பா²ஹியமத்³தா⁴னக்கமகதா²
பா²ஹியந்னாமேன ஹி சினபி⁴க்கு²னா 956-பு³த்³த⁴வஸ்ஸே ஸீஹளதீ³பதோ ஸக்கதபா⁴ஸாரோபிதங் மஹிஸாஸகவினயபிடகஞ்ச தீ³கா⁴க³மோ ச ஸங்யுத்தாக³மோ ச ஸன்னிபாதபிடகஞ்ச அத்தனா ஸஹ சினரட்ட²மானீதந்தி தஸ்ஸ அத்³தா⁴னக்கமகதா²யங் மஹாயானபிடகஞ்சேவ தே²ரவாத³பிடகஞ்சா’’தி ச தேனேவ சினபி⁴க்கு²னா த³ஸ்ஸிதங்.
யஸ்மா பன அப⁴யகி³ரிவாஸினோ மஹாயானபிடகம்பி உக்³க³ண்ஹந்தி, தஸ்மா தஸ்மிங் விஹாரே மஹாயானிகானங் பதா⁴னாசரியபூ⁴தேஹி அஸ்ஸகோ⁴ஸனாக³ஜ்ஜுனேஹி கதக³ந்தா²பி ஸங்விஜ்ஜமானாயேவ ப⁴வெய்யுங், ததோயேவ தேஸங் நயஞ்ச நாமஞ்ச ஆசரியபு³த்³த⁴கோ⁴ஸத்தே²ரோபி அஞ்ஞேபி தங்காலிகா மஹாவிஹாரவாஸினோ ஸுதஸம்பன்னா தே²ரா ஜானெய்யுங்யேவ. அபிச த³க்கி²ணஇந்தி³யரட்டே² ஸமுத்³த³ஸமீபே கு³ந்தாஜனபதே³ நாகா³ரஜுனகொண்ட³ங் நாம டா²னமத்தி², யத்த² நாக³ஜ்ஜுனோ மஹாயானிகானங் பதா⁴னாசரியபூ⁴தோ வஸந்தோ பு³த்³த⁴ஸாஸனங் பதிட்டா²பேஸி. ஆசரியபு³த்³த⁴கோ⁴ஸஸ்ஸ ச தந்தே³ஸிகபா⁴வனிமித்தங் தி³ஸ்ஸதி, தங் பச்ச²தோ (33-பிட்டே²) ஆவிப⁴விஸ்ஸதி. தஸ்மாபி ஆசரியபு³த்³த⁴கோ⁴ஸத்தே²ரோ நாக³ஜ்ஜுனஸ்ஸ ச அஸ்ஸகோ⁴ஸஸ்ஸ ச நயஞ்ச நாமஞ்ச ஜானெய்யயேவாதி ஸக்கா அனுமினிதுங்.
ஜானதோயேவ பன தேஸங் நயஸ்ஸ வா நாமஸ்ஸ வா அத்தனோ அட்ட²கதா²யமப்பகாஸனங் தேஸங் நிகாயந்தரபா⁴வதோயேவஸ்ஸ. ததா² ஹி தேஸங் அஸ்ஸகோ⁴ஸனாக³ஜ்ஜுனானங் அஸ்ஸகோ⁴ஸோ ஸப்³ப³த்தி²வாத³க³ணே பரியாபன்னோ, நாக³ஜ்ஜுனோ ச மஹாஸங்கி⁴க-சேதியவாதி³க³ணாதீ³ஹி ஜாதே மஹாயானநிகாயே பரியாபன்னோ, ‘‘மஹாவிஹாரவாஸீனங் வங்ஸாலங்காரபூ⁴தேனா’’தி. தஸ்மா ‘‘ஆசரியபு³த்³த⁴கோ⁴ஸோ தேஸங் நயங் ஜானந்தோயேவ அத்தனோ க³ந்தே²ஸு நிகாயந்தரஸமயேஹி அஸம்மிஸ்ஸனத்த²ங் நப்பகாஸேஸீ’’தி வேதி³தப்³ப³ங்.
எத்தாவதா ச யானி ‘‘போ³தி⁴மண்ட³ஸமீபம்ஹி, ஜாதோ ப்³ராஹ்மணமாணவோ’’திஆதி³னா வுத்தஸ்ஸ மஹாவங்ஸவசனஸ்ஸ விசாரணமுகே²ன ஆசரியபு³த்³த⁴கோ⁴ஸஸ்ஸ வம்ப⁴னவசனானி த⁴ம்மானந்த³கோஸம்பி³னா வுத்தானி, தானி அமூலகபா⁴வேன அனுவிசாரிதானி. ததா²பி ‘‘ஆசரியபு³த்³த⁴கோ⁴ஸோ போ³தி⁴மண்ட³ஸமீபே ஜாதோ’’தி ஏதங் பன அத்த²ங் ஸாதே⁴துங் த³ள்ஹகாரணங் ந தி³ஸ்ஸதேவ ட²பெத்வா தங் மஹாவங்ஸவசனங், யம்பி பு³த்³த⁴கோ⁴ஸுப்பத்தியங் வுத்தங், தம்பி மஹாவங்ஸமேவ நிஸ்ஸாய வுத்தவசனத்தா ந த³ள்ஹகாரணங் ஹோதீதி.