3. ததியோ பரிச்சே²தோ³
சேதஸிகவிபா⁴க³னித்³தே³ஸவண்ணனா
89. நாமஸாமஞ்ஞதோயேவ த்³வேபஞ்ஞாஸாதி ப²ஸ்ஸாதி³னாமஸாமஞ்ஞேன த்³வீஹி அதி⁴கா பண்ணாஸ ஹொந்தி, ஸம்பயுத்தத⁴ம்மபே⁴த³தோ பன ஏகூனநவுதிசித்தஸம்பயுத்தோ ப²ஸ்ஸோ ஏகூனநவுதிவிதோ⁴தி ஏவமாதி³னா ப³ஹுவிதா⁴பி ஹொந்தீதி அத்தோ².
நனு ச ப²ஸ்ஸாத³யோ ஹெட்டா² பாளிக்கமேன த³ஸ்ஸிதா, இத⁴ பன கஸ்மா ந ததா² வுத்தாதி? ஏகேகஸபா⁴வவந்தானங் தங்தங்ஸாமஞ்ஞாபெக்கா²ய
90. ஏவங் ப²ஸ்ஸாத³யோ த⁴ம்மே உத்³தி³ஸித்வா இதா³னி ‘‘எத்தகேஸு அயங் த⁴ம்மோ ஸமுபலப்³ப⁴தீ’’தி சித்துப்பாதே³ஸு தேஸங் பயோக³ங் த³ஸ்ஸேதுங் பட²மங் தாவ சித்தக³ணனங் த³ஸ்ஸெந்தோ ஆஹ ‘‘சதுபஞ்ஞாஸதா⁴’’திஆதி³. காமேதி காமாவசரேதி வுத்தங் ஹோதி. ஏவங் ‘‘ரூபே அரூபே’’தி எத்தா²பி. ஆஸவவிஸயத்தாபா⁴வதோ ந விஜ்ஜந்தி ஏதேஸு ஆஸவாதி அனாஸவா.
91-2. ஸமாஸதோதி வித்தா²ராபெக்கா²ய வுத்தங், ந இதோபி ஸமாஸஸ்ஸ அபா⁴வதோ. அதிஸங்கே²பதோ பன ஏகூனநவுதி சித்துப்பாதா³ ஹொந்தி. ஏதேஸூதி இமேஸு சித்துப்பாதே³ஸு. தேஸங் ப²ஸ்ஸாதீ³னங் த⁴ம்மானங் உப்பத்திங் ஏகேகங் உத்³த⁴ரித்வா சித்தசேதஸிகேஸு பி⁴க்கூ²னங் பாடவத்தா²ய பவக்கா²மீதி ஸம்ப³ந்தோ⁴. ஏககந்தி ஏகேகங், கா³தா²ப³ந்த⁴வஸேன ஏ-காரலோபோ.
93. சேதஸிகவிபா⁴க³ங் வத்துகாமோபி அவினிப்³போ⁴க³த⁴ம்மே த³ஸ்ஸேதுங் சித்தேன ஸஹ ஏகதோ கத்வா ‘‘ப²ஸ்ஸபஞ்சக’’ந்தி. ஏகதோ உப்பாதோ³ ஏதேஸந்தி ஏகுப்பாதா³, ஸஹ கீ²யந்தீதி ஸஹக்க²யா, ஏகதோ உப்பஜ்ஜித்வா ஏகதோ நிருஜ்ஜ²னகாதி அத்தோ².
94. ஸப்³பெ³ஸ்வேவ ஏகவீஸஸதேஸு சித்தேஸு ஸமுபலப்³ப⁴னதோ ஸப்³ப³ஸாதா⁴ரணா. கிஞ்சாபி அனந்தரகா³தா²ய சித்தேன
95-100. த்³விபஞ்சவிஞ்ஞாணவஜ்ஜிதசதுசத்தாலீஸகாமாவசரசித்தேஸு, லோகியலோகுத்தரவஸேன ஏகாத³ஸஸு பட²மஜ்ஜா²னிகசித்தேஸு சாதி பஞ்சபஞ்ஞாஸசித்தேஸு விதக்கஸ்ஸ தே³ஸிதத்தா ஆஹ ‘‘விதக்கோ…பே॰… ஸமுதீ³ரிதோ’’தி. விசாரோ பஞ்சபஞ்ஞாஸஸவிதக்கசித்தேஸு சேவ ஏகாத³ஸஸு து³தியஜ்ஜா²னிகசித்தேஸு சாதி ச²ஸட்டி²சித்தேஸு உப்பஜ்ஜதீதி ஆஹ ‘‘சாரோ…பே॰… ஜாயதே’’தி.
ஏகபஞ்ஞாஸசித்தேஸு பீதீதி காயவிஞ்ஞாணவஜ்ஜிதேஸு அட்டா²ரஸஸு ஸோமனஸ்ஸஸஹக³தகாமாவசரசித்தேஸு சேவ சதுத்த²பஞ்சமஜ்ஜா²னவஜ்ஜிததெத்திங்ஸரூபஜ்ஜா²னிகசித்தேஸு சாதி ஏகபஞ்ஞாஸசித்தேஸு பீதி ஜாயதி. தேஸட்டி²யா ஸுக²ந்தி ஏகபண்ணாஸஸப்பீதிகசித்தேஸு சேவ ஏகாத³ஸஸு சதுத்த²ஜ்ஜா²னிகசித்தேஸு, குஸலவிபாககாயவிஞ்ஞாணே சாதி தேஸட்டி²யா சித்தேஸு ஸுக²ங் ஜாயதி. தேஸட்டி²ஸுக²ஸஹக³தசித்தானி சேவ தீணி ச து³க்க²ஸஹக³தானீதி ச²ஸட்டி²சித்தே வஜ்ஜெத்வா அவஸேஸபஞ்சபண்ணாஸசித்தேஸு உபெக்கா² உப்பஜ்ஜதீதி ஆஹ ‘‘உபெக்கா² பஞ்சபஞ்ஞாஸசித்தேஸூ’’தி. து³க்க²ங் தீஸூதி த்³வீஸு படிக⁴சித்தேஸு சேவ அகுஸலவிபாககாயவிஞ்ஞாணே சாதி தீஸு சித்தேஸு து³க்க²ங் ஜாயதி. ஹோதி…பே॰… ஸோமனஸ்ஸிந்த்³ரியந்தி தேஸட்டி²யா ஸுக²ஸஹக³தசித்தேஸு ஏகமேவ காயவிஞ்ஞாணங் அபனெத்வா அவஸேஸேஸு ஸோமனஸ்ஸிந்த்³ரியங் ஹோதி. அகுஸலவிபாககாயவிஞ்ஞாணவஸேன ஏகமேவ து³க்கி²ந்த்³ரியஸஹக³தங், ததா² குஸலவிபாககாயவிஞ்ஞாணமேவ ஸுகி²ந்த்³ரியஸம்பயுத்தந்தி ஆஹ ‘‘து³க்கி²ந்த்³ரியங்…பே॰… ஸுகி²ந்த்³ரிய’’ந்தி.
அஹேதுகவிபாககிரியாமனோதா⁴துவஜ்ஜிதேஸு ‘‘பஞ்சுத்தர…பே॰… ஆஹா’’தி. தி³ட்ட²த⁴ம்மிகஸம்பராயிகத்தே²ஸு வினாயகோ. ஸமாதி⁴ந்த்³ரியங் விசிகிச்சா²வஜ்ஜிதவீரியஸஹக³தசித்தேஸு வுத்தந்தி ஆஹ ‘‘சதுத்தரஸதே’’திஆதி³.
அட்டா²ரஸ அஹேதுகசித்தானி, த்³வே ஏகஹேதுகசித்தானி ச வஜ்ஜெத்வா அவஸேஸஏகுத்தரஸதே சித்தே ச²ந்தோ³ உப்பஜ்ஜதீதி த³ஸ்ஸேதுங் ‘‘ஸப்³பா³ஹேதுகசித்தானீ’’திஆதி³ வுத்தங். த³ஸ விஞ்ஞாணேதி குஸலாகுஸலவிபாகவஸேன த்³விகு³ணிதே சக்கா²தி³கே பஞ்சவிஞ்ஞாணே.
102-6. நியதா ந யேவாபனகா விய கதா³சீதி அத்தோ². கத²ங் பனேதே ஏகனவுதியா சித்தெஸ்வேவ ஜாயந்தீதி ஆஹ ‘‘அஹேதுகேஸூ’’திஆதி³. ஏகூனாஸீதியாதி த்³வாத³ஸ ஞாணஸம்பயுத்தகாமாவசரானி, பஞ்சத³ஸ ரூபாவசரானி, த்³வாத³ஸ அரூபாவசரானி, ஸமசத்தாலீஸ லோகுத்தரசித்தானீதி ஏவங் ஏகூனாஸீதியா திஹேதுகசித்தேஸு. அட்ட²வீஸதியா சித்தேதி ஸோளஸஸு காமாவசரகுஸலமஹாகிரியாஸு, த்³வாத³ஸஸு ச லோகியசதுத்த²ஜ்ஜா²னசித்தேஸு சாதி அட்ட²வீஸதிசித்தேஸு. ஸாட்ட²கே சத்தாலீஸவிதே⁴தி அட்ட²ஸஹிதே சத்தாலீஸவிதே⁴, அட்ட²சத்தாலீஸவிதே⁴தி வுத்தங் ஹோதி. ச² யுக³ளானீதி காயபஸ்ஸத்³தி⁴சித்தபஸ்ஸத்³தா⁴தீ³னி ச² யுக³ளானி. குஸலாப்³யாகதா சாதி குஸலசித்தஸம்பயோக³தோ குஸலா, அப்³யாகதசித்தஸம்பயோக³தோ அப்³யாகதாதி குஸலேனபகாஸனவிதா⁴னேஸு சே²கேன ஸத்து²னா பகாஸிதா தே³ஸிதாதி அத்தோ².
108-111. ஸங்ஸயோதி மஹேஸினா ஸம்மாஸம்பு³த்³தே⁴ன. அட்ட²ஸூதி அட்ட²லோப⁴ஸஹக³தசித்தேஸு. சதூஸூதி தெஸ்வேவ தி³ட்டி²ஸஹக³தசித்தேஸு. தி³ட்டி²வியுத்தேஸு சதூஸூதி ஸம்ப³ந்தோ⁴. த்³வீஸ்வேவாதி த்³வீஸு தோ³ஸமூலகசித்தேஸு. த்³வீஸு ஜாயந்தி நோ ஸஹாதி தோ³ஸமூலெஸ்வேவ த்³வீஸு ஜாயந்தி, ஸஹ பன ந உப்பஜ்ஜந்தி, உஸூயனகாலே இஸ்ஸா, மச்ச²ரணகாலே மச்சே²ரந்திஆதி³னா நானா ஹுத்வாவ உப்பஜ்ஜந்தி. பஞ்சஸூதி பஞ்சஸு ஸஸங்கா²ரிகசித்தேஸு.
112. சித்தஸ்ஸ சேதஸிகத்தாபா⁴வேபி குஸலாகுஸலாப்³யாகதத⁴ம்மானங் க³ணனட்டா²னதோ ‘‘மனோ’’தி சித்தம்பி வுத்தங்.
114-5. எத்தாவதா ‘‘ஏகூனதிங்ஸசித்தேஸூ’’திஆதி³ வுத்தங். நனு ச ப²ஸ்ஸபஞ்சமகராஸி ஸப்³ப³பட²மங் ஆக³தா, ஸா கஸ்மா ந வுத்தாதி? ஸப்³ப³ஸாதா⁴ரணபா⁴வதோ. ந ஹி ஸோ சித்துப்பாதோ³ அத்தி², யோ ப²ஸ்ஸபஞ்சமகவினிமுத்தோதி. ஏகாத³ஸ பட²மஜ்ஜா²னிகானி ஸோமனஸ்ஸஸஹக³தானி, த்³வாத³ஸ ஸஹேதுககாமாவசரானி, ததா² சத்தாரி அகுஸலானி, ஸுக²ஸந்தீரணஹஸிதுப்பாதா³னி த்³வேதி ஏகூனதிங்ஸசித்தேஸு பஞ்சங்கி³கங் ஜா²னங் பஞ்சகராஸிஸங்கா²தங் மதங். சது…பே॰… நித்³தி³ஸேதி ஏகாத³ஸ து³தியஜ்ஜா²னிகானி, குஸலவிபாககிரியாவஸேன த்³வாத³ஸ உபெக்கா²ஸஹக³தஸஹேதுககாமாவசரானி, உபெக்கா²தோ³மனஸ்ஸஸஹக³தானி அட்ட² அகுஸலானி, த்³விபஞ்சவிஞ்ஞாணவஜ்ஜிதஉபெக்கா²ஸஹக³தானி ச² அஹேதுகசித்தானி சாதி இமானி ஸத்ததிங்ஸ சித்தானி யதா²யோக³ங் சதூஹி ஜா²னங்கே³ஹி யுத்தானி. எத்த²
ஏகாத³ஸவித⁴ந்தி ஏகாத³ஸவித⁴ங் ததியஜ்ஜா²னிகசித்தங் பீதிஸுக²சித்தேகக்³க³தாயோக³தோ திவங்கி³கமுதீ³ரிதங். சதுத்திங்ஸ…பே॰… முதீ³ரிதந்தி த்³வாத³ஸ அரூபாவசரசித்தானி, த்³வாவீஸதி சதுத்த²பஞ்சமஜ்ஜா²னிகானி ஸாஸவானாஸவானீதி சதுத்திங்ஸ சித்தானி யதா²யோக³ங் உபெக்கே²கக்³க³தாயோக³தோ, ஸுகே²கக்³க³தாயோக³தோ ச து³வங்கி³கமுதீ³ரிதங். சதுத்த²ஜ்ஜா²னிகானி ஹி ஏகாத³ஸ ஸுகே²கக்³க³தாஸஹிதானி, ஸேஸானி தேவீஸதி உபெக்கே²கக்³க³தாஸஹிதானி.
116. ஸபா⁴வேனாவிதக்கேஸூதி து³தியஜ்ஜா²னாத³யோ விய பா⁴வனாப³லேன வினா ஸபா⁴வேனேவ அவிதக்கேஸு த்³விபஞ்சவிஞ்ஞாணேஸு. தேஸு ஹி விஜ்ஜமானானிபி ஸேஸஜா²னங்கா³னி விதக்கவிரஹேன உபனிஜ்ஜா²னகிச்சேஸு அஸமத்தா²னி. தேனேவ ஹி அட்ட²கதா²யம்பி ‘‘விதக்கபச்சி²மகஞ்ஹி ஜா²னங்க³ங் நாமா’’தி வுத்தங். பா⁴வனாய அவிதக்கபா⁴வப்பத்தானி பன பா⁴வனாப³லேனேவ உபனிஜ்ஜா²னகிச்சேஸு படுதரா, தஸ்மா ஸபா⁴வேனாவிதக்கேஸு ஜா²னங்கா³னி ந உத்³த⁴ரெய்ய. ‘‘ந உத்³த⁴டா’’தி வா பாடோ², ந உத்³த⁴டானீதி அத்தோ².
யதி³ ஏவங் கஸ்மா த்³விபஞ்சவிஞ்ஞாணேஸு ஸரூபேனேவ சித்தேகக்³க³தா வுத்தா, நனு தஸ்ஸா விதக்கவிரஹேன ஜா²னங்க³கிச்சே அஸமத்த²தாய ராஸிப⁴ஜனாபா⁴வதோ யேவாபனகவஸேன வசனங் யுத்தந்தி த⁴ம்மஸங்க³ணியங் த்³விபஞ்சவிஞ்ஞாணேஸு ஸங்க³ஹவாரே ஜா²னங்க³ராஸி ந உத்³த⁴டாதி ரூபதா⁴துயங் திண்ணங் மஹாபூ⁴தானங் அப்படிக⁴பா⁴வேபி காமதா⁴துயங் ஸப்படிக⁴மஹாபூ⁴தேஹி ஸமானபா⁴வதோ தத்தா²பி ஸப்படிக⁴பா⁴வோ விய த்³விபஞ்சவிஞ்ஞாணேஸு வேத³னாசித்தேகக்³க³தானங் விதக்கவியோகே³ன ஜா²னகிச்சாகரணேபி ஸவிதக்கசித்தேஸு ஜா²னசித்தஸமங்கீ³வேத³னாதீ³ஹி ஸமானத்தா ஜா²னங்க³பா⁴வேன வசனங் நாம யுத்தங். தேனேவ ச நாமரூபஸமாஸே ‘‘ப²ஸ்ஸபஞ்சகராஸிஜா²னது³கராஸிஇந்த்³ரியத்திகராஸீ’’தி வுத்தந்தி. அத² வா கிங் ஏதாய யுத்திசிந்தாய, த⁴ம்மஸபா⁴வவேதி³னா ததா²க³தேன த⁴ம்மஸபா⁴வங் அவிரஜ்ஜி²த்வா தே³ஸிதந்தி ந எத்த² அனுயோகோ³ காதப்³போ³தி. அஹேதுகசித்தானங் ஆரம்மணே ஸுப்பதிட்டி²ததாபா⁴வேன அனிய்யானிகத்தா வுத்தங் ‘‘ஸப்³பா³…பே॰… ந உத்³த⁴ரே’’தி. வுத்தஞ்ஹேதங் அட்ட²கதா²யம்பி ‘‘ஹேதுபச்சி²மகோ மக்³கோ³’’தி.
117. தீணி ஸோளஸசித்தேஸூதி பன்னரஸஸு அஹேதுகவிபாகசித்தேஸு சேவ கிரியாமனோதா⁴தும்ஹி சாதி ஸோளஸஸு சித்தேஸு. மனிந்த்³ரியங் ஜீவிதிந்த்³ரியங் வேத³னிந்த்³ரியேஸு லப்³ப⁴மானமேகந்தி தீணிந்த்³ரியானி ஹொந்தி. இமேஸுபி குஸலவிபாககாயவிஞ்ஞாணதா⁴துயங் மனிந்த்³ரியஸுகி²ந்த்³ரியஜீவிதிந்த்³ரியவஸேன தீணிந்த்³ரியானி, அகுஸலவிபாககாயவிஞ்ஞாணதா⁴துயங் து³க்கி²ந்த்³ரியேன ஸஹ தீணி, ஸுக²ஸந்தீரணே ஸோமனஸ்ஸிந்த்³ரியேன ஸஹ தீணி, அவஸேஸதேரஸசித்தேஸு உபெக்கி²ந்த்³ரியேன ஸஹ தீணீதி. எத்த² சித்தந்தி ஸஸம்பயுத்தத⁴ம்மஸ்ஸ சித்துப்பாத³ஸ்ஸ அதி⁴ப்பேதத்தா மனிந்த்³ரியஸ்ஸாபி ஆதா⁴ரபா⁴வோ யுஜ்ஜெய்ய. இதரதா² ஹி மனிந்த்³ரியந்தி ஏகஸ்மிங் பன சத்தாரீதி ஏகஸ்மிங் விசிகிச்சா²ஸஹக³தே வீரியிந்த்³ரியமனிந்த்³ரியஜீவிதிந்த்³ரியஉபெக்கி²ந்த்³ரியவஸேன சத்தாரி. பஞ்ச தேரஸஸூதி ட²பெத்வா விசிகிச்சா²ஸஹக³தங் அவஸேஸானி ஏகாத³ஸ அகுஸலசித்தானி, கிரியாஹேதுகமனோவிஞ்ஞாணதா⁴துத்³வயந்தி தேரஸஸு சித்தேஸு வீரியிந்த்³ரியாதீ³னி தீணி, ஸமாதி⁴ந்த்³ரியங், வேத³னிந்த்³ரியேஸு லப்³ப⁴மானங் ஏகந்தி பஞ்சிந்த்³ரியானி. எத்த² ஹி த்³வீஸு தோ³ஸமூலேஸு வீரியிந்த்³ரியஸமாதி⁴ந்த்³ரியமனிந்த்³ரியஜீவிதிந்த்³ரியதோ³மனஸ்ஸிந்த்³ரியவஸேன
118. ஸத்த த்³வாத³ஸசித்தேஸூதி த்³வாத³ஸஸு ஞாணவிப்பயுத்தசித்தேஸு ஸத்³தா⁴ஸதிஸமாதி⁴வீரியஜீவிதமனிந்த்³ரியானி ச வேத³னிந்த்³ரியேஸு லப்³ப⁴மானமேகந்தி ஸத்த இந்த்³ரியானி. தத்த² ஹி ச²ஸு ஸோமனஸ்ஸஸஹக³தேஸு ஸத்³தி⁴ந்த்³ரியாதீ³னி ச² ஸோமனஸ்ஸிந்த்³ரியேன ஸத்³தி⁴ங் ஸத்த, இதரேஸு ச²ஸு உபெக்கி²ந்த்³ரியேன ஸத்³தி⁴ங் ஸத்த ஹொந்தி. ஏகேனூனேஸு…பே॰… மனேஸு சாதி த்³வாத³ஸ ஞாணஸம்பயுத்தானி காமாவசரானி, ஸத்தவீஸதி லோகியஜ்ஜா²னசித்தானி சாதி ஏகூனசத்தாலீஸவிதே⁴ஸு லோகியசித்தேஸு புரிமானி ஸத்த, பஞ்ஞிந்த்³ரியஞ்சாதி அட்டே²வ இந்த்³ரியானி. எத்த² ஹி ஸோமனஸ்ஸஸஹக³தேஸு ச²ஸு காமாவசரேஸு, த்³வாத³ஸஸு ரூபாவசரசதுக்கஜ்ஜா²னேஸு சாதி அட்டா²ரஸசித்தேஸு ஸோமனஸ்ஸிந்த்³ரியேன, ஸேஸேஸு ச உபெக்கி²ந்த்³ரியேன ஸத்³தி⁴ங் யோஜெத்வா அட்டி²ந்த்³ரியானி வேதி³தப்³பா³னி.
119. சத்தாலீஸாய சித்தேஸு நவகந்தி ஸமசத்தாலீஸவிதே⁴ஸு லோகுத்தரசித்தேஸு புரிமானி அட்ட²இந்த்³ரியானி, அனஞ்ஞாதஞ்ஞஸ்ஸாமீதிந்த்³ரியங் அஞ்ஞிந்த்³ரியங் அஞ்ஞாதாவிந்த்³ரியந்தி இமேஸு லப்³ப⁴மானமேகந்தி இந்த்³ரியானங் நவகா. ஸோதாபத்திமக்³கே³ஸு ஹி அனஞ்ஞாதஞ்ஞஸ்ஸாமீதிந்த்³ரியங் ஏவந்தி ச²ஹி இந்த்³ரியேஹி ஸம்பயுத்தஸ்ஸ அபா⁴வதோ கத்த²சி தீணி, கத்த²சி சத்தாரி, கத்த²சி பஞ்ச, கத்த²சி ஸத்த, கத்த²சி அட்ட², கத்த²சி நவிந்த்³ரியானீதி ஏவங் ச²ஹி ஆகாரேஹி இந்த்³ரியயோகோ³பி, ந கேவலங் ஜா²னங்க³யோகோ³வ, அத² கோ² இந்த்³ரியேஹி ஸஹ சித்துப்பாதா³னங் ஸம்பயோகோ³பி வேதி³தப்³போ³தி.
120-3. இதா³னி மக்³க³ங்க³ஸம்பயோக³ங் த³ஸ்ஸெந்தோ பட²மங் தாவ யேஸு சித்தேஸு மக்³க³ங்கா³னி ந லப்³ப⁴ந்தி, தானி த³ஸ்ஸெத்வா பச்சா² மக்³க³ங்க³யோக³சித்துப்பாதே³ த³ஸ்ஸேதுங் ‘‘அமக்³க³ங்கா³னீ’’திஆதி³மாஹ. எத்தா²தி ஏதஸ்மிங் ஏகவீஸஸதப்பபே⁴தே³ சித்தஸ்மிங், இமஸ்மிங் மக்³க³ங்கா³தி⁴காரே வா. விஞ்ஞாணேஸு த்³விபஞ்சஸூதி ஸபா⁴வாவிதக்கேஸு சக்கா²தீ³ஸு த்³விபஞ்சவிஞ்ஞாணேஸு. கிஞ்சாபி ஹெட்டா² த்³விபஞ்சவிஞ்ஞாணேஸு ஜா²னங்கா³பா⁴வோ, அஹேதுகேஸு ச மக்³க³ங்கா³பா⁴வோ வுத்தோவ, அஜா²னங்கா³னி பன தத்த² அதி⁴காரவஸேன வுத்தானி, இத⁴ பஸங்கா³க³தவஸேன. அமக்³க³ங்கா³னி தத்த² பஸங்கா³க³தவஸேன, இத⁴ அதி⁴காரவஸேனாதி ந கோசி புனருத்திதோ³ஸோ.
ஏகந்தி து³மக்³க³ங்க³ங். திமக்³க³ங்கா³னி ஸத்தஸூதி சத்தாரி தி³ட்டி²விப்பயுத்தானி, த்³வே தோ³ஸமூலானி, உத்³த⁴ச்சஸஹக³தசித்தந்தி ஸத்தஸு மிச்சா²ஸங்கப்பமிச்சா²வாயாமமிச்சா²ஸமாதி⁴யோக³தோ திமக்³க³ங்கா³னி. சத்தாலீஸ…பே॰… சதுரங்கி³கோதி த்³வாத³ஸ ஞாணவிப்பயுத்தானி, சத்தாரி தி³ட்டி²ஸம்பயுத்தானி, பட²மஜ்ஜா²னிகவஜ்ஜானி சதுவீஸதி மஹக்³க³தசித்தானீதி சத்தாலீஸசித்தேஸு யோ மக்³கோ³ லப்³ப⁴தி, ஸோ யதா²யோக³ங் ஸம்மாஸங்கப்பஸம்மாவாயாமஸம்மாஸதிஸம்மாஸமாதி⁴யோக³தோ, மிச்சா²தி³ட்டி²மிச்சா²ஸங்கப்பமிச்சா²வாயாமமிச்சா²ஸமாதி⁴யோக³தோ, ஸம்மாதி³ட்டி²ஸம்மாவாயாமஸம்மாஸதிஸம்மாஸமாதி⁴யோக³தோ
பஞ்சத்³த³ஸஸு…பே॰… பஞ்சங்கி³கோதி த்³வாத³ஸஸு ஞாணஸம்பயுத்தகாமாவசரேஸு சேவ தீஸு லோகியபட²மஜ்ஜா²னிகேஸு சாதி பன்னரஸஸு சித்தேஸு ஸம்மாதி³ட்டி²ஸம்மாஸங்கப்பஸம்மாவாயாமஸம்மாஸதிஸம்மாஸமாதி⁴வஸேன பஞ்சங்கி³கோ மக்³கோ³. நனு ச ஸம்மாவாசாத³யோ காமாவசரேஸு லப்³ப⁴ந்தீதி? ஸச்சங் லப்³ப⁴ந்தி, பாடே² பன அனாக³தத்தா இத⁴ பரிச்சத்தாதி. த்³வத்திங்ஸசித்தேஸூதி பட²மஜ்ஜா²னிகவஜ்ஜேஸு த்³வத்திங்ஸலோகுத்தரசித்தேஸு. ஸத்தங்கி³கோதி அவிதக்கத்தா ஸம்மாஸங்கப்போ ந லப்³ப⁴தீதி தங் பரிச்சஜித்வா அவஸேஸஸத்தமக்³க³ங்க³வஸேன ஸத்தங்கி³கோ வுத்தோ.
யத்த² பன ஸம்மாஸங்கப்போ லப்³ப⁴தி, தத்த² தேன ஸஹ அட்ட²ங்கி³கோதி ஆஹ ‘‘மக்³கோ³ அட்ட²ஸூ’’திஆதி³. தத்த² அட்ட²ஸு சித்தேஸூதி பட²மஜ்ஜா²னிகேஸு அட்ட²ஸு லோகுத்தரசித்தேஸு. ஏவந்தி ச²ஹி மக்³க³ங்கே³ஹி ஸம்பயுத்தஸ்ஸ அபா⁴வதோ கத்த²சி த்³வே மக்³க³ங்கா³னி, கத்த²சி தீணி, கத்த²சி சத்தாரி, கத்த²சி பஞ்ச, கத்த²சி ஸத்த, கத்த²சி அட்டா²தி ஏவங் ச²ஹி பகாரேஹி.
124-6. இதா³னி ப³லஸம்பயோக³ங் த³ஸ்ஸெந்தோ ஆஹ ‘‘ப³லானி த்³வே’’திஆதி³. தத்த² வீரியப³லஸமாதி⁴ப³லவஸேன த்³வே ப³லானி கிரியாஹேதுகமனோவிஞ்ஞாணதா⁴துத்³வயே விப⁴ங்க³வாரே ஆக³தானி வீரியப³லஸமாதி⁴ப³லானி பச்சேகங் லப்³ப⁴ந்தீதி ‘‘த்³வே த்³விசித்தேஸூ’’தி வுத்தங். ஏகஸ்மிங் தீணீதி ஏகஸ்மிங் விசிகிச்சா²ஸஹக³தே வீரியப³லஅஹிரிகப³லஅனொத்தப்பப³லவஸேன தீணி ப³லானி. ஏகாத³ஸஸு சத்தாரீதி விசிகிச்சா²ஸஹக³தவஜ்ஜேஸு ஏகாத³ஸஸு அகுஸலசித்தேஸு ஸமாதி⁴ப³லஞ்சேவ புப்³பே³ ச² த்³வாத³ஸஸூதி த்³வாத³ஸஸு ஞாணவிப்பயுத்தசித்தேஸு ஸத்³தா⁴வீரியஸதிஸமாதி⁴ஹிரிஒத்தப்பவஸேன ச² ப³லானி.
ஏகூனாஸீதியா ஸத்தாதி த்³வாத³ஸஸு ஞாணஸம்பயுத்தகாமாவசரசித்தேஸு சேவ ஸத்தவீஸதிமஹக்³க³தசித்தேஸு ச சத்தாலீஸாய லோகுத்தரசித்தேஸு சாதி ஏகூனாஸீதிவிதே⁴ஸு சித்தேஸு ஸத்³தா⁴வீரியஸதிஸமாதி⁴பஞ்ஞாஹிரிஒத்தப்பவஸேன ஸத்த ப³லானி. ஸோளஸேவாப³லானீதி பஞ்சத³ஸ அஹேதுகவிபாகானி, கிரியாமனோதா⁴துஆவஜ்ஜனஞ்சாதி ஸோளஸ ப³லவிப்பயோக³தோ அப³லசித்தானி. ஏவந்தி பஞ்சஹி ப³லேஹி ஸம்பயுத்தஸ்ஸ அபா⁴வதோ கத்த²சி த்³வே, கத்த²சி தீணி, கத்த²சி சத்தாரி, கத்த²சி ச², கத்த²சி ஸத்தாதி பஞ்சஹி ஆகாரேஹி ஸப³லங், இமேஸு ஏகஸ்ஸாபி அபா⁴வதோ அப³லம்பி ச விஞ்ஞெய்யங், விஜானிதப்³ப³ந்தி அத்தோ². ஹேதுராஸிஆத³யோ வினிச்ச²யபா⁴வதோ ந வுத்தாதி வேதி³தப்³ப³ங். யேஸு சித்தேஸு யானி ஜா²னங்க³மக்³க³ங்க³ப³லிந்த்³ரியானி ஜாயந்தீதி ஸம்ப³ந்தோ⁴. கா³தா²ப³ந்த⁴ஸுக²த்த²ங் இந்த்³ரியானங் ஓஸானகரணங்.
இதி அபி⁴த⁴ம்மத்த²விகாஸினியா நாம
அபி⁴த⁴ம்மாவதாரஸங்வண்ணனாய
சேதஸிகவிபா⁴க³னித்³தே³ஸவண்ணனா நிட்டி²தா.