3. ததியோ பரிச்சே²தோ³
பே⁴த³ஸங்க³ஹவிபா⁴கோ³
123.
ஏவங் பே⁴த³ஸபா⁴வேஸு, தெஸ்வேவ புன ஸங்க³ஹங்;
ஸபா⁴வத்த²விஸேஸேஹி, பவக்கா²மி இதோ பரங்.
124.
அஸாதா⁴ரணஞாணேஹி, ஸத்தா² வத்து²விவேசகோ;
ஸங்க³ஹெத்வா ஸபா⁴கே³ஹி, த⁴ம்மே த³ஸ்ஸேஸி சக்கு²மா.
125.
தி³ட்டி²பி⁴னிவேஸட்டே²ன, யதா²பூ⁴தஸபா⁴வதோ;
பரமாமஸதிச்சேகா, பராமாஸோதி பா⁴ஸிதா.
126.
கிலேஸாஸுசிபா⁴வேன, வணஸ்ஸாவரஸோ விய;
ஆலிம்பந்தாவ ஸந்தானங், ஸவந்தீதி பகாஸிதா.
127.
காமதண்ஹா ப⁴வதண்ஹா, தி³ட்டா²விஜ்ஜாதி ஆஸவா;
சத்தாரோ ஆஸவட்டே²ன, தயோ த⁴ம்மா ஸபா⁴வதோ.
128.
ஏதேவோ கா⁴தி வுத்தாவ, த்³வாராலம்பா³பி⁴வாஹினோ;
ஒத்த²ரித்வா பராபூ⁴தே, ஹரந்தா பாணினோ ப⁴வே.
129.
யோகா³தி
த்³வாராலம்பா³பி⁴ஸம்ப³ந்தா⁴, யந்தப³ந்தா⁴வ யோஜிதா.
130.
ஸந்தானமதி⁴க³ண்ஹந்தா, மாலுவாவ மஹாதருங்;
க³ண்ஹந்தா த³ள்ஹமாலம்ப³ங், மண்டூ³கமிவ பன்னகோ³.
131.
காமதண்ஹா ச தி³ட்டி² ச, உபாதா³னா சதுப்³பி³தா⁴;
தி³ட்டி² தி³ட்டி²ஸீலப்³ப³த-மத்தவாதோ³தி பே⁴தி³தா.
132.
காயேன காயங் க³ந்தெ²ந்தா, து³ப்பமுஞ்சானுவேடி²னோ;
கதி²தா காயக³ந்தா²தி, தண்ஹாப்³யாபாத³தி³ட்டி²யோ.
133.
ஸீலப்³ப³தபராமாஸோ, இதி தி³ட்டி² விபே⁴தி³தா;
இத³ங்ஸச்சாபி⁴னிவேஸோ, இதி சேவங் சதுப்³பி³தா⁴.
134.
நெக்க²ம்மங் பலிபோ³தெ⁴ந்தா, பா⁴வனாபரிபந்த²கா;
ஸந்தானமண்ட³கோஸாவ, பரியோனந்த⁴காதி ச.
135.
காமச்ச²ந்தோ³ ச ப்³யாபாதோ³, தி²னமித்³த⁴ஞ்ச ஸங்ஸயோ;
அவிஜ்ஜுத்³த⁴ச்சகுக்குச்சமிதி நீவரணா மதா.
136.
ஆகா³ள்ஹங் பரியாதா³ய, ஓக³ய்ஹனுப்பவத்தினோ;
யொப்பரோகா³வ ஸந்தான-மனுஸெந்தீதி பா⁴ஸிதா.
137.
காமராகோ³ ப⁴வராகோ³, படிகோ⁴ மானதி³ட்டி²யோ;
கங்கா²விஜ்ஜாதி ஸத்தேவ, ச² த⁴ம்மாநுஸயா மதா.
138.
த்³வாராலம்ப³ணப³ந்தே⁴ன, பாணீனங் ப⁴வமண்ட³லே;
ஸங்யோஜனானி வுத்தானி, பாஸப³ந்தா⁴வ பக்கி²னங்.
139.
காமரூபாரூபராகா³, படிகோ⁴ மோஹஸங்ஸயோ;
தி³ட்டி² ஸீலப்³ப³தங் மானோ, உத்³த⁴ச்சேன த³ஸா ப⁴வே.
140.
ரூபாரூபராகு³த்³த⁴ச்சங், அபி⁴த⁴ம்மே வினா புன;
ப⁴வராகி³ஸ்ஸ மச்சே²ரங், க³ஹெத்வா த³ஸதா⁴ ஸியுங்.
141.
ஸங்க்லேபயந்தி
ஸஹஜாதேக்லேஸெந்தீதி, கிலேஸாதி பகாஸிதா.
142.
லோபோ⁴ தோ³ஸோ ச மோஹோ ச,
தி³ட்டி² மானோ ச ஸங்ஸயோ;
தி²னாஹிரிகனொத்தப்ப-
முத்³த⁴ச்சேன ஸியுங் த³ஸ.
143.
நவஸங்க³ஹிதா எத்த², தி³ட்டி²லோபா⁴ பகாஸிதா;
ஸத்தஸங்க³ஹிதாவிஜ்ஜா, படிகோ⁴ பஞ்சஸங்க³ஹோ.
144.
சதுஸங்க³ஹிதா கங்கா², மானுத்³த⁴ச்சா திஸங்க³ஹா;
து³கஸங்க³ஹிதங் தீ²னங், குக்குச்சமேகஸங்க³ஹங்.
145.
த்³விதா⁴ஹிரிகனொத்தப்ப-மிஸ்ஸாமச்ச²ரியங் ததா²;
இச்சேவங் த³ஸதா⁴ வுத்தா, பாபகெஸ்வேவ ஸங்க³ஹா.
146.
பராமாஸாஸவோகா⁴ ச, யோகு³பாதா³னக³ந்த²தோ;
நீவாரணானுஸயதோ, ஸங்யோஜனகிலேஸதோ.
147.
சுத்³த³ஸேவ து ஸங்கே²பா, ஸத்தபஞ்ஞாஸ பே⁴த³தோ;
யதா²த⁴ம்மானுஸாரேன, சித்துப்பாதே³ஸு யோஜயே.
148.
ததோபரே நோபராமா-ஸாதி³பே⁴தி³தஸங்க³ஹா;
சித்தங் சேதஸிகங் ரூபங், நிப்³பா³னமிதி தீ³பயே.
149.
இச்சாகுஸலத⁴ம்மானங், ஞத்வா ஸங்க³ஹமுத்தரங்;
மிஸ்ஸகா நாம விஞ்ஞெய்யா, யதா²ஸம்ப⁴வதோ கத²ங்;
150.
லோபோ⁴ தோ³ஸோ ச மோஹோ ச,
ஏகந்தாகுஸலா தயோ;
அலோபா⁴தோ³ஸாமோஹோ ச,
குஸலாப்³யாகதா ததா².
151.
பாத³பஸ்ஸேவ
மூலபா⁴வேன த⁴ம்மானங், ஹேதூ த⁴ம்மா ச² தீ³பிதா.
152.
விதக்கோ
ஸோமனஸ்ஸங் தோ³மனஸ்ஸங், உபெக்கா²தி ச வேத³னா.
153.
ஆஹச்சுபனிஜ்ஜா²யந்தா, நிஜ்ஜா²னட்டே²ன பச்சயா;
ஜா²னத⁴ம்மாதி ஸத்தா²ஹ, பஞ்ச வத்து²ஸபா⁴வதோ.
154.
ஸம்மாதி³ட்டி² ச ஸங்கப்போ, வாயாமோ விரதித்தயங்;
ஸம்மாஸதி ஸமாதீ⁴ ச, மிச்சா²தி³ட்டி² ச ஸம்ப⁴வா.
155.
ஸம்மாமிச்சா² ச நீயந்தா, நிய்யானட்டே²ன பச்சயா;
மக்³க³ங்கா³ த்³வாத³ஸக்கா²தா, நவ த⁴ம்மா ஸபா⁴வதோ.
156.
அத்தபா⁴வங் பவத்தெந்தா, ஓஜட்ட²மகவேத³னங்;
படிஸந்தி⁴னாமரூப-மாஹரந்தா யதா²க்கமங்.
157.
கப³ளீகாரோ ஆஹாரோ,
ப²ஸ்ஸோ ஸஞ்சேதனா ததா²;
விஞ்ஞாணமிதி சத்தாரோ,
ஆஹாராதி பகாஸிதா.
158.
த⁴ம்மானங் ஸஹஜாதானங், இந்த்³ரியட்டே²ன பச்சயா;
அத்தானமிஸ்ஸரட்டே²ன, அனுவத்தாபகா ததா².
159.
ஸத்³தா⁴ ச ஸதி பஞ்ஞா ச, வீரியேகக்³க³தாபி ச;
வேத³னா ஜீவிதங் சித்தங், அட்ட² ரூபிந்த்³ரியானி ச.
160.
கத²ங் ஜீவிதமேகங் து, ஸுக²ங் து³க்க²ந்தி வேத³னா;
ஸோமனஸ்ஸங் தோ³மனஸ்ஸங், உபெக்கா²தி ச பே⁴தி³தா.
161.
பஞ்ஞாதி³மக்³கே³னஞ்ஞாத-ஞ்ஞஸ்ஸாமீதிந்த்³ரியங் ப⁴வே;
மஜ்ஜே² அஞ்ஞிந்த்³ரியமந்தே, அஞ்ஞாதாவிந்த்³ரியங் ததா².
162.
ஸோளஸேவ
இந்த்³ரியானீதி வுத்தானி, பா³வீஸதி விபா⁴வயே.
163.
த³ள்ஹாதி⁴ட்டி²தஸந்தானா
ப³லவந்தஸபா⁴வேன, ப³லத⁴ம்மா பகாஸிதா.
164.
ஸத்³தா⁴ ஸதி ஹிரொத்தப்பங், வீரியேகக்³க³தா ததா²;
பஞ்ஞாஹிரிகானொத்தப்ப-மிச்சேவங் நவதா⁴ மதா.
165.
ஜெட்டா² புப்³ப³ங்க³மட்டே²ன, புஞ்ஞாபுஞ்ஞபவத்தியங்;
பச்சயாதி⁴ப்பதெய்யேன, ஸஹஜானங் யதா²ரஹங்.
166.
சத்தாரோதி⁴பதீ வுத்தா, ஆதி⁴ப்பச்சஸபா⁴வதோ;
ச²ந்தோ³ சித்தஞ்ச வீரியங், வீமங்ஸாதி ச தாதி³னா.
167.
பஞ்சஸங்க³ஹிதா பஞ்ஞா, வாயாமேகக்³க³தா பன;
சதுஸங்க³ஹிதா சித்தங், ஸதி சேவ திஸங்க³ஹா.
168.
ஸங்கப்போ வேத³னா ஸத்³தா⁴, து³கஸங்க³ஹிதா மதா;
ஏகேகஸங்க³ஹா ஸேஸா, அட்ட²வீஸதி பா⁴ஸிதா;
இச்சேவங் ஸத்ததா⁴ பே⁴தோ³, வுத்தோ மிஸ்ஸகஸங்க³ஹோ.
169.
ஹேதுஜா²னங்க³மக்³க³ங்கா³, ஆஹாரிந்த்³ரியதோ ததா²;
ப³லாதி⁴ப்பதிதோ சேவ, புஞ்ஞாபுஞ்ஞாதி³மிஸ்ஸதா;
ச²த்திங்ஸேவ ஸபா⁴வேன, சதுஸட்டி² பபே⁴த³தோ.
170.
இச்சேவங் ஸங்க³ஹெத்வான, விபா⁴வெய்ய ததோ பரங்;
சித்துப்பாத³பபே⁴தே³ஸு, யதா²ஸம்ப⁴வதோ கத²ங்.
171.
ஸிதாவஜ்ஜனவிஞ்ஞாணங், ஸம்படிச்ச²னதீரணா;
அட்டா²ரஸாஹேதுகாவ, மோமூஹா ஏகஹேதுகா.
172.
ஸேஸா து குஸலா ஞாணவியுத்தா ச த்³விஹேதுகா;
சித்துப்பாதா³பரே ஸத்த-சத்தாலீஸ திஹேதுகா.
173.
பஞ்சவிஞ்ஞாணமஜ்ஜா²னங்
சதுத்த²பஞ்சமஜ்ஜா²னங், திஜா²னங் ததியங் மதா.
174.
சதுஜா²னங் து து³தியங், காமே ச ஸுக²வஜ்ஜிதா;
பஞ்சஜா²னங் து பட²மங், காமே ச ஸுகி²தா மதா.
175.
பட²மானுத்தரங்
ஸத்தமக்³க³ங்கி³கங் நாம, ஸேஸஜா²னமனுத்தரங்.
176.
லோகியங் பட²மங் ஜா²னங், ததா² காமே திஹேதுகா;
பஞ்சமக்³க³ங்கி³கா நாம, சித்துப்பாதா³ பகாஸிதா.
177.
ஸேஸங் மஹக்³க³தங் ஜா²னங், ஸம்பயுத்தா ச தி³ட்டி²யா;
ஞாணேன விப்பயுத்தா ச, சதுமக்³க³ங்கி³கா மதா.
178.
படிகு⁴த்³த⁴ச்சயுத்தா ச, விப்பயுத்தா ச தி³ட்டி²யா;
திமக்³க³ங்க³ங் து³மக்³க³ங்க³ங், கங்கி²தங் ஸமுதீ³ரிதங்.
179.
ந ஹொந்தாஹேதுகே மக்³கா³, சித்தட்டி²தி ச கங்கி²தே;
விதி³தா நியததா ச, லோகியேஸு ந உத்³த⁴டா.
180.
காமேஸு கப³ளீகாரோ, அனாஹாரோ அஸஞ்ஞினோ;
சித்துப்பாதே³ஸு ஸப்³ப³த்த², ஆஹாரத்தயமீரிதங்.
181.
இந்த்³ரியானி விபா⁴வெய்ய, நவதா⁴னுத்தரே பு³தோ⁴;
அட்ட²தா⁴ ஸமுதீ³ரெய்ய, லோகியேஸு திஹேதுகே.
182.
ஸத்ததா⁴ பன ஞாணேன, விப்பயுத்தே பகாஸயே;
ஸிதவொட்ட²ப்³ப³னாபுஞ்ஞே, பஞ்சதா⁴ கங்கி²தே பன.
183.
சதுதா⁴ திவிதா⁴ ஸேஸே, சித்துப்பாதே³ ஸமீரயே;
திஹேதுகா ஸத்தப³லா, ச²ப³லா து து³ஹேதுகா.
184.
சதுப³லா அகுஸலா, கங்கி²தங் திப³லங் மதங்;
த்³விப³லங் ஸிதவொட்ட²ப்³ப³-மப³லங் ஸேஸமீரிதங்.
185.
ஜவனேதி⁴பதீனங்
த்³விஹேதுகே வா குஸலே, வீமங்ஸா நோபலப்³ப⁴தி.
186.
லோகியேஸு விபாகேஸு,
மோஹமூலே அஹேதுகே;
யதா²ஸம்ப⁴வவுத்தித்தா,
நத்தா²தி⁴பதி கோசிபி.
187.
ஸம்போ⁴தி
து³க்கி²ந்த்³ரியம்பி தத்தே²வ, பாபபாகம்ஹி பா⁴ஸிதங்.
188.
ஸந்தீரணஞ்ச ஹஸனங், ஸோமனஸ்ஸானி ஸோளஸ;
பட²மாதி³சதுஜ்ஜா²னங், ஸோமனஸ்ஸயுதங் ப⁴வே.
189.
தோ³மனஸ்ஸயுத்தா த்³வேவ, சித்துப்பாதா³ பகாஸிதா;
தத³ஞ்ஞே பன ஸப்³பே³பி, பஞ்சபஞ்ஞாஸுபெக்க²கா.
190.
வேத³னாஸம்பயோக³ஞ்ச, வினிப்³பு⁴ஜ்ஜேவமட்ட²தா⁴;
ஹேதுயோகா³தி³பே⁴தே³ஹி, சித்துப்பாதா³ பகாஸிதா.
191.
தங்தங்வியோக³பே⁴த³ஞ்ச, பச்சேகமத² மிஸ்ஸிதங்;
யதா²வுத்தானுஸாரேன, யதா²ஸம்ப⁴வதோ நயே.
192.
இச்சேவங் பன யோஜெத்வா, சித்துப்பாதே³ஸு மிஸ்ஸகங்;
ததோ ஞெய்யா விஸுத்³தா⁴ ச, போ³தி⁴பக்கி²யஸங்க³ஹா.
193.
காயே ச வேத³னாசித்தே, த⁴ம்மேஸு ச யதா²ரஹங்;
அஸுப⁴ங் து³க்க²மனிச்ச-மனத்தாதி ஸுபட்டி²தா.
194.
ஸம்மாஸதி பனிச்சேகா, கிச்சகோ³சரபே⁴த³தோ;
ஸதிபட்டா²னநாமேன, சத்தாரோதி பகாஸிதா.
195.
உப்பன்னானுப்பன்னபாப-பஹானானுப்பாத³னாய ச;
அனுப்பன்னுப்பன்னேஹி வா, நிப்³ப³த்திஅபி⁴வுத்³தி⁴யா.
196.
பத³ஹந்தஸ்ஸ
ஸம்மப்பதா⁴னநாமேன, சத்தாரோதி பகாஸிதா.
197.
இத்³தி⁴யா பாத³பூ⁴தத்தா, இத்³தி⁴பாதா³தி பா⁴ஸிதா;
ச²ந்தோ³ சித்தஞ்ச வீரியங், வீமங்ஸாதி சதுப்³பி³தா⁴.
198.
பஞ்ச ஸத்³தா⁴ ஸதி பஞ்ஞா, வீரியேகக்³க³தா ததா²;
இந்த்³ரியானிந்த்³ரியட்டே²ன, ப³லட்டே²ன ப³லானி ச.
199.
ஸதி த⁴ம்மவிசயோ ச, ததா² வீரியபீதியோ;
பஸ்ஸத்³தே⁴கக்³க³தாபெக்கா², பு³ஜ்ஜ²ந்தஸ்ஸங்க³பா⁴வதோ.
200.
பொ³ஜ்ஜ²ங்கா³தி
நிய்யானட்டே²ன மக்³க³ங்கா³, ஸம்மாதி³ட்டா²தி³அட்ட²தா⁴.
201.
ச²ஸங்க³ஹெத்த² வாயாமோ, ஸதிபஞ்ஞா ஸமீரிதா;
பஞ்சஸங்க³ஹிதா நாம, ஸமாதி⁴ சதுஸங்க³ஹோ.
202.
ஸத்³தா⁴ து³ஸங்க³ஹா வுத்தா, ஸேஸா ஏகேகஸங்க³ஹா;
இச்சேவங் ஸத்ததா⁴ பே⁴தோ³, போ³தி⁴பக்கி²யஸங்க³ஹோ.
203.
ஸதிபட்டா²னஸம்மப்பதா⁴னதோ இத்³தி⁴பாத³தோ;
இந்த்³ரியப³லபொ³ஜ்ஜ²ங்கா³, மக்³க³பே⁴தா³ ச பா⁴ஸிதா.
204.
ச²ந்தோ³ சித்தமுபெக்கா² ச, ஸத்³தா⁴பஸ்ஸத்³தி⁴பீதியோ;
ஸம்மாதி³ட்டி² ச ஸங்கப்போ, வாயாமோ விரதித்தயங்.
205.
ஸம்மாஸதி ஸமாதீ⁴தி, தீ³பிதா போ³தி⁴பக்கி²யா;
சுத்³த³ஸா த⁴ம்மதோ ஹொந்தி, ஸத்ததிங்ஸ பபே⁴த³தோ.
206.
யேஹி த⁴ம்மேஹி பு³ஜ்ஜ²ந்தோ, ஸச்சானி படிவிஜ்ஜ²தி;
ஸமத்தானுத்தரே ஹொந்தி, ந வா ஸங்கப்பபீதியோ.
207.
புப்³ப³பா⁴கே³பி லப்³ப⁴ந்தி, லோகியம்ஹி யதா²ரஹங்;
நிப்³பே³த⁴பா⁴வனாகாலே, ச²ப்³பி³ஸுத்³தி⁴பவத்தியங்.
208.
இச்சேவங்
ஸபா⁴வபே⁴த³பி⁴ன்னானங், ஸபா⁴க³த்தே²ஹி ஸங்க³ஹங்.
209.
பே⁴த³ஸங்க³ஹவிதூ³ஹி வண்ணிதங், பே⁴த³ஸங்க³ஹவிமுத்திஸாஸனே;
பே⁴த³ஸங்க³ஹனயத்த²முத்தமங், பே⁴த³ஸங்க³ஹமுக²ங் பகாஸிதங்.
210.
த⁴ம்மஸபா⁴வவிபா⁴க³பு³தே⁴வங், த⁴ம்மதி³ஸம்பதிஸாஸனத⁴ம்மே;
த⁴ம்மவிபூ⁴திவிபூ⁴ஸிதசித்தா, த⁴ம்மரஸாமதபா⁴கி³ ப⁴வந்தி.
இதி நாமரூபபரிச்சே²தே³ பே⁴த³ஸங்க³ஹவிபா⁴கோ³ நாம
ததியோ பரிச்சே²தோ³.