19. கங்கா²விதரணவிஸுத்³தி⁴னித்³தே³ஸோ
பச்சயபரிக்³க³ஹகதா²
678. ஏதஸ்ஸேவ கங்கா²விதரணவிஸுத்³தி⁴ நாம.
தங் ஸம்பாதே³துகாமோ பி⁴க்கு² யதா² நாம குஸலோ பி⁴ஸக்கோ ரோக³ங் தி³ஸ்வா தஸ்ஸ ஸமுட்டா²னங் பரியேஸதி. யதா² வா பன அனுகம்பகோ புரிஸோ த³ஹரங் குமாரங் மந்த³ங் உத்தானஸெய்யகங் ரதி²காய நிபன்னங் தி³ஸ்வா ‘‘கஸ்ஸ நு கோ² அயங் புத்தகோ’’தி தஸ்ஸ மாதாபிதரோ ஆவஜ்ஜதி, ஏவமேவ தஸ்ஸ நாமரூபஸ்ஸ ஹேதுபச்சயபரியேஸனங் ஆபஜ்ஜதி.
ஸோ ஆதி³தோவ இதி படிஸஞ்சிக்க²தி ‘‘ந தாவித⁴ங் நாமரூபங் அஹேதுகங், ஸப்³ப³த்த² ஸப்³ப³தா³ ஸப்³பே³ஸஞ்ச ஏகஸதி³ஸபா⁴வாபத்திதோ, ந இஸ்ஸராதி³ஹேதுகங், நாமரூபதோ உத்³த⁴ங் இஸ்ஸராதீ³னங் அபா⁴வதோ. யேபி நாமரூபமத்தமேவ இஸ்ஸராத³யோதி வத³ந்தி, தேஸங் இஸ்ஸராதி³ஸங்கா²தனாமரூபஸ்ஸ அஹேதுகபா⁴வப்பத்திதோ. தஸ்மா ப⁴விதப்³ப³மஸ்ஸ ஹேதுபச்சயேஹி, கே நு கோ² தே’’தி.
679. ஸோ ஏவங் நாமரூபஸ்ஸ ஹேதுபச்சயே ஆவஜ்ஜெத்வா இமஸ்ஸ தாவ ரூபகாயஸ்ஸ ஏவங் ஹேதுபச்சயே பரிக்³க³ண்ஹாதி – ‘‘அயங் காயோ நிப்³ப³த்தமானோ நேவ உப்பலபது³மபுண்ட³ரீகஸோக³ந்தி⁴காதீ³னங் அப்³ப⁴ந்தரே நிப்³ப³த்ததி, ந மணிமுத்தாஹாராதீ³னங், அத² கோ² ஆமாஸயபக்காஸயானங் அந்தரே உத³ரபடலங் பச்ச²தோ பிட்டி²கண்டகங் புரதோ கத்வா அந்தஅந்தகு³ணபரிவாரிதோ ஸயம்பி து³க்³க³ந்த⁴ஜேகு³ச்ச²படிக்கூலோ து³க்³க³ந்த⁴ஜேகு³ச்ச²படிக்கூலே பரமஸம்பா³தே⁴ ஓகாஸே பூதிமச்ச²பூதிகும்மாஸஓளிக³ல்லசந்த³னிகாதீ³ஸு கிமிவ நிப்³ப³த்ததி. தஸ்ஸேவங் நிப்³ப³த்தமானஸ்ஸ ‘அவிஜ்ஜா தண்ஹா உபாதா³னங் கம்ம’ந்தி இமே சத்தாரோ த⁴ம்மா நிப்³ப³த்தகத்தா ஹேது, ஆஹாரோ உபத்த²ம்ப⁴கத்தா பச்சயோதி பஞ்ச
ஸோ ஏவங் பச்சயதோ நாமரூபஸ்ஸ பவத்திங் தி³ஸ்வா யதா² இத³ங் ஏதரஹி, ஏவங் அதீதேபி அத்³தா⁴னே பச்சயதோ பவத்தித்த², அனாக³தேபி பச்சயதோ பவத்திஸ்ஸதீதி ஸமனுபஸ்ஸதி.
680. தஸ்ஸேவங் ஸமனுபஸ்ஸதோ யா ஸா புப்³ப³ந்தங் ஆரப்³ப⁴ ‘‘அஹோஸிங் நு கோ² அஹங் அதீதமத்³தா⁴னங், ந நு கோ² அஹோஸிங் அதீதமத்³தா⁴னங், கிங் நு கோ² அஹோஸிங் அதீதமத்³தா⁴னங், கத²ங் நு கோ² அஹோஸிங் அதீதமத்³தா⁴னங், கிங் ஹுத்வா கிங் அஹோஸிங் நு கோ² அஹங் அதீதமத்³தா⁴ன’’ந்தி (ம॰ நி॰ 1.18; ஸங்॰ நி॰ 2.20) பஞ்சவிதா⁴ விசிகிச்சா² வுத்தா, யாபி அபரந்தங் ஆரப்³ப⁴ ‘‘ப⁴விஸ்ஸாமி நு கோ² அஹங் அனாக³தமத்³தா⁴னங், ந நு கோ² ப⁴விஸ்ஸாமி அனாக³தமத்³தா⁴னங், கிங் நு கோ² ப⁴விஸ்ஸாமி அனாக³தமத்³தா⁴னங், கத²ங் நு கோ² ப⁴விஸ்ஸாமி அனாக³தமத்³தா⁴னங், கிங் ஹுத்வா கிங் ப⁴விஸ்ஸாமி நு கோ² அஹங் அனாக³தமத்³தா⁴ன’’ந்தி பஞ்சவிதா⁴ விசிகிச்சா² வுத்தா, யாபி பச்சுப்பன்னங் ஆரப்³ப⁴ ‘‘ஏதரஹி வா பன பச்சுப்பன்னங் அத்³தா⁴னங் அஜ்ஜ²த்தங் கத²ங்கதீ² ஹோதி – அஹங் நு கொ²ஸ்மி, நோ நு கொ²ஸ்மி, கிங் நு கொ²ஸ்மி, கத²ங் நு கொ²ஸ்மி, அயங் நு கோ² ஸத்தோ குதோ ஆக³தோ, ஸோ குஹிங் கா³மீ ப⁴விஸ்ஸதீ’’தி (ம॰ நி॰ 1.18) ச²ப்³பி³தா⁴ விசிகிச்சா² வுத்தா, ஸா ஸப்³பா³பி பஹீயதி.
681. அபரோ ஸாதா⁴ரணாஸாதா⁴ரணவஸேன து³வித⁴ங் நாமஸ்ஸ பச்சயங் பஸ்ஸதி, கம்மாதி³வஸேன சதுப்³பி³த⁴ங் ரூபஸ்ஸ. து³விதோ⁴ ஹி நாமஸ்ஸ பச்சயோ ஸாதா⁴ரணோ அஸாதா⁴ரணோ ச. தத்த² சக்கா²தீ³னி ச² த்³வாரானி, ரூபாதீ³னி ச² ஆரம்மணானி நாமஸ்ஸ ஸாதா⁴ரணோ பச்சயோ, குஸலாதி³பே⁴த³தோ ஸப்³ப³ப்பகாரஸ்ஸாபி ததோ பவத்திதோ. மனஸிகாராதி³கோ அஸாதா⁴ரணோ. யோனிஸோ மனஸிகாரஸத்³த⁴ம்மஸ்ஸவனாதி³கோ ஹி குஸலஸ்ஸேவ ஹோதி, விபரீதோ அகுஸலஸ்ஸ, கம்மாதி³கோ விபாகஸ்ஸ, ப⁴வங்கா³தி³கோ கிரியஸ்ஸாதி.
ரூபஸ்ஸ
ஸோ ஏவங் பச்சயதோ நாமரூபஸ்ஸ பவத்திங் தி³ஸ்வா யதா² இத³ங் ஏதரஹி, ஏவங் அதீதேபி அத்³தா⁴னே பச்சயதோ பவத்தித்த², அனாக³தேபி பச்சயதோ பவத்திஸ்ஸதீதி ஸமனுபஸ்ஸதி. தஸ்ஸேவங் ஸமனுபஸ்ஸதோ வுத்தனயேனேவ தீஸுபி அத்³தா⁴ஸு விசிகிச்சா² பஹீயதி.
682. அபரோ தேஸங்யேவ நாமரூபஸங்கா²தானங் ஸங்கா²ரானங் ஜராபத்திங் ஜிண்ணானஞ்ச ப⁴ங்க³ங் தி³ஸ்வா இத³ங் ஸங்கா²ரானங் ஜராமரணங் நாம ஜாதியா ஸதி ஹோதி, ஜாதி ப⁴வே ஸதி, ப⁴வோ உபாதா³னே ஸதி, உபாதா³னங் தண்ஹாய ஸதி, தண்ஹா வேத³னாய ஸதி, வேத³னா ப²ஸ்ஸே ஸதி, ப²ஸ்ஸோ ஸளாயதனே ஸதி, ஸளாயதனங் நாமரூபே ஸதி, நாமரூபங் விஞ்ஞாணே ஸதி, விஞ்ஞாணங் ஸங்கா²ரேஸு ஸதி, ஸங்கா²ரா அவிஜ்ஜாய ஸதீதி ஏவங் படிலோமபடிச்சஸமுப்பாத³வஸேன நாமரூபஸ்ஸ பச்சயபரிக்³க³ஹங் கரோதி. அத²ஸ்ஸ வுத்தனயேனேவ விசிகிச்சா² பஹீயதி.
683. அபரோ ‘‘இதி கோ² அவிஜ்ஜாபச்சயா ஸங்கா²ரா’’தி (ஸங்॰ நி॰ 2.2) புப்³பே³ வித்தா²ரெத்வா த³ஸ்ஸிதஅனுலோமபடிச்சஸமுப்பாத³வஸேனேவ நாமரூபஸ்ஸ பச்சயபரிக்³க³ஹங் கரோதி. அத²ஸ்ஸ வுத்தனயேனேவ கங்கா² பஹீயதி.
684. அபரோ ‘‘புரிமகம்மப⁴வஸ்மிங் மோஹோ அவிஜ்ஜா, ஆயூஹனா ஸங்கா²ரா, நிகந்தி தண்ஹா, உபக³மனங் உபாதா³னங், சேதனா ப⁴வோதி இமே பஞ்ச த⁴ம்மா புரிமகம்மப⁴வஸ்மிங் இத⁴ படிஸந்தி⁴யா பச்சயா, இத⁴ படிஸந்தி⁴ விஞ்ஞாணங், ஓக்கந்தி நாமரூபங், பஸாதோ³ ஆயதனங், பு²ட்டோ² ப²ஸ்ஸோ, வேத³யிதங் வேத³னாதி இமே பஞ்ச த⁴ம்மா இதூ⁴பபத்திப⁴வஸ்மிங் புரேகதஸ்ஸ கம்மஸ்ஸ பச்சயா. இத⁴ பரிபக்கத்தா ஆயதனானங் மோஹோ அவிஜ்ஜா…பே॰… சேதனா ப⁴வோதி இமே பஞ்ச த⁴ம்மா இத⁴ கம்மப⁴வஸ்மிங் ஆயதிங் படிஸந்தி⁴யா பச்சயா’’தி (படி॰ ம॰ 1.47) ஏவங் கம்மவட்டவிபாகவட்டவஸேன நாமரூபஸ்ஸ பச்சயபரிக்³க³ஹங் கரோதி.
685. தத்த² தி³ட்டி²த⁴ம்மவேத³னீயகம்மங் நாம. தங் இமஸ்மிஞ்ஞேவ அத்தபா⁴வே விபாகங் தே³தி. ததா² அஸக்கொந்தங் பன ‘‘அஹோஸிகம்மங் நாஹோஸி கம்மவிபாகோ, ந ப⁴விஸ்ஸதி கம்மவிபாகோ, நத்தி² கம்மவிபாகோ’’தி (படி॰ ம॰ 1.234) இமஸ்ஸ திகஸ்ஸ வஸேன அஹோஸிகம்மங் நாம ஹோதி. அத்த²ஸாதி⁴கா பன ஸத்தமஜவனசேதனா உபபஜ்ஜவேத³னீயகம்மங் நாம. தங் அனந்தரே அத்தபா⁴வே விபாகங் தே³தி. ததா² அஸக்கொந்தங் வுத்தனயேனேவ அஹோஸிகம்மங் நாம ஹோதி. உபி⁴ன்னங் அந்தரே பஞ்ச ஜவனசேதனா அபராபரியவேத³னீயகம்மங் நாம. தங் அனாக³தே யதா³ ஓகாஸங் லப⁴தி, ததா³ விபாகங் தே³தி. ஸதி ஸங்ஸாரப்பவத்தியா அஹோஸிகம்மங் நாம ந ஹோதி.
686. அபரம்பி சதுப்³பி³த⁴ங் கம்மங் – யங் க³ருகங், யங் ப³ஹுலங், யதா³ஸன்னங், கடத்தா வா பன கம்மந்தி. தத்த² குஸலங் வா ஹோது அகுஸலங் வா, க³ருகாக³ருகேஸு யங் க³ருகங் மாதுகா⁴தாதி³கம்மங் வா மஹக்³க³தகம்மங் வா, ததே³வ பட²மங் விபச்சதி. ததா² ப³ஹுலாப³ஹுலேஸுபி யங் ப³ஹுலங் ஹோதி ஸுஸீல்யங் வா து³ஸ்ஸீல்யங் வா, ததே³வ பட²மங் விபச்சதி. யதா³ஸன்னங் நாம மரணகாலே அனுஸ்ஸரிதகம்மங். யஞ்ஹி ஆஸன்னமரணோ அனுஸ்ஸரிதுங் ஸக்கோதி, தேனேவ உபபஜ்ஜதி. ஏதேஹி பன தீஹி முத்தங் புனப்புனங் லத்³தா⁴ஸேவனங் கடத்தா வா பன கம்மங் நாம ஹோதி, தேஸங் அபா⁴வே தங் படிஸந்தி⁴ங் ஆகட்³ட⁴தி.
687. அபரம்பி சதுப்³பி³த⁴ங் கம்மங் – ஜனகங், உபத்த²ம்ப⁴கங், உபபீளகங், உபகா⁴தகந்தி. தத்த² ஜனகங் நாம குஸலம்பி ஹோதி அகுஸலம்பி. தங் படிஸந்தி⁴யம்பி பவத்தேபி ரூபாரூபவிபாகக்க²ந்தே⁴ ஜனேதி. உபத்த²ம்ப⁴கங் பன விபாகங் ஜனேதுங் ந ஸக்கோதி, அஞ்ஞேன கம்மேன தி³ன்னாய படிஸந்தி⁴யா ஜனிதே விபாகே உப்பஜ்ஜமானகஸுக²து³க்க²ங் உபத்த²ம்பே⁴தி, அத்³தா⁴னங் பவத்தேதி. உபபீளகங் அஞ்ஞேன கம்மேன தி³ன்னாய படிஸந்தி⁴யா ஜனிதே விபாகே உப்பஜ்ஜமானகஸுக²து³க்க²ங் பீளேதி பா³த⁴தி, அத்³தா⁴னங் பவத்திதுங் ந தே³தி. உபகா⁴தகங் பன ஸயங் குஸலம்பி அகுஸலம்பி ஸமானங் அஞ்ஞங் து³ப்³ப³லகம்மங் கா⁴தெத்வா தஸ்ஸ விபாகங் படிபா³ஹித்வா அத்தனோ விபாகஸ்ஸ ஓகாஸங் கரோதி. ஏவங் பன கம்மேன கதே ஓகாஸே தங் விபாகங் உப்பன்னங் நாம வுச்சதி.
இதி
688. இதி இமங் த்³வாத³ஸவித⁴ங் கம்மங் கம்மவட்டே பக்கி²பித்வா ஏவங் ஏகோ கம்மவட்டவிபாகவட்டவஸேன நாமரூபஸ்ஸ பச்சயபரிக்³க³ஹங் கரோதி. ஸோ ஏவங் கம்மவட்டவிபாகவட்டவஸேன பச்சயதோ நாமரூபஸ்ஸ பவத்திங் தி³ஸ்வா ‘‘யதா² இத³ங் ஏதரஹி, ஏவங் அதீதேபி அத்³தா⁴னே கம்மவட்டவிபாகவட்டவஸேன பச்சயதோ பவத்தித்த², அனாக³தேபி கம்மவட்டவிபாகவட்டவஸேனேவ பச்சயதோ பவத்திஸ்ஸதீ’’தி. இதி கம்மஞ்சேவ கம்மவிபாகோ ச, கம்மவட்டஞ்ச விபாகவட்டஞ்ச, கம்மபவத்தஞ்ச விபாகபவத்தஞ்ச, கம்மஸந்ததி ச விபாகஸந்ததி ச, கிரியா ச கிரியாப²லஞ்ச.
கம்மா விபாகா வத்தந்தி, விபாகோ கம்மஸம்ப⁴வோ;
கம்மா புனப்³ப⁴வோ ஹோதி, ஏவங் லோகோ பவத்ததீதி. –
ஸமனுபஸ்ஸதி. தஸ்ஸேவங் ஸமனுபஸ்ஸதோ யா ஸா புப்³ப³ந்தாத³யோ ஆரப்³ப⁴ ‘‘அஹோஸிங் நு கோ² அஹ’’ந்திஆதி³னா நயேன வுத்தா ஸோளஸவிதா⁴ விசிகிச்சா², ஸா ஸப்³பா³ பஹீயதி. ஸப்³ப³ப⁴வயோனிக³திட்டி²தினிவாஸேஸு ஹேதுப²லஸம்ப³ந்த⁴வஸேன பவத்தமானங் நாமரூபமத்தமேவ கா²யதி. ஸோ நேவ காரணதோ உத்³த⁴ங் காரகங் பஸ்ஸதி, ந விபாகப்பவத்திதோ உத்³த⁴ங் விபாகபடிஸங்வேத³கங். காரணே பன ஸதி ‘‘காரகோ’’தி, விபாகப்பவத்தியா ஸதி ‘‘படிஸங்வேத³கோ’’தி ஸமஞ்ஞாமத்தேன பண்டி³தா வோஹரந்திச்சேவஸ்ஸ ஸம்மப்பஞ்ஞாய ஸுதி³ட்ட²ங் ஹோதி.
689. தேனாஹு போராணா –
‘‘கம்மஸ்ஸ காரகோ நத்தி², விபாகஸ்ஸ ச வேத³கோ;
ஸுத்³த⁴த⁴ம்மா பவத்தந்தி, ஏவேதங் ஸம்மத³ஸ்ஸனங்.
‘‘ஏவங் கம்மே விபாகே ச, வத்தமானே ஸஹேதுகே;
பீ³ஜருக்கா²தி³கானங்வ, புப்³பா³ கோடி ந நாயதி;
அனாக³தேபி ஸங்ஸாரே, அப்பவத்தங் ந தி³ஸ்ஸதி.
‘‘ஏதமத்த²ங்
ஸத்தஸஞ்ஞங் க³ஹெத்வான, ஸஸ்ஸதுச்சே²த³த³ஸ்ஸினோ;
த்³வாஸட்டி²தி³ட்டி²ங் க³ண்ஹந்தி, அஞ்ஞமஞ்ஞவிரோதி⁴தா.
‘‘தி³ட்டி²ப³ந்த⁴னப³த்³தா⁴ தே, தண்ஹாஸோதேன வுய்ஹரே;
தண்ஹாஸோதேன வுய்ஹந்தா, ந தே து³க்கா² பமுச்சரே.
‘‘ஏவமேதங் அபி⁴ஞ்ஞாய, பி⁴க்கு² பு³த்³த⁴ஸ்ஸ ஸாவகோ;
க³ம்பீ⁴ரங் நிபுணங் ஸுஞ்ஞங், பச்சயங் படிவிஜ்ஜ²தி.
‘‘கம்மங் நத்தி² விபாகம்ஹி, பாகோ கம்மே ந விஜ்ஜதி;
அஞ்ஞமஞ்ஞங் உபோ⁴ ஸுஞ்ஞா, ந ச கம்மங் வினா ப²லங்.
‘‘யதா² ந ஸூரியே அக்³கி³, ந மணிம்ஹி ந கோ³மயே;
ந தேஸங் ப³ஹி ஸோ அத்தி², ஸம்பா⁴ரேஹி ச ஜாயதி.
‘‘ததா² ந அந்தோ கம்மஸ்ஸ, விபாகோ உபலப்³ப⁴தி;
ப³ஹித்³தா⁴பி ந கம்மஸ்ஸ, ந கம்மங் தத்த² விஜ்ஜதி.
‘‘ப²லேன ஸுஞ்ஞங் தங் கம்மங், ப²லங் கம்மே ந விஜ்ஜதி;
கம்மஞ்ச கோ² உபாதா³ய, ததோ நிப்³ப³த்ததே ப²லங்.
‘‘ந ஹெத்த² தே³வோ ப்³ரஹ்மா வா, ஸங்ஸாரஸ்ஸத்தி²காரகோ;
ஸுத்³த⁴த⁴ம்மா பவத்தந்தி, ஹேதுஸம்பா⁴ரபச்சயா’’தி.
690. தஸ்ஸேவங் கம்மவட்டவிபாகவட்டவஸேன நாமரூபஸ்ஸ பச்சயபரிக்³க³ஹங் கத்வா தீஸு அத்³தா⁴ஸு பஹீனவிசிகிச்ச²ஸ்ஸ ஸப்³பே³ அதீதானாக³தபச்சுப்பன்னத⁴ம்மா சுதிபடிஸந்தி⁴வஸேன விதி³தா ஹொந்தி, ஸாஸ்ஸ ஹோதி ஞாதபரிஞ்ஞா.
ஸோ
யதே²வ சக்கு²விஞ்ஞாணங், மனோதா⁴துஅனந்தரங்;
ந சேவ ஆக³தங் நாபி, ந நிப்³ப³த்தங் அனந்தரங்.
ததே²வ படிஸந்தி⁴ம்ஹி, வத்ததே சித்தஸந்ததி;
புரிமங் பி⁴ஜ்ஜதே சித்தங், பச்சி²மங் ஜாயதே ததோ.
தேஸங் அந்தரிகா நத்தி², வீசி தேஸங் ந விஜ்ஜதி;
ந சிதோ க³ச்ச²தி கிஞ்சி, படிஸந்தி⁴ ச ஜாயதீதி.
691. ஏவங் சுதிபடிஸந்தி⁴வஸேன விதி³தஸப்³ப³த⁴ம்மஸ்ஸ ஸப்³பா³காரேன நாமரூபஸ்ஸ பச்சயபரிக்³க³ஹஞாணங் தா²மக³தங் ஹோதி, ஸோளஸவிதா⁴ கங்கா² ஸுட்டு²தரங் பஹீயதி. ந கேவலஞ்ச ஸா ஏவ, ‘‘ஸத்த²ரி கங்க²தீ’’தி (த⁴॰ ஸ॰ 1008) ஆதி³னயப்பவத்தா அட்ட²விதா⁴பி கங்கா² பஹீயதியேவ, த்³வாஸட்டி² தி³ட்டி²க³தானி விக்க²ம்ப⁴ந்தி. ஏவங் நானானயேஹி நாமரூபபச்சயபரிக்³க³ஹணேன தீஸு அத்³தா⁴ஸு கங்க²ங் விதரித்வா டி²தங் ஞாணங் கங்கா²விதரணவிஸுத்³தீ⁴தி வேதி³தப்³ப³ங். த⁴ம்மட்டி²திஞாணந்திபி யதா²பூ⁴தஞாணந்திபி ஸம்மாத³ஸ்ஸனந்திபி ஏதஸ்ஸேவாதி⁴வசனங். வுத்தஞ்ஹேதங் –
‘‘அவிஜ்ஜா
‘‘அனிச்சதோ மனஸிகரொந்தோ கதமே த⁴ம்மே யதா²பூ⁴தங் ஜானாதி பஸ்ஸதி, கத²ங் ஸம்மாத³ஸ்ஸனங் ஹோதி, கத²ங் தத³ன்வயேன ஸப்³பே³ ஸங்கா²ரா அனிச்சதோ ஸுதி³ட்டா² ஹொந்தி, கத்த² கங்கா² பஹீயதி? து³க்க²தோ…பே॰… அனத்ததோ மனஸிகரொந்தோ கதமே த⁴ம்மே யதா²பூ⁴தங் ஜானாதி பஸ்ஸதி…பே॰… கத்த² கங்கா² பஹீயதீதி?
‘‘அனிச்சதோ
‘‘யஞ்ச யதா²பூ⁴தஞாணங் யஞ்ச ஸம்மாத³ஸ்ஸனங் யா ச கங்கா²விதரணா, இமே த⁴ம்மா நானத்தா² சேவ நானாப்³யஞ்ஜனா ச, உதா³ஹு ஏகத்தா² ப்³யஞ்ஜனமேவ நானந்தி? யஞ்ச யதா²பூ⁴தஞாணங் யஞ்ச ஸம்மாத³ஸ்ஸனங் யா ச கங்கா²விதரணா, இமே த⁴ம்மா ஏகத்தா², ப்³யஞ்ஜனமேவ நான’’ந்தி (படி॰ ம॰ 1.227).
இமினா பன ஞாணேன ஸமன்னாக³தோ விபஸ்ஸகோ பு³த்³த⁴ஸாஸனே லத்³த⁴ஸ்ஸாஸோ லத்³த⁴பதிட்டோ² நியதக³திகோ சூளஸோதாபன்னோ நாம ஹோதி.
தஸ்மா பி⁴க்கு² ஸதா³ ஸதோ, நாமரூபஸ்ஸ ஸப்³ப³ஸோ;
பச்சயே பரிக்³க³ண்ஹெய்ய, கங்கா²விதரணத்தி²கோதி.
இதி ஸாது⁴ஜனபாமோஜ்ஜத்தா²ய கதே விஸுத்³தி⁴மக்³கே³
பஞ்ஞாபா⁴வனாதி⁴காரே
கங்கா²விதரணவிஸுத்³தி⁴னித்³தே³ஸோ நாம
ஏகூனவீஸதிமோ பரிச்சே²தோ³.