4. பத²வீகஸிணனித்³தே³ஸவண்ணனா
51. பா²ஸு ஹோதீதி ஆவாஸஸப்பாயாதி³லாபே⁴ன மனஸிகாரபா²ஸுதா பா⁴வனானுகூலதா ஹோதி. பரிஸோதெ⁴ந்தேனாதி தேஸங் தேஸங் க³ண்டி²ட்டா²னானங் சி²ந்த³னவஸேன விஸோதெ⁴ந்தேன. அகிலமந்தோயேவாதி அகிலந்தகாயோ ஏவ. ஸதி ஹி காயகிலமதே² ஸியா கம்மட்டா²னமனஸிகாரஸ்ஸ அந்தராயோதி அதி⁴ப்பாயோ. க³ண்டி²ட்டா²னந்தி அத்த²தோ, அதி⁴ப்பாயதோ ச து³ப்³பி³னிவேத⁴தாய க³ண்டி²பூ⁴தங் டா²னங். சி²ந்தி³த்வாதி யாதா²வதோ அத்த²ஸ்ஸ, அதி⁴ப்பாயஸ்ஸ ச விபா⁴வனேன சி²ந்தி³த்வா, விபூ⁴தங் ஸுபாகடங் கத்வாதி அதி⁴ப்பாயோ. ஸுவிஸுத்³த⁴ந்தி ஸுட்டு² விஸுத்³த⁴ங், நிகு³ம்ப³ங் நிஜ்ஜடந்தி அத்தோ².
அனநுரூபவிஹாரவண்ணனா
52. அஞ்ஞதரேனாதி அஞ்ஞதரேனாபி, பகே³வ அனேகேஹீதி அதி⁴ப்பாயோ. மஹந்தபா⁴வோ மஹத்தங். ததா² ஸேஸேஸு. ஸொண்ட³வா ஸொண்டீ³. ததா² பண்ணந்திஆதீ³ஸு. போ³தி⁴அங்க³ணாதீ³ஸு காதப்³ப³ங் இத⁴ ‘‘வத்த’’ந்தி அதி⁴ப்பேதந்தி ஆஹ ‘‘பானீயக⁴டங் வா ரித்த’’ந்தி. நிட்டி²தாயாதி பவிட்ட²பவிட்டா²னங் தா³னேன பரிக்கீ²ணாய. ஜிண்ணவிஹாரேபி யத்ர பி⁴க்கூ² ஏவங் வத³ந்தி ‘‘ஆயஸ்மா, யதா²ஸுக²ங் ஸமணத⁴ம்மங் கரோது, மயங் படிஜக்³கி³ஸ்ஸாமா’’தி. ஏவரூபே விஹாதப்³ப³ந்தி அயம்பி நயோ லப்³ப⁴தி, வுத்தனயத்தா பன ந வுத்தோ.
மஹாபத²விஹாரேதி மஹாபத²ஸமீபே விஹாரே. பா⁴ஜனதா³ருதோ³ணிகாதீ³னீதி ரஜனபா⁴ஜனானி, ரஜனத்தா²ய தா³ரு, தா³ருமயதோ³ணிகா, ரஜனபசனட்டா²னங், தோ⁴வனப²லகந்தி ஏவமாதீ³னி. ஸாகஹாரிகாதி ஸாகஹாரினியோ இத்தி²யோ. விஸபா⁴க³ஸத்³தோ³ காமகு³ணூபஸங்ஹிதோ கீ³தஸத்³தோ³தி வத³ந்தி, கேவலோபி இத்தி²ஸத்³தோ³ விஸபா⁴க³ஸத்³தோ³ ஏவ. தத்ராதி புப்ப²வந்தே விஹாரே. தாதி³ஸோயேவாதி ‘‘தத்த²ஸ்ஸ கம்மட்டா²னங் க³ஹெத்வா’’திஆதி³னா யாதி³ஸோ பண்ணவந்தே விஹாரே உபத்³த³வோ வுத்தோ, தாதி³ஸோயேவ. ‘‘புப்ப²ஹாரிகாயோ புப்ப²ங் ஓசினந்தியோ’’தி பன வத்தப்³ப³ங். அயமித⁴ விஸேஸோ.
பத்த²னீயேதி ‘‘லேணஸம்மதே’’தி. த³க்கி²ணாகி³ரீதி மக³த⁴விஸயே த³க்கி²ணாகி³ரீதி வத³ந்தி.
விஸபா⁴கா³ரம்மணானி ‘‘க⁴டேஹி நிக⁴ங்ஸந்தியோ’’திஆதி³ வுத்தங். த³ப்³பூ³பகரணயொக்³கா³ ருக்கா² த³ப்³பூ³பகரணருக்கா².
யோ பன விஹாரோ. க²லந்தி த⁴ஞ்ஞகரணட்டா²னங். கா³வோ ருந்த⁴ந்தி ‘‘ஸஸ்ஸங் கா²தி³ங்ஸூ’’தி. உத³கவாரந்தி கேதா³ரேஸு ஸஸ்ஸானங் தா³தப்³ப³உத³கவாரங். அயம்பீதி மஹாஸங்க⁴போ⁴கோ³பி விஹாரோ. வாரியமானா கம்மட்டா²னிகேன பி⁴க்கு²னா.
ஸமுத்³த³ஸாமுத்³தி³கனதீ³னிஸ்ஸிதங் உத³கபட்டனங். மஹானக³ரானங் ஆயத்³வாரபூ⁴தங் அடவிமுகா²தி³னிஸ்ஸிதங் த²லபட்டனங். அப்பஸன்னா ஹொந்தி. தேனஸ்ஸ தத்த² பா²ஸுவிஹாரோ ந ஹோதீதி அதி⁴ப்பாயோ. மஞ்ஞமானா ராஜமனுஸ்ஸா.
ஸமோஸரணேனாதி இதோ சிதோ ஸஞ்சரணேன. பபாதேதி பபாதஸீஸே ட²த்வா கா³யி ‘‘கீ³தஸத்³தே³ன இதா⁴க³தங் பபாதே பாதெத்வா கா²தி³ஸ்ஸாமீ’’தி. வேகே³ன க³ஹெத்வாதி வேகே³னாக³ந்த்வா ‘‘குஹிங் யாஸீ’’தி க²ந்தே⁴ க³ஹெத்வா.
யத்தா²தி யஸ்மிங் விஹாரே, விஹாரஸாமந்தா வா ந ஸக்கா ஹோதி கல்யாணமித்தங் லத்³து⁴ங், தத்த² விஹாரே ஸோ அலாபோ⁴ மஹாதோ³ஸோதி யோஜனா.
பந்த²னிந்தி பந்தே² நீதோ பவத்திதோதி பந்த²னீ, மக்³க³னிஸ்ஸிதோ விஹாரோ. தங் பந்த²னிங். ஸொண்டி³ந்தி ஸொண்டி³ஸஹிதோ விஹாரோ ஸொண்டீ³, தங் ஸொண்டி³ங். ததா² பண்ணந்திஆதீ³ஸு. நக³ரனிஸ்ஸிதங் நக³ரந்தி வுத்தங் உத்தரபத³லோபேன யதா² ‘‘பீ⁴மஸேனோ பீ⁴மோ’’தி. தா³ருனாதி தா³ருனிஸ்ஸிதேன ஸஹ. விஸபா⁴கே³னாதி யோ விஸபா⁴கே³ஹி வுஸீயதி, விஸபா⁴கா³னங் வா நிவாஸோ, ஸோ விஹாரோ விஸபா⁴கோ³. தேன விஸபா⁴கே³ன ஸத்³தி⁴ங். பச்சந்தனிஸ்ஸிதஞ்ச ஸீமானிஸ்ஸிதஞ்ச அஸப்பாயஞ்ச பச்சந்தஸீமாஸப்பாயங். யத்த² மித்தோ ந லப்³ப⁴தி, தம்பீதி ஸப்³ப³த்த² டா²ன-ஸத்³தா³பெக்கா²ய நபுங்ஸகனித்³தே³ஸோ. இதி விஞ்ஞாயாதி ‘‘பா⁴வனாய அனநுரூபானீ’’தி ஏவங் விஜானித்வா.
அனுரூபவிஹாரவண்ணனா
53. அயங் அனுரூபோ நாமாதி அயங் விஹாரோ பா⁴வனாய அனுரூபோ நாம. நாதிதூ³ரந்தி கோ³சரட்டா²னதோ அட்³ட⁴கா³வுததோ ஓரபா⁴க³தாய ந நாச்சாஸன்னந்தி பச்சி²மேன பமாணேன கோ³சரட்டா²னதோ பஞ்சத⁴னுஸதிகதாய ந அதிஆஸன்னங். தாய ச பன நாதிதூ³ரனாச்சாஸன்னதாய, கோ³சரட்டா²னங் பரிஸ்ஸயாதி³ரஹிதமக்³க³தாய ச க³மனஸ்ஸ ச ஆக³மனஸ்ஸ ச யுத்தரூபத்தா க³மனாக³மனஸம்பன்னங். தி³வஸபா⁴கே³ மஹாஜனஸங்கிண்ணதாபா⁴வேன தி³வா அப்பாகிண்ணங். அபா⁴வத்தோ² ஹி அயங் அப்ப-ஸத்³தோ³ ‘‘அப்பிச்சோ²’’திஆதீ³ஸு (ம॰ நி॰ 1.336) விய. ரத்தியங் ஜனாலாபஸத்³தா³பா⁴வேன ரத்திங் அப்பஸத்³த³ங். ஸப்³ப³தா³பி ஜனஸன்னிபாதனிக்³கோ⁴ஸாபா⁴வேன அப்பனிக்³கோ⁴ஸங். அப்பகஸிரேனாதி அகஸிரேன ஸுகே²னேவ. ஸீலாதி³கு³ணானங் தி²ரபா⁴வப்பத்தியா தே²ரா. ஸுத்தகெ³ய்யாதி³ ப³ஹு ஸுதங் ஏதேஸந்தி ப³ஹுஸ்ஸுதா. வாசுக்³க³தகரணேன, ஸம்மதே³வ க³ரூனங் ஸந்திகே ஆக³மிதபா⁴வேன ச ஆக³தோ பரியத்தித⁴ம்மஸங்கா²தோ ஆக³மோ ஏதேஸந்தி ஆக³தாக³மா. ஸுத்தாபி⁴த⁴ம்மஸங்கா²தஸ்ஸ த⁴ம்மஸ்ஸ தா⁴ரணேன த⁴ம்மத⁴ரா. வினயஸ்ஸ தா⁴ரணேன வினயத⁴ரா. தேஸங்யேவ த⁴ம்மவினயானங் மாதிகாய தா⁴ரணேன மாதிகாத⁴ரா. தத்த² தத்த² த⁴ம்மபரிபுச்சா²ய பரிபுச்ச²தி. அத்த²பரிபுச்சா²ய பரிபஞ்ஹதி வீமங்ஸதி விசாரேதி. இத³ங், ப⁴ந்தே, கத²ங் இமஸ்ஸ கோ அத்தோ²தி பரிபுச்ச²னபரிபஞ்ஹாகாரத³ஸ்ஸனங். அவிவடஞ்சேவ பாளியா அத்த²ங் பதே³ஸந்தரபாளித³ஸ்ஸனேன ஆக³மதோ விவரந்தி. அனுத்தானீகதஞ்ச யுத்திவிபா⁴வனேன உத்தானீகரொந்தி. கங்க²ட்டா²னியேஸு த⁴ம்மேஸு ஸங்ஸயுப்பத்தியா ஹேதுதாய க³ண்டி²ட்டா²னபூ⁴தேஸு பாளிபதே³ஸேஸு யாதா²வதோ வினிச்ச²யதா³னேன கங்க²ங் படிவினோதெ³ந்தி. எத்த² ச ‘‘நாதிதூ³ரங், நாச்சாஸன்னங், க³மனாக³மனஸம்பன்ன’’ந்தி ஏகங் அங்க³ங், ‘‘தி³வா அப்பாகிண்ணங், ரத்திங் அப்பஸத்³த³ங் அப்பனிக்³கோ⁴ஸ’’ந்தி ஏகங், ‘‘அப்பட³ங்ஸமகஸவாதாதபஸரீஸபஸம்ப²ஸ்ஸ’’ந்தி ஏகங், ‘‘தஸ்மிங் கோ² பன ஸேனாஸனே விஹரந்தஸ்ஸ…பே॰… பரிக்கா²ரா’’தி ஏகங், ‘‘தஸ்மிங் கோ² பன ஸேனாஸனே தே²ரா…பே॰… கங்க²ங் படிவினோதெ³ந்தீ’’தி ஏகங். ஏவங் பஞ்ச அங்கா³னி வேதி³தப்³பா³னி.
கு²த்³த³கபலிபோ³த⁴வண்ணனா
54. கு²த்³த³கபலிபோ³து⁴பச்சே²தே³ பயோஜனங் பரதோ ஆக³மிஸ்ஸதி. அக்³க³ளஅனுவாதபரிப⁴ண்ட³தா³னாதி³னா த³ள்ஹீகம்மங் வா. தந்தச்சே²தா³தீ³ஸு துன்னகம்மங் வா காதப்³ப³ங்.
பா⁴வனாவிதா⁴னவண்ணனா
55. ஸப்³ப³கம்மட்டா²னவஸேனாதி பிண்ட³பாதபடிக்கந்தேனாதி பிண்ட³பாதபரிபோ⁴க³தோ படினிவத்தேன, பிண்ட³பாதபு⁴த்தாவினா ஓனீதபத்தபாணினாதி அத்தோ². ப⁴த்தஸம்மத³ங் படிவினோதெ³த்வாதி போ⁴ஜனநிமித்தங் பரிஸ்ஸமங் வினோதெ³த்வா. ஆஹாரே ஹி ஆஸயங் பவிட்ட²மத்தே தஸ்ஸ ஆக³ந்துகதாய யேபு⁴ய்யேன ஸியா ஸரீரஸ்ஸ கோசி பரிஸ்ஸமோ, தங் வூபஸமெத்வா. தஸ்மிங் ஹி அவூபஸந்தே ஸரீரகே²தே³ன சித்தங் ஏகக்³க³தங் ந லபெ⁴ய்யாதி. பவிவித்தேதி ஜனவிவித்தே. ஸுக²னிஸின்னேனாதி பல்லங்கங் ஆபு⁴ஜித்வா உஜுங் காயங் பணிதா⁴ய நிஸஜ்ஜாய ஸுக²னிஸின்னேன. வுத்தஞ்ஹேதந்தி யங் ‘‘கதாய வா’’திஆதி³னா பத²வியா நிமித்தக்³க³ஹணங் இத⁴ வுச்சதி, வுத்தங் ஹேதங் போராணட்ட²கதா²யங்.
இதா³னி தங் அட்ட²கதா²பாளிங் த³ஸ்ஸெந்தோ ‘‘பத²வீகஸிணங் உக்³க³ண்ஹந்தோ’’திஆதி³மாஹ. தத்தா²யங் ஸங்கே²பத்தோ² – பத²வீகஸிணங் உக்³க³ண்ஹந்தோதி உக்³க³ஹனிமித்தபா⁴வேன பத²வீகஸிணங் க³ண்ஹந்தோ ஆதி³யந்தோ, உக்³க³ஹனிமித்தபூ⁴தங் பத²வீகஸிணங் உப்பாதெ³ந்தோதி அத்தோ². உப்பாத³னஞ்செத்த² ததா²னிமித்தஸ்ஸ உபட்டா²பனங் த³ட்ட²ப்³ப³ங். பத²வியந்தி வக்க²மானவிஸேஸே பத²வீமண்ட³லே. நிமித்தங் க³ண்ஹாதீதி தத்த² சக்கு²னா ஆதா³ஸதலே முக²னிமித்தங் விய பா⁴வனாஞாணேன வக்க²மானவிஸேஸங் பத²வீனிமித்தங் க³ண்ஹாதி. ‘‘பத²விய’’ந்தி வத்வாபி மண்ட³லாபெக்கா²ய நபுங்ஸகனித்³தே³ஸோ. கதேதி வக்க²மானவிதி⁴னா அபி⁴ஸங்க²தேதி அத்தோ². வா-ஸத்³தோ³ அனியமத்தோ². அகதேதி பாகதிகே க²லமண்ட³லாதி³கே பத²வீமண்ட³லே. ஸாந்தகேதி ஸஅந்தகே ஏவ, ஸபரிச்சே²தே³ ஏவாதி அத்தோ². ஸாவதா⁴ரணஞ்ஹேதங் வசனங். ததா² ஹி தேன நிவத்திதங் த³ஸ்ஸேதுங் ‘‘நோ அனந்தகே’’தி வுத்தங். ஸகோடியேதிஆதீ³னிபி தஸ்ஸேவ வேவசனானி. ஸுப்பமத்தே வாதிஆதீ³ஸு ஸுப்பஸராவானி ஸமப்பமாணானி இச்சி²தானி. கேசி பன வத³ந்தி ‘‘ஸராவமத்தங் வித³த்தி²சதுரங்கு³லங் ஹோதி, ஸுப்பமத்தங் ததோ அதி⁴கப்பமாணந்தி. கித்திமங் கஸிணமண்ட³லங் ஹெட்டி²மபரிச்சே²தே³ன ஸராவமத்தங், உபரிமபரிச்சே²தே³ன ஸுப்பமத்தங், ந ததோ அதோ⁴, உத்³த⁴ங் வாதி பரித்தப்பமாணபே⁴த³ஸங்க³ண்ஹனத்த²ங் ‘ஸுப்பமத்தே வா ஸராவமத்தே வா’தி வுத்த’’ந்தி. யதா²உபட்டி²தே ஆரம்மணே ஏகங்கு³லமத்தம்பி வட்³டி⁴தங் அப்பமாணமேவாதி வுத்தோவாயமத்தோ². கேசி பன ‘‘ச²த்தமத்தம்பி கஸிணமண்ட³லங் காதப்³ப³’’ந்தி வத³ந்தி.
ஸோ தங் நிமித்தங் ஸுக்³க³ஹிதங் கரோதீதி ஸோ யோகா³வசரோ தங் பத²வீமண்ட³லங் ஸுக்³க³ஹிதங் நிமித்தங் ஸூபதா⁴ரிதங் உபதா⁴ரேதி நாம. ஏவங் உபதா⁴ரிதங் பன நங் புனப்புனங் ஆவஜ்ஜெந்தோ மனஸி கரொந்தோ தமேவாரப்³ப⁴ ஆஸேவனங் பா⁴வனங் ப³ஹுலங் பவத்தெந்தோ ஸுவவத்தி²தங் வவத்த²பேதி நாம. தஸ்மிங் ஆரம்மணேதி ஏவங் ஸுக்³க³ஹிதகரணாதி³னா ஸம்மதே³வ உபட்டி²தே தஸ்மிங் பத²வீகஸிணஸஞ்ஞிதே ஆரம்மணே. சித்தங் உபனிப³ந்த⁴தீதி அத்தனோ சித்தங் உபசாரஜ்ஜா²னங் உபனெத்வா நிப³ந்த⁴தி அஞ்ஞாரம்மணதோ வினிவத்தங் கரோதி. அத்³தா⁴ இமாயாதிஆதி³ ஆனிஸங்ஸத³ஸ்ஸாவிதாத³ஸ்ஸனங்.
இதா³னி யதா²த³ஸ்ஸிதஸ்ஸ அட்ட²கதா²பாட²ஸ்ஸ அத்த²ப்பகாஸனேன ஸத்³தி⁴ங் பா⁴வனாவிதி⁴ங் விபா⁴வேதுகாமோ அகதே தாவ நிமித்தக்³க³ஹணங் த³ஸ்ஸெந்தோ ‘‘தத்த² யேன அதீதப⁴வேபீ’’திஆதி³மாஹ. தத்த² தத்தா²தி தஸ்மிங் அட்ட²கதா²பாடே². சதுக்கபஞ்சகஜ்ஜா²னானீதி சதுக்கபஞ்சகனயவஸேன வத³தி. புஞ்ஞவதோதி பா⁴வனாமயபுஞ்ஞவதோ. உபனிஸ்ஸயஸம்பன்னஸ்ஸாதி தாதி³ஸேனேவ உபனிஸ்ஸயேன ஸமன்னாக³தஸ்ஸ. க²லமண்ட³லேதி மண்ட³லாகாரே த⁴ஞ்ஞகரணட்டா²னே. தங்டா²னப்பமாணமேவாதி ஓலோகிதட்டா²னப்பமாணமேவ.
அவிராதெ⁴த்வாதி அவிரஜ்ஜி²த்வா வுத்தவிதி⁴னா ஏவ. நீலபீதலோஹிதஓதா³தஸம்பே⁴த³வஸேனாதி நீலாதி³வண்ணாஹி மத்திகாஹி பச்சேகங், ஏகஜ்ஜ²ஞ்ச ஸங்ஸக்³க³வஸேன. க³ங்கா³வஹேதி க³ங்கா³ஸோதே. ஸீஹளதீ³பே கிர ராவணக³ங்கா³ நாம நதீ³, தஸ்ஸா ஸோதேன சி²ன்னதடட்டா²னே மத்திகா அருணவண்ணா. தங் ஸந்தா⁴ய வுத்தங் ‘‘க³ங்கா³வஹே மத்திகாஸதி³ஸாய அருணவண்ணாயா’’தி. அருணவண்ணாய அருணனிபா⁴ய, அருணப்பபா⁴வண்ணாயாதி அத்தோ².
ஏவங் கஸிணதோ³ஸே த³ஸ்ஸெத்வா இதா³னி கஸிணகரணாதி³கே ஸேஸாகாரே த³ஸ்ஸேதுங் ‘‘தஞ்ச கோ²’’திஆதி³ வுத்தங். ஸங்ஹாரிமந்தி ஸங்ஹரிதப்³ப³ங் க³ஹெத்வா சரணயொக்³க³ங். தத்ரட்ட²கந்தி யத்ர கதங், தத்தே²வ திட்ட²னகங். வுத்தப்பமாணந்தி வட்டந்தி மண்ட³லஸண்டா²னங். பரிகம்மகாலேதி நிமித்துக்³க³ஹணாய பா⁴வனாகாலே. ஏததே³வாதி யங் வித³த்தி²சதுரங்கு³லவித்தா²ரங், ஏததே³வ பமாணங் ஸந்தா⁴ய ‘‘ஸுப்பமத்தங் வா ஸராவமத்தங் வா’’தி வுத்தங். ஸுப்பங் ஹி நாதிமஹந்தங், ஸராவஞ்ச மஹந்தங் சாடிபிதா⁴னப்பஹோனகந்தி ஸமப்பமாணங் ஹோதி.
56. தஸ்மாதி ஏவங் வுத்தபமாணங் பரிச்சே²த³ந்தி யதா²வுத்தப்பமாணங் வித³த்தி²சதுரங்கு³லவித்தா²ரங் பரிச்சே²த³ங் கத்வா, ஏவங் வுத்தப்பமாணங் வா கஸிணமண்ட³லங் விஸபா⁴க³வண்ணேன பரிச்சே²த³ங் கத்வா. ருக்க²பாணிகாதி குசந்த³னாதி³ருக்க²பாணிகா அருணவண்ணஸ்ஸ விஸபா⁴க³வண்ணங் ஸமுட்ட²பேதி. தஸ்மா தங் அக்³க³ஹெத்வாதி வுத்தங். பகதிருக்க²பாணிகா பன பாஸாணபாணிகாக³திகாவ. நின்னுன்னதட்டா²னாபா⁴வேன பே⁴ரீதலஸதி³ஸங் கத்வா. ததோ தூ³ரதரேதிஆதி³ யதா²வுத்ததோ பதே³ஸதோ, பீட²தோ ச அஞ்ஞஸ்மிங் ஆதீ³னவத³ஸ்ஸனங். கஸிணதோ³ஸாதி ஹத்த²பாணிபதா³த³யோ இத⁴ கஸிணதோ³ஸா.
வுத்தனயேனேவாதி ‘‘அட்³ட⁴தெய்யஹத்த²ந்தரே பதே³ஸே, வித³த்தி²சதுரங்கு³லபாத³கே பீடே²’’தி ச வுத்தவிதி⁴னாவ. காமேஸு ஆதீ³னவந்தி ‘‘காமா நாமேதே அட்டி²கங்கலூபமா நிரஸ்ஸாத³ட்டே²ன, திணுக்கூபமா அனுத³ஹனட்டே²ன, அங்கா³ரகாஸூபமா மஹாபி⁴தாபட்டே²ன, ஸுபினகூபமா இத்தரபச்சுபட்டா²னட்டே²ன, யாசிதகூபமா தாவகாலிகட்டே²ன, ருக்க²ப²லூபமா ஸப்³ப³ங்க³பச்சங்க³பலிப⁴ஞ்ஜனட்டே²ன, அஸிஸூனூபமா அதி⁴குட்டனட்டே²ன, ஸத்திஸூலூபமா வினிவிஜ்ஜ²னட்டே²ன, ஸப்பஸிரூபமா ஸபடிப⁴யட்டே²னா’’திஆதி³னா (பாசி॰ அட்ட²॰ 417; ம॰ நி॰ அட்ட²॰ 1.234) ‘‘அப்பஸ்ஸாதா³ காமா ப³ஹுது³க்கா² ப³ஹுபாயாஸா’’திஆதி³னா (பாசி॰ 417; ம॰ நி॰ 1.234; 2.42) ‘‘காமஸுக²ஞ்ச நாமேதங் ப³ஹுபரிஸ்ஸயங், ஸாஸங்கங், ஸப⁴யங், ஸங்கிலிட்ட²ங், மீள்ஹபரிபோ⁴க³ஸதி³ஸங், ஹீனங், க³ம்மங், போது²ஜ்ஜனிகங், அனரியங், அனத்த²ஸங்ஹித’’ந்திஆதி³னா ச அனேகாகாரவோகாரங் வத்து²காமகிலேஸகாமேஸு ஆதீ³னவங் தோ³ஸங் பச்சவெக்கி²த்வா. காமனிஸ்ஸரணேதி காமானங் நிஸ்ஸரணபூ⁴தே, தேஹி வா நிஸ்ஸடே. அக்³க³மக்³க³ஸ்ஸ பாத³கபா⁴வேன ஸப்³ப³து³க்க²ஸமதிக்கமஸ்ஸ உபாயபூ⁴தே. நெக்க²ம்மேதி ஜா²னே. ஜாதாபி⁴லாஸேன ஸஞ்ஜாதச்ச²ந்தே³ன. ‘‘ஸம்மாஸம்பு³த்³தோ⁴ வத ப⁴க³வா அவிபரீதத⁴ம்மதே³ஸனத்தா, ஸ்வாக்கா²தோ பு³த்³த⁴த⁴ம்மஸங்க⁴கு³ணானுஸ்ஸரணேன ரதனத்தயவிஸயங் பீதிபாமோஜ்ஜங் ஜனயித்வா. நெக்க²ம்மங் படிபஜ்ஜதி ஏதாயாதி நெக்க²ம்மபடிபதா³, ஸஉபசாரஸ்ஸ ஜா²னஸ்ஸ, விபஸ்ஸனாய, மக்³க³ஸ்ஸ, நிப்³பா³னஸ்ஸ ச அதி⁴க³மகாரணந்தி அத்தோ². புப்³பே³ பன பட²மஜ்ஜா²னமேவ நெக்க²ம்மந்தி வுத்தத்தா வுத்தாவஸேஸா ஸப்³பே³பி நெக்க²ம்மத⁴ம்மா. யதா²ஹ –
‘‘பப்³ப³ஜ்ஜா பட²மங் ஜா²னங், நிப்³பா³னங் ச விபஸ்ஸனா;
ஸப்³பே³பி குஸலா த⁴ம்மா, ‘நெக்க²ம்ம’ந்தி பவுச்சரே’’தி. (இதிவு॰ அட்ட²॰ 109);
பவிவேகஸுக²ரஸஸ்ஸாதி ஸமேன ஆகாரேனாதி அதிஉம்மீலனஅதிமந்தா³லோசனானி வஜ்ஜெத்வா நாதிஉம்மீலனநாதிமந்தா³லோசனஸங்கா²தேன ஸமேன ஆலோசனாகாரேன. நிமித்தங் க³ண்ஹந்தேனாதி பத²வீகஸிணே சக்கு²னா க³ஹிதனிமித்தங் மனஸா க³ண்ஹந்தேன. பா⁴வேதப்³ப³ந்தி ததா²பவத்தங் நிமித்தக்³க³ஹணங் வட்³டே⁴தப்³ப³ங் ஆஸேவிதப்³ப³ங் ப³ஹுலீகாதப்³ப³ங்.
சக்கு² கிலமதி அதிஸுகு²மங், அதிபா⁴ஸுரஞ்ச ரூபக³தங் உபனிஜ்ஜா²யதோ விய. அதிவிபூ⁴தங் ஹோதி அத்தனோ ஸபா⁴வாவிபா⁴வதோ. ததா² ச வண்ணதோ வா லக்க²ணதோ வா உபதிட்டெ²ய்ய. தேன வுத்தங் ‘‘தேனஸ்ஸ நிமித்தங் நுப்பஜ்ஜதீ’’தி. அவிபூ⁴தங் ஹோதி க³ஜனிம்மீலனேன பெக்க²ந்தஸ்ஸ ரூபக³தங் விய. சித்தஞ்ச லீனங் ஹோதி த³ஸ்ஸனே மந்த³ப்³யாபாரதாய கோஸஜ்ஜபாததோ. தேனாஹ ‘‘ஏவம்பி நிமித்தங் நுப்பஜ்ஜதீ’’தி. ஆதா³ஸதலே முக²னிமித்தத³ஸ்ஸினா வியாதி யதா² ஆதா³ஸதலே முக²னிமித்தத³ஸ்ஸீ புரிஸோ ந தத்த² அதிகா³ள்ஹங் உம்மீலதி, நாபி அதிமந்த³ங், ந ஆதா³ஸதலஸ்ஸ வண்ணங் பச்சவெக்க²தி, நாபி லக்க²ணங் மனஸி கரோதி. அத² கோ² ஸமேன ஆகாரேன ஓலோகெந்தோ அத்தனோ முக²னிமித்தமேவ பஸ்ஸதி, ஏவமேவ அயம்பி பத²வீகஸிணங் ஸமேன ஆகாரேன ஓலோகெந்தோ நிமித்தக்³க³ஹணப்பஸுதோயேவ ஹோதி, தேன வுத்தங் ‘‘ஸமேன ஆகாரேனா’’திஆதி³. ந வண்ணோ பச்சவெக்கி²தப்³போ³தி யோ தத்த² பத²வீகஸிணே அருணவண்ணோ, ஸோ ந சிந்தேதப்³போ³. சக்கு²விஞ்ஞாணேன பன க³ஹணங் ந ஸக்கா நிவாரேதுங். தேனேவெத்த² ‘‘ந ஓலோகேதப்³போ³’’தி ந லக்க²ணங் மனஸி காதப்³ப³ந்தி யங் தத்த² பத²வீதா⁴துயா த²த்³த⁴லக்க²ணங், தங் ந மனஸி காதப்³ப³ங்.
தி³ஸ்வா க³ஹேதப்³ப³த்தா ‘‘வண்ணங் அமுஞ்சித்வா’’தி வத்வாபி வண்ணவஸேனெத்த² ஆபோ⁴கோ³ ந காதப்³போ³, ஸோ பன வண்ணோ நிஸ்ஸயக³திகோ காதப்³போ³தி த³ஸ்ஸெந்தோ ஆஹ ‘‘நிஸ்ஸயஸவண்ணங் கத்வா’’தி. நிஸ்ஸயேன ஸமானாகாரஸன்னிஸ்ஸிதோ ஸோ வண்ணோ தாய பத²வியா ஸமானக³திகங் கத்வா, வண்ணேன ஸஹேவ ‘‘பத²வீ’’தி மனஸி காதப்³ப³ந்தி அத்தோ². உஸ்ஸத³வஸேன பண்ணத்தித⁴ம்மேதி பத²வீதா⁴துயா உஸ்ஸன்னபா⁴வேன ஸத்திதோ அதி⁴கபா⁴வேன ஸஸம்பா⁴ரபத²வியங் ‘‘பத²வீ’’தி யோ லோகவோஹாரோ, தஸ்மிங் பண்ணத்தித⁴ம்மே சித்தங் பட்ட²பெத்வா ‘‘பத²வீ, பத²வீ’’தி மனஸி காதப்³ப³ங். யதி³ லோகவோஹாரேன பண்ணத்திமத்தே சித்தங் ட²பேதப்³ப³ங், நாமந்தரவஸேனபி பத²வீ மனஸி காதப்³பா³ ப⁴வெய்யாதி, ஹோது, கோ தோ³ஸோதி த³ஸ்ஸெந்தோ ‘‘மஹீ மேதி³னீ’’திஆதி³மாஹ. தத்த² யமிச்ச²தீதி யங் நாமங் வத்துங் இச்ச²தி, தங் வத்தப்³ப³ங். தஞ்ச கோ² யத³ஸ்ஸ ஸஞ்ஞானுகூலங் ஹோதி யங் நாமங் அஸ்ஸ யோகி³னோ புப்³பே³ தத்த² க³ஹிதஸஞ்ஞாவஸேன அனுகூலங் பசுரதாய, பகு³ணதாய வா ஆக³ச்ச²தி, தங் வத்தப்³ப³ங். வத்தப்³ப³ந்தி ச பட²மஸமன்னாஹாரே கஸ்ஸசி வசீபே⁴தோ³பி ஹோதீதி கத்வா வுத்தங், ஆசரியேன வா வத்தப்³ப³தங் ஸந்தா⁴ய. கிங் வா ப³ஹுனா, பாகடபா⁴வோயேவெத்த² பமாணந்தி த³ஸ்ஸேதுங் ‘‘அபிசா’’திஆதி³ வுத்தங். காலேன உம்மீலெத்வா காலேன நிம்மீலெத்வாதி கிஞ்சி காலங் சக்கு²ங் உம்மீலெத்வா நிமித்தக்³க³ஹணவஸேன பத²வீமண்ட³லங் ஓலோகெத்வா புன கிஞ்சி காலங் சக்கு²ங் நிம்மீலெத்வா ஆவஜ்ஜிதப்³ப³ங். யேனாகாரேன ஓலோகெத்வா க³ஹிதங், தேனாகாரேன புன தங் ஸமன்னாஹரிதப்³ப³ங்.
57. ஆபாத²மாக³ச்ச²தீதி மனொத்³வாரிகஜவனானங் கோ³சரபா⁴வங் உபக³ச்ச²தி. தஸ்ஸ உக்³க³ஹனிமித்தஸ்ஸ. ந தஸ்மிங் டா²னே நிஸீதி³தப்³ப³ங். கஸ்மா? யதி³ உக்³க³ஹனிமித்தே ஜாதேபி பத²வீமண்ட³லங் ஓலோகெத்வா பா⁴வேதி, படிபா⁴க³னிமித்துப்பத்தி ந ஸியா. ஸமீபட்டே²ன ச ந ஓலோகேதுங் ந ஸக்கா. தேன வுத்தங் ‘‘அத்தனோ வஸனட்டா²னங் பவிஸித்வா’’திஆதி³. நிஸ்ஸத்³த³பா⁴வாய ஏகபடலிகூபாஹனாக³ஹணங், பரிஸ்ஸயவினோத³னத்த²ங் கத்தரத³ண்ட³க்³க³ஹணங். ஸசே நஸ்ஸதி, அதா²னேன பா⁴வேதப்³ப³ந்தி ஸம்ப³ந்தோ⁴. வக்க²மானேஸு அஸப்பாயேஸு கேனசிதே³வ அஸப்பாயேன காரணபூ⁴தேன. நிமித்தங் ஆதா³யாதி யதா²ஜாதங் உக்³க³ஹனிமித்தங் க³ஹெத்வா. ஸமன்னாஹரிதப்³ப³ந்தி ஆவஜ்ஜிதப்³ப³ங் நிமித்தந்தி அதி⁴ப்பாயோ, ஸம்மா வா அனு தக்காஹதங் விதக்காஹதந்தி தக்கனதோ, ஸவிஸேஸங் தக்கனதோ ச ‘‘தக்கோ, விதக்கோ’’தி ச ஏவங் லத்³த⁴னாமேன பா⁴வனாசித்தஸம்பயுத்தேன ஸம்மாஸங்கப்பேன ஆஹனநபரியாஹனநகிச்சேன அபராபரங் வத்தமானேன கம்மட்டா²னங் ஆஹதங், பரியாஹதஞ்ச காதப்³ப³ங், ப³லப்பத்தவிதக்கோ மனஸிகாரோ ப³ஹுலங் பவத்தேதப்³போ³தி அத்தோ². ஏவங் கரொந்தஸ்ஸாதி ஏவங் கம்மட்டா²னங் தக்காஹதங் விதக்காஹதங் கரொந்தஸ்ஸ. யதா² பா⁴வனா புப்³பே³னாபரங் விஸேஸங் ஆவஹதி, ஏவங் அனுயுஞ்ஜந்தஸ்ஸ. அனுக்கமேனாதி பா⁴வனானுக்கமேன. யதா³ ஸத்³தா⁴தீ³னி இந்த்³ரியானி ஸுவிஸதா³னி திக்கா²னி பவத்தந்தி, ததா³ அஸ்ஸத்³தி⁴யாதீ³னங் தூ³ரீபா⁴வேன ஸாதிஸயதா²மப்பத்தேஹி ஸத்தஹி ப³லேஹி லத்³தூ⁴பத்த²ம்பா⁴னி விதக்காதீ³னி காமாவசரானேவ ஜா²னங்கா³னி ப³ஹூனி ஹுத்வா பாதுப⁴வந்தி. ததோ ஏவ தேஸங் உஜுவிபச்சனீகபூ⁴தா காமச்ச²ந்தா³த³யோ ஸத்³தி⁴ங் ததே³கட்டே²ஹி பாபத⁴ம்மேஹி விதூ³ரீ ப⁴வந்தி, படிபா⁴க³னிமித்துப்பத்தியா ஸத்³தி⁴ங் தங் ஆரப்³ப⁴ உபசாரஜ்ஜா²னங் உப்பஜ்ஜதி. தேன வுத்தங் ‘‘நீவரணானி விக்க²ம்ப⁴ந்தீ’’திஆதி³. தத்த² ஸன்னிஸீத³ந்தீதி ஸம்மதே³வ ஸீத³ந்தி, உபஸமந்தீதி அத்தோ².
இமஸ்ஸாதி படிபா⁴க³னிமித்தஸ்ஸ. அங்கு³லிபத³பாணிபதா³தி³கோ கஸிணதோ³ஸோ. ஆதா³ஸமண்ட³லூபமாதீ³ஹி தஞ்ச கோ² படிபா⁴க³னிமித்தங் நேவ வண்ணவந்தங் ந ஸண்டா²னவந்தங் அபரமத்த²ஸபா⁴வத்தா. ஈதி³ஸந்தி வண்ணஸண்டா²னவந்தங். திலக்க²ணப்³பா⁴ஹதந்தி உப்பாதா³தி³லக்க²ணத்தயானுபவிட்ட²ங், அனிச்சதாதி³லக்க²ணத்தயங்கிதங் வா. யதி³ ந பனேதங் தாதி³ஸங் வண்ணாதி³வந்தங், கத²ங் ஜா²னஸ்ஸ ஆரம்மணபா⁴வோதி ஆஹ ‘‘கேவலஞ்ஹீ’’திஆதி³. ஸஞ்ஞஜந்தி பா⁴வனாஸஞ்ஞாஜனிதங், பா⁴வனாஸஞ்ஞாய ஸஞ்ஜாதமத்தங். ந ஹி அஸபா⁴வஸ்ஸ குதோசி ஸமுட்டா²னங் அத்தி². தேனாஹ ‘‘உபட்டா²னாகாரமத்த’’ந்தி.
58. விக்க²ம்பி⁴தானேவ ஸன்னிஸின்னாவ, ந பன தத³த்த²ங் உஸ்ஸாஹோ காதப்³போ³தி அதி⁴ப்பாயோ. ‘‘உபசாரஸமாதி⁴னா’’தி வுத்தே இதரோபி ஸமாதி⁴ அத்தீ²தி அத்த²தோ ஆபன்னந்தி தம்பி த³ஸ்ஸேதுங் ‘‘து³விதோ⁴ ஹி ஸமாதீ⁴’’திஆதி³ ஆரத்³த⁴ங். த்³வீஹாகாரேஹீதி ஜா²னத⁴ம்மானங் படிபக்க²தூ³ரீபா⁴வோ, தி²ரபா⁴வப்பத்தி சாதி இமேஹி த்³வீஹி காரணேஹி. இதா³னி தானி காரணானி அவத்தா²முகே²ன த³ஸ்ஸேதுங் ‘‘உபசாரபூ⁴மியங் வா’’திஆதி³ வுத்தங். உபசாரபூ⁴மியந்தி உபசாராவத்தா²யங். யதி³பி ததா³ ஜா²னங்கா³னி படுதரானி மஹக்³க³தபா⁴வப்பத்தானி ந உப்பஜ்ஜந்தி, தேஸங் ‘‘நீவரணப்பஹானேன சித்தங் ஸமாஹிதங் ஹோதீ’’தி. படிலாப⁴பூ⁴மியந்தி ஜா²னஸ்ஸ அதி⁴க³மாவத்தா²யங். ததா³ ஹி அப்பனாபத்தானங் ஜா²னத⁴ம்மானங் உப்பத்தியா சித்தங் ஸமாதி⁴யதி. தேனாஹ ‘‘அங்க³பாதுபா⁴வேனா’’தி. சித்தங் ஸமாஹிதங் ஹோதீதி ஸம்ப³ந்தோ⁴.
ந தா²மஜாதானீதி ந ஜாததா²மானி, ந பா⁴வனாப³லங் பத்தானீதி அத்தோ². சித்தந்தி ஜா²னசித்தங். கேவலம்பி ரத்திங் கேவலம்பி தி³வஸங் திட்ட²தீதி ஸமாபத்திவேலங் ஸந்தா⁴யாஹ. உபசாரபூ⁴மியங் நிமித்தவட்³ட⁴னங் யுத்தந்தி கத்வா வுத்தங் ‘‘நிமித்தங் வட்³டெ⁴த்வா’’தி. லத்³த⁴பரிஹானீதி லத்³த⁴உபசாரஜ்ஜா²னபரிஹானி. நிமித்தே அவினஸ்ஸந்தே ததா³ரம்மணஜா²னம்பி அபரிஹீனமேவ ஹோதி, நிமித்தே பன ஆரக்கா²பா⁴வேன வினட்டே² லத்³த⁴ங் லத்³த⁴ங் ஜா²னம்பி வினஸ்ஸதி ததா³யத்தவுத்திதோ. தேனாஹ ‘‘ஆரக்க²ம்ஹீ’’திஆதி³.
ஸத்தஸப்பாயவண்ணனா
59. ‘‘தா²வரஞ்ச ஹோதீ’’தி வத்வா யதா² தா²வரங் ஹோதி, தங் த³ஸ்ஸேதுங் ‘‘ஸதி உபட்டா²தி, சித்தங் ஸமாதி⁴யதீ’’தி வுத்தங். யதா²லத்³த⁴ஞ்ஹி நிமித்தங் தத்த² ஸதிங் ஸூபட்டி²தங் கத்வா ஏகக்³க³தங் விந்த³ந்தஸ்ஸ ஸதி-க்³க³ஹணேன செத்த² ஸம்பஜஞ்ஞங், ஸமாதி⁴க்³க³ஹணேன வீரியஞ்ச ஸங்க³ஹிதங் ஹோதி நானந்தரியபா⁴வதோ. தத்தா²தி தேஸு ஆவாஸேஸு. தீணி தீணீதி ஏகேகஸ்மிங் ஆவாஸே அவுத்த²அவுத்த²ட்டா²னே வஸனநியாமேன தயோ தயோ தி³வஸே வஸித்வா.
உத்தரேன வா த³க்கி²ணேன வாதி வுத்தங் க³மனாக³மனே ஸூரியாபி⁴முக²பா⁴வனிவாரணத்த²ந்தி. ஸஹஸ்ஸத⁴னுப்பமாணங் தி³யட்³ட⁴கோஸங்.
த்³வத்திங்ஸ திரச்சா²னகதா²தி ராஜகதா²தி³கே (தீ³॰ நி॰ 1.17; ம॰ நி॰ 2.223; ஸங்॰ நி॰ 5.1080; அ॰ நி॰ 10.69; பாசி॰ 508) ஸந்தா⁴யாஹ. தா ஹி பாளியங் ஸரூபதோ அனாக³தாபி அரஞ்ஞபப்³ப³தனதீ³தீ³பகதா² இதி-ஸத்³தே³ன ஸங்க³ஹெத்வா ஸக்³க³மொக்கா²னங் திரச்சா²னபா⁴வதோ ‘‘த்³வத்திங்ஸ திரச்சா²னகதா²’’தி வுத்தா. த³ஸகதா²வத்து²னிஸ்ஸிதந்தி ‘‘அப்பிச்ச²தா, ஸந்துட்டி², பவிவேகோ, அஸங்ஸக்³கோ³, வீரியாரம்போ⁴, ஸீல, ஸமாதி⁴, பஞ்ஞா, விமுத்தி, விமுத்திஞாணத³ஸ்ஸன’’ந்தி இமானி அப்பிச்ச²கதா²தீ³னங் வத்தூ²னி, தன்னிஸ்ஸிதங் ப⁴ஸ்ஸங் ஸப்பாயங்.
அதிரச்சா²னகதி²கோதி ஸீலாதி³கு³ணஸம்பன்னோதி ஸீலஸமாதி⁴ஆதி³கு³ணஸம்பன்னோ. யோ ஹி ஸமாதி⁴கம்மட்டா²னிகோ, ஸமாதி⁴கம்மட்டா²னஸ்ஸ வா பாரங் பத்தோ, ஸோ இமஸ்ஸ யோகி³னோ ஸப்பாயோ. தேனாஹ ‘‘யங் நிஸ்ஸாயா’’திஆதி³. காயத³ள்ஹீப³ஹுலோதி காயஸ்ஸ ஸந்தப்பனபோஸனப்பஸுதோ. யங் ஸந்தா⁴ய வுத்தங் ‘‘யாவத³த்த²ங் உத³ராவதே³ஹகங் பு⁴ஞ்ஜித்வா ஸெய்யஸுக²ங் பஸ்ஸஸுக²ங் மித்³த⁴ஸுக²ங் அனுயுத்தோ விஹரதீ’’தி (தீ³॰ நி॰ 3.320; ம॰ நி॰ 1.186; அ॰ நி॰ 5.206).
போ⁴ஜனங் யேபு⁴ய்யேன மது⁴ரம்பி³லரஸவஸேன ஸத்தானங் உபயோக³ங் க³ச்ச²தி த³தி⁴ஆதீ³ஸு ததா² த³ஸ்ஸனதோ. கடுகாதி³ரஸா பன கேவலங் அபி⁴ஸங்கா²ரகா ஏவாதி ஆஹ ‘‘கஸ்ஸசி மது⁴ரங், கஸ்ஸசி அம்பி³லங் ஸப்பாயங் ஹோதீ’’தி.
யஸ்மிங் இரியாபதே² ஆதா⁴ரபூ⁴தே, வத்தமானே வா, யஸ்மிங் வா இரியாபதே² பவத்தமானஸ்ஸ. நிமித்தாஸேவனப³ஹுலஸ்ஸாதி நிமித்தே ஆஸேவனாப³ஹுலஸ்ஸ படிபா⁴க³னிமித்தே விஸயபூ⁴தே பா⁴வனாமனஸிகாரங்
த³ஸவித⁴அப்பனாகோஸல்லவண்ணனா
60. ந ஹோதி அப்பனா. யேன விதி⁴னா அப்பனாயங் குஸலோ ஹோதி, ஸோ த³ஸவிதோ⁴ விதி⁴ அப்பனாகோஸல்லங், தன்னிப்³ப³த்தங் வா ஞாணங். வத்து²விஸத³கிரியதோதி வத்தூ²னங் விஸத³பா⁴வகரணதோ அப்பனாகோஸல்லங் இச்சி²தப்³ப³ந்தி ஸம்ப³ந்தோ⁴. ஏவங் ஸேஸேஸுபி.
61. சித்தசேதஸிகானங் ஹி பவத்திட்டா²னபா⁴வதோ ஸரீரங், தப்படிப³த்³தா⁴னி சீவராதீ³னி ச இத⁴ ‘‘வத்தூ²னீ’’தி அதி⁴ப்பேதானி. தானி யதா² சித்தஸ்ஸ ஸுகா²வஹானி ஹொந்தி, ததா² கரணங் தேஸங் விஸத³பா⁴வகரணங். தேன வுத்தங் ‘‘அஜ்ஜ²த்திகபா³ஹிரான’’ந்திஆதி³. ஸரீரங் வாதி வா-ஸத்³தோ³ அட்டா²னப்பயுத்தோ, ஸரீரங் ஸேத³மலக்³க³ஹிதங் வா அஞ்ஞேன வா அவஸ்ஸுதகிச்சேன விபா³தி⁴தந்தி அதி⁴ப்பாயோ. ஸேனாஸனங் வாதி வா-ஸத்³தே³ன பத்தாதீ³னம்பி ஸங்க³ஹோ த³ட்ட²ப்³போ³. நனு சாயங் நயோ அவிஸதே³ ஸதி, விஸயபூ⁴தே வா. கத²ங் பா⁴வனமனுயுஞ்ஜந்தஸ்ஸ தானி விஸயோ? அந்தரந்தரா பவத்தனகசித்துப்பாத³வஸேனேவங் வுத்தங். தே ஹி சித்துப்பாதா³ சித்தேகக்³க³தாய அபரிஸுத்³த⁴பா⁴வாய ஸங்வத்தந்தி. சித்தசேதஸிகேஸு நிஸ்ஸயாதி³பச்சயபூ⁴தேஸு. ஞாணம்பீதி பி-ஸத்³தோ³ ஸம்பிண்ட³னே. தேன ‘‘ந கேவலங் தங் வத்து²யேவ, அத² கோ² தஸ்மிங் அபரிஸுத்³தே⁴ ஞாணம்பி அபரிஸுத்³த⁴ங் ஹோதீ’’தி த³ஸ்ஸிதங். தங்ஸம்பயுத்தானங் பன அபரிஸுத்³த⁴தா அவுத்தஸித்³தா⁴, ஞாணஸ்ஸ ச விஸுங் க³ஹணங் அப்பனாய ப³ஹுகாரத்தா. ததா² ஹி ஜா²னங் ‘‘த³ந்தா⁴பி⁴ஞ்ஞங், கி²ப்பாபி⁴ஞ்ஞ’’ந்தி ஞாணமுகே²ன நித்³தி³ட்ட²ங். நிஸ்ஸயனிஸ்ஸயோபி நிஸ்ஸயொத்வேவ வுச்சதீதி ஆஹ ‘‘தீ³பகபல்லிகவட்டிதேலானி நிஸ்ஸாயா’’தி. ஞாணே அவிஸதே³ விபஸ்ஸனாபா⁴வனா விய ஸமாதி⁴பா⁴வனாபி பரிது³ப்³ப³லா ஹோதீதி த³ஸ்ஸேதுங் ‘‘அபரிஸுத்³தே⁴ன ஞாணேனா’’திஆதி³ வுத்தங். தத்த² கம்மட்டா²னந்தி ஸமத²கம்மட்டா²னங் ஆஹ. வுட்³டி⁴ங் அங்க³பாதுபா⁴வேன, விரூள்ஹிங் கு³ணபா⁴வேன, வேபுல்லங் ஸப்³ப³ஸோ வஸிபா⁴வப்பத்தியா வேதி³தப்³ப³ங். விஸதே³ பனாதி ஸுக்கபக்கோ², தஸ்ஸ வுத்தவிபரியாயேன அத்தோ² வேதி³தப்³போ³.
62. ஸமபா⁴வகரணந்தி ஸத்³தி⁴ந்த்³ரியங் ப³லவங் ஹோதி. தேனாஹ ‘‘இதரானி மந்தா³னீ’’தி. ததோதி தஸ்மா ஸத்³தி⁴ந்த்³ரியஸ்ஸ ப³லவபா⁴வதோ, இதரேஸஞ்ச மந்த³த்தா. கோஸஜ்ஜபக்கே² பதிதுங் அத³த்வா ஸம்பயுத்தத⁴ம்மானங் பக்³க³ண்ஹனங் அனுப³லப்பதா³னங் பக்³க³ஹோ, பக்³க³ஹோவ கிச்சங், பக்³க³ஹகிச்சங் காதுங் ந ஸக்கோதீதி ஸம்ப³ந்தி⁴தப்³ப³ங். ஆரம்மணங் உபக³ந்த்வா டா²னங், அனிஸ்ஸஜ்ஜனங் வா உபட்டா²னங், விக்கே²பபடிபக்கோ². யேன வா ஸம்பயுத்தா அவிக்கி²த்தா ஹொந்தி, ஸோ அவிக்கே²போ. ரூபக³தங் விய சக்கு²னா யேன யாதா²வதோ விஸயஸபா⁴வங் பஸ்ஸதி, தங் த³ஸ்ஸனகிச்சங் காதுங் ந ஸக்கோதி ப³லவதா ஸத்³தி⁴ந்த்³ரியேன அபி⁴பூ⁴தத்தா. ஸஹஜாதத⁴ம்மேஸு ஹி இந்த³ட்ட²ங் காரெந்தானங் ஸஹபவத்தமானானங் த⁴ம்மானங் ஏகரஸதாவஸேனேவ அத்த²ஸித்³தி⁴, ந அஞ்ஞதா². தஸ்மாதி வுத்தமேவத்த²ங் காரணபா⁴வேன பச்சாமஸதி தந்தி ஸத்³தி⁴ந்த்³ரியங். த⁴ம்மஸபா⁴வபச்சவெக்க²ணேனாதி யஸ்ஸ ஸத்³தெ⁴ய்யவத்து²னோ உளாரதாதி³கு³ணே அதி⁴முச்சனஸ்ஸ ஸாதிஸயப்பவத்தியா ஸத்³தி⁴ந்த்³ரியங் ப³லவங் ஜாதங், தஸ்ஸ பச்சயபச்சயுப்பன்னாதி³விபா⁴க³தோ யாதா²வதோ வீமங்ஸனேன. ஏவஞ்ஹி ஏவங்த⁴ம்மதானயேன ஸபா⁴வரஸதோ பரிக்³க³ய்ஹமானே ஸவிப்பா²ரோ அதி⁴மொக்கோ² ந ஹோதி, ‘‘அயங் இமேஸங் த⁴ம்மானங் ஸபா⁴வோ’’தி பரிஜானநவஸேன பஞ்ஞாப்³யாபாரஸ்ஸ ஸாதிஸயத்தா. து⁴ரியத⁴ம்மேஸு ஹி யதா² ஸத்³தா⁴ய ப³லவபா⁴வே பஞ்ஞாய மந்த³பா⁴வோ ஹோதி, ஏவங் பஞ்ஞாய ப³லவபா⁴வே ஸத்³தா⁴ய மந்த³பா⁴வோ ஹோதீதி. தேன வுத்தங் ‘‘தங் த⁴ம்மஸபா⁴வபச்சவெக்க²ணேன ஹாபேதப்³ப³’’ந்தி.
ததா² அமனஸிகாரேனாதி யேனாகாரேன பா⁴வனமனுயுஞ்ஜந்தஸ்ஸ ஸத்³தி⁴ந்த்³ரியங் ப³லவங் ஹோதி, தேனாகாரேன பா⁴வனாய அனநுயுஞ்ஜனதோதி வுத்தங் ஹோதி. இத⁴ து³விதே⁴ன ஸத்³தி⁴ந்த்³ரியஸ்ஸ ப³லவபா⁴வோ, அத்தனோ வா பச்சயவிஸேஸதோ கிச்சுத்தரியேன, வீரியாதீ³னங் வா மந்த³கிச்சதாய. தத்த² பட²மவிகப்பே ஹாபனவிதி⁴ த³ஸ்ஸிதோ, து³தியவிகப்பே பன யதா² மனஸி கரோதோ வீரியாதீ³னங் மந்த³கிச்சதாய ஸத்³தி⁴ந்த்³ரியங் ப³லவங் ஜாதங், ததா² அமனஸிகாரேன வீரியாதீ³னங் படுகிச்சபா⁴வாவஹேன மனஸிகாரேன ஸத்³தி⁴ந்த்³ரியங் தேஹி ஸமரஸங் கரொந்தேன ஹாபேதப்³ப³ங். இமினா நயேன ஸேஸிந்த்³ரியேஸுபி ஹாபனவிதி⁴ வேதி³தப்³போ³.
வக்கலித்தே²ரவத்தூ²தி ஸோ ஹி ஆயஸ்மா ஸத்³தா⁴தி⁴முத்ததாய கதாதி⁴காரோ ஸத்து² ரூபகாயத³ஸ்ஸனப்பஸுதோ ஏவ ஹுத்வா விஹரந்தோ ஸத்தா²ரா ‘‘கிங் தே, வக்கலி, இமினா பூதிகாயேன தி³ட்டே²ன? யோ கோ², வக்கலி, த⁴ம்மங் பஸ்ஸதி, ஸோ மங் பஸ்ஸதீ’’திஆதி³னா (ஸங்॰ நி॰ 3.87) ஓவதி³த்வா
‘‘பாமோஜ்ஜப³ஹுலோ பி⁴க்கு², பஸன்னோ பு³த்³த⁴ஸாஸனே;
அதி⁴க³ச்சே² பத³ங் ஸந்தங், ஸங்கா²ரூபஸமங் ஸுக²’’ந்தி. (த⁴॰ ப॰ 381) –
கா³த²ங் வத்வா ‘‘ஏஹி வக்கலீ’’தி ஆஹ. ஸோ தேன அமதேனேவ அபி⁴ஸித்தோ ஹட்ட²துட்டோ² ஹுத்வா விபஸ்ஸனங் பட்ட²பேஸி. ஸத்³தா⁴ய பன ப³லவபா⁴வதோ ‘‘வக்கலித்தே²ரவத்து² செத்த² நித³ஸ்ஸன’’ந்தி.
இதரகிச்சபே⁴த³ந்தி உபட்டா²னாதி³கிச்சவிஸேஸங். பஸ்ஸத்³தா⁴தீ³தி ஆதி³-ஸத்³தே³ன ஸமாதி⁴உபெக்கா²ஸம்பொ³ஜ்ஜ²ங்கா³னங் ஸங்க³ஹோ த³ட்ட²ப்³போ³. ஹாபேதப்³ப³ந்தி யதா² ஸத்³தி⁴ந்த்³ரியஸ்ஸ ப³லவபா⁴வோ த⁴ம்மஸபா⁴வபச்சவெக்க²ணேன ஹாயதி, ஏவங் வீரியிந்த்³ரியஸ்ஸ அதி⁴மத்ததா பஸ்ஸத்³தி⁴ஆதி³பா⁴வனாய ஹாயதி, ஸமாதி⁴பக்கி²யத்தா தஸ்ஸா. ததா² ஹி ஸா ஸமாதி⁴ந்த்³ரியஸ்ஸ அதி⁴மத்ததங் கோஸஜ்ஜபாததோ ரக்க²ந்தீ வீரியாதி³பா⁴வனா விய வீரியிந்த்³ரியஸ்ஸ அதி⁴மத்ததங் உத்³த⁴ச்சபாததோ ரக்க²ந்தீ ஏகங்ஸதோ ஹாபேதி. தேன வுத்தங் ‘‘பஸ்ஸத்³தா⁴தி³பா⁴வனாய ஹாபேதப்³ப³’’ந்தி.
ஸோணத்தே²ரஸ்ஸ வத்தூ²தி (மஹாவ॰ 243) ஸுகுமாரஸ்ஸ ஸோணத்தே²ரஸ்ஸ வத்து². ஸோ ஹி ஆயஸ்மா ஸத்து² ஸந்திகே கம்மட்டா²னங் க³ஹெத்வா ஸீதவனே விஹரந்தோ ‘‘மம ஸரீரங் ஸுகு²மாலங், ந ச ஸக்கா ஸுகே²னேவ ஸுக²ங் அதி⁴க³ந்துங், காயங் கிலமெத்வாபி ஸமணத⁴ம்மோ காதப்³போ³’’தி டா²னசங்கமமேவ அதி⁴ட்டா²ய பதா⁴னமனுயுஞ்ஜந்தோ பாத³தலேஸு போ²டேஸு உட்டி²தேஸுபி வேத³னங் அஜ்ஜு²பெக்கி²த்வா த³ள்ஹங் வீரியங் கரொந்தோ அச்சாரத்³த⁴வீரியதாய விஸேஸங் நிப்³ப³த்தேதுங் நாஸக்கி². ஸத்தா² தத்த² க³ந்த்வா வீணோவாதே³ன ஓவதி³த்வா வீரியஸமதாயோஜனவிதி⁴ங் த³ஸ்ஸெந்தோ கம்மட்டா²னங் ஸோதெ⁴த்வா கி³ஜ்ஜ²கூடங் க³தோ. தே²ரோபி ஸத்தா²ரா தி³ன்னநயேன வீரியஸமதங் யோஜெந்தோ விபஸ்ஸனங் உஸ்ஸுக்காபெத்வா அரஹத்தே பதிட்டா²ஸி. தேன வுத்தங் ‘‘ஸோணத்தே²ரஸ்ஸ வத்து² த³ஸ்ஸேதப்³ப³’’ந்தி.
ஸேஸேஸுபீதி ஏகஸ்ஸாதி ஏகேகஸ்ஸ. ஸாமஞ்ஞனித்³தே³ஸோவாயங் த³ட்ட²ப்³போ³. ஏவங் பஞ்சன்னங் இந்த்³ரியானங் பச்சேகங் அதி⁴மத்ததாய பன ஹாபனவஸேன ஸமதங் த³ஸ்ஸெத்வா இதா³னி தத்த² யேஸங் விஸேஸதோ அஸாதா⁴ரணதோ, ஸாதா⁴ரணதோ ச ஸமதா இச்சி²தப்³பா³, தங் த³ஸ்ஸேதுங் ‘‘விஸேஸதோ பனா’’திஆதி³ வுத்தங். எத்தா²தி ஏதேஸு பஞ்சஸு இந்த்³ரியேஸு. ஸமதந்தி ஸத்³தா⁴பஞ்ஞானங் அஞ்ஞமஞ்ஞங் அனூனானதி⁴கபா⁴வங். ததா² ஸமாதி⁴வீரியானங்
‘‘ப³லவஸத்³தோ⁴ ஹீ’’திஆதி³ நித³ஸ்ஸனவஸேன வுத்தங். தஸ்ஸத்தோ² – யோ ப³லவதியா ஸத்³தா⁴ய ஸமன்னாக³தோ அவிஸத³ஞாணோ, ஸோ முத்³த⁴ப்பஸன்னோ ஹோதி, ந அவேச்சப்பஸன்னோ. ததா² ஹி ஸோ அவத்து²ஸ்மிங் பஸீத³தி ஸெய்யதா²பி தித்தி²யஸாவகா. கேராடிகபக்க²ந்தி ஸாடெ²ய்யபக்க²ங் ப⁴ஜதி. ஸத்³தா⁴ஹீனாய பஞ்ஞாய அதிதா⁴வந்தோ ‘‘தெ³ய்யவத்து²பரிச்சாகே³ன வினா சித்துப்பாத³மத்தேனபி தா³னமயங் புஞ்ஞங் ஹோதீ’’திஆதீ³னி பரிகப்பேதி ஹேதுபடிரூபகேஹி வஞ்சிதோ. ஏவங்பூ⁴தோ பன ஸுக்க²தக்கவிலுத்தசித்தோ பண்டி³தானங் வசனங் நாதி³யதி, ஸஞ்ஞத்திங் ந க³ச்ச²தி. தேனாஹ ‘‘பே⁴ஸஜ்ஜஸமுட்டி²தோ விய ரோகோ³ அதேகிச்சோ² ஹோதீ’’தி. யதா² செத்த² ஸத்³தா⁴பஞ்ஞானங் அஞ்ஞமஞ்ஞவிரஹோ ந அத்தா²வஹோ அனத்தா²வஹோ ச, ஏவமிதா⁴பி ஸமாதி⁴வீரியானங் அஞ்ஞமஞ்ஞவிரஹோ ந அவிக்கே²பாவஹோ விக்கே²பாவஹோ சாதி வேதி³தப்³ப³ங். கோஸஜ்ஜங் அபி⁴ப⁴வதி, தேன அப்பனங் ந பாபுணாதீதி அதி⁴ப்பாயோ. உத்³த⁴ச்சங் அபி⁴ப⁴வதீதி எத்தா²பி ஏஸேவ நயோ. தது³ப⁴யந்தி தங் ஸத்³தா⁴பஞ்ஞாத்³வயங், ஸமாதி⁴வீரியத்³வயஞ்ச. ஸமங் காதப்³ப³ந்தி ஸமரஸங் காதப்³ப³ங்.
ஸமாதி⁴கம்மிகஸ்ஸாதி ஸமத²கம்மட்டா²னிகஸ்ஸ. ஏவந்தி ஏவங் ஸந்தே, ஸத்³தா⁴ய தேஸங் ப³லவபா⁴வே ஸதீதி அத்தோ². ஸத்³த³ஹந்தோதி ‘‘பத²வீ பத²வீ’’தி மனஸிகரணமத்தேன கத²ங் ஜா²னுப்பத்தீதி அசிந்தெத்வா ‘‘அத்³தா⁴ ஸம்மாஸம்பு³த்³தே⁴ன வுத்தவிதி⁴ இஜ்ஜி²ஸ்ஸதீ’’தி ஸத்³த³ஹந்தோ ஸத்³த⁴ங் ஜனெந்தோ. ஓகப்பெந்தோதி ஆரம்மணங் அனுபவிஸித்வா விய அதி⁴முச்சனவஸேன ஓகப்பெந்தோ பக்க²ந்த³ந்தோ. ஏகக்³க³தா ப³லவதீ வட்டதி ஸமாதி⁴பதா⁴னத்தா ஜா²னஸ்ஸ. உபி⁴ன்னந்தி ஸமாதி⁴பஞ்ஞானங், ஸமாதி⁴கம்மிகஸ்ஸ ஸமாதி⁴னோ அதி⁴மத்ததாபி இச்சி²தப்³பா³தி ஆஹ ‘‘ஸமதாயபீ’’தி, ஸமபா⁴வேனாபீதி அத்தோ². அப்பனாதி இதா⁴தி⁴ப்பேதஅப்பனா. ததா² ஹி ‘‘ஹோதியேவா’’தி ஸாஸங்கங் வத³தி
யதி³ ‘‘ஸதி பன ஸப்³ப³த்த² ப³லவதீ வட்டதீ’’தி. ஸப்³ப³த்தா²தி லீனுத்³த⁴ச்சபக்கே²ஸு பஞ்சஸு இந்த்³ரியேஸு. உத்³த⁴ச்சபக்கி²யே க³ண்ஹந்தோ ‘‘ஸத்³தா⁴வீரியபஞ்ஞான’’ந்தி ஆஹ. அஞ்ஞதா²பீதி ச க³ஹேதப்³பா³ ஸியா. ததா² ஹி ‘‘கோஸஜ்ஜபக்கே²ன ஸமாதி⁴னா’’ இச்சேவ வுத்தங், ந ‘‘பஸ்ஸத்³தி⁴ஸமாதி⁴உபெக்கா²ஹீ’’தி. ஸா ஸதி. ஸப்³பே³ஸு ராஜகம்மேஸு நியுத்தோ ஸப்³ப³கம்மிகோ. தேன காரணேன ஸப்³ப³த்த² இச்சி²தப்³ப³த்தே²ன. ஆஹ அட்ட²கதா²யங். ஸப்³ப³த்த² நியுத்தா ஸப்³ப³த்தி²கா, ஸப்³பே³ன வா லீனுத்³த⁴ச்சபக்கி²யேன பொ³ஜ்ஜ²ங்க³க்³க³ஹணேன அத்தே²தப்³பா³ ஸப்³ப³த்தி²யா, ஸப்³ப³த்தி²யாவ ஸப்³ப³த்தி²கா. சித்தந்தி குஸலசித்தங். தஸ்ஸ ஹி ஸதி படிஸரணங் பராயணங் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய. தேனாஹ ‘‘ஆரக்க²பச்சுபட்டா²னா’’திஆதி³.
63. சித்தேகக்³க³தானிமித்தஸ்ஸாதி சித்தேகக்³க³தாய நிமித்தஸ்ஸ, சித்தேகக்³க³தாஸங்கா²தஸ்ஸ ச நிமித்தஸ்ஸ. சித்தஸ்ஸ ஹி ஸமாஹிதாகாரங் ஸல்லக்கெ²த்வா ஸமத²னிமித்தங் ரக்க²ந்தோயேவ கஸிணனிமித்தங் ரக்க²தி. தஸ்மா பத²வீகஸிணாதி³கஸ்ஸாதி ஆதி³-ஸத்³தே³ன ந கேவலங் படிபா⁴க³னிமித்தஸ்ஸேவ, அத² கோ² ஸமத²னிமித்தஸ்ஸாபி க³ஹணங் த³ட்ட²ப்³ப³ங். தந்தி ரக்க²ணகோஸல்லங். இத⁴ அப்பனாகோஸல்லகதா²யங் ‘‘நிமித்தகோஸல்ல’’ந்தி அதி⁴ப்பேதங், கரணபா⁴வனாகோஸல்லானங் பகே³வ ஸித்³த⁴த்தாதி அதி⁴ப்பாயோ.
64. அதிஸிதி²லவீரியதாதீ³ஹீதி ஆதி³-ஸத்³தே³ன பமோத³னஸங்வேஜனவிபரியாயே ஸங்க³ண்ஹாதி. லீனந்தி ஸங்குசிதங் கோஸஜ்ஜபக்க²பதிதங். சித்தந்தி பா⁴வனாசித்தங். த⁴ம்மவிசயஸம்பொ³ஜ்ஜ²ங்கா³த³யோ பா⁴வேதீதி எத்த² ‘‘தயோ’’தி பத³ங் ஆனெத்வா ஸம்ப³ந்தி⁴தப்³ப³ங். யதா² பன தே பா⁴வேதப்³பா³, தங் ஸயமேவ வக்க²தி.
பரித்தந்தி அப்பகங். உஜ்ஜாலேதுகாமோதி பதீ³பேதுகாமோ. உத³கவாதங் த³தெ³ய்யாதி உத³கமிஸ்ஸங் வாதங் உபனெய்ய. அகாலோதி நகாலோ, அயுத்தகாலோ வா. ஸதிஆதி³த⁴ம்மஸாமக்³கி³ஸங்கா²தாய போ³தி⁴யா பு³ஜ்ஜ²தி ஏதாயாதி கத்வா, தங்ஸமங்கி³னோ வா பு³ஜ்ஜ²தீதி போ³தி⁴னோ யோகி³னோ அங்க³ந்தி பொ³ஜ்ஜ²ங்கோ³ பஸ்ஸத்³தி⁴ஸம்பொ³ஜ்ஜ²ங்க³ஸ்ஸ. ஸமாதி⁴ஸம்பொ³ஜ்ஜ²ங்கா³தீ³ஸுபி ஏஸேவ நயோ. அயங் பன விஸேஸோ – ஸமாதி⁴ஸ்ஸ தாவ பத³த்த²லக்க²ணானி ஹெட்டா² ஆக³தானேவ. உபபத்திதோ இக்க²தீதி உபெக்கா². ஸா பனாயங் அத்த²தோ தத்ரமஜ்ஜ²த்துபெக்கா²வ இத⁴ பொ³ஜ்ஜ²ங்கு³பெக்கா² வேதி³தப்³பா³. து³ஸமுட்டா²பயந்தி ஸமுட்டா²பேதுங் உப்பாதே³துங் அஸக்குணெய்யங். த⁴ம்மானங், த⁴ம்மேஸு வா விசயோ த⁴ம்மவிசயோ, பஞ்ஞாதி அத்தோ². வீரஸ்ஸ பா⁴வோ, கம்மங் வா, விதி⁴னா வா ஈரேதப்³ப³ங் பவத்தேதப்³ப³ந்தி வீரியங், உஸ்ஸாஹோ. பீணேதி காயங், சித்தங் ச ஸந்தப்பேதீதி பீதி.
யங் யங் ஸகங் யதா²ஸகங், அத்தனோ அத்தனோதி அத்தோ². ஆஹாரவஸேனாதி பச்சயவஸேன. பா⁴வனாதி உப்பாத³னா, வட்³ட⁴னா ச. குஸலாகுஸலாதி கோஸல்லஸம்பூ⁴தட்டே²ன குஸலா, தப்படிபக்க²தோ அகுஸலா. யே அகுஸலா, தே ஸாவஜ்ஜா. யே குஸலா, தே அனவஜ்ஜா. அகுஸலா ஹீனா, இதரே பணீதா. குஸலாபி வா ஹீனேஹி ச²ந்தா³தீ³ஹி ஆரத்³தா⁴ ஹீனா, இதரே பணீதா. கண்ஹாதி காளகா சித்தஸ்ஸ அபப⁴ஸ்ஸரபா⁴வகரணா, ஸுக்காதி ஓதா³தா சித்தஸ்ஸ பப⁴ஸ்ஸரபா⁴வகரணா. கண்ஹாபி⁴ஜாதிஹேதுதோ வா கண்ஹா, ஸுக்காபி⁴ஜாதிஹேதுதோ ஸுக்கா. தே ஏவ ஸப்படிபா⁴கா³. கண்ஹா ஹி உஜுவிபச்சனீகதாய ஸுக்கேஹி ஸப்படிபா⁴கா³. ததா² ஸுக்காபி இதரேஹி. அத² வா கண்ஹா ச ஸுக்கா ச ஸப்படிபா⁴கா³ ச கண்ஹஸுக்கஸப்படிபா⁴கா³. ஸுகா² ஹி வேத³னா து³க்கா²ய வேத³னாய ஸப்படிபா⁴கா³, து³க்கா² ச வேத³னா ஸுகா²ய ஸப்படிபா⁴கா³தி. அனுப்பன்னஸ்ஸாதி அனிப்³ப³த்தஸ்ஸ. உப்பாதா³யாதி உப்பாத³னத்தா²ய. உப்பன்னஸ்ஸாதி நிப்³ப³த்தஸ்ஸ. பி⁴ய்யோபா⁴வாயாதி புனப்புனபா⁴வாய. வேபுல்லாயாதி விபுலபா⁴வாய. பா⁴வனாயாதி வட்³டி⁴யா. பாரிபூரியாதி பரிபூரணத்தா²ய.
தத்தா²தி ‘‘அத்தி² பி⁴க்க²வே’’திஆதி³னா த³ஸ்ஸிதபாடே². ஸபா⁴வஸாமஞ்ஞலக்க²ணபடிவேத⁴வஸேனாதி ஏகஜ்ஜ²ங் கத்வா க³ஹணே அனவஜ்ஜஸுக²விபாகாதி³கஸ்ஸ விஸுங் விஸுங் பன பு²ஸனாதி³கஸ்ஸ ஸபா⁴வலக்க²ணஸ்ஸ, அனிச்சாதி³கஸ்ஸ ஸாமஞ்ஞலக்க²ணஸ்ஸ ச படிவிஜ்ஜ²னவஸேன. பவத்தமனஸிகாரோதி குஸலாதீ³னங் தங்தங்ஸபா⁴வலக்க²ணாதி³கஸ்ஸ யாதா²வதோ அவபு³ஜ்ஜ²னவஸேன உப்பன்னஜவனசித்துப்பாதோ³. ஸோ ஹி அவிபரீதமனஸிகாரதாய ‘‘யோனிஸோமனஸிகாரோ’’தி வுத்தோ. ததா³போ⁴க³தாய ஆவஜ்ஜனாபி தக்³க³திகாவ. ருப்பனலக்க²ணாதி³கம்பி ‘‘ஆரம்ப⁴தா⁴தூதி பட²மவீரியங் வுச்சதீ’’தி. லத்³தா⁴ஸேவனங் வீரியங் ப³லப்பத்தங் ‘‘கோஸஜ்ஜதோ நிக்க²ந்தத்தா ததோ ப³லவதர’’ந்தி. அதி⁴மத்தாதி⁴மத்ததரானங் படிபக்க²த⁴ம்மானங் வித⁴மனஸமத்த²ங் படுபடுதராதி³பா⁴வப்பத்தங் ஹோதீதி வுத்தங் ‘‘பரங் பரங் டா²னங் அக்கமனதோ ததோபி ப³லவதர’’ந்தி. திட்ட²தி பவத்ததி எத்தா²தி டா²னியா, பீதிஸம்பொ³ஜ்ஜ²ங்க³ஸ்ஸ டா²னியா பீதிஸம்பொ³ஜ்ஜ²ங்க³ட்டா²னியா. டா²தப்³போ³ வா டா²னியோ, பீதிஸம்பொ³ஜ்ஜ²ங்கோ³ டா²னியோ ஏதேஸூதி பீதிஸம்பொ³ஜ்ஜ²ங்க³ட்டா²னியா, அபராபரங் வத்தமானா பீதிஸம்பொ³ஜ்ஜ²ங்க³ஸம்பயுத்தா த⁴ம்மா. யஸ்மா பன தேஸு பீதியேவ பீதிஸம்பொ³ஜ்ஜ²ங்க³ஸ்ஸ விஸேஸகாரணங், தஸ்மா வுத்தங் ‘‘பீதியா ஏவ ஏதங் நாம’’ந்தி. உப்பாத³கமனஸிகாரோதி யதா² மனஸி கரோதோ அனுப்பன்னோ பீதிஸம்பொ³ஜ்ஜ²ங்கோ³ உப்பஜ்ஜதி, உப்பன்னோ ச வட்³ட⁴தி, ததா² பவத்தமனஸிகாரோ.
பரிபுச்ச²கதாதி பரியோகா³ஹெத்வா புச்ச²கபா⁴வோ. பஞ்சபி ஹி நிகாயே உக்³க³ஹெத்வா ஆசரியே பரியுபாஸித்வா தஸ்ஸ தஸ்ஸ அத்த²ங் பரிபுச்ச²ந்தஸ்ஸ, தே வா ஸஹ அட்ட²கதா²ய பரியோகா³ஹெத்வா யங் யங் தத்த² க³ண்டி²ட்டா²னங், தங் தங் ‘‘இத³ங், ப⁴ந்தே, கத²ங், இமஸ்ஸ கோ அத்தோ²’’தி புச்ச²ந்தஸ்ஸ த⁴ம்மவிசயஸம்பொ³ஜ்ஜ²ங்கோ³ உப்பஜ்ஜதீதி. வத்து²விஸத³கிரியா இந்த்³ரியஸமத்தபடிபாத³னா ஸங்கே²பதோ, வித்தா²ரதோ ச பகாஸிதா ஏவ. தத்த² பன ஸமாதி⁴ஸங்வத்தனியபா⁴வேன ஆக³தா, இத⁴ பஞ்ஞாஸங்வத்தனியபா⁴வேன. யத³க்³கே³ன ஹி ஸமாதி⁴ஸங்வத்தனிகா, தத³க்³கே³ன பஞ்ஞாஸங்வத்தனிகா ஸமாதி⁴ஸ்ஸ ஞாணபச்சுபட்டா²னதோ. ‘‘ஸமாஹிதோ யதா²பூ⁴தங் பஜானாதீ’’தி (ஸங்॰ நி॰ 4.99; 5.1071) வுத்தங். து³ப்பஞ்ஞபுக்³க³லபரிவஜ்ஜனா நாம து³ப்பஞ்ஞானங் மந்த³பு³த்³தீ⁴னங் ப⁴த்தனிக்கி²த்தகாகமங்ஸனிக்கி²த்தஸுனக²ஸதி³ஸானங் மோமூஹபுக்³க³லானங் தூ³ரதோ பரிச்சஜனா. பஞ்ஞவந்தபுக்³க³லஸேவனா நாம பஞ்ஞாய கதாதி⁴காரானங் ஸச்சபடிச்சஸமுப்பாதா³தீ³ஸு குஸலானங் அரியானங், விபஸ்ஸனாகம்மிகானங் வா மஹாபஞ்ஞானங் காலேன காலங் உபஸங்கமனங். க³ம்பீ⁴ரஞாணசரியபச்சவெக்க²ணாதி க³ம்பீ⁴ரஞாணேஹி சரிதப்³பா³னங் க²ந்தா⁴யதனதா⁴தாதீ³னங், ஸச்சபச்சயாகாராதி³தீ³பனானங் வா ஸுஞ்ஞதாபடிஸங்யுத்தானங் ஸுத்தந்தானங் பச்சவெக்க²ணா. தத³தி⁴முத்ததாதி பஞ்ஞாதி⁴முத்ததா, பஞ்ஞாய நின்னபோணபப்³பா⁴ரதாதி அத்தோ².
அபாயாதீ³தி ஆதி³-ஸத்³தே³ன ஜாதிஆதி³ங் அதீதே வட்டமூலகங் து³க்க²ங், அனாக³தே வட்டமூலகங் து³க்க²ங், பச்சுப்பன்னே ஆஹாரபரியெட்டி²மூலகஞ்ச து³க்க²ங் ஸங்க³ண்ஹாதி. வீரியாயத்தஸ்ஸ லோகியலோகுத்தரவிஸேஸஸ்ஸ அதி⁴க³மோ ஏவ ஆனிஸங்ஸோ, தஸ்ஸ த³ஸ்ஸனஸீலதா வீரியாயத்த…பே॰… த³ஸ்ஸிதா. ஸபுப்³ப³பா⁴கோ³ நிப்³பா³னகா³மிமக்³கோ³ க³மனவீதி² க³ந்தப்³பா³ படிபஜ்ஜிதப்³பா³ படிபதா³தி கத்வா தா³யகானங் மஹப்ப²லபா⁴வகரணேன பிண்டா³பசாயனதாதி பச்சயதா³யகானங் அத்தனி காரஸ்ஸ அத்தனோ ஸம்மாபடிபத்தியா மஹப்ப²லகாரபா⁴வஸ்ஸ கரணேன பிண்ட³ஸ்ஸ பி⁴க்கா²ய படிபூஜனா. இதரதா²தி ஆமிஸபூஜாய. குஸீதபுக்³க³லபரிவஜ்ஜனதாதி அலஸானங் பா⁴வனாய நாமமத்தம்பி அஜானந்தானங் காயத³ள்ஹீப³ஹுலானங் யாவத³த்த²ங் பு⁴ஞ்ஜித்வா ஸெய்யஸுகா²தி³அனுயுஞ்ஜனகானங் திரச்சா²னகதி²கானங் புக்³க³லானங் தூ³ரதோ பரிச்சஜனா. ஆரத்³த⁴வீரியபுக்³க³லஸேவனதாதி ‘‘தி³வஸங் சங்கமேன நிஸஜ்ஜாயா’’திஆதி³னா (விப⁴॰ 519; அ॰ நி॰ 3.16) பா⁴வனாரம்ப⁴வஸேன ஆரத்³த⁴வீரியானங் த³ள்ஹபரக்கமானங் புக்³க³லானங் காலேன காலங் உபஸங்கமனா. ஸம்மப்பதா⁴னபச்சவெக்க²ணதாதி சதுப்³பி³த⁴ஸம்மப்பதா⁴னானுபா⁴வஸ்ஸ பச்சவெக்க²ணதா. தத³தி⁴முத்ததாதி தஸ்மிங் வீரியஸம்பொ³ஜ்ஜ²ங்கே³ அதி⁴முத்தி ஸப்³பி³ரியாபதே²ஸு நின்னபோணபப்³பா⁴ரதா. எத்த² ச தி²னமித்³த⁴வினோத³னகுஸீதபுக்³க³லபரிவஜ்ஜனஆரத்³த⁴வீரியபுக்³க³லஸேவனதத³தி⁴முத்ததா படிபக்க²வித⁴மனபச்சயூபஸங்ஹாரவஸேன, அபாயாதி³ப⁴யபச்சவெக்க²ணாத³யோ ஸமுத்தேஜனவஸேன வீரியஸம்பொ³ஜ்ஜ²ங்க³ஸ்ஸ உப்பாத³கா த³ட்ட²ப்³பா³.
பு³த்³தா⁴தீ³ஸு பஸாத³ஸினேஹாபா⁴வேன து²ஸக²ரஹத³யா லூக²புக்³க³லா, தப்³பி³பரியாயேன ஸினித்³த⁴புக்³க³லா வேதி³தப்³பா³. பு³த்³தா⁴தீ³னங் கு³ணபரிதீ³பனா ஸம்பஸாத³னீயஸுத்தாத³யோ (தீ³॰ நி॰ 3.141 ஆத³யோ) பஸாத³னீயஸுத்தந்தா. இமேஹி ஆகாரேஹீதி யதா²வுத்தேஹி குஸலாதீ³னங் ஸபா⁴வஸாமஞ்ஞலக்க²ணபடிவிஜ்ஜ²னாதி³ஆகாரேஹி சேவ பரிபுச்ச²கதாதி³ஆகாரேஹி ச. ஏதே த⁴ம்மேதி ஏதே குஸலாதீ³ஸு யோனிஸோமனஸிகாராதி³கே சேவ த⁴ம்மத்த²ஞ்ஞுதாதி³கே ச.
65. அச்சாரத்³த⁴வீரியதாதீ³ஹீதி அதிவிய பக்³க³ஹிதவீரியதாதீ³ஹி. ஆதி³-ஸத்³தே³ன ஸங்வேஜனபமோத³னாதி³ங் ஸங்க³ண்ஹாதி. உத்³த⁴தந்தி ஸமாதி⁴ஆதீ³னங் மந்த³தாய அவூபஸந்தங். து³வூபஸமயந்தி வூபஸமேதுங் ஸமாதா⁴துங் அஸக்குணெய்யங்.
தங் ஆகாரங் ஸல்லக்கெ²த்வாதி யேனாகாரேன அஸ்ஸ யோகி³னோ பஸ்ஸத்³தி⁴ ஸமாதி⁴ உபெக்கா²தி இமே பஸ்ஸத்³தி⁴ஆத³யோ த⁴ம்மா புப்³பே³ யதா²ரஹங் தஸ்மிங் தஸ்மிங் காலே உப்பன்னபுப்³பா³, தங் சித்ததங்ஸம்பயுத்தத⁴ம்மானங் பஸ்ஸத்³தா⁴காரங், ஸமாஹிதாகாரங், அஜ்ஜு²பெக்கி²தாகாரஞ்ச உபலக்கெ²த்வா உபதா⁴ரெத்வா. தீஸுபி பதே³ஸூதி ‘‘அத்தி², பி⁴க்க²வே, காயப்பஸ்ஸத்³தீ⁴’’திஆதி³னா ஆக³தேஸு தீஸுபி வாக்யேஸு, தேஹி வா பகாஸிதேஸு தீஸு த⁴ம்மகொட்டா²ஸேஸு. யதா²ஸமாஹிதாகாரங் ஸல்லக்கெ²த்வா க³ய்ஹமானோ ‘‘ஸமத²னிமித்தந்தி ச ஸமத²ஸ்ஸேவேதமதி⁴வசன’’ந்தி. நானாரம்மணே பரிப்³ப⁴மனேன விவித⁴ங் அக்³க³ங் ஏதஸ்ஸாதி ப்³யக்³கோ³, விக்கே²போ. ததா² ஹி ஸோ அனவட்டா²னரஸோ, ப⁴ந்ததாபச்சுபட்டா²னோ ச வுத்தோ. ஏகக்³க³தாபா⁴வதோ ப்³யக்³க³படிபக்கோ²தி அப்³யக்³கோ³, ஸமாதி⁴. ஸோ ஏவ நிமித்தந்தி புப்³பே³ விய வத்தப்³ப³ங். தேனாஹ ‘‘அவிக்கே²பட்டே²ன ச தஸ்ஸேவ அப்³யக்³க³னிமித்தந்தி அதி⁴வசன’’ந்தி.
ஸரீராவத்த²ங் ஞத்வா மத்தஸோ பரிபு⁴த்தோ பணீதாஹாரோ காயலஹுதாதீ³னங் ஸமுட்டா²பனேன பஸ்ஸத்³தி⁴யா பச்சயோ ஹோதி, ததா² உதுஸப்பாயங், இரியாபத²ஸப்பாயஞ்ச ஸேவிதங், பயோகோ³ ச காயிகோ பவத்திதோதி ஆஹ ‘‘பணீதபோ⁴ஜனஸேவனதா’’திஆதி³. பயோக³ஸமதாதீ³னங் அபா⁴வேன ஸத³ரத²காயசித்தா புக்³க³லா ஸாரத்³த⁴புக்³க³லா. வுத்தவிபரியாயேன பஸ்ஸத்³த⁴காயா புக்³க³லா வேதி³தப்³பா³.
நிரஸ்ஸாத³ஸ்ஸாதி பா⁴வனஸ்ஸாத³ரஹிதஸ்ஸ. பா⁴வனா ஹி வீதி²படிபன்னா புப்³பே³னாபரங் விஸேஸவதீ பவத்தமானா சித்தஸ்ஸ அஸ்ஸாத³ங் உபஸமஸுக²ங் ஆவஹதி, தத³பா⁴வதோ நிரஸ்ஸாத³ங் சித்தங் ஹோதி. ஸத்³தா⁴ஸங்வேக³வஸேனாதி ஸத்³தா⁴வஸேன, ஸங்வேக³வஸேன ச. ஸம்பஹங்ஸனதாதி ஸம்மதே³வ பஹங்ஸனதா ஸங்வேஜனபுப்³ப³கபஸாது³ப்பாத³னேன பா⁴வனா சித்தஸ்ஸ தோஸனா. ஸம்மாபவத்தஸ்ஸாதி லீனுத்³த⁴ச்சவிரஹேன, ஸமத²வீதி²படிபத்தியா ச ஸமங், ஸவிஸேஸஞ்ச பவத்தியா ஸம்மதே³வ பவத்தஸ்ஸ பா⁴வனாசித்தஸ்ஸ. அஜ்ஜு²பெக்க²னதாதி பக்³க³ஹனிக்³க³ஹஸம்பஹங்ஸனேஸு அப்³யாவடதா. ஜா²னவிமொக்க²பச்சவெக்க²ணதாதி பட²மாதீ³னி ஜா²னானி பச்சனீகத⁴ம்மேஹி ஸுட்டு² விமுத்ததாதி³னா தேயேவ விமொக்கா² தேஸங் ‘‘ஏவங் பா⁴வனா, ஏவங் ஸமாபஜ்ஜனா, ஏவங் அதி⁴ட்டா²னங், ஏவங் வுட்டா²னங், ஏவங் ஸங்கிலேஸோ, ஏவங் வோதா³ன’’ந்தி பதி பதி அவெக்க²ணா.
ஸத்தமஜ்ஜ²த்ததாதி ஸங்கா²ரமஜ்ஜ²த்ததாதி அஜ்ஜ²த்திகேஸு சக்கா²தீ³ஸு, பா³ஹிரேஸு பத்தசீவராதீ³ஸு மஜ்ஜ²த்தாகாரோ அஜ்ஜு²பெக்க²னா. ஸத்தஸங்கா²ரானங் மமாயனங் ஸத்தஸங்கா²ரகேலாயனங். இமேஹாகாரேஹீதி இமேஹி யதா²வுத்தேஹி காயசித்தானங் பஸ்ஸத்³தா⁴காரஸல்லக்க²ணாதி³ஆகாரேஹி சேவ ஸப்பாயாஹாரஸேவனாதி³ஆகாரேஹி ச. ஏதே த⁴ம்மேதி ஏதே பஸ்ஸத்³தி⁴ஆதி³த⁴ம்மே.
66. பஞ்ஞாபயோக³மந்த³தாயாதி பஞ்ஞாப்³யாபாரஸ்ஸ அப்பபா⁴வேன. யதா² ஹி தா³னஸீலானி அலோபா⁴தோ³ஸப்பதா⁴னானி நந்தி சித்தங். ஜாதிஜராப்³யாதி⁴மரணானி யதா²ரஹங் ஸுக³தியங், து³க்³க³தியஞ்ச ஹொந்தீதி தத³ஞ்ஞமேவ பஞ்சவித⁴ப³ந்த⁴னாதி³கு²ப்பிபாஸாதி³அஞ்ஞமஞ்ஞவிபா³த⁴னாதி³ஹேதுகங் அபாயது³க்க²ங் த³ட்ட²ப்³ப³ங். தயித³ங் ஸப்³ப³ங் தேஸங் தேஸங் ஸத்தானங் பச்சுப்பன்னப⁴வனிஸ்ஸிதங் க³ஹிதந்தி அதீதே, அனாக³தே ச காலே வட்டமூலகது³க்கா²னி விஸுங் க³ஹிதானி. யே பன ஸத்தா ஆஹாரூபஜீவினோ, தத்த² ச உட்டா²னப²லூபஜீவினோ, தேஸங் அஞ்ஞேஹி அஸாதா⁴ரணங் ஜீவிதது³க்க²ங் அட்ட²மங் ஸங்வேக³வத்து² வுத்தந்தி த³ட்ட²ப்³ப³ங்.
அஸ்ஸாதி சித்தஸ்ஸ. அலீனந்திஆதீ³ஸு கோஸஜ்ஜபக்கி²யானங் த⁴ம்மானங் அனதி⁴மத்ததாய அலீனங். உத்³த⁴ச்சபக்கி²கானங் த⁴ம்மானங் அனதி⁴மத்ததாய அனுத்³த⁴தங். பஞ்ஞாபயோக³ஸம்பத்தியா, உபஸமஸுகா²தி⁴க³மேன ச அனிரஸ்ஸாத³ங். புப்³பே³னாபரங் ஸவிஸேஸங் ததோ ஏவ ஆரம்மணே ஸமப்பவத்தங், ஸமத²வீதி²படிபன்னஞ்ச. தத்த² அலீனதாய பக்³க³ஹே, அனுத்³த⁴ததாய நிக்³க³ஹே, அனிரஸ்ஸாத³தாய ஸம்பஹங்ஸனே ந ப்³யாபாரங் ஆபஜ்ஜதி. அலீனானுத்³த⁴ததாய ஹி ஆரம்மணே ஸமப்பவத்தங் அனிரஸ்ஸாத³தாய ஸமத²வீதி²படிபன்னங். ஸமப்பவத்தியா வா அலீனங் அனுத்³த⁴தங், ஸமத²வீதி²படிபத்தியா அனிரஸ்ஸாத³ந்தி த³ட்ட²ப்³ப³ங்.
நெக்க²ம்மபடிபத³ந்தி ஜா²னபடிபத்திங். ஸமாதி⁴அதி⁴முத்ததாதி ஸமாதி⁴னிப்³ப³த்தனே ஜா²னாதி⁴க³மே யுத்தப்பயுத்ததா. ஸா பன யஸ்மா ஸமாதி⁴ங் க³ருங் கத்வா தத்த² நின்னபோணபப்³பா⁴ரபா⁴வேன ‘‘ஸமாதி⁴க³ரூ’’திஆதி³ வுத்தங்.
67. படிலத்³தே⁴ நிமித்தஸ்மிங் ஏவங் ஹி ஸம்பாத³யதோ அப்பனாகோஸல்லங் இமங் அப்பனா ஸம்பவத்ததீதி ஸம்ப³ந்தோ⁴. ஸாதி அப்பனா. ஹித்வா ஹீதி ஹி-ஸத்³தோ³ ஹேதுஅத்தோ². யஸ்மா டா²னமேதங் ந விஜ்ஜதி, தஸ்மா சித்தப்பவத்திஆகாரங் பா⁴வனாசித்தஸ்ஸ லீனுத்³த⁴தாதி³வஸேன பவத்திஆகாரங் ஸல்லக்க²யங் உபதா⁴ரெந்தோ. ஸமதங் வீரியஸ்ஸேவ வீரியஸ்ஸ ஸமாதி⁴னா ஸமரஸதங்யேவ யோஜயேத². கத²ங் பன யோஜயேதா²தி ஆஹ ‘‘ஈஸகம்பீ’’திஆதி³. தத்த² லயந்தி லீனபா⁴வங், ஸங்கோசந்தி அத்தோ². யந்தந்தி க³ச்ச²ந்தங் பக்³க³ண்ஹேதே²வ ஸமபா⁴வாயாதி அதி⁴ப்பாயோ. தேனாஹ ‘‘அச்சாரத்³த⁴ங் நிஸேதெ⁴த்வா ஸமமேவ பவத்தயே’’தி. கத²ங் பன ஸமமேவ பவத்தயேதி ஆஹ ‘‘ரேணும்ஹீ’’திஆதி³. யதா²தி ரேணுஆதீ³ஸு யதா² மது⁴கராதீ³னங் பவத்தி உபமாபா⁴வேன அட்ட²கதா²யங் ஸம்மவண்ணிதா, ஏவங் லீனுத்³த⁴தபா⁴வேஹி மோசயித்வா வீரியஸமதாயோஜனேன நிமித்தாபி⁴முக²ங் மானஸங் படிபாத³யே படிபா⁴க³னிமித்தாபி⁴முக²ங் பா⁴வனாசித்தங் ஸம்பாதெ³ய்யாதி அத்தோ².
நிமித்தாபி⁴முக²படிபாத³னவண்ணனா
68. தத்ராதி தஸ்மிங் ‘‘ரேணும்ஹீ’’திஆதி³னா வுத்தகா³தா²த்³வயே. அத்த²தீ³பனா உபமூபமெய்யத்த²விபா⁴வனா. அசே²கோதி அகுஸலோ. பக்க²ந்தோ³தி தா⁴விதுங் ஆரத்³தோ⁴. விகஸனக்க²ணேயேவ ஸரஸங் குஸுமபராக³ங் ஹோதி, பச்சா² வாதாதீ³ஹி பரிபததி, விரஸங் வா ஹோதி. தஸ்மா நிவத்தனே ரேணு கீ²யதீதி ஆஹ ‘‘கீ²ணே ரேணும்ஹி ஸம்பாபுணாதீ’’தி. புப்ப²ராஸிந்தி ருக்க²ஸாகா²ஸு நிஸ்ஸிதங் புப்ப²ஸஞ்சயங்.
ஸல்லகத்தஅந்தேவாஸிகேஸூதி ஸல்லகத்தஆசரியஸ்ஸ அந்தேவாஸிகேஸு. உத³கதா²லக³தேதி உத³கதா²லியங் ட²பிதே. ஸத்த²கம்மந்தி ஸிராவேத⁴னாதி³ஸத்த²கம்மங். பு²ஸிதும்பி உப்பலபத்தந்தி ஸம்ப³ந்தோ⁴. ஸமேனாதி புரிமகா விய க³ருங், மந்த³ஞ்ச பயோக³ங் அகத்வா ஸமப்பமாணேன பயோகே³ன. தத்தா²தி உப்பலபத்தே. பரியோதா³தஸிப்போதி ஸுவிஸுத்³த⁴ஸிப்போ நிப்ப²ன்னஸிப்போ.
மக்கடகஸுத்தந்தி நியாமகோ நாவாஸாரதீ². லங்காரந்தி கிலஞ்ஜாதி³மயங் நாவாகடஸாரகங். தேலேன அச²ட்³டெ³ந்தோ நாளிங் பூரேதீதி ஸராவாதி³க³தேன தேலேன அச²ட்³டெ³ந்தோ ஸுகு²மச்சி²த்³த³கங் தேலனாளிங் பூரேதி. ஏவமேவாதி யதா² தே ஆதி³தோ வுத்தமது⁴கரஸல்லகத்தஅந்தேவாஸிஸுத்தாகட்³ட⁴கனியாமகதேலபூரகா வேகே³ன பயோக³ங் கரொந்தி, ஏவமேவ யோ பி⁴க்கு² ‘‘ஸீக⁴ங் அப்பனங் பாபுணிஸ்ஸாமீ’’தி கா³ள்ஹங் வீரியங் கரோதி, யோ மஜ்ஜே² வுத்தமது⁴கராத³யோ விய வீரியங் ந கரோதி, இமே த்³வேபி வீரியஸமதாபா⁴வேன அப்பனங் பாபுணிதுங் ந ஸக்கொந்தி. யோ பன அவஸானே வுத்தமது⁴கராத³யோ விய ஸமப்பயோகோ³, அயங் அப்பனங் பாபுணிதுங் ஸக்கோதி வீரியஸமதாயோக³தோதி உபமாஸங்ஸந்த³னங் வேதி³தப்³ப³ங். தேன வுத்தங் ‘‘ஏகோ பி⁴க்கூ²’’திஆதி³. லீனங் பா⁴வனாசித்தந்தி அதி⁴ப்பாயோ.
பட²மஜ்ஜா²னகதா²வண்ணனா
69. ஏவந்தி மானஸங் படிபா⁴க³னிமித்தேயேவ ட²பனவஸேன நிமித்தாபி⁴முக²ங் படிபாத³யதோ அஸ்ஸ யோகி³னோ. இஜ்ஜி²ஸ்ஸதீதி ஸமிஜ்ஜி²ஸ்ஸதி, உப்பஜ்ஜிஸ்ஸதீதி அத்தோ². அனுயோக³வஸேனாதி பா⁴வனாவஸேன. ஸேஸானீதி ஸேஸானி தீணி, சத்தாரி வா. பகதிசித்தேஹீதி பாகதிகேஹி காமாவசரசித்தேஹி. ப³லவ…பே॰… சித்தேகக்³க³தானி பா⁴வனாப³லேன படுதரஸபா⁴வப்பத்தியா. பரிகம்மத்தாதி படிஸங்கா²ரகத்தா. யதி³ ஆஸன்னத்தா உபசாரதா, கொ³த்ரபு⁴னோ ஏவ உபசாரஸமஞ்ஞா ஸியாதி ஆஹ ‘‘ஸமீபசாரித்தா வா’’தி. அனச்சாஸன்னோபி ஹி நாதிதூ³ரபவத்தீ ஸமீபசாரீ நாம ஹோதி. அப்பனங் உபேச்ச சரந்தீதி உபசாரானி. இதோ புப்³பே³ பரிகம்மானந்தி நானாவஜ்ஜனவீதி²யங் பரிகம்மானங். எத்தா²தி ஏதேஸு பரிகம்முபசாரானுலோமஸஞ்ஞிதேஸு. ஸப்³ப³ந்திமந்தி ததியங், சதுத்த²ங் வா. பரித்தகொ³த்தாபி⁴ப⁴வனதோதி பரித்தஸ்ஸ கொ³த்தஸ்ஸ அபி⁴ப⁴வனதோ. க³ங்தாயதீதி ஹி கொ³த்தங், ‘‘பரித்த’’ந்தி பவத்தமானங் அபி⁴தா⁴னங், பு³த்³தி⁴ஞ்ச ஏகங்ஸிகவிஸயதாய ரக்க²தீதி பரித்தகொ³த்தங். யதா² ஹி பு³த்³தி⁴ ஆரம்மணபூ⁴தேன அத்தே²ன வினா ந பவத்ததி, ஏவங் அபி⁴தா⁴னங் அபி⁴தெ⁴ய்யபூ⁴தேன. தஸ்மா ஸோ தானி தாயதி ரக்க²தீதி வுச்சதி. தங் பன மஹக்³க³தானுத்தரவிது⁴ரங் காமதண்ஹாய கோ³சரபூ⁴தங் காமாவசரத⁴ம்மானங் ஆவேணிகரூபங் த³ட்ட²ப்³ப³ங். மஹக்³க³தகொ³த்தேபி இமினா நயேன அத்தோ² வேதி³தப்³போ³. பா⁴வனதோதி உப்பாத³னதோ.
அவிஸேஸேன ‘‘அக்³க³ஹிதக்³க³ஹணேனா’’திஆதி³. நானாவஜ்ஜனபரிகம்மமேவ பரிகம்மந்தி அதி⁴ப்பாயேன ‘‘பட²மங் வா உபசார’’ந்திஆதி³ வுத்தங். சதுத்த²ங் அப்பனாசித்தங், பஞ்சமங் வா அப்பனாசித்தங் புப்³பே³ வுத்தனயேன ஸசே சதுத்த²ங் கொ³த்ரபு⁴ ஹோதீதி அத்தோ². பஞ்சமங் வாதி வா-ஸத்³தோ³ அனியமே. ஸ்வாயங் அனியமோ இமினா காரணேனாதி த³ஸ்ஸேதுங் ‘‘தஞ்ச கோ² கி²ப்பாபி⁴ஞ்ஞத³ந்தா⁴பி⁴ஞ்ஞவஸேனா’’தி வுத்தங். தத்த² கி²ப்பாபி⁴ஞ்ஞஸ்ஸ சதுத்த²ங் அப்பேதி, த³ந்தா⁴பி⁴ஞ்ஞஸ்ஸ பஞ்சமங். கஸ்மா பன சதுத்த²ங், பஞ்சமங் வா அப்பேதி, ந ததோ பரந்தி ஆஹ ‘‘ததோ பரங் ஜவனங் பததீ’’தி. ததோ பஞ்சமதோ பரங் ச²ட்ட²ங், ஸத்தமஞ்ச ஜவனங் பதந்தங் விய ஹோதி பரிக்கீ²ணஜவத்தாதி அதி⁴ப்பாயோ.
யதா² அலத்³தா⁴ஸேவனங் பட²மஜவனங் து³ப்³ப³லத்தா கொ³த்ரபு⁴ங் ந உப்பாதே³தி, லத்³தா⁴ஸேவனங் பன ப³லவபா⁴வதோ ‘‘தஸ்மா ச²ட்டே²பி ஸத்தமேபி அப்பனா ஹோதீ’’தி. தந்தி தே²ரஸ்ஸ வசனங். ஸுத்தஸுத்தானுலோமஆசரியவாதே³ஹி அனுபத்த²ம்பி⁴தத்தா வுத்தங் ‘‘அத்தனோமதிமத்த’’ந்தி. ‘‘புரிமா புரிமா குஸலா த⁴ம்மா’’தி (பட்டா²॰ 1.1.12) பன ஸுத்தபத³மகாரணங் ஆஸேவனபச்சயலாப⁴ஸ்ஸ ப³லவபா⁴வே அனேகந்திகத்தா. ததா² ஹி அலத்³தா⁴ஸேவனாபி பட²மசேதனா தி³ட்ட²த⁴ம்மவேத³னீயா ஹோதி, லத்³தா⁴ஸேவனா து³தியசேதனா யாவ ச²ட்ட²சேதனா அபராபரியவேத³னீயா. சதுத்த²பஞ்சமேஸுயேவாதிஆதி³ வுத்தஸ்ஸேவத்த²ஸ்ஸ யுத்தித³ஸ்ஸனமுகே²ன நிக³மனத்த²ங் வுத்தங். தத்த² யதி³ ச²ட்ட²ஸத்தமங் ஜவனங் பதிதங் நாம ஹோதி பரிக்கீ²ணஜவத்தா, கத²ங் ஸத்தமஜவனசேதனா உபபஜ்ஜவேத³னீயா, ஆனந்தரியா ச ஹோதீதி? நாயங் விஸேஸோ ஆஸேவனபச்சயலாபே⁴ன ப³லப்பத்தியா. கிஞ்சரஹி கிரியாவத்தா²விஸேஸதோ. கிரியாவத்தா² ஹி ஆரம்ப⁴மஜ்ஜ²பரியோஸானவஸேன திவிதா⁴. தத்த² ச பரியோஸானாவத்தா²ய ஸன்னிட்டா²பகசேதனாபா⁴வேன உபபஜ்ஜவேத³னீயாதி³தா ஹோதி, ந ப³லவபா⁴வேனாதி த³ட்ட²ப்³ப³ங். படிஸந்தி⁴யா அனந்தரபச்சயபா⁴வினோ விபாகஸந்தானஸ்ஸ அனந்தரபச்சயபா⁴வேன ததா² அபி⁴ஸங்க²தத்தாதி ச வத³ந்தி. தஸ்மா ச²ட்ட²ஸத்தமானங் பபாதாபி⁴முக²தாய பரிக்கீ²ணஜவதா ந ஸக்கா நிவாரேதுங். ததா² ஹி ‘‘யதா² ஹி புரிஸோ’’திஆதி³ வுத்தங்.
ஸா ச பன அப்பனா. அத்³தா⁴னபரிச்சே²தோ³தி காலபரிச்சே²தோ³. ஸோ பனெத்த² ஸத்தஸு டா²னேஸு கத்த²சி அபரிமாணசித்தக்க²ணதாய, கத்த²சி அதிஇத்தரக²ணதாய நத்தீ²தி வுத்தோ. ந ஹெத்த² ஸம்புண்ணஜவனவீதி² அத்³தா⁴ லப்³ப⁴தி. தேனேவாஹ ‘‘எத்த² மக்³கா³னந்தரப²ல’’ந்திஆதி³. ஸேஸட்டா²னேஸூதி பட²மப்பனா, லோகியாபி⁴ஞ்ஞா, மக்³க³க்க²ணோ, நிரோதா⁴ வுட்ட²ஹந்தஸ்ஸ ப²லக்க²ணோதி ஏதேஸு சதூஸு டா²னேஸு.
எத்தாவதாதி எத்தகேன பா⁴வனாக்கமேன ஏஸ யோகா³வசரோ பட²மங் ஜா²னங் உபஸம்பஜ்ஜ விஹரதி. ஏவங் விஹரதா ச அனேன ததே³வ பட²மங் ஜா²னங் அதி⁴க³தங் ஹோதி பத²வீகஸிணந்தி ஸம்ப³ந்தோ⁴.
70. தத்தா²தி தஸ்மிங் ஜா²னபாடே². விவிச்சித்வாதி விஸுங் ஹுத்வா. தேனாஹ ‘‘வினா ஹுத்வா அபக்கமித்வா’’தி, பஜஹனவஸேன அபஸக்கித்வாதி அத்தோ². விவிச்சேவ காமேஹீதி எத்த² ‘‘விவிச்சா’’தி இமினா விவேசனங் ஜா²னக்க²ணே காமானங் அபா⁴வமத்தங் வுத்தங். ‘‘விவிச்சேவா’’தி பன இமினா ஏகங்ஸதோ காமானங் விவேசேதப்³ப³தாதீ³பனேன தப்படிபக்க²தா ஜா²னஸ்ஸ, காமவிவேகஸ்ஸ ச ஜா²னாதி⁴க³மூபாயதா ‘‘கத²’’ந்திஆதி³ வுத்தங். ‘‘அந்த⁴காரே ஸதி பதீ³போபா⁴ஸோ வியா’’தி ஏதேன யதா² பதீ³போபா⁴ஸாபா⁴வேன ரத்தியங் அந்த⁴காராபி⁴ப⁴வோ, ஏவங் ஜா²னாபா⁴வேன ஸத்தஸந்ததியங் காமாபி⁴ப⁴வோதி த³ஸ்ஸேதி.
ஏதந்தி புப்³ப³பதே³யேவ அவதா⁴ரணவசனங். ந கோ² பன ஏவங் த³ட்ட²ப்³ப³ங் ‘‘காமேஹி ஏவா’’தி அவதா⁴ரணஸ்ஸ அகதத்தா. நிஸ்ஸரந்தி நிக்³க³ச்ச²ந்தி ஏதேன, எத்த² வாதி நிஸ்ஸரணங். கே நிக்³க³ச்ச²ந்தி? காமா, தேஸங் காமானங் நிஸ்ஸரணங் பஹானங் தன்னிஸ்ஸரணங், ததோ. கத²ங் பன ஸமானே விக்க²ம்ப⁴னே காமானமேவேதங் நிஸ்ஸரணங், ந ப்³யாபாதா³தீ³னந்தி சோத³னங் யுத்திதோ, ஆக³மதோ ச ஸோதே⁴துங் ‘‘காமதா⁴தூ’’திஆதி³ வுத்தங். தத்த² காமதா⁴துஸமதிக்கமனதோதி ஸகலஸ்ஸபி காமப⁴வஸ்ஸ ஸமதிக்கமபடிபதா³பா⁴வதோ. தேன இமஸ்ஸ ஜா²னஸ்ஸ காமபரிஞ்ஞாபா⁴வமாஹ. காமராக³படிபக்க²தோதி வக்க²மானவிபா⁴க³ஸ்ஸ கிலேஸகாமஸ்ஸ பச்சத்தி²கபா⁴வதோ. தேன யதா² மெத்தா ப்³யாபாத³ஸ்ஸ, கருணா விஹிங்ஸாய, ஏவமித³ங் ஜா²னங் காமராக³ஸ்ஸ உஜுவிபச்சனீகபூ⁴தந்தி த³ஸ்ஸேதி. ஏவமத்தனோ பவத்தியா, விபாகப்பவத்தியா ச காமராக³தோ, காமதா⁴துதோ ‘‘யதா²ஹா’’திஆதி³. காமஞ்சேதமத்த²ங் தீ³பேதுங் புரிமபதே³யேவ அவதா⁴ரணங் க³ஹிதங், உத்தரபதே³பி பன தங் க³ஹேதப்³ப³மேவ ததா² அத்த²ஸம்ப⁴வதோதி த³ஸ்ஸேதுங் ‘‘உத்தரபதே³பீ’’திஆதி³ வுத்தங். இதோதி காமச்ச²ந்த³தோ. ஏஸ நியமோ. ஸாதா⁴ரணவசனேனாதி அவிஸேஸவசனேன. தத³ங்க³விக்க²ம்ப⁴னஸமுச்சே²த³ப்படிபஸ்ஸத்³தி⁴னிஸ்ஸரணவிவேகா தத³ங்க³விவேகாத³யோ. சித்தகாயஉபதி⁴விவேகா சித்தவிவேகாத³யோ. தயோ ஏவ இத⁴ ஜா²னகதா²யங் த³ட்ட²ப்³பா³ ஸமுச்சே²த³விவேகாதீ³னங் அஸம்ப⁴வதோ.
நித்³தே³ஸேதி மஹானித்³தே³ஸே (மஹானி॰ 1, 7). தத்த² ஹி ‘‘உத்³தா³னதோ த்³வே காமா – வத்து²காமா கிலேஸகாமா சா’’தி உத்³தி³ஸித்வா ‘‘தத்த² கதமே வத்து²காமா? மனாபியா ரூபா…பே॰… மனாபியா பொ²ட்ட²ப்³பா³’’திஆதி³னா வத்து²காமா நித்³தி³ட்டா². தே பன காமீயந்தீதி காமாதி வேதி³தப்³பா³. தத்தே²வாதி நித்³தே³ஸே ஏவ. விப⁴ங்கே³தி ஜா²னவிப⁴ங்கே³ (விப⁴॰ 564). பத்த²னாகாரேன பவத்தோ து³ப்³ப³லோ லோபோ⁴ ச²ந்த³னட்டே²ன ச²ந்தோ³, ததோ ப³லவா ரஞ்ஜனட்டே²ன ராகோ³, ததோபி ப³லவதரோ ப³ஹலராகோ³ ச²ந்த³ராகோ³. நிமித்தானுப்³யஞ்ஜனானி ஸங்கப்பேதி ஏதேனாதி ஸங்கப்போ, ததா²பவத்தோ லோபோ⁴, ததோ ப³லவா ரஞ்ஜனட்டே²ன ராகோ³, ஸங்கப்பனவஸேனேவ பவத்தோ ததோபி ப³லவதரோ ஸங்கப்பராகோ³தி. ஸ்வாயங் கிலேஸகாமா. காமெந்தீதி காமா, காமெந்தி ஏதேஹீதி வா.
ஏவஞ்ஹி ஸதீதி ஏவங் உப⁴யேஸம்பி காமானங் ஸங்க³ஹே ஸதி. வத்து²காமேஹிபீதி ‘‘வத்து²காமேஹி விவிச்சேவா’’திபி அத்தோ² யுஜ்ஜதீதி ஏவங் யுஜ்ஜமானத்த²ந்தரஸமுச்சயத்தோ² பி-ஸத்³தோ³, ந கிலேஸகாமஸமுச்சயத்தோ². கஸ்மா? இமஸ்மிங் அத்தே² கிலேஸகாமேஹி விவேகஸ்ஸ து³தியபதே³ன வுத்தத்தா. தேனாதி வத்து²காமவிவேகேன. காயவிவேகோ வுத்தோ ஹோதி புத்ததா³ராதி³பரிக்³க³ஹவிவேகதீ³பனதோ. புரிமேனாதி காயவிவேகேன. எத்தா²தி ‘‘விவிச்சேவ காமேஹி, விவிச்ச அகுஸலேஹி த⁴ம்மேஹீ’’தி ஏதஸ்மிங் பத³த்³வயே, இதோ வா நித்³தா⁴ரிதே விவேகத்³வயே. அகுஸல-ஸத்³தே³ன யதி³பி ‘‘து³தியேன கிலேஸகாமேஹி விவேகவசனதோ’’தி. து³தியேனாதி ச சித்தவிவேகேனாதி அத்தோ². ஏதேஸந்தி யதா²வுத்தானங் த்³வின்னங் பதா³னங், நித்³தா⁴ரணே சேதங் ஸாமிவசனங். தண்ஹாதி³ஸங்கிலேஸானங் வத்து²னோ பஹானங் ஸங்கிலேஸவத்து²ப்பஹானங். லோலபா⁴வோ நாம தத்த² தத்த² ரூபாதீ³ஸு தண்ஹுப்பாதோ³, தஸ்ஸ ஹேது வத்து²காமா ஏவ வேதி³தப்³பா³. பா³லபா⁴வோ அவிஜ்ஜா, து³ச்சிந்திதசிந்திதாதி³ வா, தஸ்ஸ அயோனிஸோமனஸிகாரோ, ஸப்³பே³பி வா அகுஸலா த⁴ம்மா ஹேது. காமகு³ணாதி⁴க³மஹேதுபி பாணாதிபாதாதி³அஸுத்³த⁴பயோகோ³ ஹோதீதி தப்³பி³வேகேன பயோக³ஸுத்³தி⁴ விபா⁴விதா. தண்ஹாஸங்கிலேஸஸோத⁴னேன, விவட்டூபனிஸ்ஸயஸங்வட்³ட⁴னேன ச அஜ்ஜா²ஸயவிஸோத⁴னங் ஆஸயபோஸனங். காமேஸூதி நித்³தா⁴ரணே பு⁴ம்மங்.
அனேகபே⁴தோ³தி காமாஸவகாமராக³ஸங்யோஜனாதி³வஸேன, ரூபதண்ஹாதி³வஸேன ச அனேகப்பபே⁴தோ³. காமச்ச²ந்தோ³யேவாதி காமஸபா⁴வோயேவ ச²ந்தோ³, ந கத்துகம்யதாச²ந்தோ³, நாபி குஸலச்ச²ந்தோ³தி அதி⁴ப்பாயோ. ஜா²னபடிபக்க²தோதி ஜா²னஸ்ஸ படிபக்க²பா⁴வதோ தங்ஹேது தன்னிமித்தங் விஸுங் வுத்தோ. அகுஸலபா⁴வஸாமஞ்ஞேன அக்³க³ஹெத்வா விஸுங் ஸரூபேன க³ஹிதோ. யதி³ கிலேஸகாமோவ புரிமபதே³ வுத்தோ, கத²ங் ப³ஹுவசனந்தி ஆஹ ‘‘அனேகபே⁴த³தோ’’திஆதி³.
அஞ்ஞேஸம்பி தி³ட்டி²மானஅஹிரிகானொத்தப்பாதீ³னங், தங்ஸஹிதப²ஸ்ஸாதீ³னஞ்ச. உபரி வுச்சமானானி ஜா²னங்கா³னி உபரிஜா²னங்கா³னி, தேஸங் அத்தனோ பச்சனீகானங் படிபக்க²பா⁴வத³ஸ்ஸனதோ தப்பச்சனீகனீவரணவசனங். நீவரணானி ஹி ஜா²னங்க³பச்சனீகானி தேஸங் பவத்தினிவாரணதோ. ஸமாதி⁴ காமச்ச²ந்த³ஸ்ஸ படிபக்கோ² ராக³ப்பணிதி⁴யா உஜுவிபச்சனீகபா⁴வதோ, நானாரம்மணேஹி பலோபி⁴தஸ்ஸ பரிப்³ப⁴மந்தஸ்ஸ சித்தஸ்ஸ ஸமாதா⁴னதோ ச. பீதி ப்³யாபாத³ஸ்ஸ படிபக்கா² பாமோஜ்ஜேன ஸமானயோக³க்கே²மத்தா. விதக்கோ தி²னமித்³த⁴ஸ்ஸ படிபக்கோ² யோனிஸோ ஸங்கப்பனவஸேன ஸவிப்பா²ரபவத்திதோ. ஸுக²ங் அவூபஸமானுதாபஸபா⁴வஸ்ஸ உத்³த⁴ச்சகுக்குச்சஸ்ஸ படிபக்க²ங் வூபஸந்தஸீதலஸபா⁴வத்தா. விசாரோ விசிகிச்சா²ய படிபக்கோ² ஆரம்மணே அனுமஜ்ஜனவஸேன பஞ்ஞாபடிரூபஸபா⁴வத்தா. மஹாகச்சானத்தே²ரேன தே³ஸிதங் பிடகானங் ஸங்வண்ணனா பேடகங், தஸ்மிங் பேடகே.
பஞ்சகாமகு³ணபே⁴த³விஸயஸ்ஸாதி ஆகா⁴தவத்து²பே⁴தா³தி³விஸயானந்தி ப்³யாபாத³விவேகவசனேன ‘‘அனத்த²ங் மே அசரீ’’தி (தீ³॰ நி॰ 3.340; அ॰ நி॰ 9.29; விப⁴॰ 960) ஆதி³ஆகா⁴தவத்து²பே⁴த³விஸயஸ்ஸ தோ³ஸஸ்ஸ, மோஹாதி⁴கேஹி தி²னமித்³தா⁴தீ³ஹி விவேகவசனேன படிச்சா²த³னவஸேன து³க்கா²தி³புப்³ப³ந்தாதி³பே⁴த³விஸயஸ்ஸ மோஹஸ்ஸ விக்க²ம்ப⁴னவிவேகோ வுத்தோ. காமராக³ப்³யாபாத³ததே³கட்ட²தி²னமித்³தா⁴தி³விக்க²ம்ப⁴கஞ்சேதங் ஸப்³பா³குஸலபடிபக்க²ஸபா⁴வத்தா. ஸப்³ப³குஸலானங் தேன ஸபா⁴வேன ஸப்³பா³குஸலப்பஹாயகங் ஹோதி, ஹொந்தம்பி காமராகா³தி³விக்க²ம்ப⁴னஸபா⁴வமேவ ஹோதி தங்ஸபா⁴வத்தாதி அவிஸேஸெத்வா நீவரணாகுஸலமூலாதீ³னங் ‘‘விக்க²ம்ப⁴னவிவேகோ வுத்தோ ஹோதீ’’தி ஆஹ.
71. யதா²பச்சயங் பவத்தமானானங் ஸபா⁴வத⁴ம்மானங் நத்தி² காசி வஸவத்திதாதி வஸவத்திபா⁴வனிவாரணத்த²ங் ‘‘விதக்கனங் விதக்கோ’’தி வுத்தங். தயித³ங் ‘‘விதக்கனங் ஈதி³ஸமித³’’ந்தி ஆரம்மணஸ்ஸ பரிகப்பனந்தி ஆஹ ‘‘ஊஹனந்தி வுத்தங் ஹோதீ’’தி. யஸ்மா சித்தங் விதக்கப³லேன ஆரம்மணங் அபி⁴னிருள்ஹங் விய ஹோதி, தஸ்மா ஸோ ஆரம்மணாபி⁴னிரோபனலக்க²ணோ வுத்தோ. யதா² ஹி கோசி ராஜவல்லப⁴ங், தங்ஸம்ப³ந்தி⁴னங் மித்தங் வா நிஸ்ஸாய ராஜகே³ஹங் ஆரோஹதி அனுபவிஸதி, ஏவங் விதக்கங் நிஸ்ஸாய சித்தங் ஆரம்மணங் ஆரோஹதி. யதி³ ஏவங், கத²ங் அவிதக்கங் சித்தங் ஆரம்மணங் ஆரோஹதீதி? விதக்கப³லேனேவ. யதா² ஹி ஸோ புரிஸோ பரிசயேன தேன வினாபி நிராஸங்கோ ராஜகே³ஹங் பவிஸதி, ஏவங் பரிசயேன விதக்கேன வினாபி அவிதக்கங் சித்தங் ஆரம்மணங் ஆரோஹதி. பரிசயேனாதி ச ஸந்தானே பவத்தவிதக்கபா⁴வனாஸங்கா²தேன பரிசயேன. விதக்கஸ்ஸ ஹி ஸந்தானே அபி⁴ண்ஹங் பவத்தஸ்ஸ வஸேன சித்தஸ்ஸ ஆரம்மணாபி⁴ருஹணங் சிரபரிசிதங். தேன தங் கதா³சி விதக்கேன வினாபி தத்த² பவத்ததேவ. யதா² தங் ஞாணஸஹிதங் ஹுத்வா ஸம்மஸனவஸேன சிரபரிசிதங் கதா³சி ஞாணவிரஹிதம்பி ஸம்மஸனவஸேன பவத்ததி, யதா² வா கிலேஸஸஹிதங் ஹுத்வா பவத்தங் ஸப்³ப³ஸோ ஆஹனநங். பரிதோ, பரிவத்தெத்வா வா ஆஹனநங் பரியாஹனநங். ‘‘ரூபங் ரூபங், பத²வீ பத²வீ’’தி ஆகோடெந்தஸ்ஸ விய பவத்தி ‘‘ஆஹனநங், பரியாஹனந’’ந்தி ச வேதி³தப்³ப³ங். ஆனயனங் சித்தஸ்ஸ ஆரம்மணே உபனயனங், ஆகட்³ட⁴னங் வா.
அனுஸஞ்சரணங் அனுமஜ்ஜனங் ஆரம்மணே சித்தஸ்ஸ அனுமஸனங், பரிமஜ்ஜனந்தி அத்தோ². ததா² ஹி விசாரோ ‘‘பரிமஜ்ஜனஹத்தோ² விய, ஸஞ்சரணஹத்தோ² வியா’’தி ச வுத்தோ. தத்தா²தி ஆரம்மணே. ஸஹஜாதானங் அனுயோஜனங் ஆரம்மணே அனுவிசாரணஸங்கா²தஅனுமஜ்ஜனவஸேனேவ வேதி³தப்³ப³ங். அனுப்பப³ந்த⁴னங் ஆரம்மணே சித்தஸ்ஸ அவிச்சி²ன்னஸ்ஸ விய பவத்தி. ததா² ஹி ஸோ ‘‘அனுஸந்தா⁴னதா’’தி (த⁴॰ ஸ॰ 8) நித்³தி³ட்டோ². தேனேவ ச ‘‘க⁴ண்டா³னுரவோ விய, பரிப்³ப⁴மனங் வியா’’தி ச வுத்தோ.
கத்த²சீதி பட²மஜ்ஜா²னே, பரித்தசித்துப்பாதே³ஸு ச. விசாரதோ ஓளாரிகட்டே²ன, விசாரஸ்ஸேவ ச புப்³ப³ங்க³மட்டே²ன அனுரவதோ ஓளாரிகோ, தஸ்ஸ ச புப்³ப³ங்க³மோ க⁴ண்டா³பி⁴கா⁴தோ விய விதக்கோ. யதா² ஹி க⁴ண்டா³பி⁴கா⁴தோ பட²மாபி⁴னிபாதோ ஹோதி, ஏவங் ஆரம்மணாபி⁴முக²னிரோபனட்டே²ன விதக்கோ சேதஸோ பட²மாபி⁴னிபாதோ ஹோதி. அபி⁴கா⁴த-க்³க³ஹணேன செத்த² அபி⁴கா⁴தஜோ ஸத்³தோ³ க³ஹிதோதி வேதி³தப்³போ³. விப்பா²ரவாதி விசலனயுத்தோ ஸபரிப்ப²ந்தோ³. பரிப்³ப⁴மனங் விய பரிஸ்ஸயாபா⁴வவீமங்ஸனத்த²ங். அனுப்பப³ந்தே⁴ன பவத்தியந்தி உபசாரே வா அப்பனாயங் வா ஸந்தானேன பவத்தியங். தத்த² ஹி விதக்கோ நிச்சலோ ஹுத்வா ஆரம்மணங் அனுபவிஸித்வா விய பவத்ததி, ந பட²மாபி⁴னிபாதே. பாகடோ ஹோதீதி விதக்கஸ்ஸ விஸேஸோ அபி⁴னிரோபனாகாரோ ஓளாரிகத்தா பட²மஜ்ஜா²னே பாகடோ ஹோதி, தத³பா⁴வதோ பஞ்சகனயே து³தியஜ்ஜா²னே விசாரஸ்ஸ விஸேஸோ அனுமஜ்ஜனாகாரோ பாகடோ ஹோதி.
வாலண்டு³பகங் ஏளகலோமாதீ³ஹி கதசும்ப³டகங். உப்பீளனஹத்தோ²தி பிண்ட³ஸ்ஸ உப்பீளனஹத்தோ². தஸ்ஸேவ இதோ சிதோ ச ஸஞ்சரணஹத்தோ². மண்ட³லந்தி கங்ஸபா⁴ஜனாதீ³ஸு கிஞ்சி மண்ட³லங் வட்டலேக²ங் கரொந்தஸ்ஸ. யதா² புப்ப²ப²லஸாகா²தி³அவயவவினிமுத்தோ அவிஜ்ஜமானோபி ருக்கோ² ‘‘ஸபுப்போ² ஸப²லோ’’தி வோஹரீயதி, ஏவங் விதக்காதி³அங்க³வினிமுத்தங் அவிஜ்ஜமானம்பி ஜா²னங் ‘‘ஸவிதக்கங் ஸவிசார’’ந்தி வோஹரீயதீதி த³ஸ்ஸேதுங் ‘‘ருக்கோ² வியா’’திஆதி³ வுத்தங். ஜா²னபா⁴வனாய புக்³க³லவஸேன தே³ஸேதப்³ப³த்தா விப⁴ங்கே³ புக்³க³லாதி⁴ட்டா²னா தே³ஸனா கதா, அத்தோ² பன தத்ராபி விப⁴ங்கே³பி யதா² இத⁴ ‘‘இமினா ஏவமேவ த³ட்ட²ப்³போ³, பரமத்த²தோ புக்³க³லஸ்ஸேவ அபா⁴வதோதி அதி⁴ப்பாயோ. அத்தோ²…பே॰… த³ட்ட²ப்³போ³ ஜா²னஸமங்கி³னோ விதக்கவிசாரஸமங்கி³தாத³ஸ்ஸனேன, ஜா²னஸ்ஸேவ ச ஸவிதக்கஸவிசாரதாய வுத்தத்தாதி ஏவங் வா எத்த² அத்தோ² த³ட்ட²ப்³போ³.
விவேகாதி விவேகா ஹேதுபூ⁴தாதி விவேக-ஸத்³த³ஸ்ஸ பா⁴வஸாத⁴னதங் ஸந்தா⁴யாஹ. விவேகேதி கத்துஸாத⁴னதங், கம்மஸாத⁴னதங் வா. ‘‘விவித்தோ’’தி ஹி இமினா நீவரணேஹி வினாபூ⁴தோ தேஹி விவேசிதோதி ச ஸாத⁴னத்³வயம்பி ஸங்க³ஹிதமேவாதி.
72. பீணயதீதி தப்பேதி, வட்³டே⁴தி வா. ஸம்பியாயனலக்க²ணாதி பரிதுஸ்ஸனலக்க²ணா. பீணனரஸாதி பரிப்³ரூஹனரஸா. ப²ரணரஸாதி பணீதரூபேஹி காயஸ்ஸ ப்³யாபனரஸா. உத³க்³க³பா⁴வோ ஓத³க்³யங். கு²த்³தி³கா லஹுங் லோமஹங்ஸனமத்தங் கத்வா பி⁴ன்னா ந புன உப்பஜ்ஜதி. க²ணிகா ப³ஹுலங் உப்பஜ்ஜதி. உப்³பே³க³தோ ப²ரணா நிச்சலத்தா, சிரட்டி²திகத்தா ச பணீததரா. சேதியங்க³ணங் க³ந்த்வாதி புண்ணவல்லிகவிஹாரே சேதியங்க³ணங் க³ந்த்வா. பகதியா தி³ட்டா²ரம்மணவஸேனாதி புப்³பே³ மஹாசேதியங் க³ஹிதாரம்மணவஸேன. சித்ரகெ³ண்டு³கோ விசித்ராகாரேன கதகெ³ண்டு³கோ. உபனிஸ்ஸயேதி ஸமீபே, தஸ்ஸ வா விஹாரஸ்ஸ நிஸ்ஸயபூ⁴தே, கோ³சரட்டா²னபூ⁴தேதி அத்தோ².
க⁴ராஜிரேதி கே³ஹங்க³ணே. பப்³ப³தஸிக²ரே கதசேதியங் ‘‘ஆகாஸசேதிய’’ந்தி வுத்தங். க³ஹிதனிமித்தேனேவாதி சேதியவந்த³னங், த⁴ம்மஸ்ஸவனஞ்ச உத்³தி³ஸ்ஸ ‘‘த⁴ஞ்ஞா வதிமே’’திஆதி³னா க³ஹிதகுஸலனிமித்தேனேவ காரணபூ⁴தேன. க³ஹிதங் வா நிமித்தங் ஏதேனாதி க³ஹிதனிமித்தங், வுத்தாகாரேன பவத்தசித்தங், தேன க³ஹிதனிமித்தேனேவ சித்தேன ஸஹ. பக்க²ந்த³ந்தி அனுபவிட்ட²ங். அனுபரிப்பு²டந்தி அனு அனு ஸமந்ததோ பு²டங், ஸப்³ப³ஸோ அனுவிஸடந்தி அத்தோ².
பஸ்ஸத்³தி⁴யா நிமித்தபா⁴வேன க³ப்³ப⁴ங் க³ண்ஹந்தீ. பரிபாசனவஸேன பரிபாகங் க³ச்ச²ந்தீ. அப்பனாஸம்பயுத்தாவ பீதி அப்பனாஸமாதி⁴பூரிகா. க²ணிகஸமாதி⁴பூரிகா ச உபசாரஸமாதி⁴பூரிகா ச அப்பனாஸமாதி⁴ஸ்ஸ விதூ³ரதராதி தது³ப⁴யங் அனாமஸந்தோ ‘‘தாஸு யா அப்பனாஸமாதி⁴ஸ்ஸா’’திஆதி³மாஹ ஸமாதி⁴ஸம்பயோக³ங் க³தாதி புப்³பே³ உபசாரஸமாதி⁴னா ஸம்பயுத்தா ஹுத்வா அனுக்கமேன வட்³டி⁴த்வா அப்பனாஸமாதி⁴னா ஸம்பயோக³ங் க³தா.
73. ஸுக²யதீதி ஸுக²ங், அத்தனா ஸம்பயுத்தத⁴ம்மே லத்³த⁴ஸ்ஸாதே³ கரோதீதி அத்தோ². ஸ்வாயங் கத்துனித்³தே³ஸோ பரியாயலத்³தோ⁴ த⁴ம்மதோ அஞ்ஞஸ்ஸ கத்து நிவத்தனத்தோ², நிப்பரியாயேன பன பா⁴வஸாத⁴னமேவ லப்³ப⁴தீதி ‘‘ஸுக²னங் ஸுக²’’ந்தி வுத்தங். இட்ட²ஸபா⁴வத்தா தங்ஸமங்கீ³புக்³க³லங், ஸம்பயுத்தத⁴ம்மே வா அத்தனி ஸாத³யதீதி ஸாதங் த³-காரஸ்ஸ த-காரங் கத்வா. ஸாதங் ‘‘மது⁴ர’’ந்தி வத³ந்தி. ஸாதங் லக்க²ணங் ஏதஸ்ஸாதி ஸாதலக்க²ணங். உபப்³ரூஹனங் ஸம்பயுத்தத⁴ம்மானங் ஸங்வட்³ட⁴னங். து³க்க²ங் விய அவிஸ்ஸஜ்ஜெத்வா அது³க்க²மஸுகா² விய அனஜ்ஜு²பெக்கி²த்வா அனு அனு க³ண்ஹனங், உபகாரிதா வா அனுக்³க³ஹோ. கத்த²சி பட²மஜ்ஜா²னாதி³கே. படிலாப⁴துட்டீ²தி படிலாப⁴வஸேன உப்பஜ்ஜனகதுட்டி². படிலத்³த⁴ரஸானுப⁴வனந்தி படிலத்³த⁴ஸ்ஸ ஆரம்மணரஸஸ்ஸ அனுப⁴வனந்தி ஸபா⁴வதோ பீதிஸுகா²னி விப⁴ஜித்வா த³ஸ்ஸேதி. யத்த² பீதி, தத்த² ஸுக²ந்தி விதக்கஸ்ஸ விய இதரேன பீதியா ஸுகே²ன அச்சந்தஸங்யோக³மாஹ. ‘‘யத்த² ஸுக²ங், தத்த² ந நியமதோ பீதீ’’தி விசாரஸ்ஸ விய விதக்கேன ஸுக²ஸ்ஸ பீதியா அனச்சந்தஸங்யோக³ங். தேன அச்சந்தானச்சந்தஸங்யோகி³தாய பீதிஸுகா²னங் விஸேஸங் த³ஸ்ஸேதி. கங் தாரெந்தி எத்தா²தி கந்தாரங், நிருத³கமருட்டா²னங். வனமேவ வனந்தங். தஸ்மிங் தஸ்மிங் ஸமயேதி இட்டா²ரம்மணஸ்ஸ படிலாப⁴ஸமயே, படிலத்³த⁴ஸ்ஸ ரஸானுப⁴வனஸமயே, வனச்சா²யாதீ³னங் ஸவனத³ஸ்ஸனஸமயே, பவேஸபரிபோ⁴க³ஸமயே ச. பாகடபா⁴வதோதி யதா²க்கமங் பீதிஸுகா²னங் விபூ⁴தபா⁴வதோ.
விவேகஜங் பீதிஸுக²ந்தி எத்த² புரிமஸ்மிங் அத்தே² விவேகஜந்தி ஜா²னங் வுத்தங். பீதிஸுக²ஸத்³த³தோ ச அத்தி²அத்த²விஸேஸதோ ‘‘அஸ்ஸ ஜா²னஸ்ஸ, அஸ்மிங் வா ஜா²னே’’தி எத்த² அ-காரோ த³ட்ட²ப்³போ³. து³தியே பீதிஸுக²மேவ விவேகஜங். ‘‘விவேகஜங்பீதிஸுக²’’ந்தி ச அஞ்ஞபத³த்த²ஸமாஸோ, பச்சத்தனித்³தே³ஸஸ்ஸ ச அலோபோ கதோ. லோபே வா ஸதி ‘‘விவேகஜபீதிஸுக²’’ந்தி பாடோ²தி அயங் விஸேஸோ.
உபஸம்பஜ்ஜாதி எத்த² உப-ஸங்-ஸத்³தா³ ‘‘உபலப்³ப⁴தி, ஸங்பு⁴ஞ்ஜதீ’’திஆதீ³ஸு விய நிரத்த²காதி த³ஸ்ஸேதுங் ‘‘உபக³ந்த்வா’’திஆதி³ங் வத்வா புன தேஸங் ஸாத்த²கபா⁴வங் த³ஸ்ஸேதுங் ‘‘உபஸம்பாத³யித்வா’’திஆதி³ வுத்தங், தஸ்மா பத்வா, ஸாதெ⁴த்வாதி வா அத்தோ². இரியந்தி கிரியங். வுத்திஆதீ³னி தஸ்ஸேவ வேவசனானி. பாலனாதி ஹி ஏகங் இரியாபத²பா³த⁴னங் இரியாபத²ந்தரேஹி ரக்க²ணா.
பஞ்சங்க³விப்பஹீனாதி³வண்ணனா
74. பஞ்ச பஞ்சங்க³விப்பஹீனங். ‘‘அக்³யாஹிதோ’’தி எத்த² ஆஹித-ஸத்³த³ஸ்ஸ விய விப்பஹீன-ஸத்³த³ஸ்ஸெத்த² பரவசனங் த³ட்ட²ப்³ப³ங், பஞ்சஹி அங்கே³ஹி விப்பஹீனந்தி வா பஞ்சங்க³விப்பஹீனங். நனு அஞ்ஞேபி அகுஸலா த⁴ம்மா இமினா ஜா²னேன பஹீயந்தி, அத² கஸ்மா பஞ்சங்க³விப்பஹீனதாவ வுச்சதீதி ஆஹ ‘‘கிஞ்சாபீ’’திஆதி³. ஜா²னலாபி⁴னோபி அஜா²னஸமங்கி³காலே ஜா²னபடிபக்க²லோப⁴சித்தாதீ³னங் பவத்திஸப்³பா⁴வதோ ‘‘ஜா²னக்க²ணே’’தி வுத்தங். பஹீயந்தீதி விக³ச்ச²ந்தி, நப்பவத்தந்தீதி அத்தோ². ஏகத்தாரம்மணேதி பத²வீகஸிணாதி³வஸேன ஏகஸபா⁴வே, ஏகக்³க³தாஸங்கா²தே ஏகத்தாவஹே வா ஆரம்மணே. தந்தி தங் நானாவிஸயபலோபி⁴தங் சித்தங். காமதா⁴துப்பஹானாயாதி நானாவிஸயஸமூபப்³யூள்ஹாய காமதா⁴துயா பஹானாய ஸமதிக்கமாய படிபத³ங் ஜா²னங் நப்படிபஜ்ஜதி. நிரந்தரந்தி விக்கே²பேன அனந்தரிதங், ஸஹிதந்தி அத்தோ². அகம்மஞ்ஞந்தி அகம்மனீயங், பா⁴வனாகம்மஸ்ஸ அயொக்³யந்தி அத்தோ². உத்³த⁴ச்சகுக்குச்சபரேதந்தி உத்³த⁴ச்சகுக்குச்சேன அபி⁴பூ⁴தங். பரிப்³ப⁴மதி அனவட்டா²னதோ, அவட்டா²னஸ்ஸ ஸமாதா⁴னஸ்ஸ அபா⁴வதோதி அத்தோ². விசிகிச்சா²ய உபஹதந்தி ஸாதிஸயஸ்ஸ விசாரஸ்ஸ அபா⁴வதோ ‘‘ஸம்மாஸம்பு³த்³தோ⁴ நு கோ² ப⁴க³வா, ந நு கோ²’’தி, ‘‘பத²வீ பத²வீ’’திஆதி³னா மனஸிகாரேன, ‘‘ஜா²னங் ஸியா நு கோ², ந நு கோ²’’திஆதி³னா ச பவத்தாய விசிகிச்சா²ய உபஹதங். நாரோஹதி அப்படிபத்தினிமித்தத்தா. விஸேஸேன ஜா²னந்தராயகரத்தாதி ஸமாதி⁴ஆதீ³னங் உஜுவிபச்சனீகபா⁴வேன ஜா²னாதி⁴க³மஸ்ஸ அந்தராயகரணதோ.
தேஹீதி ஜா²னாதி⁴க³மஸ்ஸ பச்சயபூ⁴தேஹி விதக்கவிசாரேஹி. அவிக்கே²பாய ஸம்பாதி³தப்பயோக³ஸ்ஸாதி ததோ ஏவங் ஸமாதா⁴னாய நிப்பா²தி³தபா⁴வனாபயோக³ஸ்ஸ. சேதஸோ பயோக³ஸம்பத்திஸம்ப⁴வாதி யதா²வுத்தபா⁴வனாபயோக³ஸம்பத்திஸமுட்டா²னா. பீதி பீணனங் பா⁴வனாவஸேன தப்பனங். உபப்³ரூஹனங் பா⁴வனாவஸேன பரிவுத்³தி⁴ங் சேதஸோ கரோதீதி ஸம்ப³ந்தோ⁴. நந்தி சித்தங். ஸஸேஸஸம்பயுத்தத⁴ம்மந்தி அவஸிட்ட²ப²ஸ்ஸாதி³த⁴ம்மஸஹிதங், ஸமங் ஸம்மா ச ஆதி⁴யதீதி ஸம்ப³ந்தோ⁴. இந்த்³ரியஸமதாவஸேன ஸமங், படிபக்க²த⁴ம்மானங். தூ³ரீபா⁴வே லீனுத்³த⁴ச்சாபா⁴வேன ஸம்மா ச ட²பேதீதி அத்தோ². ஏகக்³க³தா ஹி ஸமாதா⁴னகிச்சேன சித்தங், ஸம்பயுத்தத⁴ம்மே ச அத்தானங் அனுவத்தாபெந்தீ ஜா²னக்க²ணே ஸாதிஸயங் ஸமாஹிதே கரோதீதி. உப்பத்திவஸேனாதி யதா²பச்சயங் உப்பஜ்ஜனவஸேன உப்பன்னங் நாம ஹோதி தத்தே²வ ஜா²னவோஹாரதோ. தேனாஹ ‘‘தஸ்மா’’திஆதி³. ‘‘யதா² பனா’’திஆதி³னாபி உபமாவஸேன தமேவத்த²ங் பாகடதரங் கரோதி.
பகதிசித்ததோதி பாகதிககாமாவசரசித்ததோ. ஸுவிஸதே³னாதி ஸுட்டு² விஸதே³ன, படுதரேனாதி அத்தோ². ஸப்³பா³வந்தந்தி ஸப்³பா³வயவவந்தங், அனவஸேஸந்தி அத்தோ². அப்பு²டந்தி அஸம்பு²ட்ட²ங். ஆரம்மணேஸு பு²ஸிதாதி அப்பனாவஸேன பவத்தமானா சித்தேகக்³க³தா ஸமந்ததோ ஆரம்மணங் ப²ரந்தீ விய ஹோதீதி கத்வா வுத்தங். கஸ்மா பனெத்த² ஜா²னபாடே² அக்³க³ஹிதா சித்தேகக்³க³தா க³ஹிதாதி அனுயோக³ங் ஸந்தா⁴ய ‘‘தத்த² சித்தேகக்³க³தா’’திஆதி³ வுத்தங். தத்தா²தி தேஸு ஜா²னங்கே³ஸு. ந நித்³தி³ட்டா²தி ஸரூபதோ ந நித்³தி³ட்டா², ஸாமஞ்ஞதோ பன ஜா²னக்³க³ஹணேன க³ஹிதா. ஏவங் வுத்தத்தாதி ஸரூபேனேவ வுத்தத்தா, அங்க³மேவ சித்தேகக்³க³தாதி ஸம்ப³ந்தோ⁴. யேன அதி⁴ப்பாயேனாதி யேன விதக்காதீ³ஹி ஸஹ வத்தந்தங் த⁴ம்மங் தீ³பேதுங் தஸ்ஸ பகாஸனாதி⁴ப்பாயேன ‘‘ஸவிதக்கங் ஸவிசார’’ந்திஆதி³னா உத்³தே³ஸோ கதோ. ஸோ ஏவ அதி⁴ப்பாயோ தேன ப⁴க³வதா விப⁴ங்கே³ ‘‘சித்தேகக்³க³தா’’தி நித்³தி³ஸந்தேன பகாஸிதோ. தஸ்மா ஸா ஜா²னபாடே² அக்³க³ஹிதாதி ந சிந்தேதப்³ப³ங்.
திவித⁴கல்யாணவண்ணனா
75. ஆதி³மஜ்ஜ²பரியோஸானவஸேனாதி ஜா²னஸ்ஸ ஆதி³மஜ்ஜ²பரியோஸானவஸேன. லக்க²ணவஸேனாதி தேஸங்யேவ அப்பனாயங் லக்கி²தப்³ப³பா⁴வவஸேன.
தத்ராதி தஸ்மிங் கல்யாணதாலக்க²ணானங் விபா⁴வனே. படிபதா³விஸுத்³தீ⁴தி படிபஜ்ஜதி ஜா²னங் ஏதாயாதி படிபதா³, கொ³த்ரபு⁴பரியோஸானோ புப்³ப³பா⁴கி³யோ பா⁴வனானயோ. பரிபந்த²தோ விஸுஜ்ஜ²னங் விஸுத்³தி⁴, படிபதா³ய விஸுத்³தி⁴ படிபதா³விஸுத்³தி⁴. ஸா பனாயங் யஸ்மா ஜா²னஸ்ஸ உப்பாத³க்க²ணே லப்³ப⁴தி, தஸ்மா வுத்தங் ‘‘படிபதா³விஸுத்³தி⁴ ஆதீ³’’தி. உபெக்கா²னுப்³ரூஹனாதி விஸோதே⁴தப்³ப³தாதீ³னங் அபா⁴வதோ ஜா²னபரியாபன்னாய தத்ரமஜ்ஜ²த்துபெக்கா²ய கிச்சனிப்ப²த்தியா அனுப்³ரூஹனா. ஸா பனாயங் விஸேஸதோ ஜா²னஸ்ஸ டி²திக்க²ணே லப்³ப⁴தி. தேன வுத்தங் ‘‘உபெக்கா²னுப்³ரூஹனா மஜ்ஜே²’’தி. ஸம்பஹங்ஸனாதி தத்த² த⁴ம்மானங் அனதிவத்தனாதி³ஸாத⁴கஸ்ஸ ஞாணஸ்ஸ கிச்சனிப்ப²த்திவஸேன பரியோத³பனா. ஸா பன யஸ்மா ஜா²னஸ்ஸ ஓஸானக்க²ணே பாகடா ஹோதி ‘‘ஸம்பஹங்ஸனா பரியோஸான’’ந்தி. இமானி தீணி லக்க²ணானீதி பரிபந்த²தோ சித்தஸ்ஸ விஸுஜ்ஜ²னாகாரோ ஆதி³கல்யாணஞ்சேவ விஸுத்³தி⁴படிபத³த்தா. யதா²வுத்தேஹி லக்க²ணேஹி ஸமன்னாக³தத்தா, ஸம்பன்னலக்க²ணத்தா ச திலக்க²ணஸம்பன்னஞ்ச. இமினா நயேன மஜ்ஜ²பரியோஸானலக்க²ணானஞ்ச யோஜனா வேதி³தப்³பா³.
ஸம்ப⁴ரீயதி ஜா²னங் ஏதேனாதி ஸம்பா⁴ரோ, நானாவஜ்ஜனபரிகம்மங். ஸஹ ஸம்பா⁴ரேனாதி ஸஸம்பா⁴ரோ, ஸோ ஏவ ஸஸம்பா⁴ரிகோ. உபசாரோதி ஏகாவஜ்ஜனூபசாரமாஹ. பக்³க³ஹாதி³கிச்சஸ்ஸ புப்³ப³பா⁴கே³ பா⁴வனாய ஏவ ஸாதி⁴தத்தா யா தத்த² ஏகாவஜ்ஜனூபசாரே ஸித்³தா⁴ அஜ்ஜு²பெக்க²னா, ஸா ஜா²னக்க²ணே பரிப்³ரூஹிதா நாம ஹோதீதி வுத்தங் ‘‘உபெக்கா²னுப்³ரூஹனா நாம அப்பனா’’தி. யதா²தி⁴க³தங் ஜா²னங் நிஸ்ஸாய யோ பஹட்டா²காரோ சித்தஸ்ஸ பரிதோஸோ, தங் பச்சவெக்க²ணாவஸேன பவத்தங் ஸந்தா⁴யாஹ ‘‘ஸம்பஹங்ஸனா நாம பச்சவெக்க²ணா’’தி. ஏகேதி அப⁴யகி³ரிவாஸினோ. தே ஹி ஏவங் படிபதா³விஸுத்³தி⁴ஆதி³கே வண்ணயந்தி, தத³யுத்தங். ததா² ஹி ஸதி அஜ்ஜா²னத⁴ம்மேஹி ஜா²னஸ்ஸ கு³ணஸங்கித்தனங் நாம கதங் ஹோதி. ந ஹி பூ⁴மந்தரங் பூ⁴மந்தரபரியாபன்னங் ஹோதி. பாளியா சேதங் விருத்³த⁴ந்தி த³ஸ்ஸேதுங் ‘‘யஸ்மா பனா’’திஆதி³ வுத்தங். தத்த² ஏகத்தக³தங் சித்தந்தி இந்த்³ரியானங் ஏகரஸபா⁴வேன, ஏகக்³க³தாய ச ஸிகா²ப்பத்தியா தத³னுகு³ணங் ஏகத்தங் க³தந்தி ஏகத்தக³தங், ஸஸம்பயுத்தங் அப்பனாபத்தசித்தங். தஸ்ஸேவ படிபதா³விஸுத்³தி⁴பக்க²ந்த³தாதி³ அனந்தரமேவ வுச்சதி. தஸ்மாதி யஸ்மா ஏகஸ்மிங்யேவ அப்பனாசித்தக்க²ணே படிபதா³விஸுத்³தி⁴ஆதி³ பாளியங் வுத்தங், தஸ்மா ஆக³மனவஸேனாதி பரிகம்மாக³மனவஸேன. அனதிவத்தனாதீ³தி ஆதி³-ஸத்³தே³ன இந்த்³ரியேகரஸதாதது³பக³வீரியவாஹனாஸேவனானி ஸங்க³ண்ஹாதி. பரியோதா³பகஸ்ஸாதி பரிஸோத⁴கஸ்ஸ பப⁴ஸ்ஸரபா⁴வகரஸ்ஸ. அனதிவத்தனாதி³பா⁴வஸாத⁴னமேவ செத்த² ஞாணஸ்ஸ கிச்சனிப்ப²த்தி வேதி³தப்³பா³.
தஸ்மிந்தி தஸ்மிங் வாரே, சதுபஞ்சசித்தபரிமாணாய அப்பனாவீதி²யந்தி அத்தோ². ததோ பரிபந்த²தோ. சித்தங் விஸுஜ்ஜ²தீதி யதி³பி ஆக³மனங் க³ஹேதுங் அவிஸேஸேன விய வுத்தங், பரிகம்மவிஸுத்³தி⁴தோ பன அப்பனாவிஸுத்³தி⁴ ஸாதிஸயாவ. தேனாஹ ‘‘விஸுத்³த⁴த்தா’’திஆதி³. ஆவரணவிரஹிதங் ஹுத்வாதி யேனாவரணேன மஜ்ஜி²மங் ஸமத²னிமித்தங். தேனாஹ ‘‘ஸமப்பவத்தோ அப்பனாஸமாதி⁴யேவா’’தி. தத³னந்தரங் பன புரிமசித்தந்தி தஸ்ஸ அப்பனாசித்தஸ்ஸ அனந்தரபச்சயபூ⁴தங் புரிமங் சித்தங், கொ³த்ரபு⁴சித்தந்தி அத்தோ². ஏகஸந்ததிபரிணாமனயேனாதி யதா² ‘‘ததே³வ கீ²ரங் த³தி⁴ஸம்பன்ன’’ந்தி, ஏவங் ஸதிபி பரித்தமஹக்³க³தபா⁴வபே⁴தே³, பச்சயபச்சயுப்பன்னபா⁴வபே⁴தே³ ச ஏகிஸ்ஸா ஏவ ஸந்ததியா பரிணாமூபக³மனநயேன ஏகத்தனயவஸேன. தத²த்தந்தி தத²பா⁴வங் அப்பனாஸமாதி⁴வஸேன ஸமாஹிதபா⁴வங். ஏவங் படிபன்னத்தாதி வுத்தாகாரேன படிபஜ்ஜமானத்தா. யஸ்மிஞ்ஹி க²ணே தத²த்தங் மஜ்ஜி²மங் ஸமத²னிமித்தங் படிபஜ்ஜதி, தஸ்மிங்யேவ க²ணே தத²த்துபக³மனேன அப்பனாஸமாதி⁴னா ஸமாஹிதபா⁴வூபக³மனேன தத்த² பக்க²ந்த³தி நாம. புரிமசித்தேதி அப்பனாசித்தஸ்ஸ புரிமஸ்மிங் சித்தே கொ³த்ரபு⁴சித்தே. விஜ்ஜமானாகாரனிப்பா²தி³காதி தஸ்மிங் சித்தே விஜ்ஜமானானங் பரிபந்த²விஸுத்³தி⁴மஜ்ஜி²மஸமத²படிபத்திபக்க²ந்த³னாகாரானங் நிப்பா²தி³கா, தேனாகாரேன நிப்ப²ஜ்ஜமானாதி அத்தோ². தேயேவ ஹி ஆகாரா பச்சயவிஸேஸதோ ஜா²னக்க²ணே நிப்ப²ஜ்ஜமானா ‘‘படிபதா³விஸுத்³தீ⁴’’தி லத்³த⁴ஸமஞ்ஞா ஜா²னஸ்ஸ தங் விஸேஸங் நிப்பா²தெ³ந்தா விய வுத்தா. உப்பாத³க்க²ணேயேவாதி அத்தலாப⁴வேலாயமேவ. யதி³ ஏவங், கத²ங் தே ஆகாரா நிப்ப²ஜ்ஜந்தீதி ஆஹ ‘‘ஆக³மனவஸேனா’’தி.
தஸ்ஸாதி சித்தஸ்ஸ. ‘‘விஸுத்³த⁴ங் சித்தங் அஜ்ஜு²பெக்க²தீ’’தி பாளியங் (படி॰ ம॰ 1.158) புக்³க³லாதி⁴ட்டா²னேன ஆக³தாதி ‘‘ப்³யாபாரங் அகரொந்தோ’’தி ஆஹ. ஸமத²படிபத்திதத²த்துபக³மனஞ்ச இத⁴ ஸமத²பா⁴வாபத்தியேவாதி ஆஹ ‘‘ஸமத²பா⁴வூபக³மனேனா’’தி. கிலேஸஸங்ஸக்³க³ங் பஹாய ஏகத்தேன உபட்டி²தஸ்ஸாதி புப்³பே³ ‘‘கத²ங் நு கோ² கிலேஸஸங்ஸக்³க³ங் பஜஹெய்ய’’ந்தி படிபன்னஸ்ஸ இதா³னி ஸமத²படிபத்தியா தஸ்ஸ பஹீனத்தா கிலேஸஸங்க³ணிகாபா⁴வேன ஏகத்தேன உபட்டி²தஸ்ஸ ஜா²னசித்தஸ்ஸ. பரிபந்த²விஸுத்³தி⁴மஜ்ஜி²மஸமத²படிபத்திபக்க²ந்த³னேஹி வுத்³தி⁴ப்பத்தியா அனுப்³ரூஹிதே ஜா²னசித்தே லத்³தோ⁴காஸா தத்ரமஜ்ஜ²த்துபெக்கா² ஸம்பயுத்தேஸு ஸமவாஹிதபா⁴வேன பவத்தமானா தே அனுப்³ரூஹெந்தீ விய ஹோதீதி ஆஹ ‘‘தத்ரமஜ்ஜ²த்துபெக்கா²ய கிச்சவஸேன உபெக்கா²னுப்³ரூஹனா வேதி³தப்³பா³’’தி.
யே தத்தா²தி தஸ்மிங் ஜா²னசித்தே. அஞ்ஞமஞ்ஞானதிவத்தனவஸேன கிச்சகரணதோ யுகே³ நத்³தா⁴ ப³த்³தா⁴ விய யுக³னத்³தா⁴. விமுத்திரஸேனாதி விமுச்சனகிச்சேன, விமுச்சனஸம்பத்தியா வா. ஏஸ யோகீ³. வாஹயதீதி பவத்தேதி. அஸ்ஸாதி ஜா²னசித்தஸ்ஸ. தஸ்மிங் க²ணேதி ப⁴ங்க³க்க²ணே. உப்பாத³க்க²ணே அதீதே ஹி டி²திக்க²ணதோ பட்டா²ய ஆஸேவனா தே ஆகாராதி அஞ்ஞமஞ்ஞானதிவத்தனாத³யோ தத்த² த⁴ம்மானங் பவத்திஆகாரா. ஆஸேவனாபி ஹி ஆஸேவனபச்சயபா⁴வீனங் த⁴ம்மானங் பவத்திஆகாரோயேவ. ஸங்கிலேஸவோதா³னேஸூதி ஸமாதி⁴பஞ்ஞானங் ஸமரஸதாய அகரணங் பா⁴வனாய ஸங்கிலேஸோ, கரணங் வோதா³னங். ததா² ஸேஸேஸுபி. ஏவமேதேஸு ஸங்கிலேஸவோதா³னேஸு தங் தங் ஆதீ³னவங் தோ³ஸங் ஆனிஸங்ஸங் கு³ணங் புரேதரங் பாடிஹாரியஞாணேன தி³ஸ்வா யதா² அஞ்ஞமஞ்ஞானதிவத்தனாத³யோ ஹொந்தி, ததா² பா⁴வனாய ஸம்பஹங்ஸிதத்தா தேனேவ ஞாணேன விஸோதி⁴தத்தா. விஸோத⁴னங் ஹெத்த² ஸம்பஹங்ஸனங். தே ஆகாரா யஸ்மா நிப்ப²ன்னா, தஸ்மா ‘‘த⁴ம்மானங்…பே॰… வேதி³தப்³பா³தி வுத்த’’ந்தி லக்க²ணஸங்வண்ணனாய ஆதி³ம்ஹி வுத்தங் நிக³மனவஸேன த³ஸ்ஸேதி.
‘‘யஸ்மா உபெக்கா²வஸேன ஞாணங் பாகடங் ஹோதீ’’தி கோ ஸம்ப³ந்தோ⁴. கஸ்மா ஸம்பஹங்ஸனாவ பரியோஸானந்தி வுத்தா, ந உபெக்கா²னுப்³ரூஹனாதி சோத³னங் ஸந்தா⁴ய ‘‘தத்த² யஸ்மா உபெக்கா²வஸேன ஞாணங் பாகடங் ஹோதீ’’தி வுத்தங். தத்தா²தி தஸ்மிங் பா⁴வனாசித்தே. உபெக்கா²வஸேன ஞாணங் பாகடங் ஹோதீதி அப்பனாகாலே பா⁴வனாய ஸமப்பவத்தியா, படிபக்க²ஸ்ஸ ச பஹானதோ பக்³க³ஹாதீ³ஸு ப்³யாபாரஸ்ஸ அகாதப்³ப³தோ அஜ்ஜு²பெக்க²னாவ ஹோதி. யங் ஸந்தா⁴ய வுத்தங் ‘‘ஸமயே சித்தஸ்ஸ அஜ்ஜு²பெக்க²னா, விஸுத்³த⁴ங் சித்தங் அஜ்ஜு²பெக்க²தீ’’தி ச ஆதி³. ஸா பனாயங் அஜ்ஜு²பெக்க²னா ஞாணஸ்ஸ கிச்சஸித்³தி⁴யா ஹோதி, விஸேஸதோ ஞாணஸாத⁴னத்தா அப்பனாப்³யாபாரஸ்ஸாதி ப²லேன காரணானுமானஞாயேன. யஸ்மா உபெக்கா²வஸேன ஞாணங் பாகடங் ஹோதி, தஸ்மா ஞாணகிச்சபூ⁴தா ஸம்பஹங்ஸனா பரியோஸானந்தி வுத்தாதி ஸம்ப³ந்தோ⁴.
இதா³னி யதா²வுத்தமத்த²ங் பாளியா ஸமத்தே²துங் ‘‘யதா²ஹா’’திஆதி³ வுத்தங். ததா²பக்³க³ஹிதங் சித்தந்தி யதா² பா⁴வனாசித்தங் கோஸஜ்ஜபக்கே² ந பததி, ததா² வீரியஸம்பொ³ஜ்ஜ²ங்க³ட்டா²னியானங் த⁴ம்மானங் ப³ஹுலீகாரவஸேன பக்³க³ஹிதங். ஸாது⁴கங் அஜ்ஜு²பெக்க²தீதி பக்³க³ண்ஹந்தேனாபி ஸமாதி⁴ஸ்ஸ வீரியஸமதாயோஜனவஸேன பக்³க³ஹிதத்தா ஸக்கச்சங் அஜ்ஜு²பெக்க²தி, தத்ரமஜ்ஜ²த்துபெக்கா² ஓகாஸங் ‘‘பஞ்ஞாவஸேன பஞ்ஞிந்த்³ரியங் அதி⁴மத்தங் ஹோதீ’’தி. தஸ்ஸ அதி⁴மத்தத்தா ஏவ அஜ்ஜு²பெக்க²ந்தஸ்ஸேவ நானாஸபா⁴வேஹி நீவரணபமுகே²ஹி கிலேஸேஹி அப்பனாசித்தங் விமுச்சதி. விமொக்க²வஸேன விமுச்சனவஸேன. பஞ்ஞாவஸேனாதி புப்³பே³ பவத்தபாரிஹாரியபஞ்ஞாவஸேன. விமுத்தத்தாதி நானாகிலேஸேஹி விமுத்தத்தா ஏவ. தே த⁴ம்மா ஸத்³தா⁴த³யோ, விஸேஸதோ ஸத்³தா⁴பஞ்ஞாவீரியஸமாத⁴யோ ஏகரஸா ஸமானகிச்சா ஹொந்தி. ஏவமயங் இந்த்³ரியானங் ஏகரஸட்டே²ன பா⁴வனா நிப்ப²ஜ்ஜமானா ஞாணப்³யாபாரோதி ஆஹ ‘‘ஞாணகிச்சபூ⁴தா ஸம்பஹங்ஸனா பரியோஸான’’ந்தி. ஏவங் திவிதா⁴ய படிபதா³விஸுத்³தி⁴யா லத்³த⁴விஸேஸாய திவிதா⁴ய உபெக்கா²னுப்³ரூஹனாய ஸாதிஸயங் பஞ்ஞிந்த்³ரியஸ்ஸ அதி⁴முத்தபா⁴வேன சதுப்³பி³தா⁴பி ஸம்பஹங்ஸனா ஸிஜ்ஜ²தீதி ஆக³மனுபெக்கா² ஞாணகிச்சவஸேன த³ஸபி ஆகாரா ஜா²னே ஏவ வேதி³தப்³பா³.
க³ணனானுபுப்³ப³தாதி க³ணனானுபுப்³ப³தாய, க³ணனானுபுப்³ப³தாமத்தங் வா பட²மந்தி இத³ந்தி அத்தோ². தேன தே³ஸனாக்கமங் உல்லிங்கே³தி. ‘‘பட²மங் உப்பன்னந்தி பட²ம’’ந்தி இமினா படிபத்திக்கமங், உப்பன்னந்தி ஹி அதி⁴க³தந்தி அத்தோ². ‘‘பட²மங் ஸமாபஜ்ஜிதப்³ப³ந்தி பட²ம’’ந்தி இத³ங் பன ந ஏகந்தலக்க²ணந்தி அட்ட²கதா²யங் (த⁴॰ ஸ॰ அட்ட²॰ 160) படிஸித்³த⁴த்தா இத⁴ ந க³ஹிதங். ஆரம்மணூபனிஜ்ஜா²னங் லக்க²ணூபனிஜ்ஜா²னந்தி து³விதே⁴ ஜா²னே இதா⁴தி⁴ப்பேதஜ்ஜா²னமேவ த³ஸ்ஸேதுங் ‘‘ஆரம்மணூபனிஜ்ஜா²னதோ’’தி வுத்தங். பத²வீகஸிணஸங்கா²தஸ்ஸ அத்தனோ அத்தனோ ஆரம்மணஸ்ஸ ரூபங் விய சக்கு²னா உபனிஜ்ஜா²யனதோ. பச்சனீகஜா²பனதோதி நீவரணாதீ³னங் பச்சனீகத⁴ம்மானங் த³ஹனதோ விக்க²ம்ப⁴னவஸேன பஜஹனதோ. ஸகலட்டே²னாதி ஹெட்டா² வுத்தனயேன கதே வா அகதே வா பரிச்சி²ஜ்ஜ க³ஹிதே பத²வீபா⁴கே³ பத²வீமண்ட³லே ஸகலாரம்மணகரணட்டே²ன. ந ஹி தஸ்ஸ ஏகதே³ஸமாரம்மணங் கரீயதி. பத²வீகஸிணஸன்னிஸ்ஸயதாய நிமித்தங் பத²வீகஸிணங் யதா² ‘‘மஞ்சா உக்குட்டி²ங் கரொந்தீ’’தி. தங்ஸஹசரணதோ ஜா²னங் பத²வீகஸிணங் யதா² ‘‘குந்தா பசரந்தீ’’தி.
சிரட்டி²திஸம்பாத³னவண்ணனா
76. லக்க²ட்டா²னே டி²தங் ஸரேன வாலங் விஜ்ஜ²தீதி வாலவேதீ⁴. இத⁴ பன அனேகதா⁴ பி⁴ன்னஸ்ஸ வாலஸ்ஸ அங்ஸுங் விஜ்ஜ²ந்தோ ‘‘வாலவேதீ⁴’’தி அதி⁴ப்பேதோ. தேன வாலவேதி⁴னா. ஸூதே³னாதி ப⁴த்தகாரேன. ‘‘ஆகாரா பரிக்³க³ஹேதப்³பா³’’தி ஸங்கே²பதோ வுத்தமத்த²ங் விவரிதுங் ‘‘யதா² ஹீ’’திஆதி³ வுத்தங். தத்த² ஸுகுஸலோதி ஸுட்டு² சே²கோ. த⁴னுக்³க³ஹோதி இஸ்ஸாஸோ. கம்மந்தி யொக்³யங். அக்கந்தபதா³னந்தி விஜ்ஜ²னகாலே அக்கமனவஸேன பவத்தபதா³னங். ஆகாரந்தி த⁴னுஜியாஸரானங் க³ஹிதாகாரங். பரிக்³க³ண்ஹெய்யாதி உபதா⁴ரெய்ய. போ⁴ஜனஸப்பாயாத³யோதி ஆதி³-ஸத்³தோ³ அவுத்தாகாரானம்பி ஸங்கா³ஹகோ த³ட்ட²ப்³போ³. தேன உதுபா⁴வனானிமித்தாதீ³னம்பி பரிக்³க³ண்ஹனங் வுத்தங் ஹோதி. தஸ்மிந்தி தஸ்மிங் தருணஸமாதி⁴ம்ஹி.
ப⁴த்தாரந்தி பரிவிஸந்தோதி போ⁴ஜெந்தோ. தஸ்ஸ ருச்சித்வா பு⁴ஞ்ஜனாகாரங் ஸல்லக்கெ²த்வா தஸ்ஸ உபனாமெந்தோதி யோஜனா. அயம்பி யோகீ³. அதி⁴க³தக்க²ணே போ⁴ஜனாத³யோ ஆகாரேதி புப்³பே³ ஜா²னஸ்ஸ அதி⁴க³தக்க²ணே கிச்சஸாத⁴கே போ⁴ஜனாதி³க³தே ஆகாரே. க³ஹெத்வாதி பரிக்³க³ஹெத்வா ஸல்லக்கெ²த்வா. நட்டே² நட்டே² ஸமாதி⁴ம்ஹி புனப்புனங் அப்பனாய.
மஹானஸவிஜ்ஜாபரிசயேன பண்டி³தோ. தத்த² விஸத³ஞாணதாய ப்³யத்தோ. டா²னுப்பத்திககஓஸல்லயோகே³ன குஸலோ. நானச்சயேஹீதி நானச்சயேஹி நானாஸபா⁴வேஹி, நானாரஸேஹீதி அத்தோ². தேனாஹ ‘‘அம்பி³லக்³கே³ஹீ’’திஆதி³. ஸூபேஹீதி ப்³யஞ்ஜனேஹி. அம்பி³லக்³கே³ஹீதி அம்பி³லகொட்டா²ஸேஹி, யே வா அம்பி³லரஸா ஹுத்வா அக்³க³பூ⁴தா, தேஹி சதுரம்பி³லாதி³மிஸ்ஸேஹி. ஏஸ நயோ தித்தகக்³கா³தீ³ஸுபி. கா²ரிகேஹீதி வாதிங்க³ணகளீராதி³மிஸ்ஸேஹி. நிமித்தந்தி ஆகாரங் ருச்சனவஸேன பு⁴ஞ்ஜனாகாரங். உக்³க³ண்ஹாதீதி உபரூபரி க³ண்ஹாதி உபதா⁴ரேதி. இமஸ்ஸ வா ஸூபெய்யஸ்ஸ அத்தா²ய ஹத்த²ங் அபி⁴ஹரதி. அபி⁴ஹாரானந்தி அபி⁴முகே²ன ஹரிதப்³பா³னங் பண்ணாகாரானங், பூஜாபி⁴ஹாரானங் வா. நிமித்தங் உக்³க³ண்ஹாதீதி ‘‘ஏவங் மே சித்தங் ஸமாஹிதங் அஹோஸீ’’தி நிமித்தங் க³ண்ஹாதி ஸல்லக்கே²தி.
ஸமாதி⁴பரிபந்தா²னந்தி ஸமாதி⁴ஸ்ஸ பரிபந்த²பூ⁴தானங். த⁴ம்மானந்தி காமச்ச²ந்தா³தி³னீவரணத⁴ம்மானங். ஸுவிஸோதி⁴தத்தாதி ஸுட்டு² விஸோதி⁴தத்தா, விக்க²ம்ப⁴னவஸேனேவ ஸம்மதே³வ பஹீனத்தாதி அத்தோ². காமாதீ³னவபச்சவெக்க²ணாதீ³ஹீதி ஆதி³-ஸத்³தே³ன அஸுப⁴மனஸிகாரனெக்க²ம்மானிஸங்ஸபச்சவெக்க²ணாதீ³னி ஸங்க³ண்ஹாதி. நெக்க²ம்மகு³ணத³ஸ்ஸனேனாபி காயது³ட்டு²ல்லந்தி காயத³ரத²ங் ஸாரத்³த⁴காயதங். தேன காயசித்தானங் ஸாரம்ப⁴னிமித்தஸ்ஸ ப்³யாபாத³னீவரணஸ்ஸ ந விஸோத⁴னமாஹ. ஆரம்ப⁴தா⁴துமனஸிகாராதீ³தி ஆதி³-ஸத்³தே³ன வீரியஸம்பொ³ஜ்ஜ²ங்க³னிமித்தானங், ஆலோகஸஞ்ஞாதீ³னஞ்ச ஸங்க³ஹோ த³ட்ட²ப்³போ³. ஸமத²னிமித்தமனஸிகாராதீ³தி ஆதி³-ஸத்³தே³ன ஸமாதி⁴ஸம்பொ³ஜ்ஜ²ங்க³ட்டா²னியானங் த⁴ம்மானங் ஸங்க³ஹோ த³ட்ட²ப்³போ³. அஞ்ஞேபி ஸமாதி⁴பரிபந்தே²தி விசிகிச்சா²ட்டா²னியே, மத³மானாதி³கே ச ஸந்தா⁴யாஹ. ஆஸயந்தி வஸனகஸுஸிரங். ஸுபரிஸுத்³த⁴ந்தி ஆஸங்கனீயத்தாபா⁴வேன ஸுட்டு² பரிஸுத்³த⁴ங். எத்தா²ஹ – நனு சாயங் பகே³வ காமாதீ³னவங் பச்சவெக்கி²த்வா ஸமத²படிபத³ங் படிபன்னோ உபசாரக்க²ணேயேவ ஜா²னேன நீவரணானி விக்க²ம்பி⁴தானி, அத² கஸ்மா புன காமாதீ³னவபச்சவெக்க²ணாதி³ க³ஹிதந்தி? ஸச்சமேதங். தங் பன பஹானமத்தந்தி ஜா²னஸ்ஸ சிரட்டி²தியா அதிஸயபஹானத்த²ங் புன க³ஹிதங்.
உத்³த⁴ச்ச மித்³த⁴ந்தி குக்குச்சங், தி²னஞ்ச ததே³கட்ட²தாய க³ஹிதமேவாதி கத்வா வுத்தங். ஸுத்³த⁴ந்தக³தோதி ஸுபரிஸுத்³த⁴பரியந்தங் ஸப்³ப³ஸோ விஸோதி⁴தகோணபரியந்தங் உய்யானங் க³தோ. தஹிங் ரமேதி தஸ்மிங் ஜா²னே ரமெய்ய தி³வஸபா⁴க³ம்பி ஜா²னஸமங்கீ³ ஏவ ப⁴வெய்ய.
சித்தபா⁴வனாவேபுல்லத்த²ந்தி ஸமாதி⁴பா⁴வனாய விபுலபா⁴வாய. யதா² ஹி பா⁴வனாவஸேன நிமித்தஸ்ஸ உப்பத்தி, ஏவமஸ்ஸ பா⁴வனாவஸேனேவ வட்³ட⁴னம்பி. தஸ்மா ஏகங்கு³லாதி³வஸேன நிமித்தங் வட்³டெ⁴ந்தஸ்ஸ புனப்புனங் ப³ஹுலீகாரேன ஜா²னங் பா⁴வனாபி வுத்³தி⁴ங் விருள்ஹிங் வேபுல்லங் ஆபஜ்ஜதி. தேன வுத்தங் ‘‘சித்தபா⁴வனாவேபுல்லத்த²ஞ்ச யதா²லத்³த⁴ங் படிபா⁴க³னிமித்தங் வட்³டே⁴தப்³ப³’’ந்தி. தஸ்ஸாதி படிபா⁴க³னிமித்தஸ்ஸ.
நிமித்தவட்³ட⁴னநயவண்ணனா
77. தத்ராதி ஸாமிஅத்தே² பு⁴ம்மவசனங், தஸ்ஸாதி அத்தோ². அவட்³டெ⁴த்வாதி யதா² கும்ப⁴காரோ மத்திகாய பத்தங் கரொந்தோ பட²மங் அபரிச்சி²ந்தி³த்வாவ பத்தங் வட்³டே⁴தி, ஏவங் பத்தவட்³ட⁴னயோகே³ன பத்தவட்³ட⁴னயுத்தியா அவட்³டெ⁴த்வா பூவிகஸ்ஸ பூவவட்³ட⁴னங். ப⁴த்தஸ்ஸ உபரி ப⁴த்தபக்கி²பனங் ப⁴த்தவட்³ட⁴னங். வத்த²ஸ்ஸ திந்தஸ்ஸ அஞ்ச²னாதி³ து³ஸ்ஸவட்³ட⁴னங். பச்சேகங் யோக³-ஸத்³தோ³ யோஜேதப்³போ³. அபரிச்சி²ந்தி³த்வா
ஹங்ஸபோதகாதி ஜவனஹங்ஸபோதகா. உக்கூலங் உன்னதட்டா²னங். விகூலங் நின்னட்டா²னங். நதீ³ஸோதேன கதங் விது³க்³க³ங் நதீ³விது³க்³க³ங். விஸமாகாரேன டி²தோ பப்³ப³தபதே³ஸோ பப்³ப³தவிஸமோ.
தூ²லானி ஹுத்வா உபட்ட²ஹந்தி பச்சவெக்க²ணாபா³ஹுல்லேன விபூ⁴தபா⁴வதோ. து³ப்³ப³லானி ஹுத்வா உபட்ட²ஹந்தி பகு³ணப³லவபா⁴வஸ்ஸ அனாபாதி³கத்தா. உபரி உஸ்ஸுக்கனாயாதி பா⁴வனாய உபரி ஆரோஹனாய, து³தியஜ்ஜா²னாதி⁴க³மாயாதி அத்தோ².
பப்³ப³தெய்யாதி பப்³ப³தே ப³ஹுலசாரினீ. அகெ²த்தஞ்ஞூதி அகோ³சரஞ்ஞூ. ஸமாதி⁴பரிபந்தா²னங் விஸோத⁴னானபி⁴ஞ்ஞாதாய பா³லோ. ஜா²னஸ்ஸ பகு³ணபா⁴வாபாத³னவெய்யத்தியஸ்ஸ அபா⁴வேன அப்³யத்தோ. உபரிஜா²னஸ்ஸ அகெ²த்தஞ்ஞூ. ஸப்³ப³தா²பி ஸமாபத்திகோஸல்லாபா⁴வேன அகுஸலோ. ஸமாதி⁴னிமித்தஸ்ஸ வா அனாஸேவனாய பா³லோ. அபா⁴வனாய அப்³யத்தோ. அப³ஹுலீகாரேன அகெ²த்தஞ்ஞூ. ஸம்மதே³வ அனதி⁴ட்டா²னதோ அகுஸலோதி யோஜேதப்³ப³ங். உப⁴தோ ப⁴ட்டோ²தி உப⁴யதோ ஜா²னதோ ப⁴ட்டோ². ஸோ ஹி அப்பகு³ணதாய ந ஸுப்பதிட்டி²ததாய ஸஉஸ்ஸாஹோபி வினாஸதோ, அஸாமத்தி²யதோ ச ஜா²னத்³வயதோ பரிஹீனோ. சிண்ணவஸினாதி ஆஸேவிதவஸினா.
பஞ்சவஸீகதா²வண்ணனா
78. வஸனங் வஸீதி தா⁴துனித்³தே³ஸதாய கிரியானித்³தே³ஸோதி அதி⁴ப்பாயேனாஹ ‘‘வஸியோ’’தி, யதா²ருசி பவத்தியோதி அத்தோ². ஆவஜ்ஜனாய வஸீ, ஆவஜ்ஜனாவஸேன வா வஸீ ஆவஜ்ஜனவஸீ. ஜா²னங் ஆவஜ்ஜிதுங் யத்த² யத்த² பதே³ஸே இச்சா² யத்தி²ச்ச²கங். யதா³ யதா³, யஸ்மிங் யஸ்மிங் வா ஜா²னங்கே³ இச்சா² யதி³ச்ச²கங். யாவ யாவ இச்சா² யாவதி³ச்ச²கங், த³-காரோ பத³ஸந்தி⁴கரோ. ‘‘யாவா’’தி ச இத³ங் ப³ஹூனங் ஜவனவாரானங் நிரந்தரங் விய ததா²பவத்தனங் ஸந்தா⁴ய வுத்தங், ந ஏகமேவ. ஸோ ஹி பரிச்சி²ன்னசித்தக்க²ணோதி. ஆவஜ்ஜனாய த³ந்தா⁴யிதத்தங் நத்தீ²தி வுத்தனயேன யத்த² கத்த²சி டா²னே யதா³ யதா³ ஸேஸாதி வுட்டா²னஅதி⁴ட்டா²னபச்சவெக்க²ணாவஸியோ.
அங்க³ஸமுதா³யபா⁴வதோ ஜா²னஸ்ஸ ஜா²னே ஆவஜ்ஜனவஸிங் நிப்பா²தே³துகாமேன படிபாடியா ஜா²னங்கா³னி ஆவஜ்ஜேதப்³பா³னீதி ஆஹ ‘‘பட²மங் விதக்கங் ஆவஜ்ஜயதோ’’தி. யதி³பி ஆவஜ்ஜனமேவெத்த² இச்சி²தங் ஆவஜ்ஜனவஸியா அதி⁴ப்பேதத்தா, ஆவஜ்ஜனாய பன உப்பன்னாய ஜவனேஹி ப⁴விதப்³ப³ங். தானி ச கோ² ஆவஜ்ஜனதப்பரதாய சித்தாபி⁴னீஹாரஸ்ஸ யதா²வஜ்ஜிதஜா²னங்கா³ரம்மணானி கதிபயானேவ ஹொந்தி, ந பரிபுண்ணானீதி வுத்தங் ‘‘விதக்காரம்மணானேவ சத்தாரி பஞ்ச வா ஜவனானி ஜவந்தீ’’தி. சத்தாரி திக்கி²ந்த்³ரியஸ்ஸ. பஞ்ச நாதிதிக்கி²ந்த்³ரியஸ்ஸாதி த³ட்ட²ப்³ப³ங். நிரந்தரந்தி விஸபா⁴கே³ஹி நிரந்தரங். அயங் பனாதி ப⁴வங்க³த்³வயந்தரிதா சதுஜவனசித்தா யதா²வுத்தா ஆவஜ்ஜனவஸீ. அஞ்ஞேஸங் வா த⁴ம்மஸேனாபதிஆதீ³னங். ஏவரூபே காலேதி உட்டா²ய ஸமுட்டா²ய லஹுதரங் ஆவஜ்ஜனவஸீனிப்³ப³த்தனகாலே. ஸா ச கோ² இத்தரா பரித்தகாலா, ந ஸத்து² யமகமஹாபாடிஹாரியே விய ஸமாபஜ்ஜனங், ஜா²னஸமங்கி³தா.
ஸீக⁴ந்தி எத்த² ஸமாபஜ்ஜிதுகாமதானந்தரங் த்³வீஸு ப⁴வங்கே³ஸு உப்பன்னேஸு ப⁴வங்க³ங் உபச்சி²ந்தி³த்வா உப்பன்னாவஜ்ஜனானந்தரங் ஸமாபஜ்ஜனங் ஸீக⁴ங் ஸமாபஜ்ஜனஸமத்த²தா. அயஞ்ச மத்த²கப்பத்தா ஸமாபஜ்ஜனவஸீ ஸத்து² த⁴ம்மதே³ஸனாயங் லப்³ப⁴தி. யங் ஸந்தா⁴ய வுத்தங் ‘‘ஸோ கோ² அஹங், அக்³கி³வெஸ்ஸன, தஸ்ஸா ஏவ கதா²ய பரியோஸானே தஸ்மிங்யேவ புரிமஸ்மிங் ஸமாதி⁴னிமித்தே அஜ்ஜ²த்தமேவ சித்தங் ஸண்ட²பேமி ஸன்னிஸாதே³மி ஏகோதி³ங் கரோமி ஸமாத³ஹாமி யேனஸ்ஸுத³ங் நிச்சகப்பங் விஹராமீ’’தி (ம॰ நி॰ 1.387). இதோ ஸீக⁴தரா ஹி ஸமாபஜ்ஜனவஸீ நாம நத்தி². ஜுண்ஹாய ரத்தியா நவோரோபிதேஹி கேஸேஹி கபோதகந்த³ராயங் விஹரந்தஸ்ஸ ஆயஸ்மதோ ஸாரிபுத்தஸ்ஸ யக்கே²ன மஹந்தம்பி பப்³ப³தகூடங் பதா³லேதுங் ஸமத்தே² பஹாரே ஸீஸே தி³ன்னே ஸமாபஜ்ஜனம்பெத்த² நித³ஸ்ஸேதப்³ப³ங். ததா² ஹி வக்க²தி ‘‘ததா³ தே²ரோ தஸ்ஸ பஹரணஸமயே ஸமாபத்திங் அப்பேஸீ’’தி (விஸுத்³தி⁴॰ 2.374). பாளியங் பன ‘‘அஞ்ஞதரங் ஸமாதி⁴ங் ஸமாபஜ்ஜித்வா நிஸின்னோ’’தி (உதா³॰ 34) வுத்தங். இமே பன தே²ரா
அச்ச²ராமத்தந்தி அங்கு³லிபோ²டமத்தங் க²ணங். ட²பேதுந்தி ஸேது விய ஸீக⁴ஸோதாய நதி³யா ஓக⁴ங் வேகே³ன பவத்திதுங் அத³த்வா யதா²வுத்தக்க²ணங் ஜா²னங் ட²பேதுங் ஸமத்த²தா. அபி⁴பு⁴ய்ய ட²பனங், அதி⁴ட்டா²னங் வியாதி வா அதி⁴ட்டா²னங். தத்த² வஸீ அதி⁴ட்டா²னவஸீ. ததே²வ லஹுங் வுட்டா²துந்தி அச்ச²ராமத்தங் வா த³ஸச்ச²ராமத்தங் வா லஹுங் க²ணங் ஜா²னஸமங்கீ³ ஹுத்வா ஜா²னதோ வுட்டா²துங் ஸமத்த²தா. ப⁴வங்க³சித்துப்பத்தியேவ ஹெத்த² ஜா²னதோ வுட்டா²னங் நாம. எத்த² ச யதா² ‘‘எத்தகமேவ க²ணங் ஜா²னங் ட²பெஸ்ஸாமீ’’தி புப்³ப³பரிகம்மவஸேன அதி⁴ட்டா²னஸமத்த²தா அதி⁴ட்டா²னவஸீ, ஏவங் ‘‘எத்தகமேவ க²ணங் ஜா²னஸமங்கீ³ ஹுத்வா ஜா²னதோ வுட்ட²ஹிஸ்ஸாமீ’’தி புப்³ப³பரிகம்மவஸேன வுட்டா²னஸமத்த²தா வுட்டா²னவஸீ வேதி³தப்³பா³, யா ஸமாபத்தி ‘‘வுட்டா²னகுஸலதா’’தி வுச்சதி. தது³ப⁴யத³ஸ்ஸனத்த²ந்தி அதி⁴ட்டா²னவுட்டா²னவஸீத³ஸ்ஸனத்த²ங்.
தத்தா²தி தஸ்மிங் நிம்மிதபப்³ப³தே தஸ்ஸ விவரே. கிஞ்சாபி ஏகங்யேவ தங் அபி⁴ஞ்ஞாசித்தங் யேன பப்³ப³தங் நிம்மினெய்ய, அபி⁴ஞ்ஞாபாத³கஸ்ஸ பன ஜா²னஸ்ஸ லஹுதரங் ட²பனங், வுட்டா²னஞ்ச இத⁴ நித³ஸ்ஸிதந்தி த³ட்ட²ப்³ப³ங். ‘‘எத்தகா இத்³தி⁴மந்தா ஏகங் உபட்டா²கங் க³ருளதோ ரக்கி²துங் ந ஸக்கி²ங்ஸூ’’தி கா³ரய்ஹா அஸ்ஸாம.
ஆவஜ்ஜனானந்தரானீதி
து³தியஜ்ஜா²னகதா²வண்ணனா
79. நீவரணப்பஹானஸ்ஸ தப்பட²மதாய ஆஸன்னநீவரணபச்சத்தி²கா. தூ²லங் நாம விபுலம்பி பெ²க்³கு³ விய ஸுக²ப⁴ஞ்ஜனீயந்தி ஆஹ ‘‘ஓளாரிகத்தா அங்க³து³ப்³ப³லா’’தி. ஸந்ததோ மனஸி கரித்வாதி பட²மஜ்ஜா²னங் விய அனோளாரிகங்க³த்தா, ஸந்தத⁴ம்மஸமங்கி³தாய ச ‘‘ஸந்த’’ந்தி மனஸி கத்வா. யே ஹி த⁴ம்மா து³தியஜ்ஜா²னே பீதிஸுகா²த³யோ, காமங் தே பட²மஜ்ஜா²னேபி ஸந்தி, தேஹி பன தே ஸந்ததரா சேவ பணீததரா ச ப⁴வந்தீதி. நிகந்திந்தி நிகாமனங், அபெக்க²ந்தி பரியாதா³யாதி கே²பெத்வா. சத்தாரி பஞ்சாதி வா-ஸத்³தோ³ லுத்தனித்³தி³ட்டோ². து³தியஜ்ஜா²னங் ஏதஸ்ஸ அத்தீ²தி து³தியஜ்ஜா²னிகங். வுத்தப்பகாரானேவாதி பட²மஜ்ஜா²னே வுத்தப்பகாரானியேவ, பரிகம்மாதி³னாமகானீதி அத்தோ².
80. வூபஸமாதி வூபஸமஹேது, வூபஸமோதி செத்த² பஹானங் அதி⁴ப்பேதங், தஞ்ச விதக்கவிசாரானங். அதிக்கமோ அத்த²தோ து³தியஜ்ஜா²னக்க²ணே அனுப்பாதோ³தி ஆஹ ‘‘ஸமதிக்கமா’’திஆதி³. கதமேஸங் பனெத்த² விதக்கவிசாரானங் வூபஸமோ அதி⁴ப்பேதோ, கிங் பட²மஜ்ஜா²னிகானங், உதா³ஹு து³தியஜ்ஜா²னிகானந்தி. கிஞ்செத்த² யதி³ பட²மஜ்ஜா²னிகானங், நத்தி² தேஸங் வூபஸமோ. ந ஹி கதா³சி பட²மஜ்ஜா²னங் விதக்கவிசாரரஹிதங் அத்தி². அத² து³தியஜ்ஜா²னிகானங், ஏவம்பி நத்தே²வ வூபஸமோ, ஸப்³பே³ன ஸப்³ப³ங் தேஸங் தத்த² அபா⁴வதோதி? வுச்சதே – யேஹி விதக்கவிசாரேஹி பட²மஜ்ஜா²னஸ்ஸ ஓளாரிகதா, தேஸங் ஸமதிக்கமா து³தியஸ்ஸ ஜா²னஸ்ஸ ஸமதி⁴க³மோ, ந ஸபா⁴வதோ அனோளாரிகானங் ப²ஸ்ஸாதீ³னங் ஸமதிக்கமாதி அயமத்தோ² ‘‘விதக்கவிசாரானங் வூபஸமா’’தி ஏதேன தீ³பிதோ. தஸ்மா ‘‘கிங் பட²மஜ்ஜா²னிகானங் விதக்கவிசாரானங் வூபஸமோ இதா⁴தி⁴ப்பேதோ, உதா³ஹு து³தியஜ்ஜா²னிகான’’ந்தி ஏதி³ஸீ சோத³னா அனோகாஸாவ. யஸ்மா தி³ட்டா²தீ³னவஸ்ஸ தங்தங்ஜா²னக்க²ணே அனுப்பத்தித⁴ம்மதாபாத³னங் வூபஸமனங் அதி⁴ப்பேதங். விதக்காத³யோ ஏவ ஜா²னங்க³பூ⁴தா ததா² கரீயந்தி, ந தங்ஸம்பயுத்தா ப²ஸ்ஸாத³யோ, தஸ்மா விதக்காதீ³னங்யேவ வூபஸமாதி³வசனங் ஞாயாக³தங். யஸ்மா பன விதக்காதீ³னங் விய தங்ஸம்பயுத்தத⁴ம்மானம்பி ஏதேன ‘‘ஏதங் ஓளாரிக’’ந்தி ஆதீ³னவத³ஸ்ஸனங் ஸுத்தே ஆக³தங், தஸ்மா அவிஸேஸேன அட்ட²கதா²யங் ‘‘ஓளாரிகஸ்ஸ பனா’’திஆதி³ க³ஹிதந்தி இத⁴ ‘‘யேஹி விதக்கவிசாரேஹீ’’திஆதி³ வுத்தந்தி த³ட்ட²ப்³ப³ங். ‘‘பீதியா ச விராகா³’’திஆதீ³ஸுபி ஏஸேவ நயோ. தஸ்மா விதக்கவிசாரபீதிஸுக²ஸமதிக்கமவசனானி ஓளாரிகோளாரிகங்க³ஸமதிக்கமா து³தியாதி³அதி⁴க³மதீ³பகானீதி தேஸங் ஏகதே³ஸபூ⁴தங் விதக்கவிசாரஸமதிக்கமவசனங் தங்தீ³பகங் வுத்தங். விஸுங் விஸுங் டி²தேபி ஹி விதக்கவிசாரஸமதிக்கமவசனாதி³கே பஹெய்யங்க³னித்³தே³ஸதாஸாமஞ்ஞேன சித்தேன ஸமூஹதோ க³ஹிதே விதக்கவிசாரவூபஸமவசனஸ்ஸ ததே³கதே³ஸதா த³ட்ட²ப்³பா³. அயஞ்ச அத்தோ²
நியகஜ்ஜ²த்தமதி⁴ப்பேதங் ந அஜ்ஜ²த்தஜ்ஜ²த்தாதி³. தத்த² காரணமாஹ ‘‘விப⁴ங்கே³ பனா’’திஆதி³. நீலவண்ணயோக³தோ நீலவத்த²ங் வியாதி நீலயோக³தோ வத்த²ங் நீலங் வியாதி அதி⁴ப்பாயோ. யேன ஸம்பஸாத³னேன யோகா³ ஜா²னங் ஸம்பஸாத³னங். தஸ்மிங் த³ஸ்ஸிதே ‘‘ஸம்பஸாத³னங் ஜா²ன’’ந்தி ஸமானாதி⁴கரணனித்³தே³ஸேனேவ தங்யோகா³ ஜா²னே தங்ஸத்³த³ப்பவத்தி த³ஸ்ஸிதாதி அவிரோதோ⁴ யுத்தோ. ஏகோதி³பா⁴வே கத²ந்தி ஏகோதி³ம்ஹி த³ஸ்ஸிதே ஏகோதி³பா⁴வங் ஜா²னந்தி ஸமானாதி⁴கரணனித்³தே³ஸேனேவ ஜா²னஸ்ஸ ஏகோதி³வட்³ட⁴னதா வுத்தா ஹோதீதி சே? ‘‘ஏகோதி³பா⁴வ’’ந்தி பத³ங் உத்³த⁴ரித்வா ஏகோதி³ஸ்ஸ நித்³தே³ஸோ ந காதப்³போ³ ஸியாதி ஏகோதி³பா⁴வஸத்³தோ³ ஏவ ஸமாதி⁴ம்ஹி பவத்தோ ஸம்பஸாத³னஸத்³தோ³ விய ஜா²னே பவத்ததீதி யுத்தங். இமஸ்மிஞ்ச அத்த²விகப்பேதி ‘‘சேதஸோ ஸம்பஸாத³யதீ’’தி ஏதஸ்மிங் பக்கே² ‘‘சேதஸோ’’தி ச உபயோக³த்தே² ஸாமிவசனங். புரிமஸ்மிந்தி ‘‘ஸம்பஸாத³னயோக³தோ ஜா²னங் ஸம்பஸாத³ன’’ந்தி வுத்தபக்கே². சேதஸோதி ஸம்ப³ந்தே⁴ ஸாமிவசனங்.
ஸெட்டோ²பி லோகே ‘‘ஏகோ’’தி வுச்சதி ‘‘யாவ பரே ஏகாஹங் தே கரோமீ’’திஆதீ³ஸு. ஏகோ அது³தியோ ‘‘ஏகாகீபி⁴ கு²த்³த³கேஹி ஜித’’ந்திஆதீ³ஸு அஸஹாயத்தோ²பி ஏக-ஸத்³தோ³ தி³ட்டோ²தி ஆஹ ‘‘ஏகோ அஸஹாயோ ஹுத்வா’’தி. ஸத்³தா⁴த³யோபி காமங் ஸம்பயுத்தத⁴ம்மானங் ஸாதா⁴ரணதோ, அஸாதா⁴ரணதோ ச பச்சயா ஹொந்தியேவ, ஸமாதி⁴ பன ஜா²னக்க²ணே ஸம்பயுத்தத⁴ம்மானங் அவிக்கே²பலக்க²ணே இந்த³ட்ட²கரணேன ஸாதிஸயங் பச்சயோ ஹோதீதி த³ஸ்ஸெந்தோ ‘‘ஸம்பயுத்தத⁴ம்மே…பே॰… அதி⁴வசன’’ந்தி ஆஹ.
‘‘ஸம்பஸாத³னங் ‘‘நனு சா’’திஆதி³ வுத்தங். ஆரம்மணே ஆஹனநபரியாஹனநவஸேன, அனுமஜ்ஜனஅனுயோஜனவஸேன ச பவத்தமானா த⁴ம்மா ஸதிபி நீவரணப்பஹானேன கிலேஸகாலுஸ்ஸியாபக³மே ‘‘விதக்கவிசாரக்கோ²பே⁴ன ந ஸுப்பஸன்ன’’ந்தி. கு²த்³தி³கா ஊமியோ வீசியோ. மஹதியோ தரங்கா³. ஸதிபி இந்த்³ரியஸமத்தே, வீரியஸமதாய ச தேனேவ கோ²பே⁴ன, ஸம்பஸாதா³பா⁴வேன ச ஸமாதி⁴பி ந ஸுட்டு² பாகடோ ப³ஹலே விய ஜலே மச்சோ². யதா²வுத்தக்கோ²போ⁴ ஏவ பலிபோ³தோ⁴. ஏவங் வுத்தேனாதி யஸ்ஸா ஸத்³தா⁴ய வஸேன ஸம்பஸாத³னங், யஸ்ஸா ச சித்தேகக்³க³தாய வஸேன ஏகோதி³பா⁴வந்தி ச ஜா²னங் வுத்தங். தாஸங் ஏவ ‘‘ஸத்³த³ஹனா’’திஆதி³னா பவத்திஆகாரஸ்ஸ விஸேஸவிபா⁴வனாவஸேன வுத்தேன. தேன விப⁴ங்க³பாடே²ன. ‘‘ஸம்பஸாத³னயோக³தோ, ஸம்பஸாத³னதோ வா ஸம்பஸாத³னங், ஏகோதி³ங் பா⁴வேதீதி ஏகோதி³பா⁴வந்தி ஜா²னங் வுத்த’’ந்தி ஏவங் பவத்தா அயங் அத்த²வண்ணனா ந விருஜ்ஜ²தி. யதா² பன அவிரோதோ⁴, ஸோ வுத்தோ ஏவ.
81. ஸந்தாதி ஸமங் நிரோத⁴ங் க³தா. ஸமிதாதி பா⁴வனாய ஸமங் க³மிதா நிரோதி⁴தா. வூபஸந்தாதி ததோ ஏவ ஸுட்டு² உபஸந்தா. அத்த²ங்க³தாதி அத்த²ங் வினாஸங் க³தா. அப்³ப⁴த்த²ங்க³தாதி உபஸக்³கே³ன பத³ங் வட்³டெ⁴த்வா வுத்தங். அப்பிதாதி வினாஸங் க³மிதா. ஸோஸிதாதி பவத்திஸங்கா²தஸ்ஸ ஸந்தானஸ்ஸ அபா⁴வேன ஸோஸங் ஸுக்க²பா⁴வங் இதா. ப்³யந்திகதாதி விக³தந்தகதா.
அயமத்தோ²தி பா⁴வனாய பஹீனத்தா விதக்கவிசாரானங் அபா⁴வோ. சோத³கேன வுத்தமத்த²ங் ஸம்படிச்சி²த்வா பரிஹரிதுங் ‘‘ஏவமேதங் ஸித்³தோ⁴வாயமத்தோ²’’தி வத்வா ‘‘ந பனேத’’ந்திஆதி³ வுத்தங். தத்த² ஏதந்தி ‘‘விதக்கவிசாரானங் வூபஸமா’’தி ஏதங் வசனங். தத³த்த²தீ³பகந்தி தஸ்ஸ விதக்கவிசாராபா⁴வமத்தஸங்கா²தஸ்ஸ அத்த²ஸ்ஸ தீ³பகங். அயஞ்ஹெத்த² அத்தோ² – து³தியஜ்ஜா²னாதி³அதி⁴க³மூபாயதீ³பகேன அஜ்ஜ²த்தஸம்பஸாத³னதாய, சேதஸோ ஏகோதி³பா⁴வதாய ச ஹேதுதீ³பகேன, அவிதக்கஅவிசாரபா⁴வஹேதுதீ³பகேன ச விதக்கவிசாரவூபஸமவசனேனேவ விதக்கவிசாராபா⁴வோ தீ³பிதோதி கிங் புன அவிதக்கஅவிசாரவசனேன கதேனாதி? ந, அதீ³பிதத்தா. ந ஹி விதக்கவிசாரவூபஸமவசனேன விதக்கவிசாரானங் அப்பவத்தி வுத்தா ஹோதி. விதக்கவிசாரேஸு ஹி தண்ஹாப்பஹானங் ஏதேஸங் வூபஸமனங், யே ச ஸங்கா²ரேஸு தண்ஹாப்பஹானங் கரொந்தி, தேஸு மக்³கே³ஸு, பஹீனதண்ஹேஸு ‘‘அவிதக்கங் அவிசார’’ந்தி வுத்தங். பட²மம்பீதி பட²மங் ஜா²னம்பி.
‘‘து³தியங் உப்பன்னந்திபி து³திய’’ந்தி வத்துங் வட்டதியேவ. ந ததா² இமஸ்ஸ விதக்கவிசாராதி யதா² பட²மஜ்ஜா²னஸ்ஸ உபசாரக்க²ணே நீவரணானி பஹீயந்தி, ததா² இமஸ்ஸ து³தியஜ்ஜா²னஸ்ஸ உபசாரக்க²ணே விதக்கவிசாரா ந பஹீயந்தி அஸங்கிலிட்ட²ஸபா⁴வத்தா, உபசாரபா⁴வனாய ச தே பஹாதுங் அஸமத்த²பா⁴வதோ. யதி³பி தாய தேஸு தண்ஹா பஹீயதி, ந பன ஸவிஸேஸங். ஸவிஸேஸஞ்ஹி தத்த² தண்ஹாப்பஹானங் அப்பனாய ஏவ ஹோதி. தேன வுத்தங் ‘‘அப்பனாக்க²ணேயேவா’’திஆதி³. பஹானங்க³தாபி அதிஸயப்பஹானவஸேனேவ வேதி³தப்³பா³ யதா² நீவரணானங் பட²மஜ்ஜா²னஸ்ஸ. தஸ்மாதி யஸ்மா திவங்க³மேவேதங் ஜா²னங், தஸ்மா. தந்தி விப⁴ங்கே³ வசனங். ரத²ஸ்ஸ பண்டு³கம்ப³லங் விய ஸம்பஸாதோ³ ஜா²னஸ்ஸ பரிக்கா²ரோ, ந ஜா²னங்க³ந்தி ஆஹ ‘‘ஸபரிக்கா²ரங் ஜா²னங் த³ஸ்ஸேது’’ந்தி.
ததியஜ்ஜா²னகதா²வண்ணனா
82. உப்பிலாவிதந்தி காமஞ்சாயங் பரிக்³க³ஹேஸு அபரிச்சத்தபேமஸ்ஸ அனாதீ³னவத³ஸ்ஸினோ தண்ஹாஸஹக³தாய பீதியா பவத்திஆகாரோ, இத⁴ பன து³தியஜ்ஜா²னபீதி அதி⁴ப்பேதா. ததா²பி ஸப்³ப³ஸோ பீதியங் அவிரத்தங், ஸாபி அனுப³ந்தெ⁴ய்யாதி வுத்தங். உப்பிலாவிதங் வியாதி வா உப்பிலாவிதங். ஆதீ³னவங் ஹி தத்த² பாகடதரங் கத்வா த³ஸ்ஸேதுங் ஏவங் வுத்தந்தி த³ட்ட²ப்³ப³ங்.
83. விரஜ்ஜனங் விராகோ³. தங் பன விரஜ்ஜனங் நிப்³பி³ந்த³னமுகே²ன ஹீளனங் வா தப்படிப³த்³த⁴ராக³ப்பஹானங் வாதி தது³ப⁴யங் த³ஸ்ஸேதுங் ‘‘வுத்தப்பகாராய பீதியா ஜிகு³ச்ச²னங் வா ஸமதிக்கமோ வா’’தி ஆஹ. வுத்தப்பகாராயாதி ‘‘யதே³வ தத்த² பீதீ’’திஆதி³னா வுத்தப்பகாராய. ஸம்பிண்ட³னங் ஸமுச்சயோ.
மக்³கோ³தி உபாயோ. தத³தி⁴க³மாயாதி ததியமக்³கா³தி⁴க³மாய.
84. உபபத்திதோதி ‘‘ஸமங் பஸ்ஸதீ’’தி. விஸதா³யாதி விபுலாயாதி மஹதியா ஸாதிஸயங் மஹக்³க³தபா⁴வப்பத்தியா. தா²மக³தாயாதி பீதிவிக³மேன தி²ரபா⁴வப்பத்தாய.
பரிஸுத்³த⁴பகதி கீ²ணாஸவபகதி நிக்கிலேஸதா. ஸத்தேஸு கம்மஸ்ஸகதாத³ஸ்ஸனஹேதுகோ ஸமபா⁴வத³ஸ்ஸனாகாரோ மஜ்ஜ²த்தாகாரோ ப்³ரஹ்மவிஹாருபெக்கா².
ஸஹஜாதத⁴ம்மானந்தி நித்³தா⁴ரணே ஸாமிவசனங். ஸமப்பவத்தியா பா⁴வனாய வீதி²படிபன்னாய அலீனானுத்³த⁴தா நிரஸ்ஸாத³தாய பக்³க³ஹனிக்³க³ஹஸம்பஹங்ஸனேஸு ப்³யாபாராபா⁴வதோ ஸம்பயுத்தத⁴ம்மேஸு மஜ்ஜ²த்தாகாரபூ⁴தா பொ³ஜ்ஜ²ங்கு³பெக்கா².
உபெக்கா²னிமித்தந்தி எத்த² லீனுத்³த⁴ச்சபக்க²பாதரஹிதங் மஜ்ஜ²த்தங் வீரியங் உபெக்கா². ததே³வ தங் ஆகாரங் க³ஹெத்வா பவத்தேதப்³ப³ஸ்ஸ தாதி³ஸஸ்ஸ வீரியஸ்ஸ நிமித்தபா⁴வதோ உபெக்கா²னிமித்தங் பா⁴வனாய ஸமப்பவத்திகாலே உபெக்கீ²யதீதி உபெக்கா², வீரியமேவ உபெக்கா² வீரியுபெக்கா².
‘‘பட²மங் ஜா²னங் படிலாப⁴த்தா²ய நீவரணே…பே॰… நேவஸஞ்ஞானாஸஞ்ஞாயதனஸமாபத்திங் படிலாப⁴த்தா²ய ஆகிஞ்சஞ்ஞாயதனஸஞ்ஞங் படிஸங்கா² ஸந்திட்ட²னா பஞ்ஞா ஸங்கா²ருபெக்கா²ஸு ஞாண’’ந்தி (படி॰ ம॰ 1.57) ஏவமாக³தா இமா அட்ட² ஸமாதி⁴வஸேன உப்பஜ்ஜந்தி. ‘‘ஸோதாபத்திமக்³க³ங் படிலாப⁴த்தா²ய உப்பாத³ங் பவத்தங் நிமித்தங் ஆயூஹனங் படிஸந்தி⁴ங் க³திங் நிப்³ப³த்திங் உபபத்திங் ஜாதிங் ஜரங் ப்³யாதி⁴ங் மரணங் ஸோகங் பரிதே³வங் உபாயாஸங். ஸோதாபத்திப²லஸமாபத்தத்தா²ய உப்பாத³ங் பவத்தங்…பே॰… அரஹத்தமக்³க³ங் படிலாப⁴த்தா²ய உப்பாத³ங்…பே॰… உபாயாஸங்…பே॰… அரஹத்தப²லஸமாபத்தத்தா²ய ஸுஞ்ஞதாவிஹாரஸமாபத்தத்தா²ய அனிமித்தவிஹாரஸமாபத்தத்தா²ய உப்பாத³ங் பவத்தங் நிமித்தங் ஆயூஹனங் படிஸந்தி⁴ங் க³திங் நிப்³ப³த்திங் உபபத்திங் ஜாதிங் ஜரங் ப்³யாதி⁴ங் மரணங் ஸோகங் பரிதே³வங் உபாயாஸங் படிஸங்கா² ஸந்திட்ட²னா பஞ்ஞா ஸங்கா²ருபெக்கா²ஸு ஞாண’’ந்தி ஏவமாக³தா இமா த³ஸ விபஸ்ஸனாவஸேன உப்பஜ்ஜந்தி. எத்த² ச பட²மஜ்ஜா²னாதீ³ஹி விக்க²ம்பி⁴தானி நீவரணவிதக்கவிசாராதீ³னி படிஸங்கா²ய ஸபா⁴வதோ உபபரிக்கி²த்வா ஸன்னிட்டா²னவஸேன திட்ட²மானா நீவரணாதி³படிஸங்கா²ஸந்திட்ட²னா தி³ட்டா²தீ³னவத்தா தேஸங் க³ஹணே உப்பாத³னே அஜ்ஜு²பெக்க²ந்தீ விபஸ்ஸனாபஞ்ஞா க³ஹணே மஜ்ஜ²த்தபூ⁴தா உபெக்கா².
தத்த² உப்பாத³ந்தி புரிமகம்மபச்சயா க²ந்தா⁴னங் இத⁴ உப்பத்திமாஹ. பவத்தந்தி ததா²உப்பன்னஸ்ஸ பவத்திங். நிமித்தந்தி ஸப்³ப³ம்பி தேபூ⁴மகஸங்கா²ரக³தங் நிமித்தபா⁴வேன உபட்டா²னதோ. ஆயூஹனந்தி ஆயதிங் படிஸந்தி⁴ஹேதுபூ⁴தங் கம்மங். படிஸந்தி⁴ந்தி ஆயதிங் உப்பத்திங். க³திந்தி யாய க³தியா ஸா படிஸந்தி⁴ ஹோதி. நிப்³ப³த்திந்தி க²ந்தா⁴னங் நிப்³ப³த்தனங். உபபத்திந்தி ‘‘ஸமாபன்னஸ்ஸ வா உபபன்னஸ்ஸ வா’’தி (படி॰ ம॰ 1.72) எத்த² ‘‘உபபன்னஸ்ஸா’’தி வுத்தவிபாகப்பவத்திங். ஜாதிந்தி ஜராதீ³னங் பச்சயபூ⁴தங் ப⁴வபச்சயா ஜாதிங். ஜராப்³யாதி⁴மரணாத³யோ பாகடா ஏவ. எத்த² ச உப்பாதா³த³யோ பஞ்சேவ ஸங்கா²ருபெக்கா²ஞாணஸ்ஸ விஸயவஸேன வுத்தா, ஸேஸா தேஸங் வேவசனவஸேன. ‘‘நிப்³ப³த்தி, ஜாதீ’’தி இத³ஞ்ஹி த்³வயங் உப்பாத³ஸ்ஸ சேவ படிஸந்தி⁴யா ச வேவசனங், ‘‘க³தி, உபபத்தி சா’’தி இத³ங் த்³வயங் பவத்தஸ்ஸ, ஜராத³யோ நிமித்தஸ்ஸாதி வேதி³தப்³ப³ங். அப்பணிஹிதவிமொக்க²வஸேன மக்³கு³ப்பத்திஹேதுபூ⁴தா சதஸ்ஸோ, ததா² ப²லஸமாபத்தியா சதஸ்ஸோ, ஸுஞ்ஞதவிஹாரஅனிமித்தவிஹாரவஸேன த்³வேதி த³ஸ ஸங்கா²ருபெக்கா².
யாதி விபஸ்ஸனாபஞ்ஞா. யத³த்தீ²தி யங் அனிச்சாதி³லக்க²ணத்தயங் உபலப்³ப⁴தி. யங் பூ⁴தந்தி யங் பச்சயனிப்³ப³த்தத்தா பூ⁴தங் க²ந்த⁴பஞ்சகங். தங் பஜஹதீதி அனிச்சானுபஸ்ஸனாதீ³ஹி நிச்சஸஞ்ஞாத³யோ பஜஹந்தோ ஸம்மதே³வ தி³ட்டா²தீ³னவத்தா தப்படிப³த்³த⁴ச்ச²ந்த³ராக³ப்பஹானேன பஜஹதி, யதா² ஆயதிங் ஆதா³னங் ந ஹோதி, ததா² படிபத்தியா பஜஹதி. ததா²பூ⁴தோ ச தத்த² உபெக்க²ங் படிலப⁴தி. விசினநேதி அனிச்சாதி³வஸேன ஸம்மஸனேபி.
ஸம்பயுத்தத⁴ம்மானங் ஸமப்பவத்திஹேதுதாய ஸமவாஹிதபூ⁴தா. நீவரணவிதக்கவிசாராதி³ஸப்³ப³பச்சனீகேஹி விமுத்தத்தா ஸப்³ப³பச்சனீகபரிஸுத்³தா⁴. தேஸங் வூபஸந்தத்தா பச்சனீகவூபஸமனேபி அப்³யாபாரபூ⁴தா அப்³யாபாரபா⁴வேன பவத்தா, அப்³யாபாரதங் வா பத்தா.
யதி³ அத்த²தோ ஏகா, கத²மயங் பே⁴தோ³தி ஆஹ ‘‘தேன தேனா’’திஆதி³. தஸ்மாதி யஸ்மா ஸதிபி ஸபா⁴வதோ அபே⁴தே³ யேஹி பன பச்சயவிஸேஸேஹி ஸ்வாயமிமாஸங் அவத்தா²பே⁴தோ³, தேஸங் ஏகஜ்ஜ²ங் அப்பவத்திதோ ந தாஸங் அபே⁴தோ³, ஏகஜ்ஜ²ங் வா பவத்தி, தஸ்மா. தேனாஹ ‘‘யத்த² ச²ளங்கு³பெக்கா²’’திஆதி³.
ஏகீபா⁴வோதி ‘‘கிச்சவஸேன த்³விதா⁴ பி⁴ன்னா’’தி வுத்தங், தங் வித்தா²ரதோ த³ஸ்ஸெந்தோ ‘‘யதா² ஹீ’’திஆதி³மாஹ. அயங் விபஸ்ஸனுபெக்கா². யங் ஸந்தா⁴ய வுத்தங் பாளியங் ‘‘யத³த்தி² யங் பூ⁴தங், தங் பஜஹதி, உபெக்க²ங் படிலப⁴தீ’’தி (ம॰ நி॰ 3.71; அ॰ நி॰ 7.55). தத்த² யத³த்தி² யங் பூ⁴தந்தி க²ந்த⁴பஞ்சகங், தங் முஞ்சிதுகம்யதாஞாணேன பஜஹதி. தி³ட்ட²ஸோவத்திகத்தயஸ்ஸ ஸப்³ப³லக்க²ணவிசினநே விய தி³ட்ட²லக்க²ணத்தயஸ்ஸ பூ⁴தஸ்ஸ ஸங்கா²ரலக்க²ணவிசினநே உபெக்க²ங் படிலப⁴தி. ஸங்கா²ரானங் அனிச்சாதி³லக்க²ணஸ்ஸ ஸுதி³ட்ட²த்தா தேஸங் விசினநே மஜ்ஜ²த்தபூ⁴தாய விபஸ்ஸனுபெக்கா²ய ஸித்³தா⁴ய ததா² தி³ட்டா²தீ³னவானங் தேஸங் க³ஹணேபி அஜ்ஜு²பெக்க²னா ஸித்³தா⁴வ ஹோதி, ஸப்³ப³ஸோ விஸங்கா²ரனின்னத்தா அஜ்ஜா²ஸயஸ்ஸ.
அனாபோ⁴க³ரஸாதி பணீதஸுகே²பி தஸ்மிங் அவனதிபடிபக்க²கிச்சாதி அத்தோ². அப்³யாபாரபச்சுபட்டா²னாதி ஸதிபி ஸுக²பாரமிப்பத்தியங் தஸ்மிங் ஸுகே² அப்³யாவடா ஹுத்வா பச்சுபதிட்ட²தி, ஸம்பயுத்தானங் வா தத்த² அப்³யாபாரங் பச்சுபட்ட²பேதீதி அத்தோ². ஸம்பயுத்தத⁴ம்மானங் கோ²ப⁴ங், உப்பிலவஞ்ச ஆவஹந்தேஹி விதக்காதீ³ஹி அபி⁴பூ⁴தத்தா அபரிப்³யத்தங். தத்த² தத்ரமஜ்ஜ²த்ததாய கிச்சங். தத³பா⁴வதோ இத⁴ பரிப்³யத்தங்.
நிட்டி²தா ‘‘உபெக்க²கோ ச விஹரதீ’’தி ஏதஸ்ஸ
ஸப்³ப³ஸோ அத்த²வண்ணனா.
85. ‘‘ஸரதீதி ஸதோ’’தி பத³ஸ்ஸ கத்துஸாத⁴னதமாஹ. ஸம்பஜானாதீதி ஸம்மதே³வ பஜானாதி. ஸரணங் சிந்தனங் உபட்டா²னங் லக்க²ணமேதிஸ்ஸாதி ஸரணலக்க²ணா. ஸம்முஸ்ஸனபடிபக்கோ² அஸம்முஸ்ஸனங், தங் கிச்சங் ஏதிஸ்ஸாதி அஸம்முஸ்ஸனரஸா. கிலேஸேஹி ஆரக்கா² ஹுத்வா பச்சுபதிட்ட²தி, ததோ வா ஆரக்க²ங் பச்சுபட்ட²பேதீதி ஆரக்க²பச்சுபட்டா²னா. அஸம்முய்ஹனங் ஸம்மதே³வ பஜானநங், ஸம்மோஹபடிபக்கோ² வா அஸம்மோஹோ. தீரணங் கிச்சஸ்ஸ பாரக³மனங். பவிசயோ வீமங்ஸா.
காமங் உபசாரஜ்ஜா²னாதீ³னி உபாதா³ய பட²மது³தியஜ்ஜா²னானிபி ஸுகு²மானேவ, இமங் பன உபரிஜா²னங் உபாதா³ய ‘‘ஓளாரிகத்தா’’தி வுத்தங். ஸா ச ஓளாரிகதா விதக்காதி³தூ²லங்க³தாய வேதி³தப்³பா³. கேசி ‘‘ப³ஹுசேதஸிகதாயா’’தி ச வத³ந்தி க³தி ஸுகா² ஹோதி தத்த² ஜா²னேஸூதி அதி⁴ப்பாயோ. அப்³யத்தங் தத்த² ஸதிஸம்பஜஞ்ஞகிச்சங் ‘‘இத³ங் நாம து³க்கரங் கரீயதீ’’தி வத்தப்³ப³ஸ்ஸ அபா⁴வதோ. ஓளாரிகங்க³ப்பஹானேன ஸுகு²மத்தாதி அயமத்தோ² காமங் து³தியஜ்ஜா²னேபி ஸம்ப⁴வதி, ததா²பி யேபு⁴ய்யேன ‘‘புரிஸஸ்ஸா’’திஆதி³. புனதே³வ பீதிங் உபக³ச்செ²ய்யாதி ஹானபா⁴கி³யங் ஜா²னங் ஸியா து³தியஜ்ஜா²னமேவ ஸம்பஜ்ஜெய்யாதி அத்தோ². தேனாஹ ‘‘பீதிஸம்பயுத்தமேவ ஸியா’’தி. ‘‘இத³ஞ்ச அதிமது⁴ரங் ஸுக²’’ந்தி ததியஜ்ஜா²னஸுக²ங் ஸந்தா⁴யாஹ. அதிமது⁴ரதா சஸ்ஸ பஹாஸோத³க்³யஸபா⁴வாய பீதியா அபா⁴வேனேவ வேதி³தப்³பா³. இத³ந்தி ‘‘ஸதோ, ஸம்பஜானோ’’தி பத³த்³வயங்.
தஸ்மா ஏதமத்த²ங் த³ஸ்ஸெந்தோதி யஸ்மா தஸ்ஸ ஜா²னஸமங்கி³னோ யங் நாமகாயேன ஸம்பயுத்தங் ஸுக²ங், தங் ஸோ படிஸங்வேதெ³ய்ய. யங் வா தந்தி அத² வா யங் தங் யதா²வுத்தங் நாமகாயஸம்பயுத்தங் ஸுக²ங். தங்ஸமுட்டா²னேன ததோ ஸமுட்டி²தேன அதிபணீதேன ரூபேன அஸ்ஸ ஜா²னஸமங்கி³னோ ரூபகாயோ யஸ்மா பு²டோ. யஸ்ஸ ரூபகாயஸ்ஸ பு²டத்தா ஜா²னா வுட்டி²தோபி ஜா²னஸமங்கீ³ காயிகங் ஸுக²ங் படிஸங்வேதெ³ய்ய. தஸ்மா ஏதங் சேதஸிககாயிகஸுக²படிஸங்வேத³னஸங்கா²தங் அத்த²ங் த³ஸ்ஸெந்தோ ‘‘ஸுக²ஞ்ச காயேன படிஸங்வேதே³தீதி ஆஹா’’தி யோஜனா. அயஞ்ஹெத்த² ஸங்கே²பத்தோ² – நாமகாயேன சேதஸிகஸுக²ங், காயிகஸுக²ஹேதுரூபஸமுட்டா²பனேன காயிகஸுக²ஞ்ச ஜா²னஸமங்கீ³ படிஸங்வேதே³தீதி வுச்சதி. பு²டத்தாதி ப்³யாபிதத்தாதி அத்தோ². யதா² ஹி உத³கேன பு²டஸரீரஸ்ஸ தாதி³ஸே நாதிபச்சனீகே வாதாதி³பொ²ட்ட²ப்³பே³ பு²டே ஸுக²ங் உப்பஜ்ஜதி, ஏவமேதேஹி பு²டஸரீரஸ்ஸாதி. அபரோ நயோ – ஸுக²ஞ்ச காயேன படிஸங்வேதே³தீதி எத்த² கத²மாபோ⁴கே³ன வினா ஸுக²படிஸங்வேத³னாதி சோத³னாயங் ‘‘கிஞ்சாபி…பே॰… ஏவங் ஸந்தேபீ’’தி. யஸ்மா தஸ்ஸ நாமகாயேன ஸம்பயுத்தங் ஸுக²ங், தஸ்மா ஸுக²ஞ்ச காயேன படிஸங்வேதே³தீதி யோஜனா. இதா³னி ஸஹாபி ஆபோ⁴கே³ன ஸுக²படிஸங்வேத³னங் த³ஸ்ஸேதுங் ‘‘யங் வா த’’ந்திஆதி³ வுத்தங்.
86. யந்தி ஹேதுஅத்தே² நிபாதோ, யஸ்மாதி அத்தோ². தேனாஹ ‘‘யங்ஜா²னஹேதூ’’தி. ‘‘ஆசிக்க²ந்தீ’’திஆதீ³னி பதா³னி கித்தனத்தா²னீதி அதி⁴ப்பாயேனாஹ ‘‘பஸங்ஸந்தீதி அதி⁴ப்பாயோ’’தி. கிந்தீதி பஸங்ஸனாகாரபுச்சா². ஏதி³ஸேஸு ‘‘ஸதிமா’’ இச்சேவ வுத்தங், ‘‘ஸம்பஜானோ’’தி ஹெட்டா² வுத்தத்தா வா.
ஜா²னக்க²ணே சேதஸிகஸுக²மேவ லப்³ப⁴தீதி ‘‘ஸுக²ங் நாமகாயேன படிஸங்வேதே³தீ’’தி ச வுத்தங். ததியந்தி க³ணனானுபுப்³ப³தாதி இதோ பட்டா²ய து³தியததியஜ்ஜா²னகதா²ஹி அவிஸேஸோ, விஸேஸோ ச வுத்தோதி.
சதுத்த²ஜ்ஜா²னகதா²வண்ணனா
87. இதா³னி நிப்³ப³த்திதவிஸேஸங் த³ஸ்ஸெந்தோ ‘‘அயங் பன விஸேஸோ’’தி வத்வா ‘‘யஸ்மா’’திஆதி³மாஹ. ஆஸேவனபச்சயேன பச்சயோ ந ஹோதி, அனிட்டே² டா²னே பத³ந்தரஸங்க³ஹிதஸ்ஸ ஆஸேவனபச்சயத்தாபா⁴வதோ. அது³க்க²மஸுகா²ய வேத³னாய உப்பஜ்ஜிதப்³ப³ங் ஸாதிஸயங் ஸுக²விராக³பா⁴வனாபா⁴வதோ. தானீதி அப்பனாவீதி²யங் ஜவனானி ஸந்தா⁴யாஹ.
88. ‘‘புப்³பே³வா’’தி வுத்தத்தா கதா³ பன தேஸங் பஹானங் ஹோதீதி சோத³னாயங் ஆஹ ‘‘சதுன்னங் ஜா²னானங் உபசாரக்க²ணே’’தி. ஏவங் வேதி³தப்³ப³ந்தி ஸம்ப³ந்தோ⁴. பஹானக்கமோ நாம பஹாயகத⁴ம்மானங் உப்பத்திபடிபாடி. தேன பன வுச்சமானே ‘‘து³க்க²ங் தோ³மனஸ்ஸங் ஸுக²ங் ஸோமனஸ்ஸ’’ந்தி வத்தப்³ப³ங் ஸியா. கஸ்மா இதோ அஞ்ஞதா² வசனந்தி ஆஹ ‘‘இந்த்³ரியவிப⁴ங்கே³’’திஆதி³. அத² கஸ்மா ஜா²னெஸ்வேவ நிரோதோ⁴ வுத்தோதி ஸம்ப³ந்தோ⁴.
கத்த² சுப்பன்னங் து³க்கி²ந்த்³ரியந்தி அத்தனோ பச்சயேஹி உப்பன்னங் து³க்கி²ந்த்³ரியங். கத்த² ச அபரிஸேஸங் நிருஜ்ஜ²தீதி நிரோத⁴ட்டா²னங் புச்ச²தி. தேன ‘‘கத்தா²’’தி புச்சா²யங், ‘‘எத்தா²’’தி விஸ்ஸஜ்ஜனேபி ஹேதும்ஹி பு⁴ம்மவசனங் த³ட்ட²ப்³ப³ங். ஜா²னானுபா⁴வனிமித்தங் ஹி அனுப்பஜ்ஜந்தங் ‘‘து³க்கி²ந்த்³ரியங் அபரிஸேஸங் நிருஜ்ஜ²தீ’’தி வுத்தங். அதிஸயனிரோதோ⁴ ஸுட்டு² பஹானங் உஜுபடிபக்கே²ன வூபஸமோ.
நானாவஜ்ஜனேதி யேன ஆவஜ்ஜனேன அப்பனாவீதி², ததோ பி⁴ன்னாவஜ்ஜனே, அனேகாவஜ்ஜனே வா. அப்பனாவீதி²யஞ்ஹி உபசாரோ ஏகாவஜ்ஜனோ, இதரோ அனேகாவஜ்ஜனோ அனேகக்க²த்துங் பவத்தனதோ. விஸமனிஸஜ்ஜாய உப்பன்னகிலமதோ² விஸமாஸனுபதாபோ. பீதிப²ரணேனாதி பீதியா ப²ரணரஸத்தா, பீதிஸமுட்டா²னானங் வா பணீதரூபானங் காயஸ்ஸ ப்³யாபனதோ வுத்தங். தேனாஹ ‘‘ஸப்³போ³ காயோ ஸுகோ²க்கந்தோ ஹோதீ’’தி. விதக்கவிசாரபச்சயேபீதி பி-ஸத்³தோ³ தத்த²ஸ்ஸ ஸியா உப்பத்தீதி தத்த² து³தியஜ்ஜா²னூபசாரே அஸ்ஸ தோ³மனஸ்ஸஸ்ஸ உப்பத்தி ப⁴வெய்ய.
எத்த² ச யதே³கே ‘‘தத்த²ஸ்ஸ ஸியா உப்பத்தீ’’தி வத³ந்தேன ஜா²னலாபீ⁴னம்பி தோ³மனுஸ்ஸுப்பத்தி அத்தீ²தி த³ஸ்ஸிதங் ஹோதி. தேன ச அனீவரணஸபா⁴வோ லோபோ⁴ விய தோ³ஸோபி அத்தீ²தி தீ³பேதி. ந ஹி தோ³ஸேன வினா தோ³மனஸ்ஸங் பவத்ததி. ந செத்த² பட்டா²னபாளியா விரோதோ⁴ சிந்தேதப்³போ³. யஸ்மா தத்த² பரிஹீனங் ஜா²னங் ஆரம்மணங் கத்வா பவத்தமானங் தோ³மனஸ்ஸங் த³ஸ்ஸிதங், அபரிஹீனஜ்ஜா²னமாரம்மணங் கத்வா உப்பஜ்ஜமானஸ்ஸ தோ³மனஸ்ஸஸ்ஸ அஸம்ப⁴வதோ. ஜா²னலாபீ⁴னங் ஸப்³ப³ஸோ தோ³மனஸ்ஸங் நுப்பஜ்ஜதீதி ச ந ஸக்கா வத்துங், அட்ட²ஸமாபத்திலாபி⁴னோ அபி தஸ்ஸ உப்பன்னத்தா. ந ஹேவ கோ² ஸோ பஹீனஜ்ஜா²னோ அஹோஸீதி வத³ந்தி, தங் அயுத்தங் அனீவரணஸபா⁴வஸ்ஸ தோ³ஸஸ்ஸ அபா⁴வதோ. யதி³ ஸியா, ரூபாரூபாவசரஸத்தானம்பி உப்பஜ்ஜெய்ய, ந ச உப்பஜ்ஜதி. ததா² ஹி ‘‘அரூபே காமச்ச²ந்த³னீவரணங் படிச்ச தி²னமித்³த⁴னீவரணங் உத்³த⁴ச்சனீவரணங் அவிஜ்ஜானீவரண’’ந்திஆதீ³ஸு ப்³யாபாத³குக்குச்சனீவரணானி அனுத்³த⁴டானி. ந செத்த² நீவரணத்தா பரிஹாரோ, காமச்ச²ந்தா³தீ³னம்பி அனீவரணானங்யேவ நீவரணஸதி³ஸதாய நீவரணபரியாயஸ்ஸ வுத்தத்தா. யங் பன வுத்தங் ‘‘அட்ட²ஸமாபத்திலாபி⁴னோ அபி தஸ்ஸ உப்பன்னத்தா’’தி, தம்பி அகாரணங் உப்பஜ்ஜமானேன ச தோ³மனஸ்ஸேன ஜா²னதோ பரிஹாயனதோ. லஹுகேன பன பச்சயேன பரிஹீனங் தாதி³ஸா அப்பகஸிரேனேவ படிபாகதிகங் கரொந்தீதி த³ட்ட²ப்³ப³ங். ‘‘தத்த²ஸ்ஸ ஸியா உப்பத்தீ’’தி இத³ங் பன பரிகப்பவசனங் உபசாரக்க²ணே தோ³மனஸ்ஸஸ்ஸ அப்பஹீனபா⁴வத³ஸ்ஸனத்த²ங். ததா² ஹி வுத்தங் ‘‘ந த்வேவ அந்தோஅப்பனாய’’ந்தி. யதி³ பன ததா³ தோ³மனஸ்ஸங் உப்பஜ்ஜெய்ய, பட²மஜ்ஜா²னம்பிஸ்ஸ பரிஹீனமேவாதி த³ட்ட²ப்³ப³ங். பஹீனம்பி ஸோமனஸ்ஸிந்த்³ரியங் பீதி விய ந தூ³ரேதி கத்வா ‘‘ஆஸன்னத்தா’’தி வுத்தங். நானாவஜ்ஜனூபசாரே பஹீனம்பி பஹானங்க³ங் படிபக்கே²ன அவிஹதத்தா அந்தரந்தரா உப்பஜ்ஜெய்ய வாதி இமமத்த²ங் த³ஸ்ஸெந்தோ ‘‘அப்பனாப்பத்தாயா’’திஆதி³மாஹ. தாதி³ஸாய ஆஸேவனாய இச்சி²தப்³ப³த்தா யதா² மக்³க³வீதி²தோ புப்³பே³ த்³வே தயோ ஜவனவாரா ஸதி³ஸானுபஸ்ஸனாவ பவத்தந்தி, ஏவமிதா⁴பி அப்பனாவாரதோ புப்³பே³ த்³வே தயோ ஜவனவாரா உபெக்கா²ஸஹக³தாவ பவத்தந்தீதி வத³ந்தி.
ஸமாஹடாதி ஸமானீதா, ஸங்க³ஹெத்வா வுத்தாதி அத்தோ². ஸுக²து³க்கா²னி விய அனோளாரிகத்தா அவிபூ⁴ததாய ஸுகு²மா. ததோ ஏவ அனுமினிதப்³ப³ஸபா⁴வத்தா து³விஞ்ஞெய்யா. து³ட்ட²ஸ்ஸாதி து³ட்ட²பயோக³ஸ்ஸ, து³த்³த³ம்மஸ்ஸாதி அத்தோ². ஸக்கா ஹோதி ஏஸா கா³ஹயிதுங் அஞ்ஞாபோஹனநயேனாதி அதி⁴ப்பாயோ.
அது³க்க²மஸுகா²ய சேதோவிமுத்தியாதி இத³மேவ சதுத்த²ஜ்ஜா²னங் த³ட்ட²ப்³ப³ங். பச்சயத³ஸ்ஸனத்த²ந்தி அதி⁴க³மஸ்ஸ உபாயபூ⁴தபச்சயத³ஸ்ஸனத்த²ங். தேனாஹ ‘‘து³க்க²ப்பஹானாத³யோ ஹி தஸ்ஸா பச்சயா’’தி. து³க்க²ப்பஹானாத³யோதி ச ஸோபசாரா பட²மஜ்ஜா²னாத³யோவெத்த² அதி⁴ப்பேதா.
பஹீனாதி வுத்தா ‘‘பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா’’தி. ஏதாதி ஸுகா²த³யோ வேத³னா.
ஸோமனஸ்ஸங் ராக³ஸ்ஸ பச்சயோ. வுத்தஞ்ஹி ‘‘ஸுகா²ய கோ², ஆவுஸோ விஸாக², வேத³னாய ராகா³னுஸயோ அனுஸேதீ’’தி (ம॰ நி॰ 1.465). தோ³மனஸ்ஸங் தோ³ஸஸ்ஸ பச்சயோ. வுத்தம்பி சேதங் ‘‘து³க்கா²ய கோ², ஆவுஸோ விஸாக², வேத³னாய படிகா⁴னுஸயோ அனுஸேதீ’’தி. ஸுகா²தி³கா⁴தேனாதி ஸுகா²தீ³னங் பஹானேன. அஸ்ஸ ஜா²னஸ்ஸ.
ந து³க்க²ந்தி அது³க்க²ங், து³க்க²விது⁴ரங். யஸ்மா தத்த² து³க்க²ங் நத்தி², தஸ்மா வுத்தங் ‘‘து³க்கா²பா⁴வேனா’’தி. அஸுக²ந்தி எத்த²பி ஏஸேவ நயோ. ஏதேனாதி து³க்க²ஸுக²படிக்கே²பவசனேன. ‘‘படிபக்க²பூ⁴த’’ந்தி இத³ங் இத⁴ ததியவேத³னாய து³க்கா²தீ³னங் ஸமதிக்கமவஸேன பத்தப்³ப³த்தா வுத்தங், ந குஸலாகுஸலானங் விய உஜுவிபச்சனீகதாய. இட்டா²னிட்ட²விபரீதஸ்ஸ மஜ்ஜ²த்தாரம்மணஸ்ஸ, இட்டா²னிட்ட²விபரீதங் வா மஜ்ஜ²த்தாகாரேன அனுப⁴வனலக்க²ணா இட்டா²னிட்ட²விபரீதானுப⁴வனலக்க²ணா. ததோ ஏவ மஜ்ஜ²த்தரஸா. அவிபூ⁴தபச்சுபட்டா²னாதி ஸுக²து³க்கா²னி விய ந விபூ⁴தாகாரா ஸுக²னிரோத⁴பத³ட்டா²னா.
89. ‘‘உபெக்கா²ஸதிபாரிஸுத்³தி⁴’’ந்தி புரிமபதே³ உத்தரபத³லோபேனேதங் ஸமாஸபத³ந்தி ஆஹ ‘‘உபெக்கா²ய ஜனிதஸதிபாரிஸுத்³தி⁴’’ந்தி. ஸப்³ப³பச்சனீகத⁴ம்மபரிஸுத்³தா⁴ய பச்சனீகஸமனேபி அப்³யாவடாய பாரிஸுத்³தி⁴உபெக்கா²ய வத்தமானாய சதுத்த²ஜ்ஜா²னே ஸதி ஸம்பஹங்ஸனபஞ்ஞா விய ஸுபரிஸுத்³தா⁴, ஸுவிஸதா³ ச ஹோதீதி ஆஹ ‘‘யா ச தஸ்ஸா ஸதியா பாரிஸுத்³தி⁴, ஸா உபெக்கா²ய கதா, ந அஞ்ஞேனா’’தி. யதி³ தத்ரமஜ்ஜ²த்ததா இத⁴ ‘‘உபெக்கா²’’தி அதி⁴ப்பேதா, கத²ங் ஸதியேவ ‘‘பரிஸுத்³தா⁴’’தி வுத்தாதி ஆஹ ‘‘ந கேவல’’ந்திஆதி³.
ஏவம்பி ‘‘தத்த² கிஞ்சாபீ’’திஆதி³ வுத்தங். தத்த² ஹெட்டா² தீஸு ஜா²னேஸு விஜ்ஜமானாயபி தத்ரமஜ்ஜ²த்ததாய பச்சனீகாபி⁴ப⁴வதோ, ஸஹாயபச்சயவேகல்லதோ ச அபாரிஸுத்³தி⁴, ததா² தங்ஸம்பயுத்தானங். தத³பா⁴வதோ இத⁴ பாரிஸுத்³தீ⁴தி இமமத்த²ங் ரூபகவஸேன த³ஸ்ஸேதுங் ‘‘யதா² பனா’’திஆதி³ வுத்தங். ஸூரியப்பபா⁴பி⁴ப⁴வாதி ஸூரியப்பபா⁴ய அபி⁴பு⁴ய்யமானத்தா. அதிக்க²தாய சந்த³லேகா² விய ரத்திபி ஸொம்மஸபா⁴வா ஸபா⁴கா³ய ரத்தியமேவ ச சந்த³லேகா² ஸமுஜ்ஜலதீதி ஸா தஸ்ஸா ஸபா⁴கா³தி த³ஸ்ஸெந்தோ ‘‘ஸொம்மபா⁴வேன ச அத்தனோ உபகாரகத்தேன வா ஸபா⁴கா³ய ரத்தியா’’தி ஆஹ.
‘‘ஏகவீதி²ய’’ந்தி இத³ங் தத்த² ஸோமனஸ்ஸஸ்ஸ ஏகங்ஸேன அபா⁴வதோ வுத்தங், ந ததோ புரிமதரேஸு ஏகங்ஸேன பா⁴வதோ. யதா² பன விதக்காத³யோ து³தியாதி³ஜ்ஜா²னக்க²ணேயேவ பஹீயந்தி, ந தேஸங் ஏகவீதி²யங் புரிமஜவனேஸு, ந ஏவமேதந்தி த³ஸ்ஸேதுங் வுத்தங். சதுக்கஜ்ஜா²னேதி சதுக்கனயவஸேன நிப்³ப³த்திதஜ்ஜா²னசதுக்கே.
பஞ்சகஜ்ஜா²னகதா²வண்ணனா
90. தத்தா²தி பட²மஜ்ஜா²னே. சதுக்கனயஸ்ஸ து³தியஜ்ஜா²னே வியாதி சதுக்கனயஸம்ப³ந்தி⁴னி து³தியஜ்ஜா²னே விய. தங் த்³விதா⁴ பி⁴ந்தி³த்வாதி சதுக்கனயே து³தியங் பஞ்சகனயே து³தியஞ்சேவ ததியஞ்ச ஹோதி அபி⁴த⁴ம்மேதி (த⁴॰ ஸ॰ 168) அதி⁴ப்பாயோ. ஸுத்தந்தேஸு பன ஸரூபதோ பஞ்சகனயோ ந க³ஹிதோ.
கஸ்மா பனெத்த² நயத்³வயவிபா⁴கோ³ க³ஹிதோதி? அபி⁴த⁴ம்மே நயத்³வயவஸேன ஜா²னானங் தே³ஸிதத்தா. கஸ்மா ச தத்த² ததா² தானி தே³ஸிதானி? புக்³க³லஜ்ஜா²ஸயதோ, தே³ஸனாவிலாஸதோ ச. ஸன்னிபதிததே³வபரிஸாய கிர யேஸங் யதா²தே³ஸிதே பட²மஜ்ஜா²னே விதக்கோ ஏவ ஓளாரிகதோ உபட்டா²ஸி, இதரே ஸந்ததோ. தேஸங் அஜ்ஜா²ஸயவஸேன ச சதுரங்கி³கங் அவிதக்கங் விசாரமத்தங் ஜா²னங் தே³ஸிதங். யேஸங் விசாரோ, யேஸங் பீதி, யேஸங் ஸுக²ங் ஓளாரிகதோ உபட்டா²ஸி, இதரே ஸந்ததோ. தேஸங் தேஸங் அஜ்ஜா²ஸயவஸேன ததியாதீ³னி ஜா²னானி தே³ஸிதானி. அயங் தாவ புக்³க³லஜ்ஜா²ஸயோ.
யஸ்ஸா பன த⁴ம்மதா⁴துயா ஸுப்படிவித்³த⁴த்தா ப⁴க³வா யஸ்மா தே³ஸனாவிலாஸப்பத்தோ, தஸ்மா ஞாணமஹந்ததாய
து³தியந்தி ச விதக்கரஹிதே, விதக்கவிசாரத்³வயரஹிதே ச ஞாயாக³தா தே³ஸனா து³தியங் அதி⁴க³ந்தப்³ப³த்தா, விசாரமத்தரஹிதேபி த்³வயப்பஹானாதி⁴க³தஸமானத⁴ம்மத்தா. ஏவஞ்ச கத்வா பஞ்சகனயனித்³தே³ஸே து³தியே வூபஸந்தோபி விதக்கோ ஸஹாயபூ⁴தவிசாராவூபஸமேன ந ஸம்மா வூபஸந்தோதி விதக்கவிசாரத்³வயரஹிதே விய விசாரவூபஸமேனேவ தது³பஸமங், ஸேஸத⁴ம்மானங் ஸமானதஞ்ச த³ஸ்ஸெந்தேன ‘‘விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங் ததியங் ஜா²னங் உபஸம்பஜ்ஜ விஹரதீ’’தி ததியங் சதுக்கனயே து³தியேன நிப்³பி³ஸேஸங் விப⁴த்தங். து³வித⁴ஸ்ஸாபி ஸஹாயவிரஹேன, அஞ்ஞதா² ச விதக்கப்பஹானேன அவிதக்கத்தங், ஸமாதி⁴ஜங் பீதிஸுக²த்தஞ்ச ஸமானந்தி ஸமானத⁴ம்மத்தாபி து³தியந்தி நித்³தே³ஸோ ததியங் வுத்தங், ததியங் அதி⁴க³ந்தப்³ப³த்தா. பட²மதோ அனந்தரபா⁴வேன பனஸ்ஸ து³தியபா⁴வோ ச உப்பஜ்ஜதீதி. கஸ்மா பனேவங் ஸரூபதோ பஞ்சகனயோ ந விப⁴த்தோதி? வினெய்யஜ்ஜா²ஸயதோ. யதா²னுலோமதே³ஸனா ஹி ஸுத்தந்ததே³ஸனாதி.
பத²வீகஸிணனித்³தே³ஸவண்ணனா நிட்டி²தா.
இதி சதுத்த²பரிச்சே²த³வண்ணனா.