6. ச²ட்டோ² பரிச்சே²தோ³
ஆரம்மணவிபா⁴க³வண்ணனா
291.
ஏதேஸங் பன சித்தானங், ஆரம்மணமிதோ பரங்;
த³ஸ்ஸயிஸ்ஸாமஹங் தேன, வினா நத்தி² ஹி ஸம்ப⁴வோ.
இதோ பரங் இதோ பரிச்சே²த³தோ பரங் அஹங் ஏதேஸங் பன சித்தானங் ஆரம்மணங் த³ஸ்ஸயிஸ்ஸாமி. ஹி கஸ்மா? தேன வினா தங் ஆரம்மணங் வஜ்ஜெத்வா சித்தானங் ஸம்ப⁴வோ நத்தி² யஸ்மா காரணா, தஸ்மா காரணா த³ஸ்ஸயிஸ்ஸாமி.
292.
ரூபங் ஸத்³த³ங் க³ந்த⁴ங் ரஸங், பொ²ட்ட²ப்³ப³ங் த⁴ம்மமேவ ச;
ச²தா⁴ ஆரம்மணங் ஆஹு, ச²ளாரம்மணகோவிதா³.
ச²ளாரம்மணேஸு சே²கா பண்டி³தா ஆரம்மணங் ச²தா⁴ ச²ப்பகாரங் ஆஹு கதே²ஸுங்.
293. தத்த² பூ⁴தே உபாதா³ய. தத்த² தேஸு ஆரம்மணேஸு பூ⁴தே உபாதா³ய பூ⁴தே படிச்ச வண்ணோ சதுஸமுட்டி²தோ ஸமுட்டி²தோ நிப்³ப³த்தோ நித³ஸ்ஸனேன ஸஹ பவத்தோ படிகே⁴ன ஸஹ பவத்தோ ரூபாரம்மணஸஞ்ஞிதோ.
294. து³விதோ⁴பி ஸமுத்³தி³ட்டோ², ஸத்³தோ³ சித்தோதுஸம்ப⁴வோ ஸத்³தோ³ து³விதோ⁴பி முனினா ஸமுத்³தி³ட்டோ² சித்தோதுஸம்ப⁴வோ, ஸவிஞ்ஞாணகஸத்³தோ³வ சித்தஸமுட்டி²தோ ஹோதி. கத²ங்? வசீபே⁴த³கசித்தேன பூ⁴தாய ஜாதாய பூ⁴மியா பத²வீதா⁴துயா விகாரதா பத²வீலக்க²ணபா⁴வதோ அதித²த்³த⁴லக்க²ணதா விகாரதா நாம. ஸா வசீவிஞ்ஞத்தி விஞ்ஞாயதீதி விஞ்ஞத்தியா உபாதி³ண்ணக⁴ட்டனஸ்ஸ கம்மஜபத²வீதா⁴துயா க⁴ட்டனஸ்ஸ காரணங் சித்தஜபத²வீதா⁴துயா கம்மஜபத²வீதா⁴துயா க⁴ட்டனஞ்ச ஸத்³தோ³ ச அபுப்³ப³ங் அசரிமங் ஹோதி.
295. அவிஞ்ஞாணகஸத்³தோ³ யோ ஸோ அவிஞ்ஞாணகஸத்³தோ³ உதுஸமுட்டி²தோ ஹோதி. அயங் து³விதோ⁴பி ஸத்³தோ³ ஸத்³தா³ரம்மணதங் க³தோ ஸத்³தா³ரம்மணபா⁴வங் பத்தோ.
296. த⁴ரீயதீதி க³ச்ச²ந்தோ க³ச்ச²ந்தோ ஜனேஹி த⁴ரீயதேதி க³ந்தோ⁴. க³மு ஸப்ப க³திம்ஹி, த⁴ர தா⁴ரணே. ஸூசனதோ அத்தனோ ஸாதா⁴ரணஸ்ஸ புப்பா²தி³னோ வத்து²ஸ்ஸ பகாஸனதோபி வா க³ந்தோ⁴ நாம. க³ந்த⁴ ஸூசனே. அயங் க³ந்தோ⁴ சதூஹி ஸமுட்டா²னங் ஏதஸ்ஸாதி சதுஸமுட்டா²னோ. க³ந்தா⁴ரம்மணஸம்மதோ.
297. ரஸமானா ரஸந்தீதி, ரஸோதி பரிகித்திதோ ஜனா ரஸமானா யங் த⁴ம்மஜாதங் ரஸந்தி அனுப⁴வந்தி, இதி யஸ்மா காரணா, தஸ்மா காரணா ரஸோ இதி ரஸோ நாம பண்டி³தேஹி பரிகித்திதோ, ஸோ ரஸோ சதுஸம்பூ⁴தோ ரஸாரம்மணனாமகோ.
298. பு²ஸீயதீதி பொ²ட்ட²ப்³ப³ங் யங் த⁴ம்மஜாதங் ஜனேஹி பு²ஸீயதீதி தஸ்மா பொ²ட்ட²ப்³ப³ங், பத²வீதேஜவாயவோ. தங் பொ²ட்ட²ப்³ப³ங் சதுஸம்பூ⁴தங் பொ²ட்ட²ப்³பா³ரம்மணங் மதங்.
299. ஸப்³ப³ங் நாமஞ்ச ரூபஞ்ச, ஹித்வா ரூபாதி³பஞ்சகங் ரூபாதி³பஞ்சகங் ஹித்வா ஸப்³ப³ங் நாமஞ்ச சித்தசேதஸிகனிப்³பா³னநாமஞ்ச ரூபஞ்ச பஞ்சபஸாத³ஸுகு²மரூபஞ்ச லக்க²ணானி ச அனிச்சது³க்க²அனத்தலக்க²ணானி ச பஞ்ஞத்தி ச த⁴ம்மாரம்மணஸஞ்ஞிதங்.
300. சா²ரம்மணானி லப்³ப⁴ந்தி, காமாவசரபூ⁴மியங் காமாவசரபூ⁴மியங் சா²ரம்மணானி லப்³ப⁴ந்தி. தீணி ரூபாவசரே ரூபஸத்³த³த⁴ம்மாரம்மணவஸேன லப்³ப⁴ந்தி. அரூபே பன ஏகேகங் த⁴ம்மாரம்மணங் லப்³ப⁴தி.
301-3. க²ணவத்து²பரித்தத்தா, ஆபாத²ங் ந வஜந்தி யே யே ரூபாத³யோ பஞ்ச விஸயா க²ணவத்து²பரித்தத்தா பஞ்சாரம்மணானங் க²ணஸ்ஸ பரித்தத்தா மந்த³த்தா தேஸங் அப்பாயுகத்தா வத்து²பரித்தத்தா பஞ்சாரம்மணானங் அதிகு²த்³த³கவத்து²கத்தா ஆபாத²ங் பஞ்சத்³வாரேஸு பாகடபா⁴வங் ந வஜந்தி, பஞ்சபஸாதே³ஸு க⁴ட்டனகிச்சங் ந ஸாதெ⁴ந்தி, தே ரூபாத³யோ பஞ்ச விஸயா த⁴ம்மாரம்மணங் ஹொந்தி. இதி யேஸங் ஏகச்சானங் ஆசரியானங் மதங் ஹோதி. கிராதி அனுஸ்ஸவனத்தே² நிபாதோ. தே படிக்கி²பிதப்³பா³வ தே ஏவங் வாதி³னோ ஏகச்சே ஆசரியா படிக்கி²பிதப்³பா³, மயா படிஸேதி⁴தப்³பா³. கஸ்மா? சக்கு²விஞ்ஞாணங் ஸோதவிஞ்ஞாணஸ்ஸ கோ³சரபூ⁴தங் ஸத்³த³ங் ந படிஅனுபோ⁴தி, ஸோதவிஞ்ஞாணங் சக்கு²விஞ்ஞாணஸ்ஸ கோ³சரபூ⁴தங் அஞ்ஞமஞ்ஞஸ்ஸ கோ³சரங் நேவ பச்சனுபொ⁴ந்தானங் தேஸங் பஞ்சன்னங் சக்கு²விஞ்ஞாணாதீ³னங் விஞ்ஞாணானங் தஞ்ச கோ³சரங் மனோதா⁴துமனோவிஞ்ஞாணதா⁴துஸங்கா²தங் ஜவனங் பன பச்சனுபோ⁴தி. இதி வசனஸ்ஸ ப⁴க³வதா வுத்தத்தா படிக்கி²பிதப்³பா³. ரூபாத³யோ பன விஸயா ரூபாதி³பஞ்சாரம்மணானி ஏவ ஹொந்தி.
304-6. தி³ப்³ப³சக்கா²தி³ஞாணானங், ரூபாதீ³னேவ கோ³சரா தானி ரூபாதீ³னி ஏவ கோ³சரா தி³ப்³ப³சக்கா²தி³ஞாணானங் அனாபாத²க³தானங் ஏவ பாகடபா⁴வங் அப்பத்தானேவ. இதிபி வசனங் வுத்தங் ந யுஜ்ஜதி. யங் த⁴ம்மஜாதங் ரூபாரம்மணங் ப⁴வந்தங், தங் த⁴ம்மஜாதங் கத²ங் கேன பகாரேன த⁴ம்மாரம்மணங் ப⁴வெய்ய? ஏவங் ஸதி ரூபாரம்மணஸ்ஸ த⁴ம்மாரம்மணத்தே ஸதி ஏதேஸங் ரூபாரம்மணத⁴ம்மாரம்மணானங் நியமோபி கத²ங் ப⁴வே கேன பகாரேன ப⁴வெய்ய? ஸப்³ப³ங் ஆரம்மணங் ஏதங் ஏதங் ஸப்³ப³ங் ஆரம்மணங் ச²ப்³பி³த⁴ங் ச²ப்பகாரங் ப⁴க³வதா ஸமுதீ³ரிதங். தங் பரித்தத்திகாதீ³னங் வஸேன ப³ஹுப்பகாரேஹி மதங்.
307. ஸப்³போ³ காமவிபாகோ ச ஸப்³போ³ தேவீஸதிகாமவிபாகோ ச க்ரியாஹேதுத்³வயம்பி ச மனோதா⁴துஹஸிதுப்பாத³வஸேன கிரியாஹேதுத்³வயம்பி சாதி பஞ்சவீஸதி சித்துப்பாதா³ ஏகந்தபரித்தாரம்மணா ஏகந்தகாமாவசராரம்மணா ஸியுங் ப⁴வெய்யுங்.
308-10. இட்டா²தி³பே⁴தா³ பஞ்சேவ, ரூபஸத்³தா³த³யோ பன த்³விபஞ்சன்னங் விஞ்ஞாணானங் படிபாடியா அனுக்கமேன கோ³சரா ஹொந்தி. ரூபாதி³பஞ்சகங் ஸப்³ப³ங், மனோதா⁴துத்தயஸ்ஸ து மனோதா⁴துத்தயஸ்ஸ பன ஸப்³ப³ங் கோ³சரோ ஆரம்மணங் ஹோதி. நாரூபங் நாமங் ஆரம்மணங் ந கரொந்தி. ந ச பஞ்ஞத்திங் பஞ்ஞத்திங் ஆரம்மணங் ந கரொந்தி. நாதீதங் அதீதங் ஆரம்மணங் ந கரொந்தி ந சனாக³தங் அனாக³தங் ஆரம்மணங் ந கரொந்தி ஏவ. ஹி ஸச்சங் வத்தமானோ கோ³சரோ ஏதேஸங் த்³விபஞ்சவிஞ்ஞாணானங், மனோதா⁴துத்தயஸ்ஸ சாதி தேரஸன்னங் சித்தானங் தங் ஆரம்மணங் வத்தமானங் ஏவ பச்சுப்பன்னங் ஏவ.
311. தேரஸேதானி சித்தானி, ஜாயந்தே காமதா⁴துயங் ஏதானி தேரஸ சித்தானி காமதா⁴துயங் ஜாயந்தி, ரூபாவசரே புஞ்ஞஜானி சக்கு²ஸோதவிஞ்ஞாணஸம்படிச்ச²னானி, கிரியாமனோதா⁴து சாதி சத்தாரி சித்தானி ஜாயந்தி. அரூபிஸு அரூபபூ⁴மீஸு நேவ கிஞ்சிபி ஏகம்பி சித்தங் நேவ ஜாயதி.
312-3. மஹாபாகானமட்ட²ன்னங் அட்ட²ன்னங் மஹாவிபாகானங் பவத்தியங் ச²ஸு த்³வாரேஸு ததா³ரம்மணகிச்சானங் ரூபாதி³ச²பரித்தானி கோ³சரா. ஸந்தீரணத்தயஸ்ஸபி பவத்தியங் பஞ்சத்³வாரே ஸந்தீரணத்தயகிச்சஸ்ஸ, ச²த்³வாரேஸு ததா³லம்ப³ணகிச்சஸ்ஸ ச ரூபாதி³ச²பரித்தானி கோ³சரா. ரூபாத³யோ பரித்தா ச², ஹஸிதுப்பாத³கோ³சரா ஹஸிதுப்பாத³ஸ்ஸ ரூபாத³யோ ச² பரித்தா கோ³சரா ஹொந்தி. பஞ்சத்³வாரே படுப்பன்னா பஞ்சஸு த்³வாரேஸு யே கோ³சரா பச்சுப்பன்னா, மனொத்³வாரே திகாலிகா யே கோ³சரா திகாலிகா தீஸு காலேஸு நியுத்தா.
314-5. து³தியாருப்பசித்தஞ்ச, சதுத்தா²ருப்பமானஸங் குஸலவிபாககிரியாவஸேன ச²ப்³பி³த⁴ங் சித்தங் மஹக்³க³தகோ³சரங் நியதங் நியதாரம்மணங் ஹோதி, தங் ச²ப்³பி³த⁴ங் சித்தங் மஹக்³க³தகோ³சரங் புப்³பே³ அத்தனா அதி⁴க³தஆகாஸானஞ்சாயதனஆகிஞ்சஞ்ஞாயதனகுஸலாரம்மணங், தேஸு த்³வே து³தியசதுத்தா²ருப்பபாகா ‘‘யஸ்ஸ யஸ்ஸ குஸலஜா²னஸ்ஸ யங் யங் ஆரம்மணங் க³ஹெத்வா ப்³ரஹ்மலோகே படிஸந்தி⁴ ஹோதீ’’தி வசனதோ ஸகஸககுஸலஸ்ஸ ஆரம்மணங் ஏவ தேஸங் விபாகானங் ஆரம்மணங் ஹோதி. நிப்³பா³னாரம்மணத்தா ஹி, ஏகந்தேன அனஞ்ஞதோ அட்டா²னாஸவசித்தானங் அப்பமாணோவ நிப்³பா³னங் ஏவ கோ³சரங் ஆரம்மணங் ஹோதி ஹி கஸ்மா காரணா? நிப்³பா³னாரம்மணத்தா, ந அஞ்ஞதோ ஆரம்மணதோ.
316-320. சத்தாரோ ஞாணஹீனா ச, காமாவசரபுஞ்ஞதோ காமாவசரகுஸலவஸேன சத்தாரோ ஞாணஹீனா ச க்ரியதோ கிரியவஸேன சத்தாரோ ஞாணஹீனா ச த்³வாத³ஸாகுஸலானி ச தே பரித்தாரம்மணா சேவ மஹக்³க³தகோ³சரா ச, தே ந வத்தப்³பா³ ச ஹொந்தி. கஸ்மா? பஞ்ஞத்தாரம்மணத்தா சத்தாரோ ஞாணஸங்யுத்தா, புஞ்ஞதோ குஸலவஸேன சத்தாரோ ஞாணஸம்பயுத்தா, க்ரியதோ கிரியவஸேன சத்தாரோ ஞாணஸம்பயுத்தா ச ததா² அபி⁴ஞ்ஞாத்³வயஞ்ச கிரியாவொட்ட²ப்³ப³னம்பி ச ஏகாத³ஸன்னங் ஏதேஸங் சித்தானங் கோ³சரோ பரித்தமஹக்³க³தஅப்பமாணவஸேன திவிதோ⁴ ஹோதி. இமே ஏகாத³ஸ ந வத்தப்³பா³பி ஹொந்தி. கஸ்மா? பஞ்ஞத்தாரம்மணத்தா. யானி வுத்தாவஸேஸானி வுத்ததோ சித்ததோ ஸேஸானி யானி சித்தானி, தானி ந வத்தப்³பா³ரம்மணானீதி விபா⁴வினா விஞ்ஞெய்யானி.
பரித்தாரம்மணத்திகங் ஸமத்தங்.
321.
து³தியாருப்பசித்தஞ்ச, சதுத்தா²ருப்பமானஸங்;
ச²ப்³பி³த⁴ங் பன ஏகந்தஅதீதாரம்மணங் ஸியா.
322-6. விஞ்ஞாணானங் த்³விபஞ்சன்னங் த்³வின்னங் பஞ்சவிஞ்ஞாணானங், மனோதா⁴துத்தயஸ்ஸ ச தேரஸன்னங் சித்தானங் கோ³சரா ரூபாத³யோ பஞ்ச த⁴ம்மா பச்சுப்பன்னாவ, அட்ட² காமமஹாவிபாகா ததா³ரம்மணகிச்சவஸேன அதீதானாக³தபச்சுப்பன்னகோ³சரா, சுதிகிச்சவஸேன அதீதாரம்மணா, படிஸந்தி⁴ப⁴வங்க³கிச்சவஸேன பச்சுப்பன்னாதீதாரம்மணா. ஸோமனஸ்ஸஸந்தீரணங் ஸந்தீரணகிச்சவஸேன பச்சுப்பன்னாரம்மணங். ததா³ரம்மணகிச்சவஸேன பச்சுப்பன்னானாக³தாதீதாரம்மணங். ஸேஸஸந்தீரணத்³வயங் ஸந்தீரணகிச்சவஸேன பச்சுப்பன்னாரம்மணங் இதி ஏதே த்³வாத³ஸ மானஸா பன ஸியாதீதாரம்மணா அதீதாரம்மணா ஸியுங். பச்சுப்பன்னானாக³தகோ³சரா பச்சுப்பன்னாரம்மணா அனாக³தாரம்மணா ஸியுங். காமே வீஸதி குஸலாகுஸலா க்ரியதோ கிரியவஸேன காமே நவ மானஸா, வொட்ட²ப்³ப³ங் வொட்ட²ப்³ப³னகிச்சவஸேன பச்சுப்பன்னாரம்மணங், ஆவஜ்ஜனகிச்சவஸேன திகாலாரம்மணங். மஹாகிரியமானஸா ஜவனகிச்சவஸேன திகாலாரம்மணா, ஸந்தே பஞ்ஞத்திகாலே நவத்தப்³பா³ரம்மணா. த்³வே அபி⁴ஞ்ஞாமானஸாபி அபி⁴ஞ்ஞாகிச்சவஸேன அதீதாதி³கோ³சரா ஸியுங். இமே மானஸா பஞ்ஞத்திகாலேபி ஸந்தே நவத்தப்³பா³ ப⁴வந்தி. ரூபாரூபப⁴வேஸு மயா வுத்ததோ ஸேஸானி ஸப்³பா³னி சித்தானி அதீதாரம்மணாதி³னா அதீதாரம்மணாதி³வஸேன பண்டி³தேன ந வத்தப்³பா³னி ந கதி²தப்³பா³னி ஹொந்தி ஏவ, பஞ்ஞத்தாரம்மணானி ஏவ ஹொந்தீதி அத்தோ².
327. காமதோ ச க்ரியா பஞ்ச காமாவசரவஸேன பஞ்ச கிரியா, ரூபதோ ரூபாவசரவஸேன பஞ்சமீ க்ரியா அபி⁴ஞ்ஞாசித்தங், ஏதேஸங் ச²ன்னங் சித்தானங் நத்தி² கிஞ்சி ஏகம்பி அகோ³சரங் அனாரம்மணங், ஸப்³பா³ரம்மணந்தி அத்தோ². ‘‘பஞ்சமீ க்ரியா’’தி வசனங் அபி⁴ஞ்ஞாசித்தவஸேன வுத்தங். ஸுத்³த⁴ஜா²னஸ்ஸ பஞ்சமரூபகிரியஸ்ஸ பஞ்ஞத்தாரம்மணங் ஏவாதி வேதி³தப்³ப³ங்.
328. நிப்³பா³னஞ்ச சதுப்³பி³த⁴ங் ப²லங், மக்³க³ங் ரூபஞ்ச அரூபங் சித்தசேதஸிகஸங்கா²தங் நாமஞ்ச கோ³சரங் காதுங் யானி சித்தானி ஸக்கொந்தி, தானி சித்தானி மே வத³, ஆசரிய, தானி மய்ஹங் கதே²ஹி.
329-30. சத்தாரோ ஞாணஸங்யுத்தா, புஞ்ஞதோ புஞ்ஞவஸேன சத்தாரோ ஞாணஸம்பயுத்தா, க்ரியதோ ததா² கிரியவஸேன அரூபங் நாமஞ்ச கோ³சரங் காதுங் ஸக்கொந்தி.
331-4. சித்தேஸு பன ஸப்³பே³ஸு யானி சித்தானி அரஹத்தப²லங் அரஹத்தமக்³க³ங் கோ³சரங் காதுங் ஸக்கொந்தி, தானி கதி சித்தானி மே வத³ தானி மய்ஹங் த்வங் கதே²ஹி. ஸப்³பே³ஸு பன சித்தேஸு, ச² ச சித்தானி மே ஸுண, போ⁴ ப⁴த்³த³முக², த்வங் மய்ஹங் வசனங் ஸுணோஹி, ஸப்³பே³ஸு பன சித்தேஸு ச² சித்தானி அரஹத்தப²லங் அரஹத்தமக்³க³ங் கோ³சரங் காதுங் ஸக்கொந்தி. சத்தாரோ ஞாணஸங்யுத்தா, கிரியா ச வொட்ட²ப்³ப³னம்பி ச கிரியாபி⁴ஞ்ஞாமனோ சாதி ச² ச சித்தானி கோ³சரங் காதுங் ஸக்கொந்தி. புஞ்ஞதோ புஞ்ஞவஸேன சத்தாரோ ஞாணஸம்பயுத்தா, புஞ்ஞதோ புஞ்ஞவஸேன அபி⁴ஞ்ஞாசித்தஞ்ச அரஹத்தப²லங் மக்³க³ங் கோ³சரங் காதுங் ந ஸக்கொந்தி.
335-8. அரஹதோ கீ²ணாஸவஸ்ஸ மக்³க³சித்தங் ப²லமானஸங் வா புது²ஜ்ஜனா வா ஸெக்கா² வா விஜானிதுங் ந ஸக்கொந்தி. கஸ்மா காரணா? புது²ஜ்ஜனோ ஸோதாபன்னஸ்ஸ மானஸங் ந ஜானாதி, ஸோதாபன்னோ ஸகதா³கா³மிஸ்ஸ மானஸங் ந ஜானாதி, ஸகதா³கா³மீ அனாகா³மிஸ்ஸ மானஸங் ந ஜானாதி, அனாகா³மீ அரஹந்தஸ்ஸ மானஸங் ந ஜானாதி. ஹெட்டி²மோ ஹெட்டி²மோ புக்³க³லோ உபரூபரி டி²தஸ்ஸ புக்³க³லஸ்ஸ மானஸங் நேவ ஜானாதி, உபரூபரி டி²தோ புக்³க³லோபி ஹெட்டி²மஸ்ஸ ஹெட்டி²மஸ்ஸ புக்³க³லஸ்ஸ மானஸங் ஜானாதி.
339-342. யோ த⁴ம்மோ யஸ்ஸ த⁴ம்மஸ்ஸ ஆரம்மணங் ஹோதி, தங் ஆரம்மணங் ஏகங் ஏகங் உத்³த⁴ரித்வா இதோ பரங் பவக்கா²மி. குஸலாரம்மணங் காமே காமே அட்ட²வித⁴ங் குஸலங் அட்ட²வித⁴ஸ்ஸ காமாவசரகுஸலஸ்ஸ ஆரம்மணங் ஹோதி. கத²ங் அகுஸலஸ்ஸ ஆரம்மணங் ஹோதி, குஸலஸ்ஸ அபி⁴ஞ்ஞாமானஸஸ்ஸ ச கிரியஸ்ஸ அபி⁴ஞ்ஞாமானஸஸ்ஸ ச ஆரம்மணங் ஹோதி, ஏகாத³ஸவித⁴ஸ்ஸ காமாவசரவிபாகஸ்ஸ ததா³ரம்மணவஸேன ஆரம்மணங் ஹோதி. ததா² காமக்ரியஸ்ஸாதி ஜவனகிச்சவஸேன ஹஸனஸ்ஸ ஆவஜ்ஜனகிச்சவஸேன வொட்ட²ப்³ப³னஸ்ஸ ஜவனகிச்சவஸேன மஹாகிரியஸ்ஸ ஆரம்மணங் ஹோதி, ஏதேஸங் ச²ன்னங் ராஸீனங் ஆரம்மணங் ஸியா ப⁴வெய்ய. ரூபாவசரபுஞ்ஞானி பஞ்ச ததோ ச²ராஸிதோ காமவிபாகங் வஜ்ஜெத்வா பஞ்சன்னங் ராஸீனங் ஆரம்மணானி ஹொந்தி. ததா³ லோப⁴மூலமோஹமூலவஸேன அத்தனா படிலத்³த⁴ஜா²னானங் அனுஸ்ஸரணகாலே தஸ்ஸ த³ஸவித⁴ஸ்ஸ அகுஸலஸ்ஸ ஆரம்மணங் ஹோதி, திஹேதுகபடிஸந்தி⁴னோ ஸத்தஸ்ஸ ஜா²னதோ பரிஹீனஸ்ஸ ஜா²னங் பச்சவெக்க²தோ ஜா²னாரம்மணங் தோ³மனஸ்ஸயுத்தங் ஹோதி, ததா³ தஸ்ஸ படிக⁴த்³வயஸ்ஸ ஆரம்மணங் ஹோதி. காமக்ரியஸ்ஸாதி ஏகந்தபரித்தாரம்மணானி கிரியாமனோதா⁴துஹஸனானி வஜ்ஜெத்வா ஆவஜ்ஜனகிச்சவஸேன வொட்ட²ப்³ப³னஸ்ஸ, ஜவனகிச்சவஸேன மஹாகிரியஸ்ஸ ச ஆரம்மணங் ஹோதி.
343. ஆருப்பகுஸலஞ்சாபி, தேபூ⁴மகுஸலஸ்ஸ ச மஹாகுஸலஸ்ஸ ச அபி⁴ஞ்ஞாகிச்சவஸேன பஞ்சமரூபகுஸலஸ்ஸ ச து³தியசதுத்த²அரூபகுஸலஸ்ஸ ச தேபூ⁴மகக்ரியஸ்ஸாபி வொட்ட²ப்³ப³னஸ்ஸ மஹாகிரியஸ்ஸ ச அபி⁴ஞ்ஞாகிச்சவஸேன பஞ்சமரூபகிரியஸ்ஸ ச து³தியசதுத்தா²ருப்பகிரியஸ்ஸ ச ஆரம்மணங் ஹோதி, து³தியாருப்பகிரியஸ்ஸ ச பட²மாருப்பகிரியாய ஆரம்மணேன
யதா³ யோகீ³ ரூபஸமாபத்தியோ ஸமாபஜ்ஜித்வா ததோ வுட்ட²ஹித்வா பட²மாருப்பகுஸலங் து³தியாருப்பகுஸலங் ததியாருப்பகுஸலஞ்ச ஸமாபஜ்ஜித்வா கீ²ணாஸவோ ஹுத்வா அத்தனா அதி⁴க³தா ஸமாபத்தியோ க³ஹெத்வா அத்தனா அனதி⁴க³தங் சதுத்த²ங் அரூபஸமாபத்திங் ஸமாபஜ்ஜி, ததா³ சதுத்தா²ருப்பகிரியா ததியாருப்பகுஸலங் ஆரம்மணங் கரோதி, ஏவங் சதுத்தா²ருப்பகிரியஸ்ஸ ததியாருப்பகுஸலங் ஆரம்மணங் ஹோதி, பச்சா² கீ²ணாஸவகாலே ஸமாபஜ்ஜிதா ரூபாரூபஸமாபத்தியோ ஹொந்தி. யதா² ஹோதி, ததா² ஏவ அகுஸலஸ்ஸபி ஆரம்மணங் ஹோதி.
344-7. அரூபாவசரபாகானந்தி ஜாதினித்³தா⁴ரணங், சதுத்த²து³தியானங் அரூபபாகானம்பி ஆரம்மணங் ஹோதி, ‘‘சதுத்த²து³தியான’’ந்தி வத்தப்³பே³ தியானங்-ஸத்³த³ஸ்ஸ லோபங் கத்வா ‘‘சதுத்த²தூ³’’தி வுத்தங், ததா³ த்³வின்னங் அரூபபாகானங் பட²மாருப்பததியாருப்பஜவனானி ஆரம்மணானி ஹொந்தி, ‘‘யஸ்ஸ குஸலஸ்ஸ ஜா²னஸ்ஸ யங் ஆரம்மணங் க³ஹெத்வா ப்³ரஹ்மலோகே படிஸந்தி⁴ ஹோதீ’’தி வசனதோ ஸகஸககுஸலானங் ஆரம்மணபூ⁴தானி அபரியாபன்னபுஞ்ஞம்பி சதுப்³பி³த⁴லோகுத்தரகுஸலம்பி காமாவசரதோ காமாவசரவஸேன குஸலஸ்ஸ ஞாணஸம்பயுத்தமஹாகுஸலஸ்ஸ ச க்ரியஸ்ஸ வொட்ட²ப்³ப³னஸ்ஸ, ஞாணஸம்பயுத்ததோ கிரியஸ்ஸ ச ரூபதோ ரூபாவசரவஸேன பஞ்சமஸ்ஸ ரூபகுஸலஸ்ஸ ச பஞ்சமஸ்ஸ ரூபகிரியஸ்ஸ சாதி சதுன்னங் ராஸீனங் ஆரம்மணங் ஸதா³ ஹோதி, அயமெத்த² அதி⁴ப்பாயோ – ஸெக்கா²னங் ஞாணஸம்பயுத்தமஹாகுஸலஸ்ஸ, வொட்ட²ப்³ப³னஸ்ஸ, பஞ்சமஸ்ஸ ரூபகுஸலஸ்ஸ ச திவித⁴ங் லோகுத்தரபுஞ்ஞங் ஆரம்மணங் ஹோதி. கீ²ணாஸவஸ்ஸ வொட்ட²ப்³ப³னஸ்ஸ, ஞாணஸம்பயுத்தமஹாகிரியஸ்ஸ, பஞ்சமஸ்ஸ ரூபகிரியஸ்ஸ ச அரஹத்தபுஞ்ஞங் ஆரம்மணங் ஹோதி. யதா² ததா² ஏவ ஸப்³ப³ங் அகுஸலங் காமாவசரதோ காமாவசரவஸேன குஸலஸ்ஸ மஹாகுஸலஸ்ஸ, க்ரியஸ்ஸ ஹஸனவொட்ட²ப்³ப³னமஹாகிரியஸ்ஸ ச ரூபாவசரதோ பன ரூபாவசரவஸேன பஞ்சமஸ்ஸ ரூபகுஸலஸ்ஸ, பஞ்சமஸ்ஸ ரூபகிரியஸ்ஸ ச ஆரம்மணங் ஹோதி, யதா² ததா² ஏவ ஸப்³ப³ஸ்ஸ அகுஸலஸ்ஸ ச காமாவசரவிபாகானங் ததா³ரம்மணகிச்சவஸேன ஏகாத³ஸன்னஞ்சாதி ச²ன்னங் ராஸீனங் ஆரம்மணங் ப⁴க³வதா ஈரிதங்.
348-352. விபாகாரம்மணங் காமே ஸப்³ப³ங் விபாகாரம்மணங் காமாவசரதோபி காமாவசரவஸேனபி குஸலஸ்ஸ மஹாகுஸலஸ்ஸ, க்ரியஸ்ஸ ஹஸனவொட்ட²ப்³ப³னமஹாகிரியஸ்ஸ ச ரூபாவசரதோ சேவ ரூபாவசரவஸேன ச ஏவ பஞ்சமஸ்ஸ ரூபகுஸலஸ்ஸ, பஞ்சமஸ்ஸ ரூபகிரியஸ்ஸ ச காமாவசரபாகானங் காமாவசரவிபாகானங் ஏகாத³ஸன்னஞ்ச ததே²வ அகுஸலஸ்ஸ ச ச²ன்னங் ராஸீனங் ஆரம்மணங் ஹோதி. ரூபே விபாகாரம்மணங் காமாவசரதோபி ச காமாவசரவஸேனபி ச குஸலஸ்ஸ மஹாகுஸலஸ்ஸ க்ரியஸ்ஸ ச வொட்ட²ப்³ப³னமஹாகிரியஸ்ஸ ச ரூபாவசரதோ சேவ ரூபாவசரவஸேன ச ஏவ குஸலஸ்ஸ ச அபுஞ்ஞஸ்ஸ சாதி பஞ்சன்னங் ராஸீனங் கோ³சரோ ஹோதி, அரூபாவசரபாகேஸு அயங் நயோ ப⁴க³வதா மதோ. வட்டே ந பரியாபன்னா நப்பவிட்டா²தி அபரியாபன்னா, தேஸங் புக்³க³லானங் பாகாபி காமதோ காமாவசரவஸேன குஸலஸ்ஸ ஞாணஸம்பயுத்தமஹாகுஸலஸ்ஸ, க்ரியஸ்ஸ ச வொட்ட²ப்³ப³னஞாணஸம்பயுத்தமஹாகிரியஸ்ஸ ச ரூபதோபி ரூபாவசரவஸேனபி குஸலஸ்ஸ பஞ்சமஸ்ஸ ரூபகுஸலஸ்ஸ, க்ரியஸ்ஸ ச பஞ்சமஸ்ஸ ரூபகிரியஸ்ஸ ச ஏவங் ஆரம்மணங் ஹோதீதி. எத்தா²யமதி⁴ப்பாயோ அபரியாபன்னபுஞ்ஞே வுத்தனயேனேவ வேதி³தப்³போ³.
353-6. காமே இத³ங் ஸப்³ப³கிரியசித்தங் காமாவசரதோபி ச காமாவசரவஸேனபி ச குஸலஸ்ஸ மஹாகுஸலஸ்ஸ, க்ரியஸ்ஸ ச ஹஸனவொட்ட²ப்³ப³னமஹாகிரியஸ்ஸ ச ரூபாவசரதோ சேவ ரூபாவசரவஸேன ச ஏவ குஸலஸ்ஸ பஞ்சமஸ்ஸ ரூபகுஸலஸ்ஸ, க்ரியஸ்ஸ ச பஞ்சமஸ்ஸ ரூபகிரியஸ்ஸ ச ஏகாத³ஸகாமாவசரபாகஸ்ஸ ச ததே²வ அகுஸலஸ்ஸ ச ஏதேஸங் ச²ன்னங் ராஸீனங் ஆரம்மணங் ஹோதி. யங் க்ரியாமானஸங் ரூபே ரூபாவசரே யங் கிரியாமானஸங், காமபாகங் ததோ வினா ததோ ராஸிதோ காமபாகங் வினா வஜ்ஜெத்வா பஞ்சன்னங் பன ராஸீனங் ஆரம்மணங் ஹோதி. காமாவசரதோ காமாவசரவஸேன கிரியஸ்ஸ வொட்ட²ப்³ப³னமஹாகிரியஸ்ஸ ஆரம்மணங் ஹோதி, ஹஸனங் ஏகந்தபரித்தாரம்மணத்தா ரூபகிரியங் ஆரம்மணங் ந கரோதி. க்ரியாசித்தங் பனாருப்பே அரூபகிரியாசித்தங் பன தேஸங் பஞ்சன்னங் ஏவ ச ராஸீனங் ஆருப்பக்ரியஸ்ஸாபி பட²மாருப்பகிரியங் து³தியாருப்பகிரியஸ்ஸ ஆரம்மணங் ஹோதி, ததியாருப்பகிரியங் சதுத்தா²ருப்பகிரியஸ்ஸ ஆரம்மணங் ஹோதி. இதி ச²ன்னங் ராஸீனங் கோ³சரோ ஹோதியேவ.
357-8.
ரூபங் சதுஸமுட்டா²னங், ரூபாரம்மணஸஞ்ஞிதங்;
காமாவசரபுஞ்ஞஸ்ஸ, ததே²வ குஸலஸ்ஸ ச;
அபி⁴ஞ்ஞாத்³வயசித்தஸ்ஸ, காமபாகக்ரியஸ்ஸ ச.
த்³விசக்கு²விஞ்ஞாணமனோதா⁴துத்³வயஸந்தீரணத்தயமஹாபாகஸ்ஸ
359-360. நிப்³பா³னாரம்மணங் காமரூபாவசரதோ காமரூபாவசரவஸேன ஸெக்கா²னங் ஞாணஸம்பயுத்தமஹாகுஸலஸ்ஸ, ரூபாவசரவஸேன பஞ்சமஸ்ஸ ரூபகுஸலஸ்ஸ ச காமரூபகிரியஸ்ஸ ச கீ²ணாஸவானங் வொட்ட²ப்³ப³னஞாணஸம்பயுத்தமஹாகிரியஸ்ஸ ச பஞ்சமரூபகிரியஸ்ஸ ச உப⁴யஸ்ஸாபி சித்தஸ்ஸ ஆரம்மணங் ஹோதி. அபரியாபன்னதோ சேவ லோகுத்தரவஸேன ச ஏவ ப²லஸ்ஸ, குஸலஸ்ஸ ச ஏதேஸங் ச²ன்னங் ராஸீனங் ஆரம்மணபச்சயோ ஹோதி.
361-2. நானப்பகாரகங் ஸப்³ப³ங், பஞ்ஞத்தாரம்மணங் பன தேபூ⁴மகஸ்ஸ புஞ்ஞஸ்ஸ மஹாகுஸலஸ்ஸ, ஸுத்³த⁴ஜா²னஸ்ஸ பஞ்சவித⁴ஸ்ஸ ரூபகுஸலஸ்ஸ, பட²மாருப்பததியாருப்பகுஸலஸ்ஸ ச ததே²வ அகுஸலஸ்ஸ ச ரூபாரூபவிபாகஸ்ஸ ஸப்³ப³ஸ்ஸ ரூபவிபாகஸ்ஸ, பட²மாருப்பததியாருப்பவிபாகஸ்ஸ ச தேபூ⁴மகக்ரியஸ்ஸ ச ஹஸனவொட்ட²ப்³ப³னமஹாகிரியஸ்ஸ ஸப்³ப³ஸ்ஸ ரூபகிரியஸ்ஸ, பட²மாருப்பததியாருப்பகிரியஸ்ஸ சாதி நவன்னங் பன ராஸீனங் ஆரம்மணபச்சயோ ஹோதி.
363-4. ரூபாரம்மணிகா த்³வே து த்³வே சித்துப்பாதா³ ரூபாரம்மணிகா, த்³வே த்³வே ஸத்³தா³தி³கோ³சரா த்³வே த்³வே சித்துப்பாதா³ ஸத்³தா³ரம்மணாதி³கோ³சரா, தயோ மனோதா⁴துஸங்கா²தா சித்துப்பாதா³ பஞ்சாரம்மணிகா நாம மதா ப⁴க³வதா. இத⁴ இமஸ்மிங் காமாவசராதி⁴காரே ஏகசத்தாலீஸேவ சித்துப்பாதா³ ச²ளாரம்மணிகா மதா. அயங் காமாவசரசித்தானங் ஆரம்மணக்கமோ.
365-9. பஞ்சாபி⁴ஞ்ஞா விவஜ்ஜெத்வா, ரூபாரூபா அனாஸவா இமே ஸப்³பே³ சித்துப்பாதா³ த⁴ம்மாரம்மணகோ³சரா ஹொந்தி. பட²மாருப்பகுஸலங் து³தியாருப்பசேதஸோ குஸலஸ்ஸ ஆரம்மணங் ஹோதி, து³தியாருப்பசேதஸோ விபாகஸ்ஸ ச ஆரம்மணங் ஹோதி, து³தியாருப்பசேதஸோ கிரியஸ்ஸ ச ஆரம்மணங் ஹோதி. து³தியாருப்பசேதஸோ கிரியஸ்ஸ பட²மாருப்பகுஸலாரம்மணபா⁴வே காரணங் ஹெட்டா² வுத்தமேவ. பட²மாருப்பபாகோயங், து³தியாருப்பசேதஸோ குஸலஸ்ஸ ச து³தியாருப்பசேதஸோ விபாகஸ்ஸ ச து³தியாருப்பசேதஸோ கிரியஸ்ஸ ச ஆரம்மணங் ந ஹோதி. ஹி கஸ்மா? தேஸங் து³தியாருப்பகுஸலவிபாககிரியானங் பட²மாருப்பகுஸலாரம்மணத்தா. பட²மங் து க்ரியாசித்தங் பட²மங் கிரியாசித்தங் பன து³தியாருப்பசேதஸோ புஞ்ஞஸ்ஸ ஆரம்மணங் ந ஹோதி. து³தியாருப்பசேதஸோ விபாகஸ்ஸ ஆரம்மணங் ந பட²மங் து க்ரியாசித்தங் பன து³தியாருப்பசேதஸோ கிரியஸ்ஸ ஆரம்மணங் ஹோதி. இதி ஏவங் இமினா மயா வுத்தப்பகாரேன சித்தானங் ஆரம்மணுப்பத்தி விபா⁴வினா தீ⁴ரேன ஞெய்யா.
370-3. புது²ஜ்ஜனஸ்ஸ ஸெக்க²ஸ்ஸ, அரூபாரம்மணங் த்³விதா⁴ த்³விப்பகாரங் குஸலங் குஸலஸ்ஸ து³தியாருப்பகுஸலஸ்ஸ ஆரம்மணங் ஹோதி, தங் பட²மாருப்பகுஸலங் து³தியாருப்பவிபாகஸ்ஸ ஆரம்மணங் ஸியா ப⁴வெய்ய. கீ²ணாஸவஸ்ஸ பி⁴க்கு²ஸ்ஸ, பட²மாருப்பமானஸங் ஆரம்மணங் திதா⁴ திப்பகாரங் ஹோதி. இதி வசனங் மஹேஸினா வுத்தங். க்ரியஸ்ஸாபி து³தியாருப்பகிரியஸ்ஸாபி பட²மாருப்பகிரியா ஆரம்மணங் ஹோதி. குஸலம்பி பட²மாருப்பகுஸலம்பி து³தியாருப்பகிரியஸ்ஸ ச ஆரம்மணங் ஹோதி. குஸலங் ஏவங் இமினா மயா வுத்தப்பகாரேன பட²மாருப்பமானஸங் ஆரம்மணங் திதா⁴ ஹோதி. ததியாருப்பசித்தம்பி சதுத்தா²ருப்பசேதஸோ குஸலஸ்ஸ ஆரம்மணங் ஹோதி, சதுத்தா²ருப்பசேதஸோ விபாகஸ்ஸ ச தங் ஆரம்மணங் ஹோதி. ஏவமேவ யதா² பட²மாருப்பமானஸங் ஆரம்மணங் த்³விதா⁴ ஹோதி, ஏவமேவ ததா² ததியாருப்பசித்தங் ஆரம்மணங் த்³விதா⁴ ஹோதி. யதா² பட²மாருப்பமானஸங் ஆரம்மணங் திதா⁴ ஹோதி, ஏவமேவ ததா² ததியாருப்பசித்தங் ஆரம்மணங் திதா⁴ ஸியா.
374. யங் யங் பன இதா⁴ரப்³ப⁴ இத⁴ இமஸ்மிங் அதி⁴காரே யங் யங் கோ³சரங் ஆரப்³ப⁴ படிச்ச யே யே சித்துப்பாதா³ ஜாயந்தி, ஸோ ஸோ கோ³சரோ தேஸஞ்ச தேஸஞ்ச சித்துப்பாதா³னங் ஆரம்மணபச்சயோ ஹோதி.
375. யோ பன நரோ இமஸ்ஸ அபி⁴த⁴ம்மாவதாரஸ்ஸ கிர பாரங் து³த்தரங் இத⁴ இமஸ்மிங் லோகே உத்தரதி, ஸோ நரோ அபி⁴த⁴ம்மமஹண்ணவே பாரங் து³த்தரங் உத்தரங் உத்தரதி ஏவ.
இதி அபி⁴த⁴ம்மாவதாரடீகாய
ஆரம்மணவிபா⁴க³வண்ணனா நிட்டி²தா.
ச²ட்டோ² பரிச்சே²தோ³.