பிடகத்தயஸ்ஸ பொத்த²காரோபனங்
மஹாவிஹாரவாஸினோ பன போராணிகங் பாளிபா⁴ஸாய ஸண்டி²தங் பரிஸுத்³த⁴பிடகமேவ படிக்³க³ண்ஹந்தி, தஞ்ச முக²பாடே²னேவ தா⁴ரெந்தி. ததா³ பன தே²ரா பச்சி²மஜனானங் ஸதிபஞ்ஞாஹானிங் தி³ஸ்வா பு³த்³த⁴காலதோ பட்டா²ய யாவ தங்காலா முக²பாடே²னாப⁴தங் ஸாட்ட²கத²ங் பிடகத்தயங் பொத்த²கே ஆரோபேதுங் ஸமாரபி⁴ங்ஸு. ஸமாரப⁴மானா ச தே அனுராத⁴ராஜதா⁴னிபுரதோ அட்ட²ஸட்டி²மிலப்பமாணே மலயஜனபதே³ மாதுல மாதலே இதி ஏதரஹி வோஹாரோ நக³ரே ஆலோகலேணே வஸந்தா ஏகஸ்ஸ தந்தே³ஸிகஸ்ஸ ஜனபதா³தி⁴பதினோ ஆரக்க²ங் க³ஹெத்வா தங் பொத்த²காரோபனகம்மமகங்ஸு மஹாவங்ஸே 33, 100-101-கா³தா²ஸு. தேனித³ங் ஞாயதி ‘‘ததா³ மஹாவிஹாரவாஸினோ தே²ரா ராஜராஜமஹாமத்தேஹி அலத்³தூ⁴பகாரா ஹுத்வா அத்தனோ ப³லேனேவ பிடகத்தயஸ்ஸ பொத்த²காரோபனகம்மமகங்ஸூ’’தி ச, ‘‘தஞ்ச யதே²வ பச்சி²மஜனானங் ஸதிபஞ்ஞாஹானிங் தி³ஸ்வா கதங், ததே²வ து³ப்³பி⁴க்க²ரட்ட²க்கோ²பா⁴தி³ப⁴யுபத்³து³தகாலேஸு து³த்³த⁴ரபா⁴வம்பி தி³ஸ்வா’’தி ச, ததா² ‘‘அப⁴யகி³ரிவாஸீனங் ஸம்படிச்சி²தஸமயந்தரவாதே³ஹி அனாகுலனத்த²ம்பி கத’’ந்தி ச. ஏவங் மஹாவிஹாரவாஸினோ தே²ரா பரிஸுத்³த⁴த்தே²ரவாத³பிடகங் ஸமயந்தரேஹி அஸம்மிஸ்ஸனத்தா²ய யதா² புரே, ததா² பாளிபா⁴ஸாய ஏவ பொத்த²கே ஆரோபெத்வாபி ஸுரக்கி²தங் ரக்கி²ங்ஸு. யதி³ ஹி ததா³ தேபிடகங் பொத்த²கேஸு அனாரோபிதமஸ்ஸ, பச்சா²காலேஸு ஸமயந்தரதோ ஆக³தஸுத்தானி ‘‘நேதானி அம்ஹாக’’ந்தி படிக்கி²பிதுங் ந ஸுகரானி ப⁴வெய்யுங். யதோ ச கோ² ததா³ ஸாட்ட²கத²ங் தேபிடகங் பொத்த²கேஸு ஆரோபிதங், ததோயேவ அனாக³தகாலேஸு ஸமயந்தராக³தஸுத்தானி தேஹி பொத்த²கேஹி ஸங்ஸந்தெ³த்வா படிக்கி²பிதுங் ஸுகரானி ஹொந்தி.
ததா² ஹி பா⁴தியராஜகாலே (524-552-பு³-வ) மஹாவிஹாரவாஸீனங் அப⁴யகி³ரிவாஸீஹி வினயே விவாதோ³ உப்பஜ்ஜி. ததா³ ராஜா தீ³க⁴காராயனங் நாம ப்³ராஹ்மணஜாதிகங் அமச்சங் தே²ரானங் ஸந்திகங் பேஸேஸி. ஸோ உபி⁴ன்னங் ஸுத்தங் ஸுத்வா வினிச்ச²யங் அதா³ஸி பாரா॰ அட்ட²॰ 2.384. ததா² வோஹாரகதிஸ்ஸராஜகாலே ச (758-780 பு³-வ) கோ³டா²ப⁴யராஜகாலே ச (797-810 பு³-வ) தே²ரவாதி³கா பொத்த²காரூள்ஹேன த⁴ம்மவினயேன ஸங்ஸந்தெ³த்வா அத⁴ம்மவாத³ங் படிக்கி²பிங்ஸு நிகாயஸங்க³ஹே 12-பிட்டே².