21. ஏகவீஸதிமவக்³கோ³
(200) 1. ஸாஸனகதா²
878. ஸாஸனங் நவங் கதந்தி? ஆமந்தா. ஸதிபட்டா²னா நவங் கதாதி? ந ஹேவங் வத்தப்³பே³…பே॰… ஸாஸனங் நவங் கதந்தி? ஆமந்தா. ஸம்மப்பதா⁴னா…பே॰… இத்³தி⁴பாதா³…பே॰… இந்த்³ரியா…பே॰… ப³லா…பே॰… பொ³ஜ்ஜ²ங்கா³ நவங் கதாதி? ந ஹேவங் வத்தப்³பே³…பே॰… புப்³பே³ அகுஸலங் பச்சா² குஸலங் கதந்தி? ந ஹேவங் வத்தப்³பே³…பே॰… புப்³பே³ ஸாஸவங்…பே॰… ஸங்யோஜனியங் க³ந்த²னியங் ஓக⁴னியங் யோக³னியங் நீவரணியங் பராமட்ட²ங் உபாதா³னியங்…பே॰… ஸங்கிலேஸிகங் பச்சா² அஸங்கிலேஸிகங் கதந்தி? ந ஹேவங் வத்தப்³பே³…பே॰….
அத்தி² கோசி ததா²க³தஸ்ஸ ஸாஸனங் நவங் கரோதீதி? ஆமந்தா. அத்தி² கோசி ஸதிபட்டா²னே நவங் கரோதீதி? ந ஹேவங் வத்தப்³பே³…பே॰… அத்தி² கோசி ஸம்மப்பதா⁴னே…பே॰… இத்³தி⁴பாதே³…பே॰… இந்த்³ரியே…பே॰… ப³லே…பே॰… பொ³ஜ்ஜ²ங்கே³ நவங் கரோதீதி? ந ஹேவங் வத்தப்³பே³…பே॰… அத்தி² கோசி புப்³பே³ அகுஸலங் பச்சா² குஸலங் கரோதீதி? ந ஹேவங் வத்தப்³பே³…பே॰… அத்தி² கோசி புப்³பே³ ஸாஸவங்…பே॰… ஸங்கிலேஸிகங் பச்சா² அஸங்கிலேஸியங் கரோதீதி? ந ஹேவங் வத்தப்³பே³…பே॰….
லப்³பா⁴ ததா²க³தஸ்ஸ ஸாஸனங் புன நவங் காதுந்தி? ஆமந்தா. லப்³பா⁴ ஸதிபட்டா²னா புன நவங் காதுந்தி? ந ஹேவங் வத்தப்³பே³…பே॰… லப்³பா⁴ ஸம்மப்பதா⁴னா…பே॰… இத்³தி⁴பாதா³…பே॰… இந்த்³ரியா…பே॰… ப³லா…பே॰… பொ³ஜ்ஜ²ங்கா³ புன நவங் காதுந்தி? ந ஹேவங் வத்தப்³பே³…பே॰… லப்³பா⁴ புப்³பே³ அகுஸலங் பச்சா² குஸலங் காதுந்தி? ந ஹேவங் வத்தப்³பே³…பே॰… லப்³பா⁴ புப்³பே³ ஸாஸவங்…பே॰… ஸங்கிலேஸியங் பச்சா² அஸங்கிலேஸியங் காதுந்தி? ந ஹேவங் வத்தப்³பே³…பே॰….
ஸாஸனகதா² நிட்டி²தா.
21. ஏகவீஸதிமவக்³கோ³
(201) 2. அவிவித்தகதா²
879. புது²ஜ்ஜனோ தேதா⁴துகேஹி த⁴ம்மேஹி அவிவித்தோதி? ஆமந்தா. புது²ஜ்ஜனோ தேதா⁴துகேஹி ப²ஸ்ஸேஹி…பே॰… தேதா⁴துகாஹி வேத³னாஹி… ஸஞ்ஞாஹி … சேதனாஹி… சித்தேஹி… ஸத்³தா⁴ஹி… வீரியேஹி… ஸதீஹி… ஸமாதீ⁴ஹி…பே॰… தேதா⁴துகாஹி பஞ்ஞாஹி அவிவித்தோதி? ந ஹேவங் வத்தப்³பே³…பே॰….
புது²ஜ்ஜனோ தேதா⁴துகேஹி கம்மேஹி அவிவித்தோதி? ஆமந்தா. யஸ்மிங் க²ணே புது²ஜ்ஜனோ சீவரங் தே³தி, தஸ்மிங் க²ணே பட²மங் ஜா²னங் உபஸம்பஜ்ஜ விஹரதி…பே॰… ஆகாஸானஞ்சாயதனங் உபஸம்பஜ்ஜ விஹரதீதி? ந ஹேவங் வத்தப்³பே³…பே॰… யஸ்மிங் க²ணே புது²ஜ்ஜனோ பிண்ட³பாதங் தே³தி…பே॰… ஸேனாஸனங் தே³தி…பே॰… கி³லானபச்சயபே⁴ஸஜ்ஜபரிக்கா²ரங் தே³தி, தஸ்மிங் க²ணே சதுத்த²ங் ஜா²னங் உபஸம்பஜ்ஜ விஹரதி… நேவஸஞ்ஞானாஸஞ்ஞாயதனங் உபஸம்பஜ்ஜ விஹரதீதி? ந ஹேவங் வத்தப்³பே³…பே॰….
880. ந வத்தப்³ப³ங் – ‘‘புது²ஜ்ஜனோ தேதா⁴துகேஹி கம்மேஹி அவிவித்தோ’’தி? ஆமந்தா . புது²ஜ்ஜனஸ்ஸ ரூபதா⁴துஅரூபதா⁴தூபக³ங் கம்மங் பரிஞ்ஞாதந்தி? ந ஹேவங் வத்தப்³பே³. தேன ஹி புது²ஜ்ஜனோ தேதா⁴துகேஹி கம்மேஹி அவிவித்தோதி…பே॰….
அவிவித்தகதா² நிட்டி²தா.
21. ஏகவீஸதிமவக்³கோ³
(202) 3. ஸங்யோஜனகதா²
881. அத்தி² கிஞ்சி ஸங்யோஜனங் அப்பஹாய அரஹத்தப்பத்தீதி? ஆமந்தா. அத்தி² கிஞ்சி ஸக்காயதி³ட்டி²ங் அப்பஹாய…பே॰… விசிகிச்ச²ங் அப்பஹாய…பே॰… ஸீலப்³ப³தபராமாஸங் அப்பஹாய… ராக³ங் அப்பஹாய… தோ³ஸங் அப்பஹாய… மோஹங் அப்பஹாய… அனொத்தப்பங் அப்பஹாய அரஹத்தப்பத்தீதி? ந ஹேவங் வத்தப்³பே³…பே॰….
அத்தி² கிஞ்சி ஸங்யோஜனங் அப்பஹாய அரஹத்தப்பத்தீதி? ஆமந்தா. அரஹா ஸராகோ³ ஸதோ³ஸோ ஸமோஹோ ஸமானோ ஸமக்கோ² ஸபளாஸோ ஸஉபாயாஸோ ஸகிலேஸோதி? ந ஹேவங் வத்தப்³பே³…பே॰… நனு அரஹா நிராகோ³ நித்³தோ³ஸோ நிம்மோஹோ நிம்மானோ நிம்மக்கோ² நிப்பளாஸோ நிருபாயாஸோ நிக்கிலேஸோதி? ஆமந்தா. ஹஞ்சி அரஹா நிராகோ³…பே॰… நிக்கிலேஸோ, நோ ச வத ரே வத்தப்³பே³ – ‘‘அத்தி² கிஞ்சி ஸங்யோஜனங் அப்பஹாய அரஹத்தப்பத்தீ’’தி.
882. ந வத்தப்³ப³ங் – ‘‘அத்தி² கிஞ்சி ஸங்யோஜனங் அப்பஹாய அரஹத்தப்பத்தீ’’தி ? ஆமந்தா. அரஹா ஸப்³ப³ங் பு³த்³த⁴விஸயங் ஜானாதீதி? ந ஹேவங் வத்தப்³பே³. தேன ஹி அத்தி² கிஞ்சி ஸங்யோஜனங் அப்பஹாய அரஹத்தப்பத்தீதி.
ஸங்யோஜனகதா² நிட்டி²தா.
21. ஏகவீஸதிமவக்³கோ³
(203) 4. இத்³தி⁴கதா²
883. அத்தி² அதி⁴ப்பாயஇத்³தி⁴ பு³த்³தா⁴னங் வா ஸாவகானங் வாதி? ஆமந்தா. ‘‘நிச்சபண்ணா ருக்கா² ஹொந்தூ’’தி – அத்தி² அதி⁴ப்பாயஇத்³தி⁴ பு³த்³தா⁴னங் வா ஸாவகானங் வாதி? ந ஹேவங் வத்தப்³பே³…பே॰… நிச்சபுப்பா² ருக்கா² ஹொந்து…பே॰… நிச்சப²லிகா ருக்கா² ஹொந்து… நிச்சங் ஜுண்ஹங் ஹோது… நிச்சங் கே²மங் ஹோது… நிச்சங் ஸுபி⁴க்க²ங் ஹோது… ‘‘நிச்சங் ஸுவத்தி² ஸுவுட்டி²கங் (ஸ்யா॰) ஹோதூ’’தி – அத்தி² அதி⁴ப்பாயஇத்³தி⁴ பு³த்³தா⁴னங் வா ஸாவகானங் வாதி? ந ஹேவங் வத்தப்³பே³…பே॰….
அத்தி² அதி⁴ப்பாயஇத்³தி⁴ பு³த்³தா⁴னங் வா ஸாவகானங் வாதி? ஆமந்தா . ‘‘உப்பன்னோ ப²ஸ்ஸோ மா நிருஜ்ஜீ²’’தி – அத்தி² அதி⁴ப்பாயஇத்³தி⁴ பு³த்³தா⁴னங் வா ஸாவகானங் வாதி? ந ஹேவங் வத்தப்³பே³…பே॰….
உப்பன்னா வேத³னா…பே॰… ஸஞ்ஞா… சேதனா… சித்தங்… ஸத்³தா⁴… வீரியங்… ஸதி… ஸமாதி⁴…பே॰… பஞ்ஞா மா நிருஜ்ஜீ²தி – அத்தி² அதி⁴ப்பாயஇத்³தி⁴ பு³த்³தா⁴னங் வா ஸாவகானங் வாதி? ந ஹேவங் வத்தப்³பே³…பே॰….
அத்தி² அதி⁴ப்பாயஇத்³தி⁴ பு³த்³தா⁴னங் வா ஸாவகானங் வாதி? ஆமந்தா. ‘‘ரூபங் நிச்சங் ஹோதூ’’தி – அத்தி² அதி⁴ப்பாயஇத்³தி⁴… வேத³னா…பே॰… ஸஞ்ஞா…பே॰… ஸங்கா²ரா…பே॰… ‘‘விஞ்ஞாணங் நிச்சங் ஹோதூ’’தி – அத்தி² அதி⁴ப்பாயஇத்³தி⁴ பு³த்³தா⁴னங் வா ஸாவகானங் வாதி? ந ஹேவங் வத்தப்³பே³…பே॰….
அத்தி² அதி⁴ப்பாயஇத்³தி⁴ பு³த்³தா⁴னங் வா ஸாவகானங் வாதி? ஆமந்தா. ‘‘ஜாதித⁴ம்மா ஸத்தா மா ஜாயிங்ஸூ’’தி அத்தி²…பே॰… ‘‘ஜராத⁴ம்மா ஸத்தா மா ஜீரிங்ஸூ’’தி…பே॰… ‘‘ப்³யாதி⁴த⁴ம்மா ஸத்தா மா ப்³யாதி⁴யிங்ஸூ’’தி…பே॰… ‘‘மரணத⁴ம்மா ஸத்தா மா மீயிங்ஸூ’’தி – அத்தி² அதி⁴ப்பாயஇத்³தி⁴ பு³த்³தா⁴னங் வா ஸாவகானங் வாதி? ந ஹேவங் வத்தப்³பே³…பே॰….
884. ந வத்தப்³ப³ங் – ‘‘அத்தி² அதி⁴ப்பாயஇத்³தி⁴ பு³த்³தா⁴னங் வா ஸாவகானங் வா’’தி? ஆமந்தா . நனு ஆயஸ்மா பிலிந்த³வச்சோ² ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பாஸாத³ங் ‘‘ஸுவண்ண’’ந்த்வேவ அதி⁴முச்சி, ஸுவண்ணோ ச பன ஆஸீதி பாரா॰ 621; மஹாவ॰ 271? ஆமந்தா. ஹஞ்சி ஆயஸ்மா பிலிந்த³வச்சோ² ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பாஸாத³ங் ஸுவண்ணந்த்வேவ அதி⁴முச்சி, ஸுவண்ணோ ச பன ஆஸி, தேன வத ரே வத்தப்³பே³ – ‘‘அத்தி² அதி⁴ப்பாயஇத்³தி⁴ பு³த்³தா⁴னங் வா ஸாவகானங் வா’’தி.
இத்³தி⁴கதா² நிட்டி²தா.
21. ஏகவீஸதிமவக்³கோ³
(204) 5. பு³த்³த⁴கதா²
885. அத்தி² பு³த்³தா⁴னங் பு³த்³தே⁴ஹி ஹீனாதிரேகதாதி? ஆமந்தா. ஸதிபட்டா²னதோதி? ந ஹேவங் வத்தப்³பே³ …பே॰… ஸம்மப்பதா⁴னதோ…பே॰… இத்³தி⁴பாத³தோ… இந்த்³ரியதோ… ப³லதோ… பொ³ஜ்ஜ²ங்க³தோ… வஸிபா⁴வதோ…பே॰… ஸப்³ப³ஞ்ஞுதஞாணத³ஸ்ஸனதோதி? ந ஹேவங் வத்தப்³பே³…பே॰….
பு³த்³த⁴கதா² நிட்டி²தா.
21. ஏகவீஸதிமவக்³கோ³
(205) 6. ஸப்³ப³தி³ஸாகதா²
886. ஸப்³பா³ தி³ஸா பு³த்³தா⁴ திட்ட²ந்தீதி? ஆமந்தா. புரத்தி²மாய தி³ஸாய பு³த்³தோ⁴ திட்ட²தீதி? ந ஹேவங் வத்தப்³பே³…பே॰… புரத்தி²மாய தி³ஸாய பு³த்³தோ⁴ திட்ட²தீதி? ஆமந்தா. கின்னாமோ ஸோ ப⁴க³வா, கிங்ஜச்சோ, கிங்கொ³த்தோ, கின்னாமா தஸ்ஸ ப⁴க³வதோ மாதாபிதரோ, கின்னாமங் தஸ்ஸ ப⁴க³வதோ ஸாவகயுக³ங், கோனாமோ தஸ்ஸ ப⁴க³வதோ உபட்டா²கோ, கீதி³ஸங் சீவரங் தா⁴ரேதி, கீதி³ஸங் பத்தங் தா⁴ரேதி, கதரஸ்மிங் கா³மே வா நிக³மே வா நக³ரே வா ரட்டே² வா ஜனபதே³ வாதி? ந ஹேவங் வத்தப்³பே³…பே॰….
த³க்கி²ணாய தி³ஸாய…பே॰… பச்சி²மாய தி³ஸாய…பே॰… உத்தராய தி³ஸாய…பே॰… ஹெட்டி²மாய தி³ஸாய பு³த்³தோ⁴ திட்ட²தீதி? ந ஹேவங் வத்தப்³பே³…பே॰… ஹெட்டி²மாய தி³ஸாய பு³த்³தோ⁴ திட்ட²தீதி? ஆமந்தா. கின்னாமோ ஸோ ப⁴க³வா…பே॰… ஜனபதே³ வாதி? ந ஹேவங் வத்தப்³பே³…பே॰….
உபரிமாய தி³ஸாய பு³த்³தோ⁴ திட்ட²தீதி? ந ஹேவங் வத்தப்³பே³…பே॰…. உபரிமாய தி³ஸாய பு³த்³தோ⁴ திட்ட²தீதி? ஆமந்தா. சாதுமஹாராஜிகே திட்ட²தி…பே॰… தாவதிங்ஸே திட்ட²தி…பே॰… யாமே திட்ட²தி…பே॰… துஸிதே திட்ட²தி…பே॰… நிம்மானரதியா திட்ட²தி…பே॰… பரனிம்மிதவஸவத்தியா திட்ட²தி…பே॰… ப்³ரஹ்மலோகே திட்ட²தீதி? ந ஹேவங் வத்தப்³பே³…பே॰….
ஸப்³ப³தி³ஸாகதா² நிட்டி²தா.
21. ஏகவீஸதிமவக்³கோ³
(206) 7. த⁴ம்மகதா²
887. ஸப்³பே³ த⁴ம்மா நியதாதி? ஆமந்தா. மிச்ச²த்தனியதாதி? ந ஹேவங் வத்தப்³பே³…பே॰… ஸம்மத்தனியதாதி? ந ஹேவங் வத்தப்³பே³…பே॰… நத்தி² அனியதோ ராஸீதி? ந ஹேவங் வத்தப்³பே³…பே॰… நனு அத்தி² அனியதோ ராஸீதி? ஆமந்தா . ஹஞ்சி அத்தி² அனியதோ ராஸி, நோ ச வத ரே வத்தப்³பே³ – ‘‘ஸப்³பே³ த⁴ம்மா நியதா’’தி.
ஸப்³பே³ த⁴ம்மா நியதாதி? ஆமந்தா. நனு தயோ ராஸீ வுத்தா ப⁴க³வதா – மிச்ச²த்தனியதோ ராஸி, ஸம்மத்தனியதோ ராஸி, அனியதோ ராஸீதி த⁴॰ ஸ॰ திகமாதிகா 15? ஆமந்தா. ஹஞ்சி தயோ ராஸீ வுத்தா ப⁴க³வதா – மிச்ச²த்தனியதோ ராஸி, ஸம்மத்தனியதோ ராஸி, அனியதோ ராஸி, நோ ச வத ரே வத்தப்³பே³ – ‘‘ஸப்³பே³ த⁴ம்மா நியதா’’தி.
ரூபங் ரூபட்டே²ன நியதந்தி? ஆமந்தா. மிச்ச²த்தனியதந்தி? ந ஹேவங் வத்தப்³பே³…பே॰… ஸம்மத்தனியதந்தி? ந ஹேவங் வத்தப்³பே³…பே॰… வேத³னா…பே॰… ஸஞ்ஞா…பே॰… ஸங்கா²ரா…பே॰… விஞ்ஞாணங் விஞ்ஞாணட்டே²ன நியதந்தி? ஆமந்தா. மிச்ச²த்தனியதந்தி? ந ஹேவங் வத்தப்³பே³…பே॰… ஸம்மத்தனியதந்தி? ந ஹேவங் வத்தப்³பே³…பே॰….
888. ந வத்தப்³ப³ங் – ரூபங் ரூபட்டே²ன நியதங்…பே॰… வேத³னா…பே॰… ஸஞ்ஞா…பே॰… ஸங்கா²ரா…பே॰… விஞ்ஞாணங் விஞ்ஞாணட்டே²ன நியதந்தி? ஆமந்தா. ரூபங் வேத³னா ஹோதி…பே॰… ஸஞ்ஞா ஹோதி… ஸங்கா²ரா ஹொந்தி… விஞ்ஞாணங் ஹோதி… வேத³னா…பே॰… ஸஞ்ஞா…பே॰… ஸங்கா²ரா…பே॰… விஞ்ஞாணங் ரூபங் ஹோதி…பே॰… வேத³னா ஹோதி… ஸஞ்ஞா ஹோதி… ஸங்கா²ரா ஹொந்தீதி? ந ஹேவங் வத்தப்³பே³. தேன ஹி ரூபங் ரூபட்டே²ன நியதங், வேத³னா…பே॰… ஸஞ்ஞா…பே॰… ஸங்கா²ரா…பே॰… விஞ்ஞாணங் விஞ்ஞாணட்டே²ன நியதந்தி.
த⁴ம்மகதா² நிட்டி²தா.
21. ஏகவீஸதிமவக்³கோ³
(207) 8. கம்மகதா²
889. ஸப்³பே³ கம்மா நியதாதி? ஆமந்தா. மிச்ச²த்தனியதாதி? ந ஹேவங் வத்தப்³பே³…பே॰… ஸம்மத்தனியதாதி? ந ஹேவங் வத்தப்³பே³…பே॰… நத்தி² அனியதோ ராஸீதி? ந ஹேவங் வத்தப்³பே³…பே॰… நனு அத்தி² அனியதோ ராஸீதி? ஆமந்தா. ஹஞ்சி அத்தி² அனியதோ ராஸி, நோ ச வத ரே வத்தப்³பே³ – ‘‘ஸப்³பே³ கம்மா நியதா’’தி.
ஸப்³பே³ கம்மா நியதாதி? ஆமந்தா. நனு தயோ ராஸீ வுத்தா ப⁴க³வதா – மிச்ச²த்தனியதோ ராஸி, ஸம்மத்தனியதோ ராஸி, அனியதோ ராஸீதி? ஆமந்தா. ஹஞ்சி தயோ ராஸீ வுத்தா ப⁴க³வதா – மிச்ச²த்தனியதோ ராஸி, ஸம்மத்தனியதோ ராஸி, அனியதோ ராஸி, நோ ச வத ரே வத்தப்³பே³ – ‘‘ஸப்³பே³ கம்மா நியதா’’தி.
890. தி³ட்ட²த⁴ம்மவேத³னீயங் கம்மங் தி³ட்ட²த⁴ம்மவேத³னீயட்டே²ன நியதந்தி? ஆமந்தா. மிச்ச²த்தனியதந்தி? ந ஹேவங் வத்தப்³பே³…பே॰… ஸம்மத்தனியதந்தி? ந ஹேவங் வத்தப்³பே³…பே॰…. உபபஜ்ஜவேத³னீயங் கம்மங்…பே॰… அபராபரியவேத³னீயங் கம்மங் அபராபரியவேத³னீயட்டே²ன நியதந்தி? ஆமந்தா. மிச்ச²த்தனியதந்தி? ந ஹேவங் வத்தப்³பே³…பே॰… ஸம்மத்தனியதந்தி? ந ஹேவங் வத்தப்³பே³…பே॰….
891. ந வத்தப்³ப³ங் – தி³ட்ட²த⁴ம்மவேத³னீயங் கம்மங் தி³ட்ட²த⁴ம்மவேத³னீயட்டே²ன நியதங், உபபஜ்ஜவேத³னீயங் கம்மங்…பே॰… அபராபரியவேத³னீயங் கம்மங் அபராபரியவேத³னீயட்டே²ன நியதந்தி? ஆமந்தா. தி³ட்ட²த⁴ம்மவேத³னீயங் கம்மங் உபபஜ்ஜவேத³னீயங் ஹோதி, அபராபரியவேத³னீயங் ஹோதி…பே॰… உபபஜ்ஜவேத³னீயங் கம்மங் தி³ட்ட²த⁴ம்மவேத³னீயங் ஹோதி, அபராபரியவேத³னீயங் ஹோதி…பே॰… அபராபரியவேத³னீயங் கம்மங் தி³ட்ட²த⁴ம்மவேத³னீயங் ஹோதி, உபபஜ்ஜவேத³னீயங் ஹோதீதி? ந ஹேவங் வத்தப்³பே³ . தேன ஹி தி³ட்ட²த⁴ம்மவேத³னீயங் கம்மங் தி³ட்ட²த⁴ம்மவேத³னீயட்டே²ன நியதங், உபபஜ்ஜவேத³னீயங் கம்மங்…பே॰… அபராபரியவேத³னீயங் கம்மங் அபராபரியவேத³னீயட்டே²ன நியதந்தி.
கம்மகதா² நிட்டி²தா.
ஏகவீஸதிமவக்³கோ³.
தஸ்ஸுத்³தா³னங் –
ஸாஸனங் நவங் கதங் அத்தி² கோசி ததா²க³தஸ்ஸ ஸாஸனங் நவங் கரோதி லப்³பா⁴ ததா²க³தஸ்ஸ ஸாஸனங் புன நவங் காதுங், புது²ஜ்ஜனோ தேதா⁴துகேஹி த⁴ம்மேஹி அவிவித்தோ, அத்தி² கிஞ்சி ஸங்யோஜனங் அப்பஹாய அரஹத்தப்பத்தி, அத்தி² அதி⁴ப்பாயித்³தி⁴ பு³த்³தா⁴னங் வா ஸாவகானங் வா, அத்தி² பு³த்³தா⁴னங் பு³த்³தே⁴ஹி ஹீனாதிரேகதா, ஸப்³பா³ தி³ஸா பு³த்³தா⁴ திட்ட²ந்தி, ஸப்³பே³ த⁴ம்மா நியதா, ஸப்³பே³ கம்மா நியதாதி.