யமகபகரண-அனுடீகா
க³ந்தா²ரம்ப⁴வண்ணனா
ஸங்கே²பேனேவாதி த⁴ம்மேஸூதி க²ந்தா⁴தி³த⁴ம்மேஸு குஸலாதி³த⁴ம்மேஸு ச. அவிபரீததோ க³ஹிதேஸு த⁴ம்மேஸு மூலயமகாதி³வஸேன பவத்தியமானா தே³ஸனா வேனெய்யானங் நானப்பகாரகோஸல்லாவஹா பரிஞ்ஞாகிச்சஸாத⁴னீ ச ஹோதி, ந விபரீததோதி ஆஹ ‘‘விபரீதக்³க³ஹணங்…பே॰… ஆரத்³த⁴’’ந்தி. ஏதேன கதா²வத்து²பகரணதே³ஸனானந்தரங் யமகபகரணதே³ஸனாய காரணமாஹ. தத்த² விபரீதக்³க³ஹணந்தி புக்³க³லபரிக்³க³ஹணாதி³மிச்சா²கா³ஹங். த⁴ம்மபுக்³க³லோகாஸாதி³னிஸ்ஸயானந்தி ‘‘யே கேசி குஸலா த⁴ம்மா, ஸப்³பே³ தே குஸலமூலா’’திஆதி³னா (யம॰ 1.மூலயமக.1) த⁴ம்மே, ‘‘யஸ்ஸ ரூபக்க²ந்தோ⁴ உப்பஜ்ஜதி, தஸ்ஸ வேத³னாக்க²ந்தோ⁴ உப்பஜ்ஜதீ’’திஆதி³னா (யம॰ 1.க²ந்த⁴யமக.50) புக்³க³லங் ‘‘யத்த² ரூபக்க²ந்தோ⁴ உப்பஜ்ஜதி, தத்த² வேத³னாக்க²ந்தோ⁴ உப்பஜ்ஜதீ’’திஆதி³னா (யம॰ 1.க²ந்த⁴யமக.51) ஓகாஸங் நிஸ்ஸாய ஆரப்³ப⁴ பவத்தானங். ஆதி³-ஸத்³தே³ன புக்³க³லோகாஸஉப்பாத³னிரோத⁴தது³ப⁴யபரிஞ்ஞாதீ³னங் ஸங்க³ஹோ த³ட்ட²ப்³போ³. ஸன்னிட்டா²னஸங்ஸயானந்தி
காமஞ்செத்த² த⁴ம்மபடிக்³கா³ஹகானங் ஸங்ஸயபுப்³ப³கங் ஸன்னிட்டா²னந்தி பட²மங் ஸங்ஸயோ வத்தப்³போ³, தே³ஸெந்தஸ்ஸ பன ப⁴க³வதோ ஸன்னிட்டா²னபுப்³ப³கோ ஸங்ஸயோதி த³ஸ்ஸனத்த²ங் அயங் பதா³னுக்கமோ கதோ. ஸப்³ப³ஞ்ஹி பரிஞ்ஞெய்யங் ஹத்தா²மலகங் விய பச்சக்க²ங் கத்வா டி²தஸ்ஸ த⁴ம்மஸாமினோ ந கத்த²சி ஸங்ஸயோ, விஸ்ஸஜ்ஜேதுகாமதாய பன வினெய்யஜ்ஜா²ஸயக³தங் ஸங்ஸயங் த³ஸ்ஸெந்தோ ஸங்ஸயிதவஸேன புச்ச²ங் கரோதீதி ஏவங் விஸ்ஸஜ்ஜனபுச்ச²னவஸேன ந ஸன்னிட்டா²னஸங்ஸயா லப்³ப⁴ந்தீதி அயமத்தோ² த³ஸ்ஸிதோ, நிச்சி²தஸங்ஸயத⁴ம்மவஸேனேவ பனெத்த² ஸன்னிட்டா²னஸங்ஸயா அட்ட²கதா²யங் ‘‘குஸலேஸு குஸலா நு கோ², ந நு கோ² குஸலாதி ஸந்தே³ஹாபா⁴வதோ’’திஆதி³. தேனேவ ச ‘‘ஸன்னிட்டா²னஸங்ஸயான’’ந்தி, ‘‘ஸன்னிட்டா²னஸங்ஸயவஸேனா’’தி ச பட²மங் ஸன்னிட்டா²னக்³க³ஹணங் கதங்.
தந்தி யமகபகரணங். தஸ்ஸ யே ஸமயாத³யோ வத்தப்³பா³, தே கதா²வத்து²பகரணதே³ஸனானந்தரோ தே³ஸனாஸமயோ, தாவதிங்ஸப⁴வனமேவ தே³ஸனாதே³ஸோ, குஸலாகுஸலமூலாதி³யமகாகாரேன தே³ஸனாதி விபா⁴க³தோ ‘‘ஸங்கே²பேனேவா’’திஆதி³கா³தா²ஹி விபா⁴விதா நிமித்தேன ஸத்³தி⁴ங் ஸங்வண்ணனபடிஞ்ஞா சாதி இமமத்த²ங் த³ஸ்ஸெந்தோ ‘‘ஸமயதே³ஸதே³ஸனாவஸேனா’’திஆதி³மாஹ. நிமித்தஞ்ஹேதங் இத⁴ ஸங்வண்ணனாய, யதி³த³ங் கமானுப்பத்தி ஆக³தபா⁴ரவாஹிதா ச பண்டி³தானங் பண்டி³தகிச்சபா⁴வதோ. தத்த² அனுப்பத்தங் த³ஸ்ஸெத்வாதி ஸம்ப³ந்தோ⁴.
தத்தா²தி தஸ்மிங் ஸமயாதி³த³ஸ்ஸனே. யமனங் உபரமனந்தி யமோ மரணந்தி ஆஹ ‘‘ஜாதியா ஸதி மரணங் ஹோதீதி…பே॰… விஸயோ’’தி. தத்த² யதா² ‘‘ஜாதியா ஸதி மரணங் ஹோதீ’’தி ஜாதி யமஸ்ஸ விஸயோ, ஏவங் ‘‘உபாதா³னக்க²ந்தே⁴ஸு ஸந்தேஸு மரணங் ஹோதீ’’தி உபாதா³னக்க²ந்தா⁴ யமஸ்ஸ விஸயோதி யோஜேதப்³ப³ங். தே ஹி மரணத⁴ம்மினோதி. அனுப்பத்தமரணங்யேவ கிப்³பி³ஸகாரினங் புக்³க³லங் யமபுரிஸா விவிதா⁴ கம்மகாரணா கரொந்தி, ந அப்பத்தமரணந்தி மரணங் யமஸ்ஸ விஸயோ வுத்தோ. ஆணாபவத்திட்டா²னந்தி இத³ங் விஸய-ஸத்³த³ஸ்ஸ அத்த²வசனங். தே³ஸங் வாதி காமாதி³தா⁴துத்தயதே³ஸங் ஸந்தா⁴யாஹ. தா⁴துத்தயிஸ்ஸரோ ஹி மச்சுராஜா. பஞ்சானந்தரியானி அஞ்ஞஸத்தா²ருத்³தே³ஸோ ச, தேன வா ஸத்³தி⁴ங் பஞ்ச வேரானி ச² அப⁴ப்³ப³ட்டா²னானி. ஆவத்தாதி பத³க்கி²ணாவத்தா. தனுருஹாதி லோமா.
க³ந்தா²ரம்ப⁴வண்ணனா நிட்டி²தா.
1. மூலயமகங்
உத்³தே³ஸவாரவண்ணனா
1. யமகஸமூஹஸ்ஸாதி ‘‘தங்ஸமூஹஸ்ஸ ச ஸகலஸ்ஸ பகரணஸ்ஸா’’தி.
குஸலாகுஸலமூலவிஸேஸானந்தி து³தியபுச்சா²ய வுத்தானங் ஸங்ஸயபத³ஸங்க³ஹிதானங் குஸலஸங்கா²தானங், ததா² பட²மபுச்சா²ய வுத்தானங் குஸலமூலஸங்கா²தானங் விஸேஸானங் அத்த²யமகபா⁴வஸ்ஸ வுத்தத்தாதி யோஜனா. யதா² ஹி பட²மபுச்சா²ய விஸேஸவந்தபா⁴வேன வுத்தாயேவ குஸலத⁴ம்மா து³தியபுச்சா²யங் விஸேஸபா⁴வேன வுத்தா, ஏவங் பட²மபுச்சா²யங் விஸேஸபா⁴வேன வுத்தாயேவ குஸலமூலத⁴ம்மா து³தியபுச்சா²யங் விஸேஸவந்தபா⁴வேன வுத்தா. வத்துவசனிச்சா²வஸேன ஹி த⁴ம்மானங் விஸேஸவிஸேஸவந்ததாவிபா⁴கா³ ஹொந்தீதி. குஸலமூலகுஸலவிஸேஸேஹி ஸங்ஸயிதபத³ஸங்க³ஹிதேஹி குஸலகுஸலமூலானங் விஸேஸவந்தானந்தி அதி⁴ப்பாயோ. எத்த² ச விஸேஸவந்தாபெக்க²விஸேஸவஸேன பட²மோ அத்த²விகப்போ வுத்தோ, து³தியோ பன விஸேஸாபெக்க²விஸேஸவந்தவஸேனாதி அயமேதேஸங் விஸேஸோ. தேனாஹ ‘‘ஞாதுங் இச்சி²தானங் ஹீ’’திஆதி³.
தத்த² ஞாதுங் இச்சி²தானந்தி புச்சா²ய விஸயபூ⁴தானந்தி அத்தோ². விஸேஸானந்தி குஸலகுஸலமூலவிஸேஸானங். விஸேஸவந்தாபெக்கா²னந்தி குஸலமூலகுஸலஸங்கா²தேஹி விஸேஸவந்தேஹி ஸாபெக்கா²னங். விஸேஸவதந்தி குஸலமூலகுஸலானங். விஸேஸாபெக்கா²னந்தி குஸலகுஸலமூலவிஸேஸேஹி ஸாபெக்கா²னங். எத்தா²தி ஏதஸ்மிங் மூலயமகே. பதா⁴னபா⁴வோதி பட²மவிகப்பே தாவ ஸங்ஸயிதப்பதா⁴னத்தா புச்சா²ய விஸேஸானங் பதா⁴னபா⁴வோ வேதி³தப்³போ³. தே ஹி ஸங்ஸயிதானங் விஸேஸவந்தோதி. து³தியவிகப்பே பன விஸேஸா நாம விஸேஸவந்தாதீ⁴னாதி விஸேஸவந்தானங் தத்த² பதா⁴னபா⁴வோ த³ட்ட²ப்³போ³. த்³வின்னங் பன ஏகஜ்ஜ²ங் பதா⁴னபா⁴வோ ந யுஜ்ஜதி. ஸதி ஹி அப்பதா⁴னே பதா⁴னங் நாம ஸியா. தேனாஹ ‘‘ஏகேகாய புச்சா²ய ஏகேகோ ஏவ அத்தோ² ஸங்க³ஹிதோ ஹோதீ’’தி. ஏவஞ்சேதங் ஸம்படிச்சி²தப்³ப³ங், அஞ்ஞதா² வினிச்சி²தவிஸேஸிதப்³ப³பா⁴வேஹி இத⁴ பதா⁴னபா⁴வோ ந யுஜ்ஜதேவாதி. ந த⁴ம்மவாசகோதி ந ஸபா⁴வத⁴ம்மவாசகோ. ஸபா⁴வத⁴ம்மோபி ஆதி³-ஸத்³தே³னஸ்ஸ ‘‘அத்தா²பி⁴ஸமயா’’திஆதீ³ஸு (ஸங்॰ நி॰ 1.129) ஆக³தா ஹிதாதி³வாசகதா ஸங்க³ய்ஹதி. தேனேவாதி பாளிஅத்த²வாசகத்தா ஏவ.
தீணிபி பதா³னீதி எத்த² பி-ஸத்³தோ³ ஸமுச்சயத்தோ², ஸமுச்சயோ ச துல்யயோகே³ ஸியா. கிங் நாம-பதே³ன அனவஸேஸதோ குஸலாதீ³னங் ஸங்க³ஹோதி ஆஸங்காய ததா³ஸங்கானிவத்தனத்த²மாஹ ‘‘தீணிபி…பே॰… ஸங்கா³ஹகத்த’’ந்தி. தத்த² ஸங்கா³ஹகத்தமத்தந்தி மத்த-ஸத்³தோ³ விஸேஸனிவத்திஅத்தோ²தி. தேன நிவத்திதங் விஸேஸங் த³ஸ்ஸேதுங் ‘‘ந நிரவஸேஸஸங்கா³ஹகத்த’’ந்தி வுத்தங். ந ஹி ரூபங் நாம-பதே³ன ஸங்க³ய்ஹதி. குஸலாதி³யேவ நாமந்தி நியமோ த³ட்ட²ப்³போ³, ந நாமங்யேவ குஸலாதீ³தி இமமேவ ச நியமங் ஸந்தா⁴யாஹ ‘‘குஸலாதீ³னங் ஸங்கா³ஹகத்தமத்தமேவ ஸந்தா⁴ய வுத்த’’ந்தி. யதி³பி நாம-பத³ங் ந நிரவஸேஸகுஸலாதி³ஸங்கா³ஹகங், குஸலாதி³ஸங்கா³ஹகங் பன ஹோதி, தத³த்த²மேவ ச தங் க³ஹிதந்தி நாமஸ்ஸ குஸலத்திகபரியாபன்னதா வுத்தாதி த³ஸ்ஸெந்தோ ஆஹ ‘‘குஸலாதி³…பே॰… வுத்த’’ந்தி.
உத்³தே³ஸவாரவண்ணனா நிட்டி²தா.
நித்³தே³ஸவாரவண்ணனா
52. து³தியயமகேதி ஏகமூலயமகே. ஏவமிதா⁴பீதி யதா² ஏகமூலயமகே ‘‘யே கேசி குஸலா’’இச்சேவ புச்சா² ஆரத்³தா⁴, ஏவங் இதா⁴பி அஞ்ஞமஞ்ஞமூலயமகேபி ‘‘யே கேசி குஸலா’’இச்சேவ புச்சா² ஆரபி⁴தப்³பா³ ஸியா. கஸ்மா? புரிமயமக…பே॰… அப்பவத்தத்தாதி. இத³ஞ்ச து³தியயமகஸ்ஸ ததா² அப்பவத்தத்தா வுத்தங், ததியயமகங் பன ததே²வ பவத்தங். கேசீதி பத³காரா. தே ஹி யதா² பட²மது³தியயமகேஸு புரிமபுச்சா² ஏவ பரிவத்தனவஸேன பச்சி²மபுச்சா² கதாதி பச்சி²மபுச்சா²ய புரிமபுச்சா² ஸமானா ட²பெத்வா படிலோமபா⁴வங், ந ததா² அஞ்ஞமஞ்ஞயமகே. தத்த² ஹி த்³வேபி புச்சா² அஞ்ஞமஞ்ஞவிஸதி³ஸா. யதி³ தத்தா²பி த்³வீஹிபி புச்சா²ஹி ஸதி³ஸாஹி ப⁴விதப்³ப³ங்
அத்த²வஸேனாதி ஸம்ப⁴வந்தானங் நிச்சி²தஸங்ஸயிதானங் அத்தா²னங் வஸேன. தத³னுரூபாயாதி தஸ்ஸா புரிமபுச்சா²ய அத்த²தோ ப்³யஞ்ஜனதோ ச அனுச்ச²விகாய. புரிமஞ்ஹி அபெக்கி²த்வா பச்சி²மாய ப⁴விதப்³ப³ங். தேனாதி தஸ்மா. யஸ்மா அனுலோமே ஸங்ஸயச்சே²தே³ ஜாதேபி படிலோமே ஸங்ஸயோ உப்பஜ்ஜதி, யதி³ ந உப்பஜ்ஜெய்ய, படிலோமபுச்சா²ய பயோஜனமேவ ந ஸியா, தஸ்மா ந பச்சி²மபுச்சா²னுரூபா புரிமபுச்சா², அத² கோ² வுத்தனயேன புரிமபுச்சா²னுரூபா பச்சி²மபுச்சா², தாய ச அனுரூபதாய அத்தா²தி³வஸேன த்³வின்னங் பதா³னங் ஸம்ப³ந்த⁴த்தா அத்தா²தி³யமகதா வுத்தா. தே³ஸனாக்கமதோ செத்த² அனுலோமபடிலோமதா வேதி³தப்³பா³ ‘‘குஸலா குஸலமூலா’’தி வத்வா ‘‘குஸலமூலா குஸலா’’தி ச வுத்தத்தா. ஸேஸயமகேஸுபி ஏஸேவ நயோ. விஸேஸவந்தவிஸேஸ, விஸேஸவிஸேஸவந்தக்³க³ஹணதோ வா இத⁴ அனுலோமபடிலோமதா வேதி³தப்³பா³. பட²மபுச்சா²யஞ்ஹி யே த⁴ம்மா விஸேஸவந்தோ, தே நிச்ச²யாதி⁴ட்டா²னே கத்வா த³ஸ்ஸெந்தோ ‘‘யே கேசி குஸலா த⁴ம்மா’’தி வத்வா தேஸு யஸ்மிங் விஸேஸோ ஸங்ஸயாதி⁴ட்டா²னோ, தங்த³ஸ்ஸனத்த²ங் ‘‘ஸப்³பே³ தே குஸலமூலா’’தி புச்சா² கதா. து³தியபுச்சா²யங் பன தப்படிலோமதோ யேன விஸேஸேன தே விஸேஸவந்தோ, தங் விஸேஸங் ஸன்னிட்டா²னங் கத்வா த³ஸ்ஸெந்தோ ‘‘யே வா பன குஸலமூலா’’தி வத்வா தே விஸேஸவந்தே ஸங்ஸயாதி⁴ட்டா²னபூ⁴தே த³ஸ்ஸேதுங் ‘‘ஸப்³பே³ தே த⁴ம்மா குஸலா’’தி புச்சா² கதா. அனியதவத்து²கா ஹி ஸன்னிட்டா²னஸங்ஸயா அனேகஜ்ஜா²ஸயத்தா ஸத்தானங்.
இமினாபி ப்³யஞ்ஜனேனாதி ‘‘யே கேசி குஸலமூலேன ஏகமூலா’’தி இமினாபி வாக்யேன. ஏவங் ந ஸக்கா வத்துந்தி யேனாதி⁴ப்பாயேன வுத்தங், தமேவாதி⁴ப்பாயங் விவரதி ‘‘ந ஹீ’’திஆதி³னா. தத்த² தேனேவாதி குஸலப்³யஞ்ஜனத்த²ஸ்ஸ குஸலமூலேன ஏகமூலப்³யஞ்ஜனத்த²ஸ்ஸ பி⁴ன்னத்தா ஏவ. விஸ்ஸஜ்ஜனந்தி விப⁴ஜனங் இதரதா²தி குஸலமூலேன ஏகமூலப்³யஞ்ஜனேன புச்சா²ய கதாய. தானி வசனானீதி குஸலவசனங் குஸலமூலேன ஏகமூலவசனஞ்ச. குஸலசித்தஸமுட்டா²னரூபவஸேன சஸ்ஸ அப்³யாகததீ³பனதா த³ட்ட²ப்³பா³. எத்தா²தி ‘‘இமினாபி ப்³யஞ்ஜனேன தஸ்ஸேவத்த²ஸ்ஸ ஸம்ப⁴வதோ’’தி ஏதஸ்மிங் வசனே. யே கேசி குஸலா…பே॰… ஸம்ப⁴வதோதி ஏதேன குஸலானங் குஸலமூலேன ஏகமூலதாய ப்³யபி⁴சாராபா⁴வங் த³ஸ்ஸேதி. தேனேவாஹ ‘‘ந ஹி…பே॰… ஸந்தீ’’தி. வுத்தப்³யஞ்ஜனத்த²ஸ்ஸேவ ஸம்ப⁴வதோதி ஹி இமினா அவுத்தப்³யஞ்ஜனத்த²ஸ்ஸ ஸம்ப⁴வாபா⁴வவசனேன ஸ்வாயமதி⁴ப்பாயமத்தோ² விபா⁴விதோ. யதா² ஹி குஸலமூலேன ஏகமூலப்³யஞ்ஜனத்தோ² குஸலப்³யஞ்ஜனத்த²ங் ப்³யபி⁴சரதி, ந ஏவங் தங் குஸலப்³யஞ்ஜனத்தோ². கத²ங் கத்வா சோத³னா, கத²ஞ்ச கத்வா பரிஹாரோ? குஸலமூலேன ஏகமூலா குஸலா ஏவாதி சோத³னா கதா, குஸலமூலேன ஏகமூலா ஏவ குஸலாதி பன பரிஹாரோ பவத்தோதி வேதி³தப்³ப³ங். து³தியயமகே விய அபுச்சி²த்வாதி ‘‘யே கேசி குஸலா’’தி அபுச்சி²த்வா. குஸலமூலேஹீதி குஸலேஹி மூலேஹி. தேதி குஸலமூலேன ஏகமூலா.
ஏகதோ உப்பஜ்ஜந்தீதி எத்த² இதி-ஸத்³தோ³ ஆதி³அத்தோ² பகாரத்தோ² வா. தேன ‘‘குஸலமூலானி ஏகமூலானி சேவ அஞ்ஞமஞ்ஞமூலானி சா’’திஆதி³பாளிஸேஸங் த³ஸ்ஸேதி. யங் ஸந்தா⁴ய ‘‘ஹெட்டா² வுத்தனயேனேவ விஸ்ஸஜ்ஜனங் காதப்³ப³ங் ப⁴வெய்யா’’தி வுத்தங். தத்த² ஹெட்டா²தி அனுலோமபுச்சா²விஸ்ஸஜ்ஜனே. வுத்தனயேனாதி ‘‘மூலானி யானி ஏகதோ உப்பஜ்ஜந்தீ’’திஆதி³னா வுத்தனயேன. தம்பீதி ‘‘குஸலமூலேனா’’திஆதி³ அட்ட²கதா²வசனம்பி. ததா²தி தேன பகாரேன, அனுலோமபுச்சா²யங் விய விஸ்ஸஜ்ஜனங் காதப்³ப³ங் ப⁴வெய்யாதி இமினா பகாரேனாதி அத்தோ². யேன காரணேன ‘‘ந ஸக்கா வத்து’’ந்தி வுத்தங், தங் காரணங் த³ஸ்ஸேதுங் ‘‘யே வா பனா’’திஆதி³மாஹ. தத்த² ‘‘ஆமந்தா’’இச்சேவ விஸ்ஸஜ்ஜனேன ப⁴விதப்³ப³ந்தி ‘‘ஸப்³பே³ தே த⁴ம்மா குஸலா’’தி புச்சா²யங் விய ‘‘ஸப்³பே³ தே த⁴ம்மா குஸலமூலேன ஏகமூலா’’தி புச்சி²தேபி படிவசனவிஸ்ஸஜ்ஜனமேவ லப்³ப⁴தி, ந அனுலோமபுச்சா²யங் விய ஸரூபத³ஸ்ஸனவிஸ்ஸஜ்ஜனங் விப⁴ஜித்வா த³ஸ்ஸேதப்³ப³ஸ்ஸ அபா⁴வதோ. யே ஹி த⁴ம்மா குஸலமூலேன ஏகமூலா, ந தே த⁴ம்மா குஸலமூலேன அஞ்ஞமஞ்ஞமூலாவ. யே பன குஸலமூலேன அஞ்ஞமஞ்ஞமூலா, தே குஸலமூலேன ஏகமூலாவ. தேனாஹ ‘‘ந ஹி…பே॰… விபா⁴கோ³ காதப்³போ³ ப⁴வெய்யா’’தி.
தத்த² யேனாதி யேன அஞ்ஞமஞ்ஞமூலேஸு ஏகமூலஸ்ஸ அபா⁴வேன. யத்தா²தி யஸ்மிங் ஞாணஸம்பயுத்தசித்துப்பாதே³. அஞ்ஞமஞ்ஞமூலகத்தா ஏகமூலகத்தா சாதி அதி⁴ப்பாயோ. த்³வின்னங் த்³வின்னஞ்ஹி ஏகேகேன அஞ்ஞமஞ்ஞமூலகத்தே வுத்தே தேஸங் ஏகேகேன ஏகமூலகத்தம்பி வுத்தமேவ ஹோதி ஸமானத்தோ² ஏகஸத்³தோ³தி கத்வா. தேனேவாஹ ‘‘யத்த² பன…பே॰… ந ஏகமூலானீ’’தி. தயித³ங் மிச்சா², த்³வீஸுபி ஏகேகேன இதரஸ்ஸ ஏகமூலகத்தங் ஸம்ப⁴வதி ஏவாதி. தேனாஹ ‘‘ஏதஸ்ஸ க³ஹணஸ்ஸ நிவாரணத்த²’’ந்திஆதி³. ‘‘யே த⁴ம்மா குஸலமூலேன அஞ்ஞமஞ்ஞமூலா, தே குஸலமூலேன ஏகமூலா’’தி இமமத்த²ங் விபா⁴வெந்தேன இத⁴ ‘‘ஆமந்தா’’தி பதே³ன யத்த² த்³வே மூலானி உப்பஜ்ஜந்தி, தத்த² ஏகேகேன இதரஸ்ஸ ஏகமூலகத்தங் பகாஸிதமேவாதி ஆஹ ‘‘ஆமந்தாதி இமினாவ விஸ்ஸஜ்ஜனேன தங்க³ஹணனிவாரணதோ’’தி நிச்சி²தத்தாதி எத்த² ஏகதோ உப்பஜ்ஜமானானங் திண்ணன்னங் தாவ மூலானங் நிச்சி²தங் ஹோது அஞ்ஞமஞ்ஞேகமூலகத்தங், த்³வின்னங் பன கத²ந்தி ஆஹ ‘‘அஞ்ஞமஞ்ஞமூலானங் ஹீ’’திஆதி³. ஸமானமூலதா ஏவாதி அவதா⁴ரணேன நிவத்திதத்த²ங் த³ஸ்ஸேதுங் ‘‘ந அஞ்ஞமஞ்ஞஸமானமூலதா’’தி வுத்தங். தேன அஞ்ஞமஞ்ஞமூலானங் ஸமானமூலதாமத்தவசனிச்சா²ய ஏகமூலக்³க³ஹணங், ந தேஸங் அஞ்ஞமஞ்ஞபச்சயதாவிஸிட்ட²ஸமானமூலதாத³ஸ்ஸனத்த²ந்தி இமமத்த²ங் த³ஸ்ஸேதி. த்³வின்னங் மூலானந்தி த்³வின்னங் ஏகமூலானங் ஏகதோ உப்பஜ்ஜமானானங். யதா² தேஸங் ஸமானமூலதா, தங் த³ஸ்ஸேதுங் ‘‘தேஸு ஹீ’’திஆதி³ வுத்தங். தங்மூலேஹி அஞ்ஞேஹீதி இதரமூலேஹி மூலத்³வயதோ அஞ்ஞேஹி ஸஹஜாதத⁴ம்மேஹி.
இதா³னி யேன அதி⁴ப்பாயேன படிலோமே ‘‘குஸலா’’இச்சேவ புச்சா² கதா, ந ‘‘குஸலமூலேன ஏகமூலா’’தி, தங் த³ஸ்ஸேதுங் ‘‘அஞ்ஞமஞ்ஞமூலத்தே பன…பே॰… கதாதி த³ட்ட²ப்³ப³’’ந்தி ஆஹ. ந ஹி குஸலமூலேன அஞ்ஞமஞ்ஞமூலேஸு கிஞ்சி ஏகமூலங் ந ஹோதீதி வுத்தோவாயமத்தோ². மூலயுத்ததமேவ வத³தி, ந மூலேஹி அயுத்தந்தி அதி⁴ப்பாயோ. அஞ்ஞதா² புப்³பே³னாபரங் விருஜ்ஜெ²ய்ய. தேனேவாதி மூலயுத்ததாய ஏவ வுச்சமானத்தா. உப⁴யத்தா²பீதி அஞ்ஞமஞ்ஞமூலா ஏகமூலாதி த்³வீஸுபி பதே³ஸு. ‘‘குஸலமூலேனா’’தி வுத்தங், குஸலமூலேன ஸம்பயுத்தேனாதி ஹி அத்தோ². யதி³ உப⁴யம்பி வசனங் மூலயுத்ததமேவ வத³தி, அத² கஸ்மா அனுலோமபுச்சா²யமேவ ஏகமூலக்³க³ஹணங் கதங், ந படிலோமபுச்சா²யந்தி உப⁴யத்தா²பி தங் க³ஹேதப்³ப³ங் ந வா க³ஹேதப்³ப³ங். ஏவஞ்ஹி மூலேகமூலயமகதே³ஸனாஹி அயங் அஞ்ஞமஞ்ஞயமகதே³ஸனா ஸமானரஸா ஸியாதி சோத³னங் மனஸி கத்வா ஆஹ ‘‘தத்தா²’’திஆதி³.
தத்த² தத்தா²தி தஸ்மிங் அஞ்ஞமஞ்ஞயமகே. யதி³பி ஏகமூலா அஞ்ஞமஞ்ஞமூலாதி இத³ங் பத³த்³வயங் வுத்தனயேன மூலயுத்ததமேவ வத³தி, ததா²பி ஸாமஞ்ஞவிஸேஸலக்க²ணே அத்தே²வ பே⁴தோ³தி த³ஸ்ஸேதுங் ‘‘மூலயோக³ஸாமஞ்ஞே’’திஆதி³ வுத்தங். ஸமூலகானங் ஸமானமூலதா ஏகமூலத்தந்தி ஏகமூலவசனங் தேஸு அவிஸேஸதோ மூலஸப்³பா⁴வமத்தங் வத³தி, ந அஞ்ஞமஞ்ஞமூலஸத்³தோ³ விய மூலேஸு லப்³ப⁴மானங் விஸேஸங், ந ச ஸாமஞ்ஞே நிச்ச²யோ விஸேஸே ஸங்ஸயங் வித⁴மதீதி இமமத்த²மாஹ ‘‘மூலயோக³ஸாமஞ்ஞே…பே॰… பவத்தா’’தி இமினா. விஸேஸே பன நிச்ச²யோ ஸாமஞ்ஞே ஸங்ஸயங் வித⁴மந்தோ ஏவ பவத்ததீதி ஆஹ ‘‘மூலயோக³விஸேஸே பன…பே॰… நிச்சி²தமேவ ஹோதீ’’தி. தஸ்மாதி வுத்தஸ்ஸேவ தஸ்ஸ ஹேதுபா⁴வேன பராமஸனங், விஸேஸனிச்ச²யேனேவ அவினாபா⁴வதோ, ஸாமஞ்ஞஸ்ஸ நிச்சி²தத்தா தத்த² வா ஸங்ஸயாபா⁴வதோதி அத்தோ². தேனாஹ ‘‘ஏகமூலாதி புச்ச²ங் அகத்வா’’தி. குஸலபா⁴வதீ³பகங் ந ஹோதீதி குஸலபா⁴வஸ்ஸேவ ‘‘குஸலபா⁴வே ஸங்ஸயஸப்³பா⁴வா’’தி. அஞ்ஞமஞ்ஞமூலவசனந்தி கேவலங் அஞ்ஞமஞ்ஞமூலவசனந்தி அதி⁴ப்பாயோ. குஸலாதி⁴காரஸ்ஸ அனுவத்தமானத்தாதி இமினா ‘‘ஸப்³பே³ தே த⁴ம்மா குஸலா’’தி குஸலக்³க³ஹணே காரணமாஹ. ஏகமூலக்³க³ஹணே ஹி பயோஜனாபா⁴வோ த³ஸ்ஸிதோ, குஸலஸ்ஸ வஸேன சாயங் தே³ஸனாதி.
53-61. மூலனயே வுத்தே ஏவ அத்தே²தி மூலனயே வுத்தே ஏவ குஸலாதி³த⁴ம்மே. குஸலாத³யோ ஹி ஸபா⁴வத⁴ம்மா இத⁴ பாளிஅத்த²தாய அத்தோ²தி வுத்தோ. குஸலமூலபா⁴வேன, மூலஸ்ஸ விஸேஸனேன, மூலயோக³தீ³பனேன ச பகாஸேதுங். குஸலமூலபூ⁴தா மூலா குஸலமூலமூலாதி ஸமாஸயோஜனா. மூலவசனஞ்ஹி நிவத்தேதப்³ப³க³ஹேதப்³ப³ஸாதா⁴ரணங். அகுஸலாப்³யாகதாபி மூலத⁴ம்மா அத்தீ²தி குஸலமூலபா⁴வேன மூலத⁴ம்மா விஸேஸிதா. மூலக்³க³ஹணேன ச மூலவந்தானங் மூலயோகோ³ தீ³பிதோ ஹோதி. ஸமானேன மூலேன, மூலஸ்ஸ விஸேஸனேன, மூலயோக³தீ³பனேன ச பகாஸேதுங் ‘‘ஏகமூலமூலா’’தி, அஞ்ஞமஞ்ஞஸ்ஸ மூலேன மூலபா⁴வேன, மூலஸ்ஸ விஸேஸனேன, மூலயோக³தீ³பனேன ச பகாஸேதுங் ‘‘அஞ்ஞமஞ்ஞமூலமூலா’’தி மூலமூலனயோ வுத்தோதி யோஜனா. தீஸுபி யமகேஸு யதா²வுத்தவிஸேஸனமேவெத்த² பரியாயந்தரங் த³ட்ட²ப்³ப³ங்.
மூலயோக³ங் தீ³பேதுந்தி மூலயோக³மேவ பதா⁴னங் ஸாதிஸயஞ்ச கத்வா தீ³பேதுந்தி அதி⁴ப்பாயோ. யதா² ஹி குஸலானி மூலானி ஏதேஸந்தி குஸலமூலகானீதி பா³ஹிரத்த²ஸமாஸே மூலயோகோ³ பதா⁴னபா⁴வேன வுத்தோ ஹோதி, ந ஏவங் ‘‘குஸலஸங்கா²தா மூலா குஸலமூலா’’தி கேவலங், ‘‘குஸலமூலமூலா’’தி ஸவிஸேஸனங் வா வுத்தே உத்தரபத³த்த²ப்பதா⁴னஸமாஸே. தேனாஹ ‘‘அஞ்ஞபத³த்த²…பே॰… தீ³பேது’’ந்தி. வுத்தப்பகாரோவாதி ‘‘குஸலமூலபா⁴வேன மூலஸ்ஸ விஸேஸனேனா’’திஆதி³னா மூலமூலனயே ச, ‘‘அஞ்ஞபத³த்த²ஸமாஸந்தேன க-காரேனா’’திஆதி³னா மூலகனயே ச வுத்தப்பகாரோ ஏவ. வசனபரியாயோ மூலமூலகனயே ஏகஜ்ஜ²ங் கத்வா யோஜேதப்³போ³.
74-85. ந ஏகமூலபா⁴வங் லப⁴மானேஹீதி அப்³யாகதமூலேன ந ஏகமூலகங் ததா²வத்தப்³ப³தங் லப⁴மானேஹி அட்டா²ரஸஅஹேதுகசித்துப்பாதா³ஹேதுகஸமுட்டா²னரூபனிப்³பா³னேஹி ஏகதோ அலப்³ப⁴மானத்தா. யதா² ஹி யதா²வுத்தசித்துப்பாதா³த³யோ ஹேதுபச்சயவிரஹிதா அஹேதுகவோஹாரங் லப⁴ந்தி, ந ஏவங் ஸஹேதுகஸமுட்டா²னங் ரூபங். தேனாஹ ‘‘அஹேதுகவோஹாரரஹிதங் கத்வா’’தி. எத்த² ச ‘‘ஸப்³ப³ங் ரூபங் ந ஹேதுகமேவ, அஹேதுகமேவா’’தி வுத்தத்தா கிஞ்சாபி ஸஹேதுகஸமுட்டா²னம்பி ரூபங் அஹேதுகங், ‘‘அப்³யாகதோ ‘‘அப்³போ³ஹாரிகங் கத்வாதி ஸஹேதுகவோஹாரேன அப்³போ³ஹாரிகங் கத்வாதி அத்த²ங் வத்வா அஞ்ஞதா² ‘அஹேதுகங் அப்³யாகதங் அப்³யாகதமூலேன ஏகமூல’ந்தி ந ஸக்கா வத்து’’ந்தி வத³ந்தி. தத்த² யங் வத்தப்³ப³ங், தங் வுத்தமேவ அஹேதுகவோஹாராபா⁴வேன ஸஹேதுகதாபரியாயஸ்ஸ அத்த²ஸித்³த⁴த்தா. அபிச ஹேதுபச்சயஸப்³பா⁴வதோ தஸ்ஸ ஸஹேதுகதாபரியாயோ லப்³ப⁴தேவ. தேனாஹ ‘‘ந வா ஸஹேதுகது³கே விய…பே॰… அப்³போ³ஹாரிகங் கத’’ந்தி. எத்த² எத்தா²தி ஏதஸ்மிங் ஏகமூலகது³கே. ஹேதுபச்சயயோகா³யோக³வஸேனாதி ஹேதுபச்சயேன யோகா³யோக³வஸேன, ஹேதுபச்சயஸ்ஸ ஸப்³பா⁴வாஸப்³பா⁴வவஸேனாதி அத்தோ². ஸஹேதுகவோஹாரமேவ லப⁴தி பச்சயபூ⁴தஹேதுஸப்³பா⁴வதோ.
அபரே அட்ட²கதா²யங் தஸ்ஸ ஏகமூலபா⁴வஸ்ஸ நிச்சி²தத்தா, தஸ்மா வுத்தனயேனேவ செத்த² அத்தோ² வேதி³தப்³போ³.
86-97. குஸலாகுஸலாப்³யாகதராஸிதோ நமனநாமனஸங்கா²தேன விஸேஸேன அரூபத⁴ம்மானங் க³ஹணங் நித்³தா⁴ரணங் நாம ஹோதீதி ஆஹ ‘‘நாமானங் நித்³தா⁴ரிதத்தா’’தி. தேன தேஸங் அதி⁴கபா⁴வமாஹ விஞ்ஞாயமானமேவ பகரணேன அபரிச்சி²ன்னத்தா. யதி³ ஏவங் ‘‘அஹேதுகங் நாமங் ஸஹேதுகங் நாம’’ந்தி பாட²ந்தரே கஸ்மா நாமக்³க³ஹணங் கதந்தி ஆஹ ‘‘ஸுபாகடபா⁴வத்த²’’ந்தி, பரிப்³யத்தங் கத்வா வுத்தே கிங் வத்தப்³ப³ந்தி அதி⁴ப்பாயோ.
நித்³தே³ஸவாரவண்ணனா நிட்டி²தா.
மூலயமகவண்ணனா நிட்டி²தா.
2. க²ந்த⁴யமகங்
1. பண்ணத்திவாரோ
உத்³தே³ஸவாரவண்ணனா
2-3. க²ந்த⁴யமகே …பே॰… பரிஞ்ஞா ச வத்தப்³பா³தி இத³ங் பதா⁴னபா⁴வேன வத்தப்³ப³த³ஸ்ஸனங். அபி⁴ஞ்ஞெய்யகதா² ஹி அபி⁴த⁴ம்மோ, ஸா ச யாவதே³வ பரிஞ்ஞத்தாதி பரிஞ்ஞாஸு ச ந வினா தீரணபரிஞ்ஞாய பஹானபரிஞ்ஞா, தீரணஞ்ச ஸம்புண்ணபரானுக்³க³ஹஸ்ஸ அதி⁴ப்பேதத்தா காலபுக்³க³லோகாஸவிபா⁴க³முகே²ன க²ந்தா⁴னங் விஸுங் ஸஹ ச உப்பாத³னிரோத⁴லக்க²ணபரிக்³க³ஹவஸேன ஸாதிஸயங் ஸம்ப⁴வதி, நாஞ்ஞதா²தி இமமத்த²ங் த³ஸ்ஸெந்தோ ‘‘ச²ஸு காலபே⁴தே³ஸு…பே॰… பரிஞ்ஞா ச வத்தப்³பா³’’தி பதா⁴னங் வத்தப்³ப³ங் உத்³த⁴ரதி. தத்த² பன யதா² ந தீரணபரிஞ்ஞாய வினா பஹானபரிஞ்ஞா, ஏவங் தீரணபரிஞ்ஞா வினா ஞாதபரிஞ்ஞாய. ஸா ‘‘தே பன க²ந்தா⁴’’திஆதி³மாஹ. பஞ்சஹி பதே³ஹீதி பஞ்சஹி ஸமுதா³யபதே³ஹி.
தத்தா²தி தேஸு ஸமுதா³யாவயவபதே³ஸு. த⁴ம்மோதி ருப்பனாதி³கோ ஞெய்யத⁴ம்மோ. ஸமுதா³யபத³ஸ்ஸாதி ரூபக்க²ந்தா⁴தி³ஸமுதா³யபத³ஸ்ஸ. யதி³பி அவயவவினிமுத்தோ பரமத்த²தோ ஸமுதா³யோ நாம நத்தி², யதா² பன அவயவோ ஸமுதா³யோ ந ஹோதி, ஏவங் ந ஸமுதா³யோபி அவயவோதி ஸதிபி ஸமுதா³யாவயவானங் பே⁴தே³ த்³வின்னங் பதா³னங் ஸமானாதி⁴கரணபா⁴வதோ அத்தே²வாபே⁴தோ³தி பத³த்³வயஸ்ஸ ஸமானத்த²தாய ஸியா ஆஸங்காதி ஆஹ ‘‘ஏதஸ்மிங் ஸங்ஸயட்டா²னே’’தி. ‘‘சக்கா²யதனங் ரூபக்க²ந்த⁴க³ணனங் க³ச்ச²தி, விஞ்ஞாணக்க²ந்தோ⁴ தஜ்ஜா மனோவிஞ்ஞாணதா⁴தூ’’திஆதீ³ஸு ஏகதே³ஸோ ஸமுதா³யபத³த்தோ² வுத்தோ, ‘‘யங் கிஞ்சி ரூபங்…பே॰… அயங் வுச்சதி ரூபக்க²ந்தோ⁴’’திஆதீ³ஸு (விப⁴॰ 2) பன ஸகலோதி ஆஹ ‘‘ரூபாதி³…பே॰… அத்தோ²’’தி. அவயவபதா³னஞ்செத்த² விஸேஸனவிஸேஸிதப்³ப³விஸயானங் ஸமானாதி⁴கரணதாய ஸமுதா³யபத³த்த²தா வுத்தா, ததோ ஏவ ஸமுதா³யபதா³னம்பி அவயவபத³த்த²தா. ந ஹி விஸேஸனவிஸேஸிதப்³பா³னங் அத்தா²னங் அச்சந்தங் பே⁴தோ³ அபே⁴தோ³ வா இச்சி²தோ, அத² கோ² பே⁴தா³பே⁴தோ³, தஸ்மா
யதா² அவயவபதே³ஹி வுச்சமானோபி ஸமுதா³யபத³ஸ்ஸ அத்தோ² ஹோதி, ஏவங் ஸமுதா³யபதே³ஹி வுச்சமானோபி அவயவபத³ஸ்ஸ அத்தோ²தி ‘‘ரூபக்க²ந்தோ⁴ ரூபஞ்சேவ ரூபக்க²ந்தோ⁴ ச, ரூபக்க²ந்தோ⁴ ரூபந்தி? ஆமந்தா’’திஆதி³னா பத³ஸோத⁴னா கதாதி த³ஸ்ஸெந்தோ ஆஹ ‘‘ரூபாதி³அவயவபதே³ஹி…பே॰… பத³ஸோத⁴னவாரோ வுத்தோ’’தி. தத்த² ஏகச்சஸ்ஸ அவயவபத³ஸ்ஸ அஞ்ஞத்த² வுத்தியா அவயவபத³த்த²ஸ்ஸ ஸமுதா³யபத³த்த²தாய ஸியா அனேகந்திகதா, ஸமுதா³யபத³ஸ்ஸ பன தங் நத்தீ²தி ஸமுதா³யபத³த்த²ஸ்ஸ அவயவபத³த்த²தாய ப்³யபி⁴சாராபா⁴வோ பாளியா பகாஸிதோதி வுத்தங் ‘‘ரூபாதி³…பே॰… த³ஸ்ஸேது’’ந்தி.
‘‘ரூபக்க²ந்தோ⁴’’திஆதீ³ஸு க²ந்த⁴த்த²ஸ்ஸ விஸேஸிதப்³ப³த்தா வுத்தங் ‘‘பதா⁴னபூ⁴தஸ்ஸ க²ந்த⁴பத³ஸ்ஸா’’தி. வேத³னாதி³உபபத³த்த²ஸ்ஸ ச ஸம்ப⁴வதோ ‘‘வேத³னாக்க²ந்தோ⁴’’திஆதீ³ஸு. ரூபாவயவபதே³ன வுத்தஸ்ஸாதி ரூபஸங்கா²தேன அவயவபதே³ன விஸேஸனபா⁴வேன வுத்தஸ்ஸ க²ந்த⁴த்த²ஸ்ஸ ரூபக்க²ந்த⁴பா⁴வோ ஹோதி. தேன வுத்தங் ‘‘ரூபக்க²ந்தோ⁴ ரூபந்தி? ஆமந்தா’’தி. தத்தா²தி தஸ்மிங் ரூபக்க²ந்த⁴பதே³. பதா⁴னபூ⁴தேன விஸேஸிதப்³ப³த்தா க²ந்தா⁴வயவபதே³ன வுத்தஸ்ஸ ருப்பனட்ட²ஸ்ஸ கிங் வேத³னாக்க²ந்தா⁴தி³பா⁴வோ ஹோதீதி யோஜனா. ஸமானே அவயவபதா³பி⁴தெ⁴ய்யபா⁴வே அப்பதா⁴னேன பதே³ன யோ அத்தோ² விஞ்ஞாயதி, ஸோ கஸ்மா பதா⁴னேன ந விஞ்ஞாயதீதி அதி⁴ப்பாயோ. க²ந்தா⁴வயவபதே³ன வுத்தோ த⁴ம்மோதி ராஸட்ட²மாஹ. தத்த² கோசீதி ருப்பனட்டோ². கேனசி ஸமுதா³யபதே³னாதி ரூபக்க²ந்த⁴பதே³ன, ந வேத³னாக்க²ந்தா⁴தி³பதே³ன. தேனாஹ ‘‘ந ஸப்³போ³ ஸப்³பே³னா’’தி. ஏஸ நயோ வேத³னாக்க²ந்தா⁴தீ³ஸு. ரூபரூபக்க²ந்தா⁴தி³அவயவஸமுதா³யபத³ஸோத⁴னமுகே²ன தத்த² ச சதுக்க²ந்த⁴வஸேன பவத்தா பாளிக³தி பத³ஸோத⁴னமூலசக்கவாரோ. ஏவஞ்ச த³ஸ்ஸெந்தேனாதி இமினா ய்வாயங் ரூபாதி³அவயவபதே³ஹி ரூபக்க²ந்தா⁴தி³ஸமுதா³யபதே³ஹி ச த³ஸ்ஸிதாகாரோ அத்த²விஸேஸோ, தங் பச்சாமஸதி. விஸேஸனபா⁴வோ பே⁴த³கதாய ஸாமஞ்ஞதோ அவச்சே²த³கத்தா, விஸேஸிதப்³ப³பா⁴வோ அபே⁴த³யோகே³ன பே⁴த³ந்தரதோ அவிச்சி²ந்தி³தப்³ப³த்தா, ஸமானாதி⁴கரணபா⁴வோ தேஸங் பே⁴தா³பே⁴தா³னங் ஏகவத்து²ஸன்னிஸ்ஸயத்தா.
தேனாதி எத்தா²தி ஏதஸ்மிங் ஸமானாதி⁴கரணே. தேனாதி வா ஸமானாதி⁴கரணபா⁴வேன. எத்தா²தி ரூபக்க²ந்த⁴பதே³. யதா² நீலுப்பலபதே³ உப்பலவிஸேஸனபூ⁴தங் நீலங் விஸிட்ட²மேவ ஹோதி, ந யங் கிஞ்சி, ஏவமிதா⁴பி க²ந்த⁴விஸேஸனபூ⁴தங் ரூபம்பி விஸிட்ட²மேவ ஸியாதி த³ஸ்ஸெந்தோ ‘‘கிங் க²ந்த⁴தோ…பே॰… ஹோதீ’’தி ஆஹ. ததா² ‘‘ரூபஞ்ச தங் க²ந்தோ⁴ சா’’தி ஸமானாதி⁴கரணபா⁴வேனேவ யங் ரூபங், ஸோ க²ந்தோ⁴. யோ க²ந்தோ⁴, தங் ரூபந்தி அயம்பி ஆபன்னோ ஏவாதி ஆஹ ‘‘ஸப்³பே³வ…பே॰… விஸேஸிதப்³பா³’’தி. விஸேஸனேன ச நாம நித்³தா⁴ரிதரூபேன ப⁴விதப்³ப³ங் அவச்சே²த³கத்தா, ந அனித்³தா⁴ரிதரூபேனாதி ஆஹ ‘‘கிங் பன த’’ந்திஆதி³, தஸ்ஸேவ க³ஹிதத்தா ந பியரூபஸாதரூபஸ்ஸாதி அதி⁴ப்பாயோ. ந ந க²ந்த⁴தோ அஞ்ஞங் ரூபங் அத்தீ²தி இத³ங் ருப்பனட்டோ² ரூபந்தி கத்வா வுத்தங், ந ஹி ஸோ க²ந்த⁴வினிமுத்தோ அத்தி². தேனேவாதி யதா²வுத்தரூபஸ்ஸ க²ந்த⁴வினிமுத்தஸ்ஸ அபா⁴வேனேவ. ‘‘பியரூபங் ஸாதரூபங், த³ஸ்ஸெந்தேனப்பக’’ந்தி ச ஆதீ³ஸு அதத³த்த²ஸ்ஸ ரூபஸத்³த³ஸ்ஸ லப்³ப⁴மானத்தா ‘‘தேன ரூபஸத்³தே³னா’’தி விஸேஸெத்வா வுத்தங். வுச்சமானங் பூ⁴துபாதா³யம்பி பே⁴த³ங் த⁴ம்மஜாதங். ஸுத்³தே⁴னாதி கேவலேன, ரூபஸத்³தே³ன வினாபீதி அத்தோ². தயித³ங் பகரணாதி³அவச்சி²ன்னதங் ஸந்தா⁴ய வுத்தங், ஸமானாதி⁴கரணதங் வா. யோ ஹி ரூபஸத்³தே³ன ஸமானாதி⁴கரணோ க²ந்த⁴ஸத்³தோ³, தேன யதா²வுத்தரூபஸத்³தே³ன விய தத³த்தோ² வுச்சதேவ. தேனாஹ ‘‘க²ந்தா⁴ ரூபக்க²ந்தோ⁴’’தி. யதி³பி யதா²வுத்தங் ரூபங் க²ந்தோ⁴ ஏவ ச, க²ந்தோ⁴ பன ந ரூபமேவாதி ஆஹ ‘‘ந ச ஸப்³பே³…பே॰… விஸேஸிதப்³பா³’’தி. தேனேவாதி அரூபஸபா⁴வஸ்ஸ க²ந்த⁴ஸ்ஸ அத்தி²பா⁴வேனேவ. தேதி க²ந்தா⁴. விப⁴ஜிதப்³பா³தி ‘‘க²ந்தா⁴ ரூபக்க²ந்தோ⁴’’தி பத³ங் உத்³த⁴ரித்வா ‘‘ரூபக்க²ந்தோ⁴ க²ந்தோ⁴ சேவ ரூபக்க²ந்தோ⁴ ச, அவஸேஸா க²ந்தா⁴ ந ரூபக்க²ந்தோ⁴’’திஆதி³னா விபா⁴கே³ன த³ஸ்ஸேதப்³பா³.
க²ந்தா⁴னங் ரூபவிஸேஸன…பே॰… ஸங்ஸயோ ஹோதீதி எத்த² கிங் க²ந்த⁴தோ அஞ்ஞாபி வேத³னா அத்தி², யதோ வினிவத்தா வேத³னா க²ந்த⁴விஸேஸனங் ஹோதி, ஸப்³பே³ ச க²ந்தா⁴ கிங் க²ந்த⁴விஸேஸனபூ⁴தாய வேத³னாய விஸேஸிதப்³பா³தி ஏவங் யோஜனா வேதி³தப்³பா³. கேசீதி அனுப⁴வனாதி³ப்பகாரா. கேனசி விஸேஸனேனாதி வேத³னாதி³னா விஸேஸனேன.
எத்த² ச ரூபாதி³பண்ணத்தி க²ந்த⁴பண்ணத்தி ச ‘‘ரூபங் க²ந்தோ⁴, க²ந்தா⁴ ரூபக்க²ந்தோ⁴’’திஆதி³னா விஸுங் ஸஹ ச ருப்பனாதி³கே அத்தே² பவத்தமானா கதா³சி அவயவபூ⁴தே பவத்ததி, கதா³சி ஸமுதா³யபூ⁴தே, தஸ்ஸா பன ததா² பவத்தனாகாரே நித்³தா⁴ரிதே யஸ்மா ரூபாதி³க்க²ந்தா⁴ பத³தோ அத்த²தோ ச ‘‘ஏவங் யேஸங்…பே॰… வேதி³தப்³போ³’’தி ஆஹ.
ஏகதே³ஸேபி ஸமுதா³யவோஹாரோ தி³ஸ்ஸதி யதா² படோ த³ட்³டோ⁴, ஸமுத்³தோ³ தி³ட்டோ²தி ஆஹ ‘‘சக்காவயவபா⁴வதோ சக்கானீதி யமகானி வுத்தானீ’’தி. ப³ந்தி⁴த்வாதி யமகபா⁴வேன ப³ந்தி⁴த்வா, யமகமூலபா⁴வேனேவ வா. மூலபா⁴வேன க³ஹணங் ஸம்ப³ந்த⁴பா⁴வோ, தங்ஸம்ப³ந்த⁴தா ச மூலபதா³தீ³னங் நாபி⁴ஆதி³ஸதி³ஸதா த³ட்ட²ப்³பா³. அபுப்³ப³ஸ்ஸ வத்தப்³ப³ஸ்ஸ அபா⁴வதோ நயித⁴ தே³ஸனா மண்ட³லபா⁴வேனேவ ஸம்ப³ஜ்ஜ²தீதி ஆஹ ‘‘ந மண்ட³லபா⁴வேன ஸம்ப³ஜ்ஜ²னதோ’’தி. யதி³பி ரூபக்க²ந்த⁴மூலகே அபுப்³ப³ங் நத்தி², வேத³னாக்க²ந்தா⁴தி³மூலகேஸு பன ஸஞ்ஞாதி³முகே²ன தே³ஸனப்பவத்தியங் அபுப்³ப³வஸேனேவ க³தோ ஸியா மண்ட³லபா⁴வேன ஸம்ப³ந்தோ⁴, ந ததா² பாடோ² பவத்தோதி ஆஹ ‘‘வேத³னாக்க²ந்த⁴…பே॰… ஸம்ப³ந்தே⁴னா’’தி. பச்சி²மஸ்ஸ புரிமேன அஸம்ப³ஜ்ஜ²னமேவ ஹி ஹெட்டி²மஸோத⁴னங். ஸுத்³த⁴க்க²ந்த⁴லாப⁴மத்தமேவ க³ஹெத்வாதி ‘‘க²ந்தா⁴ ரூப’’ந்தி எத்த² க²ந்தா⁴தி க²ந்த⁴ஸத்³தே³ன லப்³ப⁴மானங் ரூபாதீ³ஹி அஸம்மிஸ்ஸங் க²ந்த⁴ட்ட²மத்தமேவ உத்³தே³ஸவஸேன க³ஹெத்வா. யதி³பி உத்³தே³ஸே க²ந்த⁴விஸேஸனங் ரூபாதி³ ‘‘க²ந்தா⁴ ரூப’’ந்தி ஸுத்³த⁴ரூபாதி³மத்தமேவ க³ஹிதங், ததா²பி விஸேஸரஹிதஸ்ஸ ஸாமஞ்ஞஸ்ஸ அபா⁴வதோ தத்த² ஸுத்³த⁴ரூபாதி³மத்ததாய அட்ட²த்வா. க²ந்த⁴விஸேஸனபா⁴வஸங்கா²தந்தி யதா²தி⁴க³தங் க²ந்தா⁴னங் விஸேஸனபா⁴வேன கதி²தங் ருப்பனாதி³கங்
உத்³தே³ஸவாரவண்ணனா நிட்டி²தா.
1. பண்ணத்திவாரோ
நித்³தே³ஸவாரவண்ணனா
26. ஏவங் வுத்தந்தி ஏவங் த்³வாராலம்ப³னேஹி ஸத்³தி⁴ங் த்³வாரப்பவத்தத⁴ம்மவிபா⁴க³வஸேன வுத்தங். பியஸபா⁴வங் பியஜாதிகங் ‘‘கத²ங் ரூபேன கோ², ஆவுஸோ’’திஆதீ³ஸு விய பியஸபா⁴வட்டே²ன ரூபங், ந ருப்பனட்டே²னாதி வுத்தங் ‘‘பியரூபங்…பே॰… ரூபங் ந ரூபக்க²ந்தோ⁴’’தி. ருப்பனட்டே²ன ரூபக்க²ந்த⁴பரியாபன்னம்பி சக்கா²தி³ பியஸபா⁴வமத்தவசனிச்சா²வஸேன பியரூபமேவ அனுப்பவிஸதி, ந ரூபக்க²ந்த⁴ந்தி ஆஹ ‘‘பியஸபா⁴வ…பே॰… ந ரூபக்க²ந்தோ⁴தி வுத்த’’ந்தி. ‘‘யோ பன யத்த² விஸேஸோ’’தி வுத்தோ விஸேஸஸத்³தோ³ நானுவத்ததீதி அதி⁴ப்பாயேனாஹ ‘‘வசனஸேஸோ’’தி. ந ஹி அதி⁴காரதோ லப்³ப⁴மானஸ்ஸ அஜ்ஜா²ஹரணகிச்சங் அத்தி². தி³ட்டி²ஸஞ்ஞாதி வா பது³த்³தா⁴ரோயங் வேதி³தப்³போ³. விஸேஸதா பனஸ்ஸா ‘‘விஸேஸங் வண்ணயிஸ்ஸாமா’’தி படிஞ்ஞாய ஏவ பாகடா. ‘‘அவஸேஸா ஸங்கா²ரா’’தி எத்தா²பி ஏஸேவ நயோ. ஸங்யோஜனவஸேன ஜானாதி அபி⁴னிவிஸதீதி ஸஞ்ஞா தி³ட்டீ²தி ஆஹ ‘‘தி³ட்டி² ஏவ ஸஞ்ஞா’’தி. தி³ட்டி² சாதி ச-ஸத்³தே³ன அவஸிட்ட²ங் பபஞ்சங் ஸங்க³ண்ஹாதி. ததா² ஹி ‘‘பபஞ்சஸஞ்ஞாஸங்கா²’’தி எத்த² பபஞ்சஸூத³னியங் (ம॰ நி॰ அட்ட²॰ 1.201) வுத்தங் ‘‘ஸஞ்ஞானாமேன வா பபஞ்சா ஏவ வுத்தா’’தி.
28. ‘‘க²ந்தா⁴ வேத³னாக்க²ந்தோ⁴’’தி ஏதஸ்மிங் அனுலோமே யதா² ஸரூபத³ஸ்ஸனேன விஸ்ஸஜ்ஜனங் லப்³ப⁴தி, ந ஏவங் ‘‘ந க²ந்தா⁴ ந வேத³னாக்க²ந்தோ⁴’’தி படிலோமே, இத⁴ பன படிவசனேன விஸ்ஸஜ்ஜனந்தி தத³த்த²ங் விவரந்தோ ‘‘க²ந்த⁴ஸத்³த³ப்பவத்தியா ச அபா⁴வே வேத³னாக்க²ந்த⁴ஸத்³த³ப்பவத்தியா ச அபா⁴வோ’’தி ஆஹ. தேன ஸத்தாபடிஸேதே⁴ அயங் ந-காரோதி த³ஸ்ஸேதி. ஸத்³த³க்³க³ஹணஞ்செத்த² ஸத்³த³னிப³ந்த⁴னத்தா ‘‘பண்ணத்திஸோத⁴னமத்தமேவ கரோதீ’’தி. தேன நித்³தா⁴ரேதப்³ப³ஸ்ஸ த⁴ம்மந்தரஸ்ஸ அபா⁴வங் த³ஸ்ஸேதி. யதோ வுத்தங் ‘‘ந அஞ்ஞத⁴ம்மஸப்³பா⁴வோ ஏவெத்த² பமாண’’ந்தி. ஏவஞ்ச கத்வாதிஆதி³னா யதா²வுத்தமத்த²ங் பாட²ந்தரேன ஸமத்தே²தி. காமங் கத்த²சி ஸதிபி க²ந்தே⁴ நத்தி² வேத³னாக்க²ந்தோ⁴, அக²ந்த⁴த்தஸபா⁴வா பன நத்தி² வேத³னாதி ‘‘ந க²ந்தா⁴ ந வேத³னாக்க²ந்தோ⁴தி? ஆமந்தா’’தி வுத்தந்தி ஏவங் வா ஏதங் த³ட்ட²ப்³ப³ங். தேனாஹ அட்ட²கதா²யங் ‘‘பஞ்ஞத்தினிப்³பா³னஸங்கா²தா’’திஆதி³.
39. ‘‘ரூபதோ அஞ்ஞே’’தி எத்த² பூ⁴துபாதா³ய த⁴ம்மோ விய பியஸபா⁴வோபி ரூபஸத்³தா³பி⁴தெ⁴ய்யதாஸாமஞ்ஞேன க³ஹிதோதி ஆஹ ‘‘லோகுத்தரா வேத³னாத³யோ த³ட்ட²ப்³பா³’’தி. அப்பவத்திமத்தமேவாதி க²ந்த⁴ஸத்³த³ப்பவத்தியா அபா⁴வே ரூபஸத்³த³ப்பவத்தியா ச அபா⁴வோதி பண்ணத்திஸோத⁴னமத்ததங்யேவ ஸந்தா⁴ய வத³தி, ததா² சாஹ ‘‘ஏவஞ்ச கத்வா’’திஆதி³. தேனேதங் த³ஸ்ஸேதி – யதா² சக்கு²தோ அஞ்ஞஸ்ஸ ஸப்³ப³ஸ்ஸபி ஸபா⁴வத⁴ம்மஸ்ஸ ஆயதனக்³க³ஹணேன க³ஹிதத்தா தது³ப⁴யவினிமுத்தங் கிஞ்சி நத்தீ²தி கேவலங் பஞ்ஞத்திஸோத⁴னத்த²ங் தமேவ அபா⁴வங் த³ஸ்ஸேதுங் ‘‘சக்கு²ஞ்ச ஆயதனே ச ட²பெத்வா அவஸேஸா ந சேவ சக்கு² ந ச ஆயதன’’ந்தி வுத்தங், ஏவமிதா⁴பி தத³த்த²மேவ உப⁴யவினிமுத்தஸ்ஸ அபா⁴வங் த³ஸ்ஸேதுங் ‘‘ரூபஞ்ச க²ந்தே⁴ ச ட²பெத்வா அவஸேஸா ந சேவ ரூபங் ந ச க²ந்தா⁴’’தி வுத்தந்தி. விஸமோபஞ்ஞாஸோ. ‘‘சக்கு²ஞ்ச ஆயதனே ச ட²பெத்வா’’தி எத்த² ஹி அவஸேஸக்³க³ஹணேன க³ய்ஹமானங் கிஞ்சி நத்தீ²தி ஸக்கா வத்துங் ஆயதனவினிமுத்தஸ்ஸ ஸபா⁴வத⁴ம்மஸ்ஸ அபா⁴வா. தேனாஹ ‘‘யதி³ ஸியா’’தி. ‘‘ரூபஞ்ச க²ந்தே⁴ ச ட²பெத்வா’’தி எத்த² பன ந ததா² ஸக்கா வத்துங் க²ந்த⁴வினிமுத்தஸ்ஸ ஸபா⁴வத⁴ம்மஸ்ஸ அத்தி²பா⁴வதோ. யதி³ பன தாதி³ஸங் க²ந்த⁴க³தங் த⁴ம்மஜாதங் நத்தீ²தி ஏவமித³ங் வுத்தங் ஸியா, ஏவங் ஸதி யுத்தமேதங் ஸியா. ததா² ஹி ‘‘அட்ட²கதா²யங் பனா’’திஆதி³னா பஞ்ஞத்திக்³க³ஹணமேவ உத்³த⁴ரீயதி. தண்ஹாவத்து² ச ந ஸியா அவஸேஸக்³க³ஹணேன க³ய்ஹமானந்தி ஆனெத்வா ஸம்ப³ந்தோ⁴. க²ந்தோ⁴ ச ஸியாதி யோஜனா.
நித்³தே³ஸவாரவண்ணனா நிட்டி²தா.
2. பவத்திவாரவண்ணனா
50-205. மிஸ்ஸககாலபே⁴தே³ஸு ‘‘அமிஸ்ஸககாலபே⁴தே³ஸு வாரேஸு அத்த²விஸேஸாபா⁴வதோ’’தி. இதா³னி தமேவத்த²ங் ‘‘புரிமஸ்ஸ ஹீ’’திஆதி³னா விவரதி. தேனாதி அத்த²விஸேஸாபா⁴வேன. எத்தா²தி ஏதஸ்மிங் பவத்திவாரபாடே², ஏதிஸ்ஸங் வா பவத்திவாரவண்ணனாயங். ச² ஏவ வுத்தா, ந நவாதி அதி⁴ப்பாயோ. தேனாஹ ‘‘அதீதேனா’’திஆதி³. ஏதே பன தயோதி அத்தனா விஸுங் அனந்தரங் த³ஸ்ஸிதே ஸந்தா⁴யாஹ. யதா²த³ஸ்ஸிதாதி அட்ட²கதா²யங் நித்³தா⁴ரெத்வா த³ஸ்ஸிதப்³பா³காரா பச்சுப்பன்னேனாதீதாத³யோ யே பாளியங் உஜுகமேவ ஆக³தா. ‘‘ந விஸுங் விஜ்ஜந்தீ’’தி வுத்தமேவத்த²ங் ‘‘தத்த² தத்த² ஹீ’’திஆதி³னா பாகடதரங் கரோதி. தத்த² படிலோமபுச்சா²ஹீதி ‘‘யஸ்ஸ வா பன வேத³னாக்க²ந்தோ⁴ தேனேவாதி நயதோ யோஜேதுங் ஸக்குணெய்யத்தா ஏவ. மிஸ்ஸககாலபே⁴தே³ஸு சாதி ந கேவலங் அமிஸ்ஸககாலபே⁴தே³ஸுயேவ, அத² கோ² மிஸ்ஸககாலபே⁴தே³ஸு சாதி அத்தோ². ந யோஜனாஸுகரதாய ஏவ புரிமே அயோஜனா, அத² கோ² ஸுக²க்³க³ஹணத்த²ம்பீதி த³ஸ்ஸெந்தோ ஆஹ ‘‘அமிஸ்ஸக…பே॰… வுத்தானீ’’தி.
யேன காரணேனாதி யேன ஏகபத³த்³வயஸங்க³ஹிதானங் க²ந்தா⁴னங் உப்பாத³ஸ்ஸ நிரோத⁴ஸ்ஸ லாப⁴ஸங்கா²தேன காரணேன. யதா²க்கமங் புரேபஞ்ஹோ பச்சா²பஞ்ஹோதி ச நாமங் வுத்தங். ச-ஸத்³தே³ன புரேபச்சா²பஞ்ஹோதி ச நாமங் வுத்தந்தி நித்³தா⁴ரெத்வா யோஜேதப்³ப³ங். தத்த² பன ‘‘ஏகபத³த்³வயஸங்க³ஹிதான’’ந்தி இத³ங் ஏகஜ்ஜ²ங் கத்வா க³ஹேதப்³ப³ங். தமேவத்த²ம்பி விவரதி ‘‘யஸ்ஸ ஹீ’’திஆதி³னா. தத்த² யஸ்ஸாதி யஸ்ஸ பஞ்ஹஸ்ஸ. ‘‘பஞ்ஹோ’’தி செத்த² புச்ச²னவஸேன பவத்தங் வசனங் வேதி³தப்³ப³ங். தேனேவாஹ ‘‘பரிபூரெத்வா விஸ்ஸஜ்ஜேதப்³ப³த்த²ஸங்க³ண்ஹனதோ’’தி. தங் ஸரூபத³ஸ்ஸனேன விஸ்ஸஜ்ஜனங் தங்விஸ்ஸஜ்ஜனங், தங் வா யதா²வுத்தங் விஸ்ஸஜ்ஜனங் ஏதஸ்ஸாதி தங்விஸ்ஸஜ்ஜனோ, தஸ்ஸ தங்விஸ்ஸஜ்ஜனஸ்ஸ. புரிமகொட்டா²ஸேனாதி புரிமேன உத்³தே³ஸபதே³ன. தேன ஹி விஸ்ஸஜ்ஜனபத³ஸ்ஸ ஸமானத்த²தா இத⁴ ஸதி³ஸத்த²தா. ஏகேன பதே³னாதி ஏகேன பதா⁴னாப்பதா⁴னேன யமகபதே³ன, ந பட²மபதே³னேவாதி அத்தோ². உப்பாத³னிரோத⁴லாப⁴ஸாமஞ்ஞமத்தேனாதி உப்பாத³ஸ்ஸ வா நிரோத⁴ஸ்ஸ வா லப்³ப⁴மானதாய ஸமானதாமத்தேன. ஸன்னிட்டா²னபத³…பே॰… யுத்தந்தி இத³ங் அட்ட²கதா²யங் ‘‘யத்த² ரூபக்க²ந்தோ⁴ நுப்பஜ்ஜதீ’’திஆதி³னா புரேபஞ்ஹஸ்ஸ த³ஸ்ஸிதத்தா வுத்தங். யதி³பி தத்த² ‘‘உப்பஜ்ஜதீ’’தி விஸ்ஸஜ்ஜிதத்தா வேத³னாக்க²ந்த⁴ஸ்ஸ உப்பாதோ³ லப்³ப⁴தீதி வுத்தங், யோ பன ஸன்னிட்டா²னபத³ஸங்க³ஹிதோ
‘‘யஸ்ஸ ரூபக்க²ந்தோ⁴ நுப்பஜ்ஜித்த², தஸ்ஸ வேத³னாக்க²ந்தோ⁴ நுப்பஜ்ஜித்தா²’’தி எத்த² ரூபக்க²ந்த⁴ஸ்ஸ அனுப்பன்னபுப்³ப³தாபடிக்கே²பமுகே²ன இதரஸ்ஸ படிக்கி²பீயதீதி ரூபக்க²ந்த⁴ஸ்ஸேவ யதா²வுத்தபடிக்கே²போ பதா⁴னபா⁴வேன வுத்தோ. ஏஸேவ நயோ அஞ்ஞேஸுபி ஏதி³ஸேஸு டா²னேஸூதி ஆஹ ‘‘ஸன்னிட்டா²னத்த²ஸ்ஸேவ படிக்கி²பனங் படிக்கே²போ’’தி ‘‘ஸங்ஸயத்த²னிவாரணங் படிஸேதோ⁴’’தி. ‘‘ந-காரவிரஹித’’ந்தி ஏதேன படிஸேத⁴ஸ்ஸ படிஸேதி⁴தமாஹ. யதி³ ஏவங் பாளிக³திபடிஸேத⁴விஸ்ஸஜ்ஜனானங் கோ விஸேஸோதி ஆஹ ‘‘தத்த² உப்பத்தீ’’திஆதி³.
ததே³கதே³ஸபக்கே²பவஸேனாதி தேஸங் சதுன்னங் பஞ்ஹானங் பஞ்சன்னஞ்ச விஸ்ஸஜ்ஜனானங் ஏகதே³ஸஸ்ஸ பக்கி²பனவஸேன. தேனாஹ அட்ட²கதா²யங் ‘‘பட²மே டா²னே பரிபுண்ணபஞ்ஹஸ்ஸ புரிமகொட்டா²ஸே ஸரூபத³ஸ்ஸனேனா’’திஆதி³. யோ பனெத்த² பஞ்ஹேஸு விஸ்ஸஜ்ஜனேஸு ச ஸத்தவீஸதியா டா²னேஸு பக்கே²பங் லப⁴தி, தங் த³ஸ்ஸேதுங் ‘‘பரிபுண்ணபஞ்ஹோ ஏவா’’திஆதி³ வுத்தங். பாளிவவத்தா²னத³ஸ்ஸனாதி³தோதி எத்த² ஆதி³-ஸத்³தே³ன புச்சா²விப⁴ங்கோ³ விஸ்ஸஜ்ஜனாடா²னானி ஏகஸ்மிங் பஞ்ஹே யோஜனானயோதி இமேஸங் ஸங்க³ஹோ த³ட்ட²ப்³போ³.
ஸுத்³தா⁴வாஸானந்திஆதி³ பாளியா பத³ங் உத்³த⁴ரித்வா அத்த²த³ஸ்ஸனத்த²ங் ஆரத்³த⁴ங். ‘‘யஸ்ஸ யத்த² ரூபக்க²ந்தோ⁴ நுப்பஜ்ஜித்த², தஸ்ஸ தத்த² வேத³னாக்க²ந்தோ⁴ நுப்பஜ்ஜித்தா²’’தி இமஸ்ஸ விஸ்ஸஜ்ஜனங் ஹோதி ‘‘ஸுத்³தா⁴வாஸானங் தேஸங் தத்தா²’’தி. தத்த² ஏகபூ⁴மியங் து³தியா உபபத்தி நத்தீ²தி ஏகிஸ்ஸா பூ⁴மியா ஏகஸ்ஸ அரியபுக்³க³லஸ்ஸ து³தியவாரங் படிஸந்தி⁴க்³க³ஹணங் நத்தீ²தி அத்தோ². ததியவாராதீ³ஸு வத்தப்³ப³மேவ நத்தி². ஸ்வாயமத்தோ² யதா² ஞாபிதோ ஹோதி, தங் த³ஸ்ஸேதுங் ‘‘படிஸந்தி⁴தோ பபு⁴தி ஹி…பே॰… பவத்தா’’தி வுத்தங். தேன அத்³தா⁴பச்சுப்பன்னவஸேனாயங் தே³ஸனா பவத்தாதி த³ஸ்ஸேதி. ஆதா³னநிக்கே²பபரிச்சி²ன்னங் கம்மஜஸந்தானங் ஏகத்தேன க³ஹெத்வா தஸ்ஸ வஸேன உப்பாத³னிரோதே⁴ஸு வுச்சமானேஸு அகம்மஜேஸு குஸலாதீ³ஸு கத²ந்தி சோத³னாயங் தேபி இத⁴ தங்னிஸ்ஸிதா ஏவ கதாதி த³ஸ்ஸெந்தோ ‘‘தஸ்மிஞ்ஹி…பே॰… த³ஸ்ஸிதா’’தி. தேனேவாதி கம்மஜஸந்தானேனேவ. தஸ்மாதி ஏககம்மனிப்³ப³த்தஸ்ஸ விபாகஸந்தானஸ்ஸ ஏகத்தேன க³ஹிதத்தா. தஸ்ஸாதி கம்மஜஸந்தானஸ்ஸ. பஞ்சஸு ஸுத்³தா⁴வாஸேஸு யதா² பச்சேகங் ‘‘ஏகிஸ்ஸா பூ⁴மியா து³தியா உபபத்தி நத்தீ²’’தி யதா²வுத்தபாளியா விஞ்ஞாயதி, ஏவங் ‘‘ஸுத்³தா⁴வாஸான’’ந்தி அவிஸேஸவசனதோ ஸகலேபி ஸுத்³தா⁴வாஸே ஸா நத்தீ²தி தாய கஸ்மா ந விஞ்ஞாயதீதி சோத³னங் ஸமுட்டா²பெத்வா ஸயமேவ பரிஹரிதுங் ‘‘கஸ்மா பனா’’திஆதி³மாஹ. தத்த² ஸுத்³தா⁴வாஸேஸு ஹெட்டா²பூ⁴மிகஸ்ஸ அஸதி இந்த்³ரியபரிபாகே உபரிபூ⁴மிஸமுப்பத்தி ந ஸக்கா ‘‘உத்³த⁴ங்ஸோதபாளிஸப்³பா⁴வா’’தி. ஸங்ஸந்தே³தப்³பா³தி யதா² ந விருஜ்ஜ²ந்தி, ஏவங் நேதப்³பா³. ததா² சேவ ஸங்வண்ணிதங்.
ஏதேன ஸன்னிட்டா²னேனாதி அங்கிதோகாஸபா⁴விரூபுப்பாத³ஸன்னிஸ்ஸயேன நிச்ச²யேன. விஸேஸிதா ததா²பா⁴விரூபபா⁴வினோ. அஸஞ்ஞஸத்தாபீதி ந கேவலங் பஞ்சவோகாரா ஏவ, அத² கோ² அஸஞ்ஞஸத்தாபி. தே ஏவ அஸஞ்ஞஸத்தே ஏவ க³ஹெத்வா புரிமகொட்டா²ஸேதி அதி⁴ப்பாயோ. தேன யே ஸன்னிட்டா²னேன வஜ்ஜிதாதி தேன யதா²வுத்தஸன்னிட்டா²னேன யே விரஹிதா, தே ததா² ந வத்தப்³பா³தி அத்தோ². இதா³னி ‘‘தே ததோ’’திஆதி³னா த³ஸ்ஸேதி. ததோதி அஸஞ்ஞாப⁴வதோ. பச்சி²மப⁴விகானந்தி எத்த² பச்சி²மப⁴வங் ஸரூபதோ த³ஸ்ஸேதுங் ‘‘கிங் பஞ்சவோகாராதீ³’’திஆதி³ வுத்தங். அபச்சி²மப⁴விகானம்பி அரூபானங் அரூபப⁴வே யதா² ரூபக்க²ந்தோ⁴ நுப்பாதி³, ஏவங் தத்த² பச்சி²மப⁴விகானங் வேத³னாக்க²ந்தோ⁴பீதி ஆஹ ‘‘ஏதேன ஸன்னிட்டா²னேன ஸங்க³ஹிதத்தா’’தி. தேனாஹ ‘‘தேஸங்…பே॰… ஆஹா’’தி. தத்த² தேஸந்தி பச்சி²மப⁴விகானங். தத்தா²தி அரூபப⁴வே. இதரானுப்பத்திபா⁴வஞ்சாதி இதரஸ்ஸ வேத³னாக்க²ந்த⁴ஸ்ஸ அனுப்பஜ்ஜனஸப்³பா⁴வம்பி. ஸப்படிஸந்தி⁴கானம்பி ஸுத்³தா⁴வாஸானங் க²ந்த⁴பே⁴த³ஸ்ஸ பரினிப்³பா³னபரியாயோ ஓளாரிகதோ³ஸப்பஹானதோ கிலேஸூபஸமஸாமஞ்ஞேன வுத்தோதி வேதி³தப்³ப³ங்.
ஸப்³பே³ஸஞ்ஹி தேஸந்தி தங்தங்பூ⁴மியங் டி²தானங் ஸப்³பே³ஸங் ஸுத்³தா⁴வாஸானங். யதா² பனாதிஆதி³னா வுத்தமேவத்த²ங் பாகடதரங் கரோதி. அனந்தா லோகதா⁴துயோதி இத³ங் ஓகாஸஸ்ஸ பரிச்சே²தா³பா⁴வங்யேவ த³ஸ்ஸேதுங் வுத்தங். புக்³க³லவஸேன ஸமானாதா⁴ரதாய ஸமானகாலத்தேன அஸம்ப⁴வந்தோ ஓகாஸவஸேன பன ஸம்ப⁴வந்தோ ஸங்கிண்ணா விய ஹொந்தீதி ஆஹ ‘‘ஸங்கிண்ணதா ஹோதீ’’தி.
பவத்திவாரவண்ணனா நிட்டி²தா.
3. பரிஞ்ஞாவாரவண்ணனா
206-208. தஸ்ஸாபீதி ஓகாஸே புக்³க³லஸ்ஸேவாதி யதா²க³ஹிதே ஓகாஸே யோ புக்³க³லோ, தஸ்ஸேவ ஓகாஸவிஸிட்ட²புக்³க³லஸ்ஸேவாதி ‘‘ஓகாஸவாரோபி சா’’தி. தஸ்மாதி யஸ்மா வுச்சமானோபி ஓகாஸோ புக்³க³லஸ்ஸ விஸேஸபா⁴வேனேவ வுச்செய்ய, ந விஸுங், தஸ்மா.
அஞ்ஞதா²தி பவத்திவாரே விய ஆதா³னநிக்கே²பபரிச்சி²ன்னங் கம்மஜஸந்தானங் ஏகத்தேன க³ஹெத்வா தஸ்ஸ உப்பாத³னிரோத⁴வஸேன பரிஞ்ஞாவசனே. ‘‘யோ ரூபக்க²ந்த⁴ங் பரிஜானாதீ’’தி ஸன்னிட்டா²னபத³ஸங்க³ஹிதத்தா²பா⁴வத³ஸ்ஸனமுகே²ன இதரஸ்ஸபி அபா⁴வங் த³ஸ்ஸேதுங் ‘‘ருபக்க²ந்த⁴பரிஜானநஸ்ஸ அபா⁴வா’’தி வுத்தங். ‘‘ஆமந்தா’’தி ச கதங், தஸ்மா பவத்தே சித்தக்க²ணவஸேனேவெத்த² தயோ அத்³தோ⁴ லப்³ப⁴ந்தீதி அத்தோ². ‘‘அக்³க³மக்³க³ஸமங்கி³ஞ்ச அரஹந்தஞ்சா’’தி த்³வின்னங் பதா³னங் ‘‘ரூபக்க²ந்த⁴ஞ்ச ந பரிஜானந்தி வேத³னாக்க²ந்த⁴ஞ்ச ந பரிஜானித்தா²’’தி த்³வீஹி பதே³ஹி யதா²க்கமங் ஸம்ப³ந்தோ⁴. ‘‘ட²பெத்வா அவஸேஸா புக்³க³லா’’தி பன பச்சேகங் யோஜேதப்³ப³ங். அக்³க³மக்³க³…பே॰… நத்தீ²தி இமினா அரஹத்தமக்³க³ஞாணஸ்ஸேவ பரிஞ்ஞாமத்த²கப்பத்தியா பரிஞ்ஞாகிச்சங் ஸாதிஸயங், தத³பா⁴வா ந இதரேஸந்தி த³ஸ்ஸேதி. யதோ தஸ்ஸேவ வஜிரூபமதா வுத்தா, ஸேஸானஞ்ச விஜ்ஜூபமதா. தேனாதி தேன யதா²வுத்தேன வசனேன. தத³வஸேஸஸப்³ப³புக்³க³லேதி ததோ அக்³க³மக்³க³ஸமங்கி³தோ அவஸேஸஸப்³ப³புக்³க³லே. இமங் பன யதா²வுத்ததோ³ஸங் பரிஹரந்தா ‘‘புது²ஜ்ஜனாத³யோ ஸந்தா⁴யா’’தி வத³ந்தி.
பரிஞ்ஞாவாரவண்ணனா நிட்டி²தா.
க²ந்த⁴யமகவண்ணனா நிட்டி²தா.
3. ஆயதனயமகங்
1. பண்ணத்திவாரோ
உத்³தே³ஸவாரவண்ணனா
1-9. வுத்தனயேனாதி
உத்³தே³ஸவாரவண்ணனா நிட்டி²தா.
நித்³தே³ஸவாரவண்ணனா
10-17. வாயனங் வாயனங். ‘‘தே³வகாயா ஸமாக³தா (தீ³॰ நி॰ 2.332; ஸங்॰ நி॰ 1.37), பண்ணத்தித⁴ம்மா’’திஆதீ³ஸு (த⁴॰ ஸ॰ து³கமாதிகா 108) ஸமூஹபஞ்ஞத்தீஸுபி காயத⁴ம்மஸத்³தா³ ஆக³தாதி ‘‘ஸஸபா⁴வ’’ந்தி விஸேஸேதி. காயவசனேன…பே॰… நத்தீ²தி இத³ங் ‘‘ந த⁴ம்மோ நாயதன’’ந்தி எத்த² த⁴ம்மஸத்³த³ஸ்ஸ வினிவத்தவிஸேஸஸப்³ப³ஸபா⁴வத⁴ம்மவாசகதங் ஸந்தா⁴ய வுத்தங், ந த⁴ம்மாயதனஸங்கா²தத⁴ம்மவிஸேஸவாசகதந்தி த³ட்ட²ப்³ப³ங்.
நித்³தே³ஸவாரவண்ணனா நிட்டி²தா.
2. பவத்திவாரவண்ணனா
18-21. ஏதஸ்மிந்தி புச்சா²மத்தலாபே⁴னாதி மோக⁴புச்சா²பா⁴வமாஹ. ஏகேகந்தி ‘‘யஸ்ஸ சக்கா²யதனங் உப்பஜ்ஜதி, தஸ்ஸ ஸத்³தா³யதனங் உப்பஜ்ஜதீ’’திஆதி³கங் ஏகேகங். பஞ்சாதி ‘‘யஸ்ஸ ஸத்³தா³யதனங் உப்பஜ்ஜதி, தஸ்ஸ க³ந்தா⁴யதனங் உப்பஜ்ஜதீ’’திஆதீ³னி பஞ்ச. புச்சா²மத்தலாபே⁴ன ஸங்க³ஹங் அனுஜானந்தோ ‘‘விஸ்ஸஜ்ஜனவஸேன ஹாபேதப்³பா³னீ’’தி ஆஹ. ‘‘வக்க²தி ஹீ’’திஆதி³னா யதா²வுத்தமத்த²ங் அட்ட²கதா²ய ஸமத்தே²தி.
ஸதி³ஸவிஸ்ஸஜ்ஜனந்தி ஸாமஞ்ஞவசனங் விஸேஸனிவிட்ட²மேவ ஹோதீதி தங் விஸேஸங் த³ஸ்ஸெந்தோ ‘‘புக்³க³லவாரமேவ ஸந்தா⁴ய வுத்த’’ந்தி வத்வா தஸ்ஸா பன ஸதி³ஸவிஸ்ஸஜ்ஜனதாய அப்³யாபிதத்தா யத்த² ஸதி³ஸங், தத்தா²பி விஸ்ஸஜ்ஜிதந்தி த³ஸ்ஸெந்தோ ‘‘ஓகாஸவாரே பன…பே॰… விஸ்ஸஜ்ஜித’’ந்தி ஆஹ. தத்த² தந்தி து³தியங். புக்³க³லவாரேபீதி யத்த² ஸதி³ஸங் விஸ்ஸஜ்ஜனங், தத்த² புக்³க³லவாரேபி விஸ்ஸஜ்ஜிதங், பகே³வ ஓகாஸவாரேதி அதி⁴ப்பாயோ. விரத்தகாமகம்மனிப்³ப³த்தஸ்ஸாதி பா⁴வனாப³லேன விரத்தோ காமோ ஏதேனாதி விரத்தகாமங், ரூபாவசரகம்மங், ததோ நிப்³ப³த்தஸ்ஸ. படிஸந்தி⁴ ஏவ பீ³ஜங் படிஸந்தி⁴பீ³ஜங், தஸ்ஸ. ‘‘ஏவங்ஸபா⁴வத்தா’’தி ஏதேன ஏகந்ததோ காமதண்ஹானிதா³னகம்மஹேதுகானி கா⁴னாதீ³னீதி த³ஸ்ஸேதி. க³ந்தா⁴த³யோ ச ந ஸந்தீதி ஸப்³பே³ன ஸப்³ப³ங் தேஸம்பி அபா⁴வங் ஸந்தா⁴ய வத³தி. தத்த² யங் வத்தப்³ப³ங், தங் ஹெட்டா² வுத்தமேவ.
‘‘ஸச்ச’’ந்தி யதா²வுத்தவஸேன க³ஹேதப்³ப³ங் சோத³கேன வுத்தமத்த²ங் ஸம்படிச்சி²த்வா புன யேனாதி⁴ப்பாயேன தானி யமகானி ஸதி³ஸவிஸ்ஸஜ்ஜனானி, தங் த³ஸ்ஸேதுங் ‘‘யதா² பனா’’திஆதி³ வுத்தங். தத்ராயங் ஸங்கே²பத்தோ² – தத்த² சக்கா²யதனமூலகேஸு கா⁴னாயதனயமகேன ‘‘ஸசக்கு²கானங் அகா⁴னகானங் உபபஜ்ஜந்தான’’ந்திஆதி³னா நயேன ஜிவ்ஹாகாயாயதனயமகானி யதா² ஸதி³ஸவிஸ்ஸஜ்ஜனானி, ததா² இத⁴ கா⁴னாயதனமூலகேஸு கா⁴னாயதனயமகேன தானி ஜிவ்ஹாகாயாயதனயமகானி ‘‘யஸ்ஸ கா⁴னாயதனங் உப்பஜ்ஜதி, தஸ்ஸ ஜிவ்ஹாயதனங் உப்பஜ்ஜதீதி? ஆமந்தா’’திஆதி³னா நயேன ஸதி³ஸவிஸ்ஸஜ்ஜனானீதி. ஏவமெத்த² உப⁴யேஸங் விஸுங் அஞ்ஞமஞ்ஞங் ஸதி³ஸவிஸ்ஸஜ்ஜனதாய இத³ங் வுத்தங், ந ஏகஜ்ஜ²ங் அஞ்ஞமஞ்ஞங் ஸதி³ஸவிஸ்ஸஜ்ஜனதாய. தேனாஹ ‘‘தஸ்மா தத்த² தத்தே²வ ஸதி³ஸவிஸ்ஸஜ்ஜனதா பாளிஅனாருள்ஹதாய காரண’’ந்தி. ஏவஞ்ச ஸதி சக்கா²யதனமூலக்³க³ஹணங் கிமத்தி²யந்தி ஆஹ ‘‘நித³ஸ்ஸனபா⁴வேனா’’திஆதி³. தத்த² நித³ஸ்ஸனபா⁴வேனாதி நித³ஸ்ஸனபூ⁴தானங் அஞ்ஞமஞ்ஞஸதி³ஸவிஸ்ஸஜ்ஜனதாஸங்கா²தேன ‘‘யேபு⁴ய்யதாயா’’தி வுத்தங் யேபு⁴ய்யதங் த³ஸ்ஸேதுங் ‘‘தேஸு ஹீ’’திஆதி³ வுத்தங்.
ஏவந்தி இமினா ‘‘ஆமந்தா’’தி படிவசனவிஸ்ஸஜ்ஜனேன யதா²வுத்தவசனஸ்ஸேவ விஸ்ஸஜ்ஜனபா⁴வானுஜானநங் கத்தப்³ப³ந்தி இமமத்த²ங் ஆகட்³ட⁴தி. ஸாதி து³தியபுச்சா². கா⁴னாயதனயமகேனாதி சக்கா²யதனமூலகேஸு கா⁴னாயதனயமகேனேவ. தங்ஸேஸானீதி தேன கா⁴னாயதனமூலககாயாயதனயமகேன ஸத்³தி⁴ங் ஸேஸானி. ஸதி³ஸவிஸ்ஸஜ்ஜனத்தா அனாருள்ஹானீதி எத்த² ‘‘அனாருள்ஹானீ’’தி எத்தகமேவ ததா²-ஸத்³தே³ன அனுகட்³டீ⁴யதி, ந ‘‘ஸதி³ஸவிஸ்ஸஜ்ஜனத்தா’’தி த³ஸ்ஸெந்தோ ‘‘ததா²தி…பே॰… ஸமஞ்ஞேனா’’தி வத்வா இதா³னி ‘‘காரணஸாமஞ்ஞேனா’’தி வுத்தஸ்ஸ ஸதி³ஸவிஸ்ஸஜ்ஜனத்தஸ்ஸ தத்த² அபா⁴வங் த³ஸ்ஸேதுங் ‘‘கா⁴னஜிவ்ஹாகாயாயதனானங் பனா’’திஆதி³ வுத்தங். தத்த² அக³ப்³ப⁴ஸெய்யகேஸு பவத்தமானானந்தி எத்தா²பி ‘‘ஸஹசாரிதாயா’’தி பத³ங் ஆனெத்வா ஸம்ப³ந்தி⁴தப்³ப³ங், ததா² ‘‘க³ப்³ப⁴ஸெய்யகேஸு ச பவத்தமானான’’ந்தி. இதரானி கா⁴னாயதனமூலகானி ஜிவ்ஹாகாயாயதனயமகானி த்³வே ந விஸ்ஸஜ்ஜீயந்தி, கா⁴னாயதனமூலகேஸு ச யமகேஸு விஸ்ஸஜ்ஜிதேஸு இதரத்³வயமூலகானி ஜிவ்ஹாகாயாயதனமூலகானி ந விஸ்ஸஜ்ஜீயந்தி அவிஸேஸத்தா அப்பவிஸேஸத்தா சாதி யோஜேதப்³ப³ங். தத்த² காயாயதனயமகே து³தியபுச்சா²வஸேன அப்பவிஸேஸோ, இதரவஸேன அவிஸேஸோ வேதி³தப்³போ³. ரூபாயதனமனாயதனேஹி ஸத்³தி⁴ந்தி இத³ங் ரூபாயதனமூலகமனாயதனவஸேன வுத்தந்தி ஆஹ ‘‘ரூபாயதன…பே॰… அதி⁴ப்பாயோ’’தி. தேனேவாஹ ‘‘ரூபாயதனமூலகேஸு ஹீ’’திஆதி³. யமகானந்தி ரூபாயதனமூலகக³ந்த⁴ரஸபொ²ட்ட²ப்³பா³யதனயமகானங். து³தியபுச்சா²னந்தி யதா²வுத்தயமகானங்யேவ து³தியபுச்சா²னங். வுத்தனயேனாதி ‘‘ஸரூபகானங் அசித்தகான’’ந்திஆதி³னா வுத்தேன நயேன. ஆதி³புச்சா²னந்தி தேஸங்யேவ யமகானங் பட²மபுச்சா²னங்.
ஹெட்டி²மேஹீதி இத³ங் அவிஸேஸவசனம்பி யேஸு ஸதி³ஸவிஸ்ஸஜ்ஜனதா ஸம்ப⁴வதி, தத³பெக்க²ந்தி ஆஹ ‘‘க³ந்த⁴ரஸ…பே॰… அத்தோ²’’தி. உத்³தி³ட்ட²த⁴ம்மேஸு உத்³தே³ஸானுரூபங் லப்³ப⁴மானவிஸேஸகத²னங் விஸ்ஸஜ்ஜனங், யோ தத்த² ந ஸப்³பே³ன ஸப்³ப³ங் உத்³தே³ஸானுரூபகு³ணேன உபலப்³ப⁴தி, தஸ்ஸ அகத²னம்பி அத்த²தோ விஸ்ஸஜ்ஜனமேவ நாம ஹோதீதி ஆஹ ‘‘அவிஸ்ஸஜ்ஜனேனேவ அலப்³ப⁴மானதாத³ஸ்ஸனேன விஸ்ஸஜ்ஜிதானி நாம ஹொந்தீ’’தி.
சக்கு²விகலஸோதவிகலா ‘‘ஜச்சந்த⁴ம்பி…பே॰… வேதி³தப்³போ³’’தி ஆஹ. பரிபுண்ணாயதனமேவ ஓபபாதிகங் ஸந்தா⁴ய வுத்தந்தி எத்த² அட்டா²னப்பயுத்தோ ஏவ-ஸத்³தோ³தி தஸ்ஸ டா²னங் த³ஸ்ஸெந்தோ ‘‘வுத்தமேவாதி அத்தோ²’’தி வத்வா தேன பரிபுண்ணாயதனஸ்ஸ தத்த² அனியதத்தா அபரிபுண்ணாயதனஸ்ஸபி ஸங்க³ஹோ ஸித்³தோ⁴தி த³ஸ்ஸெந்தோ ‘‘தேன ஜச்சந்த⁴ப³தி⁴ரம்பி ஸந்தா⁴ய வுத்ததா ந நிவாரிதா ஹோதீ’’தி ஆஹ.
22-254. தஸ்மிங் புக்³க³லஸ்ஸ அனாமட்ட²த்தாதி கஸ்மா வுத்தங், யாவதா ‘‘ரூபீப்³ரஹ்மலோகங் புச்ச²தீ’’தி இமினாபி ஓகாஸோயேவ ஆமட்டோ²தி. ‘‘ஆமந்தா’’தி படிஞ்ஞாய காரணவிபா⁴வனாதி⁴ப்பாயேனேவ ‘‘கஸ்மா படிஞ்ஞாத’’ந்தி சோத³னங் ஸமுட்டா²பெத்வா தங் காரணங் த³ஸ்ஸேதுகாமோ ‘‘நனூ’’திஆதி³மாஹ க³ப்³ப⁴ஸெய்யகபா⁴வங் க³ந்த்வா பரினிப்³பா³யிஸ்ஸதீதி பச்சி²மப⁴விகங் ஸந்தா⁴யாஹ. தத³வத்த²ஸ்ஸாதி பச்சி²மப⁴வாவத்த²ஸ்ஸ. ப⁴விஸ்ஸந்தஸ்ஸாதி பா⁴வினோ. படிஞ்ஞாதப்³ப³த்தாதி ‘‘உப்பஜ்ஜிஸ்ஸதீ’’தி படிஞ்ஞாதப்³ப³த்தா.
அத² கஸ்மாதி எத்தா²யங் ஸங்கே²பத்தோ² – யதி³ ‘‘யஸ்ஸ ரூபாயதனங் உப்பஜ்ஜிஸ்ஸதி, தஸ்ஸ சக்கா²யதனங் உப்பஜ்ஜிஸ்ஸதீ’’தி புச்சா²யங் வுத்தேன விதி⁴னா படிஞ்ஞாதப்³ப³ங், அத² கஸ்மா அத² கேன காரணேன படிலோமே ‘‘யஸ்ஸ வா பன ரூபாயதனங் நுப்பஜ்ஜிஸ்ஸதி, தஸ்ஸ சக்கா²யதனங் நுப்பஜ்ஜிஸ்ஸதீ’’தி புச்சா²ய ‘‘ஆமந்தா’’தி படிஞ்ஞாதங், நனு இத³ங் அஞ்ஞமஞ்ஞங் விருத்³த⁴ந்தி? நனூதிஆதி³னாபி சோத³கோ தமேவ விரோத⁴ங் விபா⁴வேதி. நோ ச நுப்பஜ்ஜிஸ்ஸதி உப்பஜ்ஜிஸ்ஸதி ஏவாதி அத்தோ². ‘‘தஸ்மிங் ப⁴வே’’திஆதி³ தஸ்ஸ பரிஹாரோ. தத்த² தஸ்மிங் ப⁴வேதி யஸ்மிங் ப⁴வே ‘‘ரூபாயதனங் நுப்பஜ்ஜிஸ்ஸதீ’’தி வுத்தங் பவத்தமானத்தா, தஸ்மிங் ப⁴வே. அனாக³தபா⁴வேன அவசனதோதி பா⁴வீபா⁴வேன அவத்தப்³ப³தோ ஆரத்³து⁴ப்பாத³பா⁴வேன பவத்தமானத்தாதி அதி⁴ப்பாயோ. தேனேவாஹ ‘‘ப⁴வந்தரே ஹீ’’திஆதி³. ந பன வுச்சதீதி ஸம்ப³ந்தோ⁴. ஏவஞ்ச கத்வாதிஆதி³னா பாட²ந்தரேன யதா²வுத்தமத்த²ங் ஸமத்தே²தி.
யஸ்மிங் அத்தபா⁴வே யேஹி ஆயதனேஹி ப⁴விதப்³ப³ங், தங்தங்ஆயதனநிப்³ப³த்தககம்மேன அவஸ்ஸங்பா⁴வீஆயதனஸ்ஸ ஸத்தஸ்ஸ, ஸந்தானஸ்ஸ வா, ‘‘யஸ்ஸ வா பன ரூபாயதனங் உப்பஜ்ஜிஸ்ஸதி, தஸ்ஸ சக்கா²யதனங் உப்பஜ்ஜிஸ்ஸதீதி? ஆமந்தா, யஸ்ஸ வா பன ரூபாயதனங் நுப்பஜ்ஜிஸ்ஸதி, தஸ்ஸ சக்கா²யதனங் நுப்பஜ்ஜிஸ்ஸதீதி? ஆமந்தா’’தி ச ஏவங் பவத்தங் புச்சா²த்³வயவிஸ்ஸஜ்ஜனங் ஆயதனபடிலாப⁴ஸ்ஸ பச்சி²மப⁴விகாத³யோதி எத்த² ஆதி³-ஸத்³தே³ன அரூபே உப்பஜ்ஜித்வா பரினிப்³பா³யனகா ஸங்க³ய்ஹந்தி. இத³ம்பி விஸ்ஸஜ்ஜனங். அபி⁴னந்தி³தப்³ப³த்தாதி ‘‘ஆமந்தா’’தி ஸம்படிச்சி²தப்³ப³த்தா.
யங் பன அகா⁴னகானங் காமாவசரங் உபபஜ்ஜந்தானந்தி வுத்தந்தி ஸம்ப³ந்தோ⁴. யஸ்ஸ விபாகோ கா⁴னாயதனுப்பத்திதோ புரேதரமேவ உபச்சி²ஜ்ஜிஸ்ஸதி, தங் கா⁴னாயதனானிப்³ப³த்தககம்மந்தி வுத்தங். கத²ங் பனீதி³ஸங் கம்மங் அத்தீ²தி விஞ்ஞாயதீதி ஆஹ ‘‘யஸ்ஸ யத்தா²’’திஆதி³. ஏவம்பி க³ப்³ப⁴ஸெய்யகோ ஏவ இத⁴ அகா⁴னகோதி அதி⁴ப்பேதோதி கத²மித³ங் விஞ்ஞாயதீதி சோத³னாய ‘‘ந ஹீ’’திஆதி³ங் வத்வா தமத்த²ங் ஸாதே⁴துங் ‘‘த⁴ம்மஹத³யவிப⁴ங்கே³’’திஆதி³ வுத்தங். அவசனத்தம்பி ஹி யதா²த⁴ம்மஸாஸனே அபி⁴த⁴ம்மே படிக்கே²போயேவாதி இதா⁴தி இமஸ்மிங் ஆயதனயமகே. யதா²த³ஸ்ஸிதாஸூதி ‘‘யஸ்ஸ வா பன ஸோதாயதனங் நுப்பஜ்ஜிஸ்ஸதி, தஸ்ஸ சக்கா²யதனங் நுப்பஜ்ஜதி, யஸ்ஸ யத்த² கா⁴னாயதனங் ந நிருஜ்ஜ²தி, தஸ்ஸ தத்த² ரூபாயதனங் ந நிருஜ்ஜி²ஸ்ஸதீ’’தி ச த³ஸ்ஸிதப்பகாராஸு புச்சா²ஸு. ஆமந்தாதி வுத்தந்தி அத² கஸ்மா ந விஞ்ஞாயதீதி யோஜனா. ஏதாஸு புச்சா²ஸு கஸ்மா படிவசனேன விஸ்ஸஜ்ஜனங் ந கதந்தி அதி⁴ப்பாயோ. ஸன்னிட்டா²னேன க³ஹிதத்த²ஸ்ஸாதி ‘‘யஸ்ஸ வா பன ஸோதாயதனங் நுப்பஜ்ஜிஸ்ஸதி, யஸ்ஸ யத்த² கா⁴னாயதனங் ந நிருஜ்ஜி²ஸ்ஸதீ’’தி ச ஏவமாதி³கேன ஸன்னிட்டா²னபதே³ன க³ஹிதஸ்ஸ அத்த²ஸ்ஸ. ஏகதே³ஸே ஸங்ஸயத்த²ஸ்ஸ ஸம்ப⁴வேனாதி ஏகதே³ஸே ஸங்ஸயிதப்³ப³ஸ்ஸ அத்த²ஸ்ஸ ஸம்ப⁴வேன ஸன்னிட்டா²னத்த²படியோக³பூ⁴தஸங்ஸயத்த²ஸ்ஸ படிவசனஸ்ஸ அகரணதோ ‘‘ஆமந்தா’’தி படிவசனவிஸ்ஸஜ்ஜனஸ்ஸ அகத்தப்³ப³தோ அத்த²ஸ்ஸ அபி⁴ந்தி³த்வா ஏகஜ்ஜ²ங் கத்வா அவத்தப்³ப³தோ. தேனாஹ ‘‘பி⁴ந்தி³தப்³பே³ஹி ந படிவசனவிஸ்ஸஜ்ஜனங் ஹோதீ’’தி.
யதி³ ஸியாதி பி⁴ந்தி³த்வா வத்தப்³பே³பி அத்தே² யதி³ படிவசனவிஸ்ஸஜ்ஜனங் ஸியா, பரிபுண்ணவிஸ்ஸஜ்ஜனமேவ ந ஸியா அனோகாஸபா⁴வதோ பி⁴ந்தி³தப்³ப³தோ சாதி அத்தோ². ததா² ஹி ‘‘பஞ்சவோகாரே பரினிப்³ப³ந்தானங், அரூபே பச்சி²மப⁴விகானங், யே ச அரூபங் உபபஜ்ஜித்வா பரினிப்³பா³யிஸ்ஸந்தி, தேஸங் சவந்தானங் தேஸங் ஸோதாயதனஞ்ச நுப்பஜ்ஜிஸ்ஸதி, சக்கா²யதனஞ்ச நுப்பஜ்ஜதீ’’தி ச, ததா² ‘‘ரூபாவசரே பரினிப்³ப³ந்தானங், அரூபானங் தேஸங் தத்த² கா⁴னாயதனஞ்ச ந நிருஜ்ஜ²தி, ரூபாயதனஞ்ச ந நிருஜ்ஜி²ஸ்ஸதீ’’தி ச தத்த² விபா⁴க³வஸேன பவத்தோ பாட²ஸேஸோ. அத² கஸ்மாதி யதி³ அபி⁴ந்தி³தப்³பே³ படிவசனவிஸ்ஸஜ்ஜனங், ந பி⁴ந்தி³தப்³பே³, ஏவங் ஸந்தே ‘‘யஸ்ஸ வா பன ஸோமனஸ்ஸிந்த்³ரியங் உப்பஜ்ஜதி, தஸ்ஸ சக்கு²ந்த்³ரியங் உப்பஜ்ஜதீதி? ஆமந்தா’’தி இமினா படிவசனவிஸ்ஸஜ்ஜனேன ‘‘காமதா⁴துயா’’திஆதி³மாஹ.
‘‘யங் சித்தங் உப்பஜ்ஜதி, ந நிருஜ்ஜ²தி, தங் சித்தங் நிருஜ்ஜி²ஸ்ஸதி, நுப்பஜ்ஜிஸ்ஸதீதி? ஆமந்தா’’தி தஸ்ஸேவ சித்தஸ்ஸ நிரோதோ⁴ அனாக³தபா⁴வேன தஸ்ஸ உப்பாத³க்க²ணே யதா² வுத்தோ, ஏவங் தஸ்ஸேவ கம்மஜஸந்தானஸ்ஸ நிரோதோ⁴ தஸ்ஸ உப்பாதே³ அனாக³தபா⁴வேன வத்தப்³போ³. தேனேதங் த³ஸ்ஸேதி ‘‘ஏகசித்தஸ்ஸ நாம உப்பாத³க்க²ணே நிரோதோ⁴ அனாக³தபா⁴வேன வுச்சதி, கிமங்க³ங் பன ஏகஸந்தானஸ்ஸா’’தி ஸப்³ப³த்த² ஸப்³ப³ஸ்மிங் அனாக³தவாரே. உபபஜ்ஜந்தானங் ஏவ வஸேன ஸோ நிரோதோ⁴ ததா² அனாக³தபா⁴வேன வுத்தோ, கஸ்மா பனெத்த² நிரோதோ⁴ உபபன்னானங் வஸேன ந வுத்தோதி ஆஹ ‘‘உப்பன்னானங் பனா’’திஆதி³. தஸ்ஸேவ யதா²பவத்தஸ்ஸ கம்மஜஸந்தானஸ்ஸ ஏவ. தஸ்மாதி யஸ்மா உப்பாத³க்க²ணதோ உத்³த⁴ங் நிரோதோ⁴ ஆரத்³தோ⁴ நாம ஹோதி, தஸ்மா. பே⁴தே³ ஸதிபி காலபே⁴தா³மஸனஸ்ஸ காரணே ஸதிபி. அனாக³தகாலாமஸனவஸேனேவ நிரோத⁴ஸ்ஸேவ வஸேன விஸ்ஸஜ்ஜனத்³வயங் உபபன்னமேவ யுத்தமேவ ஹோதீதி. அஞ்ஞேஸங் வஸேன நிரோத⁴ஸ்ஸேவ வத்துங் அஸக்குணெய்யத்தா ‘‘அரஹத’’ந்தி வுத்தங்.
யதி³ உபபத்திஅனந்தரங் நிரோதோ⁴ ஆரத்³தோ⁴ நாம ஹோதி, அத² கஸ்மா சுதியா நிரோத⁴வசனந்தி சோத³னங் ஸந்தா⁴யாஹ ‘‘தன்னிட்டா²னபா⁴வதோ பன சுதியா நிரோத⁴வசன’’ந்தி. தன்னிட்டா²னபா⁴வதோதி தஸ்ஸ ஸந்தானஸ்ஸ நிட்டா²னபா⁴வதோ. பவத்தேதிஆதி³ வுத்தஸ்ஸேவத்த²ஸ்ஸ பாகடகரணங். தத்த² தஸ்ஸாதி ஸந்தானஸ்ஸ. வக்க²தீதிஆதி³பி பவத்தே நிரோத⁴ங் அனாதி³யித்வா சுதினிரோத⁴ஸ்ஸேவ க³ஹிததாய காரணவசனங். தேனாதி தேன யதா²வுத்தேன பாட²ந்தரவசனேன. எத்தா²தி ஏதஸ்மிங் ‘‘யஸ்ஸ சக்கா²யதனங் நிருஜ்ஜி²ஸ்ஸதீ’’திஆதி³கே ஆயதனயமகே. யதி³ பவத்தே நிருத்³த⁴ஸ்ஸபி சுதியா ஏவ நிரோதோ⁴ இச்சி²தோ, ‘‘ஸசக்கு²கான’’ந்திஆதி³ கத²ந்தி ஆஹ ‘‘ஸசக்கு²கானந்திஆதீ³ஸு ச படிலத்³த⁴சக்கு²கானந்திஆதி³னா அத்தோ² விஞ்ஞாயதீ’’தி. தேதி அரூபே பச்சி²மப⁴விகா. அசக்கு²கவசனஞ்ச ஸாவஸேஸந்தி யோஜனா.
பவத்திவாரவண்ணனா நிட்டி²தா.
ஆயதனயமகவண்ணனா நிட்டி²தா.
4. தா⁴துயமகங்
1-19. ஸத்³த³தா⁴துஸம்ப³ந்தா⁴னந்தி
தா⁴துயமகவண்ணனா நிட்டி²தா.
5. ஸச்சயமகங்
1. பண்ணத்திவாரவண்ணனா
10-26. ஸோதி அஞ்ஞத்தா²தி ஸங்கா²ரது³க்க²விபரிணாமது³க்க²து³க்கா²தி⁴ட்டா²னேஸு. அஞ்ஞனிரபெக்கோ²தி ஸங்கா²ராதி³பத³ந்தரானபெக்கோ². தேனாதி அஞ்ஞனிரபெக்க²து³க்க²பத³க்³க³ஹணதோ. தஸ்மிங் து³க்க²து³க்கே² விஸயபூ⁴தே. ஏஸ து³க்க²ஸத்³தோ³ ‘‘து³க்க²ங் து³க்க²ஸச்ச’’ந்தி எத்த² பட²மோ து³க்க²ஸத்³தோ³. தஞ்ச து³க்க²து³க்க²ங். ‘‘து³க்க²ங் து³க்க²ஸச்ச’’ந்தி எத்த² து³க்க²மேவ து³க்க²ஸச்சந்தி நயித³ங் அவதா⁴ரணங் இச்சி²தப்³ப³ங், து³க்க²ங் து³க்க²ஸச்சமேவாதி பன இச்சி²தப்³ப³ந்தி ஆஹ ‘‘ஏகந்தேன து³க்க²ஸச்சமேவா’’தி. ஸச்சவிப⁴ங்கே³ வுத்தேஸு ஸமுத³யேஸு கோசி ப²லத⁴ம்மேஸு நத்தீ²தி ஸச்சவிப⁴ங்கே³ பஞ்சதா⁴ வுத்தேஸு ஸமுத³யேஸு ஏகோபி ப²லஸபா⁴வேஸு நத்தி², ப²லஸபா⁴வோ நத்தீ²தி அத்தோ². ‘‘ப²லத⁴ம்மோ நத்தீ²’’தி ச பாடோ². மக்³க³ஸத்³தோ³ ச ப²லங்கே³ஸூதி ஸாமஞ்ஞப²லங்கே³ஸு ஸம்மாதி³ட்டி²ஆதீ³ஸு ‘‘மக்³க³ங்க³ங் மக்³க³பரியாபன்ன’’ந்திஆதி³னா (விப⁴॰ 492, 495) ஆக³தோ மக்³க³ஸத்³தோ³ மக்³க³ப²லத்தா பவத்ததி காரணூபசாரேனாதி அதி⁴ப்பாயோ. தேனாஹ ‘‘ந மக்³க³கிச்சஸப்³பா⁴வா’’திஆதி³. தஸ்மாதி யஸ்மா ஸச்சதே³ஸனாய பப⁴வாதி³ஸபா⁴வா ஏவ த⁴ம்மா ஸமுத³யாதி³பரியாயேன வுத்தா, ந அப்பப⁴வாதி³ஸபா⁴வா, தஸ்மா
பத³ஸோத⁴னேன…பே॰… இத⁴ க³ஹிதாதி ஏதேன அஸச்சஸபா⁴வானங் த⁴ம்மானங் பகரணேன நிவத்திததங் ஆஹ. தேஸந்தி து³க்கா²தீ³னங். தப்³பி³ஸேஸனயோக³விஸேஸந்தி தேன து³க்கா²தி³விஸேஸனயோகே³ன விஸிட்ட²தங். ஸச்சவிஸேஸனபா⁴வேனேவ து³க்கா²தீ³னங் பரிஞ்ஞெய்யதாதி³பா⁴வோ ஸித்³தோ⁴தி ஆஹ ‘‘ஏகந்தஸச்சத்தா’’தி. யதா² செத்தா²தி யதா² ஏதஸ்மிங் ஸச்சயமகே ஸுத்³த⁴ஸச்சவாரே ஸச்சவிஸேஸனபூ⁴தா ஏவ து³க்கா²த³யோ க³ஹிதா. ஏவங் க²ந்த⁴யமகாதீ³ஸுபீதி ந ஸுத்³த⁴ஸச்சவாரே ஏவ அயங் நயோ த³ஸ்ஸிதோதி அத்தோ². பத³ஸோத⁴னவாரே தங்மூலசக்கவாரே ச ‘‘ரூபங் ரூபக்க²ந்தோ⁴’’திஆதி³னா ஸமுதா³யபதா³னங்யேவ வுத்தத்தா வத்தப்³ப³மேவ நத்தீ²தி ‘‘ஸுத்³த⁴க்க²ந்தா⁴தி³வாரேஸூ’’தி வுத்தங். ததா² செத்தா²பி ‘‘அட்ட²கதா²யங் பனா’’திஆதி³. புரிமோ ஏவ அத்தோ² யுத்தோ, யுத்திதோ பாடோ²வ ப³லவாதி.
பண்ணத்திவாரவண்ணனா நிட்டி²தா.
2. பவத்திவாரவண்ணனா
27-164. து³க்க²பரிஞ்ஞா யாவ து³க்க²ஸமதிக்கமனத்தா²தி ஸப்பதே³ஸங் பவத்தாபி ஸா தத³த்தா²வஹா ப⁴வெய்யாதி கஸ்ஸசி ஆஸங்கா ஸியாதி த³ஸ்ஸெந்தோ ஆஹ ‘‘அரியத்தா…பே॰… கத்வா வுத்த’’ந்தி. கேசி பனெத்த² ‘‘அந்திமப⁴வே டி²தத்தா’’தி காரணங் வத³ந்தி, தங் ந யுஜ்ஜதி உபபத்தியா து³க்க²விசாரத்தா, ந ச ஸப்³பே³ ஸுத்³தா⁴வாஸா அந்திமப⁴விகா உத்³த⁴ங்ஸோதவசனதோ. ‘‘யஸ்ஸ து³க்க²ஸச்சங் உப்பஜ்ஜதீ’’தி உப்பாதா³வத்தா². அவிஸேஸேன து³க்க²ஸச்சபரியாபன்னா த⁴ம்மா ஸம்ப³ந்தீ⁴பா⁴வேனேவ ‘‘ஸப்³பே³ உபபஜ்ஜந்தா’’திஆதி³ங் வத்வா ஸ்வாயமத்தோ² யஸ்மா நிச்ச²யரூபேன க³ஹிதோ, நிச்சி²தஸ்ஸேவ ச அத்த²ஸ்ஸ விபா⁴க³த³ஸ்ஸனேன ப⁴விதப்³ப³ங், தஸ்மா ‘‘தெஸ்வேவ…பே॰… உபபன்னமேவா’’தி ஆஹ. தத்த² தெஸ்வேவ கேசி த³ஸ்ஸீயந்தீதி ஸம்ப³ந்தோ⁴. ஏககொட்டா²ஸுப்பத்திஸமங்கி³னோதி து³க்க²கொட்டா²ஸுப்பத்திஸமங்கி³னோ. தேஸூதி ஸன்னிட்டா²னேன க³ஹிதேஸு. மக்³க³ப²லுப்பாத³ஸமங்கீ³ஸூதி மக்³க³ப²லுப்பாத³ஸமங்கீ³னங், அயமேவ வா பாடோ².
எத்த² சாதிஆதி³னா ‘‘ஸப்³பே³ஸ’’ந்திஆதி³பாளியா பிண்ட³த்த²ங் த³ஸ்ஸேதி. தத்த² ஸமுத³யஸச்சுப்பாத³வோமிஸ்ஸஸ்ஸ து³க்க²ஸச்சுப்பாத³ஸ்ஸாதி இத³ங் அனாத³ரே ஸாமிவசனங். கத்த²சி ஸமுத³யஸச்சுப்பாத³வோமிஸ்ஸேபி து³க்க²ஸச்சே தங்ரஹிதஸ்ஸ ஸமுத³யஸச்சுப்பாத³ரஹிதஸ்ஸ து³க்க²ஸச்சுப்பாத³ஸ்ஸ த³ஸ்ஸனவஸேன வுத்தந்தி யோஜனா. கேசி பன ‘‘ஸமுத³யஸச்சாவோமிஸ்ஸஸ்ஸா’’தி பட²ந்தி, தேஸங் ‘‘தங்ரஹிதஸ்ஸா’’தி இத³ங் புரிமபத³ஸ்ஸ அத்த²விவரணங் வேதி³தப்³ப³ங். தங்ஸஹிதஸ்ஸாதி ஸமுத³யஸச்சுப்பாத³ஸஹிதஸ்ஸ து³க்க²ஸச்சுப்பாத³ஸ்ஸ த³ஸ்ஸனவஸேன வுத்தந்தி யோஜனா. தேஸந்தி அஸஞ்ஞஸத்தானங், பவத்தியங் து³க்க²ஸச்சஸ்ஸ உப்பாதோ³ ‘‘பவத்தே’’திஆதி³னா வுத்தேஸு த்³வீஸுபி கொட்டா²ஸேஸு ந க³ஹிதோதி அத்தோ². படிஸந்தி⁴யங் பன ததா² நிரோதோ⁴ சாதி யதா² அஸஞ்ஞஸத்தானங் படிஸந்தி⁴யங் து³க்க²ஸச்சஸ்ஸ உப்பாதோ³ பட²மகொட்டா²ஸேன க³ஹிதோ, பவத்தியங் பன ஸோ த்³வீஹி கொட்டா²ஸேஹி ந க³ஹிதோ, ததா² தேஸங் து³க்க²ஸச்சஸ்ஸ நிரோதோ⁴பீதி அத்தோ². ததா² ஹி ‘‘ஸப்³பே³ஸங் சவந்தானங் பவத்தே தண்ஹாவிப்பயுத்தசித்தஸ்ஸ ப⁴ங்க³க்க²ணே’’திஆதி³னா (யம॰ 1.ஸச்சயமக.88) நிரோத⁴வாரே பாளி பவத்தா. ஏஸேவ நயோதி ய்வாயங் ‘‘எத்த² சா’’திஆதி³னா ஸமுத³யஸச்சயமகே பாளியா அத்த²னயோ வுத்தோ, மக்³க³ஸச்சயமகேபி ஏஸேவ நயோ, ஏவமேவ தத்தா²பி அத்தோ² நேதப்³போ³தி அத்தோ². ததா² ஹி ‘‘ஸப்³பே³ஸங் உபபஜ்ஜந்தான’’ந்திஆதி³னா தத்த² பாளி பவத்தா.
ஏவஞ்ச ஸதீதி ஏவங் க²ணவஸேன ஓகாஸக்³க³ஹணே ஸதீதி யதா²வுத்தமத்த²ங் அனநுஜானநவஸேன பச்சாமஸதி. ஏதஸ்ஸ விஸ்ஸஜ்ஜனேதி ஏதஸ்ஸ யமகபத³ஸ்ஸ விஸ்ஸஜ்ஜனே. ‘‘அக்³க³மக்³க³ஸ்ஸ உப்பாத³க்க²ணே, அரஹந்தானங் சித்தஸ்ஸ உப்பாத³க்க²ணே, யஸ்ஸ சித்தஸ்ஸ அனந்தரா அக்³க³மக்³க³ங் படிலபி⁴ஸ்ஸந்தி, தஸ்ஸ சித்தஸ்ஸ உப்பாத³க்க²ணே, அஸஞ்ஞஸத்தங் உபபஜ்ஜந்தானங் தேஸங் தத்த² து³க்க²ஸச்சங் உப்பஜ்ஜதி, நோ ச தேஸங் தத்த² ஸமுத³யஸச்சங் உப்பஜ்ஜிஸ்ஸதீ’’தி (யம॰ 1.ஸச்சயமக.71) புரிமகொட்டா²ஸஸ்ஸ ஆக³தத்தா விரோதோ⁴ நத்தீ²தி ‘‘பச்சி²மகொட்டா²ஸே’’திஆதி³ வுத்தங் தஸ்மாதி யஸ்மா ந உபபத்திசித்துப்பாத³க்க²ணோ பா⁴வினோ ஸமுத³யபச்சுப்பாத³ஸ்ஸ ஆதா⁴ரோ, அத² கோ² காமாவசராதி³ஓகாஸோ, தஸ்மா. புக்³க³லோகாஸவாரோ ஹேஸாதி யஸ்மா புக்³க³லோகாஸவாரோ ஏஸ, தஸ்மா ‘‘தேஸங் தத்தா²’’தி எத்த² ஓகாஸவஸேன தத்த²-ஸத்³த³ஸ்ஸ அத்தோ² வேதி³தப்³போ³. யதி³ புக்³க³லோகாஸவாரே காமாவசராதி³ஓகாஸவஸேனேவ அத்தோ² க³ஹேதப்³போ³, ந க²ணவஸேன, அத² கஸ்மா ‘‘ஸப்³பே³ஸங் உபபஜ்ஜந்தான’’ந்திஆதி³னா ஓகாஸங் அனாமஸித்வா தத்த² விஸ்ஸஜ்ஜனங் பவத்தந்தி சோத³னங் ஸந்தா⁴யாஹ ‘‘தத்த²…பே॰… ஸோ ஏவா’’தி. தத்த² தத்தா²தி ஓகாஸவாரே. புக்³க³லவிஸேஸத³ஸ்ஸனத்த²ந்தி புக்³க³லஸங்கா²தவிஸேஸத³ஸ்ஸனத்த²ங். யத்த² தேதி யஸ்மிங் காமாவசராதி³ஓகாஸே தே புக்³க³லா.
கேசீதி த⁴ம்மஸிரித்தே²ரங் ஸந்தா⁴யாஹ. ஸோ ஹி ‘‘பவத்தே சித்தஸ்ஸ ப⁴ங்க³க்க²ணே து³க்க²ஸச்சங் நுப்பஜ்ஜதீ’’தி எத்த² சித்தஜரூபமேவ அதி⁴ப்பேதங் சித்தபடிப³த்³த⁴வுத்தித்தாதி காரணங் வத³தி. அபரே ‘‘அரூபேதி இமங் புரிமாபெக்க²ம்பி ஹோதீதி தேன பவத்தங் விஸேஸெத்வா அரூபப⁴வவஸேன அயமத்தோ² வுத்தோ புக்³க³லோ ந சித்தங் அபெக்கி²த்வாவ க³ஹிதோதி இத³ங் சித்தஸ்ஸ அனதி⁴கதத்தா வுத்தங். யத்த² பன ஸமுத³யஸச்சஸ்ஸ உப்பாத³னிச்ச²யோ, தத்தே²வ தஸ்ஸ அனுப்பாத³னிச்ச²யேனபி ப⁴விதப்³ப³ங் சித்தேன ச வினா புக்³க³லஸ்ஸேவ அனுபலப்³ப⁴னதோதி ‘‘யஸ்ஸ ஸமுத³யஸச்சங் நுப்பஜ்ஜதீ’’தி எத்த² ஸமுத³யஸச்சாதா⁴ரங் சித்தங் அத்த²தோ க³ஹிதமேவாதி ஸக்கா விஞ்ஞாதுங். அபிச இந்த்³ரியப³த்³தே⁴பி ந ஸப்³போ³ ரூபுப்பாதோ³ ஏகந்தேன சித்துப்பாதா³தீ⁴னோதி ஸக்கா வத்துங் சித்துப்பத்தியா வினாபி தத்த² ரூபுப்பத்தித³ஸ்ஸனதோ, தஸ்மா சித்தஜரூபமேவ சித்தஸ்ஸ உப்பாத³க்க²ணே உப்பஜ்ஜதி, ந இதரங், இதரங் பன தஸ்ஸ தீஸுபி க²ணேஸு உப்பஜ்ஜதீதி நிட்ட²மெத்த² க³ந்தப்³ப³ங். விப⁴ஜிதப்³பா³ அவிப⁴த்தா நாம நத்தீ²தி ஸியாயங் பஸங்கோ³ பட²மவாரே, து³தியவாரே பன விப⁴ஜனா ஏவ ஸாதி நாயங் பஸங்கோ³ லப்³ப⁴தி, பட²மவாரேபி வா நாயங் பஸங்கோ³. கஸ்மா? ஏஸா ஹி யமகஸ்ஸ பகதி, யதி³த³ங் யதா²லாப⁴வஸேன யோஜனா.
து³தியே சித்தே வத்தமானேதி எத்த² ‘‘பட²மங் ப⁴வங்க³ங், து³தியங் சித்த’’ந்தி வத³ந்தி. ப⁴வனிகந்தியா ஆவஜ்ஜனம்பி விபாகப்பவத்திதோ விஸதி³ஸத்தா ‘‘து³திய’’ந்தி வத்துங் ஸக்கா, ததோ பட்டா²ய புப்³பே³ தஸ்ஸ தத்த² ஸமுத³யஸச்சங் நுப்பஜ்ஜித்தா²தி வத்தப்³பா³தி அபரே. ப⁴வனிகந்தியா பன ஸஹஜாதங் பட²மங் சித்தங் இத⁴ து³தியங் சித்தந்தி அதி⁴ப்பேதங். ததோ புப்³பே³ பவத்தங் ஸப்³ப³ங் அப்³யாகதபா⁴வேன ஸமானஜாதிகத்தா ஏகந்தி கத்வா ததோ பட்டா²ய ஹெட்டா² தஸ்ஸ தத்த² ஸமுத³யஸச்சங் நுப்பஜ்ஜித்தே²வாதி ‘‘ஸப்³ப³ந்திமேன பரிச்சே²தே³னா’’திஆதி³. தஸ்மிந்தி து³தியே சித்தே. தேன ஸமானக³திகத்தாதி தேன யதா²வுத்தது³தியசித்தேன ச தங்ஸமங்கி³னோ வா து³க்க²ஸச்சங் உப்பஜ்ஜித்த², நோ ச ஸமுத³யஸச்சந்தி வத்தப்³ப³பா⁴வேன ஸமானக³திகத்தா. ஏவஞ்ச கத்வாதி தேன ஸமானக³திகதாய த³ஸ்ஸிதத்தா ஏவ. யதா²வுத்தாதி து³தியாகுஸலசித்ததோ புரிமஸப்³ப³சித்தஸமங்கி³னோ அக்³க³ஹிதா ஹொந்தி இதரபா⁴வாபா⁴வதோ. வுத்தமேவத்த²ங் பாட²ந்தரேன ஸமத்தே²துங் ‘‘யதா²’’திஆதி³ வுத்தங். தேதி சதுவோகாரா. வஜ்ஜேதப்³பா³தி ‘‘இதரேஸ’’ந்தி விஸேஸனேன நிவத்தேதப்³பா³. பஞ்சவோகாரா விய யதா²வுத்தா ஸுத்³தா⁴வாஸாதி து³தியசித்தக்க²ணஸமங்கி³பா⁴வேன வுத்தப்பகாரா யதா² ஸுத்³தா⁴வாஸஸங்கா²தா பஞ்சவோகாரா புப்³பே³ வுத்தா ஸந்தி, ஏவங் சதுவோகாரா புப்³பே³ வுத்தா ந ஹி ஸந்தீதி யோஜனா.
‘‘யஸ்ஸ ‘‘புக்³க³லோகாஸா அஞ்ஞமஞ்ஞபரிச்சி²ன்னா க³ஹிதா’’தி. காமாவசரே…பே॰… உபபன்னாதி எத்த² காமாவசரே அபி⁴ஸமேதாவினோ ரூபாவசரங் உபபன்னா, ரூபாவசரே அபி⁴ஸமேதாவினோ அரூபாவசரங் உபபன்னா, வா-ஸத்³தே³ன காமாவசரே அபி⁴ஸமேதாவினோ அரூபாவசரங் உபபன்னாதி ச யோஜேதப்³ப³ங். தத்தா²தி உபபன்னோகாஸே. அபி⁴ஸமயோதி உபரிமக்³கா³பி⁴ஸமயோ யாவ உபபன்னோ ந ப⁴விஸ்ஸதி, தாவ தே தத்த² உபபன்னபுக்³க³லா எத்த² ஏதஸ்மிங் ‘‘அபி⁴ஸமேதாவீன’’ந்திஆதி³னா வுத்தே து³தியகொட்டா²ஸே ந க³ய்ஹந்தி புக்³க³லோகாஸானங் அஞ்ஞமஞ்ஞங் பரிச்சி²ன்னத்தா. யதி³ ஏவங் கிங் தே இமஸ்மிங் யமகே அஸங்க³ஹிதாதி ஆஹ ‘‘தே பனா’’திஆதி³. தத்த² யங் வுத்தங் ‘‘ஸமானக³திகாதி விஸுங் ந த³ஸ்ஸிதா’’தி, தங் பாகடதரங் காதுங் ‘‘அனபி⁴ஸமேதாவீன’’ந்திஆதி³ வுத்தங். தஸ்ஸத்தோ² – ‘‘அனபி⁴ஸமேதாவீன’’ந்தி இமினா பட²மபதே³ன க³ஹிதா ஸப்³ப³த்த² மக்³கு³ப்பத்திரஹே ஸம்பத்திப⁴வே தத்த² ஸுத்³தா⁴வாஸே யே அனபி⁴ஸமேதாவினோ, தேஸு த்³விப்பகாரேஸு ஸுத்³தா⁴வாஸா யஸ்மிங் காலே தத்த² அனபி⁴ஸமேதாவினோதி க³ஹேதப்³பா³, தத்த² நேஸங் ததா² க³ஹேதப்³ப³காலஸ்ஸ விஸேஸனத்த²ங் ‘‘ஸுத்³தா⁴வாஸானங் து³தியே சித்தே வத்தமானே’’தி வுத்தந்தி.
ஏதேனாதி ஏதேன வசனேன. வோதா³னசித்தங் நாம மக்³க³சித்தானங் அனந்தரபச்சயபூ⁴தங் சித்தங், இத⁴ பன அக்³க³மக்³க³சித்தஸ்ஸ. ததோதி யதா²வுத்தவோதா³னசித்ததோ புரிமதரசித்தஸமங்கி³னோ, அனுலோமஞாணஸம்பயுத்தசித்தஸமங்கி³னோ, அவஸிட்ட²வுட்டா²னகா³மினிவிபஸ்ஸனாசித்தாதி³ஸமங்கி³னோபி. தேனாஹ ‘‘யாவ ஸப்³ப³ந்திமதண்ஹாஸம்பயுத்தசித்தஸமங்கீ³, தாவ த³ஸ்ஸிதா’’தி.
படிஸந்தி⁴சுதிசித்தானங் ‘‘பவத்தே சித்தஸ்ஸா’’திஆதி³. தத்த² சுதிசித்தஸ்ஸபி உப்பாத³க்க²ணஸ்ஸ க³ஹணங் த³ட்ட²ப்³ப³ந்தி யோஜனா. த்³வீஸுபி கொட்டா²ஸேஸூதி ஸமுத³யஸச்சஸ்ஸ பா⁴வினோ நிரோத⁴ஸ்ஸ அப்படிக்கே²பபடிக்கே²பவஸேன பவத்தேஸு புரிமபச்சி²மகொட்டா²ஸேஸு. ந விஸேஸிதந்தி யதா²வுத்தே அப்படிக்கே²பே ச ஸதிபி விஸேஸெத்வா ந வுத்தந்தி அத்தோ². ஏகஸ்ஸபி புக்³க³லஸ்ஸ தாதி³ஸஸ்ஸ மக்³க³ஸ்ஸ ச ப²லஸ்ஸ ச ப⁴ங்க³க்க²ணஸமங்கி³னோ புரிமகொட்டா²ஸஸ்ஸேவ அப⁴ஜனதோ கொட்டா²ஸத்³வயஸம்ப⁴வாபா⁴வதோதி அத்தோ². இதா³னி தமேவத்த²ங் விவரிதுங் ‘‘யஸ்ஸ து³க்க²ஸச்ச’’ந்திஆதி³ வுத்தங். கேஸஞ்சி புக்³க³லானங். நித்³தா⁴ரணே சேதங் ஸாமிவசனங். ‘‘மக்³க³ஸ்ஸ ச ப²லஸ்ஸ ‘‘திண்ணங் ப²லானங் த்³வின்னஞ்ச மக்³கா³ன’’ந்தி ஆஹ. தானி பன ஹெட்டி²மானி தீணி ப²லானி மஜ்ஜே² ச த்³வே மக்³கா³ வேதி³தப்³பா³. நிரந்தரங் அனுப்பாதெ³த்வாதி படிபக்க²த⁴ம்மேஹி அவோகிண்ணங் கத்வா ஸஹ விபஸ்ஸனாய மக்³க³ங் உப்பாதெ³ந்தேன யா ஸாதச்சகிரியா காதப்³பா³, தங் அகத்வாதி அத்தோ². தேனாஹ ‘‘அந்தரந்தரா…பே॰… உப்பாதெ³த்வா’’தி. ‘‘அரூபே மக்³க³ஸ்ஸ ச ப²லஸ்ஸ ச ப⁴ங்க³க்க²ணே’’தி அவிஸேஸதோ வுத்தே கத²மயங் விஸேஸோ லப்³ப⁴தீதி ஆஹ ‘‘ஸாமஞ்ஞவசனேனபீ’’திஆதி³. தேன அபவாத³விஸயபரியாயேன உபஸக்³கா³ அபி⁴னிவிஸந்தீதி லோகஸித்³தோ⁴யங் ஞாயோதி த³ஸ்ஸேதி.
பவத்திவாரவண்ணனா நிட்டி²தா.
3. பரிஞ்ஞாவாரவண்ணனா
165-170. எத்தே²வாதி இமஸ்மிங் ஸச்சயமகே ஏவ. அபரிஞ்ஞெய்யதாத³ஸ்ஸனத்த²ந்தி எத்த² அ-காரோ ந பரிஞ்ஞெய்யாபா⁴வவசனோ, நாபி பரிஞ்ஞெய்யபடிபக்க²வசனோ, அத² கோ² தத³ஞ்ஞவசனோதி யதா²ரஹங் ஸச்சேஸு லப்³ப⁴மானானங் பஹாதப்³ப³தாதீ³னம்பி த³ஸ்ஸனே ஆபன்னேயேவ ஸமயவாரோ த³ஸ்ஸனபரோ, யேஸஞ்ச ந த³ஸ்ஸனபரோ, தேஸு கேஸுசி ஸச்சேஸு லப்³ப⁴மானானம்பி கேஸஞ்சி விஸேஸானங் அயங் வாரோ ந த³ஸ்ஸனபரோதி த³ஸ்ஸெந்தோ ‘‘ஸச்சி²கரண…பே॰… த³ஸ்ஸனத்த²ஞ்சா’’தி ஆஹ. ஸமுத³யே பஹானபரிஞ்ஞாவ வுத்தா, ந தீரணபரிஞ்ஞாதி யுத்தங் தாவேதங் ஸமுத³யஸ்ஸபி தீரேதப்³ப³ஸபா⁴வத்தா, ‘‘து³க்கே² தீரணபரிஞ்ஞாவ வுத்தா, ந பஹானபரிஞ்ஞா’’தி இத³ங் பன கஸ்மா வுத்தங், நனு து³க்க²ங் அப்பஹாதப்³ப³மேவாதி? ஸமுத³யஸச்சவிப⁴ங்கே³ வுத்தானங் கேஸஞ்சி ஸமுத³யகொட்டா²ஸானங் து³க்க²ஸச்சே ஸங்க³ஹணதோ து³க்க²ஸமுத³யே வா அஸங்கரதோவ க³ஹெத்வா பூ⁴தகத²னமேதங் த³ட்ட²ப்³ப³ங். உப⁴யத்தா²தி து³க்கே² ஸமுத³யே ச வுத்தா. கஸ்மா? தேஸங் ஸாதா⁴ரணாதி. ஏவங் ஸாதா⁴ரணாஸாதா⁴ரணபே⁴த³பி⁴ன்னங் யதா²வுத்தங் பரிஞ்ஞாகிச்சங் புப்³ப³பா⁴கே³ நானக்க²ணே லப்³ப⁴மானம்பி மக்³க³காலே ஏகக்க²ணே ஏவ லப்³ப⁴தி ஏகஞாணகிச்சத்தாதி த³ஸ்ஸேதுங் ‘‘மக்³க³ஞாணஞ்ஹீ’’திஆதி³ வுத்தங்.
பரிஞ்ஞாவாரவண்ணனா நிட்டி²தா.
ஸச்சயமகவண்ணனா நிட்டி²தா.
6. ஸங்கா²ரயமகங்
1. பண்ணத்திவாரவண்ணனா
1. ஸதிபி ‘‘க²ந்தா⁴த³யோ விய புப்³பே³ அவிப⁴த்தா’’தி ஆஹ. பகாரத்தோ² வா எத்த² ஆதி³-ஸத்³தோ³ ‘‘பூ⁴வாத³யோ’’திஆதீ³ஸு வியாதி குஸலமூலாதீ³னம்பி ஸங்க³ஹோ த³ட்ட²ப்³போ³. அவிஞ்ஞாதத்தா நிஸாமெந்தேஹி. ஹேதுஅத்தோ² வா எத்த² லுத்தனித்³தி³ட்டோ² அவிஞ்ஞாபிதத்தாதி அத்தோ². யதி³பி காயஸங்கா²ரானங் விகப்பத்³வயேபி ஹேதுப²லபா⁴வோயேவ இச்சி²தோ, ஸாமிவசனரூபாவிபூ⁴தோ பன அத்தே²வ அத்த²பே⁴தோ³தி த³ஸ்ஸெந்தோ ‘‘காயஸ்ஸ…பே॰… கத்துஅத்தே²’’தி ஆஹ. ஸோ பனாதி கத்துஅத்தோ².
2-7. ஸுத்³தி⁴கஏகேகபத³வஸேனாதி ‘‘காயோ ஸங்கா²ரோ’’திஆதீ³ஸு த்³வீஸு த்³வீஸு பதே³ஸு அஞ்ஞமஞ்ஞங் அஸம்மிஸ்ஸஏகேகபத³வஸேன. அத்தா²பா⁴வதோதி யதா²தி⁴ப்பேதத்தா²பா⁴வதோ. அஞ்ஞதா² கரஜகாயாதி³கோ அத்தோ² அத்தே²வ. தேனேவாஹ ‘‘பத³ஸோத⁴ன…பே॰… அவசனீயத்தா’’தி. இதா³னி தமேவ அத்தா²பா⁴வங் ப்³யதிரேகவஸேன த³ஸ்ஸெந்தோ ‘‘யதா²’’திஆதி³மாஹ. கஸ்மா பன உப⁴யத்த² ஸமானே ஸமாஸபத³பா⁴வே தத்த² அத்தோ² லப்³ப⁴தி, இத⁴ ந லப்³ப⁴தீதி? பி⁴ன்னலக்க²ணத்தா. தத்த² ஹி ரூபக்க²ந்தா⁴தி³பதா³னி ‘‘யதா²தி⁴ப்பேதத்தா²பா⁴வதோ’’தி.
விஸுங் அதீ³பெத்வாதி ‘‘காயஸங்கா²ரோ’’திஆதி³னா ஸஹ வுச்சமானோபி காயஸங்கா²ரஸத்³தோ³ விஸுங் விஸுங் அத்தனோ அத்த²ங் அஜோதெத்வா ஏகங் அத்த²ங் யதி³ தீ³பேதீதி பரிகப்பவஸேன வத³தி. தேன காயஸங்கா²ரஸத்³தா³னங் ஸமானாதி⁴கரணதங் உல்லிங்கே³தி. ‘‘காயஸங்கா²ரஸத்³தோ³ காயஸங்கா²ரத்தே² வத்தமானோ’’தி கஸ்மா வுத்தங், ‘‘ஸங்கா²ரஸத்³தோ³ ஸங்கா²ரத்தே²வ வத்தமானோ’’தி பன வத்தப்³ப³ங் ஸியா. ஏவஞ்ஹி ஸதி க²ந்த⁴த்தே² வத்தமானோ க²ந்த⁴ஸத்³தோ³ விய ரூபஸத்³தே³ன காயஸத்³தே³ன விஸேஸிதப்³போ³தி இத³ங் வசனங் யுஜ்ஜெய்ய, காயஸங்கா²ரஸத்³தா³னங் பன ஸமானாதி⁴கரணத்தே ந கேவலங் ஸங்கா²ரஸத்³தோ³யேவ ஸங்கா²ரத்தே² ‘‘காயஸங்கா²ரஸத்³தோ³ காயஸங்கா²ரத்தே² வத்தமானோ’’தி வுத்தங் ஸியா, காயஸத்³தே³ன ஸமானாதி⁴கரணேனாதி அதி⁴ப்பாயோ. ப்³யதி⁴கரணேன பன ஸங்கா²ரஸ்ஸ விஸேஸிதப்³ப³தா அத்தே²வாதி.
இமஸ்ஸ வாரஸ்ஸாதி ஸுத்³த⁴ஸங்கா²ரவாரஸ்ஸ. பத³ஸோத⁴னேன த³ஸ்ஸிதானந்தி எத்தகேவ வுச்சமானே தத்த² த³ஸ்ஸிதபா⁴வஸாமஞ்ஞேன ஸுத்³த⁴காயாதீ³னம்பி க³ஹணங் ஆபஜ்ஜெய்யாதி தங்னிவாரணத்த²ங் ‘‘யதா²தி⁴ப்பேதானமேவா’’தி ஆஹ. காயாதி³பதே³ஹி அக்³க³ஹிதத்தாதி ஸுத்³த⁴காயாதி³பதே³ஹி அக்³க³ஹிதத்தா. இத⁴ பனாதி அட்ட²கதா²யங். ஸுத்³த⁴ஸங்கா²ரவாரங் ஸந்தா⁴ய வுத்தம்பி ஸுத்³த⁴ஸங்கா²ரவாரமேவெத்த² அனநுஜானந்தோ ஸகலஸங்கா²ரயமகவிஸயந்தி ஆஹ ‘‘இத⁴ பன ஸங்கா²ரயமகே’’தி. அதி⁴ப்பேதத்த²பரிச்சாகோ³தி அஸ்ஸாஸபஸ்ஸாஸாதி³கஸ்ஸ அதி⁴ப்பேதத்த²ஸ்ஸ அக்³க³ஹணங் சேதனாகாயஅபி⁴ஸங்க²ரணஸங்கா²ராதி³ அனதி⁴ப்பேதத்த²பரிக்³க³ஹோ. யதி³ ‘‘காயோ ஸங்கா²ரோ’’திஆதி³னா ஸுத்³த⁴ஸங்கா²ரதங்மூலசக்கவாரா அத்தா²பா⁴வதோ இத⁴ ந க³ஹேதப்³பா³, அத² கஸ்மா பவத்திவாரமேவ அனாரபி⁴த்வா அஞ்ஞதா² தே³ஸனா ஆரத்³தா⁴தி ஆஹ ‘‘பத³ஸோத⁴னவாரதங்மூலசக்கவாரேஹீ’’திஆதி³. ஸங்ஸயோ ஹோதி ஸங்கா²ரஸத்³த³வசனீயதாஸாமஞ்ஞதோ காயஸங்கா²ராதி³பதா³னங் ப்³யதி⁴கரணபா⁴வதோ ச. தேனேவாஹ ‘‘அஸமானாதி⁴கரணேஹி…பே॰… த³ஸ்ஸிதாயா’’தி.
பண்ணத்திவாரவண்ணனா நிட்டி²தா.
2. பவத்திவாரவண்ணனா
19. ஸங்கா²ரானங் புக்³க³லானஞ்ச ஓகாஸத்தாதி ஸம்பயுத்தானங் நிஸ்ஸயபச்சயதாய, ஸங்கா²ரானங் ஸமாபஜ்ஜிதப்³ப³தாய புக்³க³லானங் ஜா²னஸ்ஸ ஓகாஸதா வேதி³தப்³பா³, பூ⁴மி பன யத³க்³கே³ன புக்³க³லானங் ஓகாஸோ, தத³க்³கே³ன ஸங்கா²ரானம்பி ஓகாஸோ. ‘‘து³தியே ஜா²னே ததியே ஜா²னே’’திஆதி³னா ஜா²னங், ‘‘காமாவசரே ரூபாவசரே’’திஆதி³னா பூ⁴மி ச விஸுங் ஓகாஸபா⁴வேன க³ஹிதா. இதீதி ஹேதுஅத்தோ², யஸ்மா ஜா²னம்பி ஓகாஸபா⁴வேன க³ஹிதங், தஸ்மாதி அத்தோ². புக்³க³லவாரே ச ஓகாஸவஸேன புக்³க³லக்³க³ஹணேதி புக்³க³லவாரே ச யதா³ புக்³க³லோகாஸஸங்கா²ராதீ³னங் ஓகாஸபா⁴வேன க³ய்ஹதி, ததா³ தஸ்மாதி யஸ்மா ஏததே³வ, தஸ்மா. து³தியததியஜ்ஜா²னோகாஸவஸேனாதி து³தியததியஜ்ஜா²னஸங்கா²தஓகாஸவஸேன க³ஹிதா. கத²ங்? ‘‘வினா விதக்கவிசாரேஹி அஸ்ஸாஸபஸ்ஸாஸானங் உப்பாத³க்க²ணே’’தி ஏவங் க³ஹிதா புக்³க³லா விஸேஸெத்வா த³ஸ்ஸிதா. கேன? தேனேவ விதக்கவிசாரரஹிதஅஸ்ஸாஸபஸ்ஸாஸுப்பாத³க்க²ணேனாதி யோஜேதப்³ப³ங்.
பட²மகொட்டா²ஸே ஜா²னோகாஸவஸேன புக்³க³லத³ஸ்ஸனங் கதந்தி வுத்தங் ‘‘புன…பே॰… த³ஸ்ஸேதீ’’தி. பூ⁴மிஓகாஸவஸேன புக்³க³லங் த³ஸ்ஸேதீதி ஸம்ப³ந்தோ⁴. த்³விப்பகாரானந்தி ஜா²னபூ⁴மிஓகாஸபே⁴தே³ன து³விதா⁴னங். தேஸந்தி புக்³க³லானங். ‘‘பட²மங் ஜா²னங் ஸமாபன்னானங் காமாவசரான’’ந்தி ச இத³ங் நிவத்தேதப்³ப³க³ஹேதப்³ப³ஸாதா⁴ரணவசனங், தஸ்ஸ ச அவச்சே²த³கங் ‘‘அஸ்ஸாஸபஸ்ஸாஸானங் உப்பாத³க்க²ணே’’தி இத³ந்தி வுத்தங் ‘‘விஸேஸ…பே॰… க²ணே’’தி. தேன விஸேஸனேன. காமாவசரானம்பீதி பி-ஸத்³தோ³ ஸம்பிண்ட³னத்தோ². தேன ந கேவலங் ரூபாரூபாவசரேஸு பட²மஜ்ஜா²னங் ஸமாபன்னானங், அத² கோ² காமாவசரானம்பீதி வுத்தமேவத்த²ங் ஸம்பிண்டே³தி. கீதி³ஸானங் காமாவசரானந்தி ஆஹ ‘‘க³ப்³ப⁴க³தாதீ³ன’’ந்தி. ஆதி³-ஸத்³தே³ன உத³கனிமுக்³க³விஸஞ்ஞிபூ⁴தா ஸங்க³ஹிதா, ந மதசதுத்த²ஜ்ஜா²னஸமாபன்னநிரோத⁴ஸமாபன்னா. தே ஹி அகாமாவசரதாய விய ரூபாரூபப⁴வஸமங்கி³னோ விதக்கவிசாருப்பத்தியாவ நிவத்திதா. ஏகந்திகத்தாதி அஸ்ஸாஸபஸ்ஸாஸாபா⁴வஸ்ஸ ஏகந்திகத்தா. நித³ஸ்ஸிதாதி ரூபாரூபாவசரா நித³ஸ்ஸனபா⁴வேன வுத்தா, ந தப்³பி³ரஹிதானங் அஞ்ஞேஸங் அபா⁴வதோதி அதி⁴ப்பாயோ. பட²மஜ்ஜா²னோகாஸா அஸ்ஸாஸபஸ்ஸாஸவிரஹவிஸிட்டா²தி யோஜனா. பட²மஞ்செத்த² பட²மஜ்ஜா²னஸமங்கீ³னங் ரூபாரூபாவசரானங் க³ஹணங், து³தியங் யதா²வுத்தக³ப்³ப⁴க³தாதீ³னங். இமினா நயேனாதி ய்வாயங் ஸப்³ப³த்த² ஸப்³ப³புச்சா²ஸு.
21. ஏதஸ்மிங் பன அத்தே² ஸதீதி ய்வாயங் உப்பத்திபூ⁴மியா ஜா²னங் விஸேஸெத்வா அத்தோ² வுத்தோ, ஏதஸ்மிங் அத்தே² க³ய்ஹமானே அஞ்ஞத்த²பி உப்பத்திபூ⁴மியா ஜா²னங் விஸேஸிதப்³ப³ங் ப⁴வெய்ய, ததா² ச அனிட்ட²ங் ஆபஜ்ஜதீதி த³ஸ்ஸெந்தோ ‘‘சதுத்த²ஜ்ஜா²னே’’திஆதி³மாஹ. கிங் பன தங் அனிட்ட²ந்தி ஆஹ ‘‘பூ⁴மீனங் ஓகாஸபா⁴வஸ்ஸேவ அக்³க³ஹிததாபத்திதோ’’தி. யத்த² யத்த² ஹி ஜா²னங் க³ய்ஹதி, தத்த² தத்த² தங் உப்பத்திபூ⁴மியா விஸேஸிதப்³ப³ங் ஹோதி. ததா² ஸதி ஜா²னோகாஸோவ க³ஹிதோ ஸியா, ந பூ⁴மிஓகாஸோ கு³ணபூ⁴தத்தா. கிஞ்ச ‘‘சதுத்த²ஜ்ஜா²னே ரூபாவசரே அரூபாவசரே’’தி எத்த² ரூபாரூபபூ⁴மியா சதுத்த²ஜ்ஜா²னே விஸேஸியமானே ததே³கதே³ஸோவ ஓகாஸவஸேன க³ஹிதோ ஸியா, ந ஸப்³ப³ங் சதுத்த²ஜ்ஜா²னங். தேனாஹ ‘‘ஸப்³ப³சதுத்த²ஜ்ஜா²னஸ்ஸ ஓகாஸவஸேன அக்³க³ஹிததாபத்திதோ சா’’தி. ஜா²னபூ⁴மோகாஸானந்தி ஜா²னோகாஸபூ⁴மிஓகாஸானங்.
நனு ச ஜா²னபூ⁴மிஓகாஸே அஸங்கரதோ யோஜியமானே ந ஸப்³ப³ஸ்மிங் பட²மஜ்ஜா²னோகாஸே காயஸங்கா²ரோ வசீஸங்கா²ரோ ச அத்தி², ததா² ஸப்³ப³ஸ்மிங் காமாவசரோகாஸேதி சோத³னுப்பத்திங் ஸந்தா⁴ய தஸ்ஸ பரிஹாரங் வத்துங் ‘‘யதி³பீ’’திஆதி³மாஹ. தத்தா²தி பட²மஜ்ஜா²னோகாஸே காமாவசரோகாஸே ச. தங்த்³வயுப்பத்தீதி தஸ்ஸ காயவசீஸங்கா²ரத்³வயஸ்ஸ உப்பத்தி. ஓகாஸத்³வயஸ்ஸ அஸங்கரதோ க³ஹணே அயஞ்ச கு³ணோ லத்³தோ⁴ ஹோதீதி ஆஹ ‘‘விஸுங்…பே॰… ந வத்தப்³ப³ங் ஹோதீ’’தி. தத்த² அங்க³மத்தவஸேனாதி விதக்காதி³ஜா²னங்க³மத்தவஸேன. தத்த² வத்தப்³ப³ங் அட்ட²கதா²யங் வுத்தமேவ. விதக்கரஹிதோபி விசாரோ வசீஸங்கா²ரோயேவாதி ஆஹ ‘‘அவிதக்க…பே॰… க³ச்ச²தீ’’தி. முத்³த⁴பூ⁴தங் து³தியஜ்ஜா²னந்தி சதுக்கனயே து³தியஜ்ஜா²னமாஹ. தஞ்ஹி ஸகலக்கோ²ப⁴கரத⁴ம்மவிக³மேன விதக்கேகங்க³ப்பஹாயிகதோ ஸாதிஸயத்தா ‘‘முத்³த⁴பூ⁴த’’ந்தி வத்தப்³ப³தங் லப⁴தி. அஸஞ்ஞஸத்தா வியாதி இத³ங் விஸதி³ஸுதா³ஹரணங் த³ட்ட²ப்³ப³ங்.
37. ஆவஜ்ஜனதோ புப்³பே³ பவத்தங் ஸப்³ப³ங் சித்தங் படிஸந்தி⁴சித்தேன ஸமானக³திகத்தா ஏகங் கத்வா வுத்தங் ‘‘பட²மதோ’’தி. தேனாஹ ‘‘அவிதக்கஅவிசாரதோ’’திஆதி³. சித்தஸங்கா²ரஸ்ஸ ஆதி³த³ஸ்ஸனத்த²ந்தி ஸுத்³தா⁴வாஸே சித்தஸங்கா²ரஸ்ஸ ஆதி³த³ஸ்ஸனத்த²ங். ததா² ‘‘வசீஸங்கா²ரஸ்ஸ ஆதி³த³ஸ்ஸனத்த²’’ந்தி எத்தா²பி.
பவத்திவாரவண்ணனா நிட்டி²தா.
ஸங்கா²ரயமகவண்ணனா நிட்டி²தா.
7. அனுஸயயமகங்
பரிச்சே²த³பரிச்சி²ன்னுத்³தே³ஸவாரவண்ணனா
1. ‘‘அவிஜ்ஜாஸமுத³யா ‘‘பச்சயதீ³பகேன மூலயமகேனா’’தி. ‘‘ஸோ ‘அனிச்சங் ரூபங், அனிச்சங் ரூப’ந்தி யதா²பூ⁴தங் பஜானாதி. சக்கு² அனிச்சங், ரூபா அனிச்சா’’தி ச ஆதி³னா ப³ஹுலக²ந்தா⁴தி³முகே²ன அனிச்சானுபஸ்ஸனாத³யோ விஹிதாதி வுத்தங் ‘‘க²ந்தா⁴தீ³ஸு தீரணபா³ஹுல்லதோ’’தி. கிலேஸானங் ஸமுச்சி²ந்த³னதோ பரங் பஹானகிச்சங் நத்தீ²தி ஆஹ ‘‘அனுஸயபஹானந்தா பஹானபரிஞ்ஞா’’தி. யதி³பி அனுஸயேஹி ஸம்பயோக³தோ ஆரம்மணதோ வா பஹானபரிஞ்ஞா நப்பவத்ததி, அனுஸயாபா⁴வே பன ததா³ரம்போ⁴ ஏவ நத்தீ²தி கத்வா வுத்தங் ‘‘அனுஸயேஹி பஹானபரிஞ்ஞங் விபா⁴வேது’’ந்தி. அனுஸயபா⁴வேன லப்³ப⁴மானானந்தி அனுஸயபா⁴வேன விஜ்ஜமானானங், அனுஸயஸபா⁴வானந்தி அத்தோ². தீஹாகாரேஹீதி பரிச்சே²தா³தீ³ஹி தீஹி பகாரேஹி. அனுஸயேஸு க³ணனஸரூபப்பவத்திட்டா²னதோ அபோ³தி⁴தேஸு புக்³க³லோகாஸாதி³வஸேன பவத்தியமானா தப்³பி³ஸயா தே³ஸனா ந ஸுவிஞ்ஞெய்யா ஹோதீதி த³ஸ்ஸெந்தோ ஆஹ ‘‘தேஸு ததா²…பே॰… து³ரவபோ³த⁴த்தா’’தி.
எத்த² புரிமேஸூதி பது³த்³தா⁴ரோ அனந்தரஸ்ஸ விதி⁴ படிஸேதோ⁴ வாதி கத்வா ஸானுஸயவாராதி³அபெக்கோ², ந அனுஸயவாராதி³அபெக்கோ² அனுஸயவாரே பாளிவவத்தா²னஸ்ஸ பகே³வ கதத்தாதி த³ஸ்ஸெந்தோ ‘‘ஏதேஸு ஸானுஸயவாராதீ³ஸு புரிமேஸூதி அத்தோ²’’தி ஆஹ. ஸானுஸயவாராதீ³ஸு ஹி தீஸு புரிமேஸு ஓகாஸவாரே யதோ ததோதி தே³ஸனா பவத்தா, ந அனுஸயவாராதீ³ஸு. அத்த²விஸேஸாபா⁴வதோதி ‘‘காமதா⁴துயா சுதஸ்ஸா’’திஆதி³னா (யம॰ 2.அனுஸயயமக.302) பாளிஆக³தபத³ஸ்ஸ, ‘‘காமதா⁴துங் வா பன உபபஜ்ஜந்தஸ்ஸா’’திஆதி³னா யமகபா⁴வேன அட்ட²கதா²ஆதி³க³தபத³ஸ்ஸ ச அத்த²விஸேஸாபா⁴வதோ. கத²மயங் யமகதே³ஸனா ஸியா து³தியஸ்ஸ பத³ஸ்ஸ அபா⁴வதோதி அத்தோ². யதி³ நாயங் யமகதே³ஸனா, அத² கஸ்மா இதா⁴க³தாதி ஆஹ ‘‘புரிமவாரே ஹீ’’திஆதி³. தத்த² அனுஸயட்டா²னபரிச்சே²த³த³ஸ்ஸனந்தி அனுஸயட்டா²னதாய ‘‘யமகதே³ஸனா…பே॰… நாமங் த³ட்ட²ப்³ப³’’ந்தி அத்த²வஸேனாதி படிலோமத்த²வஸேன. பட²மபதே³ன ஹி வுத்தஸ்ஸ விபரிவத்தனவஸேனபி யமகதே³ஸனா ஹோதி ‘‘ரூபங் ரூபக்க²ந்தோ⁴, ரூபக்க²ந்தோ⁴ ரூப’’ந்திஆதீ³ஸு (யம॰ 1.க²ந்த⁴யமக.2), தத்த² பன அத்த²விஸேஸோ அத்தி², இத⁴ நத்தி², தஸ்மா ந ததா² தே³ஸனா கதாதி த³ஸ்ஸெந்தோ ஆஹ ‘‘அத்த²விஸேஸாபா⁴வதோ பன ந வுத்தா’’தி. லப்³ப⁴மானதாவஸேனாதி புச்சா²ய லப்³ப⁴மானதாவஸேன.
உப்பத்திஅரஹதங் த³ஸ்ஸேதீதி இமினா நிப்பரியாயேன அனுஸயா அனாக³தாதி த³ஸ்ஸிதங் ஹோதி யதோ தே மக்³க³வஜ்ஜா², ந ச அதீதபச்சுப்பன்னா உப்பத்திரஹாதி வுச்சந்தி உப்பன்னத்தா. யங்ஸபா⁴வா பன த⁴ம்மா அனாக³தா அனுஸயாதி வுச்சந்தி, தங்ஸபா⁴வா ஏவ தே அதீதபச்சுப்பன்னா வுத்தா. ந ஹி த⁴ம்மானங் அத்³தா⁴பே⁴தே³ன ஸபா⁴வபே⁴தோ³ அத்தி², தஸ்மா அனுஸயானங் அதீதபச்சுப்பன்னபா⁴வா பரியாயதோ லப்³ப⁴ந்தீதி அட்ட²கதா²யங் (யம॰ அட்ட²॰ அனுஸயயமக 1) ‘‘அதீதோபி ஹோதீ’’திஆதி³ வுத்தங். ஏவங்பகாராதி அனுஸயப்பகாரா, காரணலாபே⁴ ஸதி உப்பஜ்ஜனாரஹாஇச்சேவ அத்தோ². ஸோ ஏவங்பகாரோ உப்பஜ்ஜனவாரே உப்பஜ்ஜதி-ஸத்³தே³ன க³ஹிதோ உப்பஜ்ஜனாரஹதாய அவிச்சி²ன்னபா⁴வதீ³பனத்த²ந்தி அதி⁴ப்பாயோ. தேனாஹ ‘‘ந க²ந்த⁴யமகாதீ³ஸு விய உப்பஜ்ஜமானதா’’தி, பச்சுப்பன்னதாதி அத்தோ². தேனேவாதிஆதி³னா யதா²வுத்தமத்த²ங் பாகடதரங் கரோதி. தத்த² நின்னானாகரணோதி நிப்³பி³ஸேஸோ. உப்பஜ்ஜனானுஸயானங் நின்னானாகரணத்தா ஏவ ஹி ‘‘எத்தே²ஸா தண்ஹா உப்பஜ்ஜமானா உப்பஜ்ஜதி, எத்த² நிவிஸமானா நிவிஸதீ’’தி விப⁴ங்கே³ (விப⁴॰ 203) ஆக³தங். அனுஸயனஞ்ஹி எத்த² நிவிஸனந்தி அதி⁴ப்பேதங்.
இதா³னி யேன பரியாயேன அதீதபச்சுப்பன்னேஸு அனுஸயவோஹாரோ, தங் த³ஸ்ஸேதுகாமோ அனாக³தம்பி தேஹி ஸத்³தி⁴ங் ஏகஜ்ஜ²ங் கத்வா த³ஸ்ஸெந்தோ ‘‘அனுரூபங் காரணங் பன…பே॰… வுச்சந்தீ’’தி ஆஹ. ஏதேன பூ⁴தபுப்³ப³க³தியா அதீதபச்சுப்பன்னேஸு உப்பத்திரஹதா வேதி³தப்³பா³தி த³ஸ்ஸேதி. உப்பத்திஅரஹதா நாம கிலேஸானங் மக்³கே³ன அஸமுச்சி²ன்னதாய வேதி³தப்³பா³. ஸா ச அதீதபச்சுப்பன்னேஸுபி அத்தே²வாதி பகாரந்தரேனபி தேஸங் பரியாயதோவ அனுஸயபா⁴வங் பகாஸேதி. தேனேவாஹ ‘‘மக்³க³ஸ்ஸ பனா’’திஆதி³. தாதி³ஸானந்தி யே மக்³க³பா⁴வனாய அஸதி உப்பத்திரஹா, தாதி³ஸானங். த⁴ம்மோ ஏவ ச உப்பஜ்ஜதி, ந த⁴ம்மாகாரோதி அதி⁴ப்பாயோ. ந ஹி த⁴ம்மாகாரா அனிச்சதாத³யோ
வுத்தம்பி தா²மக³மனங் அக்³க³ஹெத்வா அப்பஹீனட்ட²மத்தமேவ க³ஹெத்வா சோத³கோ சோதே³தீதி த³ஸ்ஸெந்தோ ஆஹ ‘‘ஸத்தானுஸய…பே॰… ஆபஜ்ஜதீதி சே’’தி. ந ஹி தா²மக³மனே க³ஹிதே சோத³னாய ஓகாஸோ அத்தி². தேனாஹ ‘‘நாபஜ்ஜதீ’’திஆதி³. வுத்தங் அட்ட²கதா²யங், ந கேவலமட்ட²கதா²யமேவ பாட²க³தோவாயமத்தோ², தஸ்மா ஏவமேவ க³ஹேதப்³போ³தி த³ஸ்ஸெந்தோ ‘‘தா²மக³தோ…பே॰… யுத்த’’ந்தி வத்வா கிங் பன தங் தா²மக³மனந்தி பராஸங்கங் நிவத்தெந்தோ ‘‘தா²மக³தந்தி ச…பே॰… வுத்தா’’தி ஆஹ. தத்த² அஞ்ஞேஹி அஸாதா⁴ரணோதி கிலேஸவத்து²ஆதீ³னங் கிலேஸதாதி³ஸபா⁴வோ விய காமராகா³தி³தோ அஞ்ஞத்த² அலப்³ப⁴மானோ தேஸங்யேவ ஆவேணிகோ ஸபா⁴வோ, யதோ தே ப⁴வபீ³ஜங் ப⁴வமூலந்தி ச வுச்சந்தி. யஸ்மா ச தா²மக³மனங் தேஸங் அனஞ்ஞஸாதா⁴ரணோ ஸபா⁴வோ, தஸ்மா அனுஸயனந்தி வுத்தங் ஹோதீதி த³ஸ்ஸெந்தோ ‘‘தா²மக³தோதி அனுஸயஸமங்கீ³தி அத்தோ²’’தி ஆஹ.
‘‘யஸ்ஸ காமராகா³னுஸயோ அனுஸேதி, தஸ்ஸ படிகா⁴னுஸயோ அனுஸேதீதி? ஆமந்தா’’திஆதி³னா (யம॰ 2.அனுஸயயமக.3) அனுஸயவாரே வுத்தோ ஏவ அத்தோ² ‘‘யஸ்ஸ காமராகா³னுஸயோ உப்பஜ்ஜதி, தஸ்ஸ படிகா⁴னுஸயோ உப்பஜ்ஜதீதி? ஆமந்தா’’திஆதி³னா (யம॰ 2.அனுஸயயமக.300) வுத்தோதி அனுஸயனாகாரோ ஏவ உப்பஜ்ஜனவாரே உப்பஜ்ஜதி-ஸத்³தே³ன க³ஹிதோதி ‘‘உப்பஜ்ஜனவாரோ அனுஸயவாரேன நின்னானாகரணோ விப⁴த்தோ’’தி யங் வுத்தங், தத்த² விசாரங் ஆரப⁴தி ‘‘அனுஸயஉப்பஜ்ஜனவாரானங் ஸமானக³திகத்தா’’திஆதி³னா. ‘‘உப்பஜ்ஜதீ’’தி வசனங் ஸியாதி உப்பஜ்ஜனவாரே ‘‘உப்பஜ்ஜதீ’’தி வசனங் அப்பஹீனாகாரதீ³பகங் ஸியா. ததா² ச ஸதி யதா² ‘‘இமஸ்ஸ உப்பாதா³’’தி எத்த² இமஸ்ஸ அனிரோதா⁴தி அயமத்தோ²பி ஞாயதி, ஏவங் ‘‘உப்பஜ்ஜதீ’’தி வுத்தே அத்த²தோ ‘‘ந உப்பஜ்ஜதீ’’தி அயமத்தோ² வுத்தோ ஹோதி அப்பஹீனாகாரஸ்ஸ உப்பத்திரஹபா⁴வஸ்ஸ அனுப்பஜ்ஜமானஸபா⁴வத்தாதி சோத³னங் த³ஸ்ஸெந்தோ ‘‘உப்பஜ்ஜதீதி வசனஸ்ஸ அவுத்ததா ந ஸக்கா வத்துந்தி சே’’தி ஆஹ. வசனத்த²விஸேஸேன தங்த்³வயஸ்ஸ வுத்தத்தாதி ஏதேன த⁴ம்மனானத்தாபா⁴வேபி பத³த்த²னானத்தே²ன வாரந்தரதே³ஸனா ஹோதி யதா² அனுரூபங் காரணங் லபி⁴த்வாதிஆதி³ தமேவ வசனத்த²விஸேஸங் விபா⁴வேதுங் ஆரத்³த⁴ங். உப்பத்தியொக்³க³ந்தி உப்பத்தியா யொக்³க³ங், உப்பஜ்ஜனஸபா⁴க³தந்தி அத்தோ². யதோ அனுஸயா உப்பத்திரஹாதி வுச்சந்தி, ஏகந்தேன சேததே³வ ஸம்படிச்சி²தப்³ப³ங் ‘‘யஸ்ஸ காமராகா³னுஸயோ உப்பஜ்ஜதி, தஸ்ஸ படிகா⁴னுஸயோ உப்பஜ்ஜதீதி? ஆமந்தா’’திஆதி³வசனதோ (யம॰ 2.அனுஸயயமக.300). ‘‘அனுஸெந்தீதி அனுஸயா’’தி எத்தகே வுத்தே ஸதா³ விஜ்ஜமானா நு கோ² தே அபரினிப்ப²ன்னானுஸயனட்டே²ன ‘‘அனுஸயா’’தி வுச்சந்தீதி அயமத்தோ² ஆபஜ்ஜதீதி தங்னிஸேத⁴னத்த²ங் ‘‘அனுரூபங் காரணங் லபி⁴த்வா உப்பஜ்ஜந்தீ’’தி வுத்தங். உப்பத்திஅரஹபா⁴வேன தா²மக³ததா அனுஸயட்டோ²தி யங் தேஸங் உப்பத்தியோக³வசனங் வுத்தங், தங் ஸம்மதே³வ ‘‘அனுஸயஸத்³த³ஸ்ஸா’’திஆதி³னா. தேன வாரத்³வயதே³ஸனுப்பாதி³கா அனுஸயஸத்³த³த்த²னித்³தா⁴ரணாதி த³ஸ்ஸேதி. தம்பி ஸுவுத்தமேவ இமினா தந்திப்பமாணேனாதி இத³ம்பி ‘‘அபி⁴த⁴ம்மே தாவா’’திஆதி³னா ஆக³தங் திவித⁴மேவ தந்திங் ஸந்தா⁴யாஹாதி த³ஸ்ஸெந்தோ ஆஹ ‘‘தந்தித்தயேனபி ஹி சித்தஸம்பயுத்ததா தீ³பிதா ஹோதீ’’தி.
பரிச்சே²த³பரிச்சி²ன்னுத்³தே³ஸவாரவண்ணனா நிட்டி²தா.
உப்பத்திட்டா²னவாரவண்ணனா
2. ஏவங் ஸதீதி வேத³னானங் விஸேஸிதப்³ப³பா⁴வே காமதா⁴துயா ச விஸேஸனபா⁴வே ஸதி. காமாதா⁴துயா அனுஸயனட்டா²னதா ந வுத்தா ஹோதி அப்பதா⁴னபா⁴வதோ, பதா⁴னாப்பதா⁴னேஸு பதா⁴னே கிச்சத³ஸ்ஸனதோ, விஸேஸனபா⁴வேன சரிதப்³ப³தாய சாதி அதி⁴ப்பாயோ. ஹோது கோ தோ³ஸோதி கதா³சி வதெ³ய்யாதி ஆஸங்கமானோ ஆஹ ‘‘த்³வீஸு பனா’’திஆதி³. த்³வீஸூதி நித்³தா⁴ரணே பு⁴ம்மங், ததா² ‘‘தீஸு தா⁴தூஸூ’’தி எத்தா²பி. தஸ்மாதி யஸ்மா தா⁴துஆதி³பே⁴தே³ன திவித⁴ங் அனுஸயட்டா²னங், தத்த² ச ரூபாரூபதா⁴தூனங் ப⁴வராக³ஸ்ஸ அனுஸயட்டா²னதா வுத்தாதி காமதா⁴துயா காமராக³ஸ்ஸ அனுஸயட்டா²னதா ஏகந்தேன வத்தப்³பா³, தஸ்மா. தீஸு தா⁴தூஸு தீஸு வேத³னாஸூதி ச நித்³தா⁴ரணே பு⁴ம்மங், காமதா⁴துயா த்³வீஸு வேத³னாஸூதி ச ஆதா⁴ரே.
த்³வீஸ்வேவாதி ஸப்³பா³ஸு த்³வீஸூதி யாஸு காஸுசி த்³வீஸு. தேனாதி ‘‘காமராகோ³ த்³வீஸு வேத³னாஸு அனுஸேதீ’’தி வசனஸாமத்தி²யலத்³தே⁴ன விஸேஸனிச்ச²யேனேவ. ப⁴வராகா³னுஸயட்டா²னங் ரூபாரூபதா⁴துயோ தத³னுரூபா ச வேத³னா. ந ஹி த்³வீஸு வேத³னாஸு காமராகா³னுஸயோவ அனுஸேதீதி அவதா⁴ரணங் இச்சி²தங், த்³வீஸு ஏவ பன வேத³னாஸூதி இச்சி²தங். தேனேவாஹ ‘‘த்³வீஸ்வேவ அனுஸேதி, ந தீஸூ’’தி. அட்டா²னஞ்ச அனுஸயானங், கிங் தங் அபரியாபன்னங் ஸக்காயே? ஸப்³போ³ லோகுத்தரோ த⁴ம்மோ. ச-ஸத்³தே³ன படிகா⁴னுஸயட்டா²னங் ஸங்க³ண்ஹாதி. தேன வுத்தங் ‘‘யதா² சா’’திஆதி³. அஞ்ஞாதி காமராகா³னுஸயட்டா²னபூ⁴தா த்³வே வேத³னா.
அஞ்ஞேஸு பியரூபஸாதரூபேஸூதி பியாயிதப்³ப³மது⁴ரஸபா⁴வேஸு. விஸேஸனஞ்சேதங் ரூபாதீ³னங் ஸப்³ப³த்³வாரஸப்³ப³புரிஸேஸு இட்ட²பா⁴வஸ்ஸ அனியததாய கதங். ஸாதஸந்தஸுக²கி³த்³தி⁴யாதி ஸாதஸுகே² ஸந்தஸுகே² ச கி³ஜ்ஜ²னாகாரேன அபி⁴கங்க²னாகாரேன. தத்த² ஸாதஸுக²ங் காயிகங், ஸந்தஸுக²ங் சேதஸிகங். ஸாதஸுக²ங் வா காயிகஸுக²ங், ஸந்தஸுக²ங் உபெக்கா²ஸுக²ங். ததா² சாஹு ‘‘உபெக்கா² பன ஸந்தத்தா, ஸுக²மிச்சேவ பா⁴ஸிதா’’தி (விஸுத்³தி⁴॰ 2.644; மஹானி॰ அட்ட²॰ 27). பரித்தங் வா ஓளாரிகங் ஸுக²ங் ஸாதஸுக²ங், அனோளாரிகங் ஸந்தஸுக²ங். பரித்தக்³க³ஹணஞ்செத்த² காமராகா³னுஸயஸ்ஸ அதி⁴ப்பேதத்தா. அஞ்ஞத்தா²தி வேத³னாஹி அஞ்ஞத்த². ஸோதி காமராகா³னுஸயோ. வேத³னாஸு அனுக³தோ ஹுத்வா ஸேதீதி வேத³னாபெக்கோ² ஏவ ஹுத்வா பவத்ததி யதா² புத்தாபெக்கா²ய தா⁴தியா அனுக்³க³ண்ஹனப்பவத்தி, ஸயனஸங்கா²தா பவத்தி ச காமராக³ஸ்ஸ நிகாமனமேவ. தேனாஹ ‘‘ஸுக²மிச்சேவ அபி⁴லபதீ’’தி. யதா² தஸ்ஸ, ஏவங் படிகா⁴னுஸயாதீ³னம்பி வுத்தனியாமேன யதா²ஸகங் கிச்சகரணமேவ து³க்க²வேத³னாதீ³ஸு அனுஸயனங் த³ட்ட²ப்³ப³ங். தேன வுத்தங் ‘‘ஏவங் படிகா⁴னுஸயோ சா’’திஆதி³. தீஸு வேத³னாஸு அனுஸயனவசனேனாதி தீஸு வேத³னாஸு யதா²ரஹங் அனுஸயனவசனேன. இட்டா²தி³பா⁴வேன க³ஹிதேஸூதி இட்டா²தீ³ஸு ஆரம்மணபகதியா வஸேன இட்டா²தி³பா⁴வேன க³ஹிதேஸு விபரீதஸஞ்ஞாய வஸேன அனிட்டா²தீ³ஸு இட்டா²தி³பா⁴வேன க³ஹிதேஸூதி யோஜனா. ந ஹி இட்டா²தி³பா⁴வேன க³ஹணங் விபரீதஸஞ்ஞா.
தத்தா²தி இட்டா²ரம்மணாதீ³ஸு. எத்தா²தி அனுஸயனே. காமஸ்ஸாதா³தி³வத்து²பூ⁴தானங் காமப⁴வாதீ³னந்தி காமஸ்ஸாத³ப⁴வஸ்ஸாத³வத்து²பூ⁴தானங் தத்தா²தி வேத³னாத்தயதா⁴துத்தயேஸு. நித்³தா⁴ரணே சேதங் பு⁴ம்மங். து³க்க²படிகா⁴தோ து³க்கே² அனபி⁴ரதி. யத்த² தத்தா²தி து³க்க²வேத³னாய தங்ஸம்பயுத்தேஸு அனிட்ட²ரூபாதீ³ஸு வாதி யத்த² தத்த². மஹக்³க³தா உபாதி³ன்னக்க²ந்தா⁴ ரூபாரூபப⁴வா, அனுபாதி³ன்னக்க²ந்தா⁴ ரூபாரூபாவசரத⁴ம்மா. தத்தா²தி யதா²வுத்தேஸு மஹக்³க³தத⁴ம்மேஸு ப⁴வராகோ³இச்சேவ வேதி³தப்³போ³. தேன வுத்தங் ‘‘ரூபதா⁴துயா அரூபதா⁴துயா எத்த² காமராகா³னுஸயோ நானுஸேதீ’’தி. தி³ட்டா²னுஸயாதீ³னந்தி ஆதி³-ஸத்³தே³ன விசிகிச்சா²னுஸயஅவிஜ்ஜானுஸயாதீ³னங் ஸங்க³ஹோ த³ட்ட²ப்³போ³.
தா⁴துத்தயவேத³னாத்தயவினிமுத்தங் தி³ட்டா²னுஸயாதீ³னங் அனுஸயனட்டா²னங் ந வுத்தந்தி ஸுவுத்தமேதங் தி³ட்டா²னுஸயாதீ³னங் உப்பத்திட்டா²னபுச்சா²யங் ‘‘ஸப்³ப³ஸக்காயபரியாபன்னேஸு த⁴ம்மேஸு’’இச்சேவ விஸ்ஸஜ்ஜிதத்தா. காமராகோ³ பன யத்த² நானுஸேதி, தங் து³க்க²வேத³னாரூபாரூபதா⁴துவினிமுத்தங் தி³ட்டா²னுஸயாதீ³னங் அனுஸயனட்டா²னங் ‘‘நனு சா’’திஆதி³ ஆரத்³த⁴ங். தத்த² தத³னுஸயனட்டா²னதோதி தஸ்ஸ காமராகா³னுஸயஸ்ஸ அனுஸயனட்டா²னதோ. அஞ்ஞா நெக்க²ம்மஸ்ஸிதஸோமனஸ்ஸுபெக்கா²ஸங்கா²தா. அயமெத்த² ஸங்கே²பத்தோ² – நெக்க²ம்மஸ்ஸிததோ³மனஸ்ஸே விய படிகா⁴னுஸயோ நெக்க²ம்மஸ்ஸிதஸோமனஸ்ஸுபெக்கா²ஸு காமராகா³னுஸயோ நானுஸேதீதி ‘‘யத்த² காமராகா³னுஸயோ நானுஸேதி, தத்த² தி³ட்டா²னுஸயோ நானுஸேதீ’’தி ஸக்கா வத்துந்தி தஸ்மா தங் உத்³த⁴ரித்வா ந வுத்தந்தி. ஹொந்தூதி தாஸங் வேத³னானங் அத்தி²தங் படிஜானித்வா உத்³த⁴ரித்வா அவசனஸ்ஸ காரணங் த³ஸ்ஸெந்தோ ஆஹ ‘‘ந பன…பே॰… தங் ந வுத்த’’ந்தி. தத³னுஸயனட்டா²னந்தி தேஸங் தி³ட்டா²னுஸயாதீ³னங் அனுஸயனட்டா²னங். தஸ்மாதி யஸ்மா ஸதிபி காமராகா³னுஸயனட்டா²னதோ அஞ்ஞஸ்மிங் தி³ட்டா²னுஸயாதீ³னங் அனுஸயனட்டா²னே தங் பன தா⁴துத்தயவேத³னாத்தயவினிமுத்தங் நத்தி² வேத³னாத்³வயபா⁴வதோ, தஸ்மா. தங் வேத³னாத்³வயங் ந வுத்தங் விஸுங் ந உத்³த⁴டந்தி அத்தோ². தஸ்மாதி யஸ்மா ‘‘யத்த² காமராகா³த³யோ நானுஸெந்தி, தத்த² தி³ட்டி²விசிகிச்சா² நானுஸெந்தீ’’தி அயமத்தோ² ‘‘ஆமந்தா’’தி இமினா படிவசனவிஸ்ஸஜ்ஜனேன அவிபா⁴க³தோ வுத்தோதி ‘‘யத்த² காமராகா³த³யோ அனுஸெந்தி, தத்த² தி³ட்டி²விசிகிச்சா² அனுஸெந்தீ’’தி அயம்பி அத்தோ² அவிபா⁴க³தோவ லப்³ப⁴தி, தஸ்மா. அவிபா⁴க³தோ ச து³க்க²ங் படிக⁴ஸ்ஸ அனுஸயனட்டா²னந்தி தீ³பிதங் ஹோதி. தேனாஹ ‘‘அவிஸேஸேன…பே॰… வேதி³தப்³ப³’’ந்தி. தத்த² அவிஸேஸேனாதி கே³ஹஸ்ஸிதங் நெக்க²ம்மஸ்ஸிதந்தி விஸேஸங் அகத்வா. ஸமுதா³யவஸேன க³ஹெத்வாதி யதா²வுத்தஅவயவானங் ஸமூஹவஸேன து³க்க²ந்த்வேவ க³ஹெத்வா. ‘‘அவிஸேஸேன ஸமுதா³யவஸேன க³ஹெத்வா’’தி இமமத்த²ங் ததா²-ஸத்³தே³ன அனுகட்³ட⁴தி ‘‘த்³வீஸு வேத³னாஸூ’’தி எத்தா²பி கே³ஹஸ்ஸிதாதி³விபா⁴க³ஸ்ஸ அனிச்சி²தத்தா.
யதி³ ஏவங் ‘‘படிக⁴ங் தேன பஜஹதி, ந தத்த² படிகா⁴னுஸயோ அனுஸேதீ’’தி இத³ங் ஸுத்தபத³ங் கத²ந்தி சோத³னங் ஸந்தா⁴ய ‘‘அபிசா’’திஆதி³ வுத்தங். தத்தா²தி தஸ்மிங் தோ³மனஸ்ஸே, தங்ஸம்பயுத்தே வா படிகே⁴. நெக்க²ம்மஸ்ஸிதங் தோ³மனஸ்ஸந்திஆதி³னா நெய்யத்த²மித³ங் ஸுத்தங், ந நீதத்த²ந்தி த³ஸ்ஸேதி. யதா² பன ஸுத்தங் உதா³ஹடங், ததா² இத⁴ கஸ்மா ந வுத்தந்தி ஆஹ ‘‘படிகு⁴ப்பத்திரஹட்டா²னதாயா’’திஆதி³. ஏவம்பி ஸுத்தாபி⁴த⁴ம்மபாடா²னங் கத²மவிரோதோ⁴தி ஆஹ நிப்பரியாயதே³ஸனா ஹேஸா, ஸா பன பரியாயதே³ஸனாதி. ஏவஞ்ச கத்வாதி பரியாயதே³ஸனத்தா ஏவ. ராகா³னுஸயோதி காமராகா³னுஸயோ அதி⁴ப்பேதோ. யதோ ‘‘அனாகா³மிமக்³கே³ன ஸமுக்³கா⁴தனங் ஸந்தா⁴யா’’தி வுத்தங், தஸ்மா தஸ்ஸ ந மஹக்³க³தத⁴ம்மா அனுஸயனட்டா²னந்தி தங் பட²மஜ்ஜா²னஞ்ச அனாமஸித்வா ‘‘ந ஹி லோகியா…பே॰… நானுஸேதீதி ஸக்கா வத்து’’ந்தி வுத்தங். அவத்து²பா⁴வதோதி ஸபா⁴வேனேவ அனுப்பத்திட்டா²னத்தா. இதா⁴தி இமஸ்மிங் அனுஸயயமகே. வுத்தனயேனாதி ‘‘நெக்க²ம்மஸ்ஸிதங் தோ³மனஸ்ஸங் உப்பாதெ³த்வா’’திஆதி³னா வுத்தேன நயேன தங்படிபக்க²பா⁴வதோதி தேஸங் படிகா⁴தீ³னங் படிபக்க²ஸ்ஸ மக்³க³ஸ்ஸ ஸப்³பா⁴வதோ. ந கேவலங் மக்³க³ஸப்³பா⁴வதோ, அத² கோ² ப³லவவிபஸ்ஸனாஸப்³பா⁴வதோபீதி த³ஸ்ஸெந்தோ ஆஹ ‘‘தங்ஸமுக்³கா⁴…பே॰… பா⁴வதோ சா’’தி.
இதா³னி யதே³தங் தத்த² தத்த² ‘‘அனுஸயனட்டா²ன’’ந்தி வுத்தங், தங் க³ஹேதப்³ப³த⁴ம்மவஸேன வா ஸியா க³ஹணவிஸேஸேன வாதி த்³வே விகப்பா, தேஸு பட²மங் ஸந்தா⁴யாஹ ‘‘ஆரம்மணே அனுஸயனட்டா²னே ஸதீ’’தி. ரூபாதி³ஆரம்மணே அனுஸயானங் அனுஸயனட்டா²னந்தி க³ய்ஹமானே யமத்த²ங் ஸந்தா⁴ய ‘‘ந ஸக்கா வத்து’’ந்தி வுத்தங், தங் த³ஸ்ஸேதுங் ‘‘து³க்கா²ய ஹீ’’திஆதி³மாஹ. யதி³ ஸியாதி யதி³ காமராகா³னுஸயோ ஸியா. ஏதஸ்ஸபீதி தி³ட்டா²னுஸயஸம்பயுத்தலோப⁴ஸ்ஸபி ‘‘ஸப்³ப³ஸக்காயபரியாபன்னேஸு த⁴ம்மேஸூ’’தி காமராக³ஸ்ஸ டா²னங் வத்தப்³ப³ங் ஸியா, ந ச வுத்தங். அத² பனாதிஆதி³ து³தியவிகப்பங் ஸந்தா⁴ய வுத்தங். அஜ்ஜா²ஸயவஸேன தங்னின்னதாயாதி அஸதிபி ஆரம்மணகரணே யத்த² காமராகா³த³யோ அஜ்ஜா²ஸயதோ நின்னா, தங் தேஸங் அனுஸயனட்டா²னங். தேன யதா²திஆதி³ யதா²வுத்தஸ்ஸ அத்த²ஸ்ஸ உதா³ஹரணவஸேன நிரூபனங். து³க்கே² படிஹஞ்ஞனவஸேனேவ பவத்ததி, நாரம்மணகரணவஸேனாதி அதி⁴ப்பாயோ. து³க்க²மேவ தஸ்ஸ அனுஸயனட்டா²னங் வுத்தந்தி அஜ்ஜா²ஸயஸ்ஸ தத்த² நின்னத்தா து³க்க²மேவ தஸ்ஸ படிக⁴ஸ்ஸ அனுஸயனட்டா²னங் வுத்தங், நாலம்பி³தங் ரூபாதி³ ஸுக²வேத³னா சாதி அதி⁴ப்பாயோ. ஏவந்தி யதா² அஞ்ஞாரம்மணஸ்ஸபி படிக⁴ஸ்ஸ அஜ்ஜா²ஸயதோ து³க்க²னின்னதாய து³க்க²மேவ அனுஸயனட்டா²னங் வுத்தங், ஏவங். து³க்கா²தீ³ஸு…பே॰… வுத்தந்தி ‘‘து³க்கே²ன ஸுக²ங் அதி⁴க³ந்தப்³ப³ங். நத்தி² தி³ன்ன’’ந்தி ச ஆதி³னா காயகிலமனது³க்கே² தா³னானுபா⁴வாதி³கே ச மிச்சா²பி⁴னிவேஸனவஸேன உப்பஜ்ஜமானேன தி³ட்டா²னுஸயேன ஸம்பயுத்தோ அஞ்ஞாரம்மணோபி லோபோ⁴ ‘‘ஏவங் ஸுக²ங் ப⁴விஸ்ஸதீ’’தி அஜ்ஜா²ஸயதோ ஸுகா²பி⁴ஸங்க³வஸேனேவ பவத்ததீதி ஸுகு²பெக்கா²பே⁴த³ங் ஸாதஸந்தஸுக²த்³வயமேவ அஸ்ஸ லோப⁴ஸ்ஸ அனுஸயனட்டா²னங் வுத்தங் பாளியங், ந யதா²வுத்தங் து³க்கா²தி³, தஸ்மா ப⁴வராக³…பே॰… ந விருஜ்ஜ²தி. ஏகஸ்மிங்யேவ சாதிஆதி³ து³தியவிகப்பங்யேவ உபப்³ரூஹனத்த²ங் வுத்தங். தத்த² ராக³ஸ்ஸ ஸுக²ஜ்ஜா²ஸயதா தங்ஸமங்கி³னோ புக்³க³லஸ்ஸ வஸேன வேதி³தப்³பா³, தன்னின்னபா⁴வேன வா சக்கு²ஸ்ஸ விஸமஜ்ஜா²ஸயதா விய. ஏஸ நயோ ஸேஸேஸுபி. தேஸங் ராக³படிகா⁴னங் நானானுஸயட்டா²னதா ஹோதி ஏகஸ்மிம்பி ஆரம்மணேதி அத்தோ².
ஏவஞ்ச கத்வாதி அஸதிபி க³ஹேதப்³ப³பே⁴தே³ க³ஹணவிஸேஸேன அனுஸயனட்டா²னஸ்ஸ பி⁴ன்னத்தா ஏவ. ‘‘யத்த²…பே॰… நோ’’தி வுத்தங், அஞ்ஞதா² விருஜ்ஜெ²ய்ய. க³ஹேதப்³ப³பே⁴தே³ன ஹி ராக³படிகா⁴னங் அனுஸயனட்டா²னபே⁴தே³ ‘‘அட்ட²கதா²யங் பனா’’திஆதி³ வுத்தங். ந படிகா⁴னுஸயோதி எத்த² ந-காரோ படிஸேத⁴னத்தோ², ந அஞ்ஞத்தோ², இதரத்த² பன ஸம்ப⁴வோ ஏவ நத்தீ²தி த³ஸ்ஸெந்தோ ‘‘யங் பனேத’’ந்திஆதி³மாஹ. தத்த² ‘‘ந ஹி தோ³மனஸ்ஸஸ்ஸ படிகா⁴னுஸயபா⁴வாஸங்கா அத்தீ²’’தி இமினா ந-காரஸ்ஸ அஞ்ஞத்த²தாபா⁴வத³ஸ்ஸனமுகே²ன அபா⁴வத்த²தங் ஸமத்தே²தி.
தே³ஸனா ஸங்கிண்ணா விய ப⁴வெய்யாதி எத்த² தே³ஸனாஸங்கரங் த³ஸ்ஸேதுங் ‘‘ப⁴வராக³ஸ்ஸபி…பே॰… ப⁴வெய்யா’’தி வுத்தங். தஸ்ஸத்தோ² – யதா² காமராக³ஸ்ஸ காமதா⁴துயா த்³வீஸு வேத³னாஸு ஆரம்மணகரணவஸேன உப்பத்தி வுத்தா ‘‘காமராகோ³ காமதா⁴துயா த்³வீஸு வேத³னாஸு அனுஸேதீ’’தி, ஏவங் யதி³ ‘‘ப⁴வராகோ³ காமதா⁴துயா த்³வீஸு வேத³னாஸு அனுஸேதீ’’தி வுச்செய்ய, ப⁴வராக³ஸ்ஸபி…பே॰… ப⁴வெய்ய. ததோ ச காமராகே³ன ஸத்³தி⁴ங் ப⁴வராக³ஸ்ஸ தே³ஸனா ஸங்கிண்ணா ப⁴வெய்ய, காமராக³தோ ச ப⁴வராக³ஸ்ஸ விஸேஸோ த³ஸ்ஸேதப்³போ³. ஸோ ச ஸஹஜாதானுஸயவஸேன ந ஸக்கா த³ஸ்ஸேதுந்தி ஆரம்மணகரணவஸேன த³ஸ்ஸேதப்³போ³. தேன வுத்தங் ‘‘தஸ்மா ஆரம்மண…பே॰… அதி⁴ப்பாயோ’’தி. தத்த² ஆரம்மணவிஸேஸேனாதி ரூபாரூபதா⁴துஸங்கா²தஆரம்மணவிஸேஸேன. விஸேஸத³ஸ்ஸனத்த²ந்தி காமராக³தோ ப⁴வராக³ஸ்ஸ விஸேஸத³ஸ்ஸனத்த²ங். ஏவங் தே³ஸனா கதாதி ‘‘ரூபதா⁴துயா அரூபதா⁴துயா எத்த² ப⁴வராகா³னுஸயோ அனுஸேதீ’’தி ஏவங் விஸயே பு⁴ம்மங் கத்வா தே³ஸனா கதா. தேனாஹ ‘‘ஸஹஜாதவேத³னாவிஸேஸாபா⁴வதோ’’தி.
உப்பத்திட்டா²னவாரவண்ணனா நிட்டி²தா.
மஹாவாரோ
1. அனுஸயவாரவண்ணனா
3. பவத்தாவிராமவஸேனாதி ‘‘மக்³கே³னேவ…பே॰… புப்³பே³’’தி.
20. சித்தசேதஸிகானஞ்ச டா²னங் நாம சித்துப்பாதோ³தி ஆஹ ‘‘ஏகஸ்மிங் சித்துப்பாதே³’’தி. தேஸங் தேஸங் புக்³க³லானந்தி புது²ஜ்ஜனாதீ³னங் புக்³க³லானங். பகதியா ஸபா⁴வேன. ஸபா⁴வஸித்³தா⁴ ஹி து³க்கா²ய வேத³னாய காமராக³ஸ்ஸ அனநுஸயனட்டா²னதா. ஏவங் ஸேஸேஸுபி யதா²ரஹங் வத்தப்³ப³ங். வக்க²தி ஹி ‘‘பகதியா து³க்கா²தீ³னங் காமராகா³தீ³னங் அனநுஸயனட்டா²னதங் ஸந்தா⁴ய வுத்த’’ந்தி. பஹானேனாதி தஸ்ஸ தஸ்ஸ அனுஸயஸ்ஸ ஸமுச்சி²ந்த³னேன. திண்ணங் புக்³க³லானந்தி புது²ஜ்ஜனஸோதாபன்னஸகதா³கா³மீனங். த்³வின்னங் புக்³க³லானந்தி அனாகா³மிஅரஹந்தானங். எத்தா²தி ஏதஸ்மிங் புக்³க³லோகாஸவாரே. புரிமனயேதி ‘‘திண்ணங் புக்³க³லான’’ந்திஆதி³கே புரிமஸ்மிங் விஸ்ஸஜ்ஜனநயே. ஓகாஸந்தி உப்பத்திட்டா²னங், இத⁴ பன து³க்க²வேத³னா பச்சி²மனயேதி ‘‘த்³வின்னங் புக்³க³லான’’ந்திஆதி³கே விஸ்ஸஜ்ஜனநயே. அனோகாஸதா அனநுஸயனட்டா²னதா.
அனுஸயவாரவண்ணனா நிட்டி²தா.
2. ஸானுஸயவாரவண்ணனா
66-131. ‘‘ஸானுஸயோ, பஜஹதி, பரிஜானாதீ’’தி புக்³க³லோ வுத்தோதி ‘‘காமராகே³ன ஸானுஸயோ, காமராக³ங் பஜஹதி, காமராக³ங் பரிஜானாதீ’’திஆதீ³ஸு அனுஸயஸமங்கி³பா⁴வேன பஹானபரிஞ்ஞாகிரியாய கத்துபா⁴வேன ச புக்³க³லோ வுத்தோ, ந த⁴ம்மோ. ப⁴வவிஸேஸேன வாதி கேவலேன ப⁴வவிஸேஸேன வா. இதரேஸூதி படிகா⁴னுஸயாதீ³ஸு. ப⁴வானுஸயவிஸேஸேன வாதி காமப⁴வாதி³ப⁴வவிஸிட்டா²னுஸயவிஸேஸேன வா. ஸானுஸயதானிரனுஸயதாதி³காதி எத்த² ஆதி³-ஸத்³தே³ன பஹானாபஹானபரிஞ்ஞாபரிஞ்ஞா த்³வீஸு வேத³னாஸூதி ஸுக²உபெக்கா²ஸு வேத³னாஸு து³க்கா²ய வேத³னாய காமராகா³னுஸயேன நிரனுஸயோதி யோஜேதப்³ப³ங். இத³ம்பி நத்தி² புக்³க³லவஸேன வுச்சமானத்தா. தேனாஹ ‘‘ந ஹி புக்³க³லஸ்ஸ…பே॰… அனுஸயான’’ந்தி. யதி³பி புக்³க³லஸ்ஸ அனுஸயனோகாஸோ அனோகாஸோ, தஸ்ஸ பன ஸானுஸயதாதி³ஹேது ஹோதீதி த³ஸ்ஸெந்தோ ‘‘அனுஸயஸ்ஸ பனா’’திஆதி³மாஹ. நிரனுஸயதாதீ³னந்தி ஆதி³-ஸத்³தே³ன அப்பஹானாபரிஞ்ஞா ஸங்க³ண்ஹாதி. பரிஜானநங் ஸமதிக்கமனந்தி பரிஞ்ஞாவாரேபி ‘‘அபாதா³னே நிஸ்ஸக்கவசன’’ந்தி வுத்தங்.
அனுஸயனட்டா²னதோதி அனுஸயனட்டா²னஹேது. ‘‘அனநுஸயனட்டா²னதோ’’தி எத்தா²பி ஏஸேவ நயோ. நிமித்தாபாதா³னபா⁴வத³ஸ்ஸனத்த²ந்தி ஸானுஸயவாரே நிமித்தபா⁴வத³ஸ்ஸனத்த²ங், பஜஹனபரிஞ்ஞாவாரேஸு அபாதா³னபா⁴வத³ஸ்ஸனத்த²ஞ்சாதி யோஜேதப்³ப³ங். பஜஹதீதி எத்த² ‘‘ரூபதா⁴துயா அரூபதா⁴துயா ததோ மானானுஸயங் பஜஹதீ’’தி பாளிபத³ங் ஆஹரித்வா யோஜேதப்³ப³ங், ந பஜஹதீதி எத்த² பன ‘‘து³க்கா²ய வேத³னாய ததோ காமராகா³னுஸயங் நப்பஜஹதீ’’தி. ஏவமாதீ³ஸூதி ஆதி³-ஸத்³தே³ன பரிஞ்ஞாவாரம்பி ஸங்க³ண்ஹாதி. பு⁴ம்மனித்³தே³ஸேனேவ ஹேதுஅத்தே²னேவ நித்³தி³ட்டா²தி அத்தோ².
சதுத்த²பஞ்ஹவிஸ்ஸஜ்ஜனேனாதி தத³த்தே²தி தங் அனுஸயனட்டா²னத³ஸ்ஸனங் அத்தோ² ஏதஸ்ஸாதி தத³த்தோ², தஸ்மிங் தத³த்தே². ‘‘அனுஸயஸ்ஸ உப்பத்திட்டா²னத³ஸ்ஸனத்த²ங் அயங் வாரோ ஆரத்³தோ⁴’’திஆதி³னா ‘‘யதோ’’தி ஏதேன அனுஸயனட்டா²னங் வுத்தந்தி இமமத்த²ங் விபா⁴வெத்வா. பமாத³லிகி²தங் விய தி³ஸ்ஸதி உப்பன்ன-ஸத்³தே³ன வத்தமானுப்பன்னே வுச்சமானே. யதா² பன உப்பஜ்ஜனவாரே உப்பஜ்ஜதி-ஸத்³தே³ன உப்பத்தியோக³தீ³பகத்தா உப்பத்திரஹா வுச்சந்தி, ஏவமிதா⁴பி உப்பத்திஅரஹே வுச்சமானே ந கோசி விரோதோ⁴. யங் பன வக்க²தி ‘‘ந ஹி அபரியாபன்னானங் அனுஸயுப்பத்திரஹட்டா²னதா’’தி, ஸோபி ந தோ³ஸோ. யத்த² யத்த² ஹி அனுஸயா உப்பத்திரஹா, ததே³வ ஏகஜ்ஜ²ங் க³ஹெத்வா ‘‘ஸப்³ப³த்தா²’’தி வுத்தந்தி. ததே²வ தி³ஸ்ஸதீதி தங் பமாத³லிகி²தங் விய தி³ஸ்ஸதீதி அத்தோ².
யதோ உப்பன்னேன ப⁴விதப்³ப³ந்தி யதோ அனுஸயனட்டா²னதோ காமகா³ரானுஸயேன உப்பன்னேன ப⁴விதப்³ப³ங், தேன ததா²தி எத்த² ததா²-ஸத்³தோ³ யதா² ‘‘யதோ உப்பன்னேனா’’தி எத்த² உப்பத்திரஹட்டா²னதோ அனுஸயஸ்ஸ உப்பத்திரஹதா வுத்தா, ததா² ‘‘உப்பஜ்ஜனகேனா’’தி எத்தா²பி ஸா ஏவ வுச்சதீதி தீ³பேதீதி ஆஹ ‘‘ஸப்³ப³த⁴ம்மேஸு…பே॰… ஆபன்னேனா’’தி. தத்த² ‘‘உப்பஜ்ஜனகோ’’தி வுத்தே அனுப்பஜ்ஜனகோ ந ஹோதீதி அயமத்தோ² விஞ்ஞாயதி, ததா² ச ஸதி தேன அனுப்பத்தி நிச்சி²தாதி உப்பன்னஸபா⁴வதா ச பகாஸிதா ஹோதீதி. தேனாஹ ‘‘ஸப்³ப³த⁴ம்மேஸு…பே॰… அபனேதீ’’தி. ‘‘யோ யதோ காமராகா³னுஸயேன நிரனுஸயோ, ஸோ ததோ மானானுஸயேன நிரனுஸயோ’’தி புச்சா²ய ‘‘யதோ ததோ’’தி ஆக³தத்தா விஸ்ஸஜ்ஜனே ‘‘ஸப்³ப³த்தா²’’தி பத³ஸ்ஸ நிஸ்ஸக்கவஸேனேவ ஸக்கா யோஜேதுந்தி த³ஸ்ஸெந்தோ ‘‘ஸப்³ப³த்தா²தி…பே॰… ந ந ஸம்ப⁴வதீ’’தி ஆஹ. பு⁴ம்மதோ அஞ்ஞத்தா²பி ஸத்³த³விதூ³ இச்ச²ந்தி, யதோ ஸப்³பே³ஸங் பாத³கங் ‘‘ஸப்³ப³த்த²பாத³க’’ந்தி வுச்சதி, இத⁴ பன நிஸ்ஸக்கவஸேன வேதி³தப்³ப³ங்.
ஸானுஸயவாரவண்ணனா நிட்டி²தா.
3. பஜஹனவாரவண்ணனா
132-197. அப்பஜஹனஸப்³பா⁴வாதி தஸ்மாதி யஸ்மா யோ காமராகா³னுஸயங் பஜஹதி, ந ஸோ மானானுஸயங் நிரவஸேஸதோ பஜஹதி, யோ ச மானானுஸயங் நிரவஸேஸதோ பஜஹதி, ந ஸோ காமராகா³னுஸயங் பஜஹதி பகே³வ பஹீனத்தா, தஸ்மா ‘‘யோ வா பன மானானுஸயங் பஜஹதி, ஸோ காமராகா³னுஸயங் பஜஹதீதி? நோ’’தி வுத்தந்தி வேதி³தப்³ப³ங். யதி³ ஏவங் பட²மபுச்சா²யங் கத²ந்தி ஆஹ ‘‘யஸ்மா பன…பே॰… வுத்த’’ந்தி. தத்த² பஹானகரணமத்தமேவாதி பஹானகிரியாஸம்ப⁴வமத்தமேவ, ந நிரவஸேஸப்பஹானந்தி அதி⁴ப்பாயோ. தே ட²பெத்வாதி தி³ட்டி²விசிகிச்சா²னுஸயாதீ³னங் நிரவஸேஸபஜஹனகே அட்ட²மகாதி³கே ட²பெத்வா. அவஸேஸாதி தஸ்ஸ தஸ்ஸ அனுஸயஸ்ஸ நிரவஸேஸப்பஜஹனகேஹி அவஸிட்டா². தேஸு யேஸங் ஏகச்சே அனுஸயா பஹீனா, தேபி அப்பஜஹனஸப்³பா⁴வேனேவ நப்பஜஹந்தீதி வுத்தா. ந ச யதா²விஜ்ஜமானேனாதி மக்³க³கிச்சபா⁴வேன விஜ்ஜமானப்பகாரேன பஹானேன வஜ்ஜிதா ரஹிதா ஏவ வுத்தாதி யோஜனா.
கேஸஞ்சீதி கேஸஞ்சீதி அனாகா³மிஅக்³க³மக்³க³ஸமங்கி³அரஹந்தானங். உப⁴யந்தி காமராக³விசிகிச்சா²னுஸயத்³வயங். ஸேஸானந்தி ‘‘ஸேஸா’’தி வுத்தானங் யதா²வுத்தபுக்³க³லானங். தேஸந்தி வுத்தப்பகாரானங் த்³வின்னங் அனுஸயானங். உப⁴யாப்பஜஹனஸ்ஸாதி காமராக³விசிகிச்சா²னுஸயாப்பஜஹனஸ்ஸ. காரணங் ந ஹோதீதி யேஸங் விசிகிச்சா²னுஸயோ பஹீனோ, தேஸங் தஸ்ஸ பஹீனதா, யேஸங் யதா²வுத்தங் உப⁴யப்பஹீனங், தேஸங் தத³ப்பஜஹனஸ்ஸ காரணங் ந ஹோதீதி அத்தோ². தேனாஹ ‘‘தேஸங் பஹீனத்தா ‘நப்பஜஹந்தீ’தி ந ஸக்கா வத்து’’ந்தி. அத² பன ந தத்த² காரணங் வுத்தங், யேன காரணவசனேன யதா²வுத்ததோ³ஸாபத்தி ஸியா, கேவலங் பன ஸன்னிட்டா²னேன தேஸங் புக்³க³லானங் க³ஹிததாத³ஸ்ஸனத்த²ங் வுத்தங் ‘‘காமராகா³னுஸயஞ்ச நப்பஜஹந்தீ’’தி, ஏவம்பி புச்சி²தஸ்ஸ ஸங்ஸயத்த²ஸ்ஸ காரணங் வத்தப்³ப³ங். ததா² ச ஸதி ‘‘ஸேஸபுக்³க³லா தஸ்ஸ அனுஸயஸ்ஸ பஹீனத்தா நப்பஜஹந்தீ’’தி காரணங் வத்தப்³ப³மேவாதி சோத³னங் ஸந்தா⁴யாஹ ‘‘ந வத்தப்³ப³’’ந்திஆதி³. தத்த² ந வத்தப்³ப³ந்தி வுத்தனயேன காரணங் ந வத்தப்³ப³ங் காரணபா⁴வஸ்ஸேவ அபா⁴வதோ. ‘‘உப⁴யாப்பஜஹனஸ்ஸ காரணங் ந ஹோதீ’’தி வுத்தங், யதா² பன வத்தப்³ப³ங், தங் த³ஸ்ஸேதுங் ‘‘யோ காமராகா³னுஸயங்…பே॰… வத்தப்³ப³த்தா’’தி ஆஹ. தேன பஹீனாப்பஹீனவஸேன ஸங்ஸயத்த²ஸங்க³ஹிதேதி ஸங்ஸயத்தே²ன பதே³ன ஸங்க³ஹிதே. ஸன்னிட்டா²னபத³ஸங்க³ஹிதங் பன பஹீயமானத்தா ‘‘நப்பஜஹதீ’’தி ந ஸக்கா வத்துந்தி.
பஜஹனவாரவண்ணனா நிட்டி²தா.
5. பஹீனவாரவண்ணனா
264-274. ப²லட்ட²வஸேனேவ தே³ஸனா ஆரத்³தா⁴, ந மக்³க³ட்ட²வஸேன, குதோ புது²ஜ்ஜனவஸேன. கஸ்மா? ப²லக்க²ணே ஹி அனுஸயா பஹீனாதி வுச்சந்தி, மக்³க³க்க²ணே பன பஹீயந்தீதி. தேனேவாஹ ‘‘மக்³க³ஸமங்கீ³னங் அக்³க³ஹிததங் தீ³பேதீ’’தி. படிலோமே ஹி புது²ஜ்ஜனவஸேனபி தே³ஸனா க³ஹிதா ‘‘யஸ்ஸ தி³ட்டா²னுஸயோ அப்பஹீனோ, தஸ்ஸ விசிகிச்சா²னுஸயோ அப்பஹீனோதி? ஆமந்தா’’திஆதி³னா. அனுஸயச்சந்தபடிபக்கே²கசித்தக்க²ணிகானந்தி அனுஸயானங் அச்சந்தங் படிபக்க²பூ⁴தஏகசித்தக்க²ணிகானங். மக்³க³ஸமங்கீ³னந்தி மக்³க³ட்டா²னங். எத்த² ச அனுஸயானங் அச்சந்தபடிபக்க²தாக்³க³ஹணேன ‘‘ந கோசீ’’திஆதி³. தத்த² தேதி மக்³க³ஸமங்கி³னோ. ந கேவலங் பஹீனவாரேயேவ, அத² கோ² அஞ்ஞேஸுபீதி த³ஸ்ஸெந்தோ ‘‘அனுஸய…பே॰… க³ஹிதா’’தி ஆஹ.
275-296. யத்த² அனுஸயோ உப்பத்திரஹோ, தத்தே²வஸ்ஸ அனுப்பத்திரஹதாபாத³னந்தி ‘‘அத்தனோ அத்தனோ ஓகாஸே ஏவ அனுப்பத்தித⁴ம்மதங் ஆபாதி³தோ’’தி ஆஹ. ததா² ஹி வுத்தங் ‘‘சக்கு²ங் லோகே பியரூபங் ஸாதரூபங், எத்தே²ஸா தண்ஹா உப்பஜ்ஜமானா உப்பஜ்ஜதி, எத்த² நிவிஸமானா நிவிஸதீ’’தி (விப⁴॰ 203) வத்வா புன வுத்தங் ‘‘சக்கு²ங் லோகே பியரூபங் ஸாதரூபங், எத்தே²ஸா தண்ஹா பஹீயமானா பஹீயதி, எத்த² நிருஜ்ஜ²மானா நிருஜ்ஜ²தீ’’தி (விப⁴॰ 204). தஸ்மாதி யஸ்மா ததோ³காஸத்தமேவ காமதா⁴துஆதி³ஓகாஸத்தமேவ அனுஸயானங் தீ³பெந்தி பஹீனாப்பஹீனவசனானி, தஸ்மா. அனோகாஸே தது³ப⁴யாவத்தப்³ப³தா வுத்தாதி யஸ்மா காமராக³படிகா⁴னுஸயானங் த்³வின்னங் உப்பத்திட்டா²னங், ஸோ ஏவ பஹானோகாஸோதி தேன ஸத்³தி⁴ங் ஸமானோகாஸேதி தேன காமராகே³ன ஸத்³தி⁴ங் ஸமானோகாஸே. ‘‘ஸாதா⁴ரணட்டா²னே’’தி வுத்தே காமதா⁴துயங் ஸுகு²பெக்கா²ஸு பஹீனோ நாம ஹோதி, ந ஸமானகாலே பஹீனோ ததியசதுத்த²மக்³க³வஜ்ஜ²த்தா காமராக³மானானுஸயானங்.
பஹீனவாரவண்ணனா நிட்டி²தா.
7. தா⁴துவாரவண்ணனா
332-340. அப்பஹீனுப்பத்திரஹபா⁴வா இத⁴ அனுக³மனஸயனானீதி த³ஸ்ஸெந்தோ ‘‘யஸ்மிங் …பே॰… அத்தோ²’’தி ஆஹ. இதா⁴பி யுத்தாதி புப்³பே³ வுத்தமேவத்த²ங் பராமஸதி. ததா² ஹி வுத்தங் ‘‘காரணலாபே⁴ உப்பத்திஅரஹதங் த³ஸ்ஸேதீ’’தி (யம॰ மூலடீ॰ அனுஸயயமக 1). ச² படிஸேத⁴வசனானீதி திஸ்ஸன்னங் தா⁴தூனங் சுதூபபாதவிஸிட்டா²னங் படிஸேத⁴னவஸேன வுத்தவசனானி, ததோ ஏவ தா⁴துவிஸேஸனித்³தா⁴ரணானி ந ஹொந்தி. படிஸேதோ⁴தி ஹி இத⁴ ஸத்தாபடிஸேதோ⁴ வுத்தோதி அதி⁴ப்பாயேன வத³தி. அஞ்ஞத்தே² பன ந-காரே நாயங் தோ³ஸோ. இமங் நாம தா⁴துங். தங்மூலிகாஸூதி படிஸேத⁴மூலிகாஸு. ஏவஞ்ஹீதி ‘‘ந காமதா⁴துயா சுதஸ்ஸ காமதா⁴துங் உபபஜ்ஜந்தஸ்ஸா’’திஆதி³னா பட²மயோஜனாய ஸதி. நகாமதா⁴துஆதீ³ஸு உபபத்திகித்தனேனேவ நகாமதா⁴துஆதி³க்³க³ஹணேனபி தா⁴துவிஸேஸஸ்ஸேவ க³ஹிததாய அத்த²தோ விஞ்ஞாயமானத்தா. தேனாஹ ‘‘ந காமதா⁴து…பே॰… விஞ்ஞாயதீ’’தி. ப⁴ஞ்ஜிதப்³பா³தி விப⁴ஜிதப்³பா³. விபா⁴கோ³ பனெத்த² து³விதோ⁴ இச்சி²தோதி ஆஹ ‘‘த்³விதா⁴ காதப்³பா³தி அத்தோ²’’தி. புச்சா² ச விஸ்ஸஜ்ஜனானி ச புச்சா²விஸ்ஸஜ்ஜனானி. யதா² அவுத்தே ப⁴ங்கா³பா⁴வஸ்ஸ அவிஞ்ஞாதத்தா ‘‘அனுஸயா ப⁴ங்கா³ நத்தீ²’’தி வத்தப்³ப³ங், ததா² தயித³ங் ‘‘கதி அனுஸயா ப⁴ங்கா³’’தி ஏதத³பெக்க²ந்தி தத³பி வத்தப்³ப³ங். புச்சா²பெக்க²ஞ்ஹி விஸ்ஸஜ்ஜனந்தி.
தா⁴துவாரவண்ணனா நிட்டி²தா.
அனுஸயயமகவண்ணனா நிட்டி²தா.
8. சித்தயமகங்
உத்³தே³ஸவாரவண்ணனா
1-62. ஸராகா³தீ³தி ஆதி³-ஸத்³தே³ன ‘‘யஸ்ஸ ஸராக³ங் சித்தங் உப்பஜ்ஜதி, ந நிருஜ்ஜ²தீ’’தி ஆரபி⁴த்வா யாவ ‘‘யஸ்ஸ அவிமுத்தங் சித்த’’ந்தி வாரோ, தாவ ஸங்க³ண்ஹாதி. குஸலாதீ³தி பன ஆதி³-ஸத்³தே³ன ‘‘யஸ்ஸ குஸலங் சித்தங் உப்பஜ்ஜதி, ந நிருஜ்ஜ²தீ’’தி ஆரபி⁴த்வா யாவ ‘‘யஸ்ஸ ஸரணங் சித்தங் உப்பஜ்ஜதி, ந நிருஜ்ஜ²தீ’’தி வாரோ, தாவ ஸங்க³ண்ஹாதி, தஸ்மா ஸராகா³தி³குஸலாதீ³ஹீதி ஸராகா³தீ³ஹி அவிமுத்தந்தேஹி, குஸலாதீ³ஹி அரணந்தேஹி பதே³ஹி மிஸ்ஸகா வாரா. ஸுத்³தி⁴காதி கேவலா யதா²வுத்தஸராகா³தீ³ஹி குஸலாதீ³ஹி ச அமிஸ்ஸகா. தயோ தயோதி புக்³க³லத⁴ம்மவஸேன ‘‘தத்த² தத்த² பன வுத்தே ஸம்பிண்டெ³த்வா’’தி. தத்த² தத்த² ஸோளஸவிதே⁴ ஸராகா³தி³மிஸ்ஸகசித்தே வுத்தே புக்³க³லே ஏவ ஏகஜ்ஜ²ங் ஸம்பிண்டெ³த்வா ஸங்க³ஹெத்வா ‘‘ஸோளஸ புக்³க³லவாரா’’தி வுத்தங். ‘‘த⁴ம்மபுக்³க³லத⁴ம்மவாரா’’தி எத்தா²பி ஏஸேவ நயோ. ந நிரந்தரங் வுத்தேதி த⁴ம்மே புக்³க³லத⁴ம்மே ச அனாமஸித்வா ஸோளஸஸுபி டா²னேஸு நிரந்தரங் புக்³க³லே ஏவ வுத்தே ஸம்பிண்டெ³த்வா ஸோளஸ புக்³க³லவாரா ந வுத்தாதி அத்தோ².
ஸங்ஸக்³க³வஸேனாதி ஸங்ஸஜ்ஜனவஸேன தே³ஸனாய விமிஸ்ஸனவஸேன. அஞ்ஞதா² ஹி உப்பாத³னிரோதா⁴ பச்சுப்பன்னானாக³தகாலா ச கத²ங் ஸங்ஸஜ்ஜீயந்தி. ஸேஸானம்பி வாரானந்தி உப்பாது³ப்பன்னவாராதீ³னங். தங்தங்னாமதாதி யதா² ‘‘யஸ்ஸ சித்தங் உப்பஜ்ஜதி, தஸ்ஸ சித்தங் உப்பன்ன’’ந்திஆதி³னா உப்பாத³உப்பன்னபா⁴வாமஸனதோ உப்பாத³உப்பன்னவாரோதி நாமங் பாளிதோ ஏவ விஞ்ஞாயதி, ஏவங் ஸேஸவாரானம்பீதி ஆஹ ‘‘தங்தங்னாமதா பாளிஅனுஸாரேன வேதி³தப்³பா³’’தி.
உத்³தே³ஸவாரவண்ணனா நிட்டி²தா.
நித்³தே³ஸவாரவண்ணனா
63. ததா²ரூபஸ்ஸேவாதி பச்சி²மசித்தஸமங்கி³னோ ஏவ. தஞ்ச சித்தந்தி தஞ்ச யதா²வுத்தக்க²ணங் பச்சி²மசித்தங். ‘‘ஏவங்பகார’’ந்தி இமஸ்ஸ அத்த²ங் த³ஸ்ஸேதுங் ‘‘ப⁴ங்க³க்க²ணஸமங்கி³மேவா’’தி வுத்தங் நிருஜ்ஜ²மானாகாரஸ்ஸ ‘‘ஏவங்பகார’’ந்தி வுத்தத்தா.
65-82. த்³வயமேதந்தி ஏவங் ந ஸக்கா வத்துந்தி இமினா வுத்தப்பகாரேன ந ஸக்கா வத்துங், பகாரந்தரேன பன ஸக்கா வத்துந்தி அதி⁴ப்பாயோ. தத்த² ‘‘ந ஹீ’’திஆதி³னா பட²மபக்க²ங் விபா⁴வேதி. விப⁴ஜிதப்³ப³ங் ஸியாதி ‘‘ப⁴ங்க³க்க²ணே தங் சித்தங் உப்பஜ்ஜித்த², நோ ச உப்பஜ்ஜதி, உப்பாத³க்க²ணே தங் சித்தங் உப்பஜ்ஜித்த² சேவ உப்பஜ்ஜதி சா’’தி விப⁴ஜிதப்³ப³ங் ஸியா, ந ச விப⁴த்தங் ‘‘ஆமந்தா’’தி வத்தப்³ப³ங் ஸியா க²ணபச்சுப்பன்னே சித்தே வுத்தனயேன உப⁴யஸ்ஸபி லப்³ப⁴மானத்தா, ந ச வுத்தங். இதா³னி யேன பகாரேன ஸக்கா வத்துங், தங் த³ஸ்ஸேதுங் ‘‘சித்தஸ்ஸ ப⁴ங்க³க்க²ணே’’திஆதி³மாஹ. புக்³க³லோ வுத்தோ, புக்³க³லவாரோ ஹேஸோதி அதி⁴ப்பாயோ. தஸ்ஸாதி புக்³க³லஸ்ஸ. ந ச கிஞ்சி சித்தங் உப்பஜ்ஜதி சித்தஸ்ஸ ப⁴ங்க³க்க²ணஸமங்கி³பா⁴வதோ. தங் பன சித்தங் உப்பஜ்ஜதி, யங் சித்தஸமங்கீ³ ஸோ புக்³க³லோதி ஏவமெத்த² அத்தோ² த³ட்ட²ப்³போ³. யதி³ அனேகசித்தவஸேனாயங் யமகதே³ஸனா பவத்தாதி சோத³னங் ஸந்தா⁴யாஹ ‘‘சித்தந்தி ஹி…பே॰… திட்ட²தீ’’தி. ஸன்னிட்டா²னவஸேன நியமோ வேதி³தப்³போ³, அஞ்ஞதா² ‘‘நோ ச தேஸங் சித்தங் உப்பஜ்ஜதீ’’திஆதி³னா படிஸேதோ⁴ ந யுஜ்ஜெய்யாதி அதி⁴ப்பாயோ. தாதி³ஸந்தி ததா²ரூபங், யத³வத்தோ² உப்பன்னஉப்பஜ்ஜமானதாதி³பரியாயேஹி வத்தப்³போ³ ஹோதி, தத³வத்த²ந்தி அத்தோ².
83-113. இமஸ்ஸ புக்³க³லவாரத்தாதி ‘‘யஸ்ஸ சித்தங் உப்பஜ்ஜமான’’ந்திஆதி³னயப்பவத்தஸ்ஸ இமஸ்ஸ அதிக்கந்தகாலவாரஸ்ஸ புக்³க³லவாரத்தா. புக்³க³லோ புச்சி²தோதி ‘‘யஸ்ஸ சித்தங் உப்பஜ்ஜமானங்…பே॰… தஸ்ஸ சித்த’’ந்தி சித்தஸமங்கி³புக்³க³லோ புச்சி²தோதி புக்³க³லஸ்ஸேவ விஸ்ஸஜ்ஜனேன ப⁴விதப்³ப³ங், இதரதா² அஞ்ஞங் புச்சி²தங் அஞ்ஞங் விஸ்ஸஜ்ஜிதங் ஸியா. ந கோசி புக்³க³லோ ந க³ஹிதோ ஸப்³ப³ஸத்தானங் அனிப்³ப³த்தசித்ததாபா⁴வதோ. தே ச பன ஸப்³பே³ புக்³க³லா. நிருஜ்ஜ²மானக்க²ணாதீதசித்தாதி நிருஜ்ஜ²மானக்க²ணா ஹுத்வா அதீதசித்தா. ததா² து³தியததியாதி யதா² பட²மபஞ்ஹோ அனவஸேஸபுக்³க³லவிஸயத்தா படிவசனேன விஸ்ஸஜ்ஜேதப்³போ³ ஸியா, ததா² ததோ ஏவ து³தியததியபஞ்ஹா ‘‘ஆமந்தா’’இச்சேவ விஸ்ஸஜ்ஜேதப்³பா³ ஸியுந்தி அத்தோ². சதுத்தோ² பன பஞ்ஹோ ஏவங் விப⁴ஜித்வா புக்³க³லவஸேனேவ விஸ்ஸஜ்ஜேதப்³போ³தி த³ஸ்ஸெந்தோ ‘‘பச்சி²மசித்தஸ்ஸா’’திஆதி³ங் வத்வா ததா² அவசனே காரணங் த³ஸ்ஸெந்தோ ‘‘சித்தவஸேன புக்³க³லவவத்தா²னதோ’’திஆதி³மாஹ. ‘‘ப⁴ங்க³க்க²ணே சித்தங் உப்பாத³க்க²ணங் வத்தமானஸ்ஸ சித்தஸ்ஸ வஸேன புக்³க³லோ உப்பாத³க்க²ணாதீதசித்தோ, ‘‘அதீதங் சித்தங் உப்பாத³க்க²ணஞ்ச வீதிக்கந்தந்தி ப⁴ங்க³க்க²ணஞ்ச வீதிக்கந்த’’ந்தி இமினா பன அதீதஸ்ஸ சித்தஸ்ஸ வஸேன புக்³க³லோ உப்பாத³க்க²ணாதீதசித்தோ வுத்தோ.
தத்தா²தி தேஸு த்³வீஸு புக்³க³லேஸு. புரிமஸ்ஸாதி பட²மங் வுத்தஸ்ஸ ஸன்னிட்டா²னபத³ஸங்க³ஹிதஸ்ஸ சித்தங் ந ப⁴ங்க³க்க²ணங் வீதிக்கந்தங். ‘‘நோ ச ப⁴ங்க³க்க²ணங் வீதிக்கந்த’’ந்தி ஹி வுத்தங். பச்சி²மஸ்ஸ வீதிக்கந்தங் சித்தங் ப⁴ங்க³க்க²ணந்தி ஸம்ப³ந்தோ⁴. ‘‘ப⁴ங்க³க்க²ணஞ்ச வீதிக்கந்த’’ந்தி ஹி வுத்தங். ஏவமாதி³கோ புக்³க³லவிபா⁴கோ³தி து³தியபஞ்ஹாதீ³ஸு வுத்தங் ஸந்தா⁴யாஹ. தஸ்ஸ சித்தஸ்ஸ தங்தங்க²ணவீதிக்கமாவீதிக்கமத³ஸ்ஸனவஸேனாதி இதா⁴தி இமஸ்மிங் அதிக்கந்தகாலவாரே. புக்³க³லவிஸிட்ட²ங் சித்தங் புச்சி²தங் ‘‘யஸ்ஸ சித்தங் தஸ்ஸ சித்த’’ந்தி வுத்தத்தா. யதி³பி புக்³க³லப்பதா⁴னா புச்சா² புக்³க³லவாரத்தா. அதா²பி சித்தப்பதா⁴னா புக்³க³லங் விஸேஸனபா⁴வேன க³ஹெத்வா சித்தஸ்ஸ விஸேஸிதத்தா. உப⁴யதா²பி து³தியபுச்சா²ய ‘‘ஆமந்தா’’தி வத்தப்³ப³ங் ஸியா அனவஸேஸபுக்³க³லவிஸயத்தா. ததா² பன அவத்வா ‘‘அதீதங் சித்த’’ந்தி வுத்தங், கஸ்மா நிரோத⁴க்க²ண…பே॰… த³ஸ்ஸனத்த²ந்தி த³ட்ட²ப்³ப³ந்தி யோஜனா. ஏஸ நயோ ‘‘ந நிருஜ்ஜ²மான’’ந்தி எத்தா²பீதி நிருஜ்ஜ²மானங் க²ணங் நிரோத⁴க்க²ணங் க²ணங் வீதிக்கந்தகாலங் கிங் தஸ்ஸ சித்தங் ந ஹோதீதி அத்தோ².
114-116. ஸராக³பச்சி²மசித்தஸ்ஸாதி ஸராக³சித்தேஸு பச்சி²மஸ்ஸ சித்தஸ்ஸ, ஏகஸ்ஸ புக்³க³லஸ்ஸ ராக³ஸம்பயுத்தசித்தேஸு யங் ஸப்³ப³பச்சி²மங் சித்தங், தஸ்ஸ. ஸோ பன புக்³க³லோ அனாகா³மீ வேதி³தப்³போ³. ந நிருஜ்ஜ²தி நிரோதா⁴ஸமங்கி³தாய. நிருஜ்ஜி²ஸ்ஸதி இதா³னி நிரோத⁴ங் பாபுணிஸ்ஸதி. அப்படிஸந்தி⁴கத்தா பன ததோ அஞ்ஞங் நுப்பஜ்ஜிஸ்ஸதி. இதரேஸந்தி யதா²வுத்தஸராக³பச்சி²மசித்தஸமங்கி³ங் வீதராக³சித்தஸமங்கி³ஞ்ச ட²பெத்வா அவஸேஸானங் இதரஸெக்கா²னஞ்சேவ புது²ஜ்ஜனானஞ்ச.
நித்³தே³ஸவாரவண்ணனா நிட்டி²தா.
சித்தயமகவண்ணனா நிட்டி²தா.
9. த⁴ம்மயமகங்
1. பண்ணத்திவாரோ
உத்³தே³ஸவாரவண்ணனா
1-16. யதா² மூலயமகே குஸலாதி³த⁴ம்மா தே³ஸிதாதி குஸலாகுஸலாப்³யாகதா த⁴ம்மா குஸலகுஸலமூலாதி³விபா⁴க³தோ அஞ்ஞதா²தி குஸலகுஸலமூலாதி³விபா⁴க³தோ அஞ்ஞதா², க²ந்தா⁴தி³வஸேனாதி அத்தோ².
உத்³தே³ஸவாரவண்ணனா நிட்டி²தா.
2. பவத்திவாரவண்ணனா
33-34. தங் பன கம்மஸமுட்டா²னாதி³ரூபங் அக்³க³ஹெத்வா. கேசீதி த⁴ம்மஸிரித்தே²ரங் ஸந்தா⁴யாஹ. ஸோ ஹி ‘‘சித்தஸமுட்டா²னரூபவஸேன வுத்த’’ந்தி அட்ட²கத²ங் ஆஹரித்வா ‘‘இமஸ்மிங் பஞ்ஹே கம்மஸமுட்டா²னாதி³ரூபஞ்ச லப்³ப⁴தீ’’தி அவோச. ததா² ச வத்வா படிலோமபாளிங் த³ஸ்ஸெத்வா ‘‘சித்தஸமுட்டா²னரூபமேவ இதா⁴தி⁴ப்பேதங். கம்மஸமுட்டா²னாதி³ரூபே ந விதா⁴னங், நாபி படிஸேதோ⁴’’தி ஆஹ. ததா²தி யதா² வுத்தப்பகாரே பாடே² சித்தஸமுட்டா²னரூபமேவ அதி⁴ப்பேதங், ததா² எத்தா²பீதி அத்தோ². நோதி வுத்தந்தி வத³ந்தீதி ஸம்ப³ந்தோ⁴. தங் பனேதந்தி யதா² உத்³த⁴டஸ்ஸ பாட²ஸ்ஸ அத்த²வசனங், ஏவங் ந ஸக்கா வத்துங். கஸ்மாதி ஆஹ ‘‘சித்தஸ்ஸ ப⁴ங்க³க்க²ணே…பே॰… படிஸேத⁴ஸித்³தி⁴தோ’’தி. ஸ்வாயங் படிஸேதோ⁴ ஹெட்டா² த³ஸ்ஸிதோயேவாதி அதி⁴ப்பாயோ.
யே ச வத³ந்தீதி எத்த² யே சாதி வஜிரபு³த்³தி⁴த்தே²ரங் ஸந்தா⁴யாஹ. ஸோ ஹி ‘‘ஸோதாபத்திமக்³க³க்க²ணே’’திஆதி³னா படிஸம்பி⁴தா³மக்³க³பாளிங் ஆஹரித்வா ‘‘யதா² தத்த² ஸதிபி கம்மஜாதி³ரூபே ட²பெத்வா சித்தஸமுட்டா²னரூபந்தி சித்தபடிப³த்³த⁴த்தா சித்தஜரூபமேவ ட²பேதப்³ப³பா⁴வேன உத்³த⁴டங், ஏவமிதா⁴பி சித்தஜரூபமேவ கதி²த’’ந்தி வத³தி. தஞ்ச நேஸங் வசனங் ததா² ந ஹோதி, யதா² தேஹி உதா³ஹடங், விஸமோயங் உபஞ்ஞாஸோதி அத்தோ². யதா² ச தங் ததா² ந ஹோதி, தங் த³ஸ்ஸேதுங் ‘‘யேஸஞ்ஹீ’’திஆதி³ வுத்தங். தேஸந்தி கம்மஜாதீ³னங். தஸ்ஸாதி மக்³க³ஸ்ஸ. தேதி அப்³யாகதா, யே உப்பாத³னிரோத⁴வந்தோ. அவிஜ்ஜமானேஸு ச உப்பாத³னிரோதே⁴ஸு நிப்³பா³னஸ்ஸ விய.
ஸன்னிட்டா²னேன க³ஹிதேஸு புக்³க³லேஸு. தேஸு ஹி கேசி அகுஸலாப்³யாகதசித்தானங் உப்பாத³க்க²ணஸமங்கி³னோ, கேசி அப்³யாகதசித்தஸ்ஸ, கேசி குஸலாப்³யாகதசித்தஸ்ஸ, தேஸு புரிமா த்³வே ‘‘பஞ்சவோகாரே’’திஆதி³மாஹ. ஏவந்தி யதா²வுத்தனயேன. ஸப்³ப³த்தா²தி ஸப்³ப³பஞ்ஹேஸு.
79. ததோதி ஏகாவஜ்ஜனவீதி²தோ. புரிமதரஜவனவீதி² யாய வுட்டா²னகா³மினீ ஸங்க³ஹிதா, தத்த² உப்பன்னஸ்ஸபி சித்தஸ்ஸ. குஸலானாக³தபா⁴வபரியோஸானேனாதி குஸலத⁴ம்மானங் அனாக³தபா⁴வஸ்ஸ பரியோஸானபூ⁴தேன அக்³க³மக்³கா³னந்தரபச்சயத்தேன தீ³பிதங் ஹோதி ஸமானலக்க²ணங் ஸப்³ப³ங். கேன? தாய ஏவ ஸமானலக்க²ணதாய. ஏஸ நயோதி யதா² குஸலானுப்பாதோ³ குஸலானாக³தபா⁴வஸ்ஸ பரியோஸானபூ⁴ததோ வுத்தபரிச்சே²த³தோ ஓரம்பி லப்³ப⁴தீதி ஸோ யதா²வுத்தபரிச்சே²தோ³ லக்க²ணமத்தந்தி ஸ்வாயங் நயோ த³ஸ்ஸிதோ. ஏஸ நயோ அகுஸலாதீதபா⁴வஸ்ஸ ஆதி³ம்ஹி ‘‘து³தியே அகுஸலே’’தி வுத்தட்டா²னே, அப்³யாகதாதீதபா⁴வஸ்ஸ ஆதி³ம்ஹி ‘‘து³தியே சித்தே’’தி வுத்தட்டா²னேபீதி யோஜனா. இதா³னி ‘‘ஏஸ நயோ’’தி யதா²வுத்தமதிதே³ஸங் ‘‘யதா² ஹீ’’திஆதி³னா பாகடதரங் கரோதி. பா⁴வனாபஹானானி த³ஸ்ஸிதானி ஹொந்தி ‘‘அக்³க³மக்³க³ஸமங்கீ³ குஸலஞ்ச த⁴ம்மங் பா⁴வேதி, அகுஸலஞ்ச பஜஹதீ’’தி. இதா⁴தி இமஸ்மிங் பவத்திவாரே. தங் தந்தி அகுஸலாதீததாதி³ குஸலானாக³ததாதி³ ச. தேன தேனாதி ‘‘து³தியே அகுஸலே அக்³க³மக்³க³ஸமங்கீ³’’தி ஏவமாதி³னா அந்தேன ச.
100. படிஸந்தி⁴சித்ததோதி இத³ங் மரியாத³க்³க³ஹணங், ந அபி⁴விதி⁴க்³க³ஹணங், யதோ ‘‘ஸோளஸம’’ந்தி ஆஹ. அபி⁴விதி⁴க்³க³ஹணமேவ வா ஸோளஸசித்தக்க²ணாயுகமேவ ரூபந்தி இமஸ்மிங் பக்கே² அதி⁴ப்பேதே படிக்கி²த்தோவாயங் வாதோ³தி த³ஸ்ஸெந்தோ ‘‘ததோ பரம்பி வா’’தி ஆஹ. அயஞ்ச விசாரோ ஹெட்டா² த³ஸ்ஸிதோ ஏவ. ந ததோ ஓரந்தி விஞ்ஞாயதி ததோ ஓரங் அகுஸலனிரோத⁴ஸமகாலங் அப்³யாகதனிரோத⁴ஸ்ஸ அஸம்ப⁴வதோ.
பவத்திவாரவண்ணனா நிட்டி²தா.
த⁴ம்மயமகவண்ணனா நிட்டி²தா.
10. இந்த்³ரியயமகங்
1. பண்ணத்திவாரோ
உத்³தே³ஸவாரவண்ணனா
1. இந்த்³ரியயமகே விப⁴ங்கே³ வியாதி யதா² இந்த்³ரியவிப⁴ங்கே³ புரிஸிந்த்³ரியானந்தரங் ஜீவிதிந்த்³ரியங் உத்³தி³ட்ட²ங், ந மனிந்த்³ரியானந்தரங், ஏவங் இமஸ்மிங் இந்த்³ரியயமகே. தஞ்ச ஸுத்ததே³ஸனானுரோதே⁴னாதி த³ஸ்ஸெந்தோ ‘‘தீணிமானி…பே॰… ஸுத்தே தே³ஸிதக்கமேனா’’தி ஆஹ. ஸோயங் யத³த்த²ங் தஸ்ஸ ஸுத்தே தே³ஸிதக்கமேன உத்³தே³ஸோ, தங் த³ஸ்ஸேதுங் ‘‘பவத்திவாரேஹீ’’திஆதி³ வுத்தங். தத்த² யதா² ‘‘ஜீவிதிந்த்³ரிய’’ந்தி இத³ங் ரூபஜீவிதிந்த்³ரியஸ்ஸ அரூபஜீவிதிந்த்³ரியஸ்ஸ ச ஸாமஞ்ஞதோ க³ஹணங், ஏவங் உபாதி³ன்னஸ்ஸ அனுபாதி³ன்னஸ்ஸ சாதி ஆஹ ‘‘கம்மஜானங் அகம்மஜானஞ்ச அனுபாலக’’ந்தி. அத² வா ஸஹஜத⁴ம்மானுபாலகம்பி ஜீவிதிந்த்³ரியங் ந கேவலங் க²ணட்டி²தியா ஏவ காரணங், அத² கோ² பப³ந்தா⁴னுபச்சே²த³ஸ்ஸபி காரணமேவ. அஞ்ஞதா² ஆயுக்க²யமரணங் ந ஸம்ப⁴வெய்ய, தஸ்மா ‘‘கம்மஜானஞ்ச அனுபாலக’’ந்தி அவிஸேஸதோ வுத்தங், சுதிபடிஸந்தீ⁴ஸு ச பவத்தமானானங் கம்மஜானங் அனுபாலகங். இதீதி தஸ்மா. தங்மூலகானீதி ஜீவிதிந்த்³ரியமூலகானி. சுதிபடிஸந்தி⁴பவத்திவஸேனாதி சுதிபடிஸந்தி⁴வஸேன பவத்திவஸேன ச. தத்த² யங் உபாதி³ன்னங், தங் சுதிபடிஸந்தி⁴வஸேனேவ, இதரங் இதரவஸேனபி வத்தப்³ப³ங். யஸ்மா சக்கு²ந்த்³ரியாதீ³ஸு புரிஸிந்த்³ரியாவஸானேஸு ஏகந்தஉபாதி³ன்னேஸு அதங்ஸபா⁴வத்தா யங் மனிந்த்³ரியங் மூலமேவ ந ஹோதி, தஸ்மா தங் ட²பெத்வா அவஸேஸமூலகானி சக்கு²ந்த்³ரியாதி³மூலகானி. ஆயதனயமகே வியாதி யதா² ஆயதனயமகே படிஸந்தி⁴வஸேனாயதனானங் உப்பாதோ³, மரணவஸேன ச நிரோதோ⁴ வுத்தோ, ஏவமிதா⁴பி சுதிஉபபத்திவஸேனேவ வத்தப்³பா³னி, தஸ்மா அதங்ஸபா⁴வத்தா ஜீவிதிந்த்³ரியங் தேஸங் சக்கு²ந்த்³ரியாதீ³னங் மஜ்ஜே² அனுத்³தி³ஸித்வா அந்தே புரிஸிந்த்³ரியானந்தரங் உத்³தி³ட்ட²ங். யங் பன சக்கு²ந்த்³ரியாதி³மூலகேஸு மனிந்த்³ரியங் ஸப்³ப³பச்சா² ஏவ க³ஹிதங், தத்த² காரணங் அட்ட²கதா²யங் வுத்தமேவ.
உத்³தே³ஸவாரவண்ணனா நிட்டி²தா.
நித்³தே³ஸவாரவண்ணனா
94. கோசி ஸபா⁴வோ நத்தீ²தி கோசி ஸபா⁴வத⁴ம்மோ நத்தி². யதி³ ஏவங் ‘‘நத்தீ²’’தி படிக்கே²போ ஏவ யுத்தோதி ஆஹ ‘‘ந ச ரூபாதீ³’’திஆதி³. ‘‘ஸுகா² து³க்கா² ‘‘ஸுக²ஸ்ஸ…பே॰… க³ஹிதோயேவா’’தி ஆஹ. து³க்க²ஸ்ஸ ச பே⁴த³ங் கத்வா.
140. பஞ்ஞிந்த்³ரியானி ஹொந்தீதி ஆமந்தாதி வுத்தந்தி பஜானநட்டே²ன அதி⁴பதெய்யட்டே²ன ச பஞ்ஞிந்த்³ரியானி ஹொந்தி, த³ஸ்ஸனட்டே²ன பன சக்கூ²னி சாதி சக்கு², இந்த்³ரியந்தி புச்சா²ய ‘‘ஆமந்தா’’தி வுத்தந்தி அதி⁴ப்பாயோ. ‘‘தண்ஹாஸோதமேவாஹா’’தி வுத்தங், ‘‘யஸ்ஸ ச²த்திங்ஸதி ஸோதா’’திஆதீ³ஸு (த⁴॰ ப॰ 339) பன தி³ட்டி²ஆதீ³னம்பி ஸோதபா⁴வோ ஆக³தோ.
பண்ணத்தினித்³தே³ஸவாரவண்ணனா நிட்டி²தா.
2. பவத்திவாரவண்ணனா
186. அஞ்ஞத⁴ம்மனிஸ்ஸயேனாதி ‘‘யோ தேஸங் ரூபீனங் த⁴ம்மானங் ஆயு டி²தீ’’திஆதி³னா (த⁴॰ ஸ॰ 634) அஞ்ஞத⁴ம்மனிஸ்ஸயேன க³ஹேதப்³ப³ங். பவத்திஞ்ச க³ஹெத்வா க³தேஸு விஸ்ஸஜ்ஜனேஸு, சுதிபடிஸந்தி⁴யோ க³ஹெத்வா க³தேஸு யோஜனா ந லப்³ப⁴தீதி அதி⁴ப்பாயோ. அலப்³ப⁴மானா ச ஸுக²து³க்க²தோ³மனஸ்ஸிந்த்³ரியேஹேவ ந லப்³ப⁴தி. தங்மூலகா ச நயாதி ஸுகி²ந்த்³ரியாதி³மூலகா ச நயா. தேஹீதி ஸுகி²ந்த்³ரியாதீ³ஹி. யோஜனாதி ‘‘பவத்தே ஸுகி²ந்த்³ரியவிப்பயுத்தசித்தஸ்ஸ உப்பாத³க்க²ணே’’திஆதி³னா உப்பஜ்ஜமானேஹி யோஜனா. தங்மூலகா ச ததா²யோஜனாமூலபூ⁴தா ச நயா ஜீவிதிந்த்³ரியாதி³மூலகா ச நயா. பாகடாயேவாதி பாளிக³தியா ஏவ விஞ்ஞாயமானயோஜனத்தா ஸுவிஞ்ஞெய்யா ஏவ.
தங் வசனங். ஸோமனஸ்ஸவிரஹிதஸசக்கு²கபடிஸந்தி⁴னித³ஸ்ஸனவஸேனாதி ஸோமனஸ்ஸவிரஹிதஸசக்கு²கபடிஸந்தி⁴யேவ நித³ஸ்ஸனந்தி யோஜேதப்³ப³ங். கத²ங் பனேதங் ஜானிதப்³ப³ங் ‘‘நித³ஸ்ஸனமத்தமேதங், ந பன க³ணனபரிச்சி²ந்த³ன’’ந்தி ஆஹ ‘‘ந ஹி சதுன்னங்யேவாதி நியமோ கதோ’’தி. தங்ஸமானலக்க²ணாதி தாய தங்ஸமானலக்க²ணாதி வா தாய ‘‘காமாவசரே…பே॰… நித³ஸ்ஸனங் கத’’ந்தி. தேனாதி உபெக்கா²ஸஹக³தமஹாவிபாகனித³ஸ்ஸனேன, யேஹி ஸமானதாய இமே நித³ஸ்ஸனபா⁴வேன வுத்தா, தே ஏகங்ஸேன தங்ஸபா⁴வா ஏவாதி அயமெத்த² அதி⁴ப்பாயோ. தேனாஹ ‘‘யதா² ஸஸோமனஸ்ஸ…பே॰… தோ ஹோதீ’’தி.
நனு ச க³ப்³ப⁴ஸெய்யகேஸு அயமத்தோ² ஏகங்ஸதோ ந லப்³ப⁴தீதி ஆஸங்கங் ஸந்தா⁴யாஹ ‘‘க³ப்³ப⁴ஸெய்யகானஞ்ச…பே॰… த³ஸ்ஸிதா ஹோதீ’’தி. தேனாஹ ‘‘ஸசக்கு²கான’’ந்திஆதி³. தத்த² யதி³ ஸஹேதுகபடிஸந்தி⁴கானங் காமாவசரானங் நியமதோ ஸசக்கு²காதி³பா⁴வத³ஸ்ஸனங் க³ப்³ப⁴ஸெய்யகவஸேன லப்³பெ⁴ய்ய, யுத்தமேதங் ஸியாதி சோத³னங் ஸந்தா⁴யாஹ ‘‘க³ப்³ப⁴ஸெய்யகேபி ஹீ’’திஆதி³. ததா² ஆயதனயமகே த³ஸ்ஸிதந்தி இத³ங் ஆயதனயமகவண்ணனாயங் அத்தனா வுத்தங் ‘‘ஏவஞ்ச கத்வா இந்த்³ரியயமகே’’திஆதி³வசனங் ஸந்தா⁴ய வுத்தங். தத்த² ஹி ஸோமனஸ்ஸிந்த்³ரியுப்பாத³ககம்மஸ்ஸ ஏகந்தேன சக்கு²ந்த்³ரியுப்பாத³னதோ க³ப்³பே⁴பி யாவ சக்கு²ந்த்³ரியுப்பத்தி, தாவ உப்பஜ்ஜமானதாய ‘‘அபி⁴னந்தி³தப்³ப³த்தா’’தி வுத்தங். ஸன்னிட்டா²னேன ஸங்க³ஹிதானந்தி ‘‘யஸ்ஸ வா பன ஸோமனஸ்ஸிந்த்³ரியங் உப்பஜ்ஜதீ’’தி ஏதேன ஸன்னிட்டா²னேன ஸங்க³ஹிதானங். இத்தீ²னங் அகா⁴னகானங் உபபஜ்ஜந்தீனந்தி ஆதீ³ஸூதி ஆதி³-ஸத்³தே³ன ‘‘இத்தீ²னங் அசக்கு²கானங் உபபஜ்ஜந்தீன’’ந்திஆதி³ங் ஸங்க³ண்ஹாதி. தே ஏவாதி க³ப்³ப⁴ஸெய்யகா ஏவ.
தங்ஸமானலக்க²ணந்தி ஸோபெக்க²அசக்கு²கபடிஸந்தி⁴பா⁴வேன ஸமானலக்க²ணங். தத்தா²தி அஹேதுகபடிஸந்தி⁴சித்தே. ஸமாதி⁴லேஸோ து³ப்³ப³லஸமாதி⁴ யோ சித்தட்டி²திமத்தோ. தஸ்மாதி யஸ்மா சித்தட்டி²தி விய து³ப்³ப³லங் வீரியங் நத்தி², யோ ‘‘வீரியலேஸோ’’தி வத்தப்³போ³, தஸ்மா, லேஸமத்தஸ்ஸபி வீரியஸ்ஸ அபா⁴வாதி அத்தோ². அஞ்ஞேஸூதி அஹேதுகபடிஸந்தி⁴சித்ததோ அஞ்ஞேஸு. கேஸுசீதி ஏகச்சேஸு. உப⁴யேனபி மனொத்³வாராவஜ்ஜனஹஸிதுப்பாத³சித்தங் வத³தி. இதா⁴தி அஹேதுகபடிஸந்தி⁴சித்தே. ஸமாதி⁴வீரியானி இந்த்³ரியப்பத்தானி ச ந ஹொந்தீதி ஸமாதி⁴கிச்சங் படிக்கி²பதி, ந ஸமாதி⁴மத்தங், ந ‘‘விஸேஸனஞ்ஹி விஸேஸிதப்³பே³ பவத்ததீ’’தி. யஸ்மிங் வீரியே ஸதி இந்த்³ரியுப்பத்தி ஸியா, ததே³வ தத்த² நத்தீ²தி அத்தோ².
அபாயே ஓபபாதிகவஸேனாதி இத³ங் ஸுக³தியங் ஓபபாதிகோ விகலிந்த்³ரியோ ந ஹோதீதி கத்வா வுத்தங், ‘‘லப்³ப⁴ந்தேவ ஞாணவிப்பயுத்தான’’ந்தி பன வுத்தத்தா ‘‘து³ஹேதுகபடிஸந்தி⁴கானங் வஸேனா’’தி அட்ட²கதா²யங் வுத்தங். தேஸந்தி இத்தி²புரிஸிந்த்³ரியஸந்தானானங். இத்தி²புரிஸிந்த்³ரியானங் பன உப்பாத³னிரோதா⁴ அபி⁴ண்ஹஸோவ ஹொந்தீதி. பட²மகப்பிகாதீ³னந்தி எத்த² ஆதி³-ஸத்³தே³ன க³ஹிதானங் பரிவத்தமானலிங்கா³னங் வஸேன உப்பாத³னிரோத⁴க்³க³ஹணங் வேதி³தப்³ப³ங். பட²மகப்பிகானங் பன வஸேன உப்பாதோ³ ஏவ லப்³ப⁴தி. ‘‘சுதிஉபபத்திவஸேனேவ து³தியபுச்சா²ஸுபி ஸன்னிட்டா²னேஹி க³ஹணங் வேதி³தப்³ப³’’ந்தி இத³ங் உபாதி³ன்னஇந்த்³ரியேஹி நியமிதத்தா வுத்தங்.
190. ஸந்தானுப்பத்தினிரோத⁴த³ஸ்ஸனதோதி ஸந்தானவஸேன உப்பாத³னிரோதா⁴னங் தி³ஸ்ஸமானத்தா. ஏதேன ரூபஜீவிதிந்த்³ரியஸ்ஸ சக்கு²ந்த்³ரியாதி³ஸமானக³திகதங் யுத்திதோ ஸாதே⁴தி. ஆக³மதோ பன ‘‘வினா ஸோமனஸ்ஸேனா’’திஆதி³னா பரதோ ஸாதெ⁴ஸ்ஸதி. சே²தோ³தி நாமங் த³ட்ட²ப்³ப³ங் ஸரூபத³ஸ்ஸனேனேவ ஸங்ஸயசே²த³னதோ.
தஸ்ஸாதி ரூபஜீவிதிந்த்³ரியஸ்ஸ. தே ச அஸஞ்ஞஸத்தா. நனு ச உப்பாதோ³வ ஜீவிதிந்த்³ரியஸ்ஸ சுதிஉபபத்திவஸேன வத்தப்³போ³, ந அனுப்பாதோ³தி ஆஹ ‘‘அனுப்பாதோ³…பே॰… ந பவத்தே’’தி. அயஞ்ச நயோ ந கேவலங் புரிமகொட்டா²ஸே ஏவ, அத² கோ² இதரகொட்டா²ஸேபி க³ஹிதோ ஏவாதி த³ஸ்ஸெந்தோ ‘‘பச்சி²மகொட்டா²ஸேபீ’’திஆதி³மாஹ.
‘‘உபபத்திசித்தஸ்ஸ உப்பாத³க்க²ணே’’தி கஸ்மா வுத்தந்தி யேனாதி⁴ப்பாயேன சோத³னா கதா, தமதி⁴ப்பாயங் விவரிதுங் ‘‘நனு ஸுத்³தா⁴வாஸ’’ந்திஆதி³ வுத்தங். ந வத்தப்³ப³ந்தி ‘‘உபபஜ்ஜந்தான’’ந்தி ந வத்தப்³ப³ங், ‘‘உபபத்திசித்தஸ்ஸ உப்பாத³க்க²ணே’’இச்சேவ வத்தப்³ப³ந்தி அத்தோ². இதா³னி யதா² ‘‘உபபஜ்ஜந்தான’’ந்தி ந வத்தப்³ப³ங், தங் த³ஸ்ஸேதுங் ‘‘யதா² ஹீ’’திஆதி³ வுத்தங். ஸோமனஸ்ஸமனிந்த்³ரியானந்தி ஸோமனஸ்ஸிந்த்³ரியமனிந்த்³ரியானங், அயமேவ வா பாடோ². ததா³தி பட²மஸ்ஸ ரூபஜீவிதிந்த்³ரியஸ்ஸ த⁴ரமானகாலே. தஸ்மாதி யஸ்மா ரூபாரூபஜீவிதிந்த்³ரியானங் அத்தே²வ காலபே⁴தோ³, உப⁴யஞ்செத்த² ஜீவிதிந்த்³ரியபா⁴வஸாமஞ்ஞேன ஏகஜ்ஜ²ங் கத்வா க³ய்ஹதி, தஸ்மா. உப⁴யந்தி ஸோமனஸ்ஸிந்த்³ரியஜீவிதிந்த்³ரியந்தி உப்பாத³க்க²ணேன நித³ஸ்ஸிதந்தி ஏதேன ‘‘உபபத்திசித்தஸ்ஸ உப்பாத³க்க²ணே’’தி இத³ங் நித³ஸ்ஸனமத்தந்தி த³ஸ்ஸேதி. இதா³னி தமேவத்த²ங் உதா³ஹரணேன பாகடதரங் காதுங் ‘‘யதா² ஹீ’’திஆதி³ வுத்தங். தத்த²
தேஸந்தி ஜீவிதிந்த்³ரியாதீ³னங். அஞ்ஞத்தா²தி பவத்தே. இதா⁴தி அனாக³தகாலபே⁴தே³. ந ந ஸம்ப⁴வதி உபபத்திக்க²ணஸ்ஸ விய ததோ பரங் பவத்திக்க²ணஸ்ஸபி அனாக³தகாலபா⁴வதோ. தஸ்மாதி உபபத்திதோ அஞ்ஞத்தா²பி யதா²தி⁴ப்பேதஉப்பாத³ஸம்ப⁴வதோ. அயஞ்ச அத்தோ² வாரந்தரேபி தி³ஸ்ஸதீதி த³ஸ்ஸெந்தோ ஆஹ ‘‘ஏவஞ்ச கத்வா’’திஆதி³. ந ஹீதிஆதி³னா தமேவத்த²ங் ஸமத்தே²தி. தத்த² அபி பச்சி²ம…பே॰… ஸந்தி⁴கஸ்ஸாதி அபி-ஸத்³தே³ன ‘‘கோ பன வாதோ³ அபச்சி²மப⁴விகஸ்ஸ ஸோமனஸ்ஸஸஹக³தபடிஸந்தி⁴கஸ்ஸா’’தி த³ஸ்ஸேதி. அபச்சி²மப⁴விகஸ்ஸ சுதிதோ பச்சா² ‘‘ஸோமனஸ்ஸிந்த்³ரியங் நிருஜ்ஜி²ஸ்ஸதீ’’தி வத்தப்³ப³மேவ நத்தீ²தி ஆஹ ‘‘சுதிதோ புப்³பே³வா’’தி. எத்த² ஹி பட²மபுச்சா²ஸு ஸன்னிட்டா²னத்தோ²திஆதீ³ஸு அயங் ஸங்கே²பத்தோ² – எத்த² ‘‘யஸ்ஸ சக்கு²ந்த்³ரியங் உப்பஜ்ஜிஸ்ஸதீ’’தி ஏவமாதீ³ஸு யமகேஸு யா பட²மபுச்சா², தாஸு ஸன்னிட்டா²னபத³ஸங்க³ஹிதோ அத்தோ². புச்சி²தப்³ப³த்த²னிஸ்ஸயோதி ‘‘தஸ்ஸ ஸோமனஸ்ஸிந்த்³ரியங் உப்பஜ்ஜிஸ்ஸதீ’’திஆதி³கஸ்ஸ புச்சி²தப்³ப³ஸ்ஸ அத்த²ஸ்ஸ நிஸ்ஸயபூ⁴தோ மாதி³ஸோவ மயா ஸதி³ஸோ ஏவ அத்தோ² உபபத்திஉப்பாதி³ந்த்³ரியவா உபபத்திக்க²ணே உப்பாதா³வத்த²இந்த்³ரியஸஹிதோ, உப⁴யுப்பாதி³ந்த்³ரியவா படிஸந்தி⁴பவத்தீஸு உப்பாதா³வத்த²இந்த்³ரியஸஹிதோ வா. படினிவத்தித்வாபி புச்சி²தப்³ப³த்த²ஸ்ஸ நிஸ்ஸயோதி ‘‘யஸ்ஸ வா பனா’’திஆதி³னா படினிவத்தித்வா புச்சி²தப்³ப³ஸ்ஸபி ஸங்ஸயத்த²ஸ்ஸ நிஸ்ஸயோதி ஏவங் இமினா விய அஜ்ஜா²ஸயேன ‘‘யஸ்ஸ வா பன ஸோமனஸ்ஸிந்த்³ரியங் உப்பஜ்ஜிஸ்ஸதீ’’திஆதீ³ஸு து³தியபுச்சா²ஸு ஸன்னிட்டா²னத்த²மேவ ஸன்னிட்டா²னபத³ஸங்க³ஹிதமேவ அத்த²ங் நியமேதி. தத்தே²வ தாஸு ஏவ புப்³பே³ வுத்தபட²மபுச்சா²ஸு ஏவ. புச்சி²தப்³ப³ங் ‘‘தஸ்ஸ ஸோமனஸ்ஸிந்த்³ரியங் உப்பஜ்ஜிஸ்ஸதீ’’திஆதீ³ஸு அனாக³தபா⁴வமத்தேன ஸரூபதோ க³ஹிதங் உப்பாத³ங் உப்பாத³ஸங்கா²தங், ‘‘தஸ்ஸ ஸோமனஸ்ஸிந்த்³ரியங் நிருஜ்ஜி²ஸ்ஸதீ’’திஆதீ³ஸு அனாக³தபா⁴வமத்தேன ஸரூபதோ க³ஹிதங் நிரோத⁴ங் வா நிரோத⁴ஸங்கா²தங் வா ஸங்ஸயத்த²ங் ந நியமேதீதி. ஏவந்தி வுத்தப்பகாரேன ஸன்னிட்டா²னத்த²ஸ்ஸ நியமோ ஹோதி, ந ஸங்ஸயத்த²ஸ்ஸ, தஸ்மா ‘‘யஸ்ஸ வா பன…பே॰… ஆமந்தா’’தி வுத்தங். ஏஸ நயோதி ய்வாயங் உப்பாத³வாரே விசாரோ வுத்தோ, நிரோத⁴வாரேபி ஏஸேவ நயோ. ததா² ஹி ‘‘யஸ்ஸ
ஏவங் அவுத்தத்தாதி உப்பாத³னிரோதா⁴னங் அனாக³தானங் ஸரூபேன அவுத்தத்தா. ந ஹி தத்த² தே ஸரூபேன வுத்தா, அத² கோ² ‘‘நுப்பஜ்ஜிஸ்ஸதீ’’தி படிக்கே²பமுகே²ன வுத்தா. தத்தா²தி அனுலோமே. ந ஏவங் யோஜேதப்³பா³ படிலோமே. தமேவ அயோஜேதப்³ப³தங் ‘‘யதா² ஹீ’’திஆதி³னா விவரதி. உப்பாத³னிரோதே⁴ அதிக்கமித்வா உப்பாத³னிரோதா⁴ ஸம்ப⁴வந்தி யோஜேதுங், ததா² உப்பாத³னிரோதே⁴ அப்பத்வா உப்பாத³னிரோதா⁴ ஸம்ப⁴வந்தி யோஜேதுந்தி யோஜனா. இத³ஞ்ச த்³வயங் யதா²னுலோமே ஸம்ப⁴வதி, ந ஏவங் படிலோமே. தேனாஹ ‘‘ந ஏவங்…பே॰… ஸம்ப⁴வந்தீ’’தி. தத்த² காரணமாஹ ‘‘அபூ⁴தாபா⁴வஸ்ஸ…பே॰… ஸம்ப⁴வானுபபத்திதோ’’தி. அபூ⁴தாபா⁴வஸ்ஸாதி அபூ⁴தஸ்ஸ அபா⁴வஸ்ஸ, அபூ⁴தஸ்ஸ உப்பாத³ஸ்ஸ நிரோத⁴ஸ்ஸ ச அபா⁴வஸ்ஸாதி அதி⁴ப்பாயோ. தேனாஹ ‘‘அபூ⁴துப்பாத³னிரோதா⁴பா⁴வோ ச படிலோமே புச்சி²தோ’’தி, தஸ்மா ‘‘ஆமந்தா’’தி ச வுத்தங், ந வுத்தங் விஸ்ஸஜ்ஜனந்தி ஸம்ப³ந்தோ⁴. அஸ்ஸ விஸேஸரஹிதஸ்ஸ அபூ⁴தாபா⁴வஸ்ஸாதி இமஸ்ஸ யதா²வுத்தஸ்ஸ யதா² ரூபாபா⁴வோ வேத³னாபா⁴வோதி கோசி அபா⁴வோபி விஸேஸஸஹிதோ, ந ஏவமயந்தி விஸேஸரஹிதஸ்ஸ அபூ⁴தாபா⁴வஸ்ஸ.
காலந்தரயோகா³பா⁴வதோதி காலவிஸேஸயோகா³பா⁴வதோ. யாதி³ஸானந்தி யானி பூ⁴தானி ந வத்தமானானி ஸதி பச்சயே உப்பஜ்ஜனாரஹானி, தேஸங் அனாக³தானந்தி அத்தோ². உப்பாத³னிரோதா⁴பா⁴வேன புச்சி²தப்³ப³ஸ்ஸாதி ‘‘நுப்பஜ்ஜிஸ்ஸதி ந நிருஜ்ஜி²ஸ்ஸதீ’’தி ஏவங் உப்பாத³ஸ்ஸ நிரோத⁴ஸ்ஸ ச அபா⁴வேன புச்சி²தப்³ப³ஸ்ஸ அத்த²ஸ்ஸ. ஸன்னிஸ்ஸயோ நிஸ்ஸயபூ⁴தோ ஸன்னிட்டா²னேன ஸன்னிச்சி²தோ ஸன்னிட்டா²னபத³ஸங்க³ஹிதோ. ஸோ யதா²வுத்தோ அத்தோ² நிஸ்ஸயோ ஏதேஸந்தி தன்னிஸ்ஸயா. தாதி³ஸானங்யேவ அனாக³தானங்யேவ உபபத்திசுதிஉப்பாத³னிரோதா⁴னங் உபபத்திசுதிஸங்கா²தஉப்பாத³னிரோதா⁴னங் அனுப்பாதா³னிரோதா⁴னங் படிக்கே²பவஸேன. ஜீவிதாதீ³னம்பி ஜீவிதமனிந்த்³ரியாதீ³னம்பி. அனுப்பாதா³னிரோதா⁴ ஸங்ஸயபதே³ன புச்சி²தா ஹொந்தி ‘‘யஸ்ஸ ஸோமனஸ்ஸிந்த்³ரியங் நுப்பஜ்ஜிஸ்ஸதி, தஸ்ஸ ஸோமனஸ்ஸிந்த்³ரியங் ந நிருஜ்ஜி²ஸ்ஸதீ’’தி. ‘‘ஆமந்தா’’தி வுத்தங் விப⁴ஜித்வா வத்தப்³ப³ஸ்ஸ அபா⁴வதோ. தேனாஹ ‘‘ந வுத்தங்…பே॰… விஸ்ஸஜ்ஜன’’ந்தி.
யே தங்ஸமானலக்க²ணதாயாதி தேன ஸோபெக்க²படிஸந்தி⁴கபா⁴வேன ஸமானலக்க²ணதாய. தங் பமாத³லிகி²தங் த⁴ம்மயமகே
பவத்திவாரவண்ணனா நிட்டி²தா.
3. பரிஞ்ஞாவாரவண்ணனா
435-482. லோகியஅப்³யாகதேஹீதி ப²லத⁴ம்மனிப்³பா³னவினிமுத்தேஹி அப்³யாகதேஹி. தானி உபாதா³யாதி தானி லோகியஅப்³யாகதானி உபாதா³ய. தங்ஸமானக³திகானங் மனிந்த்³ரியாதீ³னங் ‘‘ஸோ வேத³னாக்க²ந்த⁴ங் பரிஜானாதீதி? ஆமந்தா’’திஆதி³னா (யம॰ 1.க²ந்த⁴யமக.206) வேத³னாக்க²ந்தா⁴தீ³னங் விய பரிஞ்ஞெய்யதா வுத்தா. யஞ்ஹி பரிஜானிதப்³ப³ங், ததே³வ பரிஜானாதீதிஆதி³னா வுத்தங். ஏவமவிபரீதே அத்தே² ஸித்³தே⁴பி சோத³கோ ‘‘மிஸ்ஸகத்தா’’தி எத்த² லப்³ப⁴மானங் லேஸங் க³ஹெத்வா சோதே³தி ‘‘யதி³ பரிஞ்ஞெய்யமிஸ்ஸகத்தா’’திஆதி³னா. தஸ்ஸத்தோ² – யதா² இத⁴ பரிஞ்ஞெய்யமிஸ்ஸகானங் பரிஞ்ஞெய்யதா வுத்தா, ஏவமஞ்ஞத்தா²பி ஸா தேஸங் வத்தப்³பா³, ததா² பா⁴வேதப்³ப³மிஸ்ஸகானங் பா⁴வேதப்³ப³தாதி. தேனாஹ ‘‘கஸ்மா த⁴ம்மயமகே’’திஆதி³. குஸலாகுஸலேஸு பா⁴வனாபஹானாபி⁴னிவேஸோ ஹோதி, யேன வுத்தங் ‘‘ஸோ தங் அகுஸலங் பஜஹதி, குஸலங் பா⁴வேதீ’’திஆதி³. ந அப்³யாகதபா⁴வந்தி ஏகேன யதா² ப²ஸ்ஸத்³வாரதோ விய விஞ்ஞாணத்³வாரதோ குஸலாதீ³னங் உப்பத்திபரியாயோ, ஏவங் வேத³னாக்க²ந்தா⁴தீ³னங் விய ந அப்³யாகதாதீ³னங் பரிஞ்ஞெய்யதாபரியாயோதி த³ஸ்ஸேதி.
குஸலாகுஸலபா⁴வேன அக்³க³ஹிதாதி ஸமுத³யஸபா⁴வேன அக்³க³ஹிதாதி அத்தோ². குஸலாகுஸலாபீதி குஸலாகுஸலபா⁴வாபி ஸமானா. பா⁴வேதப்³ப³பஹாதப்³ப³பா⁴வேஹி வினாபி ஹோதி, யோ ந மக்³க³ஸமுத³யஸச்சபக்கி²யோ. யதா² ‘‘அனிச்சங் ரூப’’ந்தி எத்த² ‘‘அனிச்சமேவ ரூபங், ந நிச்ச’’ந்தி படியோகி³வினிவத்தனமேவ ஏவ-காரேன கரீயதி, ந தஸ்ஸ து³க்கா²னத்ததாத³யோ நிவாரிதா ஹொந்தி, ஏவங் ‘‘பஹாதப்³ப³மேவா’’தி எத்த² ஏவ-ஸத்³தே³ன படியோகி³பூ⁴தங் அப்பஹாதப்³ப³மேவ நிவத்தீயதி, ந ததோ அஞ்ஞவிஸேஸாதி த³ஸ்ஸெந்தோ ஆஹ ‘‘ஏதேன பஹாதப்³ப³மேவா’’திஆதி³. பா⁴வேதப்³ப³பா⁴வோ ஏவ தஸ்ஸ அஞ்ஞிந்த்³ரியஸ்ஸ
எத்தா²தி ஏதஸ்மிங் பரிஞ்ஞாவாரே. ச² புக்³க³லாதி புது²ஜ்ஜனேன ஸத்³தி⁴ங் யாவ அனாகா³மிமக்³க³ட்டா² ச² புக்³க³லா. அபி⁴ந்தி³த்வா க³ஹிதோ தத்த² ப⁴ப்³பா³ப⁴ப்³பா³னங் கிச்சவிஸேஸஸ்ஸ அக்³க³ஹிதத்தா. யத்த² பன ஸதி புது²ஜ்ஜனக்³க³ஹணஸாமஞ்ஞே ப⁴ப்³பா³னங் கிச்சங் க³ஹிதங், யத்த² ச அப⁴ப்³பா³னங், தத்த² தே ஏவ பி⁴ந்தி³த்வா வுத்தா ஹொந்தீதி த³ஸ்ஸெந்தோ ‘‘யே ச புது²ஜ்ஜனா மக்³க³ங் படிலபி⁴ஸ்ஸந்தி, யே ச புது²ஜ்ஜனா மக்³க³ங் ந படிலபி⁴ஸ்ஸந்தீ’’தி ச ஆதி³மாஹ. அரஹாதி அரியோ, அயமேவ வா பாடோ². பட²மமக்³க³ப²லஸமங்கீ³தி புரிமமக்³க³ப²லஸமங்கீ³. இதரோதி அரஹா. ஏவங் புக்³க³லபே⁴த³ங் ஞத்வாதி இத⁴ புது²ஜ்ஜனோ ஸோ ச அப⁴ப்³போ³தி க³ஹிதோ, இத⁴ ப⁴ப்³போ³ இத⁴ அரியா, யே ச பட²மமக்³க³ப²லஸமங்கி³னோ யாவ அக்³க³மக்³க³ப²லஸமங்கி³னோதி ஏவங் யதா²வுத்தங் புக்³க³லவிபா⁴க³ங் ஞத்வா. தத்த² தத்தா²தி தேஸங் த்³வே புது²ஜ்ஜனா அட்ட² அரியாதி இமேஸங் யதா²வுத்தபுக்³க³லானங் பே⁴த³தோ அபே⁴த³தோ ச க³ஹணவஸேன ஆக³தே தஸ்மிங் தஸ்மிங் பாட²பதே³ஸே. ஸன்னிட்டா²னேனாதி ஸன்னிட்டா²னபத³வஸேன, நிச்ச²யவஸேனேவ வா. நித்³தா⁴ரெத்வாதி விஸ்ஸஜ்ஜனங் யோஜேதப்³ப³ந்தி விஸ்ஸஜ்ஜனவஸேன பவத்தபாளியா யதா²வுத்தஅத்த²த³ஸ்ஸனேன ஸம்ப³ந்த⁴தோ விபா⁴வேதப்³போ³தி.
பரிஞ்ஞாவாரவண்ணனா நிட்டி²தா.
இந்த்³ரியயமகவண்ணனா நிட்டி²தா.
யமகபகரண-அனுடீகா ஸமத்தா.
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ