19. ஏகூனவீஸதிமோ பரிச்சே²தோ³
கங்கா²விதரணவிஸுத்³தி⁴னித்³தே³ஸவண்ணனா
1227. அனந்தரங் ‘‘ஏதஸ்ஸா’’தி வுத்தங், ந தத³ஞ்ஞதோ விஸேஸனத்த²ங் தத³ஞ்ஞஸ்ஸ ச அபா⁴வதோ. அஜ்ஜ²த்தங் வா ஹி விபஸ்ஸனாபி⁴னிவேஸோ ஹோது ப³ஹித்³தா⁴ வா, அத்த²ஸித்³தி⁴யங் பன லக்க²ணதோ ஸப்³ப³ம்பி நாமரூபங் அனவஸேஸதோ பரிக்³க³ஹிதமேவ ஹோதீதி. ஜானித்வா ஹேதுபச்சயேதி ஹேதுபச்சயே பரிக்³க³ண்ஹித்வா, ஹேதுபச்சயே பரிக்³க³ண்ஹனஹேதூதி வுத்தங் ஹோதி. பச்சயபரிக்³க³ஹணஹேது ஹிஸ்ஸ அத்³த⁴த்தயே கங்கா²விதரணங் ஹோதீதி. விதரித்வாதி அதிக்கமித்வா, விக்க²ம்பெ⁴த்வாதி அத்தோ². தங் பன ஞாணங் ததா²விக³தங் வஸிபா⁴வப்பத்தங் ஜா²னங் விய யோகி³னோ ஸந்தானே பப³ந்த⁴வஸேன பவத்ததீதி கத்வா வுத்தங் ‘‘டி²த’’ந்தி.
1229-30. நாமரூபஸ்ஸ…பே॰… ஆவஜ்ஜித்வாதி யதா² நாம குஸலோ பி⁴ஸக்கோ ரோக³ங் தி³ஸ்வா தஸ்ஸ ஸமுட்டா²னங் பரியேஸதி, யதா² வா பன அனுகம்பகோ புரிஸோ குமாரங் உத்தானஸெய்யங் நாமரூபஸ்ஸ கோ ஹேது, கோ வா பச்சயோ ப⁴வே. ந தாவேதங் அஹேதுகங் ஸப்³ப³த்த², ஸப்³ப³தா³, ஸப்³பே³ஸஞ்ச ஏகஸதி³ஸபா⁴வாபத்திதோ, ந இஸ்ஸராதி³ஹேதுகங் நாமரூபதோ உத்³த⁴ங் இஸ்ஸராதீ³னங் அபா⁴வதோ. யேபி நாமரூபமத்தமேவ இஸ்ஸராத³யோதி வத³ந்தி தேஸங் இஸ்ஸராதி³ஸங்கா²தனாமரூபஸ்ஸ அஹேதுபா⁴வாபத்திதோ, தஸ்மா ப⁴விதப்³ப³மஸ்ஸ ஹேதுபச்சயேஹி, ‘‘கோ நு கோ²’’தி நாமரூபஸ்ஸ ஹேதுபச்சயே ஆவஜ்ஜித்வாதி அத்தோ². ஏவங் தாவ கத்வா இமஸ்ஸ நாமரூபஸ்ஸ ஹேதுபச்சயே பரிக்³க³ண்ஹந்தேன ஓளாரிகத்தா, ஸுபாகடத்தா ச ரூபஸ்ஸ பச்சயபரிக்³க³ஹோ ஸுகரோதி பட²மங் தஸ்ஸ பச்சயபரிக்³க³ஹோ காதப்³போ³தி த³ஸ்ஸெந்தோ ஆஹ ‘‘ரூபகாயஸ்ஸா’’திஆதி³. தத்த² யதா² நாமரூபஸ்ஸ பச்சயபரிக்³க³ஹோ அஹேதுவிஸமஹேதுவாத³னிவத்தியா ஹோதி, ஏவங் நிப்³பி³தா³விராகா³வஹபா⁴வேன தத்த² தத்த² அபி⁴ரதினிவத்தியாபி இச்சி²தப்³போ³தி தங் த்³வத்திங்ஸாகாரவஸேன த³ஸ்ஸேதுங் ‘‘கேஸா லோமா’’திஆதி³ வுத்தங்.
1232-3. அவிஜ்ஜா…பே॰… மதோதி அவிஜ்ஜா தண்ஹா உபாதா³னங் கம்மந்தி இத³ங் சதுப்³பி³த⁴ங் ஏதஸ்ஸ யதா²வுத்தஸ்ஸ ரூபகாயஸ்ஸ ஹேது, சதுப்³பி³தோ⁴ ஆஹாரோ பச்சயோதி அத்தோ². கஸ்மா பன புரிமங் ஹேது, இதரோ பச்சயோதி சோத³னங் ஸந்தா⁴ய ‘‘ஜனகோ’’திஆதி³ங் வத்வா தங் லோகவஸேன ஸமத்தே²துங் ‘‘ஹெத்வங்குரஸ்ஸா’’திஆதி³ வுத்தங். தத்த² ஜனகோதி, அனுபாலகோதி ச அந்தோக³தஹெத்வத்த²மித³ங் விஸேஸனங், ஜனகத்தா, அனுபாலகத்தாதி வுத்தங் ஹோதி. தத்த² ஜனகத்தாதி நிப்³ப³த்தகத்தா. இமினா பீ³ஜங் விய அங்குரஸ்ஸ அவிஜ்ஜாத³யோ ரூபகாயஸ்ஸ அஸாதா⁴ரணகாரணதாய ஹேதூதி த³ஸ்ஸிதங். அனுபாலகத்தாதி உபத்த²ம்ப⁴கத்தா. இமினா பன அங்குரஸ்ஸ பத²வீஸலிலாத³யோ
1234-7. இதிமே…பே॰… க³தாதி ஏவமேதே அவிஜ்ஜாத³யோ பஞ்ச த⁴ம்மா யதா²ரஹங் ஹேதுபா⁴வங், பச்சயபா⁴வஞ்ச க³தா. மாதாவ உபனிஸ்ஸயாதி அவிஜ்ஜா ப⁴வேஸு விஜ்ஜமானதோ³ஸபடிச்சா²த³னபா⁴வேன, தண்ஹா பத்த²னாபா⁴வேன, உபாதா³னங் த³ள்ஹக்³கா³ஹபா⁴வேனாதி ஏவங் ஸங்கா²ரப⁴வானங் ஹேதுபூ⁴தா ஜனகஸஹாயதாய ப⁴வனிகந்திதங்ஸஹஜாதஆஸன்னகாரணத்தா அபி⁴ஸங்கா²ரிகா, அபஸ்ஸயபூ⁴தா வாதி மாதா விய உபனிஸ்ஸயா ஹொந்தி. யதா² பிதுஜனிதஸுக்கே புத்தஸ்ஸ உப்பத்தீதி பிதா ஜனகோ, ஏவங் கம்மங் ஸத்தஸ்ஸ உப்பாத³கத்தா ஜனகந்தி ஆஹ. யதா² தா⁴தீ ஜாதஸ்ஸ குமாரஸ்ஸ வட்³டி⁴தா ஸந்தா⁴ரிகா, ஏவங் ஆஹாரோ உப்பன்னஸ்ஸ காயஸ்ஸ ப்³ரூஹேதா, ஸந்தா⁴ரகோ சாதி வுத்தங் ‘‘தா⁴தீ…பே॰… ப⁴வே’’தி. காமஞ்செத்த² அவிஜ்ஜாத³யோ நாமகாயஸ்ஸாபி பச்சயோ, பகாரந்தரேன பன தஸ்ஸ பாகடங் பச்சயபரிக்³க³ஹவிதி⁴ங் த³ஸ்ஸேதுங் ‘‘சக்கு²ஞ்சா’’திஆதி³ வுத்தங். தத்த² சக்கு²ஞ்சாதி ச-ஸத்³தோ³ ஸமுச்சயத்தோ², தேன சக்கு²விஞ்ஞாணஸ்ஸ ஆவஜ்ஜனாதி³ங் அஜ்ஜ²த்தங் ஸப்³ப³ங் பச்சயஜாதங் ஸங்க³ண்ஹாதி. ரூபமாலோகமேவ சாதி பன ச-ஸத்³தே³ன யதா² பா³ஹிரரூபங் சக்கு²விஞ்ஞாணஸ்ஸ ஆரம்மணபச்சயோ, யதா² ச ஆலோகோ உபனிஸ்ஸயபச்சயோ, ஏவங் அஞ்ஞம்பி பா³ஹிரங் பச்சயஜாதங் ஸங்க³ண்ஹாதி. படிச்சாதி பச்சயபூ⁴தங் லத்³தா⁴தி அத்தோ². தேன சக்கு²ஸ்ஸ நிஸ்ஸயபுரேஜாதஇந்த்³ரியவிப்பயுத்தஅத்தி²அவிக³தவஸேன, ரூபாலோகானஞ்ச யதா²ஸம்ப⁴வங் ஆரம்மணஉபனிஸ்ஸயபுரேஜாதஅத்தி²அவிக³தவஸேன, இதரேஸஞ்ச ஸத்³த³ஸங்க³ஹிதானங் அனந்தராதி³ஸஹஜாதாதி³வஸேன பச்சயபா⁴வங் த³ஸ்ஸேதி. ஆதி³-ஸத்³தே³ன ப²ஸ்ஸாதீ³னங் விய ஸஹ பச்சயேஹி ஸோதவிஞ்ஞாணாதீ³னங் ஸங்க³ஹோ வேதி³தப்³போ³. ஏவங் ஸம்மஸனூபக³ங் ஸப்³ப³ங் நாமங் ஸஹ பச்சயேன ஸங்க³ஹிதங் ஹோதி. தேனாஹ ‘‘நாமகாயஸ்ஸ பச்சயங் பரிக³ண்ஹதீ’’தி.
1238-40. தி³ஸ்வானாதி ததே²வித³ந்தி இமினா ந கேவலங் ஸப்பச்சயதாமத்தமேவ ஏதரஹி பவத்ததி, தாதி³ஸேஹி அவிஜ்ஜாதி³பச்சயேஹேவ அதீதேபி பவத்தித்தா²தி பச்சயஸஹிததாபி பச்சாமட்டா²தி த³ட்ட²ப்³ப³ங். புப்³ப³ந்தேதி அதீதக²ந்த⁴ப்பப³ந்த⁴கொட்டா²ஸே. பஞ்சதா⁴க³தாதி –
‘‘அஹோஸிங் நு கோ² அஹமதீதமத்³தா⁴னங், ந நு கோ² அஹோஸிங் அஹமதீதமத்³தா⁴னங், கிங் நு கோ² அஹோஸிங் அஹமதீதமத்³தா⁴னங், கத²ங் நு கோ² அஹோஸிங் அஹமதீதமத்³தா⁴னங், கிங் ஹுத்வா கிங் அஹோஸிங் நு கோ² அஹமதீதமத்³தா⁴ன’’ந்தி (ம॰ நி॰ 1.18; ஸங்॰ நி॰ 2.20; மஹானி॰ 174) –
பஞ்சஹி ஆகாரேஹி ஆக³தா, பவத்தா வா. அபரந்தேதி அனாக³தே க²ந்த⁴ப்பப³ந்த⁴கொட்டா²ஸே. பஞ்சதா⁴ ஸமுதீ³ரிதாதி –
‘‘ப⁴விஸ்ஸாமி நு கோ² அஹமனாக³தமத்³தா⁴னங், ந நு கோ² ப⁴விஸ்ஸாமி அஹமனாக³தமத்³தா⁴னங், கிங் நு கோ² ப⁴விஸ்ஸாமி அஹமனாக³தமத்³தா⁴னங், கத²ங் நு கோ² ப⁴விஸ்ஸாமி அஹமனாக³தமத்³தா⁴னங், கிங் ஹுத்வா கிங் ப⁴விஸ்ஸாமி நு கோ² அஹமனாக³தமத்³தா⁴ன’’ந்தி (ம॰ நி॰ 1.18; ஸங்॰ நி॰ 2.20; மஹானி॰ 174) –
ஏவங் பஞ்சதா⁴ கதி²தா.
1241. பச்சுப்பன்னேபி அத்³தா⁴னேதி ஏதரஹி படிஸந்தி⁴ங் ஆதி³ங் கத்வா சுதிபரியந்தே அத்³தா⁴னேபி. அத்³தா⁴ன-க்³க³ஹணேன செத்த² பச்சுப்பன்னக²ந்த⁴கொட்டா²ஸமேவ வத³தி. ந ஹி தப்³பி³னிமுத்தோ அஞ்ஞோ கோசி காலோ நாம அத்தீ²தி. ச²ப்³பி³தா⁴ பரிகித்திதாதி –
‘‘அஹங் நு கொ²ஸ்மி, நோ நு கொ²ஸ்மி, கிங் நு கொ²ஸ்மி, கத²ங் நு கொ²ஸ்மி, அயங் நு கோ² ஸத்தோ குதோ ஆக³தோ, ஸோ குஹிங் கா³மீ ச ப⁴விஸ்ஸதீ’’தி (ம॰ நி॰ 1.18; ஸங்॰ நி॰ 2.20; மஹானி॰ 174) –
ஏவங் ‘‘ஸப்³பா³’’தி வத்வாபி ‘‘அனவஸேஸா’’தி வுத்தங். நத்தி² ஏதிஸ்ஸா அவஸேஸோ அவஸிட்டோ²தி அனவஸேஸா, ஸோளஸவிதா⁴பி சேஸா ஏககங்கா²வஸேனாபி அனவஸிட்டா² ஹுத்வாதி வுத்தங் ஹோதி. பஹிய்யதீதி விக்க²ம்ப⁴னவஸேன பஹிய்யதி. காமங் நாமரூபமத்தங் வினா ஸத்தஸ்ஸ அத³ஸ்ஸனேன தி³ட்டி²விஸுத்³தி⁴யாவ பச்சுப்பன்னே கங்கா² பஹீனா, அதீதானாக³தே கங்கா²னங் பஹானேன பன பச்சுப்பன்னே கங்கா²ய அதிஸயப்பஹானங் த³ஸ்ஸேதுங் இதே⁴வ ஸா வுத்தா. அத² வா பச்சுப்பன்னே நிஸ்ஸத்தனாமரூபஸ்ஸ பச்சயேஸு பவத்தகங்கா²ய இதே⁴வ தீரணதோ ஸா இத⁴ வுத்தா. வண்ணப⁴ணனங் வா ஏதங் இத⁴ பச்சுப்பன்னகங்கா²ய பஹானவசனங் யதா² தங் ஸோதாபத்திமக்³கா³தீ³ஸு பஹீனானம்பி ச பஞ்சன்னங் ஓரம்பா⁴கி³யானங் ஸங்யோஜனானங் பஹானாதிஆதி³னா அனாகா³மிமக்³கா³தீ³ஸு வசனந்தி.
1242. கம்மவிபாகானங் வஸேனாபீதி புரிமகம்மப⁴வஸ்மிங் மோஹோ அவிஜ்ஜா, ஆயூஹனங் ஸங்கா²ரா, நிகந்தி தண்ஹா, உபக³மனங் உபாதா³னங், சேதனா ப⁴வோ இதி இமே பஞ்ச த⁴ம்மா புரிமகம்மப⁴வஸ்மிங் இத⁴ படிஸந்தி⁴யா பச்சயா, இத⁴ படிஸந்தி⁴ விஞ்ஞாணங், ஓக்கந்தி நாமரூபங், பஸாதோ³ ஆயதனங், பு²ட்டோ² ப²ஸ்ஸோ, வேத³யிதங் வேத³னா இதி இமே பஞ்ச த⁴ம்மா இதூ⁴பபத்திப⁴வஸ்மிங் புரே கதஸ்ஸ கம்மஸ்ஸ பச்சயா, இத⁴ பரிபக்கத்தா ஆயதனானங் மோஹோ அவிஜ்ஜா…பே॰… சேதனா ப⁴வோ இதி இமே பஞ்ச த⁴ம்மா கம்மப⁴வஸ்மிங் ஆயதிங் படிஸந்தி⁴யா பச்சயாதி ஏவங் வுத்தானங் கம்மவட்டவிபாகவட்டானங் வஸேன. கிலேஸவட்டோபி செத்த² கம்மஸஹாயதாய கம்மவட்டேனேவ ஸங்க³ஹிதோதி த³ட்ட²ப்³ப³ங்.
1243. தி³ட்ட²த⁴ம்மவேத³னீயந்தி எத்த² தி³ட்ட²த⁴ம்மோ வுச்சதி பச்சக்க²பூ⁴தோ பச்சுப்பன்னோ அத்தபா⁴வோ, தத்த² வேதி³தப்³ப³ப²லங் கம்மங் தி³ட்ட²த⁴ம்மவேத³னீயங். உபபஜ்ஜாபராபரியாஹோஸிகம்மவஸா பனாதி உபபஜ்ஜவேத³னீயஅபராபரியவேத³னீயஅஹோஸிகம்மவஸேன. உத்தரபத³லோபவஸேன ஹி ‘‘உபபஜ்ஜாபராபரிய’’ந்தி வுத்தங். தத்த² பச்சுப்பன்னப⁴வதோ அனந்தரங் உபபஜ்ஜித்வா வேதி³தப்³ப³ப²லங் கம்மங் உபபஜ்ஜவேத³னீயங். அபரே அபரே தி³ட்ட²த⁴ம்மதோ அஞ்ஞஸ்மிங் அஞ்ஞஸ்மிங் யத்த²கத்த²சி அத்தபா⁴வே வேதி³தப்³ப³ப²லங் கம்மங் அபராபரியவேத³னீயங். அஹோஸி ஏவ கம்மங், ந தஸ்ஸ விபாகோ அஹோஸி, அத்தி², ப⁴விஸ்ஸதி சாதி ஏவங் வத்தப்³ப³கம்மங் அஹோஸிகம்மங்.
படிபக்கே²ஹி அனபி⁴பூ⁴ததாய, பச்சயவிஸேஸேன படிலத்³த⁴விஸேஸதாய ச ப³லவபா⁴வப்பத்தா தாதி³ஸஸ்ஸ புப்³பா³பி⁴ஸங்கா²ரஸ்ஸ வஸேன ஸாதிஸயா ஹுத்வா பவத்தா பட²மஜவனசேதனா தஸ்மிங்யேவ அத்தபா⁴வே தி³ட்ட²த⁴ம்மவேத³னீயா நாம. ஸா ஹி வுத்தாகாரேன ப³லவதி ஜவனஸந்தானே கு³ணவிஸேஸயுத்தேஸு உபகாரானுபகாரவஸப்பவத்தியா, ஆஸேவனாலாபே⁴ன அப்பவிபாகதாய ச இதரத்³வயங் விய பவத்தஸந்தானுபரமாபெக்க²ங், ஓகாஸலாபா⁴பெக்க²ஞ்ச கம்மங் ந ஹோதீதி இதே⁴வ புப்ப²மத்தங் விய பவத்திவிபாகமத்தங் அஹேதுகப²லங் தே³தி, ஸஹேதுகப²லதா³னே பன படிஸந்தி⁴ஆகட்³ட⁴னம்பி ஆபஜ்ஜெய்ய. ததா² அஸக்கொந்தந்தி கம்மஸ்ஸ விபாகதா³னங் நாம உபதி⁴ப்பயோகா³தி³பச்சயந்தரஸமவாயேனேவ ஹோதீதி தத³பா⁴வதோ தஸ்மிங்யேவ அத்தபா⁴வே விபாகங் தா³துங் அஸக்கொந்தங். அஹோஸிகம்மங்…பே॰… விபாகோதி எத்த² ‘‘அஹோஸி கம்ம’’ந்தி பத³ங் விஸுங் விஸுங் யோஜேதப்³ப³ங் ‘‘அஹோஸி கம்மங் நாஹோஸி கம்மவிபாகோ, அஹோஸி கம்மங் ந ப⁴விஸ்ஸதி கம்மவிபாகோ, அஹோஸி கம்மங் நத்தி² கம்மவிபாகோ’’தி (படி॰ ம॰ 1.234). தத்த² ஸகஸககாலாதிக்கந்தஸ்ஸ உபபஜ்ஜவேத³னீயஸ்ஸ, தி³ட்ட²த⁴ம்மவேத³னீயஸ்ஸ ச வஸேன புரிமங் வுத்தங். தஞ்ஹி கம்மஸ்ஸ
அத்த²ஸாதி⁴காதி தா³னாதி³பாணாதிபாதாதி³அத்த²ஸ்ஸ நிப்பா²தி³கா. கா பன ஸாதி ஆஹ ‘‘ஸத்தமஜவனசேதனா’’தி. ஸா ஹி ஸன்னிட்டா²பகசேதனா வுத்தனயேன படிலத்³த⁴விஸேஸா, படிஸந்தி⁴யா அனந்தரபச்சயபா⁴வினோ விபாகஸந்தானஸ்ஸ அனந்தரபச்சயபா⁴வேன வா ததா² அபி⁴ஸங்க²தா ஸமானா அனந்தரத்தபா⁴வே விபாகதா³யினீ உபபஜ்ஜவேத³னீயங் நாம. யேபு⁴ய்யவுத்தியா செத்த² ‘‘ஸத்தமஜவனசேதனா’’தி வுத்தங். பச்சவெக்க²ணவஸிதாதி³பவத்தியங் பன பஞ்சமாதி³காபி ஹோதி. விபாகங் தே³தீதி படிஸந்தி⁴ங் த³த்வா பவத்திவிபாகங் தே³தி, அதி³ன்னபடிஸந்தி⁴கங் பன பவத்திவிபாகங் தே³தீதி நத்தி². சுதிஅனந்தரஞ்ஹி உபபஜ்ஜவேத³னீயஸ்ஸ ஓகாஸோதி ஆசரியா. படிஸந்தி⁴யா பன தி³ன்னாய ஜாதிஸதேபி பவத்திவிபாகங் தே³தி. தேனாஹ ப⁴க³வா ‘‘திரச்சா²னக³தே தா³னங் த³த்வா ஸதகு³ணா பாடிகங்கி²தப்³பா³’’தி (ம॰ நி॰ 3.379). உபி⁴ன்ன…பே॰… தே³தீதி யதா²வுத்தகாரணவிரஹதோ தி³ட்ட²த⁴ம்மூபபஜ்ஜவேத³னீயபா⁴வங் அஸம்பத்தா பஞ்ச சேதனா விபாகதா³னஸபா⁴வஸ்ஸ அனுபச்சி²ன்னத்தா யதா³ ஓகாஸங் லப⁴தி, ததா³ படிஸந்தி⁴விபாகங், பவத்திவிபாகங் வா தே³தி. ஸதி ஸங்ஸாரப்பவத்தியாதி இமினா
1244. ஏவங் ‘‘க³ருக’’ந்திஆதி³ வுத்தங். தத்த² க³ருகந்தி மஹாஸாவஜ்ஜங், மஹானுபா⁴வஞ்ச அஞ்ஞேன கம்மேன படிபா³ஹிதுங் அஸக்குணெய்யகம்மங். ப³ஹுலந்தி அபி⁴ண்ஹஸோ கதங், ஏகவாரங் கத்வாபி அபி⁴ண்ஹஸமாஸேவிதஞ்ச. ஆஸன்னந்தி மரணாஸன்னகாலே அனுஸ்ஸரிதங், ததா³ கதஞ்ச. கடத்தாகம்மந்தி க³ருகாதி³பா⁴வங் அஸம்பத்தங் கதமத்ததோயேவ கம்மந்தி வத்தப்³ப³கம்மங். தத்த² குஸலங் வா ஹோது அகுஸலங் வா, க³ருகாக³ருகேஸு யங் க³ருகங் மாதுகா⁴தகாதி³கம்மங் வா மஹக்³க³தகம்மங் வா, ததே³வ பட²மங் விபச்சதி. ததா² ப³ஹுலாப³ஹுலேஸு யங் ப³ஹுலங் ஸுஸீல்யங் து³ஸ்ஸீல்யங் வா, ததே³வ பட²மங் விபச்சதி. தூ³ராஸன்னேஸு யங் ஆஸன்னங் மரணகாலே அனுஸ்ஸரிதங், தேனேவ உபபஜ்ஜதி. ஆஸன்னகாலே கதே ச வத்தப்³ப³மேவ நத்தீ²தி. கடத்தா பன கம்மங் புனப்புனங் லத்³தா⁴ஸேவனங் புரிமானங் அபா⁴வே படிஸந்தி⁴ங் ஆகட்³ட⁴தி. இதி க³ருகங் ஸப்³ப³பட²மங் விபச்சதி. ததா² ஹி தங் ‘‘க³ருக’’ந்தி வுத்தங். க³ருகே அஸதி ப³ஹுலீகதங், தஸ்மிம்பி அஸதி ஆஸன்னங், தஸ்மிம்பி அஸதி கடத்தாகம்மந்தி வுத்தங் ‘‘புரிமஜாதீஸு கதகம்மங் விபச்சதீ’’தி.
1245. படிஸந்தி⁴தா³னாதி³வஸேன விபாகஸந்தானஸ்ஸ நிப்³ப³த்தகங் ஜனகங். ஸுக²து³க்க²ஸந்தானஸ்ஸ, நாமரூபப்பப³ந்த⁴ஸ்ஸ வா சிரதரப்பத்திஹேதுபூ⁴தங் உபத்த²ம்ப⁴கங். தேனாஹ ‘‘ஸுக²து³க்க²ங் உபத்த²ம்பே⁴தி, அத்³தா⁴னங் பவத்தேதீ’’தி. ஸுக²து³க்கே² பவத்தமானே ப³வ்ஹாபா³த⁴தாதி³பச்சயூபனிபாதனேன ஸணிகங் ஸணிகங் தஸ்ஸ விபா³த⁴கங் உபபீளகங். தேனாஹ ‘‘ஸுக²து³க்க²ங் பீளேதி பா³த⁴தி, அத்³தா⁴னங் பவத்திதுங் ந தே³தீ’’தி. ததா² படிபக்க²கம்மவிபாகஸ்ஸ அப்பவத்திகரணவஸேன உபச்சே²த³கங் படிபா³ஹகங் உபகா⁴தகங். தேனாஹ ‘‘தஸ்ஸ விபாகங் படிபா³ஹித்வா’’தி.
ரூபஞ்ச ‘‘ரூபாரூபவிபாகக்க²ந்தே⁴’’தி வுத்தங். அஞ்ஞேன கம்மேனாதி குஸலேன வா அகுஸலேன வா அஞ்ஞேன கம்மேன கத்துபூ⁴தேன தி³ன்னாய படிஸந்தி⁴யா விபாகே ஜனிதே. தேனாஹ ‘‘ஜனிதே விபாகே’’தி. பவத்திவிபாகங் ஸந்தா⁴ய ‘‘ஜனிதே விபாகே’’தி வத³ந்தி. உப்பஜ்ஜனகஸுக²து³க்க²ங் உபத்த²ம்பே⁴தீதி உபத்த²ம்ப⁴ககம்மங் குஸலங் ஸமானங் அஞ்ஞேனபி குஸலகம்மேன உப்பஜ்ஜமானகங் ஸுக²ங் தஸ்ஸ படிபக்க²விபா³த⁴னவஸேன உபத்த²ம்பே⁴தி. அகுஸலங் அஞ்ஞேன அகுஸலகம்மேன உபபஜ்ஜமானங் து³க்க²ங் ததே²வ உபத்த²ம்பே⁴தி. ஏவஞ்ச உபத்த²ம்பெ⁴ந்தங் தங் தீ³க⁴காலங் பவத்தேதி நாமாதி ஆஹ ‘‘அத்³தா⁴னங் பவத்தேதீ’’தி. உப்பஜ்ஜனகஸுக²து³க்க²ங் பீளேதீதி உபபீளகங் அகுஸலங் ஸமானங் ஸுகி²தஸ்ஸ ரோகா³தி³அந்தராயகாரணஸம்பாத³கபா⁴வேன ஸுக²ஸந்தானங் உபச்சி²ந்த³ந்தங் பீளேதி, குஸலஞ்ச ரோகா³தி³னா து³க்கி²தஸ்ஸ பே⁴ஸஜ்ஜாதி³ஸுகா²தி³காரணஸம்பாத³கபா⁴வேன து³க்க²ஸந்தானங் விச்சி²ந்த³ந்தங் பீளேதி. கேசி பன ‘‘ஸுக²து³க்க²ஸ்ஸ காரணங் அஸம்பாதெ³ந்தம்பி படிஸந்தி⁴தா³யககம்மஸ்ஸ பவத்திவிபாகங் படிபா³ஹித்வா ஸயங் விபாகதா³யககம்மங் உபபீளககம்ம’’ந்தி வத³ந்தி. ஏவங் ஸந்தே பன படிஸந்தி⁴தா³யகமேவ ஜனககம்மந்தி வுத்தங் ஸியா.
அபிச உபகா⁴தகேன ஸஹ இமஸ்ஸ விஸேஸபா⁴வோ ஆபஜ்ஜதி, தங் படிஸந்தி⁴விபாகஸ்ஸ படிபா³ஹகந்தி சே? தங் ந, அவிஸேஸேன வுத்தத்தாதி. ‘‘து³ப்³ப³லங் கம்மங் கா⁴தெத்வா’’தி வுத்தே ‘‘நனு தஸ்ஸ புப்³பே³யேவ ஸித்³த⁴த்தா, நிருத்³த⁴த்தா ச கத²மித³ங் தது³பகா⁴தகங் ஹோதீ’’தி ஆபன்னங் சோத³னங் ஸந்தா⁴ய கம்மஸ்ஸ கா⁴தனங் நாம தஸ்ஸ விபாகபடிபா³ஹனமேவாதி த³ஸ்ஸெந்தோ ஆஹ ‘‘தஸ்ஸ விபாகங் படிபா³ஹித்வா’’தி. தங்படிபா³ஹனஞ்ச அத்தனோ விபாகுப்பத்தியா ஓகாஸகரணந்தி வுத்தங் ‘‘அத்தனோ விபாகஸ்ஸ ஓகாஸங் கரோதீ’’தி. விபச்சனாய கதோகாஸங் கம்மங் ‘‘ஏவங்…பே॰… உப்பன்னங் நாம ஹோதீ’’தி.
உபபீளகங் அஞ்ஞஸ்ஸ விபாகங் உபச்சி²ந்த³தி, ந ஸயங் அத்தனோ விபாகங் தே³தி, உபகா⁴தகங் பன து³ப்³ப³லகம்மங் உபச்சி²ந்தி³த்வா அத்தனோ விபாகங் உப்பாதே³தீதி அயமேதேஸங் விஸேஸோ. கேசி பன ஆசரியா அபரேனாபி நயேன ஜனகாதி³கம்மங் இச்ச²ந்தி. கத²ங்? யஸ்மிங் கம்மே கதே படிஸந்தி⁴யங், பவத்தே ச விபாககடத்தாரூபானங் உப்பத்தி ஹோதி, தங் ஜனகங். யஸ்மிங் பன கதே அஞ்ஞேன ஜனிதஸ்ஸ இட்ட²ஸ்ஸ வா அனிட்ட²ஸ்ஸ வா ப²லஸ்ஸ விபா³த⁴கவிச்சே²த³கபச்சயானுப்பத்தியா, உபப்³ரூஹகபச்சயுப்பத்தியா ச ஜனகானுபா⁴வானுரூபங் பரிபோஸகசிரதரப்பப³ந்தா⁴ ஹொந்தி, தங் உபத்த²ம்ப⁴கங். ஜனகேன நிப்³ப³த்திதங் குஸலப²லங், அகுஸலப²லங் வா யேன பச்சனீகபூ⁴தேன ரோக³தா⁴துவிஸமதாதி³னிமித்ததாய பா³தீ⁴யதி, தங் உபபீளகங். யேன பன கம்முனா ஜனகஸாமத்தி²யவஸேன சிரதரப்பப³ந்தா⁴ரஹம்பி ஸமானங் ப²லவிச்சே²த³கபச்சயுப்பத்தியா உபஹஞ்ஞதி விச்சி²ஜ்ஜதி, தங் உபகா⁴தகந்தி.
எத்த² ‘‘யதா² இத³’’ந்திஆதி³ வுத்தங். அத்³த⁴த்தயேபி கிரியாகிரியாப²லமத்ததாத³ஸ்ஸனபரத்தா சோத³னாய. இதீ கம்மஞ்சேவாதிஆதி³னா வுத்தஸ்ஸேவத்த²ஸ்ஸ நிக³மனவஸேன வுத்தங். தஸ்ஸேவங்…பே॰… பஹிய்யதீதி தஸ்ஸேவங் ஸமனுபஸ்ஸதோ யா ஸா புப்³ப³ந்தாத³யோ ஆரப்³ப⁴ ‘‘அஹோஸிங் நு கோ² அஹ’’ந்திஆதி³னா நயேன பவத்தா விசிகிச்சா² பஹிய்யதி.
1246-8. பஹீனாய பன தாய ஸப்³ப³ப⁴வயோனிக³திடி²திஸத்தாவாஸேஸு ஹேதுப²லஸம்ப³ந்த⁴வஸேனேவ பவத்தனாமரூபமத்தமேவ கா²யதி. தேனேவாஹ ‘‘ஹேதுப²லஸ்ஸ ஸம்ப³ந்த⁴வஸேனேவா’’திஆதி³. காரணஸாமக்³கி³யங் தா³னாதீ³ஹி ஸாதி⁴தகிரியாய பவத்தமானாய காரணமத்தே கத்துவோஹாரோதி ஆஹ ‘‘காரணதோ உத்³த⁴ங் காரணங் ந ச பஸ்ஸதீ’’தி. பாக…பே॰… படிவேத³கங் ந பஸ்ஸதீதி ஸம்ப³ந்தோ⁴. பாகபடிவேத³கந்தி விபாகவிந்த³கங். ஏவங் அபஸ்ஸந்தோ பன காரணே ஸதி காரகோதி, விபாகப்பவத்தியா ஸதி படிஸங்வேத³கோதி ஸமஞ்ஞாமத்தேனேவ பண்டி³தா வோஹரந்தி. இச்சேவங் ஸம்மப்பஞ்ஞாய பஸ்ஸதி. ஸுத்³த⁴த⁴ம்மாதி கேனசி ஸத்தேன வா புக்³க³லேன வா அமிஸ்ஸத⁴ம்மா. ஏவேதந்தி ஏவங்வித⁴ங் ஏதங் த³ஸ்ஸனங் ஸம்மத³ஸ்ஸனங், அவிபரீதத³ஸ்ஸனந்தி அத்தோ².
1249. பீ³ஜருக்கா²தி³கானங் வாதி யதா² பீ³ஜதோ ருக்கோ², ருக்க²தோ பீ³ஜந்தி ஏவங் காரணபரம்பரக³வேஸனே அனாதி³காலிகத்தா பீ³ஜருக்க²ஸந்தானஸ்ஸ புப்³பா³ கோடி நத்தி², ஏவங் கம்மபச்சயா விபாகோ, விபாகபச்சயா கம்மந்தி பரியேஸனே அனாதி³காலிகத்தா கம்மவிபாகஸந்தானஸ்ஸ புப்³பா³ கோடி ந பஞ்ஞாயதி. ஆதி³-ஸத்³தே³ன ‘‘குக்குடியா அண்ட³ங், அண்ட³தோ குக்குடீ, புனபி குக்குடியா அண்ட³’’ந்தி ஏவமாதி³ங் ஸங்க³ண்ஹாதி.
1250-3. அனாக³தேபி ஸங்ஸாரேதி யதா² அதீதே, ஏவங் அனாக³தேபி அத்³தா⁴னே க²ந்தா⁴னங் படிபாடீதிஆதி³னா வுத்தஸங்ஸாரே ஸதி. அப்பவத்தி ந தி³ஸ்ஸதீதி கம்மதோ விபாகோ ப⁴விஸ்ஸதி, விபாகதோ கம்மந்தி அனாக³தே காரியபரம்பராய க³வேஸியமானாய அபரிக்கீ²ணஸங்யோஜனஸ்ஸ கம்மவிபாகானங் அப்பவத்தனங் ந தி³ஸ்ஸதி, பவத்ததி ஏவாதி அத்தோ². ஹேதுப²லஸம்ப³ந்த⁴வஸேன பவத்தமானே ஸங்ஸாரே ‘‘புப்³பா³ கோடி ந பஞ்ஞாயதீ’’தி வசனேன காரணே ஆதி³ஸ்ஸ அபா⁴வோ வுத்தோ, ‘‘அப்பவத்தி ந தி³ஸ்ஸதீ’’தி வசனேன ப²லஸ்ஸ அவஸானாபா⁴வோ வுத்தோதி. ஏதமத்த²ந்தி ‘‘கம்மஸ்ஸ காரகோ நத்தீ²’’திஆதி³னா வுத்தமத்த²ங். அஸயங்வஸீதி ந ஸயங்வஸினோ, மிச்சா²பி⁴னிவேஸபரவஸாதி அத்தோ². அஞ்ஞமஞ்ஞவிரோதி⁴னோதி இதரீதரவிருத்³தா⁴ தி³ட்டி²யோ வா தி³ட்டி²யா வா அஞ்ஞமஞ்ஞேன ஸஹ விரோதி⁴னோ. க³ம்பீ⁴ரஞாணகோ³சரதாய க³ம்பீ⁴ரங். ததா² நிபுணங். ஸத்தஸுஞ்ஞதாய, அஞ்ஞமஞ்ஞஸபா⁴வஸுஞ்ஞதாய ச ஸுஞ்ஞங். பச்சயந்தி நாமரூபஸ்ஸ பச்சயங், தப்பச்சயபடிவேதே⁴னேவ ச ஸப்³ப³ங் படிவித்³த⁴ங் ஹோதீதி.
1254-6. கம்மங் நத்தி² விபாகம்ஹீதி குட்டாதீ³ஸு ரஜாதி³ விய விபாகே ஸந்திட்ட²மானங் கம்மங் நத்தி². பாகோ கம்மே ந விஜ்ஜதீதி ததா² கம்மே ஸந்திட்ட²மானோ விபாகோ நத்தி². யதா²வுத்தமேவத்த²ங் உபமாய விபா⁴வேதுங் ‘‘யதா² ந ஸூரியே’’திஆதி³ வுத்தங். மணிம்ஹீதி ஸூரியகந்தமணிம்ஹி. ந தேஸங் ப³ஹி ஸோ அத்தீ²தி தே முஞ்சித்வா தேஹி ப³ஹி ஸோ அக்³கி³ நத்தி². ஸம்பா⁴ரேஹீதி ஸமங்கீ³பூ⁴தேஹி ஆதபாதீ³ஹி தீஹி காரணேஹி. ந அந்தோ கம்மஸ்ஸாதிஆதி³ அத்த²தோ ஹெட்டா² வுத்தம்பி உபமானிக³மனத்த²ங் புனபி வுத்தந்தி த³ட்ட²ப்³ப³ங்.
1257-8. யதி³ ஹேது, ப²லஞ்ச அஞ்ஞமஞ்ஞரஹிதங், கத²ங் ஹேதுதோ ப²லங் நிப்³ப³த்ததீதி ஆஹ ‘‘கம்மஞ்ச கோ² உபாதா³யா’’தி. ந கேவலங் கம்மப²லமேவ ஸுஞ்ஞங் கத்துரஹிதங், ஸப்³ப³ம்பி த⁴ம்மஜாதங் காரகரஹிதந்தி ‘‘ந ஹெத்த² தே³வோ’’திஆதி³கா³தா² வுத்தா. ஹேதுஸம்பா⁴ரபச்சயாதி ஏகேன ஹேதுனா ஏகஸ்ஸ, அனேகஸ்ஸ வா ப²லஸ்ஸ அனிப்³ப³த்திதோ ஹேதுஸமூஹனிமித்தங், ஸம்பா⁴ரோதி வா பச்சயாதி⁴வசனந்தி ஹேதுபச்சயனிமித்தந்தி அத்தோ².
1259. அத்³தா⁴ஸு தரித்வா கங்க²ந்தி தீஸு அத்³தா⁴ஸு ஸோளஸவித⁴ங் கங்க²ங் விதரித்வா. ந கேவலமேதங் ஸோளஸவித⁴மேவ கங்க²ங் விதரதி, அத² கோ² ‘‘ஸத்த²ரி கங்க²தீ’’திஆதி³னயப்பவத்தங் (த⁴॰ ஸ॰ 1123; விப⁴॰ 915) அட்ட²வித⁴ங் கங்க²ம்பி பஜஹதி. ததா² ஹெத்த² பு³த்³தோ⁴ த⁴ம்மோ ஸங்கோ⁴ ஸிக்கா²தி புப்³ப³ந்தோதி அதீதா க²ந்தா⁴யதனதா⁴துயோ, அபரந்தோதி அனாக³தா, புப்³ப³ந்தாபரந்தோதி தது³ப⁴யங், அத்³தா⁴பச்சுப்பன்னங் வா தது³ப⁴யபா⁴க³யுத்தத்தா. படிச்சஸமுப்பன்னத⁴ம்மக்³க³ஹணேன க³ஹிதோ அட்ட²மோ கங்கா²விஸயோ நாமரூபமத்தங், இத³ப்பச்சயதா-க்³க³ஹணேன பன தஸ்ஸ பச்சயோ க³ஹிதோ, தஸ்மா ஸோளஸவத்து²காய பஹீனாய அட்ட²வத்து²கா கங்கா² அப்பதிட்டா²வ ஹோதீதி. ஏதாஸஞ்ச பஹானேன த்³வாஸட்டி²தி³ட்டி²க³தானிபி விக்க²ம்ப⁴ந்தி தி³ட்டே²கட்ட²த்தா விசிகிச்சா²ய. யதா² ஹி தி³ட்டி² ஸமுச்சி²ஜ்ஜமானா விசிகிச்சா²ய ஸத்³தி⁴ங்யேவ ஸமுச்சி²ஜ்ஜதி, ஏவங் விசிகிச்சா² விக்க²ம்பி⁴யமானா தி³ட்டி²யா ஸத்³தி⁴ங்யேவ விக்க²ம்பீ⁴யதி. அத்தாபி⁴னிவேஸூபனிஸ்ஸயா ஹி ‘‘அஹோஸிங் நு கோ² அஹ’’ந்திஆதி³னயப்பவத்தா (ம॰ நி॰ 1.18; ஸங்॰ நி॰ 2.20; மஹானி॰ 174) ஸோளஸவத்து²கா கங்கா², ஸா ஏவ ச புப்³ப³ந்தாதி³வத்து²பா⁴வேன வுத்தா, அத்தாபி⁴னிவேஸவத்து²கானி த்³வாஸட்டி² தி³ட்டி²க³தானி, பு³த்³தா⁴தி³வத்து²கா ச ததே³கட்டா²தி. உட்டி²தந்தி உப்பஜ்ஜித்வா டி²தங்.
1260-2. கங்கா²விதரணங் நாமாதி யதா²வுத்தகங்கா²விதரணதோ கங்கா²விதரணங் நாம. ந கேவலங் கங்கா²விதரணங் நாம, த⁴ம்மட்டி²திஞாணந்திபி யதா²பூ⁴தஞாணந்திபி ஸம்மாத³ஸ்ஸனந்திபி இத³ங் ஸமுதீ³ரிதங். எத்த² ச த⁴ரீயந்தி அத்தனோ பச்சயேஹீதி த⁴ம்மா, திட்ட²தி எத்த² ப²லங் ததா³யத்தவுத்திதாயாதி டி²தி, த⁴ம்மானங் டி²தி த⁴ம்மட்டி²தி, பச்சயத⁴ம்மா. அத² வா த⁴ம்மோதி காரணங் ‘‘த⁴ம்மபடிஸம்பி⁴தா³’’திஆதீ³ஸு (விப⁴॰ 718-721) விய, த⁴ம்மஸ்ஸ டி²திஸபா⁴வோ, த⁴ம்மதோ ச அஞ்ஞோ ஸபா⁴வோ நத்தீ²தி பச்சயத⁴ம்மானங் பச்சயபா⁴வோ, த⁴ம்மட்டி²தியங் ஞாணங் த⁴ம்மட்டி²திஞாணங். ஸங்கா²ரானங் யதா²பூ⁴தங் அனிச்சதாதி³ யதா²பூ⁴தங், தத்த² ஞாணந்தி யதா²பூ⁴தஞாணங். ஸம்மா பஸ்ஸதீதி ஸம்மாத³ஸ்ஸனங். லத்³த⁴ப்பதிட்டோ²தி ஸாஸனே பதிட்டா² நாம அரியமக்³கோ³. அயங் பன தங் அனதி⁴க³தோபி தத³தி⁴க³முபாயபடிபத்தியங் டி²தத்தா லத்³த⁴ப்பதிட்டோ² விய ஹோதீதி ‘‘லத்³த⁴ப்பதிட்டோ²’’தி வுத்தோ. ததோயேவ சூளகோ ஸோதாபன்னோ, லோகியாஹி ஸீலஸமாதி⁴பஞ்ஞாஹி ஸமன்னாக³தத்தா உத்தரி அப்படிவிஜ்ஜ²ந்தோ ஸோதாபன்னோ விய நியதோ, ஸுக³திபராயணோ ச ஹோதீதி சூளஸோதாபன்னோ. ஸோதாபன்னோ ஹி கீ²ணாபாயது³க்³க³திவினிபாதோதி. அத² வா லத்³த⁴ப்பதிட்டோ² கங்கா²விதரணவிஸுத்³தி⁴ஸமதி⁴க³மேன. ஸப்பச்சயனாமரூபத³ஸ்ஸனேன ஹி ஸம்மத்³தி³ததி³ட்டி²கண்டகோ வினித்³து⁴தஅஹேதுகவிஸமஹேதுவாதோ³ யதா²ஸகபச்சயேஹேவ த⁴ம்மப்பவத்திங் ஞத்வா ஸாஸனே பதிட்டி²தஸத்³தோ⁴ லத்³த⁴ப்பதிட்டோ² நாம ஹோதீதி. நாமரூபவவத்தா²னேன து³க்க²ஸச்சங், த⁴ம்மட்டி²திஞாணேன ஸமுத³யஸச்சங், தஸ்ஸேவ அபரபா⁴கே³ அனிச்சதோ மனஸிகாராதி³விதி⁴னா மக்³க³ஸச்சஞ்ச அபி⁴ஞ்ஞாய பவத்தியா து³க்க²பா⁴வங் தி³ஸ்வா தஸ்ஸ அப்பவத்தே நிரோதே⁴ ‘‘ஸோதாபன்னோ ஹி சூளகோ’’தி. தஸ்மாதி யஸ்மா ஏவங் மஹானிஸங்ஸமேதங் ஞாணங், தஸ்மா ஸபஞ்ஞோ அத்தனோ ஹிதானுபெக்க²னபஞ்ஞாய ஸமன்னாக³தோ. தேனாஹ ‘‘அத்த²காமோ’’தி.
இதி அபி⁴த⁴ம்மத்த²விகாஸினியா நாம
அபி⁴த⁴ம்மாவதாரஸங்வண்ணனாய
கங்கா²விதரணவிஸுத்³தி⁴னித்³தே³ஸவண்ணனா நிட்டி²தா.