5. வீதி²முத்தபரிச்சே²த³வண்ணனா
1. எத்தாவதா வீதி²ஸங்க³ஹங் த³ஸ்ஸெத்வா இதா³னி வீதி²முத்தஸங்க³ஹங் த³ஸ்ஸேதுமாரப⁴ந்தோ ஆஹ ‘‘வீதி²சித்தவஸேனேவ’’ந்த்யாதி³. ஏவங் யதா²வுத்தனயேன வீதி²சித்தவஸேன பவத்தியங் படிஸந்தி⁴தோ அபரபா⁴கே³ சுதிபரியோஸானங் பவத்திஸங்க³ஹோ நாம ஸங்க³ஹோ உதீ³ரிதோ, இதா³னி தத³னந்தரங் ஸந்தி⁴யங் படிஸந்தி⁴காலே, ததா³ஸன்னதாய தங்க³ஹணேனேவ க³ஹிதசுதிகாலே ச பவத்திஸங்க³ஹோ வுச்சதீதி யோஜனா.
பூ⁴மிசதுக்கவண்ணனா
3. புஞ்ஞஸம்மதா அபாயபூ⁴மி. அனேகவித⁴ஸம்பத்திஅதி⁴ட்டா²னதாய ஸோப⁴னா க³ந்தப்³ப³தோ உபபஜ்ஜிதப்³ப³தோ க³தீதி ஸுக³தி, காமதண்ஹாஸஹசரிதா ஸுக³தி காமஸுக³தி, ஸாயேவ பூ⁴மீதி காமஸுக³திபூ⁴மி. ஏவங் ஸேஸேஸுபி.
4. அயதோ ஸுக²தோ நிக்³க³தோதி நிரயோ. திரோ அஞ்சிதாதி திரச்சா²னா, தேஸங் யோனி திரச்சா²னயோனி. யவந்தி தாய ஸத்தா அமிஸ்ஸிதாபி ஸமானஜாதிதாய மிஸ்ஸிதா விய ஹொந்தீதி யோனி. ஸா பன அத்த²தோ க²ந்தா⁴னங் பவத்திவிஸேஸோ. பகட்டே²ன ஸுக²தோ இதா க³தாதி பேதா, நிஜ்ஜா²மதண்ஹிகாதி³பே⁴தா³னங் பேதானங் விஸயோ பெத்திவிஸயோ அஸுரா, பேதாஸுரா. இதரே பன ந ஸுரா ஸுரப்படிபக்கா²தி அஸுரா, இத⁴ ச பேதாஸுரானமேவ க³ஹணங் இதரேஸங் தாவதிங்ஸேஸு க³ஹணஸ்ஸ இச்சி²தத்தா. ததா² ஹி வுத்தங் ஆசரியேன –
‘‘தாவதிங்ஸேஸு தே³வேஸு, வேபசித்தாஸுரா க³தா’’தி; (நாம॰ பரி॰ 438);
5. ஸதிஸூரபா⁴வப்³ரஹ்மசரியயொக்³யதாதி³கு³ணேஹி உக்கட்ட²மனதாய மனோ உஸ்ஸன்னங் ஏதேஸந்தி மனுஸ்ஸா. ததா² ஹி பரமஸதினேபக்காதி³ப்பத்தா பு³த்³தா⁴த³யோபி மனுஸ்ஸபூ⁴தாயேவ. ஜம்பு³தீ³பவாஸினோ செத்த² நிப்பரியாயதோ மனுஸ்ஸா. தேஹி பன ஸமானரூபாதி³தாய ஸத்³தி⁴ங் பரித்ததீ³பவாஸீஹி இதரமஹாதீ³பவாஸினோபி ‘‘மனுஸ்ஸா’’தி வுச்சந்தி. லோகியா பன ‘‘மனுனோ ஆதி³க²த்தியஸ்ஸ அபச்சங் புத்தாதி மனுஸ்ஸா’’தி வத³ந்தி. மனுஸ்ஸானங் நிவாஸபூ⁴தா பூ⁴மி இத⁴ மனுஸ்ஸா. ஏவங் ஸேஸேஸுபி.
சதூஸு மஹாராஜேஸு ப⁴த்தி ஏதேஸங், சதுன்னங் வா மஹாராஜானங் நிவாஸட்டா²னபூ⁴தே சாதுமஹாராஜே ப⁴வாதி சாதுமஹாராஜிகா. மாகே⁴ன மாணவேன ஸத்³தி⁴ங் தெத்திங்ஸ ஸஹபுஞ்ஞகாரினோ எத்த² நிப்³ப³த்தாதி தங்ஸஹசரிதட்டா²னங் தெத்திங்ஸங், ததே³வ தாவதிங்ஸங், தங்னிவாஸோ ஏதேஸந்தி தாவதிங்ஸாதி வத³ந்தி. யஸ்மா பன யாமா. அத்தனோ ஸிரிஸம்பத்தியா துஸங் பீதிங் இதா க³தாதி துஸிதா. நிம்மானே ரதி ஏதேஸந்தி நிம்மானரதினோ. பரனிம்மிதேஸு போ⁴கே³ஸு அத்தனோ வஸங் வத்தெந்தீதி பரனிம்மிதவஸவத்தினோ.
7. மஹாப்³ரஹ்மானங் பரிசாரிகத்தா தேஸங் பரிஸதி ப⁴வாதி ப்³ரஹ்மபாரிஸஜ்ஜா. தேஸங் புரோஹிதட்டா²னே டி²தத்தா ப்³ரஹ்மபுரோஹிதா. தேஹி தேஹி ஜா²னாதீ³ஹி கு³ணவிஸேஸேஹி ப்³ரூஹிதா பரிவுத்³தா⁴தி ப்³ரஹ்மானோ, வண்ணவந்ததாய சேவ தீ³கா⁴யுகதாதீ³ஹி ச ப்³ரஹ்மபாரிஸஜ்ஜாதீ³ஹி மஹந்தா ப்³ரஹ்மானோதி மஹாப்³ரஹ்மானோ. தயோபேதே பணீதரதனபபா⁴வபா⁴ஸிதஸமானதலவாஸினோ.
8. உபரிமேஹி பரித்தா ஆபா⁴ ஏதேஸந்தி பரித்தாபா⁴. அப்பமாணா ஆபா⁴ ஏதேஸந்தி அப்பமாணாபா⁴. வலாஹகதோ விஜ்ஜு விய இதோ சிதோ ச ஆபா⁴ ஸரதி நிஸ்ஸரதி ஏதேஸங் ஸப்பீதிகஜ்ஜா²னநிப்³ப³த்தக்க²ந்த⁴ஸந்தானத்தாதி ஆப⁴ஸ்ஸரா. த³ண்ட³தீ³பிகாய வா அச்சி விய ஏதேஸங் ஸரீரதோ ஆபா⁴ சி²ஜ்ஜித்வா சி²ஜ்ஜித்வா பதந்தீ விய ஸரதி நிஸ்ஸரதீதி ஆப⁴ஸ்ஸரா. யதா²வுத்தாய வா பபா⁴ய ஆபா⁴ஸனஸீலாதி ஆப⁴ஸ்ஸரா. ஏதேபி தயோ பணீதரதனபபா⁴வபா⁴ஸிதேகதலவாஸினோ.
9. ஸுபா⁴தி ஏகக்³க⁴னா அசலா ஸரீராபா⁴ வுச்சதி, ஸா உபரிப்³ரஹ்மேஹி பரித்தா ஏதேஸந்தி பரித்தஸுபா⁴. அப்பமாணா ஸுபா⁴ ஏதேஸந்தி அப்பமாணஸுபா⁴. பபா⁴ஸமுத³யஸங்கா²தேஹி ஸுபே⁴ஹி கிண்ணா ஆகிண்ணாதி ஸுப⁴கிண்ஹா. ‘‘ஸுபா⁴கிண்ணா’’தி ச வத்தப்³பே³ ஆ-ஸத்³த³ஸ்ஸ ரஸ்ஸத்தங், அந்திமண-காரஸ்ஸ ச ஹ-காரங் கத்வா ‘‘ஸுப⁴கிண்ஹா’’தி வுத்தங். ஏதேபி பணீதரதனபபா⁴வபா⁴ஸிதேகதலவாஸினோ.
10. ஜா²னப்பபா⁴வனிப்³ப³த்தங் வேஹப்ப²லா. ஸஞ்ஞாவிராக³பா⁴வனானிப்³ப³த்தரூபஸந்ததிமத்தத்தா நத்தி² ஸஞ்ஞா, தங்முகே²ன வுத்தாவஸேஸா அரூபக்க²ந்தா⁴ ச ஏதேஸந்தி அஸஞ்ஞா. தேயேவ ஸத்தாதி அஸஞ்ஞஸத்தா. ஏதேபி பணீதரதனபபா⁴வபா⁴ஸிதேகதலவாஸினோ. ஸுத்³தா⁴னங் ஸுத்³தா⁴வாஸா.
11. இமேஸு பன பட²மதலவாஸினோ அப்பகேன காலேன அத்தனோ டா²னங் ந விஜஹந்தீதி அவிஹா. து³தியதலவாஸினோ ந கேனசி தப்பந்தீதி அதப்பா. ததியதலவாஸினோ பரமஸுந்த³ரரூபத்தா ஸுகே²ன தி³ஸ்ஸந்தீதி ஸுத³ஸ்ஸா. சதுத்த²தலவாஸினோ ஸுபரிஸுத்³த⁴த³ஸ்ஸனத்தா ஸுகே²ன பஸ்ஸந்தீதி ஸுத³ஸ்ஸினோ. பஞ்சமதலவாஸினோ பன உக்கட்ட²ஸம்பத்திகத்தா நத்தி² ஏதேஸங் கனிட்ட²பா⁴வோதி அகனிட்டா².
12. ஆகாஸானஞ்சாயதனே பவத்தா பட²மாருப்பவிபாகபூ⁴தசதுக்க²ந்தா⁴ ஏவ, தேஹி பரிச்சி²ன்னஓகாஸோ வா ஆகாஸானஞ்சாயதனபூ⁴மி. ஏவங் ஸேஸேஸுபி.
13. புது²ஜ்ஜனா, ஸோதாபன்னா ச ஸகதா³கா³மினோ சாபி புக்³க³லா ஸுத்³தா⁴வாஸேஸு ஸப்³ப³தா² ந லப்³ப⁴ந்தீதி ஸம்ப³ந்தோ⁴. புது²ஜ்ஜனாதீ³னஞ்ச படிக்கே²பேன அனாகா³மிஅரஹந்தானமேவ தத்த² லாபோ⁴ வுத்தோ ஹோதி.
14. ஸேஸட்டா²னேஸூதி ஸுத்³தா⁴வாஸஅபாயஅஸஞ்ஞிவஜ்ஜிதேஸு ஸேஸட்டா²னேஸு அரியா, அனரியாபி ச லப்³ப⁴ந்தி.
பூ⁴மிசதுக்கவண்ணனா நிட்டி²தா.
படிஸந்தி⁴சதுக்கவண்ணனா
16. ஓக்கந்திக்க²ணேதி
17. ஜாதியா அந்தோ⁴ ஜச்சந்தோ⁴. கிஞ்சாபி ஜாதிக்க²ணே அண்ட³ஜஜலாபு³ஜா ஸப்³பே³பி அசக்கு²காவ ஜச்சந்தோ⁴ நாம. அபரே பன ‘‘ஜச்சந்தோ⁴தி பஸூதியங்யேவ அந்தோ⁴, மாதுகுச்சி²யங் அந்தோ⁴ ஹுத்வா நிக்க²ந்தோதி அத்தோ², தேன து³ஹேதுகதிஹேதுகானங் மாதுகுச்சி²யங் சக்கு²ஸ்ஸ அவிபஜ்ஜனங் ஸித்³த⁴’’ந்தி வத³ந்தி. ஜச்சந்தா⁴தீ³னந்தி எத்த² ஆதி³க்³க³ஹணேன ஜச்சப³தி⁴ரஜச்சமூக³ஜச்சஜளஜச்சும்மத்தகபண்ட³கஉப⁴தொப்³யஞ்ஜனகனபுங்ஸகமம்மாதீ³னங் ஸங்க³ஹோ. அபரே பன ‘‘ஏகச்சே அஹேதுகபடிஸந்தி⁴கா அவிகலிந்த்³ரியா ஹுத்வா தோ²கங் விசாரணபகதிகா ஹொந்தி, தாதி³ஸானம்பி ஆதி³ஸத்³தே³ன ஸங்க³ஹோ’’தி வத³ந்தி. பு⁴ம்மதே³வே ஸிதா நிஸ்ஸிதா தக்³க³திகத்தாதி பு⁴ம்மஸ்ஸிதா. ஸுக²ஸமுஸ்ஸயதோ வினிபாதாதி வினிபாதிகா.
18. ஸப்³ப³த்தா²பி காமஸுக³தியந்தி தே³வமனுஸ்ஸவஸேன ஸத்தவிதா⁴யபி காமஸுக³தியங்.
21. தேஸூதி யதா²வுத்தபடிஸந்தி⁴யுத்தேஸு புக்³க³லேஸு, அபாயாதீ³ஸு வா. ஆயுப்பமாணக³ணனாய நியமோ நத்தி² கேஸஞ்சி சிராயுகத்தா, கேஸஞ்சி சிரதராயுகத்தா ச. ததா²சாஹு –
‘‘ஆபாயிகமனுஸ்ஸாயு-
பரிச்சே²தோ³ ந விஜ்ஜதி;
ததா² ஹி காலோ மந்தா⁴தா,
யக்கா² கேசி சிராயுனோ’’தி. –
அபாயேஸு
22. தி³ப்³பா³னி பஞ்சவஸ்ஸஸதானீதி மனுஸ்ஸானங் பஞ்ஞாஸ வஸ்ஸானி ஏகதி³னங், தத³னுரூபதோ மாஸஸங்வச்ச²ரே
‘‘யானி பஞ்ஞாஸ வஸ்ஸானி, மனுஸ்ஸானங் தி³னோ தஹிங்;
திங்ஸரத்திதி³வோ மாஸோ, மாஸா த்³வாத³ஸ ஸங்வச்ச²ரங்;
தேன ஸங்வச்ச²ரேனாயு, தி³ப்³ப³ங் பஞ்சஸதங் மத’’ந்தி.
மனுஸ்ஸக³ணனாயாதி மனுஸ்ஸானங் ஸங்வச்ச²ரக³ணனாய. ததோ சதுக்³கு³ணந்தி சாதுமஹாராஜிகானங் பஞ்ஞாஸமானுஸ்ஸகவஸ்ஸபரிமிதங் தி³வஸங், தி³ப்³பா³னி ச பஞ்சவஸ்ஸஸதானி தி³கு³ணங் கத்வா தி³ப்³ப³வஸ்ஸஸஹஸ்ஸானி தாவதிங்ஸானங் ஸம்ப⁴வதீதி ஏவங் தி³வஸஸங்வச்ச²ரதி³கு³ணவஸேன சதுக்³கு³ணங், தங் பன தி³ப்³ப³க³ணனாய வஸ்ஸஸஹஸ்ஸங், மனுஸ்ஸக³ணனாய ஸட்டி²வஸ்ஸஸதஸஹஸ்ஸாதி⁴கதிகோடிப்பமாணங் ஹோதி. ததோ சதுக்³கு³ணங் யாமானந்தி தாவதிங்ஸானமாயுப்பமாணதோ வுத்தனயேன சதுக்³கு³ணங், தி³ப்³ப³க³ணனாய த்³விஸஹஸ்ஸங், மனுஸ்ஸக³ணனாய சத்தாலீஸவஸ்ஸஸதஸஹஸ்ஸாதி⁴கா சுத்³த³ஸ வஸ்ஸகோடியோ ஹொந்தி. ததோ சதுக்³கு³ணங் துஸிதானந்தி தி³ப்³பா³னி சத்தாரி வஸ்ஸஸஹஸ்ஸானி, மனுஸ்ஸக³ணனாய ஸட்டி²வஸ்ஸஸதஸஹஸ்ஸாதி⁴கா ஸத்தபஞ்ஞாஸ ததோ சதுக்³கு³ணங் நிம்மானரதீனந்தி தி³ப்³பா³னி அட்ட²வஸ்ஸஸஹஸ்ஸானி, மனுஸ்ஸக³ணனாய த்³வே வஸ்ஸகோடிஸதானி சத்தாலீஸவஸ்ஸஸதஸஹஸ்ஸாதி⁴கா திங்ஸ வஸ்ஸகோடியோ ச. ததோ சதுக்³கு³ணங் பரனிம்மிதவஸவத்தீனந்தி தி³ப்³பா³னி ஸோளஸ வஸ்ஸஸஹஸ்ஸானி.
23. மனுஸ்ஸக³ணனங் பன ஸயமேவ த³ஸ்ஸெந்தோ ஆஹ ‘‘நவஸதஞ்சா’’த்யாதி³. வஸ்ஸானங் ஸம்ப³ந்தி⁴ நவஸதங் ஏகவீஸ கோடியோ, ததா² ஸட்டி² ச வஸ்ஸஸதஸஹஸ்ஸானி வஸவத்தீஸு ஆயுப்பமாணந்தி ஸம்ப³ந்தோ⁴.
25. து³தியஜ்ஜா²னபூ⁴மியந்தி சதுக்கனயவஸேன வுத்தங். ததோ பரங் பவத்தியங், சவனகாலே ச ததா²ரூபமேவ ப⁴வங்க³சுதிவஸேன பவத்தித்வா நிருஜ்ஜ²தீதி யோஜனா.
29. தேஸூதி தாஹி க³ஹிதபடிஸந்தி⁴கேஸு ப்³ரஹ்மேஸு. கப்பஸ்ஸாதி அஸங்க்²யெய்யகப்பஸ்ஸ. ந ஹி ப்³ரஹ்மபாரிஸஜ்ஜாதீ³னங் திண்ணங் மஹாகப்பவஸேன ஆயுபரிச்சே²தோ³ ஸம்ப⁴வதி ஏககப்பேபி தேஸங் அவினாஸாபா⁴வேன
‘‘ஸத்த ஸத்தக்³கி³னா வாரா, அட்ட²மே அட்ட²மே த³கா;
சதுஸட்டி² யதா³ புண்ணா, ஏகோ வாயுவரோ ஸியா.
‘‘அக்³கி³னாப⁴ஸ்ஸரா
வேஹப்ப²லதோ வாதேன, ஏவங் லோகோ வினஸ்ஸதீ’’தி. –
தஸ்மா திண்ணம்பி பட²மஜ்ஜா²னதலானங் ஏககப்பேபி அவினாஸாபா⁴வதோ ஸகலகப்பே தேஸங் ஸம்ப⁴வோ நத்தீ²தி அஸங்க்²யெய்யகப்பவஸேன தேஸங் ஆயுபரிச்சே²தோ³ த³ட்ட²ப்³போ³. து³தியஜ்ஜா²னாதி³தலதோ பட்டா²ய பன பரிபுண்ணஸ்ஸ மஹாகப்பஸ்ஸ வஸேன, ந அஸங்க்²யெய்யகப்பவஸேன. அஸங்க்²யெய்யகப்போதி ச யோஜனாயாமவித்தா²ரதோ ஸேதஸாஸபராஸிதோ வஸ்ஸஸதவஸ்ஸஸதச்சயேன ஏகேகபீ³ஜஸ்ஸ ஹரணேன ஸாஸபராஸினோ பரிக்க²யேபி அக்க²யஸபா⁴வஸ்ஸ மஹாகப்பஸ்ஸ சதுத்த²பா⁴கோ³. ஸோ பன ஸத்த²ரோக³து³ப்³பி⁴க்கா²னங் அஞ்ஞதரஸங்வட்டேன ப³ஹூஸு வினாஸமுபக³தேஸு அவஸிட்ட²ஸத்தஸந்தானப்பவத்தகுஸலகம்மானுபா⁴வேன த³ஸவஸ்ஸதோ பட்டா²ய அனுக்கமேன அஸங்க்²யெய்யாயுகப்பமாணேஸு ஸத்தேஸு புன அஸத்³த⁴ம்மஸமாதா³னவஸேன கமேன பரிஹாயித்வா த³ஸவஸ்ஸாயுகேஸு ஜாதேஸு ரோகா³தீ³னங் அஞ்ஞதரஸங்வட்டேன ஸத்தானங் வினாஸப்பத்தியாவ ‘‘அயமேகோ அந்தரகப்போ’’தி ஏவங் பரிச்சி²ன்னஸ்ஸ அந்தரகப்பஸ்ஸ வஸேன சதுஸட்டி²அந்தரகப்பப்பமாணோ ஹோதி, ‘‘வீஸதிஅந்தரகப்பப்பமாணோ’’தி ச வத³ந்தி.
45. ஆகாஸானஞ்சாயதனங் உபக³ச்ச²ந்தீதி ஆகாஸானஞ்சாயதனூபகா³.
49. ஏகமேவாதி பூ⁴மிதோ, ஜாதிதோ, ஸம்பயுத்தத⁴ம்மதோ, ஸங்கா²ரதோ ச ஸமானமேவ. ஏகஜாதியந்தி ஏகஸ்மிங் ப⁴வே.
படிஸந்தி⁴சதுக்கவண்ணனா நிட்டி²தா.
கம்மசதுக்கவண்ணனா
50. இதா³னி ‘‘ஜனக’’ந்த்யாதி³ ஆரத்³த⁴ங், ஜனயதீதி ஜனகங். உபத்த²ம்பே⁴தீதி உபத்த²ம்ப⁴கங். உபக³ந்த்வா பீளேதீதி உபபீளகங். உபக³ந்த்வா கா⁴தேதீதி உபகா⁴தகங்.
தத்த² படிஸந்தி⁴பவத்தீஸு விபாககடத்தாரூபானங் நிப்³ப³த்தகா குஸலாகுஸலசேதனா ஜனகங் நாம. ஸயங் விபாகங் நிப்³ப³த்தேதுங் அஸக்கொந்தம்பி கம்மந்தரஸ்ஸ சிரதரவிபாகனிப்³ப³த்தனே பச்சயபூ⁴தங், விபாகஸ்ஸேவ வா ஸுக²து³க்க²பூ⁴தஸ்ஸ விச்சே²த³பச்சயானுப்பத்தியா, உபப்³ரூஹனபச்சயுப்பத்தியா ச ஜனகஸாமத்தி²யானுரூபங் சிரதரப்பவத்திபச்சயபூ⁴தங் குஸலாகுஸலகம்மங் உபத்த²ம்ப⁴கங் நாம. கம்மந்தரஜனிதவிபாகஸ்ஸ ப்³யாதி⁴தா⁴துஸமதாதி³னிமித்தவிபா³த⁴னேன சிரதரப்பவத்திவினிப³ந்த⁴கங் யங் கிஞ்சி கம்மங் உபபீளகங் நாம. து³ப்³ப³லஸ்ஸ பன கம்மஸ்ஸ ஜனகஸாமத்தி²யங் உபஹச்ச விச்சே²த³கபச்சயுப்பாத³னேன தஸ்ஸ விபாகங் படிபா³ஹித்வா ஸயங் விபாகனிப்³ப³த்தககம்மங் உபகா⁴தகங் நாம.
ஜனகோபகா⁴தகானஞ்ஹி அயங் விஸேஸோ – ஜனகங் கம்மந்தரஸ்ஸ விபாகங் அனுபச்சி²ந்தி³த்வாவ விபாகங் ஜனேதி, உபகா⁴தகங் உபச்சே²த³னபுப்³ப³கந்தி இத³ங் தாவ அட்ட²கதா²ஸு (விஸுத்³தி⁴॰ 2.687; அ॰ நி॰ அட்ட²॰ 2.3.34) ஸன்னிட்டா²னங். அபரே பன ஆசரியா ‘‘உபபீளககம்மங் ப³ஹ்வாபா³த⁴தாதி³பச்சயோபஸங்ஹாரேன கம்மந்தரஸ்ஸ விபாகங் அந்தரந்தரா விபா³த⁴தி. உபகா⁴தகங் பன தங் ஸப்³ப³ஸோ உபச்சி²ந்தி³த்வா அஞ்ஞஸ்ஸ ஓகாஸங் தே³தி, ந பன ஸயங் விபாகனிப்³ப³த்தகங். ஏவஞ்ஹி ஜனகதோ இமஸ்ஸ விஸேஸோ ஸுபாகடோ’’தி வத³ந்தி. கிச்சவஸேனாதி ஜனநஉபத்த²ம்ப⁴னஉபபீளனஉபச்சே²த³னகிச்சவஸேன.
51. க³ருகந்தி மஹாஸாவஜ்ஜங், மஹானுபா⁴வஞ்ச அஞ்ஞேன கம்மேன படிபா³ஹிதுங் அஸக்குணெய்யகம்மங். ஆஸன்னந்தி மரணகாலே அனுஸ்ஸரிதங், ததா³ கதஞ்ச. ஆசிண்ணந்தி அபி⁴ண்ஹஸோ கதங் கடத்தாகம்மந்தி க³ருகாதி³பா⁴வங் அஸம்பத்தங் கதமத்ததோயேவ கம்மந்தி வத்தப்³ப³கம்மங்.
தத்த² குஸலங் வா ஹோது அகுஸலங் வா, க³ருகாக³ருகேஸு யங் க³ருகங் அகுஸலபக்கே² மாதுகா⁴தகாதி³கம்மங் ‘‘பாகதா³னபரியாயேனா’’தி, விபாகதா³னானுக்கமேனாத்யத்தோ². அபி⁴த⁴ம்மாவதாராதீ³ஸு பன ஆஸன்னதோ ஆசிண்ணங் பட²மங் விபச்சந்தங் கத்வா வுத்தங். யதா² பன கோ³க³ணபரிபுண்ணஸ்ஸ வஜஸ்ஸ த்³வாரே விவடே அபரபா⁴கே³ த³ம்மக³வப³லவக³வேஸு ஸந்தேஸுபி யோ வஜத்³வாரஸ்ஸ ஆஸன்னோ ஹோதி, அந்தமஸோ து³ப்³ப³லஜரக்³க³வோபி, ஸோயேவ பட²மதரங் நிக்க²மதி, ஏவங் க³ருகதோ அஞ்ஞேஸு குஸலாகுஸலேஸு ஸந்தேஸுபி மரணகாலஸ்ஸ ஆஸன்னத்தா ஆஸன்னமேவ பட²மங் விபாகங் தே³தீதி இத⁴ தங் பட²மங் வுத்தங்.
52. தி³ட்ட²த⁴ம்மோ பச்சக்க²பூ⁴தோ பச்சுப்பன்னோ அத்தபா⁴வோ, தத்த² வேதி³தப்³ப³ங் விபாகானுப⁴வனவஸேனாதி தி³ட்ட²த⁴ம்மவேத³னீயங். தி³ட்ட²த⁴ம்மதோ அனந்தரங் உபபஜ்ஜித்வா வேதி³தப்³ப³ங் உபபஜ்ஜவேத³னீயங். அபரே அபரே தி³ட்ட²த⁴ம்மதோ அஞ்ஞஸ்மிங் யத்த² கத்த²சி அத்தபா⁴வே வேதி³தப்³ப³ங் கம்மங் அபராபரியவேத³னீயங். அஹோஸி ஏவ கம்மங் அஹோஸிகம்மங்.
தத்த² படிபக்கே²ஹி அனபி⁴பூ⁴ததாய, பச்சயவிஸேஸேன படிலத்³த⁴விஸேஸதாய ச ப³லவபா⁴வப்பத்தா தாதி³ஸஸ்ஸ புப்³பா³பி⁴ஸங்கா²ரஸ்ஸ வஸேன ஸாதிஸயா ஹுத்வா தஸ்மிங்யேவ அத்தபா⁴வே ப²லதா³யினீ பட²மஜவனசேதனா தி³ட்ட²த⁴ம்மவேத³னீயங் நாம. ஸா ஹி வுத்தப்பகாரேன ப³லவஜனஸந்தானே கு³ணவிஸேஸயுத்தேஸு உபகாரானுபகாரவஸப்பவத்தியா, ஆஸேவனாலாபே⁴ன அப்பவிபாகதாய ச இதரத்³வயங் விய பவத்தஸந்தானுபரமாபெக்க²ங், ஓகாஸலாபா⁴பெக்க²ஞ்ச கம்மங் ந ஹோதீதி இதே⁴வ புப்ப²மத்தங் விய பவத்திவிபாகமத்தங் அஹேதுகப²லங் தே³தி. அத்த²ஸாதி⁴கா பன ஸத்தமஜவனசேதனா ஸன்னிட்டா²பகசேதனாபூ⁴தா வுத்தனயேன படிலத்³த⁴விஸேஸா அனந்தரத்தபா⁴வே விபாகதா³யினீ உபபஜ்ஜவேத³னீயங் நாம. ஸா ச படிஸந்தி⁴ங் த³த்வாவ பவத்திவிபாகங் தே³தி. படிஸந்தி⁴யா அபராபரியவேத³னியங் நாம. ஸகஸககாலாதீதங் பன புரிமகம்மத்³வயங், ததியம்பி ச ஸங்ஸாரப்பவத்தியா வொச்சி²ன்னாய அஹோஸிகம்மங் நாம.
பாககாலவஸேனாதி பச்சுப்பன்னே, தத³னந்தரே, யதா³ கதா³சீதி ஏவங் புரிமானங் திண்ணங் யதா²பரிச்சி²ன்னகாலவஸேன, இதரஸ்ஸ தங்காலாபா⁴வவஸேன ச. அஹோஸிகம்மஸ்ஸ ஹி காலாதிக்கமதோவ தங் வோஹாரோ.
53. பாகடா²னவஸேனாதி
54. இதா³னி அகுஸலாதி³கம்மானங் காயகம்மத்³வாராதி³வஸேன பவத்திங், தங்னித்³தே³ஸமுகே²ன ச தேஸங் பாணாதிபாதாதி³வஸேன த³ஸவிதா⁴தி³பே⁴த³ஞ்ச த³ஸ்ஸேதுங் ‘‘தத்த² அகுஸல’’ந்த்யாதி³ ஆரத்³த⁴ங். காயத்³வாரே பவத்தங் கம்மங் காயகம்மங். ஏவங் வசீகம்மாதீ³னி.
55. பாணஸ்ஸ ஸணிகங் பதிதுங் அத³த்வா அதீவ பாதனங் பாணாதிபாதோ. காயவாசாஹி அதி³ன்னஸ்ஸ ஆதா³னங் அதி³ன்னாதா³னங். மேது²னவீதிக்கமஸங்கா²தேஸு காமேஸு மிச்சா² சரணங் காமேஸு மிச்சா²சாரோ.
தத்த² பாணோதி வோஹாரதோ ஸத்தோ, பரமத்த²தோ ஜீவிதிந்த்³ரியங். தஸ்மிங் பாணே பாணஸஞ்ஞினோ ஜீவிதிந்த்³ரியுபச்சே²த³கப்பயோக³ஸமுட்டா²பிகா வத⁴கசேதனா பாணாதிபாதோ. பரப⁴ண்டே³ ததா²ஸஞ்ஞினோ ததா³தா³யகப்பயோக³ஸமுட்டா²பிகா தெ²ய்யசேதனா அதி³ன்னாதா³னங். அஸத்³த⁴ம்மஸேவனவஸேன காயத்³வாரப்பவத்தா அக³ந்தப்³ப³ட்டா²னவீதிக்கமசேதனா காமேஸுமிச்சா²சாரோ நாம. ஸுராபானம்பி எத்தே²வ ஸங்க³ய்ஹதீதி வத³ந்தி ரஸஸங்கா²தேஸு காமேஸு மிச்சா²சாரபா⁴வதோ. காயவிஞ்ஞத்திஸங்கா²தே காயத்³வாரேதி காயேன அதி⁴ப்பாயவிஞ்ஞாபனதோ, ஸயஞ்ச காயேன விஞ்ஞெய்யத்தா காயவிஞ்ஞத்திஸங்கா²தே அபி⁴க்கமாதி³ஜனகசித்தஜவாயோதா⁴த்வாதி⁴ககலாபஸ்ஸ விகாரபூ⁴தே ஸந்த²ம்ப⁴னாதீ³னங் ஸஹகாரீகாரணபூ⁴தே சோபனகாயபா⁴வதோ, கம்மானங் பவத்திமுக²பா⁴வதோ ச காயத்³வாரஸங்கா²தே கம்மத்³வாரே.
கிஞ்சாபி ‘‘பா³ஹுல்லவுத்திதோ’’தி வுத்தங். காயகம்மஞ்ஹி காயத்³வாரேயேவ ப³ஹுலங் பவத்ததி, அப்பங் வசீத்³வாரே, தஸ்மா காயத்³வாரேயேவ ப³ஹுலங் பவத்தனதோ காயகம்மபா⁴வோ ஸித்³தோ⁴ வனசரகாதீ³னங் வனசரகாதி³பா⁴வோ விய. ததா² காயகம்மமேவ யேபு⁴ய்யேன காயத்³வாரே பவத்ததி, ந இதரானி, தஸ்மா காயகம்மஸ்ஸ யேபு⁴ய்யேன எத்தே²வ பவத்தனதோ காயகம்மத்³வாரபா⁴வோ ஸித்³தோ⁴ ப்³ராஹ்மணகா³மாதீ³னங் ப்³ராஹ்மணகா³மாதி³பா⁴வோ வியாதி நத்தி² கம்மத்³வாரவவத்தா²னே கோசி விப³ந்தோ⁴தி அயமெத்தா²தி⁴ப்பாயோ.
56. முஸாதி அபூ⁴தங் வத்து², தங் தச்ச²தோ வத³ந்தி ஏதேனாதி முஸாவாதோ³. பிஸதி ஸாமக்³கி³ங் ஸஞ்சுண்ணேதி விக்கி²பதி, பியபா⁴வங் ஸுஞ்ஞங் கரோதீதி வா பிஸுணா. அத்தானம்பி பரம்பி ப²ருஸங் கரோதி, ககசோ விய க²ரஸம்ப²ஸ்ஸாதி வா ப²ருஸா. ஸங் ஸுக²ங், ஹிதஞ்ச ப²லதி விஸரதி வினாஸேதீதி ஸம்ப²ங், அத்தனோ, பரேஸஞ்ச அனுபகாரங் யங் கிஞ்சி, தங் பலபதி ஏதேனாதி ஸம்ப²ப்பலாபோ.
தத்த² அபூ⁴தங் வத்து²ங் பூ⁴ததோ பரங் விஞ்ஞாபேதுகாமஸ்ஸ ததா² விஞ்ஞாபனப்பயோக³ஸமுட்டா²பிகா சேதனா முஸாவாதோ³. ஸோ பரஸ்ஸ அத்த²பே⁴த³கரோவ கம்மபதோ² ஹோதி, இதரோ பிஸுணவாசா, ஸாபி த்³வீஸு பி⁴ன்னேஸுயேவ கம்மபதோ². பரஸ்ஸ மம்மச்சே²த³கரவசீபயோக³ஸமுட்டா²பிகா ஏகந்தப²ருஸசேதனா ப²ருஸவாசா. ந ஹி சித்தஸண்ஹதாய ஸதி ப²ருஸவாசா நாம ஹோதி. ஸீதாஹரணாதி³அனத்த²விஞ்ஞாபனப்பயோக³ஸமுட்டா²பிகா ஸங்கிலிட்ட²சேதனா ஸம்ப²ப்பலாபோ, ஸோ பன பரேஹி தஸ்மிங் அனத்தே² க³ஹிதேயேவ கம்மபதோ². வசீவிஞ்ஞத்திஸங்கா²தே வசீத்³வாரேதி வாசாய அதி⁴ப்பாயங் விஞ்ஞாபேதி, ஸயஞ்ச வாசாய விஞ்ஞாயதீதி வசீவிஞ்ஞத்திஸங்கா²தே வசீபே⁴த³கரப்பயோக³ஸமுட்டா²பகசித்தஸமுட்டா²னபத²வீதா⁴த்வாதி⁴ககலாபஸ்ஸ பா³ஹுல்லவுத்திதோதி இத³ங் வுத்தனயமேவ.
57. பரஸம்பத்திங் அபி⁴முக²ங் ஜா²யதி லோப⁴வஸேன சிந்தேதீதி அபி⁴ஜ்ஜா². ப்³யாபஜ்ஜதி ஹிதஸுக²ங் ஏதேனாதி ப்³யாபாதோ³. மிச்சா² விபரீததோ பஸ்ஸதீதி மிச்சா²தி³ட்டி².
தத்த² ‘‘அஹோ வத இத³ங் மம ஸியா’’தி ஏவங் பரப⁴ண்டா³பி⁴ஜ்ஜா²யனங் அபி⁴ஜ்ஜா², ஸா பரப⁴ண்ட³ஸ்ஸ அத்தனோ நாமனேனேவ கம்மபதோ² ஹோதி. ‘‘அஹோ வதாயங் ஸத்தோ வினஸ்ஸெய்யா’’தி ஏவங் மனோபதோ³ஸோ ப்³யாபாதோ³. ‘‘நத்தி² தி³ன்ன’’ந்த்யாதி³னா நயேன விபரீதத³ஸ்ஸனங் மிச்சா²தி³ட்டி². எத்த² பன நத்தி²கஅஹேதுகஅகிரியதி³ட்டீ²ஹியேவ கம்மபத²பே⁴தோ³. இமேஸங் பன அங்கா³தி³வவத்தா²னவஸேன பபஞ்சோ தத்த² தத்த² (தீ³॰ நி॰ அட்ட²॰ 1.8; த⁴॰ ஸ॰ அட்ட²॰ 1 அகுஸலகம்மபத²கதா²; பாரா॰ அட்ட²॰ 2.172) ஆக³தனயேன த³ட்ட²ப்³போ³. அஞ்ஞத்ராபி விஞ்ஞத்தியாதி காயவசீவிஞ்ஞத்திங் வினாபி, தங் அஸமுட்டா²பெத்வாபீத்யத்தோ². விஞ்ஞத்திஸமுட்டா²பகசித்தஸம்பயுத்தா செத்த² அபி⁴ஜ்ஜா²த³யோ சேதனாபக்கி²காவ ஹொந்தி.
58. தோ³ஸமூலேன ஜாயந்தீதி ஸஹஜாதாதி³பச்சயேன தோ³ஸஸங்கா²தமூலேன, தோ³ஸமூலகசித்தேன வா ஜாயந்தி, ந லோப⁴மூலாதீ³ஹி. ஹஸமானாபி ஹி ராஜானோ தோ³ஸசித்தேனேவ பாணவத⁴ங் ஆணாபெந்தி, ததா² ப²ருஸவாசாப்³யாபாதே³ஸுபி யதா²ரஹங் த³ட்ட²ப்³ப³ங். மிச்சா²த³ஸ்ஸனஸ்ஸ அபி⁴னிவிஸிதப்³ப³வத்தூ²ஸு லோப⁴புப்³ப³ங்க³மமேவ அபி⁴னிவிஸனதோ ஆஹ ‘‘மிச்சா²தி³ட்டி² ச லோப⁴மூலேனா’’தி. ஸேஸானி சத்தாரிபி த்³வீஹி மூலேஹி ஸம்ப⁴வந்தீதி யோ தாவ அபி⁴மதங் வத்து²ங், அனபி⁴மதங் வா அத்தப³ந்து⁴பரித்தாணாதி³ப்பயோஜனங் ஸந்தா⁴ய ஹரதி, தஸ்ஸ அதி³ன்னாதா³னங் லோப⁴மூலேன ஹோதி. வேரனிய்யாதனத்த²ங் ஹரந்தஸ்ஸ தோ³ஸமூலேன. நீதிபாட²கப்பமாணதோ து³ட்ட²னிக்³க³ஹணத்த²ங் பரஸந்தகங் ஹரந்தானங் ராஜூனங், ப்³ராஹ்மணானஞ்ச ‘‘ஸப்³ப³மித³ங் ப்³ராஹ்மணானங் ராஜூஹி தி³ன்னங், தேஸங் பன ஸப்³ப³து³ப்³ப³லபா⁴வேன அஞ்ஞே பரிபு⁴ஞ்ஜந்தி, அத்தஸந்தகமேவ ப்³ராஹ்மணா பரிபு⁴ஞ்ஜந்தீ’’த்யாதீ³னி வத்வா ஸகஸஞ்ஞாய ஏவங் யங் கிஞ்சி ஹரந்தானங், கம்மப²லஸம்ப³ந்தா⁴பவாதீ³னஞ்ச மோஹமூலேன. ஏவங் முஸாவாதா³தீ³ஸுபி யதா²ரஹங் யோஜேதப்³ப³ங்.
63. ச²ஸு ஆரம்மணேஸு திவித⁴கம்மவஸேன உப்பஜ்ஜமானம்பேதங் திவித⁴னியமேன உப்பஜ்ஜதீதி ஆஹ ‘‘ததா² தா³னஸீலபா⁴வனாவஸேனா’’தி. த³ஸதா⁴ நித்³தி³ஸியமானானங் ஹி த்³வின்னங், புன த்³வின்னங், திண்ணஞ்ச அட்ட²கதா²தீ³ஸு (த⁴॰ ஸ॰ அட்ட²॰ 156-159) ஆக³தனயேன க³ஹேதப்³பா³.
65. தீ³யதி ஏதேனாதி தா³னங், பரிச்சாக³சேதனா. ஏவங் ஸேஸேஸுபி. ஸீலதீதி ஸீலங், காயவசீகம்மானி ஸமாத³ஹதி, ஸம்மா ட²பேதீத்யத்தோ², ஸீலயதி வா உபதா⁴ரேதீதி ஸீலங் பா⁴வனா. அபசாயதி பூஜாவஸேன ஸாமீசிங் கரோதி ஏதேனாதி அபசாயனங். தங்தங்கிச்சகரணே ப்³யாவடஸ்ஸ பா⁴வோ வெய்யாவச்சங். அத்தனோ ஸந்தானே நிப்³ப³த்தா பத்தி தீ³யதி ஏதேனாதி பத்திதா³னங். பத்திங் அனுமோத³தி ஏதாயாதி பத்தானுமோத³னா. த⁴ம்மங் ஸுணந்தி ஏதேனாதி த⁴ம்மஸ்ஸவனங். த⁴ம்மங் தே³ஸெந்தி ஏதாயாதி த⁴ம்மதே³ஸனா. தி³ட்டி²யா உஜுகரணங் தி³ட்டி²ஜுகம்மங்.
தத்த² ஸானுஸயஸந்தானவதோ பரேஸங் பூஜானுக்³க³ஹகாமதாய அத்தனோ விஜ்ஜமானவத்து²பரிச்சஜனவஸப்பவத்தசேதனா தா³னங் நாம, தா³னவத்து²பரியேஸனவஸேன, தி³ன்னஸ்ஸ ஸோமனஸ்ஸசித்தேன அனுஸ்ஸரணவஸேன ச பவத்தா புப்³ப³பச்சா²பா⁴க³சேதனா எத்தே²வ ஸமோதா⁴னங் க³ச்ச²ந்தி. ஏவங் ஸேஸேஸுபி யதா²ரஹங் த³ட்ட²ப்³ப³ங். நிச்சஸீலாதி³வஸேன பஞ்ச, அட்ட², த³ஸ வா ஸீலானி ஸமாதி³யந்தஸ்ஸ, பரிபூரெந்தஸ்ஸ, அஸமாதி³யித்வாபி ஸம்பத்தகாயவசீது³ச்சரிததோ விரமந்தஸ்ஸ, பப்³ப³ஜந்தஸ்ஸ, உபஸம்பத³மாளகே ஸங்வரங் ஸமாதி³யந்தஸ்ஸ, சதுபாரிஸுத்³தி⁴ஸீலங் பரிபூரெந்தஸ்ஸ ச பவத்தசேதனா ஸீலங் நாம. சத்தாலீஸாய கம்மட்டா²னேஸு, க²ந்தா⁴தீ³ஸு ச பூ⁴மீஸு பரிகம்மஸம்மஸனவஸப்பவத்தா அப்பனங் அப்பத்தா கொ³த்ரபு⁴பரியோஸானசேதனா பா⁴வனா நாம, நிரவஜ்ஜவிஜ்ஜாதி³பரியாபுணனசேதனாபி எத்தே²வ ஸமோதா⁴னங் க³ச்ச²தி.
வயஸா, கு³ணேஹி ச ஜெட்டா²னங் சீவராதீ³ஸு பச்சாஸாரஹிதேன அஸங்கிலிட்ட²ஜ்ஜா²ஸயேன பச்சுட்டா²னஆஸனாபி⁴னீஹாராதி³விதி⁴னா ப³ஹுமானகரணசேதனா அபசாயனங் நாம. தேஸமேவ, கி³லானானஞ்ச யதா²வுத்தஜ்ஜா²ஸயேன தங்தங்கிச்சகரணசேதனா வெய்யாவச்சங் நாம. அத்தனோ ஸந்தானே நிப்³ப³த்தஸ்ஸ புஞ்ஞஸ்ஸ பரேஹி பத்திதா³னங் நாம. பரேஹி தி³ன்னஸ்ஸ, அதி³ன்னஸ்ஸபி வா புஞ்ஞஸ்ஸ மச்சே²ரமலவினிஸ்ஸடேன சித்தேன அப்³பா⁴னுமோத³னசேதனா பத்தானுமோத³னா நாம த⁴ம்மஸ்ஸவனங் நாம, நிரவஜ்ஜவிஜ்ஜாதி³ஸவனசேதனாபி எத்தே²வ ஸங்க³ய்ஹதி. லாப⁴ஸக்காராதி³னிரபெக்க²தாய யோனிஸோ மனஸி கரோதோ ஹிதூபதே³ஸசேதனா த⁴ம்மதே³ஸனா நாம, நிரவஜ்ஜவிஜ்ஜாதி³உபதி³ஸனசேதனாபி எத்தே²வ ஸங்க³ஹங் க³ச்ச²தி. ‘‘அத்தி² தி³ன்ன’’ந்த்யாதி³னயப்பவத்தஸம்மாத³ஸ்ஸனவஸேன தி³ட்டி²யா உஜுகரணங் தி³ட்டி²ஜுகம்மங் நாம.
யதி³ ஏவங் ஞாணவிப்பயுத்தசித்துப்பாத³ஸ்ஸ தி³ட்டி²ஜுகம்மபுஞ்ஞகிரியபா⁴வோ ந லப்³ப⁴தீதி? நோ ந லப்³ப⁴தி புரிமபச்சி²மசேதனானம்பி தங்தங்புஞ்ஞகிரியாஸ்வேவ ஸங்க³ண்ஹனதோ. கிஞ்சாபி ஹி உஜுகரணவேலாயங் ஞாணஸம்பயுத்தமேவ சித்தங் ஹோதி, புரிமபச்சா²பா⁴கே³ பன ஞாணவிப்பயுத்தம்பி ஸம்ப⁴வதீதி தஸ்ஸபி தி³ட்டி²ஜுகம்மபா⁴வோ உபபஜ்ஜதீதி அலமதிப்பபஞ்சேன.
இமேஸு பன த³ஸஸு பத்திதா³னானுமோத³னா தா³னே ஸங்க³ஹங் க³ச்ச²ந்தி தங்ஸபா⁴வத்தா. தா³னம்பி ஹி இஸ்ஸாமச்சே²ரானங் படிபக்க²ங், ஏதேபி. தஸ்மா ஸமானப்படிபக்க²தாய ஏகலக்க²ணத்தா தே தா³னமயபுஞ்ஞகிரியவத்து²ம்ஹி ஸங்க³ய்ஹந்தி. அபசாயனவெய்யாவச்சாஸீலமயபுஞ்ஞேவ ஸங்க³ய்ஹந்தி சாரித்தஸீலபா⁴வதோ. தே³ஸனாஸவனதி³ட்டி²ஜுகா பன குஸலத⁴ம்மாஸேவனபா⁴வதோ பா⁴வனாமயே ஸங்க³ஹங் க³ச்ச²ந்தீதி (தீ³॰ நி॰ டீ॰ 3.305) ஆசரியத⁴ம்மபாலத்தே²ரேன வுத்தங். அபரே பன ‘‘தே³ஸெந்தோ, ஸுணந்தோ ச தே³ஸனானுஸாரேன ஞாணங் தீ³க⁴னிகாயட்ட²கதா²யங் (தீ³॰ நி॰ அட்ட²॰ 3.305; த⁴॰ ஸ॰ அட்ட²॰ 156-159 புஞ்ஞாகிரியவத்தா²தி³கதா²) ‘‘தி³ட்டி²ஜுகம்மங் ஸப்³பே³ஸங் நியமலக்க²ண’’ந்தி வுத்தங். ஏவங் தா³னஸீலபா⁴வனாவஸேன தீஸு இதரேஸங் ஸங்க³ண்ஹனதோ ஸங்கே²பதோ திவித⁴மேவ புஞ்ஞகிரியவத்து² ஹோதீதி த³ட்ட²ப்³ப³ங், ததா² சேவ ஆசரியேன ஹெட்டா² த³ஸ்ஸிதங்.
67. மனோகம்மமேவ தஞ்ச ரூபாவசரகுஸலங் பா⁴வனாமயங் தா³னாதி³வஸேன அப்பவத்தனதோ. அப்பனாப்பத்தங் புப்³ப³பா⁴க³ப்பவத்தானங் காமாவசரபா⁴வதோ. ஜா²னங்க³பே⁴தே³னாதி படிபதா³தி³பே⁴த³தோ அனேகவித⁴த்தேபி அங்கா³திக்கமவஸேன நிப்³ப³த்தஜ்ஜா²னங்க³பே⁴த³தோ பஞ்சவித⁴ங் ஹோதி.
68. ஆரம்மணபே⁴தே³னாதி கஸிணுக்³கா⁴டிமாகாஸங், ஆகாஸவிஸயங் மனோ, தத³பா⁴வோ, ததா³லம்ப³ங் விஞ்ஞாணந்தி சதுப்³பி³த⁴ந்தி இமேஸங் சதுன்னங் ஆரம்மணானங் பே⁴தே³ன.
69. எத்தா²தி இமேஸு பாகட்டா²னவஸேன சதுப்³பி³தே⁴ஸு கம்மேஸு. உத்³த⁴ச்சரஹிதந்தி உத்³த⁴ச்சஸஹக³தசேதனாரஹிதங் ஏகாத³ஸவித⁴ங் அகுஸலகம்மங். கிங் பனெத்த² காரணங் அதி⁴மொக்க²விரஹேன ஸப்³ப³து³ப்³ப³லம்பி விசிகிச்சா²ஸஹக³தங் படிஸந்தி⁴ங் ஆகட்³ட⁴தி, அதி⁴மொக்க²ஸம்பயோகே³ன ததோ ப³லவந்தம்பி உத்³த⁴ச்சஸஹக³தங் நாகட்³ட⁴தீதி
கத²ங் பனேதங் விஞ்ஞாதப்³ப³ங் உத்³த⁴ச்சஸஹக³தஸ்ஸ படிஸந்தி⁴தா³னஸபா⁴வோ நத்தீ²தி? த³ஸ்ஸனேனபஹாதப்³பே³ஸு அனாக³தத்தா. திவிதா⁴ ஹி அகுஸலா த³ஸ்ஸனேன பஹாதப்³பா³, பா⁴வனாய பஹாதப்³பா³, ஸியா த³ஸ்ஸனேன பஹாதப்³பா³, ஸியா பா⁴வனாய பஹாதப்³பா³தி. தத்த² தி³ட்டி²ஸஹக³தவிசிகிச்சா²ஸஹக³தசித்துப்பாதா³ த³ஸ்ஸனேன பஹாதப்³பா³ நாம பட²மங் நிப்³பா³னத³ஸ்ஸனவஸேன ‘‘த³ஸ்ஸன’’ந்தி லத்³த⁴னாமேன ஸோதாபத்திமக்³கே³ன பஹாதப்³ப³த்தா. உத்³த⁴ச்சஸஹக³தசித்துப்பாதோ³ பா⁴வனாய பஹாதப்³போ³ நாம அக்³க³மக்³கே³ன பஹாதப்³ப³த்தா. உபரிமக்³க³த்தயஞ்ஹி பட²மமக்³கே³ன தி³ட்ட²னிப்³பா³னே பா⁴வனாவஸேன பவத்தனதோ ‘‘பா⁴வனா’’தி வுச்சதி. தி³ட்டி²விப்பயுத்ததோ³மனஸ்ஸஸஹக³தசித்துப்பாதா³ பன ஸியா த³ஸ்ஸனேன பஹாதப்³பா³, ஸியா பா⁴வனாய பஹாதப்³பா³ தேஸங் அபாயனிப்³ப³த்தகாவத்தா²ய பட²மமக்³கே³ன, ஸேஸப³ஹலாப³ஹலாவத்தா²ய உபரிமக்³கே³ஹி பஹீயமானத்தா. தத்த² ஸியா த³ஸ்ஸனேன பஹாதப்³ப³ம்பி த³ஸ்ஸனேன பஹாதப்³ப³ஸாமஞ்ஞேன இத⁴ ‘‘த³ஸ்ஸனேன பஹாதப்³ப³’’ந்தி வோஹரந்தி.
யதி³ ச உத்³த⁴ச்சஸஹக³தங் படிஸந்தி⁴ங் த³தெ³ய்ய, ததா³ அகுஸலபடிஸந்தி⁴யா ஸுக³தியங் அஸம்ப⁴வதோ அபாயெஸ்வேவ த³தெ³ய்ய. அபாயக³மனீயஞ்ச அவஸ்ஸங் த³ஸ்ஸனேன பஹாதப்³ப³ங் ஸியா. இதரதா² படிஸம்பி⁴தா³விப⁴ங்கே³ –
‘‘யஸ்மிங் ஸமயே அகுஸலங் சித்தங் உப்பன்னங் ஹோதி உபெக்கா²ஸஹக³தங் உத்³த⁴ச்சஸம்பயுத்தங் ரூபாரம்மணங் வா…பே॰… த⁴ம்மாரம்மணங் வா, யங் யங் வா பனாரப்³ப⁴ தஸ்மிங் ஸமயே ப²ஸ்ஸோ ஹோதி…பே॰… அவிக்கே²போ ஹோதி, இமே த⁴ம்மா அகுஸலா. இமேஸு த⁴ம்மேஸு ஞாணங் த⁴ம்மபடிஸம்பி⁴தா³, தேஸங் விபாகே ஞாணங் அத்த²படிஸம்பி⁴தா³’’தி (விப⁴॰ 730-731) –
ஏவங் உத்³த⁴ச்சஸஹக³தசித்துப்பாத³ங் உத்³த⁴ரித்வா தஸ்ஸ விபாகோபி உத்³த⁴டோதி கத²மஸ்ஸ படிஸந்தி⁴தா³னாபா⁴வோ ஸம்படிச்சி²தப்³போ³தி? நாயங் படிஸந்தி⁴தா³னங் ஸந்தா⁴ய உத்³த⁴டோ. அத² கோ² பவத்திவிபாகங் ஸந்தா⁴ய. பட்டா²னே பன –
‘‘ஸஹஜாதா த³ஸ்ஸனேன பஹாதப்³பா³ சேதனா சித்தஸமுட்டா²னானங் ரூபானங் கம்மபச்சயேன பச்சயோ, நானாக்க²ணிகா த³ஸ்ஸனேன பஹாதப்³பா³ சேதனா விபாகானங் க²ந்தா⁴னங், கடத்தா ச ரூபானங் கம்மபச்சயேன பச்சயோ’’தி (பட்டா²॰ 2.8.89) –
த³ஸ்ஸனேன பஹாதப்³ப³சேதனாய ஏவ ஸஹஜாதனானாக்க²ணிககம்மபச்சயபா⁴வங் உத்³த⁴ரித்வா ‘‘ஸஹஜாதா பா⁴வனாய பஹாதப்³பா³ சேதனா சித்தஸமுட்டா²னானங் ரூபானங் கம்மபச்சயேன பச்சயோ’’தி படிஸம்பி⁴தா³விப⁴ங்கே³ உத்³த⁴ச்சஸஹக³தானம்பி பவத்திவிபாகஸ்ஸ உத்³த⁴டத்தா, பட்டா²னே ச படிஸந்தி⁴விபாகபா⁴வமேவ ஸந்தா⁴ய நானாக்க²ணிககம்மபச்சயபா⁴வஸ்ஸ அனுத்³த⁴டத்தா. யதி³ ஹி பவத்திவிபாகங் ஸந்தா⁴ய நானாக்க²ணிககம்மபச்சயபா⁴வோ வுச்செய்ய, ததா³ படிஸந்தி⁴விபாகம்பிஸ்ஸ மஞ்ஞெய்யுந்தி லப்³ப⁴மானஸ்ஸபி பவத்திவிபாகஸ்ஸ வஸேன நானாக்க²ணிககம்மபச்சயபா⁴வோ ந வுத்தோ, தஸ்மா ந ஸக்கா தஸ்ஸ பவத்திவிபாகங் நிவாரேதுங். தேனாஹ ‘‘பவத்தியங் பனா’’த்யாதி³. ஆசரியபு³த்³த⁴மித்தாத³யோ பன அத்தி² உத்³த⁴ச்சஸஹக³தங் பா⁴வனாய பஹாதப்³ப³ம்பி. அத்தி² ந பா⁴வனாய பஹாதப்³ப³ம்பி, தேஸு பா⁴வனாய பஹாதப்³ப³ங் ஸெக்க²ஸந்தானப்பவத்தங், இதரங் புது²ஜ்ஜனஸந்தானப்பவத்தங், ப²லதா³னஞ்ச புது²ஜ்ஜனஸந்தானப்பவத்தஸ்ஸேவ ந இதரஸ்ஸாதி ஏவங் உத்³த⁴ச்சஸஹக³தங் த்³விதா⁴ விப⁴ஜித்வா ஏகஸ்ஸ உப⁴யவிபாகதா³னங், ஏகஸ்ஸ ஸப்³ப³தா²பி விபாகாபா⁴வங் வண்ணெந்தி. யோ பனெத்த² தேஸங் வினிச்ச²யோ, யஞ்ச தஸ்ஸ நிராகரணங், யஞ்ச ஸப்³ப³தா²பி விபாகாபா⁴வவாதீ³னங் மதபடிக்கே²பனங் இத⁴ அவுத்தங், தங் ஸப்³ப³ங் பரமத்த²மஞ்ஜூஸாதீ³ஸு, விஸேஸதோ ச அபி⁴த⁴ம்மத்த²விகாஸினியா நாம அபி⁴த⁴ம்மாவதாரஸங்வண்ணனாயங் வுத்தனயேன வேதி³தப்³ப³ங்.
ஸப்³ப³த்தா²பி காமலோகேதி ஸுக³திது³க்³க³திவஸேன ஸப்³ப³ஸ்மிம்பி காமலோகே. யதா²ரஹந்தி த்³வாராரம்மணானுரூபங். அபாயேஸுபி யங் நாக³ஸுபண்ணாதீ³னங் மஹாஸம்பத்திவிஸயங் விபாகவிஞ்ஞாணங், யஞ்ச நிரயவாஸீனங் மஹாமொக்³க³ல்லானத்தே²ரத³ஸ்ஸனாதீ³ஸு உப்பஜ்ஜதி விபாகவிஞ்ஞாணங்
71. ஏவங் பன விபச்சந்தங் கம்மங் ஸோளஸகத்³வாத³ஸகஅட்ட²கவஸேன திதா⁴ விபச்சதீதி த³ஸ்ஸேதுங் ‘‘தத்தா²பி’’த்யாதி³ வுத்தங். தத்தா²பீதி ஏவங் விபச்சமானேபி குஸலகம்மே. உக்கட்ட²ந்தி குஸலபரிவாரலாப⁴தோ உக்கட்ட²ங். யங் பன கரணகாலே அகுஸலகம்மேஹி பரிவாரிதங், பச்சா² வா ‘‘து³க்கடமேதங் மயா’’தி விப்படிஸாருப்பாத³னேன பரிபா⁴விதங், தங் ஓமகந்தி த³ட்ட²ப்³ப³ங்.
படிஸந்தி⁴ந்தி ஏகமேவ படிஸந்தி⁴ங். ந ஹி ஏகேன கம்மேன அனேகாஸு ஜாதீஸு படிஸந்தி⁴ ஹோதி, பவத்திவிபாகோ பன ஜாதிஸதேபி ஜாதிஸஹஸ்ஸேபி ஹோதி. யதா²ஹ ‘‘திரச்சா²னக³தே தா³னங் த³த்வா ஸதகு³ணா த³க்கி²ணா பாடிகங்கி²தப்³பா³’’தி (ம॰ நி॰ 3.379). யஸ்மா பனெத்த² ஞாணங் ஜச்சந்தா⁴தி³விபத்தினிமித்தஸ்ஸ மோஹஸ்ஸ, ஸப்³பா³குஸலஸ்ஸேவ வா படிபக்க²ங், தஸ்மா தங்ஸம்பயுத்தங் கம்மங் ஜச்சந்தா⁴தி³விபத்திபச்சயங் ந ஹோதீதி திஹேதுகங் அதிது³ப்³ப³லம்பி ஸமானங் ‘‘திஹேதுகமோமகங் து³ஹேதுகமுக்கட்ட²ஞ்சா’’த்யாதி³.
எத்த² ஸியா – யதா² படிஸம்பி⁴தா³மக்³கே³ ‘‘க³திஸம்பத்தியா ஞாணஸம்பயுத்தே அட்ட²ன்னங் ஹேதூனங் பச்சயா உபபத்தி ஹோதீ’’தி (படி॰ ம॰ 1.231) குஸலஸ்ஸ கம்மஸ்ஸ ஜவனக்க²ணே திண்ணங், நிகந்திக்க²ணே த்³வின்னங், படிஸந்தி⁴க்க²ணே திண்ணஞ்ச ஹேதூனங் வஸேன அட்ட²ன்னங் ஹேதூனங் பச்சயா ஞாணஸம்பயுத்தூபபத்தி, ததா² ‘‘க³திஸம்பத்தியா ஞாணவிப்பயுத்தே ச²ன்னங் ஹேதூனங் பச்சயா உபபத்தி ஹோதீ’’தி (படி॰ ம॰ 1.233) ஜவனக்க²ணே த்³வின்னங், நிகந்திக்க²ணே த்³வின்னங், படிஸந்தி⁴க்க²ணே த்³வின்னஞ்ச ஹேதூனங் வஸேன ச²ன்னங் ஹேதூனங் பச்சயா ஞாணவிப்பயுத்தூபபத்தி வுத்தா, ஏவங் ‘‘க³திஸம்பத்தியா ஞாணவிப்பயுத்தே ஸத்தன்னங் ஹேதூனங் பச்சயா உபபத்தி ஹோதீ’’தி திஹேதுககம்மேன து³ஹேதுகபடிஸந்தி⁴யா அவுத்தத்தா நத்தி² திஹேதுகஸ்ஸ து³ஹேதுகபடிஸந்தி⁴ஆகட்³ட⁴னந்தி? நயித³மேவங் து³ஹேதுகோமககம்மேன அஹேதுகபடிஸந்தி⁴யா விய திஹேதுகோமககம்மேன ஸாமத்தி²யானுரூபதோ து³ஹேதுகபடிஸந்தி⁴யாவ தா³தப்³ப³த்தா, கம்மஸரிக்க²கவிபாகத³ஸ்ஸத்த²ங் பன மஹாதே²ரேன ஸாவஸேஸோ பாடோ² கதோ. இதரதா² ‘‘சதுன்னங் ஹேதூனங் பச்சயா’’தி வசனாபா⁴வதோ து³ஹேதுககம்மேன அஹேதுகூபபத்தியாபிஅபா⁴வோ ஆபஜ்ஜதி, தஸ்மா யதா² ஸுக³தியங் ஜச்சந்த⁴ப³தி⁴ராதி³விபத்தியா அஹேதுகூபபத்திங் வஜ்ஜெத்வா க³திஸம்பத்தியா ஸஹேதுகூபபத்தித³ஸ்ஸனத்த²ங் து³ஹேதுகூபபத்தி ஏவ உத்³த⁴டா, ந அஹேதுகூபபத்தி, ஏவங் கம்மஸரிக்க²கவிபாகத³ஸ்ஸனத்த²ங்
74. ஏவங் ஏகாய சேதனாய ஸோளஸ விபாகானி எத்தே²வ த்³வாத³ஸகமக்³கோ³ அஹேதுகட்ட²கம்பீதி பவத்தஸ்ஸ திபிடகசூளனாக³த்தே²ரவாத³ஸ்ஸ வஸேன விபாகப்பவத்திங் த³ஸ்ஸெத்வா இதா³னி ஏகாய சேதனாய த்³வாத³ஸ விபாகானி எத்தே²வ த³ஸகமக்³கோ³ அஹேதுகட்ட²கம்பீதி ஆக³தஸ்ஸ மோரவாபீவாஸீமஹாத⁴ம்மரக்கி²தத்தே²ரவாத³ஸ்ஸபி வஸேன த³ஸ்ஸேதுங் அஸங்கா²ரங் ஸஸங்கா²ரவிபாகானீ’’த்யாதி³ வுத்தங். யதா² முகே² சலிதே ஆதா³ஸதலே முக²னிமித்தங் சலதி, ஏவங் அஸங்கா²ரகுஸலஸ்ஸ அஸங்கா²ரவிபாகோவ ஹோதி, ந ஸஸங்கா²ரோதி ஏவங் ஆக³மனதோவ ஸங்கா²ரபே⁴தோ³தி அயமெத்தா²தி⁴ப்பாயோ. யஸ்மா பன விபாகஸ்ஸ ஸங்கா²ரபே⁴தோ³ பச்சயவஸேன இச்சி²தோ, ந கம்மவஸேன, தஸ்மா ஏஸ கேசிவாதோ³ கதோ.
தேஸந்தி தேஸங் ஏவங்வாதீ³னங். யதா²க்கமந்தி திஹேதுகுக்கட்டா²தீ³னங் அனுக்கமேன. த்³வாத³ஸ விபாகானீதி திஹேதுகுக்கட்ட²அஸங்கா²ரிகஸஸங்கா²ரிககம்மஸ்ஸ வஸேன யதா²க்கமங் ஸஸங்கா²ரிகசதுக்கவஜ்ஜிதானி, அஸங்கா²ரிகசதுக்கவஜ்ஜிதானி ச த்³வாத³ஸ விபாகானி, ததா² திஹேதுகோமகஸ்ஸ, து³ஹேதுகுக்கட்ட²ஸ்ஸ ச கம்மஸ்ஸ வஸேன து³ஹேதுகஸஸங்கா²ரத்³வயவஜ்ஜிதானி, து³ஹேதுகாஸங்கா²ரத்³வயவஜ்ஜிதானி ச த³ஸ விபாகானி, து³ஹேதுகோமகஸ்ஸ வஸேன து³ஹேதுகத்³வயவஜ்ஜிதானி ச அட்ட² விபாகானி யதா²வுத்தஸ்ஸ ‘‘திஹேதுகமுக்கட்ட²’’ந்த்யாதி³னா வுத்தனயஸ்ஸ அனுஸாரேன அனுஸ்ஸரணேன யதா²ஸம்ப⁴வங் தஸ்ஸ தஸ்ஸ ஸம்ப⁴வானுரூபதோ உத்³தி³ஸே.
75. பரிதோ அத்தங் க²ண்டி³தங் விய அப்பானுபா⁴வந்தி பரித்தங். பகட்ட²பா⁴வங் நீதந்தி பணீதங், உபி⁴ன்னங் மஜ்ஜே² ப⁴வங் மஜ்ஜி²மங். தத்த² ‘‘படிலத்³த⁴மத்தங் அட்ட²கதா²யங் வுத்தங், ததா² ‘‘நாதிஸுபா⁴விதங் அபரிபுண்ணவஸீபா⁴வங் மஜ்ஜி²மங். அதிவிய ஸுபா⁴விதங் பன ஸப்³ப³ஸோ பரிபுண்ணவஸீபா⁴வங் பணீத’’ந்தி. ஆசரியேன பனெத்த² பரித்தம்பி ஈஸகங் லத்³தா⁴ஸேவனமேவாதி⁴ப்பேதந்தி தி³ஸ்ஸதி. ததா² ஹானேன நாமரூபபரிச்சே²தே³ –
‘‘ஸமானாஸேவனே
அலத்³தா⁴ தாதி³ஸங் ஹேதுங், அபி⁴ஞ்ஞா ந விபச்சதீ’’தி. (நாம॰ பரி॰ 474);
ஸமானபூ⁴மிகதோவ ஆஸேவனலாபே⁴ன ப³லவபா⁴வதோ மஹக்³க³தத⁴ம்மானங் விபாகதா³னங் வத்வா தத³பா⁴வதோ அபி⁴ஞ்ஞாய அவிபச்சனங் வுத்தங். ஹீனேஹி ச²ந்த³சித்தவீரியவீமங்ஸாஹி நிப்³ப³த்திதங் வா பரித்தங். மஜ்ஜி²மேஹி ச²ந்தா³தீ³ஹி மஜ்ஜி²மங். பணீதேஹி பணீதந்தி அலமதிப்பபஞ்சேன.
84. பஞ்சமஜ்ஜா²னங் பா⁴வெத்வாதி அபி⁴ஞ்ஞாபா⁴வங் அஸம்பத்தங் பஞ்சமஜ்ஜா²னங் திவித⁴ம்பி பா⁴வெத்வா. அபி⁴ஞ்ஞாபா⁴வப்பத்தஸ்ஸ பன அவிபாகபா⁴வோ ‘‘அலத்³தா⁴ தாதி³ஸ’’ந்த்யாதி³னா (நாம॰ பரி॰ 474) ஆசரியேன ஸாதி⁴தோ. மூலடீகாகாராத³யோ பன அஞ்ஞதா²பி தங் ஸாதெ⁴ந்தி. தங் பன ஸங்கே²பதோ, தத்த² தத்த² வித்தா²ரதோ ச அபி⁴த⁴ம்மத்த²விகாஸினியங் வுத்தனயேன த³ட்ட²ப்³ப³ங். ஸஞ்ஞாவிராக³ங் பா⁴வெத்வாதி ‘‘ஸஞ்ஞா ரோகோ³, ஸஞ்ஞா க³ண்டோ³’’த்யாதி³னா, ‘‘தீ⁴ சித்தங் தி⁴ப்³ப³தங் சித்த’’ந்த்யாதி³னா வா நயேன அரூபப்பவத்தியா ஆதீ³னவத³ஸ்ஸனேன தத³பா⁴வே ச பணீதபா⁴வஸன்னிட்டா²னேன வாயோகஸிணே கேஸஞ்சி மதேன பரிச்சி²ன்னாகாஸகஸிணே வா பா⁴வனாப³லேன தேன படிலபி⁴தப்³ப³பா⁴வே அரூபஸ்ஸ அனிப்³ப³த்திஸபா⁴வாபாத³னவஸேன அரூபவிராக³பா⁴வனங் பா⁴வெத்வா அஞ்ஞஸத்தேஸு உப்பஜ்ஜந்தி கம்மகிரியவாதி³னோ தித்தி²யா ஏவாத்யதி⁴ப்பாயோ
86. அனாகா³மினோ பன ஸுத்³தா⁴வாஸேஸு உப்பஜ்ஜந்தீதி அனாகா³மினோயேவ அரியா புது²ஜ்ஜனாதி³காலே, பச்சா²பி வா பஞ்சமஜ்ஜா²னங் திவித⁴ம்பி பா⁴வெத்வா ஸத்³தா⁴தி³இந்த்³ரியவேமத்ததானுக்கமேன பஞ்சஸு ஸுத்³தா⁴வாஸேஸு உப்பஜ்ஜந்தி.
87. யதா²க்கமங் பா⁴வெத்வா யதா²க்கமங் ஆருப்பேஸு உப்பஜ்ஜந்தீதி யோஜனா யதா²க்கமந்தி ச பட²மாருப்பாதி³அனுக்கமேன. ஸப்³ப³ம்பி சேதங் தஸ்ஸ தஸ்ஸேவ ஜா²னஸ்ஸ ஆவேணிகபூ⁴மிவஸேன வுத்தங். நிகந்தியா பன ஸதி புது²ஜ்ஜனாத³யோ யதா²லத்³த⁴ஜ்ஜா²னஸ்ஸ பூ⁴மிபூ⁴தேஸு ஸுத்³தா⁴வாஸவஜ்ஜிதேஸு யத்த² கத்த²சி நிப்³ப³த்தந்தி, ததா² காமப⁴வேபி காமாவசரகம்மப³லேன. ‘இஜ்ஜ²தி, பி⁴க்க²வே, ஸீலவதோ சேதோபணிதி⁴ விஸுத்³த⁴த்தா’தி (அ॰ நி॰ 8.35) ஹி வுத்தங். அனாகா³மினோ பன காமராக³ஸ்ஸ ஸப்³ப³ஸோ ஆசரியேன –
‘‘ஸுத்³தா⁴வாஸெஸ்வனாகா³மி-புக்³க³லாவோபபஜ்ஜரே;
காமதா⁴தும்ஹி ஜாயந்தி, அனாகா³மிவிவஜ்ஜிதா’’தி. (பரம॰ வி॰ 205);
ஸுக்க²விபஸ்ஸகாபி பனேதே மரணகாலே ஏகந்தேனேவ ஸமாபத்திங் நிப்³ப³த்தெந்தி ஸமாதி⁴ம்ஹி பரிபூரகாரீபா⁴வதோதி த³ட்ட²ப்³ப³ங். ‘‘இத்தி²யோபி பன அரியா வா அனரியா வா அட்ட²ஸமாபத்திலாபி⁴னியோ ப்³ரஹ்மபாரிஸஜ்ஜேஸுயேவ நிப்³ப³த்தந்தீ’’தி அட்ட²கதா²யங் (விப⁴॰ அட்ட²॰ 809; அ॰ நி॰ அட்ட²॰ 1.1.279 ஆத³யோ; ம॰ நி॰ அட்ட²॰ 3.130) வுத்தங். அபிசெத்த² வேஹப்ப²லஅகனிட்ட²சதுத்தா²ருப்பப⁴வானங் ஸெட்ட²ப⁴வபா⁴வதோ ஆசரியேன –
‘‘வேஹப்ப²லே அகனிட்டே², ப⁴வக்³கே³ ச பதிட்டி²தா;
ந புனாஞ்ஞத்த² ஜாயந்தி, ஸப்³பே³ அரியபுக்³க³லா;
ப்³ரஹ்மலோகக³தா ஹெட்டா², அரியா நோபபஜ்ஜரே’’தி. (நாம॰ பரி॰ 452-453);
கம்மசதுக்கவண்ணனா நிட்டி²தா.
சுதிபடிஸந்தி⁴க்கமவண்ணனா
89. ‘‘ஆயுக்க²யேனா’’த்யாதீ³ஸு ஸதிபி கம்மானுபா⁴வே தங்தங்க³தீஸு யதா²பரிச்சி²ன்னஸ்ஸ ஆயுனோ பரிக்க²யேன மரணங் ஆயுக்க²யமரணங். ஸதிபி தத்த² தத்த² பரிச்சி²ன்னாயுஸேஸே க³திகாலாதி³பச்சயஸாமக்³கி³யஞ்ச கம்மக்க²யமரணங். ஆயுகம்மானங் ஸமகமேவ பரிக்கீ²ணத்தா மரணங் உப⁴யக்க²யமரணங். ஸதிபி தஸ்மிங் து³விமே புரிமப⁴வஸித்³த⁴ஸ்ஸ கஸ்ஸசி உபச்சே²த³ககம்முனோ ப³லேன ஸத்த²ஹரணாதீ³ஹி உபக்கமேஹி உபச்சி²ஜ்ஜமானஸந்தானானங், கு³ணமஹந்தேஸு வா கதேன கேனசி உபக்கமேன ஆயூஹிதஉபச்சே²த³ககம்முனா படிபா³ஹிதஸாமத்தி²யஸ்ஸ கம்மஸ்ஸ தங்தங்அத்தபா⁴வப்பவத்தனே அஸமத்த²பா⁴வதோ து³ஸிமாரகலாபு³ராஜாதீ³னங் விய தங்க²ணேயேவ டா²னாசாவனவஸேன பவத்தமரணங் உபச்சே²த³கமரணங் நாம. இத³ங் பன நேரயிகானங் உத்தரகுருவாஸீனங் கேஸஞ்சி தே³வானஞ்ச ந ஹோதி. தேனாஹு –
‘‘உபக்கமேன வா கேஸஞ்சுபச்சே²த³ககம்முனா’’தி. (ஸ॰ ஸ॰ 62);
மரணஸ்ஸ உப்பத்தி பவத்தி மரணுப்பத்தி.
90. மரணகாலேதி யதா²ரஹந்தி தங்தங்க³தீஸு உப்பஜ்ஜனகஸத்தானுரூபங், கத்த²சி பன அனுப்பஜ்ஜமானஸ்ஸ கீ²ணாஸவஸ்ஸ யதோ²பட்டி²தங் நாமரூபத⁴ம்மாதி³கமேவ சுதிபரியோஸானானங் கோ³சரபா⁴வங் க³ச்ச²தி, ந கம்மகம்மனிமித்தாத³யோ. உபலத்³த⁴புப்³ப³ந்தி சேதியத³ஸ்ஸனாதி³வஸேன புப்³பே³ உபலத்³த⁴ங். உபகரணபூ⁴தந்தி புப்பா²தி³வஸேன உபகரணபூ⁴தங். உபலபி⁴தப்³ப³ந்தி அனுப⁴விதப்³ப³ங். உபபோ⁴க³பூ⁴தந்தி அச்ச²ராவிமானகப்பருக்க²னிரயக்³கி³ஆதி³கங் உபபு⁴ஞ்ஜிதப்³ப³ங். அச்ச²ராவிமானகப்பருக்க²மாதுகுச்சி²ஆதி³க³தங் ஹி ரூபாயதனங் ஸுக³தினிமித்தங். நிரயக்³கி³னிரயபாலாதி³க³தங் து³க்³க³தினிமித்தங். க³தியா நிமித்தங் க³தினிமித்தங்.
கம்மப³லேனாதி படிஸந்தி⁴னிப்³ப³த்தகஸ்ஸ குஸலாகுஸலகம்மஸ்ஸ ஆனுபா⁴வேன. ச²ன்னங் த்³வாரானந்தி வக்க²மானநயேன யதா²ஸம்ப⁴வங் ச²ன்னங் உபபத்தித்³வாரானங், யதி³ குஸலகம்மங் விபச்சதி, ததா³ பரிஸுத்³த⁴ங் குஸலசித்தங் பவத்ததி, அத² அகுஸலகம்மங், ததா³ உபக்கிலிட்ட²ங் அகுஸலசித்தந்தி ஆஹ ‘‘விபச்சமானக…பே॰… கிலிட்ட²ங் வா’’தி. தேனாஹ ப⁴க³வா ‘‘நிமித்தஸ்ஸாத³க³தி⁴தங் வா, பி⁴க்க²வே, விஞ்ஞாணங் திட்ட²மானங் திட்ட²தி, அனுப்³யஞ்ஜனஸ்ஸாத³க³தி⁴தங் வா, தஸ்மிங் சே ஸமயே காலங் கரோதி, டா²னமேதங் விஜ்ஜதி, யங் த்³வின்னங் க³தீனங் அஞ்ஞதரங் க³திங் உபபஜ்ஜெய்ய நிரயங் வா திரச்சா²னயோனிங் வா’’தி (ஸங்॰ நி॰ 4.235). தத்தோ²ணதங் வாதி தஸ்மிங் உபபஜ்ஜிதப்³ப³ப⁴வே ஓணதங் விய, தத்தோ²ணதங் ஏவாதி வா பத³ச்சே²தோ³. ‘‘பா³ஹுல்லேனா’’தி எத்த² அதி⁴ப்பாயோ ‘‘யேபு⁴ய்யேன ப⁴வந்தரே’’தி எத்த² ‘‘பா³ஹுல்லேனா’’தி இமினா ஸஹஸா ஒச்சி²ஜ்ஜமானஜீவிதானங் ஸணிகங் மரந்தானங் விய ந அபி⁴க்க²ணமேவாதி தீ³பிதந்தி விஞ்ஞாயதி. அபி⁴னவகரணவஸேனாதி தங்க²ணே கரியமானங் விய அத்தானங் அபி⁴னவகரணவஸேன.
91. பச்சாஸன்னமரணஸ்ஸாதி வீதி²சித்தாவஸானேதி ததா³ரம்மணபரியோஸானானங், ஜவனபரியோஸானானங் வா வீதி²சித்தானங் அவஸானே. தத்த² ‘‘காமப⁴வதோ சவித்வா தத்தே²வ உப்பஜ்ஜமானானங் ததா³ரம்மணபரியோஸானானி, ஸேஸானங் ஜவனபரியோஸானானீ’’தி த⁴ம்மானுஸாரணியங் வுத்தங். ப⁴வங்க³க்க²யேவாதி யதி³ ஏகஜவனவீதி²தோ அதி⁴கதராயுஸேஸோ ஸியா, ததா³ ப⁴வங்கா³வஸானே வா உப்பஜ்ஜித்வா நிருஜ்ஜ²தி. அத² ஏகசித்தக்க²ணாயுஸேஸோ ஸியா, ததா³ வீதி²சித்தாவஸானே, தஞ்ச அதீதகம்மாதி³விஸயமேவ. ‘‘தஸ்ஸானந்தரமேவா’’தி இமினா அந்தராப⁴வவாதி³மதங் படிக்கி²பதி.
யதா²ரஹந்தி கம்மகரணகாலஸ்ஸ, விபாகதா³னகாலஸ்ஸ ச அனுரூபவஸேன. அத² வா விபச்சமானககம்மானுரூபங் அனுஸயவஸேன, ஜவனஸஹஜாதவஸேன வா பவத்திஅனுரூபதொத்யத்தோ². நனு ச ‘‘அவிஜ்ஜானுஸயபரிக்கி²த்தேனா’’த்யாதி³ வுத்தங். ஜவனஸஹஜாதானஞ்ச கத²ங் அனுஸயபா⁴வோதி? நாயங் தோ³ஸோ அனுஸயஸதி³ஸதாய தாஸம்பி அனுஸயவோஹாரபா⁴வதோ. இதரதா² அகுஸலகம்மஸஹஜாதானங் ப⁴வதண்ஹாஸஹஜாதானங் வா சுதிஆஸன்னஜவனஸஹஜாதானஞ்ச ஸங்க³ஹோ ந ஸியா. அவிஜ்ஜாவ அப்பஹீனட்டே²ன அனுஸயனதோ பவத்தனதோ அனுஸயோ, தேன பரிக்கி²த்தேன பரிவாரிதேன. தண்ஹானுஸயோவ மூலங் பதா⁴னங் ஸஹகாரீகாரணபூ⁴தங் இமஸ்ஸாதி தண்ஹானுஸயமூலகோ. ஸங்கா²ரேனாதி குஸலாகுஸலகம்மேன கம்மஸஹஜாதப²ஸ்ஸாதி³த⁴ம்மஸமுதா³யேன சுதிஆஸன்னஜவனஸஹஜாதேன வா, தேன ஜனியமானங். அவிஜ்ஜாய ஹி படிச்ச²ன்னாதீ³னவவிஸயே தண்ஹா நாமேதி, கி²பனகஸங்கா²ரஸம்மதா யதா²வுத்தஸங்கா²ரா கி²பந்தி, யதா²ஹு –
‘‘அவிஜ்ஜாதண்ஹாஸங்கா²ர-ஸஹஜேஹி அபாயினங்;
விஸயாதீ³னவச்சா²தி³னமனக்கி²பகேஹி து.
‘‘அப்பஹீனேஹி
கி²பகா பன ஸங்கா²ரா, குஸலாவ ப⁴வந்திஹா’’தி. (ஸ॰ ஸ॰ 164-165);
ஸம்பயுத்தேஹி பரிக்³க³ய்ஹமானந்தி அத்தனா ஸம்பயுத்தேஹி ப²ஸ்ஸாதீ³ஹி த⁴ம்மேஹி ஸம்பயுத்தபச்சயாதி³னா பரிவாரெத்வா க³ய்ஹமானங், ஸஹஜாதானமதி⁴ட்டா²னபா⁴வேன புப்³ப³ங்க³மபூ⁴தந்தி அத்தனா ஸஹஜாதானங் பதிட்டா²னபா⁴வேன பதா⁴னபூ⁴தங். ‘‘மனோபுப்³ப³ங்க³மா த⁴ம்மா’’தி (த⁴॰ ப॰ 1-2) ஹி வுத்தங். ப⁴வந்தரபடிஸந்தா⁴னவஸேனாதி புரிமப⁴வந்தரஸ்ஸ, பச்சி²மப⁴வந்தரஸ்ஸ ச அஞ்ஞமஞ்ஞங் ஏகாப³த்³த⁴ங் விய படிஸந்த³ஹனவஸேன உப்பஜ்ஜமானமேவ பதிட்டா²தி, ந இதோ க³ந்த்வாத்யதி⁴ப்பாயோ. ந ஹி புரிமப⁴வபரியாபன்னோ கோசி த⁴ம்மோ ப⁴வந்தரங் ஸங்கமதி, நாபி புரிமப⁴வபரியாபன்னஹேதூஹி வினா உப்பஜ்ஜதி படிகோ⁴ஸபதீ³பமுத்³தா³ வியாதி அலமதிப்பபஞ்சேன.
92. மந்த³ங் ஹுத்வா பவத்தானி மந்த³ப்பவத்தானி. பச்சுப்பன்னாரம்மணேஸு ஆபாத²க³தேஸு மனொத்³வாரே க³தினிமித்தவஸேன, பஞ்சத்³வாரே கம்மனிமித்தவஸேனாத்யதி⁴ப்பாயோ. படிஸந்தி⁴ப⁴வங்கா³னம்பி பச்சுப்பன்னாரம்மணதா லப்³ப⁴தீதி மனொத்³வாரே தாவ படிஸந்தி⁴யா சதுன்னங் ப⁴வங்கா³னஞ்ச, பஞ்சத்³வாரே பன படிஸந்தி⁴யாவ பச்சுப்பன்னாரம்மணபா⁴வோ லப்³ப⁴தி. ததா² ஹி கஸ்ஸசி மனொத்³வாரே ஆபாத²மாக³தங் பச்சுப்பன்னங் க³தினிமித்தங் ஆரப்³ப⁴ உப்பன்னாய ததா³ரம்மணபரியோஸானாய சித்தவீதி²யா அனந்தரங் சுதிசித்தே உப்பன்னே தத³னந்தரங் பஞ்சசித்தக்க²ணாயுகே ஆரம்மணே பவத்தாய படிஸந்தி⁴யா சதுன்னங் ப⁴வங்கா³னங், பஞ்சத்³வாரே ச ஞாதகாதீ³ஹி உபட்டா²பிதேஸு தெ³ய்யத⁴ம்மேஸு வண்ணாதி³கே ஆரப்³ப⁴ யதா²ரஹங் பவத்தாய சித்தவீதி²யா சுதிசித்தஸ்ஸ ச அனந்தரங் ஏகசித்தக்க²ணாயுகே ஆரம்மணே பவத்தாய படிஸந்தி⁴யா பச்சுப்பன்னாரம்மணே பவத்தி உபலப்³ப⁴தீதி அயமெத்த² ஸங்கே²போ, வித்தா²ரோ விஸுத்³தி⁴மக்³கே³(விஸுத்³தி⁴॰ 2.620 ஆத³யோ) விப⁴ங்க³ட்ட²கதா²யங் (விப⁴॰ அட்ட²॰ 227) வா ஸங்கா²ரபச்சயாவிஞ்ஞாணபத³வண்ணனாயங் வுத்தனயேன த³ட்ட²ப்³போ³. ச²த்³வாரக்³க³ஹிதந்தி கம்மனிமித்தங் ச²த்³வாரக்³க³ஹிதங், க³தினிமித்தங் ச²ட்ட²த்³வாரக்³க³ஹிதந்தி யதா²ஸம்ப⁴வங் யோஜேதப்³ப³ங். அபரே பன அவிஸேஸதோ வண்ணெந்தி. ஸச்சஸங்கே²பேபி தேனேவாதி⁴ப்பாயேன இத³ங் வுத்தங் –
‘‘பஞ்சத்³வாரே ஸியா ஸந்தி⁴, வினா கம்மங் த்³விகோ³சரே’’தி; (ஸ॰ ஸ॰ 173);
அட்ட²கதா²யங் (விஸுத்³தி⁴॰ 2.624-625; விப⁴॰ அட்ட²॰ 227) மூலடீகாதீ³ஸு ச ‘‘கம்மப³லேன உபட்டா²பிதங் வண்ணாயதனங் ஸுபினங் பஸ்ஸந்தஸ்ஸ விய தி³ப்³ப³சக்கு²ஸ்ஸ விய ச மனொத்³வாரேயேவ கோ³சரபா⁴வங் க³ச்ச²தீ’’தி (விஸுத்³தி⁴॰ மஹா॰ 2.623) நியமெத்வா வுத்தத்தா தேஸங் வசனங் ந ஸம்படிச்ச²ந்தி ஆசரியா. ‘‘பச்சுப்பன்னஞ்சா’’தி எத்த² க³தினிமித்தங் தாவ பச்சுப்பன்னாரம்மணங் யுஜ்ஜதி, கம்மனிமித்தங் பன படிஸந்தி⁴ஜனககம்மஸ்ஸேவ நிமித்தபூ⁴தங் அதி⁴ப்பேதந்தி கத²ங் தஸ்ஸ சுதிஆஸன்னஜவனேஹி க³ஹிதஸ்ஸ பச்சுப்பன்னபா⁴வோ ஸம்ப⁴வதி. ந ஹி ததே³வ ஆரம்மணுபட்டா²பகங், ததே³வ படிஸந்தி⁴ஜனகங் ப⁴வெய்ய உபசிதபா⁴வாபா⁴வதோ அனஸ்ஸாதி³தத்தா ச. ‘‘கதத்தா உபசிதத்தா’’தி (த⁴॰ ஸ॰ 431) ஹி வசனதோ புனப்புனங் லத்³தா⁴ஸேவனமேவ கம்மங் படிஸந்தி⁴ங் ஆகட்³ட⁴தி. படிஸம்பி⁴தா³மக்³கே³ (படி॰ ம॰ 1.232) ச நிகந்திக்க²ணே த்³வின்னங் ஹேதூனங் பச்சயாபி ஸஹேதுகபடிஸந்தி⁴யா வுத்தத்தாகதூபசிதம்பி கம்மங் தண்ஹாய அஸ்ஸாதி³தமேவ விபாகங் அபி⁴னிப்பா²தே³தி, ததா³ ச படிஸந்தி⁴யா ஸமானவீதி²யங் விய பவத்தமானானி சுதிஆஸன்னஜவனானி கத²ங் புனப்புனங் லத்³தா⁴ஸேவனானி ஸியுங், கத²ஞ்ச தானி ததா³ கண்ஹாய பராமட்டா²னி. அபிச பச்சுப்பன்னங் கம்மனிமித்தங் சுதிஆஸன்னப்பவத்தானங் பஞ்சத்³வாரிகஜவனானங் ஆரம்மணங் ஹோதி. ‘‘பஞ்சத்³வாரிககம்மஞ்ச படிஸந்தி⁴னிமித்தகங் ந அட்ட²கதா²யங் (விஸுத்³தி⁴॰ 2.620; விப⁴॰ அட்ட²॰ 227) வுத்தந்தி ஸச்சமேதங். ஞாதகாதீ³ஹி உபட்டா²பிதேஸு பன புப்பா²தீ³ஸு ஸன்னிஹிதெஸ்வேவ மரணஸம்ப⁴வதோ தத்த² வண்ணாதி³கங் ஆரப்³ப⁴ சுதிஆஸன்னவீதி²தோ புரிமபா⁴க³ப்பவத்தானங் படிஸந்தி⁴ஜனநஸமத்தா²னங் மனொத்³வாரிகஜவனானங் ஆரம்மணபூ⁴தேன ஸஹ ஸமானத்தா ததே³கஸந்ததிபதிதங் சுதிஆஸன்னஜவனக்³க³ஹிதம்பி பச்சுப்பன்னங் வண்ணாதி³கங் கம்மனிமித்தபா⁴வேன வுத்தங். ஏவஞ்ச கத்வா வுத்தங் ஆனந்தா³சரியேன ‘‘பஞ்சத்³வாரே ச ஆபாத²மாக³ச்ச²ந்தங் பச்சுப்பன்னங் கம்மனிமித்தங் ஆஸன்னகதகம்மாரம்மணஸந்ததியங் உப்பன்னங், தங்ஸதி³ஸஞ்ச த³ட்ட²ப்³ப³’’ந்தி (விப⁴॰ மூலடீ॰ 227; விஸுத்³தி⁴॰ மஹா॰ 2.623).
94. யதா²ரஹந்தி து³தியசதுத்த²பட²மததியானங் படிஸந்தீ⁴னங் அனுரூபதோ.
98. ஆருப்பசுதியா பரங் ஹெட்டி²மாருப்பவஜ்ஜிதா ஆருப்பபடிஸந்தி⁴யோ ஹொந்தி உபரூபரிஅரூபீனங் ஹெட்டி²மஹெட்டி²மகம்மஸ்ஸ அனாயூஹனதோ, உபசாரஜ்ஜா²னஸ்ஸ பன ப³லவபா⁴வதோ தஸ்ஸ விபாகபூ⁴தா காமதிஹேதுகா படிஸந்தி⁴யோ ஹொந்தி. ரூபாவசரசுதியா பரங் அஹேதுகரஹிதா உபசாரஜ்ஜா²னானுபா⁴வேனேவ
சுதிபடிஸந்தி⁴க்கமவண்ணனா நிட்டி²தா.
99. படிஸந்தி⁴யா படிஸந்தி⁴னிரோதா⁴னந்தரதோ. ததே³வ சித்தந்தி தங்ஸதி³ஸதாய தப்³போ³ஹாரப்பவத்தத்தா ததே³வ சித்தங் யதா² ‘‘தானியேவ ஓஸதா⁴னீ’’தி. அஸதி வீதி²சித்துப்பாதே³தி அந்தரந்தரா வீதி²சித்தானங் உப்பாதே³ அஸதி, சுதிசித்தங் ஹுத்வா நிருஜ்ஜ²தி ததே³வ சித்தந்தி ஸம்ப³ந்தோ⁴.
101. பரிவத்தந்தா பவத்தந்தி யாவ வட்டமூலஸமுச்சே²தா³த்யதி⁴ப்பாயோ.
102. யதா² இஹ ப⁴வேபடிஸந்தி⁴ சேவ ப⁴வங்க³ஞ்ச வீதி²யோ ச சுதி ச, ததா² புன ப⁴வந்தரே படிஸந்தி⁴ப⁴வங்க³ந்தி ஏவமாதி³கா அயங் சித்தஸந்ததி பரிவத்ததீதி யோஜனா. கேசி பன இமஸ்மிங் பரிச்சே²தே³ வீதி²முத்தஸங்க³ஹஸ்ஸேவ த³ஸ்ஸிதத்தா படிஸந்தி⁴ப⁴வங்க³சுதீனமேவ இத⁴ க³ஹணங் யுத்தந்த்யாதி⁴ப்பாயேன ‘‘படிஸந்தி⁴ப⁴வங்க³வீதி²யோ’’தி இமஸ்ஸ படிஸந்தி⁴ப⁴வங்க³ப்பவாஹாதி அத்த²ங் வத³ந்தி, தங் தேஸங் மதிமத்தங் பவத்திஸங்க³ஹத³ஸ்ஸனாவஸானே தத்த² ஸங்க³ஹிதானங் ஸப்³பே³ஸமேவ நிக³மனஸ்ஸ அதி⁴ப்பேதத்தா. ஏவஞ்ஹி ஸதி ‘‘படிஸங்கா²ய பனேதமத்³து⁴வ’’ந்தி எத்த² ஸப்³பே³ஸமேவ ஏத-ஸத்³தே³ன பராமஸனங் ஸுட்டு² உபபன்னங் ஹோதி. ஏதங் யதா²வுத்தங் வட்டபவத்தங் அத்³து⁴வங் அனிச்சங் பலோகத⁴ம்மங் படிஸங்கா²ய பச்சவெக்கி²த்வா பு³தா⁴ பண்டி³தா சிராய சிரகாலங் ஸுப்³ப³தா ஹுத்வா அச்சுதங் து⁴வங் அசவனத⁴ம்மங் பத³ங் நிப்³பா³னங் அதி⁴க³ந்த்வா மக்³க³ப²லஞாணேன ஸச்சி²கத்வா ததோயேவ ஸுட்டு² ஸமுச்சி²ன்னஸினேஹப³ந்த⁴னா ஸமங் நிருபதி⁴ஸேஸனிப்³பா³னதா⁴துங் எஸ்ஸந்தி பாபுணிஸ்ஸந்தி.
இதி அபி⁴த⁴ம்மத்த²விபா⁴வினியா நாம அபி⁴த⁴ம்மத்த²ஸங்க³ஹவண்ணனாய
வீதி²முத்தபரிச்சே²த³வண்ணனா நிட்டி²தா.