²ஸ்ஸ மூலபூ⁴தந்தி அத்தோ².
நிரோத⁴ஸச்சங்…பே॰… பஞ்சஹாகாரேஹி நித்³தி³ட்ட²ந்தி அரியஸச்சதே³ஸனதோ ஸச்சதே³ஸனாய விஸேஸங் த³ஸ்ஸேதி. தத்த² ‘‘திண்ணன்னஞ்ச குஸலமூலானங் அவஸேஸானஞ்ச ஸாஸவகுஸலானங் பஹான’’ந்தி இத³ங் தேஸங் பச்சயானங் அவிஜ்ஜாதண்ஹாஉபாதா³னானங் பஹானவஸேன, அவிஜ்ஜாதீ³ஸு வா பஹீனேஸு தேஸங் அப்பவத்திவஸேன வுத்தந்தி வேதி³தப்³ப³ங். ந ஹி குஸலா பஹாதப்³பா³தி. பஹானந்தி ச மக்³க³கிச்சவஸேன தத³தி⁴க³மனீயங் நிரோத⁴ங் த³ஸ்ஸேதி, நிரோத⁴ஸ்ஸேவ வா தண்ஹாதீ³னங் அப்பவத்திபா⁴வோ பஹானந்தி த³ட்ட²ப்³ப³ங்.
யதி³பி ‘‘புப்³பே³வ கோ² பனஸ்ஸ காயகம்மங் வசீகம்மங் ஆஜீவோ ஸுபரிஸுத்³தோ⁴ ஹோதி, ஏவமஸ்ஸாயங் அரியோ அட்ட²ங்கி³கோ மக்³கோ³ பா⁴வனாபாரிபூரிங் க³ச்ச²தீ’’தி (ம॰ நி॰ 3.431) லோகுத்தரமக்³க³க்க²ணே அட்ட²ங்கி³கமக்³க³பாரிபூரியா உபனிஸ்ஸயத³ஸ்ஸனத்த²ங் இத³ங் ‘‘புப்³பே³வ கோ²…பே॰… ஸுபரிஸுத்³தோ⁴ ஹோதீதி வசனதோ’’திஆதி³. ஏவமித³ங் வசனதோதி நிஸ்ஸக்கவசனங் தே³ஸனுபாயஸ்ஸ ஞாபகனித³ஸ்ஸனங் ஹோதி, வசனதோதி வா அத்தனோ வசனானுரூபங் பஞ்சங்கி³கோபி மக்³கோ³ படிபதா³ ஏவாதி ப⁴க³வதா தே³ஸிதோதி அத்தோ². கத்தா²தி? தே³வபுரே, தஸ்மா தங் தே³ஸிதனயங் த³ஸ்ஸேதுங் பஞ்சங்கி³கவாரோபி நித்³தி³ட்டோ² த⁴ம்மஸங்கா³ஹகேஹி. அத² வா ‘‘புப்³பே³வ கோ² பனஸ்ஸா’’தி வசனேனேவ அஜ்ஜா²ஸயவிஸேஸகாரணனித³ஸ்ஸகேன புக்³க³லஜ்ஜா²ஸயவஸேன பஞ்சங்கி³கோ மக்³கோ³பி படிபதா³ ஏவாதி தே³ஸிதோ ஹோதீதி ஆஹ ‘‘புப்³பே³வ கோ² பன…பே॰… வசனதோ பன…பே॰… தே³ஸிதோ’’தி, தஸ்மா தங் ஸுத்தந்தே தே³ஸிதனயங் த³ஸ்ஸேதுங் பஞ்சங்கி³கவாரோபி நித்³தி³ட்டோ² ப⁴க³வதா தே³வபுரேதி அத்தோ².
ஜா²னேஹி தே³ஸனாபவேஸோ, பா⁴வனாபவேஸோ வா ஜா²னாபி⁴னிவேஸோ. ஏகேகஸ்மிங் கொட்டா²ஸே சதுன்னங் சதுன்னங் நயஸஹஸ்ஸானங் த³ஸ்ஸனங் க³ணனாஸுக²த்த²ந்தி வேதி³தப்³ப³ங். யதா² பன பாளி டி²தா, ததா² ஏகேகிஸ்ஸா படிபதா³ய ஸுஞ்ஞதாதீ³ஸு ச பஞ்ச பஞ்ச கொட்டா²ஸே யோஜெத்வா பாளிக³மனங் கதந்தி விஞ்ஞாயதி. தத்த² அட்ட²ங்கி³கவாரே து³தியஜ்ஜா²னாதீ³ஸு தஸ்மிங் ஸமயே ஸத்தங்கி³கோ மக்³கோ³ ஹோதீதி யோஜனா காதப்³பா³, ஸப்³ப³ஸங்கா³ஹிகவாரே ச யதா² விஜ்ஜமானத⁴ம்மவஸேனாதி.
அபி⁴த⁴ம்மபா⁴ஜனீயவண்ணனா நிட்டி²தா.
3. பஞ்ஹபுச்ச²கவண்ணனா
215. ஏவங் புரிமேஸுபி த்³வீஸூதி கஸ்மா வுத்தங், நனு ஸுத்தந்தபா⁴ஜனீயே து³க்க²னிரோத⁴கா³மினிபடிபதா³னித்³தே³ஸே லோகியலோகுத்தரமிஸ்ஸகோ மக்³கோ³ வுத்தோ. தஸ்ஸ ஹி அட்ட²கதா²யங் (விப⁴॰ அட்ட²॰ 205) ‘‘சதூஸு ஸச்சேஸு உக்³க³ஹாதி³வஸேன புப்³ப³பா⁴க³ஞாணுப்பத்திங் ஸந்தா⁴ய இத³ங் ‘து³க்கே² ஞாண’ந்திஆதி³ வுத்தங், படிவேத⁴க்க²ணே பன ஏகமேவ ஞாணங் ஹோதீ’’தி ஸம்மாதி³ட்டி²யா, ததா² ஸம்மாஸங்கப்பாதீ³னஞ்ச லோகியலோகுத்தரமிஸ்ஸகதா த³ஸ்ஸிதா ‘‘அபிசேஸா ஸம்மாதி³ட்டி² நாம புப்³ப³பா⁴கே³ நானாக்க²ணா நானாரம்மணா ஹோதி, மக்³க³க்க²ணே ஏகக்க²ணா ஏகாரம்மணா’’திஆதி³னா சாதி? ஸச்சமேதங், ஏவங் பன ஆக³மனவஸேன தத்தா²பி சதுஸச்சகம்மட்டா²னத³ஸ்ஸனாதி³முகே²ன அரியோவ ‘‘ஏவங் புரிமேஸுபி த்³வீஸூதி ஏதேனாதி.
பஞ்ஹபுச்ச²கவண்ணனா நிட்டி²தா.
ஸச்சவிப⁴ங்க³வண்ணனா நிட்டி²தா.