5. பஞ்சமோ பரிச்சே²தோ³
பூ⁴மிபுக்³க³லசித்துப்பத்தினித்³தே³ஸவண்ணனா
182-8. பு³த்³தி⁴யா பு³த்³தி⁴வுத்³தி⁴கரங். யஸ்ஸ யஸ்ஸ நயஸ்ஸ கத²னங் படிஞ்ஞாதங், தங் தங் த³ஸ்ஸெந்தோ ஆஹ ‘‘சித்தானங் பூ⁴மீஸுப்பத்தி’’ந்தி. தங் வத்வா பூ⁴மீனங் ஆதா⁴ரவஸேன பஸங்கா³க³தங் க³திபே⁴த³ங், ப⁴வபே⁴த³ஞ்ச த³ஸ்ஸேதுங் ‘‘தே³வா சேவா’’திஆதி³ வுத்தங். ‘‘சதஸ்ஸோபாயபூ⁴மியோ’’தி வத்வா அஸுரக³தியா பேதக³தியங்யேவ ஸங்க³ஹிதத்தா ‘‘க³தியோ பஞ்சா’’தி வுத்தந்தி வத³ந்தி. மயங் பன ‘‘திஸ்ஸோவாபாயபூ⁴மியோ’’தி பாடே²ன ப⁴விதப்³ப³ந்தி மஞ்ஞாம. ந ஹி ஏஸ அனாகுலவசனோ ஆசரியோ ஈதி³ஸங் புப்³பா³பரவிருத்³த⁴ங் விய ஸம்மோஹஜனகங் வசனங் பா⁴ஸதி. பாளியம்பி ஹி –
‘‘பஞ்ச கோ² இமா, ஸாரிபுத்த, க³தியோ. கதமா பஞ்ச? நிரயோ திரச்சா²னயோனி பெத்திவிஸயோ மனுஸ்ஸா தே³வா’’தி (அ॰ நி॰ 9.68) –
ஏவங் தயோ ப⁴வா. தத்தா²தி தேஸு தீஸு ப⁴வேஸு. திங்ஸேவாதி சதஸ்ஸோ அபாயபூ⁴மியோ, ஸத்தவிதா⁴ காமஸுக³திபூ⁴மி, ஸோளஸ ரூபீப்³ரஹ்மலோகா, சதஸ்ஸோ அரூபபூ⁴மியோதி ஏகதிங்ஸபூ⁴மீனமந்தரே சித்தப்பவத்திஅதி⁴காரத்தா அஸஞ்ஞபூ⁴மிங் அபனெத்வா அவஸேஸா திங்ஸேவ பூ⁴மியோதி அத்தோ². தாஸு திங்ஸேவ புக்³க³லாதி தாஸு பூ⁴மீஸு உப்பன்னா புக்³க³லா பூ⁴மிக³ணனவஸேன திங்ஸேவ ஹொந்தி. பூ⁴மிவஸேன திங்ஸவிதா⁴பி பன படிஸந்தி⁴சித்தக³ணனாய ஏகூனவீஸதி ஹொந்தீதி த³ஸ்ஸெந்தோ ஆஹ ‘‘பூ⁴மீஸ்வேதாஸூ’’திஆதி³.
படிஸந்தி⁴கசித்தானந்தி த³ஸ காமாவசரபடிஸந்தி⁴சித்தானி, பஞ்ச ரூபாவசரபடிஸந்தி⁴சித்தானி, சத்தாரி அரூபாவசரபடிஸந்தி⁴சித்தானீதி இமேஸங் ஏகூனவீஸதிபடிஸந்தி⁴சித்தானங் வஸேன. அஸஞ்ஞீனமசித்தகாதி அஸஞ்ஞஸத்தானங் அசித்தகா படிஸந்தி⁴. வுத்தஞ்ஹேதங் –
‘‘அஸஞ்ஞஸத்தா
யதி³ படிஸந்தி⁴வஸேன வீஸதி புக்³க³லா, கத²ங் பூ⁴மிவஸேன திங்ஸாதி வுத்தா. ஏகதிங்ஸாதி ஹி வத்தப்³ப³ந்தி ஆஹ ‘‘இதா⁴’’திஆதி³.
ந விஜ்ஜதி ஹேது இமேஸந்தி அஹேதூ, து³வே, தீணி ச ஹேதூ இமேஸந்தி த்³விதிஹேதூ, படிஸந்தி⁴வஸேன அஹேதுகா, து³ஹேதுகா, திஹேதுகா சாதி அத்தோ². தத்த² அஹேதுகா ஆபாயிகா ச, ஏகச்சே பூ⁴மதே³வா, மனுஸ்ஸேஸு ஜச்சந்த⁴ஜச்சப³தி⁴ரஜச்சும்மத்தகனபுங்ஸகஉப⁴தொப்³யஞ்ஜனகாத³யோ ச. வுத்தாவஸேஸா காமஸுக³திவாஸினோவ து³ஹேதுகா. திஹேதுகா பன காமஸுக³திவாஸினோவ. அரியா பன அட்டா²தி சதுன்னங் அரியமக்³க³ஸமங்கீ³னங், சதுன்னஞ்ச அரியப²லஸமங்கீ³னங் வஸேன அட்ட² அரியபுக்³க³லா
189-92. ‘‘பூ⁴மீஸுப்பத்திங் ப⁴ணதோ மே நிபோ³த⁴தா²’’தி ஸுத்வா சோத³கோ ‘‘திங்ஸபூ⁴மீஸூ’’திஆதி³னா ஸப்³பே³ஸங் பூ⁴மீனங் ஸாதா⁴ரணசித்தானி புச்ச²தி, இதரோ ‘‘சுத்³த³ஸேவா’’தி விஸ்ஸஜ்ஜேதி. தத்த² அட்ட² பரித்தகுஸலானி, சத்தாரி தி³ட்டி²விப்பயுத்தானி, உத்³த⁴ச்சஸஹக³தங், மனொத்³வாராவஜ்ஜனஞ்சாதி சுத்³த³ஸேவ, ந ஊனானி நாதி⁴கானி, ஸப்³பா³ஸு திங்ஸபூ⁴மீஸு ஹொந்தி, ஸப்³ப³பூ⁴மீனங் ஸாதா⁴ரணானீதி அத்தோ².
ஸதா³…பே॰… ஸியுந்தி த்³வே தோ³ஸமூலானி, குஸலவிபாகசக்கு²ஸோதவிஞ்ஞாணஸம்படிச்ச²னஸந்தீரணத்³வயவஜ்ஜிதானி அட்டா²ரஸ காமாவசரவிபாகசித்தானீதி வீஸதி சித்தானி ஸதா³ காமேயேவ ப⁴வே ஸியுங், ந கதா³சி அஞ்ஞத்த² உப்பஜ்ஜந்தீதி அத்தோ². நனு ச ப்³ரஹ்மூனம்பி அகுஸலவிபாகானி உப்பஜ்ஜந்தீதி? ஸச்சங் உப்பஜ்ஜந்தி, தானி காமப⁴வே அனிட்ட²ரூபாத³யோ ஆரப்³ப⁴ உப்பஜ்ஜந்தி ப்³ரஹ்மலோகே தேஸங் அபா⁴வதோதி காமப⁴வேயேவ நியமிதானி. ரூபாவசரவிபாகசித்தானி பஞ்ச ரூபாவசரப⁴வேயேவ ஸியுங், சத்தாரோ ச அரூபாவசரவிபாகா அரூபீஸூதி ஆஹ ‘‘பஞ்ச ரூபப⁴வே’’திஆதி³.
காம …பே॰… ப⁴வந்தீதி ரூபாவசரகுஸலகிரியசித்தானி சேவ குஸலவிபாகானி ச சக்கு²ஸோதவிஞ்ஞாணஸம்படிச்ச²னஸந்தீரணானி வொட்ட²ப்³ப³னவஜ்ஜானி ச த்³வே அஹேதுககிரியசித்தானி பட²மமக்³க³விஞ்ஞாணந்தி அட்டா²ரஸ சித்தானி காமரூபப⁴வேயேவ ப⁴வந்தி, ந அரூபப⁴வே. தத்த² ஹி ஸப்³ப³ஸோ ரூபஸஞ்ஞானங் ஸமதிக்கந்தத்தா ரூபாவசரகுஸலகிரியா நுப்பஜ்ஜந்தி. சக்கு²விஞ்ஞாணாதீ³னி வத்து²த்³வாரவிரஹதோ, ஹஸிதுப்பாதோ³ ஏகந்தவத்து²னிஸ்ஸயத்தா, ஸோதாபத்திமக்³கோ³ பரதோகோ⁴ஸபச்சயாயேவ நிப்³ப³த்தனதோ த்³வேசத்தாலீஸாதி அட்ட² பரித்தகுஸலானி, சத்தாரி அரூபகுஸலானி, பட²மமக்³க³வஜ்ஜானி ஸத்த லோகுத்தரசித்தானி, படிக⁴த்³வயவஜ்ஜிதானி ச த³ஸ அகுஸலசித்தானி, புப்³பே³ வுத்தஅஹேதுககிரியாத்³வயவஜ்ஜிதானி நவ காமாவசரகிரியசித்தானி, சத்தாரி அரூபாவசரகிரியசித்தானீதி ஏவங் த்³வேசத்தாலீஸ சித்தானி தீஸு ப⁴வேஸு ஹொந்தி.
193-204. ஏவங் ப⁴வவஸேன சித்துப்பத்திங் த³ஸ்ஸெத்வா இதா³னி காலவஸேன த³ஸ்ஸெந்தோ ஆஹ ‘‘ட²பெத்வா பனா’’திஆதி³. ஸப்³பா³ஸந்தி நித்³தா⁴ரணத்தே² ஸாமிவசனங். அட்ட² மஹாகிரியா, அரஹத்தமக்³க³ப²லசித்தானி, அனாகா³மிப²லங், நேவஸஞ்ஞானாஸஞ்ஞாயதனகுஸலகிரியாதி தேரஸேவ சித்தானி அபாயரஹிதாஸு ச²ப்³பீ³ஸபூ⁴மீஸு ஹொந்தி அபாயேஸு விபாகாவரணஸப்³பா⁴வே ஏதேஸங் அனுப்பஜ்ஜனதோ. அபரானி ச² சித்தானீதி ஸம்ப³ந்தோ⁴. தானி பன ரூபப⁴வஸாதா⁴ரணானங் பஞ்சபரித்தவிபாகானங், கிரியமனோதா⁴துயா ச வஸேன வேதி³தப்³பா³னி.
பஞ்ச சித்தானீதி தி³ட்டி²ஸம்பயுத்தவிசிகிச்சா²வஸேன பஞ்ச சித்தானி. தானி ஹி பஞ்சஸு ஸுத்³தா⁴வாஸபூ⁴மீஸு ந லப்³ப⁴ந்தி. தத்த² அனாகா³மிகீ²ணாஸவானமேவ அதி⁴வுத்த²த்தா, தேஸஞ்ச பட²மமக்³கே³னேவ இமேஸங் பஞ்சன்னங் விஞ்ஞாணானங் அனுப்பாத³த⁴ம்மதங் ஆபாதி³தத்தா.
அபரானி து³வேதி ததியாருப்பகுஸலகிரியசித்தானி. தானி ஹி நேவஸஞ்ஞானாஸஞ்ஞாயதனேஸு அதிக்கந்தாரம்மணத்தா, அபாயேஸு ச அஹேதுகபடிஸந்தி⁴கத்தா நுப்பஜ்ஜந்தி. சதுவீஸதீபூ⁴மிஸு த்³வே சாதி விஞ்ஞாணஞ்சாயதனகுஸலகிரியாவஸேன த்³வே சித்தானி. தேவீஸபூ⁴மிஸு த்³வேயேவாதி ஆகாஸானஞ்சாயதனகுஸலகிரியசித்தானி.
ஏகாத³ஸவித⁴ந்தி ரூபாவசரகுஸலகிரியா ஹஸிதுப்பாதோ³தி ஏகாத³ஸ. ஸோதாபத்திப²லங் யாவ அனாகா³மிமக்³கோ³ சத்தாரி ச சித்தானி ஸுத்³தா⁴வாஸஅபாயவஜ்ஜாஸு ஏகவீஸதிபூ⁴மீஸு ப⁴வந்தி. ஏகங் ச²ஸு பூ⁴மிஸூதி வேஹப்ப²லஸுத்³தா⁴வாஸஸங்கா²தாஸு ச²ஸு பஞ்சமஜ்ஜா²னபூ⁴மீஸு.
சத்தாரி…பே॰… பூ⁴மிஸூதி சதுத்த²ஜ்ஜா²னவிபாகோ பரித்தஸுப⁴அப்பமாணஸுப⁴ஸுப⁴கிண்ஹவஸேன தீஸு பூ⁴மீஸு ஜாயதி, து³தியஜ்ஜா²னவிபாகோ, ததியஜ்ஜா²னவிபாகோ ச பரித்தாபா⁴அப்பமாணாபா⁴ஆப⁴ஸ்ஸரவஸேன தீஸு பூ⁴மீஸு, பட²மஜ்ஜா²னவிபாகோ ப்³ரஹ்மபாரிஸஜ்ஜப்³ரஹ்மபுரோஹிதமஹாப்³ரஹ்மாவஸேன தீஸு பூ⁴மீஸு ஹோதீதி ஏவங் சத்தாரி சித்தானி ஏகேகவஸேன தீஸு தீஸு பூ⁴மீஸு ஜாயந்தி.
206-9. ஏவங் எத்தகானேவ சித்தானி எத்தகாஸு பூ⁴மீஸு உப்பஜ்ஜந்தீதி சித்தனியமவஸேன உப்பத்திங் த³ஸ்ஸெத்வா இதா³னி எத்தகாஸு ஏவ பூ⁴மீஸு எத்தகானேவ சித்தானி உப்பஜ்ஜந்தீதி பூ⁴மினியமவஸேன த³ஸ்ஸேதுங் ‘‘குஸலாகுஸலா காமே’’திஆதி³ ஆரத்³த⁴ங். தத்த² காமே குஸலாகுஸலா வீஸதி, தேஸங் பன்னரஸ அஹேதுகா பாகா, ஆவஜ்ஜனத்³வயஞ்சாதி ஸத்ததிங்ஸேவ மானஸா நரகாதீ³ஸு சதூஸுபி அபாயேஸு ஜாயரே. அவஸேஸானி பன ஸத்தரஸ காமாவசரவிபாககிரியசித்தானி, பஞ்சதிங்ஸ மஹக்³க³தலோகுத்தரானீதி த்³வேபஞ்ஞாஸ மானஸா கதா³சிபி தேஸு நுப்பஜ்ஜந்தி அபூ⁴மிபா⁴வதோதி அத்தோ².
அஸீதி ஹத³யாதி வுத்தாவஸேஸானி அஸீதி சித்தானி. கா⁴னாதி³விஞ்ஞாணத்தயந்தி குஸலவிபாககா⁴னாதி³விஞ்ஞாணத்தயங். ‘‘அபுஞ்ஞஜா பாகா’’தி அகுஸலவிபாகானங் ஸப்³பே³ஸமேவ க³ஹிதத்தா கா⁴னாதி³விஞ்ஞாணத்தயங் அக்³க³ஹிதவிஸேஸம்பி பாரிஸேஸஞாயேன குஸலவிபாகமேவ விஞ்ஞாயதி.
213. தோ³மனஸ்ஸந்தி க்ரியா ச த்³வேதி வொட்ட²ப்³ப³னவஜ்ஜிதா த்³வே அஹேதுககிரியா.
214. பூ⁴மிவஸேனேவாதி புக்³க³லே அனாமஸித்வா கேவலங் பூ⁴மிவஸேன. புக்³க³லானங் வஸேன ச பூ⁴மிவஸேன ச சித்துப்பத்திங் விபா⁴வயேதி ஸம்ப³ந்தோ⁴.
216-8. பஞ்சபூ⁴மிஸூதி ஆசரியஜோதிபாலத்தே²ரஸ்ஸ அதி⁴ப்பாயேன திஹேதுகவிபாகேஹிபி ஸத்³தி⁴ங் பஞ்சசத்தாலீஸேவாதி த³ட்ட²ப்³ப³ங். அஹேதுகஸ்ஸ வுத்தேஹீதி அஹேதுகஸத்தஸ்ஸ வுத்தேஹி ஸத்ததிங்ஸமானஸேஹி ஸஹ. நவ க்ரியாதி அட்ட² மஹாகிரியா, ஹஸிதுப்பாதோ³ சாதி இமானி அஸாதா⁴ரணகிரியசித்தானி நவ.
220-1. ‘‘சதுபஞ்ஞாஸ மானஸா’’தி வத்வா தேஸங் ஸரூபதோ த³ஸ்ஸனத்த²ங் ஆஹ ‘‘த்³விஹேதுகஸ்ஸா’’திஆதி³. புன ‘‘சதுபஞ்ஞாஸா’’திஆதி³ பன நிக³மனங்.
223-4. பஞ்ஞாஸேவஸ்ஸ சித்தானீதி திஹேதுகஸ்ஸ புது²ஜ்ஜனஸ்ஸ வுத்தசதுபஞ்ஞாஸசித்தேஸு தி³ட்டி²விசிகிச்சா²ஸஹக³தவஜ்ஜானி ஏகூனபஞ்ஞாஸ, ஸோதாபத்திப²லந்தி இமானி பஞ்ஞாஸேவ சித்தானி அஸ்ஸ காமாவசரஸ்ஸ ஸோதாபன்னதே³ஹினோ ஜாயந்தே. நவதிங்ஸேவாதி ஏகூனசத்தாலீஸசித்தானி. பட²மங் ப²லந்தி ஸோதாபத்திப²லங்.
225-8. து³தியஞ்ச ப²லங் ஹித்வாதி ஸகதா³கா³மிப²லங் ஹித்வா. ச-ஸத்³தே³ன ஸோதாபத்திப²லஞ்ச ஹித்வாதி அத்தோ². அத்தனோ ப²லேன யானி அட்ட²சத்தாலீஸ சித்தானி, தானி அனாகா³மிஸ்ஸ ஸத்தஸ்ஸ ஜாயந்தி. சத்தாலீஸஞ்ச சத்தாரீதி தேவீஸதி காமாவசரவிபாகசித்தானி, வீஸதி கிரியசித்தானி, அரஹத்தப²லஞ்சாதி சதுசத்தாலீஸ சித்தானி. ஸகங் ஸகந்தி ‘‘ஸோதாபன்னஸ்ஸ ஸோதாபத்திமக்³க³சித்தங், ஸகதா³கா³மினோ ஸகதா³கா³மிமக்³க³சித்த’’ந்திஆதி³னா அத்தனோ அத்தனோ மக்³க³சித்தங். கஸ்மா பன தேஸங் ஏகேகமேவ சித்தங் ஹோதீதி ஆஹ ‘‘ஏகசித்தக்க²ணாஹி தே’’தி. பஞ்சதிங்ஸேவாதி ஸத்தரஸ காமரூபாரூபகுஸலசித்தானி, படிக⁴த்³வயவஜ்ஜானி த³ஸ அகுஸலானி, ரூபப⁴வே லப்³ப⁴மானகானி பஞ்ச அஹேதுகவிபாகானி, ஆவஜ்ஜனத்³வயங், பட²மஜ்ஜா²னவிபாகோ சாதி பஞ்சதிங்ஸ சித்தானி தீஸு பட²மஜ்ஜா²னபூ⁴மீஸு புது²ஜ்ஜனஸ்ஸ ஜாயந்தி.
232-5. ஹித்வா சாதி எத்த² ச-ஸத்³தே³ன பட²மப²லஸ்ஸ க³ஹணங் த³ஸ்ஸேதி. தேன அபுஞ்ஞபஞ்சகங் ஹித்வா பட²மங் ப²லங் க³ஹெத்வா சாதி அத்தோ². அபுஞ்ஞபஞ்சகந்தி தி³ட்டி²ஸம்பயுத்தவிசிகிச்சா²ஸஹக³தவஸேன தத்தா²தி தேஸு ஸோதாபன்னஸ்ஸ வுத்தேஸு. தத்தே²வாதி ஸகதா³கா³மிஸ்ஸ வுத்தேஸு. புஞ்ஞஜங் ஸம்படிச்ச²னங் ஸந்தீரணத்³வயஞ்சேவாதி ஸம்ப³ந்தோ⁴.
237. ஏவங் பட²மஜ்ஜா²னபூ⁴மியங் புது²ஜ்ஜனஸோதாபன்னாதி³வஸேன சித்தஸம்ப⁴வங் த³ஸ்ஸெத்வா இதா³னி தேஸமேவ வஸேன து³தியஜ்ஜா²னபூ⁴மியங் த³ஸ்ஸேதுங் ‘‘புது²ஜ்ஜனஸ்ஸா’’திஆதி³ ஆரத்³த⁴ங். து³தியஜ்ஜா²னததியஜ்ஜா²னவிபாகானங் ஏகஸத்தஸ்ஸேவ அஸம்ப⁴வேபி து³தியஜ்ஜா²னதலே நிப்³ப³த்தே புது²ஜ்ஜனாத³யோ புது²ஜ்ஜனாதி³பா⁴வஸாமஞ்ஞேன ஏகதோ க³ஹெத்வா ‘‘து³தியஜ்ஜா²னததியஜ்ஜா²னபாகதோ’’தி வுத்தங்.
242. பரித்தஸுபா⁴தி³தோ பட்டா²ய யாவ அகனிட்டா² ததியசதுத்த²ஜ்ஜா²னபூ⁴மீஸு பட²மஜ்ஜா²னபூ⁴மியங் வுத்தக³ணனாய சித்தப்பவத்தி வேதி³தப்³பா³. தேனாஹ ‘‘பரித்தகஸுபா⁴தீ³ன’’ந்திஆதி³.
247. சதுவீஸதி சித்தானீதி அட்ட²பரித்தகுஸலானி, சத்தாரி அரூபகுஸலானி, படிக⁴த்³வயவஜ்ஜிதானி த³ஸ அகுஸலசித்தானி, பட²மாருப்பவிபாகோ, மனொத்³வாராவஜ்ஜனஞ்சாதி சதுவீஸதி சித்தானி பட²மாருப்பபூ⁴மியங் புது²ஜ்ஜனஸ்ஸ ஜாயந்தி.
250-3. த³ஸ பஞ்சாதி அட்ட² மஹாகிரியா, சதஸ்ஸோ அரூபகிரியா, மனொத்³வாராவஜ்ஜனங், பட²மாருப்பவிபாகோ, அரஹத்தப²லஞ்சாதி பன்னரஸ சித்தானி பட²மாருப்பபூ⁴மியங் அரஹதோ ஹொந்தி.
தேவீஸாதி பட²மாருப்பபூ⁴மியங் புது²ஜ்ஜனஸ்ஸ வுத்தேஸு சதுவீஸதிசித்தேஸு ஆகாஸானஞ்சாயதனகுஸலவிபாகவஜ்ஜா பா³வீஸதி ச து³தியாருப்பவிபாகோ சாதி தேவீஸதி து³தியாருப்பபூ⁴மியங் புது²ஜ்ஜனஸ்ஸ ஹொந்தி. தத்தே²வ திண்ணங் ப²லட்ட²ஸேகா²னங் புது²ஜ்ஜனஸ்ஸ வுத்தேஸு அகுஸலபஞ்சகவஜ்ஜானி அட்டா²ரஸ, தங்தங்ப²லஞ்சாதி ஏகூனவீஸதி சித்தானி ஹொந்தி.
க்ரியா த்³வாத³ஸாதி அட்ட² மஹாகிரியா, ஆகாஸானஞ்சாயதனவஜ்ஜிதா திஸ்ஸோ அரூபகிரியா, மனொத்³வாராவஜ்ஜனந்தி த்³வாத³ஸ கிரியசித்தானி. பாகேகோதி ஏகோ அரூபவிபாகோ.
து³தியாருப்பபூ⁴மியங் புது²ஜ்ஜனஸ்ஸ வுத்தேஸு விஞ்ஞாணஞ்சாயதனகுஸலவிபாகவஜ்ஜானி ஏகவீஸதி பா³வீஸதி சித்தானி ததியாருப்பபூ⁴மியங் புது²ஜ்ஜனஸ்ஸ உப்பஜ்ஜந்தி.
254-60. புது²ஜ்ஜனஸ்ஸ வுத்தேஸு அபுஞ்ஞபஞ்சகவஜ்ஜானி ஸத்தரஸ, பட²மப²லஞ்சாதி அட்டா²ரஸ ததியாருப்பபூ⁴மியங் ஸோதாபன்னஸ்ஸ உப்பஜ்ஜந்தி. தானீதி தானேவ அட்டா²ரஸ சித்தானி. ‘‘ட²பெத்வா பட²மங் ப²ல’’ந்தி ஹி வசனதோ து³தியப²லங் பக்கி²பித்வாதி அயமத்தோ² அவுத்தஸித்³தோ⁴. ந ஹி ஸகதா³கா³மினோ ஸகதா³கா³மிப²லஞ்ச நுப்பஜ்ஜதி ‘‘ட²பெத்வா து³தியங் ப²ல’’ந்தி. எத்தா²பி அனாகா³மிப²லங் பகரணஸித்³த⁴மேவாதி த³ட்ட²ப்³ப³ங். அட்ட² மஹாகிரியா, த்³வே ததியசதுத்தா²ருப்பகிரியா, மனொத்³வாராவஜ்ஜனங், ஆகிஞ்சஞ்ஞாயதனவிபாகோ, அரஹத்தப²லந்தி தேரஸ சித்தானி ததியாருப்பபூ⁴மியங் கீ²ணாஸவஸ்ஸ ஜாயந்தி. ததியாருப்பபூ⁴மியங் புது²ஜ்ஜனஸ்ஸ வுத்தேஸு த்³வாவீஸதிசித்தேஸு ஆகிஞ்சஞ்ஞாயதனகுஸலவிபாகவஜ்ஜாதி வீஸதி, நேவஸஞ்ஞானாஸஞ்ஞாயதனவிபாகோதி ஏகவீஸதி சித்தானி சதுத்தா²ருப்பபூ⁴மியங் புது²ஜ்ஜனஸ்ஸ ஜாயந்தி. புது²ஜ்ஜனஸ்ஸ வுத்தேஸு அபுஞ்ஞபஞ்சகவஜ்ஜானி ஸோளஸ, ஸோதாபத்திப²லஞ்சாதி ஸத்தரஸ தத்தே²வ ஸோதாபன்னஸ்ஸ ஹொந்தி. அட்ட² மஹாகிரியா, த்³வே ச நேவஸஞ்ஞானாஸஞ்ஞாயதனவிபாககிரியா, மனொத்³வாராவஜ்ஜனங், அரஹத்தப²லஞ்சாதி த்³வாத³ஸ சித்தானி தத்தே²வ அரஹதோ உப்பஜ்ஜந்தி.
261-3. அரூபகுஸலா சேவ கிரியாபி ச உப்பஜ்ஜந்தி, ந பன விபாகாதி அதி⁴ப்பாயோ. உத்³த⁴முத்³த⁴மரூபீனந்தி விஞ்ஞாணஞ்சாயதனாதீ³ஸு அரூபீனங். ஹெட்டி²மாதி விஞ்ஞாணஞ்சாயதனிகானங் ஆகாஸானஞ்சாயதனகுஸலவிபாகா நுப்பஜ்ஜந்தி, ஆகிஞ்சஞ்ஞாயதனிகானங் ஆகாஸானஞ்சாயதனவிஞ்ஞாணஞ்சாயதனகுஸலவிபாகாதி ஏவமாதி³னா ஹெட்டி²மா ஹெட்டி²மா அரூபா நுப்பஜ்ஜந்தி. கஸ்மாதி ஆஹ ‘‘தி³ட்டா²தீ³னவதோ கிரா’’தி. கிராதி அனுஸ்ஸுதியங். தி³ட்டா²தீ³னவதோதி ஆரம்மணே, ஜா²னே ச தி³ட்ட²தோ³ஸத்தா. குஸலானுத்தராதி லோகுத்தரகுஸலா.
266. ஸப்³போ³ ரூபோ மஹக்³க³தோதி ஸப்³போ³ ரூபாவசரமஹக்³க³தசித்துப்பாதோ³. மனோதா⁴தூதி கிரியாமனோதா⁴துவிபாகமனோதா⁴தூனங் காமவிபாக-க்³க³ஹணேன க³ஹிதத்தா.
269-73. ஏவங்…பே॰… ஹெட்டி²மந்தி து³தியாருப்பபூ⁴மியங் வுத்தேஸு து³தியாருப்பத்தயங் ட²பெத்வா அத்தனோ பாகேன ஸஹ ததியாருப்பபூ⁴மியங் அத்தனோ அத்தனோதி பட²மாருப்பபூ⁴மியங் பட²மாருப்பவிபாகோ, து³தியாருப்பபூ⁴மியங் து³தியாருப்பவிபாகோதி ஏவங் அத்தனோ அத்தனோ விபாகா சத்தாரோ ச அனாஸவா லோகுத்தரவிபாகாதி ஏவங் சதூஸு அரூபபூ⁴மீஸு ஏகேகாய பூ⁴மியா பஞ்ச பஞ்ச விபாகா ஜாயந்தி. யா கிரியா தேரஸேவ ஸியுங், தா ஸப்³ப³பட²மாருப்பபூ⁴மியங் கீ²ணாஸவஸ்ஸ ஜாயந்தேதி ஸம்ப³ந்தோ⁴. து³தியாருப்பபூ⁴மியங் கீ²ணாஸவஸ்ஸ பட²மாருப்பகிரியசித்தங் வஜ்ஜெத்வா த்³வாத³ஸேவ க்ரியா ஹொந்தி. ததியாருப்பபூ⁴மியங் து³தியாருப்பகிரியசித்தங் வஜ்ஜெத்வா ஏகாத³ஸ. சதுத்தா²ருப்பபூ⁴மியங் ததியாருப்பகிரியசித்தங் வஜ்ஜெத்வா த³ஸேவ விஞ்ஞெய்யா.
274-5. இதா³னி கேவலங் புக்³க³லவஸேன தேஸமேவ புக்³க³லானங் ஆவேணிகசித்தங் த³ஸ்ஸேதுங் ‘‘அரஹதோ பனா’’திஆதி³னா அரஹதோயேவ உப்பஜ்ஜனகசித்தங் த³ஸ்ஸெத்வா அனாகா³மிஆதீ³னங் பாடிபுக்³க³லிகங் ஸகஸகப²லசித்தங் பாகடமேவாதி ஸங்கி²த்தங். அரஹதோதி கீ²ணாஸவஸ்ஸ. அரஹதோ பா⁴வோ அரஹத்தங், அரஹத்தப²லந்தி அத்தோ². தஞ்ஹி ‘‘அரீனங் ஹதத்தா அரஹா’’திஆதி³னா அரஹந்த-ஸத்³த³ஸ்ஸ பவத்தினிமித்தபா⁴வேன ‘‘அரஹத்த’’ந்தி வுச்சதி. இதா³னி தேஸங் தேஸங் புக்³க³லானங் ஸாதா⁴ரணசித்தானி த³ஸ்ஸேதுங் ‘‘சதுன்னஞ்ச ப²லட்டா²ன’’ந்திஆதி³ வுத்தங்.
290. ஸுஸாரந்தி அத்த²ப்³யஞ்ஜனவஸேன பரிச்சஜிதப்³ப³ஸ்ஸ பெ²க்³கு³ஸ்ஸ அபா⁴வதோ ஸுட்டு² ஸாரங், ஸப்³ப³ஸோ ஸாரந்தி அத்தோ². பரந்தி ஸுஸாரத்தா ஏவ பரங். ஸத்தானங் இத⁴லோகபரலோகஹிதபடிச்சா²த³கஸ்ஸ அவிஜ்ஜந்த⁴காரஸ்ஸ வித⁴மனதோ மோஹந்த⁴காரப்பதீ³பங். சிந்தேதீதி அத்த²வஸேன சிந்தேதி. வாசேதீதி ப்³யஞ்ஜனவஸேன ‘‘நரங்…பே॰… நோபயந்தீ’’தி ராக³தோ³ஸானுபக³மனமேவ வுத்தங். ‘‘மோஹந்த⁴காரப்பதீ³ப’’ந்தி வா வசனேனேவ மோஹஸ்ஸ அனுபக³மோ வுத்தோ ஹோதீதி ராக³தோ³ஸானமேவ அனுபக³மனங் வுத்தங். மூலபூ⁴தானங் பன திண்ணங் அனுபக³மனவசனேன ஸேஸகிலேஸானம்பி அனுபக³மனங் வுத்தமேவாதி த³ட்ட²ப்³ப³ங்.
இதி அபி⁴த⁴ம்மத்த²விகாஸினியா நாம
அபி⁴த⁴ம்மாவதாரஸங்வண்ணனாய
பூ⁴மிபுக்³க³லசித்துப்பத்தினித்³தே³ஸவண்ணனா நிட்டி²தா.
பட²மோ பா⁴கோ³ நிட்டி²தோ.
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
அபி⁴த⁴ம்மாவதார-அபி⁴னவடீகா
(து³தியோ பா⁴கோ³)