24. சதுவீஸதிமோ பரிச்சே²தோ³
பச்சயனித்³தே³ஸவண்ணனா
1395. இதா³னி நேஸங் பச்சயவிதி⁴ங் த³ஸ்ஸேதுங் ‘‘யேஸ’’ந்திஆதி³ ஆரத்³த⁴ங்.
படிச்ச பச்சயோ, ஹினோதி பதிட்டா²தி எத்தா²தி ஹேது, அனேகத்த²த்தா தா⁴துஸத்³தா³னங் ஹி-ஸத்³தோ³ மூல-ஸத்³தோ³ விய பதிட்ட²த்தோ² வேதி³தப்³போ³, ஹினோதி வா ஏதேன கம்மனிதா³னபூ⁴தேன உத்³த⁴ங் ஓஜங் அதிஹரந்தேன மூலேன விய பாத³போ தப்பச்சயங் ப²லங் க³ச்ச²தி விருள்ஹிங் ஆபஜ்ஜதீதி ஹேது, ஹேது ச ஸோ மூலட்டே²ன, பச்சயோ ச உபகாரகட்டே²னாதி ஹேதுபச்சயோ, ஹேது ஹுத்வா பச்சயோ ஹேதுபா⁴வேன பச்சயோதி அத்தோ².
ஏவங் ஆரம்மணபச்சயாதீ³ஸு த³ட்ட²ப்³ப³ங். ஸ்வாயங் படிஸந்தி⁴யங் கம்மஸமுட்டா²னானங், பவத்தியங் சித்தஸமுட்டா²னானங் ரூபானங், உப⁴யத்த² ஸஹஜாதனாமத⁴ம்மானஞ்ச பச்சயோ. ஸப்³ப³லோகியலோகுத்தரந்தி இமினா பஞ்ஞத்தியாபி லோகே விதி³தபா⁴வேன லோகியபதே³ன ஸங்க³ஹிதத்தா ரூபாதி³பே⁴தே³ஸு ச²ப்³பி³தே⁴ஸு ஸங்க²தாஸங்க²தபஞ்ஞத்தித⁴ம்மேஸு ந கோசி த⁴ம்மோ ஆரம்மணபச்சயோ ந ஹோதீதி த³ஸ்ஸேதி. தேனேவ ‘‘யங் யங் த⁴ம்மங் ஆரப்³பா⁴’’தி அனியதோ ஆரப்³பா⁴தி ஆலம்பி³த்வா, க³ஹெத்வாதி அத்தோ². உப்பஜ்ஜந்தீதி இத³ங் நித³ஸ்ஸனமத்தங். தே பன தங் ஆரப்³ப⁴ உப்பஜ்ஜந்தி சேவ திட்ட²ந்தி ச. யதா² ஹி து³ப்³ப³லோ புரிஸோ த³ண்ட³ங் வா ரஜ்ஜுங் வா ஆலம்பி³த்வா உட்ட²ஹதி சேவ திட்ட²தி ச, ஏவங் சித்தசேதஸிகா த⁴ம்மா ரூபாதி³ஆரம்மணங் ஆலம்பி³த்வா உப்பஜ்ஜந்தி சேவ திட்ட²ந்தி சாதி.
ஜெட்ட²கட்டே²ன உபகாரகோ த⁴ம்மோ அதி⁴பதிபச்சயோ. ஜெட்ட²கட்டே²னாதி ச பமுக²பா⁴வேன. அத்தாதீ⁴னானஞ்ஹி பதிபூ⁴தோ த⁴ம்மோ அதி⁴பதீதி ஸோ தேஸங் பமுக²பா⁴வேன பவத்ததி. ‘‘ச²ந்தா³தி⁴பதி ச²ந்த³ஸம்பயுத்தகானங் த⁴ம்மானங் தங்ஸமுட்டா²னானஞ்ச ரூபானங் அதி⁴பதிபச்சயேன பச்சயோ’’திஆதி³வசனதோ ச²ந்தா³த³யோ சத்தாரோ த⁴ம்மா ஸஹஜாதனாமரூபானங் ஸஹஜாதாதி⁴பதீதி த³ஸ்ஸெந்தோ ஆஹ ‘‘தத்த² ஸஹஜாதாதி⁴பதீ’’திஆதி³. ‘‘ச²ந்த³வதோ கிங் நாம கம்மங் ந ஸிஜ்ஜ²தீ’’திஆதி³கங் புரிமாபி⁴ஸங்கா²ரூபனிஸ்ஸயங் லபி⁴த்வா உப்பஜ்ஜமானே சித்துப்பாதே³ ச²ந்தா³த³யோ து⁴ரபூ⁴தா ஜெட்ட²கபூ⁴தா ஸம்பயுத்தத⁴ம்மே, தங்ஸமுட்டா²னரூபே ச ஸாத⁴யமானா வஸே வத்தயமானா ஹுத்வா பவத்தந்தி, தே ச தேஸங் வஸேன வத்தந்தி ஹீனாதி³பா⁴வேன தத³னுவத்தனதோ. தேன தே அதி⁴பதிபச்சயா ஹொந்தி, நோ ச கோ² ஏகதோ. யதா³ ஹி ச²ந்த³ங் து⁴ரங் ச²ந்த³ங் ஜெட்ட²கங் கத்வா சித்தங் பவத்ததி, ததா³ ச²ந்தோ³வ அதி⁴பதி, ந இதரே. ஏஸ நயோ ஸேஸேஸுபி. அதி⁴பதிபா⁴வோபி ஹி நேஸங் அத்தனோ பவத்தினிவாரகே அபி⁴பு⁴ய்ய பவத்தனதோ ஹோதி. அவஸேஸந்தி யதா²வுத்தானங் தேஸங் க³ருகாதப்³ப³தாபா⁴வதோ, க³ருகதஸ்ஸேவ ச க³ருங் கத்வாதி க³ருகாரசித்தீகாரவஸேன வா அஸ்ஸாத³னவஸேன வா க³ருங் பா⁴ரிகங் லத்³த⁴ப்³ப³ங் அனவஞ்ஞாதங் கத்வா. க³ருகாதப்³ப³ஞ்ஹி ஆரம்மணங் தன்னின்னபோணபப்³பா⁴ரானங் அஸ்ஸாத³னபச்சவெக்க²ணமக்³க³ப²லானங் அத்தனோ வஸே வத்தயமானங் விய பச்சயோ ஹோதி, தஸ்மா அயங் அத்தாதீ⁴னானங் பதிபா⁴வேன உபகாரகத்தா அதி⁴பதிபச்சயோ த³ட்ட²ப்³போ³.
அந்தரயதீதி அந்தரங், ப்³யவதா⁴யகந்தி அத்தோ², நாஸ்ஸ அந்தரங் விஜ்ஜதீதி அனந்தரோ, ஸோயேவ பச்சயோதி அனந்தரபச்சயோ, அனந்தரபா⁴வேன உபகாரகோ த⁴ம்மோதி அதி⁴ப்பாயோ. அனந்தரனிருத்³தா⁴தி அத்தனோ நிரோதா⁴னந்தரங் அனுரூபசித்துப்பாத³ஸ்ஸ உப்பத்திபச்சயபா⁴வேன தஸ்ஸ உப்பத்தியா புரிமபா⁴கே³ அனந்தரங் ஹுத்வா நிருத்³தா⁴, ரூபத⁴ம்மா பன அனந்தரபச்சயா நத்தி².
ஸமனந்தரபா⁴வேன உபகாரகோ த⁴ம்மோ ஸமனந்தரபச்சயோ, ததா² ஸமனந்தரபச்சயோபீதி ட²பெத்வா உபஸக்³க³மத்தங் ந எத்த² கோசி விஸேஸோ. யோ ஹி அனந்தரபச்சயோ, ஸோவ ஸமனந்தரபச்சயோதி. புரிமபச்சி²மானஞ்ஹி அனந்தருப்பாத³பா⁴வதோ நிரந்தருப்பாத³னஸமத்த²தா அனந்தரபச்சயதா, ரூபகலாபானங் விய ஸண்டா²னாபா⁴வதோ பச்சயபச்சயுப்பன்னானங் ஸஹட்டா²னாபா⁴வதோ ச ‘‘இத³மிதோ உத்³த⁴ங் ஹெட்டா² திரிய’’ந்தி விபா⁴கா³பா⁴வா அத்தனோ ஏகத்தமிவ உபனெத்வா ஸுட்டு² அனந்தரபா⁴வேன உப்பாதே³துங் ஸமத்த²தா ஸமனந்தரபச்சயதா, தஸ்மா த⁴ம்மதோ அவிஸேஸேபி வினெய்யவஸேன ப்³யஞ்ஜனத்த²மத்ததோ விஸேஸங் க³ஹெத்வா தேஸங் விஸுங் தே³ஸனா கதா. யம்பி ‘‘அத்தா²னந்தரதாய அனந்தரபச்சயோ, காலானந்தரதாய ஸமனந்தரபச்சயோ’’தி ஆசரியானங் மதங், தங் ‘‘நிரோதா⁴ வுட்ட²ஹந்தஸ்ஸ
உப்பஜ்ஜமானோவ ஸஹுப்பாத³னவஸேன உபகாரகோ த⁴ம்மோ ஸஹஜாதபச்சயோ பகாஸஸ்ஸ பதீ³போ விய, ஸோ பனாயங் ‘‘சித்தசேதஸிகா த⁴ம்மா அஞ்ஞமஞ்ஞங், ஸஹஜாதரூபானஞ்ச, மஹாபூ⁴தா அஞ்ஞமஞ்ஞங், உபாதா³ரூபானஞ்ச, படிஸந்தி⁴க்க²ணே வத்து²விபாகா அஞ்ஞமஞ்ஞ’’ந்தி ச திவிதோ⁴ ஹோதி, தஸ்மா வுத்தங் ‘‘சித்தசேதஸிகா’’திஆதி³. யம்பி ஹி பாளியங் அரூபக்க²ந்தா⁴தி³வஸேனஸ்ஸ ச²ப்³பி³த⁴தங் வுத்தங், தம்பி எத்தே²வ ஸங்க³ஹிதங். யோ பனெத்த² ஸேஸரூபத⁴ம்மானங், உப⁴யத்த² வத்து²னோ ச பவத்தியா
அஞ்ஞமஞ்ஞங் உப்பாத³னுபத்த²ம்ப⁴னபா⁴வேன அத்தனோ உபகாரகஸ்ஸ உபகாரகோ த⁴ம்மோ அஞ்ஞமஞ்ஞபச்சயோ. அஞ்ஞமஞ்ஞுபத்த²ம்ப⁴கதித³ண்ட³கங் விய உபகாரகதா ச அஞ்ஞமஞ்ஞதாவஸேனேவ த³ட்ட²ப்³பா³, ந ஸஹஜாதாதி³வஸேன. ஸஹஜாதாதி³பச்சயோ ஹொந்தோயேவ ஹி கோசி கஸ்ஸசி அஞ்ஞமஞ்ஞபச்சயோ ந ஹோதி சித்தசேதஸிகானங் சித்தஜரூபே ஸதி, மஹாபூ⁴தானங் உபாதா³ரூபே ஸதி அஞ்ஞமஞ்ஞபச்சயத்தாபா⁴வதோ. யதா²ஹ ‘‘சத்தாரோ க²ந்தா⁴ அரூபினோ அஞ்ஞமஞ்ஞபச்சயேன பச்சயோ, சத்தாரோ மஹாபூ⁴தா…பே॰… ஓக்கந்திக்க²ணே நாமரூபங் அஞ்ஞமஞ்ஞபச்சயேன பச்சயோ’’தி (பட்டா²॰ 1.1.7). ஆசரியேன பன பச்சயுப்பன்னத⁴ம்மே அபராமஸித்வா வுச்சமானத்தா அவிஸேஸேன வுத்தங் ‘‘ததா² அஞ்ஞமஞ்ஞபச்சயோ’’தி.
தருஆதீ³னங் பத²வீ விய அதி⁴ட்டா²னாகாரேன, சித்தகம்மாதீ³னங் படாத³யோ விய ச நிஸ்ஸயாகாரேன உபகாரகோ த⁴ம்மோ வத்து²ரூபானீதி ஸத்தன்னங் விஞ்ஞாணதா⁴தூனங் அதி⁴ட்டா²னாகாரேன நிஸ்ஸயபச்சயபூ⁴தானி வத்து²ரூபானி. மஹாபூ⁴தா சித்தசேதஸிகா சாதி அஞ்ஞமஞ்ஞங், உபாதா³ரூபானஞ்ச ததே²வ நிஸ்ஸயபூ⁴தானி மஹாபூ⁴தானி அஞ்ஞமஞ்ஞங், ஸஹஜாதரூபானஞ்ச நிஸ்ஸயாகாரேன பச்சயானி சித்தசேதஸிகானி, தத³தீ⁴னவுத்திதாய அத்தனோ ப²லேன நிஸ்ஸிதோ ந படிக்கி²த்தோதி நிஸ்ஸயோ.
யதா² பன பு⁴ஸோ ஆயாஸோ உபாயாஸோ, ஏவங் பு⁴ஸோ நிஸ்ஸயோ உபனிஸ்ஸயோ, ப³லவகாரணந்தி அத்தோ², தஸ்மா ப³லவகாரணபா⁴வேன உபகாரகோ த⁴ம்மோ உபனிஸ்ஸயபச்சயோதி வேதி³தப்³போ³. ஸோ ஆரம்மணூபனிஸ்ஸயோ அனந்தரூபனிஸ்ஸயோ பகதூபனிஸ்ஸயோதி திவிதோ⁴தி ஆஹ ‘‘ஆரம்மணா’’திஆதி³. தத்த² –
‘‘தா³னங் த³த்வா ஸீலங் ஸமாதி³யித்வா உபோஸத²கம்மங் கத்வா தங் க³ருங் கத்வா பச்சவெக்க²தி, புப்³பே³ ஸுசிண்ணானி க³ருங் கத்வா பச்சவெக்க²தி, ஜா²னா வுட்ட²ஹித்வா ஜா²னங் க³ருங் கத்வா பச்சவெக்க²தி, ஸேகா² கொ³த்ரபு⁴ங் க³ருங் கத்வா பச்சவெக்க²ந்தி, வோதா³னங் க³ருங் கத்வா
ஏவமாதி³னா நயேன ஆரம்மணூபனிஸ்ஸயோ தாவ ஆரம்மணாதி⁴பதினா ஸத்³தி⁴ங் நானத்தங் அகத்வாவ விப⁴த்தோ. தேனாஹ ‘‘ஆரம்மணூபனிஸ்ஸயோ ஆரம்மணாதி⁴பதியேவா’’தி. கிஞ்சாபி நானத்தங் அகத்வா விப⁴த்தோ, ததா²பி அயங் தேஸங் விஸேஸோ – யங் ஆரம்மணங் க³ருங் கத்வா சித்தசேதஸிகா உப்பஜ்ஜந்தி, தங் நியமதோ தேஸங் ஆரம்மணேஸு ப³லவாரம்மணங் ஹோதி. இதி க³ருகாதப்³ப³மத்தட்டே²ன ஆரம்மணாதி⁴பதி, ப³லவகாரணட்டே²ன ஆரம்மணூபனிஸ்ஸயோதி ச ஏவமேதேஸங் நானத்தங் வேதி³தப்³ப³ங்.
அனந்தரூபனிஸ்ஸயோபி ‘‘அனந்தரூபனிஸ்ஸயோ பன அனந்தரபச்சயோவா’’தி. ஏவங் ஸந்தேபி அத்தனோ அனந்தரா அனுரூபசித்துப்பாத³வஸேன அனந்தரபச்சயோ, ப³லவகாரணவஸேன அனந்தரூபனிஸ்ஸயபச்சயோதி ஏவமேதேஸங் நானத்தங் வேதி³தப்³ப³ங்.
பகதியா ஏவ பச்சயந்தரரஹிதேன அத்தனோ ஸபா⁴வேனேவ உபனிஸ்ஸயோ பகதூபனிஸ்ஸயோ, ஆரம்மணஅனந்தரேஹி அமிஸ்ஸோவ புத²கே³வ கோசி உபனிஸ்ஸயோதி வுத்தங் ஹோதி. அத² வா பகதோ உபனிஸ்ஸயோ பகதூபனிஸ்ஸயோ. பகதோதி செத்த² ப-காரோ உபஸக்³கோ³, ஸோ அத்தனோ ப²லஸ்ஸ உப்பாத³னஸமத்த²பா⁴வேன ஸந்தானே நிப்பா²தி³தபா⁴வங், உபஸேவிதபா⁴வஞ்ச தீ³பேதி, தஸ்மா அத்தனோ ஸந்தானே நிப்ப²ன்னோ வா காயிகஸுக²து³க்க²ஸத்³தா⁴ஸீலாதி³ உபஸேவிதோ வா உதுபோ⁴ஜனாதி³ பகதூபனிஸ்ஸயோதி அத்தோ². உபஸேவனஞ்செத்த² து³வித⁴ங் உபயோகோ³பஸேவனங் ஆரம்மணூபஸேவனஞ்ச. ஏவஞ்ச கத்வா அனாக³தஸ்ஸாபி உபனிஸ்ஸயபச்சயதா லத்³தா⁴ ஹோதி. காயிகஸுக²…பே॰… யோ சாதி எத்த² காயிகஸுக²து³க்கா²னி ராக³ஸத்³தா⁴தீ³னங், உதுபோ⁴ஜனாத³யோ சித்தஸமாதா⁴னாதீ³னங், ஸத்³தா⁴ஸீலாத³யோ ஸத்³தா⁴ஸீலாதீ³னஞ்ச உபனிஸ்ஸயா ஹொந்தி. ஆதி³-ஸத்³தே³ன யங் யங் உபனிஸ்ஸாய யஸ்ஸ யஸ்ஸ ஸம்ப⁴வோ, தங் தங் தஸ்ஸ தஸ்ஸ உபனிஸ்ஸயபச்சயபூ⁴தங் ஸங்க³ண்ஹாதி. பச்சயமஹாபதே³ஸோ ஹேஸ, யதி³த³ங் உபனிஸ்ஸயபச்சயோதி.
பச்சயுப்பன்னதோ பட²மதரங் உப்பஜ்ஜித்வா வத்தமானபா⁴வேன உபகாரகோ த⁴ம்மோ புரேஜாதபச்சயோ. ஸோ ‘‘வத்து²புரேஜாதோ நாமா’’திஆதி³. யதா² செத்த² ‘‘வத்து²ரூபானீ’’தி ஹத³யவத்து²னோபி க³ஹணங், ஏவங் ‘‘ரூபாதீ³னீ’’திஆதி³-க்³க³ஹணேன த⁴ம்மாரம்மணஸ்ஸாபி க³ஹணங் த³ட்ட²ப்³ப³ங். நனு ச பஞ்சாரம்மணானேவ ஆரம்மணபுரேஜாதபா⁴வேன ஆக³தானீதி? ஸச்சங் ஆக³தானி, பஞ்ஹாவாரே பன ‘‘ஸேகா² வா புது²ஜ்ஜனா வா சக்கு²ங் அனிச்சதோ து³க்க²தோ அனத்ததோ விபஸ்ஸந்தீ’’திஆதி³னா (பட்டா²॰ 1.1.424) அவிஸேஸேன பச்சுப்பன்னசக்கா²தீ³னம்பி க³ஹிதத்தா த⁴ம்மாரம்மணஸ்ஸ ஆரம்மணபுரேஜாதபா⁴வோ ந ஸக்கா படிபா³ஹிதுங். அத்த²தோபி ஹேதங் ஸித்³த⁴ங் ‘‘யங் யங் பச்சுப்பன்னங் ஆரம்மணங் க³ஹெத்வா மனொத்³வாரே சித்தங் பவத்ததி, தங் தஸ்ஸ ஆரம்மணபுரேஜாதங் ஹோதீ’’தி. எத்த² ச நிஸ்ஸயாரம்மணாகாராதீ³ஹி விஸிட்டா² புரேஜாதபா⁴வேன வினா உபகாரபா⁴வங் அக³ச்ச²ந்தானங் வத்தா²ரம்மணானங் புரேஜாதாகாரேன உபகாரகதா புரேஜாதபச்சயதாதி அயமஸ்ஸ நிஸ்ஸயாரம்மணபச்சயதாஹி விஸேஸோ.
கி³ஜ்ஜ²போதகஸரீரானங் ஆஹாராஸா சேதனா விய புரேஜாதானங் ரூபானங் உபத்த²ம்ப⁴கபா⁴வேன உபகாரகோ த⁴ம்மோ பச்சா²ஜாதபச்சயோ. மனோஸஞ்சேதனாஹாரவஸேன ஹி பச்சா²ஜாதசித்தசேதஸிகேஹி வினா ஸந்தானட்டி²திஹேதுபா⁴வங் அக³ச்ச²ந்தானங் பச்சா²ஜாதாகாரேன சித்தசேதஸிகானங் உபகாரகதா விப்பயுத்தாகாராதீ³ஹி விஸிட்டா² பச்சா²ஜாதபச்சயதாதி ஏவங் ஸப்³ப³பச்சயானங் பச்சயந்தராகாரவிஸிட்டா² உபகாரகதா த³ட்ட²ப்³பா³. ஸோ பன ‘‘பச்சா²ஜாதா சித்தசேதஸிகா த⁴ம்மா புரேஜாதஸ்ஸ இமஸ்ஸ காயஸ்ஸ பச்சா²ஜாதபச்சயேன பச்சயோ’’தி (பட்டா²॰ 1.1.11) ஆக³தத்தா ஏகவிதோ⁴தி ஆஹ ‘‘சித்தசேதஸிகாவா’’தி.
புரிமபுரிமபரிசிதக³ந்தோ² விய உத்தருத்தரஸ்ஸ க³ந்த²ஸ்ஸ குஸலாதி³பா⁴வேன அத்தஸதி³ஸபகு³ணப³லவபா⁴வவிஸிட்ட²ங் அத்தஸஜாதியதாகா³ஹகங் ஆஸேவனபச்சயோ. பி⁴ன்னஜாதிகா ஹி பி⁴ன்னஜாதிகானங் ஆஸேவனகு³ணேன பகு³ணப³லவபா⁴வவிஸிட்ட²ங் குஸலாதி³பா⁴வஸங்கா²தங் அத்தனோ க³திங் கா³ஹாபேதுங் ந ஸக்கொந்தி, ந ச ஸயங் ததோ க³ண்ஹந்தி. தே பன அனந்தராதீதானி லோகியகுஸலாகுஸலானி சேவ அனாவஜ்ஜனகிரியாஜவனானி சாதி ஆஹ ‘‘ட²பெத்வா ஆவஜ்ஜனத்³வய’’ந்திஆதி³. ‘‘ந மக்³க³பச்சயா ஆஸேவனே ஏக’’ந்தி (பட்டா²॰ 1.1.221) வசனதோ அஹேதுககிரியாஸு ஹஸிதுப்பாத³ஸ்ஸேவ ஆஸேவனபா⁴வேன, ஆவஜ்ஜனத்³வயங் ஆஸேவனபச்சயோ ந ஹோதி, லோகுத்தரம்பி குஸலங் பி⁴ன்னஜாதிகஸ்ஸேவ ப²லஸ்ஸ புரேசரத்தா ந தேன, ஆஸேவனகு³ணங் க³ண்ஹாபேதி, விபாகாப்³யாகதம்பி கம்மவஸேன ஆசரியத⁴ம்மபாலத்தே²ரேன வுத்தங், தம்பி ‘‘யேபு⁴ய்யவஸேன வுத்த’’ந்தி விஞ்ஞாயதி, இதரதா² பன ஆசரியஸ்ஸ அஸமபெக்கி²தாவிதா⁴யகத்தப்பஸங்க³தோ. ததா² ஹி வுத்தங் பட்டா²னட்ட²கதா²யங் ‘‘லோகுத்தரோ பன ஆஸேவனபச்சயோ நாம நத்தீ²’’தி (பட்டா²॰ அட்ட²॰ 1.12). மக்³கோ³ பன கொ³த்ரபு⁴தோ ஆஸேவனங் ந க³ண்ஹாதீதி நத்தி² பூ⁴மிஆதி³வஸேன நானாஜாதிகதாய அனதி⁴ப்பேதத்தா. ததா² ஹி வுத்தங் பட்டா²னே ‘‘கொ³த்ரபு⁴ மக்³க³ஸ்ஸ ஆஸேவனபச்சயேன பச்சயோ, வோதா³னங் மக்³க³ஸ்ஸ ஆஸேவனபச்சயேன பச்சயோ’’தி (பட்டா²॰ 1.1.426).
சித்தப்பயோக³ஸங்கா²தஆயூஹனகிரியாபா⁴வேன ஸஹஜாதானங், நானக்க²ணிகானஞ்ச உபகாரகோ த⁴ம்மோ கம்மபச்சயோ ஸஹஜாதா, பச்சயுப்பன்னதோ நானக்க²ணே ப⁴வா நானக்க²ணிகா. ஸஹஜாதா லோகியலோகுத்தரா சேதனாதி ஸம்ப³ந்தோ⁴. ஸா ஸஹஜாதனாமானங், தங்ஸமுட்டா²னானஞ்ச ரூபானங் பச்சயோ, இதரா பன விபாககடத்தாரூபானந்தி த³ட்ட²ப்³ப³ங். ஸாஸவகுஸலாகுஸலசேதனாதி அத்தனோ உப்பாத³விஸிட்டே² ஸந்தானே ஸேஸபச்சயஸமாக³மே பவத்தமானானங் விபாககடத்தாரூபானங் ஸந்தானவிஸேஸனகிரியாபா⁴வேன உபகாரிகா காமரூபாரூபகுஸலசேதனா, அகுஸலசேதனா ச. தஸ்ஸா ஹி ததா² கிரியாபா⁴வேன பவத்தத்தா தேஸங் பவத்தி, ந அஞ்ஞதா². இதரா பன ஸஹஜாதானங் ஆயூஹனகிரியாபா⁴வேன பவத்தமானா உபகாரிகாதி வத்தப்³ப³ங். அவதா⁴ரணேன பனெத்த² சேதனாஸம்பயுத்தங் அபி⁴ஜ்ஜா²தி³கம்மங் படிக்கி²பதி ஸதிபி விபாகத⁴ம்மஸபா⁴வே சேதனாவஜ்ஜானங் அதங்ஸபா⁴வத்தா. அனாஸவ…பே॰… பச்சயோதி இமினா லோகியகுஸலசேதனாய விஸேஸமத்தங் த³ஸ்ஸேதி, ந நானக்க²ணிககம்மபச்சயதாபா⁴வங். ஏவஞ்ச கத்வா வுத்தங் அட்ட²கதா²யங் ‘‘அரூபாவசரசேதனா, பன லோகுத்தரசேதனா ச உப்பஜ்ஜித்வா நிருத்³தா⁴ அத்தனோ அத்தனோ விபாகக்க²ந்தா⁴னங் நானக்க²ணிககம்மபச்சயேன பச்சயோ’’தி.
அத்தனோ நிருஸ்ஸாஹஸந்தபா⁴வேன ஸஹஜாதனாமரூபானங் நிருஸ்ஸாஹஸந்தபா⁴வாய உபகாரகா அரூபத⁴ம்மாவ விபாகபச்சயோ. தேனாஹ ‘‘விபாகசித்தசேதஸிகா’’தி. தே ஹி பயோகே³ன அஸாதே⁴தப்³ப³தாய கம்மஸ்ஸ கதத்தா நிப்ப²ஜ்ஜனமத்ததோ நிருஸ்ஸாஹஸந்தபா⁴வா ஹொந்தி, ந கிலேஸவூபஸமஸந்தபா⁴வா
ரூபாரூபானங் ஆஹாரபச்சயோ. ஸதிபி ஹி ஜனகபா⁴வே உபத்த²ம்ப⁴கத்தமேவ ஆஹாரஸ்ஸ பதா⁴னகிச்சங், ஜனயந்தோபி ச ஆஹாரோ அவிச்சே²த³வஸேன உபத்த²ம்பெ⁴ந்தோவ ஜனேதீதி உபத்த²ம்ப⁴னபா⁴வோவ ஆஹாரபா⁴வோதி. தத்த² கப³ளீகாரோ ஆஹாரோ ரூபகாயஸ்ஸேவ உபத்த²ம்ப⁴கோ, ஸேஸா தயோ ரூபாரூபகாயஸ்ஸ. ந கேவலஞ்ஹி தே நாமத⁴ம்மானமேவ அவிச்சே²த³ஹேதுகா, அத² கோ² படிஸந்தி⁴யங் கடத்தாரூபானங், பவத்தே சித்தஜரூபானம்பி.
தேஸு தேஸு கிச்சேஸு பச்சயுப்பன்னத⁴ம்மேஹி அத்தானங் அனுவத்தாபனகஸங்கா²தஆதி⁴பச்சட்டே²ன பச்சயோ இந்த்³ரியபச்சயோ. அதி⁴பதிபச்சயத⁴ம்மானஞ்ஹி பவத்திவினிவாரகே அபி⁴ப⁴வித்வா பவத்தனேன க³ருபா⁴வோ அதி⁴பதியட்டோ², இந்த்³ரியானங் பன த³ஸ்ஸனாதி³கிச்சேஸு சக்கு²விஞ்ஞாணாதீ³ஹி, ஜீவனே கம்மஜரூபேஹி, அரூபத⁴ம்மேஹி ச ஜீவந்தேஹி ஸுகி²தாதி³பா⁴வேஸு ஸுகி²தாதீ³ஹி அதி⁴மொக்க²பக்³க³ஹஉபட்டா²னாவிக்கே²பப்பஜானநேஸு ‘‘அனஞ்ஞாதங் ஞஸ்ஸாமீ’’தி பவத்தியங் ஆஜானநே, அஞ்ஞாதாவிபா⁴வே ச ஸத்³தா⁴தி³ஸஹஜாதேஹீதி ஏவங் தங்தங்கிச்சேஸு சக்கா²தி³பச்சயேஹி த⁴ம்மேஹி சக்கா²தீ³னங் அனுவத்தனியதாமத்தங் இந்த்³ரியானங் ஆதி⁴பச்சட்டோ²தி அயமேவ தேஸங் விஸேஸோ. ரூபஸத்தக-க்³க³ஹணேன சக்கா²தீ³னி பஞ்ச, இத்தி²புரிஸிந்த்³ரியத்³வயஞ்ச த³ஸ்ஸேதி. ஜீவிதிந்த்³ரியங் பன அரூபஜீவிதிந்த்³ரியேன ஸத்³தி⁴ங் ஏகதோ கத்வா ஜீவித-க்³க³ஹணேன க³ஹிதங். ஏவஞ்ஹி த்³வாவீஸதி இந்த்³ரியானி ஹொந்தி. ‘‘அனாதி³மதி ஸங்ஸாரே அனஞ்ஞாதங் அஸச்சி²கதங் சதுஸச்சத⁴ம்மங், நிப்³பா³னமேவ வா ஞஸ்ஸாமீ’’தி பவத்தஸ்ஸ இந்த்³ரியங் அனஞ்ஞாதஞ்ஞஸ்ஸாமீதிந்த்³ரியங், பட²மமக்³க³ஞாணங். ஆஜானதோ பட²மமக்³கே³ன தி³ட்ட²மரியாத³ங் அனதிக்கமித்வா ஜானதோ இந்த்³ரியங் அஞ்ஞிந்த்³ரியங், ஸோதாபத்திப²லதோ யாவ அரஹத்தமக்³கா³ ச²ஸு ஞாணங், அஞ்ஞாதாவினோ சதூஸு ஸச்சேஸு பரினிட்டி²தகிச்சஸ்ஸ இந்த்³ரியங் அஞ்ஞாதாவிந்த்³ரியங், அரஹத்தப²லஞாணங் ‘‘தேஸூ’’திஆதி³ வுத்தங். தானி ஹி யேபு⁴ய்யேன லிங்கா³தீ³ஹி அனுவத்தியமானானிபி பச்சயபா⁴வதோ நானுவத்தீயந்தீதி வுத்தோவாயமத்தோ².
ஆரம்மணூபனிஜ்ஜா²னலக்க²ணூபனிஜ்ஜா²னவஸேன ‘‘ஜா²னபச்சயோ’’திஆதி³. தே பன படிஸந்தி⁴யங் கடத்தாரூபானங், பவத்தே சித்தஜரூபானங், உப⁴யத்த² நாமத⁴ம்மானஞ்ச பச்சயாதி த³ட்ட²ப்³ப³ங்.
ஸுக³திதோ, து³க்³க³திதோ, குஸலதோ, அகுஸலதோ வா நிய்யானட்டே²ன ஸஹஜாதானங் உபகாரகதா மக்³க³பச்சயதா, ஸா ச ஸம்மாதி³ட்டா²தீ³னந்தி ஆஹ ‘‘மக்³க³பச்சயோ’’திஆதி³. ஸங்கப்ப-க்³க³ஹணேன ஸம்மாஸங்கப்பங், மிச்சா²ஸங்கப்பஞ்ச த³ஸ்ஸேதி. ஏவங் ஸேஸேஸுபி. மிச்சா²ஸங்கப்பாத³யோ ஹி அபாயமக்³க³ங்கா³, மிச்சா²ஸதிமிச்சா²வாசாத³யோ செத்த² ததா²பவத்தசித்துப்பாதா³, சேதனா ச, அயம்பி ஜா²னபச்சயே வுத்தானமேவ பச்சயுப்பன்னானங் பச்சயோதி த³ட்ட²ப்³ப³ங்.
பரமத்தே²ன பி⁴ன்னானம்பி ஏகீபா⁴வக³தானங் விய ஏகுப்பாதா³தி³பா⁴வஸங்கா²தஸம்பயோக³லக்க²ணேன உபகாரகதா ஸம்பயுத்தபச்சயதா, ஸா ச நாமத⁴ம்மானமேவ, ந ரூபத⁴ம்மானந்தி ஆஹ ‘‘ஸம்பயுத்தபச்சயோ’’திஆதி³.
அஞ்ஞமஞ்ஞஸம்ப³ந்த⁴தாய யுத்தானம்பி ஸமானானங் விப்பயுத்தபா⁴வேன விஸங்ஸட்ட²தாய நானத்தூபக³மனேன உபகாரகதா விப்பயுத்தபச்சயதா, ஸா ச வத்தூ²னங், சித்தசேதஸிகானமேவ வாதி ஆஹ ‘‘விப்பயுத்தபச்சயோ’’திஆதி³. ச² வத்தூ²னி ஹி ஸத்தன்னங் வத்து²புரேஜாதானீதி இத³ங் சக்கா²தி³வத்து²வஸேனேவ வுத்தங், ஹத³யவத்து² பன படிஸந்தி⁴யம்பி பச்சயபா⁴வதோ ஸஹஜாதம்பி லப்³ப⁴தி. வுத்தம்பி ஹேதங் அப்³யாகதபத³ஸ்ஸ ஸஹஜாதவிப⁴ங்கே³ ‘‘படிஸந்தி⁴க்க²ணே விபாகாப்³யாகதா க²ந்தா⁴ கடத்தாரூபானங், க²ந்தா⁴ வத்து²ஸ்ஸ, வத்து² க²ந்தா⁴னங் விப்பயுத்தபச்சயேன பச்சயோ’’தி. ததா² பச்சா²ஜாதா சித்தசேதஸிகாதி ச சக்கு²விஞ்ஞாணாதி³வஸேனேவ வுத்தங், ‘‘ஸஹஜாதா குஸலா க²ந்தா⁴ சித்தஸமுட்டா²னானங் ரூபானங் விப்பயுத்தபச்சயேன பச்சயோ’’திஆதி³வசனதோ (பட்டா²॰ 1.1.434) பன ஸஹஜாதாபி லப்³ப⁴ந்தி. ஏவஞ்ச கத்வா வுத்தங் அட்ட²கதா²யங் ‘‘விப்பயுத்தபச்சயோ ஸஹஜாதபுரேஜாதபச்சா²ஜாதவஸேன திவிதோ⁴’’தி. அயங் பன ரூபத⁴ம்மோ ஸமானோ ரூபத⁴ம்மஸ்ஸ பச்சயோ ந ஹோதி ஸம்பயோகா³ஸங்காய அபா⁴வதோ.
யேஸஞ்ஹி நாமானங் சக்கா²தீ³னங் அப்³ப⁴ந்தரதோ நிக்க²மந்தானங் விய பவத்தி, ரூபானஞ்ச நாமஸன்னிஸ்ஸயேனேவ ‘‘அத்தி²பச்சயோ’’திஆதி³. ரூபஜீவிதிந்த்³ரியஞ்ஹி கடத்தாரூபானங், கப³ளீகாராஹாரோ இமஸ்ஸ காயஸ்ஸ நிஸ்ஸயபச்சயே வுத்தத⁴ம்மாதி ச வத்து²ரூபமஹாபூ⁴தசித்தசேதஸிகானங் த⁴ம்மஸாமஞ்ஞேனேவ க³ஹணங், ந நிஸ்ஸயபச்சயபா⁴வீனங்யேவ. பச்சா²ஜாதானம்பி சித்தசேதஸிகானங் புரேஜாதஸ்ஸ காயஸ்ஸ பஞ்ஹாவாரே பச்சயபா⁴வேன நித்³தி³ட்ட²த்தா. எத்த² ச அத்தி²பா⁴வாபா⁴வேன அனுபகாரகானமேவ அத்தி²பா⁴வேன உபகாரகதாய அத்தி²பச்சயதாபா⁴வதோ நத்தி² நிப்³பா³னஸ்ஸ ஸப்³ப³தா³ பா⁴வினோ அத்தி²பச்சயதா, உப்பாதா³தி³யுத்தானங் வா நத்தி²பா⁴வோபகாரதாவிருத்³தோ⁴ உபகாரகபா⁴வோ அத்தி²பச்சயதாதி ந தஸ்ஸ தப்பச்சயத்தப்பஸங்கோ³.
நத்தி²பச்சயோதிஆதீ³ஸு அனந்தரதாமத்தேன, சித்தனியாமகபா⁴வேன வா உபகாரகதா அனந்தரபச்சயதா. ஏகஸ்மிங் ப²ஸ்ஸாதி³த⁴ம்மஸமுதா³யே பவத்தமானே து³தியஸ்ஸ அபா⁴வதோ அத்தனோ டி²தியா ஓகாஸமலப⁴ந்தானங் அனந்தரங் உப்பஜ்ஜமானகசித்தசேதஸிகானங் ஓகாஸதா³னவஸேன உபகாரகதா நத்தி²பச்சயதா. அத்தனோ ஸபா⁴வாவிக³மேன அப்பவத்தமானானங் விக³தபா⁴வேன உபகாரகதா விக³தபச்சயதா. அத்த²தோ பன த்³வின்னம்பி அனந்தரபச்சயபா⁴வீத⁴ம்மத்தா அவிஸேஸோ வுத்தோ. ஸபா⁴வதாமத்தேன உபகாரகதா அத்தி²பச்சயதா, நிரோதா⁴னுபக³மனவஸேன உபகாரகதா அவிக³தபச்சயதாதி பச்சயவிஸேஸோ தேஸங் த⁴ம்மாவிஸேஸேபி வேதி³தப்³போ³. த⁴ம்மானஞ்ஹி ஸமத்த²தாவிஸேஸங் ஸப்³பா³காரேன ஞத்வா ப⁴க³வதா சதுவீஸதிபச்சயா தே³ஸிதாதி ப⁴க³வதி ஸத்³தா⁴ய ‘‘ஏவங் விஸேஸா ஏதே த⁴ம்மா’’தி ஸுதமயஞாணங் உப்பாதெ³த்வா சிந்தாபா⁴வனாமயஞாணேஹி தத³பி⁴ஸமயாய யோகோ³ கரணீயோ. அவிஸேஸேபி த⁴ம்மஸாமத்தி²யஸ்ஸ ததா² ததா² வினேதப்³ப³புக்³க³லானங் வஸேன ஹெட்டா² வுத்தோபி பச்சயோ புன பகாரந்தரேன வுச்சதி யதா² அஹேதுகது³கங் வத்வாபி ஹேதுவிப்பயுத்தது³கங் வியாதி த³ட்ட²ப்³ப³ங்.
யஸ்மா ‘‘ரூபங் ரூபஸ்ஸ…பே॰… ஸத்ததா⁴ பச்சயோ ஹோதீ’’தி.
ரூபங் அரூபஸ்ஸாதிஆதீ³ஸுபி ஹெட்டா² வுத்தபச்சயுப்பன்னத⁴ம்மே ஸுட்டு² உபலக்கெ²த்வா பச்சயோ யோஜேதப்³போ³. ரூபங் ரூபாரூபஸ்ஸாதி நத்தீ²தி இத³ங் ஸஹஜாதபச்சயபூ⁴தம்பி ரூபங் ரூபாரூபத்³வயஸ்ஸ பச்சயபா⁴வேன அனாக³தந்தி கத்வா வுத்தங்.
ஸப்³பே³ஸங் பச்சயானங் ஆரம்மணபச்சயே உபனிஸ்ஸயபச்சயே, ஸஹஜாதனானக்க²ணிகசேதனாய கம்மபச்சயே, ஸஹஜாதபுரேஜாதபச்சா²ஜாதாதி³பே⁴த³ஸ்ஸ அத்தி²பச்சயே ச ஸமோதா⁴னதோ ஸப்³பே³பி பச்சயா ஸங்கே²பதோ சதுப்³பி³தா⁴யேவாதி த³ஸ்ஸெந்தோ ஆஹ ‘‘ஸப்³பே³ பனிமே’’திஆதி³.
இதி அபி⁴த⁴ம்மத்த²விகாஸினியா நாம
அபி⁴த⁴ம்மாவதாரஸங்வண்ணனாய
பச்சயனித்³தே³ஸவண்ணனா நிட்டி²தா.
நிக³மனகதா²வண்ணனா
1400-2. ஸப்³ப³த⁴ம்மேஸு அப்படிஹதக³திதாய ஸுந்த³ரா மதி இமஸ்ஸாதி ஸுமதி, தஸ்ஸ ஸுமதிஸ்ஸ ப⁴க³வதோ மதிவிசாரங் ஞாணசாரங் போ³தே⁴தீதி ஸுமதிமதிவிசாரபோ³த⁴னோ. விருத்³தா⁴ மதி யேஸங் தே விமதினோ, விருத்³தா⁴ மதீதி ச விருத்³த⁴த³ஸ்ஸனந்தி அத்தோ². தேஸங் விமோஹங் வினாஸேதீதி விமதிவிமோஹவினாஸனோ. யதோ யஸ்மா நாமதோ ஸுமதினா பி⁴க்கு²னா மானதோ ப³ஹுமானேன ஆயாசிதஸம்மானதோ ஆயாசிதோ ஹுத்வா ஸம்மா அவனதோ ஸதா³யேவ மதோ அயங், ததோ தஸ்மா மயா ரசிதோ அபி⁴த⁴ம்மாவதாரோ. ததா² ஹி பா⁴வனா ஸாதூ⁴னங் ஸம்பா⁴வனா ஹிதவிபா⁴வனா ஹிதப்பகாஸனதோ ஸதா³ தோஸதா³தி யோஜனா.
1403-14. அயுத்தங் வா விருத்³த⁴ங் வாதி எத்த² ‘‘அட்ட²கதா²ய விமுக²பூ⁴தங் அயுத்தங் நாம, பாளியா விமுக²பூ⁴தங் விருத்³த⁴’’ந்தி வத³ந்தி. ப்³யப்பதா²னந்தி ச வாசனாமக்³கா³னந்தி அத்தோ². திவிதா⁴தி ஏகோ ப்³யப்பதோ² ஸத்³த³ஸம்பன்னோ, ந அத்த²ஸம்பன்னோ, ஏகோ அத்த²ஸம்பன்னோ, ந ஸத்³த³ஸம்பன்னோ, ஏகோ உப⁴யஸம்பன்னோதி திப்பகாராதி அத்தோ². ஹிதமேவ அத்தோ²தி ஹிதத்தோ², தங் அத்தனோ காமேதீதி ஹிதத்த²காமோ. அஸங்கிண்ணகுலாகுலேஹி அஸம்பி⁴ன்னகுலேஹி ஸங்கிண்ணே. கேலாஸோயேவ ஸிக²ரோதி கேலாஸஸிக²ரோ, ஸோ ஹி ஹிமவதோ சதுராஸீதியா கூடஸஹஸ்ஸானங் பாமொக்கோ² ரஜதமயோ மஹாஸிக²ரோ. ததா³காரேஹி ஸப்³ப³ஸேதேஹி பாஸாதே³ஹி படிமண்டி³தத்தா கேலாஸ…பே॰… மண்டி³தோ. கண்ஹதா³ஸேனாதி ஏவங்னாமகேன உபாஸகேன. பாசீனபாஸாதே³தி பாசீனதி³ஸாபா⁴க³ஸன்னிஸ்ஸிதே பாஸாதே³. அயந்தி அயமபி⁴த⁴ம்மாவதாரோ.
நிட்டி²தாயங் அபி⁴த⁴ம்மத்த²விகாஸினீ நாம
அபி⁴த⁴ம்மாவதாரஸங்வண்ணனா.
நிக³மனகதா²
1.
ரம்மே புலத்தி²னக³ரே நக³ராதி⁴ராஜே,
ரஞ்ஞா பரக்கமபு⁴ஜேன மஹாபு⁴ஜேன;
காராபிதே வஸதி ஜேதவனே விஹாரே,
யோ ரம்மஹம்மியவரூபவனாபி⁴ராமே.
2.
ஸம்பன்னஸீலத³மஸங்யமதோஸிதேஹி,
ஸம்மானிதோ வஸிக³ணேஹி கு³ணாகரேஹி;
பத்தோ முனிந்த³வசனாதி³ஸு நேகக³ந்த²-
ஜாதேஸு சாசரியதங் மஹிதங் விதூ³ஹி.
3..
ஞாணானுபா⁴வமிஹ
ஸங்வண்ணனா ச வினயட்ட²கதா²தி³கானங்;
ஸாரத்த²தீ³பனிமுகா² மது⁴ரத்த²ஸார-
ஸந்தீ³பனேன ஸுஜனங் பரிதோஸயந்தீ.
4.
தஸ்ஸானுகம்பமவலம்பி³ய ஸாரிபுத்த-
த்தே²ரஸ்ஸ தா²மக³தஸாரகு³ணாகரஸ்ஸ;
யோ ஸாஸனே ஜினவரஸ்ஸ ரதிங் உளாரங்,
பப்போதி நந்தி³பரிவேணனிவாஸவாஸீ.
5.
ஸ ஸாத⁴யங் ஸோதுஹிதங் அனப்பகங்,
ஸுமங்க³லோதீ³ரிதனாமவிஸ்ஸுதோ;
அகாபி⁴த⁴ம்மத்த²விகாஸினிங் இமங்,
பகாஸயந்திங் மது⁴ரத்த²ஸம்பத³ந்தி.
அபி⁴த⁴ம்மாவதாரடீகா ஸமத்தா.