பட்டா²னபகரண-அனுடீகா
க³ந்தா²ரம்ப⁴வண்ணனா
காமகு³ணாதீ³ஹீதி லளந்தீதி லளிதானுப⁴வனவஸேன ரமந்தி. தேஸூதி காமகு³ணாதீ³ஸு. விஹரந்தீதி இரியாபத²பரிவத்தனாதி³னா வத்தந்தி. பச்சத்தி²கேதி பா³ஹிரப்³ப⁴ந்தரபே⁴தே³ அமித்தே. இஸ்ஸரியங் தத்த² தத்த² ஆதி⁴பதெய்யங். டா²னங் ஸெட்டி²ஸேனாபதியுவராஜாதி³ட்டா²னந்தரங். ஆதி³-ஸத்³தே³ன பரிவாரபரிச்சே²தா³தி³ ஸங்க³ய்ஹதி. புஞ்ஞயோகா³னுபா⁴வப்பத்தாயாதி தா³னமயாதி³புஞ்ஞானுபா⁴வாதி⁴க³தாய ஸமத²விபஸ்ஸனாபா⁴வனாஸங்கா²தயோகா³னுபா⁴வாதி⁴க³தாய ச. ஜுதியாதி ஸரீரப்பபா⁴ய சேவ ஞாணப்பபா⁴ய ச. எத்த² ச தே³வ-ஸத்³தோ³ யதா² கீளாவிஜிகி³ஸாவோஹாரஜுதிக³திஅத்தோ², ஏவங் ஸத்திஅபி⁴த்த²வகமனத்தோ²பி ஹோதி தா⁴துஸத்³தா³னங் அனேகத்த²பா⁴வதோதி ‘‘யதி³ச்சி²தனிப்பா²த³னே ஸக்கொந்தீதி வா’’திஆதி³ வுத்தங்.
இத்³தி⁴விதா⁴தி³தாமத்தேன ப⁴க³வதோ அபி⁴ஞ்ஞாதீ³னங் ஸாவகேஹி ஸாதா⁴ரணதாவசனங், ஸபா⁴வதோ பன ஸப்³பே³பி ‘‘நிரதிஸயாய அபி⁴ஞ்ஞாகீளாய, உத்தமேஹி தி³ப்³ப³ப்³ரஹ்மஅரியவிஹாரேஹீ’’தி ஆஹ. சித்திஸ்ஸரியஸத்தத⁴னாதீ³னங் தா³னஸங்கா²தேன ஸம்மாபடிபத்திஅவேச்சப்பஸாத³ஸக்காரானங் க³ஹணஸங்கா²தேனாதி யோஜனா. க³ஹணஞ்செத்த² தேஸு உபலப்³ப⁴மானஸம்மாபடிபத்திஅவேச்சப்பஸாதா³னங் தேஹி உபனீயமானஸக்காரஸ்ஸ ச அபி⁴னந்த³னங் அனுமோத³னங் ஸம்படிச்ச²னஞ்ச வேதி³தப்³ப³ங். த⁴ம்மஸபா⁴வானுரூபானுஸாஸனீவசனேனேவ ச பன ஸிக்கா²பத³பஞ்ஞத்திபி ஸங்க³ஹிதாதி த³ட்ட²ப்³பா³ வீதிக்கமத⁴ம்மானுரூபா அனுஸாஸனீதி கத்வா. ஞாணக³தி ஞாணேன க³ந்தப்³ப³ஸ்ஸ ஞெய்யஸ்ஸ அவபோ³தோ⁴. ஸமன்னாக³தத்தாதி இத³ங் ‘‘அபி⁴ஞ்ஞாகீளாயா’’திஆதீ³ஸு பச்சேகங் யோஜேதப்³ப³ங், ததா² ஸதே³வகேன லோகேனாதி இத³ங் ‘‘க³மனீயதோ’’திஆதீ³ஸு. தே தே³வேதி ஸம்முதிதே³வாதி³கே தே³வே. தேஹி கு³ணேஹீதி அபி⁴ஞ்ஞாதி³கு³ணேஹி. பூஜனீயதரோ தே³வோதி அதிரேகதரோதி அதி⁴கதரோ. உபபத்திதே³வானந்தி இத³ங் தப்³ப³ஹுலதாய வுத்தங். விஸுத்³தி⁴தே³வாபி ஹி தத்த² விஜ்ஜந்தேவ, தேஸுபி வா லப்³ப⁴மானங் உபபத்திதே³வபா⁴வமத்தமேவ க³ஹெத்வா ததா² வுத்தங். படிபக்கா²னங் து³ஸ்ஸீல்யமுட்ட²ஸ்ஸச்சவிக்கே²பானங், ஸீலவிபத்திஅபி⁴ஜ்ஜா²தோ³மனஸ்ஸஅவஸிட்ட²னீவரணானங் வா.
இஸீனங் ஸத்தமோ, இஸீஸு ஸத்தமோதி து³வித⁴ம்பி அத்த²ங் யோஜெத்வா த³ஸ்ஸெந்தோ ‘‘சதுஸச்சாவபோ³த⁴க³தியா…பே॰… வுத்தோ’’தி ஆஹ. ஸபரஸந்தானேஸு ஸீலாதி³கு³ணானங் ஏஸனட்டே²ன வா இஸயோ, பு³த்³தா⁴த³யோ அரியா. இஸி ச ஸோ ஸத்தமோ சாதி இஸிஸத்தமோதி ஏவமெத்த² அத்தோ² த³ட்ட²ப்³போ³. ‘‘நாமரூபனிரோத⁴’’ந்தி எத்த² யங் நாமரூபங் நிரோதே⁴தப்³ப³ங், தங் த³ஸ்ஸெந்தோ ‘‘யதோ விஞ்ஞாணங் பச்சுதா³வத்ததீ’’தி ஆஹ. வட்டபரியாபன்னஞ்ஹி நாமரூபங் நிரோதே⁴தப்³ப³ங். தஸ்மிஞ்ஹி நிரோதி⁴தே ஸப்³ப³ஸோ நாமரூபங் நிரோதி⁴தமேவ ஹோதி. யதா²ஹ ‘‘ஸோதாபத்திமக்³க³ஞாணேன அபி⁴ஸங்கா²ரவிஞ்ஞாணஸ்ஸ நிரோதே⁴ன ஸத்த ப⁴வே ட²பெத்வா அனமதக்³கே³ ஸங்ஸாரே யே உப்பஜ்ஜெய்யுங் நாமஞ்ச ரூபஞ்ச, எத்தே²தே நிருஜ்ஜ²ந்தி…பே॰… அரஹதோ அனுபாதி³ஸேஸாய நிப்³பா³னதா⁴துயா பரினிப்³பா³யந்தஸ்ஸ சரிமவிஞ்ஞாணஸ்ஸ நிரோதே⁴ன பஞ்ஞா ச ஸதி ச நாமஞ்ச ரூபஞ்ச, எத்தே²தே நிருஜ்ஜ²ந்தி வூபஸமந்தி அத்த²ங் க³ச்ச²ந்தி படிப்பஸ்ஸம்ப⁴ந்தீ’’தி (சூளனி॰ அஜிதமாணவபுச்சா²னித்³தே³ஸ 6). அதிக³ம்பீ⁴ரனயமண்டி³ததே³ஸனங் ஸாதிஸயங் பச்சயாகாரஸ்ஸ விபா⁴வனதோ. ஸபா⁴வதோ ச பச்சயாகாரோ க³ம்பீ⁴ரோ. யதா²ஹ ‘‘அதி⁴க³தோ கோ² ம்யாயங் த⁴ம்மோ க³ம்பீ⁴ரோ’’திஆதி³ (தீ³॰ நி॰ 2.67; ம॰ நி॰ 1.281; 2.337; ஸங்॰ நி॰ 1.172; மஹாவ॰ 7, 8), ‘‘க³ம்பீ⁴ரோ சாயங், ஆனந்த³
க³ந்தா²ரம்ப⁴வண்ணனா நிட்டி²தா.
பச்சயுத்³தே³ஸவண்ணனா
ஸமானநேதி ஸமானநயனே, ஸமாஹரணே, ஸமானகரணே வா அட்ட²கதா²தி⁴ப்பாயங். தத்த² ‘‘த்³வே அனுலோமானி த⁴ம்மானுலோமஞ்ச பச்சயானுலோமஞ்சா’’திஆதி³னா பரதோ வண்ணயிஸ்ஸந்தி.
பட்டா²னநாமத்தோ²தி ‘‘திகபட்டா²னாதீ³னங் திகபட்டா²னாதி³னாமத்தோ²’’தி வுத்தங். அத² வா அவயவானமேவ பட்டா²னநாமத்தோ² நித்³தா⁴ரேதப்³போ³ தங்ஸமுதா³யமத்தத்தா பகரணஸ்ஸ. ந ஹி ஸமுதா³யோ நாம கோசி அத்தோ² அத்தீ²தி த³ஸ்ஸேதுங் ‘‘பட்டா²னங்…பே॰… நாமத்தோ²’’தி வுத்தங். தேனேவாஹ ‘‘இமஸ்ஸ பகரணஸ்ஸ…பே॰… ஸமோதா⁴னதா செத்த² வத்தப்³பா³’’தி. வசனஸமுதா³யத்த²விஜானநேன விதி³தபட்டா²னஸாமஞ்ஞத்த²ஸ்ஸ வித்தா²ரதோ பட்டா²னகதா² வுச்சமானா ஸுக²க்³க³ஹணா ஹோதீதி த³ஸ்ஸெந்தோ ஆஹ ‘‘ஏவஞ்ஹி…பே॰… ஹோதீ’’தி. தத்தா²தி தாஸு நாமத்த²யதா²வுத்தஸமோதா⁴னதாஸு. ஸப்³ப³ஸாதா⁴ரணஸ்ஸாதி ஸப்³பே³ஸங் அவயவபூ⁴தானங் திகபட்டா²னாதீ³னங் ஸமுதா³யஸ்ஸ ச ஸாதா⁴ரணஸ்ஸ. அத்த²தோ ஆபன்னங் நானாவித⁴பா⁴வந்தி பகாரக்³க³ஹணேனேவ பகாரானங் அனேகவித⁴தா ச க³ஹிதாவ ஹொந்தீதி வுத்தங். பகாரேஹி டா²னந்தி ஹி பட்டா²னங், நானாவிதோ⁴ பச்சயோ, தங் எத்த² விப⁴ஜனவஸேன அத்தீ²தி பட்டா²னங், பகரணங், தத³வயவோ ச. ஏதஸ்மிஞ்ச அத்த²னயே ஸத்³த³தோபி நானாவித⁴பா⁴வஸித்³தி⁴ த³ஸ்ஸிதாதி வேதி³தப்³பா³. தத்த² நானப்பகாரா பச்சயதா, நானப்பகாரானங் பச்சயதா ச நானப்பகாரபச்சயதாதி உப⁴யம்பி ஸாமஞ்ஞனித்³தே³ஸேன ஏகஸேஸனயேன வா ஏகஜ்ஜ²ங் க³ஹிதந்தி த³ஸ்ஸெந்தோ ‘‘ஏகஸ்ஸபி…பே॰… வேதி³தப்³பா³’’தி ஆஹ. அனேகத⁴ம்மபா⁴வதோதி அனேகே த⁴ம்மா ஏதஸ்ஸாதி அனேகத⁴ம்மோ, தப்³பா⁴வதோதி யோஜேதப்³ப³ங். நானப்பகாரபச்சயதாதி
காமங் த⁴ம்மஸங்க³ஹாதீ³ஸுபி அத்தே²வ பச்சயத⁴ம்மவிபா⁴கோ³, ஸோ பன தத்த² பச்சயபா⁴வோ ந ததா² தப்பரபா⁴வேன விப⁴த்தோ யதா² பட்டா²னேதி த³ஸ்ஸெந்தோ ‘‘ஏதேன…பே॰… த³ஸ்ஸேதீ’’தி ஆஹ. ஸாதிஸயவிபா⁴க³தங் இமஸ்ஸ பகரணஸ்ஸ ததா² தத³வயவானங்.
ஸப்³ப³ஞ்ஞுதஞ்ஞாணஸ்ஸ யதா²வுத்தக³மனங் யத³தி⁴கரணங், தங் த³ஸ்ஸேதுங் ‘‘எத்தா²தி வசனஸேஸோ’’தி. க³மனதே³ஸபா⁴வதோதி பவத்திட்டா²னபா⁴வதோ. அஞ்ஞேஹி க³திமந்தேஹீதி தீஸு காலேஸு அப்படிஹதஞாணாதீ³ஹி. தஸ்ஸ ஸப்³ப³ஞ்ஞுதஞ்ஞாணஸ்ஸ.
திவிதே⁴ன ‘‘திகானந்தி திகவஸேன வுத்தத⁴ம்மான’’ந்தி. தீணி பரிமாணானி ஏதேஸந்தி ஹி திகா. ஸமந்தாதி ஸமந்ததோ ஸப்³ப³பா⁴க³தோதி வுத்தங் ஹோதீதி ஆஹ ‘‘அனுலோமாதீ³ஹி ஸப்³ப³ப்பகாரேஹிபீ’’தி. க³தானீதி பவத்தானி. ஸமந்தசதுவீஸதிபட்டா²னானீதி ஸமந்ததோ அனுலோமாதி³ஸப்³ப³பா⁴க³தோ ஸமோதா⁴னவஸேன சதுவீஸதி பட்டா²னானி. அனுலோமாதி³ஸப்³ப³கொட்டா²ஸதோதி அனுலோமாதி³சதுகொட்டா²ஸதோ. திகாதி³ச²ச²பா⁴வந்தி திகாதி³து³கது³கபரியோஸானேஹி ச²ச²பா⁴வங். தேனாதி யதா²வுத்தத³ஸ்ஸனேன. த⁴ம்மானுலோமாதி³ஸப்³ப³கொட்டா²ஸதோதி பச்சனீகாதி³து³காதி³ஸஹஜாதவாராதி³பச்சயபச்சனீயாதி³ஆரம்மணமூலாதீ³னங் க³ஹணங் த³ட்ட²ப்³ப³ங். யதா²வுத்ததோ அஞ்ஞஸ்ஸ பகாரஸ்ஸ அஸம்ப⁴வதோ ‘‘அனூனேஹி நயேஹி பவத்தானீதி வுத்தங் ஹோதீ’’தி ஆஹ. தானி பன யதா²வுத்தானி ஸமந்தபட்டா²னானி. அயஞ்ச அத்த²வண்ணனா அட்ட²கதா²வசனேன அஞ்ஞத³த்து² ஸங்ஸந்த³தீதி த³ஸ்ஸெந்தோ ஆஹ ‘‘தேனேவாஹ…பே॰… வஸேனா’’தி.
ஹேதுனோதி ஹேதுஸபா⁴வஸ்ஸ த⁴ம்மஸ்ஸ. ஸதிபி ஹேதுஸபா⁴வஸ்ஸ ஆரம்மணபச்சயாதி³பா⁴வே ஸவிஸேஸே தாவ பச்சயே த³ஸ்ஸெந்தேன ‘‘அதி⁴பதிபச்சயாதி³பூ⁴தஸ்ஸ சா’’தி வுத்தங். ‘‘ஹேது ஹுத்வா பச்சயோ’’தி வுத்தே த⁴ம்மஸ்ஸ ஹேதுஸபா⁴வதா நித்³தா⁴ரிதா, ந பச்சயவிஸேஸோதி தஸ்ஸ அதி⁴பதிபச்சயாதி³பா⁴வோ ந நிவாரிதோதி ஆஹ ‘‘ஏதேனபி ஸோ ஏவ தோ³ஸோ ஆபஜ்ஜதீ’’தி. தேனாதி ஹேதுபா⁴வக்³க³ஹணேன. இதா⁴தி ‘‘ஹேதுபச்சயோ’’தி எத்த². த⁴ம்மக்³க³ஹணந்தி அலோபா⁴தி³த⁴ம்மக்³க³ஹணங். ஸத்திவிஸேஸோ அத்தனோ ப³லங் ஸத்திகாரணபா⁴வோ, யோ ரஸோதிபி வுச்சதி, ஸ்வாயங் அனஞ்ஞஸாதா⁴ரணதாய த⁴ம்மதோ அனஞ்ஞோபி பச்சயந்தரஸமவாயேயேவ தஸ்ஸாதி ஹேதுபா⁴வஸங்கா²தஸ்ஸ ஸாமத்தி²யஸ்ஸ. ஹேது ஹுத்வாதி எத்தா²பி ஹேதுபா⁴வவாசகோ ஹேதுஸத்³தோ³, ந ஹேதுஸபா⁴வத⁴ம்மவாசகோதி ஆஹ ‘‘ஹேது ஹுத்வா பச்சயோதி ச வுத்த’’ந்தி.
ஏவஞ்ச கத்வாதிஆதி³னா யதா²வுத்தமத்த²ங் பாளியா ஸமத்தே²தி. யதி³ ஏவங் அட்ட²கதா²யங் த⁴ம்மஸ்ஸேவ பச்சயதாவசனங் கத²ந்தி ஆஹ ‘‘அட்ட²கதா²யங் பனா’’திஆதி³ ‘‘இதா⁴பி வா…பே॰… த³ஸ்ஸேதீ’’தி. த⁴ம்மஸத்திவிபா⁴வனங் பனெத்த² ந ஸக்கா படிக்கி²பிதுந்தி த³ஸ்ஸெந்தோ ‘‘ந ஹீ’’திஆதி³மாஹ. அத்தோ² ஏதஸ்ஸ அத்தீ²தி அத்தோ², அத்தா²பி⁴தா⁴யிவசனந்தி வுத்தங் ‘‘ஏதீதி ஏதஸ்ஸ அத்தோ² வத்ததீ’’தி, தஸ்மா அத்தோ²தி அத்த²வசனந்தி வுத்தங் ஹோதி. தேனாஹ ‘‘தஞ்ச உப்பத்திட்டி²தீனங் ஸாதா⁴ரணவசன’’ந்தி. தஞ்சாதி ஹி ‘‘வத்ததீ’’தி வசனங் பச்சாமட்ட²ங். அத² வா ஏதீதி ஏதஸ்ஸ அத்தோ²தி ‘‘ஏதீ’’தி ஏதஸ்ஸ பத³ஸ்ஸ அத்தோ² ‘‘வத்ததீ’’தி எத்த² வத்தனகிரியா. தஞ்சாதி தஞ்ச வத்தனங். ஏதஸ்மிங் பனத்தே² ஸாதா⁴ரணவசனந்தி எத்த² வசன-ஸத்³தோ³ அத்த²பரியாயோ வேதி³தப்³போ³ ‘‘வுச்சதீ’’தி கத்வா. யத³க்³கே³ன உப்பத்தியா பச்சயோ, தத³க்³கே³ன டி²தியாபி பச்சயோதி கோசி ஆஸங்கெய்யாதி ததா³ஸங்கானிவத்தனத்த²ங் வுத்தங் ‘‘கோசி ஹி…பே॰… ஹேதுஆத³யோ’’தி. எத்த² ச யதா² உப்பஜ்ஜனாரஹானங் உப்பத்தியா பச்சயே ஸதியேவ உப்பாதோ³, நாஸதி, ஏவங் திட்ட²ந்தானம்பி டி²திபச்சயவஸேனேவ டா²னங் யதா² ஜீவிதிந்த்³ரியவஸேன ஸஹஜாதத⁴ம்மானந்தி த³ட்ட²ப்³ப³ங். யே பன அரூபத⁴ம்மானங் டி²திங் படிக்கி²பந்தி, யங் வத்தப்³ப³ங், தங் ஹெட்டா² வுத்தமேவ.
யதா² அதி⁴கரணஸாத⁴னோ பதிட்ட²த்தோ² ஹேது-ஸத்³தோ³, ஏவங் கரணஸாத⁴னோ பவத்திஅத்தோ²பி யுஜ்ஜதீதி த³ஸ்ஸெந்தோ ‘‘ஹினோதீ’’திஆதி³மாஹ. ‘‘லோபோ⁴ நிதா³னங் கம்மானங் ஸமுத³யாயா’’திஆதி³வசனதோ ஹேதூனங் கம்மனிதா³னபா⁴வோ வேதி³தப்³போ³.
ஏதேனாதி ஹேதுபச்சயதோ அஞ்ஞேனேவ குஸலபா⁴வஸித்³தி⁴வசனேன. ஏகே ஆசரியா. ஸபா⁴வதோவாதி ஏதேன யதா² அஞ்ஞேஸங் ரூபக³தங் ஓபா⁴ஸெந்தஸ்ஸ பதீ³பஸ்ஸ ரூபக³தோபா⁴ஸகேன அஞ்ஞேன பயோஜனங் நத்தி² ஸயங் ஓபா⁴ஸனஸபா⁴வத்தா, ஏவங் அஞ்ஞேஸங் குஸலாதி³பா⁴வஸாத⁴கானங் ஹேதூனங் அஞ்ஞேன குஸலாதி³பா⁴வஸாத⁴கேன ‘‘யஸ்மா பனா’’திஆதி³னா. ஸா பன அஞ்ஞபடிப³த்³தா⁴ குஸலாதி³தா.
ந கோசி த⁴ம்மோ ந ஹோதீதி ரூபாதி³பே⁴தே³ன ச²ப்³பி³தே⁴ஸு ஸங்க²தாஸங்க²தபஞ்ஞத்தித⁴ம்மேஸு கோசிபி த⁴ம்மோ ஆரம்மணபச்சயோ ந ந ஹோதி, ஸ்வாயங் ஆரம்மணபச்சயபா⁴வோ ஹெட்டா² தா⁴துவிப⁴ங்க³வண்ணனாயங் வுத்தோயேவ.
புரிமாபி⁴ஸங்கா²ரூபனிஸ்ஸயந்தி ‘‘ச²ந்த³வதோ’’திஆதி³னா வுத்தாகாரேன புரிமஸித்³த⁴ங் சித்தாபி⁴ஸங்கா²ரகஸங்கா²தங் உபனிஸ்ஸயங். சித்தேதி சித்தஸீஸேனாயங் நித்³தே³ஸோ த³ட்ட²ப்³போ³. ந ஹி சித்தமேவ ததா²பி⁴ஸங்க²ரீயதி, அத² கோ² தங்ஸம்பயுத்தத⁴ம்மாபி. ஸாத⁴யமானாதி வஸே வத்தயமானா. வஸவத்தனஞ்செத்த² ததா³காரானுவிதா⁴னங். ச²ந்தா³தீ³ஸு ஹி ஹீனேஸு மஜ்ஜி²மேஸு பணீதேஸு தங்தங்ஸம்பயுத்தாபி ததா² ததா² பவத்தந்தி. தேனாஹ ‘‘ஹீனாதி³பா⁴வேன தத³னுவத்தனதோ’’தி. தேனாதி அத்தனோ வஸே வத்தாபனேன, தேஸங் வா வஸே வத்தனேன. தேஹி ச²ந்தா³த³யோ. அதி⁴பதிபச்சயா ஹொந்தி அத்தாதீ⁴னானங் பதிபா⁴வேன பவத்தனதோ. க³ருகாதப்³ப³ங் ஆரம்மணங் மஹக்³க³தத⁴ம்மலோப⁴னீயத⁴ம்மாதி³.
தத³னந்தருப்பாத³னியமோதி தஸ்ஸ தஸ்ஸேவ சித்தஸ்ஸ அனந்தரங் உப்பஜ்ஜமானதங். தங்தங்ஸஹகாரீபச்சயவிஸிட்ட²ஸ்ஸாதி தேன தேன ஆரம்மணாதி³னா ஸஹகாரீகாரணேன தது³ப்பாத³னஸமத்த²தாஸங்கா²தங் விஸேஸங் பத்தஸ்ஸ. தாயயேவாதி யா வேகா²தா³னே புப்ப²னஸமத்த²தா வேகா²பக³மே லத்³தோ⁴காஸா, தாயமேவ.
உபஸக்³க³வஸேனபி அத்த²விஸேஸோ ஹோதீதி வுத்தங் ‘‘ஸத்³த³த்த²மத்ததோ நானாகரண’’ந்தி. வசனீயத்த²தோதி பா⁴வத்த²தோ. பா⁴வத்தோ²பி ஹி வசனக்³க³ஹணானுஸாரேன விஞ்ஞெய்யத்தா ‘‘வசனீயோ’’தி வுச்சதி. நிரோது⁴ப்பாத³ந்தராபா⁴வதோதி புரிமனிரோத⁴ஸ்ஸ பச்சி²முப்பாத³ஸ்ஸ ச ப்³யவதா⁴யகாபா⁴வதோ. நிரந்தருப்பாத³னஸமத்த²தாதி ஏதேன நிரோதா⁴னங் நிரோத⁴ஸமகாலுப்பாத³வாத³ங் நிவாரேதி. ஸதி ஹி ஸமகாலத்தே ப்³யவதா⁴னாஸங்கா ஏவ ந ஸியா ஸண்டா²னாபா⁴வதோ. இத³மிதோ ஹெட்டா² உத்³த⁴ங் திரியந்தி விபா⁴கா³பா⁴வா அத்தனா ஏகத்தமிவ உபனெத்வாதி யோஜனா. ஸண்டா²னாபா⁴வேன ஹி அப்படிக⁴பா⁴வூபலக்க²ணேன
விபா⁴க³தோ ஆகாரோ, த⁴ம்மானங் பவத்திபே⁴தோ³. நேவஸஞ்ஞானாஸஞ்ஞாயதனப²லஸமாபத்தீனங் நிரோது⁴ப்பாதா³னந்தரதாயாதி யோஜனா. புரிமசுதீதி அஸஞ்ஞஸத்துப்பத்திதோ புரிமசுதி. யதி³ காலந்தரதா நத்தி², கத²மித³ங் ‘‘ஸத்தாஹங் நிரோத⁴ங் ஸமாபஜ்ஜித்வா பஞ்ச கப்பஸதானி அதிக்கமித்வா’’தி வசனந்தி ஆஹ ‘‘ந ஹி தேஸங்…பே॰… வுச்செய்யா’’தி. நனு தேஸங் அந்தரா ரூபஸந்தானோ பவத்ததேவாதி அனுயோக³ங் ஸந்தா⁴யாஹ ‘‘ந ச…பே॰… அஞ்ஞஸந்தானத்தா’’தி. யதி³ ஏவங் தேஸங் அஞ்ஞபி⁴ன்னஸந்தானங் விய அஞ்ஞமஞ்ஞூபகாரேனபி ப⁴விதப்³ப³ந்தி சோத³னாய வுத்தங் ‘‘ரூபாரூப…பே॰… ஹொந்தீ’’தி. தேனேதங் த³ஸ்ஸேதி – யதி³பி ரூபாரூபத⁴ம்மா ஏகஸ்மிங் புக்³க³லே வத்தமானா விஸேஸதோ அஞ்ஞமஞ்ஞூபகாரகபா⁴வேன வத்தந்தி, அஞ்ஞமஞ்ஞங் பன விஸதி³ஸஸபா⁴வதாய விஸுங்யேவ ஸந்தானபா⁴வேன பவத்தனதோ ப்³யவதா⁴யகா ந ஹொந்தி ஸந்ததிவஸேன மிது² அபரியாபன்னத்தா, யதோ ‘‘அஞ்ஞமஞ்ஞங் விப்பயுத்தா, விஸங்ஸட்டா²’’தி ச வுத்தந்தி. உபகாரகோ ச நாம அச்சந்தங் பி⁴ன்னஸந்தானானம்பி ஹோதியேவாதி ந தாவதா ஸந்தானாபே⁴தோ³தி பி⁴ய்யோபி நேஸங் ப்³யவதா⁴யகதாபா⁴வோ வேதி³தப்³போ³. யதா² ஸமானஜாதிகானங் சித்துப்பாதா³னங் நிரந்தரதா ஸுட்டு² அனந்தரபா⁴வேன பாகடா, ந ததா² அஸமானஜாதிகானந்தி அதி⁴ப்பாயேன ‘‘ஜவனானந்தரஸ்ஸ ஜவனஸ்ஸ விய ப⁴வங்கா³னந்தரஸ்ஸ ப⁴வங்க³ஸ்ஸ வியா’’தி வுத்தங்.
பச்சயபா⁴வோ செத்தா²தி எத்த² ச-ஸத்³தோ³ ப்³யதிரேகோ. ஸோ யேன விஸேஸேனெத்த² உப்பாத³க்க²ணங், தங் விஸேஸங் ஜோதேதி. அனந்தரபச்சயாதீ³னந்தி ஆதி³-ஸத்³தே³ன ஸமனந்தரபச்சயங் ஸங்க³ண்ஹாதி. புரேபச்சா²பா⁴வா, தது³பாதி³கா வா உப்பாத³னிரோதா⁴ புப்³ப³ந்தாபரந்தபரிச்சே²தோ³, தேன க³ஹிதானங் க²ணத்தயபரியாபன்னானந்தி அத்தோ². தேனாஹ ‘‘உப்பஜ்ஜதீதி வசனங் அலப⁴ந்தான’’ந்தி. உப்பாத³க்க²ணஸமங்கீ³ ஹி ‘‘உப்பஜ்ஜதீ’’தி வுச்சதி. ததா² ஹி வுத்தங் ‘‘உப்பாத³க்க²ணே உப்பஜ்ஜமானங், நோ ச உப்பன்னங், ப⁴ங்க³க்க²ணே உப்பன்னங் நோ ச உப்பஜ்ஜமான’’ந்தி (யம॰ 2.சித்தயமக.81). ஸோதி அனந்தராதி³பச்சயபா⁴வோ. அபரிச்சே²த³ந்தி காலவஸேன பரிச்சே²த³ரஹிதங். யதோதி புப்³ப³ந்தாபரந்தவஸேன பரிச்சே²தா³பா⁴வதோ. தேனேவாதி காலவஸேன பரிச்சி²ஜ்ஜ ஏவ த⁴ம்மானங் க³ஹணதோ.
உப்பத்தியா பச்சயபா⁴வேன பாகடேனாதி இத³ங் தஸ்ஸ நித³ஸ்ஸனபா⁴வனித³ஸ்ஸனங். ஸித்³த⁴ஞ்ஹி நித³ஸ்ஸனங். பச்சயுப்பன்னானந்தி பச்சயனிப்³ப³த்தானங், அத்தனோ ப²லபூ⁴தானந்தி ஸஹஜாதபா⁴வேனாதி ஸஹ உப்பன்னபா⁴வேன. அத்தனா ஸஹுப்பன்னத⁴ம்மானஞ்ஹி ஸஹுப்பன்னபா⁴வேன உபகாரகதா ஸஹஜாதபச்சயதா. தேன டி²திக்க²ணேபி நேஸங் உபகாரகதா வேதி³தப்³பா³. ஏவஞ்ஹி ‘‘பகாஸஸ்ஸ பதீ³போ வியா’’தி நித³ஸ்ஸனம்பி ஸுட்டு² யுஜ்ஜதி. பதீ³போ ஹி பகாஸஸ்ஸ டி²தியாபி பச்சயோதி.
அஞ்ஞமஞ்ஞதாவஸேனேவாதி இமினா ஸஹஜாதாதி³பா⁴வேன அத்தனோ உபகாரகஸ்ஸ உபகாரகதாமத்தங் ந அஞ்ஞமஞ்ஞபச்சயதா, அத² கோ² அஞ்ஞமஞ்ஞபச்சயபா⁴வவஸேனாதி லக்க²ணஸங்கராபா⁴வங் த³ஸ்ஸேதி, ந ஸஹஜாதாதி³பச்சயேஹி வினா அஞ்ஞமஞ்ஞபச்சயஸ்ஸ பவத்தி. தேனேவாஹ ‘‘ந ஸஹஜாததாதி³வஸேனா’’தி. யதி³பி அஞ்ஞமஞ்ஞபச்சயோ ஸஹஜாதாதி³பச்சயேஹி வினா ந ஹோதி, ஸஹஜாதாதி³பச்சயா பன தேன வினாபி ஹொந்தீதி ஸஹஜாததாதி³விது⁴ரேனேவ பகாரேன அஞ்ஞமஞ்ஞபச்சயஸ்ஸ பவத்தீதி த³ஸ்ஸெந்தோ ‘‘ஸஹஜாதாதி³…பே॰… ந ஹோதீ’’தி வத்வா தமேவத்த²ங் பாகடதரங் காதுங் ‘‘ந ச புரேஜாத…பே॰… ஹொந்தீ’’தி ஆஹ. ஸஹஜாததாதீ³தி ச ஆதி³-ஸத்³தே³ன நிஸ்ஸயஅத்தி²அவிக³தாதீ³னங் க³ஹணங் வேதி³தப்³ப³ங்.
பத²வீதா⁴துயங் பதிட்டா²ய ஏவ ஸேஸதா⁴துயோ உபாதா³ரூபானி விய யதா²ஸககிச்சங் கரொந்தீதி வுத்தங் ‘‘அதி⁴ட்டா²னாகாரேன பத²வீதா⁴து ஸேஸதா⁴தூன’’ந்தி. எத்த² அதி⁴ட்டா²னாகாரேனாதி ஆதா⁴ராகாரேன. ஆதா⁴ராகாரோ செத்த² நேஸங் ஸாதிஸயங் தத³தீ⁴னவுத்திதாய வேதி³தப்³போ³, யதோ பூ⁴தானி அனித்³தி³ஸிதப்³ப³ட்டா²னானி வுச்சந்தி. ஏவஞ்ச கத்வா சக்கா²தீ³னம்பி அதி⁴ட்டா²னாகாரேன உபகாரகதா ஸுட்டு² யுஜ்ஜதி. ந ஹி யதா²வுத்தங் தத³தீ⁴னவுத்தியா விஸேஸங் முஞ்சித்வா அஞ்ஞோ சக்கா²தீ³ஸு அதே³ஸகானங் அரூபத⁴ம்மானங் அதி⁴ட்டா²னாகாரோ ஸம்ப⁴வதி. யதி³பி யங் யங் த⁴ம்மங் படிச்ச யே யே த⁴ம்மா பவத்தந்தி, தேஸங் ஸப்³பே³ஸங் தத³தீ⁴னவுத்திபா⁴வோ, யேன பன பச்சயபா⁴வவிஸேஸேன சக்கா²தீ³னங் படுமந்த³பா⁴வேஸு சக்கு²விஞ்ஞாணாத³யோ தத³னுவிதா⁴னாகாரேனேவ பவத்தந்தி, ஸ்வாயமித³ங் தேஸங் தத³தீ⁴னவுத்தியா ஸித்³தோ⁴ விஸேஸோதி வுத்தோ. ஏவஞ்ஹி பச்சயபா⁴வஸாமஞ்ஞே ஸதிபி ஆரம்மணபச்சயதோ நிஸ்ஸயபச்சயஸ்ஸ விஸேஸோ ஸித்³தோ⁴தி வேதி³தப்³போ³. ஸ்வாயங் தா⁴துவிப⁴ங்கே³ விபா⁴விதோயேவ. க²ந்தா⁴த³யோ தங்தங்னிஸ்ஸயானங் க²ந்தா⁴தீ³னந்தி ‘‘உபகாரகா’’தி ஆனெத்வா ஸம்ப³ந்தி⁴தப்³ப³ங்.
யங் கிஞ்சி காரணங் நிஸ்ஸயோதி வத³தி, ந வுத்தலக்க²ணூபபன்னமேவ. ஏதேன பச்சயட்டோ² இத⁴ நிஸ்ஸயட்டோ²தி த³ஸ்ஸேதி. தத்தா²தி நித்³தா⁴ரணே பு⁴ம்மங். தேன வுத்தங் ‘‘நித்³தா⁴ரேதீ’’தி.
ஸுட்டு²கததங் தீ³பேதி, கஸ்ஸ? ‘‘அத்தனோ’’தி வுத்தஸ்ஸ பகதஸத்³தே³ன விஸேஸியமானஸ்ஸ பச்சயஸ்ஸ. கேன கதந்தி? அத்தனோ காரணேஹீதி ஸித்³தோ⁴வாயமத்தோ². ததா²தி ப²லஸ்ஸ உப்பாத³னஸமத்த²பா⁴வேன. அத² வா ததா²தி நிப்பா²த³னவஸேன உபஸேவனவஸேன ச. தத்த² நிப்பா²த³னங் ஹேதுபச்சயஸமோதா⁴னேன ப²லஸ்ஸ நிப்³ப³த்தனங், தங் ஸுவிஞ்ஞெய்யந்தி அனாமஸித்வா உபஸேவனமேவ விபா⁴வெந்தோ ‘‘உபஸேவிதோ வா’’தி ஆஹ. தத்த² அல்லீயாபனங் பரிபோ⁴க³வஸேன வேதி³தப்³ப³ங். தேனாஹ ‘‘உபபோ⁴கூ³பஸேவன’’ந்தி. விஜானநாதி³வஸேனாதி விஜானநஸஞ்ஜானநானுப⁴வனாதி³வஸேன. தேனாதி யதா²வுத்தஉபஸேவிதஸ்ஸ பகதபா⁴வேன. அனாக³தானம்பி…பே॰… வுத்தா ஹோதி, பகே³வ அதீதானங் பச்சுப்பன்னானஞ்சாதி அதி⁴ப்பாயோ. பச்சுப்பன்னஸ்ஸபி ஹி ‘‘பச்சுப்பன்னங் உது போ⁴ஜனங் ஸேனாஸனங் உபனிஸ்ஸாய ஜா²னங் உப்பாதெ³ந்தீ’’திஆதி³வசனதோ (பட்டா²॰ 2.18.8) பகதூபனிஸ்ஸயபா⁴வே லப்³ப⁴தீதி.
யதா² யே த⁴ம்மா யேஸங் த⁴ம்மானங் பச்சா²ஜாதபச்சயா ஹொந்தி, தே தேஸங் ஏகங்ஸேன விப்பயுத்தஅத்தி²அவிக³தபச்சயாபி ஹொந்தி, ததா² யே த⁴ம்மா யேஸங் த⁴ம்மானங் புரேஜாதபச்சயா ஹொந்தி, தே தேஸங் நிஸ்ஸயாரம்மணபச்சயாபி ஹொந்தீதி உப⁴யேஸு உப⁴யேஸங் பச்சயாகாரானங் லக்க²ணதோ ஸங்கராபா⁴வங் த³ஸ்ஸேதுங் ‘‘விப்பயுத்தாகாராதீ³ஹி விஸிட்டா², நிஸ்ஸயாரம்மணாகாராதீ³ஹி விஸிட்டா²’’தி ச வுத்தங். யதா² ஹி பச்சா²ஜாதபுரேஜாதாகாரா அஞ்ஞமஞ்ஞவிஸிட்டா², ஏவங் பச்சா²ஜாதவிப்பயுத்தாகாராத³யோ புரேஜாதனிஸ்ஸயாகாராத³யோ ச அஞ்ஞமஞ்ஞவிப⁴த்தஸபா⁴வா ஏவாதி.
மனோஸஞ்சேதனாஹாரவஸேன பவத்தமானேஹீதி இமினா சேதனாய ஸம்பயுத்தத⁴ம்மானம்பி தத³னுகு³ணங் அத்தனோ பச்சயுப்பன்னேஸு பவத்திமாஹ. தேனேவாதி சேதனாஹாரவஸேன உபகாரகத்தா ஏவ.
பயோகே³ன கரணீயஸ்ஸாதி ஏதேன பி⁴ன்னஜாதி யங் தாதி³ஸங் பயோகே³ன காதுங் ந ஸக்கா, தங் நிவத்தேதி. அனேகவாரங் பவத்தியா ஆஸேவனட்ட²ஸ்ஸ பாகடபா⁴வோதி கத்வா வுத்தங் ‘‘புனப்புனங் கரண’’ந்தி. ஏகஸ்ஸ பன அத்தஸதி³ஸஸ்ஸாதி அரூபத⁴ம்மஸாரம்மணதாஸுக்ககண்ஹாதி³பா⁴வேஹி அத்தனா ஸதி³ஸஸ்ஸ. இத³ங் பச்சயுப்பன்னவிஸேஸனங், ‘‘அத்தஸதி³ஸஸபா⁴வதாபாத³ன’’ந்தி வாஸனங் வாஸங் கா³ஹாபனங், இத⁴ பன வாஸனங் விய வாஸனங், பா⁴வனந்தி அத்தோ². க³ந்தா²தீ³ஸூதி க³ந்த²ஸிப்பாதீ³ஸு. விஸயே சேதங் பு⁴ம்மங், ந நித்³தா⁴ரணே. தேன க³ந்த²ஸிப்பாதி³விஸயா புரிமஸித்³தா⁴ அஜ்ஜ²யனாதி³கிரியா ‘‘க³ந்தா²தீ³ஸு புரிமா புரிமா’’தி வுத்தா, ஸா பன ஆஸேவனாகாரா இத⁴ உதா³ஹரணபா⁴வேன அதி⁴ப்பேதாதி ஆஹ ‘‘புரிமா புரிமா ஆஸேவனா வியாதி அதி⁴ப்பாயோ’’தி. நித்³தா⁴ரணே ஏவ வா ஏதங் பு⁴ம்மங். க³ந்தா²தி³விஸயா ஹி ஆஸேவனா க³ந்தா²தீ³தி வுத்தா யதா² ரூபவிஸயஜ்ஜா²னங் ரூபந்தி வுத்தங் ‘‘ரூபீ ரூபானி பஸ்ஸதீ’’திஆதீ³ஸு (ம॰ நி॰ 2.248; 3.312; படி॰ ம॰ 1.209; த⁴॰ ஸ॰ 248).
அத்தனோ விய ஸம்பயுத்தத⁴ம்மானம்பி கிச்சஸாதி⁴கா சேதனா சித்தஸ்ஸ ப்³யாபாரபா⁴வேன லக்கீ²யதீதி ஆஹ ‘‘சித்தபயோகோ³ சேதனா’’தி. தாயாதி தாய சேதனாய. உப்பன்னகிரியதாவிஸிட்டே²தி சித்தபயோக³ஸங்கா²தாய சேதனாகிரியாய உப்பத்தியா விஸிட்டே² விஸேஸங் ஆபன்னே. யஸ்மிஞ்ஹி ஸந்தானே குஸலாகுஸலசேதனா உப்பஜ்ஜதி, தத்த² யதா²ப³லங் தாதி³ஸங் விஸேஸாதா⁴னங் கத்வா நிருஜ்ஜ²தி, யதோ தத்தே²வ அவஸேஸபச்சயஸமவாயே தஸ்ஸா ப²லபூ⁴தானி விபாககடத்தாரூபானி நிப்³ப³த்திஸ்ஸந்தி. தேனாஹ ‘‘ஸேஸபச்சய…பே॰… ந அஞ்ஞதா²’’தி. தேஸந்தி விபாககடத்தாரூபானங். தேனாதி சித்தகிரியபா⁴வேன. கிங் வத்தப்³ப³ந்தி அஸஹஜாதானம்பி பா⁴வீனங் உபகாரிகா சேதனா ஸஹஜாதானங் உபகாரிகாதி வத்தப்³ப³மேவ நத்தீ²தி அத்தோ².
நிருஸ்ஸாஹஸந்தபா⁴வேனாதி உஸ்ஸாஹனங் உஸ்ஸாஹோ, நத்தி² ஏதஸ்ஸ உஸ்ஸாஹோதி நிருஸ்ஸாஹோ, ஸோ ஏவ ஸந்தபா⁴வோதி நிருஸ்ஸாஹஸந்தபா⁴வோ, தேன. உஸ்ஸாஹோதி ச கிரியமயசித்துப்பாத³ஸ்ஸ பவத்திஆகாரோ வேதி³தப்³போ³, யோ ப்³யாபாரோதி ச வுச்சதி, ந வீரியுஸ்ஸாஹோ. ஸ்வாயங் யதா² அஸமுக்³கா⁴திதானுஸயானங் கிரியமயசித்துப்பாதே³ஸு ஸாதிஸயோ ஏதேனாதி நிருஸ்ஸாஹஸந்தபா⁴வக்³க³ஹணேன. ஸாரம்மணாதி³பா⁴வேனாதி ஸாரம்மணஅரூபத⁴ம்மசித்தசேதஸிகப²ஸ்ஸாதி³பா⁴வேன. விஸதி³ஸவிபாகபா⁴வங் த³ஸ்ஸேதி யதா²வுத்தஉஸ்ஸாஹமத்தரஹிதஸந்தபா⁴வஸ்ஸ விபக்கபா⁴வமாபன்னேஸு அரூபத⁴ம்மேஸு ஏவ லப்³ப⁴னதோ. ஸோதி விபாகபா⁴வோ. விபாகானங் பயோகே³ன அஸாதே⁴தப்³ப³தாயாதி பயோகே³னாதி கம்மப²லுப்பத்திமூலஹேதுபூ⁴தேன புரிமபயோகே³ன. யங் ஸந்தா⁴ய வுத்தங் ‘‘பயோக³ஸம்பத்திங் ஆக³ம்ம விபச்சந்தீ’’திஆதி³. அஞ்ஞதா²தி பயோகே³ன வினா. ஸேஸபச்சயேஸூதி கம்மஸ்ஸ விபாகுப்பாத³னே ஸஹகாரீகாரணேஸு. கம்மஸ்ஸ கடத்தாயேவ பயோகே³ ஸதி அஸதிபீதி வுத்தமேவத்த²ங் அவதா⁴ரணேன த³ஸ்ஸெந்தோ விபாகானங் நிருஸ்ஸாஹதங் பாகடங் கரோதி. ந கிலேஸவூபஸமஸந்தபா⁴வோ யதா² தங் ஸந்தானேஸு ஜா²னஸமாபத்தீஸூதி அதி⁴ப்பாயோ. அயஞ்ச விபாகானங் ஸந்தபா⁴வோ நானுமானிகோ, அத² கோ² பச்சக்க²ஸித்³தோ⁴தி த³ஸ்ஸெந்தோ ‘‘ஸந்தபா⁴வதோயேவா’’திஆதி³மாஹ. தத்த² அபி⁴னிபாதக்³க³ஹணேன கிச்சதோ பஞ்சவிஞ்ஞாணானி த³ஸ்ஸேதி. தேனேவாஹ ‘‘பஞ்சஹி விஞ்ஞாணேஹி ந கிஞ்சி த⁴ம்மங் படிஜானாதி அஞ்ஞத்ர அபி⁴னிபாதமத்தா’’தி. தப்பச்சயவதந்தி விபாகபச்சயவந்தானங், விபாகபச்சயேன உபகத்தப்³பா³னந்தி அத்தோ². அவிபாகானங் ரூபத⁴ம்மானங். விபாகானுகுலங் பவத்திந்தி ஸந்தஸபா⁴வங் பச்சயபா⁴வமாஹ.
யதா²ஸகங் பச்சயேஹி நிப்³ப³த்தானங் பச்சயுப்பன்னானங் அனுப³லப்பதா³னங் உபத்த²ம்ப⁴கத்தங், தயித³ங் ஆஹாரேஸு ந நியதங் ததோ அஞ்ஞதா²பி பவத்தனதோ. ததா² ஸதி ததே³வ தத்த² கஸ்மா க³ஹிதந்தி சோத³னங் மனஸி கத்வா ஆஹ ‘‘ஸதிபி…பே॰… உபத்த²ம்ப⁴கத்தேனா’’தி. தேன பதா⁴னாப்பதா⁴னேஸு பதா⁴னேன நித்³தே³ஸோ ஞாயக³தோதி த³ஸ்ஸேதி. காமஞ்செத்த² ‘‘ரூபாரூபானங் உபத்த²ம்ப⁴கத்தேனா’’தி அவிஸேஸதோ வுத்தங், ஸாமஞ்ஞஜோதனா பன விஸேஸே அவதிட்ட²தீதி யதா²ரஹங் பச்சயபா⁴வோ நித்³தா⁴ரேதப்³போ³. ஸ்வாயங் தேஸங் உபத்த²ம்ப⁴கத்தஸ்ஸ பதா⁴னபா⁴வவிபா⁴வனேனேவ ஆவி ப⁴வதீதி தமேவ த³ஸ்ஸெந்தோ ‘‘உபத்த²ம்ப⁴கத்தஞ்ஹீ’’திஆதி³மாஹ. ப²ஸ்ஸமனோஸஞ்சேதனாவிஞ்ஞாணானி அத்தனா ஸஹஜாதத⁴ம்மானங் ஸஹுப்பாத³னபா⁴வேன பச்சயா ஹொந்தீதி ஆஹ ‘‘ஸதிபி ஜனகத்தே அரூபீனங் ஆஹாரான’’ந்தி. உபத்த²ம்ப⁴கத்தங் ஹோதி உப்பாத³தோ பரம்பி நேஸங் பச்சயபா⁴வதோ. அஸதிபி ஜனகத்தே உபத்த²ம்பி⁴யமானஸ்ஸ ரூபஸ்ஸ அஞ்ஞேஹி யதா²ஸகங் பச்சயேஹி ஜனிதத்தா. தேனாஹ ‘‘சதுஸமுட்டா²னிகரூபூபத்த²ம்ப⁴கரூபாஹாரஸ்ஸா’’தி. யத³க்³கே³ன ரூபாரூபாஹாரா அத்தனோ ப²லஸ்ஸ உப்பத்தியா பச்சயா ஹொந்தி, தத³க்³கே³ன டி²தியாபி பச்சயா ஹொந்தியேவாதி உபத்த²ம்ப⁴கத்தங் ஜனகத்தங் ந ப்³யபி⁴சரதி, தஸ்மா அனுபத்த²ம்ப⁴கஸ்ஸ ஆஹாரஸ்ஸ குதோ ஜனகதா. தேனாஹ ‘‘அஸதி பன…பே॰… நத்தீ²தி உபத்த²ம்ப⁴கத்தங் பதா⁴ன’’ந்தி. யஸ்மா ஜனகோ அஜனகோபி ஹுத்வா ஆஹாரோ உபத்த²ம்ப⁴கோ ஹோதி, அனுபத்த²ம்ப⁴கோ பன ஹுத்வா ஜனகோ ந ஹோதியேவ, தஸ்மாஸ்ஸ உபத்த²ம்ப⁴கத்தங் பதா⁴னந்தி ‘‘ஜனயமானோபி ஹீ’’திஆதி³மாஹ. அவிச்சே²த³வஸேனாதி ஸந்ததியா க⁴ட்டனவஸேன.
யதி³ அதி⁴பதியட்டோ² இந்த்³ரியபச்சயதா, ஏவங் ஸந்தே அதி⁴பதிபச்சயதோ இந்த்³ரியபச்சயஸ்ஸ கிங் நானாகரணந்தி சோத³னங் மனஸி கத்வா தங் தேஸங் நானாகரணங் த³ஸ்ஸெந்தோ ‘‘ந அதி⁴பதிபச்சயத⁴ம்மானங் வியா’’திஆதி³மாஹ. தத்த² பவத்தினிவாரகேதி அத்தனோ அதி⁴பதிபச்சயபவத்தியா நிவாரகே அஞ்ஞே அதி⁴பதிபச்சயத⁴ம்மே. அபி⁴ப⁴வித்வா பவத்தனேனாதி புரிமாபி⁴ஸங்கா²ரஸித்³தே⁴ன தோ⁴ரெய்யபா⁴வேன அபி⁴பு⁴ய்ய பவத்தியா. க³ருபா⁴வோதி ஜெட்ட²கபா⁴வோ. அயஞ்ஹெத்த² ஸங்கே²பத்தோ² – யேன ஜெட்ட²கபா⁴வேன ச²ந்தா³த³யோ அத்தனோ பவத்திவிப³ந்த⁴கே துல்யயோகீ³த⁴ம்மே தத³ஞ்ஞத⁴ம்மே விய அபி⁴பு⁴ய்ய பவத்தந்தி, ந ஸோ இந்த்³ரியபச்சயதாய அதி⁴பதியட்டோ²தி அதி⁴ப்பேதோதி. அத² கோ சரஹீதி ஆஹ ‘‘அத² கோ²’’திஆதி³. த³ஸ்ஸனாதி³கிச்சேஸு நிமித்தபூ⁴தேஸு சக்கு²விஞ்ஞாணாதீ³ஹி சக்கா²தீ³ஹி பச்சயேஹி சக்கா²தீ³னங் அனுவத்தனீயதாதி ஸம்ப³ந்தோ⁴. ஜீவனே அனுபாலனே ஜீவந்தேஹி ஸஹஜாதத⁴ம்மேஹி ஜீவிதஸ்ஸ, ஸுகி²தாதீ³ஹி ஸுகி²தது³க்கி²தஸோமனஸ்ஸிததோ³மனஸ்ஸிதுபெக்கி²தேஹி ஸஹஜாதத⁴ம்மேஹி ஸுகா²தீ³னங் அனுவத்தனீயதாதி யோஜனா. தங்தங்கிச்சேஸூதி வுத்தமேவ த³ஸ்ஸனாதி³கிச்சங் பச்சாமஸதி. சக்கா²த³யோ சக்கா²தி³பச்சயேஹி. சக்கா²தீ³னந்தி சக்கா²தி³ஜீவிதஸுகா²தி³ஸத்³தா⁴தீ³னங்.
தேஸு கிச்சேஸூதி த³ஸ்ஸனாதி³கிச்சேஸு. சக்கா²தீ³னங் இஸ்ஸரியங் அதி⁴பதியட்டோ², ஸா இந்த்³ரியபச்சயதாதி அத்தோ². தப்பச்சயானங் சக்கு²விஞ்ஞாணாதீ³னங் தத³னுவத்தனேன தேஸங் சக்கா²தீ³னங் அனுவத்தனேன. தத்த² த³ஸ்ஸனாதி³கிச்சே. பவத்தீதி ச இத³ங் தஸ்ஸ அதி⁴பதியட்ட²ஸ்ஸ பாகடகரணங். அனுவத்தகேன ஹி அனுவத்தனீயோ அதி⁴பதியட்டோ² பாகடோ ஹோதி. யதா² சக்கா²தீ³னங் கிச்சவஸேன அதி⁴பதியட்டோ², ந ஏவங் பா⁴வத்³வயஸ்ஸ. தஸ்ஸ பன தாதி³ஸேன காரணதாமத்தேனாதி த³ஸ்ஸெந்தோ ‘‘இத்தி²புரிஸிந்த்³ரியானங் பனா’’திஆதி³மாஹ. பச்சயேஹீதி கம்மாதி³பச்சயேஹி. ததோதி இத்தா²தி³க்³க³ஹணபச்சயபா⁴வதோ. தங்ஸஹிதஸந்தானேதி இத்தி²ந்த்³ரியாதி³ஸஹிதஸந்தானே. ‘‘ஸுகி²ந்த்³ரியது³க்கி²ந்த்³ரியானிபி சக்கா²தி³க்³க³ஹணேன க³ஹிதானீ’’தி இத³ங் இந்த்³ரியபச்சயமேவ ஸந்தா⁴ய வுத்தங், பச்சா²ஜாதாதீ³ஹி பன தானி ரூபத⁴ம்மானம்பி பச்சயா ஹொந்தியேவ.
லக்க²ணாரம்மணூபனிஜ்ஜா²னபூ⁴தானந்தி அனிச்சதாதி³லக்க²ணஸ்ஸ பத²வீகஸிணாதி³ஆரம்மணஸ்ஸ ச உபனிஜ்ஜா²னவஸேன விதக்காதீ³னந்தி விதக்கவிசாரபீதிவேத³னாசித்தேகக்³க³தானங். உபக³ந்த்வா நிஜ்ஜா²னந்தி உபனிகச்ச நிஜ்ஜா²னஜ்ஜா²னாரம்மணஸ்ஸ ஜா²னசக்கு²னா ப்³யத்ததரங் ஓலோகனங் அத்த²தோ சிந்தனமேவ ஹோதீதி வுத்தங் ‘‘பெக்க²னங் சிந்தனஞ்சா’’தி. தேனேவாஹ ‘‘விதக்கனாதி³வஸேனா’’தி. விதக்காதீ³னங்யேவ ஸாதா⁴ரணோ, யேன தேயேவ ‘‘ஜா²னங்கா³னீ’’தி வுச்சந்தி. ஸுக²து³க்க²வேத³னாத்³வயந்தி ஸாமஞ்ஞவசனம்பி உபனிஜ்ஜா²யனட்ட²ஸ்ஸ அதி⁴கதத்தா அனுபனிஜ்ஜா²னஸபா⁴வமேவ தங் போ³தே⁴தீதி ஆஹ ‘‘ஸுகி²ந்த்³ரியது³க்கி²ந்த்³ரியத்³வய’’ந்தி. தஞ்ஹி இதா⁴தி⁴ப்பேதப்³ப³ங், ந ஸோமனஸ்ஸதோ³மனஸ்ஸிந்த்³ரியங். தேன வுத்தங் ‘‘அதி⁴ப்பாயோ’’தி. அஜா²னங்கா³ உபெக்கா²சித்தேகக்³க³தா பஞ்சவிஞ்ஞாணஸஹக³தா த³ட்ட²ப்³பா³ விதக்கபச்சி²மகத்தா ஜா²னங்கா³னங். யதி³ ஏவந்தி ஜா²னங்க³வசனேனேவ அஜா²னங்கா³னங் நிவத்தனங் கதங், ஏவங் ஸந்தே. ஏகந்தேன ந உபெக்கா²ய விய அனேகந்தேன. அனேகந்திகஞ்ஹி உபெக்கா²ய அஜா²னங்க³த்தங். யதி³ ஏகந்தேன அஜா²னங்க³ங் ஸுக²து³க்கி²ந்த்³ரியங், அத² கத²ங் பஸங்கோ³தி ஆஹ ‘‘ஜா²னங்க³ட்டா²னே நித்³தி³ட்ட²த்தா’’தி. அத² வா யதி³ ஏகந்தேன அஜா²னங்க³தங் வேத³னாத்³வயங், கத²ங் ஜா²னங்க³வோஹாரோதி ஆஹ ‘‘ஜா²னங்க³ட்டா²னே நித்³தி³ட்ட²த்தா’’தி. ஸதிபி…பே॰… த³ஸ்ஸனத்த²ங் ‘‘ட²பெத்வா ஸுக²து³க்கி²ந்த்³ரியத்³வய’’ந்தி வுத்தந்தி யோஜனா ‘‘உபெக்கா²…பே॰… அத்தீ²’’தி, பஞ்சவிஞ்ஞாணஸஹக³தானங் ஜா²னபச்சயபா⁴வோ பன நத்தி², ந இதரேஸந்தி அதி⁴ப்பாயோ. க³ஹணங் கதங் உபெக்கா²சித்தேகக்³க³தானந்தி ஆனெத்வா யோஜனா.
யதோ ததோ வாதி து³க்³க³திதோ வா ஸுக³திதோ வா ஸங்கிலேஸதோ வா வோதா³னதோ வா நிய்யானட்டோ², ஸ்வாயங் யதா²க்கமங் ஸம்மா மிச்சா² வா ஹோதீதி ஆஹ ‘‘ஸம்மா வா மிச்சா² வாதி அத்தோ²’’தி. அஹேதுகசித்தேஸு ந லப்³ப⁴ந்தீதி எத்த² அஹேதுகசித்தேஸு ஏவ ந லப்³ப⁴ந்தீதி ஏவமவதா⁴ரணங் க³ஹேதப்³ப³ங், ந அஹேதுகசித்தேஸு ந லப்³ப⁴ந்தி ஏவாதி. தஸ்மா புரிமஸ்மிஞ்ஹி அவதா⁴ரணே அஹேதுகசித்தேஸு அலாபோ⁴ நியதோதி ஸோ பதியோகீ³ஸு நிவத்திதோ ஹோதி. தேனாஹ ‘‘ஸஹேதுகசித்தேஸு அலாபா⁴பா⁴வத³ஸ்ஸனத்த²ங் வுத்த’’ந்தி. து³தியே பன அஹேதுகசித்தானி அலாபே⁴ நியதானீதி தேஸு அனவஸேஸதோ அலாபே⁴ன ப⁴விதப்³ப³ங். ததா² ஸதி யோ கேஸுசி அஹேதுகசித்தேஸு ஜா²னபச்சயோ லப்³ப⁴தி, ஸோபி நிவாரிதோ ஸியா. தேன வுத்தங் ‘‘ந அஹேதுகசித்தேஸூ’’திஆதி³. தத்த² லாபா⁴பா⁴வத³ஸ்ஸனத்த²ந்தி லாபா⁴பா⁴வஸ்ஸேவ த³ஸ்ஸனத்த²ங் ந வுத்தந்தி அத்தோ². தேன ஏகச்சாலாபோ⁴ அபடிக்கி²த்தோ ஹோதி. தேனேவாஹ ‘‘கத்த²சி கஸ்ஸசி லாபோ⁴ ந நிவாரிதோ’’தி. ஏவங் அத்தே² க³ய்ஹமானேதி ஏவங் வுத்தனயேன பட²மபதா³வதா⁴ரணவஸேன அத்தே² விஞ்ஞாயமானே. எத்தகமேவ விஞ்ஞாயெய்யாதி அஹேதுகசித்தேஸு கேஸுசி சித்தேஸு ஜா²னமக்³க³பச்சயேஸு கஸ்ஸசி ‘‘ந ஸவிதக்க…பே॰… கத’’ந்தி. யதி³பி ந கதங், அத்த²தோ பன தங் கதமேவாதி வேதி³தப்³ப³ங்.
அஹேதுகசித்தேஸு வா லாபா⁴பா⁴வத³ஸ்ஸனத்தே²திஆதி³ பச்சி²மபதா³வதா⁴ரணவஸேன அத்த²த³ஸ்ஸனங். தஸ்மாதி யஸ்மா அஹேதுகசித்தேஸு ந லப்³ப⁴ந்தி ஏவாதி ஏவங் நியமே கரியமானே யதா²வுத்தோ அத்தோ² ஸம்ப⁴வதி, தஸ்மா. அயஞ்ச அத்தோ² பாட²ந்தரேனபி ஸங்ஸந்த³தீதி த³ஸ்ஸேதுங் ‘‘யேன அலாபே⁴னா’’திஆதி³ வுத்தங். தங் அலாப⁴ந்தி தங் த⁴ம்மஸங்க³ணியங் பகாஸிதங் அலாப⁴ங். ஏஸாதி ஏஸ இத⁴ பட்டா²னவண்ணனாயங் ‘‘அஹேதுகசித்தேஸு ந லப்³ப⁴ந்தீ’’தி ‘‘யதா² ஹீ’’திஆதி³மாஹ. தத்த² ஸஹேதுகேஸூதி ஸஹேதுகசித்தேஸு. ஸங்கட்³டி⁴த்வாதி அவிஸடே கத்வா. ஏகத்தக³தபா⁴வகரணந்தி ஏகபா⁴வாபாத³னங். இமஸ்மிங் பன பகரணே ஜா²னபச்சயோ வுத்தோவ யதா²லாப⁴பச்சயாகாரவிபா⁴வனே தே³ஸனாய தப்பரபா⁴வதோ.
ஸமந்தி அவிஸமங், ஸம்மா, ஸஹ வா. பகாரேஹீதி ஏகவத்து²கதாதி³ப்பகாரேஹி. யுத்ததாயாதி ஸங்ஸட்ட²தாய. ஸா பன ஸங்ஸட்ட²தா யஸ்மா ஸபா⁴வதோ அனேகேஸம்பி ஸதங் ஏகத்தக³மனங் விய ஹோதி, தஸ்மா வுத்தங் ‘‘ஏகீபா⁴வோபக³மனேன விய உபகாரகதா’’தி. ஏவங் உபகாரகதா ச தேஸங் ப³ஹூனங் ஸஹச்ச ஏகத்தகாரிதாய நித³ஸ்ஸேதப்³பா³.
யுத்தானம்பி ஸதந்தி வுத்தப்பகாரேன ஸங்ஸட்ட²தாய அஞ்ஞமஞ்ஞஸம்ப³ந்த⁴தாய யுத்தானம்பி ஸமானானங். அயஞ்ச யுத்ததா ந ஸம்பயுத்தபச்சயதாய விய பச்சயத⁴ம்மேஸு பச்சயுப்பன்னத⁴ம்மேஸு ச வேதி³தப்³பா³, கேவலங் தத்த² அரூபஸபா⁴வத்தா உப⁴யங் ஸமது⁴ரங், இத⁴ ரூபாரூபஸபா⁴வத்தா விது⁴ரந்தி அயங் விஸேஸோ. விப்பயுத்தபா⁴வேனாதி விஸங்ஸட்ட²பா⁴வேன. தேன வுத்தங் ‘‘நானத்தூபக³மேனா’’தி. இத³ஞ்ஹெத்த² விப்பயுத்ததாய விஸேஸனங் யா நானத்தூபக³மனஸங்கா²தா விப்பயுத்ததா, ந ஸா ‘‘ஞாணவிப்பயுத்த’’ந்திஆதீ³ஸு விய அபா⁴வமத்தந்தி, அயஞ்ச உபகாரகதா வினா ஸங்ஸக்³கே³ன ஸஹாவட்டா²யிதாய கிச்சகாரிதாதீ³ஹி நித³ஸ்ஸேதப்³பா³. ந ஹீதிஆதி³ ‘‘யுத்தான’’ந்தி வுத்தஸ்ஸ அத்த²ஸ்ஸ ஸமத்த²னங் ‘‘தாதி³ஸே யோகே³ ஸதியேவ விப்பயுத்தபச்சயதா’’தி. தேனாஹ ‘‘ந ஹீ’’திஆதி³. தஸ்ஸத்தோ² – யதா² ‘‘வத்து² க²ந்தா⁴னங், ஸஹஜாதா குஸலா க²ந்தா⁴ சித்தஸமுட்டா²னானங் ரூபானங், பச்சா²ஜாதா குஸலா க²ந்தா⁴ புரேஜாதஸ்ஸ இமஸ்ஸ காயஸ்ஸ விப்பயுத்தபச்சயேன பச்சயோ’’திஆதி³வசனதோ (பட்டா²॰ 1.1.434) வத்து²ஸஹஜாதபச்சா²ஜாதவஸேன யுத்தானங் ‘‘ரூபானங் பனா’’திஆதி³. விப்பயோகோ³யேவ நத்தி² ஸம்பயோகா³ஸங்காய அபா⁴வதோ. ஸம்பயுஜ்ஜமானானஞ்ஹி அரூபானங் ரூபேஹி, ரூபானஞ்ச தேஹி ஸியா ஸம்பயோகா³ஸங்கா, ஸம்பயோக³லக்க²ணங் பன நத்தீ²தி தேஸங் விப்பயோகோ³ வுத்தோ. தேனாஹ ‘‘சதூஹி ஸம்பயோகோ³ சதூஹி விப்பயோகோ³’’தி.
அத்தி² மே பாபகம்மங் கதந்தி கதபா⁴வவிஸிட்டா² அத்தி²தா வுச்சமானா கிரியாய ஸித்³த⁴பா⁴வமேவ தீ³பேதி, ந ஸிஜ்ஜ²மானதந்தி ஆஹ ‘‘நிப்³ப³த்ததாலக்க²ணங் அத்தி²பா⁴வ’’ந்தி. அத்த²தோ பன கம்மஸ்ஸ அனிப்³ப³த்தப²லதாய ஏவமெத்த² அத்தி²தா வேதி³தப்³பா³. அத்தி² புக்³க³லோதி பனெத்த² தஸ்ஸா பஞ்ஞத்தியா க³ஹேதப்³ப³தா, தது³பாதா³னஸ்ஸ வா பப³ந்தா⁴விச்சே²தோ³ லப்³ப⁴தேவாதி வுத்தங் ‘‘உபலப்³ப⁴மானதாலக்க²ணங் அத்தி²பா⁴வ’’ந்தி. பச்சயத⁴ம்மஸ்ஸ யதி³பி உப்பாத³தோ பட்டா²ய யாவ ப⁴ங்கா³ லப்³ப⁴மானதா அத்தி²பா⁴வோ, ததா²பி தஸ்ஸ யதா² உப்பாத³க்க²ணதோ டி²திக்க²ணே ஸாதிஸயோ ப்³யாபாரோ, ஏவங் பச்சயுப்பன்னேபீதி வுத்தங் ‘‘ஸதிபி ஜனகத்தே உபத்த²ம்ப⁴கப்பட்டா²னா அத்தி²பா⁴வேன உபகாரகதா’’தி. வத்தா²ரம்மணஸஹஜாதாதீ³னந்தி ஆதி³-ஸத்³தே³ன புரேஜாதபச்சா²ஜாதாதீ³னி ஸங்க³ண்ஹாதி. அத்தி²பா⁴வேனேவ ந நிஸ்ஸயாதி³பா⁴வேனாதி ‘‘ஸாதா⁴ரண’’ந்தி வுத்தங் உபகாரகத்தங் விபா⁴வேதி.
ப²ஸ்ஸாதீ³னங் அனேகேஸங் ஸஹபா⁴வோ நத்தீ²தி இத³ங் ந ஏகசித்துப்பாத³பரியாபன்னே ஸந்தா⁴ய, அத² கோ² நானாசித்துப்பாத³பரியாபன்னேதி த³ஸ்ஸெந்தோ ‘‘ஏகஸ்மிங் ப²ஸ்ஸாதி³ஸமுதா³யே ஸதி து³தியோ ந ஹோதீ’’தி ஆஹ. ஸ்வாயமத்தோ² ‘‘ஸஹபா⁴வோ நத்தீ²’’தி ஸஹபா⁴வபடிக்கே²பேனேவ விஞ்ஞாயதி. எத்தாவதா பன அனவபு³ஜ்ஜ²ந்தானங் வஸேன விவரித்வா வுத்தோ. தேனாதி அனேகேஸங் ப²ஸ்ஸாதீ³னங் ஸஹபா⁴வாபா⁴வேன. யதி³ நத்தி²தாமத்தேன உபகாரகதா நத்தி²பச்சயதா, அனானந்தராதீதவஸேனபி ஸியாதி சோத³னங் ஸந்தா⁴யாஹ ‘‘ஸதிபீ’’திஆதி³. தானீதி புரிமதரசித்தானி. த³த³மானங் வியாதி கஸ்மா வுத்தங், நனு ஓகாஸங் தே³தியேவ. ததா² ஹி வுத்தங் ‘‘பவத்திஓகாஸதா³னேன உபகாரகதா’’தி? ஸச்சமேதங், ஏவமஜ்ஜா²ஸயா விய பச்சயத⁴ம்மா அபா⁴வங் க³ச்ச²ந்தீதி த³ஸ்ஸனத்த²ங் விய-ஸத்³த³க்³க³ஹணங்.
நத்தி²தாவிக³மானங் ஸதிபி பச்சயஸ்ஸ த⁴ம்மஸ்ஸ அனுபலத்³தி⁴தாஸாமஞ்ஞே நத்தி²விக³தபச்சயேஸு லப்³ப⁴மானங் விஸேஸமத்த²ங் விபா⁴வேதுங் ‘‘எத்த² சா’’திஆதி³ வுத்தங். அபா⁴வமத்தேனாதி ஹுத்வா அபா⁴வமத்தேன. தேனெத்த² நிரோதா⁴னந்தரங் பச்சயத⁴ம்மஸ்ஸ உபகாரகத்தங் ஆஹ, யதா² தங் ‘‘ஓகாஸதா³ன’’ந்தி ஸபா⁴வவிக³மேனாதி ஏதேன நிரோத⁴தோ பரம்பி யதோ ‘‘விக³ததா நிரோத⁴ப்பத்ததா’’தி வுத்தங். பச்சயத⁴ம்மே யாஸங் நத்தி²தாவிக³ததானங் வஸேன நத்தி²விக³தபச்சயா வுத்தா, தாஸங் விஸேஸே த³ஸ்ஸிதே நத்தி²விக³தபச்சயானங் விஸேஸோ ‘‘நத்தி²தா ச நிரோதா⁴னந்தரஸுஞ்ஞதா விக³ததா நிரோத⁴ப்பத்ததா’’தி வுத்தங், தத்த² நிரோதா⁴னந்தரா ந நிரோத⁴ஸமகாலாதி அதி⁴ப்பாயோ. ததா²தி இமினா யதா² பச்சயத⁴ம்மாவிஸேஸேபி நத்தி²விக³தபச்சயபா⁴வவிஸேஸோ நித்³தா⁴ரிதோ, ததா² அத்தி²அவிக³தபச்சயபா⁴வவிஸேஸோதி இமமத்த²ங் உபஸங்ஹரதி. யதா² ஹி நிரோதா⁴னந்தரனிரோத⁴ப்பத்தீஹி நத்தி²விக³ததானங் பே⁴தோ³ லக்கி²தோ, ஏவங் பச்சயத⁴ம்மஸ்ஸ த⁴ரமானதானிரோதா⁴னுபக³மேஹி அத்தி²அவிக³ததானந்தி. கத²ங் பனாயங் த⁴ம்மாவிஸேஸே பச்சயபா⁴வவிஸேஸோ து³விஞ்ஞெய்யரூபேன டி²தோ ஸம்மா விபா⁴விஸ்ஸதீதி ஆஹ ‘‘த⁴ம்மானஞ்ஹீ’’திஆதி³. தத³பி⁴ஸமயாய தேஸங் பச்சயவிஸேஸானங் அதி⁴க³மத்த²ங்.
சதூஸு க²ந்தே⁴ஸு ஏகஸ்ஸபி அஸங்க³ஹிதத்தாபா⁴வதோ அனந்தராதீ³ஹீதி விப⁴த்திங் பரிணாமெத்வா யோஜனா. அஞ்ஞந்தி ஸுகு²மரூபங். ந ஹி தங் புரேஜாதபச்சயோ ஹோதி. நனு ச ரூபரூபம்பி புரேஜாதபச்சயபா⁴வேன குஸலத்திகே நாக³தந்தி ஆஹ ‘‘ரூபரூபங் பனா’’திஆதி³. அஞ்ஞத்த² ஆக³தமேவாதி யதி³பி குஸலத்திகே நாக³தங், ஸனித³ஸ்ஸனத்திகாதீ³ஸு பன ஆக³தத்தா ந ஸக்கா ரூபரூபஸ்ஸ புரேஜாதபச்சயதங் படிக்கி²பிதுந்தி அத்தோ².
பச்சயுத்³தே³ஸவண்ணனா நிட்டி²தா.
பச்சயனித்³தே³ஸோ
1. ஹேதுபச்சயனித்³தே³ஸவண்ணனா
1. ஹேதுபச்சயேன பச்சயபா⁴வோ ஹேதுபச்சயோதி உத்³தி³ட்டோ², ந ஹேதுபச்சயத⁴ம்மோதி அத்தோ². ஸோதி ஹேதுபா⁴வேன பச்சயோ. எத்த² ச பட²மவிகப்பே யோ ஹேதுபச்சயேன பச்சயபா⁴வோ வுத்தோ, யோ ச து³தியவிகப்பே ஹேதுபா⁴வேன பச்சயோ வுத்தோ, ஸோ யஸ்மா அத்த²தோ யதா²வுத்தஸ்ஸ பச்சயத⁴ம்மஸ்ஸ யதா²வுத்தானங் ‘‘உப⁴யதா²பி ஹேதுபா⁴வேன உபகாரகதா ஹேதுபச்சயோதி உத்³தி³ட்டோ²தி த³ஸ்ஸிதங் ஹோதீ’’தி. யதா² செத்த², ஏவங் ‘‘ஆரம்மணபச்சயேன பச்சயபா⁴வோ, ஆரம்மணபா⁴வேன வா பச்சயோ ஆரம்மணபச்சயோ’’திஆதி³னா ஆரம்மணபச்சயாதீ³ஸு அத்தோ² நேதப்³போ³தி த³ஸ்ஸெந்தோ ‘‘ஏஸ நயோ ஸேஸபச்சயேஸுபீ’’தி ஆஹ. த⁴ம்மஸபா⁴வோ ஏவ, ந த⁴ம்மதோ அஞ்ஞா த⁴ம்மஸத்தி நாம அத்தீ²தி. உபகாரகங் த⁴ம்மந்தி பச்சயத⁴ம்மங் ஆஹ. உபகாரகதந்தி பச்சயதங்.
பச்சத்தனித்³தி³ட்டோ²தி பச்சத்தவஸேன நித்³தி³ட்டோ², பட²மாய விப⁴த்தியா நித்³தி³ட்டோ²தி அத்தோ². தேனாதி பச்சயத⁴ம்மனித்³தே³ஸபூ⁴தேன பச்சத்தனித்³தி³ட்டே²ன பட²மேன ஹேதுஸத்³தே³ன. ஏதஸ்ஸாதி ஹேதுஸத்³தா³பி⁴தெ⁴ய்யமத்த²மாஹ. ஸோ ஹி ச²ப்³பி³தோ⁴ நவவிதோ⁴ த்³வாத³ஸவிதோ⁴தி அனேகபே⁴தே³ன பி⁴ன்னோபி ஹேதுபா⁴வஸாமஞ்ஞேன ஏகஜ்ஜ²ங் கத்வா ஏகவசனேன வுத்தோ. து³தியோ ஹேதுஸத்³தோ³தி ஆனெத்வா யோஜனா. ஹேதுனா ஸம்பயுத்தானந்தி அதி⁴கதத்தா வுத்தங் ‘‘ஹேது ஸம்பயுத்தானங் பச்சயோ ஹொந்தோ ஹேதுனா ஸம்பயுத்தானமேவ பச்சயோ ஹோதி, ந விப்பயுத்தான’’ந்தி ஏவங் பத³மேதங். ந ஹி ஸப்³பே³ன ஸப்³ப³ங் ஹேதுவிப்பயுத்தத⁴ம்மானங் ஹேதுபச்சயோ ந ஹோதீதி. ஸம்பயுத்தஸத்³த³ஸ்ஸ ஸம்ப³ந்தீ⁴ஸத்³த³த்தா ‘‘ஸம்பயுத்தஸத்³த³ஸ்ஸ ஸாபெக்க²த்தா’’தி வுத்தங். ஸம்பயுத்தோதி ஹி வுத்தே கேன ஸம்பயுத்தோதி ஏகந்ததோ ஸம்ப³ந்தி⁴அந்தரங் அபெக்கி²தப்³ப³ங். தேனாஹ ‘‘அஞ்ஞஸ்ஸ…பே॰… விஞ்ஞாயதீ’’தி. நாயங் ஏகந்தோதி ய்வாயங் ‘‘து³தியே ஹேதுஸத்³தே³ அவிஜ்ஜமானே’’திஆதி³னா வுத்தோ அத்தோ², அயமேகந்தோ ந ஹோதி, அஞ்ஞாபெக்கோ²பி ஸத்³தோ³ அஞ்ஞஸ்ஸ விஸேஸனங் ஹோதீதி இத³ங் ந ஸப்³ப³த்தே²வ ஸம்ப⁴வதீதி அத்தோ². ‘‘பச்சத்தனித்³தி³ட்டோ²’’தி இமினா பட²மஸ்ஸ ஹேதுஸத்³த³ஸ்ஸ ஸம்பயுத்தஸத்³தா³னபெக்க²தங் ஆஹ. தேன வுத்தங் ‘‘ஹேஹுபச்சயேன பச்சயோதி எத்தே²வ ப்³யாவடோ’’தி. அவிஸிட்டா²தி ந விஸேஸிதா. ஏவந்தி யதா² ஹேதுஸத்³தே³ன அஞ்ஞத்த² ப்³யாவடேன ஸம்பயுத்தா ந விஸேஸியந்தி கிச்சந்தரபஸுதத்தா, ஏவங் ஸம்பயுத்தஸத்³தே³ன ஹேதுஸத்³த³விஸேஸனரஹிதேன தத³த்த²மத்தப்³யாவடத்தா அவிஸேஸதோ ஸம்பயுத்தானங் க³ஹணங் ஸியா. தேன வுத்தங் ‘‘ஸம்பயுத்தஸத்³தே³னா’’திஆதி³. ஆஹாரிந்த்³ரியாஸம்பயுத்தஸ்ஸ அபா⁴வதோதி ஆஹாரேஹி இந்த்³ரியேஹி ச நஸம்பயுத்தஸ்ஸ த⁴ம்மஸ்ஸ அபா⁴வதோ. ந ஹி ப²ஸ்ஸசேதனாவிஞ்ஞாணவேத³னாஜீவிதவிரஹிதோ சித்துப்பாதோ³ அத்தி². தேனாஹ ‘‘வஜ்ஜேதப்³பா³…பே॰… தங் ந கத’’ந்தி. வஜ்ஜேதப்³ப³ங் ஹேதுவிப்பயுத்தங்.
ஏவம்பீதி து³தியேன ஹேதுஸத்³தே³ன க³ய்ஹமானேபி நாபஜ்ஜதி. யதி³பி ஹேதவோ ப³ஹவோ, ஸாமஞ்ஞனித்³தே³ஸோ சாயங், ததா²பி ஸாமஞ்ஞஜோதனாய விஸேஸனித்³தி³ட்ட²த்தாதி ‘‘பச்சத்த…பே॰… வுத்தத்தா’’தி. வினாபி து³தியேன ஹேதுஸத்³தே³ன ஹேதுஸம்பயுத்தபா⁴வே ஸித்³தே⁴பீதி இமினா யங் ந பன ஹேதூனந்தி இத³ங் ஹேதுஸ்ஸ பச்சயபா⁴வேன க³ஹிதத்தா பச்சயுப்பன்னபா⁴வேன க³ஹணங் ந யுஜ்ஜெய்யாதி ஆஸங்கமானங் ஸந்தா⁴ய வுத்தங். தேனேவாஹ ‘‘ஏவம்பி க³ஹணங் ஸியா’’தி. ஸோதி து³தியோ ஹேதுஸத்³தோ³. அபரே பன ‘‘ஹேதுஸம்பயுத்தகான’’ந்தி எத்த² ஹேதூனஞ்ச ஸம்பயுத்தகானஞ்சாதி ஸமாஸங் விகப்பெந்தி. பதிட்டா²மத்தாதி³பா⁴வேன நிரபெக்கா²தி ஹேதுஜா²னமக்³க³த⁴ம்மா பதிட்டா²னஉபனிஜ்ஜா²னநிய்யானமத்தேன அஞ்ஞத⁴ம்மனிரபெக்கா² ஹேதுஜா²னமக்³க³பச்சயகிச்சங் கரொந்தி. ஸாபெக்கா² ஏவாதி அஞ்ஞஸாபெக்கா² ஏவ. ஆஹரிதப்³ப³இஸிதப்³பா³ ஆஹாரிந்த்³ரியபச்சயேஹி உபகத்தப்³ப³த⁴ம்மா. தஸ்மாதி யஸ்மா யேஹி ஸாபெக்கா², தே அத்தனோ பச்சயுப்பன்னத⁴ம்மே பச்சயபா⁴வேனேவ பரிச்சி²ந்தி³த்வா திட்ட²ந்தி, தஸ்மா. தேனாஹ ‘‘தே வினாபி…பே॰… ந கத’’ந்தி. பரிச்சி²ந்த³ந்தி விஸேஸெந்தி. தந்தி து³தியங் ஆஹாரிந்த்³ரியக்³க³ஹணங். தத்தா²தி ஆஹாரிந்த்³ரியபச்சயனித்³தே³ஸே. ந கேவலஞ்ச தத்தே²வ, இத⁴ ச ஹேதுபச்சயனித்³தே³ஸே து³தியேன ஹேதுக்³க³ஹணேன பச்சயுப்பன்னானங் புன விஸேஸனகிச்சங் நத்தி², கஸ்மா? பச்சயபூ⁴தேனேவ ஹேதுனா ஸம்பயுத்தானங் அஞ்ஞேஸஞ்ச ஹேதூனங் அவிச்சி²ன்னத்தா.
புரிமவசனாபெக்கோ² வுத்தஸ்ஸேவ நித்³தே³ஸோதி தங்-ஸத்³த³ஸ்ஸ படினித்³தே³ஸபா⁴வமாஹ. பாகடீபூ⁴தே ஏவ அத்தே² பவத்ததி, பாகடீபா⁴வோ ச அஞ்ஞானபெக்கே²ன ஸத்³தே³ன பகாஸிதத்தா வேதி³தப்³போ³. அனபெக்க²னீயோ அத்த²ந்தரப்³யாவடத்தா. அஞ்ஞோதி ஹேதுஸத்³த³தோ அஞ்ஞோ. நித்³தி³ஸிதப்³ப³பகாஸகோ வுத்தோ நத்தி², யோ தங்-ஸத்³தே³ன படினித்³தே³ஸங் லபெ⁴ய்ய.
யதி³ ஏவங் ‘‘தங்ஸமுட்டா²னான’’ந்தி எத்த² கத²ந்தி ஆஹ ‘‘ஹேதுஸம்பயுத்தகானந்தி இமினா பனா’’திஆதி³. தத்த² பன-ஸத்³தோ³ ஸதிபி ஹேதூ ஹேதுஸம்பயுத்தகானங் நித்³தே³ஸபா⁴வே ஹேதுஸம்பயுத்தகஸத்³தே³ லப்³ப⁴மானானங் நித்³தி³ஸிதப்³பா³னங் பாகடீகரணஸங்கா²தங் ஹேதுஸத்³த³தோ விஸேஸங் ஜோதேதி. ‘‘ஹேதுஸம்பயுத்தகான’’ந்தி இமஸ்ஸ ஸமாஸபத³ஸ்ஸ உத்தரபத³த்த²ப்பதா⁴னத்தமாஹ ‘‘பச்சயுப்பன்னவசனேனா’’தி. தேன ச யதா²தி⁴ப்பேதஸ்ஸ அத்த²ஸ்ஸ ஏகதே³ஸோவ வுச்சதி த⁴ம்மானங் விஸேஸனபா⁴வதோதி ஆஹ ‘‘அஸமத்தேனா’’தி. விஸேஸனங் நாம விஸேஸிதப்³பா³பெக்க²ந்தி ஆஹ ‘‘பச்சயுப்பன்னவசனந்தராபெக்கே²னா’’தி. வுத்ததாய வினா படினித்³தே³ஸதா நத்தீ²தி ‘‘புப்³பே³ வுத்தேனா’’தி வுத்தங்.
தங்-ஸத்³தே³ன நித்³தி³ஸிதப்³ப³ந்தி ‘‘தங்ஸமுட்டா²னான’’ந்தி எத்த² தங்-ஸத்³தே³ன நித்³தி³ஸிதப்³ப³ங் ஹேதுஸம்பயுத்தகஸத்³தே³ பாகடீபூ⁴தங் கிங் பனாதி புச்ச²தி. தே ஹேதூ சேவ…பே॰… ஹேதுஸம்பயுத்தகா ச அஞ்ஞதா²தி ‘‘யேஹி ஹேதூஹீ’’திஆதி³னா வுத்தப்பகாரதோ அஞ்ஞதா² அஞ்ஞேன பகாரேன. தங் அஞ்ஞங் பகாரங் த³ஸ்ஸெந்தோ ‘‘தே ஹேதூ…பே॰… ஸம்ப³ந்தே⁴ ஸதீ’’தி ஆஹ. இதா⁴தி அனந்தரங் வுத்தஸம்ப³ந்த⁴னங் பு⁴ம்மனித்³தே³ஸேன பராமஸதி. தேனேவாதி பட²மேனேவ ஹேதுஸத்³தே³ன. தங்-ஸத்³தே³ன நித்³தி³ஸிதப்³பா³தி ‘‘தங்ஸமுட்டா²னான’’ந்தி எத்த² தங்-ஸத்³தே³ன நித்³தி³ஸிதப்³பா³ யதா² பாகடா, ஏவங் புப்³பே³ ‘‘தங்ஸம்பயுத்தகான’’ந்தி வுத்தசோத³னாயம்பி ஏவமேவ தேனேவ தங்-ஸத்³தே³ன நித்³தி³ஸிதப்³பா³ பாகடா ப⁴விதுங் அரஹந்தி. ததா² ச ஸதி நித்³தி³ஸிதப்³ப³ஸ்ஸ…பே॰… ந யுஜ்ஜெய்ய. து³வித⁴ம்பி வா ஹேதுக்³க³ஹணங் அபனெத்வாதி ‘‘ஹேதூ ஹேதுஸம்பயுத்தகான’’ந்தி எத்த² கதங் த்³விப்பகாரஹேதுக்³க³ஹணங் அவிசாரெத்வா ‘‘தங்ஸம்பயுத்தகானந்தி அவத்வா’’திஆதி³னா தங்-ஸத்³த³வசனீயதங் சோதே³தி, ‘‘நித்³தி³ஸிதப்³ப³ஸ்ஸ அபாகடத்தா’’திஆதி³னா பரிஹரதி ச. ஹேதூ ஹி பச்சயாதி இத³ங் அயங் ஹேதுபச்சயகதா²தி கத்வா வுத்தங்.
தங் ந வுத்தந்தி சித்தஸமுட்டா²னவசனங் ந வுத்தங். தஸ்ஸாதி ஸஹஜாதபச்சயஸ்ஸ. கடத்தாரூபஸ்ஸ பச்சயபா⁴வோ ந வுத்தோ ப⁴வெய்ய, வுத்தோவ ஸோ ‘‘விபாகாப்³யாகதோ ஏகோ க²ந்தோ⁴ திண்ணன்னங் க²ந்தா⁴னங் கடத்தா ச ரூபானங் ஸஹஜாதபச்சயேன பச்சயோ, தயோ க²ந்தா⁴ ஏகஸ்ஸ க²ந்த⁴ஸ்ஸ கடத்தா ச ரூபான’’ந்திஆதி³னா, தஸ்மா சித்தசேதஸிகானங் கடத்தாரூபபச்சயபா⁴வோ ந ஸக்கா நிவாரேதுங். தத்தா²தி ஸஹஜாதபச்சயனித்³தே³ஸே. தத்த² ஹி ‘‘சித்தசேதஸிகா த⁴ம்மா சித்தஸமுட்டா²னானங் ரூபானங் ஸஹஜாதபச்சயேன பச்சயோ’’தி சித்தஸமுட்டா²னரூபானி ஏவ நித்³தி³ட்டா²னி. இதா⁴பீதி இமஸ்மிங் ஹேதுபச்சயனித்³தே³ஸேபி. ஏவங் ப⁴விதப்³ப³ந்தி ‘‘சித்தஸமுட்டா²னான’’ந்தி நித்³தே³ஸேன ப⁴விதப்³ப³ங். யதி³ ஏவங் கஸ்மா ததா² ந வுத்தந்தி ஆஹ ‘‘சித்தஸமுட்டா²னானந்தி பனா’’திஆதி³. விஸேஸிதங் ஹோதி ஸப்³ப³சித்தசேதஸிகாஸமுட்டா²னபா⁴வேன. வசனேனாதி யதா²த³ஸ்ஸிதேன ஸஹஜாதபச்சயனித்³தே³ஸவசனேன. சித்தசேதஸிகானங் பச்சயபா⁴வோ ஏவ ஹி தத்த² பச்சயனித்³தே³ஸே வுத்தோ, ந சித்தசேதஸிகானங் ஸமுட்டா²னபா⁴வோதி அதி⁴ப்பாயோ.
ஹேதுஆதி³படிப³த்³த⁴தஞ்ச த³ஸ்ஸேதி யத³க்³கே³ன தானி சித்தபடிப³த்³த⁴வுத்தீனி, தத³க்³கே³ன தங்ஸம்பயுத்தத⁴ம்மபடிப³த்³த⁴வுத்தீனிபி ஹொந்தீதி. ஆரம்மணமேதங் ஹோதீதி பதிட்டி²தேதி கம்மங் ஜவாபெத்வா படிஸந்தி⁴ஆகட்³ட⁴னஸமத்த²தாபதிட்டா²பத்தே கம்மவிஞ்ஞாணே விருள்ஹேதி விருள்ஹே விருஹந்தேதி அத்தோ². அத² வா பதிட்டா² விஞ்ஞாணஸ்ஸ ஹோதீதி கிலேஸாபி⁴ஸங்கா²ரஸங்கா²தே கம்மவிஞ்ஞாணஸ்ஸ டி²தியா பவத்தியா ஆரம்மணே பச்சயே படிஸித்³தே⁴ ஆயதிபடிஸந்தி⁴விஞ்ஞாணஸ்ஸ பதிட்டா² ஹோதி, தஸ்மிங் படிஸந்தி⁴விஞ்ஞாணே புனப்³ப⁴வாபி⁴னிப்³ப³த்திவஸேன பதிட்டி²தே பதிட்ட²ஹந்தே விருள்ஹே பீ³ஜபா⁴வேன விருஹந்தே நாமரூபஸ்ஸ அவக்கந்தி ஹோதீதி ஏவமெத்த² அத்தோ² வேதி³தப்³போ³. தேனாஹ ‘‘படிஸந்தி⁴னாமரூபஸ்ஸ விஞ்ஞாணபச்சயதா வுத்தா’’தி.
புரிமதரஸித்³தா⁴யாதி கெ²த்தபா⁴வனிப்³ப³த்தியா புரேதரமேவ ஸித்³தா⁴ய பத²வியா. அத்தலாபோ⁴யேவ செத்த² பதிட்டா²னங், ந படிலத்³த⁴த்தபா⁴வானங் அவட்டா²னந்தி த³ஸ்ஸெந்தோ ‘‘பதிட்டா²னங் கம்மஸ்ஸ கடத்தா உப்பத்தீதி வுத்தங் ஹோதீ’’தி ஆஹ.
ஸேஸரூபானந்தி படிஸந்தி⁴க்க²ணே பத²வீதா⁴துஆதீ³னங் ஸேஸரூபானங், பவத்தே பன திஸந்ததிரூபானம்பி. ஸஹப⁴வனமத்தங் வா த³ஸ்ஸேதி. ஸஹபா⁴வேனபி ஹி அத்தி² காசி விஸேஸமத்தா. கத்த²சி கத்த²சீதி பகதிகாலப⁴வவிஸேஸாதி³கே. ததியபகதியஞ்ஹி பட²மகப்பிககாலே ச பா⁴வகலாபோ நத்தி², ரூபப⁴வே காயகலாபோபி. ஆதி³-ஸத்³தே³ன தத்தே²வ கா⁴னஜிவ்ஹாகலாபா, காமப⁴வே ச அந்தா⁴தீ³னங் சக்கா²தி³கலாபா ஸங்க³ய்ஹந்தி. கத்த²சி அபா⁴வாபா⁴வதோதி நாமரூபோகாஸே கத்த²சிபி அபா⁴வாபா⁴வதோ.
தேஸந்தி பவத்தியங் கடத்தாரூபாதீ³னங். ந ஹி ஹேது பவத்தியங் கடத்தாரூபஸ்ஸ பச்சயோ ஹோதி, உதுஆஹாரஜானங் பன ஸம்ப⁴வோயேவ நத்தி². தேன வுத்தங் ‘‘பச்சயபா⁴வப்பஸங்கோ³யேவ நத்தீ²’’தி. ந பன லப்³ப⁴தி பச்சயபச்சனீயே தாதி³ஸஸ்ஸ வாரஸ்ஸ அனுத்³த⁴டத்தா. இத³ந்தி ‘‘பவத்தியங் கடத்தாரூபாதீ³னங் பச்சயபா⁴வபடிபா³ஹனதோ’’தி இத³ங் ‘‘ஹேதூ ஸஹஜாதான’’ந்தி அதே³ஸனாய பரிஹாரவசனங், ஈதி³ஸீ பன சோத³னா அனோகாஸா ஏவாதி த³ஸ்ஸேதுங் ‘‘ப⁴க³வா பனா’’திஆதி³
ஹேதுபச்சயனித்³தே³ஸவண்ணனா நிட்டி²தா.
2. ஆரம்மணபச்சயனித்³தே³ஸவண்ணனா
2. உப்பஜ்ஜனக்க²ணேயேவாதி தேனாதி சக்கு²விஞ்ஞாணாதீ³னங் வத்தமானக்க²ணேயேவ ரூபாதீ³னங் ஆரம்மணபச்சயத்தேன. அனாலம்பி³யமானானந்தி ஸப்³பே³ன ஸப்³ப³ங் நாலம்பி³யமானானந்தி அத்தோ². அஞ்ஞதா² ஹி யதா²வுத்தானங் ரூபாதீ³னங் யதா³ ஆரம்மணபச்சயத்தாபா⁴வோ, ததா³ அனாலம்பி³யமானதாவாதி. ஸப்³ப³ரூபானீதி ஸப்³பா³னி ரூபாயதனானி, யத்தகானி தானி ஆபாத²க³தானி யொக்³யதே³ஸே டி²தானி, தானி ஸப்³பா³னீதி அத்தோ². ஸஹ ந ஹொந்தீதி ஏகஜ்ஜ²ங் ஆரம்மணங் ந ஹொந்தி. ஸதிபி ஹி அனேகேஸங் ஏகஜ்ஜ²ங் ஆபாத²க³மனே யத்த² யத்த² புப்³பா³போ⁴கோ³, தங் தங்யேவ ஆரம்மணங் ஹோதி, ந ஸப்³ப³ங். நீலாதி³ஸங்கா⁴தவஸேன சேதங் வுத்தங், ந பச்சேகங் நீலாதி³ரூபாயதனமத்தவஸேன. ஸமுதி³தானியேவ ஹி ரூபாயதனானி சக்கு²விஞ்ஞாணஸ்ஸ ஆரம்மணங், ந விஸுங் விஸுந்தி தா⁴துவிப⁴ங்க³வண்ணனாயங் த³ஸ்ஸிதோயங் நயோ. யங் பன அட்ட²கதா²யங் ‘‘தே தே விஸுங் விஸுங் ஆரம்மணபச்சயோ ஹொந்தீ’’திபி வுத்தங், தம்பி யதா²வுத்தமேவத்த²ங் ஸந்தா⁴ய வுத்தங். அஞ்ஞதா² ரூபாயதனங் மனிந்த்³ரியகோ³சரங் நாம ந ஸியா. ஸத்³தா³தீ³ஸுபி ஏஸேவ நயோ. தேனேவாஹ ‘‘ததா² ஸத்³தா³த³யோபீ’’தி. ‘‘ஸஹ ந ஹொந்தீ’’தி வுத்தமத்த²ங் பாளியா விபா⁴வேதுங் ‘‘யங் யந்தி ஹி வசனங் ரூபாதீ³னி பி⁴ந்த³தீ’’தி ஆஹ.
‘‘யே ஏதே’’திஆதி³கோ புரிமோ அத்தோ², ‘‘ந ஏகதோ ஹொந்தீ’’திஆதி³கோ பன பச்சி²மோ, ‘‘ஸப்³பா³ரம்மணதாதி³வஸேன வா இதா⁴பி அத்தோ² க³ஹேதப்³போ³’’தி கஸ்மா வுத்தங். ந ஹி ‘‘யங் யங் வா பனாரப்³பா⁴’’தி இமிஸ்ஸா பாளியா விய ‘‘யங் யங் த⁴ம்மங் ஆரப்³பா⁴’’தி இமஸ்ஸ பாட²ஸ்ஸ புரதோ மனோவிஞ்ஞாணஸ்ஸ ஸப்³பா³ரம்மணதா நாக³தா. வுத்தஞ்ஹி ‘‘ஸப்³பே³ த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஆரம்மணபச்சயேன பச்சயோ’’தி. ந
பவத்தந்தி பவத்தனங். நதி³யா ஸந்த³னங் பப்³ப³தஸ்ஸ டா²னந்தி ஹி வுத்தா அவிரதமவிச்சே²த³னாயங் ததா²பவத்திகிரியாவ. தேனாஹ ‘‘அவிரதங் அவிச்சி²ன்னங் ஸந்த³ந்தீ’’தி. ஏவந்தி யதா² ‘‘ஸந்த³ந்தீ’’தி வத்தமானவசனங் வுத்தங், ஏவங் ‘‘யே யே த⁴ம்மா உப்பஜ்ஜந்தீ’’தி ஸப்³ப³ஸங்க³ஹவஸேன உப்பஜ்ஜனஸ்ஸ க³ஹிதத்தா ஆரம்மணபவக்³க³தோ ‘‘உப்பஜ்ஜந்தீ’’தி வத்தமானவசனங் வுத்தந்தி அத்தோ². தேனாஹ அட்ட²கதா²யங் ‘‘ஸப்³ப³காலஸங்க³ஹவஸேனா’’திஆதி³. ததா² ச வுத்தங் ‘‘அதீதானாக³த…பே॰… அதி⁴ப்பாயோ’’தி, அதீதானாக³தபச்சுப்பன்னானங் சித்தசேதஸிகானந்தி அத்தோ². ஸமுதா³யவஸேனாதி சித்தேன ராஸீகரணவஸேன. அதி⁴ப்பாயோதி இமினா வத்தமானுபசாரேன வினாவ ‘‘யே யே த⁴ம்மா உப்பஜ்ஜந்தீ’’தி எத்த² வத்தமானத்த²ங் ஸக்கா யோஜேதுந்தி இமமத்த²ங் உல்லிங்கே³தி. தேனாஹ ‘‘இமே பனா’’திஆதி³. யதி³பி பச்சயத⁴ம்மா கேசி அதீதா அனாக³தாபி ஹொந்தி, பச்சயுப்பன்னத⁴ம்மோ பன பச்சுப்பன்னோ ஏவாதி ஆஹ ‘‘அதீதானாக³தானங் ந ஹொந்தீ’’தி. உப்பாதே³ வா ஹி பச்சயுப்பன்னஸ்ஸ பச்சயேன ப⁴விதப்³ப³ங் டி²தியங் வாதி. தஸ்மாதி யஸ்மா அதீதானாக³தா பரமத்த²தோ நத்தி², தஸ்மா. தேஸூதி பச்சயுப்பன்னேஸு. தங்தங்பச்சயாதி தங் தங் ரூபாதி³ஆரம்மணங் பச்சயோ ஏதேஸந்தி தங்தங்பச்சயா. அயமத்தோ² த³ஸ்ஸிதோ ஹோதி ஸமானஸபா⁴வத்தா. ந ஹி அத்தா²பே⁴தே³ன ஸபா⁴வபே⁴தோ³ அத்தி². ந பன தங்தங்பச்சயவந்ததா த³ஸ்ஸிதா ஹோதி அதீதானாக³தேஸு நிப்பரியாயேன தத³பா⁴வதோ. யஸ்மா பச்சயவந்தோ பச்சயுப்பன்னாயேவ, தே ச பச்சுப்பன்னாயேவாதி.
யங் யங் த⁴ம்மங் தே தே த⁴ம்மாதி யங்னிமித்தாயங்வசனபே⁴தோ³, தங் த³ஸ்ஸேதுங் ‘‘எத்த² சா’’திஆதி³ ஆரத்³த⁴ங். ரூபாரூபத⁴ம்மா ஹி கலாபதோ பவத்தமானாபி சித்தசேதஸிகானங் கதா³சி விஸுங் விஸுங் ஆரம்மணங் ஹொந்தி, கதா³சி ஏகஜ்ஜ²ங், ந எத்த² நியமோ அத்தி², புரிமாபோ⁴கோ³யேவ பன ததா²க³ஹணே காரணங். தயிமங் தீ³பேதுங் ப⁴க³வதா யங்வசனபே⁴தோ³ கதோதி ச ஸக்கா வத்துங், யஸ்மா பன ஏககலாபபரியாபன்னானம்பி த⁴ம்மானங் ஏகஜ்ஜ²ங் க³ஹணே ந ஸமுதா³யோ க³ய்ஹதி ததா³போ⁴கா³பா⁴வதோ, அத² கோ² ஸமுதி³தா த⁴ம்மா ஏவாதி ஸஹக்³க³ஹணம்பி விஸுங்க³ஹணக³திகங், தஸ்மா விஸுங்க³ஹணஸப்³பா⁴வதீ³பனத்த²ங் ‘‘யங் ய’’ந்தி வத்வா ஸதிபி விஸுங்க³ஹணே தே ஸப்³பே³ ஏகஜ்ஜ²ங் ஆரம்மணபச்சயோ ஹொந்தீதி த³ஸ்ஸனத்த²ங் ‘‘தே தே’’தி வுத்தந்தி இமமத்த²ங் த³ஸ்ஸெந்தோ ‘‘சத்தாரோ ஹி க²ந்தா⁴’’திஆதி³மாஹ. தத்த² வேத³னாதீ³ஸூதி வேத³னாதீ³ஸு சதூஸு க²ந்தே⁴ஸு அபி⁴ந்தி³த்வா க³ஹணவஸேன, பி⁴ந்தி³த்வா பன க³ஹணவஸேன ப²ஸ்ஸாதீ³ஸு. யோ ச ரூபாதி³கோதி இத³ங் விஞ்ஞாணந்தரஸ்ஸ ஸாதா⁴ரணாரம்மணவஸேன வுத்தங், யே ச அனேகே ப²ஸ்ஸாத³யோதி இத³ங் அஸாதா⁴ரணாரம்மணவஸேன. தே ஸப்³பே³தி தே ஸாதா⁴ரணாஸாதா⁴ரணப்பபே⁴தே³ ஸப்³பே³பி ஆரம்மணத⁴ம்மே. ஏகேகமேவ ஆரப்³ப⁴ உப்பஜ்ஜந்தீதி எத்த² யங் வத்தப்³ப³ங், தங் ஹெட்டா² வுத்தமேவ. ரூபாரம்மணத⁴ம்மா ச அனேகே நீலாதி³பே⁴த³தோ. ததா²தி அனேகே. தேன பே⁴ரிஸத்³தா³தி³கே, மூலக³ந்தா⁴தி³கே, மூலரஸாதி³கே, கதி²னஸம்ப²ஸ்ஸாதி³கே, வேத³னாதி³கே ச ஸங்க³ண்ஹாதி. அனேகேதி ஹி இமினா அனேககலாபக³தானங்யேவ வண்ணாதீ³னங் இந்த்³ரியவிஞ்ஞாணாரம்மணபா⁴வமாஹ. ஸாமஞ்ஞதோ ஹி வுத்தங் யதா²ரஹங் பி⁴ந்தி³த்வா நித³ஸ்ஸிதப்³ப³ங் ஹோதீதி.
குஸலவிபாகஸ்ஸாதி குஸலஸ்ஸ விபாகஸ்ஸ ச. ந ஹி நிப்³பா³னங் புப்³பே³ நிவுத்த²ந்தி இத³ங் ‘‘தி³ட்ட²னிப்³பா³னோயேவா’’திஆதி³னா வக்க²மானமேவ அத்த²ங் ஹத³யே ட²பெத்வா வுத்தங். புப்³பே³னிவாஸானுஸ்ஸதிஞாணேன ஹி நிப்³பா³னவிபா⁴வனங் அதி³ட்ட²ஸச்சஸ்ஸ வா ஸியா தி³ட்ட²ஸச்சஸ்ஸபி வா. தத்த² அதி³ட்ட²ஸச்சேன தாவ தங் விபா⁴வேதுமேவ ந ஸக்கா அப்படிவித்³த⁴த்தா, இதரஸ்ஸ பன பகே³வ விபூ⁴தமேவாதி தங் தேன விபா⁴விதங் நாம ஹோதீதி அதி⁴ப்பாயோ. எத்த² ச ‘‘ந ச தங் வுத்த’’ந்தி இமினா புப்³பே³னிவாஸானுஸ்ஸதிஞாணஸ்ஸ நிப்³பா³னாரம்மணகரணாபா⁴வங் ஆக³மதோ த³ஸ்ஸெத்வா ‘‘ந ஹி நிப்³பா³ன’’ந்திஆதி³னா யுத்திதோ த³ஸ்ஸேதி. தத்த² ‘‘ந புப்³பே³ நிவுத்த²ங் அஸங்க²தத்தா’’தி கஸ்மா வுத்தங்? கோ³சராஸேவனாய ஆஸேவிதஸ்ஸபி நிவுத்த²ந்தி இச்சி²தத்தா. தி³ட்ட²ஸச்சோயேவ ஹி புப்³பே³னிவாஸானுஸ்ஸதிஞாணேன ஏவங் அனாக³தங்ஸஞாணேபி யோஜேதப்³ப³ந்தி யதா² புப்³பே³னிவாஸானுஸ்ஸதிஞாணஸ்ஸ நிப்³பா³னாரம்மணதா த³ஸ்ஸிதா, ஏவங் அனாக³தங்ஸஞாணேபி யதா²ரஹங் யோஜேதப்³ப³ங். தத்த² பன ‘‘க²ந்த⁴படிப³த்³த⁴விபா⁴வனகாலே’’திஆதி³னா யோஜனா வேதி³தப்³பா³. தேன வுத்தங் ‘‘யதா²ரஹ’’ந்தி. கஸ்ஸசி அபி⁴ஞ்ஞாப்பத்தஸ்ஸபி ரூபாவசரஸ்ஸ, பகே³வ இதரஸ்ஸ.
ஆரம்மணபச்சயனித்³தே³ஸவண்ணனா நிட்டி²தா.
3. அதி⁴பதிபச்சயனித்³தே³ஸவண்ணனா
3. து⁴ரஸஹசரியதோ ‘‘து⁴ரந்தி து⁴ரக்³கா³ஹ’’ந்தி. ச²ந்த³ஸ்ஸ புப்³ப³ங்க³மதாஸித்³த⁴ங் பாஸங்ஸபா⁴வங் உபாதா³ய அட்ட²கதா²யங் ‘‘ஜெட்ட²க’’ந்தி வுத்தந்தி தமேவத்த²ங் தீ³பெந்தோ ‘‘ஸெட்ட²’’ந்தி ஆஹ. ததா² ஹி வுத்தங் அட்ட²ஸாலினியங் ‘‘ச²ந்த³ங் புப்³ப³ங்க³மங் கத்வா ஆயூஹித’’ந்தி. புரிமச²ந்த³ஸ்ஸாதி ‘‘ச²ந்தா³தி⁴பதீ’’தி புரிமஸ்மிங் பதே³ நித்³தே³ஸவஸேன வுத்தஸ்ஸ ச²ந்த³ஸத்³த³ஸ்ஸ ஸமானரூபேன ஸதி³ஸாகாரேன. தத³னந்தரங் நித்³தி³ட்டே²னாதி தஸ்ஸ புரிமஸ்ஸ ச²ந்த³ஸத்³த³ஸ்ஸ அனந்தரங் நித்³தே³ஸவஸேன வுத்தேன. ததோ ஏவ ச தங்ஸமானத்த²தாய ச தங்ஸம்ப³ந்தே⁴ன ‘‘ச²ந்த³ஸம்பயுத்தகான’’ந்தி எத்த² ச²ந்த³ஸத்³தே³னேவ அதி⁴பதிஸத்³த³ரஹிதேனாதி அத்தோ². பச்சயபூ⁴தஸ்ஸாதி அதி⁴பதிபச்சயபூ⁴தஸ்ஸ. ஸம்பயுத்தகவிஸேஸனபா⁴வோதி அத்தனா ஸம்பயுத்தத⁴ம்மானங் ஸோ ஏவ அதி⁴பதிபச்சயதாஸங்கா²தோ விஸேஸனபா⁴வோ. ஏஸ நயோதி இமினா ‘‘வீரியாதி⁴பதி வீரியஸம்பயுத்தகானந்திஆதீ³ஸு புரிமவீரியஸ்ஸ ஸமானரூபேனா’’திஆதி³னா வத்தப்³ப³ங் அத்த²வசனங் அதிதி³ஸதி.
குஸலாப்³யாகதானங் பவத்திந்தி குஸலாப்³யாகதானங் அதி⁴பதீனங் பவத்தனாகாரங். அலத்³த⁴ங் ஆரம்மணங் லத்³த⁴ப்³ப³ங் லப்³ப⁴னீயங், லத்³து⁴ங் வா ஸக்குணெய்யங், து³தியே பன அத்தே² லாப⁴மரஹதீதி லத்³த⁴ப்³ப³ங். அவஞ்ஞாதந்தி பகே³வ அனவஞ்ஞாதந்தி அத்தோ².
அப்பனாப்பத்தா குஸலகிரியத⁴ம்மா மஹாப³லா ஸாதி⁴பதிகா ஏவ ஹொந்தி, ததா² மிச்ச²த்தனியதாபீதி ஆஹ ‘‘அப்பனாஸதி³ஸா…பே॰… நுப்பஜ்ஜந்தீ’’தி. அப்பனாஸதி³ஸாதி கம்மகிலேஸாவரணபூ⁴தா ச தேதி தே மிச்ச²த்தனியதத⁴ம்மா கம்மாவரணபூ⁴தா, யே ஆனந்தரியப்பகாரா கிலேஸாவரணபூ⁴தா, யே நியதமிச்சா²தி³ட்டி²த⁴ம்மா, ஸம்பயுத்தசேதனாய பனெத்த² கிலேஸாவரணபக்கி²கதா த³ட்ட²ப்³பா³ ஆனந்தரியசேதனாஸம்பயுத்தஸ்ஸ படிக⁴ஸ்ஸ கம்மாவரணபக்கி²கதா விய. பச்சக்க²க³தி அனந்தரதாய வினா பா⁴வினீதி வுத்தங் ‘‘பச்சக்க²ஸக்³கா³னங் காமாவசரதே³வானம்பீ’’தி. தேன தேஸு ஆனந்தரியா விய அஸம்பா⁴வினோ அஹேதுகாபி⁴னிவேஸாத³யோபீதி த³ஸ்ஸேதி.
திவிதோ⁴பி கிரியாரம்மணாதி⁴பதீதி எத்த² அயங் கிரியாரம்மணாதி⁴பதீதி அஜ்ஜ²த்தாரம்மணோ அதி⁴ப்பேதோ, உதா³ஹு ப³ஹித்³தா⁴ரம்மணோதி உப⁴யதா²பி ந ஸம்ப⁴வோ ஏவாதி த³ஸ்ஸெந்தோ ‘‘காமாவசராதி³பே⁴த³தோ பனா’’திஆதி³மாஹ. தத்த² பரஸந்தானக³தானங் ஸாரம்மணத⁴ம்மானங் அதி⁴பதிபச்சயதா அபா⁴வதோதி அவசனதோ. அவசனஞ்ஹி நாம யதா²த⁴ம்மஸாஸனே அபி⁴த⁴ம்மே அபா⁴வோ ஏவாதி ஏதேனேவ அனுத்³த⁴டதாபி அவுத்ததோ வேதி³தப்³பா³. அஜ்ஜ²த்தாரம்மணப³ஹித்³தா⁴ரம்மணத்³வயவினிமுத்தஸ்ஸ ஸாரம்மணத⁴ம்மஸ்ஸ அபா⁴வதோ நத்தீ²தி விஞ்ஞாயதீதி வத்தப்³பே³ தமேவ விஞ்ஞாயமானதங் ஸம்பா⁴வெந்தோ ‘‘நத்தீ²தி விஞ்ஞாயமானேபீ’’தி ஆஹ. தேன வுத்தங் ‘‘ப³ஹித்³தா⁴ க²ந்தே⁴’’திஆதி³. ரூபே ஏவ ப⁴விதுங் அரஹதி ஏதி³ஸேஸு டா²னேஸு அரூபே அஸம்ப⁴வதோதி அதி⁴ப்பாயோ. அஸம்ப⁴வதோ ச யதா²வுத்தபாளிஅனுஸாரதோதி வேதி³தப்³ப³ந்தி. ‘‘விசாரித’’ந்தி கஸ்மா வுத்தங், நனு ‘‘அதீதாரம்மணே அனாக³தே க²ந்தே⁴ க³ருங் கத்வா அஸ்ஸாதே³தீ’’திஆதி³வசனதோ அரூபேபி ஏதி³ஸேஸு டா²னேஸு க²ந்த⁴ஸத்³தோ³ பவத்ததேவ. ஆவஜ்ஜனகிரியஸப்³பா⁴வதோ பனாதி இத³ங் யதா²த³ஸ்ஸிதபாளியா விரோத⁴பரிஹரணாதி⁴ப்பாயேன வுத்தங், அவசனங் பன கத்த²சி வினெய்யஜ்ஜா²ஸயேன, கத்த²சி நயத³ஸ்ஸனேன ஹோதீதி குதோ விரோதா⁴வஸரோ.
அதி⁴பதிபச்சயனித்³தே³ஸவண்ணனா நிட்டி²தா.
4. அனந்தரபச்சயனித்³தே³ஸவண்ணனா
4. யதா²வுத்தா நிரோதா⁴னந்தரஸுஞ்ஞதா நிரோத⁴ப்பத்ததா ஓகாஸதா³னவிஸேஸோ, அத்தனோ அனுரூபசித்துப்பாத³னஸமத்த²தா சித்தனியமஹேதுதா, தத்த² சித்தனியமஹேதுவிஸேஸோ த³ட்ட²ப்³போ³. தா⁴துவஸேனாதி விஞ்ஞாணதா⁴துமனோதா⁴துமனோவிஞ்ஞாணதா⁴துவஸேன. எத்தகா ஏவ ஹி தா⁴துயோ பி⁴ன்னஸபா⁴வா அனந்தரபச்சயதாய நியமெத்வா வத்தப்³பா³, அபி⁴ன்னஸபா⁴வா பன விஸேஸாபா⁴வதோ புரிமதாமத்தங்யேவ விஸேஸங் புரக்க²த்வா வத்தப்³பா³தி தா குஸலாதி³பே⁴தே³ன ததா² வுத்தா. தேனாஹ ‘‘குஸலாதி³வஸேன சா’’தி. யா பன மனோதா⁴துமனோவிஞ்ஞாணதா⁴துவஸேன அனந்தரபச்சயதா வத்தப்³பா³, தத்த² மனோவிஞ்ஞாணதா⁴து மனோதா⁴துயா அனந்தரபச்சயேன பச்சயோதி வுச்சமானோ ஸம்மோஹோ ஸியா, புரே மனோதா⁴துயா அனந்தரபச்சயபா⁴வேன வுத்தா, இதா³னி மனோவிஞ்ஞாணதா⁴து மனோதா⁴துயாதி பச்சயபச்சயுப்பன்னவிஸேஸா ந விஞ்ஞாயெய்ய, மனோதா⁴துயா பன சக்கு²விஞ்ஞாணாதி³தா⁴தூனங் அனந்தரபச்சயபா⁴வே வுச்சமானே நியமோ நத்தி². தேனாஹ ‘‘மனோதா⁴து சக்கு²விஞ்ஞாணதா⁴துயாதி சா’’தி ததே²வாதி நியமாபா⁴வதோ ஏவாதி அத்தோ². தஸ்மாதி யஸ்மா இதோ அஞ்ஞதா² தே³ஸனாய பச்சயபச்சயுப்பன்னானங் விஸேஸாபா⁴வோ சித்தவிஸேஸத³ஸ்ஸனவிச்சே²தோ³ நியமாபா⁴வோ சாதி இமே தோ³ஸா ஆபஜ்ஜந்தி, தஸ்மா. நித³ஸ்ஸனேனாதி தா⁴துவஸேன நித³ஸ்ஸனேன. நயங் த³ஸ்ஸெத்வாதி ‘‘மனோவிஞ்ஞாணதா⁴து தங்ஸம்பயுத்தகா ச த⁴ம்மா மனோதா⁴துயா தங்ஸம்பயுத்தகானஞ்ச த⁴ம்மானங் அனந்தரபச்சயேன பச்சயோ’’தி ஏவமாதி³கஸ்ஸ அனந்தரபச்சயதாக்³க³ஹணஸ்ஸ நயங் த³ஸ்ஸெத்வா. நிரவஸேஸத³ஸ்ஸனத்த²ந்தி நிரவஸேஸஸ்ஸ அனந்தரபச்சயபா⁴வினோ சித்துப்பாத³ஸ்ஸ த³ஸ்ஸனத்த²ங்.
ஸதி³ஸகுஸலானந்தி ஸமானகுஸலானங், ஸமானதா செத்த² ஏகவீதி²பரியாபன்னதாய வேதி³தப்³பா³. தேனேவாஹ ‘‘பூ⁴மிபி⁴ன்னானம்பி பச்சயபா⁴வோ வுத்தோ ஹோதீ’’தி. ஸமானவீதி²தா ச யஸ்மா ஸமானவேத³னா ஸமானஹேதுகா ச ஹொந்தி, தஸ்மா ‘‘வேத³னாய வா ஹேதூஹி வா ஸதி³ஸகுஸலான’’ந்தி ஆஹ. வா-ஸத்³தோ³ செத்த² அனியமத்தோ². தேன ஞாணஸங்கா²ராதி³பே⁴த³ஸ்ஸபி விகப்பனவஸேன ஸங்க³ஹோ த³ட்ட²ப்³போ³. சுதிபி க³ஹிதா தங்ஸபா⁴வத்தா. ப⁴வங்க³சித்தமேவ ஹி பரியோஸானே ‘‘சுதீ’’தி வுச்சதி. குஸலாகுஸலானந்தரஞ்ச கதா³சி ஸா உப்பஜ்ஜதீதி ததா³ரம்மணம்பி க³ஹிதந்தி த³ட்ட²ப்³ப³ங், கிரியஜவனானந்தரங் ததா³ரம்மணுப்பத்தியந்தி அதி⁴ப்பாயோ.
காமாவசரகிரியாய ‘‘ஆவஜ்ஜனக்³க³ஹணேன காமாவசரகிரியங் விஸேஸேதீ’’தி ஆஹ. தமேவ ஹி அத்த²ங் பாகடதரங் காதுங் ‘‘காமாவசரவிபாகோ’’திஆதி³ வுத்தங். வொட்ட²ப்³ப³னம்பி க³ஹிதங் ஸந்தீரணானந்தரத்தாதி அதி⁴ப்பாயோ.
அனந்தரபச்சயனித்³தே³ஸவண்ணனா நிட்டி²தா.
6. ஸஹஜாதபச்சயனித்³தே³ஸவண்ணனா
6. போராணபாடோ²தி புராதனோ அட்ட²கதா²பாடோ². இமஸ்ஸாதி இமஸ்ஸ பத³ஸ்ஸ. அவுத்தஸ்ஸாதி பாளியங் அவுத்தஸ்ஸ. யதி³பி ஸஹக³தஸத்³த³ஸ்ஸ அத்த²ஸங்வண்ணனாயங் ஸங்ஸட்ட²ஸத்³த³ஸ்ஸ விய ஸமானத்த²ஸ்ஸபி கத்த²சி ஸத்³த³ந்தரஸ்ஸ அத்தோ² வுச்சதி பரியாயவிஸேஸபோ³த⁴னத்த²ங், ததா²பி ந மூலஸத்³த³ஸ்ஸ அத்தோ² விபா⁴விதோ ‘‘ந ச…பே॰… ஹோதீ’’தி. ‘‘அஞ்ஞமஞ்ஞ’’ந்தி ச ‘‘அஞ்ஞஅஞ்ஞ’’ந்தி வத்தப்³பே³ ம-காராக³மங் கத்வா நித்³தே³ஸோ, கம்மப்³யதிஹாரே சேதங் பத³ங், தஸ்மா இதரேதரந்தி வுத்தங் ஹோதி. பச்சயபச்சயுப்பன்னானங் ஏகஸ்மிங்யேவ க²ணே பச்சயுப்பன்னபச்சயபா⁴வஸ்ஸ இச்சி²தத்தா யோ ஹி யஸ்ஸ பச்சயோ யஸ்மிங் க²ணே, தஸ்மிங்யேவ க²ணே ஸோபி தஸ்ஸ பச்சயோதி அயமெத்த² அஞ்ஞமஞ்ஞபச்சயதா. ததா² ஹி அட்ட²கதா²யங் ‘‘அஞ்ஞோ அஞ்ஞஸ்ஸா’’தி வத்வா ‘‘இமினா…பே॰… தீ³பேதீ’’தி வுத்தங். ஓக்கமனங் பவிஸனந்தி அத்தோ². ஆஸனக்க²ணே ஹி த⁴ம்மா புரிமப⁴வதோ இமங் ப⁴வங் பவிஸந்தா விய ஹொந்தி. தேன வுத்தங் ‘‘பரலோகதோ இமங் லோகங் ஆக³ந்த்வா பவிஸந்தங் விய உப்பஜ்ஜதீ’’தி. தஸ்மா அவிஸேஸேன படிஸந்தி⁴ ஓக்கந்திஸத்³தா³பி⁴தெ⁴ய்யாதி அதி⁴ப்பாயேன வுத்தங் ‘‘ஓக்கந்தி…பே॰… அதி⁴ப்பாயேனாஹா’’தி. தங்னிவாரணத்த²ந்தி தஸ்ஸ க²ணந்தரே ரூபீனங் ஸஹஜாதபச்சயபா⁴வஸ்ஸ ‘‘கஞ்சி காலே ந ஸஹஜாதபச்சயேன பச்சயோ’’தி நிவாரணத்த²ங். தேன பத³த்³வயேன ஸமானேஸு பச்சயபச்சயுப்பன்னத⁴ம்மேஸு புரிமதோ பச்சி²மஸ்ஸ விஸேஸமத்த²ங் த³ஸ்ஸேதி.
ஏவஞ்ச ‘‘கஞ்சி காலே’’தி பத³ஸ்ஸ ‘‘கேசி காலேதி வா, கிஸ்மிஞ்சி காலே’’தி வா விப⁴த்திவிபல்லாஸேன அத்தோ² க³ஹேதப்³போ³தி அதி⁴ப்பாயேன பட²மவிகப்பங் த³ஸ்ஸெத்வா இதா³னி பகாரந்தரேன த³ஸ்ஸேதுங் ‘‘கஞ்சி காலேதி கேசி கிஸ்மிஞ்சி காலேதி வா அத்தோ²’’தி ஆஹ. தேன ‘‘கஞ்சீ’’தி அயங் ஸாமஞ்ஞனித்³தே³ஸோதி த³ஸ்ஸேதி. யோ ஹி அயங் ‘‘கேசீ’’தி பச்சத்தப³ஹுவசனாபி⁴தெ⁴ய்யோ அத்தோ², யோ ச ‘‘கிஸ்மிஞ்சீ’’தி பு⁴ம்மேகவசனாபி⁴தெ⁴ய்யோ, தது³ப⁴யங் ஸதி காலவந்தகாலதாவிபா⁴கே³ கிங்-ஸத்³த³ஸ்ஸ வசனீயதாஸாமஞ்ஞேன பன ஏகஜ்ஜ²ங் கத்வா ‘‘கஞ்சீ’’தி பாளியங் வுத்தந்தி தங் விப⁴ஜித்வா த³ஸ்ஸேதுங் ‘‘கேசி கிஸ்மிஞ்சீ’’தி வுத்தங். அட்ட²கதா²யங் பன ‘‘கிஸ்மிஞ்சீ’’தி பு⁴ம்மவஸேனேவ வுத்தங். தேன யதா²வுத்தஅத்த²விபா⁴கே³ன பதே³ன. வத்து²பூ⁴தாதி வத்து²ஸபா⁴வா. ஹத³யரூபமேவ ஸந்தா⁴ய வத³தி. ரூபந்தரானந்தி ஹத³யவத்து²தோ அஞ்ஞரூபானங். அரூபீனங் ஸஹஜாதபச்சயதங் புப்³பே³ ‘‘ஓக்கந்திக்க²ணே நாமரூப’’ந்தி எத்த² அனிவாரிதங் நிவாரேதீதி யோஜனா, ததா² வத்து²ஸ்ஸ ச காலந்தரே படிஸந்தி⁴காலதோ அஞ்ஞஸ்மிங் காலே அரூபீனங் நிவாரேதீதி. ஏவஞ்ச கத்வாதிஆதி³னா யதா²வுத்தஅத்த²வண்ணனாய பாளியங் விப⁴த்தினித்³தே³ஸஸ்ஸ ரூபகபா⁴வமாஹ. புனபி புரிமதோ பச்சி²மஸ்ஸ உபசயேன விஸேஸங் த³ஸ்ஸேதுங் ‘‘புரிமேன சா’’திஆதி³ வுத்தங். தத்த² புரிமேனாதி ‘‘ஓக்கந்திக்க²ணே நாமரூப’’ந்தி இமினா பச்சயனித்³தே³ஸவசனேன. ‘‘ஏகோ க²ந்தோ⁴ வத்து² ச திண்ணங் க²ந்தா⁴ன’’ந்திஆதி³னா படிச்சவாராதி³பாடே²ன. அத்த²விவரணஞ்ஹி பச்சயனித்³தே³ஸபாளியா ஸப்³பே³பி ஸத்த மஹாவாரா. வத்து²ஸ்ஸ வத்தப்³ப³த்தே ஆபன்னே கிந்தி பச்சயோதி தஸ்ஸ நாமஸ்ஸாதி யோஜனா. ஏதேனாதி ‘‘ரூபினோ கேவலஸ்ஸாதி நாமரஹிதஸ்ஸ வத்து²ஸ்ஸ. ததா²தி நாமஸ்ஸ பச்சயபா⁴வேன.
கத்த²சீதி ‘‘ரூபினோ த⁴ம்மா அரூபீனங் த⁴ம்மானங் கஞ்சி காலங் ஸஹஜாதபச்சயேன பச்சயோ’’தி ஏதஸ்மிங் நித்³தே³ஸே. எத்த² ஹி அஞ்ஞமஞ்ஞஸஹஜாதபச்சயபா⁴வோ லப்³ப⁴தி. வசனேனாதி ‘‘அஞ்ஞமஞ்ஞ’’ந்தி இமினா வசனேன பாளியங் ஸஹஜாதபச்சயபா⁴வஸ்ஸ அஸங்க³ஹிதத்தா, அத்த²தோ பன லப்³ப⁴தேவாதி. தேனாஹ ‘‘லப்³ப⁴மானேபீ’’தி. தஸ்ஸாதி அஞ்ஞமஞ்ஞபச்சயத்தஸ்ஸ. ஏவந்தி ‘‘ந அஞ்ஞமஞ்ஞவஸேனா’’தி இமினா பகாரேன. ஸமுதா³யேகதே³ஸவஸேன ஸாமிவசனந்தி அவயவாவயவிஸம்ப³ந்தே⁴ அவயவினி ஸாமிவசனந்தி அத்தோ², நித்³தா⁴ரணே வா ‘‘கண்ஹா கா³வீன’’ந்திஆதீ³ஸு விய.
ஸஹஜாதபச்சயனித்³தே³ஸவண்ணனா நிட்டி²தா.
8. நிஸ்ஸயபச்சயனித்³தே³ஸவண்ணனா
8. கிஸ்மிஞ்சி காலேதி இத³ங் ந லப்³ப⁴தி ஸப்³ப³தா³பி நிஸ்ஸயபச்சயதாய லப்³ப⁴மானத்தா. ஸஹஜங் புரேஜந்தி ஹி விபா⁴க³ங் அனாமஸித்வா நிஸ்ஸயதாமத்தமேவ நிஸ்ஸயபச்சயதா. வத்து²ரூபங் பஞ்சவோகாரப⁴வேதி வத்து²ரூபங் பஞ்சவோகாரப⁴வே சாதி ச-ஸத்³தோ³ லுத்தனித்³தி³ட்டோ² த³ட்ட²ப்³போ³. தஸ்ஸாதி ஆருப்பவிபாகட்ட²பனஸ்ஸ. பகாஸேதப்³ப³த்தாதி இமினா அபாகடங் பாகடங் கத்வா வசனேன சோத³னா அனோகாஸாதி த³ஸ்ஸேதி.
நிஸ்ஸயபச்சயனித்³தே³ஸவண்ணனா நிட்டி²தா.
9. உபனிஸ்ஸயபச்சயனித்³தே³ஸவண்ணனா
9. உபனிஸ்ஸயே தயோதி அனந்தராரம்மணபகதூபனிஸ்ஸயப்பபே⁴தே³ தயோ உபனிஸ்ஸயே. அனேகஸங்கா³ஹகதாயாதி அனேகேஸங் பச்சயத⁴ம்மானங் ஸங்க³ஹணதோ. ஏகந்தேனேவ ஹொந்தி சித்தனியமஹேதுபா⁴வேன யேஸு பதே³ஸூதி யேஸு குஸலாதி³பதே³ஸு. ஸங்க³ஹிதோதி ஸங்க³ஹங் க³தோ, குஸலாதி³பதே³ஸு யேஸங் பதா³னங்யேவ அனந்தரூபனிஸ்ஸயோ லப்³ப⁴தீதி அத்தோ². தேஸு ‘‘கேஸஞ்சீ’’தி ந வுத்தங். கஸ்மா? ந ஸக்கா வத்துங் ஏகந்தேனேவ உபலப்³ப⁴னதோ. தேஸூதி குஸலாகுஸலபதே³ஸு. ந ஹி குஸலோ அகுஸலஸ்ஸ அனந்தரூபனிஸ்ஸயோ ஹோதி, அகுஸலோ வா குஸலஸ்ஸ, ஆரம்மணபகதூபனிஸ்ஸயா பன அனேகந்திகா, தஸ்மா தத்த² ‘‘கேஸஞ்சீ’’தி வுத்தங். ஸித்³தா⁴னங் பச்சயத⁴ம்மானந்தி பச்சயபா⁴வேன புரிமனிப்ப²ன்னானங் குஸலாதீ³னங் குஸலஸ்ஸ அகுஸலஸ்ஸ வாதி அத்தோ². அகுஸலாதீ³ஹீதி யதா²ஸங்க்²யங் அகுஸலேன குஸலேன வா. அவிஸேஸேனாதி யதா²வுத்தவிஸேஸே நியமங் அக்³க³ஹெத்வா அகுஸலாதீ³ஸு அகுஸலகுஸலானங் ‘‘கேஸஞ்சீ’’திஆதி³னா.
அனாரம்மணத்தா ஆரம்மணூபனிஸ்ஸயங் புப்³பா³பரனியமேன அப்பவத்திதோ அனந்தரூபனிஸ்ஸயங் ந லப⁴தீதி யோஜனா. பகதஸ்ஸாதி நிப்பா²தி³தஸ்ஸ, உபஸேவிதஸ்ஸ வா. ந ஹி ரூபஸந்தானஸ்ஸ ஸத்³தா⁴தி³னிப்பா²த³னங் அத்தி², உதுபோ⁴ஜனாதி³உபஸேவனங் வா ஸம்ப⁴வதி. தேனாஹ ‘‘யதா² ஹி…பே॰… ரூபஸந்தானேனா’’தி. நனு ச ரூபஸந்தானே புப்³பே³னாபரங் விஸேஸோ லப்³ப⁴தி ‘‘யஸ்மிஞ்சா’’திஆதி³. தத்த² தந்தி உதுபீ³ஜாதி³கங் கம்மாதி³ ச தேன ரூபேன புரிமனிப்ப²ன்னேன. உப்பாத³னங் ஸாபி⁴ஸந்தி⁴கங் த³ட்ட²ப்³ப³ங். அதி⁴பதீஸு புப்³பா³பி⁴ஸங்கா²ரோ விய பகப்பனங் ஸங்வித³ஹனங். பகரணங் வுத்தலக்க²ணேன காரணபா⁴வேன அவட்டா²னங், யதோ காரணவிஸேஸோ ‘‘பகதீ’’தி வுச்சதி. யதி³ ஏவங் கஸ்மா ரூபஸ்ஸேவ தங் படிக்கி²பீயதீதி ஆஹ ‘‘யதா² ச…பே॰… த³ட்ட²ப்³பா³’’தி. ஏவம்பி உதுபீ³ஜாதீ³னங் அங்குராதீ³ஸு கத²ங் பச்சயவிஸேஸபா⁴வோதி ஆஹ ‘‘உதுபீ³ஜாத³யோ பன…பே॰… பா⁴வதோ’’தி. உபனிஸ்ஸயோதி ச யஸ்மா ப³லவதாகாரணங் அதி⁴ப்பேதங், தஸ்மா ந எத்த² ஏகந்தேன புரிமனிப்ப²த்தி இச்சி²தப்³பா³. யதி³ ஏவங் பாளியங் கத²ங் புரிமக்³க³ஹணந்தி ஆஹ ‘‘புரிமபுரிமானங்யேவ பனா’’திஆதி³. தேபி வா பரிகப்பனவஸேன புரிமனிப்ப²ன்னாயேவ நாம ஹொந்தி. ந ஹி அஸங்விதி³தாகாரே வத்து²ஸ்மிங் பத்த²னாபவத்தீதி. தேனாஹ ‘‘தங்ஸமானலக்க²ணதாயா’’தி.
த⁴ம்மேதி புக்³க³லஸேனாஸனபஞ்ஞத்தீனங் உபாதா³னபூ⁴தே த⁴ம்மே. அயங் நயோதி பஞ்ஞத்திமுகே²ன பஞ்ஞபேதப்³பா³ தது³பாதா³னபூ⁴தா த⁴ம்மா க³ய்ஹந்தீதி யதா²வுத்தோ நயோ. எத்தே²வாதி ‘‘ஸேனாஸனம்பி உபனிஸ்ஸயபச்சயேன பச்சயோ’’தி ஏதஸ்மிங்யேவ வசனே. கத²ங் பச்சுப்பன்னஸ்ஸ பகதூபனிஸ்ஸயபா⁴வோதி சோத³னாய ‘‘வக்க²தீ’’திஆதி³னா ஆக³மங் த³ஸ்ஸெத்வா யுத்திங் த³ஸ்ஸேதுங் ‘‘பச்சுப்பன்னானம்பிச தாதி³ஸானங் புப்³பே³ பகதத்தா’’தி வுத்தங். தாதி³ஸானந்தி யாதி³ஸா உதுஆத³யோ பச்சுபட்டி²தா, தாதி³ஸானங் ததோ புப்³பே³ புரேதரங் பகதத்தா பகதூபனிஸ்ஸயயொக்³யதாய ஆபாதி³தத்தா.
கஸிணாதீ³னம்பி ஆரம்மணூபனிஸ்ஸயதா ஸம்ப⁴வதீதி கத்வா வுத்தங் ‘‘இமினா அதி⁴ப்பாயேன ‘ஏகச்சாயா’தி ஆஹா’’தி. ததா² ஹி ‘‘கஸிணமண்ட³லங் தி³ஸ்வா’’திஆதி³னா தஸ்ஸ உபனிஸ்ஸயபா⁴வோ அட்ட²கதா²யங் வுத்தோ.
அரூபாவசரகுஸலம்பி உபனிஸ்ஸயோ ஹோதி, பகே³வ காமாவசரரூபாவசரகுஸலந்தி அதி⁴ப்பாயோ. தங் பன யதா² உபனிஸ்ஸயோ ஹோதி, தங் த³ஸ்ஸேதுங் ‘‘யஸ்மிங் கஸிணாதி³ம்ஹீ’’திஆதி³ வுத்தங். அனுப்பன்னஜா²னுப்பாத³னேதி ரூபாவசரஜ்ஜா²னங் ஸந்தா⁴யாஹ, அரூபாவசரஜ்ஜா²னே பன வத்தப்³ப³மேவ நத்தி². தது³ப்பாத³ககுஸலானந்தி தஸ்ஸ ரூபாவசரவிபாகஸ்ஸ உப்பாத³ககுஸலானங், ரூபாவசரகுஸலானந்தி படிஸந்தி⁴னியாமகஸ்ஸாதி ரூபாவசரபடிஸந்தி⁴னியாமகஸ்ஸ. சுதிதோதி ரூபாவசரபடிஸந்தி⁴யா அனந்தரபச்சயபூ⁴தாய சுதியா. புரிமஜவனஸ்ஸ வஸேனாதி சுதியா ஆஸன்னஜவனபா⁴வேன. ரூபாவசரகுஸலங் அரூபாவசரவிபாகஸ்ஸாதி எத்தா²பி ‘‘தது³ப்பாத³ககுஸலான’’ந்திஆதி³னா ஆனெத்வா யோஜேதப்³ப³ங். யதா² ச ‘‘ரூபாவசரகுஸலங் அரூபாவசரவிபாகஸ்ஸ உபனிஸ்ஸயோ’’தி வுத்தங், ஏவங் ‘‘காமாவசரகுஸலம்பி தது³ப்பாத³ககுஸலான’’ந்திஆதி³னா யோஜேதப்³ப³ங். லோகுத்தரவிபாகஸ்ஸ தேபூ⁴மககுஸலானம்பி பாத³காதி³வஸேன உபனிஸ்ஸயபா⁴வோ பாகடோயேவ, ததா² தங்தங்பூ⁴மககுஸலானங் தங்தங்பூ⁴மககிரியானங், காமாவசரகுஸலஸ்ஸ ரூபாரூபாவசரகிரியானங், ரூபாவசரகுஸலஸ்ஸ அரூபாவசரகிரியாய உபனிஸ்ஸயபா⁴வோதி இமமத்த²ங் த³ஸ்ஸெந்தோ ‘‘ஏவங் பச்சேகங்…பே॰… வேதி³தப்³போ³’’தி ஆஹ. ‘‘ஸத்³த⁴ங் உபனிஸ்ஸாய தா³னங் தே³தீ’’திஆதி³னா பகதூபனிஸ்ஸயோ உத்³தே³ஸவஸேனேவ பாடோ² ஆக³தோ, ந விப⁴ஜனவஸேனாதி ஆஹ ‘‘பாளியம்பி…பே॰… விஸ்ஸஜ்ஜிதோ’’தி. குஸலத்திகாதீ³ஸு அனுலோமாதி³பே⁴த³பி⁴ன்னத்தா பஞ்ஹாவாரேஸூதி ப³ஹுவசனநித்³தே³ஸோ.
லோகுத்தரனிப்³ப³த்தனங் உபனிஸ்ஸாய பரஸ்ஸ ஸினேஹுப்பாத³னே லோகுத்தரத⁴ம்மா உபனிஸ்ஸயோ விய ஹொந்தீதி அயமெத்த² லேஸோ, பா⁴வினோ பன லோகுத்தரஸ்ஸ அகுஸலானங் உபனிஸ்ஸயதா ஸம்ப⁴வதீதி ஆஹ ‘‘ந இத³ங் ஸாரதோ த³ட்ட²ப்³ப³ந்தி அதி⁴ப்பாயோ’’தி. ரூபாவசராதி³குஸலானந்தி ரூபாரூபாவசரலோகுத்தரகுஸலானங் உப்பாதி³யமானஸ்ஸ ரூபாவசரகுஸலஸ்ஸாதி யோஜனா. ரூபாவசரகிரியஸ்ஸ ச அரூபாவசரவிபாகோ உபனிஸ்ஸயோ கத²ந்தி ஆஹ ‘‘புப்³பே³ நிவுத்தா²தீ³ஸு…பே॰… அரஹதோ’’தி ‘‘சதுபூ⁴மகா…பே॰… உபனிஸ்ஸயோ’’தி. லோகியகுஸலானங் பன லோகுத்தரவிபாகா உபனிஸ்ஸயோ ந ஹொந்தீதி த³ஸ்ஸெந்தோ ‘‘யதி³பீ’’திஆதி³மாஹ. தேனேவ ஹி ‘‘ததா² தேபூ⁴மகவிபாகோ’’தி தேபூ⁴மகக்³க³ஹணங் கதங். தத்த² தேனாதி அனாகா³மினா. தந்தி அரஹத்தப²லங். தஸ்மாதி அதி³ட்ட²புப்³ப³த்தா. தானி வியாதி ஸோதாபத்திப²லானி விய. தேஸந்தி புது²ஜ்ஜனாதீ³னங். இமஸ்ஸாதி அனாகா³மினோ. இத³ங் வுத்தங் ஹோதி – யதா² புது²ஜ்ஜனாதீ³னங் ஸந்தானே ஜா²னாதீ³னங் ஸோதாபத்திப²லாதீ³னங் ந உபனிஸ்ஸயபச்சயோ அனுபலத்³த⁴புப்³ப³த்தா, ஏவங் அனாகா³மினோ ஜா²னாதீ³னங் ‘‘உபலத்³த⁴புப்³ப³ஸதி³ஸமேவ ஹி அனாக³தம்பி உபனிஸ்ஸயோ’’தி. அட்ட²கதா²யங் பன ஹெட்டி²மப²லானங் குஸலூபனிஸ்ஸயதா வுத்தா ஏவ.
யதா² விபாகா குஸலானங், ஏவங் கிரியாபி தேஸங் உபனிஸ்ஸயோ ஹோதீதி தங் நயங் த³ஸ்ஸேதுங் ‘‘கிரியங் அத்த²படிஸம்பி⁴தா³தி³’’ந்திஆதி³ வுத்தங். யோனிஸோமனஸிகாரே வத்தப்³ப³மேவ நத்தீ²தி சதுபூ⁴மககுஸலஸ்ஸபி யோனிஸோமனஸிகாரோ உபனிஸ்ஸயோ ஹோதீதி எத்த² வத்தப்³ப³மேவ நத்தி², தத³த்த²ங் யோனிஸோமனஸிகாரங் பவத்தெந்தஸ்ஸாதி அத்தோ². தந்தி யோனிஸோமனஸிகாரங். அகுஸலஸ்ஸ ச சதுபூ⁴மகவிபாகஸ்ஸ உபனிஸ்ஸயோ யோனிஸோமனஸிகாரோதி யோஜனா. ஏவங் கிரியஸ்ஸபீதி யதா² குஸலஸ்ஸ யோனிஸோமனஸிகாரஸ்ஸ வஸேன உபனிஸ்ஸயோ வுத்தோ, ஏவங் கிரியஸ்ஸபி யோனிஸோமனஸிகாரஸ்ஸ வஸேன யோஜேதப்³ப³ந்தி அத்தோ². ஸோ ஹி தங் உபனிஸ்ஸாய ராகா³தி³உப்பாத³னே அகுஸலஸ்ஸ வுத்தனயேன குஸலாகுஸலூபனிஸ்ஸயபா⁴வமுகே²ன சதுபூ⁴மகவிபாகஸ்ஸ உபனிஸ்ஸயோ ஹோதியேவ. யதி³ கிரியஸங்கா²தோ…பே॰… ஹோதியேவ, அத² கஸ்மா பகதூபனிஸ்ஸயவிப⁴ஜனே கிரியா ந க³ஹிதா, உதுபோ⁴ஜனஸேனாஸனானியேவ க³ஹிதானீதி ஆஹ ‘‘நேவவிபாகனவிபாகத⁴ம்மத⁴ம்மேஸு…பே॰… நயத³ஸ்ஸனமத்தமேவா’’தி. ஏவமாதி³கந்தி ஆதி³-ஸத்³தே³ன ‘‘குஸலங் த⁴ம்மங் ஸஹஜாதோ அப்³யாகதோ த⁴ம்மோ உப்பஜ்ஜதி ந உபனிஸ்ஸயபச்சயா’’தி ஏவமாதி³கங் ஸங்க³ண்ஹாதி. உபனிஸ்ஸயபரியாயோ உபனிஸஸத்³தோ³தி கத்வா வுத்தங் ‘‘விஞ்ஞாணூபனிஸங் நாமரூபங், நாமரூபூபனிஸஞ்ச ஸளாயதனந்திஆதி³கேனா’’தி. எத்த² ஹி விஞ்ஞாணஸ்ஸ நாமரூபானங் ப²ஸ்ஸரூபாதீ³னங் சக்கா²யதனாதீ³னஞ்ச உபனிஸ்ஸயபா⁴வோ வுத்தோதி.
உபனிஸ்ஸயபச்சயனித்³தே³ஸவண்ணனா நிட்டி²தா.
10. புரேஜாதபச்சயனித்³தே³ஸவண்ணனா
10. த³ஸ்ஸிதமேவ ‘‘ஸரூபேன அத³ஸ்ஸிதத்தா’’தி. ‘‘யங் யங் த⁴ம்மங் புரேஜாதங் ஆரப்³ப⁴ யே யே த⁴ம்மா உப்பஜ்ஜந்தி சித்தசேதஸிகா ஸரூபேன பாளியங் அத³ஸ்ஸிதத்தா. இத்³தி⁴விதா⁴பி⁴ஞ்ஞாய சாதி ச-ஸத்³தே³ன சுதூபபாதஞாணஸ்ஸபி ஸங்க³ஹோ த³ட்ட²ப்³போ³. தஸ்ஸபி ஹி ரூபத⁴ம்மாரம்மணகாலே அட்டா²ரஸஸு யங் கிஞ்சி ஆரம்மணபுரேஜாதங் ஹோதி பச்சுப்பன்னாரம்மணத்தா. ‘‘சவமானே உபபஜ்ஜமானே’’தி ஹி வுத்தங். தி³ப்³ப³சக்கு²தி³ப்³ப³ஸோதஞாணேஸு ச வத்தப்³ப³மேவ நத்தி².
இதரஸ்ஸபி அபா⁴வாதி ஆரம்மணபுரேஜாதஸ்ஸபி அபா⁴வா அக்³க³ஹணங் படிஸந்தி⁴பா⁴வினோதி யோஜனா. ஸதிபி கஸ்ஸசி படிஸந்தி⁴பா⁴வினோ ஆரம்மணபுரேஜாதே விபூ⁴தங் பன கத்வா ஆரம்மணகரணாபா⁴வதோ அவிஜ்ஜமானஸதி³ஸந்தி கத்வா வுத்தங் ‘‘இதரஸ்ஸபி அபா⁴வா’’தி. தேனேவாஹ ‘‘படிஸந்தி⁴யா விய அபரிப்³யத்தஸ்ஸ ஆரம்மணஸ்ஸ ஆரம்மணமத்தபா⁴வதோ’’தி. ஸந்தீரணபா⁴வினோ மனோவிஞ்ஞாணதா⁴துயாபி ஏகந்தேனேவ புரேஜாதபச்சயோ ரூபாதீ³னி பஞ்சாரம்மணானீதி யோஜனா. எத்த² ச ‘‘மனோதா⁴தூனஞ்சா’’திஆதி³ ‘‘ததா³ரம்மணபா⁴வினோ’’தி பத³ஸ்ஸ புரதோ வத்தப்³போ³, உப்படிபாடியா லிகி²தங்.
புரேஜாதபச்சயனித்³தே³ஸவண்ணனா நிட்டி²தா.
11. பச்சா²ஜாதபச்சயனித்³தே³ஸவண்ணனா
11. நிரவஸேஸத³ஸ்ஸிதபுரேஜாதத³ஸ்ஸனவஸேனாதி ‘‘சதுஸமுட்டா²னிகதிஸமுட்டா²னிகரூபகாயஸ்ஸா’’தி ஏவங் நிரவஸேஸதோ த³ஸ்ஸிதஸ்ஸ புரேஜாதஸ்ஸ பச்சயுப்பன்னஸ்ஸ த³ஸ்ஸனவஸேன. பச்சயா ஹி இத⁴ காமாவசரரூபாவசரவிபாகா, தேஸு காமாவசரவிபாகோ ச சதுஸமுட்டா²னிகரூபகாயஸ்ஸ பச்சயோ, ந இதரோ. தேனேவாஹ ‘‘ரூபாவசரவிபாகோ பன ஆஹாரஸமுட்டா²னஸ்ஸ ந ஹோதீ’’தி, தஸ்மா ‘‘தஸ்ஸேவா’’தி வுத்தேபி யதா²ரஹமத்தோ² வேதி³தப்³போ³.
பச்சா²ஜாதபச்சயனித்³தே³ஸவண்ணனா நிட்டி²தா.
12. ஆஸேவனபச்சயனித்³தே³ஸவண்ணனா
12. பகாரேஹி பகு³ணங், ப³ஹுக்க²த்துங் பவத்தியா பா⁴விதந்தி அத்தோ². அதிஸயேன பகு³ணங் பகு³ணதரங், ததோயேவ ப³லவதரங். தஸ்ஸ பா⁴வோ, தேன பகு³ணதரப³லவதரபா⁴வேன விஸிட்ட²ங் விஸேஸப்பத்தங். ஸ்வாயங் விஸேஸோ விபாகே நத்தீ²தி ஆஹ ‘‘ஏதேன விபாகாப்³யாகததோ விஸேஸேதீ’’தி.
ஆஸேவனபச்சயனித்³தே³ஸவண்ணனா நிட்டி²தா.
13. கம்மபச்சயனித்³தே³ஸவண்ணனா
13. ஏவங்ஸபா⁴வாதி கம்மபச்சயேன உபகாரகஸபா⁴வா. ஸமத்த²தாதி ஆனுபா⁴வோ. தஸ்ஸாதி விபாகக்க²ந்த⁴கடத்தாரூபஸங்கா²தஸ்ஸ ப²லஸ்ஸ. கம்மபச்சயபா⁴வோ வுத்தோதி கம்மபச்சயேன பச்சயபா⁴வோ வுத்தோ. ஏகவோகாரே ரூபம்பீதி ஏகவோகாரேபி ரூபங் ந ஜனேதி, பகே³வ சதுவோகாரேதி அத்தோ².
கம்மபச்சயனித்³தே³ஸவண்ணனா நிட்டி²தா.
14. விபாகபச்சயனித்³தே³ஸவண்ணனா
14. யதா² ஹி ரூபப⁴வே ஸஞ்ஞீனங் தங்னிப்³ப³த்திதபுஞ்ஞாபி⁴ஸங்கா²ரேனேவ ரூபுப்பத்தி, ஏவங் அஸஞ்ஞீனம்பீதி தத்த² காமாவசரகம்முனா யதா² விபாகானுரூபானங் பச்சயோ ஹொந்தோ கேஸஞ்சியேவ ஹோதி, ந ஸப்³பே³ஸங், கத்த²சியேவ ஹோதி, ந ஸப்³ப³த்த², ந ஏவங் விபாகானந்தி ஆஹ ‘‘ஏகந்தேனா’’தி. தேஸங் வஸேனாதி தேஸங் விபாகபச்சயலாபீ⁴னங் விபாகக்க²ந்தா⁴னங் வஸேன. ந ஹீதிஆதி³னா ‘‘ஏகந்தேனா’’தி வுத்தமத்த²ங் ப்³யதிரேகதோ விபா⁴வேதி. பூ⁴மித்³வயவிபாகோதி காமாவசரரூபாவசரவிபாகோ ஆருப்பே ரூபஸ்ஸ ந ஹி பச்சயோதி யோஜனா.
விபாகபச்சயனித்³தே³ஸவண்ணனா நிட்டி²தா.
15. ஆஹாரபச்சயனித்³தே³ஸவண்ணனா
15. கேவலாய ‘‘அஸிதபீதாதி³வத்தூ²ஹி ஸஹ அஜ்ஜோ²ஹரிதோவா’’தி வுத்தங். கா²த³னீயபோ⁴ஜனீயப்பபே⁴தே³ அஸிதே தாவ கப³ளீகாரதா ஹோது, பாதப்³பா³தி³கே பன கத²ந்தி ஆஹ ‘‘பாதப்³ப³…பே॰… ஹொந்தீ’’தி. யேபு⁴ய்யவஸேன வா ஏவங் வுத்தந்தி வேதி³தப்³ப³ங்.
அனுபாலகோதி உபத்த²ம்ப⁴கோ. சித்தஸமுட்டா²னஸ்ஸ காயஸ்ஸ ஆஹாரபச்சயபா⁴வோ கப³ளீகாராஹாரஸ்ஸ விசாரெத்வா க³ஹேதப்³போ³. கஸ்மாதி சே? எத்த² காரணமாஹ ‘‘ந ஹீ’’திஆதி³னா. ஸதி ஹி பச்சயபா⁴வே ‘‘சித்தஸமுட்டா²னோ கப³ளீகாராஹாரோ சித்தஸமுட்டா²னஸ்ஸ காயஸ்ஸ ஆஹாரபச்சயேன பச்சயோ’’திஆதி³ வத்தப்³ப³ங் ஸியா, ந பன வுத்தங், நோசித்தஸமுட்டா²னஸ்ஸ பன வுத்தங். தேனாஹ ‘‘திவிதோ⁴பி…பே॰… வுத்தோ’’தி.
ஆஹாரபச்சயனித்³தே³ஸவண்ணனா நிட்டி²தா.
16. இந்த்³ரியபச்சயனித்³தே³ஸவண்ணனா
16. ‘‘மிஸ்ஸகத்தா’’தி இத³ங் இந்த்³ரியதாய ரூபாரூபஜீவிதிந்த்³ரியானங் ஏகஜ்ஜ²ங் கத்வா தே³ஸிததங் ஸந்தா⁴ய வுத்தங், தஸ்மா மிஸ்ஸகத்தாதி ரூபஜீவிதிந்த்³ரியமிஸ்ஸகத்தாதி அத்தோ². ஜீவிதிந்த்³ரியந்தி அரூபஜீவிதிந்த்³ரியங். ந ஸப்³பே³ன ஸப்³ப³ங் வஜ்ஜிதப்³ப³ந்தி யதா² பஞ்ஹாபுச்ச²கே அரூபஜீவிதிந்த்³ரியங் மிஸ்ஸகத்தா ந க³ஹிதங், ந ஏவமித⁴ அரூபஜீவிதிந்த்³ரியங் அக்³க³ஹிதந்தி அத்தோ².
அரூபானங் சக்கு²விஞ்ஞாணாதீ³னங் பச்சயந்தராபெக்கா²னி ஆவஜ்ஜனாரம்மணாதி³அஞ்ஞபச்சயஸாபெக்கா²னி இந்த்³ரியபச்சயா ஸியுங் சக்கா²தீ³னங் ரூபாரூபானங் அஞ்ஞமஞ்ஞங் கதா³சிபி அவினிப்³பு⁴த்தபா⁴வஸ்ஸ அபா⁴வதோ, பச்சயந்தரஸமோதா⁴னாபெக்க²தாய ச. யோ பன நிரபெக்கோ²தி யதா² சக்கா²தீ³னி பச்சயந்தரேஸு ஸாபெக்கா²னி, ஏவங் ஸாபெக்கோ² அஹுத்வா யோ தத்த² நிரபெக்கோ² இந்த்³ரியபச்சயோ ஹோதி அவினிப்³பு⁴த்தத⁴ம்மானங் யதா² து³வித⁴ம்பி ஜீவிதிந்த்³ரியங், ஸோ அத்தனோ…பே॰… நத்தீ²தி அவினிப்³பு⁴த்தானங் தேஸம்பி லிங்கா³தீ³னங் ஸியுங் வினிப்³பு⁴த்தானங் பச்சயுப்பன்னானங் இந்த்³ரியபச்சயதாபா⁴வஸ்ஸ அதி³ட்ட²த்தா. நனு சக்கா²தீ³னங் வினிப்³பு⁴த்தானங் ‘‘ந ஹீ’’திஆதி³மாஹ. ஸதி சேவந்தி ஏவங் வுத்தப்பகாரே ஸமானஜாதியங்யேவ அவினிப்³பு⁴த்தஸ்ஸ இந்த்³ரியபச்சயபா⁴வே ஸதி இத்தி²புரிஸிந்த்³ரியேஹி ஸத்³தி⁴ங். ஸஹயோகே³ ஹி இத³ங் கரணவசனங். யதி³பி இத்தி²புரிஸிந்த்³ரியானி லிங்கா³தீ³னங் கலலாதி³காலே இந்த்³ரியபச்சயதங் ந ப²ரெய்யுங் தேஸங் ததா³ அபா⁴வதோ. யே பன ரூபத⁴ம்மா ததா³ ஸந்தி, தேஹி அவினிப்³பு⁴த்தாவ, தேஸங் கஸ்மா ந ப²ரந்தீதி ஆஹ ‘‘அஞ்ஞேஸங் பனா’’திஆதி³. அபீ³ஜபா⁴வதோ அனிமித்தபா⁴வதோ. தத³னுரூபானந்தி கலலாதி³அவத்தா²னுரூபானங் அத்தி²தங் இச்ச²ந்தி, யதோ ‘‘இத்தீ², புரிஸோ’’தி பகதிவிபா⁴கோ³ விஞ்ஞாயதீதி தேஸங் அதி⁴ப்பாயோ.
குஸலஜாதியந்தி நித்³தா⁴ரணே பு⁴ம்மங். யே பன ‘‘குஸலஜாதிக’’ந்தி பட²ந்தி, தேஸங் பச்சத்தேகவசனங். விஸுங் ஏகஜாதி வா பூ⁴மி வா ந ஹோதி ததே³கதே³ஸபா⁴வதோ. ஹேதுஆதீ³ஸுபீதி ஆதி³-ஸத்³தே³ன ‘‘அகுஸலாஹாரேஸுபி ஏஸேவ நயோ’’தி ஏவமாதி³கங் ஸங்க³ண்ஹாதி. ஏஸ நயோதி ய்வாயங் ‘‘பூ⁴மிவஸேன வுத்தேஸூ’’திஆதி³னா அரூபே அலப்³ப⁴மானஸ்ஸ இந்த்³ரியபச்சயஸ்ஸ அட்ட²பனே அத்த²னயோ வுத்தோ, ஏஸ நயோ யோஜேதப்³போ³தி. ததா² அபரியாபன்னகுஸலஹேது, ததா² அகுஸலஹேதூதி எத்தா²பி பட²மாபரியாபன்னகுஸலஹேது தோ³மனஸ்ஸஸஹக³தாகுஸலஹேது ச விஸுங் ஏகஜாதி பூ⁴மி வா ந ஹொந்தீதி ஆருப்பே அலப்³ப⁴மானாபி விஸுங் ந ட²பிதாதி யோஜேதப்³போ³. ஏஸ நயோ ‘‘அகுஸலாஹாரேஸுபி ஏஸேவ நயோ’’தி ஏவமாதீ³ஸு.
ஸதி ஸஹஜாதபச்சயத்தே உப்பாத³க்க²ணேபி இந்த்³ரியபச்சயதா ஸியாதி கத்வா வுத்தங் ‘‘ஸஹஜாதபச்சயத்தாபா⁴வங் ஸந்தா⁴யா’’தி. வுத்தஞ்ஹி ‘‘உப்பஜ்ஜமானோ ஸஹ உப்பஜ்ஜமானபா⁴வேன உபகாரகோ த⁴ம்மோ ஸஹஜாதபச்சயோ’’தி (பட்டா²॰ அட்ட²॰ பச்சயுத்³தே³ஸவண்ணனா). தஸ்ஸ பன ஸஹஜாதபச்சயத்தாபா⁴வோ யதி³பி அட்ட²கதா²யங் ‘‘ஸஹஜாதபச்சயதா பன தஸ்ஸ நத்தீ²’’தி ஸரூபேனேவ த³ஸ்ஸிதோ, ததா²பி தங் அனநுஜானந்தோ ‘‘உப்பாத³…பே॰… நிவாரேது’’ந்தி வத்வா ‘‘வக்க²தீ’’திஆதி³னா தமத்த²ங் ஸமத்தே²தி. கம்மபச்சயஸதி³ஸந்தி ஹி ஏதேன தஸ்ஸ உப்பாத³க்க²ணே பச்சயபா⁴வோ பகாஸிதோ. பவத்தேசாதி ச-ஸத்³தே³ன படிஸந்தி⁴யஞ்ச கடத்தாரூபஸ்ஸ ரூபஜீவிதிந்த்³ரியதோ அஞ்ஞோ இந்த்³ரியபச்சயோ ந ஹி அத்தீ²தி யோஜனா. படிச்சவாராத³யோ ச² வாரா உப்பாத³க்க²ணமேவ க³ஹெத்வா பவத்தா ‘‘குஸலங் த⁴ம்மங் படிச்ச குஸலோ ஏவஞ்ச கத்வாதி உப்பாத³க்க²ணமேவ க³ஹெத்வா பவத்தத்தா. ஏதேஸூதி யதா²வுத்தேஸு ச²ஸு வாரேஸு. கேசி பன ‘‘ரூபஜீவிதிந்த்³ரியஸ்ஸ அனுபாலனங் உப்பாத³க்க²ணே ந பாகடங் ப³லவஞ்ச யதா² டி²திக்க²ணே பச்சா²ஜாதாதி³பச்சயலாப⁴தோ தி²ரபா⁴வப்பத்தியாஸ்ஸ தங் பாகடங் ப³லவஞ்ச, தஸ்மா ‘டி²திக்க²ணே’தி வுத்த’’ந்தி வத³ந்தி.
இந்த்³ரியபச்சயனித்³தே³ஸவண்ணனா நிட்டி²தா.
17. ஜா²னபச்சயனித்³தே³ஸவண்ணனா
17. ஸோமனஸ்ஸதோ³மனஸ்ஸஸங்கா²தானீதி ஸோமனஸ்ஸதோ³மனஸ்ஸபரியாயேன வுத்தானி, ஜா²னங்க³பா⁴வவிஸேஸனதோ வா ஸோமனஸ்ஸதோ³மனஸ்ஸபூ⁴தானேவ ஸுக²து³க்கா²னி ஜா²னங்கா³னி, ந இதரஸுக²து³க்கா²னீதி ஜா²னங்க³பூ⁴தானங்யேவ ஸுக²து³க்கா²னங் ஜா²னங்க³பா⁴வத³ஸ்ஸனத்த²ங் ஸோமனஸ்ஸதோ³மனஸ்ஸக்³க³ஹணங் கதங். இதா³னி யதா²வுத்தமேவ ‘‘த்³விபஞ்சவிஞ்ஞாணேஸூ’’திஆதி³னா வித்தா²ரதோ விபா⁴வேதி, தங் ஸுவிஞ்ஞெய்யமேவ. தேனாதி விஸேஸனபூ⁴தேன ஸோமனஸ்ஸதோ³மனஸ்ஸக்³க³ஹணேன.
அபி⁴னிபாதமத்தத்தாதி ஆரம்மணகரணமத்தபா⁴வதோ. சிந்தனாபவத்தியா உபனிஜ்ஜா²யனபவத்தியா. யதா²வுத்தேனேவ காரணேனாதி ‘‘உபனிஜ்ஜா²னாகாரஸ்ஸ அபா⁴வதோ’’தி ஏதேன காரணேன. புப்³பே³திஆதி³தோ. சத்தாரி அங்கா³னி வஜ்ஜிதானீதி ஸத்தஸு அங்கே³ஸு த³ஸ்ஸியமானேஸு சத்தாரி அங்கா³னி வஜ்ஜிதானி. அட்ட²கதா² ஹேஸாதி லேஸேன அபகாஸேதப்³ப³தாய காரணமாஹ. தீஸுபி ஏகமேவ வத்தப்³ப³ங் ஸியா, தங்ஸமானலக்க²ணதாய இதரேஸங் திண்ணம்பி க³ஹணங் ஹோதீதி. திண்ணங் பன வசனேனாதி உபெக்கா²ஸுக²து³க்கா²னங் அஜா²னங்க³தாத³ஸ்ஸனத்தே²ன வசனேன. ததோ உபெக்கா²தி³தோ அஞ்ஞஸ்ஸ த⁴ம்மஸ்ஸ சித்தேகக்³க³தாய ஜா²னங்க³ந்தி உத்³த⁴டபா⁴வோ ஆபஜ்ஜதி அஜா²னங்கே³ஸு அக்³க³ஹிதத்தா. யதா²வுத்தகாரணதோதி ‘‘உபனிஜ்ஜா²னாகாரஸ்ஸ அபா⁴வதோ’’தி வுத்தகாரணதோ அஞ்ஞேன காரணேன அனுத்³த⁴டபா⁴வோ வா ஆபஜ்ஜதி அனுபனிஜ்ஜா²யனஸபா⁴வேஹி ஸத்³தி⁴ங் அக்³க³ஹிதத்தா உபனிஜ்ஜா²யனாகாரபா⁴வதோ அஞ்ஞேனேவ காரணேன சித்தேகக்³க³தாய தங்தோ³ஸபரிஹரணத்த²ந்தி யதா²வுத்ததோ³ஸவினிமோசனத்த²ங்.
யே பனாதிஆதி³ பத³காரமத்தத³ஸ்ஸனங். ஸோமனஸ்ஸாதீ³ஹீதி ஸோமனஸ்ஸதோ³மனஸ்ஸஜா²னங்கு³பெக்கா²ஹி. அவிபூ⁴தபா⁴வோ உபெக்க²னங். உபெக்கா² ஹி அவிபூ⁴தகிச்சா வுத்தா. ஸமானானங் கேஸங்? ஸுகா²தீ³னங், கேஹி? ஸோமனஸ்ஸாதீ³ஹி, கத²ங்? ஸுக²…பே॰… யுத்ததாதி யோஜனா. ந சித்தேகக்³க³தாயாதி ஸுகா²தீ³ஹி, தத³ஞ்ஞேஹி அபி⁴னிரோபனாதீ³ஹி ச அனிந்த்³ரியகிச்சதாய ச அனுபனிஜ்ஜா²யனகிச்சதாய ச அஸமானதாய பஞ்சவிஞ்ஞாணேஸு சித்தேகக்³க³தாய ஜா²னங்க³ந்தி அனுத்³த⁴டபா⁴வே காரணங் ந வத்தப்³ப³ந்தி. ஸாதி சித்தேகக்³க³தா. எத்தா²தி ‘‘உபெக்கா²ஸுக²து³க்கா²னீ’’தி ஏதஸ்மிங் அட்ட²கதா²வசனே ந க³ஹிதா. விசிகிச்சா²யுத்தமனோதா⁴துஆதீ³ஸூதி விசிகிச்சா²ஸம்பயுத்தசித்தே மனோதா⁴துயா ஸம்படிச்ச²னாதீ³ஸு ச. தஸ்ஸாபி சித்தேகக்³க³தாயபி.
ஜா²னபச்சயனித்³தே³ஸவண்ணனா நிட்டி²தா.
18. மக்³க³பச்சயனித்³தே³ஸவண்ணனா
18. து³வித⁴ம்பி ஸங்கப்பந்தி ஸம்மாஸங்கப்போ மிச்சா²ஸங்கப்போதி ச ஏவங் அனவஜ்ஜஸாவஜ்ஜபே⁴தே³ன து³வித⁴ம்பி. வீரியங் ஸமாதி⁴ந்தி எத்தா²பி ஏஸேவ நயோ. ஸங்க³ண்ஹித்வா விதக்காதி³பா⁴வஸாமஞ்ஞேன ஸஹ க³ஹெத்வா, ஏகேகமேவ கத்வா க³ஹெத்வாதி அத்தோ². தேஹி மிச்சா²வாசாகம்மந்தாஜீவேஹி. இதா⁴தி இமஸ்மிங் மக்³க³பச்சயனித்³தே³ஸே லப்³ப⁴மானானி ச மக்³க³பச்சயபா⁴வதோ, ச-ஸத்³தே³ன அலப்³ப⁴மானானி ச மக்³க³பச்சயத்தாபா⁴வா. யதி³ ஏவங் கஸ்மா வுத்தானீதி ஆஹ ‘‘மக்³க³ங்க³வசனஸாமஞ்ஞேனா’’தி. ஏவங் பரியாயனித்³தே³ஸோ இத⁴ கிமத்தி²யோதி சோத³னங் ஸந்தா⁴யாஹ ‘‘ஏவஞ்ஹி ஸுத்தவோஹாரோபி த³ஸ்ஸிதோ ஹோதீ’’தி. ஏவங் பன த³ஸ்ஸெந்தேனாதி பரமத்த²தோ அமக்³க³ங்கா³னிபி ஸுத்தே மக்³க³ங்க³வோஹாரஸித்³தி⁴யா இத⁴ மக்³க³ங்கே³ஹி ஸஹ த³ஸ்ஸெந்தேன. உத்³த⁴ரித்வாதி பது³த்³தா⁴ரங் கத்வா. இதா³னி மிச்சா²வாசாதீ³ஹி ஸத்³தி⁴ங் த்³வாத³ஸங்கா³னி ந த³ஸ்ஸேதப்³பா³னி, கஸ்மாதி சேதி ஆஹ ‘‘ந ஹி பாளியங்…பே॰… வத்தப்³போ³’’தி. தப்படிபக்க²பா⁴வதோயேவ மிச்சா²மக்³க³ங்கா³னி, ந மிச்சா²தி³ட்டி²ஆத³யோ விய ஸபா⁴வதோதி அதி⁴ப்பாயோ.
பரியாயனிப்பரியாயமக்³க³ங்க³த³ஸ்ஸனத்தே²பி அத்த²வசனே ஏவங் ந வத்தப்³ப³மேவாதி த³ஸ்ஸெந்தோ ‘‘பரியாய…பே॰… அதி⁴கரணானீ’’தி ஆஹ. தஸ்ஸத்தோ² – யதா² தஸ்மாதி யஸ்மா பாளிக³தோயேவ மக்³க³ங்க³ஸத்³தோ³ உத்³த⁴டோ, ந தத³ஞ்ஞஸாதா⁴ரணோ, ந ச அத்து²த்³தா⁴ரமுகே²ன அதி⁴ப்பேதத்தோ² நியமிதோ, தஸ்மா. தேஸூதி அஹேதுகசித்துப்பாதே³ஸு. ‘‘ஸம்மாதி³ட்டி²…பே॰… ஸமாத⁴யோ’’தி எத்த² ஸங்கப்பவாயாமஸமாத⁴யோ ஸம்மாமிச்சா²ஸத்³தே³ஹி விஸேஸெத்வா வுத்தாதி ஆஹ ‘‘ஸம்மாதி³ட்டி²ஆத³யோ யதா²வுத்தா ஸந்தீ’’தி. ஸங்கப்பவாயாமஸமாதி⁴ப்பத்தா பன தத்த² கேசி ஸந்தியேவாதி. அத² வா ஸம்மாதி³ட்டி²ஆத³யோதி வுத்தப்பகாரே ஸம்மாதி³ட்டி²ஆதி³கே அனவஸேஸே ஸந்தா⁴ய வுத்தங். தேனாஹ ‘‘யதா²வுத்தா’’தி. உப்பத்திட்டா²னநியமனத்த²த்தா ந விஸேஸனத்த²த்தாதி அதி⁴ப்பாயோ.
மக்³க³பச்சயனித்³தே³ஸவண்ணனா நிட்டி²தா.
20. விப்பயுத்தபச்சயனித்³தே³ஸவண்ணனா
20. ஸம்பயோகா³ஸங்காவத்து²பூ⁴தோதி ஸம்பயோகா³ஸங்காய அதி⁴ட்டா²னபூ⁴தோ. தேனாஹ அட்ட²கதா²யங் ‘‘அரூபினோ ஹி க²ந்தா⁴ சக்கா²தீ³னங் வத்தூ²னங் அப்³ப⁴ந்தரதோ நிக்க²மந்தா விய உப்பஜ்ஜந்தீ’’தி.
விப்பயுத்தபச்சயனித்³தே³ஸவண்ணனா நிட்டி²தா.
21. அத்தி²பச்சயனித்³தே³ஸவண்ணனா
21. யஸ்மிங் ஸதி யங் ஹோதி, அஸதி ச ந ஹோதி, ஸோ தஸ்ஸ பச்சயோதி யதி³த³ங் ஸமாஸதோ பச்சயலக்க²ணங் யங் ஸந்தா⁴ய ஸுத்தே வுத்தங் ‘‘இமஸ்மிங் ஸதி இத³ங் ஹோதி, இமஸ்மிங் அஸதி இத³ங் ந ஹோதீ’’தி, தயித³ங் அத்தி²பச்சயே யோஜெத்வா த³ஸ்ஸெந்தோ ‘‘யோ ஹீ’’திஆதி³ங் வத்வா அயஞ்ச நயோ ‘‘நிப்³பா³னஞ்ச…பே॰… உபகாரகங் ஹோதீ’’தி ஆஹ. தேன பச்சயத⁴ம்மானங் நத்தி²பா⁴வோபகாரகதாவிருத்³தோ⁴தி நத்தி²பச்சயபா⁴வவிருத்³தோ⁴. விக³தாவிக³தபச்சயா விய ஹி அஞ்ஞமஞ்ஞங் உஜுபச்சனீகபா⁴வேன டி²தா நத்தி²அத்தி²பச்சயா. ந நிப்³பா³னங் அத்தி²பச்சயோ நத்தி²பா⁴வோபகாரகதாஅவிரோத⁴தோ. யே ஹி அத்தி²பச்சயத⁴ம்மா, தே நத்தி²பா⁴வோபகாரகதாவிருத்³தா⁴ ஏவ தி³ட்டா²தி அதி⁴ப்பாயோ.
ஸதி ச உப்பன்னத்தேதி ஸம்ப³ந்தோ⁴. யேஸங் பச்சயா ஹொந்தி ஆஹாரிந்த்³ரியாதி யோஜனா. ஏகதோதி ஸஹ. ஸஹஜாதாதி³பச்சயத்தாபா⁴வதோதி ஸஹஜாதபுரேஜாதபச்சா²ஜாதபச்சயத்தாபா⁴வதோ. தத³பா⁴வோதி ஸஹஜாதாதி³பச்சயத்தாபா⁴வோ. ஏதேஸந்தி அத்தி²பச்சயதாவஸேன பவத்தமானானங் ஆஹாரிந்த்³ரியானங். த⁴ம்மஸபா⁴வவஸேனாதி த⁴ம்மதாவஸேன. த⁴ம்மதா ஹேஸா, யதி³த³ங் பச்சயுப்பன்னேஹி ஸஹ புரேதரங் பச்சா² ச லப்³ப⁴மானா ஆஹாரிந்த்³ரியா தேஸங் அத்தி²பச்சயா ஹொந்தி, ந ஸஹஜாதாதி³பச்சயாதி. யதா² வா சக்கா²தி³த்³வாரானங் ரூபாதி³ஆரம்மணானங் ஸதிபி நியதவுத்திதாய த்³வாராரம்மணதோ விஞ்ஞாணஸ்ஸ ச²ப்³பி³த⁴பா⁴வே ஆரம்மணமனாமஸித்வா, த்³வாரதோ த்³வாரமனாமஸித்வா ஆரம்மணதோ ச²ப்³பி³த⁴தா வுச்சதி, ஏவமிதா⁴பி ஆஹாரிந்த்³ரியானங் பச்சயுப்பன்னேஹி ஸதிபி ஸஹஜாதாதி³பா⁴வே அரூபக்க²ந்தா⁴தி³வஸேன ஸஹஜாதாதி³பே⁴த³பி⁴ன்னஸ்ஸ அத்தி²பச்சயஸ்ஸ த³ஸ்ஸிதத்தா பஞ்ஹாவாரே ஆஹாரிந்த்³ரியானங் வஸேன ஆக³தே சதுத்த²பஞ்சமகொட்டா²ஸபூ⁴தே அத்தி²பச்சயவிஸேஸே ஸஹஜாதாதி³பே⁴த³ங் ஆமஸிதுங் ந லப்³ப⁴தீதி த³ஸ்ஸேதுங் அட்ட²கதா²யங் ‘‘ஆஹாரோ இந்த்³ரியஞ்ச ஸஹஜாதாதி³பே⁴த³ங் ந லப⁴தீ’’தி வுத்தங், ந பன ஆஹாரிந்த்³ரியேஸு ஸஹஜாதாதி³பா⁴வஸ்ஸ அபா⁴வதோ. ஏவம்பெத்த² அத்தோ² த³ட்ட²ப்³போ³.
அத்தி²பச்சயனித்³தே³ஸவண்ணனா நிட்டி²தா.
22-23-24. நத்தி²விக³தஅவிக³தபச்சயனித்³தே³ஸவண்ணனா
22-23. எத்தா²தி நத்தி²பச்சயே. நானந்தி நானத்தங். ஏதேனாதி அனந்தரபச்சயதோ நத்தி²பச்சயஸ்ஸ விஸேஸமத்ததீ³பனேன ‘‘பச்சயலக்க²ணமேவ ஹெத்த² நான’’ந்தி இமினா வசனேன. அத்தோ²தி ப்³யஞ்ஜனஸங்க³ஹிதேதி ‘‘நத்தி²பச்சயோ பச்சயலக்க²ணமத்தேதி எத்த² பவத்திஓகாஸதா³னேன உபகாரகா அரூபத⁴ம்மா, விக³தபா⁴வேன உபகாரகாதி ஏவமாதி³கே பச்சயானங் லக்க²ணமத்தே.
நத்தி²விக³தஅவிக³தபச்சயனித்³தே³ஸவண்ணனா நிட்டி²தா.
பச்சயனித்³தே³ஸவண்ணனா நிட்டி²தா.
பச்சயனித்³தே³ஸபகிண்ணகவினிச்ச²யகதா²வண்ணனா
ஆதி³மபாடோ²தி புரிமபாடோ². ததா² ச ஸதீதி தோ³ஸஸ்ஸபி ஸத்தரஸஹி பச்சயேஹி பச்சயபா⁴வே ஸதி. அதி⁴பதிபச்சயபா⁴வோபிஸ்ஸ அனுஞ்ஞாதோ ஹோதீதி ஆஹ ‘‘தோ³ஸஸ்ஸபி க³ருகரணங் பாளியங் வத்தப்³ப³ங் ஸியா’’தி. ‘‘ஸேஸான’’ந்தி வசனேனேவ நிவாரிதோதி கதா³சி ஆஸங்கெய்யாதி தங்னிவத்தனத்த²மாஹ ‘‘ந ச ஸேஸான’’ந்திஆதி³. புரேஜாதாதீ³ஹீதி புரேஜாதகம்மாஹாரஜா²னிந்த்³ரியமக்³க³விபாகபச்சயேஹி. தன்னிவாரணத்த²ந்தி தஸ்ஸ யதா²வுத்ததோ³ஸஸ்ஸ நிவாரணத்த²ங். விஸுஞ்ச அக்³க³ஹெத்வாதி லோப⁴மோஹா விபாகபச்சயாபி ந ஹொந்தி, ததா² தோ³ஸோதி ஏவங் விஸுஞ்ச அக்³க³ஹெத்வா. பொ²ட்ட²ப்³பா³யதனங் காயவிஞ்ஞாணதா⁴துயா ஆரம்மணாதி³பச்சயோ ஹொந்தங்யேவ பத²வீஆதி³ஸபா⁴வத்தா அத்தனா ஸஹஜாதானங் ஸஹஜாதாதி³பச்சயா ஹொந்தியேவாதி வுத்தங் ‘‘பொ²ட்ட²ப்³பா³யதனஸ்ஸ ஸஹஜாதாதி³பச்சயபா⁴வங் த³ஸ்ஸேதீ’’தி. ‘‘ஸப்³ப³த⁴ம்மான’’ந்தி ‘‘ஸப்³பே³ த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஆரம்மணபச்சயேன பச்சயோ’’தி எத்த² வுத்தே ஸப்³ப³த⁴ம்மே ஸந்தா⁴யாஹ ‘‘ஸப்³ப³த⁴ம்மானங் யதா²யோக³ங் ஹேதாதி³பச்சயபா⁴வங் த³ஸ்ஸேதீ’’தி. ந ஹி ஏதங்…பே॰… பா⁴வத³ஸ்ஸனங், அத² கோ² ஏகத⁴ம்மஸ்ஸ அனேகபச்சயபா⁴வத³ஸ்ஸனங், தஸ்மா ‘‘ஏதேன பொ²ட்ட²ப்³பா³யதனஸ்ஸா’’திஆதி³ வுத்தந்தி அதி⁴ப்பாயோ. ரூபாதீ³னந்தி ரூபாயதனாதீ³னங்.
பே⁴தா³தி விஸேஸா. பே⁴த³ங் அனாமஸித்வாதி சக்கு²விஞ்ஞாணதா⁴துஆதி³விஸேஸங் அக்³க³ஹெத்வா. தே ஏவாதி யதா²வுத்தவிஸேஸானங் ஸாமஞ்ஞபூ⁴தே க²ந்தே⁴ ஏவ. யங் ஸந்தா⁴ய ‘‘ஏவங் ந ஸக்கா வத்து’’ந்தி வுத்தங், தங் விபா⁴வேதுங் ‘‘ந ஹீ’’திஆதி³ வுத்தங். பட்டா²னஸங்வண்ணனா ஹேஸாதி ஏதேன ஸுத்தே வுத்தபரியாயமக்³க³பா⁴வேனெத்த² ஸேஸபச்சயபா⁴வோதி மக்³க³பச்சயங் ட²பெத்வா யதா²வுத்தேஹி ஸேஸேஹி அட்டா²ரஸஹி அதி⁴பதிபச்சயோ ந ஹோதீதி ஆரம்மணாதி⁴பதிபச்சயோ ந ஹோதி. தந்தி விசிகிச்ச²ங். தத்தா²தி யதா²வுத்தேஸு அஹிரிகாதீ³ஸு.
த³ஸதா⁴ பச்சயா ஹொந்தி, புன ததா² ஹத³யவத்து²ந்தி இத³ங் அத்த²மத்தவசனங். பாடோ² பன ‘‘ஹத³யவத்து² தேஸஞ்சேவ விப்பயுத்தஸ்ஸ ச வஸேன த³ஸதா⁴ பச்சயோ ஹோதீ’’தி வேதி³தப்³போ³. ரூபஸத்³த³க³ந்த⁴ரஸாயதனமத்தமேவாதி இத³ங் ரூபாதீ³னங் ஸஹஜாதபச்சயதாய விய நிஸ்ஸயபச்சயதாய ச அபா⁴வதோ, புரேஜாதபச்சயதாய ச பா⁴வதோ வுத்தங். ஏதானீதி யதா²வுத்தானி ரூபஸத்³த³க³ந்த⁴ரஸாரம்மணானி. ஸப்³பா³திக்கந்தபச்சயாபெக்கா²தி ‘‘ஏகத⁴ம்மஸ்ஸ அனேகபச்சயபா⁴வதோ’’தி ஏதஸ்மிங் விசாரே ஹேதுஆதி³அதிக்கந்தபச்சயாபெக்கா² ஏதேஸங் ரூபாதீ³னங் அபுப்³ப³தா நத்தி², அத² கோ² ஆரம்மணஆரம்மணாதி⁴பதிஆரம்மணூபனிஸ்ஸயபச்சயாபெக்கா². ந ஹி ரூபாதீ³னி ஹேதுஸஹஜாதாதி⁴பதிஆதி³வஸேன பச்சயா ஹொந்தீதி. தஸ்ஸாதி ரூபஜீவிதிந்த்³ரியஸ்ஸ புரேஜாதபச்சயபா⁴வதோ அபுப்³ப³தா, தஸ்மா தங் ஏகூனவீஸதிவிதோ⁴ பச்சயோ ஹோதீதி வுத்தங் ஹோதி. ஸத்ததா⁴ பச்சயபா⁴வோ யோஜேதப்³போ³, ந ஹி ஓஜா புரேஜாதபச்சயோ ந ஹோதீதி.
அத்தோ²தி வா ஹேதுஆதி³த⁴ம்மானங் ஸபா⁴வோ வேதி³தப்³போ³. ஸோ ஹி அத்தனோ பச்சயுப்பன்னேஹி அரணீயதோ உபக³ந்தப்³ப³தோ, ஞாணேன வா ஞாதப்³ப³தோ ‘‘அத்தோ²’’தி வுச்சதி. ஆகாரோதி தஸ்ஸேவ பவத்திஆகாரோ, யேன அத்தனோ பச்சயுப்பன்னானங் பச்சயபா⁴வங் உபக³ச்ச²தீதி ஏவமெத்த² அத்தோ² த³ட்ட²ப்³போ³. தங் பன விப்பயுத்தங். ‘‘ஸத்தஹாகாரேஹீ’’தி படா²னஸ்ஸ காரணமாஹ ‘‘உக்கட்ட²பரிச்சே²தோ³ ஹீ’’திஆதி³னா.
யங் கம்மபச்சயோ…பே॰… த³ட்ட²ப்³ப³ங் ஆஸேவனகம்மபச்சயானங் பச்சயுப்பன்னஸ்ஸ அனந்தரட்டா²னதாய. ஸஹஜாதம்பி ஹி அனந்தரமேவாதி. கோசி பனெத்தா²தி எத்த² ஏதஸ்மிங் பகதூபனிஸ்ஸயஸமுதா³யே கோசி ததே³கதே³ஸபூ⁴தோ கம்மஸபா⁴வோ பகதூபனிஸ்ஸயோதி அத்தோ². தத்தா²தி ‘‘யதி³த³ங் ஆரம்மணபுரேஜாதே பனெத்த² இந்த்³ரியவிப்பயுத்தபச்சயதா ந லப்³ப⁴தீ’’தி வுத்தங், தஸ்மிங், தஸ்மிங் வா ஆரம்மணபுரேஜாதக்³க³ஹணே. வத்து²ஸ்ஸ விப்பயுத்தபச்சயதா லப்³ப⁴தீதி ந வத்தப்³பா³. ந ஹி ஆரம்மணபூ⁴தங் வத்து² விப்பயுத்தபச்சயோ ஹோதி, அத² கோ² நிஸ்ஸயபூ⁴தமேவாதி. இதோ உத்தரீதி எத்த² ‘‘இதோ’’தி ‘‘புரேஜாததோ பரதோபீ’’தி. தேன கம்மாதி³பச்சயேஸுபி வக்க²மானேஸு லப்³ப⁴மானாலப்³ப⁴மானங் வேதி³தப்³ப³ந்தி வுத்தங் ஹோதி. து³தியங் பன நயங் அனபெக்கி²த்வா அட்ட²கதா²யங் ஆக³தவஸேன வுத்தங் ‘‘இதோ வா இந்த்³ரியவிப்பயுத்ததோ’’தி, அத்தனா வுத்தனயேன பன ‘‘நிஸ்ஸயிந்த்³ரியவிப்பயுத்ததோ வா’’தி. தத்த² வத்தப்³ப³ங் ஸயமேவாஹ ‘‘ஆரம்மணாதி⁴பதீ’’திஆதி³. கம்மாதீ³ஸு லப்³ப⁴மானாலப்³ப⁴மானங் ந வக்க²தி ‘‘இதோ உத்தரீ’’திஆதி³னா பகே³வ அதிதே³ஸஸ்ஸ கதத்தா, தஸ்மா புரிமோயேவ புரேஜாததோபீதி வுத்தஅத்தோ²யேவ அதி⁴ப்பேதோ.
‘‘மக்³க³பச்சயதங் அவிஜஹந்தோவா’’தி இமினா ச மக்³க³பச்சயோ வுத்தோதி ‘‘மக்³க³வஜ்ஜானங் நவன்ன’’ந்தி வுத்தங் பச்சி²மபாடே², புரிமபாடே² பன ‘‘மக்³க³பச்சயதங் அவிஜஹந்தோவா’’தி வுத்தத்தா ஏவ மக்³க³பச்சயேன ஸத்³தி⁴ங் ஸஹஜாதாதி³பச்சயா க³ஹேதப்³பா³தி ‘‘த³ஸன்ன’’ந்தி வுத்தங். தத்த² பச்சி²மபாடே² ‘‘ஏகாத³ஸஹாகாரேஹீ’’தி வத்தப்³ப³ங், புரிமபாடே² ‘‘த்³வாத³ஸஹீ’’தி.
ஸமனந்தரனிருத்³த⁴தாய ஆரம்மணபா⁴வேன சாதி விஜ்ஜமானம்பி விஸேஸமனாமஸித்வா கேவலங் ஸமனந்தரனிருத்³த⁴தாய ஆரம்மணபா⁴வேன, ந ச ஸமனந்தரனிருத்³த⁴தாஆரம்மணபா⁴வஸாமஞ்ஞேனாதி அத்தோ². ‘‘இமினா உபாயேனா’’தி பச்சயஸபா⁴க³தாத³ஸ்ஸனேன பச்சயவிஸபா⁴க³தாத³ஸ்ஸனேன ச வுத்தங் பத³த்³வயங் ஏகஜ்ஜ²ங் கத்வா பது³த்³தா⁴ரோ கதோதி த³ஸ்ஸெந்தோ ‘‘ஹேதுஆதீ³னங் ஸஹஜாதானங்…பே॰… யோஜேதப்³பா³’’தி ஆஹ. ஹேதுஆரம்மணாதீ³னங் ஸஹஜாதாஸஹஜாதபா⁴வேன அஞ்ஞமஞ்ஞவிஸபா⁴க³தாதி யோஜனா. ஏவமாதி³னாதி ஆதி³-ஸத்³தே³ன புரேஜாதானங் சக்கா²தீ³னங் ரூபாதீ³னஞ்ச புரேஜாதபா⁴வேன ஸபா⁴க³தா, பவத்தியங் வத்து²க²ந்தா⁴தீ³னங் புரேஜாதபச்சா²ஜாதானங் புரேஜாதபச்சா²ஜாதபா⁴வேன விஸபா⁴க³தாதி ஏவமாதீ³னம்பி ஸங்க³ஹோ த³ட்ட²ப்³போ³. ஹேதுனஹேதுஆதி³பா⁴வதோபி செத்த² யுக³ளகதோ விஞ்ஞாதப்³போ³ வினிச்ச²யோ. ஹேதுபச்சயோ ஹி ஹேதுபா⁴வேன பச்சயோ, இதரே தத³ஞ்ஞபா⁴வேன. ஏவமிதரேஸுபி யதா²ரஹங் யுக³ளகதோ வேதி³தப்³போ³.
உப⁴யப்பதா⁴னதாதி ஜனநோபத்த²ம்ப⁴னப்பதா⁴னதா. டா²னந்தி பத³ஸ்ஸ அத்த²வசனங் காரணபா⁴வோதி வினாபி பா⁴வபச்சயங் பா⁴வபச்சயஸ்ஸ அத்தோ² ஞாயதீதி. உபனிஸ்ஸயங் பி⁴ந்த³ந்தேனாதி அனந்தரூபனிஸ்ஸயபகதூபனிஸ்ஸயவிபா⁴கே³ன விப⁴ஜந்தேன. தயோபி உபனிஸ்ஸயா வத்தப்³பா³ உபனிஸ்ஸயவிபா⁴க³பா⁴வதோ. உபனிஸ்ஸயக்³க³ஹணமேவ காதப்³ப³ங் ஸாமஞ்ஞரூபேன. தத்தா²தி ஏவமவட்டி²தே அனந்தரூபனிஸ்ஸயபகதூபனிஸ்ஸயோதி பி⁴ந்த³னங் விபா⁴க³கரணங் யதி³ பகதூபனிஸ்ஸயஸ்ஸ ரூபானங் பச்சயத்தாபா⁴வத³ஸ்ஸனத்த²ங், நனு ஆரம்மணூபனிஸ்ஸயஅனந்தரூபனிஸ்ஸயாபி ரூபானங் பச்சயா ந ஹொந்தியேவாதி? ஸச்சங் ந ஹொந்தி, தே பன த³ஸ்ஸிதனயாதி ததே³கதே³ஸேன இதரம்பி த³ஸ்ஸிதமேவ ஹோதீதி இமமத்த²ங் த³ஸ்ஸெந்தோ ‘‘ஆரம்மணங்…பே॰… த³ட்ட²ப்³ப³’’ந்தி ஆஹ. தங்ஸமானக³திகத்தாதி தேஹி அனந்தராதீ³ஹி ஸமானக³திகத்தா அரூபானங்யேவ பச்சயபா⁴வதோ. தந்தி புரேஜாதபச்சயங். தத்தா²தி அனந்தராதீ³ஸு படி²த்வா.
பச்சயனித்³தே³ஸபகிண்ணகவினிச்ச²யகதா²வண்ணனா நிட்டி²தா.
புச்சா²வாரோ
1. பச்சயானுலோமவண்ணனா
ஏகேகங் திகங் து³கஞ்சாதி குஸலத்திகாதீ³ஸு பா³வீஸதியா திகேஸு ஹேதுது³காதீ³ஸு ஸதங் து³கேஸு ஏகேகங் திகங் து³கஞ்ச. ந திகது³கந்தி துல்யயோகீ³னங் ந திகது³கந்தி அத்தோ². திகவிஸிட்ட²ங் பன து³கங், து³கவிஸிட்ட²ஞ்ச திகங், திகவிஸிட்ட²திகது³கவிஸிட்ட²து³கேஸு விய நிஸ்ஸாய உபரி தே³ஸனா பவத்தா ஏவாதி.
யே குஸலாதி³த⁴ம்மே படிச்சாதி வுத்தா ‘‘குஸலங் த⁴ம்மங் படிச்ச குஸலோ த⁴ம்மோ உப்பஜ்ஜதி ஹேதுபச்சயா’’திஆதீ³ஸு, தே குஸலாதி³த⁴ம்மா படிச்சத்த²ங் ப²ரந்தா ஹேதுஆதி³பச்சயட்ட²ங் ஸாதெ⁴ந்தா குஸலாதி³பச்சயா சேவாதி அத்தோ². தேனேவாஹாதி யஸ்மா பச்சயத⁴ம்மானங் பச்சயுப்பன்னேஸு படிச்சத்த²ப²ரணங் உப⁴யேஸங் தேஸங் ஸஹபா⁴வே ஸதி, நாஞ்ஞதா². தேனேவ காரணேனாஹ ‘‘தே ச கோ² ஸஹஜாதாவா’’தி. தேதி ஹேதுஆதி³பச்சயா. தேஸு ஹி ஹேதுஸஹஜாதஅஞ்ஞமஞ்ஞனிஸ்ஸயாத³யோ ஸஹஜாதா, அனந்தரஸமனந்தராத³யோ அஸஹஜாதா பச்சயா ஹொந்தீதி. ஏதேஹி த்³வீஹி வாரேஹி இதரேதரத்த²போ³த⁴னவஸேன பவத்தாய தே³ஸனாய கிங் ஸாதி⁴தங் ஹோதீதி ஆஹ ‘‘ஏவஞ்ச நிருத்திகோஸல்லங் ஜனிதங் ஹோதீ’’தி.
தே தே பஞ்ஹே உத்³த⁴ரித்வாதி ‘‘ஸியா குஸலோ த⁴ம்மோ குஸலஸ்ஸ த⁴ம்மஸ்ஸ ஹேதுபச்சயேன பச்சயோ’’திஆத³யோ யே யே பஞ்ஹா விஸ்ஸஜ்ஜனங் லப⁴ந்தி, தே தே பஞ்ஹே உத்³த⁴ரித்வா. பமாத³லேகா² ஏஸாதி இத³ங் ‘‘குஸலோ ஹேது ஹேதுஸம்பயுத்தகானங் த⁴ம்மான’’ந்தி லிகி²தங் ஸந்தா⁴ய வுத்தங். படிச்சஸஹஜாதவாரேஸு ஸஹஜாதபச்சயோ, பச்சயனிஸ்ஸயவாரேஸு நிஸ்ஸயபச்சயோ, ஸங்ஸட்ட²ஸம்பயுத்தவாரேஸு ‘‘புரிமவாரேஸு…பே॰… நியமெத்வா’’தி. தத்தா²தி தேஸு புரிமவாரேஸு ச²ஸு. ந விஞ்ஞாயந்தி ஸரூபதோ அனுத்³த⁴டத்தா. ஏவமாதீ³ஹி பஞ்ஹேஹி. ஹேதாதி³பச்சயபச்சயுப்பன்னேஸூதி ஹேதுஆதீ³ஸு பச்சயத⁴ம்மேஸு ஸம்பயுத்தக்க²ந்தா⁴தி³பே⁴தே³ஸு தேஸங் பச்சயுப்பன்னேஸு. நித்³தா⁴ரணே சேதங் பு⁴ம்மங். ஹேதாதி³பச்சயானங் நிச்ச²யாபா⁴வதோதி ‘‘இமே நாம தே ஹேதுஆத³யோ பச்சயத⁴ம்மா’’தி நிச்ச²யாபா⁴வதோ ஸரூபதோ அனித்³தா⁴ரிதத்தா. யதா² ஹி நாம நானாஜடாஜடிதங் கு³ம்ப³ந்தரக³தஞ்ச தங்ஸதி³ஸங் ஸரூபதோ அதி³ஸ்ஸமானங் இத³ங் தந்தி ந வினிச்சி²னீயதி, ஏவங் ஞாதுங் இச்சி²தோபி அத்தோ² ஸரூபதோ அனித்³தா⁴ரிதோ நிஜ்ஜடோ நிகு³ம்போ³ ச நாம ந ஹோதி நிச்ச²யாபா⁴வதோ, ஸரூபதோ பன தஸ்மிங் நித்³தா⁴ரிதே தப்³பி³ஸயஸ்ஸ நிச்ச²யஸ்ஸ வஸேன புக்³க³லஸ்ஸ அஸம்பு³த்³த⁴பா⁴வாப்பத்தியா ஸோ பஞ்ஹோ நிஜ்ஜடோ நிகு³ம்போ³ ச நாம ஹோதீதி ஆஹ ‘‘நிச்ச²யாபா⁴வதோ தே பஞ்ஹா நிஜ்ஜடா நிகு³ம்பா³ ச கத்வா ந விப⁴த்தா’’தி, ‘‘ந கோசி புச்சா²ஸங்க³ஹிதோ…பே॰… விப⁴த்தா’’தி ச. தந்தி பஞ்ஹாவிஸ்ஸஜ்ஜனங் ஸந்தா⁴ய நிஜ்ஜடதா ந வுத்தா, அத² கோ² நிச்ச²யுப்பாத³னந்தி அதி⁴ப்பாயோ.
ட²பனங் நாம இத⁴ வினெய்யஸந்தானே பதிட்ட²பனங், தங் பன தஸ்ஸ அத்த²ஸ்ஸ தீ³பனங் ஜோதனந்தி ஆஹ ‘‘பகாஸிதத்தா’’தி. பகாரேஹீதி ஹேதுஆதி³பச்சயப்பகாரேஹி, குஸலாதி³பச்சயபச்சயுப்பன்னப்பகாரேஹி வா.
25-34. பரிகப்பனங் வித³ஹனந்தி கத்வா ஆஹ ‘‘பரிகப்பபுச்சா²தி விதி⁴புச்சா²’’தி. ஸியாதி ப⁴வெய்யாதி அத்தோ². ஏஸோ விதி⁴ கிங் அத்தீ²தி ஏதேன ‘‘ஸியா’’தி விதி⁴ம்ஹி கிரியாபத³ங். புச்சா² பன வாக்யத்த²ஸித்³தா⁴ வேதி³தப்³பா³. தமேவ ஹி வாக்யத்த²ஸித்³த⁴ங் புச்ச²ங் த³ஸ்ஸேதுங் அட்ட²கதா²யம்பி ‘‘கிங் ஸோ குஸலங் த⁴ம்மங் படிச்ச ஸியா’’தி வுத்தங். ஸங்புச்ச²னங் பரிகப்பபுச்சா²தி தஸ்மிங் பக்கே² ஹி கிரியாய பதே³னேவ புச்சா² விபா⁴வீயதீதி வுத்தங் ஹோதீதி. ‘‘ஸியா குஸலங் த⁴ம்மங் படிச்ச குஸலோ த⁴ம்மோ உப்பஜ்ஜெய்ய ஹேதுபச்சயா’’தி எத்த² ‘‘குஸலங் த⁴ம்மங் படிச்ச ஹேதுபச்சயா’’தி உப⁴யமித³ங் பச்சயவசனங், ‘‘குஸலோ த⁴ம்மோ உப்பஜ்ஜெய்யா’’தி பச்சயுப்பன்னவசனங். தேஸு ‘‘யோ குஸலோ த⁴ம்மோ உப்பஜ்ஜெய்யா’’திஆதி³மாஹ. தத்த² ஸப்³ப³புச்சா²னங் பவத்திதோதி குஸலமூலாதீ³னங் ஸத்தஸத்தபுச்சா²னங் பவத்தனதோ, உப்பஜ்ஜமானங் குஸலங். தேஹி பச்சயேஹீதி பச்சா²ஜாதவிபாகபச்சயேஹி உப்பத்தி அனுஞ்ஞாதாதி ஆபஜ்ஜதி, ந ச தங் யுத்தந்தி அதி⁴ப்பாயோ. தங்தங்பச்சயாதி ததோ ததோ யோனிஸோமனஸிகாராதி³பச்சயதோ. ப⁴வனமத்தி²தா எத்த² ந ச புச்சி²தாதி ‘‘கிங் ஸியா’’தி வுத்தயோஜனாய தோ³ஸமாஹ. ஏவஞ்ச கத்வாதி உப்பத்தியா ஏவ புச்சி²தத்தா.
தத்தா²தி ‘‘அத² வா’’திஆதி³னா வுத்தே அத்த²ந்தரே. உப்பஜ்ஜெய்யாதி உப்பத்திங் அனுஜானித்வாதி ‘‘உப்பஜ்ஜெய்யா’’தி எத்த² வுத்தங் குஸலபச்சயங் உப்பத்திங் அனுஜானித்வா. தஸ்ஸாதி உப்பத்தியா. ப⁴வனபுச்ச²னந்தி ஹேதுபச்சயா ப⁴வனபுச்ச²னங் ந யுத்தந்தி ஸம்ப³ந்தோ⁴. புன தஸ்ஸாதி ஹேதுபச்சயா உப்பத்தியா. ப⁴வனபுச்ச²னந்தி கேவலங் ப⁴வனபுச்ச²னங். தஸ்மாதி யஸ்மா வுத்தனயேன உப⁴யத்தா²பி உப்பத்திஅனுஜானநமுகே²ன ப⁴வனபுச்ச²னங் அயுத்தங், தஸ்மா. அனுஜானநஞ்ச அட்ட²கதா²யங் வுத்தே அத்த²விகப்பத்³வயே அத்த²தோ ஆபன்னங், தங் அனநுஜானந்தோ ஆஹ ‘‘அனநுஜானித்வாவா’’திஆதி³. ஸங்புச்ச²னமேவாதி இமினா ஸங்புச்ச²னே ‘‘உப்பஜ்ஜெய்யா’’தி இத³ங் கிரியாபத³ந்தி த³ஸ்ஸேதி. யதி³ ஏவங் ‘‘ஸியா’’தி இத³ங் கத²ந்தி ஆஹ ‘‘ஸியாதி…பே॰… புச்ச²தீ’’தி. அயங் நயோதி ‘‘ஸியா’’திஆதி³னா அனந்தரவுத்தோ அத்த²னயோ. ந விஞ்ஞாயதி அனாமட்ட²விஸேஸத்தா. த்³வேபி புச்சா²தி ஸம்ப⁴வனபுச்சா² தப்³பி³ஸேஸபுச்சா² சாதி து³விதா⁴பி புச்சா² ஏகாயேவ புச்சா² ஸங்புச்ச²னபா⁴வதோ ஏகாதி⁴கரணபா⁴வதோ ச.
க³மனுஸ்ஸுக்கவசனந்தி க³மனஸ்ஸ உஸ்ஸுக்கவசனங். க³மனகிரியாய யதா² அத்தனோ கத்தா உபரி கத்தப்³ப³கிரியாய யொக்³யரூபோ ஹோதி, ஏவமேவ டா²னங் க³மனுஸ்ஸுக்கனங் தஸ்ஸ போ³த⁴னங் வசனங். ஏவங்பூ⁴தா ச கிரியா யஸ்மா அத்த²தோ கிரியந்தராபெக்கா² நாம ஹோதி, தஸ்மா வுத்தங் ‘‘க³மனஸ்ஸ…பே॰… அத்தோ²’’தி. கத²ங் பனேதஸ்மிங் ஸஹஜாதபச்சயபட்டா²னே படிச்சவாரே படிச்சஸத்³த³ஸ்ஸ பச்சி²மகாலகிரியாபெக்க²தாதி சோத³னங் மனஸி கத்வா ஆஹ ‘‘யதி³பீ’’திஆதி³. தேனேதங் த³ஸ்ஸேதி ‘‘அஸதிபி படிஅயனுப்பஜ்ஜனானங் காலபே⁴தே³ அஞ்ஞத்ர ஹேதுப²லேஸு தி³ஸ்ஸமானங் புரிமபச்சி²மகாலதங் ‘‘க³ஹணப்பவத்திஆகாரவஸேன…பே॰… த³ட்ட²ப்³போ³’’தி. தத்த² அத்தபடிலாபோ⁴ உப்பாதோ³தி அத்தோ².
க³மனந்தி ‘‘க³ச்ச²ந்தஸ்ஸ படிக³மனங், உப்பஜ்ஜந்தஸ்ஸ படிஉப்பஜ்ஜன’’ந்தி. தயித³ங் க³மனபடிக³மனங், உப்பஜ்ஜனபடிஉப்பஜ்ஜனங் ஸமானகிரியா. கத²ங்? யஸ்மா படிகரணங் படிஸத்³த³த்தோ². தஸ்மாதி யஸ்மா ஸஹஜாதபச்சயபூ⁴தஸ்ஸ உப்பஜ்ஜந்தஸ்ஸ படிஉப்பஜ்ஜனங் ‘‘படிச்ச உப்பஜ்ஜதீ’’தி எத்த² அத்தோ², தஸ்மா. ததா³யத்துப்பத்தியாதி ஸஹயோகே³ கரணவசனங், கரணத்தே², ஹேதுத்தே² வா, தஸ்மிங் உப்பஜ்ஜமானே குஸலத⁴ம்மே ஆயத்தாய படிப³த்³தா⁴ய உப்பத்தியா ஸஹேவ படிக³ந்த்வாதி அத்தோ². தேன படிஅயனத்தலாபா⁴னங் ஸமானகாலதங் த³ஸ்ஸேதி. தேனேவாஹ ‘‘ஸஹஜாதபச்சயங் கத்வாதி வுத்தங் ஹோதீ’’திஆதி³. நனு ச ஸமானகாலகிரியாயங் ஈதி³ஸோ ஸத்³த³ப்பயோகோ³ நத்தி², புரிமகாலகிரியாயமேவ ச அத்தீ²தி? நாயமேகந்தோ ஸமானகாலகிரியாயம்பி கேஹிசி இச்சி²தத்தா. ததா² ஹி –
‘‘நிஹந்த்வா திமிரங் லோகே, உதி³தோ ஸதரங்ஸமி;
லோகேகசக்கு²பூ⁴தோய-மத்த²மேதி தி³வாகரோ.
‘‘ஸிரீவிலாஸரூபேன, ஸப்³ப³ஸோபா⁴விபா⁴வினா;
ஓபா⁴ஸெத்வாதி³தோ பு³த்³தோ⁴, ஸதரங்ஸி யதா² பரோ’’தி. –
ச பயோகா³ தி³ஸ்ஸந்தி.
35-38. தாஸூதி து³கமூலகனயே ஹேதாரம்மணது³கே ஏகூனபஞ்ஞாஸபுச்சா², தாஸு. ஹேதாரம்மணது³கேதி ‘‘ஹேதுபச்சயா ஆரம்மணபச்சயா’’தி ஏவங் ஹேதுபச்சயஆரம்மணபச்சயானங் வஸேன ஆக³தே பச்சயது³கே. த்³வின்னங் புச்சா²னங் த³ஸ்ஸிதத்தாதி யஸ்மிங் வாசனாமக்³கே³ குஸலபத³மூலா குஸலபதா³வஸானா எத்தா²தி ஏதஸ்மிங் பண்ணத்திவாரே புச்சா²னங் வுத்தோ ந பச்சயானந்தி அத்தோ². புச்சா²ய ஹி வஸேன ஹேதுபச்சயே ஹேதுபச்சயஸங்கா²தங் ஏகமூலங் ஏதஸ்ஸாதி ஏகமூலகோ, நயஸத்³தா³பெக்கா²ய சாயங் புல்லிங்க³னித்³தே³ஸோ. ஏவங் ஆரம்மணபச்சயமூலகாதீ³ஸு. ததா² ஹேதுஆரம்மணபச்சயஸங்கா²தானி ‘‘பச்சயானங் பன வஸேனா’’திஆதி³. ஹேதாரம்மணது³காதீ³னந்தி அவயவே ஸாமிவசனங், அதி⁴பதிஆதீ³னந்தி ஸம்ப³ந்தோ⁴. ததோ பரங் மூலஸ்ஸ அபா⁴வதோ ஸப்³ப³மூலகங் அனவஸேஸானங் பச்சயானங் மூலபா⁴வேன க³ஹிதத்தா. ந ஹி மூலவந்தபா⁴வேன க³ஹிதா பச்சயா மூலபா⁴வேன க³ய்ஹந்தி. பச்சயக³மனங் பாளிக³மனந்தி விஞ்ஞாயதி அபி⁴தெ⁴ய்யானுரூபங் லிங்க³வசனாதீ³தி கத்வா. இதா⁴தி அனுலோமே. ச-ஸத்³தோ³ உபசயத்தோ². ஸோ தேவீஸதிமூலஸ்ஸ ஸப்³ப³மூலபா⁴வங் உபசயேன வுச்சமானங் ஜோதேதி.
39-40. ஏவங் ஸதீதி ‘‘ஆரம்மணபச்சயா ஹேதுபச்சயா’’தி ஆரபி⁴த்வா ‘‘ஆரம்மணபச்சயா அவிக³தபச்சயா, ஆரம்மணபச்சயா ஹேதுபச்சயா’’தி ஏவங் வாசனாமக்³கே³ ஸதி. சக்கப³ந்த⁴னவஸேன பாளிக³தி ஆபஜ்ஜது, கோ தோ³ஸோதி கதா³சி வதெ³ய்யாதி ஆஹ ‘‘ஹெட்டி²மஸோத⁴னவஸேன ச இத⁴ அபி⁴த⁴ம்மே பாளி க³தா’’தி. ததா² ஹி க²ந்த⁴விப⁴ங்கா³தீ³ஸுபி பாளி ஹெட்டி²மஸோத⁴னவஸேன பவத்தா. க³ணனசாரேன தமத்த²ங் ஸாதே⁴துங் ‘‘ஏவஞ்ச கத்வா’’திஆதி³ வுத்தங். ஆரம்மணாதீ³ஸூதி ஆரம்மணமூலகாதீ³ஸு நயேஸு. தஸ்மிங் தஸ்மிந்தி தஸ்மிங் தஸ்மிங் ஆரம்மணாதி³பச்சயே. ஸுத்³தி⁴கதோதி ஸுத்³தி⁴கனயதோ. தஸ்மாதி ஆரம்மணமூலகாதீ³ஸு ஸுத்³தி⁴கனயஸ்ஸ அலப்³ப⁴மானத்தா. ஏகமூலகனயோ த³ட்ட²ப்³போ³ ஆரம்மணமூலகேதி அதி⁴ப்பாயோ. ‘‘ஆரம்மணபச்சயா…பே॰… அவிக³தபச்சயாதி வா’’திஆதி³ தாதி³ஸங் வாசனாமக்³க³ங் ஸந்தா⁴ய வுத்தங். யத்த² ‘‘ஆரம்மணபச்சயா ஹேதுபச்சயா, ஆரம்மணபச்சயா அதி⁴பதிபச்சயா, ஆரம்மணபச்சயா…பே॰… அவிக³தபச்சயா’’தி ஏவங் ஆரம்மணமூலகே அனந்தரபச்சயமூலபூ⁴தா ஆரம்மணபச்சயபரியோஸானமேவ ஏகமூலகங் த³ஸ்ஸெத்வா உபரி அவஸிட்ட²ஏகமூலகதோ பட்டா²ய யாவ ஸப்³ப³மூலகே விக³தபச்சயா, தாவ ஸங்கி²பித்வா அவிக³தபச்சயோவ த³ஸ்ஸிதோ. தேனாஹ ‘‘ஏகமூலகேஸூ’’திஆதி³. இதோ பரேஸுபி ஏதி³ஸேஸு டா²னேஸு ஏஸேவ நயோ. மூலமேவ த³ஸ்ஸெத்வாதி அதி⁴பதிமூலகே ஏகமூலகஸ்ஸ ஆதி³மேவ த³ஸ்ஸெத்வா. ந ஸுத்³தி⁴கத³ஸ்ஸனந்தி ந ஸுத்³தி⁴கனயத³ஸ்ஸனங். ‘‘ஸுத்³தி⁴கனயோ நாபி ஸப்³ப³மூலகே கதிபயபச்சயத³ஸ்ஸனங் உபரி ஸப்³ப³மூலகே ஏகமூலகஸ்ஸ ஆக³தத்தா.
41. ஏகஸ்மிஞ்சாதி அவிக³தமூலகாதி³கே ச நயே. ஸங்கே²பந்தரக³தோதி ஸங்கே²பஸ்ஸ ஸங்கி²பிதஸ்ஸ அப்³ப⁴ந்தரக³தோ, ஸங்கி²பிதப்³போ³தி அத்தோ². மஜ்ஜி²மானங் த³ஸ்ஸனந்தி மஜ்ஜி²மானங் நயதோ த³ஸ்ஸனங், அஞ்ஞதா² ஸங்கே²போ ஏவ ந ஸியா. க³தித³ஸ்ஸனந்தி அந்தத³ஸ்ஸனங் அகத்வா பாளிக³தியா த³ஸ்ஸனங், தஞ்ச ஆதி³தோ பட்டா²ய கதிபயத³ஸ்ஸனமேவ. தேன விக³தபச்சயுத்³தா⁴ரணேன ஓஸானசதுக்கங் த³ஸ்ஸேதி அவிக³தமூலகே விக³தபச்சயஸ்ஸ ஓஸானபா⁴வதோ. ஸப்³ப³மூலகஸ்ஸ அவஸானேன ‘‘விக³தபச்சயா’’தி பதே³ன.
யதா² ஹேதுஆதீ³னங் பச்சயானங் உத்³தே³ஸானுபுப்³பி³யா து³கதிகாதி³யோஜனா கதா, ஏவங் தத்த² ஆரம்மணாதி³பச்சயே லங்கி⁴த்வாபி ஸக்கா யோஜனங் காதுங், ததா² கஸ்மா ந கதா? யதி³பி அனவஸேஸதோ பச்சயானங் மூலபா⁴வேன க³ஹிதத்தா கேஸஞ்சி கேஹிசி யோஜனே அத்த²விஸேஸோ நத்தி², ஆரம்மணமூலகாதீ³ஸு பன ஆரம்மணாதி⁴பதிது³காதீ³னங் ஹேதுமூலகே ச ஹேதுஅதி⁴பதிஅனந்தரதிகாதீ³னங் தங்தங்அவஸிட்ட²பச்சயேஹி யோஜனாய அத்தே²வ விஸேஸோ, ஏவங் ஸந்தேபி யஸ்மா உப்படிபாடியா யோஜனா ந ஸுக²க்³க³ஹணா, ஸக்கா ச ஞாணுத்தரேன புக்³க³லேன யதா²த³ஸ்ஸிதேன நயேன யோஜிதுந்தி உப்படிபாடியா பச்சயே அக்³க³ஹெத்வா படிபாடியாவ தே யோஜெத்வா த³ஸ்ஸிதாதி இமமத்த²மாஹ ‘‘எத்த² சா’’திஆதி³னா.
தஞ்ச க³மனங் யுத்தந்தி யங் ஸப்³பே³ஹி திகேஹி ஏகேகஸ்ஸ து³கஸ்ஸ யோஜனாவஸேன பாளிக³மனங், தங் யுத்தங் திகேஸு து³கானங் பக்கே²பபா⁴வதோ. தத்தா²தி து³கேஸு. ஏகேகஸ்மிந்தி ஏகேகஸ்மிங் து³கதிகே. நயாதி அனுலோமனயாத³யோ வாரே வாரே சத்தாரோ நயா, புச்சா² பன ஸத்தவீஸதி. யதி³ ஏவங் கஸ்மா ஹேதுது³கேன ஸமானாதி? தங் திகபதே³ஸு பச்சேகங் ஹேதுது³கஸ்ஸ லப்³ப⁴மானஸ்ஸ ஹேதுது³கபா⁴வஸாமஞ்ஞதோ வுத்தங்.
வுத்தனயேனாதி ‘‘ந ஹீ’’திஆதி³னா து³கதிகே வுத்தனயேன. தத்த² ஹி ந து³கஸ்ஸ யோஜனா அத்தி², அத² கோ² து³கானங் ஏகேகேன பதே³ன திகஸ்ஸ யோஜனா. தேனாஹ ‘‘ஏகேகோ திகோ து³கஸதேன யோஜிதோ’’தி. ஏகேகஸ்மிந்தி ஏகேகஸ்மிங் திகது³கே.
திகாத³யோ ச² நயாதி ‘‘திகஞ்ச பட்டா²னவர’’ந்திஆதி³னா கா³தா²யங் வுத்தா திகபட்டா²னாத³யோ ச² நயா. ஸத்தவித⁴ம்பீதி வாரபே⁴தே³ன ஸத்ததா⁴ பி⁴ந்தி³த்வா வுத்தம்பி. அனுலோமந்தி பச்சயானுலோமங் அனுலோமபா⁴வஸாமஞ்ஞேன ஸஹ க³ஹெத்வா. ததா² சதுப்³பி³த⁴ம்பி திகபட்டா²னங் திகபட்டா²னதாஸாமஞ்ஞேன, து³கபட்டா²னாதீ³னி ச சத்தாரி சத்தாரி தங்ஸாமஞ்ஞேன ஸஹ க³ஹெத்வா. இமமத்த²ங் க³ஹெத்வா ‘‘திகஞ்ச பட்டா²னவர’’ந்தி கா³தா²ய அதி⁴ப்பாயவிபா⁴வனவஸேன ‘‘அனுலோமம்ஹீ’’திஆதி³னா வுத்தங் இமமத்த²ங் க³ஹெத்வா. ஸத்தப்பபே⁴தே³தி படிச்சவாராதி³வஸேன ஸத்தப்பபே⁴தே³. ச²பி ஏதே திகாதி³பே⁴தே³ன சதுசதுப்பபே⁴தா³ த⁴ம்மானுலோமாதி³வஸேன ச² உத்³த⁴ரிதப்³பா³தி இத³ங் த³ஸ்ஸேதீதி யோஜனா. அயஞ்ஹெத்த² ஸங்கே²பத்தோ² – த⁴ம்மானுலோமாதி³விபா⁴க³பி⁴ன்னாபி திகாதி³பா⁴வஸாமஞ்ஞேன ஏகஜ்ஜ²ங் கத்வா வுத்தா திகபட்டா²னாதி³ஸங்கா²தா திகாத³யோ ச² த⁴ம்மனயா படிச்சவாராதி³வஸேன விப⁴ஜியமானா தத்த² தத்த² நித்³தா⁴ரியமானே அனுலோமதாஸாமஞ்ஞேன அனுலோமந்தி ஏகதோ க³ஹிதே பச்சயானுலோமே ஸுட்டு² அதிவிய க³ம்பீ⁴ராதி. அட்ட²கதா²யங் பன ‘‘இத⁴ பன அயங் கா³தா² தஸ்மிங் த⁴ம்மானுலோமே பச்சயானுலோமங் ஸந்தா⁴ய வுத்தா’’தி த⁴ம்மானுலோமோ பச்சயானுலோமஸ்ஸ விஸேஸனபா⁴வேன நியமெத்வா வுத்தோ. ஏஸ நயோ பச்சனீயகா³தா²தீ³ஸுபி. திகபட்டா²னஸ்ஸ து³கபட்டா²னஸ்ஸ ச புப்³பே³ அத்தோ² வுத்தோதி ஆஹ ‘‘து³கதிகபட்டா²னாதீ³ஸூ’’தி. திகேஹி பட்டா²னந்தி திகேஹி நானப்பகாரதோ பச்சயவிபா⁴வனங், திகேஹி வா ஞாணஸ்ஸ பவத்தனட்டா²னங். து³கஸம்ப³ந்தி⁴ திகபட்டா²னங், து³கவிஸிட்டா²னங் வா திகானங் பட்டா²னங் து³கதிகபட்டா²னந்தி இமமத்த²ங் த³ஸ்ஸெந்தோ ‘‘து³கான’’ந்திஆதி³மாஹ. து³காதி³விஸேஸிதஸ்ஸாதி து³காதி³பத³விஸேஸிதஸ்ஸ து³காதி³பா⁴வோ த³ட்ட²ப்³போ³ ‘‘ஹேதுங் குஸலங் த⁴ம்மங் படிச்ச, நஹேதுங் குஸலங் த⁴ம்மங் படிச்சா’’திஆதி³வசனதோ.
பச்சயானுலோமவண்ணனா நிட்டி²தா.
2. பச்சயபச்சனீயவண்ணனா
42-44. யாவாதி பாளிபத³ஸ்ஸ அத்த²வசனங் யத்தகோதி ஆஹ ‘‘பபே⁴தோ³’’தி. அத்தி² தேவீஸதிமூலகஸ்ஸாதி அத்தோ². தாவ தத்தகங் பபே⁴த³ங். தத்தா²தி அனுலோமே ஆக³தந்தி அத்தோ². நயத³ஸ்ஸனவஸேன த³ஸ்ஸிதங் ஏகேகஸ்ஸ பத³ஸ்ஸ வித்தா²ரங் த³ஸ்ஸேதி. அவஸேஸஸ்ஸ பச்சயஸ்ஸ மூலவந்தபா⁴வேன க³ஹிதஸ்ஸ.
பச்சயபச்சனீயவண்ணனா நிட்டி²தா.
3. அனுலோமபச்சனீயவண்ணனா
45-48. புன தத்தா²தி அனுலோமே. பச்சயபதா³னீதி பச்சயா ஏவ பதா³னி பச்சயபதா³னி. இதா⁴தி அனுலோமபச்சனீயே. ஸுத்³தி⁴கபச்சயானந்தி பச்சயந்தரேன அவோமிஸ்ஸானங் பச்சயானங், அனுலோமபச்சனீயதே³ஸனங் வக்க²மானங் ஸந்தா⁴யாதி அத்தோ².
அனுலோமபச்சனீயவண்ணனா நிட்டி²தா.
புச்சா²வாரவண்ணனா நிட்டி²தா.
1. குஸலத்திகங்
1. படிச்சவாரவண்ணனா
1. பச்சயானுலோமங்
(1) விப⁴ங்க³வாரவண்ணனா
53. திகபதா³னங் திகந்தரபதே³ஹி விஸதி³ஸதா பாகடாயேவாதி வுத்தங் ‘‘திகபத³னானத்தமத்தேன வினா’’தி. மூலாவஸானவஸேனாதி ‘‘ஏகமூலேகாவஸானங் நவா’’திஆதி³னா வுத்தமூலாவஸானவஸேன. ‘‘ந தாயேவ வேத³னாத்திகாதீ³ஸூ’’தி எத்த² யா ஸதி³ஸதா படிக்கி²த்தா, தங் த³ஸ்ஸேதுங் ‘‘ஸதி³ஸதங் ஸந்தா⁴ய ‘ந தாயேவா’தி வுத்த’’ந்தி ஆஹ.
தேன ஸஹஜாதபச்சயபூ⁴தேனாதி தேன வேத³னாதி³பே⁴தே³ன ஏகேன த⁴ம்மேன ஸஹஜாதபச்சயோ ஹொந்தேன, ஸஹஜாதபச்சயதங் வா பத்தேன பாபுணந்தேனாதி அனுஞ்ஞாதங் விய ஹோதீதி யதி³பி அட்ட²கதா²யங் ‘‘யாவ நிரோத⁴க³மனா’’திஆதி³வசனேஹி க²ணத்தயஸமங்கீ³ உப்பஜ்ஜதீதி அனுஞ்ஞாதங் விய ஹோதி, உப்பாத³க்க²ணஸமங்கீ³யேவ பன உப்பஜ்ஜதீதி வுத்தோ படிச்சவாராதீ³னங் ச²ன்னங் வாரானங் உப்பாத³மேவ க³ஹெத்வா பவத்தத்தா. ததா² ஹி தேஸு பச்சா²ஜாதபச்சயோ அனுலோமதோ ந திட்ட²தி.
இத⁴ குஸலவசனேன க³ஹிதே க²ந்தே⁴ ஸந்தா⁴ய வுத்தந்தி இமஸ்மிங் படிச்சவாரே ‘‘குஸலங் த⁴ம்மங் படிச்ச குஸலோ த⁴ம்மோ உப்பஜ்ஜதீ’’தி குஸலஸத்³தே³ன க³ஹிதே க²ந்தே⁴ ஸந்தா⁴ய வுத்தங் சதூஸுபி குஸலக²ந்தே⁴ஸு ஏகதோ உப்பஜ்ஜமானேஸு ஸாமஞ்ஞதோ வுத்தேஸு ஸஹஜாதாதி³ஸாதா⁴ரணபச்சயவஸேன அவிஸேஸதோ ஸப்³பே³ ஸப்³பே³ஸங் பச்சயாதி அயமேவ இமஸ்ஸ பச்சயோ, இமஸ்ஸேவ அயங் பச்சயோதி ச நியமெத்வா வத்துங் ந ஸக்கா. தேன வுத்தங் அட்ட²கதா²யங் ‘‘ஏகஸ்ஸேவ த்³வின்னங்யேவ வா’’திஆதி³. ‘‘ஸுகா²ய வேத³னாய ஸம்பயுத்தங் த⁴ம்மங் படிச்சா’’திஆதீ³ஸு பன விஸேஸனபா⁴வேன வேத³னாதீ³னங் விஸுங் க³ஹிதத்தா ‘‘ஏகங் க²ந்த⁴ங் படிச்ச த்³வே க²ந்தா⁴’’திஆதி³ வத்துங் ஸக்கா. தேன வுத்தங் ‘‘வேத³னாத்திகாதீ³ஸு பனா’’திஆதி³. ததா²தி இமினா ‘‘ஏகேகஸ்ஸபி து³காதி³பே⁴தா³னஞ்சா’’தி இமங் அனுகட்³ட⁴தி.
ஏதஸ்மிந்தி ‘‘விபாகாப்³யாகதங் கிரியாப்³யாகத’’ந்தி ஏவங் விபாககிரியாப்³யாகதக்³க³ஹணே. ‘‘ஸப்³ப³ஸ்மிங் ந க³ஹேதப்³ப³’’ந்தி வுத்தங், கத்த² பன க³ஹேதப்³ப³ந்தி ஆஹ ‘‘சித்தஸமுட்டா²னஞ்ச ரூபந்தி எத்தே²வா’’தி. ஏவங் பட²மே வாக்யே அதிப்³யாபிதங் பரிஹரித்வா து³தியே அப்³யாபிதங் பரிஹரிதுங் ‘‘ந கேவல’’ந்திஆதி³ வுத்தங். எத்தா²தி ‘‘விபாகாப்³யாகதங் கிரியாப்³யாகத’’ந்தி எத்த² ந க³ஹேதப்³ப³ங் தஸ்ஸபி ஆருப்பே உப்பஜ்ஜமானஸ்ஸ ரூபேன வினா உப்பத்திதோ. எத்த² ச யதா² ஹேதுபச்சயக்³க³ஹணேனேவ அஹேதுகங் நிவத்திதங், ஏவங் சித்தஸமுட்டா²னஞ்ச ரூபந்தி ரூபக்³க³ஹணேனேவ ஆருப்பே விபாகோபி தத்த² உப்பஜ்ஜமானேன சித்துப்பாதே³ன ஸத்³தி⁴ங் ந க³ஹிதோ. தங் பனேதங் அத்த²ஸித்³த⁴மேவ அகத்வா ஸரூபதோ பாகடதரங் ‘‘விபாகாப்³யாகத’’ந்திஆதி³ வுத்தங். படிஸந்தி⁴பச்சி²மசித்தானி பனெத்த² ஸதிபி ரூபஸ்ஸ அனுப்பாத³னே வவத்தா²னாபா⁴வதோ ந க³ஹிதானீதி த³ட்ட²ப்³ப³ங்.
பச்சயபூ⁴தஸ்ஸாதி க²ந்தா⁴னங் பச்சயபூ⁴தஸ்ஸ வத்து²ஸ்ஸ அக்³க³ஹிததாபத்திங் நிவாரேதுங், கத²ங்? பச்சயுப்பன்னபா⁴வேன, கத்த²? ‘‘கடத்தா ச ரூப’’ந்தி ஏதஸ்மிங் ஸாமஞ்ஞவசனே ‘‘க²ந்தே⁴ படிச்ச வத்தூ²’’தி வுத்தங், ஏவஞ்ஹிஸ்ஸ பச்சயுப்பன்னதா த³ஸ்ஸிதா அஞ்ஞமஞ்ஞாபெக்க²ங் வசனத்³வயந்தி ‘‘க²ந்தே⁴ படிச்ச வத்து², வத்து²ங் படிச்ச க²ந்தா⁴’’தி பத³த்³வயங் ஸந்தா⁴ய வுத்தங். ஸாமஞ்ஞேன க³ஹிதந்தி ‘‘கடத்தா ச ரூப’’ந்தி இமினா ஸாமஞ்ஞவசனேன, கடத்தாரூபஸாமஞ்ஞேன வா க³ஹிதங்.
உபாதா³ரூபக்³க³ஹணேன வினா ‘‘உபாதா³ரூப’’ந்தி அக்³க³ஹெத்வா கேவலங் சித்தஸமுட்டா²னரூபங் ‘‘கடத்தாரூபங்’’இச்சேவ க³ஹெத்வாதி அத்தோ². ஏதஸ்மிங் பன த³ஸ்ஸனேதி ‘‘மஹாபூ⁴தேபி படிச்ச உப்பத்தித³ஸ்ஸனத்த²’’ந்தி வுத்தே ஏதஸ்மிங் அத்த²த³ஸ்ஸனே. க²ந்த⁴பச்சயஸஹிதந்தி படிஸந்தி⁴யங் கடத்தாரூபங், பவத்தியங் சித்தஸமுட்டா²னங் ரூபங் வத³தி. அஸஹிதந்தி பன பவத்தியங் கடத்தாரூபங் ஆஹாரஸமுட்டா²னங் உதுஸமுட்டா²னங் அனிந்த்³ரியப³த்³த⁴ங் அஸஞ்ஞப⁴வஸங்க³ஹிதஞ்ச ரூபங். படிஸந்தி⁴யம்பீதி பி-ஸத்³தே³ன பவத்தியம்பி கடத்தாரூபங் அஞ்ஞஞ்ச தத்த² உப்பஜ்ஜனகங் உபாதா³ரூபந்தி அத்தோ² த³ட்ட²ப்³போ³. கத²ங் பனெத்த² பூ⁴தே படிச்ச உப்பஜ்ஜமானஸ்ஸ ரூபஸ்ஸ ஹேதுபச்சயா உப்பஜ்ஜதீதி? ‘‘க²ந்தே⁴ படிச்ச ஹேதுபச்சயா உப்பஜ்ஜமானங் ரூபங் பூ⁴தேபி படிச்ச உப்பஜ்ஜதீ’’தி ஏவங் பத³மேதங், பூ⁴தானங் வா ஹேதுபச்சயதோ நிப்³ப³த்தத்தா ஏவங் வுத்தங். காரணகாரணம்பி ஹி காரணந்த்வேவ வுச்சதி யதா² ‘‘சோரேஹி கா³மோ த³ட்³டோ⁴’’தி.
பூ⁴தே படிச்ச உபாதா³ரூபந்தி பது³த்³தா⁴ரோ கதோ, ‘‘மஹாபூ⁴தே படிச்ச உபாதா³ரூப’’ந்தி பன பாடோ²தி அட்ட²கதா²யஞ்ச தமேவ வுத்தங். அயங் ஹெத்த²த்தோ² – ‘‘மஹாபூ⁴தே படிச்ச உபாதா³ரூப’’ந்தி இமஸ்மிங் பாடே² வுத்தனயேன உபாதா³ரூபம்பி குஸலே க²ந்தே⁴ மஹாபூ⁴தே ச படிச்ச உப்பஜ்ஜதீதி. கோ பன ஸோ நயோதி தங் த³ஸ்ஸேதுங் ‘‘மஹாபூ⁴தே…பே॰… ஸந்தா⁴யாஹா’’தி வுத்தங். தத்த² அத்த²தோ அயங் நயோ வுத்தோதி ‘‘மஹாபூ⁴தே படிச்ச சித்தஸமுட்டா²னங் ரூபங் கடத்தாரூபங் உபாதா³ரூப’’ந்தி இமினா அப்³யாகதே க²ந்தே⁴ மஹாபூ⁴தே ச படிச்ச உபாதா³ரூபானங் உப்பத்திவசனேன குஸலே க²ந்தே⁴ மஹாபூ⁴தே ச படிச்ச உபாதா³ரூபானங் உப்பத்தி அத்த²தோ வுத்தோ ஹோதீதி அத்தோ².
54. ரூபேன வினா பச்சயுப்பன்னங் ந லப்³ப⁴தீதி ஏதேன யா புச்சா² அரூபமிஸ்ஸகாவஸானா, தாபி இத⁴ ந க³ய்ஹந்தி, பகே³வ ரூபாவஸானாதி த³ஸ்ஸேதி.
57. தாய ஸமானலக்க²ணாதி பஞ்சக்க²ந்த⁴படிஸந்தி⁴தாய க³ப்³ப⁴ஸெய்யகபடிஸந்தி⁴யா ஸமானலக்க²ணா. பரிபுண்ணத⁴ம்மானந்தி பரியத்திவிபா⁴கா³னங் பஞ்சக்க²ந்த⁴த⁴ம்மானங். எத்தா²தி ஏதஸ்மிங் ஸஹஜாதபச்சயனித்³தே³ஸே.
சித்தகம்மஸமுட்டா²னரூபந்தி புன ஆஹாரஸமுட்டா²னந்தி எத்த² புனக³ஹணங் உதுஸமுட்டா²னாபெக்க²ங். ந ஹி தங் புப்³பே³ பா³ஹிரக்³க³ஹணேன அக்³க³ஹிதங், ஆஹாரஸமுட்டா²னங் பன அக்³க³ஹிதமேவ, உதுஸமுட்டா²னஸ்ஸ கஸ்மா புனக³ஹணந்தி ஆஹ ‘‘ஏதேஹீ’’திஆதி³. தத்தா²தி அஸஞ்ஞஸத்தேஸு. தஸ்ஸாதி உதுஸமுட்டா²னஸ்ஸ. ஆதி³ம்ஹீதி பா³ஹிரஆஹாரஸமுட்டா²னஉதுஸமுட்டா²னஅஸஞ்ஞஸத்தவஸேன ஆக³தவாரேஹி பட²மவாரே. அவிஸேஸவசனந்தி பா³ஹிராதி³விஸேஸங் அகத்வா வுத்தவசனங், அரூபம்பி பச்சயங் லப⁴ந்தங் அத்த²ங் ஹேதாதி³கே பச்சயே லப⁴ந்தங் ஸஹ ஸங்க³ண்ஹித்வாதி யோஜனா. தஸ்ஸாதி, தத்தா²தி ச பத³த்³வயேன யதா²வுத்தங் பட²மவாரமேவ பச்சாமஸதி. தங்ஸமானக³திகந்தி சித்தஸமுட்டா²னக³திகங். இதா⁴பீதி இமஸ்மிங் ஸஹஜாதபச்சயனித்³தே³ஸேபி. கம்மபச்சயவிப⁴ங்கே³ வியாதி நானாக்க²ணிககம்மபச்சயனித்³தே³ஸே விய. ததா² ஹி வுத்தங் அட்ட²கதா²யங் ‘‘தங்ஸமுட்டா²னந்தி இமினா படிஸந்தி⁴க்க²ணே கடத்தாரூபம்பி ஸங்க³ண்ஹாதீ’’தி. அயஞ்ச அத்த²விஸேஸோ எத்த² ஏகங்ஸேன இச்சி²தப்³போ³தி த³ஸ்ஸெந்தோ ‘‘ந ஹி…பே॰… அத்தீ²’’தி ஆஹ.
அவிஸேஸெத்வாதி ‘‘உதுஸமுட்டா²ன’’ந்திஆதி³னா விஸேஸங் அகத்வா. உபாதா³ரூபந்தி விஸேஸெத்வாவ கஸ்மா பன வுத்தானீதி யோஜனா. ஹேதுபச்சயாதீ³ஸூதி ஆதி³-ஸத்³தே³ன ஸஹஜாதபச்சயாதி³ங் ஸங்க³ண்ஹாதி. ஸஹாதி சித்தஸமுட்டா²னரூபங் கடத்தாரூபந்தி ஏவங் ஏகதோ. விஸுந்தி சித்தஸமுட்டா²னங் ரூபங் கடத்தாரூபதோ விஸேஸெத்வா. தத்த² பா³ஹிரக்³க³ஹணாதீ³ஹி வியாதி யதா² ‘‘பா³ஹிரங் ஏகங் மஹாபூ⁴த’’ந்திஆதீ³ஸு பா³ஹிரஆஹாரஸமுட்டா²னஉதுஸமுட்டா²னக்³க³ஹணேஹி மஹாபூ⁴தானி விஸேஸிதானி, ஏவங் எத்த² ‘‘மஹாபூ⁴தே படிச்சா’’தி ஏதஸ்மிங் நித்³தே³ஸே மஹாபூ⁴தானங் கேனசி விஸேஸனேன அவிஸேஸிதத்தா சித்தஸமுட்டா²னரூபபா⁴வகடத்தாரூபபா⁴வேஹி விஸேஸெத்வாவ வுத்தானீதி யோஜனா.
இதா³னி அஞ்ஞேனபி காரணேன தேஸங் விஸேஸிதப்³ப³தங் த³ஸ்ஸேதுங் ‘‘அபிசா’’திஆதி³ வுத்தங். தத்த² ந கோசி பச்சயோதி இத³ங் பட்டா²னே ஆக³தனியாமேன ரூபங் உபனிஸ்ஸயபச்சயங் ந லப⁴தீதி கத்வா வுத்தங். தேனாஹ ‘‘ஹேதாதீ³ஸூ’’தி. தத³வினாபா⁴வதோ பன தஸ்ஸ சித்தகம்மானங் காரணபா⁴வோ வேதி³தப்³போ³, யதோ இத்³தி⁴சித்தனிப்³ப³த்தானி கம்மபச்சயானி சாதி வுத்தானி. நனு சித்தங் ஆஹாரஉதுஸமுட்டா²னானங் பச்சயோ ஹோதீதி? ஸச்சங் ஹோதி, ஸோ பன உபத்த²ம்ப⁴கத்தேன, ந ஜனகத்தேனாதி த³ஸ்ஸெந்தோ ஆஹ ‘‘ஆஹார…பே॰… ஜனக’’ந்தி ‘‘மஹாபூ⁴தானேவ…பே॰… ஜனகானீ’’தி. சித்தேன கம்முனா ச வினா அபா⁴வே யதா²க்கமங் சித்தகம்மஸமுட்டா²னஉபாதா³ரூபானந்தி அத்தோ². சித்தஸமுட்டா²னரூபகடத்தாரூபபூ⁴தானேவாதி சித்தகம்மஸமுட்டா²னமஹாபூ⁴தனிப்³ப³த்தானேவ மஹாபூ⁴தானங் தேஸங் ஆஸன்னகாரணத்தா. அஞ்ஞானீதி உதுஆஹாரஸமுட்டா²னானி உபாதா³ரூபானி வத³தி. விஸேஸனங் கதங் ‘‘சித்தஸமுட்டா²னங் ரூபங் கடத்தாரூபங் உபாதா³ரூப’’ந்தி. ஸமானஜாதிகேன ரூபேன உதுனா ஆஹாரேன சாதி அத்தோ². பாகடவிஸேஸனானேவாதி இத³ங் யேஹி மஹாபூ⁴தேஹி தானி நிப்³ப³த்தானி, தேஸங் ‘‘ஆஹாரஸமுட்டா²னங் உதுஸமுட்டா²ன’’ந்தி விஸேஸிதத்தா வுத்தங். ந விஸேஸனங் அரஹந்தி ந விஸேஸிதப்³பா³னி காரணவிஸேஸனேனேவ விஸேஸஸ்ஸ ஸித்³த⁴த்தா, ‘‘மஹாபூ⁴தே படிச்ச உபாதா³ரூப’’ந்த்வேவ வத்தப்³ப³ந்தி அத்தோ². ஏதானி பன சித்தஜகம்மஜரூபானி.
ஸவிஸேஸேனாதி யேன விஸேஸேன விஸேஸிதா, தங் த³ஸ்ஸெந்தோ சித்தங் ஸந்தா⁴யாஹ ‘‘ஸஹஜாதாதி³பச்சயபா⁴வதோ’’தி, இதரங் பன ஸந்தா⁴ய ‘‘மூலகாரணபா⁴வதோ’’தி, கம்மூபனிஸ்ஸயபச்சயபா⁴வதோதி அத்தோ². இதரானீதி ஆஹாரஉதுஸமுட்டா²னானிபி உபாதா³ரூபானி. மஹாபூ⁴தவிஸேஸனேனேவ விஸேஸிதானீதி ‘‘ஆஹாரஸமுட்டா²னங் ஏகங் மஹாபூ⁴தங் படிச்ச உதுஸமுட்டா²னங் ஏகங் மஹாபூ⁴தங் படிச்சா’’தி மஹாபூ⁴தவிஸேஸனேனேவ ஜனகபச்சயேன ஆஹாரேன உதுனா ச விஸேஸிதானி. இதா⁴தி ‘‘சித்தஸமுட்டா²னங் ரூபங் கடத்தாரூபங் உபாதா³ரூப’’ந்தி இமஸ்மிங் வசனே. எத்த² ஹி உபாதா³ரூபானங் சித்தகம்மஸமுட்டா²னதாவசனேன தங்னிஸ்ஸயானம்பி தப்³பா⁴வோ பகாஸிதோதி. அஞ்ஞதரவிஸேஸனங் உப⁴யவிஸேஸனங் ஹோதி உப⁴யேஸங் அவினிப்³போ⁴கே³ன பவத்தனதோ.
58. புப்³பே³தி ஹேதுபச்சயாதீ³ஸு. விஸுங் பச்சயபா⁴வேனாதி ‘‘படிஸந்தி⁴க்க²ணே விபாகாப்³யாகதங் ஏகங் க²ந்த⁴ங் படிச்ச தயோ க²ந்தா⁴ கடத்தா ச ரூப’’ந்திஆதி³னா வத்து²ஸ்ஸ விஸுங் பச்சயபா⁴வேன. எத்த² ச விஸுங்யேவ பச்சயபா⁴வேன த³ஸ்ஸிதானீதி ந ஸக்கா வத்துங், ‘‘க²ந்தே⁴ படிச்ச வத்து², வத்து²ங் படிச்ச க²ந்தா⁴’’தி பச்சயுப்பன்னபா⁴வோ விய க²ந்தா⁴னங் ஏகதோபி பச்சயபா⁴வோ த³ஸ்ஸிதோ. தேனேவ ஹி தஸ்மிங் அத்தே² அத்தனோ அருசிங் விபா⁴வெந்தோ ஆஹ ‘‘இமினா அதி⁴ப்பாயேனாஹா’’தி. யோ பனத்தோ² அத்தனோ ‘‘க²ந்தே⁴ படிச்ச வத்தூ²தி இத³ங் பனா’’திஆதி³ வுத்தங். க²ந்தா⁴னங் பச்சயபூ⁴தானங் படிச்சட்ட²ப²ரணதாத³ஸ்ஸனங் வத்து²ஸ்ஸ பச்சயபூ⁴தஸ்ஸ படிச்சட்ட²ப²ரணதாத³ஸ்ஸனங், ந க²ந்தா⁴னந்தி ஸம்ப³ந்தோ⁴. இதே⁴வாதி இமஸ்மிங் அஞ்ஞமஞ்ஞபச்சயே ஏவ. ஹேதுபச்சயாதீ³ஸுபி அயமேவ நயோ, தத்த² ஹி படிச்சட்ட²ப²ரணஸ்ஸ ஸமானதா. த³ஸ்ஸிதாய படிச்சட்ட²த்³வயப²ரணதாய. க²ந்த⁴வத்தூ²னஞ்ச த³ஸ்ஸிதாயேவாதி க²ந்த⁴வத்தூ²னஞ்ச ஏகதோ படிச்சட்ட²ப²ரணதா த³ஸ்ஸிதாயேவ.
ஏவமாதீ³தி ஆதி³-ஸத்³தே³ன ‘‘அகுஸலங் த⁴ம்மங் படிச்சா’’தி ஏவமாதி³ ஸங்க³ய்ஹதி. நனு ப⁴விதப்³ப³ந்தி யோஜனா. ஹேதுபச்சயாதீ³ஹி வியாதி ஸதி³ஸூதா³ஹரணந்தி தங் த³ஸ்ஸெந்தோ ‘‘ந ஹீ’’திஆதி³மாஹ. யங் ‘‘ஏகங், தயோ, த்³வே ச க²ந்தே⁴ படிச்சா’’தி வுத்தங் பச்சயஜாதந்தி அத்தோ². பச்சயட்டோ² ஹி படிச்சட்டோ². தேனாஹ ‘‘தே ஹேதுபச்சயபூ⁴தா ஏவ ந ஹொந்தீ’’தி. ஏதேன ந படிச்சட்ட²ப²ரணகஸ்ஸ ஏகந்திகோ ஹேதுஆதி³பச்சயபா⁴வோதி த³ஸ்ஸேதி. தேனாஹ ‘‘ஏஸ நயோ ஆரம்மணபச்சயாதீ³ஸூ’’தி. ந ஹி ஆரம்மணபச்சயபூ⁴தோ த⁴ம்மோ படிச்சட்ட²ங் ப²ரதி. வுத்தஞ்ச ‘‘குஸலங் த⁴ம்மங் படிச்ச குஸலோ த⁴ம்மோ உப்பஜ்ஜதி ஆரம்மணபச்சயா’’தி.
பச்சயந்தரேனபி உபகாரகதாமத்தம்பி க³ஹெத்வா படிச்சவாரே வாரந்தரே ச ஹேதுஆதி³பச்சயா த³ஸ்ஸிதாதி உபசயேன யதா²வுத்தங் விபா⁴வெந்தோ ‘‘பச்சயவாரே சா’’திஆதி³மாஹ. தங்பச்சயாதி வத்து²பச்சயா, யதா²ரஹங் பச்சயபூ⁴தங் வத்து²ங் லபி⁴த்வாதி அத்தோ². தேதி குஸலே க²ந்தே⁴ படிச்ச. தேஸந்தி மஹாபூ⁴தானங் க²ந்தா⁴னங். பச்சயபா⁴வாபா⁴வதோதி இத³ங் க²ந்தா⁴னங் ஹேதுஸஹஜாதாதி³பச்சயபா⁴வஸ்ஸ மஹாபூ⁴தேஸு தி³ட்ட²த்தா வுத்தங். யதி³ ஏவங் அஞ்ஞமஞ்ஞபச்சயாபி தே தேஸங் ப⁴வெய்யுந்தி பரஸ்ஸ ஆஸங்கனிராஸங்கங் கரொந்தோ ‘‘அஞ்ஞமஞ்ஞஸத்³தோ³ ஹீ’’திஆதி³மாஹ. நிரபெக்கோ²தி அஞ்ஞனிரபெக்கோ². ந ஹி ஹேதுத⁴ம்மோ த⁴ம்மந்தராபெக்கோ² ஹுத்வா ஹேதுபச்சயோ ஹோதி, ஸத்³த³ஸீஸேனெத்த² அத்தோ² வுத்தோ. அஞ்ஞதராபெக்கோ²தி அத்தனா ஸஹகாரிகாரணபூ⁴தங், இதரங் வா யங் கிஞ்சி அஞ்ஞதரங் அபெக்க²தீதி அஞ்ஞதராபெக்கோ². யதா²வுத்தேதரேதராபெக்கோ²தி அரூபக்க²ந்தா⁴தி³பே⁴த³ங் பாளியங் வுத்தப்பகாரங் இதரேதரங் மிது² பச்சயபூ⁴தங் அபெக்க²தீதி இதரேதராபெக்கோ². பச்சயபச்சயுப்பன்னா ச க²ந்தா⁴ மஹாபூ⁴தா இத⁴ யதா²வுத்தா ப⁴வெய்யுந்தி கஸ்மா வுத்தங். ந ஹி க²ந்தா⁴ மஹாபூ⁴தா அஞ்ஞமஞ்ஞங் அஞ்ஞமஞ்ஞபச்சயபா⁴வேன வுத்தா, அத² க²ந்தா⁴ ச மஹாபூ⁴தா சாதி விஸுங் விஸுங் க³ய்ஹெய்யுங், ஏவங் ஸதி ‘‘மஹாபூ⁴தா க²ந்தா⁴னங் ந கோசி பச்சயோ’’தி ந வத்தப்³ப³ங்.
யஸ்ஸ ஸயங் பச்சயோ, ததோ தேன தன்னிஸ்ஸிதேன வாதி யஸ்ஸ த⁴ம்மஸ்ஸ ஸயங் அத்தனா பச்சயோ ஹோதி, ததோ த⁴ம்மதோ ஸயங் உப்பஜ்ஜமானங் கத²ங் தேன த⁴ம்மேன தன்னிஸ்ஸிதேன வா அஞ்ஞமஞ்ஞபச்சயேன ஏவங்பூ⁴தங் தங் த⁴ம்மஜாதங் அஞ்ஞமஞ்ஞபச்சயா உப்பஜ்ஜதீதி வத்தப்³ப³தங் அரஹதீதி வுத்தமேவத்த²ங் உதா³ஹரணேன விபா⁴வேதி ‘‘யதா²’’திஆதி³னா. தத்த² ‘‘க²ந்தே⁴ படிச்ச க²ந்தா⁴’’தி இத³ங் ‘‘தேன அஞ்ஞமஞ்ஞபச்சயேன உப்பஜ்ஜமான’’ந்தி இமஸ்ஸ உதா³ஹரணங், ‘‘வத்து²ங் பச்சயா க²ந்தா⁴’’தி இத³ங் பன ‘‘தன்னிஸ்ஸிதேன அஞ்ஞமஞ்ஞபச்சயேன உப்பஜ்ஜமான’’ந்தி ஏதஸ்ஸ. தஸ்மாதி வுத்தமேவ அத்த²ங் காரணபா⁴வேன பச்சாமஸதி. அத்தனோ பச்சயஸ்ஸ பச்சயத்தாபா⁴வதோதி அத்தனோ பச்சயபூ⁴தஸ்ஸ அரூபக்க²ந்த⁴ஸ்ஸ பச்சயபா⁴வாபா⁴வதோ. ந ஹி மஹாபூ⁴தா யதோ க²ந்த⁴தோ உப்பன்னா, தேஸங் பச்சயா ஹொந்தி. தத³பெக்க²த்தாதி இதரேதரபச்சயபா⁴வாபெக்க²த்தா. க²ந்தே⁴ படிச்ச பச்சயா சாதி படிச்சவாரே வுத்தனியாமேனேவ க²ந்தே⁴ படிச்ச, பச்சயவாரே வுத்தனியாமேன க²ந்தே⁴ பச்சயா ச. நஅஞ்ஞமஞ்ஞபச்சயா ச வுத்தாதி அஞ்ஞமஞ்ஞபச்சயதோ அஞ்ஞஸ்மா நிஸ்ஸயபச்சயாதி³தோ மஹாபூ⁴தானங் உப்பத்தி வுத்தா சாதி அத்தோ². வத்து²ங் பச்சயா உப்பஜ்ஜமானாதி வத்து²ங் புரேஜாதபச்சயங் கத்வா உப்பஜ்ஜமானா. தன்னிஸ்ஸிதேன ச அஞ்ஞமஞ்ஞபச்சயேனாதி தங் வத்து²ங் நிஸ்ஸிதேன க²ந்தே⁴ன அஞ்ஞமஞ்ஞபச்சயபூ⁴தேன உப்பஜ்ஜந்தி, தஸ்மா யதா²வுத்தேன காரணேன வத்து²ங் பச்சயா…பே॰… வுத்தா, இமினா பரியாயேன பன உஜுகங் பவத்தியங் வத்து²ஸ்ஸ அஞ்ஞமஞ்ஞபச்சயபா⁴வோதி அத்தோ².
59. ஸா ந க³ஹிதாதி யா ‘‘சக்கா²யதனங் நிஸ்ஸாயா’’திஆதி³னா சக்கா²யதனாதீ³னங் நிஸ்ஸயபச்சயதா வுத்தா, ஸா இத⁴ படிச்சவாரே ந வுத்தாதி அத்தோ² ஸஹஜாதத்தோ² படிச்சத்தோ²தி கத்வா. தேனாஹ ‘‘சக்கா²யதனாதீ³னி…பே॰… அதி⁴ப்பாயோ’’தி. யேஸங் பன அரூபக்க²ந்த⁴மஹாபூ⁴தனாமரூபசித்தசேதஸிகமஹாபூ⁴தரூபித⁴ம்மானங் வஸேன ச²தா⁴ நிஸ்ஸயபச்சயோ இச்சி²தோ, தேஸங் வஸேன இத⁴ விப⁴த்தோ ஏவ. கத²ங் ரூபிவஸேன விப⁴த்தோதி சே? ‘‘வத்து²ங் படிச்ச க²ந்தா⁴’’தி ஹத³யவத்து²வஸேன ஸரூபதோ த³ஸ்ஸிதோ ஏவ. இதரேஸம்பி வஸேன ‘‘அப்³யாகதங் த⁴ம்மங் படிச்ச அப்³யாகதோ த⁴ம்மோ உப்பஜ்ஜதி நிஸ்ஸயபச்சயா’’தி எத்த² த³ஸ்ஸிதோ. யதா² ஹி ‘‘குஸலங் த⁴ம்மங் படிச்ச குஸலோ த⁴ம்மோ உப்பஜ்ஜதி ஆரம்மணபச்சயா’’திஆதீ³ஸு ரூபாயதனாதீ³னங் அஸதிபி படிச்சட்ட²ப²ரணே ஆரம்மணபச்சயபா⁴வோ த³ஸ்ஸிதோ ஹோதி, ஏவமிதா⁴பி சக்கா²யதனாதீ³னங் நிஸ்ஸயபச்சயபா⁴வோ த³ஸ்ஸிதோ ஹோதி. தேன வுத்தங் ‘‘நிஸ்ஸய…பே॰… ந க³ஹிதானீ’’தி.
60. த்³வீஸு உபனிஸ்ஸயேஸூதி அனந்தரபகதூபனிஸ்ஸயேஸு. குஸலாபி பன மஹக்³க³தாதி பி-ஸத்³தே³ன கதா³சி ந லப⁴ந்தி, யதா³ க³ருங் கத்வா ந பவத்தந்தீதி அத்தோ².
61. அஞ்ஞத்த² ஹேதுபச்சயாதீ³ஸு. பச்சயங் அனித்³தி³ஸித்வாதி பச்சயங் த⁴ம்மங் ஸரூபதோ அனித்³தி³ஸித்வா. ந ஹி ஹேதுபச்சயனித்³தே³ஸாதீ³ஸு அலோபா⁴தி³குஸலாதி³ஸரூபவிஸேஸதோ ஹேதுஆதி³த⁴ம்மா த³ஸ்ஸிதா. குஸலாதீ³ஸூதி இத³ங் அலோபா⁴தி³விஸேஸனங். தேன யதா² அலோபா⁴தீ³ஸு அயமேவ பச்சயோதி நியமோ நத்தி², ஏவங் தப்³பி³ஸேஸேஸு குஸலாதீ³ஸூதி த³ஸ்ஸேதி. இத⁴ பன புரேஜாதபச்சயே. வத்து²னவத்து²த⁴ம்மேஸூதி நித்³தா⁴ரணே பு⁴ம்மங். புரேஜாதபச்சயா உப்பஜ்ஜமானானந்தி இமினா படிஸந்தி⁴க்க²ணே, ஆருப்பே உப்பஜ்ஜமானே ச க²ந்தே⁴ நிவத்தேதி. கஸ்மா பனெத்த² வத்து²புரேஜாதமேவ க³ஹிதங், ந ஆரம்மணபுரேஜாதந்தி சோத³னங் மனஸி கத்வா ஆஹ ‘‘ஆரம்மணபுரேஜாதம்பி ஹி வத்து²புரேஜாதே அவிஜ்ஜமானே ந லப்³ப⁴தீ’’தி. தஸ்ஸாதி படிஸந்தி⁴விபாகஸ்ஸ. ந உத்³த⁴டோதி வுத்தமேவத்த²ங் பாகடங் காதுங் ‘‘நேவவிபாக…பே॰… தீணீதி வுத்த’’ந்தி வுத்தங். அலாப⁴தோதி யதி³ லப்³பெ⁴ய்ய, ‘‘சத்தாரீ’’தி வத்தப்³ப³ங் ஸியாதி த³ஸ்ஸேதி. தத்தா²தி விபாகத்திகே. தீணீதி ‘‘விபாகங் த⁴ம்மங் படிச்ச விபாகோ த⁴ம்மோ உப்பஜ்ஜதி புரேஜாதபச்சயா, விபாகத⁴ம்மத⁴ம்மங், நேவவிபாகனவிபாகத⁴ம்மத⁴ம்மங் படிச்சா’’தி இமானி தீணி.
63. தது³பாதா³ரூபானந்தி தே மஹாபூ⁴தே நிஸ்ஸாய பவத்தஉபாதா³ரூபானங். வத³தீதி ஏகக்க²ணிகனானாக்க²ணிககம்மபச்சயங் வத³தி அவினிப்³போ⁴க³வஸேன பவத்தமானானங் தேஸங் பச்சயேன விஸேஸாபா⁴வதோ. பவத்தியங் கடத்தாரூபானந்தி விஸேஸனங் படிஸந்தி⁴க்க²ணே கடத்தாரூபானங் ஏகக்க²ணிகஸ்ஸபி கம்மபச்சயஸ்ஸ இச்சி²தத்தா. தேனேவ ஹி அட்ட²கதா²யங் ‘‘ததா² படிஸந்தி⁴க்க²ணே மஹாபூ⁴தான’’ந்தி து³விதோ⁴பி கம்மபச்சயோ வுத்தோ.
64. யங் யங் படிஸந்தி⁴யங் லப்³ப⁴தீதி சக்கு²ந்த்³ரியாதீ³ஸு யங் யங் இந்த்³ரியரூபங் படிஸந்தி⁴யங் லப்³ப⁴தி, தஸ்ஸ தஸ்ஸ வஸேன இந்த்³ரியரூபஞ்ச வத்து²ரூபஞ்ச ‘‘கடத்தாரூப’’ந்தி வுத்தங்.
69. கேஸஞ்சீதி பஞ்சவோகாரே படிஸந்தி⁴க்க²ந்தா⁴தீ³னங். தேஸஞ்ஹி வத்து² நியமதோ விப்பயுத்தபச்சயோ ஹோதி. ஸமானவிப்பயுத்தபச்சயாதி ஸதி³ஸவிப்பயுத்தபச்சயா. குஸலாகுஸலா ஹி க²ந்தா⁴ ஏகச்சே ச அப்³யாகதா யஸ்ஸ ‘‘கேஸஞ்சி க²ந்தா⁴…பே॰… நானாவிப்பயுத்தபச்சயாபீ’’தி. பச்சயங் பச்சயங் கரோதீதி பச்சயத⁴ம்மங் வத்து²ங் க²ந்தே⁴ ச அத்தனோ பச்சயபூ⁴தங் கரோதி, யதா²வுத்தங் பச்சயத⁴ம்மங் பச்சயங் கத்வா பவத்ததீதி அத்தோ². தங்கிரியாகரணதோதி விப்பயுத்தபச்சயகிச்சகரணதோ. படிச்ச உப்பத்தி நத்தீ²தி படிச்சட்ட²ப²ரணங் நத்தி² ஸஹஜாதட்டோ² படிச்சட்டோ²தி கத்வா. ‘‘படிச்ச உப்பஜ்ஜந்தீ’’தி எத்தகமேவாஹ, கிங் படிச்ச? க²ந்தே⁴தி பாகடோயமத்தோ²தி. தேனாஹ ‘‘கிங் பன படிச்சா’’திஆதி³. பச்சாஸத்திஞாயேன அனந்தரஸ்ஸ விதி⁴ படிஸேதோ⁴ வா ஹோதீதி க³ண்ஹெய்யாதி தங் நிவாரேதுங் வுத்தந்தி த³ஸ்ஸெந்தோ ‘‘அனந்தரத்தா…பே॰… வுத்தங் ஹோதீ’’தி ஆஹ.
71-72. ஸங்கி²பித்வா த³ஸ்ஸிதானங் வஸேனேதங் வுத்தந்தி ஸங்கி²பித்வா த³ஸ்ஸிதானங் பச்சயானங் வஸேன ஏதங் ‘‘இமே தேவீஸதி பச்சயா’’திஆதி³வசனங் வாசனாமக்³க³ங் த³ஸ்ஸெந்தேஹிபி பாளியங் வுத்தந்தி அட்ட²கதா²யங் வுத்தங். ஏகேனபீதி குஸலாதீ³ஸு ச பதே³ஸு ஏகேனபி பதே³ன, தஸ்மிங் தஸ்மிங் வா பச்சயனித்³தே³ஸே வாக்யஸங்கா²தேன ஏகேனபி பதே³ன. தயோ பச்சயாதி ஹேதுஆரம்மணாதி⁴பதிபச்சயா. தே சத்தாரோ பச்சா²ஜாதஞ்ச வஜ்ஜெத்வாதி எத்த² யதா²வுத்தே சத்தாரோ பச்சயே வித்தா²ரிதத்தா ‘‘வஜ்ஜெத்வா’’தி வுத்தங், பச்சா²ஜாதங் பன ஸப்³பே³ன ஸப்³ப³ங் அக்³க³ஹிதத்தா. எத்தகா ஹி ஏகூனவீஸதி பச்சயா யதா²வுத்தே பச்சயே வஜ்ஜெத்வா அவஸிட்டா². யே பனாதி பத³காரகே வத³தி. ஸங்கி²பித்வாதி பத³ஸ்ஸ ‘‘பாளியங் வித்தா²ரிதங் அவித்தா²ரிதஞ்ச ஸப்³ப³ங் ஸங்க³ஹெத்வா வுத்த’’ந்தி அத்த²ங் வத³ந்தி. ‘‘தேவீஸதி பச்சயா’’தி பாடே²ன ப⁴விதப்³ப³ங் ‘‘ஸப்³ப³ங் ஸங்க³ஹெத்வா’’தி வுத்தத்தா. பச்சா²ஜாதபச்சயோயேவ ஹி வஜ்ஜேதப்³போ³தி. ஏவங் வாத³ந்தரே வத்தப்³ப³ங் வத்வா இதா³னி பாளியா அவிபரீதங் அத்த²ங் த³ஸ்ஸேதுங் ‘‘ஆதி³ம்ஹி பனா’’திஆதி³ வுத்தங்.
விப⁴ங்க³வாரவண்ணனா நிட்டி²தா.
(2) ஸங்க்²யாவாரவண்ணனா
73. யதா² அஞ்ஞமஞ்ஞபச்சயே விஸேஸோ விப⁴ங்கே³ அத்தீ²தி இத³ங் ஹேதுபச்சயாதி³விப⁴ங்க³தோ விஸேஸபா⁴வஸாமஞ்ஞேன வுத்தங். ந ஹி யாதி³ஸோ அஞ்ஞமஞ்ஞபச்சயவிப⁴ங்கே³ விஸேஸோ, தாதி³ஸோ புரேஜாதபச்சயவிப⁴ங்கே³. ததா² ஹி அஞ்ஞமஞ்ஞபச்சயே படிஸந்தி⁴ லப்³ப⁴தி, ந புரேஜாதபச்சயே. ‘‘விபாகாப்³யாகதங் ஏகங் க²ந்த⁴ங் படிச்சா’’திஆதி³கே விப⁴ங்கே³தி இமினா யஸ்மிங் பச்சயே விபாகாப்³யாகதங் உத்³த⁴டங், தங் நித³ஸ்ஸனவஸேன த³ஸ்ஸேதி. இத³ங் வுத்தங் ஹோதி – யதா² ஹேதுபச்சயாதீ³ஸு ‘‘விபாகாப்³யாகதங் ஏகங் க²ந்த⁴ங் படிச்சா’’திஆதி³னா விப⁴ங்கே³ விபாகாப்³யாகதங் உத்³த⁴டங் அத்தி², ஏவங் விபாகாப்³யாகதாபா⁴வங் ஆஸேவனபச்சயே விஸேஸங் த³ஸ்ஸேதீதி.
74. ஏதஸ்மிங் அனுலோமேதி இமஸ்மிங் படிச்சவாரே பச்சயானுலோமே. ஸுத்³தி⁴கனயேதி பட²மே நயே. த³ஸ்ஸிதக³ணனதோதி ‘‘நவ, தீணி, ஏக’’ந்தி ஏவங் ஸங்கே²பதோ த³ஸ்ஸிதக³ணனதோ. ததோ பரேஸு நயேஸூதி ததோ பட²மனயதோ பரேஸு து³தியாதி³னயேஸு. அஞ்ஞிஸ்ஸாதி நவாதி³பே⁴த³தோ அஞ்ஞிஸ்ஸா க³ணனாய. அப³ஹுக³ணனேன யுத்தஸ்ஸ ப³ஹுக³ணனஸ்ஸ பச்சயஸ்ஸ, தேன அப³ஹுக³ணனேன. ஸமானக³ணனதா சாதி ச-ஸத்³தோ³ ப்³யதிரேகோ. தேன பச்சனீயதோ அனுலோமே யோ விஸேஸோ வுச்சதி, தங் ஜோதேதி. தேனாஹ ‘‘அனுலோமேயேவ த³ட்ட²ப்³பா³’’தி. அனுலோமேயேவாதி அவதா⁴ரணேன நிவத்திதங் த³ஸ்ஸேதுங் ‘‘பச்சனீயே…பே॰… வக்க²தீ’’தி வுத்தங்.
76-79. தே பன தேரஸமூலகாதி³கே நயே ஸாஸேவனஸவிபாகேஸு த்³வீஸு த்³வாவீஸதிமூலகேஸு ஸாஸேவனமேவ க³ஹெத்வா இதரங் பஜஹந்தோ ஆஹ ‘‘பச்சா²ஜாதவிபாகானங் பரிஹீனத்தா’’தி. விரோதா⁴பா⁴வே ஸதீதி இத³ங் ‘‘ஸியா குஸலங் த⁴ம்மங் படிச்ச அகுஸலோ த⁴ம்மோ உப்பஜ்ஜெய்யா’’திஆதீ³ஸு விய பரிகப்பவசனங் ஸந்தா⁴ய வுத்தங். தேனாஹ ‘‘புச்சா²ய த³ஸ்ஸிதனயேனா’’தி. தஸ்ஸ ச தேவீஸதிமூலகஸ்ஸ. நாமந்தி தேவீஸதிமூலகந்தி நாமங். த்³வாவீஸதி…பே॰… வுத்தந்தி ஏதேன த்³வாவீஸதிமூலகோவ பரமத்த²தோ லப்³ப⁴தி, ந தேவீஸதிமூலகோதி த³ஸ்ஸேதி.
அஞ்ஞபதா³னீதி ஸுத்³தி⁴கனயோதி பட²மனயோ, யங் அட்ட²கதா²யங் ‘‘ஏகமூல’’ந்தி வுத்தங். ஆரம்மணமூலகாதீ³ஸு ந லப்³ப⁴தீதி து³மூலகாதீ³ஸு தங் ந யோஜீயதி. ஹெட்டி²மங் ஹெட்டி²மங் ஸோதெ⁴த்வா ஏவ ஹி அபி⁴த⁴ம்மபாளி பவத்தா, தஸ்மா ‘‘ஆரம்மணே…பே॰… பஞ்ஹா’’தி வுத்தந்தி தத்தா²தி ‘‘தீணியேவ பஞ்ஹா’’தி பாடே². ‘‘வத்து அதி⁴ப்பாயானுவிதா⁴யீ ஸத்³த³ப்பயோகோ³’’தி கத்வா அதி⁴ப்பாயங் விபா⁴வெந்தோ ஆஹ ‘‘ததோ உத்³த⁴ங் க³ணனங் நிவாரேதி, ந அதோ⁴ படிக்கி²பதீ’’தி. க³ணனாய உபனிக்கி²த்தபஞ்ஞத்திபா⁴வதோ ஹெட்டா²க³ணனங் அமுஞ்சித்வாவ உபரிக³ணனா ஸம்ப⁴வதீதி ஆஹ ‘‘தீஸு ஏகஸ்ஸ அந்தோக³த⁴தாய ச ‘தீணியேவா’தி வுத்த’’ந்தி. அத்தனோ வசனந்தி ‘‘தத்ரித³ங் லக்க²ண’’ந்திஆதி³னா வுத்தங் அத்தனோ வசனங்.
80-85. அவிக³தா…பே॰… வுத்தேபி விபல்லாஸயோஜனங் அகத்வாதி அதி⁴ப்பாயோ. ஸா த³ஸ்ஸிதா ஹோதீதி ஸா விபல்லாஸயோஜனங் அகத்வா த³ஸ்ஸியமானா யதி³பி த³ஸ்ஸிதா ஹோதி, ந ஏவங் ஆவிகரணவஸேன த³ஸ்ஸிதா ஹோதி தாதி³ஸஸ்ஸ லிங்க³னஸ்ஸ அபா⁴வதோ யதா² விபல்லாஸயோஜனாயந்தி அதி⁴ப்பாயோ. தேனாஹ ‘‘விபல்லாஸ…பே॰… ஹோதீ’’தி. ஏவமேவ அதி⁴ப்பாயோ யோஜேதப்³போ³தி ‘‘யே…பே॰… தங் த³ஸ்ஸேது’’ந்தி எத்த² ‘‘யதி³பி அவிக³தானந்தர’’ந்திஆதி³னா யதா² அதி⁴ப்பாயோ யோஜிதோ, ஏவமேவ ‘‘தேனேதங் ஆவிகரோதீ’’தி எத்தா²பி அதி⁴ப்பாயோ யோஜேதப்³போ³. கிங் வுத்தங் ஹோதி? யதா² தத்த² ‘‘ஊனதரக³ணனேஹி ஸமானக³ணனேஹி ச ஸத்³தி⁴ங் ஸங்ஸந்த³னே ஊனதரா ஸமானா ச க³ணனா ஹோதீ’’தி அயமத்தோ² ஞாபனவஸேன த³ஸ்ஸிதோ, ஏவமிதா⁴பீதி. தேன வுத்தங் அட்ட²கதா²யங் ‘‘ஆரம்மணபச்சயோ யேன யேன ப³ஹுதரக³ணனேன வா ஸமானக³ணனேன வா பச்சயேன ஸத்³தி⁴ங் திகது³காதி³பே⁴த³ங் க³ச்ச²தி, ஸப்³ப³த்த² தீணேவ பஞ்ஹவிஸ்ஸஜ்ஜனானி வேதி³தப்³பா³னீ’’தி. ந கேவலமத்த²விஸேஸாவிகரணத்த²மேவெத்த² ததா² யோஜனா கதா, அத² கோ² தே³ஸனாக்கமோயேவ ஸோதி த³ஸ்ஸேதுங் ‘‘பச்சனீயாதீ³ஸுபி பனா’’திஆதி³மாஹ. தத்த² மூலபத³ந்தி ஆரம்மணபச்சயாதி³கங் தஸ்மிங் தஸ்மிங் நயே மூலபூ⁴தங் பத³ங். தத்தா²தி பச்சனீயாதீ³ஸு. ஏதங் லக்க²ணந்தி ‘‘தத்ரித³ங் லக்க²ண’’ந்திஆதி³னா வுத்தலக்க²ணங். தஸ்மாதி யஸ்மா புப்³பே³னாபரங் பாளி ஏவமேவ பவத்தா, தஸ்மா ஏவ. தேன மூலபத³ங் ஆதி³ம்ஹியேவ ட²பெத்வா தே³ஸனா ஞாயாக³தாதி த³ஸ்ஸேதி. யதி³ ஏவங் லிங்க³னேன அத்த²விஸேஸாவிகரணங் கத²ந்தி ‘‘ந ச விஞ்ஞாதே அத்தே² வசனேன லிங்கே³ன ச பயோஜனங் அத்தீ²’’தி.
பச்சயானுலோமவண்ணனா நிட்டி²தா.
படிச்சவாரோ
பச்சயபச்சனீயவண்ணனா
86-87. ரூபஸமுட்டா²பகவஸேனேவ வேதி³தப்³ப³ந்தி இத³ங் அட்ட²கதா²வசனங் அனந்தரங் ‘‘சித்தஸமுட்டா²னஞ்ச ரூப’’ந்தி பாளியங் ஆக³தத்தா வுத்தங், பஞ்சவிஞ்ஞாணானங் பன அஹேதுகபடிஸந்தி⁴சித்தானஞ்ச வஸேன யோஜனா ஸம்ப⁴வதீதி கத்வா வுத்தங் ‘‘ஸப்³ப³ஸங்கா³ஹிகவஸேன பனேதங் ந ந ஸக்கா யோஜேது’’ந்தி.
93. ஸஹஜாதபுரேஜாதபச்சயாதி இத³ங் பச்சயேன பச்சயத⁴ம்மோபலக்க²ணந்தி த³ஸ்ஸேதுங் ‘‘ஸஹஜாதா ச ஹேதுஆத³யோ…பே॰… அத்தோ² த³ட்ட²ப்³போ³’’தி வத்வா ‘‘ந ஹீ’’திஆதி³னா தமேவத்த²ங் ஸமத்தே²தி.
94-97. ஸோ பச்சயோதி ஸோ படிச்சட்ட²ப²ரணகோ பச்சயோ.
99-102. சித்தஸமுட்டா²னாத³யோதி ஆதி³-ஸத்³தே³ன பா³ஹிரரூபஆஹாரஸமுட்டா²னாத³யோ ரூபகொட்டா²ஸா ஸங்க³ய்ஹந்தி. தஸ்ஸாதி மக்³க³பச்சயங் லப⁴ந்தஸ்ஸ ரூபஸ்ஸ. ஏவமேவ பனாதி இமினா யதா² நமக்³க³பச்சயே வுத்தங், ஏவமேவ நஹேதுபச்சயாதீ³ஸு யங் ஹேதுபச்சயங் லப⁴தி, தஸ்ஸ பரிஹீனத்தாதி இமமத்த²ங் உபஸங்ஹரதி. தேனாஹ ‘‘ஏகச்சரூபஸ்ஸ பச்சயுப்பன்னதா த³ட்ட²ப்³பா³’’தி.
107-130. ஸப்³ப³த்தா²தி பன்னரஸமூலகாதீ³ஸு ஸப்³பே³ஸு நயேஸு. காமங் ஸுத்³தி⁴கனயாதீ³ஸு விஸதி³ஸவிஸ்ஸஜ்ஜனா, இதா⁴தி⁴ப்பேதத்த²ங் பன த³ஸ்ஸேதுங் ‘‘ஏகேஸூ’’திஆதி³ வுத்தங். இதா⁴தி ஏதேஸு நாஹாரமூலகாதி³னயேஸு. க³ணனாயேவ ந ஸரூபத³ஸ்ஸனந்தி ஸுத்³தி⁴கனயே விய க³ணனாய ஏவ ந ஸரூபத³ஸ்ஸனங் அதி⁴ப்பேதந்தி அத்தோ².
பச்சயபச்சனீயவண்ணனா நிட்டி²தா.
பச்சயானுலோமபச்சனீயவண்ணனா
131-189. திண்ணந்தி ஸாதா⁴ரணானந்தி யே தேஸங் திண்ணங் ஸாதா⁴ரணா பச்சயா பச்சனீகதோ ந லப்³ப⁴ந்தி, யஸ்மா தேஸங் ஸங்க³ண்ஹனவஸேன வுத்தங், தஸ்மா. மக்³க³பச்சயேதி மக்³க³பச்சயே அனுலோமதோ டி²தே. இதரேஹீதி ஹேதுஅதி⁴பதிபச்சயேஹி. ஸாதா⁴ரணா ஸத்தேவாதி மக்³க³பச்சயவஜ்ஜே ஸத்தேவ. ஹேதுபச்சயோபி பச்சனீயதோ ந லப்³ப⁴தீதி ஹேதுரஹிதேஸு அதி⁴பதினோ அபா⁴வா. ஸோ பனாதி ஹேதுபச்சயோ அஸாதா⁴ரணோதி கத்வா ந வுத்தோ ஸாதா⁴ரணானங் அலப்³ப⁴மானானங் வுச்சமானத்தா. ந ஹி ஹேதுபச்சயோ மக்³க³பச்சயஸ்ஸ ஸாதா⁴ரணோ. யேஹீதி யேஹி பச்சயேஹி. தேதி அனந்தரபச்சயாத³யோ. ஏகந்திகத்தாதி அவினாபா⁴வதோ. அரூபட்டா²னிகாதி அரூபபச்சயா அரூபத⁴ம்மானங்யேவ பச்சயபூ⁴தா அனந்தரபச்சயாத³யோ. தேனாதி ‘‘ஏகந்திகானங் அரூபட்டா²னிகா’’தி இதா⁴தி⁴ப்பேதத்தா. தேஹீதி புரேஜாதாஸேவனபச்சயேஹி. தேஸங் வஸேனாதி தேஸங் ஊனதரக³ணனானங் ஏககாதீ³னங் வஸேன. தஸ்ஸ தஸ்ஸாதி பச்சனீயதோ யோஜிதஸ்ஸ தஸ்ஸ தஸ்ஸ து³காதி³கஸ்ஸ ப³ஹுக³ணனஸ்ஸ. க³ணனாதி ஊனதரக³ணனா. அனுலோமதோ டி²தஸ்ஸபீதி பி-ஸத்³தே³ன அனுலோமதோ டி²தோ வா ஹோது பச்சனீயதோ யோஜிதோ வா, ஊனதரக³ணனாய ஸமானந்தி த³ஸ்ஸேதி. நயித³ங் லக்க²ணங் ஏகந்திகந்தி இமினா யதா²வுத்தலக்க²ணங் யேபு⁴ய்யவஸேன வுத்தந்தி த³ஸ்ஸேதி.
பச்சயானுலோமபச்சனீயவண்ணனா நிட்டி²தா.
பச்சயபச்சனீயானுலோமவண்ணனா
190. ஸப்³பே³ஸுபீதி பச்சா²ஜாதங் ட²பெத்வா ஸப்³பே³ஸுபி பச்சயேஸு. ஸோ ஹி அனுலோமதோ அலப்³ப⁴மானபா⁴வேன க³ஹிதோ ‘‘ஸப்³பே³ஸூ’’தி எத்த² ஸங்க³ஹங் ந லப⁴தி. அரூபாவசரவிபாகஸ்ஸ ஆருப்பே உப்பன்னலோகுத்தரவிபாகஸ்ஸ ச புரேஜாதாஸேவனானங் அலப்³ப⁴னதோதி ‘‘கிஞ்சி நித³ஸ்ஸனவஸேன த³ஸ்ஸெந்தோ’’தி ஆஹ.
அவஸேஸானங் லாப⁴மத்தந்தி அவஸேஸானங் ஏகச்சானங் லாப⁴ங். தேனாஹ ‘‘ந ஸப்³பே³ஸங் அவஸேஸானங் லாப⁴’’ந்தி பச்சா²ஜாதே பஸங்கோ³ நத்தீ²தி பச்சா²ஜாதோ புரேஜா…பே॰… லப்³ப⁴தீதி இமினா விப்பயுத்தே பச்சனீயதோ டி²தே புரேஜாதோ லப்³ப⁴தீதி அயம்பி அத்த²தோ ஆபன்னோ ஹோதீதி தங் நித்³தா⁴ரெத்வா தத்த² யங் வத்தப்³ப³ங், தங் த³ஸ்ஸேதுங் ‘‘புரேஜாதோ பன விப்பயுத்தே பச்சனீயதோ டி²தே அனுலோமதோ லப்³ப⁴தீதி இத³ம்பீ’’திஆதி³ வுத்தங். தத்த² ‘‘அவஸேஸா ஸப்³பே³பீதி அத்தே² க³ய்ஹமானே ஆபஜ்ஜெய்யா’’தி இத³ங் தஸ்ஸா அத்தா²பத்தியா ஸப்³பா⁴வத³ஸ்ஸனமத்தங் த³ட்ட²ப்³ப³ங், அத்தோ² பன தாதி³ஸோ ந உபலப்³ப⁴தீதி அயமெத்த² அதி⁴ப்பாயோ. தேனாஹ ‘‘யம்பி கேசீ’’திஆதி³.
தத்த² கேசீதி பத³காரே ஸந்தா⁴யாஹ. தே ஹி ‘‘அரூபதா⁴துயா சவித்வா காமதா⁴துங் உபபஜ்ஜந்தஸ்ஸ க³தினிமித்தங் ஆரம்மணபுரேஜாதங் ஹோதீதி ஞாபேதுங் ‘நவிப்பயுத்தபச்சயா புரேஜாதே’தி அயமத்தோ² நித்³தா⁴ரிதோ’’தி வத³ந்தி, தங் ந யுஜ்ஜதி ஆருப்பே ரூபங் ஆரப்³ப⁴ சித்துப்பாத³ஸ்ஸ அஸம்ப⁴வதோ. ததா² ஹேகே அஸஞ்ஞப⁴வானந்தரஸ்ஸ விய ஆருப்பானந்தரஸ்ஸ காமாவசரபடிஸந்தி⁴விஞ்ஞாணஸ்ஸ புரிமானுபட்டி²தாரம்மணங் இச்ச²ந்தி. தேனேவாஹ ‘‘தம்பி தேஸங் ருசிமத்தமேவா’’திஆதி³. யுஜ்ஜமானகபச்சயுப்பன்னவஸேன வாதி யஸ்மிங் யஸ்மிங் பச்சயே அனுலோமதோ டி²தே யங் யங் பச்சயுப்பன்னங் ப⁴விதுங் யுஜ்ஜதி, தஸ்ஸ தஸ்ஸ வஸேனாதி அத்தோ². ந விசாரிதங் ஸுவிஞ்ஞெய்யத்தாதி அதி⁴ப்பாயோ. நவாதி ஆரம்மணஅனந்தரஸமனந்தரூபனிஸ்ஸயபுரேஜாதாஸேவனஸம்பயுத்தனத்தி²விக³தபச்சயா. தம்பி தேஸங் நவன்னங் பச்சயானங் அனுலோமதோ அலப்³ப⁴மானதங்.
191-195. ந அஞ்ஞமஞ்ஞேன க⁴டிதஸ்ஸ மூலஸ்ஸாதி அஞ்ஞமஞ்ஞபச்சயேன பச்சனீயதோ டி²தேன யோஜிதஸ்ஸ ஸத்தமஸ்ஸ மூலஸ்ஸ வித்தா²ரிதத்தா. ஸப்³ப³ங் ஸதி³ஸந்தி ஸப்³ப³பாளிக³மனங் ஸதி³ஸங்.
இமஸ்மிங்…பே॰… வேதி³தப்³போ³தி எத்த² இமஸ்மிங் எத்தா²தி த்³வே பு⁴ம்மனித்³தே³ஸா. தேஸு பட²மஸ்ஸ விஸயோ பச்சனீயானுலோமேதி அட்ட²கதா²யமேவ த³ஸ்ஸிதோதி அத³ஸ்ஸிதஸ்ஸ விஸயங் த³ஸ்ஸேதுங் ‘‘ஏதேஸூ’’திஆதி³ வுத்தங். பி-ஸத்³தே³னாதி ‘‘இமேஸம்பீ’’தி எத்த² பி-ஸத்³தே³ன. கிஸ்மிஞ்சி பச்சயே. கம்மபச்சயங் லப⁴ந்தானிபி சக்கா²தீ³னி விபாகவிஞ்ஞாணாதீ³னி ச இந்த்³ரியங் ந லப⁴ந்தீதி கத்வா ‘‘யேபு⁴ய்யேனா’’தி வுத்தங், கதிபயங் ந லப⁴தீதி வுத்தங் ஹோதி. மக்³க³பச்சயந்திஆதீ³ஸுபி ஏஸேவ நயோ. யதா²வுத்தானீதி பஞ்சவோகாரபவத்திஅஸஞ்ஞப⁴வபரியாபன்னானி கடத்தாரூபானேவ வத³தி, ந சித்தஸமுட்டா²னரூபானீதி யே ரூபத⁴ம்மானங் பச்சயா ஹொந்தீதி யே ஹேதுஅதி⁴பதிஸஹஜாதாதி³பச்சயா ரூபத⁴ம்மானங் பச்சயா ஹொந்தி, ஏதேயேவ ஹேதுஅதி⁴பதிஆதி³கே ச² பச்சயே ஏதேயேவாதி வசனேன அஞ்ஞே கதிபயே லப⁴ந்தீதி ஸித்³த⁴ங் ஹோதீதி தங் த³ஸ்ஸெந்தோ ‘‘பச்சா²ஜாதா…பே॰… லப⁴தீ’’தி ஆஹ. அயஞ்ச பச்சயலாபோ⁴ ந ஜனகவஸேன வேதி³தப்³போ³தி த³ஸ்ஸேதுங் ‘‘லப்³ப⁴மானா…பே॰… த³ஸ்ஸன’’ந்தி வுத்தங். த⁴ம்மவஸேனாதி பச்சயுப்பன்னத⁴ம்மவஸேன. இந்த்³ரியந்தி இந்த்³ரியபச்சயங். யதி³ ஏவந்தி கடத்தாரூபங் யங் யங் ந லப⁴தி, தங் தங் யதி³ வத்தப்³ப³ங், ஏவங் ஸந்தே ரூபத⁴ம்மேஸு பூ⁴தரூபானியேவ அஞ்ஞமஞ்ஞபச்சயங் லப⁴ந்தீதி ஆஹ ‘‘உபாதா³ரூபானி…பே॰… வத்தப்³ப³’’ந்தி. தங் பன உபாதா³ரூபானங் அஞ்ஞமஞ்ஞபச்சயாலாப⁴வசனங். அரூபிந்த்³ரியாலாப⁴ந்தி அரூபீனங் இந்த்³ரியானங் வஸேன இந்த்³ரியபச்சயாலாப⁴ங்.
196-197. ப³ஹுக³ணனம்பி ஊனதரக³ணனேன யோஜிதங் ஊனதரக³ணமேவ ஹோதீதி கத்வா வுத்தங் ‘‘யதி³பி திகாதீ³ஸு ‘ஹேதுயா பஞ்சா’தி இத³ங் நத்தீ²’’தி. அனுத்தானங் து³விஞ்ஞெய்யதாய க³ம்பீ⁴ரங். யதா² ச பூ⁴தரூபானி நாரம்மணபச்சயா அஞ்ஞமஞ்ஞபச்சயா உப்பஜ்ஜந்தி, ஏவங் படிஸந்தி⁴க்க²ணே வத்து²ரூபந்தி ஆஹ ‘‘வத்து²பி பன லப⁴தீ’’தி. யதா² ஹெட்டா² ஏகமூலகங் ‘‘து³மூலக’’ந்தி வுத்தங், ஏவங் இதா⁴பி து³மூலகங் ‘‘திமூலக’’ந்தி வத³ந்தி.
203-233. சேதனாமத்தஸங்கா³ஹகேதி சேதனாமத்தங்யேவ பச்சயுப்பன்னங் க³ஹெத்வா டி²தே பஞ்ஹே. தத்த² ஹி ‘‘நகம்மபச்சயா ஹேதுபச்சயா’’தி வத்துங் ஸக்கா. ஏவங்பகாரேதி இத³ங் ‘‘தீணீதிஆதீ³ஸூ’’தி எத்த² ஆதி³-ஸத்³த³ஸ்ஸ அத்த²வசனந்தி த³ஸ்ஸெந்தோ ‘‘ஆதி³-ஸத்³தோ³ ஹி பகாரத்தோ²வ ஹோதீ’’தி ஆஹ. ரூபம்பி லப்³ப⁴தி சேதனாமத்தமேவ அஸங்க³ண்ஹனதோ.
பச்சயபச்சனீயானுலோமவண்ணனா நிட்டி²தா.
படிச்சவாரவண்ணனா நிட்டி²தா.
2. ஸஹஜாதவாரவண்ணனா
234-242. ஸஹஜாதபச்சயகரணந்தி ஸஹஜாதங் பச்சயத⁴ம்மங் பச்சயங் கத்வா பவத்தி. ஸஹஜாதாயத்தபா⁴வக³மனந்தி ஸஹஜாதே பச்சயத⁴ம்மே ஆயத்தபா⁴வஸ்ஸ ‘‘ஸஹஜாதஸத்³தே³ன…பே॰… வுத்த’’ந்தி. தஸ்ஸ கரணஸ்ஸ க³மனஸ்ஸ வாதி தஸ்ஸ யதா²வுத்தஸ்ஸ ஸஹஜாதபச்சயகரணஸ்ஸ ஸஹஜாதாயத்தபா⁴வூபக³மனஸ்ஸ வா. ‘‘குஸலங் த⁴ம்மங் ஸஹஜாதோ’’தி இமஸ்ஸ குஸலங் த⁴ம்மங் ஸஹஜாதங் தங்ஸஹபா⁴விதஞ்ச பச்சயங் கத்வாதி அயமத்தோ²தி ஆஹ ‘‘குஸலாதீ³னங் கம்மபா⁴வதோ’’தி. ஸஹஜாதபச்சயஸஹபா⁴வீனங் பச்சயானங் ஸங்க³ண்ஹத்த²ஞ்ஹெத்த² ‘‘ஸஹஜாதாயத்தபா⁴வக³மனங் வா’’தி வுத்தங்.
தங்கம்மபா⁴வதோதி தேஸங் யதா²வுத்தபச்சயகரணததா³யத்தபா⁴வக³மனானங் கம்மபா⁴வதோ. அட்ட²கதா²யங் பன ‘‘குஸலங் த⁴ம்மங் ஸஹஜாதோதி குஸலங் த⁴ம்மங் படிச்ச தேன ஸஹஜாதோ ஹுத்வா’’தி படிச்சஸத்³த³ங் ஆஹரித்வா அத்தோ² வுத்தோ, தங் ‘‘படிச்சத்தோ² ஸஹஜாதத்தோ²’’தி கத்வா வுத்தங். ஸஹஜாதஸத்³த³யோகே³ குஸலங் த⁴ம்மந்தி உபயோக³வசனஸ்ஸ யுத்தி ந வுத்தா, ‘‘தேன ஸஹஜாதோ ஹுத்வா’’தி பன வுத்தத்தா கரணத்தே² உபயோக³வசனந்தி த³ஸ்ஸிதந்தி கேசி. நிஸ்ஸயவாரே பன குஸலங் த⁴ம்மங் நிஸ்ஸயத்தே²ன பச்சயங் கத்வாதி வத³ந்தேன இதா⁴பி ‘‘குஸலங் த⁴ம்மங் ஸஹஜாதத்தே²ன பச்சயங் கத்வா’’தி அயமத்தோ² வுத்தோயேவ ஹோதி, படிச்சஸத்³தா³ஹரணம்பி இமமேவத்த²ங் ஞாபேதீதி த³ட்ட²ப்³ப³ங். உபாதா³ரூபங் கிஞ்சி பூ⁴தரூபஸ்ஸ அனுபாலகங் உபத்த²ம்ப⁴கஞ்ச ஹொந்தம்பி ஸஹஜாதலக்க²ணேன ந ஹோதி, தஸ்மா படிச்சத்த²ங் ந ப²ரதீதி ஆஹ ‘‘படிச்சாதி இமினா வசனேன தீ³பிதோ பச்சயோ ந ஹோதீ’’தி. நித³ஸ்ஸனவஸேன வுத்தந்தி உதா³ஹரணவஸேன வுத்தங், ந அனவஸேஸதோதி அத்தோ². யதா²வுத்தோதி படிச்சத்த²ப²ரணவஸேன வுத்தோ. யதா² ச உபாதா³ரூபங் பூ⁴தரூபஸ்ஸ உபாதா³ரூபஸ்ஸ ச பச்சயோ ந ஹோதி, ஏவங் ட²பெத்வா ச² வத்தூ²னி ஸேஸரூபானி அரூபத⁴ம்மானங் பச்சயோ ந ஹோதீதி த³ஸ்ஸெந்தோ ‘‘வத்து²வஜ்ஜானி ரூபானி ச அரூபான’’ந்தி ஆஹ.
ஸஹஜாதவாரவண்ணனா நிட்டி²தா.
3. பச்சயவாரவண்ணனா
243. பதி-ஸத்³தோ³ பதிட்ட²த்த²ங் தீ³பேதி ‘‘ஸாரே பதிட்டி²தோ’’திஆதீ³ஸு, அய-ஸத்³தோ³ க³திங் தீ³பேதி ‘‘ஏதி எத்தா²தி அயோ’’தி.
பூ⁴துபாதா³ரூபானி ஸஹ ஸங்க³ண்ஹித்வா வுத்தங் உபாதா³ரூபானங் விய பூ⁴தரூபானி நிஸ்ஸயோ ஹோதீதி கத்வா. யதி³ ஏவங் கஸ்மா அட்ட²கதா²யங் ‘‘மஹாபூ⁴தே நிஸ்ஸாய சித்தஸமுட்டா²னங் உபாதா³ரூப’’ந்தி உபாதா³ரூபங்யேவ த³ஸ்ஸிதந்தி ஆஹ ‘‘அட்ட²கதா²யங் பனா’’திஆதி³.
255. படிச்சவாரே ஸஹஜாதேதி படிச்சவாரே ஸஹஜாதபச்சயவண்ணனாயங், கம்மஉதுஜானந்தி கம்மஜானங் உதுஜானஞ்ச வஸேன அத்தோ² வுத்தோதி யோஜனா. ததா² ஹி தத்த² வுத்தங் ‘‘த்³விஸந்ததிஸமுட்டா²னபூ⁴தவஸேன வுத்த’’ந்தி (பட்டா²॰ அட்ட²॰ 1.57). கம்மே சாதி கம்மே ஜனககம்மபச்சயே க³ஹிதே. ஏகந்தானேகந்தகம்மஜானந்தி ஏகந்தேன கம்மஜானங் ந ஏகந்தகம்மஜானஞ்ச. தத்த² அஸஞ்ஞப⁴வே ஏகந்தகம்மஜங் நாம ஜீவிதிந்த்³ரியங், இதரங் உபாதா³ரூபங் பூ⁴தரூபஞ்ச ந ஏகந்தகம்மஜங், தது³ப⁴யம்பி தத்த² ஏகஜ்ஜ²ங் கத்வா வுத்தங், ‘‘மஹாபூ⁴தே படிச்ச கடத்தாரூப’’ந்தி இத³ங் பன கம்மஸமுட்டா²னவஸேனேவ வுத்தந்தி. ஸோ நாதி⁴ப்பேதோதி யோ யதா²த³ஸ்ஸிதோ படிச்சவாரே ஸஹஜாதபச்சயே அத்தோ² வுத்தோ, ஸோ இத⁴ ந அதி⁴ப்பேதோ. கஸ்மாதி சே, ஆஹ ‘‘கடத்தா…பே॰… க³ஹிதத்தா’’தி. தங் பஹாயாதி தங் படிச்சவாரே வுத்தமத்த²ங் பஹாய அக்³க³ஹெத்வா. யதா²க³ஹிதஸ்ஸாதி ‘‘அஸஞ்ஞ…பே॰… கடத்தாரூபங் உபாதா³ரூப’’ந்தி பாளியங் ஏவ க³ஹிதஸ்ஸ. படிச்ச பச்சயாதி இத³ங் த்³வின்னங் வாரானங் உபலக்க²ணங். படிச்சவாரே ஆக³தனயேன மஹாபூ⁴தே படிச்ச, பச்சயவாரே ஆக³தனயேன மஹாபூ⁴தே பச்சயா மஹாபூ⁴தானங் உப்பத்தி ந நிவாரேதப்³பா³, தஸ்மா ‘‘உபாதா³ரூபஸங்கா²தங் கடத்தாரூப’’ந்தி ஏவங் உபாதா³ரூபக்³க³ஹணேன கடத்தாரூபங் அவிஸேஸெத்வா உபாதா³ரூபானங் நிவத்தேதப்³பா³னங் உதுசித்தாஹாரஸமுட்டா²னானங் அத்தி²தாய கடத்தா…பே॰… விஸேஸனங் த³ட்ட²ப்³ப³ந்தி ஏவமெத்த² யோஜனா வேதி³தப்³பா³.
286-287. ஏகச்சஸ்ஸ ரூபஸ்ஸாதி அஹேதுகசித்தஸமுட்டா²னஸ்ஸ. இதோ பரேஸுபி ஏகச்சரூபக்³க³ஹணே ஏஸேவ நயோ. சக்கா²தி³த⁴ம்மவஸேனாதி சக்கா²யதனாதி³ரூபத⁴ம்மவஸேன. சித்தஸமுட்டா²னாதி³கொட்டா²ஸவஸேனாதி சித்தஜாதி³ரூபத⁴ம்மபா⁴க³வஸேன. ஸப்³ப³ங் லப்³ப⁴தீதி ஸதிபி இமஸ்ஸ நயஸ்ஸ
பச்சயவாரவண்ணனா நிட்டி²தா.
4. நிஸ்ஸயவாரவண்ணனா
329-337. நிஸ்ஸயபச்சயபா⁴வந்தி நிஸ்ஸயவாரே வுத்தஸ்ஸ ஸஹஜாதபுரேஜாதஸ்ஸ ச நிஸ்ஸயட்ட²ஸ்ஸ த⁴ம்மஸ்ஸ பச்சயபா⁴வங் பச்சயவாரேன நியமேதுந்தி யோஜனா. ததா² பச்சயவாரே ‘‘பச்சயா’’தி வுத்தஸ்ஸ பச்சயத⁴ம்மஸ்ஸ ஸஹஜாதபுரேஜாதபா⁴வங் நிஸ்ஸயவாரேன நியமேதுந்தி யோஜனா. நியமனஞ்செத்த² பச்சயட்ட²னிஸ்ஸயட்டா²னங் பரியாயந்தரேன பகாஸிதத்தா அத்த²தோ பே⁴தா³பா⁴வத³ஸ்ஸனந்தி வேதி³தப்³போ³. தேன வுத்தங் ‘‘பச்சயத்தங் நாம நிஸ்ஸயத்தங், நிஸ்ஸயத்தங் நாம பச்சயத்த’’ந்தி.
நிஸ்ஸயவாரவண்ணனா நிட்டி²தா.
5. ஸங்ஸட்ட²வாரவண்ணனா
351-368. ஸாதி ஸவத்து²கா படிஸந்தி⁴. இதா⁴பீதி இமஸ்மிங் ஸங்ஸட்ட²வாரேபி. அதி⁴பதிபுரேஜாதாஸேவனேஸு அனுலோமதோ நகம்மனவிபாகனஜா²னநவிப்பயுத்தேஸு பச்சனீயதோ டி²தேஸு ந லப்³ப⁴தி, அஞ்ஞேஸு ஸஹஜாதாதீ³ஸு அனுலோமதோ ஹேதுஆதீ³ஸு பச்சனீயதோ ச அனுலோமதோ ச டி²தேஸு லப்³ப⁴தீதி. தேனாஹ ‘‘லப்³ப⁴மானபச்சயேஸூ’’தி. இமஸ்ஸ விஸேஸஸ்ஸாதி இமஸ்ஸ யதா²வுத்தஸ்ஸ விஸேஸஸ்ஸ த³ஸ்ஸனத்த²ங் உத்³த⁴டா, தஸ்மா தாதி³ஸஸ்ஸ விஸேஸஸ்ஸ த³ஸ்ஸேதப்³ப³ஸ்ஸ அபா⁴வதோ வத்து²விரஹிதா படிஸந்தி⁴ அனுத்³த⁴டா, ந விப்பயுத்தே பச்சனீயதோ டி²தே அபா⁴வதோதி அத்தோ². ஹேதுபச்சயவிரஹிதமத்தத³ஸ்ஸனத்த²ந்தி இமினா பூ⁴தகத²னங் அஹேதுகக்³க³ஹணங் ந ப்³யபி⁴சாரனிவத்தனந்தி த³ஸ்ஸேதி. ‘‘அஹேதுகவிபாககிரியவஸேனா’’தி ப⁴விதப்³ப³ங் ஹேதுபரியந்தத்தா மக்³க³ஸ்ஸ.
369-391. ‘‘ஹேதும்ஹி ‘‘படிச்சவாரே…பே॰… நயேனா’’தி. ஸேஸேஸூதி அஹேதுகமோஹவஜ்ஜாஹேதுகேஸு பஞ்சவிஞ்ஞாணா…பே॰… ஜா²னபச்சயங் லப⁴ந்தி, தஸ்மா ‘‘அஹேதுகமோஹோவ ஜா²னமக்³க³பச்சயங் லப⁴தீ’’தி ந ஸக்கா வத்துங், கிஞ்ச பச்சனீயானுலோமே த்³வின்னங் பச்சயானங் அனுலோமேன அனுலோமவஸேன ஸஹ யோஜனா நத்தி² ஏகேகஸ்ஸேவ யோஜனாய ஆக³தத்தா, தஸ்மா அஹேதுகமோஹோவ மக்³க³பச்சயங் லப⁴தீதி ஏவமெத்த² யோஜனா வேதி³தப்³பா³.
ஸங்ஸட்ட²வாரவண்ணனா நிட்டி²தா.
6. ஸம்பயுத்தவாரவண்ணனா
392-400. ஸதி³ஸங் ஸம்பயுத்தந்தி ‘‘யங் ஸதி³ஸங், தங் ஸங்ஸட்ட²’’ந்தி வுச்சமானங் ஸம்பயுத்தங் ந ஹோதி ‘‘ஸங்ஸட்டா² யோஜிதா ஹயா’’திஆதீ³ஸு. அஸங்ஸட்ட²ங் வோகிண்ணந்தி யங் ந ஸங்ஸட்ட²ங் அந்தரந்தரா உப்பஜ்ஜமானேன வோகிண்ணம்பி விமிஸ்ஸதாய ஸம்பயுத்தந்தி வுச்சமானங், தங் ஸங்ஸட்ட²ங் ந ஹோதி ‘‘யா ஸா வீமங்ஸா…பே॰… கோஸஜ்ஜஸம்பயுத்தா’’திஆதீ³ஸு. ஏவங் அஸம்பயுத்தஸ்ஸபி ஸங்ஸட்ட²பரியாயோ அஸங்ஸட்ட²ஸ்ஸ ச ஸம்பயுத்தபரியாயோ அத்தீ²தி தது³ப⁴யங் இதரேதரங் நியமேதீதி த³ஸ்ஸனத்த²ங் வாரத்³வயதே³ஸனாதி த³ஸ்ஸெந்தோ ஆஹ ‘‘உப⁴யங்…பே॰… நியாமகங் ஹோதீ’’தி, ஸங்ஸட்ட²ஸத்³தோ³ ஹி வோகிண்ணட்டோ² நத்தி², ஸம்பயுத்தஸத்³தோ³ ச ஸதி³ஸத்தோ², தஸ்மா யதா² ஸங்ஸட்ட²ஸத்³தோ³ ஸம்பயுத்தஸத்³தா³பெக்கோ² ஸதி³ஸத்த²தோ வினிவத்தித்வா ஏகுப்பாதா³தி³ஸபா⁴வமேவ அத்த²ங் போ³தே⁴தி, ஏவங் ஸம்பயுத்தஸத்³தோ³பி ஸங்ஸட்ட²ஸத்³தா³பெக்கோ² வோகிண்ணட்ட²தோ வினிவத்தித்வாதி அஞ்ஞமஞ்ஞாபெக்க²ஸ்ஸ ஸத்³த³த்³வயஸ்ஸ அஞ்ஞமஞ்ஞனியாமகதா வேதி³தப்³பா³.
ஸம்பயுத்தவாரவண்ணனா நிட்டி²தா.
7. பஞ்ஹாவாரவிப⁴ங்க³வண்ணனா
401-403. தே பச்சயேதி தே ஹேதுஆதி³கே பச்சயே. படிபாடியாதி எத்த² பச்சயபடிபாடியா குஸலாதி³பத³படிபாடியா வாதி ஆஸங்காயங் உப⁴யவஸேனபி அத்தோ² யுஜ்ஜதீதி த³ஸ்ஸெந்தோ பட²மங் தாவ ஸந்தா⁴யாஹ ‘‘யதா²க்கமேனா’’திஆதி³. தஸ்ஸத்தோ² – ‘‘ஹேதுபச்சயோ ஆரம்மணபச்சயோ’’திஆதி³னா நயேன தே³ஸனாக்கமேன யாய படிபாடியா படிச்சவாரே பச்சயா ஆக³தா, தத³னுரூபங் தே த³ஸ்ஸேதுந்தி. து³தியங் பன த³ஸ்ஸேதுங் ‘‘குஸலோ குஸலஸ்ஸா’’திஆதி³ வுத்தங். ஸா பனாயங் பத³படிபாடி யஸ்மா ந குஸலபத³த³ஸ்ஸனமத்தேன த³ஸ்ஸிதா ஹோதி, தஸ்மா தங் ஏகதே³ஸேன ஸகலங் நயதோ த³ஸ்ஸெந்தோ ஆஹ ‘‘குஸலோ குஸலஸ்ஸாதி…பே॰… ஹோதீ’’தி. தேனாதி நித³ஸ்ஸனமத்தேன ‘‘குஸலோ குஸலஸ்ஸா’’தி பதே³ன. ஸப்³போ³ பபே⁴தோ³தி யங் தத்த² தத்த² பச்சயே ‘‘குஸலோ குஸலஸ்ஸா’’திஆதி³கோ யத்தகோ பபே⁴தோ³ விஸ்ஸஜ்ஜனங் லப⁴தி, ஸோ ஸப்³போ³ பபே⁴தோ³தி அத்தோ². தே பச்சயே படிபாடியா த³ஸ்ஸேதுந்தி தே ஹேதுஆதி³பச்சயே குஸலாதி³பத³படிபாடியா த³ஸ்ஸேதுங்.
404. ப²லவிஸேஸங் ஆகங்க²ந்தா படிக்³கா³ஹகதோ விய தா³யகதோபி யதா² த³க்கி²ணா விஸுஜ்ஜ²தி, ஏவங் தா³னங் தெ³ந்தீதி ஆஹ ‘‘விஸுத்³த⁴ங் கத்வா’’தி. தேஸந்தி வத்தப்³ப³தாரஹந்தி இமினா வோதா³னஸ்ஸ ஸகதா³கா³மிஆதீ³னங் ஆவேணிகதங் த³ஸ்ஸேதி. காமங் அக்³க³மக்³க³புரேசாரிகம்பி வோதா³னமேவ, அஸெக்கோ² பன ஹுத்வா தங் பச்சவெக்க²தீதி ந தங் இத⁴ க³ஹிதங். தந்தி வோதா³னங். கொ³த்ரபு⁴சித்தந்தி அட்ட²மகஸ்ஸ உப்பஜ்ஜனகாலே ‘‘கொ³த்ரபூ⁴’’தி வத்தப்³ப³தாரஹங் சித்தங். கொ³த்ரபு⁴ஸதி³ஸந்தி வா ஸோதாபன்னாதி³கொ³த்ராபி⁴பா⁴வீதி வா கொ³த்ரபு⁴சித்தந்தி ஏவமெத்த² அத்தோ² வேதி³தப்³போ³. பச்சயுப்பன்னங் பூ⁴மிதோ வவத்த²பேதி, ‘‘தேபூ⁴மககுஸலமேவா’’தி எத்த² விய ந பச்சயத⁴ம்மந்தி அத்தோ². தே³ஸனந்தரத்தாதி ‘‘குஸலசித்தஸமங்கி³ஸ்ஸா’’திஆதி³னா புக்³க³லாமஸனதே³ஸனதோ அஞ்ஞத்தா, அஞ்ஞதா² க³ஹிதங் புன ந க³ண்ஹெய்யாதி அதி⁴ப்பாயோ.
405. ராக³ரஹிதஸ்ஸ விய ஸோமனஸ்ஸரஹிதஸ்ஸ ச ராக³ஸ்ஸ ந ஆரம்மணே அஸ்ஸாத³னவஸேன பவத்தி அஜ்ஜு²பெக்க²னதோதி வுத்தங் ‘‘அஸ்ஸாத³னங்…பே॰… கிச்ச’’ந்தி. ஸஹஸாகாரப்பவத்தாய உப்பிலாவிதஸபா⁴வாய பீதியா ஆஹிதவிஸேஸாய தண்ஹாய தங் தண்ஹாபி⁴னந்த³னந்தி வுச்சதீதி தங் ஸந்தா⁴யாஹ ‘‘பீதிகிச்சஸஹிதாய தண்ஹாய கிச்ச’’ந்தி. யதா² ச யதா²வுத்தகிச்சவிஸேஸாய பீதியா ஆஹிதவிஸேஸா தண்ஹா தண்ஹாபி⁴னந்த³னா, ஏவங் தி³ட்டா²பி⁴னந்த³னா வேதி³தப்³பா³. யஸ்மா பன ஸா ‘‘தி³ட்டா²பி⁴னந்த³னா தி³ட்டி²யேவா’’தி. எத்த² பனாதி ‘‘அபி⁴னந்த³தீ’’தி பத³ஸ்ஸ தண்ஹாதி³ட்டி²வஸேன வுத்தேஸு ஏதேஸு பன த்³வீஸு அத்தே²ஸு. அபி⁴னந்த³ந்தஸ்ஸாதி இத³ங் தி³ட்டா²பி⁴னந்த³னங்யேவ ஸந்தா⁴ய வுத்தந்தி அதி⁴ப்பாயேன ‘‘பச்சி²மத்த²மேவ க³ஹெத்வா’’தி வுத்தங். அபி⁴னந்த³ந்தஸ்ஸாதி பன அவிஸேஸதோ வுத்தத்தா தண்ஹாவஸேன தி³ட்டி²வஸேன அபி⁴னந்த³ந்தஸ்ஸாதி அயமெத்த² அத்தோ² அதி⁴ப்பேதோ, தஸ்மா ‘‘அபி⁴னந்த³னா…பே॰… ந ஸக்கா வத்து’’ந்தி இத³மித⁴ வசனமனோகாஸங். கஸ்மா? தி³ட்டி²ரஹிதேபி ஸந்தானே அபி⁴னந்த³னஸ்ஸ வுத்தத்தா. தண்ஹாவஸேன நந்த³தீதி தண்ஹாபி⁴னந்த³னவஸேனேவ வுத்தோ அத்தோ² புரிமோ அத்தோ². த்³வீஸு பன ஸோமனஸ்ஸஸஹக³தசித்துப்பாதே³ஸூதி தி³ட்டி²ரஹிதானி ஸோமனஸ்ஸஸஹக³தசித்தானி ஸந்தா⁴யாஹ. யதா²வுத்தேனாதி ‘‘ஸராக³ஸ்ஸ ஸோமனஸ்ஸஸ்ஸா’’திஆதி³னா வுத்தேன ஸோமனஸ்ஸேன அஸ்ஸாதெ³ந்தஸ்ஸ, ராகே³ன ச தேஸுயேவ யதா²வுத்தேஸு த்³வீஸு சித்தேஸு அஸ்ஸாதெ³ந்தஸ்ஸ, சதூஸுபி ஸோமனஸ்ஸஸஹக³தசித்தேஸு ஸப்பீதிகதண்ஹாய அபி⁴னந்த³ந்தஸ்ஸ, சதூஸுபி தி³ட்டி²ஸம்பயுத்தேஸு தி³ட்டா²பி⁴னந்த³னாய அபி⁴னந்த³ந்தஸ்ஸ தி³ட்டி² உப்பஜ்ஜதீதி ஏவமெத்த² யோஜனா வேதி³தப்³பா³. தேன வுத்தங் ‘‘இதிபி ஸக்கா யோஜேது’’ந்தி. யதா² தி³ட்டூ²பனிஸ்ஸயதோ தி³ட்டா²பி⁴னந்த³னா ஸம்ப⁴வதி, ஏவங் தண்ஹூபனிஸ்ஸயதோ தண்ஹாபி⁴னந்த³னாபி ஸம்ப⁴வதீதி த³ட்ட²ப்³ப³ங். ‘‘அபி⁴னந்த³தி ராகோ³ உப்பஜ்ஜதீ’’தி வசனதோ ஸப்பீதிகதண்ஹாய அபி⁴னந்த³ந்தஸ்ஸ ராகு³ப்பத்திபி வத்தப்³பா³, ந வா வத்தப்³பா³ தண்ஹாபி⁴னந்த³னாய ஏவ ராகு³ப்பத்தியா வுத்தத்தா.
406. ‘‘ததா³ரம்மணதாயா’’தி வத்தப்³பே³ ‘‘ததா³ரம்மணதா’’தி வுத்தந்தி ஆஹ ‘‘விப⁴த்திலோபோ ஹெத்த² கதோ’’தி. ததா³ரம்மணதாதி எத்த² தா-ஸத்³தா³பி⁴தெ⁴ய்யோ அத்தோ² பா⁴வோ நாம, ஸோ பன ததா³ரம்மணஸத்³தா³பி⁴தெ⁴ய்யதோ அஞ்ஞோ நத்தீ²தி த³ஸ்ஸெந்தோ ஆஹ ‘‘பா⁴வவந்ததோ வா அஞ்ஞோ பா⁴வோ நாம நத்தீ²’’தி. ஏதேன ஸகத்தே² அயங் தா-ஸத்³தோ³தி த³ஸ்ஸேதி. தேனாஹ ‘‘விபாகோ ததா³ரம்மணபா⁴வபூ⁴தோதி அத்தோ²’’தி. ஏதஸ்மிஞ்சத்தே² ‘‘ததா³ரம்மணதா’’தி பச்சத்தேகவசனங் த³ட்ட²ப்³ப³ங். விஞ்ஞாணஞ்சாயதன…பே॰… ந வுத்தந்தி யதி³பி காமாவசரவிபாகானம்பி கம்மங் ‘‘ததா³ரம்மணேன பனா’’திஆதி³. அனுலோமதோ ஸமாபஜ்ஜனே யேபு⁴ய்யேன ஆஸன்னஸமாபத்தியா ஆரம்மணபா⁴வோ த³ஸ்ஸிதோ, அஞ்ஞதா² ‘‘படிலோமதோ வா ஏகந்தரிகவஸேன வா’’தி வசனங் நிரத்த²கங் ஸியாதி அதி⁴ப்பாயோ. ப⁴வெய்யாதி அனாஸன்னாபி ஸமாபத்தி ஆரம்மணங் ப⁴வெய்ய, ந ஸக்கா படிக்கி²பிதுந்தி ‘‘யேபு⁴ய்யேனா’’தி வுத்தங். ஏவங் ஸதீதி யதி³ ஆவஜ்ஜனாய ஏவ ஆரம்மணபா⁴வேன குஸலானங் க²ந்தா⁴னங் அப்³யாகதாரம்மணதா அதி⁴ப்பேதா, ஏவங் ஸந்தே. வத்தப்³ப³ங் ஸியாதி ‘‘இத்³தி⁴வித⁴ஞாணஸ்ஸா’’தி ச பாளியங் வத்தப்³ப³ங் ஸியா தஸ்ஸாபி ஆவஜ்ஜனாய ஆரம்மணபா⁴வதோ. தங் ந வுத்தந்தி தங் அப்³யாகதங் இத்³தி⁴வித⁴ஞாணங் ‘‘குஸலா க²ந்தா⁴ இத்³தி⁴வித⁴ஞாணஸ்ஸா’’தி ந வுத்தங். ஹொந்தீதி ஆரம்மணங் ஹொந்தி. தானீதி சேதோபரியஞாணாதீ³னி. யாய காயசீதி சேதோபரியஞாணாதீ³னங் அஞ்ஞேஸஞ்ச குஸலானங் ஆரம்மணகரணவஸேன ஆவஜ்ஜந்தியா.
407-409. ஆதீ³னவத³ஸ்ஸனேன ஸபா⁴வதோ ச அனிட்ட²தாமத்தவஸேன ச தோ³மனஸ்ஸஸ்ஸ உப்பத்தி வேதி³தப்³பா³தி யோஜேதப்³ப³ங். ஆகா⁴தவத்து²ஆதி³பே⁴தே³ன அக்க²ந்திபே⁴தா³ வேதி³தப்³பா³.
410. ஸப்³ப³ஸ்ஸாதி பகரணபரிச்சி²ன்னே க³ய்ஹமானே ஸப்³ப³ஸ்ஸ அப்³யாகதஸ்ஸ, அத்த²ந்தரவஸேன பன க³ய்ஹமானே ஸப்³ப³ஸ்ஸ ஞெய்யஸ்ஸாதி அத்தோ². அஸக்குணெய்யத்தாதி இத³ங் வத்தப்³ப³ஸ்ஸ அனந்தாபரிமெய்யதாய வுத்தங், ந அஞ்ஞாணபடிகா⁴ததோ.
417. வோதா³னஸங்கா²தங் வுட்டா²னங் அபுப்³ப³தோ ந ஹோதீதி வுத்தங் ‘‘அபுப்³ப³தோ சித்தஸந்தானதோ வுட்டா²னங் ப⁴வங்க³மேவா’’தி. தஞ்ஹி யதா²லத்³த⁴ஸ்ஸ விஸேஸஸ்ஸ வோதா³பனங் பகு³ணபா⁴வாபாத³னங் அபுப்³ப³ங் நாம ந ஹோதி. ததா² ஹி வுத்தங் ‘‘ஹெட்டி²மங் ஹெட்டி²மஞ்ஹி பகு³ணஜ்ஜா²னங் உபரிமஸ்ஸ உபரிமஸ்ஸ பத³ட்டா²னங் ஹோதி, தஸ்மா வோதா³னம்பி வுட்டா²னந்தி வுத்த’’ந்தி. அவஜ்ஜேதப்³ப³த்தா வத்தப்³ப³ங் நத்தீ²தி குஸலபா⁴வேன ‘‘நேவஸஞ்ஞானாஸஞ்ஞாயதனங்…பே॰… ஸமாபத்தியா’’தி ஆஹ. சித்துப்பாத³கண்டே³ வுத்தமேவாதி பட்டா²னே பன ‘‘குஸலே நிருத்³தே⁴ விபாகோ ததா³ரம்மணதா உப்பஜ்ஜதீ’’திஆதி³னா ‘‘கிரியானந்தரங் ததா³ரம்மணபா⁴வே’’தி யங் வத்தப்³ப³ங், தங் சித்துப்பாத³கண்ட³வண்ணனாயங் வுத்தமேவ.
தா உபோ⁴பீதி யா ‘‘குஸலவிபாகாஹேதுகஸோமனஸ்ஸஸஹக³தா உபெக்கா²ஸஹக³தா சா’’தி த்³வே மனோவிஞ்ஞாணதா⁴துயோ வுத்தா, தா உபோ⁴பி ஸோமனஸ்ஸஸஹக³தமனோவிஞ்ஞாணதா⁴துவஸேன வுத்தா. கஸ்மா? த³ஸன்னங் காமாவசரப⁴வங்கா³னங் அத்தனோ ததா³ரம்மணகாலே ஸந்தீரணகாலே ச வொட்ட²ப்³ப³னஸ்ஸ அனந்தரபச்சயபா⁴வதோ. உபெக்கா²ஸஹக³தா பன யதா²வுத்தானங் த³ஸன்னங் விபாகானங் மனோவிஞ்ஞாணதா⁴தூனங் அத்தனோ
423. படிவிஜ்ஜி²த்வாதி ஜானித்வா. த³ள்ஹங் ந க³ஹேதப்³ப³ந்தி த³ள்ஹக்³கா³ஹங் ந க³ஹேதப்³ப³ங். ப³லவதோ…பே॰… விபச்சனதோதி ஏதேன ப³லவதா து³ப்³ப³லதா ச அப்பமாணங், கதோகாஸதா பமாணந்தி த³ஸ்ஸேதி. கதோகாஸதா ச அவஸேஸபச்சயஸமவாயே விபாகாபி⁴முக²தாதி த³ட்ட²ப்³ப³ங். யங் கிஞ்சீதி ச ப³லவங் து³ப்³ப³லங் வாதி அத்தோ². விபாகஜனகம்பி கிஞ்சி கம்மங் உபனிஸ்ஸயபச்சயோ ந ஹோதீதி ஸக்கா வத்துங். ஸதி ஹி கம்மஉபனிஸ்ஸயபச்சயானங் அவினாபா⁴வே விபாகத்திகே உபனிஸ்ஸயபச்சயே க³ஹிதே கம்மபச்சயோ விஸுங் ந உத்³த⁴ரிதப்³போ³ ஸியா, வேத³னாத்திகே ச உபனிஸ்ஸயே பச்சனீயதோ டி²தே கம்மபச்சயேன ஸத்³தி⁴ங் அட்டா²தி ந வத்தப்³ப³ங் ஸியாதி அதி⁴ப்பாயோ. பச்சயத்³வயஸ்ஸ பன லப்³ப⁴மானதப்பராய தே³ஸனாய உபனிஸ்ஸயே க³ஹிதேபி கம்மபச்சயோ உத்³த⁴ரிதப்³போ³யேவாதி ஸக்கா வத்துங். லப்³ப⁴மானஸ்ஸ ஹி உத்³த⁴ரணங் ஞாயாக³தங், ததா² உபனிஸ்ஸயே பச்சனீயதோ டி²தேபி கம்மபச்சயோ வத்தப்³போ³வ உபனிஸ்ஸயஸ்ஸ அனேகபே⁴த³த்தா, விபாகங் ஜனெந்தங் கம்மங் விபாகஸ்ஸ உபனிஸ்ஸயோ ந ஹோதீதி ந வத்தப்³ப³மேவாதி வேதி³தப்³ப³ங்.
பரஸ்ஸ பவத்தங் ஓமானந்தி பரஸந்தானே அத்தானங் உத்³தி³ஸ்ஸ பவத்தங் அவமானங். தேஸூதி யோ அனேன புப்³பே³ ஹதோ, தஸ்ஸ ஞாதிமித்தேஸு. மாதுகா⁴தனத்த²ங் பவத்திததாய புரிமசேதனாய மாதுகா⁴தகம்மேன ஸதி³ஸதா, யதா² ச ஆணத்தியங் பஹாரேபி ஏஸேவ நயோ. தேன வுத்தங் ‘‘ஏஸ நயோ த்³வீஹி பகாரேஹீதி எத்தா²பீ’’தி.
வட்டனிஸ்ஸிதோ தா³னாதி³வஸேன ஸத்³த⁴ங் உப்பாதெ³ந்தோ ராக³ங் உபனிஸ்ஸாய தா³னாதி³வஸேன ஸத்³த⁴ங் உப்பாதே³தி நாம, ந விவட்டனிஸ்ஸிதோ அவிஸேஸேன வுத்தத்தாதி ஆஹ ‘‘இமினா அதி⁴ப்பாயேன வத³தீ’’தி. ஏதேஸந்தி காயிகஸுக²து³க்கா²னங். ஏகதோபீதி இத³ங் யதி³பி ஏகஸ்மிங் ஸந்தானே ஸுக²து³க்கா²னங் ஏகஸ்மிங் க²ணே உப்பத்தி நத்தி², பச்சயஸமாயோகோ³ பன தேஸங் ஏகஜ்ஜ²ம்பி ஹோதீதி கத்வா வுத்தங்.
425. புரிமவாரேஸு வியாதி படிச்சவாராதீ³ஸு புரிமேஸு விய. இமஸ்மிந்தி பஞ்ஹாவாரே. பச்சயேன உப்பத்தி வுச்சதீதி ஹேதுஆதி³னா தேன தேன பச்சயேன தங்தங்பச்சயுப்பன்னஸ்ஸ உப்பத்தி ந வுச்சதி தேஸங் தேஸங் த⁴ம்மானந்தி ஹேதுஆதீ³னங் தேஸங் தேஸங் பச்சயத⁴ம்மானங். தங்தங்பச்சயபா⁴வோதி ஹேதுஆதீ³னங் தங்தங்பச்சயபா⁴வோ வுச்சதி. தேனேவ புரிமேஸு ச²ஸு வாரேஸு ‘‘குஸலோ த⁴ம்மோ உப்பஜ்ஜதீ’’திஆதி³னா தத்த² தத்த² உப்பாத³க்³க³ஹணங் கதங், இத⁴ பன ‘‘குஸலஸ்ஸ த⁴ம்மஸ்ஸ ஹேதுபச்சயேன பச்சயோ’’திஆதி³னா பச்சயபா⁴வோ க³ஹிதோ. தேனாதி உபத்த²ம்ப⁴கத்தேன பச்சயபா⁴வேன. இதா⁴தி பஞ்ஹாவாரே.
427. பதிட்டா²பூ⁴தஸ்ஸாதி நிஸ்ஸயபூ⁴தஸ்ஸ. கம்மபச்சயோதி ஸஹஜாதகம்மபச்சயோ. து³கமூலகது³காவஸானாதி ‘‘குஸலோ ச அப்³யாகதோ ச த⁴ம்மா குஸலஸ்ஸ ச அப்³யாகதஸ்ஸ ச த⁴ம்மஸ்ஸா’’தி ஏவங் து³கமூலகது³காவஸானா கத்வா வுத்தபஞ்ஹா. தத்தா²தி பச்சயவாரே. குஸலோ ச அப்³யாகதோ ச த⁴ம்மாதி குஸலாப்³யாகதப்பபே⁴தா³ பச்சயுப்பன்னா த⁴ம்மா. யதோ ததோ வாதி பச்சயத⁴ம்மனியமங் அகத்வா யதோ ததோ வா குஸலாப்³யாகதவஸேன உப⁴யபச்சயதோ உப்பத்திமத்தமேவ தத்த² பச்சயவாரே அதி⁴ப்பேதங், உப⁴யஸ்ஸ யதா²வுத்தஸ்ஸ பச்சயுப்பன்னஸ்ஸ உபி⁴ன்னங் யதா²வுத்தானங்யேவ பச்சயத⁴ம்மானங் பச்சயபா⁴வோ ந அதி⁴ப்பேதோ உப்பாத³பதா⁴னத்தா தஸ்ஸா தே³ஸனாயாதி அதி⁴ப்பாயோ. நிஸ்ஸயாதி³பூ⁴தாதி நிஸ்ஸயஅத்தி²அவிக³தபூ⁴தா பச்சயத⁴ம்மா ந லப்³ப⁴ந்தி, தஸ்மா குஸலோ ச…பே॰… ந வுத்தந்தி யோஜனா.
பஞ்ஹாவாரவிப⁴ங்க³வண்ணனா நிட்டி²தா.
பஞ்ஹாவாரஸ்ஸ க⁴டனே அனுலோமக³ணனா
439. எத்தா²தி யதி³ ஏவந்தி யதி³ குஸலாகுஸலமூலேஹி அலப்³ப⁴மானம்பி லப்³ப⁴தி, ஏவங் ஸந்தே. க³ணனமத்தஸாமஞ்ஞதோ, ந பச்சயஸாமஞ்ஞதோதி அதி⁴ப்பாயோ.
440. நித³ஸ்ஸனவஸேன த³ட்ட²ப்³போ³ யேபு⁴ய்யேன இந்த்³ரியமக்³க³பச்சயானஞ்ச ஹேதுபச்சயஸ்ஸ விஸபா⁴க³த்தா. இந்த்³ரியமக்³க³பச்சயா ச விஸபா⁴கா³தி விஸேஸனேன யோ தத்த² ஸபா⁴க³பா⁴வோ, தங் நிவத்தேதி. ததா² பா⁴வாபா⁴வதோதி தஸ்மிங் ஹேதுபச்சயாகாரே ஸதி பா⁴வதோ, ஹேதுத⁴ம்மானங் ஹேதுபச்சயபா⁴வே அதி⁴பதிபச்சயாதீ³னந்தி அதி⁴பதிந்த்³ரியமக்³க³பச்சயானங். விஸபா⁴க³தா ஹேதுபச்சயஸ்ஸ. குஸலாதி³ஹேதூனந்தி குஸலாகுஸலகிரியாப்³யாகதஹேதூனங். ஹேதுபச்சயபா⁴வேதி ஹேதுபச்சயத்தே ஹேதுபா⁴வேன உபகாரகத்தே. விபாகபச்சயபா⁴வாபா⁴வதோதி விபாகபச்சயபா⁴வஸ்ஸ அபா⁴வதோ. ந ஹி விபாகானங் விபாகபச்சயதா அத்தி². விபாகஹேதூனங் இதரஹேதூஹி ஹேதுபச்சயதாய அத்தி² ஸபா⁴க³தாதி ஆஹ ‘‘ஹேதுவஜ்ஜான’’ந்தி. விபாகானங் விஸபா⁴க³தாய ப⁴விதப்³ப³ங், ந ஹி விபாகத⁴ம்மத⁴ம்மனேவவிபாகனவிபாகத⁴ம்மத⁴ம்மானங் விபாகேஹி ஸபா⁴க³தா அத்தி² ராஸந்தரபா⁴வதோதி அதி⁴ப்பாயோ. உப⁴யபச்சயஸஹிதேதி ஹேதுவிபாகபச்சயஸஹிதே. ஹேதுபச்சயபா⁴வே விபாகம்ஹீதி ஹேதுபச்சயபா⁴வேன வத்தமானே விபாகத⁴ம்மே. விபாகபச்சயத்தாபா⁴வாபா⁴வதோதி விபாகபச்சயபா⁴வாபா⁴வஸ்ஸ அபா⁴வதோ. ந ஹி விபாகோ விபாகஸ்ஸ விபாகபச்சயோ ந ஹோதி, தஸ்மா நத்தி² ஹேதுவிபாகபச்சயானங் விஸபா⁴க³தாதி அதி⁴ப்பாயோ.
இதா³னி வுத்தமேவத்த²ங் உதா³ஹரணேன ஸமத்தெ²ந்தோ ‘‘யதா² ஹீ’’திஆதி³மாஹ. ஹேதுஸஹஜாதபச்சயஸஹிதேதி ஹேதுபச்சயஸஹஜாதபச்சயஸஹிதே, உப⁴யபச்சயயுத்தேதி அத்தோ². ஹேதூனந்தி இத³ங் ‘‘ஸஹஜாதபச்சயத்தாபா⁴வோ’’தி இமினாபி ஸம்ப³ந்தி⁴தப்³ப³ங். ஹேதூனஞ்ஹி ஹேதுபச்சயஸஹிதே ராஸிம்ஹி ஹேதுபச்சயபா⁴வோ விய ஸஹஜாதபச்சயபா⁴வோபி அத்தீ²தி. தத்த² ஹேதுவஜ்ஜானங் ஸஹஜாதத⁴ம்மானங் ஹேதுத⁴ம்மஸ்ஸ ச ந ஸபா⁴க³தா வுச்சதி ஸஹஜாதபச்சயேன ஸபா⁴க³பா⁴வதோ. ஏவமிதா⁴பீதி யதா² ஹேதுஸஹஜாதபச்சயேஸு வுத்தப்பகாரேன நத்தி² விஸபா⁴க³தா, ஏவமிதா⁴பி ஏஸ நயோ விப்பயுத்தபச்சயேபீதி ய்வாயங் நயோ ஹேதுஸஹஜாதபச்சயேஸு விஸபா⁴க³தாபா⁴வோ வுத்தோ, ஏஸ நயோ ஹேதுஸஹிதே விப்பயுத்தபச்சயேபீதி அத்தோ². தத்தா²பி ஹி ‘‘ஹேதுவிப்பயுத்தபச்சயஸஹிதே ராஸிம்ஹீ’’திஆதி³ ஸக்கா யோஜேதுந்தி. பச்சுப்பன்னோ ஏவ பச்சயுப்பன்னோ, பச்சயோ பன அதீதோபி அனாக³தோபி காலவினிமுத்தோபி ஹோதீதி பச்சுப்பன்னக்க²ணே ஹேதுபச்சயபா⁴வே ஸஹஜாதாதி³பச்சயபா⁴வங் ஸந்தா⁴ய ததா²பா⁴வாபா⁴வவஸேன ஸபா⁴க³தாய வுச்சமானாய நானாக்க²ணிகானங் குஸலாதீ³னங் ஹேதூனங் விபாகானஞ்ச வஸேன விஸபா⁴க³தா தஸ்ஸேவ ஹேதுஸ்ஸ ந வத்தப்³பா³தி இமமத்த²ங் த³ஸ்ஸேதி ‘‘அபிசா’’திஆதி³னா.
அக்³க³ஹிதவிஸேஸதோ ஸாமஞ்ஞதோ விஸேஸோ ந ஸுவிஞ்ஞெய்யோ ஹோதீதி அதி⁴ப்பாயேனாஹ ‘‘குஸலா வீமங்ஸாதி⁴பதீதி ஏவங் வத்தப்³ப³’’ந்தி.
441-443. ‘‘இதரானி த்³வே லப⁴தீ’’தி ஏவங் வத்துங் ந ஸக்கா, ஹேதாதி⁴பதிது³கேஹி த³ஸ்ஸிதானி யானி ‘‘குஸலோ த⁴ம்மோ குஸலஸ்ஸ த⁴ம்மஸ்ஸ, குஸலோ த⁴ம்மோ அப்³யாகதஸ்ஸ, குஸலோ த⁴ம்மோ குஸலஸ்ஸ ச அப்³யாகதஸ்ஸ ச, அப்³யாகதோ த⁴ம்மோ அப்³யாகதஸ்ஸா’’தி சத்தாரி விஸ்ஸஜ்ஜனானி, தேஸு ஹேதுஸஹஜாதனிஸ்ஸயஅத்தி²அவிக³தஇந்த்³ரியமக்³க³பச்சயேஸு ஸம்பயுத்தபச்சயே பவிட்டே² ‘‘குஸலோ த⁴ம்மோ குஸலஸ்ஸ, அப்³யாகதோ த⁴ம்மோ அப்³யாகதஸ்ஸா’’தி இமானி த்³வே லப⁴தி. யங் ஸந்தா⁴ய அட்ட²கதா²யங் வுத்தங் ‘‘ஸசே தேஹி ஸத்³தி⁴ங்…பே॰… தானேவ த்³வே லப⁴தீ’’தி, தேஹி பன இதரானி நாம ‘‘குஸலோ த⁴ம்மோ அப்³யாகதஸ்ஸ, குஸலோ த⁴ம்மோ குஸலஸ்ஸ ச அப்³யாகதஸ்ஸ சா’’தி இமானி த்³வேபி ஸியுங். ந ஹி குஸலோ த⁴ம்மோ குஸலஸ்ஸ விப்பயுத்தபச்சயேன பச்சயோ ஹோதி. தேன வுத்தங் ‘‘இதரானி த்³வே லப⁴தீதி புரிமபாடோ²’’திஆதி³. இதரானி த்³வேதி வா அஞ்ஞானி த்³வே, யானி ஸம்பயுத்தபச்சயவஸேன த்³வே விஸ்ஸஜ்ஜனானி, விப்பயுத்தபவேஸே பன ததோ அஞ்ஞானி அஞ்ஞதா²பூ⁴தானி த்³வே விஸ்ஸஜ்ஜனானி. யானி ஸந்தா⁴ய வுத்தங் ‘‘குஸலோ அப்³யாகதஸ்ஸ, அப்³யாகதோ அப்³யாகதஸ்ஸாதி த்³வே லப⁴தீதி பட²ந்தீ’’தி. தேஸூதி ஊனதரக³ணனாஹேதூஸு விபாகஅஞ்ஞமஞ்ஞாதீ³ஸு.
அனாமட்ட²விபாகானீதி ந விபாகஹேதுரஹிதானி ஸாதா⁴ரணவஸேன வுத்தத்தா. தேன வுத்தங் அட்ட²கதா²யங் ‘‘ஸாமஞ்ஞதோ நவன்னம்பி ஹேதூனங் வஸேன வுத்தானீ’’தி, ‘‘விபாகஹேதுபி லப்³ப⁴தீ’’தி ச.
தத்தா²தி பஞ்சமக⁴டனதோ பட்டா²ய பஞ்சஸு க⁴டனேஸு. தேன விபாகேன ஸஹ, ஸமங் வா உட்டா²னங் ஏதஸ்ஸாதி ஸமுட்டா²னந்தி அயம்பி அத்தோ² ஸம்ப⁴வதீதி வுத்தங் ‘‘படிஸந்தி⁴யங் கடத்தாரூபம்பி தங்ஸமுட்டா²னக்³க³ஹணேனேவ ஸங்க³ண்ஹாதீ’’தி. ஏஸேவ நயோதி இமினா கடத்தாரூபம்பி தங்ஸமுட்டா²னக்³க³ஹணேனேவ ஸங்க³ண்ஹாதீதி இமமேவத்த²ங் அதிதி³ஸதி.
ஏவம்பீதி ‘‘ஏதேஸு பனா’’திஆதி³னா ஸங்கே²பதோ வுத்தப்பகாரேபீதி அத்தோ². தேனாஹ ‘‘ஏதேஸு பன…பே॰… வுத்தனயேனபீ’’தி. யோ யோ பச்சயோதி யோ யோ ஹேதுஆதி³பச்சயோ மூலபா⁴வேன டி²தோ பரேஸங் பச்சயானங். தப்பச்சயத⁴ம்மானந்தி தேஹி ஹேதுஆதி³பச்சயேஹி பச்சயபூ⁴தானங் ஹேதுஆதி³த⁴ம்மானங். நிரவஸேஸஊனஊனதரஊனதமலாப⁴க்கமேனாதி தே த⁴ம்மா யேஸு விஸ்ஸஜ்ஜனேஸு யதா²ரஹங் நிரவஸேஸா லப்³ப⁴ந்தி ‘‘நிரவஸேஸலாபே⁴ ச…பே॰… வேதி³தப்³போ³’’தி.
ஹேதுமூலகங் நிட்டி²தங்.
445. பஞ்சமே ஏகந்தி ஸனிஸ்ஸயதோ அப்³யாகதமூலங் அகுஸலந்தி இத³ங் ஸந்தா⁴யாஹ ‘‘வத்து²வஸேன ஸனிஸ்ஸயங் வக்க²தீ’’தி. ந இத³ந்தி இத³ங் சதுத்த²ங் க⁴டனங் லப்³ப⁴மானஸ்ஸபி வத்து²ஸ்ஸ வஸேன க⁴டனங் ந ஹோதி தஸ்ஸ வக்க²மானத்தா, தஸ்மா ‘‘ஆரம்மணவஸேனேவா’’தி ஏகங்ஸோ க³ஹிதோதி அத்த²யோஜனா.
446. ஸஹஜாதபுரேஜாதா ஏகோ நிஸ்ஸயபச்சயோதி இமினா ஸதிபி பச்சயத⁴ம்மபே⁴தே³ பச்சயபா⁴வபே⁴தோ³ நத்தீ²தி த³ஸ்ஸேதி, ததா² ‘‘அத்தி²பச்சயோ’’தி இமினாபி. அவிக³தபச்சயோபெத்த² அத்தி²பச்சயேனேவ ஸங்க³ஹிதோதி த³ட்ட²ப்³போ³. ‘‘அத்தி²அவிக³தபச்சயோ’’தி பாடோ². ஸஹஜாதாரம்மணாதி⁴பதி பன ந கேவலங் பச்சயத⁴ம்மப்பபே⁴தோ³வ, அத² கோ² பச்சயபா⁴வபே⁴தோ³பி அத்தே²வாதி ஆஹ ‘‘ஏவங்…பே॰… அபா⁴வதோ’’தி. வுத்தமேவத்த²ங் பாகடதரங் ‘‘நிஸ்ஸயபா⁴வோ ஹீ’’திஆதி³ வுத்தங். தத்த² ஸஹஜாதபுரேஜாதனிஸ்ஸயாதீ³னந்தி ஸஹஜாதனிஸ்ஸயபுரேஜாதனிஸ்ஸயாதீ³னங். ஆதி³-ஸத்³தே³ன ஸஹஜாதபுரேஜாதஅத்தி²அவிக³தபா⁴வே ஸங்க³ண்ஹாதி. ந பனேவந்திஆதி³னா வுத்தமேவத்த²ங் விவரந்தோ ‘‘ஸஹஜாதோ ஹீ’’திஆதி³மாஹ. பி⁴ன்னஸபா⁴வாதி ஸமானேபி அதி⁴பதிஸத்³த³வசனீயபா⁴வே பச்சயபா⁴வவிஸிட்டே²ன ஸபா⁴வேன பி⁴ன்னஸபா⁴வா, ந ஹேதுபச்சயாத³யோ விய ஸபா⁴வமத்தேன. தேனேவாதி பி⁴ன்னஸபா⁴வத்தா ஏவ. அஞ்ஞதா² ‘‘குஸலோ குஸலஸ்ஸ ஸஹஜாதவஸேன, அப்³யாகதோ ஆரம்மணவஸேன அதி⁴பதிபச்சயேன பச்சயோ ஹோதீ’’தி தது³ப⁴யங் ஏகஜ்ஜ²ங் கத்வா வத்தப்³ப³ங் ஸியா, ந ச வுத்தந்தி த³ஸ்ஸெந்தோ ஆஹ ‘‘பஞ்ஹாவாரவிப⁴ங்கே³…பே॰… ந வுத்த’’ந்தி.
447-452. ஸாதா⁴ரணவஸேனாதி அதி⁴பதிந்த்³ரியபா⁴வஸாமஞ்ஞேன. ததா² சேவ ச² க⁴டனானி யோஜெத்வா த³ஸ்ஸேதி ‘‘அதி⁴பதீ’’திஆதி³னா. த்³வே பச்சயத⁴ம்மாதி வீரியவீமங்ஸானங் வஸேன த்³வே பச்சயத⁴ம்மா, ஏகோயேவ சித்தாதி⁴பதிவஸேன. ஸமக்³க³கானி புப்³பே³ வத்தப்³பா³னி ஸியுங் அதி⁴பதிபடிபாடியாதி அதி⁴ப்பாயோ. பட²மஞ்ஹி வீரியாதி⁴பதி பச்சா² சித்தாதி⁴பதீதி. தேஸங் ஆஹாரமக்³க³பச்சயானங் பச்சா² வுத்தானி ஸமக்³க³கானி. ஸதி³ஸத்தாதி இத³ங் பரதோ ‘‘ஹேதுவஸேன வுத்தக⁴டனேஹி ஸதி³ஸத்தா’’திஆதி³வசனங் ஸந்தா⁴ய வுத்தங்.
457-460. து³மூலகந்தி குஸலாப்³யாகதமூலகங். தங் குஸலமூலகேஸு கஸ்மா வுத்தந்தி சோத³னாயங் ஆஹ ‘‘அப்³யாகதஸஹிதஸ்ஸ குஸலஸ்ஸ பச்சயபா⁴வத³ஸ்ஸனவஸேனா’’தி. எத்தா²தி அனுலோமக³ணனே. யதா²வுத்தேஸூதி ‘‘ஸஹஜாதஅஞ்ஞமஞ்ஞனிஸ்ஸயவிபாகஸம்பயுத்தவிப்பயுத்தஅத்தி²அவிக³தமூலகேஸூ’’தி ஏவங் வுத்தேஸு ஸஹஜாதாதி³மூலகேஸு. அத்தி²அவிக³தமூலகவஜ்ஜேஸூதி அத்தி²அவிக³தமூலகானி ட²பெத்வா அவஸேஸேஸு ஆஹாரேன ஆஹாரபச்சயேன க⁴டனானி ந யோஜிதானீதி ஸம்ப³ந்தோ⁴. அதி⁴பதிந்த்³ரியேஹி ச நிஸ்ஸயாதி³வஜ்ஜேஸு ஸஹஜாதாதீ³ஸு க⁴டனானி ந யோஜிதானீதி யோஜனா. தேஸூதி ஹேதுகம்மஜா²னமக்³கே³ஸு ஆஹாரே அதி⁴பதிந்த்³ரியேஸு ச தங்தங்க⁴டனவஸேன யதா²வுத்தேஸு யோஜியமானேஸு. தேனாதி ஹேதுஆதி³அரூபத⁴ம்மானங்யேவ லப்³ப⁴னதோ. தேஹி க⁴டனானீதி ஹேதுஆதீ³ஹி யோஜியமானானி க⁴டனானி. ரூபமிஸ்ஸகத்தாபா⁴வேனாதி இத³ங் வுத்தஸதி³ஸதாய காரணவசனங். கஸ்மா பனெத்த² அத்தி²அவிக³தமூலகானி நிஸ்ஸயவிப்பயுத்தஅத்தி²அவிக³தானி ‘‘அத்தி²அவிக³தேஹி பனா’’திஆதி³. நிஸ்ஸயாதீ³ஹி யோஜியமானானி அதி⁴பதிந்த்³ரியானி ரூபமிஸ்ஸகானி ஹொந்தீதி ந வுத்தானீதி ஸம்ப³ந்தோ⁴. யதி³ ஏவங் கஸ்மா அத்தி²அவிக³தமூலகேஸு ஆஹாரேன, நிஸ்ஸயாதி³மூலகேஸு ச அதி⁴பதிந்த்³ரியேஹி யோஜனா கதாதி சோத³னங் ஸந்தா⁴யாஹ ‘‘அதி⁴பதாஹாரிந்த்³ரியமூலகேஸூ’’திஆதி³.
473-477. ஏதி³ஸேஸு டா²னேஸு க²ந்த⁴-ஸத்³தோ³ அரூபெஸ்வேவ நிருள்ஹோதி கத்வா வுத்தங் ‘‘ந பவத்தே விய க²ந்தா⁴யேவ பச்சயுப்பன்னபா⁴வேன க³ஹேதப்³பா³’’தி. கடத்தாரூபம்பி பன லப்³ப⁴தீதி இமினா ‘‘ஏகக்க²ணிககம்மவஸேன வுத்தானீ’’தி வசனங் படிக்கி²பதி. யமத்த²ங் ஸந்தா⁴ய ‘‘கஸ்மா ந வுத்த’’ந்தி வுத்தங், தங் பாகடதரங் கரொந்தோ ‘‘நனூ’’திஆதி³ங் வத்வா புன தங் உதா³ஹரணேன விபா⁴வேதுங் ‘‘யதா²சா’’திஆதி³ வுத்தங். ஆரம்மணனிஸ்ஸயபச்சயபா⁴வேனாதி ஆரம்மணபச்சயபா⁴வேன நிஸ்ஸயபச்சயபா⁴வேன ச. கம்மஸ்ஸ ச பச்சயபா⁴வோ பாகடோயேவாதி ஆஹ ‘‘கம்மம்பி ஆரம்மணபச்சயபா⁴வேன வத்தப்³ப³’’ந்தி. த்³வின்னங் பச்சயபா⁴வானந்தி கம்மாரம்மணபச்சயபா⁴வானங். அஞ்ஞமஞ்ஞபடிக்கே²பதோதி இமினா த்³வின்னங் பச்சயபா⁴வானங் பி⁴ன்னத்தா பவத்திஆகாரஸ்ஸ ஏகக்க²ணே ஏகஸ்மிங் பச்சயத⁴ம்மே அயுஜ்ஜமானதங் த³ஸ்ஸேதி. யதா²த³ஸ்ஸிதஸ்ஸ நித³ஸ்ஸிதப்³பே³ன அஸமானதங் த³ஸ்ஸெந்தோ ‘‘பச்சுப்பன்னஞ்ஹி…பே॰… யுத்தங் வத்து’’ந்தி ஆஹ. கம்மங் பனாதிஆதி³னா கம்மாரம்மணபச்சயானங் ‘‘ஏஸ ச ஸபா⁴வோ’’திஆதி³மாஹ. தத்த² வத்தமானானந்தி பச்சுப்பன்னானங். யந்தி இத³ங் ‘‘வத்தப்³ப³தா’’தி இமினா ஸம்ப³ந்தி⁴யமானங் ‘‘யா’’தி இத்தி²லிங்க³வஸேன விபரிணாமேதப்³ப³ங். யதா²திஆதி³னா தமேவத்த²ங் உதா³ஹரணத³ஸ்ஸனேன விபா⁴வேதி.
478-483. யங் விஞ்ஞாணங் அதி⁴பதிபச்சயோ ந ஹோதி, தங் அனாமட்டா²தி⁴பதிபா⁴வங் த³ட்ட²ப்³ப³ங். வத்து²ஸ்ஸ வஸேனாதி ஹாபேதப்³ப³ஸ்ஸ வத்து²ஸ்ஸ வஸேன.
484-495. அரூபிந்த்³ரியானி ‘‘சக்கா²தீ³னி ச பன சக்கு²விஞ்ஞாணாதீ³னங் லப்³ப⁴ந்தீ’’தி. தங்ஸமானக³திகாதி வீரியேன ஸமானக³திகா மக்³க³பச்சயதாய.
511-514. விப்பயுத்தமூலகே ‘‘த³ஸமே குஸலாத³யோ சித்தஸமுட்டா²னான’’ந்தி இத³ங் பவத்திவஸேன அட்ட²கதா²யங் வுத்தந்தி ஆஹ ‘‘படிஸந்தி⁴யங் பன ‘க²ந்தா⁴ கடத்தாரூபானங் வத்து² ச க²ந்தா⁴ன’ந்தி இத³ம்பி லப்³ப⁴தீ’’தி. தஸ்ஸ த³ஸ்ஸனவஸேனாதி தஸ்ஸ வத்து²ஸ்ஸ த³ஸ்ஸனவஸேன, ந அனவஸேஸதோ பச்சயத⁴ம்மஸ்ஸ த³ஸ்ஸனவஸேன. தேனாஹ ‘‘க²ந்தா⁴ ச வத்து²ஸ்ஸாதி இத³ம்பி பன லப்³ப⁴தேவா’’தி. ந வஜ்ஜேதப்³பா³னீதி தேஸம்பி பச்சயுப்பன்னபா⁴வேன யோஜேதப்³ப³த்தா.
515-518. அரூபவத்தா²ரம்மணமஹாபூ⁴தஇந்த்³ரியாஹாரானங் பச்சயத⁴ம்மானந்தி அத்தோ². ‘‘ஆஹாரிந்த்³ரியபச்சயா சா’’திபி பன வத்தப்³ப³ங். கஸ்மா? ந ஹி இந்த்³ரியாஹாரானங் வஸேன ஸஹஜாதாத³யோ லப்³ப⁴ந்தி, இந்த்³ரியாஹாரானங் பன வஸேன இந்த்³ரியாஹாரபச்சயாவ லப்³ப⁴ந்தி. ‘‘ஸஹஜாதங் புரேஜாதங் பச்சா²ஜாதங் ஆஹாரங் இந்த்³ரிய’’ந்தி ஹி உத்³தி³ஸித்வா அத்தி²பச்சயோ விப⁴த்தோதி. கேசி பனெத்த² ‘‘ஆஹாரக்³க³ஹணேன கப³ளீகாரோ ஆஹாரோவ க³ஹிதோ, இந்த்³ரியக்³க³ஹணேன ச ரூபஜீவிதிந்த்³ரியமேவ, ஸேஸாஹாரிந்த்³ரியானி ஸஹஜாதாதீ³ஸ்வேவ அந்தோக³தா⁴னி கதானி. யானி தத³ந்தோக³தா⁴னி, தே ஸந்தா⁴ய அட்ட²கதா²யங் ‘அரூபவத்தா²ரம்மணமஹாபூ⁴தஇந்த்³ரியாஹாரானங் வஸேனா’தி எத்த² இந்த்³ரியாஹாரக்³க³ஹணங் கதந்தி ‘ஸஹஜாதபுரேஜாதபச்சா²ஜாதபச்சயா லப்³ப⁴ந்தீ’தி வுத்த’’ந்தி வத³ந்தி.
தத்த² ததோதி நவமதோதி அத்தோ², ந த³ஸமதோதி அதி⁴ப்பாயோ. ந ஹி ஏகாத³ஸமே அதி⁴பதி அத்தீ²தி. ததா² சுத்³த³ஸமேதி எத்த² ததா²-ஸத்³தே³ன வத்து²க்³க³ஹணேன சக்கா²தி³வத்தூ²னிபி க³ஹிதானீதி இமமத்த²ங் உபஸங்ஹரதி. ததே³வாதி ஆரம்மணமேவ.
519. ஸஹஜாதானி வியாதி ஸஹஜாதபச்சயஸஹிதானி விய க⁴டனானி. ஸஹஜாதேனாதி ஸஹஜாதபச்சயேன. தானீதி ‘‘பகிண்ணகக⁴டனானீ’’தி வுத்தக⁴டனானி. யானி ஹி ஸஹஜாதபச்சயேன ந யோஜிதானி, தானெத்த² பகிண்ணகக⁴டனானீதி வுத்தானி. புரேஜாத…பே॰… வஸேனாதி எத்த² அயங் யோஜனா – புரேஜாதஸ்ஸ பச்சா²ஜாதஸ்ஸ ஆஹாரஸ்ஸ இந்த்³ரியஸ்ஸ ச ஸஹஜாதேன அஞ்ஞமஞ்ஞஞ்ச ஸாமஞ்ஞவஸேன, தேஸங்யேவ ஸஹஜாதேன அஞ்ஞமஞ்ஞஞ்ச அஸாமஞ்ஞவஸேன சாதி வுத்தங் ஹோதி. யதா² புரேஜாதஸ்ஸ பச்சா²ஜாதஸ்ஸ ச ஸஹஜாதேன அஸாமஞ்ஞங் பி⁴ன்னஸபா⁴வத்தா, ததோ ஏவ ஆஹாரிந்த்³ரியானம்பி தேன அஸாமஞ்ஞங், ஏவங் புரேஜாதாதீ³னங் சதுன்னம்பி அஞ்ஞமஞ்ஞங் அஸாமஞ்ஞங் பி⁴ன்னஸபா⁴வத்தா. ஏவங் அஸாமஞ்ஞவஸேன அஸமானதாவஸேன யதா²வுத்தானி க⁴டனானி விப்பகிண்ணானி. யதா² பன ஸஹஜாதபச்சயத⁴ம்மா அரூபக்க²ந்தா⁴த³யோ தேனேவ ஸஹஜாதபச்சயதாஸங்கா²தேன மிதூ²னங் ஸமானபா⁴வேன அஞ்ஞேஹி அஸங்கிண்ணா அத்தனோ பச்சயுப்பன்னானங் பச்சயோ ஹொந்தீதி அஸாமஞ்ஞவஸேன தேஸங் பவத்தி, ஏவங் புரேஜாதாதி³பச்சயத⁴ம்மாபீதி தேஸங் ஸஹஜாதேன அஞ்ஞமஞ்ஞஞ்ச யதா²வுத்தஸ்ஸ ஸாமஞ்ஞஸ்ஸ அஸாமஞ்ஞஸ்ஸ ச வஸேன தானி க⁴டனானி விப்பகிண்ணானீதி பகிண்ணகானி வுத்தானி. ஏவங் ஸந்தே ஸஹஜாதானம்பி க⁴டனானங் பகிண்ணகபா⁴வோ ஆபஜ்ஜதீதி? நாபஜ்ஜதி, தேஸங் ஸஹஜாததாய ஏவ அவிப்பகிண்ணபா⁴வஸித்³தி⁴தோ. தேன வுத்தங் ‘‘ஸஹஜாதங் அக்³க³ஹெத்வா வுத்தானி பகிண்ணகானி நாமா’’தி.
தானீதி பகிண்ணகக⁴டனானி. குஸலவிபாகாதி குஸலா ச விபாகா ச, யே அபி⁴ன்னலக்க²ணா ஹுத்வா குஸலஸபா⁴வா விபாகஸபா⁴வா சாதி அத்தோ². ஏவங்ஸபா⁴வஞ்ச ஏகங் அஞ்ஞிந்த்³ரியமேவாதி ‘‘இத³ங்…பே॰… லப்³ப⁴தீ’’தி. நனு ச ஸத்³தி⁴ந்த்³ரியாதி³வஸேனபி அயமத்தோ² லப்³ப⁴தீதி? தேஸங் கிரியஸபா⁴வதாபி அத்தே²வாதி. து³க்க²ந்தி சேதஸிகது³க்க²ங். தேனாஹ ‘‘அகுஸலமேவா’’தி. விபாகஸ்ஸ து³க்க²ஸ்ஸாதி யோஜனா. தேன வுத்தங் ‘‘அஜா²னங்க³த்தா’’தி. அகுஸலவிபாககிரியாதி விசிகிச்சா²சித்தபஞ்சவிஞ்ஞாணகிரியாமனோதா⁴தூஸு பவத்தனதோ அகுஸலவிபாககிரியாவ ஹோதி சித்தட்டி²தீதி ‘‘அகுஸலஸ்ஸ…பே॰… லப்³பெ⁴ய்யா’’தி. இமஸ்மிங் குஸலத்திகே விபாகோ விபாகாப்³யாகதமிச்சேவ க³ய்ஹதி, ந அகுஸலாதி³பதே³ஹி விஸேஸெத்வாதி இமமத்த²ங் த³ஸ்ஸெந்தோ ‘‘குஸலவிபாகா…பே॰… நத்தீ²’’தி ஆஹ.
பஞ்ஹாவாரஸ்ஸ க⁴டனே அனுலோமக³ணனா நிட்டி²தா.
பச்சனீயுத்³தா⁴ரவண்ணனா
527. நஹேதுபச்சயேனாதி எத்த² ந-காரோ அஞ்ஞத்தோ²தி த³ஸ்ஸெந்தோ ‘‘ஹேதுபச்சயதோ அஞ்ஞேன பச்சயேனா’’தி ஆஹ. அக்³க³ஹிதக்³க³ஹணேனாஹி ஸஹஜாதாதி³ஸங்க³ஹவஸேன அக்³க³ஹிதானங் க³ஹணேன. அட்ட² ஹொந்தீதி இமிஸ்ஸா பாளியா ஆக³தா ஆரம்மணாத³யோ அட்ட² பச்சயா ஹொந்தி. தேஸூதி அட்ட²ஸு பச்சயேஸு. தீஹீதி ஆரம்மணஸஹஜாதஉபனிஸ்ஸயபச்சயேஹி. த்³வீஹீதி ஆரம்மணபச்சயஉபனிஸ்ஸயபச்சயேஹி. தஸ்மிங் தஸ்மிங் பச்சயேதி தஸ்மிங் தஸ்மிங் ஹேதுஆதி³கே பச்சயே. ததோ ஹேதுஆதி³பச்சயதோ. யதா²யோக³ங் யோஜேதப்³பா³தி யஸ்மிங் பச்சயே பச்சனீயதோ டி²தே யே பச்சயா அனுலோமதோ யோஜனங் லப⁴ந்தி, தே யோஜேதப்³பா³தி அத்தோ².
த்³வின்னந்தி அனந்தரூபனிஸ்ஸயஸ்ஸ பகதூபனிஸ்ஸயஸ்ஸாதி இமேஸங் த்³வின்னங். வத்து²புரேஜாதஸ்ஸ வஸேன புரேஜாதங் ஆரம்மணபுரேஜாதஸ்ஸ ஆரம்மணேன ஸங்க³ஹிதத்தா. அஞ்ஞிஸ்ஸா சேதனாயாதி நானாக்க²ணிககம்மபச்சயபா⁴வேனேவ பவத்தாய சேதனாய. அரூபாஹாரா அபரிச்சத்தஸஹஜாதபா⁴வா ஏவ ‘‘ஸஹஜாததோ அஞ்ஞஸ்ஸ கப³ளீகாராஹாரஸ்ஸ வஸேன ஆஹாரோ’’தி. ஸஹஜாததோ அஞ்ஞஸ்ஸாதி ச இத³ங் அரூபாஹாரனிவத்தனத்த²ங் வுத்தங், ந கப³ளீகாராஹாரவிஸேஸனிவத்தனத்த²ங் தாதி³ஸஸ்ஸேவ தஸ்ஸ அபா⁴வதோ. ந ஹி ரூபாஹாரோ ஸஹஜாதபச்சயோ ஹோதி, நாபி புரேஜாதபச்சயோ ஹோதி ‘‘ரூபாஹாரோ…பே॰… ஆஹாரபச்சயோவ ஹோதீ’’தி. ஸஹஜாததோ புரேஜாததோ ச அஞ்ஞஸ்ஸ ரூபஜீவிதிந்த்³ரியஸ்ஸாதி எத்த² ரூபாஹாரே வுத்தனயேனேவ அத்தோ² வேதி³தப்³போ³.
ஏவஞ்ச கத்வாதி புரிமபுரிமேஹி அஸங்க³ஹிதஸங்க³ண்ஹனவஸேன பச்சி²மபச்சி²மானங் க³ஹிதத்தா ததா² ரூபாஹாரஸ்ஸ ஜீவிதிந்த்³ரியஸ்ஸ ச வஸேன இத⁴ ஆஹாரிந்த்³ரியபச்சயானங் க³ஹிதத்தாதி அத்தோ², அஞ்ஞதா² ‘‘ஆஹாரபச்சயேன பச்சயோ, இந்த்³ரியபச்சயேன பச்சயோ’’தி வத்தப்³ப³ங் ஸியாதி அதி⁴ப்பாயோ. தேனேவாஹ ‘‘ஆரம்மண…பே॰… இச்சேவ வுத்த’’ந்தி. தத³ஞ்ஞாபா⁴வாதி ததோ ஆரம்மணாதி³பச்சயதோ அஞ்ஞஸ்ஸ இதா⁴தி⁴ப்பேதகம்மாதி³பச்சயஸ்ஸ குஸலே அபா⁴வா. தஸ்மாதி யஸ்மா ஆரம்மணதோ அஞ்ஞேஸங் த்³வின்னங் வஸேன உபனிஸ்ஸயோ வுத்தோ, தஸ்மா ‘‘ஆரம்மணாதி⁴பதி ஆரம்மணபச்சயே ஸங்க³ஹங் க³ச்ச²தீ’’தி வத்தப்³ப³ங், ந ஆரம்மணூபனிஸ்ஸயேதி அதி⁴ப்பாயோ. யதி³ ஏவங் கஸ்மா பரித்தத்திகபஞ்ஹாவாரபச்சனீயே ஆரம்மணங் ந வுத்தங். உபனிஸ்ஸயேன ஹி அஸங்க³ஹிதத்தே தங் வத்தப்³ப³மேவ ஸியாதி சோத³னங் ஸந்தா⁴யாஹ ‘‘யங் பனா’’திஆதி³. தத்த² புரிமேஹி அஸங்க³ஹிதவஸேன வுத்தானந்தி புரிமேஹி பச்சயேஹி அஸங்க³ஹிதவஸேன வுத்தானங் பச்சி²மானங் பச்சயானங். ஸங்க³ஹிதவிவஜ்ஜனாபா⁴வதோதி அத்தனா ஸமானலக்க²ணதாய ஸங்க³ஹிதஸ்ஸ பச்சயஸ்ஸ விவஜ்ஜனாபா⁴வதோ, விவஜ்ஜனே காரணங் நத்தீ²தி அத்தோ². உபனிஸ்ஸயதோ அஞ்ஞாரம்மணாபா⁴வதோதி அப்பமாணோ த⁴ம்மோ அப்பமாணஸ்ஸ த⁴ம்மஸ்ஸ ஆரம்மணங் ஹொந்தோ ஆரம்மணூபனிஸ்ஸயோவ ஹோதி ஆரம்மணாதி⁴பதிபா⁴வதோதி அத்தோ². யதா² ஆரம்மணே க³ஹிதே ஆரம்மணூபனிஸ்ஸயோ க³ஹிதோவ ஹோதி ப³லவாரம்மணபா⁴வதோ ‘‘ந பன ஆரம்மணூபனிஸ்ஸயஸ்ஸ ஆரம்மணே அஸங்க³ஹிதத்தா’’தி.
பச்சா²ஜாதஆஹாரானந்தி அத்தனோ பச்சயுப்பன்னதோ புரேஜாதகாயதோ பச்சா²ஜாதானங் அரூபாஹாரானங். தே ஹி அத்தனா ஸஹஜாதஅரூபத⁴ம்மானங் தங்ஸமுட்டா²னரூபத⁴ம்மானம்பி ஸஹஜாதஅத்தி²பச்சயா ஹொந்தி, புரேஜாதானங் பன வத்தூ²னங் பச்சா²ஜாதஅத்தி²பச்சயோ. பச்சா²ஜாதிந்த்³ரியானந்தி பச்சா²ஜாதானங் அரூபிந்த்³ரியானங். ஸேஸங் ஆஹாரே வுத்தனயேன யோஜேதப்³ப³ங். யஸ்மா ஏதே ஆஹாரிந்த்³ரியா யஸ்மிங் க²ணே புரேஜாதஅத்தி²பச்சயங் லப⁴ந்தி, தஸ்மிங்யேவ க²ணே தங்தங்பச்சயுப்பன்னானங் ஸஹஜாதஅத்தி²பச்சயோ பச்சா²ஜாதஅத்தி²பச்சயோ ச ஹொந்தி, தஸ்மா வுத்தங் ‘‘ஸஹாபி அத்தி²அவிக³தபச்சயபா⁴வோ ஹோதீ’’தி. திண்ணந்தி ஸஹஜாதாதீ³னங் திண்ணங். ச²ஹி பே⁴தே³ஹீதி விஸுங் க³ஹிதேஹி ஸஹஜாதாதீ³ஹி பஞ்சஹி யதா²ரஹங் ஏகஜ்ஜ²ங் க³ஹிதபே⁴தே³ன சாதி ச²ஹி அத்தி²பச்சயபே⁴தே³ஹி. ஏகேகங் ஸங்க³ஹெத்வாதி அத்தி²பச்சயலக்க²ணங் அவிக³தபச்சயலக்க²ணஞ்ச விஸுங் விஸுங் ச²ஹி பே⁴தே³ஹி ஸங்க³ஹெத்வா வுத்தங்.
அஜ்ஜ²த்திகபா³ஹிரபே⁴த³தோதி வத்தப்³ப³ங் சக்கா²தீ³னங் ஜீவிதிந்த்³ரியஸ்ஸ ச அதி⁴ப்பேதத்தா, ஸபரஸந்தானிகானஞ்ச இந்த்³ரியானங் அனதி⁴ப்பேதத்தா. நிஸ்ஸயபுரேஜாதவிப்பயுத்தஅத்தி²அவிக³தானங் புரேஜாதபூ⁴தானந்தி அதி⁴ப்பாயோ. தேஸஞ்ஹி புரேஜாதே ஸங்க³ஹோ. ததே³கதே³ஸஸ்ஸாதி ஆரம்மணேகதே³ஸஸ்ஸ, ஆரம்மணாதி⁴பதிஆரம்மணூபனிஸ்ஸயானந்தி அத்தோ². தேஸந்தி நிஸ்ஸயாதீ³னங். உபனிஸ்ஸயாதீ³ஸூதி உபனிஸ்ஸயபுரேஜாதபச்சயாதீ³ஸு. தங் பன புரேஜாதபூ⁴தங் ஆரம்மணங். தத்தா²தி உபனிஸ்ஸயபச்சயஸங்க³ஹே. யதா²வுத்தனயோ செத்த² ஏகந்தேன க³ஹேதப்³போ³தி த³ஸ்ஸேதுங் ‘‘அத² பனா’’திஆதி³ வுத்தங்.
ஏவ-ஸத்³தோ³ ஆனெத்வா யோஜேதப்³போ³, அஞ்ஞதா² தேஸு பஞ்ஹேஸு ஏகஸபா⁴வதோவ பச்சயஸ்ஸ ஆக³மனங் வுத்தங் ஸியா. தேனாதி ‘‘ஏகோவா’’தி அவதா⁴ரணேன அக்³க³ஹிதேன. தேஸூதி ஸஹஜாதபுரேஜாதபச்சயேஸு. உக்கட்ட²வஸேனாதி ‘‘ஏகோ த்³வே’’திஆதி³னா வுத்தஉக்கங்ஸவஸேன. தே தே பச்சயே ஸங்க³ஹெத்வாதி தே ஹேதுஆதி³பச்சயே ஸஹஜாதாதி³பச்சயேஹி ஸங்க³ஹெத்வா. த³ஸ்ஸிதபச்சயபரிச்சே²தோ³தி ஸோளஸாதி³பே⁴தே³ன ஸங்க³ஹெத்வா த³ஸ்ஸிதபச்சயபரிச்சே²தோ³.
பபே⁴த³பரிஹானீஸூதி நஹேதுபச்சயாதி இமினா ஹேதுபச்சயதோ அஞ்ஞே பச்சயா க³ஹிதாதி கத்வா வுத்தங் ‘‘நஹேதுபச்சயாதி எத்த² லப்³ப⁴மானபச்சயே ஸந்தா⁴ய வுத்த’’ந்தி. ஏவஞ்ச கத்வாதி ஸப்³ப³பச்சனீயஸாதா⁴ரணலக்க²ணவஸேன வுத்தத்தா ஏவ ந வத்தப்³ப³ங் ஸியா, ந ஹி ஹேதுபச்சயே பச்சனீயதோ டி²தே ஹேதுத⁴ம்மோ ஹேதுஸ்ஸ த⁴ம்மஸ்ஸ ஸஹஜாதபச்சயேன பச்சயோதி ஸக்கா வத்துங். வீஸதி பச்சயாதி ஹேதுபச்சயேன ஸத்³தி⁴ங் வீஸதி பச்சயா. பரிஹானீயங் வித்தா²ரகத²ங் த³ஸ்ஸெந்தோதி யோஜனா.
528. தேஹி தேஹி பச்சயேஹீதி ஸஹஜாதபச்சயாதீ³ஹி தேஹி தேஹி ஸங்கா³ஹகபூ⁴தேஹி பச்சயேஹி. தே தே பச்சயாதி ஸங்க³ஹேதப்³பா³ அஞ்ஞமஞ்ஞபச்சயாத³யோ ஹேதுபச்சயாத³யோ வா தே தே பச்சயா. அஞ்ஞேஸங் அபா⁴வங் ஸந்தா⁴ய வுத்தங், ந தேஸங் ஸப்³பே³ஸங் ஸம்ப⁴வந்தி அதி⁴ப்பாயோ. தேனாஹ ‘‘ந ஹீ’’திஆதி³. தத்த² த்³வேயேவாதி ஆரம்மணாதி⁴பதிங் அபனெத்வா ஆஹ. அப்³யாகதஸ்ஸபீதி பி-ஸத்³தே³ன ந கேவலங் குஸலஸ்ஸேவ, அத² கோ² அப்³யாகதஸ்ஸபீதி குஸலங் ஸம்பிண்டே³தி.
530. தேன ஸத்³தி⁴ந்தி வத்து²னா ஸத்³தி⁴ங். ஸுத்³தா⁴னந்தி கேவலானங் வத்து²னா வினா ச க³ஹிதானங் குஸலக்க²ந்தா⁴னங். யதி³பி வத்து²னா ஸத்³தி⁴ங் ஸஹஜாதட்டோ² நத்தி², நிஸ்ஸயாதி³பா⁴வோ பன அத்தே²வாதி த³ஸ்ஸெந்தோ ‘‘வத்து²னா பனா’’திஆதி³மாஹ.
ஸஹஜாதபுரேஜாதபச்சா²ஜாதஆஹாரிந்த்³ரியானங் அத்தி²பச்சயேன ஸங்க³ஹேதப்³ப³த்தா ஸஹஜாதாதீ³ஹி ஸங்க³ஹேதப்³பா³னங் தங்ஸங்க³ஹோ ஸுகரோதி த³ஸ்ஸேதுங் உபனிஸ்ஸயேன ஸங்க³ஹேதப்³பா³னங் ஸங்க³ஹோ வுத்தனயோ ஏவாதி வுத்தங் ‘‘சதூஸு ஸப்³ப³பச்சயே ஸங்க³ண்ஹித்வா’’தி. கம்மங் பன ஸஹஜாதூபனிஸ்ஸயேஹி அஸங்க³ஹேதப்³ப³தாபி அத்தீ²தி ஸரூபதோ க³ஹிதங், அஞ்ஞதா² ‘‘தீஸு பச்சயேஸூ’’தி வத்தப்³ப³ங் ஸியா. மிஸ்ஸகாமிஸ்ஸகஸ்ஸாதி ஸஹஜாதபுரேஜாதாதி³பா⁴வேஹி மிஸ்ஸகஸ்ஸ ததா² அமிஸ்ஸகஸ்ஸ ச. வுத்தமேவத்த²ங் வித்தா²ரதோ த³ஸ்ஸேதுங் ‘‘ந ஹீ’’திஆதி³ வுத்தங். தேனாதி அத்தி²பச்சயவிபா⁴க³ஸங்கா³ஹகானங் ஸஹஜாதாதீ³னங் க³ஹணேன. ஸப்³ப³பச்சயானங்…பே॰… ஹோதீதி இமினா ‘‘இமஸ்மிங் பன பச்சயுத்³தா⁴ரே’’திஆதி³னா வுத்தோபி பச்சயஸங்க³ஹோ இத⁴ அத்த²தோ த³ஸ்ஸிதோயேவாதி இமமத்த²ங் த³ஸ்ஸேதி.
நிஸ்ஸயோ கஸ்மா ந வுத்தோ? ஸஹஜாதனிஸ்ஸயோ புரேஜாதனிஸ்ஸயோதி ஹி ஸக்கா விப⁴ஜிதுந்தி அதி⁴ப்பாயோ. விப்பயுத்தோ வா கஸ்மா ந வுத்தோ? புரேஜாதவிப்பயுத்தோ பச்சா²ஜாதவிப்பயுத்தோதி விப⁴ஜிதுங் ஸக்காதி அத்தோ². யங் மிஸ்ஸகாமிஸ்ஸகபா⁴வங் மனஸி கத்வா ‘‘அவத்தப்³ப³த்தா’’தி ‘‘நிஸ்ஸயோ தாவா’’திஆதி³மாஹ. விஸேஸிதப்³போ³ ‘‘விப்பயுத்தபச்சயேன பச்சயோ’’தி அவிஸேஸேன பாளியங் வுத்தத்தா. ஸோ வியாதி அத்தி²பச்சயோ விய, நிஸ்ஸயபச்சயோ விய வா அத்தி²பச்சயவிஸேஸாபா⁴வேன விப்பயுத்தபச்சயோ ந வத்தப்³போ³வ. த்³வின்னங் பச்சயானங் விய பபே⁴த³ஸப்³பா⁴வதோதி த³ஸ்ஸெந்தோ ‘‘ஸஹஜாதபுரேஜாதானஞ்சா’’திஆதி³மாஹ. ததா²திஆதி³னா வுத்தமத்த²ங் பாளியா ஸமத்தே²துங் ‘‘வக்க²தீ’’திஆதி³ வுத்தங். தத்த² மக்³க³ப²லத⁴ம்மானங் மக்³க³ப²லதங்ஸமுட்டா²னரூபவஸேன ஸஹஜாதஅத்தி²பச்சயோ தேஸங்யேவ புரேஜாதசதுஸந்ததிரூபவஸேன பச்சா²ஜாதஅத்தி²பச்சயோ வுத்தோ, ந பன விப்பயுத்தபச்சயபா⁴வோ வக்க²தீதி யோஜனா. ஸோதி விப்பயுத்தபச்சயோ.
ஹேதுஆதீ³னங் ஸஹஜாதந்தோக³த⁴த்தா ஹேதுஆத³யோ தப்³பி³ஸேஸா ஹொந்தீதி கத்வா வுத்தங் ‘‘ஸஹஜாதபச்சயோ ச ஹேதுஆதீ³ஹி விஸேஸேதப்³போ³’’தி. ஸோதி ஸஹஜாதபச்சயோ. விருத்³த⁴பச்சயேஹீதி ஸஹஜாதபுரேஜாதஸ்ஸ ஸஹஜாதாதி³பா⁴வேன விருத்³தே⁴ஹி பச்சயேஹி. தேனாஹ ‘‘உப்பத்திகாலவிருத்³தே⁴ஹி பச்சயேஹீ’’தி.
பச்சனீயுத்³தா⁴ரவண்ணனா நிட்டி²தா.
பச்சனீயக³ணனவண்ணனா
நஹேதுமூலகவண்ணனா
532. அதி⁴பதிபச்சயாதி³பூ⁴தோ ஆரம்மணபச்சயோதி ஆரம்மணஆரம்மணாதி⁴பதிஆரம்மணூபனிஸ்ஸயே வத³தி. தே ச யஸ்மா ஆரம்மணஸபா⁴வா ஏவ, தஸ்மா வுத்தங் ‘‘பரிஹாயதியேவா’’தி. பன்னரஸஸூதி து³தியே ஸஹஜாதபச்சயே ‘‘ஹேதுபச்சயோ’’திஆதி³னா வுத்தேஸு பன்னரஸஸு. ஏகாத³ஸன்னங் வஸேனாதி ஸஹஜாதபச்சயோ, ஸஹஜாததாவிஸிட்டா² அதி⁴பதினிஸ்ஸயகம்மாஹாரிந்த்³ரியத்தி²அவிக³தஹேதுஜா²னமக்³கா³ சாதி இமேஸங் ஏகாத³ஸன்னங் ஸஹஜாதே அந்தோக³தா⁴ ஹேதுஆத³யோ. தஸ்மிங் படிக்கி²த்தேதி தஸ்மிங் ஸஹஜாதே படிக்கி²த்தே பச்சனீயதோ டி²தே. அனந்தோக³தா⁴ ஸஹஜாதே ‘‘ஆரம்மணாதி⁴பதிபுரேஜாதனிஸ்ஸயாத³யோ’’தி. ஆரம்மணாதி³ஆகாரேனாதி ஆரம்மணபுரேஜாதனிஸ்ஸயனானாக்க²ணிககம்மாதி³ஆகாரேன.
தஸ்மிங் படிக்கி²த்தேதி தஸ்மிங் ஸஹஜாதபச்சயே படிக்கி²த்தே. இமே வாராதி ஸஹஜாதங் புரேஜாதந்தி விஸ்ஸஜ்ஜிதவாரா. ஏதே நிஸ்ஸயாத³யோதி ஸஹஜாததாவிஸிட்டே² நிஸ்ஸயாதி³கே வத³தி, ந இதரே. தேனாஹ ‘‘யஸ்மா ச…பே॰… படிக்கே²பேன படிக்கி²த்தா’’தி.
நிஸ்ஸயாதி³பூ⁴தஞ்ச ஸஹஜாதபச்சயங் ட²பெத்வாதி ஏதேன ‘‘ட²பெத்வா ஸஹஜாதபச்சய’’ந்தி எத்த² அந்தோக³த⁴னிஸ்ஸயாதி³பா⁴வோயேவ ஸஹஜாதபச்சயோ க³ஹிதோதி த³ஸ்ஸேதி. நிஸ்ஸயாதீ³தி ஆதி³-ஸத்³தே³ன ஹேதுஆதீ³னங் ஸங்க³ஹோ த³ட்ட²ப்³போ³. அஞ்ஞமஞ்ஞபச்சயத⁴ம்மவஸேன பவத்திஸப்³பா⁴வதோதி அஞ்ஞமஞ்ஞபச்சயத⁴ம்மவஸேன ஸஹஜாதாதீ³ஹி பவத்திஸப்³பா⁴வதோ அஞ்ஞமஞ்ஞே படிக்கி²த்தே ‘‘குஸலோ குஸலாப்³யாகதஸ்ஸா’’தி வாரோ பரிஹாயதி. தேஸங் தேஸங் பச்சயுப்பன்னானந்தி இத³ங் ஸாமஞ்ஞவசனம்பி ‘‘அஞ்ஞமஞ்ஞபச்சயஸங்க³ஹங் க³தா’’தி வசனதோ அஞ்ஞமஞ்ஞபச்சயலாபீ⁴னங்யேவ க³ஹணங் ஸியாதி ஆஸங்கங் நிவத்தேதுங் ‘‘குஸலோ ச குஸலஸ்ஸா’’திஆதி³ வுத்தங். ஸமுதா³யபூ⁴தோதி சதுக்க²ந்த⁴ஸமுதா³யபூ⁴தோ. ஏகதே³ஸபூ⁴தேஹீதி தஸ்ஸேவ ஏகதே³ஸபூ⁴தேஹி. ‘‘குஸலோ பனா’’திஆதி³ ‘‘நஅஞ்ஞமஞ்ஞபச்சயேன…பே॰… பரிஹாயதீ’’தி இமஸ்ஸ அட்ட²கதா²வசனஸ்ஸ ஸமாதா⁴னவசனங்.
ரூபக்க²ந்தே⁴கதே³ஸோவ ஹொந்தி ரூபாஹாரரூபிந்த்³ரியவஸேன, ‘‘ஏகந்தேன விப்பயுத்தபச்சயத⁴ம்மேஹீ’’தி வுத்தத⁴ம்மா ‘‘தே’’தி பச்சாமட்டா²தி ஆஹ ‘‘தேதி தே விப்பயுத்தபச்சயத⁴ம்மா’’தி.
533. பச்சனீயக³ணனங் த³ஸ்ஸேதுந்தி வுத்தேபி நனு பச்சயக³ணனமேவ த³ஸ்ஸிதங் ஹோதீதி கஸ்ஸசி ஆஸங்கா ஸியாதி தங் நிவத்தெந்தோ ஆஹ ‘‘பச்சனீயவாரக³ணனா ஹி த³ஸ்ஸிதா’’தி. ப³லவகம்மங் விபாகஸ்ஸ உபனிஸ்ஸயோ ஹோதி, இதரங் கம்மபச்சயோ ஏவாதி ஆஹ ‘‘விபாகஸ்ஸபி பன…பே॰… கம்மபச்சயோ ஹோதீ’’தி.
நஹேதுமூலகவண்ணனா நிட்டி²தா.
534. பரிச்சி²ன்னக³ணனானீதி ‘‘பரிச்சி²ன்னக³ணனானி விஸ்ஸஜ்ஜனானீ’’தி. பச்சனீயதோ டி²தோபி ஹேது நயானங் மூலபா⁴வேனேவ டி²தோதி ஆஹ ‘‘ஹேதுமூலகே’’தி, அட்ட²கதா²யங் பன ‘‘நஹேதுமூலக’’மிச்சேவ வுத்தங்.
538. மூலங் ஸங்கி²பித்வாதி ஸத்தமூலகங் அட்ட²மூலகங் நவமூலகஞ்ச ஸங்கி²பித்வா. த்³வீஸூதி ‘‘தீணீ’’தி வுத்தேஸு தீஸு விஸ்ஸஜ்ஜனேஸு புரிமேஸு த்³வீஸு ‘‘குஸலோ த⁴ம்மோ அப்³யாகதஸ்ஸ, அகுஸலோ த⁴ம்மோ அப்³யாகதஸ்ஸா’’தி இமேஸு. தேனாஹ ‘‘விபாகோ பச்சயுப்பன்னோ ஹோதீ’’தி. ததியேதி ‘‘அப்³யாகதோ த⁴ம்மோ அப்³யாகதஸ்ஸா’’தி இமஸ்மிங். தேஸமுட்டா²னிககாயோதி உதுசித்தாஹாரானங் வஸேன தேஸமுட்டா²னிககாயோ.
545. ஏதங் த்³வயங் ஸந்தா⁴ய வுத்தங், யதா² அரூபங் அரூபஸ்ஸ, ஏவங் ரூபம்பி ரூபஸ்ஸ விப்பயுத்தபச்சயோ ந ஹோதீதி. ரூபாப்³யாகதோ அரூபாப்³யாகதஸ்ஸாதி இத³ங் வத்து²க²ந்தே⁴ ஸந்தா⁴ய வுத்தங். அரூபாப்³யாகதோ ரூபாப்³யாகதஸ்ஸாதி இத³ங் பன சித்தஸமுட்டா²னரூபஞ்சாதி தேஸங் ஏகந்திகோ விப்பயுத்தபச்சயபா⁴வோதி ஆஹ ‘‘ஸஹஜாத…பே॰… ஹோதியேவா’’தி. ஸஹஜாதாஹாரிந்த்³ரியவஸேனாதி ஸஹஜாதஅரூபாஹாரிந்த்³ரியவஸேன.
546. ஏகமூலகேகாவஸானா அனந்தரபகதூபனிஸ்ஸயவஸேன லப்³ப⁴ந்தீதி இத³ங் யதா²ரஹவஸேன வுத்தந்தி தங் யதா²ரஹங் படிக்கே²பாபடிக்கே²பவஸேனபி த³ஸ்ஸேதப்³ப³ந்தி ‘‘அத்தி²பச்சயே பனா’’திஆதி³ வுத்தங். புரிமேஸூதி நாரம்மணாதீ³ஸு. நவாதி ஏகமூலகாவஸானா நவ. த்³வேயேவாதி ‘‘குஸலோ த⁴ம்மோ அப்³யாகதஸ்ஸ, அகுஸலோ த⁴ம்மோ அப்³யாகதஸ்ஸா’’தி இமே த்³வேயேவ.
பச்சனீயவண்ணனா நிட்டி²தா.
அனுலோமபச்சனீயவண்ணனா
550. இமேஹேவாதி ‘‘குஸலோ குஸலஸ்ஸ, அகுஸலோ அகுஸலஸ்ஸா’’தி இமேஹி ஏவ ஸமானா ஹொந்தி குஸலாதி³தாஸாமஞ்ஞேன. தேன வுத்தங் ‘‘அத்தா²பா⁴வதோ பன ந அனுரூபா’’தி. ‘‘குஸலோ குஸலஸ்ஸா’’திஆதி³னா ‘‘யதா²யோக³ங் நித்³தே³ஸதோ சா’’தி.
551. ஹேதுனாமந்தி ஹேது ச தங் நாமஞ்சாதி ஹேதுனாமங். பச்சயந்தி தமேவ பச்சயபூ⁴தங் ஸந்தா⁴யாதி யோஜனா.
552. த்³வின்னம்பி அதி⁴பதீனந்தி ஸஹஜாதாரம்மணாதி⁴பதீனங் வஸேன, தங் ‘‘குஸலங் குஸலஸ்ஸ ஸஹஜாததோ சேவ ஆரம்மணதோ சா’’திஆதி³னா அட்ட²கதா²யங் வுத்தனயேனேவ வேதி³தப்³ப³ங். நாரம்மணே ஸத்தாதி ஸஹஜாதாதி⁴பதிஸ்ஸ வஸேன வுத்தங், ந ஸஹஜாதே ஸத்தாதி ஆரம்மணாதி⁴பதிஸ்ஸ வஸேன வுத்தந்தி யோஜனா. ஏவந்தி யதா² அதி⁴பதிம்ஹி வுத்தங், ஏவங் ஸப்³ப³த்த² ஸப்³ப³பச்சயேஸு. ‘‘தஸ்மிங் தஸ்மிங்…பே॰… உத்³த⁴ரிதப்³பா³’’தி வத்வா தஸ்ஸ க³ணனுத்³தா⁴ரஸ்ஸ ஸுகரதங் உபாயஞ்ச த³ஸ்ஸெந்தோ ‘‘அனுலோமே…பே॰… விஞ்ஞாது’’ந்தி ஆஹ.
அனுலோமபச்சனீயவண்ணனா நிட்டி²தா.
பச்சனீயானுலோமவண்ணனா
631. பரிஹாபனக³ணனாயாதி பரிஹாபேதப்³ப³க³ணனாய ஸமானத்தஞ்ச ந ஏகந்திகங் ஊனதமபா⁴வஸ்ஸபி ஸம்ப⁴வதோதி அதி⁴ப்பாயோ. தேனாஹ ‘‘நஹேதுனாரம்மணது³கஸ்ஸா’’திஆதி³. தத்த² ஸத்³தி⁴ங் யோஜியமானேன ஊனதரக³ணனேன அதி⁴பதிபச்சயேன பரிஹீனாபீதி யோஜனா. ஸத்³தி⁴ங் பரிஹீனாபீதி வா இமஸ்மிங் பக்கே² ‘‘அதி⁴பதிபச்சயேனா’’தி இத்த²ம்பூ⁴தலக்க²ணே கரணவசனங். ஏதந்தி லக்க²ணங்.
அட்டா²னந்தி அனுலோமதோ அட்டா²னங் அதிட்ட²னங். திட்ட²ந்தீதி அனுலோமதோதி யோஜனா. தேஸந்தி ஹேதுஆதீ³னங். இதரேஸூதி யாதி³ஸா அதி⁴ப்பேதா, தே த³ஸ்ஸேதுங் ‘‘அதி⁴பதீ’’திஆதி³ வுத்தங். இமானி த்³வேதி ‘‘குஸலாப்³யாகதா அப்³யாகதஸ்ஸ, அகுஸலாஅப்³யாகதா அப்³யாகதஸ்ஸா’’தி இமானி ச த்³வே.
நஹேதுமூலகவண்ணனா நிட்டி²தா.
636. ஹேதுயா வுத்தேஹி தீஹீதி ஹேதுபச்சயா வுத்தேஹி தீஹி விஸ்ஸஜ்ஜனேஹி ஸத்³தி⁴ங். வாரஸாமஞ்ஞமேவ வத³தி, ந அத்த²ஸாமஞ்ஞந்தி அதி⁴ப்பாயோ. ததா² கம்மே தீணீதி ஹேதுயா வுத்தானேவாதி சாதி ‘‘கம்மே தீணீ’’தி எத்த² ‘‘ஹேதுயா வுத்தானேவா’’தி இமஸ்மிங் அத்த²வசனேபி ததா² வாரஸாமஞ்ஞமேவ ஸந்தா⁴ய வத³தீதி அத்தோ².
644. ஏகேகமேவாதி ஏகேகமேவ விஸ்ஸஜ்ஜனங்.
650. ஸகட்டா²னேதி அத்தனா டி²தட்டா²னே. ததோ பரேதராதி ததோ அக்³க³ஹிதபச்சயதோ பரேதரா பச்சனீயதோ. நாஹாரே…பே॰… லாபோ⁴ ஹோதீதி ஆஹாரபச்சயே பச்சனீயதோ டி²தே இந்த்³ரியபச்சயங், அனுலோமதோ இந்த்³ரியபச்சயே ச பச்சனீயதோ டி²தே ஆஹாரபச்சயங் அனுலோமதோ யோஜெத்வா யதா² பஞ்ஹோ லப்³ப⁴தீதி அத்தோ². தேஸூதி ஆஹாரிந்த்³ரியேஸு. த்³விதா⁴ பி⁴ன்னானி பச்சனீயதோ அனுலோமதோ ச யோஜேதப்³ப³பா⁴வேன.
பச்சனீயானுலோமவண்ணனா நிட்டி²தா.
குஸலத்திகவண்ணனா நிட்டி²தா.
2. வேத³னாத்திகவண்ணனா
1. வேத³னாத்திகே படிச்சாதி³னியமந்தி திகபத³ஸம்ப³ந்த⁴வஸேன படிச்சவாராதீ³ஸு வத்தப்³ப³ங் படிச்சஸஹஜாதட்டா²தி³னியமனங் ந லப⁴ந்தி வேத³னாரூபனிப்³பா³னானி. கஸ்மா? திகமுத்தகத்தா. ததா² பச்சயுப்பன்னவசனங். ந ஹி ஸக்கா வத்துங் வேத³னங் ரூபங் நிப்³பா³னஞ்ச ஸந்தா⁴ய ‘‘ஸுகா²ய வேத³னாய ஸம்பயுத்தங் த⁴ம்மங் படிச்ச ஸுகா²ய வேத³னாய ஸம்பயுத்தோ உப்பஜ்ஜதீ’’தி. திகத⁴ம்மானந்தி வேத³னாத்திகத⁴ம்மானங். தத்தா²தி ஹேதுபச்சயாதீ³ஸு. யதா²னுரூபதோதி வேத³னாதீ³ஸு யோ யஸ்ஸ வேத³னாய ஸம்பயுத்தத⁴ம்மஸ்ஸ ஆரம்மணாதீ³தி ஆதி³-ஸத்³தே³ன ஆரம்மணாதி⁴பதிஆரம்மணூபனிஸ்ஸயாதி³கே ஸங்க³ண்ஹாதி.
10. குஸலத்திகேபி பரிஹீனந்தி இத³ங் பச்சனீயங் ஸந்தா⁴ய வுத்தங். ரூபாரூபத⁴ம்மபரிக்³கா³ஹகத்தாதி இத³ங் அனாதி³பூ⁴தஸ்ஸபி ஸஹஜாதஸ்ஸ ஆதி³ம்ஹி ட²பனே ஆதி³-ஸத்³தே³னாதி ‘‘ஸஹஜாதாத³யோ’’தி எத்த² ஆதி³-ஸத்³தே³ன. யதா²ரஹங் ஆரப்³ப⁴ உப்பத்திவஸேன ஸப்³பே³ அரூபத⁴ம்மா ஆரம்மணாதீ³னங் பச்சயுப்பன்னா ஹொந்தீதி வுத்தங் ‘‘பச்சயுப்பன்னவஸேன ஸப்³பா³ரூபத⁴ம்மபரிக்³கா³ஹகானங் ஆரம்மணாதீ³ன’’ந்தி. ஆதி³-ஸத்³தே³ன ஆரம்மணாதி⁴பதிஆரம்மணூபனிஸ்ஸயாதி³கே ஸங்க³ண்ஹாதி. தேனாதி ‘‘ஸப்³பா³ரூபத⁴ம்மபரிக்³கா³ஹகா பனா’’திஆதி³வசனேன. ஸப்³ப³ட்டா²னிகானங்…பே॰… த³ஸ்ஸிதா ஹோதி ஸஹஜாதத³ஸ்ஸனேனாதி அத்தோ². ஏகதே³ஸபரிஹானித³ஸ்ஸனேனேவ ஹி ஸமுதா³யபரிஹானி த³ஸ்ஸிதா ஹோதீதி. ஸஹஜாதாத³யோதி வா ஆதி³-ஸத்³தே³ன ஸப்³ப³ட்டா²னிகா சத்தாரோபி த³ஸ்ஸிதா ஹொந்தீதி. ஸஹஜாதமூலகாதி ஸஹஜாதபச்சயே ஸதி ப⁴வந்தா ந ஸஹஜாதங் புரதோ கத்வா பாளியங் ஆக³தா. தேனாஹ ‘‘ஸஹஜாதனிப³ந்த⁴னா…பே॰… வுத்தங் ஹோதீ’’தி. ஸோ பச்சா²ஜாதோ கஸ்மா பன ந பரிஹாயதீதி ஸம்ப³ந்தோ⁴. தத்தா²தி யதா²வுத்தாய பரிஹானியங் அபரிஹானியஞ்ச. ஸஹஜாதனிப³ந்த⁴னேஹீதி ஸஹஜாதத⁴ம்மனிமித்தேஹி பச்சயபா⁴வேஹி இத⁴ பச்சயத⁴ம்மஹேதுகோ வுத்தோ. எத்தே²வாதி பரிஹானியங்யேவ. ஸா ஹி இத⁴ அதி⁴கதா. ஸஹஜாதனிப³ந்த⁴னானமேவ பரிஹானீதி வுத்தே ‘‘கிங் ஸப்³பே³ஸங்யேவ நேஸங் பரிஹானீ’’தி ஆஸங்காய ஆஹ ‘‘ஸஹஜாத…பே॰… த³ஸ்ஸிதமேத’’ந்தி.
17. நயத³ஸ்ஸனமேவ கரோதீதி யதா² அஹேதுககிரியசேதனங் ஸந்தா⁴ய ‘‘நஹேதுபச்சயா நகம்மபச்சயா’’தி வத்துங் லப்³பா⁴, ஏவங் நவிபாகபச்சயாதிபி லப்³பா⁴. அஹேதுகமோஹங் பன ஸந்தா⁴ய ‘‘நஹேதுபச்சயா நவிபாகபச்சயா’’தி லப்³பா⁴, ந ‘‘நகம்மபச்சயா’’தி. தேனாஹ ‘‘ந ச பச்சயபச்சயுப்பன்னத⁴ம்மஸாமஞ்ஞத³ஸ்ஸன’’ந்திஆதி³.
25-37. யதா² குஸலத்திகங், ஏவங் க³ணேதப்³ப³ந்தி இத³ங் யங் ஸந்தா⁴ய பாளியங் நிக்கி²த்தங், தங் த³ஸ்ஸேதுங் வுத்தங் ‘‘ஹேதுமூலகானங்…பே॰… நக³ணனஸாமஞ்ஞ’’ந்தி. ந ஹி குஸலத்திகே அனுலோமபச்சனீயே க³ணனாஹி வேத³னாத்திகே தா ஸமானா. பரிவத்தெத்வாபி யோஜிதாதி எத்த² ‘‘நஹேதுபச்சயா நபுரேஜாதபச்சயா ஆரம்மணே ஏக’’ந்தி ஆரம்மணங் பட²மங் வத்வா வத்தப்³ப³ம்பி புரேஜாதங் நஹேதுபச்சயா கம்மே தீணீதி இத³மேவ பத³ங் பரிவத்தெத்வா ‘‘நகம்மபச்சயா ஹேதுயா தீணீதி வுத்த’’ந்திபி வத³ந்தி.
39. தங்ஸம்பயுத்தேதி ஸத்³தா⁴பஞ்சகேஸூதி ஸத்³தா⁴ஸீலஸுதசாக³பஞ்ஞாஸு. கத்தப்³ப³ந்தி வா யோஜனா காதப்³பா³தி அத்தோ². அவஸேஸேஸூதி ராகா³தீ³ஸு. பாளிக³தித³ஸ்ஸனத்த²ந்தி ‘‘ஏவங் பாளி பவத்தா’’தி பாளியா பவத்தித³ஸ்ஸனத்த²ங். ராகா³தீ³ஹி உபனிஸ்ஸயபூ⁴தேஹி. அனுப்பத்திதோதி ந உப்பஜ்ஜனதோ. தங் பாளிக³திங் திகந்தரபாளியா த³ஸ்ஸெந்தோ ‘‘குஸலத்திகேபிஹீ’’திஆதி³மாஹ. இதா⁴பீதி இமஸ்மிங் வேத³னாத்திகேபி.
62. அனஞ்ஞத்தந்தி அபே⁴த³ங். ஸுக²வேத³னாஸம்பயுத்தோ ஹி த⁴ம்மோ ஸுக²வேத³னாஸம்பயுத்தஸ்ஸேவ த⁴ம்மஸ்ஸ ஹேதுபச்சயேன பச்சயோ, ந இதரேஸங். ஏஸ நயோ ஸேஸபதே³ஸு ஸேஸேஸு ச ‘‘தீணீ’’தி ஆக³தட்டா²னேஸு. தேன வுத்தங் ‘‘ஸப்³பா³னி தீணி ஸுத்³தா⁴னங் திண்ணங் பதா³னங் வஸேன வேதி³தப்³பா³னீ’’தி. ‘‘பச்சா²ஜாதா அரூபத⁴ம்மானங் பச்சயோ ந ஹொந்தீ’’தி யுத்தமேதங், புரேஜாதா பன அரூபத⁴ம்மானங் பச்சயா ந ஹொந்தீதி கத²மித³ங் க³ஹேதப்³ப³ந்தி சோத³னங் ஸந்தா⁴யாஹ ‘‘புரேஜாதா’’திஆதி³, புரேஜாதா ஹுத்வா பச்சயோ ந ஹொந்தீதி அத்தோ². புரிமதரங் உப்பஜ்ஜித்வா டி²தா ஹி ரூபத⁴ம்மா பச்சா² உப்பன்னானங் அரூபத⁴ம்மானங் புரேஜாதபச்சயோ ஹொந்தி, ந சாயங் நயோ அரூபத⁴ம்மேஸு லப்³ப⁴தி. தேன வுத்தங் ‘‘புரேஜாதத்தாபா⁴வதோ’’தி. ததா² பச்சா²ஜாதத்தாபா⁴வதோதி யதா² இமஸ்மிங் திகே கஸ்ஸசி த⁴ம்மஸ்ஸ புரேஜாதத்தாபா⁴வதோ புரேஜாதபச்சயோ ந ஹொந்தீதி வுத்தங், ததா² பச்சா²ஜாதத்தாபா⁴வதோ பச்சா²ஜாதா ஹுத்வா பச்சயோ ந ஹொந்தி, பச்சா²ஜாதபச்சயோ ந ஹொந்தீதி அத்தோ². ந ஹி ஏகஸ்மிங் ஸந்தானே கேஸுசி அரூபத⁴ம்மேஸு பட²மதரங் உப்பஜ்ஜித்வா டி²தேஸு பச்சா² கேசி அரூபத⁴ம்மா உப்பஜ்ஜந்தி, யதோ தே தேஸங் பச்சா²ஜாதபச்சயோ ப⁴வெய்யுங்.
83-87. அவஸேஸேஸு அட்ட²ஸூதி ‘‘ஸுகா²ய வேத³னாய ஸம்பயுத்தோ த⁴ம்மோ’’திஆதி³னா ஏகமூலகேகாவஸானா யே நவ நவ வாரா ஆரம்மணபச்சயாதீ³ஸு லப்³ப⁴ந்தி, தேஸு யதா²வுத்தமேகங் வஜ்ஜெத்வா ஸேஸேஸு அட்ட²ஸு. தீஸ்வேவாதி ஸுத்³தே⁴ஸு தீஸ்வேவ ஸஹஜாதகம்மபச்சயோ லப்³ப⁴தி.
வேத³னாத்திகவண்ணனா நிட்டி²தா.
3. விபாகத்திகவண்ணனா
1-23. ஸோயேவாதி
24-52. தந்தி தங் வசனங், தங் வா கடத்தாரூபங். யஸ்மா சித்தஸமுட்டா²னஸ்ஸ உபாதா³ரூபஸ்ஸ யதா² க²ந்தே⁴ படிச்ச உப்பத்தி, ததா² மஹாபூ⁴தே ச படிச்ச உப்பத்தி. ந ஹி தஸ்ஸ தது³ப⁴யங் வினா உப்பத்தி அத்தி², ந ஏவங் கடத்தாரூபஸ்ஸ. தஞ்ஹி கம்மஸ்ஸ கடத்தா உப்பஜ்ஜமானங் மஹாபூ⁴தே படிச்ச உப்பஜ்ஜதி, தஸ்மா சித்தஸமுட்டா²னங் ரூபங் உபாதா³ரூபஸ்ஸ தங் விஸேஸங் த³ஸ்ஸேதுங் ததே³வ வுத்தங், ந கடத்தாரூபங் வுத்தந்தி இமமத்த²ங் த³ஸ்ஸேதுங் ‘‘க²ந்தே⁴ படிச்சா’’திஆதி³மாஹ. யதி³பி கடத்தாரூபங் ‘‘மஹாபூ⁴தே படிச்ச சித்தஸமுட்டா²னங் ரூபங் உபாதா³ரூப’’ந்தி எத்த² ந க³ஹிதங், வசனந்தரேன பன க³ஹிதமேவாதி த³ஸ்ஸெந்தோ ‘‘பவத்தியங் பனா’’திஆதி³மாஹ. ஏவஞ்ச கத்வாதி க²ந்தே⁴ படிச்ச உப்பத்தியா அபா⁴வதோயேவ. நாஹாரபச்சயேதி ஆஹாரபச்சயே பச்சனீயதோ டி²தே. தம்பீதி கடத்தாரூபம்பி. டி²திக்க²ணே கடத்தாரூபஸ்ஸ ஆஹாரோ உபத்த²ம்ப⁴கோ ஹோதீதி கத்வா வுத்தங் ‘‘உப்பாத³க்க²ணே’’தி.
விபாகத்திகவண்ணனா நிட்டி²தா.
4. உபாதி³ன்னத்திகவண்ணனா
51. அதி⁴பதித⁴ம்மோயேவ லோகுத்தரத⁴ம்மேஸு நாதி⁴பதிபச்சயா உப்பஜ்ஜதீதி ஆஹ ‘‘நாதி⁴பதிபச்சயாதி ஸயங் அதி⁴பதிபூ⁴தத்தா’’தி. நனு அதி⁴பதித⁴ம்மோபி ஆரம்மணாதி⁴பதிவஸேன அதி⁴பதிபச்சயேன உப்பஜ்ஜதீதி சோத³னங் ஸந்தா⁴யாஹ ‘‘அவிரஹிதா…பே॰… த³ஸ்ஸேதீ’’தி. அவிரஹிதாரம்மணாதி⁴பதீஸூதி லோகுத்தரே ஸந்தா⁴யாஹ. தே ஹி நிப்³பா³னாரம்மணத்தா ஏவங் வுச்சதி. பி-ஸத்³தே³ன கோ பன வாதோ³ விரஹிதாரம்மணாதி⁴பதிஅனேகந்தாரம்மணாதி⁴பதீஸூதி த³ஸ்ஸேதி.
72. அனுபாலனுபத்த²ம்ப⁴னவஸேனாதி ஜீவிதிந்த்³ரியங் விய கடத்தாரூபானங் அனுபாலனவஸேன ஓஜா தஸ்ஸேவ கம்மஜகாயஸ்ஸ உபத்த²ம்ப⁴னவஸேன பச்சயோ ஹோதி, ந ஜனகவஸேனாதி யோஜனா. ஏதஸ்மிங் பன அத்தே² ஸதீதி ஆஹாரந்திபி வத்தப்³ப³ந்தி யதா² ஜீவிதிந்த்³ரியவஸேன ‘‘உபாதி³ன்னுபாதா³னியோ த⁴ம்மோ உபாதி³ன்னுபாதா³னியஸ்ஸ த⁴ம்மஸ்ஸ அத்தி²பச்சயேன பச்சயோ’’தி வுத்தங், ஏவங் யதா²வுத்தஆஹாரஸ்ஸபி வஸேன வத்தப்³ப³ந்தி அத்தோ². எத்த² ச யஸ்மிங் கலாபே கம்மஜா ஓஜா கதா³சி தஸ்ஸேவ உபத்த²ம்ப⁴னபச்சயோ ஹோதீதி அயமத்தோ² அட்ட²கதா²யங் த³ஸ்ஸிதோ. யதி³ கம்மஜா ஓஜா ஏகங்ஸதோ ஸகலாபரூபூபத்த²ம்ப⁴னவஸேனேவ பவத்ததி, ததா² ஸதி இமாய பாளியா விரோதோ⁴ ஸியாதி த³ஸ்ஸெந்தோ ‘‘யதி³ ச…பே॰… ஹோதீ’’தி அட்ட²கதா²வசனங் உத்³த⁴ரித்வா தத்த² தோ³ஸங் விபா⁴வெந்தோ ‘‘ஏவங் ஸதீ’’தி ஆஹ. தத்த² தந்தி தங் வசனங். அனஜ்ஜோ²ஹடாய அத்தனோ பச்சயதோ நிப்³ப³த்தாய, பச்சயோ செத்த² கம்மங்யேவ. தேனாஹ ‘‘ஸஸந்தானக³தாய உபாதி³ன்னோஜாயா’’தி.
அயம்பி பஞ்ஹோ, ந கேவலங் புப்³பே³ வுத்தஆஹாரோயேவாதி அதி⁴ப்பாயோ. உத்³த⁴ரிதப்³போ³ ஸியா, ந ச உத்³த⁴டோ. தஸ்மாதி ஏதஸ்ஸ ‘‘வாதோ³ ப³லவதரோ’’தி ஏதேன ஸம்ப³ந்தோ⁴. கஸ்மா பன யதா²வுத்தேஸு த்³வீஸு பஞ்ஹேஸு ஆஹாரோ ந உத்³த⁴டோதி ஆஹ ‘‘அஜ்ஜோ²ஹடஸ்ஸா’’திஆதி³. தத்த² து³தியபஞ்ஹோதி து³கமூலகே து³தியபஞ்ஹோதி யோஜனா. து³தியபஞ்ஹோ ச ந உத்³த⁴டோதி எத்தா²பி ‘‘அஜ்ஜோ²ஹடஸ்ஸ…பே॰… அபா⁴வதோ’’தி இத³ங் ஆனெத்வா ஸம்ப³ந்தி⁴தப்³ப³ங். இதரஸ்ஸாதி அனஜ்ஜோ²ஹடஸ்ஸ. அஜ்ஜோ²ஹடமேவ ந அனஜ்ஜோ²ஹடங், யதா²வுத்தோஜந்தி அதி⁴ப்பாயோ. ‘‘ப³லவதரோ’’தி வத்வா தஸ்ஸ ப³லவதரபா⁴வங் த³ஸ்ஸெந்தோ ‘‘ந ஹீ’’திஆதி³மாஹ. கதிபயாலோபே அஜ்ஜோ²ஹரித்வா வஸித்வா டி²தஸ்ஸ விய அஜ்ஜோ²ஹடமத்தாஹி மண்டூ³காதீ³ஹி அஜ்ஜோ²ஹாரகஸ்ஸ ஸரீரே விஸேஸாதா⁴னங் வேதி³தப்³ப³ங்.
இத⁴ வுத்தேஹீதி இமஸ்மிங் உபாதி³ன்னத்திகே வுத்தேஹி. ஏகமூலகது³கதிகாவஸானபஞ்ஹவிஸ்ஸஜ்ஜனேஹீதி ஏகபத³மூலகேஹி து³காவஸானேஹி திகாவஸானேஹி ச பஞ்ஹவிஸ்ஸஜ்ஜனேஹி. தே பன ‘‘அனுபாதி³ன்னுபாதா³னியோ த⁴ம்மோ உபாதி³ன்னுபாதா³னியஸ்ஸ அனுபாதி³ன்னுபாதா³னியஸ்ஸ ச த⁴ம்மஸ்ஸ அத்தி²பச்சயேன பச்சயோ, அனுபாதி³ன்னஅனுபாதா³னியோ த⁴ம்மோ உபாதி³ன்னுபாதா³னியஸ்ஸ அனுபாதி³ன்னுபாதா³னியஸ்ஸ அனுபாதி³ன்னஅனுபாதா³னியஸ்ஸ ச த⁴ம்மஸ்ஸ அத்தி²பச்சயேன பச்சயோ’’தி ஏவங் வேதி³தப்³போ³. இதா⁴தி இமஸ்மிங் உபாதி³ன்னத்திகே. து³தியது³காவஸானே வியாதி து³தியது³காவஸானே பஞ்ஹவிஸ்ஸஜ்ஜனே விய, ‘‘அனுபாதி³ன்னுபாதா³னியோ ‘‘ஸுகா²வபோ³த⁴னத்த²ங் பன தத்த² ஸஹஜாதவஸேனேவ விஸ்ஸஜ்ஜனங் கத’’ந்தி. ஸஹஜாதவஸேனேவாதி ஸஹஜாதஅத்தி²பச்சயவஸேனேவ. ஏகமூலகது³காவஸானாதி ‘‘குஸலோ த⁴ம்மோ குஸலஸ்ஸ ச அப்³யாகதஸ்ஸ சா’’தி ஏவங்பகாரா பஞ்ஹா. தத்த² குஸலத்திகே உத்³த⁴டா. இத⁴ பன இமஸ்மிங் உபாதி³ன்னத்திகே. ஏதேஹி யதா²வுத்தேஹி விஸ்ஸஜ்ஜனேஹி. ஏகோ த⁴ம்மோதி ஏகோ வேத³னாதி³கோ பச்சயத⁴ம்மோ. அனேகேஹீதி ஸஹஜாதபச்சா²ஜாதாதீ³ஹி அனேகேஹி அத்தி²பச்சயவிஸேஸேஹி. அனேகேஸங் த⁴ம்மானந்தி அனேகேஸங் பச்சயுப்பன்னத⁴ம்மானங். ஏகோ அத்தி²பச்சயோதி இத³ங் அத்தி²பச்சயதாஸாமஞ்ஞதோ வுத்தங்.
இதா³னி யதா²வுத்தங் அவுத்தஞ்ச அத்தி²பச்சயே லப்³ப⁴மானங் விஸேஸங் வித்தா²ரதோ த³ஸ்ஸெந்தோ ‘‘ஏகோ ஹீ’’திஆதி³மாஹ. தத்த² ஏகோதி அத்தி²பச்சயவிஸேஸேஸு ஏகோ. ஏகஸ்ஸாதி தாதி³ஸஸ்ஸேவ ஏகஸ்ஸ. அஞ்ஞதா² ஹி ஏகோ த⁴ம்மோ ஏகஸ்ஸ த⁴ம்மஸ்ஸ பச்சயோ நாம நத்தி². ஏகேனேவாதி ஸஹஜாதஅத்தி²பச்சயேனேவ யதா² ஓக்கந்திக்க²ணே வத்து². தஞ்ஹி அத்தனா ஸஹஜாதஸ்ஸ நாமஸ்ஸ ஸஹஜாதஅத்தி²பச்சயேனேவ பச்சயோ ஹோதி, ந புரேஜாதாதி³னா. ஏகோ ஸஹஜாதஅரூபக்க²ந்தோ⁴ அனேகேஸங் அத்தனா ஸஹஜாதானங் அரூபக்க²ந்தா⁴னங் ஏகேன ஸஹஜாதஅத்தி²பச்சயேன, அனேகேஹி ஸஹஜாதபச்சா²ஜாதஅத்தி²பச்சயேஹி யதா²க்கமங் அத்தனா ஸஹஜாதானங் சித்தஸமுட்டா²னரூபானங் புரேஜாதானங் தேஸமுட்டா²னிகரூபானங். அனேகோ புரேஜாதவத்து²ரூபஞ்சேவ ஸஹஜாதஅரூபக்க²ந்தா⁴ ச ஏகஸ்ஸ அரூபக்க²ந்த⁴ஸ்ஸ யதா²க்கமங் புரேஜாதஸஹஜாதஅத்தி²பச்சயேஹி. அனேகோ அரூபத⁴ம்மோ அனேகேஸங் ஸஹஜாதஅரூபத⁴ம்மானங் புரேஜாதரூபத⁴ம்மானஞ்ச ஸஹஜாதபச்சா²ஜாதஅத்தி²பச்சயேஹி. அனேகோ வா ஆஹாரிந்த்³ரியப்பகாரோ அனேகேஸங் ரூபத⁴ம்மானங் யதா²ரஹங் ஸஹஜாதபுரேஜாதபச்சா²ஜாதாஹாரிந்த்³ரியவஸேன அத்தி²பச்சயேன பச்சயோ ஹோதி. ஏவங் பச்சயுப்பன்னானங் அஸமானத்தேபி அயமத்தோ² ஸம்ப⁴வதி, ஸமானத்தே ‘‘ஸமானத்தே பச்சயுப்பன்னத⁴ம்மான’’ந்தி. ஸஹஜாதங் புரேஜாதேனேவ ஸஹ அத்தி²பச்சயோ ஹோதீதி ஸஹஜாதஅத்தி²பச்சயத⁴ம்மோ புரேஜாதஅத்தி²பச்சயத⁴ம்மேன ஸஹேவ அத்தி²பச்சயோ ஹோதி. யதா² வத்து²னா புரேஜாதஅத்தி²பச்சயங் லப⁴ந்தா ஏவ குஸலாதி³த⁴ம்மா ஸஹஜாதானங் க²ந்தா⁴னங் சித்தஸமுட்டா²னானஞ்ச ரூபானங் ஸஹஜாதஅத்தி²பச்சயோ ஹொந்தி, ததா² தே புரேஜாதஸ்ஸ காயஸ்ஸ பச்சா²ஜாதபச்சயோபி ஹொந்தியேவ. தேனாஹ ‘‘பச்சா²ஜாதேன சா’’தி. அத்தி²பச்சயோ ஹோதீதி ஸம்ப³ந்தோ⁴. அயங் ஸஹஜாதபச்சா²ஜாதானங் அத்தி²பச்சயபா⁴வோ பச்சயத⁴ம்மானங் அபே⁴தே³ ஏவ இச்சி²தோ, ந பே⁴தே³. தேனாஹ ‘‘அனஞ்ஞத⁴ம்மத்தேன…பே॰… நானாத⁴ம்மத்தே’’தி.
இதா³னி ‘‘யதி³ ஸியா’’திஆதி³மாஹ. தத்த² ஏகோ அத்தி²பச்சயபா⁴வோ நத்தீ²தி ஏகஸ்ஸேவ பச்சயத⁴ம்மஸ்ஸ வஸேன லப்³ப⁴மானோ ஏகோ அத்தி²பச்சயபா⁴வோ நத்தி². கஸ்மா? விரோத⁴தோ. தேன வுத்தங் ‘‘ஸஹஜாத…பே॰… ந வுத்த’’ந்தி. ஏவஞ்ச கத்வாதி ஸஹஜாதபச்சா²ஜாதானங் ஏகத⁴ம்மவஸேன ஸஹ அலாப⁴தோ ஏவ. ஏகத⁴ம்மவஸேனாதி ஏகஸ்ஸேவ பச்சயத⁴ம்மஸ்ஸ வஸேன. தேனாஹ ‘‘நானாத⁴ம்மானங் விருத்³த⁴ஸபா⁴வத்தா’’தி. விருத்³த⁴ஸபா⁴வதா ச ஸஹஜாதபச்சா²ஜாதவஸேன வேதி³தப்³பா³, இத⁴ பன லோகியலோகுத்தராதி³பா⁴வதோதி. அஞ்ஞதா²தி தேஸங் ஸஹஜாதபச்சா²ஜாதானங் ஏகஜ்ஜ²ங் லாபே⁴. இந்த்³ரியபடிக்கே²பேபீதி இந்த்³ரியபச்சயே பச்சனீகதோ டி²தேபி. தஸ்ஸ பஞ்ஹஸ்ஸ லாப⁴தோதி ‘‘உபாதி³ன்னுபாதா³னியோ ச அனுபாதி³ன்னுபாதா³னியோ ச த⁴ம்மா உபாதி³ன்னுபாதா³னியஸ்ஸ த⁴ம்மஸ்ஸ அத்தி²பச்சயேன பச்சயோ’’தி ஏதஸ்ஸ பஞ்ஹஸ்ஸ லாப⁴தோ. பா³வீஸாதி ஏகமூலகாவஸானா நவ, ஏகமூலகது³காவஸானா பஞ்ச, ஏகமூலகதிகாவஸானமேகங், து³கமூலகேகாவஸானா சத்தாரோ, து³கமூலகாவஸானா த்³வே, து³கமூலகதிகாவஸானமேகந்தி ஏவங் பா³வீஸதி. யதா² புப்³பே³ ஸஹஜாதங் புரேஜாதேன ஸஹேவ அத்தி²பச்சயோ ஹோதீதி வுத்தங், ஏவங் புரேஜாதம்பி தேனாதி த³ஸ்ஸெந்தோ ஆஹ ‘‘புரேஜாதங் ஸஹஜாதேனேவ ஸஹ அத்தி²பச்சயோ ஹோதீ’’தி. தத்த² ஸஹஜாதேனேவ ஸஹாதி ஸஹஜாதேன ஸஹேவ. அட்டா²னப்பயுத்தோ ஹி அயங் ஏவ-ஸத்³தோ³, ஸஹஜாதேன ந வினா புரேஜாதஅத்தி²பச்சயோதி அத்தோ². இதரேஸு பன அத்தி²பச்சயத⁴ம்மேஸு நியமோ நத்தி² தேஹி ‘‘ந இதரேஹீ’’தி. தம்பி வத்து² தங்ஸஹிதபுரேஜாதமேவாதி யங் ‘‘புரேஜாதங் ஸஹஜாதேனேவ ஸஹ அத்தி²பச்சயோ ஹோதீ’’தி வுத்தங், தம்பி வத்து²புரேஜாதஞ்சேவ தங்ஸஹிதாரம்மணபுரேஜாதமேவ ச, ந கேவலங் ஆரம்மணபுரேஜாதங். தேனாஹ ‘‘ந இதர’’ந்தி.
இதா³னி யதா²வுத்தமத்த²ங் பாட²ந்தரேன விபா⁴வேதுங் ‘‘குஸலத்திகே ஹீ’’திஆதி³ வுத்தங். யதி³ புரேஜாதங் தங்ஸஹஜாதேன வினாபி அத்தி²பச்சயோ ஸியா, ‘‘நவிப்பயுத்தபச்சயா அத்தி²யா பஞ்சா’’தி வத்துங் ந ஸக்கா, வுத்தஞ்சேதங், தஸ்மா விஞ்ஞாயதி ‘‘புரேஜாதங் ஸஹஜாதேன ஸஹேவ அத்தி²பச்சயோ ஹோதீ’’தி. நவிப்பயுத்தே பா³வீஸாதி எத்தா²பி ஏஸேவ நயோ. தத்தா²தி ஸனித³ஸ்ஸனத்திகே. அத்தி²விப⁴ங்கே³தி அத்தி²பச்சயஸ்ஸ விப⁴ஜனே. திகமூலகேகாவஸானந்தி ‘‘ஸனித³ஸ்ஸனஸப்படிகோ⁴ ச அனித³ஸ்ஸனஸப்படிகோ⁴ ச அனித³ஸ்ஸனஅப்படிகோ⁴ ச த⁴ம்மா அனித³ஸ்ஸனஸப்படிக⁴ஸ்ஸ த⁴ம்மஸ்ஸ அத்தி²பச்சயேன பச்சயோ’’தி ஏவங் திகமூலகோ ஏகாவஸானோ பஞ்ஹோ உத்³த⁴டோ. பச்சயுத்³தா⁴ரேதி ச தத்தே²வ பச்சயுத்³தா⁴ரே. ததா² ச ஸோ பஞ்ஹோ உத்³த⁴டோ. தயித³ங் கத²ங், யதி³ புரேஜாதங் ஸஹஜாதேனேவ ஸஹ அத்தி²பச்சயோ ஹோதீதி சோத³னாயங் ஆஹ ‘‘தங் வத்து²ஸஹிதஸ்ஸ…பே॰… பச்சயபா⁴வதோ’’தி. தஸ்ஸத்தோ² பச்சா²ஜாதங் ஆஹாரிந்த்³ரியேஹேவ ஸஹ அத்தி²பச்சயோ ஹோதி, ந புரேஜாதேனாதி அதி⁴ப்பாயோ. அனஞ்ஞத⁴ம்மத்தேதி பச்சயத⁴ம்மஸ்ஸ அனஞ்ஞத்தே. ஸஹஜாதேன ஸஹ அத்தி²பச்சயோ ஹோதீதி யோஜனா. ஸேஸபத³த்³வயேபி ஏஸேவ நயோ. தத்தா²பி படியோகி³புரேஜாதங்யேவ த³ட்ட²ப்³ப³ங். ‘‘அத்தி²பச்சயவிஸேஸேஸு பனா’’திஆதி³னா அத்தனா த³ஸ்ஸிதங் விசாரங் ‘‘ஏவமேத’’ந்தி நிக³மனவஸேன பச்சாமஸதி.
உபாதி³ன்னத்திகவண்ணனா நிட்டி²தா.
6. விதக்கத்திகவண்ணனா
22. விதக்கத்திகே ஸத்தஸு மூலகேஸூதி ‘‘ஸவிதக்கஸவிசாரங் த⁴ம்மங் படிச்சா’’திஆதி³னா ஆக³தானி தீணி ஏககானி, தீணி து³கானி, ஏகங் திகந்தி ஏவங் ஏகமூலகானி யானி ஸத்தமூலகானி, தேஸு. யதா²க்கமந்தி பாளியங் ஆக³தானுக்கமேன. ஸத்தாதி பட²மே ஏககே ஸத்த. பஞ்சாதி து³தியே பஞ்ச. தானிமானி ஹேதுபச்சயே வுத்தனயேன வேதி³தப்³பா³னி. இத⁴ பன பவத்திவஸேனேவ யோஜேதப்³ப³ங். தீணீதிஆதீ³ஸு ததியே தீணி, சதுத்தே² ஏகங், பஞ்சமே தீணி, ச²ட்டே²பி தீணி, ஸத்தமே ஏகங். தானி பன யதா²க்கமங் ததியபத³ங் படிச்ச ததியபத³து³தியபத³தது³ப⁴யவஸேன, பட²மபத³ததியபதா³னி படிச்ச ததியபத³வஸேன, பட²மபத³து³தியபதா³னி படிச்ச பட²மபத³ததியபத³தது³ப⁴யவஸேன, து³தியபத³ததியபதா³னி படிச்ச பட²மபத³ததியபத³தது³ப⁴யவஸேன, பட²மது³தியததியபதா³னி படிச்ச ததியபத³வஸேனேவ வேதி³தப்³பா³னி. அஞ்ஞமஞ்ஞே அட்ட²வீஸாதிஆதீ³ஸுபி இமினாவ நயேன க³ணனா வேதி³தப்³பா³. ஏவந்தி யதா²வுத்தங் க³ணனங் பச்சாமஸதி. து³தியததியமூலகேஸு ஏகங் ஏகந்தி து³தியமூலகே ஏகங், ததியமூலகே ஏகந்தி யோஜேதப்³ப³ங். ததா² ஆஸேவனேதி யதா² புரேஜாதே ஏகாத³ஸ, ததா² ஆஸேவனேதி அத்தோ². அஞ்ஞானீதி அதி⁴பதிஅஞ்ஞமஞ்ஞபுரேஜாதாஸேவனதோ அஞ்ஞேஸு பச்சயேஸு க³ணனானி. ஹேதுஆரம்மணஸதி³ஸானீதி ஹேதுஆரம்மணபச்சயேஸு க³ணனாஸதி³ஸானி.
31. அவிஸேஸேனாதி ‘‘கஸ்மா’’திஆதி³மாஹ. இதரேஸந்தி லோகியவிபாகானங். தே விஸுங் நித்³தா⁴ரெத்வா வுத்தாதி தே யதா²வுத்தலோகியவிபாகா அவிதக்கவிசாரமத்தஸாமஞ்ஞதோ விஸுங் நீஹரித்வா வுத்தா. ‘‘அவிதக்கவிசாரமத்தே க²ந்தே⁴ படிச்ச அவிதக்கவிசாரமத்தா அதி⁴பதீ’’தி வுத்தராஸி புரிமகொட்டா²ஸோ.
38. ஏதந்தி ‘‘அவிதக்கவிசாரமத்தங் அவிதக்க…பே॰… ஸஹ க³ச்ச²ந்தேனா’’தி ஆக³தபாளிபத³ங். தஸ்ஸ அத்த²ங் த³ஸ்ஸேதுங் ‘‘மூலங்…பே॰… வுத்தங் ஹோதீ’’தி ஆஹ. தத்த² அவிதக்க…பே॰… யோஜெந்தேனாதி அவிதக்கேஹி அவிதக்கபரியாயேன வுத்தேஹி அவிதக்கவிசாரமத்தஅவிதக்கஅவிசாரபதே³ஹி ஸஹ மூலபத³ங் நபுரேஜாதஸதி³ஸங் நாஸேவனே பாளிக³மனங் காதப்³ப³ங், படி²தப்³ப³ந்தி அத்தோ². பொத்த²கேஸு பன ‘‘அவிதக்கவிசாரமத்தங் விபாகேன ஸஹ க³ச்ச²ந்தேனா’’தி தி³ஸ்ஸதி, விபாகேன விஸேஸனபூ⁴தேன ஸஹ யோஜெந்தேனாதி அத்தோ². தேனேவாஹ ‘‘விபாகங் அவிதக்கவிசாரமத்தந்திஆதி³ யோஜேதப்³ப³’’ந்தி.
ஏகமூலகே பாளியங் யோஜிதமேவாதி ‘‘து³மூலகேஸு பட²மே’’தி வுத்தங்.
49. மூலபத³மேவ அவஸானபா⁴வேனாதி ‘‘ஸவிதக்கஸவிசாரங் த⁴ம்மங் பச்சயா ஸவிதக்கஸவிசாரோ த⁴ம்மோ உப்பஜ்ஜதி நஹேதுபச்சயா’’திஆதி³னா மூலபத³மேவ அவஸானபா⁴வேன யோஜிதங். ஸத்த மோஹா உத்³த⁴ரிதப்³பா³தி இத³ங் நஹேதுபச்சயங் ஸந்தா⁴ய வுத்தங். படிச்சவாரே ஹி அஹேதுகமோஹோ திக்க²த்துமேவ ஆக³தோ. இத⁴ பன ‘‘வத்து²ங் பச்சயா’’திஆதி³னா சதூஸுபி மூலகேஸு ஆக³தோ, தஸ்மா ஸத்தக்க²த்துங் ஆக³மனங் ஸந்தா⁴ய ‘‘ஸத்த மோஹா’’தி வுத்தந்தி வேதி³தப்³ப³ங்.
உபனிஸ்ஸயேன ஸங்க³ஹிதத்தாதி உபனிஸ்ஸயபச்சயேனேவ கம்மபச்சயஸ்ஸ ஸங்க³ஹிதத்தா. ஸப்³ப³ஸ்ஸபி ரூபாரூபாவசரகம்மஸ்ஸ ப³லவபா⁴வதோ உபனிஸ்ஸயத்தாபா⁴வோ நத்தி², யதோ தங் ‘‘க³ரூ’’தி வுச்சதி, கம்மக்க²யகரஸ்ஸ பன கம்மஸ்ஸ ப³லவபா⁴வே வத்தப்³ப³மேவ நத்தீ²தி இமமத்த²ங் பாளியா ஏவ விபா⁴வேதுங் வுத்தங் ‘‘உபாதி³ன்னத்திகபஞ்ஹாவாரபச்சனீயே ஹி…பே॰… விஞ்ஞாயதீ’’தி.
விதக்கத்திகவண்ணனா நிட்டி²தா.
8. த³ஸ்ஸனேனபஹாதப்³ப³த்திகவண்ணனா
படிச்சஸமுப்பாத³விப⁴ங்கே³ விசாரிதனயேன விசாரேதப்³ப³ந்தி இத³ங் ‘‘ந ச புது²ஜ்ஜனானங் த³ஸ்ஸனேன பஹாதுங் ஸக்குணெய்யோ, இதரேஸங் ந கேனசி பச்சயேன பச்சயோ ந ஹொந்தீதி ஸக்கா வத்து’’ந்திஆதி³னா அத்தனா ஆனீதங்
த³ஸ்ஸனேனபஹாதப்³ப³த்திகவண்ணனா நிட்டி²தா.
பட்டா²னபகரண-அனுடீகா ஸமத்தா.
இதி பஞ்சபகரணமூலடீகாய லீனத்த²வண்ணனா
அனுடீகா ஸமத்தா.
அபி⁴த⁴ம்மஸ்ஸ அனுடீகா ஸமத்தா.